رواية قاتلة ابي الفصل السابع والعشرون بقلم بنت الشيخ ترابية
فزيت ساعة 6 تقريبا وجنت نايمه بغرفتي
صفنت انا اذكر جنت نايمه بالصالة وهذا جان بحضني
شجابني هنا
كمت طلعت لكيت الريوك مجهز على الميز ويمه ورقه والشقه فارغه مابيها احد ومصفي الصالة
شلت الورقه وفتحتها وجان مكتوب
:- كعدت من وكت وانا شلتج للغرفة وصفيت الشقه وسويتلج ريوك وخليت مصرف الج على الميز بالصالة
اكلي واشربي من الماي الي موجود على الكاونتر لا تشربين من الماي العادي ولا تطلعين اليوم لانو الحارس ماخذ اقامه لا تتحركين لمكان انتظريني اخلص شغلي واجي اطلعج وافرفرج...
ونقطتين شارحه وكاتب چيفتي
انا هذا الرجال لعب بعقلي
انا اكرهه ما احبه نهاااااائي شلون وافقت عليه شنو جنت احس اصلا؟؟؟؟؟؟!
مجرد شفته بالسوك شوكت لحك يحبني؟؟؟
صبيت الجاب وكعدت اكل
بس تفكيري كله بهذا الموضوع شنو سالفته
زين ليش يكول سحر البارحه وليش يكول مريضه؟
يارب دخيلك ماتحمل عقلي ثگل والله ثگل من التفكير
وكمت نظفت غرفتي والمطبخ ومسحت الطباخ
وصفيت كلشي وسويت عنايه الي وريناد مااجت
ساعة 8 ليل وصلني اشعار كمت فتحت تلفوني
من رقم غريب ع الواتس
اول رساله كاتب
: كاعده؟
وراها كاتب
: اذا كاعده جهزي نفسج ورمشي عليه خلصت شغلي حتى اجي اطلعج
عرفته هو
رحت بسرعه بدلت وجهزت نفسي وخليت مكياج
وترتبت على اخر حبايه مدري بسببه او لانو ضايجه ماعرف بس كل الي اعرفه داجهز نفسي بس حتى اطلع وهو صاحب الطلعه
خلصت تقريبا ساعة 9 خابرته كتله كملت
وكال جايج
رحت للغرفة خليت عطر سمعت صوت الباب انفتح عرفته هو لانو عنده مفتاح
رحت للصالة جان لابس جاكيت اسود وبنطرون اسود والبدي بيجي
نفس لبسي تمامًا
ايهم: خلصتي؟
: اي يلا
لزم ايدي حاولت اسحبها وضغط عليها
قفل الباب واخذ تلفوني بجيبه وصعدنا بالمصعد
وطلعنا من العماره وصعدنا بالسيارة وهذا كله ولازم ايدي حاولت اسحبها اكثر من مره وماقبل اخر شي خزرني و غلست
ايهم: شنو حابه تسمعين
: مدري اي شي يغير الجو
شغل اغنية انسى العالم حسيته متعمد
صفنت بوجهه وكلمات الاغنيه براسي وگفنا تقاطع سد الجام وصارت هدووء فقط الاغنية
بسرعة اجت ببالي لحظة من جنا نركص ع هذي الاغنية بغرفتي نزلت عيني منه
وتذكرت جنا بحاله هيام ببعض
لفظتها وعيني عليه
: اكرهك
هز راسه وابتسم وغير الاغنية
: اموت منك ايهم ماجاي اتقبلك نهاااائي
هز راسه وكال: شربي الماي؟
هزيت راسي ودرت وجهي على الجامه ونزلت دمعتي
شهكت حس عليه بسرعه وكف السيارة ودار وجهي عليه
ايهم: شكو شبيج؟
: اكرهك ايهم بس مادري
ايهم: احجيلي شكو
: عقلي ميريدك وبداخلي يكرهك واتقزز منك بس بنفس الوقت احبك واريدك
جاي اذكر لحظاتنا سويه بس مادري ليش اكرهك
يعني الصبح جنت ماذكر اي شي بيناتنا غير اول مره من شفتك اما هسه تذكرت كلشي
حابتك وكارهتك حيييييييييييل
ابتسم ومسح دموعي وكال: تهون يُبا انا يمج
