رواية فصلية بديلة ( شموخ ) الجزء الثاني الفصل السادس والعشرون 26 بقلم ام ملكوت

:-كعدت الصبح  نفس الروتين تريكت روبه وخيار مثروم وطلعت بعدما ودعت امي وامنت ريانه عدهه .. ركبت سياره بابا اخذني للدائره

ودعته ونزلت تمشيتلهه وفزيت على اثر شخطه سياره عبرت من يمي كلش باوعت

باستغراب وعصبيه وشفته راهب صفهه للسياره الجيب السوده ونزل باوعلي وسد الباب حيل برجله واجه يتبختر بمشيته وجنطته على كتفه شايلهه

وكف كبالي صبحت عليه ورد علي وهوه ياشرلي ادخل جوه تحمحمت ودخلت وراه وهوه يمشي سريع ..سجلت البصمه وصعدت للطابق الثاني

وهوه دخل مكتبه صبحت عل كل وكعدت عل كرسي اجت صديقتي تحمحمت و كالت ..

_اليوم محاضره #ابو_الرهبان 

_ابو الرهبان

_اي الكل هنا يسمي ابو الرهبان فصرنه ندلعه بهل اسم

_همم اي اليوم التدريب هم عنده 

_البارحه مالحكت اسالج 

_شنو

_انتي تعرفينه 

_ليش

_لا بس اشو البارحه بالتدريب شد وياج وركز بالتدريب عليج

_لا لان مكتوب بسجلي عندي مشكله بحمل السلاح ولازم يختبروني بي بعدما يخلص التدريب

_هااا هيج السالفه واحنه عبالنه يعرفج 

_لا بس عن قريب نصير معارف

_شلون 

_لان اخوي رح يخطب اخته وانتو الكل معزومين الجمعه الجايه على خطوبتهم

_ياا عمري الله يهنيهم والف مبروك يارب

_حبيبتي تسلمين يوم الالج واشوفج عروسه

_بعد وقت طويل 

_هههه جوي واجوائي انتي

_هههه والله ..

اندك الباب واحنه نحجي دخل الضابط وكال المحقق راهب طالبنه فوك السطح كلنه تافافنه هم فوك السطح وبالبرد يعني ناوي يجمدنه ويسوينه

تماثيل يقتدون بينه الدفعه البعدنه .. كمنه لبسنه زي جديد عباره عن بدله شغل عسكريه نفس بدله السمكري .. لبسناهه وصعدنه للسطح واشوفه

جايب هليكوبتر بقينه مصدومين كل يوم كاعد يبهرنه اكثر شمر السلسله من ايده واجه وهوه ينكت اديه من التراب وكال موجه الكلام للكل..

_يعني اوصلكم للقمه واطيركم واليحط عل كاع بسلام يزيد درجاته..

باوعت بتساؤل وكتله محاوله الطف الجو..

_سيدي درجات الاخره قصدك مو 

_تحششين

_لا بس يعني سيدي شلون تطيرنه وننزل عل كاع طيور احنه لو مجنحين

_راح تخليني صدك اشمرج من الطياره بدون مضله 

_هاا مضله طلع اكو شكرا سيدي عل جواب..

صفن بيه مقلص عيونه وابتسمت تنهد وبهتت ملامحه استغربت شصارله درت وجهي عنه وهوه احسه مستمر يباوعلي راح اخذ الاحزمه والمضلات ربطهم هوه

علينه بدون مايحاول يلمس وحده حتى بطريق الخطأ .. وصل يمي لبست الجنطه وربط الحزام

وهوه يباوعلي وعاكد حواجبه نزلت عيني عنه اشوف شلون يربط الحزام واردف بهمس..

_تحششين علي مو ست شموخ

_لا سيدي حشاك بس ردت الطف الجو

_شصار بالوزن 

_من اليوم بديت سيدي..

راسي طليت على الكاع واحنه نرتفع عنهه اكثر ولزمني من الجنطه البضهري ورجعني عل كرسي باوعتله وتحمحمت والموجودين حبسوا ضحكتهم

احس صايره سخيفه واضحك العالم علي من وره رهبانوو..   المهم وصلنه لقمه مو عاليه كلش عن الارض ووكف راهب على حيله واشر لواحد من

الولد راح و واحد من الضباط ربطهم سويه وشمرهم واحس عبالك شمرني انه بس همزين ويانه ضابط يعرف بهاي الشغله نزل ويانه والا احنه وين نعرف

بالهبوط .. شمرهم واحد وره الثاني وانه خلاني اخر وحده تخصر يباوعلي منتظرني اوكف باوعتله بتوسل وكتله...

_سيدي ماريد انزل اخاف من هيج مرتفعات

_هاي انتي الكلبج قوي جنه نكول بس خليهه بالج ماكو شي اسمه اخاف بهذا المجال 

_راهب فدوا لا تخليني انزل اتخربط والله ومالحك افتح المضله

_ومنو كلج راح تفتحين المضله انتي الضابط هوه يفتح مضلته وينزلج بامان للكاع

_حتى لو سيدي اخاف والله بعدني مامستعده احس..

تافاف ونزل سحبني من ايدي وانه لزكت روحي بالزاويه ماقبلت اروح وياه لان فعلا اخاف انزل حتى لو وياي ضابط متمرس وشلون عاد انه اثق

بجنس ادم.. بقه يباوعلي بحيره واشر للضابط تقدم عليه اخذ جنطه المضله منه لبسهه وشد الحبال لزمني من حافه الستره وسحبني عليه

صرت مقابيله وربط احبالنه سويه وضبهن حيل رفع عيونه دون راسه والمسافه معدومه بيناتنه وكال وهوه انفاسه الحاره تلفح وجهي..

_وهسه بعدج تخافين وماتردين تنزلين..

