رواية خيط وابرة الفصل الثامن والعشرون بقلم شمس العراقية
"حين تكون يتيماً يشعرُ العالم بإكمله أنه مسموحٌ له بإن يؤذيكَ وكأن غياب السند إذنٌ رسميٌ بالظلمِ."
لينا ـ طول هالفترة ملتهيه بدراستي صح عقلي مو صافي وأفكار توديني وتجيبني بس هي وعدتني ما تأذيني!! كون توفي بوعدها وياي بس شإمن بيها هي أنسانه ينخاف منها .. وكل مره أحجي ويه لبنى أحاول أحذرها بس لبنى من النوع الفطيره عقلها يسحب بطيء
أو بالأصح أحنه أثنينا ثولان وقليلين خبره بالحياة رغم هواي تجارب مرت علينا وما تعلمنا منها لان ما وعينا على هيج ناس وهيج بشريه تحفرلك حفره وأنت مأكل وشارب وياها بنفس الماعون بحسبة الصداقة!
... وأمي الله يرحمها ما لحگت تعلمنا وتوعينا وكلنا بعدنا ما داخلين العشرين شنتعلم واحنه بس جنا من البيت للمدرسه وكعداتنا ويه أمي حتى بأهلنا ما أختلطنا ولا عدنه فكره عنهم تالي وكعنا بمله قذره ما اعرف شلون نطلع منها ..
كاعده بغرفتي لحالي لا لبنى ولا نور كلشي أختلف بحياتي وفاتحه كتابي وياريت لو أستوعب
بالي كله يم صفا اريد احجي وخايفه من الموضوع ليذبوها برأسي لا تفضحني وتفضح أختي
واخاف منها لا تنهزم واطيح عكل وتخزي الشوارب واهلها ناس خوش ناس ومو بيدي الدم يحن والسمعه تعم عالكل وصرت من كلشي اخاف وهي مثل الحيه الرگطه اللي تسوي سوايتها وتصور اختي وزوجها بغرفه نومهم كلشي تگدر تسوي
لا اكدر احجي لبنى ولا اكدر اسكت وبالعه الموس بالحالتين توكف الكلمه بزردومي واني اشوف باقر ونافع لو دروا بفضيحه اختهم شيصير اسكت احسن ولا اللي دخل لو نهزمت عدها اهل يططمون سالفتها مو مثلي عندي نورس تركصلي بجفيه عالفضايح.
وخلال هاي الفتره مو بس على لبنى خايفه حتى على نور خوفي صار يزداد!!
نورس من يوم الزعلت أني ما مرتاحه الها أحس ورا هالأنسانه شيء خايفته خلف هالوجه ما مرحمن سبحان الله أبداً مــا أرتاحلها من دون أخواتها ..
عايشه الدور بالبيت وتتأمر ومرات تصييح على خالتي وخالتي ساكته ومتجنبتها هذيج المره لسانها سليط وكحه وشوفتنا نجوم الظهر بس من يوم أبويه مات هي تغيرت جذرياً أحس نكسرت عينها وصارت بس تريد برودة الكاع ما تريد مشاكل وعمي محمود شالع گلبها أذا تشكيله منهن يكب بيها مستحيل ينطي بناته أبداً
كاعدة بالمطبخ يم خالتي حاطة كتابي بحضني وهي تشتغل ونبأ طلعت الملابس تنشرهن وميثم هسه كعد من النوم يتأمر على خالتي بريوگه .
سميعه ـ أسويلج ريوك ويه أخوج
لينا ـ لا خاله تسلمين ما جوعانه .. وطلعت نورس لابسه عبايتها باوعتلها مخليه مكياج ومرتبه شكلها! رفعت حاجبي ما عاجبني وضعها ..لبست شحاطتها وشالت جنطتها وطلعت! باوعت على خالتي وين راحت هاي .
سميعه ـ أنه أدري وين ولت .. بس لا على صبيحه شلون سالفه هسه نور تشعوط من القهر أنه ما أخلص
لينا ـ طبگت الكتاب ولحگتها فتحت الباب وراها شفتها راحت بالفرع صوب بيت نور على خالتها! هي بالعادة تروح على بيت چدي بس صار فترة كثرانه رواحتها لبيت خالتها صبيحه ..
رجعت وخالتي واكفه وتطحن قهر وسألت نبأ عليها
سميعه ـ أختج وين راحت
نبأ ـ على خالتي صبيحه
سميعه ـ ما تعرف تكعد هاي يوميه طلعات لو صبيحه لو جديتج مهديه بس عليمن تطلع أكيد على عماتها عرجها عرج نوريه .
لينا ـ نبأ سگتت ورجعت فتحت كتابي وما مر وگت ودخلت علينا نور الوجه ما يتفسر كعدت تحجي ومقهوره شگو شبيــچ
نور ـ يمـــا ترى والله مو وضعيه هاي!
سميعه ـ وكعتيلي گلبي شبيچ أمي
ـ نورس!
ـ شبيها نوريه
ـ شيسمونها يوميه الصبح تجي تساعد خالتي
ـ ونوب أختچ تعلمت خوش تعلوم شگو شغله عدها أدز عليها نويرس تجي تنظفلي! هذاك اليوم غرفتها تريد تنظيف وأني گتلها خل أنظفها الج گالت لا أدز على نورس أنتِ حامل وين بيج گتلها لا بيه قابل ما مشتغله مو شايله بيت كله على رأسي تگولي أنهجم بيت جذبج هو كله أني أشتغل وأنظف وأطبخ ومفاصل عندي وراتب أبني بس دوايات! طلعتني صفر .
ـ ميخالف يا بنتي خالتچ
ـ على عيني ورأسي بس والله ماما أكعد من ساعه ٨ من يروح غافر لدوامه أسويله ريوك يگولي أرجعي نامي ما أنام أكمل كل شغلي حتى الغده أطبخه عالرغم هو ما يجي لـ ٨ بالليل بس أكول خطيه مره جبيره تجوع وكل هذا تگولي شمسويه وتالي هسه فحطت من القهر بس راح غافر خابرت نورس وأخذتها وراحن الماركت جابت مواد الدولمه وكعدن يلفن بيها دگول عبالك نورس جنتها!! .
1 تعليق
لينا ـ الصوج من خالتج شگو أدز عليها .
ـ شمدريني وعاد من يجي غافر تكعد تمدح بيها كدامه! بالقران ما يصير هيج ترى حــرام ويــن صايره وين عايشين أحنه أجانب وهي متزوجه شهل التصرفات عود وين تريد توصل! تطلگها من نافع تزوجها لغافر أستغفر الله يمه أختج مو صاحيه وتالي أنجلطت من وراها قسم بالله مو صاحيه .
نور ـ ما اله حجايه وياها شُــــــنو! هو مو أبوها چا شنو دوره لو بس يعرف هذاك الدرب ولكه بيت يلمه ويلم بناته! بخيرهم ما خيرونا بشرهم عموا علينا ..
ماما الله يخليچ شوفيلي صرفة حل حاجي عمي أو خالي مشعان خل نافع يرجعها تسسون عليه فضل قسم بالله العظيم .
لينا ـ تحجي بقهر بالگوه تأخذ النفس
سميعه ـ أنتِ حامل لاتضلين تطحنين قهر موزين عليج
وعلى بنيتج واليوم أخابر خالج مشعان وأفهم منه شنهي سالفتهم ويه جنتهم لان عمج ما منه فايده أيسي .
1 تعليق
لينا ـ هزت رأسها وشالت جنطتها ها تروحين
نور ـ أي أروح عود خابريني ماما .. باي
لينا ـ گمت وياها وأباوعلها الحمل لايك الها سمنانه ولج طالعه تخبلين هاي لان بيچ بنوته
ـ ليش ما أنتِ تحجين وياه
ـ لا يابه
ـ نور أبداً ما محاجيته؟
ـ قصدج مراسله
ـ أي
ـ أي والله من يوم التزوجت.. وبعدين وشنو هالأسئله ست لينا
ـ لا هيج .. بس يعني فضول
ـ فضولج خلي نايم .. باي .
ـ راحت ورجعت البيت وقبل الظهر أجتي نورس شايله ماعون دولمه وخالتي باوعتلها ما راضيه .
سميعه ـ يمه نورس ترى ما يصير تضلين رايحه راده ويوميه ماشيه لو على بيت جدج لـو بيت خالتج وعيالج أذا سمعوا ما يرضون بالأخص رجلج .
نورس ـ بصفتچ منو؟ أمي تحاسبيني! وأنتِ كلتيلها بيت جدي وخالتي مو غربه وعيالي ما الهم شغل بيه أني بيت أبويه محد اله دخل وياريت نصايحج توفريهن الج أو لبنتج من جانت بنيه جان حجيتهن الها! من جانت من بيت لبيت تفتر جان عاجبج بس يمي لا ما يصير .
لينا ـ عافت ماعون الدولمه ودخلت غرفتها وخالتي تستغفر .. تقربت شميت ماعون الدولمه خاف يطلع بي سحوره!! خلي نور تدير بالها على غافر منها لاتخلي يأكل من طبخها خاله هاي سحرت النافع ما تسحر لغافر وتهجم بيت نور!! .. خالتي وجهه تغيرت وأصفرت بلعت ريگها وكعدت أيدها على رأسها وأتصلت على نور وكعدت تحجي وياها وتنصح بيها .
والله هالمله وبيها سحوره أيس تعيش مرتاح نخلص من مهديه ونوريه تطلع النا دبل واحد في أربعه .. نورس بنت حميدان فلش الميدان ..
1 تعليق
خالتي صارت تخاف على بيت بنتها حقها ما الومها من حق تحافظ على بيت بنتها لاينهجم على أيد السحارات
وصارت تروح يم أختها عسى ولعلى تسوي حل وخابرت خالي مشعان بس ما حصلت منه لا حق ولا باطل كظاها يصيح ويحجي على نافع گلشي ما فهمنه منه
ـ زينه والله ملتهيه بالدورس تعرفين تعب
ـ أي صح .. مبروك خوش معدل جايبه على هالمعدل بالسادس تحصلين طبيه اذا يبقى هذا مستواج
ـ أي أن شاء الله .
ـ أن شاء الله يله أخذي راحتج حبيت اسأل عنج والله تعرفين أنتِ عزيزه عليه وجنت اريد اطلب منج شغله بس تأجلت بعدين عود أراسلج عليها .
