رواية سواد الاثمد الفصل السادس والعشرون 26 بقلم نورس

فزت من مكانها :- الأم يسر ؟ .. شلون هيج ؟؟ .. اني أمها .. لا لاا يا ربي دخيلك لا .. بنتي هاي بننننننتي

صارت تصرخ وتبجي بصوت عالي

شهربان :- اني الشلتها ببطني وتعبت بيها .. اني اللي تأذيت وتحملت أذيته والحبس والجوع والمررض شلوووون يسجلها بأسمها ؟ .. شلون تصيييير إلها ؟؟

تحجي وتمسح بدموعها وتباوع للصورة اجتني مدتلياها ايدها ترجف :- هاج شوفي اقري الأسم زين اني مدا أشوف عيوني مغوشة 

اخذتها منها وصافنة عليها أباوع لحالها شلون انگلب

أباوع للصورة وأرجع أباوعلها دموعي بعيني 

گالت :- ها ؟ .. منو الأم ؟ 

رجفت شفايفي الحجاية مطلعت من لساني خايفة من رد فعلها هي حست حجت بصوت خافت :- يسر ؟

هزيت راسي جرت الصورة من ايدي حيل

صرخت :- شلوون هييييج اني أمها والله العظيم اني 

دخلت ماما على الصوت مفزوعة تباوعلنا بخوف

شدن :- شبيجن شصاير 

- راحت بنتي ماما راحت بنتتتتتي .. مسجلها بأسمها ريحانة صارت بأسم مررررته .. أخذوووها من حضني وين أحصلها بعد .. ويييين أروح وأدورها 

گعدت للگاع تضرب برجلها ماما تريد بس تلزمها انگلب حالها گلاب جانت هاي أول مرة أشوف بان بهالحالة 

انطويت على روحي بزاوية الغرفة وأباوع عليها شلون منهارة دموعي تنزل جانت حالتها تخوف عبالك مو هي

ماما تصيح بيها تريد تلزم ايدها هلست شعرها 

- لج تخبلتي اووگفي بس أحاجيج 

دفعت ايدها :- وخررري مني .. أگلها ريحانة راحت بنتي باگووها من حضني .. شسويت حتى هيج يصير بية ؟ .. غلطت ؟ أدري والله أستاهل أتعاقب والله اني أستاهل تعاقبني يا ربي بس مو هييييج .. ورى كل الأذية الشفتها منه تصير ريحانة إلهم واني أطلع منها بالمرض والأدمان لييييش ؟ ليش لييييييش هيج يصير شسويييييت ماما گوليلي شنو الذنب السويته 

ماما وگفت على جهة تعصر بروحها عليها تباوع لحالها ما بيدها شي تسويه انهارت صوتها يگطع الگلب وهي تعاتبنا بكلامها وتعاتب روحها، دموعها تنزل بحرگة 

رفعت راسها ليفوك شهگت شهگة موجوعة من كل گلبها 

شهربان :- عساك يا عبد بحرگة گلبي .. جعل حوبتي بذمتك .. أريييد من الله يشوفني بيك يوم .. كون من أعز ناسك تنكسر كسرة ما من وراها جبر .. الله يحرك گلبك مثل ما حرگت گلبي .. حسبي الله ونعم الوكيل حسسسبي الله ونعم الوكيل عليك حسـ......                                                                        

ضلت تتحسب وتشهك لحد ما وحدها سكتت رفعت راسها لماما عيونها حمر ومورمة وخرت شعرها وگامتها

مدت ايدها :- انطيني .. 

شدن :- شنطيج 

- حبوووب علاج أي شي أريد أنطمر راسي يوجعني 

ضلت ساكتة تباوعلها دموعها بعينها :- بسسسرعة يلا 

مشت عنها تدور بالغرفة حال ماما مجان أحسن من حال بان تبجي بدون صوت وتشيل ايدها تمسح دموعها بسرعة وهي تشوفها بهالحال وما بيدها شي تسويه 

لدرجة تدور بالمجرات والعلاگة مال علاج گدامها عالميز

گمتلها :- ماما هيانة العلاج گبالج 

انطيتها العلاگة أخذتها طلعتلها شريط اخذت منه حبوب ومشت تنطيه إلها گالت :- نورجان جيبيلها مَي

رحت للمطبخ جبتلها بطل ورجعت انطيته إلها دفعت ايدي مقبلت تشرب بلعتهن بدون مَي وتمددت بالگاع

جانت فاقدة تهذي تردد :- مسميها ياقوت .. مو ياقوت بنتي إسمها ريحانة 

نزلت يمها ماما توخر بشعرها عن وجها 

- ليش يماما عالگاع باردة تتمرضين گومي بفراشج 

دفعت ايدها :- وخروا مني لحد يحاجيني 

حجتها وغطت وجها بأيدها صورة بنتها لازمتها حيل 

تنهدت ماما وما لحت عليها باوعتلي :- انطيني المخدة والغطى من يمج

مشيت للجرباية انطيتهن إلها خلت المخدة جوة راسها وغطتها عافتها وگامت منها دنگت شالت صورة الجنسية

تباوع بيها عاقدة حاجبها باوعتلي جرتني من ايدي وطلعنا من الغرفة بلا صوت اخذتني للصالة 

شدن :- هاي الصور منين جابتهن ؟

صرت أفرك بيدي :- اني انطيتها إلها 

- نورجان لتلعبين بأعصابي وانتِ منيلج هالصور 

- من طلعت بالحديقة انشمرت من فوك السياج حجارة انداريت ولگيت الظرف عالگاع ومو بس هذا حتى وياهن طلقة 

فزت :- طلقة ؟ 

- اي هذيج بالغرفة ضلت عالجرباية 

گلتلي أروح اجيبها رحت بسرعة للغرفة أخذتها ورجعتلها

مديتها إلها أخذتها تباوع بيها لونها بهت وجها صار أصفر 

- مسمعتي صوت أحد صاح 

- لا بس انشمرن أخذتهن وفتت لبان

گعدت عالتخم حيلها باد تضرب برجلها وتبجي

- يا ربي هاي وين جانتلي عايزة مصايب النوب تهديدات 

باوعتلي بعتب :- أدري حظي حزمج ورحتيلها للغرفة مو هياني واگفة يمج بالمطبخ جان اجيتيني                                            

من حجت هيج متحملت نزلت دموعي 

نورجان :- واني شمدريني حيصير هيج لگيت اسمها عالظرف ورحت انطيه إلها 

- وهسه عليمن تبجين عايزة اني دتزيديها عليَّ 

- آسفة والله مو قصدي 

هدأت شوي وانتبهلتها تباوع للشاشة مال كاميرات أخذت الريموت مال شاشة گامت ترجع بالتسجيل 

وطلعت اللقطة وقت الجنت گاعدة اني بالحديقة واحد لابس كاسكيته وقمصلة سودة فات من جهة البيت يمشي ويَّ السياج شمر الحجارة والظرف ومشى بسرعة 

عادت اللقطة أكثر من مرة وجهه مجان مبين بالتصوير يمشي مدنك والشفقة جانت مغطية وجهه ايده بجيوبه حركات واحد محسب حساب لوجود الكاميرات 

باوعت لماما بخوف :- منو هذا 

- ما أدري يأمي ما ادري شلون مصيبة يا ربي

مشت للتليفون جابته وگعدت تتصل على عمو فدار انتبهت إلها أطرافها كلها ترجف رد عليها انطته علم بالصار وهي تبجي گلها جايج

جنا خايفين حيل ورد فعل ماما خوفني بالزايد 

من صفنت بيها بيني وبين روحي لزمتني الخوفة صارت تجيني أفكار تزيد من خوفي وعيني عالباب 

بالله لو داخل علينا للبيت وبس احنا هنا شجان صار ؟

ساعة واجوا عمو فدار ومآب عادت عليه السالفة وشوفته التصوير مآب تخبل گام يشيل بروحه ويرگعها

مآب :- هيج عيني عينك بنص بيتنا ويشمر تهديدات والله ما أعديها إلو 

- لا هيج اگف تانشوف شنتصرف 

- أكثر من هيج شنو منتظر يفوتلك للبيت بيدو سلاحو واحنا عندحك عليه حط ببالك يعرف بوكت دوامنا ويدري احنا مو هين والبيت بس حريم وهاي حركتو گرصة إذن إلنا تا يگول أخش بيتكم خاوة وفنو اليحجي

شدن :- بس هذا مو عبد أعرفه مو نفس الهيئة 

فدار :- عجل شنو لبالج بابا يجيج هو للبيت يدري متوعدلو بوحدة من زمان بيه زود خليه يبين وجهو جدامي مو عيدز بجماعتو المخانيث هالمخنث 

مآب :- لا يابا شلون يجيك ضام راسو مثل الواوي 

باوع عمو علينا وحس علينا شلون خايفين 

- بابا لا تهمن ماكو شي هذا حسابو عندي معليجن انتن ما راح يطلع بيدو يسوي شي

- شلون ميسوي شي فدار اليوم تهديد مرة الجاية ينفذ تهديده هذا مخلي بان براسه هو من زمان متوعدلها لو تشوف حالها شلون تهسترت من شافت الصور والنبي تبجي على حالها 

رفع الصورة :- هي بس هاي لو اكو غيرها ؟

- اي اكو وحدة لخ عند بان                                             

- امشي جيبيها 

گامت ماما راحت للغرفة شوي ورجعت بيدها الصورة 

انطتها لعمو فدار :- عجل بنتج ذيج وين 

- انطيتها علاجها ونامت خبلها المجرم 

باوع للصورة عاگد حواجبه :- هي هاي بنتها ؟

تحسرت :- اي 

انتبهت لمآب مدنك يهز برجله فتح أول دگمة من البدلة مثل المخنوك رفع راسه انتبهلي أباوعله عافنا وگام طلع

ضل عمو فدار يطمن بماما ويحجي ويانا يحاول يخفف الخوف والحالة الجنا بيها أخذ الصور والطلقة وگام

فدار :- سهلة وعيونج سهلة كافي لا تبجين دحگي لبنياتج گوي گلبج وسكتيهن ماكو شي أنا أعرف شغلي وياه 

هزت راسها تمسح بدموعها وصانا نقفل البيبان ولو صار شي نخابره بسرعة گال ما راح اتأخر بس أخلص شغلي

فوك نفسية بان المتدمرة جانت الرعبة العشنا بيها يومها محد جان إله نفس ياكل ماما تروح وتجي على الغرفة تشوف بان على نومتها وعمو فدار كل شوي يتصل 

لحد ما اجتني ماما واني بالصالة مدتلي تليفونها

گالت :- شبير من الصبح ديدز مسجات يسأل عليج اخذي حاجيه 

اخذته منها وراحت اتصلت عليه رد :- ها شُبير

شبير :- هلا بهالصوت وينكم يولي مختفين

- ما أدري بالموبايل هسه ماما گلتلي

استغرب :- شبيه صوتج شو مخنوگة 

حجيتله الصار واني ضايجة

گال :- يابا والله هذا لو وگع بيدي إلا أزوعو حليب أمو 

- متنا خوف شُبير ولو تشوف بان شصار بيها من عرفت بنتها صارت بأسم مرته هذيج فقدت فقدت 

- نعلعلة شرفو يول من تالي هاي الكلفة هيج يصير بحالها

- يا كلفة أگله انتهت

- وخالي شگال بالله شراح يسوي

- ما أدري والله أخذ الصور والطلقة وطلعوا هو ومآب 

- خير ان شاء الله يلا عودين انا اخابر مآب وأفتهم منو 

سمعت صوت طگة الجداحة يمه گال :- وينج ..

- ها

- انا جايكم للمغرب هيج بس أگضي شغلي وأرد أناملي ساعة وراي طريق انتِ تحظري تاترجعين وياي للغربية 

گمزت :- لا شُبير عليك الله خليني هنا 

- ميصير يولي صار چم يوم عايفة دوامج وخلصتي العطلة هم هناك تعاي الحگي لمي دروسج الفاتن

- ماريد أعوفهم بس هاليومين خليني عليك النبي

- يابا حرمتي مشتاگلها شلون بالله عايفتني لوحدي عفتر بالبيت                                             

- ليش مو هيام يمك 

- من رد تيم للغربية راحت عندو للبيت 

سكتت رجع يأكد عليَّ :- مثل ما گتلج تحظري تاترجعين وياي 

اختنگت وعيوني انملت دموع 

گتله بصوت مخنوك :- ما ماريد 

سمعته يستغفر 

- ديلا يلا عود أجي ونشوف بلا بجي عاد 

- يعني قبلت راح أبقى ؟

- روحي نورجان

سد الخط رفعت ايدي خليت گذلتي ورى اذني 

مدام لان يعني يقبل أبقى گمت رجعت الموبايل لماما ورحت للغرفة بان جانت على وضعها أخذت مخدة وخليتها بالگاع مددت بصفها ..

من أغمض عيوني ينعاد عليَّ منظرها الصبح وشلون تملخ بشعرها وماما تباوعلها مثل المربطة ايديها متعرف شتسوي رجعت بيّة ذاكرتي ليوم إنتحارها من رفضت ماما تنطيها الحبوب وحبستها جانت بنفس الإنهيار 

خفت حيل عليها ونغزني گلبي ما أتخيلها تعيدها ..

تقربت منها حشگت روحي يمها لزك حتى إذا گعدت أحس عليها غمضت عيوني وغفيت نايمة على نومتها 

الدنيا ليل اندك باب الشارع حيل طلعنا من الغرفة وگفنا بالصالة مرعوبات وحدة تباوع لوجه الثانية بخوف

الدك يزيد عالباب تشجعت ومشيت صحت :- منو 

محد رد فتحته وباوعت صار بوجهي رجال غريب ملامح وجهه مواضحة أباوع لهيئته ضخم لابس أسود بأسود بيده سلاح، شكله جان يخوف من صدك 

دفعني وفات للصالة وأسمع صريخ بان تصيح :- اجاني .. ضميني ماما اجاني .. راح ياخذني ضميني منه 

وماما حاضنتها حيل ودموعها تنزل وتباوعله مشى عليها جر بان من شعرها وسحبها من حضنها وصار يمشي بيها طلعها من البيت وهي تصرخ ...

