رواية خيط وابرة الفصل التاسع والعشرون 29 بقلم شمس العراقية

لبنى ـ من يوم الأنهزمت بي والقصر وأهل القصر داخلين حالة أنذار والكل أعصاب حتى الحجيه تعارك الكل وباقر يطب ويطلع يصييح وحقهم مصيبتهم مصيبه 

بنتهم فضحتهم وأذا العالم تعرف فضحيتهم جبيره وما تتسولف .

كاعدين كلهم وعمي مشعان يصفگ بإيديه وراحوا دورا ما خلوا ورجعوا مـا لگوها وعمتي حربيه بس تضرب على رجليها والدموع تجري والحجيه تلوم بيها. 

الحجيه عطايات ـ كله منج أم الفتايل هاي خلفتج السگط واكفتلي تحجين على نافع من كون مرض بلحگج وهسه شسوي بيج مگابلتني شو نافع وهججتي والبت هزمتيها بشنو فلحتي يالخارمه . 

مشعان ـ الفضيحه ما تطلع عتبة الباب ممنوع أحد يجبب طاري وأذا سمعت حجايه أحاسب الكل والحساب قاسي يكون وأنتِ أهلج أمج أخواتج كان من يكون ما تجيبين طاري بنتج السكط لما نلكي الها ذچر وگتها يصير خير

وأنتِ عمي لبنى خاف تخابرين أهلج لاتحجين عمي 

والباقين ما يحتاج أوصي . 

لبنى ـ أن شاء الله عمي .. حجيت وعمتي گبل خزرتني 

وباقر أشرلي أكوم .. گمت لغرفتي وضل هالحال أيام وباقر ما يحجي وياي محملني السبب! 

وشيعوا عليها صفا مريضه بيها مرض ومطعونه بطنها وجاي يعالجونها طب عرب عند الحجيه علمود أذا لگوها وگتلوها يگولون لـ العالم ماتت بمرض وهيج محد يكشف الفضيحه والله زين يعرفون يتسترون على فضايحهم مو مثل عمامي متباهيين وأبسط حلولهم زواچ ما أدري نهاية هالسالفة شلون تنحل حاطتها بغرفتي وكاعده . 

لينا ـ أكولج طگيت أريد أطلع برى 

لينى ـ وين تطلعين على صخام وجهج كعدي وسگتي وعمتي هنا مقيمه بس تشوفج تضل تسمعج حجي

ـ بس أني مالي ذنب والفضيحه التكبعت بيها بنتها السبب ليش محملتني الذنب مو أني أختج أذا أنتِ ما توكفين وياي مو يوگف وياي 

ـ من سوالفج من رأسج اليابس . لينا سگتي رحمه لأمي ولو خليتي بيها رحمات لو بس محافظه على أسمها حتى رحمه ما تريد منچ . 

ـ ملامتها تأكل بگلبي حتى نور أحسن منها هي من يومها هيج تكره سوالف التخص الموبايل والتصوير حريصه بشكل وأذا طلع حجي تضل تلوم وتحجي عاذرتها هذا طبعها وحقها أني غبيه ما سمعت منها نصيحه 

وهي هم الله يكون بعونها باقر مزاعلها ودومه أعصابه فايره وتبين هي زينه بس شكلها يبين مهضومه دمعتها بطارف عينها وأحس بحنيتها من يجي الليل تغطيني وتضل تمسح على رأسي وتلوم بنفسها 

لبنى ـ شطالع بإيدي وما سويته الچ وين أوديج منهم

شلون أخلصج وأحافظ عليج .. أنتِ بنيتي والذكرى البقتلي من ريحة أمي . 

عفتها وگمت على باقر شفته راح صوب المضيف باقر أوكف . 

باقر ـ على كيفج لاتركضيين واكف أوكفي أنه جايج 

لبنى ـ أجاني گلت الحك بيك قبل لاتروح 

ـ دأخذي نفس على كيفج بويه 

ـ لاتروح للمضيف خليك نام هنا 

ـ وين أنام 

ـ تذكرت لينا عادي تروح يم خالتي لميعه وأنت تأخذ راحتك على جربايتك أحسن ما تنام عالكاع 

ـ لا يابه شسالفه عوفيها يمج ومالج شغل بيه مرتاح بنومتي. يله رجعي لفراشج تأخر الوگت . 

ـ بعدك زعلان مني 

ـ أنتِ ششتوفين 

ـ بعدك 

ـ أي بعدني وبالي دايخ مو وگتج يله أمشي للغرفه 

ـ نزلت رأسي ومشيت مقهوره ومهضومه وهو راح المضيف من يوم ما أنهزمت راح تكمل أسبوع هو ينام بالمضيف وعذرته ويچي يوم ويعرف السبب لازم تبين الحقيقة ويظهر الحق . 

كاعدين العصر يحجون بموضوعها وعمتي حربيه متحضره تريد ترجع للبيت . 

مشعان ـ أنصب جادر فاتحتها ونگول ماتت بمرض وفاتحه من صدك وحجايه زايده ما أسمع حتى أهلج يعرفونها هي ميته 

الحجيه عطايات ـ من عساها من صدك تموت ونطم عارها .. يمه مشعان وليدك ماهو ما سألت عنه شفته وين ما وين... وين ينام يأكل يشرب 

مشعان ـ لا ما سألت ولا اسأل واحد مخربط أكثر من أخته المسقط ويمه ديري بالج بيوم تگوليلي رجعه ما يرجع ولا أشوف خلقته طول ما أني عايش لو متت خل يلفي على القصر بس هسه خلي الشوراع تربي لان الظاهر مشعان ما عرف يربي تالي ما تالي يزني بالشقق ويشرب عرگ واحد مسربت وطايح حظه . 

لبنى ـ ردت أكوم ودخل علينا نافع! وعمي صاح بي

مشعان ـ شچايك أمشي أطلع برا 

لبنى ـ ما سمع لعمي ويمشي سريع وشمر موبايله كدام أمه قربت شاشه صفا! 

نافع ـ تنوعي لصوره زين شوفي بنتج صارلها يومين بالطب العدلي شوفي صورتها بالت**ريح!

حربيه ـ يماااا بنيتي صفااااااي يمه سوده بوجه أمج 

لبنى ـ گامت تعيط وتلطم وتبجي بچي ماصاير وعمي تقرب أيديه يرجفون سحب الموبايل وباوع على نافع وضل ساكت 

نافع ـ أني عاق مــو وبنتكم هم عاق ولگيتها بس لگيتها ميته حرامات ما لحگت عليها وشربت من د*ها شوفيها زين يمه شوفيها وطلعت حامل وطفلها كامل بطنها يمه بنتج حامل! هاي الأنهزمت طلعت حامل يعني عامله العمايل وأنتوا مـا تدرون بيها . 

لبنى ـ يحجي والكل ساكت وأولهم عمتي حربيه گتمت بجيها ونوحها ووكع الموبايل يم رجلين باقر سحبه وتقربت شفتها م*رحينها ومخ**ينها شكلها يخوف 

وجهه كله ط*نات قويه وأيديها كذلك باقر گلب الموبايل 

ما خلاني أشوفها زين 

الحجية عطايات ـ شلون لگيتها وشلون ماتت هالسليمه 

نافع ـ عالطريق الخارجي ضاربتها سياره شامرها على الرصيف حسب المعلومات السمعتها مــا أعرف تريد تتنهزم أو نازله من تكسي تتنظر أحد وتأخر عليها رايده تعبر وأجتها سيارة وخلصتنا منها بس الأعرفه لگيناها على الطريق الخارجي مضروبه بسياره وبالت*ريح تبين هي حامل وطفلها يتجاوز عمره أشهر

يعني بنتج من يمج تطلع وتطب وبكيفها وفواكاها حامل يعني سالفتها واصله للعمق وما تنحجي أذا ما طلعت متزوجه بالسر! بس الشيء الوحيد الأريد أعرفه وينج عنها وين جنتي ما تبعتي بنتج ما خليتي بالج عدها ترى خراب البنت من الأم أذا ما تبع ظناها يضيع وأنتِ ضيعتي بنتج بس گولليلي بشنو جنتي ملتهيه عنها بشنو يمه حاجيني على صخام وجهج وجهي ترتبيج الها وين 

شلون تعشك وتصخم وتحمل وأنتِ غافله عنها . 