ـ ها! أي كولي بشنو أكدر أساعدج
ـ لا بعدين بس قبل كلشي خليج على وعدج وياي ولاتنسين نفسج وأختج ما يحتاج اذكرج شعندي عليجن
ـ ها لا ما يحتاج
ـ تمام باي
ـ باي .. نهت المحادثة وشمرت الموبايل شقصدها جانت محتاجه شغله بس لاتريد تنهزم وتريد مني اساعدها بالهزيمه لاهاي العايزه يبوووه كملت على راسج يا لينا ..
عفت الموبايل حتى نافع شلته من رأسي ويني وين نورس خل أحير بهل المصيبه الوكعت على رأسي تضل تتطلب وتتأمر عليه ولازم اني أصير الجلب مطيع الها من كبر لفني .. شتريد مني من خرب بروح أهلج وساعة السوده العرفتج بيها أي والله .
بالليل كاعدين أني وخالتي نتعلل نباوع مسلسل تركي والبنات كاعدات ويانا بس نورس يم بيت جدي ياسين! وعمي جان كاعد بالأستقبال عالحاسبه مالته مخلي ملفات يشتغل ومندمج ويأكلن وأني بالي مشغول وأفكر بصفا شتريد مني ليش گالت بعدين أراسلچ!
ودخلت نورس لابسه عبايتها وذابه الشال على رأسها والدموع تجري شلال! والوجه أحمر ومبين عليها فحطانه من القهر شصاير بيها .
نورس ـ وينك بابا تعال شوف أبن أختك التزامط بي نافع ونافع وأبن أختي لما أبن أختي شسوا بيه أبن أختك سويته اليه نبي وكسرتوا رگبتي وياه بهل الزواج المصخم من ساعة السوده التزوجته بيها .
محمود ـ شگـــو شبيـــچ تبچين منــو وياج وشبي نافع مـــا تحجين .
نورس ـ أجه للبيت جدي وطلگني وجابني ذبني يم الباب وگالي روحي على أبوج من أنعل أبوج لابو الساعة السوده الشفتج بيها والگواد اليبقيج على ذمته طلگني بابا طلگني .. نافع طلگني .
7 تعليق
محمود ـ تستاهلين چا مو هذا التردينه مو هذا مطلبچ
ـ شمدريني بي ما يصدك أطلب الطلاك
ـ خوما چاي تلعبين عليه والرجال طگ حوصلته والطلاك ما بي شقه هو قرار لو ترجعين لو تتطلگين وأنتِ عندتي على قرارچ... حجيت وياج ما فعلتي هذا قرارج ما جبرتج على شيء لا على زواج ولا على طلاك .
ـ بس أني ما طلبت گبل طلاك گتله لـو تطلعني بيت لوحدي لو تطلگني يعني خيرته عبالي أكسر ظهره ويطلعني بيت لوحدي بس أبن أختك ما صدك يخلص مني وتالي طلگني وفواكاها هو الممنون عبالك جابرينه عليه .
ـ والله يا بابا أنتِ تحيرين أكبر واحد ونافع ما خايف عليه بس أنتِ ما تنحملين شيسويلج بعد وأذا عالبيت يطلعج بس أنتِ تردين گلشي على مزاجج والحياة تردينها تمشي على أصابعج والسبب مو بيج بابا السبب بيه أنه أنطيتج مجال ودللتج وگلت بنتي الجبيره ما أريد أهضمها وأكسر خاطرها بس تالي شحلصتي غير طيحان الحظ وتطلگتي دكعدي ونجبي يم أخواتج
لينا ـ دخلت يم أخواتها تبچي دم تخبلت خبال خلتنا صافنين هاي شبيها مو جانت تريد تتطلك منه وگتلت روجها شبيها هسه ملخت نفسها والله صدك تحيرين أكبر واحد .
1 تعليق
تأخر الوقت ونعست ودخلت الغرفه فتحت موبايلي لگيت نافع متصل عليه عشر مكالمات! خير يا ساتر راسلته ها نافع متصل عليه .
نافع ـ وينج لخاطر الله
لينا ـ موبايلي بالغرفة ما أدري بي ليش صاير شيء
نافع ـ ها لينا كاعده بعدج
لينا ـ أي خير نافع محتاج شيء
ـ لا سلامتج بس حبيت اسأل عليچ!
ـ ها تسأل عنك العافية شكراً على سؤالك
ـ لينا أريد أحجي وياج أتصال لان جاي أسوق ما أكدر أكتب تكدرين
ـ أي عادي بس خوفتني صاير شيء
ـ لا .. راح أتصل
ـ تمام وأتصل وجاوبته ها
ـ لينا نجحتي مو
ـ أي الحمدلله
ـ شگد معدلچ
ـ ٩٠ ليش؟
ـ أي الحمدلله من قبل لا أخلص أمتحانات خالتي لزمتلي دورات دورس خصوصيه
ـ أي أدري بس صفا رسبت هم جنت ناوي أدخلها وياج بس مو شاطره مثلج
ـ تذكرتها بگلبي منين تنجح ها أي رسبت يله تنحج
ـ ما بيها مجال بعد
ـ ليش
ـ بطلتها مو مال دراسه گلاوجيه
ـ ها شعجب
ـ ليش ما تدرين مــا گالتلج
ـ لا والله ما جابتلي طاري
ـ شعجب ما حاجيه وياها
ـ لا نحجي بس ما گالتلي هي بطلت! نافع صاير شيء
ـ گتلج لا
ـ تمام .
ـ لينا سؤال بس قبل لا اسأل أريدج تصدقين وياي
ـ جواب
ـ شتعرفين عن صفا .
ـ بلعت ريگي بـصعوبه ها شُنو هذا السؤال شعرف مثلاً
سؤالك غريب ضحكت اتلافى سؤاله
ـ عوفي الضحك على صفحه! اسألج وجاوبي شتعرفين عنها شتحجيلج مثلاً أي شيء تعرفينه
ـ مـا أعرف شيء عنها .. أسلئته دوختني
ـ وصلت الشقه تعالي مراسله ما أريد أحد يسمعج تحجين
ـ يا شقه
ـ بعدين أحجيلج تعالي مراسله على الواتساب لا على ماسنجر تمام
ـ نافع خوفتني والله
ـ لاتخافين بابا شبيج شحاجي وياج ومخوفج يله تعالي
ـ سد الخط وطلعت باوعت الكل نايم والاضويه طافيه ورجعت وراسلته واتساب ها نافع
ـ اوگفي هسه أجيج .
ـ منو گالك
ـ لبنى گالتلي .. ليش لبنى ما گالتلچ شصار
ـ عن شنو تگولي
ـ ما حاجيه وياها
ـ لا والله ما حاجيه بس سمعت من خالتي رايحه القريه وموبايلها مغلق گلت يجوز ماكو شبكه يمها وما يحصل
ليش لبنى شتگولي .
ـ صفا أنهزمت وهزيمتها وراها سالفه جبيره
ـ وگع الموبايل من أيدي يعني قبل ساعه من راسلتني جانت رايدتني بشغله تريد تنهزم وأنهزمت .
ـ وين رحتي لينا
ـ موجوده
ـ لينا أنتِ تثقين بيه مو
ـ أي والله
ـ چا أصدگي وياي ولاتخذليني وأحجيلي التعرفينه عنها بدون لا لف ولا دوران .
ـ نافع ما أكدر أحجي شيء عنها وهي أنهزمت بعد الله يخليك عوفني بحالي .
ـ ليش خايفه منها شمسويتلج
ـ رگبتي وركبة أختي عدها ما أكدر أحجيلك اكثر الله يخليك نافع
ـ تحجين نص السالفه وتردين نافع يعوفج لينا أحجي بالحسنى ترى باقيلي فيوز واحد أذا طگ أهل أهلج أحرگهم .
ـ ما أكدر والله أخاف من أختك وأخاف منها على لبنى منها
ـ ها وأختج شعليها من صفا شلازمه عليچن
ـ ما أكدر نافع الله يخليك
ـ لينا أكلي خرا ونعل مكطعه على حلگج وحلگي زين لو لا .. أحجي ولاتخافين من أكبر واحد .. صفا تهددج بشي مو وتخافين تحجين
ـ أي بجيت وكتبت عدها مقاطع لأختي وصور الها بالحمام ومقاطع ما تنشاف نافع أتمنى تكون فهمت
ـ يعني دزتلج مقاطع لأختج
ـ أي هدتتني بيها مو بس لبنى أني هم
ـ أنتِ شُــنوْ .. شگو بعد عدا لبنى!
ـ حجيتله السالفه كلها
ـ خفت منها هي هددتني تنشر لبنى بكل كروبات وگالت موجوده بإكبر كروب عالفيس بوك بثانيه أنشره وخفت لاتنفضح أختي ونفس الوقت هددتني بأبو صخام عدها محادثات مفبركه والله عني وصور هم
ـ يعني هي حاجيه ويه أبو قنادر بحسابج! وشلون وحسابج عندج مـا فهمت شلون دبرت هاي! وين داخلات أنتن بيا خيسه شمسويات من بلاوي مو بنات صركاعة الله لچ أنتن شُــنوْ .
ـ والقران هي مو أني والقران نافع مو أني بيش أحلفلك وروح أمي مو أني والله ما عندي هيج سوالف وروح أمي الما عندي أعز منها... والله نافع مو أني والله
ـ ياهو حسابج
ـ القديم
ـ أي بحثت عليه بعده موجود بس ما أكدر أرجعه لان الباسورد وگلشي عدها هي مره أنقفل يمي صار خلل يطلبون معلومات وفجأه أنقفل وبعد ما تبعت وراه لان أني قليل أستخدمه بس علمود اراسل أخواتي
ـ يعني شُــنو
ـ ما مصدگني مو
ـ لا گملي گملي
ـ الله عليك مصدكني لاتخليني أحجيلك وتصدمني بيك
ـ ليا عار
ـ والله حقي وأختك مرمرتني والله أيام اني مل نايمه حتى خربت واهسي بدراستي ما تدري شسوت بيه وشلون تهددني ومقاطع لبنى نافع والله ما تنشاف گلشي علني نافع ما اعرف شلون اوصلك الفكره بس موقفي جان صعب .. الله يخليك أفهمني
ـ عوفي هذا التمسلت مو وگته كملي بعدين شصار
ـ أي گتلك مو أنقفل من يمي أثاري هي مأخذته يمها ومغيره كلمة السر وگلشي ومره موبايلي نسيته بغرفتها أو يمكن ساحبه الصور من ماسنجر من جنت ارسلهن لنور
ـ لحظه لحظه خوما عندج صور لنور بحسابج القديم
ـ لا لا ما عندي صور لنور لاتخاف والله بس صوري عدها وتدزهن بإسمي لابو مسار
ـ تف على خلقتج والله بيج صونده أصلخ عقلج هذا الخايس .