سكتت ونزلت عيني عنه فعلا شمالني مساع خايفه وهسه تطمنت من عرفت راح ينزلني هوه تجاهلت سؤاله ودرت عيني عنه متشرده من نضراته.. 

كمل ودار وره ضهري لزمني من الجنطه ومشاني لحافه الباب همس باذني بفحيح حار سيطر على بروده وجناتي وقشعرلي ..

لزمني من اكتافي حيل ودفعني بقوه وهوه وياي طرنه بالسما وانه مغمضه عيوني ماكدر اباوع للكاع خاف ادوخ واتقيئ عل زلمه نوب بس يااااالله على

هل شعور شكد خرافي ومستحيل.. احس من البرد خشمي جمد ماصرت احس بي عبالك طير حر وطاير استغليت هل فرصه حتى احقق امنيتي وانه

صغيره من جنت اتمنى اصير عصفور واطير .. فتحت عيوني و اديه وصرت ارفرف بيهن مثل الجناحات وابتسامه حماسيه على وجهي ماهمني

اطيح او انضرب بعمود او انزل على شط لو نهر ماهمني شي وكأن وراي شخص مايسمح لهل اشياء من ان تصيرلي.. سمعته حجه كلام مامفهوم زين

من قوه الهوى التفتت عليه اساله شنو كال وهز راسه ب لا بس انه متاكده سمعته حجه كلام مو واضح بس الشي الوحيد الكدرت اسمعه هوه 

"طول العمر" و ماعرفت شنو طول العمر وشنو الكاله .. المهم فتره مو طويله من السعاده والحريه هبطنه ونزلنه ببطئ بالكاع رفعت رجلي خفت

يتزلغن وامرني ابقيهن على طبيعتهن عاد عفتهم ولمن خليتهه بالكاع وركضنه احس رجع الدم يمشي بجسمي ويتحرك .. التفتت على راهب وانه

مبتسمه بحماس بعدما وكفنه وهوه نزل عينه على عيوني صفن بيهه لحظات وهوه ساكت انحرجت من نضرته وتشردت بعيوني ..تحمحمت ياله

استوعب ودار عينه عني لزم المضله وصار يلملم بيهه خلاهه بالجنطه واجه فتح الحزام مني وهوه يكول..

_تدرين هذا الجزء من التدريب هوه المفضل عندي حتى من ايام تدريبي 

_ليش هوه بالذات

_جنت استمتع بي واحس اني طير متحرر بعيد عن الارض والبشريه للحظات معدوده وهسه صار احلى بعيني لان صار سر سعاده شخص عزيز علي

_قصدك انه

_فهمج كفايه ..

صفنت بي بتعجب وهوه مستمر يفك بالحبال وعينه بعيني كلهه لحظات وفزينه على صوت

زملائنه جايين من بعيد اخذ الجنط وراح للخيمه الجان محضرهه درت وجهي ورحت باتجاه زملائي لزمت صديقتي بيدي وهي ترجف وكالت..

_ولج شنو هاي الهبوط هيج يخوف شوفي جسمي لحد هساه يرجف

_هههه شسالفه صح يخوف بس ممتع 

_يا ممتع صابني هبوط وزهراء تلكينهه بالحمامات العامه تتقيئ

_هاي شنو عاد انتن تحمستن وطرتن قبلي شصار بيجن هسه

_بعد هيه على قوه الكلب مو على الجراة وانتي كلبج يتحمل هيج احنه لا 

_يا قوه كلب لو شايفتني شلون بقيت اتوسل بالمحقق حتى يعوفني وماينزلني

_لا بربج 

_اي والله

_هههههه خرب والله لو يسمعن البنات يسونج مزق

_شعدهن الضلن يرجفن عل اقل انه ما رفلي جفن من هبطت 

_على كولتج..

اجه راهب وصفت سيارات ٣ سوده وحده وره الثانيه وكال نصعد بيهن حتى نرجع للدائره توزعنه عليهن وشفته صعد باول سياره وانه بثاني وحده

مدري ليش ردت اصعد بنفس سياره وياه عبالك زفه وصاعده ويه غربه وعايفه اهلي بغير سياره يا الله عل تشبيه شبلاه عقلي هل فتره .. المهم بقيت

اسولف ويه صديقتي ملتهيه وياهه مره ومره اللخ اصفن بالشوارع من الجامه المضلله وتبين دنيا ليل عندي وهيه نهار كلش حلوه وجبيره حيل هل

سيارات عجبني يراد اشتريلي وحده بالمستقبل هه عبالك احجي على اوباما مايدرون بيه احجي على دبابات الجيش السوده ههه .. المهم تقريب النص ساعه مسافه طريق ووصلنه للدائره نزلنه من السيارات التفت علينه راهب صفك بيده وكال..

_الهبوط اكيد اخذ من حيلكم حيل اريدكم تستعيدون نفسكم وتركضون حوالين الدائره ٢٠ لفه تالي نصعد لقاعه الحديد تمام 

_حاضر سيدي 

_يله هرولوا .. 

سوينه مثلما كال ورحنه نركض وفعلا حسيت الركض فادني رغم رجلي جانن مهدود حيلهن بس رجعلهن الحيل بعدما لفينه ٢٠ مره وكعدنه نرتاح كم دقيقه .. 

اجه الضابط الجان مسؤؤل على اشراف الركض وكاللنه نروح للقاعه

عاد رحنه بدلنه ملابسنه واحنه نشطين اجه الضابط بعدما طلعنه وامرنه من باجر نشتري ملابس رياضه وشرط راهب تكون مستوره من الطرفين ..