مشعان ـ يعني من أخذتيها الدكتوره تفحصينها جنتي تدرين بنتج حامل ومع ذلك هزمتيها علمود تخلصينها من عدنا هااا أحجي أحجي لا ألحكج بيها . 

نافع ـ أي جانت تدري ومن حجيت محد صدگني گتلگم وراها سالفه وسالفت أني ضاربها ومدمر نفسيتها ما تنعقل ماكو بنت تنهزم من بيت أهلها الا وراها مصيبه لا معامله زفت ولا أخويه معاديني مو وياها أخواتها أطيح حظها التفك حلگها بس هاي جانت المدلله ياعيني وغرفة لوحدها وموبايل من الزين عمي الأجانب ما يلحگونه بالدلال والسربته ومن جنت أحاربها ما أقبل تلزم موبايلج لو موبايل ناجح لو حليم جنتي تحجين وتطلعيني أني موخوش أدمي تالي من ورا ظهري رحتي أشتريتي الها موبايل خاص بيها وهي بعدها رابع أعدادي عناد بنافع بس بناتنا لازم يشيلين موبايلات شلون مو أحنه نختلف نتثق يابه نتثق بالخراب وطيحان الحظ ..

مشعان ـ أسكتي أسگتي لاتحجين ولا حجايه ولج عينج لاتخلينها بعيني بعد 

نافع ـ بنيه بگد النعال أشيلها موبايل واحطها بغرفه لوحدها شتشوف كدامها طبعاً تغلط تكول اهلي موفرين اليه كلشي بس هي لو أدمي جان غزر بيها هالدلال وما خانت الثقه بس هي من الأصل عظمها خايس لان عرجها نكس ومن جنت معاديها تلوموني وتحجون عليه .

وربعها مو شايلات موبايلات شو ما عملهن هالعمل بس بنتج بدعت وأذا على لينا والطلع عليها فه خليني ساكت كل الفضايح سببها بنتج وأنتن فضختنا أنتِ وبنتج وكسرتي رگبتها وجان أنذبحت بشربة ماي وأخوج بس على هاليتامى سان سجينته . 

ومشكلتي الوحيده أحاجيج وما عندي دليل برائتها لان بنتچ ماتت وطمرت سوالفها من طمرت جلاب السود

لبنى ـ عمتي مدنگه بس الدموع تجري ونافع يحجي بعصبيه و*م محترك ما أنطاهم مجال وعمي ساكت يسمعله ويباوع بغضب ونظرات ما تتفسر لعمتي سگت نافع وكعد لازم رأسه . 

مشعان ـ شلون لگيتها هالصگط 

نافع ـ خليت بلاغ عند ولد صاحبي وأمنته گتله مخطوفه وياريت لو مخطوفه هي طلعت مهزومه بصخام وجهه 

وخابرني گالي أسم أختك موجود تعال رحت لكيتها مأخذينها بالطب العدلي م***ينها والعرفته لگيناها مشموره عالرصيف مثل الجلب من تضربه سياره وتشمره ماتت فطيس وأجيت أريد هبدت فلوس تسد حلوك قبل لاينفتح بيها تحقيق! وتطش سالفتها وأسمنا ينكز بالتحقيق ومعارفنا هواي بس ينلگف أسمها ننفضح فضيحه لولد ولدنا . 

حربيه ـ محد يفضح أختك ويفضحنا ويفضح روحه غيرك أنت ولك ما شايفه هيج أخ يركص بجفيه هالفضيحه بدال ما يتسترها وين الستر التحجي عنه وينه 

لبنى ـ عمي راد يضربها بس ناجح ما قبل سحبها عالصفحه 

مشعان ـ ولج أسگتي بعد الج حس عگب كا اللي صار وحسابج مو هسه والله ضامها الج بس أجيب*ثة المكبوره بنتج واسويلها فاتحه وگتها أتفرغلج واطين عيشتج يا عار النسوان طمي عارج وسگتي وساكت لان أكول أم والماتت ظناها ما أريد أتصرف تصرف كدام ولدج بس خل تكظي والج الصافي يحربيه الج الصافي يعدمج حياتج! 

نافع ـ وگدامن فاضح العار بنتج شو كدامكم كلكم چا مو أنتوا أهلها أهاا قصدج كدام هاليتامى بنات أخوج والله لو تدرين تكبعن بتهم وتحملن حجي علمود لابنتج تنفضح بس يمه أنتِ وبنتج مو مال واحد يسترجن واليتيم اله حوبه وتعثر وشوفي شلون عثرت بنتج وفلتت من أيدي ما ذب**ها وغسلت عاري بإيدي والله هاي سالفتها حتى بنت ما خلف من وراها على سمعة عمتها الصكط عمت على أخواتها والله لا يرحمها وعساها لا الها گبر بين الكبور وأذا أجيبها الج ونسويلها كبر وفاتحه كله كدام الناس لا أكثر لان بنتج عار .. 

يله حضروا الفلوس علمود أولي أنطيهن والصبح يسلمونه جثتها . 

لبنى ـ تقرب أخذ موبايله من صف باقر وگام راح ولحگه عمي وناجح وباقر هم دخلوا المضيف على الشيخ لان ما جان گاعد يحجوله السالفه بس طلعوا عمتي كامت تلطم بگل قوتها والحجيه ساكته والباقيات يباعن الها سحبت نفسي ولكيت لينا كاعده ها دريتي سمعتي نافع شگال 

لينا ـ أي سمعت وأن شاءلله صدگتي برائتي 

ـ أصلاً أني مصدگتج بس جنت مقهوره منج ماكو أخت ما تعرف أختها شنو .. تقربت حضنتها وگامت تبجي 

خلص سكتي هاي أنكشفت وماتت موت الجلاب السود على كولت نافع فطيس طلعت حوبتنا 

ـ ماي بارد نزل على گلبي ما تصورين شگد فرحانه أول مره أسمع ميت يموت أفرح هيج فرحه 

ـ گامت تضحك ضحكت وياها ولميتها بحضني وبقينا كاعدين نحجي بسالفتها وتسولفلي شلون جانت تطلع وياه كافي لينا لاتحجين ماتت ومات سرها وياها لخاطر اهلها خطيه خوش ناس ما مأذين أحد 

ـ هو شمسگتني لمـا أهلها ما يستاهلون الا كل خير

ـ خل أطلع أشوف شصار ما صار .. طلعت بس الشيخ كاعد بالحديقه والحجيه بصفه يحجون وعمتي حربيه ملخه نفسها تبجي ورا البيت .. 

لليل محد بين منهم وضلينا كاعدين ننتظر والبنات جابهن ناجح ورجع وتأخروا الوگت رجعوا كلهم بس نافع مو وياهم گالوا عالصبح يجيبونها ومتأخرين لان هوسه ودوخه بالگوه فاضينها بسگوت لاحد يطلع أسمها هي ماتت وخلصت وهما يسترون وراها فضحيتها وموتتها ويطممون عارها علمود لا تنفضح وتخرب سمعتهم خطيه والله فد نقهرت على عمي مشعان كاعد وأيده على رأسه واجتي عليه الحجيه حضنته من رأسه . 

الحجيه عطايات ـ أحمد ربك وأشكر أنكظت هيج وما أنفضحنه ولممتوا سالفتها گبل لاتطش والعالم تعلج بلحمنا 

مشعان ـ يمه أنه أشسويت هيج خلفتي تجازيني بهل العار هذا شمسوي وشسويت الهم والله ما قصرت وياهم والله .. وهسه نافع ردت منه يرد وياي القصر ما فعل ضل معاند ومشى وعافني أدري أمه ظلمته علمود تخلص عار بنتها سوتلها مسرحيه كدامي وخلتني اصدك 

الحجية عطايات ـ هو يصفن على وگته ويرد ميخالف يمه لاتقهر روحك موزين كظت سالفة بنيتك الباقي مگدور عليه . 

لبنى ـ باقر أجه باوعلي عفته ومشيت الغرفه توقعت منه يسألني بس مـا حجه شيء والليل كله محد نام وأني هم ضليت بس أتگلب ولينا نامت اليوم مرتاحه عكس ما أجتي دومها دمعتها على خدها .. 