گعدت بفزة على صوتها وهي تبجي وماما يمها تحاجيها

باوعت لروحي بعدني بالغرفة على نومتي أتلمس وجهي عرگانة حيل وگلبي يدك باوعت لبان بصفي

مسحت على وجهي جريت نفس الخوفة بعدها بية 

باوعتلهن أحاول أركز بكلامهن 

شهربان :- هسه يرجعها يلا والله أموته والله إذا مرجع الصورة منو گله ياخذها شلوون تخلينه

- حيرجعها والله بس انطي مجال لبين ميجي من دوامه

- أريدها يلا أشهركم وأخزيكم والله إذا الصورة صار بيها شي 

- صار تأمرين أمر بس اهدأي 

صاحت :- تقشمرين عليَّ لج شددددن 

- والله ما أقشمر عليج شجاج گتلج بس يجي آخذها منه وأرجعها إلج 

رجعت مددت خلت راسها عالمخدة منطيتنا ظهرها                                          

مدت ماما ايدها لشعرها :- سودة عليَّ يأمي محروك گلبج على بنتج شسوه بحالج هالمجرم الله ينتقم منه 

لليل إلتموا الولد وخالهم بالبيت عمو تيم وشبير هنا 

مشيتلهم للصالة وماما جابتلهم چاي أخذها منها مآب وزعلهم وهي گعدت ديسولفون بموضوع التهديد 

وگفت يم التخم الگاعد عليه شبير حاوطت عكسه 

باوعلي :- ها يول 

- ها 

- شو بالله مدي اصبعج بالإستكان خوطيه 

استغربت :- يا ليش عود

مآب :- تا يگلج الچاي مر وانتِ تحلينو خرب غيرتك جدد سوالفك صارت قديمة

- بين الطمك متنطون مجال للواحد يترومس 

باوعلي عمو تيم گال :- شلونج يولي 

- زينة عمو 

- ما مبين وجهج يگول غير شي

شدن :- مو حقها عالهبطة الأكلتها اليوم وهي عاد منا شلونها تعجبك بهيج سوالف

- الصدك عاد انتن گعدتجن هين غلط بغلط خاصة ورى سوايتو الأخيرة ساعة الجاب ربعو واجوا مسلحين تايهدون عالبيت

فدار :- بعد عش منعوف بيوتنا لخاطر واحد مخنث ما بيه كل غيرة 

- انتَ گلتها واحد عديم غيرة ما يهمو البيت بيه بس حريم ساعة الساعة يجيهن لهين وانتَ ما موجود بالله شنو موقفك لو صار بوحدة بيهن شي

- ايخسى هالحرمة بيه خير يطلعلي وجهو تاعلمو حك الله شلون يصير 

- ما گلنا شي يا خالي الشغلة مو قصة مراجل المثل هذا ما ينحزر شنو براسو شغلو من جوة الجوة والغدر لعبتو مو بعيدة اليوم خلصت على تهديد باجر يجيك مسلح 

- والعمل ؟

- بيتك فارغ ما بيه بس البنات وأمهن وانتَ تكتل يومك كلو بدوامك ما گاعد هين استعجلت من شلت دورية الحماية من باب بيتك 

سحب باكيته طلعله جگارة ورثها وصار يدخن بسكتة 

اندارلي عمو تيم :- اختج وينها ؟

- هيانها گاعدة بالغرفة 

- امشي اندهيها تا أحاجيها

مشيت للغرفة لگيتها متمددة بس گاعدة 

نورجان :- بان گومي عمو تيم يريدج 

اندارت بسرعة :- فدار اجة ؟

- اي هذاك بالصالة ..

ملحگت عليها طفرت بسرعة طلعت من الغرفة رحت وراها وگفت گدام عمو فدار مدت ايدها إله

جر نفس من جگارته وزفره گلها :- هاه ؟

تيم :- لله يا محسنين 

اندارت لعمو تيم انطته خزرة                                            

شبير گله :- اهبده انطتو وحدة 

رجعت اندارت لعمو فدار 

- رجعلي صورة بنتي يلا

باوعلها من فوك ليجوة معاجبه الوضع أشرلها بعيونه على عمو تيم اندارت تباوعله جانن الصور يمه مد ايده للميز سحب الصور وانطاهن إلها جرتهن منه بنترة 

أخذت الصورة البيها بنتها والثانية عقجتها وشمرتها بالگاع واستغربت من مشت گعدت للتخم مگابلتهم 

- سوادين اي والله

بان :- بالله انتَ الأگرع اسكت

شبير :- بيك سكتته

مآب هز ايده :- روح أبو علي بعد شيخلصك 

دنك راسه يحك طرف حاجبه شفته مبتسم 

فدار :- يول شو انتِ ما تحشمين لا جبير ولا غيرو 

- مو شغلك

- احجي عدل تاما أگوم أجيبج بطراك يفر وجهج فر

عمو تيم أشرله بمعنى عوفها 

شبير گاعد عالتخم اللي يم بان شفته عينه عالصورة 

گلها :- بحظج وبختج هاي بنتج ؟ 

مآب :- عش لازم بايگتها 

صفك ايد بأيد :- يول رحنا بيها هاي نسخة من الكلفة 

شدن :- اي وشنو يعني غير أمها 

- دخيلج جنا بمكينة صرنا بمكينتين احنا بوحدة وما خلصانين

رجع يباوع للصورة :- دحك النوب جنها سلبوح سيان مثل أمها

- أهوو شبير صدك چذب 

ماما گوة عليها كتمت ضحكتها وتأشرله حتى يسكت وعينها على بان تدري بيه يحجي هيج حتى يحجيها 

بس لو الحايط رد بان ردت خلصتها سكتة وبالها مو ويانا فد مرة لازمة الصورة عينها بيها بس تصفّن

صارت عيني على عمو تيم بيده الطلقة مدنك يفر بيها بيده عالطبلة الگدامه وساكت يسمع لعمو فدار

- الصور افتهمنا موضوعهن بس الطلقة إلمن گاصدها

شهربان :- إلي

باوعولها اثنينهم رفعت ايدها خلت گذلتها ورى إذنها

- وعش بالله ؟ 

گالت :- هو من زمان گلياها تردين الطفل يضل بحضنج تبقين يمي غير هيج احسبي روحج ميتة وهددني وعاد الحجاية عليَّ أكثر من مرة 

- وهذا كلو وشردتي 

شبير باوع لمآب :- يول مو أگلك كلفة 

- ليش اني شنو عيشتي عنده ؟ مسويني خدامة إله ولمرته وفني لو فتحت حلگي واعترضت على شي يگوله هذا غير الإهاين والضرب وآخر شي ختمها ببنتي بأول أشهر من حملي عيني عينك تجي تگعد العينتين گبالي تگلي الطفل ورى ميجي إلي اني أربيه                                             

شمتوقعين مني أسوي ؟ تدري لو مشاردة بذاك اليوم وطالعة من بيته جان صبحت منتحرة حالي حال ذاك الراح علگله شال بالسگف وعافني ملطشة لعبد وأمثاله

تيم هز راسه :- هي بينت هذا حاطج براسو وحتى الصور إلو غاية بيها عيگلج تردين بنتج هاي هي يمي تعاي وشوفيها يعني يستدرجچ تا تروحيلو 

فدار :- اشتعلت روحو واشتعل الخلفو بگبرو وينو هو غير لو يبين گلبت بغداد عليه ماكو مو هين طافر

- تريد عبد إلزم زلمتو الشمرلك التهديد

- ما مبين وجهو بكاميرات البيت گلت لمآب يدور عالجوارين العندو كاميرات يشوفنا التصوير عسى ولعل تطلع وحدة منهن لاگفة وجهو بس بقت بعد على باجر الوكت تأخر هساع

- أحسن شي تسويه مآب شيصير وياك هم انطيني خبر بقت بعد بس سالفة گعدتهن هين 

- اخذهن وياك للغربية 

من حجى هيج فزت بان من مكانها 

- شنو اخذهن للغربية بكيفكم انتوا شنو ما أروح والله

تيم :- ما عنمشي بالكيف گعدتج هين انتِ بالذات ما راهمة 

- خايف منه ؟

- خايف من منو يولي اعرفي شلون تحجين خايفين عليج انتِ أگلج هذا حاطج براسو يعني ناوي عليج وبگعدتج هين ايدنا مربطة لأن محد يمج 

- بس انتَ انطيتني كلمة ترى عيب عليك مو زلمة اليخلف بحجايته

- لا حول ولا قوة إلا بالله أگلها ثور تگلي إحلبو

- والله ما أروح وياكم ولا أطلع من بغداد مدام بنتي مو وياي حتى لو أطلع من بيت فدار معايزة لبيته 

عض اصبعه وباوعلي :- يول شو ناوشيني نعال من يمج

شدن :- ماما اسمعي الكلام لخاطري ولتأذيني عليج امشي وياي لهناك اني يمج وخلي عمج فدار والولد هنا متكفلين بموضوع بنتج گعدتج هنا شنو معناها وهو كل شوي مسويله سالفة عليج لو صار بيج شي اني بشنو ربحي 

گامت تبجي :- وترديني أعوف بنتي يم واحد مثل عبد يعني انتِ متعرفين عبد منو وأهله شنو متعرفين أخوه عبد الكريم ونفسيته القذرة شنو

- عبد يگوم يگعد يضل أبوها مراح يخلي أحد يتقربلها شعليها قابل وإذا مبقت عنده 

- شو تحجين بكل أريحية ولا عبالك الدتحجين عليها بنتي شنو ماما عبالج اني مثلج ؟ أعوف بنتي وراي وأدور وجهي وأمشي أتزوج وما أدير بال شصار عليها عاشت ماتت انضربت تصخمت ..

مسحت دموعها :- لتخافين اني مو مثلج ومراح أتحرك مناه إذا ما رجعت ريحانة لحضني 

درت وجهي وأشوف ماما عيونها مغورگة وجها باهت حسيتها انصدمت بكلامها وتباوع للوجوه تفشلت            

                                

دارت وجها وفاتت جوة شبير اجته مكالمة گام طلع برة يرد ومآب سوة روحه ملتهي بتليفونه ..

من فاتت ماما جوة نتر بيها عمو فدار

- يول انتِ شلون تحجين هيج ويَّ أمج

- انتَ معليك 

دا يگوم إلها صار بوجهه عمو تيم 

- لا بداعتي عوفها جاهل هي متشوف حالها

- جاهل ؟ هاي جاهل دحك العرامة والصلافة لسانها يهتر عالرايح والجاي ما تحشم أحد حتى أمها ما مخليتلها إعتبار انطينياها تاعيد تربيتها من جديد 

- لخاطري خالي امسحها بوجهي متنعاد بعد

گوة سكته وخلاه يگعد 

اندار على بان :- وانتِ شوية اگضبي لسانج عاذرينج ومقدرين وضعج نگول خطية لا تخليني أتصرف وياج بغير إسلوب 

حجاها بحزم خازرها نظرته المعتادة من يبدي يعصب 

ردته :- مو شغلك 

صاح بيها :- انكتمي لج

- انتَ انكتم 

فدار :- شفت وعتگلي جاهل يول عرنة هاي عررررنة 

أشرلها براسه :- امشي فوتي جوة لتخليني أدحك وجهج تعاي نورجان اخذيها 

مشيت يمها وهي تباوع عليهم خازرتهم لزمت ايدها أخذت صورة بنتها ومشينا للغرفة راحت للچرباية انطوت على روحها وأسمع صوتها تون گامت تبجي 

حجيت وياها نترت بوجهي ودفعتني عنها لازمة الصورة بيدها حيل مردت أضوجها بالزايد عفتها براحتها

بس طلعت دموعي بعيني وخنگتي بصدري من دفعتها

مجانت هيج تعاملنا حيل متغيرة ..

طلعت للحديقة شفت شبير على وگفته برة دا يدخن

شافني أبجي ذب الدخان من صدره 

گال :- ها شبلاج النوب 

- ماكو شي 

- عجل عش تبجين 

- هيج 

مدلي جگارته :- هاج يولي هاج دخني الدنيا متسوى

باوعتله منطيني الأوكي اخذتها منه سحبت نفس وزفرته

هو يباوعلي گال :- خبرة بنات شدن 

اخذني الواهس وهي بيدي سحبها مني 

- دكافي چلبتي

جگارته سودة تموت ريحتها والنفس مالتها صدك يريح الأعصاب شگد صارلي وياه مشفته غيّر نوعيتهن 

سحب النفس الأخير منها وذبها بالگاع داسها برجله 

گال :- يلا حظرتي ملابسج تانطلع وجه الصبح

- شُبيرررررر 

- أهوو بيها راء السالفة انداست 

- عليك النبي خلي أبقئ                                          

- كلها يوم يومين ويجن وراج أمج وأختج ضلتج هين شنو معناها وانتِ عندج دوام 

- اي هو أجي وياهن 

- والغيابات ؟

- عادي مغبت هن كم يوم 

باوعلي وهز راسه :- خوش بس إذا اجيتيني ورى چم يوم وگتيلي يردون تعهد لو يردون ولي الأمر متلومين إلا نفسج هاي انا گتلج

- اي عادي

- عادي تگلي بنت السطل 

ابتسمت وباوعت للسما جانت مغيمة والجو ضباب 

انتبهلته مركز بوجهي عاگد حاجبه

گال :- هاي شنو بوجهج

لزمت وجهي بخوف :- شنو 

- شو گربي ولج

صرت گدامه وهو مدنك عليَّ شو هذا مد ايدك إلزم راسي من ورى وقربني إله باسني من شفتي 

وخر مني ايده جوة حنكي اصبعه يمرره على شفايفي على كيفه غمضت عيوني وفتحتها بهدوء أباوعله 

رجع باسني بوسة سريعة ووخر قبل ليطلع أحد

- أطيب من الجگارة ومحمد

انتبه لرجلي طالعة حافية والجو ثلج 

گلي :- امشي طبي لا تتمرضين 

- هسه بس شويونة

- هي شنو هاي الشويونة امشي فوتي گتلج خاوية بساع تگعين 

واحنا دنحجي طلع مآب من البيت بهمة مستعجل 

اجة لشبير :- امشي وياي شبير

- ها وين مفين ؟

باوعلي :- دمشي وانا أگلك

شبير انتبهلي بعدني واگفة گلي أدخل للبيت وهم طلعوا

ضلت عيني وراهم وهم يطلعون انگلب مزاجي بسرعة طلعة وبيها مآب وشبير يعني ماخذة للشقة وجايب بنات

فتت للبيت دمعتي متشكلة بطرف عيني وضايجة حيل

شافني عمو تيم :- رجلج وينو يولي امشي اندهيه

نورجان :- اجة مآب أخذه وياه وراحوا للشقة جايبين بنات وشرب

اول محجيت هيج فزوا هو وعمو فدار من مكانهم 

عمو تيم شال موبايله وسويچه من الطبلة وطلع بسرعة 

وعمو فدار لزم تليفونه ونازل دوسة ونص على الولد

مفهمت شصاير وليش هيج فزوا ضلت عيني على عمو فدار يتصل على مآب وشبير وميردون مخلى لا فشار لا مسبة تعتب عليه وصاير أعصاب خفت ورجعت ليورى