: بس انا اكرهك
ايهم: مو بيدج.. هند خلي اكلج شغله تبقى بيني وبينج وحاولي تساعديني بيها حتى نتعالج
: شنو هي؟
ايهم: سليل مسويتلنا سحر انا كدرت اتجاوزه بالعلاج وبالابتعاد عنج طلعت منها بقيتي بس انتي عينيني خلي اساعدج هنادي
: وانا شنو اسوي؟
ايهم: كل الي اكلج عليه تنفذي وماتعانديني بشي
شغل السيارة ومشى
نزل الجام وانطاني كلينكس
مسحت دموعي وصفنت على الشارع
صف السيارة بالكراج ونزلنا لزم ايدي ومشى بيه
ايهم: نروح مطعم وراها نفتر؟
: ايي جوعانه
اخذني لمطعم كلش فخم ويجنن
كعدنا وبسرعه يضيفون والطلبات توصل خلال 10د
عكس العراق لسانا يوكع وحلكنا يصير شطوله
انا طلبت بيتزا وهو طلب كباب دجاج وهمبركر
اكلنا بس اشوفه ممرتاح
ويباوع وراي
انداريت شفت بنيه وولد كاعدين البنيه تأشر عليه وتبتسم والولد يبتسم صفح
رجعت باوعت لايهم خزرني
ايهم: شكو درتي وجهج؟
: مدري لانو شفتك تباوع درت وجهي انا
ايهم: باجر نروح نعقد محكمه وشيخ
: مو ع كيفك مستحيل
ايهم: مو ع كيفج انتي ومن نرجع للعراق نجدد العقد يمهم لانو ميدرون انا لكيتج
: وليش تعقد؟؟؟؟
ايهم: مو كتلج شنو اكلج نفذي بدون عناد؟
هزيت راسي وسكتت كلشي ماريد بس الله يخلصني منه اتقزز منه مو نوب يعقد واكيد زوجي ويكعد يمي وينام يمي ايييع
خلصنا كام غسل وانتظرني بره وغسلت وطلعت
افترينا وشفت ولد واكف يم ساعه تركيا ويبيع نفاخ
ابتسمت
ايهم: اصبري دقيقه
فلت ايدي وانا درت وجهي اباوع على العالم والشوارع
اجه من وراي ومد ايده بيها نفاختين
انداريت عليه وابتسمت وهو ابتسم
اخذتهم ورجع لزم ايدي واخذلي شعر بنات وعصير وراها موطه واخر شي دونات انتفخت كتله خلي نرجع
دگت ساعة تركيا ساعة 1
رجعنا للكراج اول ماصعدت للسيارة خليت النفاخ وره ونزلت الكرسي شوي جتفت ايدي ونمت
ماصحيت الا على الهمس مالته
: هدهد كومي حبيبي يلا وصلنا
فتحت عيوني ومطيت نفسي ونزلت قفل السيارة وانا كمزت
: مااااا افتح نفاخااااتييييي
فتحلي السيارة ويضحك
اخذتهم وقفل السيارة وشديت الخيط مالهم بأصبعي
ومشيت كدامه وادردم وهو يضحك
: يقفل السيارة وعايف نفاخاتي المن جايبهن لعد
وكفنا يم المصعد وكف كدامي منتظرين المصعد يفتح
: اذا نفاخاتي طكن انت السبب وتشتريلي غيرهن مفهوووووم
هز راسه
صعدنا بالمصعد وعكدتهن حيل بأصبعي الصغير اباوعله صافن عليه ومبتسم ومخلي راسه على باب المصعد
وكف بينا ونزل وياي للشقه
فتح الباب ودخلنا وكال
: باجر ساعة 9 جهزي نفسج نروح نعقد شيخ ومناك نطلع للمحكمه عندي شهود انا ومجهز كلشي تمام؟
هزيت راسي تقرب مني ولزمني من خصري وسحبني اله لزكني لزك بيه
صفن بعيوني شوي وتقرب باسني وراها نزل لحنجي وهمس : اتنفسج.. اعشقج وهايم بيج
وعافني وطلع من الشقه وقفل الباب وراه
وهم حسيت باحساس غريب رحت فتحت النفاخ بالغرفه وبدلت ملابسي وتمددت على الجربايه حتى انام وعيني على النفاخ واتذكر وابتسم