الصبح كعدنا على صوت العياط وكعدت البيت مليان عالم مدري منين چايه گومة نساوين وزلم الظاهر أقاربهم بلغوهم جنت لابسه دشداشه لون أحمر حلفت الا يدخل تابوتها يله أنزعها .. ومر الوگت ودخلوا شايلين تابوتها كأنما صدك ماتت مطعونه بمرض وأمها وأخواتها وخالاتها وجديتها ملخن نفسهن نزلوها بالصاله وطلعوا ونافع وباقر جانوا شايلين تابوتها خلوها بالكاع وطلعوا ضلن بس النسوان تتعايط . 

مهديه ـ ولج جده منين لفاج هالمرض من سوده بوجهي كون على شبابج يبعد عين جديتج . 

لبنى ـ رادن يفتحن التابوت بس الحجيه ما قبلت أحد يشوفها گبل شالنها يغسلن الها والحجيه وخالتي سميعه ونهاوند وصبيحه دخلن يغسلن الها ماكو أحد ثاني ..أجه ناجح حلگه يابس أنطاني علاگه جبيره 

ناجح ـ لبنى هاي أنطيها الهن الجفن وشغلات حبوبه وصتني عليهن . 

لبنى ـ تمام أخذتها وأيدي ترجف هذا جفنج يا صفا وبيدي! دگيت الباب خالتي سميعه فتحته مخلياتها عالقريوله **مها اصفر كركم وبي ط*"ات لون بنفسجي وكله م*يط من طول لطول مال ت*ريح 

أخذته مني وسدت الباب وشويه وطلعت الحجيه شايله العلاكه بيدها دخلت الغرفه فرشت القماش وكعدت تحضر جفنها وكل جسمي يرجف تالي عاطت بيه 

الحجيه عطايات ـ أنتِ حامل شموگفج فوك رأسي شو أنكلعي منا . 

لبنى ـ طلعنا أني ولينا ونباوع عليهن شلون يعيطن لما كملنها وطلعناها ودگن ولطمن على تابوتها وأجو شالوها أخوانها والعياط ماله والي .. ولمحت نور اكولج يمكن هاي ما تدري عبالها صدك ماتت بمرض خبيث . 

لينا ـ شمدريها هسه تجي وأبشرها هاي حوبتنا الله بالمرصاد حسبي الله عليهن 

لبنى ـ أجتي وگفت يمنا وتبجي 

لينا ـ تبجين عليها ولج هاي عار ما تستاهل منج دمعه 

نور ـ لا خطيه ماتت مريضه 

لينا ـ ولج يا مرض صدگتي دتعالي بغرفة لبنى أحجيلج الموجز شلون موجز يبرد نار گلبج كلها 

لبنى ـ أخذتها الغرفه كعدت تحجيلها وشويه وأجني و نور مصدومه 

نور ـ أول مره أتشمت بميت وعدل نفس الوگت يله بلكي عمتي حربيه تنكسر عينها وتعرف أن الله حق واليتيم اله حوبه وقليل طعنت بشرفنا وبشرفي يابه هاي الدموع عيشتيناها أيام وليالي على مخده كل عبره تشك صدري جانت ملتهيه بينا وتحجي وتطعن بشرفنا وعايفه بنتها تبدع بشرفها يله نكول الله يرحمها . 

لينا ـ من الله لايرحمها أن شاء الله عساها لانزلت عليها الرحمه والله لايسامحها دنيا أخره 

لبنى ـ لا ولج الميت ما يجوز عليه غير الرحمه 

لينا ـ تردين تترحمين ترحمي أنتِ لان فطيره أما أني انعلها وأنعل روحي اذا دزيتلها رحمه أدبسزز حتى من ماتت نسترت ولطمات ونوحات وفاتحه والدنيا نگلبت عليها خوما مثلي أنفضحت كدام الدنيا ولحدالان بنظرهم اني ساقطه وأم دروب . 

لبنى ـ أي والله باعي شلون يلطمن عليها وأخواتها ملخن نفسهن وعمتي بكل حيلها لطمي يعمه الطمي حتى باقر بسبب كلامج اليه كام يشك بيه شدعي عليج وعلى بنتج والله أحسها زايده مني اذا أدز رحمات لبنتج 

ومر الوگت وبلشت الناس تجي ونصبوا الجوادر الدنيا نگلبت عليهم وأني عمتي وهبيه ما خلتتي تخاف عليه من العين كاعده بغرفتي ولينا يمي تجيبلي الأكل لعندي بس بالليل أطلع من تخف الهوسه وباقر ما أشوفه بس على كدما يجي يغير ملابسه لان الناس جاي تجي عليهم هواي هي النسوان ما الها مكانات تكعد مو عاد الزلم .

أباوع على مكانه فارغ خنگتني العبره راح يضل هيج والله مشتاقتله أوف لو يدري بسوالف أخته أتمنى أحجيله وأخلص .. أباوع على نور ولينا كاعدات يسولفن بينهم ويضحكن ولجن نصن صوتجن فضحتنا هسه بله اجتي وحده منهن . 

لينا ـ شمسوين حتى الضحك حرام ومنو بحالنا جاي يدگنا ويلطمن يموتن عاللطم همزين ما عندي لطمات علمود من أموت محد يلطم وراي ويحرگني بگبري . 

نور ـ چا أنه وين رحت 

ـ سگتي أم الفتوك والجذب تركصيلي بجفيه چا تعلميني بيج... أكولج على طاري الچا شو حبيت لهجتكم وكل سوالفكم كمت احجيها والله حلوه 

ـ أكو أحلى من الچا تعلمي من حبوبه تعلمي لهجتها تجنن أنه من أكعد وياها أضل بس أباوع على حلگها صح لهجتي متنوعه مره من لهجه ابوي مره من أمي مره من حبوبه يعني شيء على شيء حلوه . 

لبنى ـ يحجن بينهن وأني وبالي يم باقر وحايره ويه نفسي شسوي أعترفله بعد كل اللي صار .. وصارت عيني على موبايل نور! وتذكرت نافع خل اسأله بالأول أكوله أو لا خاف أكوله وأعم على نفسي بلكي هو يحجيله بطريقته ويه أخوه ويبريني من شگوگه ويبض وجهي كدام باقر . 

نور عادي أگلب بموبايلچ موبايلي عاطل صار فتره حجيت ولينا گلبت عيونها عليه كأنما فهمتني لان نور ما تدري بموضوع التصوير ما حجينا الها . 

نور ـ أي عادي عيني كدامج . 

لبنى ـ أخذته دورت على حسابه لان ماكو رسائل بينهم

لكيته ودزيتله لايك بسرعه فتحها ودز لايك رجعت كتبت اله موجود 

نافع ـ أي مو دزيتلج لايك شبيچ 

لبنى ـ نافع أني لبنى أريد أحجي وياك 

ـ ها لبنى گولي صاير شيء 

ـ لا لا ما صاير شيء بس بخصوص باقر شلون أكوله على اللي صار وسالفة التصوير 

ـ لا ديري بالج لبنى 

ـ ليش مو لازم يعرف خلص هواي ضميت عليه 

ـ ما عندج دليل وباقر عرف صفا شنو أكيد عرف علمود سالفة هزيمتها مو موضوع ثاني فاهمه عليه 

ـ بس ليش ما تقبل أكوله 

ـ راح يگولج شنو دليلج ونافع شافه لو لا وتكبر الشگوك برأسه وتفتحين على نفسج باب وسالفتج ماتت ويه صفا وخلص الموضوع نقفل بابا ليش تبحوشين ورا خراب حياتج . 

ـ وباقر 

ـ شبي؟ ترى أجاني وأعتذر مني وطلب مني أرجع القصر بس أني مشكلتي مو وياه ولا زعلان من عنده حقه كل رجال بمكانه غيور على مرته هيج يتصرف وأكثر وما الومه بس مشكلتي ويه أهلي وباقر أخوي وعادي تصافينا والأمور طبيعيه بينا يسأل ويراسل . 

ـ تمام هذا هو 

ـ أي هذا هو أنسي 

ـ أخذ راحتك 

ـ الله وياج . 