لحد ما ردوا عليه 

صاح :- وييييينك ابن الخرا .. أنعل أبوك لابو منين ما طلعت .. ثق بالله الكريم يا مآب أحسبلك خمس دقايق إن ما انزرعتوا جدامي انتَ وتكك الآخر أحسب الله ما خلقكم                           

                   

سد التليفون بسرعة گعد عالتخم ينافخ بعصبية ويهز برجله عالسريع جر الگلاص مال مَي شرب منه 

شگول يمكن عشر دقايق لو أقل فات عمو تيم وشبير ومآب يمشون گدامه يدفع بيهم وواگعلهم رزايل 

خلاهم گدام عمو فدار 

تيم :- هاك خالي استلم كسرت عليه بنص الطريق ووگفتو ساحل الأخ وياه ورايحلهم 

جان ديقصد شبير 

گاملهم عمو فدار :- عش تكبر راس يول شحاسب روحك

شبير :- أندري 

- سمعتلك چلمتين وشلت روحك ومشيت شيسموها عودين ؟ مو گتلك انا أتصرف شوفة الحال هاي و نافخ روحك على شنو 

رد شبير گله :- شمدريني 

- بالقرآن يا مآب لو عدت هالحركة نوبة اللخ وكسرت حجايتي ما تلوم إلا نفسك طايح الحظ

شبير :- اي والله أدبسز ساقط اضربو خالي تايجر عدل 

- انتَ اكل تبن الحجي إلكم اثنينكم

مآب :- هذا هو يالچبير تأمر 

- انگلع لشقتك يلا ولتخليني أدحك وجهك

رفع ايده وطلع يفر بالسويچ مال سيارة 

وگفت يم شبير گتله :- همزين عمو صيح عليكم 

فتح عيونه :- عش ولج 

- لعد رايحين للبنات متستحون

- يا بنات هذن يولي شاكر وولدو 

عقدت حاجبي :- يا شاكر ؟

عض شفته :- أنعل شرفك شبير وأنعل قسمتك المفينة

باوع عمو تيم للساعة بيده

- هم يلا احنا نطلع بعد

- ضل للصبح وتوكلوا 

- لا مترهم بعد حاسب حسابي وجبت سيارتي وياي تاطلع بيها

باوعلي شافني واگفة :- يلا يولي تهيري تانروح 

- لا عمو اني راح أبقى هنا يم ماما وبان

عقد حاجبه :- وعش يابة ؟ 

- من يجوون عود أجي وياهم حجيت لشُبير وقبل

- أطيح حظج انتِ وشبير امشي بساع جدامي وراج كومة مال دروس وإمتحانات گضيتيها غيابات 

باوعت لشبير مدمعة سوة روحه مسمع ولا عبالك أباوعله عمو فدار وتيم طلعوا برة مشيتله وگفت گدامه 

نورجان :- لعد انتَ مو گتلي ابقي 

- اي وهسع انا حجيت ابقي منو لازمج

- مسمعت عمو تيم شگال 

- يول هذا أخاف منو ما ينرد 

عرفته ديضحك عليَّ هو أصلاً مصدك رايدها من الله على الله أروح وياهم رحت لماما أبجي گتلها تحجايهم هم مقبلت وهم حطت حجتها الدوام والمدرسة 

أخذت جنطتي لميت ملابسي ودموعي تنزل وأشهك 

اجاني صوتها من وراي 

بان :- شبيج 

انداريت دموعي بعيني :- راح أروح ومحد ديقبل أبقى هنا

سكتت شوي تباوعلي

گالت :- ميخالف روحي لحگي دروسج الفاتتج حرامات يتراكمن عليج 

لميت ملابسي وشلت جنطتي على ظهري واني على بجية وحدة مسحت دموعي ومشيت لبان دنگت بستها

جانت صافنة ما انطت أي رد فعل ودعتها وطلعت برة

عمو تيم بسيارته وشبير مشغل السيارة وفاتح الباب واگفلي وعمو فدار وماما واگفين يم باب الشارع 

حضنتها وعمو فدار يهز بيده لأن شافني ابجي

- مزعط وحك ربج فلا تكبر

شدن :- خابريني ماما لتگطعين عينج من نفسج وانتبهي لدروسج يلا يعيني 

هزيت راسي ومشيت صعدت يم شبير عمو تيم مشى قبلنا وشبير رفع ايده أشرلهم وحرك السيارة ...

       ...《 شدن 》 ...   

عيني على سيارتهم وهي تبتعد انتبهتله عينه يمي

گتله :- ها ؟

- گعدتج هين يمي أريح إلي بس گعدتج بالغربية أريح وأأمن إلج ولبناتج 

- يعني تريدني آخذها وألحگهم 

جر نفس طويل وسد باب الشارع وفتنا اثنينا نمشي

فات هو للغرفة أخذله ملابس ودخل للحمام يسبح

أباوع للبيت وللغرفة أحس حيطانها صارت دتخنگني النفس ضاك عندي وصدري اختنك ردت بس هوا 

مديت ايدي أفرك بصدري غمضت عيوني رفعت راسي 

متحملت گمت من مكاني للكنتور جريتلي قمصلة من ملاته لبستها فوك ملابسي وطلعت برة للكليدور جريتلي شوز من الكيشوانية دنگت لبستها وطلعت من البيت

صرت أتمشى عالرصيف وعبرت شارع بيت فدار ما عندي وجهة معينة امشي لوين متاخذني رجلية 

ردت بس أشتملي هوا نظيف اختنگت جوة ..

ايدي مچتفتها من البرد ومخلية كبوس القمصلة على راسي مدنگة راسي للگاع حتى مدا أشوف الگدامي 

الشوارع شبه فارغة دنيا ليل وسيارات قليلة تتخاطف عالشارع العام واني أمشي بين السايدين 

دموعي گامت تصب من وحدهم 

هو الصوج مني ؟ ..

اني قصرت وياهن بشي ؟

من ورى ممات حارث واني شايلتهن بعيوني وحاولت هواي حتى ما أعيشهن حياة ثانية ورى وفاة أبوهن بقن مدللات وبقن اللي يطلبنه يتنفذ وأگلهن حاضر وتأمرن 

كُلشي اشتغلت وتحملت حجي أشكال وأسمع وأعبر لجل عيونهن جبتها من الصالونات لمعامل الخياطة وأخذتلي فترة اشتغلت سكرتيرة بعيادة لحد ملگيتلي وظيفة تناسبني بشهادتي بالقطاع الخاص وكملت بيها

جنت رايدة بس أسد حلك فؤاد وسالم ويبعدوني عن فكرة الزواج حتى لحد يسحبهن مني بس مخلوني والله

بكُلشي جانوا مخلين عثرة گدامي هذا يريد فلوس وذاك يريد البنات لو تعاي أتزوجج واني جنت لوحدي 

كل السويته علمودهن حتى زواجي من فدار بالمرتين جان لمصلحتهن هن قبل ليكون بمصلحتي ورغبتي جنت محتاجة سند وظهر قوي واحد يوگف بوجه سالم

ومجان گدامي خيار غير الموافقة ولو صحلي خيار غير الزواج جان سويته بدون ما أفكر، ما أگول حبيته إنسان أحترمه إله وگفات وصاحب أفضال عليَّ ما أنكر

تلومني على زواجي منه ليش ؟ ليش عبالها اني من قبلت جنت مرتاحة وهي مو يمي ؟ متعرف شنو الموقف اللي انحطيت بيه يومها جبرني أقبل بالعقد

وگفت مسحت دموعي وخليت ايدي بجيوب القمصلة 

باوعت للشارع، يمكن إهتمامي وحرصي الزايد بنورجان ورى الحادثة الصارتلها خلاني أهملها وأنساها ما أدير بال لنفسيتها بوقت الجانت هي أكثر وحدة محتاجة إهتمام ومداراة خاصة ورى وفاة أبوها ..

جريت نفس طويل ودرت وجهي كملت مشي بالشارع حايرة بأمري وبضيمي أسولف ويَّ روحي مثل المخبلة

سمعت صوت هورن من ورى سرعت مشيتي بلا ما أندار يا مكثر الملطلطين بالشارع هيج وكت 

باوعت گدامي شارع أول مرة أدخل بيه وأشوفه

دا أمشي ايدي انجرت حيل من ورى وأباوع وألگي فدار بوجهي عيونه صايرة بگصته واني منا جنت باجية 

فدار :- شعندج مفيييييينة للشارع هساع ؟؟ يووووول تدرين الساعة بيش هسسسسه ؟ وين موليييية 

مرديت دفعني من جتفي للسيارة :- اصعدي خلصيني 

ركبت السيارة وهو صعد رگع الباب حيل صاير أعصاب

حرك راجع للبيت وجاب الطريق يصيح متخبل شلون طالعة بهالوقت طول ما هو يحجي اني ساكتة 

عيني بالجامة دموعي تنزل من شافني هيج تنرفز بالزايد وگلب على لبسي والله شنو طالعة بالبنطرون 

جزعت انداريت عليه صحت

شدن :- اختنگتتتتتت يا بشر مخنوگة طلعت أشتملي هوا ما كفرت وهيانة لبسي گدامك عريض ومستور 

- لا ترفعين صوتج لججج لا أفر وجهج فر احجي عدل

- دا احجي عدل انتَ دتبالغ برد فعلك عبالك اول دتشوفني بهاللبس 

- أباااااالغ ؟ طالعة بالوحدة ونص بالليل للشارع وتگولييييين تبالغ يا مگرررررن هذا العيقبل حرمتو تطلع هالشكل بهيج وكت شنو صغيييرة انتِ ما تدرين الشارع لام شكو سگط وزبالة بهالساعة ؟؟ لج عقل ما ضل براسسسسي من شفت باب الشارع مفتوح

سكتت دايرة وجهي عنه وهو هم من وحده سكت بعد

بس أعصابه براسه نفسه جان عالي رجعني للبيت 

نزلت وهو وراي دخل سيارته للگراج وسد الباب ولحگني للغرفة نزعت القمصلة رجعتها ومشيت طلعتلي ملابس ورحت للحمام ردت دوش دافي يهدأ أعصابي 

طلعت المنشفة على راسي أطگطك من البرد هو جان متمدد عالجرباية يسلت بهالجگاير وايده ورى راسه

گعدت عالمراية أنشف بشعري وعيني كل شوي تخطف عليه بنظرة سريعة بأنعكاس المراية ألگاه ديباوعلي 

نشفت شعري بالسشوار عالسريع ومشطته عفته مفتوح على طوله بعده شوي بيه رطوبة سحبت مرطب رطبت بيه ايدي ورشيت عطر گمت طفيت الأضوية 

مشيت للجرباية مددت وجريت الغطى عليَّ انديته ظهري ضل التيبلام اليم الجرباية مشتغل ضواه خافت 

سمعته جر نفس طويل گال :- زعلتي مني ؟

- لا 

- عجل عش منطيتني ظهرج 

حجاها ومد ايده صار يمررها على كتفي 

- ماكو شي 

- مقهورة من حجايتها مو 

انداريت عليه بلا ما أرد وجهه قريب عليَّ يباوع بعيوني 

تقرب طبع بوسة على خشمي ونزل باسني طرف شفتي راسه برگبتي يشتم بيها متحملت نزلت دموعي 

حس ابتعد بسرعة يباوعلي 

- شبلاج يولي ومحمد سودنتيني 

گعدت لحيلي أبجي سحبني لحضنه صرت أحجيله 

شدن :- ليش صايرة مدا تتقبلني بشنو غلطت اني والله مقصرت وياها تلومني لأن عفتها ببيت عمها بيوم الشردنا اني ونورجان واجيتك بس معفتها رجعتلها بيومها لو جنت ماخذتها وياي جان ابن عمها خرب عليَّ الأول والتالي وراح بلغ أبوه وتالي اثنينهن يرحن مني محسبت حساب سجودة تدك الناقصة وتخليها بمكان أختها كل وبالي اني مأمنة عليها أثاري شمرتها بيدي للنار

- يول هي ضايجة من زواجنا وضايجة مني انا ما جاي تتقبل وضعنا سوية 

باوعتله :- لتلومها فدار متعرف هي شگد جانت متعلقة بأبوها وشلون جان مدللها ومضايجة منك بنتي متعرف تكره أحد حتى من انفتح موضوع زواجي من سالم انطت نفس رد الفعل مدتتقبل يصير بحياتي رجال ثاني غير أبوها وياخذ مكانه وهمات ..

وخرت شعري عن وجهي وكملت كلامي 

- احنا زواجنا جان بوقت غلط هي ضايعة ما أدري بيها وين ما وين بس ظرفي بيومها جبرني أوافق 

رفع حاجبه :- هاه يعني حظرتج مجبورة عليَّ ؟ 

ضحكت ودرت وجهي مسحت دموعي 

- لا مو هيج قصدي بس التوقيت جان غلط وانتَ بالأصل جنت مفاتحني بالموضوع قبلها واني أجلته لحد منلگي بان بس هي صارت بعد 

رجع ظهره تمدد وسحبني بحضنه راسي على صدره 

- بنتج مصيرها تتقبل زواجنا هي هساع ما واعية عطيها مجال تصحى وتگوم على حيلها 

باس راسي :- نامي ولا تفكرين زايد ذبي حملج عليَّ ولا تهمين ما دامني بگربج 

كلامه ريحني وعلى البجي البجيته ارتاحيت شوي وحسيت روحي فرغت البداخلي ونمت يومها بحضنه 

لهناك وفزيت على صوت الجامع وهو ديكبر لأذان الفجر 

الضوة صاير بوجهي وفدار مو بمكانه شفته طلع من الحمام ايديه وراسه مبللين أخذ سجادته فرشها 

جنت حيل بردانة ملفلفة روحي بالغطى والنومة بعدها بعيني بس منطاني گلبي أرجع أنام وأفوت وكتها 

گمت للحمام توضيت وطلعت لبست الإيزار مديتلي سجادة ووگفت أصلي وراه مكتفة ايدي ..