ـ أستاهل والله أستاهل بس شمدريني هيج تسوي بيه
وبالأخص من كامت تهدد بيه يعني حقي اخاف على نفسي وعلى أختي ومحادثات ويه مسار تثبت عليه التهمه!
ـ هسه عوفينا من أبو قنادر بعدين أتفرغله هسه أحجيلي عن صفا گلشي من الالف للياء وأذا ضميتي شيء عني مثل ما أهلي خسروني تخسريني .
ـ لا دخليلك
ـ چا أحجيلي التعرفينه
ـ بديت أحجيله وهو ساكت ما يكتب شيء
ـ تمام يعني جنتي تدرين بيها تريد تنهزم وسگتي
ـ مو بيدي والله
ـ تدرين بيها تريد تنزل روؤسنا وتطيح عگلنا وتجيبلنا العار وسگتي يا عار سگتي من هسه الزمج وأكطع أحد يلومني .
ـ گتلك رگبتي ورگبة أختي بيدها قابل بيدي
ـ بس أني كشفتها وموبايلها عندي لو لبنى مراسلتج وكايلتلج جان أنتِ أجيتي گلتيلي .
ـ لحظه شون يعني گشفتها ليش هي شوگت نهزمت
ـ اليوم المغرب وجنت أدور عليها هسه من راسلتج دخلت الشقه
ـ يعني أنت شفت المقاطع الفيديو والصور بموبايلها مو
ـ أي وكشفتها وشفت گلشي بس ما لكيت بموبايلها عدا المقاطع مالت لبنى والصور فقط هذن أي مستمسك ثاني ماكو موبايل فارغ تماماً كأنما هزيمتها مدروسه!
ـ والمحادثات مالتي ويه أبو مسـار
ـ ماكو گلشي يخصچ! أصلاً هسه عرفت منچ ما لكيت بس لـ لبنى هي سالفتها تحير أكبر ذكي ما أعرف شنو هدفها لبنى لو أنتِ لو أبالها شيء ثاني!
ـ بس نافع أذا تگول موبايلها عندك وهي المغرب أنهزمت! شلون قبل ساعتين راسلتني من حسابها
ـ راسلتچ شلون ومن يا حساب جديد يعني
ـ لا حسابها الثاني ما أعرف أنتوا تعرفونه أو لا بس راسلتني منه
ـ ركضي شوفي بعده موجوده
ـ رحت شفته أي موجود نشط منذ ثلاث ساعات
ـ يعني موجود حسابها عدها
ـ دزيلياه بساع
ـ تمام دزيته شتسوي بي
ـ يفيدني .. وخلي عينج عالموبايل أخاف تراسلج خليج طبيعيه وياها سوي روحج مــا تعرفين بيها منهزمه صادقيها وجرجريها بالكلام شتريد منج كولي الها حاضر حتى لو تهددج خلي تهدد بس مهم الكفها والزمها الا احلل ذبحها
ـ أخاف منها نافع أخاف تنشر أختي وتنشرني والله العظيم أموت وأختي تنفضح نافع فكر بينا مو بس تفكر بسمعة أهلك
ـ وداعتج مفكر بيچن بس لازم بالأول أوصل رأس الحية وأكطعها أخلص وأخلصجن وياي .
ـ الله يشد حيلك
ـ عندج نسخ من المقاطع الفيديو والصور
ـ ليش
ـ أني حذفتهن مو موبايلها وتلفته هو والبي ما أدري أذا ما طلع عدها نسخ ثانيه .. عندج نسخ يمج أدزيهن اليه
ـ لا والله مــا عندي حذفتهن بساعتها ما بقت گلشي بس شفتهن طارن حتى كلامها حذفته ما لحكت أسكرن شيء ومن الصدمه تجمدت أيديه وينني وين اسكرن
ـ حرامات والمشكله انتن عقلجن بي تبن ما تشغلنه بس فاكات حلوگجن من خرب بحظ أمجن شگد فاهيه على هيج خلفه . بنات مفتحات باللبن أنتن توكعن بمصايب وملطومات على حلوگجن وساكتات كل هذا يصير وياج واني ما أدري وابو صخام من زمان شاك بي وحاجيتج وصخمت وجهج يالعار ما حجيتي تف عليج
ـ وأنت شتسوي بالنسخ من المقاطع
ـ جنت ما أحتاجها بس هسه أحتاجيتها بس يله صارت بعد
ـ شتسوي بيهن
ـ شسوي بيهن مثلاً عقلج **شيفسرلج لو أنتِ مثل الزماله أختج تخلن الواحد يشك حتى بنفسه .
ـ حقها ترى
ـ چا مو حقها أنعل أبو الما يكول حقها ويعذرها فاتت ما ذبحتها بساعتها فاتت شمدريني سالفه بس المقاطع طلعت أكبر بهواي بس الكفها وين تطير مني .
ـ تحتاج مني شيء بعد
ـ لا سلامتج ولاتخافين ما تكدر تسويلج شيء
ـ تمام
ـ عندج حسابه
ـ لا والله
ـ تمام راح أطلع من أرجع اراسلج تمام
ـ بس الوقت متأخر هسه
ـ وأذا ..هو ليش أني أنام بعد واخلي رأسي عالمخده أذا ما الكاها والله ما يغمضلي جفن أذا ما أحني أيدي بدمها .. وحالياً السالفه مطممه أدعيلي الكاها خلال وقت قصير قبل لاتطش سالفتها وتخرب سمعتنا ويوكع علينا العار ما تقوم النا قايمة والله وأذا الشيخ يسمع يشنق روحه بالسجن ولا يطلع ويلگي هذا العار العايفته الصكط أخته من عسانا لا النا الأخوات على هالدگة هاي .
ـ أن شاء الله تلگاها
ـ أن شاء الله .. صدك قبل لا أمشي أختج لاتراسلينها موبايلها مو عدها وخاف تحجين وياها سالفة مقاطع والصور تنسيهن تماماً كطنه وحطيها بأذنج
ـ الله وياك .. راح وضليت عايشه بقلق ما أعرف شراح يسوي وشلون تكون نهاية هالسالفه والله گلبي ما مرتاح والسليمه أخته وين أنهزمت وين وليتي صفا شمسويه بعمرج من مصايب حتى أخوج شاك بيچ
وراج سالفه وماكو بنت تنهزم أذا مسويه مكسوره
وأنتِ مكسراتج هواي يا خوفي تجرفيني بسوالفچ!
يومين نافع مختفي حتى عالأنترنت ماكو ما فاتح أخر مره من راسلني وأتصلت عليه مغلق! ضل بالي عليه ورحت المحاضره ورجعت أكلت بدون واهس وگمت .
فتحت موبايلي لگيت رسائل من صفا!
صفا ـ سويتها لينا وخلفتي الوعد البينا مــا صبرتي ورحتي گلتي اله مو ..
لينا ـ جاوبتها صفا شگو شبيج مــا فهمت عن شُــنوْ تحجين
ـ تغشمين نفسج عليَّ، عبالج تعبر سوالفج واللعايبج رحتي وثقتي بنافع وحجيتي اله وأنطيتي حسابي وخربتي عليه المكان الكاعده ومأمنه على نفسي بي بس سهله من بطن عيني أنتِ أندكيتي بيه وگتلج وحذرتج بس مشكلتج بعد سويلج ما تسمعين النصيحه
ـ بس أنتِ السبب وأذا لگوني يطيح حظج قبلي
ـ صفا أوكفي خل نحجي صفا رسلت الرساله وفصل الأنترنت راسلت نافع ما موجود وينك هسه وگتك تختفي يمعود رحت أتصلت عليه ما يجاوبني من خرب
بحظي .. عفت الموبايل وضليت عايشه بقلق
ومر الوگت وعيني عالموبايل أنتظر نافع يفتح موبايله وأبلغه .. ضليت أگلب بگتابي مالي واهس خايفه ومع الأسف صفا ما كذبت خبر فزيت على صوت عمي محمود يعيط بعلو صوته
محمود ـ ولچ لينا اليوم أذبحج أدبسززز لينا .
لينا ـ هي ثواني ما تنعد وأندفر الباب كل قوته ودخلوا الغربان سود محمود ونورس! شيريدون مني وعيونهم تجادح نار ونورس گامت تحجي حجي ما يلنبس عليه ثوب .
نورس ـ لج ام الزلم تصادقين واحد بكد أبوج لج انفضحنا ويه منو ويه المختار دلال المنطقه صخام ولطام براسج ان شاءالله .
لينا ـ شكاعد تحجين شكو منو
نورس ـ لا تغشمين بروحج هاج الموبايل وشوفي سوالفج أدبسزز بربوك كحبه فضحتينا خزيتينا بين العالم ويامن ويه واحد بكد أبوج شيبته بيضه دودتي عليه مـا كدرتي بدون رجال
لينا ـ عمي شمر الموبايل ولزمني وطلعني بالصاله شحطني من شعري ومـا أعرف الضرب منين يجيني
وأركض مفرفحه منه أريد مكان يلمني شحطني من شعري وراشديات ملخني من الضرب وخالتي تتوسل بي
لينا ـ جذب والله افتراء عمي والله ما مسويه شيء
والله مو أني والله أركض للغرفه ويركض ورايه يهود هو بنته هي تحجي وهو يضرب وخالتي تفازع تريد تخلصني ضربها وگعها على وجهه ونورس تباوع بشماته
ولا تقربتلي بس تباوع للموبايل وتقرأ ىالمحادثات وبصفها سبأ تلطم على صدرها ونبأ حارت بخالتي ..
محمود ـ أدبسزز بربوك تردين تفضحيني بالمنطقه لج اني ما خلصت من أختج وسوالفها الا تفلنا المر اليوم ذبحج علًى أيدي اليوم اكسرج والخلقج .