ـ حذفت المحادثة وأنطيتها الموبايل أكولجن ما تگومن صارت دنيا مغرب أختنگت أريد أطلع هسه خفت الهوسه 

نور ـ أي والله وهسه أمي وخالاتي جاي يسون حلاوة تمر تخبل بالدهن الحر أموت عليها فدطيبه . 

لينا ـ أني الأكل گوه أكلته مو عاد حلاوتها ما تجوزين 

نور ـ لا لينا دكافي عاد خطيه ماتت الله يغفرلها ويرحمها ليني گلبج لاتصيرين قاسيه يله گومي هسه كاعدات كلهن الأجواء تخبل . 

لينا ـ خرب بيومج ميت الهم ميت يا أجواء غير بطرانه 

لبنى ـ گمت أني ونور ورحنا للساحه كاعدات كلهن وكعدت بصف عمتي وهبيه وأنطتني حلاوه 

وهبيه ـ أكلي بس لاتكثرين لايصير عندج چالي 

لبنى ـ لا دخيلج عمه بدون ما أكل چالي موتني نوم ما يخليني أنام .. أكلت شويه وأباوع الهن شلون يعجنن تمر بالدهن ويكورنها ويخلنها بكرصه خبز وخالتي لميعه وصالحه والبنات يخبزن عالتنور الطين ويجيبن ويخلن الحلاوه بالصياني ويوزعونها بالعرب .

نور تساعدهن ونورس هم وياهن ولاحظت عليها بس تباوع على نور ونور بالها مو يمها تشتغل والها واهس الا هذيج مراقبه كل حركه الها! . 

كملن وصبوا العشه اني ما تعشيت دخلت غرفتي ورا العشه گامن يعنن ويبچن عليها وصوت عمتي يوصلني لغرفتي طلعت وشفت عمي مشعان واكف ويه خالتي سميعه ونهاوند . 

مشعان ـ خل تدك وتلطم خليها بس خل تخلص الفاتحه الا أخليها طول عمرها تلطم على الحياة اللي راح تعيشها 

لبنى ـ رجعت ما حبيت يشوفني وعبالهم متشمته وهي من دون شيء ما خلصانه منها رجعت بقيت كاعده وأنتظرت تخف الهوسه وبالي يم لينا ماكو وين راحت توني ردت أطلع دخل باقر وقفل الباب باوعتله شكله تعبان حيل وعيونه ذبلانات ضل صافن بوجهي وتداركت صفنتي وتهربت منه . 

باقر ـ وين 

لبنى ـ أشوف لينا مــا أعرف وين راحت 

ـ وهي صغيره تشوفينها وين وأكيد كاعده يم أختج نور 

وين تــروح قابل 

ـ أختي الصغيره 

ـ ياريت هذا الأهتمام اليه 

ـ ليش مقصره وياك 

ـ لا حشاج من القصور بس ما أريد أهتمامج لأحد غيري حتى لو جانت أختج . 

ـ سگتت تقرب رفع حنجي باوعتله وأختنگت 

ـ أسف وحقج عليه ولو أعرف الأعتذار يطيب خاطرج ويمحي قساوتي عليج بهذيج الأيام أعتذرلج منا لباجر 

ـ بجيت وبقيت ساكته تقرب مسح دموعي 

ـ تقبلين أعتذاري وترضين بـ باقر من جديد 

ـ هزيت رأسي گبل حضني وضمني بحضنه يالله شگد مشتاقتلك ليش هيج حرمتني من حضنك ليش . 

ـ الصوج منج أنتِ جنتي تدرين بيها وضميتي عليه ومن سألتج نكرتي وضليتي تنكرين حتى سالفة أختج نكرتيها لما خالتي تحجي أنه ما أعرف شيء وعقل ما خليتي برأسي حقي لو موحقي كل تصرفاتج بهذيج الأيام تخليني أشك شيصير لو حاجيتلي .

ـ لان أني جنه والموقف جان صعب ما كدرت أحجيلك وأخوك ما قبل حلفني وگال المشكله ما تطلع وما رادها تكبر بس صار اللي صار 

ـ شصار بهذاك اليوم 

ـ رجعنا باقر 

ـ أحجيلي لبنى هي ماتت بعد على شنو تضمين 

ـ ماكو شيء ينحجي أني شفتها لازمه موبايلها وما لحكت أحجي وياها وأجه نافع وأخذ موبايلها وصعدها وصار اللي صار . 

ـ بس هيج 

ـ أي 

ـ يله أنسي 

ـ أني نسيت وما أريد گلشي غير رضاك وقربك مني هذا البعد اني خانكني خنك تدري بنفسك لو لا شكد قسيت عليه . 

ـ أي أزعلي أزعلي علمود أعرف شلون أرضيج 

ـ ما أريد 

ـ تعبان والله سهليها عليه الله يسهل عليج ولادتج 

ـ حضني وبقيت حاضنته وأشم ريحة عطره الطيبه وما كدر يقاوم سحبني أكثر لحضنه وتراضينا بكل حب...

لليل تأخر الوگت وخف الصوت كعدت تعبانه بالگوه رفعت نفسي باوعت على باقر نايم والتعب مأخذ مساحه من ملامحه سوده عليه شگد تعبان تقربت بسته من خده فدوه لوجهك .. 

وگمت أني وگرشي أدعبل حيل ثگلانه دخلت السابع يله هانت وفتحت الباب باوعت الصاله ظلمه بس أصوات خفيفه تجي من صوب غرفة الحجيه مديت رأسي الأخوات كلهن كاعدات يسولفن بس الحجيه نايمه ونور نايمه بصفها ولينا ماكو . 

سميعه ـ ها يمه لبنى بيج شيء 

لبنى ـ لا خاله بس اسأل على لينا 

ـ نايمه بصفي بس ملفلفه رأسها بالملحف 

ـ ماشي عيني خاله رجعت ماطول ماكو أحد أدخل أسبح الصبح كلها تفتر حتى عيب ..أخذت ملابسي دخلت سبحت وأني طالعه لاكتني عمتي حربيه 

حربيه ـ شگد ما تستحين گولي ميت الهم ميت بس فلفل تعلمني بيچن ومتشمات بموتها متشمات حسبي الله عليجن . 

لبنى ـ مشت وخلتني ما جاوبتها هاي شبيها عفيه بشر حتى الموت ما يكسر عينه لما الماتت بنتج وموتتها بشعه لازم يحط عندج وتبطلين سم وحقاره علينا وخوما أحنه موتناها ماتت من سوالفها وقذارتها أستغفر الله ربي . 

ومر أسبوع وخلصت الفاتحه بس هم بعدهم يجون وخالتي سميعه راحت ويه نور وغافر بس صبيحه ضلت ما راحت . 

دخلت الغرفه لكيت باقر يخابر گمل مكالمته خوما تريد تلتحق 

باقر ـ أي 

لبنى ـ لا عليك الله ابقى والله ما شبعت منك شوف 

ضحك وفتحلي حضنه لاتروح مشتاقتلك 

ـ باقي هسه جانت أحجي وياهم أخذت أجازه كم يوم علمودج وهم علمود أخوي حربي المحامي خابرني علمود قضيته وأمي تريد تروح تشوفه أوديها 

ـ ماشي حبيبي زين ما سويت . 

ـ صايره تشتاقيلي هواي شسالفتج كابه هرموناتج عليه 

ـ من زعلك الطولته عليه 

ـ أحنه ما نخلص من هالسالفه مو أعتذرت شسويلج ياعيني علمود ترضين علينا 

ـ تبقى يمي لما أمل منك أصلاً ما أمل أحب هيج أكابل وجهك الحلو وأتمعن بيك وبعدين أكولك روح لدوامك 

ـ شلون بيج وبسوالفج أني 

ـ لمني بصدره وفعلاً هالأيام الزعل بيها روحي طگت عليه وصايره ما أريد أفارگه أبداً أحب عالطول كدامي وضل أسبوع عشناها بكل حب وبعدها التحق ... 

وخلال هالأيام الوضع بالقصر شوي أحسن وفعلاً محد يموت ورا أحد والأيام تمشي والحياة تنعاش بس ما راحت الأ على عمتي حربيه ... كاعدين كلهم وهي جانت موجوده . 

مشعان ـ طول هالأيام صابر وساكتلج ومتحملج وگلت ميخالف بنتها ميته خليها تدك وتلطم بس هسه الأجه الوگت الأكولج بي مع السلامه ووراج عشر حجرات . 

