رواية سواد الاثمد الفصل الخامس والعشرون بقلم نورس
مدلي ايده خازرني :- گربي جاي
عين عليه وعين على مآب اللي واگف بالباب بصف الضابط يباوعلي بنظرات حسسني وكأني بنت ليل
الرجال من شافني متحركت من مكاني تقدم جرني من عكسي قربني عليه وگفني يمه يباوعلي من فوك ليجوة
تيم :- بيج شي
رجفة جسمي صرت مدا أگدر أسيطر عليها رعشة قوية
الضابط الوياهم صاح بالبنات :- جوة يلا
مشن اثنينهن وحدة لازمة بالثانية يردن يعبرن الباب
وحدة منهن عثرت اجت توگع
الضابط صاح من وراها :- چبح كون
تطافرن بسرعة طلعن من الغرفة نزلن ليجوة
قبل ليندار گال :- سابقكم جوة أبو علي
عاف الغرفة ونزل
رجع باوعلي أشرلي :- يلا امشينا
مآب :- أبو علي دحك لبسها مخلع هاي هيج تنزل جدامهم وخلك الله كلها هساع واگفة جوة
انتبه على لبسي واستغفر
تيم :- اووو هاي وين جانتلي
اندار على مآب :- انزع سترتك يول
نزع سترته وشمرها عليه لگفها نكتها يباوع بيها واندارلي
مدلياها :- هاج اگضبي إلبسيها
أخذتها منه ايدي ترجف لبستها على ملابسي
رفعت راسي باوعتله ركزت بوجهه يباوع بالغرفة معاجبه الوضع وترجع عيونه تنصب عليَّ
- يولي السترة سديها
باوعت لنفسي وباوعتله مفهمت قصده
أشرلي بعيونه على جهة صدري دنگت لزمت السترة بسرعة سديتها بيدي انكتمت وجهي أحسه دخن
وهو دار وجهه بسرعة وكل شوي ينافخ ويستغفر
مشى للباب :- مآب دقيقتين جيب البنية وتعال وراي نازل گبلكم تا أسويلها مجال تفوت منهم حوشهم مليان ازلام
طلع ومآب يباوعلي ونظراته هي هي
مآب :- كونج وحدة من بناتنا وإلي سلطة عليج جان شفت شغلي وياج يا يابة متحلفلج وحك الله
دنگت لازمة بالسترة حيل أعصر بيها
نتر :- يلا خاتون خلصينا لو ينرادلج عزيمة
حجاها بنتر ونفور وسوالي مجال حتى أطلع مشيت من يمه وقبل لا أعبر لزم ايدي رجعني لمكاني
گال :- هسع تنزلين تمشين بوجهج عدل وگبل للباب تصعدين بالسيارة عينج متشيليها من الگاع
نترت ايده مني بلا ما أحجي بس خنگتي مبينة بوجهي
صرت أمشي وهو وراي نزلنا جوة خلاني وراه
صار الرجال نفسه گدامنا أشرلنا بيده حتى نكمل مشي طلعنا البيت سيارتهم طبك بالباب وراها دوريات شرطة
فتحلي باب السيارة صعدت وسده ورجعلهم جوة
حديقتهم جانت متروسة ضباط وفاطمة بنصهم واگفة تتجادل ويَّ الضابط وبيدها أوراق صوتها جان عالي
أباوع للشارع ناس طالعة من بيوتها تباوع بفضول للي يصير وعينها عالبيت ودوريات الشرطة الواگفة
صوت أنفاسي عالي عيوني صارت تحرگني وبس تدمع
عصرت ايدي حيل وباوعتها جانت لهاية ريحانة بيدي
متحملت نزلت دموعي بسرعة وللحال اللي وصلتله ووصلت روحي إله لوحدي وبنتي ما أدري بيها وين
جنت رايدة أخلص أي بس مو بهالطريقة
مو يطلعوني من بيت مشبوه وعليه سمعة جايفة مثل شغل أصحابه مجنت رايدة أوصل هالمواصيل
مجنت فرحانة من لگوني بگد مجنت مستعرة من نفسي وخجلانة من عيون الناس عليَّ واني دا أطلع من البيت
فركت وجهي ومسحت دموعي ورجعت تنزل
ضميت ايدي لصدري خليت راسي عالجامة عيني متشكلة عالبيت لحظات وشفتهم ديطلعون
فاطمة والوياها جرجروهم للدوريات مآب والرجال الوياه طلعوا وراهم وگفوا قريب من السيارة
صوتهم رغم جان عالي بس يا دوب يوصلني
ظهره جان عليَّ ساد الرؤية عني لابس مدني بنطرون أسود وقميص أبيض شعره خفيف حيل وشواربه هيئته
جان متصورلي انه ضابط
أسمعه يسولف ويَّ اثنين من الضباط واگفين وياه
- ترى حتى البنية الوياكم المفروض ويَّ البقية للتوقيف
تيم :- لا لا أبد ولا تسولف بيها أنا حاجيلك ومفهمك الوضعية شلون صايرة انسالي هالسالفة
- مترهم والله الأمر اجانا من فوك
- أوس دبرها من يمك رحمة لأهلك
عز الدين :- هذا هو اخذ البنية وتوكل أبو علي الباجر اني أجيب النقيب ونجيكم للبيت
ضحك الضابط :- النوب
- دمشيها يمعود بس اليوم والباجر إذا تريد يجيبوها للمركز
سكت شوي وگال :- والله راح تورطوني انتوا
تسالموا وانداروا لسياراتهم صعدوا اثنينهم بالصدر
مآب يسوق شغل السيارة ومشت مبتعدة عن البيت واني عيني عليه الشرطة بعدها واگفة تارسة الباب
تيم :- عدت بابا عدت لا تخافين ولا تشيلين هم
انداريت بسرعة عليه يباوعلي بالمراية الأمامية
انطويت على روحي أكثر ودرت عيوني عنه أتلافى أباوع لوجوههم حتى لا أشوف نظراتهم إلي
تنهد يحجي لمآب :- ماكو النوب حتى متحجي
- إنطيها مجال منا لساعة إذا ما خلتك عتفر بأذانك من لسانها والمرادد تعال وعاتبني
- اييييه هي تبين لبعدين ما يضل شي على حالو
فعلًا ميضل شي على حاله
شلون راح أنكر وشلون أبرّي نفسي گدامهم وهو شافني داخلة عليهم بيدي صينية المشروب بهذا لبسي الخزي
نزلت دموعي دايرة وجهي للجامة
مكيفة بروحج لج بان فايتة عليهم تضيفيهم ومنتظرة واحد منهم تحلين بعينه حتى يسحبج من ايدج لوحدة من الغرف وين جان عقلج من طاوعتي عمتج وستار شجنتي متوقعة منهم
دموعي موگفت ألوم بنفسي وآكل بروحي عالسويته
مآب :- عش تبجين
انداروا اثنينهم نفس اللحظة جريت نفس وضليت ساكتة دموعي تنزل بلا صوت :- عوفها لحالها
- شعوفها أبو علي لا تخبلني من ساعة ما ركبت السيارة وهي على هالحال لا ترضى تحجي ولا تجاوب اليسألها
- عينك بدربك مآب لا تخليني أعيد الحجي
- والله ما أعوفها
اندارلي صاح :- احجي لج شوداج لذاك البيت بلا دموع العيارات هاي حافظ سوالف البرابيك المثلج
تيم :- لازم معاشرهن
سكت للحظات يسوق ويرجع يباوعله :- صدك تحجي
- انكتم وسد حلگك لا تخليني أهينك حسابي وياك بعدين ضامها إلك بس اصبرلي
سكت بعد محجى بس عيونه جانت تسولف يسوق سريع فتح الجامة ورثله جگارة يحرك روحه بيها
بنص الطريق وگله :- مآب استدار لتطلع لبيت خالي
خفف السرعة :- عجل وين
- اطلع لشقتك
- عش هيج
- يول نفوت عليهم بهالساع من الليل خالي بس يدحك حال البنية ألف سالفة وسالفة تصير براسو وانا ما منطيه علم بالصار خليه منا للصبح تا أحجي وياه وآخذها لبيتو
- ولو عرف وما عجبو الصار
- هو اول وتالي راح يعرف بس مو وكتها هسه ماريد حجاية زايدة ناقصة تمس البنية وهي بهالحال ما نعرف شصار ما صار وياها وانتَ تعرف خالي أعصابو براسو
- هذا هو اللي تشوفو
غير طريقه ورحنا لشقة مآب
وصلنا هناك نزلنا وقفل السيارة هذا الرجال الأگرع ضل يخابر أشرلنا نروح ومشى مسافة مبتعد عنا
ومآب أخذني وصعدنا للشقة فتح الباب وسوالي مجال
أول مدخلت خطف بذاكرتي أول فوتة إلي لهنا
باوعت للصالة داير مدايري الشقة فارغة!..
انداريتله :- لعد ماما وين
تجاهلني شمر سويچه عالتخم واني أحاجيه
شهربان :- مآب دا أحجي وياك وين ماما
باوعلي :- مو هنا
رجفت شفايفي :- لعد لويش جبتني لشقتك
- شبيج بابا انتِ تغنين ما سمعتي تيم شگال بالسيارة
- يا تيم شنو شگال
ضل يباوعلي وساكت هز ايده ومشى عني
لزمت راسي نزلت دموعي بحيرة من أمري
همست :- يا ربي شدا يصيرلي
مسحت دموعي من على خدي ودا أمشي للباب أريد أطلع من الشقة انلزمت ايدي وانجريت ليجوة حيل
باوعتله :- وخرر شتريد أريد أروح لماما شكو جايبني لهنا
ما سمعني جرني لجوة الشقة گوة عني واني أتلاوى وياه
دفعني للتخم گعدني صحت بيه :- شبيك انتَ شبييييك دا أگلك وديني لأمي ماريييد أبقى بشقتك
حط سبابته على حلگه فاتح عيونه خازرني
مآب :- اششششش تاما أطر راسج بالحايط وأحسب الله ما خلقج ترى بالگوات گاضب روحي منج
گمت دا أمشي لزمني من عكسي جرني وگفني گدامه
نتر :- انا ويامن أحجي
- عوف ايدي
- بان ضبي لسانج بحلگج ولا تفتحينو ترى حتى صوتج ما طايق أسمعو وحك الخلقج لا تخليني أتسودن عليج ترى عملتج متتسولف
گزيت على أسناني :- ممسوية شي سمعت لو لا ومالك حق تحاسبني عووف ايدي يلا
زاد بضغطه على ايدي وكأنه يعاندني
- شردتج من ز**** رجلج شتسميها ؟ .. گعدتج عند البربوك فاطمة شنو معناها ؟ .. منين تعرفيها انتِ من شوكت عندها واحنا مالنا علم نافرين ما عنعرف ليلنا من صبحنا تاليتج يم الكاولية فاطمة تشتغل عليج
ما حطيتي امج اختج جدامج ما حسبتي حساب لسمعتهن .. عيون أبوج ما عرضن گبالج وانتِ گاعدة بنص الگ حاب وتشتغلين شغلتهن .. لجج وحك القرآن بنفسي أگضبج تا أطلع بروحج وهم ما يفوخ گلبي
يعت بأيدي حيل دموعي تنزل طول ما هو يحجي
الأكثر من وجع ايدي جان كلامه اللي جان مثل سچ ين بخاصرتي حكم عليَّ وكأن اني اللي اختاريت هالشي
خليت ايدي فوك ايده :- مآب ايدي دتأذيني وخر
- والله لو إلي سلطة عليج دقيقة ما أبقيج تشمين الهوى لأن حرام بيج كلشي توقعت منج ثقي بالله إلا هاي
شهگت :- ايدي ولك ايييدي
صاح :- طبج وجع فوگ وجع
ويَّ صيحته اندفع من كتفه عني وصار الرجال الأگرع نفسه گبالي دفعه عني وصار بيني وبينه
تيم الله :- ول هين هين وين گاعدين شلون تگضبها هالشكل
- طبها مرض وحدة ساقطة حالها حال الساقطات الگاعدات بذاك البيت
صاح بيه :- لك انتِ شو صاير متحترم مو واگف جدامك
سكت ومشى گعد عالتخم صاير أعصاب
رجع گله :- هاه وتديرلي ظهرك وانا أحاجيك
- لا محشوم بس رادت تطلع من الشقة وفارت أعصابي عليها عنودية ما عتنرد
ضليت لازمة ايدي متأذية وصوت شهگاتي صار عالي
اندارلي يباوعلي عاقد حاجبه انتبه لأيدي
- شبلاها ايدج
ضليت ساكتة بس دموعي تجر
رد سألني :- ماذيتج حيل
- اخذوني لماما أريد أمي ولج ماما الحگيني
أحجي وبين كلمة والثانية أشهك غصب عني
اندار على مآب صاح بيه :- شعملت إلها يالثور يالأمعة
- حتى ما گضبتها قوي عيارة عتمثل تاما أحد يحاجيها
من حجى هيج تخبل عليه راحله لزمه من ياخته گومه
- ثق وحك عديلة مريم ايدها لو طلعت مخلوعة أجي أتريك بيك وجه الصبح
راد يحجي صاح :- ولا چلمة طايح الحظ
عافه بنترة وباوع للشقة
رد صاح :- انطيني سويچك مال سيارة
- عش وين تريـ....