لينا ـ يضرب بالواير وكل ضربه يشيل لحمي بيها ويتحلف واني گمت ما اشوف من كمية الضرب والدم يتطافر من شفتي وخشمي شعري صرت أشوف الخصل بكل مكان جوه رجليهم واني وحيده بينهم لا أم تدافعلي ولا أب أخت ولا أخ بس خالتي وما تگدرله من قوة الضرب حتى بناته خافن ونورس گامت ترجف ذب الموبايل وتقربت تريد تخلصني ضربها ودفعها على أخواتها .
دخلت نور رادت تتقرب خالتي سحبتها خافت يضربها وهي حامل گبل شهگت بخوف وسحبني جنازه بحيث أثر الدم بالصاله تقربت خالتي عضته من أيده نبتت سنونها وضربها على رأسها الا وكعت على وجهه رادت وحاولت تخلصني منه بأي طريقه بس مـا گدرت .
1 تعليق
نور ـ ماما فدوة ماما أكعدي مــامـــا الله يخليج لاتعوفيني مــامــا ولك حقير شسويتلها يا مجرم يا ظالم شسويتلها الله يأخذكم الله يخلصنا منكم حسبي الله عليكم دنيا أخره عسى حوبتنا تكسر ظهوركم يهود كفار أنتوا كفار .
لينا ـ سحبني من شعري خلاني بغرفتي وقفل الغرفه عليه وطلع بس النفس بيه حسبي الله بيج صفا .
محمود ـ والله التدخل عليها أذبحها والله فاتح بيت مگوده أني مگوده .. قبل نور لعبت لعب تالي غافر ستر عليها وخلصنه من عارها وهسه هاي الساقطه فضحتنا ما خليتن النا وجه خزيتنا أنوب ويه مختار المنطقه يا بربوك بس أني الج أصبريلي .
لينا ـ نايمه عالكاع والدم يجري من خشمي وحلگي زحفت أدور على موبايلي ماكو نورس الجلبه أخذته النگسه مثل أبوها حسبي الله عليكم .
أسمع أصواتهن وصوت كثر وسمعت صوت هشام
هشام ـ وينها وموبايلها وينه أبو صخام منين طلع إلنا والگواد أبن الگلب منهزم من بيته .
لينا ـ أندك الباب وسمعت خالتي تحجي بصوت ناصي الحمدلله ما بيها شيء
سميعه ـ لينا وينج يمه من خرب بحظج وحظي ولج هسه نور جاي تخابر نافع يجي يخلصج منهم ما بقالنا بس نافع والله يلتفلچ ويخلصج من عمامج
بس ليش هيج سويتي يا يمه شسويلج شلون أخلصج منهم كلهم التموا عليج عمج قادر وجدج ياسين وولد عمامج والمغضوب عمج محمود سان سنونه عليچ .
لينا ـ خاله والله أفتراء والله جذب مو تعرفيني بالي كله يم گتابي ما عندي هاي السوالف والله وروح أمي خاله ما حجت بعد ما سمعت الها صوت .. ضليت بالغرفه ومر الوگت بس أسمع صوت عمامي يحجون وعمي محمود يجعر ويصيحح
.. والوجع ينهش بيه گمت ما أشوف شبه بديت أفقد الوعي وما حسيت غير انسحبت بكل قوتي وخالتي تصيح .
سميعه ـ ولك يمه أخذها وخلصها داخله عليك ينافع خلص لينا منهم ولكم هاي يتيمه أم وأب خافوا ربگم ترى حوبتها تعثررررر كومة زلم على يتيمه والبنيه أني مربيتها ما عدها هالدروب أخاف غلطانين يمه والله تربيه قلق ينحلف بيها مو بالحيف
محمود ـ وين مأخذها بكيفك داخل البيت نافع أمشي أطلع برا ولا تتدخل وأحنه أهلها ونغسل عارنا .
2 تعليق
نافع ـ ولا زلمه يفگ حلگه ويمنعني ولينا أمانة خالي صباح واليتقرب يحفر گبره بإيده خلوني أخذها وأمشي بدون مشاكل .
1 تعليق
قادر ـ بنات خالك خلن روؤسنا بالطين جابن النا العار فضحنا بالمنطقه شتحجي أنت وشعليك صاير والي عليهن أمشي أطلع برا وخلينا نشوف شغلنا البنت بنتنا وأحنه أهلها والعار عارنا ما الك حق تتدخل وتأخذها وياك .
محمود ـ هشام أخذها للبيت أخذها .. والله لينا ما تطلع وياك والله لو أعرف أسيح دمها والله بس تطلع جنازتها هالساقطه .
لينا ـ عمي محمود وعمي قادر حاضنين نافع ما يخلونه يتقرب وهشام سحبني للاستقبال جنازه وبثواني نافع سحب سلاح من خصر عمي محمود وجهه عليهم
نافع ـ أي حركه منكم أسوي مجزره بيكم والله ترة عقلي واكف على شعره منعول أهل أهلي هي شعره واكفه بس توكع يصير ما يصير بالقران الكريم والعباس أبو فاضل أذا ما تنطونيها ما يجرالكم الخير.. هشام عوفها وأطبك على صفحه
1 تعليق
هشام ـ نافع أسحب نفسك وأحنه أهلها ونتوالها ونحل السالفه زايده منك تتدخل وأذا أبن خالها .
نافع ـ خليني محترمك لا أطبگك وياهم .
لينا ـ سحبني من هشام وبالگوه أمشي وطلعنا وعمي محمود يركض مثل الاسد من ياخذون منه الفريسه ومتعاركين عليه والروح غاليه والموت محاصرني رغم الوجع البيه ركضت ورا نافع بس صعدت بالسياره وقفل البيبان وشمر السلاح بنص الحديقه
وعمي محمود يحاول يرجعني أعصابه نفجرت وخشمه ينفض دم ما لحكت أقفل الجامه غير عمي سحب شعري ونافع يسحب ويريد يخلصني انقفلت الجامه على شعري وضل مجلب واحس عروك شعري طكت والدم يتطافر من كصتي وأعيط فرفحت وينج يمه وينج .
1 تعليق
بس شغل السياره بكل سرعته وعمي يركض ويغلط على نافع .
محمود ـ من أنعل أبوك لابو الساعه الصرت بيها خالك يا گواد من ** بصفحة أهلك بس سهله نافع أذا ما طيحت حظك
لينا ـ شغلها وفتح الجام واني اشهك من كل گلبي
ربي اخذ أمانتي وخلصني تالي اطلع بفضيحه واني لا بيها ولا عليها وام الفضايح كاعده ومستريحه بدون عقاب .. ربي انت تشوف ربي اخذلي حقي منها
طلعنا على طريق ترابي واني حالي وين صرت وين جنت
بيت أبويه سمعتي وتربيه أمي ينحلف بيها ومحاضراتي ودراستي وشهادتي يعني شُــنو خسرت گلشي بسببج يا صفا .
تمشي بينا السياره ويحجي وياي وأني بس أبجي وحالتي يرثى لها أنطاني كلنكس مسحت الدم على وجهي الطريق طويل على گلبي كلها مصدكه الخبر انتشر أسرع من خبر وفاه بشر
معقوله الفضيحه هلكد جبيره لو اني مستسهله الوضع
لان عند الله بريئه ومخايفه هو كان غلطي بس اليعرفني يصدكني اني مستحيل أغلط هالغلطه
لينا ـ دموعي تنزل منو يصدكني أختي نفسها تكلي حذرتج وخالتي سميعه تسوي نفسها مصدكتني بس اني ادري شكو بگلبها تكول يتيمه خطيه
ـ الله بالمرصاد لينا حوبتج تبين والله .
ـ اضرب على وجهي شسويت بعمري شسوووويت
لزم ايديه يهديني ارتميت بحضنه عبالك أبويه واني عيوني ما أسيطر كمت ماشوف من البچي
وتجي بالي
اغنيه مثل طير بقفص وحده
تبرى الشحر من عنده
غصب عنه رضا بوعده
زمانه شجاب وشوده .
خليت رأسي وأباوع عالشارع .. وين مأخذني .
نافع ـ مكان أمن .
ـ أختك رسلت الهم گلشي هي جابتلي الفضيحه .
ـ بس الج لـو لبنى هم لان خاف تكون محتفظه بنسخ لمقاطع تنلاص وعلي تروحن بالرجلين وين أوديجن أحجي العار شُــنو رسلت الهم غير المحادثات
ـ هو شضل أذا لبنى أو أني شخلت علينا أختك وسمعتنا صارت بالحضيض
ـ مو وگته هالحجي لينا أحجي علمود أتلاحك لـ لبنى گبل لو تكبر المشكله بسرعه
ـ مــا أدري مــا شفت بس نورس جانت تقرأ يمكن راسلتهن الها ولعمي محمود وباقي عمامي مسويه عليه هجوم جماعي من الكل .
ـ هسه أشوف نور .. موبايلج وين
ـ يم نورس أشك بيها هي أخذته.. أتصل على نور وفتح سماعه
ـ فرچه تشوفهن من طاح حظها
ـ نافع المحادثات ما تنشاف أبو مسار واصل للعمق بالحچي وداز صور لنفسه ما أدري شگولك! بس فضيحه جبيره .
ـ ليا ساقط
ـ عمي محمود عقل ما ضل برأسه وكاعدين يحجون يمكن راح يخابرون جدي حبيب ويگولوله عليك أخذتها وأخاف السالفه تكبر ولينا تروح بالرجلين لان أختي مستحيل تسوي هيج والله لينا أختي أني أعرفها ما تحب ونوب شايب!
ـ يصير خير صارت عندي بعد السالفه .. أكولج موبايل لينا عند نورس حاولي تأخذينه منها وتضمينه عندج من يصيرلي مجال أمرلج أخذه
ـ ياريت أنت تكول الها لان ما تتحاجى
ـ ماشي .
ـ رجع أتصل على نورس
ـ أكولج موبايل لينا بقي يم خالتي وأذا أنطيتي لأبوج لو عمامج ما تدرين شسويلج
ـ هسه أنطي لخالتك وشسوي بي أني عشتوا على صخام وجهها وسوالفها .. بس أنت ضل طمطم ضل خيستها واصله للعظم خاف ما تدري وفضحيتها جبيره .