كملنا هو رجع للچرباية تمدد ينام ساعتين قبل ليگعد لدوامه واني گمت رحت أشوف بان بالغرفة البصفي

فتحت الباب الضوة مشتغل صار بوجهي نفس منظر الشال المعلك بالسگف أريد أمشي ما أگدر باد حيلي

صارت عيني بالغرفة عيوني مغوشة گد الدموع التجمعت بيها أدورها صرت ما اشوف گدامي

دخلت لازمة گلبي وأحجي بين وبين روحي وأدعي رب العالمين .. ربي لا تفجعني ببناتي ربي مالي غيرهن فدوة لأسمك أموت لو صار بيها شي والله 

هي لحظات بسيطة جانت عليَّ بساعات لحد مصارت گدامي گاعدة بزاوية الغرفة حاضنة روحها عيونها حمر

غير لو رجلي تعيني بعد وگعت للگاع انتهيت لحظتها 

رفعت راسي باوعتلها عينها عليَّ ساكتة 

- ليش هيج ماما لييش .. شسويتلج حتى هيج تأذيني وتحرگين أعصابي .. اني عايزة قهر ؟ .. عايزة هبطات وحرگان أعصاب ؟ .. أذيتج ودترجعيها إلي .. احجيلي لتسكتين تفرفحيني تحرگين گلبي بالزايد

صارت تبجي بلا متحجي بس صوت نشغاتها يوصلني 

على صوتي اجة فدار شاف وضعيتنا وشاف الشال معلك

تخبل اگلب علينا صياح راحلها لزمها من ملابسها رفعها من الگاع يعت بيها ويصيح وهي تشاهك بجي  

صاح :- يول هاي شنووووو انتِ شمفيييينة شمصخمة بحظج هذا المعلگتو شنوو ولجججج

جابها براشدي :- احجججججي طايحة الحظ

ما حجت ولا فتحت حلگها وصوت بجيها صار عالي 

نترها من ايده وصعد عالكرسي المخليته يفتح بالشال ومستمر غلط وصياح واني گاعدة على جهة عيني عليها

نزل الشال شمره بصفي صاح :- هي هاي سوايييية بنية متربية ؟ معلگتلها شال ولج تاتنتحرر والله لو گايلتي ما گصرت بيها أحطلي طلقة براسسها أريح إلها وإلي 

مجان عندي شي أحجيه أدافع بيه عنها معرفت ساعتها شنو أتصرف راسي فارغ كل فكري بيها وبمنظر الشال 

رفع ايده بتهديد :- دحگي ولجج هاي بنتج انا بعد ما أتحملها أكثر من هيج كافي عاد مصخت ما دامها بهذا الحال وعگلها مو براسها ما تضل عندي هين 

گمت :- يعني شتريدني أسوي وين أوديها 

- البارحة تيم حاجاني طالع ببنتو لأربيل عندها مراجعة دكتورها هناك تاخذين هاي الخبلة وترحين تشوفيلها چارة شوفي شتسوين تدخليها مصح 

- مصح ؟ كل عقلك أدخلها مصح متعرف انتَ هنا شلون يعاملون المدمن هو والميت سوة لا أكل بيه خير لا رعاية لا مكان نظيف تمووت هاي متتحمل 

- مو شغلي بقت يمج تردين تعرضيها على دكتور مختص بنتج وانتِ حرة أنا بعد ما أستحملها أكثر من هيج كافي عاد جززعت روحي وأگول تعقل وهي تزيد

طلع وهو يدردم بصوت عالي :- ما مجبور انا أبتلي بيها تروح تسوي بروحها شي وتبليني شگلك گاعدة ببيتو 

كل هذا الحجي واللوم بلعته وسكتت، شريد أحجي ؟

صدك هو ممجبور بيها مدامني اني إمها اني المسؤولة عنها وعن تصرفاتها وهي بهالحال والظاهر صدك تأخرت هالمرة وماطلت بموضوع علاجها وهاي النتيجة 

گمت أخذتها امشي بيها للحمام جانت فاقدة شهگتها تطلع من كل گلبها صرت أحسها مواعية عاللي ديصير

غسلت وجها لميت شعرها ورجعتها للغرفة نومتها بفراشها واني يم راسها وضليت يمها اليوم كله معفتها

اليوم الثاني ضليت ملازمتها اليوم كله خفت لا تغفل عيني وتسوي شي بروحها فدار جان طالع بشغله 

الساعة جانت أربعة العصر الشمس طالعة خليتها تگعد بالحديقة شوي على ضوة النهار وكل شوي أطلع أشوفها

رحتلها جانت گاعدة عالمرجوحة تصفّن 

أول مشافتني گمزت 

شهربان :- كافي عاد بزعتيني كل شوي جايتني كل شوي بوجهي ترى مو مخبلة اني مراح أسوي شي بديتي تخنگيني ترى 

- وشدعواج هيج منفعلة مرايدة منج شي سويت كيكة واجيت دا اسألج إذا تردين أجيبلج

سكتت ورجعت گعدت مكانها عاقدة حواجبها مطنگرة

اعتبرت سكوتها موافقة ومشيت بسرعة للمطبخ جبت الماعونين مال كيك اللي محضرتهم أخذت الصينية وطلعت يمها للحديقة گعدنا عالطاولة البرة 

صبيتلها عصير وانطيته إلها صارت تاكل ارتاحيت من شفتها بهالحال مفتحت وياها موضوع عالصار البارحة 

انفتح باب الشارع وفات مآب شافنا بالحديقة اجانا 

مآب :- ها الله يساعدهم 

- هلو عيني شعجب شو هنا 

- أبوي دزني علمود الكاميرات مال جوارين

- اي وشصار وياك ؟

مآب :- أخذت التسجيلات وطالع بيهن بوجهي للمركز گعدت راجعتهن وجهو مبين بچم لقطة بس التصوير مو هالگد جان واضح تا أسحبلي چم صورة إلو وأوضحها ومن باجر طالعين تاندور عليه

- وخما احد من الجوارين اعترضكم مثل ذيج المرة 

- لا وين أصلًا شارعنا كلو رتب من جماعة أبوي ما قصروا تعاونوا وياي من عرفوا بالصار 

- وينلگي مو ؟

أخذ الشوكة گص قطعة كيك من ماعون بان أكلها

گال :- ينلگي ينلگي وين يطير قابل يوم يومين اسبوع مصيرو واگع بيدي حتى لو أنشر صورتو بصفحة وهمية عالفيس إلا ما يطلع واحد اثنين يعرفوه

- الله يسهللكم 

انتبهلتها عينها عليه مركزة بكلامه وهو أخذه الواهس ياكل بالكيك من ماعونها گتله :- تريد أگصلك قطعة ؟

أشرلي بيده لا وهو ياكل جر گلاصها يريد يشرب ضاجت

صاحت بيه :- هييي انتَ شبيك شبيييك شهاللعبان نفس

مآب :- شدعواج شنو هالنحاسة 

حجاها ورجع مد ايده يريد ياخذ الگلاص مخلته لزمت ايده تعاندت وياه شو هاي شيلي ايدج واشمري الگلاص والبيه بوجه الولد فز بسرعة يرفع بملابسه 

صاح بيها :- وثول

- الثولك 

خزرتها :- بان شبيج شهالتصرفات 

- اني لو هو مدتشوفيه 

- ام عين الضيگة هي لگمتين كيكة مطيرة تلث أرباعها وشربة عصير شدعواج بين الطمج اي والله

- بين الطمك انتَ 

عافتنا وفاتت جوة ضايجة وگفت تعذرت منه وهو يضحك على خبالها راح للمغسلة ينظف قميصه 

وگفت ألم بالمواعين وأشيل الگزاز من الگاع 

رجع گال :- تيم راح يجي بالليل تايحجي وياج على روحتكم لأربيل

- اي والدك فاتحني بالموضوع

- يعني قابلة تاخذيها وترحين

- قابلة لويش ما أقبل بس خلي تخلص من هالسم البجسمها مدتشوف حالها بس خوفي منها هي لو دگت رجل متروح 

- مو بكيفها غصبًا ما عليها تروح لهناك شنو عاجبها حالها هالشكل حالها حال المسودن 

- ما أدري صايرة متتحمل بس أحاجيها تگمز بوجهي

- اتركي الموضوع لأبو علي هو يعرف شلون يحاجيها بأسلوبو تايقنعها 

شال تليفونه :- يلا تأمريني بشي ؟

- لا عيوني سلامتك 

سلم ورجع طلع 

بالليل مثل مگال اجوا فدار وتيم للبيت سوية هي جانت بالغرفة گاعدة راد يشوفها رحت صحتلها مقبلت

عاد گام هو للغرفة فتحت الباب وسويتله مجال 

شدن :- تفضل هيانها گاعدة 

فات وهي تباوعله دارت وجها تنافخ 

- استغفر الله هم هذا الأگرع

تيم :- شبيج لج 

- لك بابا روحوا ماريد أشوف أحد ولا أريد أسمع شي ليش مدا تفتهموون شنو هاللزگة هاي

- يول احجي عدل انا فوك عمرج عمرين عش تخليني أهينج ؟

- اطلع بررررة يلا .. اطلع دا أگلك .. روحوا ماريييييد أسمع لأحد .. خبلتوني ليش تلحووووون .. روح يلا وليييييييييي .. ماريد أشوفك ماريد أشووووف أحد

تحجي وگامت عالميز تواليت شالت الغراض العليه تشمر بيهن بالگاع اجيت أروحلها أشرلي بمعنى عوفيها 

ضليت واگفة بمكاني وعيني عليها خايفة لتلوح رجليها گزازة تهسترت علينا تشيل وتشمر بنص الغرفة 

- يلا لك يلا امشي الطع 

هز ايده :- سوادين اي والله 

فات للغرفة جر الكرسي گعد عليه 

گلها :- دتعاي دحگي شجبتلج 

- روووح ماريد شي

- هاه حتى هاي ؟ 

حجاها وطلع لهاية من جيبه شوفها إلها شمرها عليها 

لگفتها :- هاي لهاية ريحانة شجابها يمك 

- انتِ ناسيتها بسيارة مآب ذاك اليوم من جبتج لبيت خالي خليتها عندي أحسن متضيع وتطلع سوادينج علينا 

سكتت عافسة وجها رجعت شعرها ليورى وتباوع عينها باللهاية البيدها أشرلها تگعد گباله عالجرباية 

- تعاي عندي حجايتين وياج وأروح ماريد منج شي

هدأت فجأة بطريقة غريبة وسمعتله مشت گعدت گباله واني واگفة بالباب مكتفة ايدي وأباوعلهم 

باوع للهوسة والگزاز اللي متناثر بالگاع 

تنهد وگال :- دواؤكَ فيك وما تُبصر .. وداؤكَ منكَ وما تشعُر .. وتحسبُ أَنكَ جرمٌ صغير .. وفيكَ انطوى العالمُ الأَكبر

باوعلها :- هاي الأبيات لأمير المؤمنين علي بن أبي طالب سلام الله عليه البيتين الأخيرات كفيلات بأن يوضحلج عظمة الإنسان وقدراتو الهائلة اللامحدودة وأنه كل إنسان بداخلو عالم كامل وأنه أفكارو معتقداتو تتفاعل ويَّ محيطو ودائرتو وهذا يعني إن البني آدم يگدر يغير واقعو بتغيير نفسو وأفكارو داخليًا

رجع ظهره ليورى وكمل كلامه :- ماريد أذكرج بالعملتيه البارحة بس حطي ببالج هالحجاية ترى النفوس تتغير والأفكار تتغير أغلب الأشياء اللي نسويها بنزوة وقتية  نندم عليها بعد مدة 

عرفت شنو ديقصد رجفت ايدها وهي توخر خصلات شعرها عن وجها ورى اذنها وغورگت عيونها بالدموع

بان :- ميهمني بعد أي شي بنتي وراحت مني صحتي وخسرتها اني نفسي مدا أعرف شنو دا أسوي وشتصرف حتى من علگت الشال مجنت واعية على نفسي إلا ورى مدخلت ماما الغرفة ما أتذكررر حتى شنو صار وراها

- وعاجبج حالج هالشكل ؟ 

اختنگت :- لا 

دنگت راسها نزلت دموعها رجعت تباوعله

- شسوي إذا مضلت سالفة ولا مصيبة ما انحطيت بيها كلما اوگف على رجلي ترجع الدنيا تدگني بوحدة أقوى من أختها شنو عيشتي اني وكل هالمصايب فوك راسي شنو شفت من عمري ؟ شفتهمت من حياتي صار سنتين

- رب العالمين يگول بكتابو ﴿لَقَدْ خَلَقْنَا الْإِنْسَانَ فِي كَبَدٍ﴾

والكبد هو عناء ومشقة المؤمن دائمًا مبتلى بهاي الدنيا  (يبتلى المرء على قدر دينه) فكري بكل شي إلا الأنتحار

لأن مصيرج راح يكون معروف وهو النار انتِ تردين تخلصين من هم الدنيا تا ترتاحين بس ثقي ما راح تلگين الراحة لأن وراج عذاب وهذا العذاب اللي انتِ بيه حاليًا هذا كلو أجر إلج وهو فترة مؤقتة ما يضل للدوم

الرسول عليه أفضل الصلاة والسلام يگول المسلم حتى الشوكة اللي يشاكها إلو بيها أجر فشلون وانتِ عايشة بنص هاي الأشواك ؟ اصبري واحتسبي لأن الله يگول ﴿إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ﴾ ..