قاطعه :- تنچب وتسكت لا أدوس بحلگك السويچ وين
ضاج حيل مشى للتخم شاله المفتاح واجى انطاه إله
جره من ايده بدون ليباوع بوجهه واندارلي
- امشينا يلا
باوعت لوجهه من بين دموعي :- وين ماخذني
صاح متنرفز :- يول لأمج غير گلتي اخذوني إلها
مسحت دموعي بسرعة ومشيت گدامه للباب وگفت أباوعله قبل ليطلع اندار لمآب مرة أخيرة
گله :- أودي البنية وأردلك هناية وأعلمك شلون تنطيني ظهرك
دنك راسه يورث بجگارته ورد :- حياك هلا بيك
طلع وأشرلي بيده نزلنا الشقة هو يمشي واني وراه صعدنا السيارة گال :- بابج
باوعتله :- ها
- يول بابج سديه زين
رجعت فتحته وسديته
دار وجهه استغفر :- يول حيل شبلاج فاهية خايفة عليه
فتحته وطبگته بكل قوتي
تيم :- حيل يستاهل دخليه ياكلها
باوعتله :- ها
رخت ملامحه ودار وجهه عني ما أعرف شيحجي
حرك السيارة ومشينا
الدنيا ظلمة ورغم الوقت متأخر بس الناس تروج
دايخة حيل راسي مدا أگدر أشيله من الجامة مغمضة عيوني السيارة جوها هادئ وهو هم ساكت محجى شي
ما أدري بروحي شلون غفيت وفزيت بسرعة
لگيته على وضعه عينه بالطريق انتبهلي أفرك بعيوني
- لا هيج بابا مو زين
باوعت للشارع :- شوكت نوصل
- مسافة الطريق مو بعاد
- من شوكت ماما بالغربية
من حجيت هيج اندار بسرعة عليَّ باوعلي بنظرة مفهمتها ورجع عينه عالطريق هنا نغزني گلبي مرتاحيت
باوعت للشارع أظلم يخوف وناس قليلة
اني شلون غبية هيج
حتى شكله مريب وما أعرفه ولا أدري وين ماخذني شلون أصعد وياه لو باقية يم مآب مو أشرفلي
شهربان :- وگف السيارة
باوعلي :- شبلاج لج
- دا أگلك وگف السيارة لا أشمر روحي هسه
خزرني حيل :- لج ترى البية مكفيني إذا ما سديتي حلگج انا أشيلج أشمرج من الجامة
يخوزر عباله راح أخاف مديت ايدي ليدة الباب ليش ما يسبقني ويقفلها من جهته تخبلت گمت أصيح عليه
- ديلا كونج بنت أمج وأبوج سويها
دفرت الچكمچة برجلي ودموعي تنزل :- افتح الباب يالچلب كلكم حيوانات
- رحم الله والديج هي هاي مجازاة الركضة وراج
- إذا انتَ زلمة افتح الباب
- ياهو گلج انا زلمة مو زلمة يابا انا حرمة متنكرة
أباوعله يحجي بكل برود بدون حتى ليكلف روحه ويندار عليَّ ديلعب بأعصابي
باوعت لأيده عالستيرن مديت نفسي وعضيته
فز بسرعة ورفع ايده وخرني عنه
باوعلي فاتح عيونه كل وسعهن خازرني
صاح :- زمالة جان سويتيلنا قدر
گوة لزم روحه وما سطرني براشدي جابني ويَّ الباب متت خوف الطريق كله لاطشة روحي بالباب
لحد مشفته دخل بشارع أعرفه وحافظته
حجيت من بين دموعي :- جايبني لبيت عمو فدار
- عجل وين محسبة آخذج
- ماريد أجي هنا دا أگلك اخذني لماما يا ربي ليش مجاي تفتهمون
انهاريت بالبجي وگف السيارة ترس گبال باب البيت
طفاها وگال :- انزلي
حجاها ونزل قبلي اجى من جهتي فتح الباب
- حدري جاي
- ما
- يول بلا سوالف المزعط انزلي خلصيني
- ما هسه تاخذني للغربية شسوي جايبني لبيت فدار
- مو بس خالي حتى حرمتو هين لتخافين فقير ما ياكل بشر
دفرت الچكمچة :- لك بابا لتضحك لتضحككك
- حيل اكلها بخاشوگة مزنجرة مآب ربج ما جبتج بسيارتي
متت بجي وهو واگفلي لازم الباب متخصر
رفعت راسي خازرته مسحت دموعي ونزلت أتوعدله
- هسه بس أفوت أشكيكم لعمو فدار أخليه يطيح حظكم اثنينكم انتَ وذاك الچلب
- هو انتِ كلها عندج چلاب بس انتِ الصاحية
حجاها وباوع لأيده العضيته منها
مشيت للباب رجلي حافية دگيته باد حيلي گعدت للگاع دموعي تنزل لامة رجلي لصدري مجرشة من البرد
اجى باوعلي :- سوادين
- اخذني لماما يلا والله إلا أگول لفدار عليك
- لا حبابة لا تگليلو والله ما سويت شي
كلما يحجي هيج أزيد بالبجي سمعته يتنهد
ردد :- لا حول ولا قوة إلا بالله هسع انا هاي وين جانتلي
گعد ركبة ونص گبالي :- گومي بابا گومي هسع حلوة هيج گعدتج بالشارع
- ما ما أفوت إلا تاخذوني لأمي
- هي أمج هين
رفعت عيوني باوعتله :- كذاب
- وداعة بنتي ومعزتها بگلبي
- گول والله
- يول حزورة شنو شو دگومي
- ما
أثناء مدا يحجي يحاول يقنعني يريدني أگوم انفتح الباب وطلع عمو فدار من الباب باوع شافنا اثنينا بالگاع
فتح عيونه متفاجئ وقبل ليحجي سبقه الأگيرع
رفع ايده وگله :- الله بالخير يابا تستقبلون خطار
فدار :- ول شجابكم انتوا هاي وين جانت
طلع برة وگفوا اثنينهم يباوعولي :- شبلاكم متحجون
حك طرف حاجبه :- انا أفهمك سالفتها خالي بس عطيني مجال تاشوف هالطرگاعة
اندارلي :- گومي يولي
- ما
صاح فدار :- شنو الما گومي لج أمج جوة صار شهور روحها لايجة عليج ما ضلت علة ما انعلت بيها وهي تدورج امشي جدامي فوتي جوة يلا
من حجى هيج عيوني انملت دموع يعني مو كذب
ماما هنا جوة خليت ايدي للگاع ودا أگوم مسيطرت أحس جسمي راخي مگاعد يعيني مدلي ايده عمو فدار گومني وضل لازمني موگفني
دا نمشي اجانا صوتها من جوة :- فدار شكو شديصير
أحس گلبي راح يطلع من مكانه گد مجانت دگته سريعة روحي وحواسي كلها جانت متلهفة لشوفتها بس أطرافي جانت مدا تعيني أمشي وأروح يمنى ويسرى
لحد موصلت الباب لزمته صارت بوجهي دتطلع
باوعتلي من فوك ليجوة ممستوعبة شمرت روحي بحضنها صرت أشهك بجي لازمة بيها حيل
تلزم بوجهي تباوعلي عيونها غورگت صوتها بيه غصة
شدن :- يمة هاي بنتي ولكم هاي بنتي يا عالم بان ماما شو باوعيلي اي والله هاي بان فدار شوف بنتي رجعتلي والله هيانها گبالي
شمتني :- يمة يا ريحتها هاي ريحة بنتي بان أعرفها
تبوس بوجهي تحضني تشمني احتارت شتسوي
فدار :- فوتن جوة يولي لا هنا بالشارع
فتنا للحديقة رجلينا بادت گوة مسيطرات عالوگفة گعدت عالثيل ما حديقة واني بحضنها لازمة ايدها حيل
أخذت ايدي رفعتها شمتها حيل وباست باطن ايدي
رفعت راسها :- وين لگيتوها شوكت هاي ليش مالي خبر
تيم الله :- عطيتج چلمة بنتج تردلج لحضنج
فتحت عيني صار بوجهي واگف على مسافة يباوعلي
دار وجهه لخاله :- خالي من رخصتك رايدك بحجايتين بيناتنا برة
صارت عيني على فدار اللي حاله انگلب بشوفتنا الحاجب مطبوك ومركز بملابسي واضح معاجبه الوضع
أخذ خاله ومشوا طلعوا برة البيت
ايدها تمررها على ظهري دنگت راسها شمتني من شعري
- انتِ بحضني صدك والله ممصدگة شسويتي بحالي بان شسويتي بحالي يماما وراج أموت باليوم ألف موتة حتى أحصل خبر عنج وين ما أروح واسأل عليج واحد يشمرني عالثاني عشت بنارين نار عبد ونار سجودة ها كتلوها ذبحوها أخذوا البنية وباعوها مثل بيعتج أول مرة لعبد مضلت حسبة مصارت براسي
طول ما هي تحجي اني دموعي تصب وأشهك
رديت :- أخذوها مني ماما أخذوا ريحانتي بنتي راحت مني ايدي ملحگت أشتمها جروها جر من ايدي والله مشبعت منها والله شگد صحت شگد توسلت وبجيت محد دارلي بال كلهم انطوني ظهرهم
ضلت ساكتة تسمعلي أسمع بس صوت جر النفس مالتها
فاتوا اثنينهم جوة فدار مگلوب وجهه باوعلي وتنهد
گال :- گومن يولن فوتن جوة الجو بارد گومي أبوية شدن فوتي البنية
شدن :- شصاير فدار ليش مدا تحجولي
- شصاير قابل ما صاير شي امشي فوتي جوة گتلج
- أحلفك بروح موتاك تگلي شصاير
جزعت روحه صاح :- يابا ضام عليج قابل عش تخليني أطلع عن طوري
باوعت لهذا الأگرع :- تيم
ضل ساكت ودار وجهه تجاهلوها اثنينهم
فدار :- الباجر يمتى يجي
- ما أدري جائز للظهر هيج گتلو البنية تعبانة عترتاح
- زين تسوي
- بس خالي مثل ما وصيتك لحد يفتح وياها السالفة وين وليش مو وكتها كلش خلي حجيها يصير گبال النقيب تانخلص من روحة المركز
- ربك أوس لازم السالفة مو غيرو إلا جان جرجروها ويَّ الجماعة
- عدت يربك
شدن :- فدار يا مركز يا نقيب انتوا ليش تخلوني على أعصابي بنتي شبيها
- ما بيها شي انا بعدين أفهمج السالفة
باوع الأگرع لساعته :- يلا انا أترخص بعد
- وين
- راد لشقة مآب وراي حساب وياه
- هذا السز من تشوفو وصيه لا يخليني أدحك خلقتو الزفرة ما دامني هين تاما أطلع بروحو
باوعلي مرة أخيرة رفع ايده :- يلا أودعناكم
سلم وراح خاله طلع وراه أسمع صوت السيارة تبتعد
سد الباب واجانا گال :- وتالي ولج گومي البنية عاد هسع عاجبج منومتها بهالبرد
لزمتني من جتفي :- گومي ماما حبيبتي بردتي شوفي دترجفين يلا يعيوني
گومتني من الگاع دخلتني جوة وفدار ورانا يسدسد بالبيبان فتنا للصالة گعدت عالتخم رفعت رجلي مددت
دا تمشي فزيت لزمت ايدها :- لتعوفيني
- هياني يمج والله
گعدت للگاع خلت راسها يم راسي وفدار يباوعلنا
گلها :- تتكسر هين لو مدخلتها الغرفة
- مدتشوفها خليني هسه أرتبلها وحدة من الغرف تنام بيها
مشى عنا البيت هادئ حيل ودافي مخطر ببالي اسأل أي سؤال لو اخلي براسي إحتمالات للوضع
اني هنا وماما يمي جان هالشي كفيل ينسيني كُلشي
غفيت بمكاني ما أدري بنفسي لهناك وفزيت من نومتي حاطة ايدي بين رجلي ميتة برد ماما مو يمي
فزيت بسرعة أباوع للمكان وأصيح بأسمها
طلعت من الغرفة اجتني :- اسم الله أمي شبيج
- مو گتلج لتعوفيني
- معايفتج والله هياني
حاضنتها ولازمة بيها حيل :- شو أشوف وجهج
لزمت وجهي رفعته مدت ايدها مسحت دموعي
- لتبجين يماما والله مرايحة شجاج متگوليلي
گومتني :- شو گومي نظفتلج الغرفة تكسرتي من هالنومة
أخذتني للغرفة اول مدخلت كفختني ريحة هادئة جانت ريحتها طيبة غرفة نظيفة وفراش دافي أكثر شي جنت محتاجته بهاللحظة
گعدت عالجرباية گالت :- متغسلين جسمج تبدلين هاي ملابسج شوفي رجليج كلها تراب
أشرتلها بيدي لا ومددت جرت حسرة ونزعتني السترة غطتني لزمت ايدي :- بردانة حبيبتي أغطيج بعد
- اي
جابلتي غطى لاخ غطتني بيه باوعتلها :- ابقي يمي
- هو اني يمج
ضلت ملازمتني لحد منمت
گعدت بنص الليل أطرافي صايرة ثلج رغم متدثرة زين بالأغطية جسمي يرجف يررجف فتحت عيني بثگل
ضوة خفيف معلوك بالغرفة عيني صارت على ماما
گاعدة گبالي مادة سجادة لابسة إيزار الصلاة وبيدها قرآن دتقرا بيه بصوت خافت فزيت من مكاني
گمت يمها گعدت خليت راسي بحضنها سدت القرآن وباسته خلته من ايدها ومدت ايدها توخر شعري
شدن :- شبيج أمي شلون فزيتي وگعتي گلبي
باوعت لوجها وصارت دموعي تصب احتارت بأمري تسألني شبيج ما أرد ليش تبجين ما أدري
لحد مهدأت وگعدت لحيلي صارت گبالي مراية عمودية
اجت عيني على حالي الفستان اللي لابسته جهة صدري بارزة من المقدمة مكياجي السايح على وجهي والكحل اللي ترس جوة عيوني سواد لو شعري الفوضوي
من شفت شكلي استحقرت روحي مو شلون مجان هاي مو اني دا أشوف وحدة رخيصة گدامي بأنعكاس المراية