لينا ـ سد الخط بوجهه هالحقيره .. ونور أتصلت
نور ـ نافع
ـ هذا واجبي عيني .
لينا ـ أنتهى الأتصال والغصه تذبح بصدري تمشي بينا السياره بس عبالك تمشي على گلبي ووصلنا القريه وشفت الغنم والمعزات والخرفان والهوايش شلون يسرحن نزلني على ساگيه النهر غسلت ورفعت شعري شديته كبه جايه بتراكسود صيفي بجامه لون سمائي فاتح وتشيرت لون وردي بس الگلاده بركبتي اغسل بماي البارد والدم يجري على ركبتي رفعت راسي وهو واكف يم السياره .
ربي اخذ حقي ربي طلع حوبتي ربي يتيمه وناجيتك
تسمع صوتي
دنگت اشمر الماي على صدري اريد النار تبرد بگلبي
وهو يدخن جگاره تلحكها جگاره اخذ ايدي صعدني بالسياره وساكت ما حجه شيء وشيحجي مثلاً الكسرت رگبتي وفضحتني كدام أهلي وعمامي أخته البربوك والله يدري منو بعد وسالفتي وين تطش حتى عينه ما يخليها بعيني بس يكفيني هو مصدگني هاي عندي تسوى الدنيا ويكفي واكف ويانا ساندين روحنا عليه .
1 تعليق
قبل نوصل القصر بدقايق حجه بتحذير
نافع ـ راح أبقيج أهنا ما أمن عليج بس يم أهلي رغم أحنه المأذينج بس ما بيدي شيء وتعرفين مصيبتي مصيبه بس خل الكفها وگتها يصير خير .
لينا ـ التشوفه وأصلاً مـا عندي مكان أروحله كثر الله خيرك
ـ وخيرج يابه وأذا أحد سألج لاتجاوبين وليش جيتي شنو السبب ومن هالحجي گولي متعارگه أنتِ والبنات ونافع جابني بينما تهدى الأوضاع .
ـ وأذا عمي محمود خابرهم وگال الجدك
ـ هسه أشوفهم وأفهم منهم وجدي مو مثل عمامج يشهرون ويفضحون أحنه نعرف شلون نستر .
ـ تمام
ـ أني راجع أخذ موبايلج من نور وأرجع على خالي محمود أكعد وياه لان هذا بسرعه يندفع من قويدر ويرگصون عالفضايح طاحين حظ .
ـ تمام .. وصل ودك هورن وطلع عمه منعم نزل وياي وأني صايره بظهره دخلت وياه وشافتني الحجيه وخالتي لميعه .
نافع ـ عمه أخذيها داخل على أختها .
لينا ـ دخلتني وعفته واكف وياها وصلتني لغرفه لبنى وعمتي وهبيه وگفت تباوعلي من فوك ليجوه وتسأل بخالتي لميعه لما طلعت لبنى وشهگت بخوف دخلت غرفتها وسدت الباب .
لبنى ـ ولج شبيج شصاير بحالج منو هيج ضاربج لينا عيني أحجي وگعتي گلبي .
لينا ـ أختج أنفضحت فضيحه مصخمه وطلعت من الموت بقدره أهلج وعمامج رادوا يذبحوني .
ـ عزه بعيني شلون يعني .. أكعدي أكعدي .
ـ كعدت وجسمي يوجعني وبديت أحجي الها وهي تسمعني وأخر شيء لطمت على صدرها وگفت تمسح بوجهه وتباوعلي بشك! لبنى لاهيج تباوعيلي
ـ شلون تردين أباوعلج على صخام وجهج جايبته وجايتني
ـ والله گلشي أتوقع منچ وياما حذرتج بس ما أتوبين
ـ أني يعني ما مصدگتني
ـ شصدك گولليلي شصدك بيج مو جنتي مرافگتها وهي خايسه وخيستها ناخره العظم أكيد أنتِ هم مثلها
ـ لا لبنى عليج الله لاتظلمين حظج وبختج وأني أختج ترتبيچ معقوله تشگين بإخلاقي .
ـ بقيتي بيها تربيه ولج يا أخلاق تحجين عنها منو يصدك بإخلاقچ من صخام بوجهج وبوجهي على هالسالفه وشلون أصدگج وأني من يومي أحجي وأمنع وأحذر وطلع على لساني شعر كلها تأخذ بالنصيحه الا أنتِ ضليتي وراها وين على صفا منين جايه من صفا وتالي متالي وكعنا بفضيحه وتصخمت وجوهنا .
ـ بس والله مو أني والله
ـ بس فضحتج وهي الأدبسزز أنهزمت بدون لاحساب لا عقاب صارلها يومين طاريها محد جابه ولعلمج عبالج تنفضح لا أمثالها ينسترن وراهن أهل يستروهن وراها أم تأكل وجوه ولا أحد يجيب طاري شرف بنتها ..
بس أني وياج منو ورانا من مصخم الوجهه تلطم وتنوح علينا وهيج أحسن يا لينا فضحتج ويامن ويه مختار المنطقه وبالمنطقه مالتنا فضيحه علني يعني تربيه أمي واسمها وابويه وسمعتها خليتهن بالخيسه واجيتيني على شنو جايه تبشريني مثلاً من الله يأخذج ويخلصني من عارج .
ـ تحجي تلطم على وجهه وترجع تضربني على رأسي
ـ هذا رأسج ما شغلتي ضليتي ملاحگتها لما طاح حظج
والله سالفتج أذا وصلت الشيخ حتى بقصره ما يبقيج ما مجبور بوحده وراها فضايح ومشاكل لان البيهم مكفيهم يذبج على أهلج ويتولون أمرج لان البنت أهلها يغسلون عارها .. وجايتني شسويلج اني بطرك روحي كافي البيه هم مثلج ما خلتلي وجه أباوع بوجه بشر باقر وشگوگه ويه نافع لو نظرات الكل محمليني الذنب ومشركيني ويه نافع .. ولج البيه مكفيني ما ناقصه والله ما ناقصه
ـ كعدت بالكاع تبجي ومهضومه ردت أتقرب منها بس خفت .. لميت نفسي وبجيت بقهر حسبي الله بيج صفا أشوفج بيج يوم أن شاء الله يلگاج ويغسل عارج
.. مر الوگت وأثنينا ساكتين
لبنى ـ أذا سألوني شگول الهم
لينا ـ نافع گال گولي الهم متعاركه ويه البنات وجابني بينما تهدأ الأوضاع خالتي سميعه دزتني
ـ وعلى أساس حلها نافع وهسه نكول قنعهم وسگتهم وعمتج حربيه نسيتها أذا عرفت تجي تبشر بشاره لان تكرهنا تموت من عدنا وأنوب نافع الواكف ويانا وجايبج وجاي تعالي أستلمي وسمعي الحجي الراح يطلع علينا الا تسوي صاحبج! أذا ما سوته صاحبج أتفلي بوجهي هنا ميتات ليش نافع يدافعلنا ميتات .
ـ أندك الباب مسحت وجهه وگامت وباقر يسألها وهي تحجيله ورجعت طلعتي ثوب من مالاتها لبستها ولبست شال وطلعت وشوي وأجتي
ـ أجتچ عمتي حربيه أستلميها يا لينا هاي الما تسمع الكلمه هيج يصير بيها علج بلحوك التكرهنه .
ـ طلعت وطلعت وراها وكاعدات كلهن وعمتي شايله عبايتها وتحجي ونافع هم جان كاعد .
حربيه ـ رجعت علمود صفيره أم الفواين أو الدرابين أي شلون تنفضح وتطش سالفتها وتنذبح وأنت ما تحضر لازم توكف الهن لازم .
نافع ـ يمــا شلزومه هالحجي گافي سگتي
ـ لا ليش أسكت لا والله أحجي خل يعرفون حقيقتهن وسوالف صفيره شنهي بس الله بالمرصاد ياما هي وأختها حشن برأسك على أختك وتالي طلعت خيستها ناخره العظم وسالفتها طشت بالمنطقه خلت كل جوارين وكل اثتين يحجن بسالفتها .
ـ يمــا أنتِ ليش ما تسكتين وتحيرين بفصيحة بنتج
ـ وصما التصم حلگك ولا كلمه تحجي بس على أختك تسبعت وصرت زلمه حوك چا هاي مو بنت خالك مفضوحه ويه مختار المنطقه وسوالف وصور وحبجيات عالموبايل وأخواته أجني عليه للبيت يتوسلن علمود أخوهن ويردن تفض هالسالفه عالخير وگالن بنتكم هي لازكه لأبننا وهسه شارد من عمامك لما هي أنطتنا مجال الرجال شيبته بيضه شيسوي بنيه بگد بناته بس هنا خفيفات حتى المتزوج يركصنه تعلمني بيهن وبدروبهن .
نافع ـ يمــا خافي ربج خافي ربج كافي عاد سدي حلگج وخليني ساكت لا أحجي حجايه
حربيه ـ لا يمــا أحجي ليش ساكت بس عليه وعلى أخواتك شاد حزامك وتهلهل علينا بلسانك بس كالوها يامن تعب يامن شگى ويامن على الحاضر لگه وهنا لگن على گد أيديهن من نور وحط أيدك وأنت من يومك حصة سميعه وهسه صرت حصة قلق ..
الحجيه عطايات ـ هيج أحسلنج والله ما يلام بيچ وهذا لسانج يجيب أخرتج فه حشمي رويحتج وكفي لسانج عن هاليتامى لا أحشه الج من عرجه وأن سمعت الج حجايه زايده ناقصه يحربيه أكظبج الباب وأدزج على مهديه وحتى على ذمة مشعان ما أبقيج بعد وخلينا بمصيبتنا والعار العافته النا صركاعتج بنتج من عساج لا الج البنات هاي خلفتج وأنتِ شمخلفه من تحجين على بنت سميعه وبنت قلق چا أنتِ مو مصخم وجهج من جعب الجدر كظي ماي وجهج ومالج دخل بيها .
حربيه ـ بس عمه البنت أهلها يتولونها وهما يحلون طلابتها چا ما وراها أهل .. ليش جابها وخله خوالها يحجون عليه لا يحترم وبگلشي متدخل ترى يردون يجون يأخذونها وتصير طلابه جبيره .
الحجيه عطايات ـ أنتِ بس أسگتي ولاتنقطين بالشر وما الج لزوم بعد والبت صارت يمنا ودخيله عند الشيخ حبيب لما تفگ طلابتها .
