رواية سواد الاثمد الفصل الثامن والعشرون 28 بقلم نورس

سمعنا صوت صريخ نسوان من جوة نزلنا نتراكض ملحگنا لگينا مرة فدار وبناتها بالحوش يم الباب 

والباب مفتوح مديت راسي أشوف وألگي مآب متمدد بالگاع وجهه مشوه ورجله تنزف الدم تارس الگاع للحظة ما عرفته لوما أمه تبجي وتصرخ بأسمه 

فرحة :- يممممة مآب راح وليدي عمت عيني كووون يبووو يحظج يفرحة تصخمتي وتعزيتي يبوووو على حظج سوود الله وجهج راح وليدج

أمه تصرخ وخواته يبجن تخبلن عليه اني انخلست من منظر الدم وهو ساكن راسه بحضن أمه ميتحرك

نورجان واگفة على صفحة تبجي مرعوبة من المنظر وماما مخبوصة بيهن طلعوا الجيران عالصوت شافوا حالنا تناوشوه بسرعة وأخذوه بسيارتهم وطلعوا 

ورجال جيرانهم وگف يحاجي مرة فدار ويهدي بيها 

گلها :- گولي يا الله يا خوية الولد بيه نفس ادعي يتلاحگوله بالمستشفى 

- يا مستشفى وينو ويين أخذتوه ودوني لهناك 

كامت بسرعة تريد تطلع برة لزمنها بناتها ما خلنها وهي تعت بيهن وتبجي ماما صاحت بيهن يجيبلها الجبة 

هديل :- وين تطلع بهذا حالها ما عتشوفيها 

ماما ردتها :- اني أأجر تكسي آخذها ونلحگهم للمستشفى

الرجال جان واگف بالباب ومنطيهن ظهره سامعهن 

گلهن :- اني آخذجن بسيارتي 

جاب سيارته صفها بالباب صعدت وياه فرحة وماما وراحوا طلعوا لحگوهم للمستشفى 

جريت نورجان من ايدها مصكوكة لونها مخطوف 

خواته لزمن الگراج تربعن ينوحن عليه شگد سمّعنا حجي وكلام يغث بس ساعتها تناسيت وانقهرت عليهن 

أخذتها غسلت وجها

گتلها :- انتِ زينة

- مات بان ماتت

- شهالحجي هذا مسمعتي الرجال شگال بيه نفس بس عياط أمه وخواته خبص الجو وخلانا منشوف گدامنا

- شفتي شكله معرفته بان والنبي شمسوين بيه ذول

تنهدت وضليت ساكتة گوة لازمة روحي الرجفة مستحلة جسمي منظر الدم مديروح من راسي                  

 ...《 شدن 》 ...

الرجال طول الطريق يتصل على جيرانهم بالسيارة الثانية أخذ منهم عنوان المستشفى الرايحيلها 

ويحجي ويَّ ام مؤتمن ويهدي بيها واني يمها لازمتها

عيني بالشارع ودموعي تنزل گلبي مقبوض حيل

ميستاهل مآب يصير بحاله هيج مشفنا منه إلا كل زين

ضليت ألهج بالدعاء وأردد آيات وتهاليل طول الطريق

واصلين للمستشفى وبوجهم للطوارئ فاحصينه الطلقة جاية برجله سووله أشعة فورية لرجله لمكان الضربة

بعد الأشعة الدكتور گال الطلقة ضاربة العظم 

بسرعة جهزوه للعمليات ودخلوه گعدنا ايدنا على گلوبنا

جوراينهم معافونا كلهم على معرفة قوية بفدار ضلوا واگفين ويانا اتصلوا عليه بلغوه وبلغوا اخوته

نص ساعة يمكن وألگى فدار جاي بأتجاهنا هو والولد

انخبصنا وگف يستفسر من الموجودين على حاله 

ولدهم كلهم هنا شفت مؤتمن ووليد أخوه لشبير وشبير گاعد للگاع مدنك وايده على راسه وناس غربة وياهم 

إدارة المستشفى گامت تحجي ميصير هالعدد كله من المرافقين صرفوا الناس ضلوا بس كم واحد الواگفين 

والعينتين مالتي عاف الدنيا ونسى ابنه بالعمليات 

جان ممنتبهلي لحد ما اندار بظهره عليَّ شافني واگفة يم مرته مكتفة ايدي انطاني نظرة گصني گص 

يباوعلي من فوك ليجوة عيونه تشكلت بگصته

عدلت وگفتي بلعت ريگي اجاني فاير ينصي بصوته 

فدار :- يول تحجين صدك انتِ تچذبين جاية بهاي ملابسج وين جاعدين 

- شبيك فدار وكته

- مبنطرة عتفترين بنص الزلم كل عگلج ولجج شدن تردييين تسوديني ترى عگل ما ضال براسي 

يحجي وويَّ كل كلمة يشدد ويضغط على عكسي 

حجيت من بين سنوني :- ايدي فدار 

نترني :- ويامن اجيتي لهين

- مو لوحدي اجيت ويَّ مرتك جيرانك جابنا لهنا 

اني گتله جيرانك لو ابتليت على عمري تعاي إلا تگليلي شسمه أشرتله عليه واگف يسولف ويّ واحد من الولد 

من شافه تهستر شمرله عليه كم وحدة عالطاير بيني وبينه ورجع عليَّ يقسّم مخله لا أهل لا موتى

ومرته يمنا لزك تباوعله وتسمع لتقسيمه عليَّ وعلى أهلي ودموعها تنزل كلش مالها خلك بالها بغير عالم 

فار دمي حيل من إسلوبه گزيت على أسناني

- فدار نصي صوتك لأن تخزينا مو إسلوب هذا للتحاور وكُلش مو وكته

- شنووو المو وكتو أدحگج بهاللبس تفرفرين جدامهم وانا اگف أدحگلج يوول شو گليلي شدهن وفضيها عش متكسفة  

- زين بس صوتك 

- امشششي ما تضلين هين والخلقج 

سحب ايدي من بينهم جيرانه واگف يباوع عينه علينا 

وجهي انطعن من الفشلة 

- فدارر شبيك الناس منا

- اشششش ولا حجاية جدامي يلا لا أجرم بيج بهالليل جدام خلك الله مكيفة بروحها جايتني بهاللبس ويّ ازلمة غريب بنت الچللللب 

- فدار لتتجاوز حدودك وياي عاذرتك لأن بوضع ميسمح بس إلا أهلي خليلك حرمة للميت 

- أشعلهم واحد واحددد بگبروهم هم لوما غمان ما جان سيبوج وزتوج زوجوج لواحد سگط هو وأهلو 

فتحت عيوني على وسعها صرت أغلي من جوة وي كل كلمة دا أحجي عصر فكي بسرعة وخرزني بمعنى اسكتي

طلعني برة شال تليفونه يخابر دموعي صارت تصب 

لزمت ايدي أفرك بيها ودايرة وجهي عنه ما أباوعله 

اجى واحد من ولدهم بسيارته خلاني أصعد وياه 

گله :- رد أم بان للبيت وابقى هناك لازم الباب لا تخليهم لحالهم البيت بس حريم

- صار خالي غيرو توصيني بشي ؟

ضرب عالبنيد وصاح :- توكل

باوعلي من الجامة هزلي راسه يتوعدلي عود بعيني 

مشت السيارة دموعي مسكتت فوك زينيتي يعني؟..

أركض بمرته بالمستشفى وأفزّع بالناس بنص الليل تالي يگلبها عليَّ بحجة اللبس وأطلع اني المو زينة 

باوعت لملابسي عريضة وكلام الله عرريضة أعرفه شلون نحس من هالسالفة وهو محذرني وماشية مثل ميريد بس تعاي شنو لابسة بنطرون ليگول مصلخة

مخلالي إحترام گدام العالم الواگفة سواني فرجة إلهم

الولد اللي ديسوق يحاجيني واني مو يمه 

گال :- شنو خوية بيج شي ؟

مسحت دموعي :- ضاك صدري عالولد خطية 

- سبع يولي سسسبع مآب يطلع من حلك الموت مو چيلة التكسرو 

وصلني للبيت نزلت دخلت تلگني بناتها بالصالة يسألن

حجيتلهن الصار وبناتي يباوعلي گاعدات عالدرج 

أخذتهن للغرفة ولميتهن بحضني اطمن بيهن 

نورجان :- عليج الله صدك زين ما بيه شي ؟

- ان شاء الله ادعيله حبيبتي 

- لعد ليش تبجين 

- ليش هو هيّن الصار يماما والله لهساع صوت الطلقة يرن بأذني مكبوت صدري حيل خليني شوي أرتاح دا أگوم أغسل وأغير ملابسي 

أحجي وصوتي بيه حشرجة من گد ممختنگة

أخذت ملابس ودخلت للحمام فتت جوة الدوش المَي بارد ثلج بس أحس نار تطلع من جسمي 

صارت دموعي والمَي سوة ..

ميتة قهر من موقفه بالمستشفى زوجته گاعدة محجى وياها كلمة اني تعاي شنو جاية ويّ رجال غريب

وزادها عليَّ بحجايته الأخيرة خلاني أتهستر من الحرگة

بجيت لحد ما ثگل راسي وكل شوي تترد حجايته لأذني

سكتت وبلعتها بساعتها بس مراح أنسالياها 

طلعت للبنات لگيت فرحة بوجهي يمها بناتها 

أثاريه هم داز ابنه حتى يجيبها ميقبل تبقى بينهم

ضلينا بيومها گاعدين للصبح مخابرات مبطلت كل شوي أمه والبنات يخابرن عالولد يطمئنن على حاله

لحد مگالوا طلعوه من العمليات والدكتور مطمنهم عن حالته بعد العملية يلا گدرنا نجر نفس شوي 

گعدت بالغرفة عالچرباية لابسة إيزار الصلاة وبيدي المصحف أقرا قرآن وبناتي نايمات يمي 

سديته وبسته خليته عالميز سحبت الغطة عليهن وگمت

نزلت جوة توها طالعة الشمس الصالة نايمة بيها فرحة عالتخم أيدها على راسها وبناتها بالغرفة توهن نامن 