انهاريت بجي بحضنها وأشكيلها :- سووني بنت ليل ماما شافوني بهالشكل لعد شگد رخيصة اني شافني واني دا أفوت عليهم والصالة متروسة زلم ماما لو تشوفنيه شلون جان ديباوعلي والله تمنيت روحي ميتة ولا واگفة گباله بهالمنظر
صرت أحجي وأضرب برجلي :- وحدة رخيصة خسرت نفسي وخسرت بنتي
وهي تلزم بأيدي :- ولج أمي شجاج لتگولين على روحج هيج
لزمت صدري أشهك فحطانة من البجي :- گلبي ماما ديوجعني
- اسم الله على گلبج من الوجع
- راح أموت
- لج بان والله أذيتيني لتحجين هيج فدوة لگلبج يماما
- شوفي وسخة قذرة اني أريد أبدل ماريد هاي الملابس
- هسه أجيبلج غيرهم
- أريد أسبح
جهزتلي الحمام ودخلتني هي وياي نزعت الفستان جانت تحجي سكتت كاسرت المَي خلته فاتر بيه شوي حرارة ايدها تمررها على كيفها على جسمي
صرت أون بوجع كلما تمد ايدها لمكان مسمعت صوتها بعد بس أحس بيها دا تبجي من جرة النفس
كملت وانطتني ملابس جديدة ساعدتني ألبسهم وطلعت گبالها بيدها المشط تمشط شعري
أحس بروحي مغيبة بغير عالم بحيث حتى ما أدري بروحي واني أحجيلها على مواقف صارت بيني وبين عبد جان يضربني بيها وعلى أتفه الأسباب
لو تشوف مكان حرك لو أثر ضربة باقي موجود تسألني عليه واني أجاوبها لمتلي شعري وخلت گتر ورجعتني للفراش غطتني لزمت ايدي مدت ايدها لجبهتي
گالت :- حرارتج ممرتفعة لويش هيج دترجفين
- باردة
اجان صوت فدار واگف بالباب :- ها شلون صارت
- ما أدري فدار منتهية البنية دخلت وياها أسبحها منين ما ألزمها تصرخ من الوجع وعلى هالرجفة هاي
- حتى الغرفة دافية خاف مريضة دحگي حرارتها
- قستها ممرتفعة
- عجل هاي ضاربتها سخونة بعظامها دفي رجليها زين
راحت جابت جورايب لبستني وفدار جاب التدفئة الكهربائية :- هاي خليها هين تا تدفي الغرفة عليجن
باوعلنا مرة أخيرة :- اندهيلي إذا احتاجيتي شي
طلع وسد الباب طفت الأضوية عافت التيبلام مشتغل واجت مددت يمي جرتني لحضنها باست راسي
على قربها وريحتها ارتاحيت
الصبح گعدتني حتى أگوم أتريك گوة جبرتني أعوف نومتي غسلت وجهي وأخذتني للمطبخ گعدنا عالطاولة
فدار ماكو بس اني وياها بالبيت
صبت الچاي خلت الكوب گدامي :- يلا مدي ايدج
شهربان :- ما أشتهي ماما
- شوفي وجهج شلون أصفر
- والله ما أشتهي دايخة حيل
- غير مماكلة يا عيني يلا بان بس شوية لخاطري
گوة جبرتني آكل من ايدها أكلت لگمتين وأشرتلها بس
- شبعت
- هو شأكلتي وشبعتي غير تاكلين يا أمي دتتنشطين شوي
- أريد أنام
- النوب
گمت مشيت مددت عالتخم اجت وراي شافتني
- شو رجعتي نمتي هنا متبتي من هالنومة تكسرج
- مرتاحة خليني
تنهدت بحسرة ومشت جابت غطة غطتني بيه
فتحت عيوني گعدت لحيلي لگيت نفسي عالجرباية باوعت نورجان نايمة بصفي عقدت حاجبي
عيوني صارت عالغرفة هاي غرفتنا
گمت طلعت وأسمع صوت ماما تصيح بأسمي
- وتالي وياج بان متجوزين من هالطبع كم مرة بمرة گتلج لتطلعين حافية وتفوتين توصخين البيت برجلج
ابتعدت عن غرفتنا ومشيت بالممر نهايته أخذتني لغرفتهم وگفت بالباب كاتمة أنفاسي واني أشوفه وهو يشد الحبل بالسگف خلاه برگبته الطبلة جواه
صحت :- بابا
اندار وبلحظة ما اندار عليَّ فلتت رجله من الطبلة
شهگت وفزيت من نومتي عرگانة أتلمس بمكاني وأباوع داير مدايري بعدني على نومة التخم وهذا نفسه الغطة
جريت نفس ودنگت راسي بين ادية
سمعت صوت زلم جاي من الأستقبال جوة اجت ماما
شافت حالي :- شو عرگانة شبيج
- حلم ماما نفسه الحلم
- سودة عليَّ گومي غسلي وجهج ارتاحي
انتبهت للصوت سألتها :- منو هنا
- خابرني فدار الصبح گال صدر الدين وصديقه الضابط حيجوون لهنا يحجون وياج وقبل شوي جابهم واجوا
- شيحجون ما عندي شي أگوله خلي يرحون
- اهدأي شبيج
- ماما دا أگلج ما عندي شي أحجيه إلهم ما أدري شي
- هو كله خلك إجراء روتيني مثل ما استجوبوا البنات بالمركز يسألونج كم سؤال وفضت راحت الضابط يصير صديق الولد ربج مسهلها عليهم وقبل يجي لهنا
- شيسألوني يعني
- فدار گال علمود البيت الجنتي بيه وشغلهم مو شي ثاني اللي تعرفينه گوليه انتِ ممسوية شي
طلع فدار رادوني جوة غسلت وجهي وعدلت شعري متخربط من النوم شافني عمو فدار مقبل أطلع
اندار على ماما :- كل عگلج مطلعتها بهالملابس هاي
شدن :- شبيهم ترى مستورات وحتى عريض انطيتها من العندي
- متطلعلهم بهالشكل انطيها غير شي تلبسو وخل تلحگني بساع
حجاها ومشى :- اووو شگد يدقق
مشت لغرفتها واجتني بيدها عباية خليجية مفتوحة
- البسيها هاي ماما فوك ملابسج بس خلصيني من لسانه
أخذتها منها لبستها باوعت بوجهه :- عاقدين مو
صارت عينها بعيني وسكتت اكتفت تهز راسها وصلني الجواب عدلتلي العباية على ملابسي ومشيت للأستقبال جان واگفلي أخذني وفتنا عليهم
گعدت بدون سلام صرت گبالهم وعمو فدار بصفي وعلى جهة شفته نفسه الأگرع گاعد على تخم منفرد
موبايله بيده مدنك عليه بس رافع طرف عينه بأتجاهي
توترت من الجو الأستقبال كلها دخان وريحة جگاير
الضابط گبالي گلي :- شلونج عمو
هزيت راسي بمعنى زينة أخذوا معلوماتي أسمي مواليدي وسألوني عالبيت وفاطمة وشغلها
جنت مترددة بالبداية وهم حسوا عليَّ
گلي :- خليج مرتاحة واحجي اللي تعرفينه أبد لتتوترين
حجيتلهم كل الشفته والعرفته خلال الأسبوعين العشتهن بذاك البيت جبيرتهم اسمها فطومة يصيحولها عمة
عندها سمسارة تجيبلها زباين يصيحولها ام أحمد تستلم 30 ألف تاخذ 10 من كل زبون والباقي تنطيه لأم البيت اللي فاتحته دعارة البنية الجديدة تخليها ترتاح 10 ايام يلا تطلعها وتعلمها عالشغل والشخص اللي يجي شايل سلاح ينسحب منه لحد ما يخلص ويتونس يلا يرجعله البيت كبير بيه 8 غرف متوزعات فوك وجوة والعرفته مو بس هذا شغلهم حتى عندهم أطفال يشتغلون بيهم جداوة بالزوراء ويفتر عليهم واحد بالبايسكل نهاية اليوم ياخذ منهم الفلوس أول بأول
اندار الضابط لذاك الأگرع
نقيب أوس :- تدري من البارحة لحد الصبح بالـ14 بنية گعدت گبالي ولا وحدة انطتني حجاية من الگالته هسه
فدار :- ديلا استلم
- واليكتلك متگدر تفتح حلگك ما طلع الصبح إلا وجماعتهم الفوك مخابرين عليهم طلعوهم تحجي تبتلي على عمرك تسكت يكتلك القهر
تيم الله :- هسع انتَ اتركنا من هذا كلو هذول شغلتهم منتهية وايدهم واصلة متعودين عالشغلة إلا الأخت هين شوداها عليهم شوصلها لهناك
باوعتله گتله :- عمتي ودتني عليها
- والتتسمى فاطمة من سائلينها عليج تگول زلمتها شايفج بالشارع وعارض عليج ترحين للبيت وماخذج إلها برضاتج
- لا كذابة عمتي سجودة ودتني بيومها بيد زوج عمتي
باوعوا واحد للثاني وكأن ممصدگيني احتاريت شلون أبرّي نفسي بعيونهم حتى أخلص من نظراتهم
رديت بخفوت واني أباوع للوجوه :- والله عمتي ودتني
باوع الضابط السألني لعمو فدار وغمزله
فدار :- هذا هو بابا گومي فوتي جوة
گمت منهم طلعت لماما جانت واگفة قريبة من الباب
شمرت نفسي بحضنها أبجي :- ممصدگيني ماما
- شلون حجي هذا
- والله أگلهم عمتي يگلولي انتِ رايحتلها برضاتج اني منين أعرفها لفاطمة صخمانة بالله
مسحت دموعي گعدت عالتخم رجعوا نزلوا وأمسحهم وعلى هالحال لحد مطلعوا من البيت ماما يمي معافتني
فاتوا فدار والأگرع للبيت شافونا
ماما سألته :- شصار شگلك النقيب
- شصار يولي بنتج هين تگول عمتي اللي هناك سائليهن يگولن هي اجتنا من حالها ولا وحدة ولا اثنين
- يعني شنو بنتي دتكذب
گعد عالتخم :- وحتى الحجي الگالتو عنهم يجوز يطلع چذب بچذب تأليف من راسها وحدة من البرابيك الهناك معترفة عليها تگول جنت أخليلها حبوب بالأكل وتجرها نومة مثل المواتة شمدريها بعد ياهو طب ياهو طلع شوكت عرفت هذا كلو
- بنتي متكذب حجت الشافته هناك الميريد يصدك مشكلته
- منو يگول أصلاً ما مدخلين عليها واحد وهي نايمة ما تدري بروحها هسع إلا هيج نحجي
- فدار انتبه لكلامك ترى هالحجي يمسني قبل ليمس بنتي شنو مدخلين عليها واحد
- عجل چذب وحدة متعرف الله وين زاتها بيت مليان عربدة وسكر وكبسلة وگـو*** للصبح شوداها عليه وشجابرها تبقى گاعدة وساكتة عش ما خابرت
- ومنين تخابر إذا دتگلك حابسيها بغرفة لا تطلع ولا تطب
- فد وحدة ام درب انا ساكت من أمس عليها بس لهين عاد وكافي بنتج وحدة بربوك شمطلعها بنصاص الليالي تفتر بالشوارع شنو احنا جديدين عليها مو چم مرة بمرة جنتي تخابريني عليها على طلعتها من البيت
تيم :- خالي مو هيج الحجي
- إلا هيج ونص مالها غير تفسير تعلمنا على فواينها عش مو هي نفسها المغافلة الگرن زوجها من الفندق وطافرة لغير دولة ويامن شلون دبرتها لهساع محد يدري
- ترى تجاوزت كُلش هواي واني ساكتة دا أشوفك وين تريد توصل بس عاد لهنا وكافي طلعتها من ماعونها
اشتد الكلام بينهم وصوتهم صار عالي گاموا واحد يرفع والثاني يكبس والأگرع بينهم يحاول يهدي بيهم
گام من مكانه گلهم :- وحك القرآن وحدة فالتة وتعرف شلون تفر السالفة ليش تروح بعيد هي مو عندها بنية هاك اسألها بنتج ويين يولي
صفنت :- بنتي
باوعتله :- عند عمتي أمجاد أخذتها مني
- دحك متيهة روحها سؤال تسألها تاخذلها صفنة بالساعة يلا ترد ثق هاي البنية مو صاحية وتريدلها تربية من جديد تا تنعدل
دفرت الطبلة برجلي وگمتله
صحت :- اي دكافي بس طعن طعن طعن أسهل شي عندكم الطعن بالأعراض تريد تعرف اني ليش شردت من اليتسمى زوجي بالفندق هاك شوف
رفعت رداني اشوفه آثار الأذية الباقية من عبد
رفعت بجامتي من جهة :- شوف هذا الأثر مال كيبل مديروح من گد مجان يعيد بمكان الضربة
انداريت :- شوف شعري شلون زينه وحرگه إلي وبعد تلوموني وأزيدك هم مو مرة لو مرتين 3 مرات شردت من عنده ولو رجعتله وصحتلي أعيدها رابعة وخامسة تدري اني كتلت طفلي الأول بيدي وهو ممكمل الشهر تدري بحملي الثاني حبسني بين أربع حيطان وربطلي ايدي ورجلي حتى لا أكتل الطفل
تدري بيه بأول يوم العرس گطع الحزام على ظهري بس لأن مقبلت آكل والله بس هيج مسويت غير شي وكل هذا واتفاجئ بيه يطلع متزوج ومرته يحبها ويجيبها گدامي يفوتها للغرفة أگله طلك ما يقبل أگله عندك مرة يگلي أريدج انتِ يابة ليش تعرف ليش أثاريه يريد مني الطفل دا يسجله بأسمها لأن متخلفله جهال هذا قدري عنده خلك مكينة للخلفة وللخدمة إله ولمرته
تدرون انتوا بهذا لو لا
لا متدرون كل واحد عايش حياته وناسين أكو بان بالدنيا ولو اني ليش أعتب عالغريب إذا هي أمي أرجع ألگاها متزوجة وعايشة الدنيا وناسيتني عتبي على منو على ذاك العلگله حبل بليلة ظلمة وعافني ملشطة للدنيا