الحجيه عطايات ـ يمه مشعان لاتغلط مهما يكون تضل أم نافع وغلطت حاسبها بس لاتغلط بغلطه جبيره لخاطر ولدك وبناتك . 

مشعان ـ لا يمه هاي هي حربيه أنتهت يمي وخل بيت أهلها يلفوها ويعلمونها شلون تحجي وتخاف ربها ببنات الناس وحوبة اليتامى جنتي ملتهيه بسميعه وبنات قلق تحجين وتطعنيين بشرفهن ما گلتي بنات أخويه ما رحمتي حال وحده منهن لما بينت حوبتهن وخسرتي بنتج بسبب تصرفاتج وقلة تدابيرج وكل هذا ما كفاج هزمتيها بسواد وجهه وطلعتي نافع صفر وهسه أتوسل بي يرجع ما يرجع ما أدري وين ساكن خسرت أبني من وراج أنتِ وبنتج والله شگد يحبني ويحب وليدي ما خلاه ينكس أيده بد*ها ويبتلي أجتي عدله والله يحبه ماتت بحادث بس هاي هي عار بنتج وطمرته والفضيحه سديتها بفلوس بس ميخالف السمعه أهم 

وهاي هي بعد ما تلزميني حربيه أنتِ طالك . 

الحجيه عطايات ـ چا هيج يا يمه على بختك يا مشعان 

مشعان ـ وعبالج تكعدين بيتي وتكابلين بناتج وطممين سالفة طلاگج كدام حبايبيج لا يا يحربيه بابي وبيتي يعثرج وأني ما مجبوره أنحرم من بيتي وبناتي وولدي علمود حضرة جنابج وين ما تولين ولي وحرامات أبقيج كاعده بهل البيت عزيتج وسويتج أدمي جبتج من خيسه أهلج والله سويتج خاتونه عالنساوين وتالي هذا جزاي .

لبنى ـ ما حجت بس منزله رأسها وتبچي كأنما تدري بهذا اللي راح يصير الحجيه تلوم بي وهو يحجي مقهور عاد ناجح تتدخل وگال 

ناجح ـ هذا هو يابه أمي تطلع من البيت بس ما تمشي بيت خوالي وسالفة طلاگها محد يعرف بيها بس أحنه بينا لان العالم وخوالي أذا عرفوا تلومك الك وخوالي ما يسگتون يردون يعرفون السبب 

مشعان ـ ما يهموني لا العالم ولا خوالك شيحجون خل يحجون ووين تولي خل تولي وباجر مولي المحكمه اطلگها رسمي وأخلص 

لبنى ـ راد يمشي وهي مسحت دموعها وباوعتلي وگالت 

حربيه ـ حسبي الله عليجن يبنات قلق . 

لبنى ـ عمي سمعها گبل ضربها على حلگها الا خله دمها يرش من حلگها وناجح وگف راد يمنعه وصاح بي 

مشعان ـ والله يا أبني لو أمك أدمي أوكف بوجهي وأمنعني بس أمك ما دارت نعمتها لان ما تحشم روحها وهسه توديها للبيت على خوالك مهم ما أشوف خلقتها كدامي

وأنه أكعد هنا أشرفلي ولا أكابل وجه أمكم مو جنت أدمي والله ساتر عليه متزوج وعندي ويلاد أثنين بس صارت بعد وخل حربي يطلع الباقي مگدور عليه .. بس هانت كلها ثلاث أشهر ويكظن ويطلع سبعي وسبع أخوته . 

لبنى ـ عمي مشى وطلع من البيت . 

ناجح ـ ليش ما تسكتين هيج أحسن وبهذا العمر طلگج هاي سالفه تحجونها .. حبوبه أحجيلج حجايه ترة والله ما يصير . 

الحجيه عطايات ـ شحجي يحبوبه مو گدامك حجيت وأبوك مصمم على قراره وطلگها چا شسوي بعد 

ناجح ـ وأمي وين تسكن أذا البيت محرم عليها وأنه ما أريدها تطلع من البيت والعالم تضل تعلج بحلمنه وتسأل ليش وليش . 

حربيه ـ بكيفه يحجي أبوك ومن بيتي ما أطلع أبقى يم بناتي ويمك أنت وأخوك وهو خل يبقى بالقصر بس بيتي ما أعوفه . 

الحجيه عطايات ـ لازم عينج تنكسر وتكظبين لسانج شوي شجاج تسودنتي على عمرج مو جنتي شحلاتج شلون مره طيبه لو جنتي تتحايلين علينا حتى تگوشين وتشيخين على مشعان بس أمج مهديه شحجي شترجى منج أترجى الطيب لا والله بس تبقين أم نافع هذا الشافعلج ومخلي ذرة محنه بگلبي الج چــا هاي مو وياج ضرتج من خذاها لليوم ما سمعت الها حس بهل القصر وخلفت كل حيد بس عمت عيني على الحيد النايم بالسجن هضيمه والله هضيمه بس وين يصدك مشعان وياي وتمر هالثلاث أشهر ويطلع حربي وينك يحبوبه . 

ناجح ـ حبوبه هذا هو وسالفة وين تگعد حلها عندي أجر بيت قريب من بيتنا وأنه وضمياء وهي تكعد ويانا . 

الحجيه عطايات ـ أنت شلون تعوف بيت أبوك وأخواتك ما كافي نافع عافلكم البيت وسفى بالشوارع مدري بي وين .. لا يمه أنت تبقى على أخواتك وتضل كاعد بالبيت حتى لـو تزوجت والبيت التأجرله كعد بي حليم وضمياء وأمك وياهم ماكو غير هالحل لما أقنعه يرجعها على ذمته هسه ما أكدر أحاجي كابات سوادينه ؏أمك

حربيه ـ حليتيها يعمه چا أنه مشعان يطلگني بهذا العمر وما فكر بالسمعه ولا فكر بناته ويكعد هنا وبناته منو يضل يمهن لو بس يفكر بروحه . 

الحجيه عطايات ـ چــا شسويلچ مو من أيدج شطالع بيدي وما سويته وأنتي ما داريتي نعمتج وحفظتي بيتج ضليتي تخبطين عامي شامي لا خلفتج درتي بالج عليها لا بيتج ولا كظيتي لسانج على هاليتامى وهذا الما يحشم روحه يجن طايرات يكفخنه على رأسه وأنه لو مكانج دافنتلي وحده بالمگابر وواحد سافي بالشوارع أطم روحي وأسكت حتى نفسي أقمته بس أنتي لايبوي رأسج گوي رأس أميمتچ

والبنات ما الج غرض بيهن أحنه اهلهن ندير بالنه عليهن وأخوانهن موجودين حيري بروحچ وبصخام وجهچ . 

حربيه ـ يله يمه ناجح گوم وديني لبيتي . 

لبنى ـ لبست عبايتها وگامت وراح وياها ناجح ضايج ومقهور ومحد جان راضي على هالقرار بس عمي مصمم وجان القرار النهائي وفعلاً طلكها محكمه رسمي وكعدوها بيت إيجار هي وواحد من ولدها وضمياء وياهم بس قريب منهم وعمي أغلب أوقاته هنا صار حصة عمتي وهبيه والحجيه تحاجيها 

الحجيه عطايات ـ صار الج وبختج تستاهلينه يإم حربي . 

الله يتمم فرحتج ويردلح وليدج سالم . 

لبنى ـ عمتي ساكته ما حجت وعمي يروح البيته لان البنات من ناجح يلتحق يضلن لوحدهن عاد يروحلهن وقسم وقته وبعدين سألت ليش ما البنات يجن هنا أثاري ما يردن والبيت ناجح كاعد بي ودوامه وباجر عگبه يتزوج ويستقر بي وضل عمي على هالحال وجاي يقنع نافع يرجع البيت وأحس طردها من البيت علمود نافع يرجع وهم ما رجع بعد على قراره ما يرجع . 