يعني قابل شنو عباله راح نجي مصاليخ لو نلبس مايوه ونجي شنو عايشين باوربا والله ياراهب وشروطه هاي .. حضرنه نفسنه سوينه احماء

ودخل راهب واحنه تجمعنه حواليه صاح باسمائنه ووزعنه كذلك على الاجهزه بس انه ماخلاني اشيل شي هل مره كلي امشي وراه راح واجيت وراه

وكف يم جهاز "فلاي" واشرلي عليه.. هزيت راسي بايجابيه و كعدت رفعت ايدي عل مسكات مثلما يوجهني وبقيت اسحب بي وهوه عبالك عشيره

لازمته كوه ينسحب لحدما اخذت عليه ايدي سويت كم مره وهوه فوك راسي واكف عين علي وعين على زملائي يراقب تدريبهم شويه وكالي

اروح على جهه والزم الاثقال بنفس الطريقه العلمهه الي البارحه .. رحت سويت مثلما كال وهوه يفتر يراقب بينه وكل شوي موجه ملاحظه لشخص

من عدنه ويبدل بينه لحدما خلص وقت المحاضره رفع ايده باوع للساعه تافاف ورفع راسه وحجه..

_لهنا وخلص وقتنه اشوفكم بعد يومين وحاولوا لمن تتفرغون تجون هنا تدربون او تدربون بالبيت حتى لا يضيع تعب هل يومين عل خالي

_حاضر سيدي

_شموخ مثلما وصيتج وزنج تخففي وايدج عوديهه عل ثقل تمام

_ حاضر سيدي

_البقيه اعتنوا بنظام اكلكم ورحاب يرادلج بعد كم كيلو تسمنين اكلي اكل صحي ودسم يعني اريد وزن صحي مو دهون وثكل 

_حاضر سيدي ابو الرهبان 

_احم يله روحوا لقاعه الحاسوب لا تتاخرون عل محقق

باوعلي ثواني وهوه يكتب بالسجل مالت اسماءنه وانه لفيت عيني على رحاب شلون اكلته بعيونهه وشني من جراة عدهه حتى تكوله كدام الكل ابو الرهبان ماخافت يطردهه لو يفشلهه 

ولو هوه شي عادي يعتبر هنا بس مادري ليش تضايقت منهه ومادري اذا حجتهه على فطرتهه لو تقصدت .. المهم رجعت عيني على راهب وهو عينه بالسجل انطاه للضابط  وطلع من القاعه ورحنه بدلنه ملابسنه بالحمامات وتوجهنه لقاعه الحاسوب كعدنه باماكنه

ودخل المحقق اخذنه ساعتين وهيج يكون خلص الدوام لليوم ورجعت للبيت ومرت يومين ثانيه نفس الروتين من البيت لأنواع المحاضرات

والتدريبات واليوم اجه وقت محاضره راهب لبسنه ملابس الرياضه يلي اشتريناهه وكملنه اجه الضابط سالم اخذنه للقاعه الثانيه الفارغه تلفتت بالمكان

وجانت ارضيتهه نفس ارضيه ملعب كره السله وبيهه كراسي على الجهتين استغربنه وكلهه تسائلت عن نوع التدريب هل مره لحدما اجه راهب بملابس

رياضيه والعين صارت عليه.. دكيناله تحيه وكال وهوه يمشي ويضرب بالكره بالكاع وترجع عليه ..كلهه ظنت ان راح يلعبنه كره السله بس لا

اعرفه راهب مايرتاح اذا مايحول الاشياء الطبيعيه الى صعبه وهيج صار فعلا .. دخلوا فريقه وبيدهم احبال كل ثنين لازمين بطرف وثبتوهم قريب عل

ارض على طول القاعه وكف الضابط سالم ووجهنه على طريقه اللعب هزيت راسي وابتسمت جني ادري بي تدريبه مو بهل سهوله .. اجينه احنه الكل

انبطحنه على ظهرنه ولزم كل واحد طوبه بيده وصرنه من جهه الولد ومن جهه البنات انطلقت الصافره وبدينه نزحف والتحدي هوه اذا طاحت

الطوبه من ايدنه او دحكت بالحبال نطلع من اللعبه ونتعاقب .. 

لفينه القاعه تقريب ال٥٠ لفه وقسم تعب وطلع وقسم خسر وانه من التعبانين طبعا لان

جسمي ثكيل ومايحملني تدريب زايد .. صفك راهب لافت انتباهنه ورحنه وكفنه باستقامه كباله باوعلنه هز راسه باسف وكال..

_بس سيدي هواي

_مو هواي كعقوبه الكم وهذا الشي بسيط بالنسبه لتدريب باجر ..

واحد باوع للثاني وهوه يتسائل شنو تدريب باجر الاصعب من الهروله ٣٠٠ لفه حوالين الدائره .. المهم رحنه واحنه نتافاف نزلنه للساحه وويانه

ضابط بيده عداد خلاله كرسي بوسط الساحه واحنه بدينه نهرول ونركض حوالين المكان والبرد ماخذ نصيب من اطرافنه فتره ياله دفينه

واستمرينه بالركض وكل شوي نخفف من السرعه لان نتعب ورئاتنه تتعب من كميه الاوكسجين

التدخل بيهه بكثره لحدما اخيرا بعد ساعه من الركض خلصنه ال٣٠٠ لفه  ووكفنه ساندين ادينه

على ركباتنه ونجر نفس كوه هز الضابط راسه بايجابيه ودخل واحنه وراه كوه نشمي وصعدنه رجلينه ورمت صفت يمي رحاب وكالت بهمس..

_خب شني سالفه من البرد والركض حتى مشكت 

_خرب شكلج شهل حجي هذا عيب منا الولد

_يمعوده وشكو بيهه هسه على اساس مايمشكون همه

_وعلي شوفي حتى ماكدر امشي هسه شلون اوكف كبال ابو الرهبان وانه مشولخه

_عابتلج ..