اختنگت مگدرت أكمل عفتهم ودخلت للغرفة أسمع صوتهم من برة سديت الباب دفرته برجلي حيل
صحت :- دخلي يجيني كلب ابن كلب بعد ويگولي ليش شردتي منه حتى أخلي القندرة بحلگه
گعدت ورى الباب أشهك بصوت عالي ماما صارت تدك عالباب تريدني أفتحلها حجيت :- ماما عوفيني الله يخليج روحي طالعة ترى
- بس أشوفج
أسمع صوت واحد يمها وراها اختفى صوتهم اثنينهم
ضليت على هالحال لحد ما خوى راسي من البجي گمت مددت عالجرباية مسطورة جفوني ثگلوا غمضت عيني
گعدت العصر عيوني مورمة أحس جسمي نار مشتعلة بيه أسناني تگزگز بلعومي أحسه جاف، صوتي بيه حشرجة صرت أحوس بمكاني وأفرك رجل برجل
موت عالبطيء لازمة بالفراش حيل وأنفر بجسمي متحملت الألم گمت أصرخ وأبجي بصوت عالي
تراكضوا على صوتي ماما لزمتني بخوف :- شبيج
شهربان :- راح أموت ماما وجع بجسمي دياكلني أكل مدا أتحمل
أرجف حيل شفتي طبگت نار اشتعلت براسي
گمت من فراشي أفتر بالغرفة گدامهم روحي مفرفحة
ماما تهسترت عليَّ صارت تبجي :- بس فهميني شنو اليوجعج
- جسمي كله يوجعني دا أشتعل من جوة أحس نار تسري بأوردتي الحگيني انطيني أي شي انطيني مسكن منوم أنام وأنسى الوجع أي شي
- فدار فدوة شسوي راح تروح من ايدي البنية
تيم الله :- هارينها هري ولد القنادر
عمو فدار وصى ماما تتحظر حتى ياخذوني للطبيب راحت وياي ماما وابن اخته الطريق كله ايدي بأيد ماما مدا أسيطر على الرعشة بجسمي راسي على كتفها
وصلنا هناك وانتظرنا سرانا ورى الفحص والتحاليل الدكتور أكدلنا جسمي بيه نسبة من المخدرات ومو نوع واحد وصاير عندي إلتهاب بالكبد، الكلى اثنينهم ضعفوا
وصفلي علاج مضاد للأدمان وسمالنا صيدلية بالأسم نجيبه منه اشترينا العلاج ورجعنا للبيت بنص الليل
وصلنا هناك اني جنت منتهية وجع جسمي مدا يهدئ أخذت العلاج وخليت راسي عالمخدة أريد الوجع يهود
أسمع صوتهم ونقاشهم بالصالة بس ممركزة باليحجوه
يومين اني على هالحال انتهيت منا وجع الأدمان منا اني روحي رايحة آخذ علاج الأدمان أرتاح شوي يهدئ راسي وأرجع ورى شوي أشتعل شعل چني مماخذة شي
جسمي صار ميتحمل يريد مخدرات
الجگاير مال فدار وين ما أشوفها آخذها بدون علمه وأگعد ورى البيت أسطرهن وحدة ورى اللخ
جنت أرتاح عليهم الجگارة تهديني شوي وتنسيني الوجع
باليوم الثالث طلعت من الغرفة دنيا الصبح
جانوا گاعدين فدار وابن اخته ومآب وياهم يحجون
فدار من شافني دار وجهه عني يكمل سالفته وياهم واني هم تجاهلته وصديته بطرف عيني مشيت عنهم
رحت لماما لگيتها بالغرفة بيدها الموبايل مشيت مددت خليت راسي بحضنها صارت ايدها تلعب بشعري
أعرف سمعتهم حجي بذاك اليوم وغلطت وتجاوزت ويمكن أذيتها بالحجي بس محد فتح وياي الموضوع
حجيت :- ماما نروح مو
- نروح هسه أگوم أطلعلج ملابس تجهزي بين ميخلص فدار دياخذنا
رادوا يعرضوني على أخصائي مقبلت عاندت إلا يرجعولي بنتي لحضني وراها شيردون أسوي
فدار رغم ممحاجيني شي بس جنت أحسه ممصدگني
بعده عباله اني رايحة لذاك البيت بأرادتي لأن من جانوا يدورون عليَّ عند بيت عمو گايليهم هي طلعت من البيت وماخذة البنية ورايحة مندري بيها
تحظرنا وأخذنا عمو فدار بسيارته اني وماما للمركز اشتكيت على عمتي أمجاد بخطف بنتي مني
مناك وبنفس الساعة طلعت دورية وطلعنا وياها
رحنا لبيت عمو ويانا بلاغ رسمي وصدك جانت عمتي أمجاد هناك أخذوها للتوقيف طبيت للبيت عيوني تدورها بكل عقلي راح ألگى بنتي ورى الكلام السمعته
كفاح :- سويتيها وجرجرتي أهلج للمراكز ولج
باوعتلها من بين دموعي صرخت :- بنتي وين
- بنتج عندج
هجمت عليها خنگتها وأصرخ بوجها لازمتني ماما وهنادي مگدرن يوخرني ركضت لفدار برة فات جرني منها وخرني وهي تشحط
- عوفني أموتها والله وخر عوفني أريد أكتلها
باوعتلي عيونها حمر تجر النفس
- دخلي يجون سالم وسجودة ويعرفون بالصار بأمجاد وهم منا متحلفيلج إلا أخليهم يطلعون بروحج وحدة ساقطة تربية ملاهي ليش هي جدتج منو متعلمات انتن على هذا الدرب
صاح بيها فدار :- يول ضبي لسانج بحلگج تاما أضبو إلج بطريقتي خليني حاط بعيني كونج حرمة إلا جان علمتج شلون تحجين
- حتى انتَ ضحكن عليك شدن وبزرتها وفارات عقلك لتنغر بيها ترى امها جانت رگاصة بالملاهي وهي بنت حرام مالها أصل حارث انعمى على عيونه وعارض أهله وأخذها لتصير انتَ مثله
من حجت هيج ماما غافلتنا وهاجمة عليها وگعت عليها كتل وغلط واني لزمت بنتها ما خليتها تتقربلها
فدار واگف على صفحة يصيح عالحراس :- ثق بالله اليگرب لوحدة بيهن يحفر گبرو بيدو وأحسب الله ما خلقو عركة حريم تكتروا بمچانكم
دفعت ماما كفاح للگاع أباوع لوجهه مشخط ومخرمش والشعر منثور حالتها حالة اجت جرتني من هنادي
واندارت لمرة عمو :- وكلام الله وهاي آخر مرة أحذركم اللي يجيبني اني وبناتي بالطاري ويسولفلي بالشرف وهو بلا شرف أهجم بيوتكم عليكم وأهججكم بليلة ظلمة وأخلي أعراض بناتكم بكل لسان مثل ما انتوا دتحجون بعرضي وعرض بناتي يالبلا شرف يالبلا غيرة كافي الشفناه منكم جوزوا عاد ملينا
أباوعلها مورثة عيونها صايرة نار
گامت كفاح لفدار :- اني أعرفك ابن عشاير دمك حار ما ترضى بالعيبة وشدن وبناتها معيوبات من صغرهن إذا تگول اني رجال وزلمة من صدك تكتلها ومتلفيها ببيتك هي وبزرتها وإذا مو گدها طلگها لتخليها على ذمتك وجيبها احنا نتصرف وياهن
من حجت هيج جابها براشدي فر راسها فر
الحراس انتفضوا سحبوا سلاحهم وجرجروه برة وهو يتصايح وياهم فايرة أعصابه طلعنا من بيتهم
صعدنا السيارة فدار أعصابه صايرة براسه جاب الطريق يتصايح وبس هو جان هنا الدورية طلعت قبلنا للمركز
خابر على ابن اخته گله بالصار وهذاك اللاخ يتهدد وصاروا واحد يرفع والثاني يكبس
ما طولت السالفة بنفس اليوم بالليل سمعنا بعمتي أمجاد ماخذين أقوالها ولاحگيها زوجها وعمو سالم وستار مطلعيها مناك
بنتي مو عندها وماكو دليل عندي يثبت هي الماخذتها افترت السالفة عليَّ سووني مريضة مو صاحية
بالمركز عمتي گايلتلهم هي ماخذة البنية وطلعت من البيت ومشفتها بعد من ذاك اليوم من ساحبين منهم تسجيل الكاميرات مال بيت عمو مرجعين التسجيلات ملاگين شي كله ممسوح يابة تسجيل وين ماكو
واني أحلفلهم بذاك اليوم طلعت بالليل بس اني وستار بالسيارة لو وگع هالتسجيل بيدي أثبت كلامي بنتي يمها
من سمعت بعمتي مطلعيها وممسوين وياها شي تخبلت بجي وصراخ وجع گلبي من جهة وألم الأدمان من جهة
انتهيت
مخلية راسي بحضن ماما گاعدة عالتخم مگابلها فدار وعلى جهة واگفين ابن اخته وابنه يسولفون بالصار
باوعلي مآب سأل ماما :- شلون صارت
شدن :- هاي شوفة عينك من وكت مرجعنا من بيت سالم على هالحال
- وشصار على سالفة الدكتور ما أخذتوها
- مدتقبل تروح
تيم الله :- وشنو بكيفها قابل نمشي وراها احنا
گمت باوعتله :- انتَ گتلي اني أجيبلج بنتج انطيتني كلمة خليك گدها
- وانا ما خلفت بكلامي شوفة عينج هاي جيتي من المركز كلما تدور تدور السالفة ترجع عليج إذا البنية فعلاً عند عمتج وينها عجل عش ما عتنلگي فتشوا بيتها وفتشوا بيت عمج شباقي بعد
صفنت بكلامه شوي وفزيت من مكاني
شهربان :- يم حماتها
- حجي جديد هذا
- والله عندها بنتي عندها ضامتها
فدار جان ديخابر واگف على جهة بس باله ويانا
من خلص تليفونه گتله :- عمو إذا بنتي مو يم عمتي أمجاد يعني عايفتها ببيت حماتها سعاد
عقد حاجبه :- منو هاي
- جنا گاعدين عندها بفترة حملي ورى مطلعنا من شقة همام
تيم الله :- متأكدة
- متأكدة والله لعد وين تريد توديها إذا بيتها مقفول وهي گاعدة عند عمو سالم وبنتي مو وياها
باوع للساعة بيده گال :- عجل گومي آخذج ونروح دام عدنا وكت
فدار :- وانتَ مصدگها
- عجل أچذبها وأصدك ملة الكاولية ذنيج طبعًا أصدگها
باوعلي :- تندلين بيتها
- لا بس همام يندلهم
اندار على مآب :- مآب امشي ويانا تانروح لشقة ابن سجودة نسحلو من ياختو ويانا تا يدلينا ببيت المرة
فدار :- لترحون لوحدكم اخذ ربعك وياكم
- وشعلينا قابل مينرادلها هوسة وخبصة إذا البنية صدك هناك كان بها وإذا ما لگيناها حالنا حال اليشمرلو حجارة بالظلمة ما خسرانين شي
حرك طگطك رگبته وباوعلي :- يلا يول شو بعدج گاعدة
فزيت من مكاني انطتني ماما لبست قمصلة على ملابسي الجو بارد لبست حذائي وطلعت وياهم
رحنا لشقة همام تفاجئ من صرت اني بوجهه أخذناه ويانا يدلينا بالعنوان مگال باطل رحنا لبيت سعاد
تيم :- ابقي هين لتنزلين
- لا أنزل
- عناد هو شنو أگلج ابقي تبقين بلا لغوة زايدة
حجاها ونزلوا تلاثتهم دگوا الباب طلعتلهم حماة عمتي جانت واضحة معالم الخوف بوجها وگفوا يحاجوها
مدت راسها شافتني بالسيارة ما اعرف شگالت وفاتت جوة وهم ضلوا على وگفتهم ابن اخت فدار يحجي ويَّ همام مآب من نظراته إله واضح مراغب وجوده
شوي وطلعت سعاد فتحتلهم الباب تسويلهم مجال ديفوتون متحملت فتحت الباب ونزلت وراهم
طبيت للبيت سعاد وبناتها واگفات على جهة وهم يدورون بالبيت وگف يحجي وياها
تيم :- يول عش تتعبينا وتعبين روحج إذا الجاهل هين گوليلنا بلا هالهوسة انا هم ما أرضاها بيت بس حريم واحنا نصول بيه زحمة
سعاد :- والله وداعة بنياتي ما أعرف أي شي من يوم ولادة بان وليومك مشايفتها لا هي ولا بنتها وهاي هي واگفة واسألها
اندار شافني خزرني :- سوادين شحجينا
- إذا مو هنا لعد تندلين مكانها احجي وما أگول انتِ الگلتليلنا عمتي أمجاد وين أخذت بنتي
- والله ما أدري حتى أمجاد مشايفتها من ذاك اليوم ببيت أخوها بس طارق ديروح ويجي ومحجالي شي لو صدك عندهم البنية أقلها جان سولفلي اني اخته مو غريبة
- والله عندهم هم بايگيها
صرت گدامها الغصة بصدري :- عليج النبي إذا تعرفين گولي گلبي نار عليها انتِ مو أم حسي بلوعتي
- والله لو أعرف وينها ما أقصر ما عندي شي وياج
نزلت دموعي وطلعت برة أبجي رفعت راسي للسما
وين ودوها يا ربي وين صارت بيدمن
اجاني صوته من ورى :- شلونج بان
انداريتله دموعي بعيني
- وتسأل دتشوف حالي عاجبك
همام :- ما بيدي شي گتلج ولو أدري هم ما أقصر بس بنتج مو عند خالتي هاي الأعرفها
- لعد وين
- ما أدري
- باعوها ماتت انخطفت أريد بس حجاية تريح گلبي إذا بيها شي ليش يضمون عني
ضل ساكت محجى شي يباوع لحالي مثل الفشلان