لينا ـ نافع گام وباوع النا ومشىٰ ولبنى جرتني دخلتني الغرفه وتضرب على وجهه
لبنى ـ وين طالعه على صخام وجهج كعدي وأنجبي بالغرفه لما نشوف تاليها شلون تفض سالفتچ وشفتي وسمعتي زين شلون أمها أجتي فضحتج كدام أهل القصر خاف هما ما يدرون هسه دروا والحجي كله صار كدامهم أنفضحتي هناك وهنا هم
وعيبج عليج وعليه تصخمت وجهونا بالسماد والسبب أنتِ وهاي صداقاتج الطايح حظها ما وراها بس هجمان البيوت
ولج ياما حجيت وحذرتج وگتلج لاتثقين بصديقه بصديقه لاتثقيين مهما كانت غريبه قريبه لاتثقيين لاتثقيين بنت عمج خالج لاتثقيين وموبايلج لاتنطي لصديقه لاتنطين موبايلج حاجتج عندج وسرج بگلبج بس شسوي لمخج ولعقلج دأگليها هسه الله يدري عمامي شناوين على نيه هسه أبسط حلولهم يزوجونج وشوفي منو يقدمونه علمود يسترج ويطمم السالفه مثل ما طمموا سالفه نور من طشت بالمنطقه هما هذول أهلج يفضحون نفسهم وابسط الحلول الزواج
وهسه شُــنو ست لينا منو يطلعج من هالفضيحه ونگول نافع نقذج منهم هسه منو ينقذج هم نافع! وهو حاير بمصيبته وعار أخته وينهم ووينچ منو بحالنا منو يفكر بينا . تستاهلين اليصيرج هذا الما يشغل عقله ويحگمه ويحسب حسابات حياته تستاهلين .
لبنى ـ تعالي تزقنبي
لينا ـ ما أريد
ـ تعالي ما بيه كل شوي أجيبلج أكل مو بيت الخلفوني أفوت وأحطلج أكل .
ـ گمت كعدت مقابلها وكعدنا ناكل أني وياها ولكمه ما تنبلع عفتها وسحبت نفسي .. لبنى الله عليج لاتصيرين ضدي والله ما الي غيرچ .
ـ سگتي لينا گلبي محترك بنار على ساعه أحط رأسي وأموت وأخلص من هالعيشه
ـ لاتگولينها فدوه لاتجيبين طاري الموت على للسانج
ـ ليش هيج سويتي بيه ليش أستاهل منج هيج تجازين تعبي أستاهل ينجاب طاريج كدام عيالي ولج ما الي عين أرفعها بوجه بشر
ـ شلون يعني
ـ عمامي وعمي محمود يردون يجون يأخذونج وأعتقد الفهمته يردون يزوجونج لواحد من ولد عمي قادر بس نافع خابرهم گال الهم باجر الصبح نجي عليكم وتصير الكعده ونفض هالسالفه كلها .
ـ منو گالج نافع حجالج
ـ لا وين يحجيلي سمعت منهن هسه كاعدات يحجن
ـ ونافع وين
ـ نافع بالديوان كاعد يم جده حبيب ما أجه لهنا حتى عشاه أخذوا اله .
ـ وباقر سألج
ـ أي سألني وهم عرف حاله حالهم لان بالبداية جذبت عليه شمدريني تجي عمتي حربيه وتفضحج وطلعت بالوجه الأسود كدامه .
نور ـ كاعده وصافنه وأفكر بهل الفضيحه الوكعت علينا ودمعتي على خدي وتذكرت نفسي من فضحني الما يخافن الله وخلن الكل يحجي بيه وبشرفي ..
بس هسه لينا منو فضحها ومنو الگواد اللي رسل صور ومحادثات لعمي محمود وعمي قادر وهشام ونورس! ما اعرف سالفه تحير ما داخله عقلي أحس مؤامره مدبره واحد مسويها علمود يطعن بشرفنا لان لينا أعرفها لو تحب عيونها تفضحها هي نافع شكثر مهتمه ومعحبه بس ما شكيت بيها تحبه لان عيونها ما بيهن لمعة الحب التفضح الشخص بعد أمتار ولو عاشگه وسوالف ودروب تعبانه شلون جابت معدل ٩٠! .
أفكار تنخر برأسي مثل نقار الخشب .. دخل غافر نزع ساعته عالميز ويباوعلي بتركيز .. جاوبته نورس راحت
غافر ـ لا بعدها كاعده .
ـ شعدها باقيه لو لگت سالفه تحجي بيها
ـ هاي هي النسوان يموتن عالسوالف .
ـ صدك ما تستحي وأبوها يحجي ويلعلع بلسانه علينا وعلى بنته الله صام حلگه يوميه كاعده ومگابلتني
گمت أريد أروحلها ومنعني
ـ عوفيها هي تروح لاتسويلج مشكله
ـ لا أروح وأطردها وأمك تريد تزعل تريد ترضى كافي عاد تحملتها بما فيه الكفايه ومره مطلگه كعدي وأنجبي بيتج
ـ نور شهل الحجي شعليج بالناس عيب بابا
ـ عيب عليها خل هي تعرف العيب شگو لافيه بيتي ترى گلبي طگ من هل الوضعية جانت متزوجه كلنا ميخالف زعلانه ومقهوره وتحي تفضي خلك يم خالتها بس هسه لا تطلگت تحترم نفسها وتكعد يم أخواتها مو تضل مكابلتك .
ـ حاجي أمك لو والله أني ادخل وأطردها وأخليها تحلم تدخل هذا البيت ترى مـا صارت
ـ ميخالف أني أحجي وياها والله بس أهدئي وما تنحل بالصياح .. يله كعدي هسه من تروح أحاجي أمي .
ـ كعدت بالگوه لازمه أعصابي وهو غير ملابسه جان طالع برا والحلو بي والحبيته من صار الحجي على لينا ما حجه ولا جاب طاري ولا گال الا خالتي ونورس كعدتهن كلها على هالسالفه وأعرف نيتها شنو تشوه سمعتنا لو بس أدري وين تردين توصلين واهلج صاروا زلم أسباع على لينا وأنتِ بنت محمود محد يگدر يحاجيج لان أبوج بظهرج أحنه منو بظهرنا أني بس غافر سانده روحي عليه .
تطلع
ـ لا باقي يمج أدري بيج تغارين
ـ جانت متزوجه بس هسه مطلگه من حقي أغار وأخاف
ـ من كل عقلج هيج تفكرين بابا أفكارج بقيها نايمه برأسج وأستري علينا شهل الحجي هذا ومنو گال تطلگت ليش نافع طلگها
ـ أي طلگها
ـ شو ما گالي
ـ ليش سألته
ـ أي گتله شوكت ترجع مرتك گال خليها هسه بالي ما صافي ما فارغلها يجوز ورا كلامه أجه طلگها
ـ ما أدري يجوز .. تمدد بصفي وطلع مباراة عالموبايل يباوع واني محتركه بنار وأندك الباب گمت فتحته خالتي
صبيحه ـ شعندج كاعده بهل الغرفه ليل نهار البنيه كعدت وگامت وأنتِ سلام ما أجيتي سلمتي لما بنات خال وخاله .
نور ـ والله ما الحك أشتاك الها لان أعوفها بيتنا أجي الكاها كدامي والعصر عفتها بيت أهلي شجابها علينا بس هي بنت أختج ما تعرف تكعد
إشهار
ـ شنو هالحجي عيب عليج شو أحترمي سمعت يا أبني مرتك شلون تحاجيني مستكثره عليه خطاري دگول البيت بيتها
غافر ـ يما نور مو قصدها بس ترى هم واكفه وزحمه هالوضعيه كلما أجي الكاها عندج جانت متزوجه وزعلانه كلنا بيها مجال بس هسه تلطگت وتريد تجي ميخالف أهلاً وسهلاً بيها بس مو هيج كلما أجي البيت الكاها خل تخفف جياتها وترى العالم تحجي يمه وما تلوم نافع تلومها هي لان تطلگت .
يعني ما يصير أني أرجع من برا تعبان أريد أخذ راحتي بيتي ونور حقها أذا الواحد بيته ما يأخذ راحته .
صبيحه ـ بعدها ما تطلگت گمتوا تعيرون وتتشمتون بيها بس هي قسمتها وحظها معثر والله وكعها بيد نافع واحد مخربط أخذله وحده ورده اكلها لحم ذبها عظم فوك هضيمتها حجايتكم وما كاعده بيت الخلفوج تتضايقين منها والبيت بيتي والبنت بنت أختي ويتيمه لا أنتِ ولا غيرج يستكثل جياتها لعندي تجي تشوفني .
غافر ـ لا يمه بهاي أعارضج وأني ساكت لخاطرج بس منا وهيج تردين تشوفينها تروحيلها البيت شوفيها هناك بس هنا أعذريني ما مجبور تطلع حجايه والله بنت أختج يتيمه وبنت أختج عدها بيت وبينا شمرة عصا وتردين أني اوديج بسيارتي .
نور ـ خالتي سگتت ما حجت بس مشت مزعوجه باوعتله حبيت موقفه من حجه بس حسيت بي هو ما راضي
غافر ـ مو گتلج لاتحجين ليش ما تسمعين الكلمه
نور ـ ما كدرت وبعدين ما حجيت شيء .
ـ هذا هو سدي الموضوع
ـ سگتنا وبعد وراي خالتي والله فلا تسگتلي وثاني يوم سمعت من أمي اليوم تصير كعدة علمود سالفة لينا بيت جدي يردونها من خوالي ونافع معاند ما ينطيها وجدي حبيب گايل دخيله عندي محد يتندنالها ..
من الصبح كعدت وياه راح الدوامه الله وياه وما نظفت بس غسلت الحوش وخليت القوري عالنار وحضرت الريوك وخالتي كعدت تدردم
صبيحه ـ ليش ما منظفه البيت لـو تعلمتي على نورس سوده عليه جانت تجي تساعدني وتشيل عني شغلتي وهسه ضليت على أيدج الا البييت يجيف أذا ما جاف وخاس وطلعت ريحته أنه مو أم غافر .
ـ لا والله گولي أنتِ جايفه ما منج خير والبيت من يوم يومه يوميه الصبح ينغسل وينجلف بس انه الله بلاني بالما بيهن خير ونوم للظهاري .