لحد ما نمت
"" "" "" "" ""
ماهر: بوية ساعة 3 الفجر شبيج؟
اسراء: عمتي حنان چاي تتعبني بالشغل ماهر وانا حامل وحملي ضعيف
ماهر: باجر احجي وياها تعالي يمي
مدلي ايده ونمت بحضنه
: ماكو اخبار عن هنادي
ماهر: لا وايهم يكول جاي ادور
: الله كريم.. رفعت راسي بسته بحنجه
ماهر: تتحارشين وحملج ضعيف
: ههههههه مابيها شي زوجي وحلالي .. عاد گرصني من خشمي وحضني حيل ونام
سمعت صوت طكطكه جوه سحبت نفسي من ماهر ونزلت
شفت زينب واكفه
: ها حبيبي شنو شدسوين؟
زينب: فاقد يريد ثلج ماعندهم
: اي انطي القوالب
زينب: اي هذا هو بس منتظره فاقد
اجه وانطته القوالب وراح وهي دخلت لغرفتها وانا سديت الباب وقفلته وانداريت شفت حنان وراي
حنان: وين جنتي؟
: هنا وقفلت الباب وين جنت يعني
حنان: لابسه ملابس نوم ونازله وحدج وتقفلين الباب؟ ويامن جنتي تحجين؟
: وي زينب عمه شبيج؟
حنان: وي زينب؟ وينها زينب! دخلي يجي الصبح واعرف شحجي
ودارت وجهها وراحت هزيت ايدي وغميتها وصعدت
"" "" "" "" ""
كعدت الصبح ماشفت الساعة بس فتحت عيني دك المنبه خرطت العافيه واهلها طفيت المنبه وجانت ورقه صغيره جواه
: اسف لانو المنبه صوته عالي بس حتى تكعدين على وكت
هذا شنو من بشر دخيلك والله يخوف شنو سالفته
طلعت لكيت الريوك جاهز والبيت صافي كل العاده
والباب مقفول ومخلي فستان يجنن بس لونه ابيض وحجاب ابيض وكعب بالصالة ويمهن عطر وساعة ومكياج
ويمهن ورقه صغيره صفره
فتحتها وكاتب
: هذا مال العقد البسي وتريكي وتجهزي وخابريني
رحت غسلت ولميت شعري تريكت وغسلت المواعين وبدلت اللون الابيض يجنن
هو مخلي وي المكياج حمره بني بس انا خليت حمره من عندي لونها احمر حسيتها نازكه اكثر وي الفستان
واتصلت عليه مارد دزيتله كتله : خلصت فتح الرساله وطلع من الواتساب
دقايق وسمعت دكه خفيفه بالباب عرفته هو فتحتها باوعلي وابتسم
ايهم: خلصتي مو؟
: ايوا خلصت
لزم ايدي ودك الباب على ريناد وانطاها المفتاح مال شقتي ورحنا بالمصعد
طول والوقت ساكته ورحنا للشيخ هو يعرفه
جان شي مانعني بس بالگوه لفظتها وحجيت
: نعم وانت وكيلي
بارك النا الشيخ من خلصنا وام ريناد واختها ويانا وهلهلت ام ريناد وطلعنا للمحكمه
وهم وصلنا وبالكوه انطيت الموافقه و وقعت
والهلاهل مال ام ريناد وحده وره الثانيه والشهود بالمحكمه باركولنا وطلعنا
وصل ام ريناد وبنتها واحنا طلعنا
اخذني لاماكن مختلفه وفرفرني واشترالي حلويات ورجعنا للعماره
بس مارجعني لشقتي لا اخذني لشقته كتله
: اريد اروح لشقتي غراضي كلهن هناك
ايهم: خلص تزوجنا شرعًا وقانونًا تجين يم زوجج والغراض ريناد نقلتهم والمفاتيح بشقتي هسه
وصلنا للطابق مالته ودخلت لشقته جان آثاثها غير عن آثاثي حيل نازكه ومرتبه وريحه عطره ماليه الشقه ملي
اخذني للغرفه مالته ودلاني على غراضي
ريناد مرتبتهن وتفاجأت مشتريلي جهاز عروس كااااامل من كلشي بحيث حتى ماكدر اكول بقى شي بنفسي