أعرف همام ما بيده شي وحتى سعاد بس شسوي عاديت الكل وصرت أشك بالكل خاصة المقربين
أخذ تكسي وطلع واحنا مشينا بالسيارة جبت الطريق أبجي عبالي حنرجع لبيت فدار تفاجأت من شفت السيارة دخلت لشارع بيت عمو سالم
شهربان :- هاي وين جايبني
اندار :- يول إذا بيت عمج مطيرين التصوير الجيران موجودين
باوعت داير مدايرهم صدك جان شارعهم كله كاميرات
وگف مآب السيارة على مسافة ونزلنا
رحنا للبيت المقابيل بيت عمو سالم كاميراتهم صايرة سنتر بباب بيت عمو يعني اللي يفوت ويطلع يبين
دك جرس الباب طلعلنا رجال :- السلام عليكم
رد مستغرب :- وعليكم السلام تفضلوا
گله احنا من الداخلية ومآب شوفه الباج مالته وشرحله الموضوع بدون تفاصيل گله حادثة خطف ومحتاجين التصوير ضروري الرجال تعاون ويانا مدري خاف
دخلنا لبيته شاشة الكاميرات بوجهنا صاروا يرجعون بالتسجيلات للأيام الفاتت مجنت أتذكر شگد بالعشرين يوم أكثر أقل ممتأكدة ضلوا بالساعتين يسرعون
الدوريات وفوتتهم عليهم فدار وماما احنا من رحنالهم كُلشي شفته وصار گدامي لحد ما اجت عيني على لقطة
فزيت :- هنا من جابوني همام وزوجته لبيت عمو حتى أشوف بنتي هو بنفس اليوم صار كُلشي
الرجال باوعلي :- شتعودين لبيت أبو محمد
ضليت ساكتة أباوعله مآب أشرلي من وراه عود اسكتي
وابن اخت فدار تلاحك الموضوع حمحم بصوت عالي
گله :- العفو ما گتلي أبو منو
- أبو زكريا
- على راسي بلا أمر عليك ثبتلنا على هالتسجيل هذا
ضلوا يقدمون ويرجعون مبين بالتصوير يومها همام اخذ زوجته وراحوا من طردته أمه بعدها بساعة طبگت سيارة ونزل منها رجال ضل واگف شوي وطلعتله عمتي أمجاد بيدها ريحانة فز گلبي نزلت دموعي
باوعلي :- هي
هزيت راسي صعدت السيارة وأخذت بنتي وراحوا قدموه بعد وراها بكم ساعة اجى ستار وطلعت اني وياه صعدت بسيارته كُلشي جان واضح بالتصوير
ومن يومها لا البنية رجعت لهنا ولا اني اجيت بعد لبيت عمو وهالتسجيل ينفي كلامهم لأن گايليهم هي ماخذة البنية وطلعت
تشكروا من الرجال وطلعوا باوعت لمآب
گتله :- شفت اني مكذبت بحرف من الگلته إلكم وانتَ وأبوك بعدكم تشكون بكلامي وممصدگين
حك گصته :- هاي تحگيني بيها يالكلفة
- اني إلك مراح أنساها لتخاف
لزم شاربه :- لا يربك يول انا طوع أمرج شتفصلين انا ألبس
تيم :- ها صگرتك
- إلا الشوارب أبو علي أديح وراهن ومحمد
ضحك ودار وجهه مشينا راجعين للبيت حجوا لفدار الصار گله :- يابا إذا أخذنا التصوير للمركز نگدر نحگهم بالسالفة ونفرها عليهم
- مو بس التصوير حتى هذا ابن سجودة ومرته تاخذوهم يشهدون وياكم عليهم شيل بيت سالم كلهم يومين بالتوقيف تا يذبون اللي ببطونهم ويگولون وين ودوا البنية
شي بداخلي جان مرتاح وصار عندي أمل بنتي ترجعلي
باوعت لماما واني مبتسمة ردتلي الأبتسامة بس أحس بعيونها قهرة مفهمت نظرتها إلي بذيج الساعة
《 نورجان 》
عيني بالطريق السما زرگة الشمس توها بدت تطلع
الجو بارد ثلج سادين شبابيك السيارة ايدي بجيوب قمصلتي ميتة برد جفوني ثگيلة أغمض وأفتح
لابسة وشاح لافتة على رگبتي ورافعته لشفتي
اندارلي وهو يسوق :- تصعدين ليورى تمددين شوي
هزيت راسي بـ لا بدون لا أباوعله
مد ايده گرص خدي :- بعدج زعلانة
- لتحاجيني شُبير
شبير :- عش هيج يولي
باوعتله :- لعد اختي صار كم يوم ببيت عمو فدار ومحد كلف روحه ويگولي
- شعمل نسيت
- كذاب وفوگاها ساحب موبايلي ما أگدر أتصل بماما
- حجينا بهالموضوع گتلج جهاز بعد ماكو
- واني شدخلني إذا رقم غريب ديتصل بنص الليل قابل اني گايلتله يدك عليَّ
- غريب مو يعرف اسمج ويعرف اختج وعتگولين غريب
- ما أعرفه والله
هز راسه عينه بالطريق :- هين ما جابتني إلا هالشغلة أنبش موقعو من جوة الگاع وأطلعو تاشوف منو هالسگط
باوعلي :- وأطلع كلب ابن كلب إذا ما طلعت اختج المهترة وربعها بالسالفة
- شعليها هي
- عجل شلون يگلج آخذج بمكانها هذا واحد من طرفها هي تعرفو وهذا انا وهاي انتِ وهسع تشوفين
سكتت ضايجة دايرة وجهي عنه حتى لو صدك شذنبي اني يسحب تليفوني ويمنعني منه جتفت ايدي وبلعتها
وصلنا لبيت عمو فدار وجه الصبح نزلت بسرعة ما انتظرته بابهم مفتوح دخلت جوة للبيت
صوتهم جايني من الصالة كفختني ريحة چاي مهيل جاية من المطبخ قريب صاير مشيت لهناك لگيت ماما واگفة دايرة ظهرها مشيت من وراها حضنتها
جفلت واندارت شافتني :- عزة بعينج هاي شجابج
أخذتني لحضنها باوستني
گالت :- شبير هنا
بوزت ورديت :- اي هيانة ديطبك سيارته
- شو مادة البوز شكو
أخذتني وطلعنا من المطبخ فات شبير سلم عليها
عمو فدار وابنه بزيهم مال دوام وعمو تيم هم وياهم گاعد على جهة سلمنا وگعد شبير واني وراه يم ماما
ضوجتي بوجهي
شدن :- بس لو أفهم شبيكم
اندار علينا :- ما بيها شي عيارة بنات
تيم :- شبيك وياها لك
- ما مسويلها شي والله شلون اختي هين وما گايلي
- حقها غير اختها
باوعت لماما :- وينها
- صدك وينها بان مكينة اندهولها تاضحك عليها
مآب :- يا مكينة يول رجعت تكبسل منا وجاي بان كبسولة
- اهبدة طلعت تبلع مخندرات
عمو فدار باوعله :- شتبلع
- مخندرات
- والله شلون ما شوف انتَ البالع
باوع لوجوهم گلهم :- بس شعجب شواربكم سليمة وهي هين وياكم بالبيت
تيم باوع لمآب :- اكو جماعة تحت التهديد
شبير ضحك :- ها وصلك السرة
- يابا والله ما سويت شي
- والله شوف شعاملك من فاينة وياها وخلتك براسها
- التوبة عمي إذا عاندتها بحجاية
- الحجي يفيدك هاي المفروض شتگلك تنحنيلها وتردها أمرج مولاتي
شدن :- ترى بالغتوا حيل بان فقيرة
باوعلها عمو فدار بطرف عينه لازم شاربه :- اي صدگتج
شبير :- دهيرة مو بنية حتى خالي يخاف منها
مشيت للغرفة الگالت عنها ماما لگيتها بعدها نايمة
گعدت يمها عالجرباية أهزها وأبجي
نورجان :- گومي بان گوومي كافي نوم
منطيتني ظهرها گعدت تتمطى فتحت عينها ركزت شافتني گدامها دا أبجي بصوت ناصي وأباوعلها
فزت لحيلها جرتني لحضنها شبكتها حيل صرت أبجي وأحجي :- لو تعرفين شگد جنت أحتاجج بهواي مواقف وأندار ما ألگاج يمي شيصير بية اشتاقيتلج هواي بان ليش گطعتي عنا فد مرة ينطيج گلبج تعوفيني
أحجي وهي ساكتة أسمع صوت شهگاتها وخرت باوعتها
وجها أحمر الكلمة متطلع منها من گد مشهگتها قوية
بستها وجريتها لصدري :- شبيج حبيبتي
لازمة ايدي المحاوطتها
ردت :- بيج ريحتها نورجان أحس بيج ريحة بنتي الما شبعت منها انتِ بنتي مو أختي
شكينا وتعاتبنا وبجينا لحد ما ملينا گمنا غسلنا وجوهنا وباوعنا وحدة للثانية طگينا ضحك واحنا بالحمام
وجوهنا حمر والعيون مغورگة منفوخة من گد البجي
مشينا طلعنا يمهم شبير منطينا ظهره اندار شافها
فتح عيونه مصدوم :- أعوذ بكلمات الله التامات يول انتِ منو
ابتسمتله بدون لتحجي وگعدت يمها
باوعلها وهو على نفس صدمته :- يول شلونج
- الحمدلله
مآب :- شو گمت تدك ناعم صار ساعة عتصيح اندهوها تاضحك عليها
- يول شضحك ثق بالله الكريم ما عرفتها هاي شصاير بيج يول
شدن :- معليك هاي هي هيج رشيقة
- يا رشيقة غير جنها سلبوح سيان
ابتسمت وسكتت ما ردت أباوعها صدك عبالك مو هي ضعفانة حيل وجها شاحب رغم الشبه اللي بينا بس وين اني وين هي فرق السما عن الگاع
إذا أگول جان هذا من أحلى أيام عمري هم مقصرة
ماما وأختي يمي على يمنتي شبير على يساري عمو فدار مترأس الطاولة صاير بين عمو تيم ومآب
والكل مندمج بالسوالف والضحك محجوا بالشغل ولا بموضوع بان وبنتها جانت هي محتاجة هالگعدة أكثر وحدة حتى تغير من نفسيتها التعبانة
عمو تيم خابروه جماعته وطلع قبلهم
والولد راحوا ويَّ عمو فدار ضليت مگابلتها اليوم كله معفتها ولا لحظة عرفت كُلشي من ماما ردت ألزم دموعي مگدرت هذا كله صاير بيها واحنا مندري
بنفس اليوم راجعين مآب وشبير لبيت هذا جيران بيت عمو سالم أبو زكريا مقابل يدخلهم البيت ولا ينطيهم التصوير أثاري متهدد وماسح التسجيلات
گلهم :- استروا عليَّ وطلعوني من السالفة اني رجال صاحب عائلة
بيومها بان انتهت جانت أول مرة أشوفها بهالحالة واگفة بالباب أباوعلها ودموعي تنزل وماما يم راسها تهدي بيها وتنطيها علاجها جانت تنشغ بحضنها مثل الجاهل
متحملت طلعت للحديقة انفجرت أبجي بصوت عالي
فاتوا شبير ومآب من برة شافوني
اجاني گعد گابلني :- شبلاج يولي عش هيج تبجين
حجيتله على بان جرني لحضنه ومآب عافنه وفات جوة
شبير :- كافي ول أبوية هسع تسكت وتگوم لحيلها يول هاي الكلفة لو نسيتي
- تعبانة شُبير عبالك مو نفسها بان القديمة متحجي قليل واللي يضوجها تسكتله من يمتى بان جانت هيج مشفت شكلها حتى انتَ الصبح تفاجئت من شفتها
- مريضة يولي الإدمان مو شي سهل وخاصة بوحدة مثل عمرها وأختج هم عنودية باقية ع العلاج لبالها راح تخلص منو هيج إذا مو دكتور صاحب إختصاص ولجنة طبية تشرف على حالتها ما تطيب
- شگد حاجتها ماما متقبل تريد ريحانة ترجعلها يلا
- آخ يا يابة صارت أم ريحانة
گام وگف لحيله ورثله جگارة :- گومي فوتي الجو بارد لتمرضين وگوي گلبج هي هساع محتاجتج انتِ أكثر وحدة وأقرب بشر إلها هوني عليها وشجعيها بدال هالبجي والمناشغ هذا
فتت جوة وحاولت أسوي اللي گاله كلامه صحيح البجي مراح يفيد ولا يسويلها شي ماريد أزيد عليها
اجى عمو فدار سأل ماما عنها وماما هم حالتها حالة
تحاول متبجي گدام بان ومتبين بس من واحد يحاجيها تنفجر من البجي ميتة خوف و قهر عليها
سأل عمو الولد على تيم :- عش ميرد من الصبح أتصلو
مآب :- ماكو حتى للبيت ما أجى اليوم من الريوك
باوع لشبير :- أخوك وينو يول
- بجيبي
- احجي عدل لك تاما أفتح راسك بهاي النفاضة
- تلگاه رايح لگعدة شرب ونسوان هو وذاك صاحبو السيد العفطي
مآب :- هذا صاحبو لفو عالسادة
- مو بالله
گام عمو فدار :- دگوموا اثنينكم تسردحوا من جدامي ماريد أدحك خلقكم الزفرة منا لباجر وراي شغل
عتفهم وفات للغرفة
باوع شبير لماما :- شو هذا رجلج طردنا باجيتي
شدن :- منك لخالك لتدخلوني بينكم
- أفا مو انا النسيب
مآب :- راح أروح للشقة تجي
فزيت من مكاني گتله :- لا ميروح
شبير :- اهبدة عش هيج يول
- ما متروح يم مآب
- آخ دحك الله شگد يحبك زتلك وحدة تغار عليك حتى من الزلم
- يا غيرة يول أگص ايدي إذا ما طلعت شايفتلها شوفة عليك وبليتني وياك
- عجل أروح السالفة صارت تخوف
سلم وطلع بسرعة جر سويچه شبير وگام
لزمت ايده :- وين راح تروح
- إذا مانعتني من حرمتي الأخرى أروح لبيت تيم تانام
- يا حترجع للغربية