- وليمتى يعني ؟

- لحد ما ربج يفرجها وإذا اجتج فكرة الأنتحار هذا يعني بعدج عن رب العالمين الدنيا بيها هواية أشياء بس الأنغلاق عالذات شي فضيع روحي أطلعي افتري شوفي ناس جدد شوفي أماكن جديدة عش هيج منطوية على روحج ؟ لا تعزلين نفسج العزلة تقتل المعزول 

- وتشوفني بحال طلعة وبنتي مو بحضني ؟ 

هز راسه :- بنتج تردلج حجيتها إلج وأرد أحجيها لو تضل هالسالفة آخر شي أسويه بهالدنيا أرجعها يعني أرجعها وعلى هالشارب بعد 

- گول والله 

- يول عطيتج حجاية زلم  

- شلون وعبد مختفي 

- شلون معليج خليها يمي انا أعرف شلون أگع عليه 

گام وگف واندارلي :- يلا ام بان بعد انتوا تجهزوا هاليومين يصلكم تليفون مني جايب بنتي وجايكم تانتوكل لأربيل بعد 

بان :- ماريد أروح لأربيل خليني هنا 

- وشلون تردين تتعالجين بالله شفتلج هناك دكتور زين 

- هنا أتعالج عادي 

- خالي بعد ميريدج ببيتو حگو سودنتيه للزلمة 

فدار :- خوب انتَ تدور تدور وترد تحطها بوجه فدار 

اندارينا عليه تيم ضحك وفدار يهز بيده

- من زود المحبة البينكم خالي

- ماريد لا تحبني ولا أحبها بس خلي تچفيني شرها 

بان :- ترى معايزتلك هسه ألم هدومي وأطلع 

- وين تردين تفينين هالنوبة ليا دولة 

- معليك عسى ما للشارع 

- لاه نچرة 

تيم :- دگعدي اگعدي بس لتتهورين تطلع للشارع هي 

- اي معليكم انتوا أروح أدور بنتي معايزة لأحد

- يول انتِ لبالج انا ما أگدر هساع أطلع مجانو اليتسمى رجلج وأروح أجيب بنتج من بين عيونو 

- لعد شمنتظر متسويها 

- لنفرض جبتها وثبتنا بالمحكمة هي تصير بنتج ببالج المحكمة راح ترضى تسلمج الحضانة ؟ 

صفنت بوجهه :- اي اني أمها أحق بيها 

- عجل انتِ قشمر لأن بهذا حالج انتِ بنظر المحكمة أم مدمنة يعني غير مؤهلة للحضانة تايسحبوها منج مثل الورد ويعطوها لأبوها وفنج لو دحگتي بنتج بعد 

ضلت ساكتة تنهد وحط ايده بجيوب بنطرونه

گلها :- انا حجيت العندي وانتِ بكيفج بعد تردين أردها إلج جم يوم وترد تنوخذ من حضنج لو تصبرين فترة تتعالجين خاطر تبقى بنتج عندج ولا تفكرين بعاطفة ابني عقلج قبل عاطفتج خاطر تعرفين تتصرفين صح

گعدوا فدار وتيم بالصالة وهي رجعت لفراشها تضرب صفنات فر راسها فر بكلامه وين الصياح والعناد وين حالها هسه مگرفصة على روحها وهادئة تفكر بالحجاه

لميت الگزاز والغراض البلگاع قللت الأضوية عفت الباب مفتوح شوي وطلعت منها خليتها براحتها تراجع نفسها

من گام تيم ديطلع وصاني أتحضر عالخميس يجينا 

شدن :- وبرأيك حتقبل ؟ 

- مو بكيفها غصبًا ما عليها ترضى لو أعرف أجرها جر من شعرها إلا شنو حالها هذا وحدة بعمرها كل ساعة والثانية مسويتلها طرگاعة بروحها وين تريد توصل 

تشكرت منه هواي سلم وطلع بسيارته 

ثاني يوم أخذني مآب وأخذتها گوة وياي دا أجيب ملابس إلنا حنضل فترة هناك الجو يگص گص بأربيل ضعف البرد اللي هنا وهي ملابسها قليلة 

ورى يومين اجة تيم بسيارته وجايب در وياه احنا تحضرنا صعدنا جنطنا بالسيارة وطلعت لازمة بأيدها 

فتحت الباب صعدت يم در بلا صوت واني ركبت گدام

تيم وخاله ورانا بالحديقة يحجون بيناتهم 

در تباوعلها الضحكة بوجها سلمت عليها ما ردت 

انداريت عليهن :- اعذريها حبيبتي شوي نفسيتها تعبانة ومالها خلك سولفيلي انتِ شلونج 

ابتسمت :- الحمدلله زينة فگدناج هناك عمة

-حبيبي فدوة لعينج 

مآب لازم الباب من صفحة در 

گلها :- ديري بالج يولي ترى ماخذين وياج ذيبة مسرحة لا تلوحج عضة منها 

باوعتلها بخزرة وسكتت 

رد :- عابت هالوجه همزين مولية تاخلص منج 

بان :- ديلا عاد شلون موتة روحي حتى أگعد يمكم انتَ وأبوك 

فدار واگف ورى مآب سمعها 

عض ايده :- هم ردت على أبوه يول انا لو ما محسب خاطر لأمج جان من زمان عطيتج چلاق يزتج على عمج

- دصبرلي خلي أرجع إذا مطلگتها منك اتفل بوجهي

- دمشي لج مزعط 

- اني إلك 

أأشرلها أعض بشفتي انهدت بلسانها عليه وهم يضحكون

 

تسالموا صعد تيم شغل السيارة

وتحرك مبتعدين عالبيت

... 《 شهربان 》 ...

وصلنا لأربيل مُتيم جان ماخذ شقة صديقه منطيه مفتاحها ويَّ وأثاثها دخلنا أول يوم متكسرين من الطريق

الشقة بيها ٣ غرف وحدة منهن سويت حمامها خاص وگعدة بسيطة مثل الصالة بس على أصغر 

وباقي الغرفتين عادية وحدة منهن سريرين 

اخذنا احنا ام الأسرة الأثنين والأگرع گعد بالسويت لوحده وضلت بنته بالغرفة اللخ من دترتب ماما بالملابس وتطلعها من الجنط صفنت شوي 

شدن :- أگلج عادي أجيب در هنا يمج ؟

- وانتِ وين ترحين 

- هنا أنام بيناتجن 

- وشنو هالوزى غير ذيج غرفة فارغة تگعد بيها 

- زحمة هو عأساس جايب عمته وياهم تدير بالها عليها بس من گلي أروح وياه عافها بالبيت يعني محسب حساب اني بمكانها 

- خليه هو يدير باله على بنته إذا هيج شعلينا احنا 

- لا خطية بنية هي تحتاج حمام تحتاج غرض نسائي تستحي تسولف لأبوها عاد احنا هنا يمها واني بيناتجن

مرديت تمددت عالچرباية وجريت الغطى دايرة وجهي 

هي طلعت من الغرفة راحتلها دقايق ورجعت أسمعها تسولف وياها اني جنت منطيتهن ظهري أسمعها تگلها

در الزهراء :- أخاف بان تتضايك مني 

- لا حبيبتي بالعكس خليج ونس وياها بالغرفة انطيها بس هالكم يوم تتعود عليج وتتعودين عليها 

غمضت عيوني تعبانة وراسي مأذيني بس النوم طغى 

غفيت شوي وفزيت ورى ساعة أقل أكثر ما أدري بس گعدت مشتعلة نار ألزم بشعري أزلغ بأيدي وماما يمي 

ارتاحينا يومين وبدا تيم ياخذ بنته لدكتورها ويرجع العصر ياخذنا اني وماما للطبيب الأخصائي النفسي 

روتينا صار عبارة عن مراجعات للدكاترة وتحاليل أشكال سواء اني أو در وأبوها وماما يركضون ويانا منا ومنا 

اني أذيتهم حيل وليالي سهرتهم على صوتي وصوت البجي والصريخ مالتي الدكتور گايللهم لتعزولها خلوها بينكم حتى لا ترجع حالتي تنتكس لأن أقل إنتكاسة ترجعني لنقطة الصفر وترجع رغبتي حتى آخذ الحبوب 

بدليل اني رغم تعالجت من المرة الأولى يم عبد بس أول منطوني الحبوب مرة ثانية جسمي تقبلهم بسرعة 

ورى أسبوع من الفرة والتعب اليوم ضلوا گاعدين بالشقة حتى مُتيم مطلع جان يخلص وقته بغرفته حتى ناخذ راحتنا أكثر وهو هم ميتقيد بوجودنا اني وماما

طلعت للصالة لگيته گاعد يمه بنته على كرسيها 

اجيت أرجع أفوت للغرفة صاح وراي 

تيم :- تعاي يولي عش ضامة روحج 

مردت أحسسه اني گاعدة بالغرفة من وراه بس هو جان كاشفني من نظراته مشيت گعدت يمهم على تخم منفرد

عيني صارت عالبلازمة بس بالي مو يمها

كل شوي أخطف بنظري عليهم گاعدين وگدامهم الطاولة مخلين كتب بنته وهو گاعد يدرسها بالهم أبد مو وياي

ضلت عيني عليهم وهو يشرحلها ومركزة وياه بالشرح

انطاها مسألة يختبرها واني أباوع وياها وگفت بنص الحل ورفعت راسها محتارة اجت عينها عليَّ تباوعلي

باوعت لأبوها عينه بالموبايل مو يمنا تقربت منها على كيفي رديتلها الحل بهمس عود حتى ليسمعني أردلها

أثاري هو عينه عليَّ گال :- ها عطيتيها إمدادات 

باوعتله بسرعة رجعت لمكاني 

انطته الدفتر وهي الإبتسامة شاگة حلگها باوع بالحل

تيم :- هاج نص صح إلج لأن غشيتي ونص إلها 

در :- يعني صح ؟ 

هز راسه وباوعلي :- انتِ مكملة يا صف وصلتي ؟ 

نزلت رداني على جفوف ايدي 

بان :- للرابع ومكملت گعدتنا ماما عالنص بسنتها اني ونورجان 

- ها مو أگول تعرفين چم سنة گلتي تاركة

- هاي السنة الثالثة إلي 

هز راسه :- اي زين هيج

ضجت :- شو مكيف شنو الزين بالموضوع 

- صارلج تلث سنوات تاركة يعني عالسنة الجاية يحقلج تقدمين سادس خارجي تا ترجعين انتِ ونورجان سوية تدرسن نفس المرحلة 

صفنت بكلامه ودرت عيوني عنه متفشلة من ردي عليه 

ثاني يوم العصر جان ديريد ياخذ بنته عندها مراجعة لدكتورها گلي أتجهز حتى أروح وياهم حاجته ماما

شدن :- محتاج شي إذا تريد اني أروح وياكم 

- لا إرتاحي انتِ هم الصبح أخذتيلج فرة ويَّ بان خليها هي تجي شناقصها قابل ايد رجل لو شتگولين ؟

حجاها وباوعلي گتله :- اي أروح 

رحت بدلت لبست قمصلة على ملابسي وماما رفعتلي شعري لبست شوزي وطلعت لگيتهم منتظريني 

نزلنا بالمصعد هو يسولف ويَّ بنته طلعنا للشارع وگفنا راح جاب سيارته ورجع نزل صعد بنته وكرسيها واني صعدت يمها وتوجهنا لعيادة الدكتور مالتها 

وصلنا هناك اباوعله شلون يعاملها عبالك أميرة ومن يحجي وياها حتى نبرته تتغير تصير گدامه هي وبس

الممرضة وگفت تشكللها بالكانيولا وهو گاعد يمها حاضنها ايده على عيونها حتى متشوف شكلت إلها مغذي وعلى وضعهم لحد ما خلص المغذي يلا گام منها

الممرضة ضلت تحجي عليه لأن مقبل يعوفها 

گلها :- يول هاي نايلون ما تتحمل ما أگدر أخليها تدحك الأبرة 

الممرضة ضحكت لدر :- هاي شنو شكبرج بعد تصيرين وتخافين من الأبرة 

- لا تعجبج بهيج سوالف 

در :- ما توجعني بس من أدحگها أدوخ أهجس تروح روحي 

هم يسولفون ويضحكون اجت عينه عليَّ صايرة گدامهم

تلاشت ضحكته من شافني الرؤية صارت مواضحة عندي بس أرمش أنهار عفتهم وگمت طلعت من المكان 

وگفت عالرصيف گعدت للگاع ضامة راسي بين رجلي وجيب اللي يسكتني بعد كل سالفة وكل ضحكة بينهم تذكرني بوالدي رفعت راسي أباوع للشارع وأجر النفس

انمدت ايد بطل مَي وكلينكس باوعته لگيته بوراي 

أخذتهن منه مسحت وجهي وهدأت شوي مگال شي ولا اني حجيت بس ضل واگف فوك راسي  عافني براحتي

122 تعليق 

دقايق وگمت وگفت أنكت بملابسي

- يلا در بقت وحدها 

تيم :- انتِ زينة عادي خلينا شوي واگفين هين ما يضر

- لا ماريد خلي نكمل حتى نرجع 

- أكيد ؟

نترت :- انتَ شگد تلح 

عفتها ودرت وجهي مشيت 

صاح وراي :- سوادين 

دخلوا هو وبنته عالدكتور واني برة منتظرتهم مطولوا ربع ساعة بالزايد وطلعوا صعدنا السيارة مراح للشقة 

وگف يم مطعم بنته گالتله :- لا ننزل بابا ما أحب هوسة المطعم

- عجل اصبريلي تانزل أجيب أكل ناخذو ويانا للشقة 

- اي أحسن 

سألنا شنو مشتهيات اني مرديت بنته گالتله اللي يعجبك نزل جاب أكل ورجع خلى العلاليك ليورى 

رجعنا للشقة جانت دنيا الليل حضرت ماما الأكل بمواعين ورتبته عالطاولة مال طعام وگعدنا كلنا نتعشى 

جانوا هادئين هو وبنته كلامهم هادئ حركاتهم هادئة 

وتوني ألاحظ الشبه بينها وبينه خاصة العيون كحيلة نفس السحبة والرموش الكثيفة بنته جانت تصفّن يعجبك بس تگعد تباوع لوجها گد محلوة وناعمة

ورى مخلصنا الأكل ساعدت ماما نقلت المواعين للمطبخ وعاونتها بغسلهم وهي تحاجيني عالأخير وگالت

- روحي ماماتي ارتاحي اني أكملهم

غسلت ايدي نشفتها بملابسي 

صاحت وراي :- لج لا بملابسج ليش هيج

طلعت للصالة لگيتهم هناك مگوم بنته من الكرسي لازمها يمشي بيها وگفت بباب الغرفة أباوع عليهم 

أخذ مسافة بسيطة عنها وخلاها تمشي لوحدها 

مشيتها مو عوجة أو بيها إنحراف بس جانت مثل الطفل اللي توه ديتعلم للمشي وگفتها ممتوازنة 

در :- بابا اگضبني راح أوگع

- حدرج لا تخافين كملي يلا يولي هستوج خطوتين

- ما أگدر بابا 

- يلا أبوي شو أشوف

- تعبت ما أگدر بعد

- يلا سباعية 

صارت تبجي :- بابا والله راح اوگع تعبت تعببببببببت 

لزمها جرها لحضنه باس راسها يحاجيها يسكّت بيها 

طلعت ماما على صوتها تسأل شبيها والبنية تشاهك

طبيت بسرعة للغرفة وسديت الباب رحت لفراشي تمددت وعيني صارت على مكانها اللي تنام بيه

أثاري كل واحد عنده هم شكل بحياته، اللي يشوف عيشتهم والخير اللي هم بيه يگول عايشين بلا هموم 

ورى ساعة حسيت الباب ينفتح غمضت عيوني بسرعة

أسمع صوتهم هو وبنته فاتوا للغرفة وهو يشجعها ويحفزها حتى لترجع تبجي وتمل من حالتها 

فتحت عيوني شوي محولها من كرسيها للچرباية ظهره صاير على جهتي تمددت وسحب الغطى غطاها بيه

تيم :- يلا بعد محتاجة شي 

- اقرالي قرآن تانام صار فترة ما قارية ضايك صدري

- وينو المصحف ؟

أشرتله عالميز اليمها أخذ القرآن سحب كرسي خلاه قريب يمها يتحرك وفنه لو اجت عينه عليَّ لو باوعلي 

انطاني ظهره وگعد يقرالها بصوت هادئ يوصلني 

يقرا بتلاوة ونبرة واضحة رغم مقصر صوته غمضت عيوني مرتاحة سكنت على صوته وعالهدوء بالغرفة 

ضل بالربع ساعة گاعد يم راسها لحد منامت سد القرآن دنك عليها باس راسها ووگف ويَّ وگفته اندار يريد يطلع

صار وجهي بوجهه لگاني فاتحة عيوني ودا أباوعلهم 

سكت شوي گال :- ها گعدناج 

- مجنت نايمة 

- نامي زين وراج گعدة الصبح يلا أبوي 

مشى للباب طفى الأضوية وطلع سد الباب وراه 

النعاس جان بعيني غمضت عيوني بسرعة نمت 

مر اسبوع لاخ على هالحال بنته جان ماخذلها إجازة مرضية من المدرسة خلصت إجازتها وصادفت إمتحانات نص السنة بعدلها أسبوع على موعدها 

وإحتار بين الياخذ بنته يرجعها للأنبار وبين نبقى اني وماما هنا لوحدنا ماما مقبلتله گالتله يوديها ما علينا شي

وصدك تحضروا ليلتها وطلعوا گال ثاني يوم أرجعلكم ما أخليكم لوحدكم، بيومها الشقة فرغت علينا شگد مجانت در هادئة بس تعودت على وجودها ونومتها يمي

واستفقدت صوته بالغرفة ليلتها من يگعد يم راسها يقرالها قرآن بكل ليلة مجان يعرف اني بحاجة هالتلاوة أكثر منها جنت أسكّن عليها وأرتاح بطريقة عجيبة 

گلت لماما تقرا يمي قرآن واني راسي بحضنها يلا نمت 

وهيج مر الأسبوع والثاني مُتيم رجع يمنا جان متصورلي جيته ويانا لأربيل بس علمود بنته وطبيبها بس من شفت ركضته ويانا وروحات الدكاترة عرفت السبب الأساسي لجيتهم لهنا هي اني مرادوا يعرضوني على دكتور واني عندهم بالغربية بهاي حالتي ..