اخذ ملابسه وطلع يبدل بالحمام وكال اخذي راحتج
بدلت ولبست تراك عادي ورفعت شعري كبايه ونزلت كم خصله بعبث ومسحت المكياج وخليت مرطب شفه وبشره وعطر وطلعت
جان كاعد بالصاله مخلي رجل على رجل ورافعهم على الطبله ويباوع تلفزيون ولابس نظارات
رحت للمطبخ فتحت الثلاجه مليانه الحمدلله
مسواك ومخضر وكلشي ماكو نقص شعرررايه وحده
طلعت صدور دجاج وغسلتهم وكعدت اقسمهم حتى اسوي تكه
اجه وحضني من وره وباسني بأذني وهمس
: شدسوين؟
: تكه دجاج
: اجيب شي من بره لو لا
: لا ميحتاج بس عندنا شي حتى نشرب وي الاكل؟
: بالثلاجه الصغيره مخلي انواع
هزيت راسي وبقى حاضني هو
خلصت الدجاج
: بس شويه وخر خلي اشويهم
ماوخر عني ولا كأنو حجيت اصلا مغلس انداريت عليه
: ممكن شوي حتى اتحرك
ابتعد عني واخذت الماعون و وكفت على الطباخ اشويهم وهم رجع حضني
تضايقت منه بس عفته لانو ميوخر
شويتهم وشويت طماطه وبصل وهو ابتعد وطلع كولا ثنين والخبز حطه بسله وعلى الميز وبلش ينكل وياي وبعدين اخذني وكعدني وهو راح جاب الباقي
وكعدنا ناكل بهدوء
خلصنا وغسلت المواعين وهو راح توضى وانا هم وصلينا الظهر
طلع للصالة طفى التلفزيون والاضويه وسد البردات تأكد من الباب مقفول ورجع للغرفة وسد الباب
فتحت شعري ونزعت التراجي والكلاده والسوار
هو اجه ولبسني الحلقه وجان لابس حلقه هم
وراح تمدد على الجربايه طفيت الاضويه ومدلي ايده
ايهم: تعالي حتى لو تتضايقين بس انام وكومي عادي
رفعت الغطى واندحست بحضنه ونمنا
مادري شنو احس بس مرتاحه حيل بحضنه
وماريد اكوم اصلا ...
دك تلفونه اكثر من مره هزاز وكعدت بسببه بس ايهم نايم
سحبت التلفون وشفت الرقم بدون اسم سويت كتم بس وصل اشعار واتس
: ليش ماترد عليه مو احبك اني
كعدت عدل على الجربايه وفتحت الاشعار
ودزت مره ثانيه
: ايهم شما سويت اني صدك بس علمودك اكسبك ترى احبك اكثر من روحي واتخيلك وياي بكل لحظه تمر
انسحب التلفون من ايدي
: شدسوين يولي ماحب احد يفتح تلفوني؟
: بس انا مرتك
: اي شجنتي تسوين وباوع للتلفون ورفع عينه عليه
شدخلج هنا؟
: اتصل اكثر من مره والجهاز هزاز وكعدت بسببو
انت كول منو هاي وشتقصد بكلامها؟
: مو مهم شعليج بيها؟ تعالي خلي ننام
: ايهم صح انا اكرهك ومو طايقتك بس انا مرتك وكتلك رغم كرهي الك وتقززي منك بس احس احبك واغار عليك واريدك وانت كتلي بسبب سحر صح لو مو صح؟ يعني لو نرجع للواقع انا احبك ومرتك والي حق بيك اكثر من نفسك على حالك والي حق اتدخل واعرف منو هاي؟
ايهم: سليل
: وشتريد؟
ايهم: ماقريتي شتريد وانطيتها بلوك اكثر من مره وميفيد مدري منين تجيني
ورجع انطاها بلوك كدامي وشمر التلفون وسحبني ورجع حضني ونام
بس حتى لو ابقى مرته انا واكيد اغار عليه واضوج
عجبني تصرفه والهدوء الي هو بيه والتفهم
توقعته راح يضرب او يكسر او يسوي شي
شلت الافكار من راسي ونمت