- يا غربية يولي هين بيتو ببغداد
- عزة عنده بيت منيله
- كلشي عندو دهيرة مو زلمة
باوع للمكان محد موجود دنك باسني طرف شفتي بوسة سريعة گرص خدي وطلع يفر بسويچه
رجعت للغرفة وسديت الباب مددت يم بان تغطيت وياها حست على حركتي فتحت عيونها
نورجان :- انتِ گاعدة
- ليش هو منين يجي النوم
حضنتها حشگت روحي يمها سمعتها تتحسر
گالت :- نورجان انتِ مرتاحة
- شلون يعني
- قصدي بزواجج من شبير
- اي شُبير كُلش حباب ويعاملني زين وحتى لو ضوجني بس أشكيه لعمو تيم لو عمة شيخة يرزلونه
- شلونهم وياج
- كُلش حبابين حاسبيني مثل بنتهم
حسيتها جرت نفس مثل المكبوتة ضلت ساكتة فترة
باوعتلها :- بان تدرين أحس مدا أصدك عندج بنية
ابتسمت :- ولا اني
- حلوة
- حيل هاگدوتها بگد جف الأيد
- شوكت أشوفها
- حتشوفيها وحترجعلي لحضني مُتيم انطاني كلمة
- منو هذا
- هذا الأگرع
- يا عمو تيم قصدج
- تگوليله عمو
- اي اني وبنته كُلش صديقات وأستحي أصيحه بأسمه
سولفنا شوي لحد مشفتها غفت واني هم نعست جريت الغطة غطيتها زين و نمنا اثنينا سوية بعد غياب طويل
للفجر فزيت من نومتي على صوت بالبيت بان نايمة
گمت من مكاني طلعت من الغرفة الصوت من الصالة
رحت هناك وأشوف عمو فدار واگف يرزل مآب وشبير
صاح :- وين جنتوا الليل كلو للأربعة يلا لفيتوا للبيت ولكم حتى الگحاب اللي بالملاهي بـ2 بالليل يردن لبيت أهلهن
باوعوا واحد للثاني وضحكوا بصوت عالي
صاح بيهم :- وقزرالقط ومرض
دك تليفونه شاف الأسم رد ومشى عنهم يخابر
مآب :- بشرفك شلون جانت الأجواء
شبير :- باريسية
ماما تچتفت واگفة على جهة
سألتهم :- شصاير شبيه فدار منفعل
- ماكو شي بس كتلنا أبو زكريا واجينا
عقدت حاجبها :- يا أبو زكريا
- هذا الچلب الغدر بينا وما رضى ينطي التصوير
باوعلي شبير
گلي :- يول امشي اندهي للكلفة جبتلها أبو زكريا بالجنطة مال سيارة تاتزين شاربو
فات عمو تيم من برة تفاجأت بيه صرت بظهر ماما الولد منتبهوله ظهرهم صاير عليه وهم مستمرين يسولفون
مآب :- يول لو على أبوي سهلة بس تيم متعبر عليه لو عرف إلا يشرنا على جبل أحد من الرزايل
- جان زين انتَ مجرب الحزام مالتو يا يابة أويلي
- لا بشرفك
- دحك انا أگول نلوف السالفة نگلو رحنا نجيب منو التصوير وتجاوز علينا وضربناه
- شتگول تعبر
- تعبر معليك يمي
ديحظرون جذبة من جذباتهم يردون يمشوها على تيم وهو واگف بوراهم ايده بجيوب البنطرون يسمع
تيم :- انا برأيي لو تگلو جنتوا بوحدة من سهراتكم الجايفة تا تطلعون منها
انداروله اثنينهم نفس اللحظة
شبير :- جبتها يالعضيد بس ما تعرفنا منو الأخ
لزموهم برة للحديقة دك رزايل عود مرزلوهم گدامنا بس صوتهم أصلاً جان عالي يوصلنا ليجوة
طلعوا رايحين لبيت أبو زكريا ضاربين الرجال شلون ممنطيهم تصوير وفايتين على بيته خاوة يردون التصوير منه وهو يحلفلهم التصوير ممسوح
أشرتلي ماما :- ارجعي نامي حبيبتي ماكو شي
تثاوبت بنعاس
- تصبحين على خير
عفتها ورجعت للغرفة نمت
《 شدن 》
نصيت قوري الچاي مشيت للكاونتر طلعت گلاصات البنات غسلتهم خليتهم عالطبلة رجعت جبت الشوكات
غسلت ايدي وطلعت من المطبخ وعينك متشوف
الگاع مطينة بيها آثار رجلين صغيرة ودايسة عالفراش
صحت :- لج بان
مدتلي راسها من الغرفة فاتحة شعرها صاير كفشخة
- هاي انتِ هيج موصخة الگاع شلون بيج متجوزين من طلعة الشارع وانتِ حافية
- مو اني
أشرتلها بيدي :- لج تعاي دا أشوف
هزتلي أكتافها مقبلت مشيتلها جريتها أباوع لرجلها مطينة هزيتها من ياختها :- يعني أبسطج أحسن
نورجان :- لا ماما خطية لتبسطيها
- انتِ اسكتي محامي الدفاع
شهربان :- أگول لبابا عليج
- عشتو تهددني بأبوها
اخذتها للحمام فوتتها تغسل رجليها وطلعت وألگى اللخ لازمتلها وصلة صغيرة تمسح الطين من الگاع
گومتها :- ها گمتي ترگعيلها عوفيه اني أمسحه
نظفت الگاع والفراش فتحتلهن تلفزيون گعدن اندمجن
مشيت للغرفة واگف گبال ميز تواليت منشفته على رگبته شعره مبلل ايدي حاوطت بطنه من ورى حضنته
- نعيمًا حبيبي
جرني من ايدي خلاني گدامه باس خدي بوسة طويلة
شهربان :- صباح الخير بابا
فزينا اثنينا على صوتها واندارينا عليها واگفة يم رجله
فتحتله ايدها دنك شالها يبوس بيها
حارث :- يا يابة لو هيج الصباح لو مينراد
چتفت ايدي لصدري وانتجيت بظهري عالميز
گتله :- مصباح أگشر
باوعولي اثنينهم نفس اللحظة
- تغارين من عدنا على عنادج
حجاها ودنك شم رگبتها وگال :- اووف يابة شنو هالريحة الطيبة
لويت شفتي :- عشتو
دا امشي عنهم لزمني جرني ينكت بشعره مَي عليَّ وبنته تضحك :- اهوو لا حارث ما أحب هالشقة
باوع لبان :- هاي شبيها أمج
هزت أكتافها :- ما أعرف
- دجيبها وتعال حطيت الريوك
عفتهم ومشيت اجوا وراي گعدوا وهي معاجبها تگعد إلا بحضنه تتحايل عليه بسوالفها وتدلع وهو كله شتردين وشتأمرين بان عنده لتگوم ولا تگعد
باوعت نورجان ما هي صحت عليها مردت
مشيت أشوفها لگيتها گاعدة لعابتها بحضنها وهي مخبوصة بيها تمشطلها :- مو دا أصيح عليج
باوعتلي :- هسه بس أكمل التسريحة
- النوب تسرحية ان شاء الله تخلصيها للغدة
- هسه والله بس شويونة
- ولا شوية فضيني الأكل برد كملي أكلج وارجعيلها
شالتها واجتني مشينا للمطبخ گعدنا تريگنا
سألته :- هم حتتأخر اليوم
- ما أدري اني وحظي بعد ومناك هم طالع أريد أشوف ولد صديقي لتنتظروني عالغدة
اندك الباب عاف الأكل وگام يشوفه طول يلا رجع
من رجع وجهه جان مگلوب حتى الأكل بطل سحب باكيته طلعله جگارة وصار يدخن ويسفت بهالچاي
- منو
باوعلي وضل ساكت خلص جگارته وگام بوس البنات طلع رحت وراه لگيته ديلبس بحذائه
تخصرت :- غير أعرف شبيك حالك انگلب حتى ريوگك مكملته
- واحد من جماعة عبد الكريم
- استغفر الله هذا ميمل مو ذاك الأسبوع هم دزله واحد وگتله ينطيك مجال هالشهر شنو هالملحة
- شسويله ابتليت بلوة على عمري تداينت منه هالفلوس ساعة الگشرة
گام تقرب باس خدي :- عفتلج فلوس عالميز عينج عالبنات
ودعته وطلع دعيت من گلبي الله يفتحها بوجهه ونخلص من هالدين الصار كابت على أنفاسنا
بنفس اليوم للمغرب اندك الباب بان جانت تبجي لان حابستها ما أخليها تطلع للشارع عفتها ومشيت برة
فتحته صار بوجهي عبد الكريم نزيت من شفته
خليت ايدي على گلبي گال :- السلام عليكم شلونج اختي أم بان
شدن :- عليكم السلام تفضل
- حارث هنا ياريت والله لو تصيحيلياه
- لا والله بعده مجاي للبيت
- ها
حجاها واجت عينه على نورجان لازمة برجلي
گعدلها ركبة ونص :- هاي الحلوة إلكم
- بنتي
مد ايده يگرص خدها خافت رجعت ليورى ضحك
باوعلي وغمز :- طالعة عليج
- شنو هالحجي هذا متستحي متخجل رجال شكبرك شگدك تشمر حجي
گام وگف ويضحك بطريقة قذرة مستهزئ
- شدعواج يابة شگنالج
- ياريت بعد متجي للبيت إلا تدك تليفون لحارث لأن ممعروف وكته شوكت يرجع للبيت وهم انطينا مجال گلك هالشهر أدبرلك جزء من المبلغ مماكليهن عليك
- لخاطر هالعيون انطيه شهر وشهرين شعدنا قابل
طبگت الباب بوجهه لزمت بنتي ودخلت أدردم :- گبر سكير أبو العرك معايزة بس عبد الكريم النوب
من اجة حارث بالليل شفت حاله غير عن الطلع بيه الصبح وجهه مرتاح وفات يضحك ويشاقي بناته
سألته گال :- اليوم شفته لهذا صديقي الگتلج عليه الصبح ابن عمه تاجر راجع من تركيا ورايد يفتح محل هنا قريب بالكاظمية ورادله واحد يلزمله الشغل وصديقي حاجيله عني رحت شفته وشافني واتفقنا اني ألزمله المحل لأن هو ميگدر مستقر بالشمال
- اي يا الله واتفقتوا خلص
- اي راح دفع إيجار ومتسوك بضاعة وراح يبدي يرتب المحل بس هالكم يوم وأگعد اني بالمحل
- هذا ربك دزه إلنا ديخلصنا من العلة عبد الكريم وملحته
عقد حاجبه باوعلي :- ليش شصاير
حجيتله الصار بدون لا أجيبله طاري كلامه القذر
تنهد :- هانت والله هانت بس خلي ألزم الشغل لو أعرف أكل وجبة وحدة باليوم ألمله فلوسه وأرجعهن إله وأنعل الساعة العرفته بيها
وبدة حارث يروح يشتغل بالمحل الشغل جان خير من الله والرجال أصلاً متفق وياه على راتب شهري جان مكفينا وزايد وبدة يسدد من الديون العليه شوي شوي
ومن جهة ممقصر علينا اني والبنات بس يأشرن يجيبلهن اليردنا قبل ليطلبن واني من أطلبه مجان يبخل
مر شهرين عشنا عيشة ملوك فلوس خير من الله ماكو كل شوي واحد داك الباب يريد فلوسه وصرت ما أهم بالإيجار وفلوس السحب والمصاريف
بس مدامت إلنا
بيوم من الأيام فات للبيت من وكت أعرفه مو هسه وكت جيته وبوجهه راح للغرفة لا حجى لا شاف البنات
استغربت بعمره مسواها جان أول ميفوت يصيحلهن وهو بالباب وهن يتراكضن لحضنه گمت مشيت وراه
فتت عليه لگيته گاعد عالجرباية مدنك ايده على راسه
خفت من حاله گعدت يمه :- شبيك شصاير من اول مفتت وحالك ميعجب
حارث :- تزين راسي لج شدن .. انباك المحل والبيه لا فلوس لا بضاعة مكسرينا وناهبينا وطافرين رحت بيها اني الصرت بوجه المدفع أبو الشغل متخبل يريد مني تعويض لخسارته منين أجيبله شلون أتصرف
- المحل انباك انتَ شعليك بأي حق يطلب منك تعويض
- ولج ما أدري من الظهر أفتر
رحت سألت يگلولي حقه ما دامك
انت الگاعد بيه ولازم الشغل
- وشگد يريد منك يعني
- ولج لا مليون ولا مليونين ٢٤ مليون منين أجيبله
الدنيا ضاگت بعينه بيومها للصبح وهو على گعدته يتگلب بفراشه صبح الصبح طلع حتى مگال وين
هناك للعصر يلا رجع گتله :-
ها شسويت
- شسويت يمعودة رحت لصديقي گلت بلكي يأثر عليه ينطيني مجال كم شهر أسويهن إله دفعات منين أجيبله هيج مبلغ أبوك قابل
بالليل گاعد صافن جگارته بيده محتار بزمانه لزمت ايده شلتها بستها
- تهون وعيونك بس گول يا الله
إلا ما ربك يباوع لحالنا
- ليمتى متگوليلي مو طلعت روحي
- تدبر والله
تنهد :- الله كريم
سكت شوي واندارلي :-
أگلج صدك فؤاد دزلج فلوس هالشهر ؟
- لا وينه هاي صار شهرين مغلسهن وأخابره حتى ميرد عليه ٦٠٠ ألف
- هم جانن سادات صفحة
- محتاج فلوس عندي ضامة جوة ايدي
- شگد عندج ؟
گمنا للغرفة طلعتله من العندي چمل منهن عالعنده هم ضامله سفطة سواهن مليون گال :- باجر أروح أنطيهن إله مال هالشهر وعود الشهر الوراه هم ندبرها
- عبد الكريم سديت دينه ؟
- بعدله عندي أربعة
- شنو القصة هالدين هذا مناوي يخلص
- مو صاحبهن عكرة
مر كم يوم هو يطلع من الصبح لليل يلا يجي يدورله شغل فلوس أسحب من العندي وبدن يقلن ولازمة روحي بالگوة ليخلصن وأحتار بأمري ..