عفتهه ومشيت لان تحجي بصوت عالي وجابتله العين حتى الضابط اليمشي مسافه عنه سمعهه والتفت عليهه يباوع لبين رجليهه فضحت روحهه

الغبيه .. المهم وصلنه اخيرا للمكتب وكعدنه نرتاح شويه تالي صاحولنه لقاعه الرياضه نفسهه رحنه واشوفه بعده كاعد بمكانه باوعلنه وهوه شاد

اصابيعه سويه .. دكيناله تحيه وكام على حيله باوعلنه اشر عل سلالم حبال وكال..

_التدريب هل مره راح يكون عل سلالم واليوصل للقمه بدون مايطيح ينعفي من تدريب باجر

_سيدي زين واليطيح 

_ينعفي من عظامه..

فتحنه عيونه بصدمه عبالنه صدك كلامه بس سرعان مازفرنه براحه لمن شفناه ابتسم وهز راسه باستنكار اشر لسالم والفريق وجابوا مثل الدوشك

لايلون منفوخ وخلوه جوه السلالم حتى اليطيح مايتاذه .. باوعتله وابتسمت وهوه صافن بيه بنص عين وظاهره على وجهه شبه ابتسامه نزلت عيني

عنه بعد ثواني من التأمل بماعرف ايش .. اخذنه الضابط صفانه واحد وره الثاني وانطلقت الصافره راح اول واحد يركض وصعد على قمتهم مثل القرد

والثاني والثالث نفس الحاله لحدما وصل دوري شديت حيلي ورحت اركض لزمت باعلى الحبال بديه وبالاسفل صعدت رجليه عليهن وصرت اتسلقه

مثلما شفتهم يسوون القبلي وصلت للقمه وصعدت عل سطح كعدت ونزلت من السرسيحه ضحكت بكلبي وحسيت بحماس عبالك طفله والعب

سرسيحه .. نزلنه وبقينه كلما يخلص السره نرجع نعيد من جديد مو علمود التدريب لا علمود السرسيحه رغم ثقل جسمي وصعودي اليطول اكثر من صعود غيري بس تونست خوش تدريب

احس طلعت برجلي عضلات كثر التمارين والركض اليوم ..المهم مر تقريب الساعه واطلق صافره النهايه راهب .. رحنه مقابيله وكفنه اشر بالسجل وهز راسه بايجابيه وهوه يكول..

_كلشي تمام لهنا ومستواكم جيد بس اريد تشدون حيلكم وتتمرنون اكثر على التمارين يلي مانجحتوا بيهه بهاي الفتره وانه راح اراقب مستواكم زين

_حاضر سيدي 

_يله وهسه شنو نروح لقاعه الحديد

_نعم سيدي..

تحمسوا الكل لان يحبون الجيم وشغلات الرياض وواحد يطلع عضلاته للثاني وانه دونهم تضايقت لان راح ينشلع كلبي بالتمارين مالت ايدي ..

رفعت راسي واشوفه يباوعلي بتسائل لان شافني ضجت قاطع صفنته سالم وهو يحجي ويا هز راسه بايجابيه وراح قبلنه يمشي واحنه وراه وكالعاده كضيناهه تمارين ولعب لحدما تفلشت اجسادنه .. طلعنه وره ساعتين وبوجهنه لقاعه الادله

الجنائيه اخذونه محاضره وهيج يكون خلص الدوام ويومين تدريب راهب .. وراح ارجع للبيت وابدي تحضيراتي لخطوبه محمد اخذت اجازه قبل لا اطلع من الدائره لان امي ماتكدر وحدهه للتحضيرات ..ثاني يوم نزلت

للسوك ويه امي وخالتي وجنان يلي ماعرف شنو سالفتهه كلت من ارجع للبيت اسالهه بله شبيهه وشسوه وياهه مرتضى بعدما فسخت خطوبتهه 

من محمد.. كملنه مشترياتنه احنه الكل وهيه بالهه طافر ماشترت شي عاد كلتلهه امهه بعدين تاخذهه .. المهم رجعنه للبيت بس مالحكت احجي

وياهه لان بس تغدوا خلوا وراحوا لبيتهم وانه وامي ثاني يوم وره مارجعت من الدوام بدينه ننظف ونعدل ونرتب البيت رغم الخطوبه بالقاعه

بس التجمع والغده راح يصير بالبيت.. راح بابا جاب خروفين كبار بقاهن وره البيت وسوه سياج من شبج حواليهن .. وريانه كيفت كلساع رايحه

يمهن لو توكف يم الشبج وتضل تاشرلهن يجلهه باديناتهه الصغار لا تخاف منهن ولا ترد وهذا الريحني بنتي طلعت مثلما ردتهه كلبهه قوي وماتخاف من شي من صغرهه شالهه سلام وخلاهه تكعد على ضهر الخروف وهيه

ضحكهه واصل لسابع جار وتصرخ بحماس بعد حيل امهه .. بقيت واكفه على جهه واضحك عليهم والخروف خطيه تخبل من سلام وريانه .. صاحتني امي ورحتلهه

للمطبخ طلعت وياهه البلامه الكبار من الكاونتر داحستهن بتلايف الدنيا عبالك كنز .. اخيرا ومن معاناة ياله طلعتهن لمن فرغت نص الكاونتر ..

خليتهن عل ميز وكمت سديت فتحه المغسله وعبيتهه ماي وبديت اغسل بيهن من التراب وانطي لامي تسطرهن عل كاونتر .. للعصر كملنه كل شغل

التنظيف والترتيب صبيتلي غده متاخر انه وامي وكعدنه نتغده سويه وناكل وهيج مرت هل يومين وصار وكت تدريب راهب وكالعاده كملت

اموري ورحت للدائره ردت ادخل وسمعت سيارته شخطت للكراج وكفت وشفته وهوه ينزل وبيده شايل علاليك وجنطه صار قريب مني وصبحت

عليه بس استغربت من رد علي بدون مايوكف او يباوع بعيوني عجيب شماله الرجال اليوم خاف مستعجل او صاير شي ماعرف .. تنهدت وصعدت

للمكتب واجه الضابط وراي انطانه ملابس ورحنه للحمامات لبسناهه وطلعن للفنون القتاليه رفعت حواجبي وهزيت راسي باعجاب كملنه تبديل

وطلعنه للقاعه بقينه ننتظر شويه تالي دخل علينه وهوه مو على بعضه وجهه شاحب وشكله مريض او ماعرف شبي وكف كبالنه واحسه مو على بعضه تحمحم اخذ السجل وكال....