خطية هم تأذن الليل كله سهرانات عالهبطة الأكلناها 

سمعت صوتها دتون بوجع مشيت يمها لازمة راسها 

شدن :- عيني أم مؤتمن شيوجعج محتاجة شي 

وخرت ايدها من راسها عيونها مورمة صوتها مبحوح

فرحة :- عطيني حبوب وجع راس رحمة لأميمتج راسي عيطك من الوجع

مشيت للغرفة أشوفلها جبت الشريط وگلاص مَي ورجعتلها انطيته إلها أخذته وشربت شوي 

گتلها :- لو تگومين بالغرفة تمددين أحسلج 

- لا لا خليني هين بس تاحط راسي شوي

رجعت لوضعيتها عفتها براحتها ومشيت عنها

صعدت للبنات اثنينهن نايمات وگفت انزع الإيزار 

سمعت صوت وحدة تون بصوت خفيف 

فزيت تقربتلها مغطية راسها بالغطة هزيتها بأيدي

شدن :- نورجان ماما 

ما ردت وصوتها طلع وخرت الغطة من راسها وأشوف وجها قطعة دم حمرة مختنگة والدموع تصب 

حضنتني كعدت يمها خليت راسها بحضني واحجايها بصوت ناصي اريدها بس ترد عليَّ تنطقلها كلمة 

- لج ماما خمشتي گلبي وكلام الله شبيج بس احجيلي أحد محاجيج 

ردت بصوت مكتوم من البجي 

نورجان :- خايفة 

- منين خايفة شكو قابل يا أمي وگعتي گلبي لبالي بيج شي                     

ضلت ساكتة راسها بحضني مددت يمها ايدي تمسد بشعرها واحجي وياها أحاول اطمنها أوخر الخوفة

- هيانها الشمس طلعت الدنيا صارت نهار وفدار موگف الولد برة واگفين بسياراتهم مو لوحدنا حبيبتي محد يگدر يتعرضلنا بعد غمضي عيونج ونامي 

على حركات ايدي بين خصلات شعرها هدأت وسكّنت شوي لحد ما اثنينا غفينا واخذتنا النومة من التعب

لهناك بين النايمة والگاعدة ..

أسمع صوت بجي ناصي واثنين يبسبسن يم راسي

فتحت عيوني باوعت للفراش لا نورجان ولا أختها

فزيت بسرعة من نومتي لگيتهن گاعدات وراي 

نورجان تبجي وضامة راسها بين رجليها وبان يمها تحاجيها وترفع بالردان مالتها تريد تشوف 

شهربان :- نورجان بس خليني أشوفها 

رجعت دفعت ايدها وخرتها ومستمرة تبجي

- شبيجن 

ردت من بين شهگاتها بسرعة :- ما بية شي 

غافلتها بان وجرت ايدها بسرعة رفعت الردان طلعت زندها تشوفني..

- شوفي ايدها شلون متشوهة 

ايدها مسلوخة وملتهبة شكل الجلد جان مقرف ومؤذي

فز گلبي لصوتها وهي تشهك تقربت منها أباوعلها واني أگول خلصت الليل تون وتبجي مغمضتلها عين براحة 

- هاي منو مسوي بيج هالشكل ؟ 

- احترگت بالطباخ 

- كذابة حرگيش هذا بالطباخ شوداج عليه 

- احترگت

رجعت اختنگت گوة تطلع الكلمة من لسانها 

وبان تتفاور عليها..

- شو انزعي البدي خلي أشوف 

اعترضت صحت بيها يلا نزعته أباوع لزندها

انعصر گلبي عصر عليها الحرك مو سطحي وهي لا منظفته وباقية بملابسها ضاغطة عليه منتهي 

- بس فهميني شحرگها إلج هيج الطباخ اني ما أخليجن تتقربن عليه 

شهربان :- لا طباخ ولا هم يحزنون هاي فرحة وبناتها البربوقات حارگاتها ومخوفاتها حتى لتحجي

باوعت عليها متكتفة ومنتچية عالحايط 

- صدك ولج احجي نورجان لتشلعين گلبي

هزت راسها :- ومتحجين ليش ساكتة ؟

- خفت گالت إذا حجيتي أچويلج لسانج مرة اللخ

- منو منهن هاي 

- هديل حرگتني بالحديدة وأمها لزمتني سدت حلگي 

- اي ليش شمسويتلهن 

بان گالت :- مبينة ديرجعنها إلنا شلون حرگت ايد بنتها 

- وهيج يشوهن أيدها حسبي الله ونعم الوكيل شنو من يا ملة هذني بعدين انتِ يا ماما غير تجين تبلغيني تعيطين تطلعين صوت ليش مالنا علم 

- مگدرت والله البارحة سحبني للغرفة وسدن حلگي خوفني وكلكم جنتوا حايرين بسالفة مآب وبان طلعت ويّ عمو تيم محد مجان موجود وأصلًا مجانت تأذيني هالشكل گلت هسه تطيب بس من ردت أنام هاج الوجع 

- تأذيج حيل ؟

- كُلش أحس أيدي دتنأكل

باوعت لأيدها :- هاي مترهم هالشكل اليوم لازم ناخذج للدكتور ديفحصها إلج أدري شلون حملتي الوجع ومحجيتي 

شهگت :- ما أدري

متت قهر من شفتها أخذتها غسلت ايدها بمَي فاتر نظفتلها داير مدايره خليتلها عصارة وضمدته إلها 

رجعت لفراشها تنام ضلت بان على گعدتها صافنة 

انتبهتلي صارت عينها بعيني غورگت عيوني

تقربت حضنتني وباست خدي

- لتبجين بداعتي 

باوعتلها شلون نايمة ونصيت صوتي 

- احترك گلبي عليها شنو أذيتها عليهن حتى هيج يسون

- أرجعها إلهن والحُر 

خزرتها :- بالله انتِ اللخ اگعدي واسكتي لو محارگة هديل من البداية مجان رجعن على أختج 

- حرگتها بساعة عصبية بسبب تجاوزها علينا وكلها يومين ورجعت ايدها طبيعية حرك سطحي ما رحت حميتلي حديدة ولزگتها بأيدها شنو وين گاعدين 

- أحلفج بداعته لأبوج متسوين شي

- جيد

- حلفتج بان

- مو گلت تمام ؟

- أعرفج متاخذين بكلامي بس أندار تسويلج سالفة 

- لا اطمئني 

ضليت ساكتة أباوعلها وأباوع لأختها بقت يمها واني غسلت ولميت شعري وقبل لا أطلع وصيتها

- گومي بان اقفلي الباب 

- شنو السالفة ماما 

أشرتلها :- اششش صوتج اختج گوة نامت گومي مثل مگتلج يلا 

طلعت وگامت قفلته وراي يلا جريت نفس 

العايفة مصيبة ابنها ومتدري بيه عايش لو ميت وحابستلها طفلة بالغرفة وحارگتها هاي وحدة ما عدها مخافة الله وگلبها أسود وأعوذ بالله من الگلب اليحقد

نزلت جوة ..

سمعت أصوات جاية من الصالة باوعت گاعدات مرة فدار وبناتها وعلى جهة گاعد شبير يسولفون 

يسألنه على مآب وهو يحجيلهن وضعه وكلام الدكتور

شافني گال :- اجيتي والله جابج ام بان اجيت على محفظة خالي بيها جنسيتو ناسيها البارحة هين ووصاني على أوراق ومستمسكات بفايل أزرك گلي ام بان تندل مچانهن 

- اي موجودات 

- بلا أمر عليج جيبيهن تالحك آخذهن إلو گبل لا يطلع للمركز 

- هسه بعيني

رحت لغرفتي أخذت محفظته ووگفت يم الكنتور أدور الفايل اللي طلبه ظهري صاير للباب اجاني صوتها

هديل :- ما تستحين انتِ حرمة شگدج عتدورين جدام ابن عمتي بالبجامة مال بيت شني مات الحيا 

سكتت ولا انداريت عليها 

رجعت گالت :- ولو انتن المثلجن منين يلوحجن الحيا لا عدجن حرام ولا حلال وما لاگيات زلام تضبجن 

شدن :- لا عيني وين أعرف اني الحرام والحلال خليته إلج انتِ وأمج 

طلعت الفايل وسديت الكنتور وانداريت عليها

- بالله شگالتلج روحج من لزمتي وحدة مثل نورجان ومخوفتها هالخوفة وجاية دتحجين بالحرام لعد السويتنه باليتيمة هاي مو حرام ؟

- أكررهج انتِ وبزرتج أدحك دم سنوني ولا أدحگجن لو بيدي أطلعجن من بيوتنا بليلة ظلمة تانخلص من شكولجن وزلامنا تفتك 

عضت ايدها :- بس آخ من الزلم من تهوى تنعمي عيونها وما تدحك الجدامها شنو أصلو يا حاوية الزتتو علينا وخلت ريحة جيفتو ترست بيتنا 

مشيت منها وقبل لا أتعداها جريت شعرها من ورى الشال عاطت بسرعة وخلت ايدها فوك ايدي

صاحت :- انچطي عنننني .. ابعدي غاد ولجج

سديت حلگها بأيدي الثانية كتمت صوتها لازمتني بتك ايد ايدها الثانية الحارگتها بان ما تگدر تحركها 

نصيت صوتي حجيت  

- هيج سديتي حلگها وخليتيها تصرخ بصوت مكتوم 

جريت شعرها حيل :- تأذي الحركة مو بالله ؟

فاتحة عيونها حيل تباوعلي وتجر بروحها تريدني أوخر

رخيت ايدي دفعتني وابتعدت عني لازمة شعرها

- لا اني مدمغة ولا قليلة شر حاطة الله بين عيوني أسمع حجيجن وأبلعه ببطني جنت مقدرة ظرفجن وتعاطفت وياجن بس انتن ميجي بعينجن الزين أثاري مو آدميات ثقي بكلام الله من توصل السالفة لبناتي أحرگجن حررك ميوگف بعيني أحد هاي اني گتلج

أخذت الفايل والمحفظة من الگاع عفتها وطلعت من الغرفة مشيت انطيهن لشبير ملگيته بالصالة

أشرتلي بنت فدار الثانية عالبرة

گالت :- طلع غاد يغسل بحمام الخطار

مشيتله لهناك لگيته واگف عالمغسلة يغسل ويذب بالمَي على وجهه وشعره باوعلي بالمراية مسح وجهه واندار

شبير :- كاملات ؟ 

- اي محد لاعب بالفايل على حطة ايده 

فتحه يباوع ويگلب بيهن 

                    

گتله :- ترددت أحجي جوة مگدرت اسألك گدامهن

- گولي 

- شصار البارحة من رحتوا لبيت سالم 

رجع الأوراق من ايده للفايل

- رحنا لبيتو وردينا رحنا لبيت نسيبو ذاك السگط ما لگيناه لا هو ولا ذاك تاركين بيوتهم للحريم المخانيث