احتاجيت الفلوس اللي يدزهن إلي فؤاد من إيجار البيت حصتنا اني وياه مأجره بـ٩٧٠ ألف وينطيني منهن بس ٣٠٠ ألف وياكل الباقي وهم قبلت
شفته مدا يرد على إتصالاتي گلت لحارث نروحله گعدنا من الصبح عفنا البنات عند الجيران وطلعنا للسليمانية
وصلنا هناك جان ماخذله شقة صغيرة على گده مدبر روحه بالنومة وباقي الفلوس ببطنه متونس بيهن
گعدت گابلته شفت حاله ما بيه شي كل وبالي مريض لو صابه فد قدر من هيج مدا يرد، حجيتله على وضعنا بآخر فترة وگتله محتاجة الفلوس
فؤاد :- يا فلوس ؟
- حصتي من الإيجار شنو يا فلوس
- مالج فلوس يمي
صفنت عليه :- شبيك فؤاد فلوسي مال شهرين مدازلي المبلغ انطينياهن دا نرجع لبيتنا ورانا طريق
- لتلحين گتلج مالج شي يمي شتردين تسوين يوي
گمت وگفت فور دمي :- شلون مالي شي يمك تريد تاكل حقي أريد فلوسي طلعهن مثل ما إلك حصة بيهن اني هم حالي من حالك
گام فات جوة باوعلي حارث أشرلي بعيونه حتى أهدئ
شوي ورجع بيده مبلغ شمرهن بوجهي
گثاني يوم راجعين لبيت هذا جيرانهم أبو زكريا مقابل يدخلهم البيت ولا ينطيهم التصوير أثاري متهدد وماسح التسجيلات وگلهم استروا عليَّ وطلعوني من السالفة
ليش ميطلع مآب مصور التسجيل كامل بتليفونه بليلة الرحناله اني وياه واخو شبير مجان واضح حيل بس مبين كُلشي ماخذينه وبوجهم للمركز ..
وبواسطة قوية من فدار وجماعته ماخذ دوريات شرطة ورايحلهم سادين شارعهم هو وابنه وابن اخته مجرجريهم كلهم من عمو سالم وعائلته لعمتي أمجاد وزوجها راجعين لبيت ستار زوج عمتي ماخذينه
عمتي سجودة مجانت موجودة هناك من سامعة بالصار رايحة للمركز وگفت تتصايح ويَّ واحد من الضباط ولازمته شاگة قميصه لزموها خلوها بالسجن
زوجة عمو وبنته طلعوهم بنفس اليوم ورى كم ساعة مالهم ايد بالصار بس الباقين كلهم أسمائهم بالبلاغ
يومين وهم بالحبس مستجوبيهم ونشوفيهم التصوير محد حاجي بعدهم ينكرون إلا عمتي أمجاد من ضاغطين عليها بالحجي گايمة تبجي معترفة
سائليها الطفلة وين ؟
مجاوبتهم :- اجى أبوها وأخذها مني
ليش ما حجيتي من الأول ؟
رادة :- مهددني ما أحجي ولا أگول حتى أمها لتعرف
من عرفت السالفة صار بيها عبد تهسترت ، عبد مختفي ما أدري بيه وين ألگاه ؟ شنو اليثبت كلامها ؟ مصدگت
تلث أيام والرابع بالواسطات مال عمو سالم مخابر جماعته اجوا ويَّ محامي دفعولهم وطلعوهم كلهم
انتهيت بيومها صدقًا ..
يعني هاي هي راحت ريحانة ؟ بعد ما أشوفها ؟
گال :- هاج هاي ٢٥٠ يعجبج تاخذيهن ميعجبج تفضلي اطلعي برة وبعد لتنتظرين مني أدزلج فلوس لأن هاي آخر مرة
صار بوجهه حارث :- وهي تگدي منك شنو شلون تشمرهن بوجها هيج إلها فلوس يمك طلعهن حتى نولي لتخليني أتصرف وياك غير تصرف
- شو تهدد انتَ ؟
- وأكسسسر راسك
لزمته أهديه وانداريت لفؤاد
- بس گلي الفلوس وين وديتهن شدتسوي بكل هالمبلغ
- أريد أتزوج
صحت :- اي وتزوج منو لازمك فلوسي ليش تاكلهن عليَّ
- ميكفن منين أجيب يا دوب مجمع العندي دفعته مقدم للبنية
- ليش وفلوس الإيجار وين دتوديه كل هالفترة
- مو گتلج بعد ماكو فلوس إيجار طلعت المؤجرين من البيت
- صدك تحجي ليش
- أريد أگعد بالبيت ورى الزواج الشقة صغيرة متكفي
- واني شعلية إلي حصة حالي حالك بيع البيت وانطيني حصتي وروح انتَ اشتريلك بيت على گدك بالعندك
- ما أگدر أبيعه
تخصرت :- وليش عيني ؟
- درته بأسم نسرين
بهت لوني :- يا نسرين
- البنية الراح أتزوجها
خلاني ادك على راسي شوفني الأوراق انهاريت
طلعت منه الدنيا ضايگة بعيني وبس أبجي
وگفنا عالرصيف جابلي مَي غسل وجهي وشربني
حارث :- كافي يمعودة فدوة خلي يولي البيت
- حارث حقي هذا الباقيلي من أمي بأي حق راح حوله بأسمها شلون فروا راسه هيج وين أنطي وجهي هسه
رجعنا لبغداد بخسارة ثانية مجنت محسبة يصير هيج صح جانن قليلات بس سادات صفحة من مصاريفنا
خاصة واحنا بهالظرف الصعب هذا محتاجين الربع
اجى راس الشهر الثاني والمليون ما تدبر وشغل مدا يلگى گتله :- شلون يعني وتالي
- شسوي مو دتشوفيني ما مخلي مكان يعتب عليَّ بالله التعيين أيست منه إلا هالشغل هذا وين ما أذب روحي ما أخذلي يوم والثاني ويطردوني
- سالم وراها مو
سكت وتنهد تنهيدة طويلة بحسرة
گتله :- ولشوكت يعني مو كافي ساكتلهم
- شسوي بالله فهميني
- شوفه شيريد منك ليش ديسوي هيج
- يريدني أرجع وياهم لشغلهم أكو غيرها
- ارجع لعد
باوعلي :- بكل عقلج انتِ ؟ ترديني أوكل عائلتي حرام والله لو على گص رگبتي ممنوع بعد تعيدين هالحجاية لتزعليني منج
عافني وگام ضايج نزلت دموعي شسوي غصبًا عني حجيتها من لا چارة أبو الشغل يريد وعبد الكريم يريد هذا غير الإيجار والمصاريف وزايدة ناقصة
والجوة ايدنا بدن يخلصن تفاليس يادوب يدبرن العيشة
بنفس اليوم خليته يطلع صحت للبنات گعدت للگاع
اجني اثنينهن
نورجان :- ها ماما
قربتها مني مديت ايدي نزعتها تراچيها وأخذت تراچي بان لزمتهن أحاجيهن :- وعد بس يصير عندي أجيبلجن احلى منهن متفقين ؟
هزن راسهن باوستهن گمت خليتهن يم جارتي وطلعت لمحلات الذهب بعتهن جابولي الزوجين مبلغ زين
رجعت للبيت بيدي علاگة حلويات إلهن أسكتهن بيها
بالليل من رجع گعد بالغرفة طلعله ضبة مال فلوس من جنطة صغيرة استغربت گتله :- هاي منيلك ؟
- رحت لأمجاد بايعة گلادتها والمبلغ جوة ايدها گتلها محتاجهن ما قصرت ان شاء الله بس يصير عندي أرجعهن إلها
- بس يصير عندك ترجعهن صدك تحجي ؟
- اي صدك أحجي
- حارث ترى أمجاد أختك مبيها شي إذا ساعدتك بدون مقابل وهي تدري بيك كُلش زين دتمر بضيگة
- وأصير مثل فؤاد وآكلهن عليها ؟
- ليش هسه هم مماكلين حقك مو دتشوفهم واحدهم بيته طول بعرض وانتَ مخلصها إيجارات محد بيهم كلف نفسه وگال أشيل عن أخوية بالله ذنيج الأثنين غاسلين ادينا منهن بس عوف هالبنية مدام الله هاديها عليك لتضل تحسسها مسوية فضل عليك خلي تشيل عنك شوي مبيها شي ترى
ضل ساكت يحسب بالفلوس مشيت للكنتور طلعتله جزر من المبلغ انطيته إله أخذهن متفاجئ
- هذن شنو
- عندي ضامتهم من زمان گلت خاف تعتازهم عالعندك
رجعهن :- لا خليهن مصرف جوة ايدج عندي هسه
گعد بالصالة يسولف ويَّ البنات وهن بحضنه كل وحدة من جهة ماخذتلها صفحة ويحجن على راسه دوخنه
شدن :- بربك ما وجعك راسك من شكاويهن
- على گلبي مثل العسل والله
حجاها وباس نورجان وهاي اللخ مبرطمة
سألها :- شبيج
ردت :- ماما أخذت التراچي ملاتي
أول محجت هيج باوع لأذنها فارغة اندارلي بسرعة
عرفت معنى نظرته گمت رحت للغرفة شوي واجاني
- أحلفج بروحها لأمج الفلوس هاي من تراچيهن ؟
سكتت عيوني غورگت :- حلفتج شدن
- اي بعتهن
صاح :- ليييييش
- معتازيهن هالفترة گتلهن من يصير عدنا نجيبلهن غيرهن مصار شي شدعوة هيج انفعلت
سكت بس أحس بتنفسه صار سريع وقوي عافني وطلع
يتنحس من تصير الشغلة تخص بناته عنده مثل الأميرات طلباتهن أوامر ميحب ينقصهن شي لو بأتعس ظروفه ورغم حالتنا بس بناتنا جانن مدللات
ورى كم يوم احتاج فلوس رجع بنفسه طلبهن مني جنت أعرف حيجي وقتهن انطيتهن إله وطلع
لورى المغرب البيت هادئ البنات بالباب منتظرات أبوهن هذا وكت جيته صحت على نورجان اجتني هي ولعابتها
گتلها :- امشي صيحي لاختج فوتن جوة صارت دنيا ليل
- هسه والله شويونة
- خمس دقايق
راحت تركض إلتهيت بالمطبخ الصوندة مال سنك مزروفة وكم مرة بمرة گلت لحارث عليها يبدلها وينسى
لهناك وسمعت صوته يصيح علينا رحتله
- هلا حبيبي
باوع للبيت گال :- لعد وين البنات
- برة بالباب
وگف :- شبيج غير هستوني جاي من برة ما شفتهن
فزيت طلعنا اثنينا نباوع للباب الشارع فارغ والدنيا ظلمة گتله :- والله هسه قبل دقايق جانن هنا ينتظرنك
فتت جوة أصيح عليهن دورتهن بالغرف بالحمام ماكو بالبيت جان سون صوت راح هو لجيرانه مو يمهم
تخبل واني صرت أبجي وأدور وياه جيرانه شافه طلع وياه وشباب من شارعنا من عرفوا ساعدونا
اني انتهيت شلون قبل دقايق هن گدام عيني وهيج فجأة اثنينهن يختفن وخاصة الخطف هالفترة كثران
گلت راحن بناتي فوك الساعة احنا مشتولين لحد ما اجى جيرانا گايد بان يمشي بيها جاي للبيت
الرجال الجابها گال :- لگيتها بنهاية الشارع وجبتها
جرها أبوها لحضنه يباوع لوجها البنية مصكوكة نحجي وياها مترد نسألها على اختها وين متحجي
أشرت بيدها منين ما اجت ايدها ترجف تررجف
شالها أبوها ومشى بيها وين متأشرله مخلاني ألحگهم
عشر دقايق يمكن ربع ساعة وشخطت سيارة بالباب
طلعت بسرعة بس بان بالباب أثاري رايح هناك للهيكل وشايف نورجان متمددة بالگاع فاقدة الوعي شايل البنية هو وجوراينه وطالعين بيها للمستشفى
معرفت إلا لوكت متأخر رحت لحگتهم للمستشفى
يابة شصاير شبيها بنتي ؟ .. محد يرد
لحد مطلعت الدكتورة متخبلة گالت :- عيني الطفلة منتهية عندها تمزق حديث بغشاء البكارة هذا إغتصاب
بادت رجلية مسطيرت وگعت للگاع جسمي كله صار يرجف إغتصاب ؟ .. شنو إغتصاب ؟ .. بنتي اني ؟
باوعتله حاله مو أحسن من حالي گاعد للگاع ظهره للحايط ومدنك راسه ساكت بطريقة خوفتني