إتصالات مستمرة من عمو فدار لماما يسألها عني ووين وصلنا بالعلاج ونورجان هم مجانت قاصرة بتليفوناتها

جان وضعي شوي أحسن من أول أيام أنام طبيعي بس تجيني مرات وجع فضيع يحتل جسمي أفز مشتعلة لحد ما بدا الموضوع يقل بالتدريج شوي شوي 

بيوم من الأيام واحنا على گعدتنا اني وماما بالصالة جان يندك جرس الشقة طلع مُتيم من غرفته أشر لماما

تيم :- استريحي انا أفتحو 

باوعتلي ماما مستغربة :- منو حيجينا ؟ 

رفعت أكتافي بمعنى ما أدري

راح فتحه أسمع صوت من برة لحد ما فات يهز بيده وفاتوا وراه نورجان وشبير فزيت اجت حضنتني 

شبير :- حي الله من جاكم 

أخوه رده :- لا هلا

- عش هيج أبو علي مو انا أخوك 

- خواك البين عجل هاي المفهية شعندك جايبها وياك

نورجان :- هاي ليش عمو والله اشتاقيتلكم

- گضبتلي سچينة لو تاخذني لو أكتل روحي وأكتلك شلون رهمتها ما أدري 

فتحت عيونها باوعتله :- عزة بعينك يا كذاب والله عمو هو گلي راح أروح لأمج وأختج امشي وياي واني اجيت

شبير :- إفتراء وتبلي الله وكيلك ما تنگدر

أذختها ماما لحضنها تبوس بيها وتشم بريحتها 

شدن :- اوف يا أمي يا ريحتج شگد مشتاقتلها همزين جبتها مدامها معطلة 

تيم :- وانطوك إجازة ؟ 

- اسبوع بعين العدو 

انتبهلي گاعدة گال :- ها مكينة الشارب شلونج شحالج 

- أحسن من حالك

- لا مبين 

لبالي جانت جيتهم للونسة مجنت محسبة حساب جية شبير لأربيل محانت خالية وجان إله بيها قصد 

بالليل الساعة جانت وحدة الكل نايم ونورجان يمنا بغرفتنا نايمة ذابة روحها تعبانة من الطريق 

الغرفة الثالثة صارت إلهم هي وشبير بس لطشت إلا هنا

طلعت الغرفة دا أروح للحمام شفت ضوة الصالة مشتغل

استغربت تمشيت على كيفي صرت يم الباب مديت راسي اباوع وألگى شبير وأخوه گاعدين عالتخم

جريت نفس لبالي شكو دا أمشي اجاني صوته وهو يگله

تيم :- انتَ متأكد هو هين ؟

وشبير يرده :- وأبصملك بالعشرة حددت مكانو موقعو يقرا أربيل 

- هاي شلون سالفة 

رجع ظهره للتخم كمل كلامه :- لو أدري بيه هذا هين ما جان جبتهن 

- ومنو گال نفسو عبد يجوز واحد من جماعتو عيدز التهديدات من هالرقم 

- هو أنا أگلك هو صار بالشهرين گلبنا بغداد عليه انا وخالي مالو أثر هناك وحتى لو على حجايتك واحد من المخانيث الجوة ايدو هم راح يفيدنا يدلينا مكانو 

شال تليفونه صار يگلب بيه ورفعه لأذنه يخابر

گال :- حياك يالأخو .. الله يسلمك محتاجك بخدمة انتَ والربع .. لا مو هساع خليها على باجر نتشاوف ونسولف

عفتهم يحجون ورجعت للغرفة وأطرافي كلها ترجف 

عبد هنا ؟ ..

سديت الباب ومشيت لفراشي حتى نسيت على شنو جنت گايمة فزت ماما من مكانها على صوت الباب 

شدن :- بان هاي انتِ

- اي ماما رحت للحمام

رجعت نامت واني سكتت نورجان نايمة بنفس الجرباية بصفي انطيتها ظهري ولفلفت روحي بالغطى أرجف

عبد بأربيل يعني يسر وريحانة وياه هنا .. 

نزلت دموعي هيج وتطلع صدك هيج قريبة عليَّ بنفس المكان واني ما أدري، عبد الچلب الله ليوفقك 

منمت بيومها من گد موجعني راسي من التفكير 

ضليت گاعدة للصبح أتگلب بفراشي ثاني يوم اثنينهم طلعوا من البيت من الصبح مرجعوا إلا تالي الليل 

محد بيهم حجى ولا گال وين جانوا ولا اني تجرأت وسألتهم ورى الصار والعرفته قررت أتصرف بطريقتي لأن أدري لو گتلهم محد راح ينطيني جواب يشفي

بالليل كُلش أكلوا وكل واحد فات غرفته مبين تعبانين

ماما متعرف بالصار ونورجان متدري بالدنيا شكو 

شفتها گاعدة بالصالة تتفرج فيلم مشيت گعدت يمها

بان :- نورجان إلج لو للذيب ؟

باوعتلي :- ها شكو

بللت شفتي هسه هاي شلون أشرحلها بلا ما تفضحني

باوعت للغرفة ماما هناك مالها صوت تقربت منها 

حجيت :- اسمعي محتاجة موبايل شُبير ضروري 

- لويش مو هياته موبايل ماما هاج خابـ....

سديت حلگها بسرعة 

- الغبرة صوتج فضحتينا ماريد أخابر أحد

وخرت ايدي :- لعد شتسوين بموبايله لشُبير

- خرب بس نصي صوتج 

همست :- شتسوين بموبايل شُبيرررر

- بعدين أگلج وعد بس هسه محتاجته كُلش إذا تگدرين تفتحينه وتجيبيلياه 

- هسه أگله

حجتها ودتگوم لزمت ايدها رجعتها 

- هي غبرة لج ما أريده يعرف حاخذ تليفونه 

- عزة ليش عود 

- بس افهميني يا أختي گتلج شغلة ضرورية أدور عليها بسرعة أرجعه ما أطول

حطت ايدها على حلگها :- بس هو هسه گاعد

- اي خلص خليه من ينام والكل ينامون اخذيه منه لو أگلج خلي أنطيج منوم تشربينه حتى ليحس عليج من تبصميه 

- لا موبايله رمز أعرفله معليج بس ينام اني أجيبه إلج 

اجيت أگوم أبوسها اتفقنا بس الكل ينامون ألگاها بالمطبخ، انطفت أضوية الشقة وكلمن بغرفته نايم

باوعت لماما هم نامت گمت من فراشي أتسحب فتحت الباب ومسديته خفت ليطلع صوت وتفز تشوفني 

رحت للمطبخ أمشي على أطراف أصابيعي فتحت الضوة

ضليت واگفة هناك أنتظرها مطولت دقايق واجت وراي

انطتني التليفون :- خما حس عليج ؟

- لا نايم نومه ثگيل 

فتحتلي الرمز وأخذته أگلب بيه

نورجان :- بس فهميني شتردين بيه 

- والله اني أفهمج كُلشي بس اصبريلي هسه 

أحجي وأگلب بين البرامج سمعت صوت گمزنا اثنينا خليت الموبايل بصدري واندارينا صار مُتيم بوجهنا                                            

عقد حواجبه :- شعتملن هين بهالساع ؟

فات علينا غفل هو وفانيلته السودة مبين جان نايم وفاز وگع گلبي نورجان صارت تمتمت متعرف شتگول

بان :- اجيت دا أشرب مَي 

- وانتِ ؟

باوع لنورجان :- اني هم اجيت أشربها 

ندستها بيدها من ورى 

جفلت :- اووي شبيج 

يباوعلنا بشك من فوك ليجوة ممقتنع أبد 

- شهالنظرات هاي عطشنا اجينا نشرب مَي شنو جرمنا 

- دمشن جدامي يلا تاشوف كل وحدة لغرفتها لبالي أحد فات علينا الشقة 

مشيت للثلاجة فتحتها جريتلي بطل مَي ورفعته بوجهه

- هذا حتى من أعطش بعد ما أجي للمطبخ وتجفت عليَّ هيج 

حجيتها ومشيت من يمه عيونه وراي نورجان هرولت قبلي لغرفتهم واني دخلت وسديت الباب على كيف 

صرت بفراشي يلا جريت النفس ايدي على گلبي

اسم الله عيون ذيب ما تنام شلون حس علينا هالشكل 

غطيت راسي بالغطى وطلعت التليفون فتحته ضليت أگلب بيه بالنص ساعة رحت على صفحته مال ماسنجر قريت آخر محادثات حاجي بيهم لفتتني وحدة 

جان ديحجي هو وصاحبه، صديقه دازله صورة وعنوان فندق بأربيل وكاتبله مسج ( بظرف يومين جبتلك عنوانه أطلبك وحدة ) وشبير راد ( نوگفلك بعرسك )

ضليت أردد بالعنوان بيني وبين نفسي لحد محفظته 

أخذتلي فرة عالموبايل مرة أخيرة ملگيت شي 

سديته وخليته جوة راسي لثاني يوم گعدت من وكت رحت لنورجان دگيت الباب طلعت تفرك بعيونها 

- سباح الخير 

قلدت صوتها :- سباح النور شُبير گاعد ؟

- لا بعده نايم

انطيتها التليفون :- نورجان لا من شاف ولا من درى 

- شسويتي بيه 

- بعدين أگلج مو تخزيني وترحين تسولفيله من يگعد

- لا والله ما أحجي

- عفية

كملنا اليوم عادي مُتيم طالع وشُبير ضل يمنا گاعد

للظهر نورجان صارت تنك فوك راس ماما إلا نروح مطعم نتغدة هناك لگيتها فرصة أطلع من الشقة 

بان :- اي ماما خلي ناكل برة صار هواي مطالعين من الشقة

- خلنها غير يوم 

نورجان :- ليش عود ؟

- حاجزة موعد بصالون أريد أروح أسوي شعري تيم گال نهاية هالأسبوع نرجع                                            

استلم وهذا من عرف بعبد هنا يريد يبعدني عنه 

گتلها :- مو حالة هاي صار بالشهر هنا مشايفين الشارع على گد المراجعات مال دكاترة جزعت روحي

- روحن لشبير بلكي يقبل ياخذجن 

نورجان :- گتله ومقبل يگول ماكو طلعة من الشقة 

- هذا هو لتطلعن گتلجن خلنها غير يوم اني آخذجن

حجتها ومشت عافتنا وحدة تباوع بوجه الثانية 

نصيت صوتي :- نورجان محتاجة هالطلعة ضروري قنعي شُبير لا ألزمج هسه أكتلج

- اني شعلية شبيج هم رايدة أطلع مثلج مديقبلون

- لج الغبرة الطلعة إلها شغل بالسويناه البارحة

عقدت حاجبها :- شسوينا ؟

غميت گصتي جريتها گعدتها يمي وسولفتلها كُلشي من البداية وعيني عالباب لا واحد يسمعنا باوعتلي بخوف

- عزة بان يعني عبد هنا بأربيل

- اشش اي هنا وأخذت العنوان مال الفندق الگاعد بيه

- وحترحين ؟

- أريد أشوفه صدك موجود لو لا نورجان إذا عبد هنا يعني بنتي وياه وإذا دريت بيها هنا والله العظيم آخذله الشرطة وأروحله للفندق آخذها من بين عيونه 

- بان خايفة 

- بس اقنعي شُبير يطلعنا والباقي يمي

گمنا اثنينا على شبير نحجي وياه 

سوه حركة بوجهه :- تؤ ماكو طلعة 

- وليش عيني 

- تيم ميقبل حتى انا ما خلاني أطلع اليوم 

حجاها ورجع عينه بالموبايل 

- تمام لعد حآخذ نورجان ونطلع وخلي أخوك يفيدك

رجع ظهره عالتخم :- الشقة مقفولة والمفاتيح يمي 

- لا بالله ؟ 

- وعيونج 

ماما سمعته گالتله :- شدعوة هالتشدد لو أدري اني رايحة وماخذتهن 

- ميقبل باجيتي شعملو قابل دحگي جدامج انا مربط حالي حالجن 

بان :- وعود شنو معناها محد يطلع إلا هو يقبل وين گاعدين احنا 

- حجيت العندي انا عبد مأمور

نورجان :- والله شُبير إذا ما أخذتني اليوم أتغدة برة لا أعرفك ولا انتَ رجلي

- ها الصفرة طالعلج حس 

- مثل مگتلك وبعد لتحاجيني هو غدة شطالبة قابل حنرجع بعد كم يوم واحنا ممفتهمين شي من گعدتنا هنا

تحجي وتنغوص مطنگرة شوي وتبجي 

تنهد وگام يباوع للساعة بيده 

                                           

گال :- خمس دقايق أفوت أبدل وأطلع ألگاجن جدامي 

تراكضنا بسرعة للغرفة غيرنا ملابسنا لبست التيشيرت 

حجيت :- لج المفهية صدك طالع لسانج من وراي

- احنا شطالبين هو غدة بمطعم هيانها المطاعم تارسة أربيل

- ها يعني انتِ عالغدة مو علمود الخطة 

صفنت :- يا خطة ؟

عضيت شفتي كملنا لبس بسرعة وطلعنا ماما أخذناها ويانا نزلناها بالصالون الحاجزة بيه واحنا رحنا مطعم

گعدنا على وحدة من الطاولات مكان فخم وكبير اجة الويتر انطيناه طلبنا وراح ندست نورجان برجلها 

افتهمت عليَّ گمت من مكاني گال :- ها وين 

بان :- أريد حمام 

أشرلي بيده عالحمامات مشيت لهناك عاد هي استلمته تهذي براسه تلهيه درت وجهي وطلعت من المطعم 

أول مشفت الشارع لزمتني خوفة وگفت أخذت تكسي

السايق جان كردي گوة دبرتها چم كلمة وياه طلعت الورقة من جيبي مسجلة بيها العنوان فهم وتحرك 

طول الطريق واني أدعي وأردد تهاليل وأذكار حتى يطلع البراسي صحيح وبنفس الوقت جنت خايفة 

طريق أبو الربع ساعة صار عليَّ بسنة وگفت السيارة بسرعة جان العنوان قريب أشرلي عالفندق بيده

طلعت من جيبي فلوس وانطيته كروته وراح

وگفت مگابلة البناية أباوع عليها ناس تفوت وتطلع 

سميت بسم الله ودخلت مثل التايهة أعرف رقم الغرفة بس خايفة لا يلگفوني جماعة الرسبشن وأروح بيها 

مشيت للموظف بأبتسامة :- مرحبا 

- أهلًا وسهلًا تفضلي 

- جاية أشوف صديقتي گاعدة هنا بالفندق وانطتني هذا العنوان ..