- معروف هذا طبعهم من يسوولهم سالفة يضمون روحهم ويخلون الحجي لسجودة 

هز راسه :- سهلة سهلة خليهم شاردين وخاشين روسهم تايثبتون عليهم الدعوى الراح تنرفع عليهم يابا خالي شمتحلف بيهم إلا يركضهم بالمحاكم وينزعهم الرتب

- شيريد يسوي 

- هاي جدامج ماخذ المستمسكات ورايحلو للمركز راح يشتكي عليهم تايفتحون بيهم محضر تحقيق 

- مآب شلون وضعه 

جر نفس طويل :- والله إذا أگلج زين أچذب عليج

- سمعتك جوة دتطمن بيهم 

- خالي وصاني ما أحجي للبيت

- خوفتني والله شبيه 

- عمليتو زينة بس تبقى بعد مضاعفات العملية ورى ما يطيب الدكتور گال حطوا ببالكم كل الأحتمالات جائز بعد ما يشيلون الضماد والخيط تصير عندو إعاقة بالمشي 

انخمش گلبي خليت ايدي على صدري 

- لا فدوة شبير گول غيرها 

- اندعيلو يولي كلنا عندعي ما توصل إصابتو لهاي المواصيل ينتهي هذا بالله الكريم تا يتدمر مستقبلو وشغلو

مگدرت ألزم دموعي گال :- لا هيج ام بان لا تخليني أتندم تاسولفلج 

- مآب ماله ذنب بكل اللي صار راح بالرجلين من ورانا 

عقد حواجبه :- من وراكم شنو شلون حجي هذا 

مسحت دموعي عن خدي

- من يوم معقدنا اني وخالك وهم يهددون مخلونا نرتاح

- يولي لا تخليني أزعل منج انتِ مالج ذنب هم سگط حتى الگاع تافلتهم من الخيسة الخاشين روحهم بيها بس وحك ربج متدوم إلهم 

باوع للساعة گال :- هم يلا بعد أروح من تحتاجون شي الولد برة بس دگيلهم الباب 

سلم وطلع مستعجل گاموا يتصلون عليه 

ضلينا هاليوم على أعصابنا مرة فدار تتصل بيهم تريد تروح تشوف ابنها وفدار ممخليها 

للعصر دگيت الباب مال شارع من جوة انفتح وصار گباله واحد من الولد من شافني دنك راسه 

- گولي حرمة خالي 

شدن :- هم تعرف شبير شوكت يجي دا أتصل عليه محصلته

- يبطى لليل ويّ خالي خيرج معتازة شي گولي ما يردج إلا لسانج  

- محتاجة واحد ياخذني للطبيب بنتي ايدها محترگة وينرادلها معاينة وشبير گلي إذا احتاجيتي شي دگي الباب الولد ميقصرون

- ابشري هساع أجيب السيارة للباب وانا آخذكم 

رحت استعجلت نورجان وجبت جنطتي ونزلنا 

صارت بوجهنا زوجة فدار تباوع لنورجان

فرحة :- هاي حرمة شبير هيج مطلعتها زنودها عريانة 

- بزودج انتِ وبنتج من حرگتنها مخليتنها تنام الليل 

جانت لابسة بدي بردن قصير حتى لا ينلچم مكان الحرك ولافة على رگبتها وشاح خفيف 

وبنته تباوعلي من فوك ليجوة فصلتني

- وأبوي يرضى عتطلعين بهاللبس لا حجاب لا لبسة طويلة تستر جسمج 

أمها ردتها :- أبوج نسى أصلو وعيشة أهلو وناسو وتطبع بطبع البغدادية وبناتها يطلعن البيت من شور راسهن وبلاية حجاب لا أكو زلمة اللي يردهن ولا يحاسب

باوعتلهن بطرف عيني وأشرت لنورجان نمشي

مليت من إسطوانة اللبس هاي كلها صارت تحاسبني ومستشرفة براسي وتگعد تحلل وتحرّم وناسين نفسهم

أخذنا الولد بالسيارة لمجمع طبي هناك الدكتور فحصها ونظفلها الحرك حطلها مرهم وضمدها بشاش طبي وعلمني كل شگد أغيره إلها بالبيت 

وصفلها علاج مسكن آلام ومرهم حروق وطلعنا

رجعنا للبيت أول مدخلنا صارت بوجهنا بان بالحديقة

رحتلها :- ليش طالعة برة الغرفة مو گتلج ابقي بيها واقفلي الباب لحد ما أرجع 

أحجي وياها ولا مقلدتلي مدنگة تفحص بالصوندة شادينها لنافورة صغيرة تسگي الثيل 

- بان دا أحاجيج

گامت نكثت ايدها من التراب 

گالت :- خوش صوندة هاي 

ضليت صافنة أباوعلها منتظرة منها جواب 

ردت بملل :- لتباوعيلي هيج اختنگت جوة طلعت أشتم هوا 

- ليش تحبين تعانديني 

- ممعاندتج بس خما أبقى حابسة روحي 

- محابستج گتلج اصبري بس لبين منرجع ليش تكسرين حجايتي دا أسوي هيج من خوفي عليج 

- ماما افهمي ميگدرن يسولي شي وإذا هن ساقطات اني أسقط منهن متشوفيهن رجعنها بنورجان مو بية 

باوعت لنورجان غيرت الموضوع بسرعة 

- شگلكم الدكتور خما ملتهب الحرك 

نورجان :- يموت بان يموتتت

- الدكتور ؟

- ولج لا الوجع 

بعز قهرتي ضحكت ودرت وجهي عاضة شفتي 

همست :- اشتعلتي بان 

مشت گعدت بالمرجوحة يم نورجان تتبسم وتباوعلي

- شكو اليوم المزاج وردي 

- من رحتن نمت نومة وشفت نفسي بالحلم لازمة صوندة وحاصرة هديل وأمها بالغرفة شبعتهن كتل

- النوب 

- وگعدت مرتاحة سبحان الله 

- صدك سبحان الله

ضحكت وخليت ايدي على حلگي أكتم صوتي

الوكت اتأخر لليل حيل يلا انفتح باب الشارع وفات فدار وراه شبير ضل گاعد بالحديقة وخاله فات للبيت

اتلگنه مرته وبناته جرهن لحضنه باس راسهن 

أباوعله وجهه صاير أسود تعبان حيل گوة يحجي

گعد بالصالة وصاح على وحدة من البنات 

فدار :- بابا سويلي إستكان چاي

مشن للمطبخ واني على وگفتي يم باب الكليدور أباوع من بعيد بس أصواتهم توصلني 

بين المترددة أمشيله أتحمدله بالسلامة على ابنه وأرجع أتذكر السواه البارحة وأكابر على روحي 

ضليت فترة على نفس الوگفة أحجي بيني وبين نفسي 

تعوذت الشيطان وجريت نفس هو هسه بظرف صعب وأعرفه روحه تصير بخشمه من ينضغط مو وكتها اني ماخذتلي موقف منه أكو شي أبدا من شي 

مشيت للصالة وين مگاعد وصلت للباب وشفت مرته گاعدة يمه وگفت بمكاني ما تحركت ظهرهم إلي 

گاعدة تبجي وتسأله على وضع مآب تريد تروحله وهو يهدي بيها ويصبّر عليها بالحجي گلها باجر آخذج

رجعت منين ما اجيت درت وجهي وطلعت للحديقة 

شبير على گعدته بالگاع ثاني ركبه ومرجع ظهره عالحايط بيده جگارة يدخن وصافن عالسما 

مشيت يمه سلمت وجريت كرسي من الطاولة وگعدت 

ذب آخر نفس من جگارته وطفاها بالحايط 

گال :- يولي شو البنات مالهن حس مرتين اجيت للبيت اليوم ما دحگتهن

- البارحة سهرانات للصبح وتخربطت نومتهن وهسه يلا قفلن ونامن

- شعجب بان ما عملتلها فاينة منا منا 

ضحكت :- ترى أفقر بنية بالدنيا بان ليش هالظلم 

- صدگتج 

جر علاگة مخليها بصفه وطلع منها سليبر فرو وردي 

- هذا إلها مو ؟

- لا هذا مالتي

- بس هي الجانت لابستو البارحة حاجية براس ابن تيم ومخليتو ياخذها لبيت عمتها هاي الصغيرة 

- أمجاد قصدك ؟

هز راسه أشرتله بيدي :- لا مستحيل البارحة جانت ويّ أبو علي

- لا متوهمة تيم نازل بنص الطريق وگلهم يردون لبيت خالي والأخت ما مقصرة ماخذة دور طلحة وساحلة علي وياها وطافرين عالبيت 

صفنت :- شو مگالتلي 

- شتگول يولي لوما فردة هالنعال مدحگها تيم وعارفها محد يدري مدستريها بينهم هي وعلي 

تذكرت ألبوم الصور اللي جابته گالت من عمتي

عضيت ايدي :- آخ منج بان

- لا تحاجيها مضموم إلها ضمة هي وذاك القشمر ابن تيم أبوه متحلف بيهم بس يفرغ راسو من سالفة مآب تا يگضبهم يگضي بيهم التوبة 

سحب باكيته طلع جگارة لخ وطلع جداحته يورثها

جريت نفس :- على ذكر سالفة مآب شصار وياكم لزمتوا سالم وستار

سحب نفس من الجگارة وصار يسولفلي من البداية 

رايح فدار للمركز الصبح ومقدم شكوى جزائية ضد سالم وستار ضابط التحقيق هناك على معرفة بفدار

فاتح بيهم محضر أولي وماخذ أقوال فدار وحاجيله تفاصيل العداوة والتهديدات القديمة الجانت بينهم 

الضابط فورًا رافع الملف لقاضي التحقيق وتحولت القضية بيده ومقدم تقرير طبي عن حالة مآب وياه تسجيل صوتي لحماة أمجاد معترفة بيه عليهم 

شبير :- القاضي ما طول للعصر صدر بحقهم أمر قبض وراحت دورية سحبتهم من الباب وجابوهم يستجوبوهم

- وين جانوا لعد 

- الله أعلم تلگيهم دحگوا السالفة كبرت گلك الشردة متفيد نسلم روحنا ناخذلنا چم يوم بالتوقيف ونطلع كفالة

- كفالة النوب شنو هالصلافة

- انتِ ما سامعة فوك شينه گوات عينو ورى ما جروهم للتحقيق نكروا كلشي ولحگهم المحامي القندرة مالتهم بساع قدم طلب إفراج بكفالة بس القاضي رفض 

أثناء مدا نحجي فات مؤتمن للبيت شافنا اجى سلم وسحب كرسي وگعد ويانا نسولف بالصار

مؤتمن :- بس أبو علي هم لوتي گايل للمرة ما راح أجيب أسمج بالسالفة وهو مسجللها صوتية معترفة بيه حتى على أخوها 