ـ أستغفر الله ربي وأتوب اليه على هالمره.. ما جاوبتها سگتت كالعاده مره جبيره شسويلها مثلاً أتعارك وياها وتصير مشكله عارگت مره وهو وحيدها لا أحترم نفسي واني مو مال مشاكل مهما يكون خالتي ومره جبيره .
گامت تعاند بيه وتغسل رششت البيت بالماي طربسته والمعطرات وتمسح وهي مفاصلها توجعها والله نظيف تالي أستغفرت ربي ورحت أريد أخذ الماسحه منها خليها خاله أني أغسل عنج روحي أكعدي سويت ريوك بس صبي الجاي .
صبيحه ـ دروحي صارت فالحه هسه تندرت عگب ما كمت أشتغل أشو وخري الكاع كلها معطرات لاتوكعين ويصير شيء على بنتج وأبتلي وخري منا .
ـ براحتج عفتها ورحت المطبخ بس سمعت الطبه ركضت لكيتها واكعه من عزه بعيني ركضت رفعتها مو كتلج كعدي يا خاله منو رايد منچ تغسلين .
صبيحه ـ دروحي صارت فالحه هسه تندرت عگب ما كمت أشتغل أشو وخري الكاع كلها معطرات لاتوكعين ويصير شيء على بنتج وأبتلي وخري منا .
ـ براحتج عفتها ورحت المطبخ بس سمعت الطبه ركضت لكيتها واكعه من عزه بعيني ركضت رفعتها مو كتلج كعدي يا خاله منو رايد منچ تغسلين .
ـ كله من وراج بس تفتلين على رأسي
ـ تعالي تعالي كعدتها عالكرسي وشفت رجلها وركضت جبت الها ثوب
ـ وخري أني أغير ثوبي لا خلف الله عليج.. الله لايوكعني على أيدج
ـ عفتها ورحت غسلت البيت كله ونشفته خفت عليها توكع واجيت لكيتها طابخه الغده ليش طبختي جان اني طبخته
ـ ما أحب طبخج لـو ماصخ لـو فاهي لو دهنه جثير
ـ براحتج خاله وأني هم أحب طبخج ونفسج بالأكل يذكرني بإمي نفس طبخها .
ـ چا أحنه جيل أول نفس جيلچن ما منجن فايده حوامل وتردن دراسة والقهر أبني موافق
ـ ما حاجيتها أحسها متحمله عليه بس تريد الزله وحجايه تذمني بيها بالأخص هالفتره من لفت علينا سليمه نورس أحس خربت عقلها ... قبل جانت تحجي بس گلبها يحن عليه مرات تصير زينه هسه أبداً دومها معصبه وتحجي عليه .
تغدينا أني وياها وراحت تصلي غسلت المواعين وأمي بلغتني عالكعده گلت أشوف غافر وأروح وأفهم منهم تالي ويه هالسالفه وين جانت النا .
غافر ـ ها حبيبي تغديتي
نور ـ اي گلبي وأنت
ـ هسه كملت الحمدلله
ـ بالعافية... أكول حبيبي غافر
ـ ها عيونه
ـ سالمات... أريد العصر أروح للبيت أهلي تقبل
ـ البارحه جنتي يمهم ياعيني وعمامج هناك شتسوين تروحين .. عوفيها من أجي أخذج الهم .
ـ لا حباب خليني أروح واليوم تصير الكعده
ـ كعدة مال شُنـــوْ
ـ علمود سالفة أختي لينا يردون يفضونها
ـ أني ليش أحبك
ـ لان أني محبوب
ـ مو بس محبوب لان خوش زلمه وكفو
ـ بعد صبغ ماكو
ـ هههه لا حبيبي مو صبغ الله وكيلك
ـ يله عندي شغل بعدين أحاجيج
ـ تمام حبيبي .. للعصر تحضرت وأريد أطلع شافتني خالتي عرفت راح تحجي محضره نفسي الها .
صبيحه ـ خير هم كظيتي عبايتج
نور ـ على أهلي خاله
ـ شعندج يم أهلج البارحه جنتي يمهم لو هي يوميه ومسويه الدرب درب سچة رايحه راده .
ـ خاله وين رايحه قابل هو بيت أهلي وما رايحه يوميه كل أربعة أيام وحسب ودايماً أروح ويه غافر بس هسه أريد أروح أمي دزت عليه .
ـ شعدها الج أمي ما تجيج هي شو رجلها ما يقبل عليها بس عليج لا لازم غافر يقبل لان فقير ولگيتنا وعلى كد أيدجن وعلى نورس تحجين وتلعلعين كدام رجلج بس على نفسج ما تگولين .
ـ من رخصتج خاله گلبت وجهه بوجهي وطلعت وصلت شفت سيارتين يم بابنا ومصطاف واكف شافني وضحك
مصطاف ـ ها مرت الضابط يابه شلونج
نور ـ يباوع صفح وباوعتله بإشمئزاز
ـ بعدج جلبه بس ما تنبحين الظاهر رجلج خوش مأدبج تأديب عمي بس هو گدرلج وسواچ أدمي .
ـ ليا أدبسزز .
ـ مثلك أبو الشوراع مسقط ومسربت وعار
1 تعليق
ـ شو أنتِ مستجلبه فدنوب هاي عليمن هالغلط
ـ عليك غير ليش أكو چلاب بالمنطقه غيركم وشرابين عرگ وساقطين
ـ ولج أدبسزز أم للسان أني أعلمج والله لما حامل چان شفت شغلي وياج حتى الجاهل أطلعه من خشمج بس شافعلج هل البطنج ورجلج خوش زلمه .
ـ شفت طابوگه وشلتها والله بس تتقرب أنومها برأسك
أبن ابو العرك الله يأخذكم گواويد .. عفته يغلط ودخلت ركض أنهزمت خفت منه يضربني ودخلت من باب المطبخ ونورس كاعده عالكرسي ونبأ تحضر الأستكاين عبرتهن رحت أدور على أمي وشفتها واكفه تحاجي عمي محمود وتتوسل بي.
سميعه ـ أبو نورس بس أسمعني الله عليك لاتظلمها هاي يتيمه أمانة أخوك والله تشيلون خطيتها بهذا الزواج ومصطاف مو مال زواج واحد مسربت هسه لو هشام بيها مجال بس مو مصطاف!
1 تعليق
محمود ـ الحجايه نحجت وفضت وخلص ولينا يأخذها مصطاف وهسه يجيبونها ونعقدلهم وأذا سمعت منج حجايه لـو تتدخلتي ما تلومين الا نفسج .
نور ـ مصطاف! عبرني ودخل الأستقبال وأمي كعدت تضرب على رجليها وتلوم بنفسها وتبچي .
سميعه ـ أنه صوجي ما درت بالي عليها التهيت عنها كله مني البنيه يتيمه أمانه عندي وراح يطيح حظها بهل الزواج ومنو خيسة الزلم مصطاف واحد مسربت ومهتلف وشراب عرگ .. يمه سوده بوجهي عليج يا لينا ويم منو يم مهديه ونوريه الا يشوفنها نجوم الظهر
يا صخام وجهج يسميعه راحت البت راحت .
ولج ركضي جيبلي هالمهجوم أخابر وأحاجي خوالج شلون يوافقون على قرارات عمج محمود وقويدر شلون من يمتى حجاية بيت ياسين تمشي على حجاية بيت حبيب بيا قاموس صايره دايره، ولج شمالج فاگه حلگج ركضي خل أتلاحك أخيتج لاتروح بالرجلين .
نور ـ طلعت موبايلي عليمن أتصل
سميعه ـ على نافع چا هو مو كظب السالفه وخذاها وياه وتوالها شلون يردها لعمامها ويكسرون رگبتها شماله تسودن مثلهم وأنه المنتجيه عليه .
نور ـ أتصلت عليه وجاوب
نافع ـ نعم
ـ نافع أمي تريد تحجي وياك
ـ بالطريق شوية نوب نوصل
ـ صدك الحجي السمعناه نافع الله عليك گولي موصدك
ـ هسه نجي ويصير خير .
ـ قطع الخط وأمي ضربت على رجليها على كيفج على روحج هسه يجون ونفهم منهم
ـ ولچ شلون خيتج هاي خيتج .
ـ گومتها وكعدتها بالمطبخ أنطيتها علاجها خفت عليها لايصيرلها شيء وسمعنا صوت هورن وطلع عمي محمود ومصطاف واكف يم الباب ويباوع بنظرات أنتصار . لـو تموت الأبالك ما يصير يا نذل ومتأكده من نافع ما يخيب ظنه بي وينطيكم لينا .
باوعت من البرده دخل جدي حبيب والوجه ما يكصه سيف مزعوج حيل ويهف بعبايته وراه نافع شايل السويج وأجو يمشون بثگل وأمي گامت على حيلها وگفت يم باب المطبخ ودنگت على جدي وتبوس بإيديه وتبجي
سميعه ـ يابه فدوه لعبايتك وممشاك أروحن الك فدوه لطولك وداخله عليك أنه وبناتي ما النا غيرك .. يابه لاتظلمون هاليتيمه وتكسرون بختها يابه بناتي هذن وأنهضمهن بموت أهلهن لاتظلموهن فوك هضيمتهن .
1 تعليق
نور ـ دخلوا الأستقبال ونبأ صبت الچاي وأنطته لمصطاف وضلينا كاعدين نلوب من القهر والباب مفتوح يحجون بس صوتهم مو واضح عفتهن ورحت من باب الداخلي جان شويه مفتوح وگفت ونافع صار گبالي خرب أشرلي معناها وخري مـا .. بقيت واكفه لبدت بصف الحايط ويحجون عبالك عدهم عركة كلام .
محمود ـ أحنه على شنو أتفقنا وياكم أنه مو خابرتك وأنطيتني كلمه وگتلي التردونه يجرالكم أشو ما أشوف هيج يعمي
حبيب ـ چا شتريد
قادر ـ لينا يعمي وينها ليش مو وياكم وعلى أساس تجيبونها وياكم ونفض طلابتها وأصلاً زايده منكم تأخذونها عدكم .