شوفته الورقة باوعلي 

گال :- لحظة من رخصتج أتصل على أصحاب الغرفة 

- لا لا ماكو داعي بس دليني اني أروحلها

- أعتذر ما أگدر 

شال التليفون واني أهز برجلي على أعصابي أتخيل يدك ويجاوب عبد ويدري بية هنا غير أنجلط 

دا أمشي أفلت سبقني وگال :- ماكو ميردون تفضلي وياي اني آخذج للغرفة 

وگفت للموظف الثاني ومشى واني وراه صعدنا المصعد للطابق السادس لحد موصلنا ووگفنا گدام الباب مال غرفة اني خاتمة القرآن رجلية ترجف تررجف

دك الباب طول يلا انفتح غمضت عيوني 

اجاني صوت مرة :- تفضلوا 

حجاها الموظف عليَّ فتحت عيني مرة تجي أربعينات شعرها أصفر جسمها تارس ضليت صافنة عليها                                           

انتبهت گالت للموظف :- بس ما أعرفها للبنية 

باوعولي اثنينهم تشجعت وحجيت

بان :- عبد موجود ؟

عقدت حاجبها :- ياا عيني يا عبد متوهمة ماما 

تعذرت منها ودرت وجهي الدمعة متشكلة بطرف عيني

الموظف گال :- أتوقع جان عدنا حجز بأسم عبد الإله البارحة خاف هذا التقصدينه 

فزيت :- اي ؟

- طلعوا من أول بارحة  

وجهي بهت يعني صدك عبد جان هنا 

أول منزلت وطلعت الفندق صار بوجهي شُبير وأخوه

دنگت راسي ومشيت عليهم اثنينهم صايرين أعصاب

استلموني رزايل وصياح وشُبير انطاني كم كفخة عالطاير شلون مغافلته من المطعم وطالعة 

دفعت ايده :- هييي وخرر ايدك

باوعتله لگيته متخصرلي 

تيم :- أحك وجهج بالرصيف ؟ 

اختنگت :- ليش مگتولي عبد هنا ليش دتضم عليَّ وتريد تبعدني وبنتي هيانها يمي

- يووول وأنا شتشوفيني گاعد غير من البارحة ملازم الفندق ورحتلو للغرفة ماكو ما موجود واصلو خبر بجيتنا وطالع

گعدت للگاع أبجي نزل لمستواي :- گومي يولي مو حلوة گعدتج بالشارع هالشكل يلا تاشوف

- ماريد 

- ديلا عاد بلا تزعطط مو گتلج يمي الموضوع عش تدوخين راسج بهالسالفة

- گلبي طاير على شوفتها 

- أدري والله أدري وحگج شما تحجين بس مو هيج مغافلتنا وطالعة لوحدج بالله لنفرض صدك هو هين وشافج وجرج سحبج عندو وين نحصلج بعد ؟ 

گام وگف :- گومي يلا 

مسحت دموعي وگمت شو هذا أول موگفت جابني براشدي خلى أذني تصفرر باوعتله عيوني تحرگني

رفع اصبعه :- هذا حتى بعد لتستهلين الطلعة لوحدج وبلاية ما تگولين لأحد يلا جدامي ولج 

يحجي وخازرني حيل وخرت شعري عن وجهي 

- لتخوزر ترى متخوف چلبي

دا أمشي گدامه للسيارة جرني من ياختي عدلني 

تيم :- دمشي عدل تمشي أعوج العوجة

درتله بكل جسمي :- أگلك احترم نفسك ولتتجاوز 

- لاه صدك ؟

رجع دفعني گدامه :- دمشي امشي نصل الشقة وأشوف شغلي وياجن انتِ وذيج اللخ 

أخذوني بالسيارة ورجعوني للشقة هذيج مناك شبير من مستفقدني بالمطعم خايفة منطيها راشدي زايعتهن كلهن                                             

رجعنا للشقة گام يرعد علينا رعد أول مرة أشوفه هيج يصيح جان لطيف وهادئ انگلب غول حتى ماما رزلها 

خايف من طلعتنا لا واحد مراقبنا على حجايته اللي يهدد يگدر ينفذ واحنا وعبد بنفس المكان ميمنعه شي

ليلتها نورجان نامت يمنا زعلانة من شُبير شلون ضاربها

ثاني يوم طلعوا اثنينهم هو وأخوه الأگرع من الصبح وهم قفلوا الشقة بس هالمرة المفتاح جان عند ماما 

ماما من عرفت السالفة بيها عبد شدت علينا أكثر منهم ميتة خوف مخلتنا نتنفس لو نعترض بحجاية 

باوعت للساعة بالسبعة ونص الصبح جنت شبعانة نوم لأن الرزالة مال بارحة خلتنا ننام من وكت مشفنا أحد 

باوعت لنورجان متمددة عالجرباية اللخ ايدها على خدها

- شبيج ؟

باوعتلي :- يعني اني عبالي حنجي لأربيل راح نتونس ونخلصها تفرفر وطلعات بالثلج معبالي هيج راح ننحبس لو أدري باقية يم در عاد نطلع للبستان وكل شوي أروح لبيت عمو تيم وشُبير كلما أگله ضايجة يفررني بسيارته هنا كُلشي ماكو 

قهرتني صدك جانت ضايجة حيل صفنت شوي 

گتلها :- تنزلين نتريك جوة ؟

گمزت من فراشها اجتني

- وين يعني 

- أكو مطعم بصف المجمع الأحنا بيه الصبح عندهم بوفيه مفتوح كم مرة رحنا تريگنا بيه إذا تردين نروح 

- اي عليج النبي 

- بس بدون محد يدري بس اني وياج نتريك بسرعة ونرجع

- اوكي

- ديلا تحضري 

عفتها تلبس وطلعت أشوف ماما شدتسوي لگيتها مگابلة المراية اللي بالممر تباوع بشعرها ولونه الجديد مفتحته درجتين عن لون شعرها الأصلي وجها صار يضوي بيه

شافتني گتلها :- كُلش حلو طالع عليج 

- مو ؟ 

حجتها وتفتر عالجهتين تباوع عليه حابة لونه 

رجعت لمته بالقراصة :- حفوت اني آخذ دوش سريع وأطلع أجهز الريوك دنتريك گعدي اختج

- تمام

أول مدخلت للحمام ركضت للغرفة بدلت ملابسي عالسريع نورجان جانت سابقتني وواگفة تخلي حمرة 

جريتها :- ديلا يمعودة وكت ميكب حتطلع شدن تلگفنا

- بس المفتاح عندها 

طلعته من جيبي خليته بوجها ورفعتلها حواجبي 

شلنا أحذيتنا بيدنا سحبنا فلوس من جنطة ماما وطلعنا 

نزلنا جوة المطعم بنفس الشارع مال مجمع دخلنا دفعنا وأخذنا ريوگنا ومشينا على وحدة من الطاولات ناكل                                              

گعدت أسمعلها وهي تسولفلي وتضحك أتونس عليها من أشوفها فرحانة وتضحك بنص الأكل وگالت عطشت

أشرت للويتر اجانا :- تفضلوا يا آنسة 

طلع لبناني حصرتني الضحكة وباوعت لنورجان 

- بدي وحدة كباية عصير بليز ..

انداريت على نورجان الصافنة :- بدك عصير ولا ئهوة 

- ها ؟

ندستها برجلي من جوة گالت :- ئهوة ئهووة 

أخذ طلبنا وراح تقربت مني 

- عزة بعينج منين تعرفين لبناني 

- هذا بيه ريحة ميشيل معليج 

- منو هذا ؟

شلت الچطل خليت لگمة بحلگي 

- ليش مسولفتلج على روحتي لبيروت شلون جانت ؟

- خرب عليج النبي سولفي منو هذا ميشيل 

گعدت أحجيلها الصارلي هناك من أول مصارت رجلي بلبنان لحد لحد مطلعت منها بآخر يوم ووداعي لميشيل

شبعنا ودفعنا حساب المشروبات لأن مو ضمن البوفيه

من طلعنا چلبت إلا نتمشى بالشارع 

- عليج النبي بان بعد ميخلونا نطلع هي مرة وحدة 

- تأخرنا هسه تلگين ماما نار 

- شويونة حبابة 

جريت نفس وتمشينا بنفس الشارع نباوع للمحلات والناس اني مرتاحيت أبد طول ما احنا نمشي

كل شوي أتلفت وأندار أحس اكو عيون دتلاحگنا ما ادري شلون بس هو الواحد يعرف من يكون مراقب 

جريت نورجان :- امشي يلا كافي

رجعنا للشقة الباب مفتوح من فتنا صاروا تلاثتهم بوجهنا

مُتيم صاح :- هلا بالفاين حظهن 

ماما تبجي استلمونا رزايل 

گتله :- ترى بس رحنا نتمشى جوة

- تعلمنا بعلم النفس الطبيعة البشرية إذا شخص يچذب بكلامو يضل يرمش هواي 

فتحت عيوني على وسعهن أشوفه بلا ما أرمش 

عض ايده حيل وگال :- وعديلة مريم إن ما حجيتن وين جنتن مفينات هساع أطك راس براس 

- رحنا نتريك عمو 

شبير :- حلوو ولحالجن بنات شدن السايبات 

- اي شُبير والنبي هيانه المطعم قريب 

لزمها من ياختها :- ولج شو دحگي بعيوني رحتي اختلطتي وسولفتي ويَّ هذا وذاك 

- عزززة لا والنبي بس بان سولفت ويَّ الويتر

- حلووو

اجة لزمني اني من ياختي :- وشسولفتي بالله يالكلفة سولفي تانسمع                                            

- شبيك محجيت شي الولد أخذ طلبنا ليش دتحسسني رايحة أدك سوالف ويَّ أهل المطعم 

نورجان :- اي والله أصلاً الكادر كله لبناني وفد محترمين

- حلووووو لبناني گتيلي 

رجع عليها لزمها من ياختها :- ياهم المحترمين ولج 

دمعت عيونها :- والله مو قصدي بعد ما أعيدها 

- يربك راح تبجي 

تيم :- وشعندج بالله هناك لو حنيتي لنزلة بيروت 

جان ديحجي وعينه عليَّ سكتت مرديت 

شدن :- يلا الحمدلله من رجعن هاي ولا غيرها 

- لا تعذريني بهاي حسابهن ما خلص طلعة ولوحدهن وانا ألف مرررررة البارحة حذرت ممنوع وحدة تطلع من هين لوحدها تضرب چلمتي بعرض الحايط وتاخذ اختها وتنزل شيسموها عودين عناد هو لو شنو 

- ترى رحت أتريك مجرمت

- يوووول انتِ بالذات وضعج خاص انتِ بحمايتي انا الإغتيالات والعصابات هين بفلس لو صارلج شي شگول لروحي شگول لأمج ؟ 

صار سم مو ريوك حرمنا الغدة مخلانا ناكل وياهم عقوبة عود إلنا وحتى الغرفة مخلانا نطلعها 

لليل يلا ماما فتحت الباب وطلعنا گعدنا بالصالة شُبير استلمنا تصنيف وأخوه گاعد يمه گدامه أوارق بيده 

شبير :- ديلا هيج أحسللجن هساع ؟ 

- والله مسوينا شي شبيك 

- انتِ فقيرة أعرفج بس سوالف ذيج تاتگلبج عليَّ 

- اي صح أگلبها عليك لك بابا هي من غير شي كارهتك وميتة منك دنتظر بس نرجع إلا أطلگها منك 

- دحك النوب بعدها تحجي وتهوبز يول انا منج أطم روحي عالرزايل الأكلتيها الصبح عجل مولية بنص اللبنانين شعندج لا يحجون لهجتج ولا تفهمينهم 

نورجان :- لا ترى بان تعرف تحجي لبناني بطلاقة البارحة شفتها تحجي ويَّ الويتر

اندارتلي :- مو صحيح بان ؟

اجت عيني بسرعة على تيم هزيت راسي بالنفي

گتله :- ئم تكزب ئمو لا تسدئها 

- اهبددددده 

تيم سوة تحديد الكل وانطانا خزرة كلها انخرست

صاح بينا صيحة رجت الشقة :- خمس دقايق أفوت للغرفة واطلع الأدحك خيالو هين أحسب الله ما خلقوو

حجاها وگام دخل لغرفته 

باوعت لشبير مبوزة

نورجان :- عمو شبيه هيج يصيح علينا 

شبير :- عوفيه حبيبتي يئار من عدنا 

- اي والله مبين 

لزم ايدها وگام :- دتعاي خلي نروح للئرفة تاسولفلج سالفة                                             

أخذها وفاتوا غرفتهم گمت اني لماما بغرفتنا ضايجة 

ضليت  بالغرفة لحد ما التمينا كلنا بالعشا گعدنا ناكل كلها ساكتة مُتيم أعصابه صايرة براسه مدري شبيه 

شهربان :- ماما الأكل اليوم غير شكل عاشت ايدج 

- حبيبتي ألف عافية بس مو اني الطبخت اليوم هاي اختج

شبير :- بالئافية الكلفه

- الله يئافيك 

تيم :- تنكتمون اثنينكم لو تبدي ايدي عتهف 

- شبلاك خوية ما تتحمل شئة دمك صاير سئيل

- راح أگوم أشعل والديك بگبورهم شبير انكتم لو تگوم

- هذا هو يابا سديت حلئي 

ماما ملزمت روحها غصت بالضحك وعلى ضحكتها كلنا ضحكنا وياها حتى هو شفته ابستم گام وهو يهز ايده

ورى ساعة تقريبًا گاعدين كل احنا بالصالة طلع مُتيم من غرفته عصبي شمر التليفون بحضني عالتخم 

تيم :- هاج دحگيييييي وعتلومني ما أخليجن تطلعن 

فزينا كلنا من ورى صوته شلت التليفون ايدي ترجف 

صارت بوجهي صورتي اني ونورجان واحنا طالعين من المطعم ومسج جواها ( شهربان حارث ونورجان حارث خوش بنيات ) ...