ومر أشهر حياتنا ماشيه وعلاقتنا أني وباقر رجعت مثل قبل وأحسن وحيل مرتاحه وتمنيت لو من الأول ساكنه هنا وخلصانه بس تريد تصير وخلال هالأشهر لينا بعدها كاعده يمنا وعمتي دزتلي موبايلهاوكتبها وملازمها تقرأ بيهن والعرفته سالفتها ضلت محد كشف الحقيقه لان صفا ماتت وگلشي مات وياها وبعد ما معلوم يمت تفض عالخير وترجع البيت مبين من وفاة صفا سگتوا عنها ولا أحد جايب طاريها وهي كاعده تقرأ وملتهيه ويه أبن عمي منعم والعصريات تروح تسرح وياهد منطينها حصتها الطليان مفطمات تسرح بيهن ومكظيه وگت .. 

وأشوفها توكف ويه الشيخ حبيب والحجيه من ينتظرون الفلاليح وهي لازمه عصتها وتركض ورا طليان لايروحن عالزرع وين جنتي ووين صرتي كون عاد قبل الأمتحانات سالفتج تفض وما تضل نايمه . 

وأني دخلت شهري وأنتظر هالأيام أروح السوك أجهز وأحضر روحي بس عمتي گالت أصبري لما أعرف تالي حربي وين وأخذج خطيه جاي يمشون بسالفته ومن ماتت صفا گالوا بعد ثلاث أشهر يعني بعدله شهر واحد ويطلع بس عمتي مشتعله بنار تحاجي باقر تريده اليوم گبل باجر

باقر ـ يمه والله مو گيفي الا يخلص محكوميته وهنا كظن ضل على عالشهر أصبري ياعيني مو أخذتج شفتي تردين أوديج هم تشوفينه ميخالف تدللي

وهبيه ـ ولك يمه طاگ گلبي لا أكلته أكله لا شربته شربه لا نومته نومه عمت عيني عليه لا يمه لا ما يقبل وصاني وحلفني ما أوصل السجن ما يقبل وما تعرف أخوك دومه ثاكب ما يرضى أروحله

باقر ـ چا أصبري ياعيني هانت كلها شهر وينور القصر . 

وهبيه ـ يوم عيد يا يمه عيد . 

لبنى ـ أنقهرت عليها أبنها خطيه وقبل لاتمشي گالت

ـ العصر حضري رويحتج يمه أخذج أجهزلج ما ضل وگت عليج 

ـ أن شاء الله عمه .بس طلعت گبل حضني ويبوس بيه تروح ويانا نختار الملابس سوا 

ـ تدلل عليه دلال ونختار سوا شتردين بعد 

ـ والأسماء ما قررنا شنو نسمي بناتنا 

ـ أبالي أسماء 

ـ الله شنو هنا لان گلش ما أبالي اني 

ـ لا أبالي والله ( في و ضي أو رفيف و رانيه ) 

ـ يخبلن شگد حلوات الله يتمم عالخير وأنت تسميهن 

ـ أن شاء الله حبيبتي . 

ـ حضني ونمت وأني متحمسه لباجر وفرحانه بناتي هانت يروح امچن كل كم أسبوع وتنورنا بكل فرحة وسلامه .. 

وثاني يوم رحنا أني وياه وعمتي وجهزنا ونختار سوا ويقلد عليه لان حيل بطني جبيره ما يصيحيلي غير البطه عمه كولليله بس يقشمر عليه 

وهبيه ـ باقر عوفها شجلبت بيها مو تدري بيها حساسه 

باقر ـ چا تدرين أبنج متونس على تنعوصها وحساسيتها والله مأخذه عقلي هالبنيه 

وهبيه ـ أسم الله على عقلك يمه والله يبختك بيها ويكومها الك بالف سلامه ويقر عينك ببناتك . 

لبنى ـ شگد أحب دعواتها اليه ورجعنا بعد الفراره والقطة الزينه فرغت محفظته عالاخير واضحك على شكله يصفك بمحفظته نستاهل 

باقر ـ چا أنه شحاجي بويه . 

لبنى ـ وأجتي لينا وفرحانه وياي وتشوف الملابس وكعدنا نرتب وجابلي سرير وملاحقاته ورتبت وحضرت گلشي ورتب غرفتي وغيرت الديكور ونخطط اني وياه وكل شوي لاكي فرصته رغم حملي ثكيل وروحي تعبانه بس أحبه يا ناس . 

ورحت أني وعمتي لدكتوره هو جان ملتحق أسبوع وينزل لازم تشوف وضعي ومن بعد فحوصات كامله گالت 

الدكتوره ـ ماما راح أحددلج عمليه لان وضعج مو مال طبيعي وتؤام وبعدهن معلكات فوك أذا هسه ما نازلات شوگت ينزلن الأفضل عمليه لسلامتج وسلامة بناتج 

لبنى ـ شوگت موعد عمليتي 

ـ مبين عليچ مستعجله ماما تلحگين على السهر والتعب بس حقج مبين عليج تعب الحمل بالأخص تؤام . 

ـ لا والله أسأل علمود التحاق زوجي 

ـ زوجج عسكري 

ـ أي دكتوره ضابط 

ـ الله يحفظه الج حبيبتي وهسه نحددلح بعد أسبوعين موعد عمليتج تأريخ هلگد بالشهر تمام تجيني المستشفى وبأيدج هاي الورقه وأكيد تخابريني قبل اليوم ونبقى على تواصل وأي شيء يصيرلج تبلغيني 

ـ أن شاء الله دكتورة وطلعت من يمها وعمتي فرحانه لان تقريبا حربي يطلع نفس الموعد بعده او قبله حسب 

وهبيه ـ هيج ويطلع وليدي ويشوف بنات أخوه عمت عيني عليه ما حضر عرسه بلكي الله يطلع قبل عمليتج يارب كملها عالخير وكومها بالسلامه هي وبناتها وطلعلي وليدي من السجن وأحفظلي ويلادي باقر وحربي يا كريم . 

لبنى ـ الله كريم عمه .. ورجعنا البيت وأتصلت عليه بشرته هانت حبيبي . 

باقر ـ غير لو يجي باجر وأنزل فركس گلبي عليج يعني أذا أسبوعين أنزل أسبوع والتحق أسبوع ومن أنزل موعد عمليتج مو

ـ أي حبيبي صح 

ـ الله كريم عيني همزين أجتي عدله جنت شايل هم لا ما أحضر عمليتج لان علينا تشديات هالفتره . 

ـ الف الحمدلله ... وأجتي لينا وخابرت نور وخالتي وخطيه هم محضرلاتي كومه ملابس بالاخص خالتي حيل مهتمه بيه ودوم تسألني وتوصيني أدير بالي .

.. طلعت وكاعدين ويا محلاها من كعده والحجيه توصي بلينا تدير بالها على الحولي رابطينه ومحضرينه لحربي من يطلع بالسلامه يذبحونه اله 

الحجيه عطايات ـ ولج مو گتلج أكو شعير بالسطل گتلج أنطي لعمج جاسم يعلف الثور چا مو حضرته الج ليش ما منطيته 

لينا ـ جده والله راح يطگ من السمن وأكل كومه الشعير مو ثور هامه عوزه بس يأكلني ونوب مجلوب بس يگلب بعيونه عليه

ـ لا تگربين صوبه چا مو وصيتج وگتلج لاتروحيله بس جاسم يعلفه ما الج لزوم بي عوفي لا يضربج ويصكطج ومنين النا لينا بعد 

ـ لا يمه جايزه من شبابي تالي ما تالي أموت على أيد الثور مالت الشيخ هو غير لو يطلع ويخلصنا من الثور مالته وگع برگبتي أبتليت بي بلوه والله ما مهتمه بالسادس بكثر مـا مهتمه بالثور مالت الشيخ . 

ـ فلك فلكج كون شعدج سوالف ديله يمه أمشي ويه عمتج وحشي وياها حشيشات خل تطس الج عبايه زينه 

ـ بس لا للثور دخليج جده كافي مو شحم طلع من عيونه من السمن 

ـ هسه دروحي وما الج غرض خل يسمن چا ألمن رابطته واعلف بي كلها أسبوعين وأذبحه لطلعة وليدي من السجن 

ـ أي جده وبطريقج هم أذبحيني لان أنتِ ما سمنتي بس الثور اني هم صرت شكدني شكبرني من العلف 

ـ موزين يجده والسمن حلو للبنيه چا عظامج طالعه ومن جابح نافع كومة عظام هسه مريه شحلاتج توجين وچ يمه فدوه لطول البنيات شحلاتهن 

ـ فدوه الج جده أسم الله عليج يله أنه اروحن ويه عمتي أودعناج 

ـ دربج أخضر يا يمه نيالك ينافع مبخت بيها لو الله يهداك وترد القصر وأزوجنك وأفرحن بيك وأشوفن خلفتك وينك يحبوبه يالكاطع علينا الدرب مامش الك رده وتكحل عيونياتي بشوفت طولك الحلو . 