الشيخ حبيب ـ البت دخيله عندي والدخيل بإمان لما تفض طلابته وأذا عدكم حجي أحجوا وخلونا نمشي
نافع ـ خالي مثل ما گال الكم جدي حبيب البت دخيله عدنا وأنتوا تردون طلابتكم تفض عالخير وتسترون بنتكم ومن حقكم هالشيء والعرفته محضرين الها واحد من ولد عمها وهم من حقكم أبن حقها وتردون تسترون الفضيحه بينكم بس أنه عندي حجايه وأريد الحاضرين كلهم يسمعونها ومن بعد أذن جدي
الشيخ حبيب ـ أحجي يجدي .
قادر ـ عمي شيحجي البنيه بنيتنا وهسه ترد النا وعارها علينا
محمود ـ قادر أكعد وأسمع الحجايه خل تفض الطلابه عالخير .
نافع ـ أحنه أجيناكم رغم عدنا ظروف ومريض بالبيت ودايخين بي بس نريد نحل هالسالفه ونتوكل والبنيه بنت خالي وأذا غلطت غلطها مو بس عليكم يرجع عليه هم وأختصر حجايتي وياكم وأكطع رأسها وأطلب منكم لينا تكون مره اليه وأنه أتكبع بيها وبعارها مثل ما تفضلتوا راضي بيها وبمشكلتها كلها
2 تعليق
نور ـ سگتتوا ونصدمت بهل القرار باوعت صارت عينه بعيني وصار الحجي بينهم عفتهم ورحت على أمي ولكيت نورس تحجي وتهوبز على أمي .
نورس ـ أي هاي العرفناها والله من سمعت نافع متدخل ويحل سالفة لينا عرفت وراه شيء سمعتي خاله وشفتي بنت رجلج شوفي الشريفه نوب ما كفاها سوالفها وفواينها ويه المختار أدور التفت على نافع وصار الها والله العظيم أضمن عليه جانت بينهم راده .
نور ـ عيب عليج أحترمي وأحشمي نفسج والتحجين عليها أختي ما أسمحلج لا أنتِ ولا غيرج يحجون بشرفها
نورس ـ من أنهجم بيت الشرف التحجين عنه مو شفناج قبل همزين نعرف تاريخج جان گلنا اي والله حجايتي صدك بس أكيد الأخت تطلع على أختها تكمل المسيره!
.. أمهات الشرف يحجن بالشرف دورحي أستري نفسج موزين غافر تستر عليج وطمملچ نسيتي ورا البيت نسيتي لو أذكرج لج بس أخذ ما أخذج هذا الشيء العافه صالح بيج مو ناخره العظم وشبع بيج بوس ومحاضن دتخلينا ساكتين ياعيني دخلينا ساكتين
وكل هذا وبعدج ما توبين كلما تسمعين نافع هنا تكظين عبايتج وتجين تشوفينه طولج تعلميني بيچن أمهات دوده حتى المتزوجه بيجن تعشگ ؏ رجلها .
نور ـ أمي تباوعلي وبدون أي كلام تقربت ضربتها راشدي بكل قوتي لا أنتِ ولا غيرج يحجون بشرفي يا أدبسزز وبدال ما مخليه خشمج بحياتي روحي شوفي حياتج وين راجعي نفسج ليش رجلج طلگج .
شلت عبايتي وفتحت الباب وعفتها تصييح وراي لان ضلت مصدومه شلون ضربتها بهل القوه
نورس ـ تضربيني لج أدبسزز تضربيني أدبسزز أم البوب أني الج .
نور ـ طلعت محتركه بنار وصلت البيت شفت خالتي تسألني جاوبتها عالسريع صارت لنافع هو حلها عفتها ودخلت غرفتي وسديت بابي وبجيت بقهر شمدريها شمدريها معقوله حاجيلها عني لا ما يسويها چا منو گال الها ...
نافع ـ ليش صوتجن عالي فضحتنا شگوو
نور ـ سمعت صوتي علمود تسأل
ـ لا ما سمعت
ـ چا روح راسلها وحاسبها لاتجي عليه
ـ شگو شبيجن
ـ نورس تعيرني بيك وبحبنا وبسوالفنا ليش نافع بس گولي ليش هيج تاليتها تخليني بهل الموقف يعني أني غافر تزوجني علمود يطمم ويستر عليه ليش شبيه
ـ نور ليكون عبالج أنه حاجيلها
ـ شمدريني
ـ لا وعيونج ما جايب طاري لأي كان مو عاد نورس لاتخلين الأفكار تخرب صورتي بعقلج مستحيل أجيب طاريج تنعدم عافيتي وأعدمه اليجيب طاريج وشرفج والله أعدمه حياته .
ـ تمام هذا هو .
ـ أني أحجي وياها
ـ لا عوفها هسه تگول أني گلتلك وتسويلي سالفه وأني هذا الموضوع ما أريده ينفتح بس الظاهر الحبايب ما يردن أعيش وأستقر بحياتي
ـ شهل الحجي محد يتندالج عيني .
ـ تمام .. رحتوا لو بعد وسالفة لينا صدك عالخير
ـ أي هسه راح نطلع بس جدي بعده كاعد ويه جدي ياسين وصدگتي گبل عالخير
ـ ها چا شلون
ـ بس شكليات كدامهم گتلهم اريدها اليه علمود لايزوجونها ويكسرون ركبتها بس ابقيها هناك يم أختها كم شهر لما تبرد السالفه واردها تكمل دراستها وعمي محمود بس أول هدا بعدين يفش .
ـ ها هيج عبالي صدك تريدها فرحتلك
ـ صخم الله وجهج أذا فرحتيلي
2 تعليق
ـ لا والله شبيك تستاهلها تلوكلك
ـ لا يابه لا هاي خيتي الصغيرونه مستحيل أفكر بيها تفكير تكون زوجتي أبد والله واكفلها لان حسبة أخوها الجبير وان شاء الله ما أقصر
ـ كفو منك والله يوفقك
ـ الله يسلمج يابه ولاتشغلين بالج بهذن الحجايات عادي جاريات على گلبي چا أنه مو أمي تكوم وتكعد تعيرني بيج هما لو جمعونا وخلصونا ولا من فرگونا خلصونا من حجيهم .
ـ لا عادي ولا يهمك
ـ يله أخذي راحتج أنه أتوكل للقريه وديري بالج على عميمه حاولي من يصيرلج مجال وديها لطبيب وضعها ما عاجبني وأنه لو عندي مجال جان وديتها بس مشغول ودايخ بسالفه
ـ أن شاء الله .. الله وياك .. نهيت المراسله وياه وحذفتها حسبي الله عليج يا نورس يا حقيره .
1 تعليق
لليل غافر رجع من دوامه وكاعدين وأنفتح الموضوع وگالتله على لينا وباوعلي كأنما يگولي ليش أني ما أدري عاد من رحنا الغرفه سألني
غافر ـ ليش من سألتج على أختج شصار ما گلتي نافع خطبها من عمامها وهسه شنو هذا السمعته من أمي
ـ وعمامج يسگتون ترى يوم يومين ويرحون يسحبون أختج نافع شيتصرف من كيفه خو يعقد عليها أذا يريدها والبنيه خوش بنيه وكلنا نغلط وبعدها جاهل يربيها ويوعيها ويعلمها على أيده مو أحسن
ـ والله ما أدري بعد ضلت يمه
ـ بيها الخير وأكولج تعاي صدك أنتِ شحاجيه على مصطاف أبن عمج
ـ ما حاجيه شيء
ـ لا حاجيه وغالطه هم شحجيتي وياه
ـ گتله جلب
ـ لا بعد أكو أكبر منها
ـ أبن الچلب گواد وشراب عرگ
ـ ومتباهيه حضرتچ شلون تغلطين هالألفاظ بالشارع
ـ يستاهل هو هم گام يغلط عليه چا تريد أسگتله
ـ لا شلون تسكتين شيلي طابوگه ونوميها برأسه
ـ أي مره لاخ تدلل أن شاء الله أنومها برأسه
ـ باع هاي من كل عقلج بابا عيب لاتخلين عقلج وياهم أنتِ كبرتي وتزوجتي وحامل هذاك اليوم ويه ساهر گايلته محراث التنور منو تباوع عليك أنت تضل نايم على گلب أهلك ومخليته شايط وينكز ويشيل بروحه ويركعها بالكاع يمت تجنين عقل .
ـ هما مو أودام كلما يشوفني أروح لبيت أهلي يسمعوني حجي ويغلطون عليه
ـ وأنتِ تكومين تغلطين عليهم لان أعرفج مرتي مو قليلة شر وحاط أيدي على گلبي لا تنومين طابوگه برأس واحد منهم وتعال غافر ودي فصل وجيب الفصل .
ـ والله اليتعده عليه ليش لا أنومها الطابوگه برأسه وبرأس أبوه
ـ لا أنت أنام بحضنك تقربت حضنته وبسته من خده
ـ بابا أعقلي أعقلي عوفيهم خيولون يعني اليوم دگوا عليه الباب أحنه محترمينك وخوش زلمه بس مرتك مو أدمي وما تحترمنا وكاظين خاطر لخاطرك فد فشلت منهم مرتي حاطه عقلها ويه ولد عمها شكبرج تصيرين
بعد
ـ من أصير بگدك أعقل
ـ من يشيب گلبي
ـ أبوس گلبك
ـ خرب بيومج أتونس على سوالفج شو دتعالي من خرب بروح عمامج واحد واحد
ـ ها وتحجي عليه لان أغلط عليهم
ـ أني رجال مالج لزوم أنتِ أنثى ما أريد تلفظين هيج الفاظ وبالشارع عيب ..
ـ ضحك عليه وغمرني بحبه وحنانه .. وهاي كلما أروح لاهلي اسويلي مشكله وياهم هما يندگون بيه واني ما بيه أسگتلهم ويجون مثل النسوان يشگون يم غافر گبور لفتكم أي والله .
ومر أسبوع وكل تواصل ويه أخواتي ما عندي بس ويه ماما وما رايحتلهم من أخر مره ضربت بيها نورس ولا هي وصلتنا بس حيل بردت گلبي بيها تستاهل البربوك
كاعده أطبخ الغده وأسمع صوت خالتي تبجي! يا ساتر
وموبايلي أتصل أمي شگو متصله من الصبح جاوبتها هلا ماما حاجتني وهي تبچي .
سميعه ـ ماما نور تحضري نروح القريه للفاتحه بنت خالج توفت ! .