.

.

،،الى تلك الغريبه الحبيبه..

لا اعلمُ لماذا احببتُكِ .. 

هل سحرتني بعيناكِ ذات لونِ الليل ام ماذا.. 

فلا اعلَمُ اذا كُنتَ تُحبيني ام لا.. 

لكن ما اعرفههُ ان عينيكِ و انت تبتسمِ لي جعلتني انسى من انا.. 

ااه لكِ يا صاحِبه الرموش الطويله الحب يأتي دون سبب، ليس هناك قيود له، لا يأتي بمال؛ 

ولا يؤخذ بجمال؛ ولا يقاس بِعُمر هو قدر.. كل مكانٍ اذهبُ إليه اراكِ صدفة..

اااه ما اجملِكِ ايتها الصدف..اتمنى ان تأتي هكذا دوماً.. أَراكِ فَتَحْلو لَدَيَّ الحَيَاةُ..

ويملأُ نَفسي صَبَاحُ الأَملْ وتنمو بصدري وُرُودٌ عِذابٌ وتحنو على قلبيَ المشْتَعِلْ كُوني لي طبيبتاً فهذا الشوقُ أتلفني‏  يا مالكه الرّوحِ إنَّ الحبَّ عذاب.

"منذ أن أحببتكِ وأنا أضيء، كأنِّي ابتلعت القمر في قلبي.!. اتمنى لو كُنتِ ترىِ ماذا اكتُبُ لكِ..

اتمنى لو كُنتِ تعلمُين كم اهواكِ.. اتمنى لو تصِلكِ هذه الكتابات التي اكتُبها بقلبي.. اتمنى وفقط تمني.. ،،

:- هاي ثاني صدفه جمعتني بشموخ بس جانت صدفه موجعه بالنسبه الي لمن عرفت انهه تزوجت فعلا وصار عدهه طفله رغم اني جنت محسب هل

حساب من سنين وجنت دائما اكول هسه تزوجت وخلفت بس التفكير والتحسب غير عن الحقيقه

المره .. رغم توقعاتي بزواجهه بس شوفه هل شي بالواقع طفه الامل يلي بداخلي الا ان لفت انتباهي كلام امي لمن كعدنه سويه وسالتهه عبير عن ريان..

_امي صدك منو هاي البنيه الاجت ويه شموخ وامهه نسيت ماسالت شموخ انه

_هاي الصغيرونه ام خدود بنت شموخ يمه

_لااا بربج امي شموخ متزوجه يعني

_اي يمه 

_ايا بذاته اشو ماكلتلي حرامات والله

_ياا ليش يمه

_عاد كلت اخذهه لعزيز كلبنه بس تالي طلعت متزوجه وعدهه بنيه

_اي يمه بس حسيتهه ضايجه من زوجهه

_شلون يعني

_من سالتهه عن زواجهه كالت زواج الاغبر وغيرت موضوعه بسرعه يمكن مامرتاحه ويه زوجهه لو بيناتهم مشاكل بعد الله اعلم

_هاي شنو بس لا يطلع مهتلف وشالع كلبهه هيه شموخ من طبعهه ثكيل تحب الزلمه الرزن والرجولي وتلكيهه طاحت بواحد حشى السامع خيخه 

_بعد الله اعلم يا يمه الله يهدي عليهه خطيه ماتستاهل 

_اي والله بس حرامات والله شموخه مايلوكلهه غير ابو معاذ زينه الزلم كلهه ..

حجتهه وباوعتلي بحسره تحمحمت وكمت مترخص منهن وانه بكلبي هم بس الله يعلم بي وزودتهه امي وعبير بكلامهه رحت للمطبخ فتحت الثلاجه وصفنت بيهه افكر

بكلام امي يعني معقوله مامرتاحه ويه زوجهه معقوله يكون مايحبهه وما داير باله عليهه او بالعكس يحبهه ويغار عليهه من زملائهه بالشغل ويسوي مشاكل وياهه .. 

جريت حسره وغصيت بيهه فركت صدري بكف ايدي محاول اجر النفس ماكو فايده فتحت باب المطبخ وطلعت فتريت

بالساحه شغلت جكاره جريت نفسهه نصه بريتي وزفرته بقهر صفنت بضلمه الليل وتذكرتهه لمن جانت صافنه بالنجوم بساحتنه تذكرتهه مساع واحنه طايرين بالجو لمن لهج لساني بذكرهه وكلت

" عسى مانحرم من هل فرحه طول العمر يا شموخ ايامي وكسره كليبي"

اكيد هيج وقت هيه يمه وبغرفته شابع شوف منهه ومتشبع بعطرهه اوف ياعطرهه اللازك بالطفله ختم على كلبي لمن استنشقته ااخ ياا نظرات عيونهه

وحلاوه ذاك الجسم اكيد متنعم بي هسه المايستاهلهه ونايم بعمق على صدرهه.. اااخ الله استغفرالله بشنو صرت افكر انه شلون اتخيلهه بهل

شكل وياه شلون بكلبي المو راضي ينساهه ويشوف غيرهه استغفرالله ربي استغفرالله .. خلصت رابع جكاره وذبيتهه بالكاع سحكت عليهه

وشمرتهه عل حديقة شفت الساعه ب١١ ونص دخلت توضيت وطلعت فرشت مصلايتي بالغرفه وتوجهت لربي اصلي واحس بذنب لاني فكرت

بطريقه حرام بشموخ وانه طول عمري تفكيري بيهه عفوي وحبي الهه عل فطره ماعرف شلون لعب الشيطان بعقلي وتخيلتهه بطريقه مو حلوه..