- شالفايدة طلعت برة العراق والتسجيل القاضي اعتبرو قرينة مو دليل قطعي لو جانت موجودة وجاريها ماخذين أقوالها نستفاد أكثر 

گتله :- حماتها لأمجاد أعرفها مسكينة لا حول ولا قوة تلگاهم مهددينها وخافت على أطفالها

- لا أگلج ولا تگليلي بيها وبلياها سالم وستار أكلوا خرا أبوي گاعدلهم ركبه ونص وناطرين مآب تستقر حالتو تاياخذون إفادتو وتقرير الطب العدلي هم هالچم يوم يطلع 

شبير :- وفوگاها توقيف ورفض كفالة 

- ومناك توقيف عن العمل وانسحبت صلاحياتهم

- والسلاح هم انسحب

- والترقية تجمدت

- ومخصصاتهم انضربت 

- سلملي عالرتبة العلى إچتافهم 

بهالأثناء طلعت هديل من البيت

هديل :- ها خوية گواكم الله

- هلا گوة حيلج 

- عجل انتوا اثنينكم هين ياهو ضل يم مآب 

- عفنا وليد هناك وأنا راح أردلو الليلة أنام عندو بس أجيت أسبح وأذب هدومي خسنا صار يومين نتزنح بنفس الملابس

اندار لشبير :- راد الليلة للغربية ؟

- مو هسع بس تانام ساعتين أكسر نعاسي زوملت من البارحة لليوم وراي دوام الصبح باجر يستلمني الآمر إلا يزيني حفر

- بهذلت حالك بالروحة والردة لبغداد 

- شنعمل من خابرونا هناك ما دحگنا جدامنا كلها ركبت سياراتها واجت 

باوعلي :- ام بان لا تنسين تگعدين نورجان تاتتحضر ترد وياي عندها دوام 

- لا شبير فدوة لعينك متگدر ايدها تون عليها خليها هاليومين بس يهدئ الألم وترجع تداوم

عگد حاجبه :- شبلاها أيدها

صارت عيني بعين هديل 

گتله :- وگع عليها مَي حار واحترگت 

- وشلونها هساع

- الولد أخذوني للطبيب وانطاها مسكنات ومرهم وطمني عليها

- عجل آخذها مناك لبيت أبو علي تاتضل يم عمتي شيخة تدير بالها عليها ومناك امر المدرسة آخذلها إجازة

- بعد أحسن 

مؤتمن عينه بتليفونه گال لأخته تسويله چاي واني دا أگوم سألت شبير إذا يريد أفرشله حتى ينام 

جان تندارلي گالت :- شدن روحي جيبي چاي للولد 

انداريت عليها :- ها

- شني ما تسمعين جيبي چاي للولد 

مؤتمن خزرها :- هدديل

- إلمن تخوزر شگتلها انا 

- احجي عدل 

- حاجية عدل عجل تاحجي أعوج 

باوعتلي :- ما تمشين شعندج صادة بوجهي 

بعدها دتحجي فز عليها أخوها لزمها من راسها متخبل

صاح :- هاي عليمن تتأمرين ولججج شنو أختج الصغيررة وتا تامرين عليييها ما تستحين طايحححة الحظ 

- شيييل ايدك عني 

شدن :- عوفها مؤتمن لا هالشكل

- نوبة الاخرى من تندهيها تگوليين أم بان مو شدن وما تحاجيها من گفى خشمج وتحترميها مثل ما تحترمين أبوي سمعتي يو لاا

تباوعله فاتحة عيونها حيل مغورگة

دفعها :- امشي ولي يلا

فاتت جوة شبير ضل گاعد ويدخن واني ألوم بيه 

- ميصير تحاجيها هيج گدامنا فشلتها

- لا ما احترمت وعدلت اسلوبها الجايف هذا طبها وجع لا تعطيها مجال أم بان هديل گوية عين ادريها ماخذة موقف وما راضية لزواجكم انتِ وأبوي 

مشيت عنهم مَي بارد نزل على گلبي 

مو بطبعي أخبّث لو أحقد بس من أسمع صوت نورجان شلون تون الليل كله وأتذكر السوته بيها أغلي من جوة

وهالمؤتمن على گد ما عصبي ويصارخ اليوم كله بس ولا مرة زل بحجاية وياي وما يرضى لحجي أمه وخواته عني اني والبنات ..

شبير فرشتله فراش ونام بالأستقبال 

ومؤتمن دخل يسبح بالحمام البراني 

اجتني أخته الثانية 

گالت :- أم بان هذا مؤتمن يريد ملابس من أبوي وما أعرف شاخذلو منهن انتِ طلعيلي أحسن

- هسه بعيني 

مشيت لغرفتنا مديت ايدي فتحت الباب ما انفتح!..

حاولت باليدة أكثر من مرة تأكدت مقفول من جوة

عقدت حاجبي شلت ايدي دگيته على كيف ماكو رد

مديت راسي باوعت للصالة فدار مموجود 

گلت يجوز دخل نام وجاي تعبان ما مركز 

دا امشي وسمعت طگة المفتاح والباب انفتح

وية ما انداريت صارت فرحة بوجهي 

اصطكيت بمكاني من شفتها جوة الغرفة 

فرحة :- هاه شعندج

غير لو أنطق بحجاية نسيت حتى عليمن اجيت 

أشرتلها عالغرفة :- ملابس .. ملابس لمؤتمن 

فتحت الباب سوتلي مجال دخلت أمشي صارت عيني عليه نايم عالسرير وايده على عيونه ولا على باله

أحس جسمي اشتعل نار فتحت الكنتور حتى ما أدري شأخذت جريت القطعة الصارت گدامي

ايدي صارت ترجف لا إرادي حرگتي صارت بگلبي 

باوعتلها واكفة لازمتلي الباب منتظرتني أطلع

ورجعت أباوعله على وضعه نايم ولا حاس بالدنيا

بحركة طلعت مني بأنفعال رگعت باب الكنتور حيل 

فز بسرعة شال ايده يباوع للغرفة صارت عينه عليَّ

درت وجهي ومشيت واني مكشرة وجهي وأسمع صوته يصيح وراي انطيت الملابس لأخت مؤتمن وصعدت

دخلت للغرفة البنات نايمات سويتلي مكان بينهن ومددت أباوع للسگف بس فنها لو عيني لاحها النوم

صرت أتگلب يمنى يسرى مديت ايدي أمسد مكان گلبي بصدري غصة بس الله يدري شكبرها 

أريد أبجي بس دموعي مراضية تنزل وتريحني

گمت من مكاني جريت الگتر لميت شعري رفعته وطلعت من الغرفة على كيفي بدون صوت

نزلت الدرج البيت أظلم والكل ذاب روحه من التعب 

اجت عيني على غرفتي بعدها مسدودة 

تنهدت ومشيت طلعت برة وصلت لباب الشارع دگيته

ثواني وسمعت صوت واحد من ولدهم 

صاح :- ياهو ؟

ترددت أحجي بللت شفايفي وجريت نفس

- اني أم بان 

- گولي تأمريني بشي 

- خالك خلص باكيت جگايره وراد واحد يشتريله باكيت لاخ

سكت شوي ورد :- جان خابرني تاروح أجيبلو عليمن مطلعج بهالساع .. شيدخن هو ؟

- كينت رصاصي 

- شوي وأجي اخذي راحتج انتِ

- لا حنتظرك هنا بعد 

- براحتج 

سمعت صوت خطواته وهو يبتعد زفرت نفس طويل مثل المكبوتة الجو جان حلو وبيه نسمة هوا باردة

بس اني جنت من جوة أغلي وبس أصفّن 

لحد مفزيت على صوته :- مرة خالي هين ؟ 

- اي هياني 

فتحتله الباب شوي مدلي بس ايده من ورى الباب ناوشني باكيتين جگاير تشكرته وقبل ليمشي 

گتله :- بس لحظة دا أجيبلك الفلوس 

- افاا عيبة بحگي هاي خوية ما رجيتها منج 

حجاها وسد الباب حيل ضليت صافنة هذا شبيه ضاج

ما ركزت مشيت من جهة الحمامات لورى البيت 

گعدت عالصبة وفتحت باكيت سحبتلي جگارة بعدين تذكرت مجايبة جداحة غمضت عيوني ضميت الباكيتين بجيبي وگمت للمطبخ جبت جداحة ورجعت لمكاني 

ورثتلي وحدة وسحبت منها نفس رجعت ظهري للحايط

عيني للسما وضوة الگمر وأحجي بيني وبين روحي

شبيج يعني شمتوقعة مثلًا  تبقى زوجته عليمن مخنوگة وكاتلج القهر من ساعة مشفتيهم ولهسه

أحاول اقنع روحي بهالحجي لحد مخلصت الجگارة بيدي واني ممنتبهة ذبيتها وطلعت وحدة لخ ورثتها

وية ما ذبيت الدخان صارت دموعي تكت على خدي

أدري هي مرته .. بس هاي غرفتي .. وفراشي اني نومتهم سوة عليه وقفلة الباب شيسموها عود 

اني اليوم كله آكل بروحي على سوايته بالمستشفى ومن رجع وشفت وضعه مشلت بخاطري وعذرته

وهو حتى مكلف نفسه يجي يعتذرلي تالي العينتين نايم وياها هيج ماخذني بالعين الصغيرة ومالي قدر عنده ؟ 

ضليت هواي گاعدة لحد منتهبت للگاع تارستها گطوف جگاير سطرتهن وحدة ورى اللخ التفكير أكل راسي 

دنگت فركت وجهي وايدي الثانية لازمة جگارة 

فزيت على صوتها :- ماما 

رفعت راسي بسرعة طفيت الجگارة وذبيتها من ايدي وعيني عليها مسحت وجهي عيوني مورمة

شدن :- شگعدج ماما ارجعي نامي

- شفتج من گمتي من فراشج تأخرتي وضل بالي يمج

سحبت ايدها بستها گعدت يمي جريتها لحضني 

- منين مقهورة هالمرة ؟

باوعتلها وضليت ساكتة گالت :- أعرفج متدخنين بس من تنقهرين حيل 

- ماكو شي

انتبهت لحضني الباكيتين مال جگاير وجواهن صورة 

أخذت الصورة وگعدت لحيلها تباوع بيها رفعت راسها

شهربان :- مشتاقتله ؟ 

- حنيتله 

- يعني بطلتي تحبيه 

- ما أدري بس شايلة بگلبي عليه 

- ليش

- دار وجهه للدنيا يتمني ويتمچن من وكت 

- بعدج مصدگة هو انتحر ؟ 

كملت كلامها :- بابا ميعوفنا والله هم قتلوه 

ضليت ساكتة وهي تباوعلي وترجع تباوع للصورة عيونها مدمعة 

بان :- نسيتي شگد جان يحبج وشگد جان متعلق بينا خاصة اني اني جان ميفارگني ماما لو نورجان اللي مجان ينام الليل حتى يطلع حقها منهم 