مخلانا نبات ليلتها ورى التهديد لمينا ملابسنا وبنفس الليلة خلى شبير ياخذنا يرجعنا لبغداد وضل هو هناك 

وصلنا لبيت فدار الصبح دخلنا بوجهنا للغرفة ذبينا نفسنا

ضلت ماما وشبير برة يحجون الصار لعمو فدار 

ضلينا على هالحال يومين الوضع سنطة لا تيم خابر ولا فدار جاب طاريه لو طاري عبد والتهديدات ماما .. ارتاحت أكثر من رجعنا لهنا شبير رجع لأخوه ثاني يوم 

ماما گالت نكملج علاجج هنا يا مكثر دكاترة بغداد 

گاعدة بالغرفة وسمعت صوت عالي من برة ركزت صوت ماما وصوت لاخ يحجي وياها طفرت من مكاني طلعت

رحت برة جانت لازمة باب الشارع واثنين زلم واگفين 

سلطان :- خلصيني يولي ما واگفيلج اليوم بطولو فدار وينو 

دارت وجها تستغفر 

- يا أخوية دا أگلك فدار بدوامه ذاك هو بالمركز روحله 

- سويلنا مجال تانفوت

يحجي وياها بنتر ولا شايفها گدامه

ردته :- تهذروني والله البيت ما بيه رجال بس اني وبناتي هنا ما أگدر أدخلكم وأبو البيت مموجود

- وتطردينا ؟

- استغفرك إلهي خوية انتَ ليش تگلب الحجي يمتى اني طردتك                                          

هز راسه يتوعدلها :- هيّن يشدن هيّن 

مشى مسافة شال تليفونه يخابر 

ماما سدت الباب وأشرتلنا ندخل حوة وهي ضايجة 

سألت نورجان گالت ذولي عمام شُبير الكبار 

ربع ساعة واجة مآب للبيت دخلهم للأستقبال وگفت ماما بالمطبخ تسويلهم چاي وتحضرلهم صينية الضيافة

اني بالصالة وأسمع صوته يحجي 

سلطان :- أبوك وينو عش ما اجة

- بالشغل عمي انا أخذت زمنية واجيت مچانو 

- وانا جايلو من درب طويل هيج يستقبلني ؟

- بس يگضي شغلو ساعة ساعتين ويجي يلحگني 

ناصر :- ونضل احنا مشتولين ساعتين هين تاننطر أبوك

- امسحوها بوجهي واعذروه ما يگدر يترك شغلو

طلع مآب من الأستقبال عيونه صايرة بگصته فات للمطبخ أخذ صينية الچاي ورجع فات عليهم 

سلطان :- أبوك ليمتى ناوي يگطع من سوالفو 

- يا سوالف ؟

- سالفة زواجاتو على أمك وهاي العايفها على ذمتو ومگعدها بيتو هي وبزرتها لهساع وين يريد يوصل بهالزواح يمتى ناوي يطلگها ويزتها بالشارع هي وزبالتها

- عمي التحجي عليها حرمة أبوي ولا انا ولا أبوي نرضى هالحجي إلها لو لبناتها ياريت لو تثمن حجاياتك 

- عش متعلمني شلون أسولف بعد طايح الحظ صايرين ما تحشمون لا جبير ولا غيرو شنو مالكم رداد انتَ وأبوك ساحلكم انتَ وأخوك وولد عزام العايف شغلو والعايف حلالو عتتراكضون لهاي البغدادية وبناتها خلك زبايل چم يوم يمل ويزتهن للشارع 

الدم صعد لراسي فتحت الباب وفتت عليهم ماما تجر بية دفعت ايدها :- لا دوگفي بالله دا أشوف منو هالزبايل

باوعتلهم اثنينهم الوجوه مگلوبة يباعون بالعين الصغيرة

بان :- جان استحيتوا على روحكم واحدكم حاط بوجهه نگلة شوارب گاعدين بنص بيتها وتحجون عليها 

- هاه هالدور صار بيتها عش لازم ناوية تدير راسو تايسجلو فدار بأسمها 

- اي مدامها على ذمته بيته هو بيتها عجبك والما عجبك صار ساعة تلغي عليها وهي متشكلة بالمطبخ دتوجبكم وگايمة بيكم هيج انتوا بالغربية تردون اليكرمكم ؟

اندار لمآب گله :- هاي البنت إلمن 

- هاي بنت البغدادية المعاجبتكم صار ساعة أسمع وأعبر بس كافي عاد مصخت اليسكت إلكم تدوسون عليه 

اندار لليمه گله :- دشوف حتى بزرتها ملسنة وملعلعة مثلها گتلك هذن نسوان بلا أصل ومالهن رداد أرييييد أفتهم فدار شبلاه وحاويهن عندو بالبيت كل هالفترة 

                                           

صحت :- خاب دمشي لك أصلها يشرفك ويشررف عشيرتك من صغيركم لجبيركم 

من حجيت هيج تخبلوا وگفوا اثنينهم يتصايحون مآب صاح بية حتى أسكت وماما تدفعني للباب مطلعت 

صاح :- دحك ولك وعتلوموني من أگوووول مالهن أصل ولا رداد يردهن إلا بزرررر بگد چف ايدي عتتصايح بوجوهنا هالطايحة الحظ 

ناصر :- هو البلا أصل وتربية گوة يصيرن عندو أبوووك شلون مأمن باجر عگبة تصيرلو بزرة منها ما تطلع مثل الأدبسز هاي ؟ ما عيشوف تربيتهن ولسانهن ؟ 

شدن :- شبيها بالله تربيتهن شنو العند بناتكم وما عدنا شوفة هالحال هاي على شنو بناتي متربايات غصبًا ما عليك انتَ وياه والربتهن مرررة تسمع لو لا مرررررررة انتوا هاي الحجاية تستعرون من عدها عندكم المرررة والقندرة تستحسفون تشوفون وحدة مرتاحة ورجالها مدللها خاصة لو جانت أرملة لو منفصلة 

- خلك زبالة انتِ وبزرتج هساع عطيه ظرف چم يوم ويزتج بالشارع شعندج لهساع گاضبة بذيالو زلمة عندو عايلة وعندو بزرة مخليتو ما يشوف دربو وين تردين توصلين أكثر من هيج فلوس نعطيج فلوس بس فكينا

- وشنو دنگدي منك انتَ وفلوسكم مگشرين بيهم بنات خير والله كافينا الحمدلله بس چفوني خيركم وشركم ولتدخلون بحياتنا 

سلطان :- انتِ ولج بنت خير ؟ بنت شدن الأمها تشتغل بالملاهي ما تنعرف نطفتها منين ما منين

باوعت لماما صوفرت من حجى بأمها وغورگت عيونها

ناصر :- شنو يولي لبالج الحجي ما يصلنا ؟ لا والله نحفر ساسج ونطلع أصلج من جوة سابع گاع ما تنضم بعد وفدار لو معمي احنا نفتحلو عيونو تايشوف 

- بسجن عاد فكن ياخة واحفظن ماي وجهن واندارن عن فدار وولدو شوفلجن غير صيدة لا انتن بطبعنا لا عيشتجن تشبع عيشتنا لا دينجن يشبه دينا 

بان :- لازم شفتنا يهود لو نعبد أصنام 

- هاي البزر تسكتوها لو أشوف شغلي وياها وعتگولين شنو الفرق بين تربية بناتنا وبناتج هاج دحگي منو التعملها وترفع صوتها على الأكبر منها بناتنا متربيات ويعرفن حدودهن ويعرفن العيب انتن شنووو خلك بنات شارع وجودجن بحياتنا لوحدو عيبة لعشايرنا

- تسولف بالعشاير ليش انتَ تعرف تربية العشاير وحجيهم وأخلاقهم لك بابا العشاير أخلاق وإحترام وانتم لا أخلاق ولا إحترام اثنينهن ما حاويهن 

صفك ايد بأيد :- عمي العيب والمستحى ماتن وحدة بگد بزري تاتعلمني بسوالف العشاير 

- العيب والمستحى ماتن الله يرحمهن بس الأخلاق من تموت من بني آدم شيرجعها بعد واگفين تطعنون بينا وبشرفنا هذا وانتوا زلم مشوربة لا عتب على حجي الصغار لعد 

ناصر :- يول انتِ شسمج ؟

- معليك بأسمي جوزوا عن أمي وبطلوا سوالف النسوان مال طلگها وطلگني عيييييب عمو عيييب جبت عمري أسمع بالنسوان تغار من النسوان أول مرة أشوف زلم تغار من نسوان                                             

تخبل صاح :- عييييييييب انتن تعرفن العيييييييييب وحدتجن جنها گحبة من گحاب الملاهي لا ملابسسسس لا ستر لا حيااااا لا مستحى يول وحدتجن حججججاب ما تعرف تنضب بيه ولو انا إلمن أحجي إذا هي الأماية ما تطلع البيت إذا ما تطك البنطرون والقميص من يمتى احنا نسسسسسوانا يطلعن هالشكل 

بان :- عيب كلمة ما إلها وجود بالأسلام أكو شي اسمه حرام وهاي الكلمة متضر المرة ولا تقيدها بأي شي من أبسط حقوقها تطلع من البيت لوحدها وتلبس اللي يعجبها وتشتغل مدامها ممسوية غلط وبحدود الدين انتَ بصفتك منو وشنو حتى حاي دتكفرنا ؟

مآب خزرني حيل ودفعني ليجوة طلعني الأستقبال

گعدت بالصالة روحي فايرة طلع ماما وراي وضل هو يتصايح وياهم شوي وسمعت صوت الباب ينرگع حيل

ماما گاعدة عالتخم ومدنگة راسها ونورجان تباوعلي 

فات مآب من برة يضحك 

صاح :- ول مكييييينة ومحمد زينت شواربهم بحجيها 

ضحكت ودرت وجهي باوعتلي ماما مفهمت نظرتها بس شفتها ابتسمت گامت وگفت وراي محاوطة رگبتي

مآب :- روحي يابا بظهرج زلمة كلف منو يلحگج

باست راسي :- سودة عليَّ حرگوا أعصابها 

- يولي هي الشعوطتهم بحجيها وطلعتهم من البيت مشتعلين تشمين عطابهم 

باوعلي :- بشرفج يولي بان هذا سلطان من زمان ما أودو ولا هو يودنا اخذيلج ببه فد شوط بمكينتج وزيني شاربو 

گتله :- ديلا عاد شلون شوارب جنهن لمة مال عفطية

غص بالضحك :- لازم ميصرفلج 

من راد يطلع ختى يرجع لدوامه ماما گلتله 

شدن :- فدوة لعينك مآب لا تحجي لفدار شي بس يرجع اني أحجيله الصار 

- لتخافين أكو جماعة راح يسبقوني ويسبقوج ويعطونو علم بالصار 

- يبوو شلون سالفة هاي

- لا تخافين انا أحاجيه وأبوي يعرف بسوالفهم مو جديد عليهم بس ها انتِ وينج هاي الكلفة اگضبيها احبسيها بغرفة واقفلي عليها الباب منا لحد ما أخابرج أعطيج الأوكي

راح مآب ومن اجة أبوه بالليل مجان بذيج الأعصاب الجنا متخيليها سولفلتله ماما الصار وهو أصلًا عنده علم مسبق بجية عمام شبير فعدى الموضوع على خير

ثاني يوم گاعدة على جربايتي وخابر شبير على ماما تليفونها جان بيدي رديت عليه :- هلا شُبير

شبير :- ها مكينة الشوارب أگلج ..

- گول

- هذا مكسور الرگبة مآب وينو ما اجاكم اليوم

- لا عليش دتسأل ؟

- تا اتصل عليه ما يرد 

- ما ادري بيه

جر نفس :- ديلا يلا عودين إذا دحگتيه وصيه يخابرني

- اوكي

انسد الخط جان مستعجل ، للمغرب تقريب بالستة اجة فدار وماما صبت الأكل صار هو غدة وهو عشا گعدنا كل احنا الأربعة وفدار يحاجي ماما 

- يول هذا مآب ما وصلكم للبيت اليوم ؟

شدن :- لا مشفته من البارحة 

- عجل وين ولى حتى الدوام ضاربو وأتصل عليه ميشيل تليفونو 

- تلگاه راح للغربية يم شُبير مو جديدة عليه

صفنت شوي وباوعتلهم

بان :- لا مو بالغربية هو شُبير خابرني الظهر يسأل عليه يگول أخابره ميرد 

من حجيت هيج فز فدار وعاف الأكل راح لتليفونه وماما گامت وراه للصالة نورجان لحگتهم واني على گعدتي كملت أكلي وأسمع صوتهم يوصلني 

شوي واجت نورجان :- شو تاكلين طبيعي مخايفة ؟

- على شنو يمعودة تلگين هسه وحدة من الحلوات يمه ومنزل المزة والكيف صاعد عنده 

اجت گعدت :- اي والله صحيح مرة شفنا بنية بشقته 

- مو گتلج كملي أكلج أحسن محد يفيدج 

فدار رجع خابر على شبير گله ما أدري بيه ما جاي للأنبار وخابر بيتهم هم گلوله مجاي لهنا عاد اجة بسرعة جر سترته وسويچ سيارته وراحله لشقته 

ماما تلوب ضلت تروح وتجي بالبيت منتظرة خبر منه

ضلينا اليوم على أعصابنا ماما تتصل على فدار ميرد الوقت تأخر والساعة عبرت الهدعش بالليل وهم ماكو

لهناك وجان ينفتح الباب مال شارع وفات فدار فاتح دگم قميصه وصاير نار نارر طب بهمة لغرفته بلا حجي

فات وراه شبير لازم السترة مال خاله ووجهه مجان يطمن عاگد حواجبه خلقهم مگلوبة حتى محجوا شي

ماما راحتله :- شبير فدوة لعينك فهمنا شصاير اليوم كله ترى على أعصابي أدك ومتجاوبون مآب وينه

صاح :- مختفي يولي مآب ماكوو رايح خالي لشقتو لاگي بابو مفتوح والشقة مگلوبة گلاب الدم مالي الگاع وهو مالو أثر.....