تنهدت وكمت صليت نافله الليل واستغفرت ربي ٣٠٠ مره بالسبحه وكعدت اقره قران لحدما حسيت بانشراح صدري ياله طبكت الكتاب ورجعته لمكانه

لميت المصلايه وتمددت عل جربايه ومعصم ايدي على عيوني.. اجت ببالي لمن تجي عينهه علي وتبتسملي بس سرعان مانفضتهه من بالي.. 

خلاص مدامهه طلعت فعلا متزوجه وعدهه بنيه فلازم منا ورايح مافكر بيهه ولا اباوع بعيونهه حتى خليهه تكمل طريقهه المشت بي بارادتهه وانه امشي

بطريق جديد خالي من حبهه راح احاول ابتعد عنهه واضم حبهه بغمج كلبي هاي اذا عقلي جاز منهه وبطل .. فركت وجهي بحيره وكلت التفكير ما

اله فايده وخلي اتجنب الصفنات واملي وقت فراغي بشغلي واهلي حتى انساهه وماتجي على بالي من اصفن .. وبعد تفكير طويل بيهه تافافت 

و لفيت راسي ونمت كوه ب٣ الفجر ..تقريبا ساعتين وكعدت جسمي متكسر وايدي متشنجه من الكتف حركتهه يمنى يسرى وكمت بتثاقل دخلت

سبحت ونشفت وطلعت بدلت ملابس الدوام مشطت شعري رشيت عطر  اخذت جنطي وحذائي

وطلعت هاي كله وانه اعاطس وجسمي يكت عرك صاحتني امي بالمطبخ ورحت صبحت عليهه بست راسهه وتلمست كصتي وهيه تسالني بقلق..

_يا يمه حبيبي وجهك موجر نار مريض شنو

_لا يوم مابيه شي استبردت شوي هسه ادفى وتروح الصخونه 

_تعال اكعد تريك يمه حتى تشرب خافض حراره وتروح لدوامك

_مالحك يمه لازم اروح اليوم دوري بالتدريب

_عل اقل اخذلك تفاحه اسند بيهه طولك

_تمام ..

انطتني تفاحه بستهه براسهه وطلعت فتحت السياره ذبيت جنطتي مالت الدوام بالكرسي الوره وفتحت الباب الامامي صعدت بيهه فتحتلي امي

الباب وطلعت من البيت وانه كل اطرافي ترجف ولزمتني كحه قويه بصدري معناهه فلاونزه لا محاله .. نزلت عل صيدليه جبتلي دوه فلاونزه

واخذت ريوك من المحل يلي بصف بيتنه رجعت صعدت بالسياره وانطلقت للشغل وصلت وصفيت السياره بالكراج اخذت العلاليك والجنطه وتمشيت

للدائره وكالعاده صادفتهه كبالي شغلت عيوني عنهه ومريت صبحت علي ورديت وانه امشي ماوكفت مثل كل مره دخلت بوجهي للمكتب ذبيت

جنطتي عن كتفي خليت العلاليك عل ميز وكعدت ع القنفه طلعت خافض حراره شربته وكبسول

التهابات ومال صداع وتمددت عل قنفه فتره وندك الباب صحت تفضل ودخل سالم دك تحيه وكال..

_سيدي صار وقت محاضرتك 

_تمام طلعهم لقاعه الفنون القتاليه وهسه اجي 

_حاضر بس خير سيدي بيك شي صوتك تعبان

_لا بس صخونه خفيفه

_تريد ناجل التدريب لغير يوم

_لا لا مايصير نبقيهم بلا تدريب روح جهزهم وانطيهم الزي وانه جاي وراكم

_حاضر سيدي..

دك تحيه وطلع رفعت راسي بثقل وكمت طلعت زي مالتي قفلت باب المكتب وبدلت ملابسي باوعت لروحي بالمرايه وجهي شاحب ويتصبب عرك بارد ..

اخذت نقالي ورحت صعدت للطابق الثالث بالمصعد ودخلت للقاعه شفتهم الكل متواجد دكولي تحيه ورحت اتمشه للطرف الثاني من القاعه

اشرت للفريق يحضرون شغلات التدريب على كوشنكاي الكاراتيه انطاني سالم السجل مالتهم المخططه من بدايه التدريب حتى اضمن ان الكل

تدرب بشكل كامل وعلى كلشي موجود.. صحت باسمائهم والكحه مافارقتني شكت صدري شك اخر شي انطيت السجل لسالم وراح هوه صاح باساميهم

ووزعهم باماكنهم اجو قسم من فريقي الجانوا يرحون وياي للقاعات هاذي وخليتهم مسؤؤلين على تعليمهم الخطوات الاولى للفنون القتاليه

وشفت عدهم معرفه زينه بيهه لان داخلين دوره انضباطيه ٦ اشهر .. خليتهم يتوزعون قسم على اكياس الملاكمه قسم على التمثال البلاستيكي

وقسم على القفز من مرتفعات والى اخره.. راحت عيني على شموخ وشفتهه تضرب بعصبيه بكيس الملاكمه وتهمس ويه روحهه يمكن متعاركه ويه

زوجهه وتخيلته كبالهه تضرب بي انتبهت علي ودرت وجهي عنهه اباوع لبقيه المتدربين بقيت اكح القاعه بارده وبرودتهه تدك بالصدر سحبت القمصله

من جنطتي لبستهه وكمت افتر عليهم حتى يدفه جسمي بالحركه التفتت على صرخه بنيه طايحه بالكاع رحتلهه بسرعه وشفتهه لازمه رجلهه وتصيح