- حجي هذا ضيع نفسه وضيع حقها وضيعنا احنا وياه

- لتگولين هيج ما انتحررر مقتول اني شفته

ضيگت عيوني :- شنو شفتي ؟ 

بقت ساكتة دموعها تنزل 

- انتِ حتى مدا تتذكرين شنو صار بيومها وبكل مرة اسألج هالسؤال تسولفيلي حلمج عقلج ديوهمج بشغلات مالها وجود افهميها هاي 

گامت وگفت عاصرة الصورة بيدها

- يرربي ليش متصدگيني دا أگولج بابا ميعوفنا بابا يحبني ميگدر على فراگي هم القتلوه وحرموني منه 

شفتها انفعلت ملحيت وياها 

- تمام هذا هو مقتول مقتول مثل متردين

ضربت رجلها بالگاع بعصبية وصياح

- لمررررة وحدة ثقي بية لمرة وحدة اخذي بكلامي وصدگيني لا تاخذيني على گد عقلي 

تبجي وتحجي دارت وجهها ومشت عني منفعلة 

جريت نفس ورجعت راسي ليورى                     

- شفت شعفتلي من مصيبة حارث ..

غمضت عيوني نزلت دموعي مثل الجمر على خدي 

مو گد أمانتك اني والله مو گدها .. مگدرت أحميهن منهم ومن شرهم .. يتقاسمون بيهن ومنين متجيهن الدگة .. مرضن ومرضت اني وياهن .. يا ربي دخيلك الصبر يا ربي عيني ومدني بالقوة لخاطرهن  

مسحت دموعي لميت الگطوف من الگاع بسرعة وگمت فتت جوة ذبيتهن ووگفت أغسل وجهي وأفرش أسناني

شفت أضوية الأستقبال مشتغلة 

عقدت حاجبي وباوعت للساعة أربعة الفجر 

صعدت للغرفة لگيتها نايمة ومغطية راسها

مشيت لنورجان أگعدها گامت تغسل واني حضرت جنطتها وخليت ملابسها وحاجاتها 

اجت وجها مبلل تروح هيج وتجي هيج گوة مفتحة 

- أسويلج أكل تاكلين تصحصحين شوي ؟ 

هزت راسها لا 

- شلونها ايدج بعدها تأذيج 

نورجان :- شويونة 

خليت علاجها بالجنطة وهي بدلت ونزلنا اني وياها 

لگيت شبير بالمطبخ حس عليّ اندار بنص التفاته بحلگه جگارة واگف يم الطباخ يريد يشغل العين 

شبير :- يولي هذا شلون يشتغل صار ساع أسوي بيه 

مشيت شغلته اله :- شتريد تسوي 

- ردت استكان چاي راسي انسطر 

- اتركه اني أسويلك 

- لا عليمن هذا هو الكتلي بس أحميه

- قديم هذا من البارحة عوفه دا أسويلك جديد 

راح هو للأستقبال واني وگفت خليتله إستكان وطلعت گلاص إلي لأن راسي أحسه يريد ينفجر 

انتظرته لبين ما فار صبيته وأخذته لهناك للصالة

شفته گاعد ويمه نورجان يباوع لأيدها المحترگة 

اول مشافني گال :- عش ما گتيلي هديل حارگتها

سكتت باوعت لنورجان دنگت راسها 

- سالفة وصارت بعد متسوى ينحجي بيها 

- مشوها زندها الأدبسز شنو الما تسوى أفين حظها والله بس خلي يصبّح الصبح 

- شُبير عفية بلا مشاكل مو وكتها أصلًا بان هي البدت وحرگت ايدها بالكتلي وهو حامي صارت وحدة بوحدة

- عجل وترجعها بمرتي ؟ نورجان شعليها بعمايل أختها 

- فدوة سد السالفة اخذها وياك للغربية وهديل كلها كم يوم وراجعة لبيت زوجها ودتشوف حالنا شصار بينا ورى مآب 

- خالي يدري ؟

- هو خالك شوكت جاي للبيت فوك ضيمه أجي اني ازيده خليه حاير بمصيبة أبنه                   

هز راسه :- هيّن ..

جر تليفونه والسويچ وگام طلع حتى چايه مشربه

باوعتلها بلوم :- لويش گتيله كذبت عليه گتله احترگت بالمَي

- ما أدري هيج گايلتله أول مشاف ايدي ضل يسأل شلون وليش 

أخذت گلاص الچاي وگعدت عالتخم أخوط بيه وأهز برجلي 

اني گوة مشّيت سالفة بان وحرگتها لهديل گدام فدار هسه بس يرجع يفتح الموضوع وياه هم يگله رجعتلها الحركة وحدة بوحدة هاي حرگت وذيج حرگت

نورجان :- ماما آسفة والله مو قصدي أحجيله 

باوعتلها جريت نفس 

- موو يمج ماما خايفة لا تكبر السالفة وتصير مشكلة لا شبير يسكت ولا فدار ينطي ببناته 

ضلينا على گعدتنا هواي باوعت للساعة عبرت الخمسة

- شنو السالفة وين راح 

نورجان مخلية راسها عالتخم ومفتحة عيونها بنعاس 

جبت تليفوني واتصلت عليه طلع مشغول 

انتظرته شوي ورجعت خابرته نفس الشي 

- عجيب ويامن يحجي كل هالوقت 

رفعت راسها :- خابرتيه ؟

- مدا أحصله خطه مشغول 

طلعت برة دگيت الباب وسألت الولد عليه

- عفية شُبير يمك متصيحلياه 

- لا والله طلع بسيارتو صار ساعة شرايدة منو 

- عساس يطلع للأنبار وياخذ مرته وياه طلع وما اجى بعد 

- هساع أتصلّو تاشوفو 

ضليت واكفة ورى الباب متخصرة شوي واجاني 

گال :- عندو شغل خوية شوي ويرد 

- خير ان شاء الله

مشيت دخلت للبيت لگيته ديتصل على موبايلي 

نورجان :- هذا هو

جاوبته :- ها شُبير

شبير :- نطّرتكم يولي طلعلتي شغلة ورحت تاگضيها صرت بعيد عليكم وطالع بوجهي للرمادي بعد ما ألحك لدوامي خلي نورجان عندج وبنهاية الأسبوع أجي لبغداد وي طلعة مآب من المستشفى وأردها وياي 

گتله براحتك سديت الخط منه وباوعت لنورجان

- گومي ماما كملي نومتج راح شُبير للأنبار

أخذتها وصعدنا للغرفة ننام 

گعدت الصبح قريب الهدعش راسي يريد ينفجر 

صرت أفرك بيه ومدنگة راسي 

نورجان :- ماما حبيبتي بيج شي ؟

رفعت راسي لگيتها گدامي گاعدة عالموبايل منتبهتلها                     

- راسي من البارحة ديأذيني حيل 

- ضلي لتنزلين جوة راح أنزل أسويلج ريوك وأجيبلج حبوب وجع راس 

- لا اگعدي واستري عليَّ وين تنزلين 

لميت شعري وگمت طلعت للحمام غسلت ورجعت 

انتبهت مكان بان فارغ 

- اختج وين ؟

- نزلت جوة 

نزلت بسرعة ونورجان وراي أسمع أصواتهم يسولفون

فدار گاعد وزوجته يمه يشربون چاي اثنينهم بملابس طلعة الظاهر جانوا طالعين 

وبناتهم يحوسن بالبيت ينظفن ويعزلن 

رفع راسه شافني واكفة على مسافة منهم درت وجهي حتى مصبحت عليه مثل كل يوم 

هو حس ضل يباوع ساكت مشيت للمطبخ سويت ريوك

ونورجان طلعت للحديقة صاحت بان وگعدنا نتريك

باوعتلها :- متاكلين ؟

بان :- ماريد 

- أكلي دتاخذين علاجج ميصير تاخذينه على معدة فارغة 

- يوم گتلج ماريدد

- احجي عدل ولتنترين لا أهفج على حلگج

عافتنا وگامت معاجبها 

خليت ايدي ورى رگبتي دنگت راسي 

- خبلتني هالبنية خبلتني لا راضية تعقل ولا تريحني 

- ماما اعذريها 

رفعت عيني باوعتلها 

گالت :- ترى والله تحبج وتضوج لضوجتج وتشتعل لو واحد مسج بكلمة بس هي انفعالية شوي ومتعرف شلون تعبر إلا هيج 

- واني شرايدة منها يا عيني اني أتحملها ومتعودة على فيوزاتها بس العالم العايشة وياهم ممجبورة تتحمل تصرفاتها 

- هسه بس تفش تجي تراضيج وتبوسج 

- هو انتن وحدة تغطي للخ واني واگعة بيها أرگعلجن

بان :- المؤمن مبلتى شدونة والله ابتلاج بينا 

درت راسي لگيتها واكفة وراي اجت حضنتني من ورى حاوطت رگبتي وباست خدي 

- أعتذر شدونة مو قصدي أنتر بوجهج 

- جديدة هاي النوب شدونة 

- ماما .. ماماتي .. يوووم .. هيج أحسن ؟ 

ابتسمت ولزمت ايدها خليتها گدامي 

- هسه صيري حبابة ولخاطري اكليلج لگمتين دتاخذين علاجج 

- صار 

گعدت بدت تاكل ونورجان هم أكلت على واهسها يتنادسن ويضحكن بيناتهن جريت نفس براحة 

اجاهم خطار من جماعة فدار الكبار الولد صاحوا چاي 

وگفت بنته تسويلهم ونورجان وياها تحضر بالإستكاين

واني واكفة عالسنك أغسل بالمواعين استفقدت بان 

غسلت ايدي ومشيت أدورها بالبيت 

مشيت للكليدور دا أفتح الباب صاح من وراي

فدار :- لا تطلعين زلم برة 

انداريتله ما انطاني وجه مشى للمطبخ أخذ صينية الچاي ورجع للأستقبال لخطاره 

عشتو بس لا هو الزعلان انفتح باب الكليدور وفاتت 

- شعندج بالحديقة كل شوي گامزة لهناك

بان :- اشتم هوا شلون يعني حتى هوا الله ما نشتمه ؟

- لتطلعين بعد زلم فايتة طالعة يضلون يحجون 

هزت راسها وصعدت فوك 

للظهر خفّت رجل الخطار من البيت فدار گعد بالصالة والولد يمه وليد أخو شبير ومؤتمن هم موجود 