لبنى ـ راحت والشال يهفهف عليها وحمدت ربي وشكرته عالقبول البينا وخلاهم يحبونها هالحب عبالك بنيتهم بالأخص الشيخ والحجيه حيل يحبونها وهي للسان مأكلتهم بلسانها وكل كعداتها وياهم وصاروا ما يصرخون خالتي لميعه كله على لينا مو قليل صارلها أشهر تعودا عليها وهي بسرعه عاشرتهم بللسان وملگى الطيب . 

صفنت عليها وعلى اللي صارلها وعداوة عمامي الها

وأنحجى عليها وأنطعن بشرفها وهي أشرف من الشرف وصفا لعبت لعب وحملت وأنهزمت وماتت ونسترت وحتى من ماتت فاتحه والكل بجه والدنيا أنخبصت عليها محد عرف عنها وعن سوالفها ولان عدها أهل يعرفون شلون يطممون عارهم أحنه منو النا وبالأخير ما راحت الا على أختي كله نتيجه الثقه الزايده اللي ننطيها سواء قرابه او غريب كله واحد اليطعنك ما يهمه دمه من دمك وهاي ضريبه ونتائج الثقه ندفعها ثمنها غالي

وماتت صفا وأندفن گلشي وياها وبعد محد چاب طاريها كأن شيء لم يُكن .. شحصلت شگد خربطت وضممت بس بالأخير النهايه كانت مأساويه ماكو شيء بالحرام وبالضم يدوم أو نحصل من وراه سعاده مستحيل نهايته دائماً معروفه لو الموت لو التشرد والضياع 

ودائماً سمع طارف حچي بينهم ينتظرون نافع يرجع ويقنعونه يعقد عليها ويسون الهم عرس والعرفته كالوا اهنا بالقصر يسكن بعد ما يروح للولايه ولينا ما تدري بهذا الحجي لان أعرفها حاسبه نافع أخوها وبس بس الأقدار الها رأي ثاني ما ندري الدنيا شنو ضامتلنا يجوز من يعقد عليها يحبها وتحبه .

الحمدلله على كل حال وتفرج أن شاء الله ما تضل هيج لابد يجي يوم ولينا ترجع بيت أبويه لابد .. نزل باقر وكظينا الأسبوع يطلعني نفتر بالسياره بس ما ينزلني لان ثكيله وجسمي كله مفاتن جسمي بارزه شلبس ما يفيد يبقيني بالسياره ونضل نسولف وأتمنى الطريق ما يخلص وياه والعصريات نطلع نفتر بالزرع ونأخذ صور! 

ونباوع على لينا متعاركه هي وعمي جاسم لان جابت الطليان عالغنم ورضعت من أمهاتها خلته شايط من القهر ويصييح عليها والشيخ صاحاها وأنهزمت عليه وخلت عمي جاسم يدردم عليها .. 

باقر ـ باعي زاوية أي تمام علمود الشمس تصير على شمسي 

لبنى ـ باقر خجلتني .. واكفه وأسوي حركات وهو يأخذلي صور وأخر لقطات أني وياه 

ـ من أنزل أسحبهن وأبقيهن بالبوم علمود من يجن بناتج يشوفهن أمهم الدب قطبي 

ـ ضربته على جتفه باقر والله أزعل 

ـ لك أروح فدوه للدب مالتي.. يله خل نمشي. 

ـ رجعنا نتمشى القصر وكالعاده لازم أحضر جنطة راح يلتحق بسرعه خلص الأسبوع ولا حسيت بي لان هو وياي بس من يروح يصير شطوله ولا يخلص . 

ـ شبيج ضايجه ياعيني تعودي مثل كلمره 

ـ ما أتعود أبداً كلمره تلتحق أختنگ وما يصير تأخذ أجازه تبقى يمي وبعد أسبوع العمليه حباب أبقى 

ـ لا ما أكدر وأذا يصير أبقيها من تولدين بالسلامه علمود أكابل بناتي 

ـ ها من هسه وأني بعتني مو ميخالف باقر 

ـ لك فديت اليغار أني فديته 

ـ غمرني بحضنه وخلص هالليل وأني مخنوگه ما نمت بس أتگلب أكو شيء كاتم على نفسي أباوعله نايم ما أريد أكعد وأخرب نومته .. كمت توضيت وصليت بلكي أرتاح يمكن مشيت هواي وتعبت وصعدن فوك ضغطن على أنفاسي على كيفجن عليه يا ماما . 

كعد وشافني أبتسمت كعدت حبيبي 

ـ بيج شيء حبيبي 

ـ لا عمري أرجع كمل نومتك. 

ـ تعالي نامي يمي تعالي 

ـ تقربت نمت بصفه وخله رأسه برگبتي لما غفه وضليت حاضنته من رأسه والعب بشعره وأشم ريحة عطره الى أن غفيت وأندك الباب وفزينا أثنينا . 

وهبيه ـ يمه باقر تأخرت عالدوامك طلعت الشمس 

باقر ـ خرب تأخرت هذا الموبايل ليش ما دك مو نبهته 

لبنى ـ يمكن دگ بس أني طفيته .. گام سبح وأجه يلبس بدلته واني حضرت جنطته ومخنوگه خنك ما أريده يروح باقر أبقى يمي دورلك واسطه شيء ضابط معارف وابقى . 

باقر ـ ما أكدر حبيبي والله مو بيدي جان بقيت 

لبنى ـ أندك الباب عمتي محضرتله الريوك دخلته الغرفه كعد يتريك ويسولف وياي ويوصيني 

باقر ـ ديري بالج على نفسج حبيبتي حاولي هل الأسبوع ترتاحين لاتضلين تفترين وتتعبين والبارحه فرفرتج وتعبتي والليل كله ما نمتي ولاتضلين تقهرين بروحج عليه وأزعل حــيل! أذا أدري بيج زعلانه وضايجه عليه ما عليه شيء كله أسبوع وأني يمج وأسبوع وأشوف بناتي يا بويه شگد متحمس الهن بعرسي ما تحمست الج هيج 

ـ ضحكت ها باقر بين على حقيقتك 

ـ شعور الأبوه حلو لبنى الله يگومج بالسلامه أنتِ وياهن ويفرحني بيكم . 

ـ أمين حبيبي ويحفظك النا .. گام وشال سلاحه وباوعلي ونزلت دمعتي تقرب باسني من شفتي وطول بيها لاتعوفني أبقى رجع كررها 

ـ هاي تروي عطشي لـ أسبوع كامل 

ـ أحبك وراح أشتاقلك 

ـ وأني أموت على أنفاسج شلون أفارك هالشفايف شلون باع نوب منفخات دگول ضاربه فلر . 

ـ حضني بقوه وضليت حاضنته وأشم بعطره حيل مخليه برأسي برگبته وأستنشق وشيء بداخلي ما يريد يبتعد عن حضنه أبداً ولا ثانيه لدرجه گوه سحب نفسه وأيديه متمسكات بي وأباوعله وبس أبجي وعمتي تحجي عليه 

وهبيه ـ لاتفاولين عليه بدموعج شبيج اليوم دمعتج ما نشفت شجاج يا بنتي . 

ـ تريدني أضل يمها وما أكدر ضام أجازتي لبناتها زعلانه تغار من بناتها من هسه شايفه يمه . 

ـ حقها من هسه تفضل بناتها عليها 

ـ تقرب حضن أمه وودعتها وأني واكفه أباوعله سلم على أهله وصل الباب ورجعلي حضني كدامهم ترجعلي بالسلامه 

ـ الله يسلمج عمري أنتِ .. ديري بالج على نفسج والبطنج ما أطول عليكم ولاتضلين تقهرين بروحج لخاطري أذا الي خاطر عندج 

ـ تمام حبيبي .. باسني من كصتي وشال جنطته وراح وصعد سيارته وعيونه تراقبني الى أن أختفت سيارته وراح الله وياه درب السلامه يروحي .