"اااخ يمه رجلي انفسخت" اجه سالم شالهه من اديهه مشاهه عل كرسي واجيت انه كرفصت كبالهه اخذت رجلهه الف بيهه يمنى ويسرى وهيه متوجعه

منهه اباوعلهه وشفتهه ورمت عرفتهه انفسخت بقيت ادلك بيهه لحدما رخت وسحبتهه حيل بدون سابق انذار هيه صرخت وهيه طكت رجلهه لزمت

كتفي عصرته من الالم نبتت اضافرهه بيه وشلون منا جسمي مفسخ اليوم .. نزلت رجلهه على كيف ودخلت الحذاء بيهه وخرت ايدهه عني وكلت

لسالم ياخذهه لمكتبهه ويجيبلهه باندج يلف رجلهه عاد هوه اخذهه وراح .. وكفت على حيلي التفتت واجت بوجهي شموخ ولكيتهم كلهم واكفين على

راسنه جانوا ويباوعون شغلت عيني عنهه وصفكت بيدي واشرتلهم يرجعون يتدربون .. رجعوا لاماكنهم ورحت انه نزعت الستره كلت ماتفيد

الستره بشي والكسل خلي اعرك روحي حتى تطلع الصخونه مني .. نزعت ساعتي خليتهه عل رف هيه ونقالي والستره لبست كفوف الملاكمه بيدي ولزمت

الكيس دك ضرب لحدما مرت فتره وانه مستمر والعرك يتصبب على طول جسمي حسيت خفقان كلبي زاد ودخت لزمت كيس الملاكمه ساند روحي

عليه ونزلت بالكاع متمدد وصدري يصعد وينزل اجر النفس حيل وكوه التموا علي كلهم ونظره القلق بعيونهم اشرتلهم وانه الهث ان مابيه شي

راحت شموخ جابت بطل الماي مالتهه الشاربه نصه وكرفصت يمي رفعت راسي بسرعه خلته على رجلهه وشربتني بيدهه وانه حيلي مهدود حتى

البطل ماكدرت الزمه.. وحاوط عقلي من بين هل هوسه كلهه والمرض شي واحد وهوه ان البطل لامس شفايفهه وهسه لامس شفايفي ماكدرت

اسيطر على هاي الفكره النطبعت بالي ولا طعم الحلو يلي صار بشفايفي من البطل رفعت ايدي ولزمهه سالم ورفعني عن الكاع وكفت ودارت بيه الدنيا كلت

بصوت شبه مسموع لسالم ان يشرف على تدريبهم وطلعت من القاعه وانه ساند نفسي على الضابط الثاني نزلت ودخلت مكتبي تمددت عل قنفه وانه

اتعوذ الشيطان من وره التفكير هذا رغم شردت من يمهه بس هل ذكره ماتروح من بالي لمن خلتني على رجلهه وشربتني من مايهه نفضت هل افكار

من راسي كوه وبقيت مغمض عيوني فتره ياله راحت الدوخه فكرت صار بيه هبوط لان شربت الدوه بدون ريوك ومنا ذبيت طاقتي عل ملاكمه

اكتملت السبحه.. المهم كعدت على حيلي طلعت الفلافل والصمون والعمبه والزلاطه سويتلي لفتين اكلتهن وشربت بطل لبن.. حسيت توه رجع الدم

لراسي وصحصحت سديت العلاليك وطلعت من المكتب صعدت بالمصعد ورجعت للقاعه دخلت وتوجهت الانظار علي اجه سالم بسرعه وكال بقلق..

_هاا سيدي ليش صعدت جان بقيت مرتاح بمكتبك 

_لا ماكو داعي بعد حسيت نفسي صرت احسن كملتوا ترتيب الجدول 

_اي نعم سيدي تفضل هذا التخطيط 

_تمام خليهم يغيرون ملابسهم للزي الرياضي ويلحكوني لقاعه الحديد

_بس سيدي تعبوا صار ساعه كامله يتدربون ..

باوعتلهم وفعلا شفتهم عركانين وتعبانين مو مال رياضه وحديد هسه هزيت راسي ب اي وكتله..

_تمام لعد خلي يرتاحون ١٠ دقايق ويبدلون ملابسهم وجيبهم لقاعتي

_القاعه السريه سيدي

_اي

_بس سيدي هاي القاعه سريه ومحد يعرف بيهه

_ماكو سر ينظم عليهم لازم نضحي باسرارنه حتى نوصللهم الفكره صح ويعرفون شغلهم زين 

_تمام حاضر سيدي..

انطيته السجل وراحت عيني لا ارادي عليهه وهيه تباوعلي بقلق على شنو تقلقين بعد يا شموخ هاي السنين كلهه كلبي متعلعل على فراكج وتالي من

التقينه طلع عندج غالي اووف  يامرض كلبي انتي .. جريت حسره وطلعت نزلت للطابق الاول ودخلت قاعه الشغل يلي جهزتهه النه انه وفريقي

قبل اسبوعين حتى نحل بيهه القضايا ونتناقش بخطط المداهمات وجانت عباره عن كراسي وطبله بالوسطه تشبه غرفه الاجتماعات تقريبا بس الحايط

الكبال الباب صاير عباره عن لوحه مليانه اوراق ملاحضات وصور وعناوين  المجرمين وكلشي يخص اخر قضيه استلمتهه .. جانت هاي القاعه

مخصصه للقضايا الجبيره والسريه يلي صعب تنحل او نطيح بعنوان ورقم المجرم او المشتبه بي وخاصه اذا جان ذو سلطه وصاحب واسطات

نناقش قضيته هنا بسريه وبدون محد يعرف بخطوتنه الجايه اتجاهه لحدما نطيح بمكانه بالجرم المشهود ونعتقله بدون ما يفلت من ايد العداله ..