يسولفون بطلعة مآب وسالفته 

فدار گلهم :- بس يطلع مآب بخير وسلامة ما أسوي هين لا ذبيحة ولا أعزم تاخذونو لهناك للغربية ناسي كلها مناك وخطاري چثير وهذا بيتي ما يسع

وليد :- وشلون ناخذو برجلو والعملية 

- بسيارة شبير العالية ينزل المقاعد الورى ويساويهن وية الجنطة ونمدلو فراش تايمدد رجلو عليه هو طريق يكتل روحو ساعة ونص 

- خوش حجي 

بعدهم ديحجون واجى صوت واحد من الولد من ورى الباب مال كليدور صاح :- خالي هييين ؟ 

- أسمعك 

- هاي حرمة برة طالبتك بالأسم 

- ياهي هاي 

- والله ما اعرفها أول مرة أدحگها وياها زلام اثنين 

صار هدوء كلنا مركزين بصوته گمنا واحد يباوع للثاني

أشر فدار لأبنه ديگله يروح يشوف منو وصوت مرة من برة تحاجي بالولد الواگف بالباب

صاحت :- وخرر هيج 

دفعت الباب مال كليدور وفاتت سجودة للصالة 

فدار :- انا شكثر دحگت صلفات وعرمات بحياتي بس مثلج ما شفت لا بالله 

صاحت بنترة :- لا تشمر بالحجي لكك هن حجايتين أگولهن وأروح 

فز مؤتمن من مكانه :- احجي عدل لج لا أكسرر سنونج بحلگج

صار بوجهه وليد 

گله :- تسودنت تريد تطك حرمة 

- ما تدحگها شتهتر!

فدار :- اطلعوا برة 

اندار لأبوه فاتح عيونه :- لا تكفرنا انتَ

- اخذو واطلع وليد وبلا مكاون وية جماعتها برة 

جره وليد يريده يطلع دفع ايد وليد ونترها وطلع وهو يفور وجهه محتقن 

گعد گدامها عالتخم خلى رجل على رجل وماد ايده منا ومنا 

- احجي شعندج

- تتنازل عالدعوى الرافعها على أخوي ونسيبي 

- مو أگلج انتِ صلفة 

- اهووو اسمع لا تضل تدور بالحجي لا سالم ولا ستار إلهم ايد بسالفة ابنك ولا عندك شي عليهم إلمن مدوخ راسك وراسنا تنازل وطلعهم لا يصيرلنا غير حجي وياك

- شو تهددين انتِ 

- ما أهدد جاية أبلغك لو ما طلعوا سالم ووستار مناه لباجر إلي تصرف ثاني وياك ترى عندي زلم تسد عين الشمس لا لبالك سجنتهم وما وراي أحد 

گام من مكانه :- كونج ازلمة وواكفة تحجين هالحجي جدامي تامدچ هين بنص البيت وأحط چيلة براسج 

- بعدال عشر زلم وداعتك لا القبلك گدرولي ولا راح يجي اليلاويني 

- انا وياج والزمن طويل منين ما تطلعيلي ألاويج بالقانون؟ أنا القانون بالعشاير؟ لآخذ حك ابني مربع من أكبر شارب بيكم

- ما ترتاح والله وابنك لو جان عندي جان حطيت الطلقة براسه وخليتك تشيع جنازته 

واگف گدامها ايديناته ورى ظهره ورافع راسه يباوعلها الحاجب معگود مضيك عيونه ووجهه جامد ما بيه رد فعل 

- مو كل مرة تنبلع الطگة الدنيا دوارة وهالمرة دورتها عليكم ويلا برة بيتي يتعذرج 

- لو ما طلعتهم يومية أشيعلك جنازة من ولدك والله 

صاح :- بررررة 

ضلت تصيح وتغلط دار ظهره إلها وأشر بيده لهديل 

- هديل اطرديها 

مشتلها هديل وهي مستمرة تغلط اندارت عليَّ شافتني 

خزرتني تتوعد :- آخ يانتِ لو ألزمج إلا أگطعجن وصل انتِ وبزرج على سواياتجن بسيطة اني إلج 

لزمتها هديل تدفع بيها :- بررة لج

دفعت ايد هديل حيل 

- لا تدفعين اني أطلع محد يطردني

اندارت ومشت هديل وراها سدت الباب حيل

فدار گعد سحب باكيته يدخن ومدنك أشر لبنته عالإستكان مال چاي أخذته ومشت للمطبخ 

انتبهت لمرة فدار تباوعلي ولو النظرات تكتل جان اني ميتة ساعتها گد مفاتحة عينها وخازرتني 

باوعت وراي شفت بناتي عالدرج أشرتلهن براسي فوك

وگفت گباله تحاجيه 

فرحة :- ما تحجي 

باوعلها أشرلها براسه بمعنى شكو 

- هاي البربوك الأجت منين تعرف حرمتك ؟

رفع راسه باوعلي ورجع سحب نفس من الجگارة

ذب الدخان گلها :- ما تعرفها 

- شني قشمر جدامك مو سمعتها بأذوني

صاح بيها قاطعها :- بسسسج عاد سدي سالفتها گتلج ما تعرفها كافي انهي الموضوع

جر باكيته والتليفون وطب للغرفة وهي عينها عليَّ

خفت وبنتها تسألها شكو ويباوّعلي صعدت لبناتي 

بالليل دا أنزل لغرفتي آخذ ملابس أريد أسبح

جريت اليدة هم لگيت الباب مقفول عرفتها جوة

جريت نفس دگيته محد فتحلي درت وجهي ومشيت

مر كم يوم مآب استقرت حالته شوي الولد يرحون ويجوون للمستشفى ويجيبولنه أخباره

ماخذين أقواله گلهم :- دفروا باب الشقة وفاتولي ملثمين لا واحد ولا اثنين ولوني دك وبوكسيات لحد ما طحت للگاع ما ادري بالدنيا فكيت عيني وانا مربط وعيني معصبة لا أشوف الجدامي ولا أعرف شكلو وكل يومين محوليني لمچان شكل 

الضابط ذاكرله اسم سالم وستار سائله شفتهم 

رده لا وهذا أخوه متخبل منه شلون هيج گله

مؤتمن :- الزمال گنالو اعترف عليهم حتى لو ما مدحگهم ولبسهم السالفة الأغم 

وليد :- شعليه هو خالي ما رضى گلو شنو شفت سولف لا تزود حجي منك 

- هو وأبوي زمايل 

- كونه هين وسامعك تغلط عليه إلا يمدك بالگاع 

- انا وأبوي نتصافى معليك انتَ 

بيوم طلعة مآب إلتهينا بالخطار ولزمنا المطبخ 

خالتهم (أخت فرحة) هم جاية من الغربية تعاونهن وبناته ومرته واني وياهن أساعد باليحتاجونه

فدار متجنبته طول الأسبوع هو ملتهي بخطاره واني هم ما أتصادمت وياه بعد 

واگفة بالمطبخ أغسل بالمواعين ونورجان يمي تشطفهم

سمعت صوته يصيح بأسمي ما انداريت رجع صاح

خالتهم اندارتلي :- هذا أبو مؤتمن ينده عليج 

غمضت عيوني وجريت نفس غسلت ومشيت أشوف

ملگيته بنته أشرتلي :- راح للغرفة 

رحت لهناك فتحت الباب ووگفت 

شدن :- صحتلي

اندار من الكنتور وجهه محتقن 

- صارر ساع أندهلج من باب المطبخ ما تسمعين ؟

- مسمعتك گول محتاج شي

رجع يدور بالكنتور :- الدشداشة مالتي البيضة وينها 

مشيت يمه سوالي مجال طلعتها إله مخليتها آخر شي لأن مكوية مردتها تتكسر 

سمعت صوت الباب ينسد انداريت بسرعة 

فدار :- انتِ شبيج 

خليت الدشداشة عالجرباية گتله :- شبية ؟

- انتِ گليلي صار چم يوم دايرة الوجه وتتحجين من گفى خشمج شكو صاير شي وانا ما أدري ؟

- والله ما أعرف اسأل نفسك

- حزورة هي غير انا تاسألج 

كتفت ايدي لصدري :- ما أدري هو انتَ فعلًا ناسي لو دتضحك عليَّ ومسوي روحك متعرف 

صفن شوي بوجهي عاقد حاجبه وراها گال

- بس لا بعدج ماخذة على موقف المستشفى مال ذاك اليوم 

- ما أدري انتَ شتگول 

- يولي تعرفيني انا من تطك براسي وانخبص أصير ما ادحك جدامي وانتِ شفتي حالنا بذاك اليوم شصار بينا لا تلوميني جنت أعصاب وصرتي جدامي 

- وهاي انتَ كلما تصير أعصاب تجي تذب حرگتك بية ؟ 

- ول بوية گتلج حتى ما أدري بروحي شهترت وياج وهاي انا جدامج شتأمرين انا حاضر 

غورگت عيوني :- فدار سبيتني وسبيت أهلي وزوجي المتوفي وهنتني گدام العالم طلعتني تجرجر بية من ايدي خليتني فرجة لليسوى والميسوى وتگولي ما أدري بروحي شحجيت ؟؟

- حگج عليَّ يابة وانا غلطان بعدد ؟

نزلت دموعي ومسحتها بسرعة 

- حتى هالكلمة دتطلع گوة عليك 

- شدن لا تسودنيني گتلج حگج عليّ واعتذرتلج شترديني أعمل يعني أبوس ايدج ورجلج تاترضين ؟

- ميحتاج لتسوي شي 

دا أمشي أتعداه جرني من عكسي إله خلاني گدامه 

- يول شبلاج رايد أراضيج تديريلي وجهج وتمشين ؟ 

- عندي شغل 

- شددددن 

غمضت عيوني ودرت وجهي مزعوجة من صوته 

هزني من ايدي اللازمها :- عجل لبالج بس انتِ الضايجة وشايلة بخاطرج حطي براسج انا هم ما راضي على لبسج وطلعتج وية ازلمة غريب نص الفجرية تفرفرين

- أفرفر ؟ فدار جنت دا اعين زوجتك شفتها مفرفحة ورى ابنها گلب والدة مفجوع منطاني گلبي أخليها تنوح وراه والرجال جوارينك ما قصر دك صدره وأخذنا

- ازلمة غريب شتعرفين عنو تاتصعدين وياه السيارة بنص الليل وهو سگط ابن سطعش سگط عيونو تبصبص للنساوين

- مرتك هم جانت صاعدة وياه ليش مسويت وياها مثل مسويت وياي ؟ 

- وانتِ تقارنين روحج بيها ؟ دحگتي لبسج ولبسها ؟ فرق السما عن الگاع بينها وبينج وانتِ جايتني مبنطرة تفترين بنص الزلم 

- كافي تحط حجتك باللبس مشكلتك متثق بية 

- من أغار عليج لانج عرضي وما أريدن أحد يدحگج أصير ما أثق بيج ؟

نزلت دموعي :- مدا أشوفها غيرة گد ما هو شك ومرض من تگلي تفترين بنص الزلم هذا شك .. ومن تسألني منو الجابج هذا شك .. ومن تخلي زوجتك وتنسى الدنيا والناس وتگعد تحاسبني عاللبس هذا شك .. لا المكان جان مناسب ولا التوقيت مناسب ولا الحالة الأحنا بيها تسمحلك تتصرف هيج تصرف بيئة بحقي

ضل صافن بوجهي :- يول انتِ شعتلوصين ؟ 

مسحت دموعي بحرگة ورجعت تنزل 

- اي هذا الصدك مشكلتك بعدك دتشوفني شدن الطبتلك للمركز نص الليل مدا تشوفني زوجتك شگد دا أحاول أتغير لخاطرك وتغيرت! ..