حولوها لمدينة الطب وأخذ تقريرها قدمنا شكوى واحد من الجوارين معترف على عبد الكريم گال شفته گبال بيتكم يحجي وياها ما أخذوا وكت بسرعة لزموه للسجن
انتهينا اني وأبوها عليها مستشفيات ودكاترة ومن جهة هو يراجع بالمركز ويا رايح جاي للمحكمة
هذاك مناك أهله حاطيله محامي اجانا عمه للبيت رادنا نتنازل ويعوضنا بالفلوس گام حارث طرده من البيت
نسينا عيشتنا .. نسينا الدين العلينا .. حياتنا انگلبت
حارث مو الأولي بس يصفن وميسولف واني إلتهيت بالبنات خاصة نورجان جانت تفز بالليل تگعد تبجي صارت تخاف من خيالها من تدرر متأذية ومحتارة بيها
نومتها بان گاعدة على جهة تصفن گتلها :- شبيج
أشرتلها تجيني گامت جريتها لحضني بستها
سمعت صوت الباب من برة نومتها يم أختها وطلعت
لگيته گاعد بالصالة مدنك راسه بين اديه :- حارث
ما رد ولا باوعلي مشيت يمه لزمته
- حارث شبيك
من حجيت هيج انفجر صار يبجي بصوت عالي ويشهك نزلت دموعي أبجي على بجيته وأحجي وياه ميرد
انتهى گتله :- لتسوي هيج بروحك عليك الله احنا محتاجيلك توگف لحيلك مالنا غيرك اني وهالبنات
بالساعة وهو على وضعه لحد ما من وحده سكت بس مفتح حلگه ولا بكلمة عاد بعدين عرفت جايله سالم وگايله يتنازل عن الشكوى ويحلوها بينهم
متعاقدين من وراه شاكر وسالم ومخلين شرط طلعة عبد الكريم من السجن يصير مقابله زواجه من نورجان بس تكبر والشغلة قانونية جانت حسب المادة ٣٩٨ من قانون العقوبات العراقي يعني مو بس حجي عابر
ثاني يوم طلع من الصبح مرجع إلا تالي الليل جايب وياه سفطة فلوس كبيرة خلاهن بيدي
گال :- ذني خليهن جوة ايدج تحتاجيهن بعدين
- منيلك هذن ؟
- شدن لخاطري بلا اسأله زايدة تعبان راسي ثايل
عافني بأستغرابي ومدد عالجرباية ذاب روحه
ثاني يوم گعد استغربت مطلع من البيت
- مراح تطلع اليوم ؟
حارث :- مليت واختنگت فد مرة گلت اگعد وياكم وأشوف البنات مشتاقلهن هواي
خلص اليوم يمهن انطلق وياهن وهن هم فرحانات بضلته للعصر گال :- امشي نطلع للكورنيش
غيرت للبنات وطلعنا بس صارت الطلعة نقمة علينا نورجان خلصتها بس تبجي مفهمناها خايفة لو شنو
لحد مدنك عليها شالها يلا شوي سكتت وخلص الطلعة شايلها ويمشي بيها وگفها يم محل ألعاب
حارث :- تردين أجيبلج لعابة
- لا
- زين أشتريلج حلويات
- لا
حجتها وخلت راسها برگبته تنغوص بصوت ناصي
شدن :- عوفها جاي تدلل عليك
- إذا هاي ما تدللت منو يستاهل الدلال لعد
يمشي بيهن وحدة شايلها واللخ گايد ايدها گعدنا بحديقة صارن هن على مسافة يلعبن واحنا نباوعلهن
انداريت عليه باوعتله بس يصفّن حاوطت ايده خليت راسي على كتفه :- بشنو دتفكر ؟
تنهد ورد :- بديت أخاف عليهن من هسه
- اسم الله شكو
باوعلي :- ديربالج عينج تغفل عنهن بيوم كافي عليَّ كسرتني وحدة ماريد أنلچم الثانية أريد أرتاح بعد تعبت
- حارث شبيك شنو هالحجي هذا
وخرت منه رجع جرني :- اعذريني
- لتضوجني بعد
لليل يلا رجعنا للبيت دخلتهن ينامن تعبانات من الفرة اجة يمهن نام وجر بان لحضنه :- شو هنا اليوم
حارث :- أهووو هسه انتِ شعليج هم رجعتي تغارين مني اني وبنتي
ضحكت وضمت راسها بصدره طفيت أضوية البيت واجيت يمهم نمت من جهة نورجان ونمنا بليلتها
وياريت ما نمت ولا غمضت عيني ..
حسيت عليه يبوس راسي وجر الغطى غطانا النعاس بعده بعيني غمضت عيوني رجعت غفيت
لهناك وفتحت أتلمس الفراش فارغ باوعت بان ماكو ولا أبوها گمت من مكاني لبست حفايتي طلعت أدورها
شفتها نهاية الممر واگفة بباب غرفتنا صحت عليها مردت
البيت أظلم بس ضوة الغرفة مشتغل شمگعدها بهالليل
مشيتلها منطيتني ظهرها :- مو أصيحلج شدتسوين گاعدة بهالوقت
لزمت ايدها دا أديرها :- مو دا أحاجيـ.....
قطعت حجايتي اول ما اجت عيني على وين مدتباوع
ايدي رجفت رجلي محسيت بيهم بعد أرمش أكثر من مرة ممصدگة اني بحلم لو شنو الحبل معلك بمكان البنكة محاوط رگبته وجهه صاير أزرك
يعني مات حارث ؟ .. صدك عود ؟ .. حارث حبيبي اللي متغفى عيني إلا على صوت همساته مات .. حارث حبيبي افتح عيونك .. هاي ليش وجهك هيج ؟ .. ليش صاير لونه أزرك ؟ .. لا ترى حارث عايش مميت
فقدت ومن گد مجنت فاقدة بيومها ما أدري شوكت بجيت شلون صرخت شوكت التموا عليَّ الجيران شلون أخذوه واني مواعية على نفسي بناتي ما أدري بيهن
وراح حارث ..
راح وعافلي حمل ثگيل على ظهري .. حارث ما يتم بس بناته .. يتمني اني هم .. جان الأب والزوج والأخ والحبيب وكُلشي بدينتي جان حارث
وهسه معافلي منه غير هالبنات أشتم ريحته بيهن
غمضت عيوني عضيت شفتي وفتحتها
نايمات اثنينهن گدامي عالجرباية وحدة حاضنة اللخ
رحت للحمام سبحت وطلعت نشفت شعري مشطته وضفرته لنهايته خليت گتر جريت أحمر الخدود خليت شوي وأخذت حمرة خليت لشفايفي عالخفيف
سحبت واحد من العطور رشيت عطر على مكان النبض
باوعتله بأنعكاس المراية بعده نايم
طلعت من الغرفة جان بعد وقت على گعدته گلت أحضر الريوك على كيفي بدون خبصة اشتهيت لبناتي فطاير جبن وگفت أسويلهن وحضرت الچاي ..
واگفة عالكاونتر حسيت بأيد تحاوط خصري نزيت وهدأت بسرعة من شميت عطره راسه برگبتي
انداريتله مبتسمة :- صباح الخير
فدار :- ول صباح النور
باوعتله بزيه العسكري واگف بكامل قيافته
- شو اليوم من وكت لو متوهمة
- اي عندي شغل بالمركز من الصبح لازم أروح
- لعد والريوك صار ساعة واگفة مكسور ظهري
گرص خدي :- تريگي انتِ والبنات بعد ما ألحك بس صبيلي وياج استكان چاي
طلع للصالة واني طلعتله استكان صبيتله ولحگته
جان ملتهي ديخابر بتليفونه يا هالتليفونات بكل ساعة وكل لحظة الرصيد ميطول عنده كل يومين والثالث
گام أخذ سويچه گال :- محتاجة شي
- لا عيوني سلامتك
- إذا احتاجيتي شي خابريني تادزلج مآب للبيت
سلم وتوكل على شغله رجعت للبنات گعدتهن عفتهن يغسلن ورجعت للمطبخ نقلت الأكل على طاولة الطعام
وگعدنا اني وياهن نتريك أباوع لبان نفسيتها جانت أحسن من الأيام الفاتت وجود اختها مهون عليها
انتبهتلي أباوعلها :- شبيج حبيبتي
شدن :- مبية شي أريد أشبع شوف بوجهج
ابتسمت جرت نفس وگالت :- تدرين هسه يلا حسيت بلوعتج وانتِ تخابرين عليَّ بلبنان واني ما أرد
- مردتج تعيشين هالأحساس وانتِ بهالعمر انتِ ينخاف عليج مو تگعدين تخافين وتهمين بطفل
نورجان :- اني هم أريد طفل أخاف عليه
باوعنالها اثنينا وهي مستمرة تاكل ممنتبهة بان ضحكت
رفعت راسها تباوعلنا :- والله شبيكم حلو هيج يصير عندي بيبي أدير بالي عليه وأنيمه وكل شوي أغيرله
شدن :- وانتِ هاي الفكرة الماخذتها عالأمومة ؟
- اي لعد شنو
- كملي أكلج ماما شلون حتخلفين انتِ وتربين ما أعرف
《 شهربان 》
أحب نصي الثاني اللي ما مهتم للدنيا وعايشها بطريقته
أحيانًا جنت أحسد نورجان على طريقة تفكيرها
شلون هيج متهم لشي لا أبالي تحجي كُلشي يجي بلسانها مرات التصرف بغباء وفوضوية هم مطلوب
عرفت الصار البارحة من نورجان وسالفة أبو زكريا
صح محصلوا الشي اللي يردونه بس كبروا بعيني حيل بعد موقفهم هذا وياي يعني أكو من يعتمد عليه
ليش ميطلع مُتيم اخو شبير مصور التسجيل كامل بتليفونه بليلة الرحنا اني وياه ومآب لبيت أو زكريا
مجان واضح حيل بس مبين كُلشي ومتفق ويَّ خاله يطلعون من الصبح ماخذينه وبوجهم للمركز ..
وبواسطة قوية من فدار وجماعته ماخذ دوريات شرطة ورايحلهم سادين شارعهم هو والولد مجرجريهم كلهم من عمو سالم وعائلته لعمتي أمجاد وزوجها راجعين لبيت ستار زوج عمتي ماخذينه ساحلينا وياهم
عمتي سجودة مجانت موجودة هناك من سامعة بالصار رايحة للمركز وگفت تتصايح ويَّ واحد من الضباط ولازمته شاگة قميصه لزموها خلوها بالسجن
زوجة عمو وبنته طلعوهم بنفس اليوم ورى كم ساعة مالهم ايد بالصار بس الباقين كلهم أسمائهم بالبلاغ
يومين وهم بالحبس مستجوبيهم ومشوفيهم التصوير محد حاجي بعدهم ينكرون إلا عمتي أمجاد من ضاغطين عليها بالحجي گايمة تبجي معترفة
سائليها الطفلة وين ؟
مجاوبتهم :- اجى أبوها وأخذها مني
ليش ما حجيتي من الأول ؟
رادة :- مهددني ما أحجي ولا أگول حتى أمها لتعرف
من عرفت السالفة صار بيها عبد تهسترت ، عبد مختفي ما أدري بيه وين ألگاه ؟ شنو اليثبت كلامها ؟ مصدگت
تلث أيام والرابع بالواسطات مال عمو سالم مخابر جماعته اجوا ويَّ محامي دفعولهم وطلعوهم كلهم
انتهيت بيومها صدقًا ..
جنت گاعدة بالغرفة ماريد أشوف أحد ويگعد ينطيني كلام تافه يبنجني بيه لو أشوف نظرات الشفقة بعيونهم
مدنگة راسي بين رجلي وفاتت نورجان للغرفة وجها مخطوف باوعتلها اجت گعدت يمي بيدها ظرف
شهربان :- شبيج ؟
مدتلي الظرف والأيد الثانية طلقة ايدها ترجف
- جنت گاعدة بالحديقة وانشمروا من فوك السياج
أخذته منها فتحته اجت بيدي صور شهگت وصارت دموعي تنزل مسيطرت عليهم .. صورة بنتي
جانت بحضن وحدة عرفتها من الحلقة البيدها هاي يسر
الصورة الثانية مصورلي الجنسية ( ياقوت عبد الإله ) اسم الأم ( يسر أحمد )....