والغايه من طلبي المتدربين لهاي الغرفه هوه حتى اعلمهم اهميه الشغل وكيفيه حل القضايا من خلال العناوين وطبيعه حياة المجرمين والضحايا لان

الشخص لو راد يصير محقق جنائي لازم يدرس ٣ مجالات مو بس مجال التحقيق والالغاز المفروض يتعلمون كل اقسام الجنائيات او يلقون نضره

عليهن عل اقل حتى ماتفوتهم فايته ولان كل تفصيله بسيطه تخص القضيه هيه بمثابه خيط رفيع يوصل لبقيه خيوط القضيه راح احاول

افهمهم اهميه دراسه كل هل امور والاختصاصات.. اندك الباب ودخلوا كلهم سويه دكوا تحيه مره ثانيه وقفل سالم الباب بقوا يباوعون حوالين القاعه

مستغربين من شكلهه اشرتلهم يكعدون عل كراسي وسوو مثلما طلبت ربطت الحاسوب بالشاشه المقابيل اللوحه وطلعت اخر قضيه استلمتهه جانت

مو سريه تماما ف اكدر اطلعهم عليهه .. عرضتلهم كل تفاصيل القضيه وهمه يقرون ويكتبون بدفتر الملاحظات الاشياء الممكن تساعد بفك القضيه ..

طرحت عليهم الاساله وصاروا ينطوني كل شخص رايه وتوقعاته للقضيه وطبعا احنه ماناخذ بالتوقعات بس نريد اثباتات وادله فعلمتهم على

كيفيه الشغل وشلون ممكن دراسه تفاصيل بقيه الاقسام ياثر على حل القضيه.. بقوا متفاجئين لان ماتوقعوا انهم لازم يدرسون هيج مواضيع

باختصاصهم وان هل اشياء فعلا مهمات وهاي اشاره خير منهم يلي ثبتتلي انهم مستعدين

يتعلمون كلشي يخص ويساعد باختصاصهم وشغلهم.. اشرت لسالم اجه يمي وحجيت بصوت مبحوح ..

_سالم تلكه ملف جبير اخضر برف الكتب جيبلياه ركض 

_حاضر سيدي..

طلع سالم شويه ورجع بيده الملف فتحته اخذت اوراقه وزعتهن عليهم وكتلهم..

_هنا بكل ورقه مكتوب مجموعه نقاط للاشياء الضروري تدرسوهه وتطلعون عليهه لانهه تفيدكم باختصاصكم كمحققين واريد الشهر الجاي اختبركم بيهن وتجيبون ممتاز مفهوم 

الكل : نعم سيدي بس شلون ندرسهن 

_راح ينطيكم الضابط سالم نسخ من الكتب الجنت ادرسهه بفتره تدريبي وكل يوم اريد تفرغون نفسكم فد ساعه تدرسوهن تمام 

الكل : حاضر سيدي ..

هزيت راسي بايجابيه وطفيت الحاسبه وكتلهم لهنا ويخلص وقتنه كاموا كلهم طلعوا من القاعه وانه طفيت الحاسبه والشاشه وشغلت الكلوبات واشوف

شموخ بعدهه واكفه بمكانهه استغربت ونزلت عيني على ايدي وانه الف بالاسلاك الكهربائيه وسالتهه بدون ماخلي عيني بعينهه..

_خير متدربه شموخ عندج سؤال عن تدريب اليوم

_لا سيدي بس اريد اسالك انت بخير لان مبين عليك مريض كلش ورغم هل شي واكف على حيلك تعلمنه 

_لا مابيه شي صرت احسن بعدما اخذت العلاج خلي بالج ويه التدريب ودرسي الكتلكم عليه

_راهب..

جمدت بمكاني ورخت عكده حواجبي من كالت اسمي كلبي ضل يرهف مدري انسحل مدري شصار بي رفعت عيوني باوعتلهه بتساؤل وكالت بقلق وهيه تمشي باتجاهي...

_راهب سويت شي انه غلط بدر مني شي 

_لا ليش تكولين هيج

_جا ليش احسك متجاهلني

_غلطانه

_لا مو غلطانه رغم اول ما التقينه جنه رسميين بتعاملنه بس عل اقل تحجي وياي طبيعي وتصبح

علي من تشوفني تهتم بتدريبي شنو الاختلف اليوم وهيج تتصرف حتى ماترفع راسك وتخلي عينك بعيني من احجي وياك

_لا يتراوالج يجوز لان مريض اليوم ومالي خلك

_متاكد

_اي مجذب عليج قابل

_تمام..

باوعتلي بحيره ورجعت انه كملت ترتيب الأسلاك صفنت بيه لحضه رفعت اكتافهه بحيره وطلعت رفعت راسي وعيوني تتبعت خطواتهه بلعت غصتي

وشمرت الاسلاك من ايدي بعصبيه.. اخذت نقالي ومفتاح القاعه وطلعت قفلتهه توجهت لمكتبي ودخلت راكع الباب وراي بضجر رفست القنفه

وخليت اديه وره رقبتي بحيره وغضب وانه افتر بالمكتب واحاول اجر النفس اخذت باكيت جكايري وطلعت للحديقه شغلت اول وحده وعبيت صدري

بدخانهه رفعت راسي للسما وزفرته بقهر وغصيت بعبرتي صرت اكح وكل كحه تزيد خنكتي أكثر شمرت الجكاره وكعدت عل صخره بتثاقل ساند

عكس اديه على رجلي وصافن بالفراغ شويه وشفت بنيه وكفت كبالي ظنيتهه شموخ وكلبي فز

ويه وكفتي وشفتهه نفس البنيه يلي رجلهه انفسخت بالتدريب عكدت حواجبي باستغراب وسالتهه..

_نعم متدربه رحاب محتاجه شي

_لا سيدي بس شفتك بهل حاله وقلقت عليك بعدك مريض تريد اسويلك كمادات شي ..