غيرت طريقة لبسي وإسلوب عيشتي في سبيل تتقبلني بس بالمقابل مدا أشوف منك أي جهد أو تغيير لخاطر علاقتنا بس اني أتنازل وبس اني اللازم أتغير وناسي نفسك وطبعك وياي وكُلشي عندك تگول غيررة 

أمسح دموعي وترجع تنزل اختنگت حيل صرت أشاهك ودنگت أبجي وهو على وگفته يباوعلي متفاجئ 

لزم حنكي يريدني أباوعله :- دحگيلي

دفعت ايده من وجهي تخبل لزمني ضاغط على فكي 

- يا ويلج لو عدتيها ونترتي ايدي منج هيج أفين حظج والله أطرر راسج حدر الگاع وأحسب الله ماخلقج

باوعتله دموعي متشكلة بعيني وهو مخنزر بوجهي 

دفعني جر ملابسه وطلع رگع الباب بكل قوته 

انهديت لوحدي بالغرفة أبجي وكاتمة صوتي لا يطلع 

ضليت بالربع ساعة على حالي ما اجى بعد 

سمعت صوت سيارات من برة ورمي جايبين مآب

گمت مسحت دموعي وواگفة عالمراية أعدّل وجهي ماريد أحد يشوفني واني هالشكل 

طلعت خواته وأمه وخالته واگفات يباوعن من شباك الصالة وأمه تبجي فاتحين باب الشارع على حيله

صوت الرمي علك الجو أول مشافتني نورجان لزمتني حيل عاصرة ايدي تخاف من صوت الرمي

باوعتلها :- روحي اصعدي يم بان 

راحت تركض واني مشيت للمطبخ أكمل شغلي 

وأسمع هوستهم وهلاهل أمه وخالته والبنات وزلم برة أصواتهم عالية شي داخل بشي متفهم كلمة 

ذبحوا ذبيحة جوى رجله على طلعته بالسلامة بس الذبيحة الكبيرة والعزيمة متحضريلها هناك 

لحد مدخلوه جانوا مجهزيله غرفة جوة خواته منظفاتها وفاراشات فراش جديد عالجرباية 

عاد يلا هدأت الهوسة شوي بس البيت صار ما يتنفس من الناس عمامهم وولدهم وجماعتهم من الشغل 

تارسين الشارع بسياراتهم انخبصنا خبص وضلينا على هالحال طول هاليومين خطار رايح وخطار جاي والچاي والگهوة بكل وكت يجي الليل نذب روحنا من التعب

ثالث يوم الصبح خطارهم جان خفيف حتى فدار رجع لدوامه وابنه ووليد جانوا موجودين يستقبلون الناس

وليد زوجته علوية بنت عم صدر الدين صديق تيم وبيته ببغداد هو الوگف لخاله أكثر الوقت لان الباقين دواماتهم بالأنبار وتيم يركض بالمحاكم والمراكز 

وگعت براسهم هو ومؤتمن وفدار معتمد عليهم أكثر شي

مشى خطارهم والولد هم طلعوا فرغ البيت شوي 

وصار هدوء گعدت بالمطبخ وجريت نفس بتنهيدة 

صار كم يوم حتى نوم مشبعانين مثل العالم 

رفعت راسي بفزة دا أسمع اسمي ينصاح 

گمت من مكاني دا أشوف منو الصوت جاي من الغرفة الجوة اللي ينامن بيها بنات فدار

الباب مفتوح شوي دفعته بيدي على كيف صارت بوجهي بنته وعلى صفحة واكفة أمها

شدن :- صحتيلي ؟

تباوعلي وتفرك بأيدها وجها مو مريح مثل المسويتلها مكسورة ضلت ساكتة ما ردت 

فرحة :- انا ندهتج 

- گولي محتاجة شـ....

بعدني ممكملة حجايتي وايد دفعتني من ورى بكل حيلها انردمت ليگدام صرت بنص الغرفة 

انداريت وأشوفها هديل لازمتلها حديدة 

صحت بيها :- شبيج تخبلتي شلون تدفعيني هالشكل 

دا أمشي أريد أوخرها من الباب حتى أطلع انجريت من شعري ليورى ورجعتني لزاوية بالغرفة دفعتني للگاع

باوعتلها فاتحة عيوني :- شبيييييج 

اندارت لبنتها أشرتلها 

فرحة :- سدي الباب 

دا أگوم رجعت خلت ايدها على جتفي ونزلتني للگاع

بنتها هذيج الخوف مالي گلبها

گلتلها :- يمة والله أبوي لو درى يگوم البيت علينا

- انهجبي ولجج انهجبي أخيج يتعاكس وية الموت اسبوع انا ما غافية عيني ما أدريه ميت لو عدل تالي تطلع هالصفرة وبناتها ساس البلة 

- معليهن يمة 

- وغمة سسسدي الباب گتلج

دفعتها هديل ليبرة :- اطلعي روحي يم مآب دحگيه تايعتاز  شي انتِ حدرو

طلعتها وسدت الباب وتگابلن اثنينهن فوك راسي 

حجيت والخوفة بگلبي 

- شرايدة مني 

- رايدتج تتكسفين على روحج وتاخذين زبالتج وتطلعين من حياتنا من يوم الدحگناجن ما شفنا الخير 

- مو بيدي الصار اني هم مغلوب على أمري ومراضية بالصار مآب معزته كبيرة عندي 

هديل :- لا تگولين اسمو على لسانج النگس عبن تنگسينو بحجواتج أخوي شاف الموت بعينو ورجلو سگطت من وراج ومن ورى بناتج هدمتن عيشتو جعل عيشتجن بالهدم كون 

- شنو ذنبو شاب بعز شبابو يروح بالرجلين من وراجن انا ربحي بمنو لو جان ميت وفاگدتو ؟

شدن :- وليش دتفاولين عليه هيانه عين الله عليه ربج رجعه إلج سالم والصار لا ذنبي ولا ذنب بناتي من ابتلينا بناس ميخافون الله بينا 

- واحنا عش مجبورين نتحمل بلاجن روحي تزوجي غير واحد يخلصج منهم فدار عندو عايلة وعندو ولد وولد اختو أربعة أي واحد يصير بيه شي دمو برگبتج

- مالي علاقة بكل الصار والله

- شرايدة فلوس ؟ أنا أعطيج فلوس شكثر ما رايدة وأشوفلج ازلمة تعقدون ويستر عليج وعلى بناتج

ضليت صافنة على كلامها :- بكل عقلج دتحجين ؟ 

- اي بكل عقلي عجل اشايفتني بنص عگل لو أهذري 

هديل :- ننطيج فلوس تلمين هدومج وتاخذين بناتج نص الليل تديرين وجهج وترحين بلا ردة واحنا نجهزلج سيارة توصلج شوف وين تردين تزتج

- فدار لو عرف باللي دتسونه مراح يسكت وكلام الله خلني أطلع وأنسى الحجي جني مسمعت شي 

جرت شعري حيل صرخت بوجع بنتها سدت حلگي

- تهدديني بزلمتي ولجج ؟ انا تهدديني بفدار ؟؟ ولج فدار بكبرو ما يگف بعيني لو وصلت لواحد من ولدي 

هديل :- أبوي من يدحگج دايرتلو وجهج وماخذة بناتج ورايحة بنص الليل بدون علمو هو من ذاتو يطلگج هاي اذا هامتج هالسالفة ورايدة تتزوجين نوبة الأخرى الله يسلمج ما تعيشين بلاية ازلمة يومية بحضن واحد 

دموعي تحرگني تارسة عيوني واني أسمعها 

- خلصيني يلا اي يو لا تاخابر الزلمة الراح ياخذجن يحضر سيارتو بالليل 

مرديت بكلمة دا أگوم رجعت دفعتني گمت أصرخ بعلو صوتي جابت وصلة خلتها بحلگي بكل قوتها 

ولزمتني من ايدي من ورى لوتها لورى ظهري قيدت حركتي وبنتها لازمة الحديدة عليَّ تقربها لوجهي

هديل :- لبالنا آدمية وتجين بالعيني والأغاتي بس المثلج متعلم عالدك والتدمغ

فاتحة عيوني بكل قوتي عيني عالحديدة الحامية وهي لازمتها وأمها مقيدتني أحاول أملص روحي ما أگدر غير الغلط والفشار والطعن اللي يلعب النفس نزلت دموعي

اندفر الباب وفاتت بان لازمتلها صوندة شافتهن لو تخبلت ركضت عليهن بكل حيلها تضرب بيهن عافني وصارن اثنينهن عليها يردن بس يلگفنها وهي استلمتهن حصرتهن بالزاوية هديل تملصت واجتها من ورى

فاتت نورجان تركض مدري منين بيدها السليبر الوردي مالتي وگعتلها دك على ظهرها جرتها وخرتها من بان

مچلبة بيها واللخ لازمة فرحة الصريخ ترس البيت 

سحبت روحي أباوع للگاع أدور عليها لحد مشفتها ركضت جريت الحديدة منهن وشمرتها بعيد عنهن                    

خفت لا تلگفها وتطببها ببطن وحدة من بناتي 

بان بالصوندة وفرحة بالگاع تصرخ كفشتها شكبرها صارت وهديل متكافشة وية نورجان مزلغتها تزلغ 

جريت نورجان منها أدفع بيها ليبرة ورجعت لبان أجر بيدها أريدها بس تمشي تطلع انهدت عليهن بلسانها 

تصيح وهي فحطانة :- ولجن برابيك تحرگنها تحررگنها ولجن لبالجن ما وراها أحد أدوسجن دوس برجلي والله لو وصلتن لوحدة منهن بعدد أخنگج ولججج فررحة أخنگج بعز نومتج وأموتج وروح حاررث

گوة جريتها من الغرفة والولد من برة فاتوا يتراكضون

گعدن يتباجن ويشكن وفرحة تصرخ بعلو صوتها

فرحة :- ولك طگتني هاي البگد بزر بزري طگتني وانا أمك لا حشمت كبرتي ولا أم التردها عني 

وهو يصيح :- شصاير شصايرر بس تا أفهم

- أگله طگت أمك تگابلن علينا هن وأمهن بنات إبليس هسسسع تخابر أبوك خابرو أگلك يلا بعد ما يلفيهن دقيقة وحدة بهالبيت 

والولد من برة يصيحون :- شكوو مؤتمن 

صاح بيهن :- اتسترن

طلعلهم بسرعة واني سحبت روحي وركضت لبناتي 

صعدتلهن طبيت وقفلت الباب مال غرفة 

دنگت لازمة ركبي وأتنفس حيل فحطانة من الهبطة

رفعت راسي أباوعلهن حالتهن حالة الشعر مهلس والوجه مزلغ ومجّرح يباوعلي عاقدات الحاجب

- هاي انتِ صارلج اسبوع تحومين عالصوندة البالحديقة علمود هاي ؟ 

شهربان :- متحلفة بيهن من زمان واجت بيها 

عيوني غورگت 

- اشتعلت أمج بنت الصخلة

- ها النوب فوگاها لو مخليتهن يحرگنج أحسن 

دنگت مبتسمة وعضيت شفتي 

باوعت لنورجان مو أحسن من حالها الوجه خريطة

- وانتِ شصاير بوجهج 

وخرت گذلتها عن وجها 

نورجان :- عادي المهم كتلناهن البربوقات 

حجتها وتوجعت لزمت شفتها مجروحة وتصب دم 

شهگت ودمعت عيونها :- عزة هذا دم والله دم 

- شموازيج لعد 

- يعني أشوفهن يضربن بيجن وأضل اباوع ؟ 

وگفت گدام المراية تباوع لوجها بيها بچية 

اندارلتي :- شفتي دتحرگني حموت من الألم

- تطيب هسه أنظفها إلج بمَي دافي 

انطيتها كلينكس خليتها تضغط على مكان الجرح 

مشيت لبان الصافنة بغير عالم مو ويانا 

لزمت وجها درته عليَّ أباوعلها آثار اديهن على خدها هديل من لزمتها من ورى مخرمشتها بأظافرها 

متت قهر من شفت حالهن 

انتبهتلي گالت :- ما بية شي ليضل بالج

- والله لو جان بيدي ما أخلي وحدة تطولجن 

لزمت ايدي 

- ماما والله ما بينا شي لعد انتِ مشفتي حالهن گصبتهن گصب بالصوندة البرابيك 

نورجان :- بان بربوقات رجاءً

- اي صدك نسيت احنا مثقفات 

ضحكت من كل گلبي وهن وحدة تشمر للثانية حجي فتحتلهن ايدي لميتهن لحضني أبوس بيهن 

شدن :- يخسى اليگول الرجال سند للمرة والله انتن السند 

ضليت بالغرفة بالساعتين حابسة روحي وهن وياي 

أسمع صوت صياح وحجي من جوة بس ما أميز منو اليحجي لو شنو يگولون صرت أطگطك

اندك باب االغرفة 

فزينا تلاثتنا وحدة تباوع بوجه الثانية صرت ورى الباب

صحت :- منو ؟

ردت بنت فدار الثانية گالت :- أبوي رايدجن جوة 

نزلت هي انداريت عليهن 

- لا تحجن شي اني أفهمه هسه تلگنه مفتر راسه من حجيهن 

بان :- كون صدك يگعد يلومنا ويصيح علينا حتى ألزم الصوندة ألعّبها عليه وعليهن والله 

- اني شحجيت ؟

ضلت ساكتة فتحت الباب أخذتهن ونزلت 

كلهم ملتمين بالاستقبال هو گاعد عالتخم بزيه العسكري مدنك لازم راسه مرته وهديل گدامه وعلى جهة واگف مؤتمن متخصر وبيده اللخ جگارة يدخن 

فاتت من يمه بان تخازروا اثنينهم

نتر بيها :- عينج لجج

جريتها ووگفت على جهة والبنات بصفي منا ومنا 

أبوه رفع راسه عالصوت وباوعلنا الوجه ما يتفسر

أول مشافنا تغيرت ملامحه وعگد حواجبه مستغرب عيونه تدور مرة علينا ومرة على زوجته وبناته

فدار :- يول انتن شحالجن 

كلها ضلت ساكتة صاح :- أغيب ساعتين عن البيت تهجمنو هجم صغاررر ؟ شتارك مززعط هين ؟؟

فرحة :- ولني هن وأمهن ولننني تولني دك بصوندة شگدها شكبرها وكسرن هديل فوگاي تاما تحاميلي منهن

- كذب هي الجرجرتني للغرفة وقفلت الباب لا متقربتلهن ولا بناتي يدرن بالصار اجني يركضن على صوت صريخي وهاي بنتك واگفة وتسمع اسألها

باوع لبنته الثانية وجها يذب ألوان وتدور بعيونها بحيرة

موقفها متنحسد عليه لا تگدر تنطي بأمها وأختها ولا تگدر تلومني اني وبناتي بالصار لأن هن البدن

صاح بيها مؤتمن :- ما تحجين 

گامت تفرك بأيدها ودنگت راسها تحجي بصوت يرجف

- يابا انا ما أدري بالصار انا بغرفة مآب واگفة تا أعطيه دواه لا شفت ولا دحگت منو طك منو 

فتحت عيوني واشتعلت من جوة دا أحجي 

صاح بعلو صوته :- صونددة ولج بنتج گاضبتلهن صوندة متوليتهن طك شني ولجن ولية 

فرحة :- بنت ما تنرد ما تنرررد ولا الأماية تگدر تگضبها وتضبها افصممم ظهرها جسرها تاتتوب من رعونيتها 

هديل :- حتى هاي أختها المالها حس تسبعت بيها وگضبتلي النعال صفگتني بيه على وجهي 

صاح :- وينها هي وييينها 

أباوع يمي ميتة خوف اريد أضمها بگلبي منهم 

بان ماكو .. 

شدن :- يمة يممة بنتي وين 

صاح بأسمها بنص البيت واني اريد أصعد الدرج طلعت من غرفتهن لازمة الحديدة شمرتها يم رجله

شهربان :- هاك شوف شووف مرتك وبنتك شلازمات على أمي يتهاددن عليها يردن يحرگنها بحديد حامي 

شهگت مرته لطمت على صدرها 

- يممممة عاباج الله كون يالمسودنة تاتبلينا الدور 

- اني أبليجن ؟

لزمت ايد نورجان رفعت ردانها تشوفه الحرك 

گلتله :- هاك شوف لزمن نورجان حرگن ايدها بالحديدة وهسه اجن يعيدن الحركة بأمنا تهسترن من سمعن بسجودة تصير عمتنا وذبن الصار بمآب براسنا

يباوع لأيد نورجان وعيونه تخازر بكل الموجودين 

فدار :- هاي ليمت الحجي ؟ 

- صار بالأسبوع 

- وانا عش مالي علم 

نورجان :- عمو ماما وصتني ما أحجي وأگولك تجنبًا للمشاكل وانتَ هم جنت تعبان ما رادت تزيد عليك

باوعلي خازرني ما فهمت نظرته لا هي عتب لا هي لوم يريد ينفجر بالموجودين محترك حرك من جوة 

دنگت راسي وأسمعه يحاجي مرته

- انتِ الحارگتها ؟ 

- تچذب عليك وانتَ صدگتهن هالسلالات الچذابات تربية شدن ما عليهن زود 

- فرررررحة انتِ الحارگتها اي يو لا 

صرخ بيها بأسمها لأول مرة جفلت من الصوت 

ضلت ساكتة وتتنفس سريع 

هديل :- انا الحرگتها يابة 

اندار عليها بسرعة كملت كلامها :- بس لا تلومني حرگتها بساعة هن البدن وأختها حرگت ايدي وخلتني أفور من الوجع

- وتردين تحرگين ايد هالجاهلة ؟؟ ولج هددديل انتِ چبيرتي تحطين عگلج بعگل وحدة مثل نورجان ؟ 

نزلت دموعها :- لا تلومني گتلك لا تلومني من حرگة گلبي ولوعتي عليكم انتَ وأمي وچملنها علينا بسالفة مآب وطلعوا الچلاب الطاگينو ومخلينا مفرفحين عليه عمامهن يعودون إلهن

فرحة :- نطف نجسة ما تطلع منهم بس العايبة وبزرهم مثلهم 

صاح بيها خرسها خازرها حيل يريد ياكلها بسنونه

هديل :- لا تصرخ على أمي مالها غرض انا الحرگتها 

دتحجي جابها براشدي فر راسها فرر 

رفعت راسها تباوعله فاتحة عيونها حيل متجمعة بيهن الدموع 

- تطگني يابة تطگني لجل وحدة جليلة حيا ما صارلك چم شهر تعرفها 

- وأدوسسس راسج هم عجل رايحة مشوها ايدها بذنب أختها هاي شعليها بهاي ؟ تجيني وتگليلي ونعلعلة أمو وأبوه الما يجيب حگج منها أنا هيج ربيتج ولجج تتسبعين على وحدة بگد بزرج ؟

- دحگتك من اجينا انا وأمي وشكيناهن إلك ما عملت شي گلبتها صياح علينا كلنا وسديت السالفة ولا چن شي صاير وهساع لمن شكني عندك تمد ايدك وتطگني جدامهن خاطر ترضيهن 

شالت ايدها مسحت دموعها بردانها

گالت :- لا تزعل مني يابة انتَ بعتنا ونسيتنا لجلهن هن وأمهن لا تلومني بعد شما أحجي عنهن وهالبيت بعد يتعذرني انا مالي مچان بيه البيت صار للبغدادية

وبناتها ...

دارت وجها وراحت للغرفة فرك

وجهه بعصبية