ورجعت حاولت أنام ما أكدر تالي گمت رتبت ملابسه وحضنت ورتبت غرفتي وأجتني لينا وكعدنا نحضر جنطة المستشفى لان وضعي تعبان خاف على أي لحظه يصير عندي ولاده گلشي يصير .. 

مر يومين ولينا تنام يمي بالغرفه واراسله بس من العصر ما راسلته وهو جان عنده شغل وأجيت فتحت موبايلي لگيت من عنده رساله كاتبلي بيها 

باقر ـ أني أكثر بشر بهاي الدنيا يحبچ .. أحبج 

لبنى ـ أبتسمت وأني أقراها وأني بعد أحبك وأكثر من حبك بقاطات حبيبي رسلتها بس ما فاتح أنترنت من زمان ساد الأنترنت! .. 

صبوا العشه وتعشينا أني ما أكلت شيء قليل صايره أتضايق وبس أريد أتمدد ما كعدت هواي وگمت لغرفتي فتحت موبايلي ما فاتح رسالتي أستغربت تالي گلت يجوز ما عنده أنترنت أو وگت عشه ما الح عليه هو من يفتحها يراسلني . 

نمت بس نومتيش بس أتگلب ونفسي مقموت گمت صليت ونفس الشي وعمتي هم كاعده لكيتها ها عمه 

وهبيه ـ شو عيني اليوم ما تأخذ نوم مدري الظهر نمت هواي ضليت بس أتگلب بفراشي حتى عمج أنزعج من كثر ما حصت بفراشي تالي طلعت وعفته وراه دوام أخرب عليه نومته .وأنتِ ليش ما نايمه 

ـ أني هذا حالي يوميه بس صارلي يومين نهائي ولا أكدر أنام 

ـ الله يساعدج بطنج واصله لحلكج حيل تعبتي وبطنج جبيره مدري شلون شايلتهن ما الله هداها وسوتلج عمليتج هالأسبوع جان خلصتي بس بعد هذا شغلهن 

ـ الله كريم هانت عمه وبقيت كاعده يمها وتالي رجعت الغرفتي من عمي كعد وراحت تسويله ريوك... دخلت تمددت وكعدت الغرفه فارغه لينا ماكو وأني مصخنه حيل عبالك كاعده بتنور جسمي يلهب لهب من الحراره 

گمت طلعت والحجيه كاعده وعمتي مخليه خضروات تسوي الغده ولينا مخليه صينية تتريك هي وحمودي صباح الخير . 

الحجيه عطايات ـ هلا يمه تعالي كعدي تريگي . 

لبنى ـ لا حجيه شو مالي نفس .. كعدت ويحجن وعيني عالموبايل لحدهسه ما فاتح رسالتي خفت وأتصلت عليه مغلق! .. باوعت على عمتي عمه هم متصله على باقر

وهبيه ـ لا والله يمه عمج گتله گال البارحه العصر محاجي ليش يمه 

لبنى ـ لا هيج عمه ملامحها تغيرت وأتصل موبايل عمي منعم حمودي أخذه ويصيحح على أبوه 

لينا ـ ولك جيبه خل نشوف منو اليتصل شگد ملگوف هالولد مدري عليمن طالع عمه عود ما أوصيج زعلي 

صالحه ـ لا فلك فلكج هو جاهل على شنو أزعل ولك حمودي دتوكف يا يمه شبلاك أنثبرت أركد بكاعك جيبه منو يخابر . 

لبنى ـ دخل عمي منعم وأخذ من عنده الموبايل وفتح الخط وگف يحجي بس ساكت ورجعت أتصلت على باقر بعده مغلق! وفزيت على صوت عمي منعم . 

منعم ـ يا يابه يا بويه يا باقــــر عمت عين عمك يا عمي . 

لبنى ـ فز گلبي وكع موبايلي وكلنا أنخبصنا بالصوت كامن قبلي وأني توهنت بگرشي أريد أكوم ما بيه تالي عطت بلينا ولج عينيني رجليه ما يشيلني توها ركضت تريد تكومني وعمتي وهبيه عاطت . 

وهبيه ـ يمــــــــا وليدي يمــــــــا باقـــــر يمــــــــا طين علــــىٰ رأسچ يوهبيه . 

لبنى ـ شبيهم لينا شبيهم باقـــــر شبي أحجي شبيهم .. وصلت الهم ويدگن ويلطمن عمه عمه 

وهبيه ـ طين علــــىٰ رأسچ يعمه رجلج أستشهد يلبنى

لبنى ـ بهاي للحظه حسيت عقلي تبنچ تماماً ورافض الموت بإي شكل من الأشكال رافضه هالخبر نفضت رأسي بقوه لااااااااا عمه لااااااا باقـــــر ما يسويها ما يعوفني لا عمه دخيلج لاتگولينها ضليت بس أعيط وأملخ بروحي باقـــــر حبيبي مو أنتظرك أني أنتظرك وبناتك بعد الهن أسبوع ليش يربي ليش أخذته وحرمتني منه ليش يتمتني مره ثانيه مو أني يتيمه أب وأم هذا عزوتي سندي أهلي دنيتي كلهم أبويه وأمي هو ... هـــذا حبيبي باقـــــر ولك باقـــــر 

وهبيه ـ دار وجهه عن الدنيا وليدي يمــــــــا باقـــــر يمــــا سودة بوجه أمك يمــــــــا كون أنه أنه أنه . 

لبنىـ لااااااا لاااااا أنفض برأسيى باقـــــر مـــا يمـــــوت ويعوفني... أعيط وأصرخ بأسمه وأملخ بنفسي هي ساعات وأبشع ساعات عمري نفضوا گلبي من صدري بضربات فشگهم ورشاشتهم وجابوا جابوا الشهيد . 

طلعن قبلي واني أحبي أكوم وأوكع أريد أوصل قبلهن أريد أحضنه أريده يحضني بطوله مو بالتابوت مو هيج أتفقنا حبيبي والله مو هيج . 

كون ميته يحبيبي كون ميته ولا أشوف تابوتك صوت الطلقات ما هز روحي والدنيا كلها ظلمت بعيني وأني أشوف أخوانه شايلين تابوته ولافينه بالعلم العراقي . 

نزلوا وأدفع بيهم هذا مو باقـــــر هذا مو باقـــــر والله مــــا يمـــــــوت هو مـــا يعــــــــوفني . 

من شفتهم نزلوا التابوت ما حسيت بروحي ركضت وضميت روحي فوگ الخشبة الباردة وخرت العلم أريد أتاكد هذا مو باقـــــر عليكم الله گولوا مو هــو لاتلوعوني عليه أني شلون أعيش وراه شلون . 

تگابلنا أني وعمتي على التابوت مخبوصات أم الشهيد وزوجة الشهيد ما مصدگين هو بالتابوت ..صرخت بصوت يكعد الميتين بس حبيبي ما كعد نايم حبيبي نايم أباوع مبستم فاتح عيونه عالنص تقرب نافع سد عيونه وباسه من عيونه وهو يشهك ويبوس بي دفعته وخر ليش سديت عيونه وخر وعمتي رفعته بكل حيله وضمته لصدرها وتبوس بي مخليته بحضنها

وهبيه ـ زرفت گلبي يمـــا .. زرفت گلبي.. يمه ريحتك شگد يمه شگد طيبه يمــــــــا أحب وأشتم يمه مسك يمه فدوة لرأسك يمه خلو بحضني خلوني أشبع منه هذا وليدي وليدي هذا ربيته كل شبر بنذر . 

لبنى ـ تشم بربحته وأني لازمه أيديه وأبوس بيهم وحلقته بعدها بإصابعها وأجه عمي مشعان أخذه منها وحضنه ويعاتبه 

مشعان ـ يا يابه يا بويه هديت حيلي كسرتلي ظهري أنه أعيش وأنت تموت يابه . 

لبنى ـ أباوعلهم أريدهم يعوفوا وأشبع منه عمه أريد أشوفه الله عليج عمه وعمتي وعمي مشعان والحجيه حاضنينه وأني زحفت عليه ونمت على صدره وبي دم مضروب بصدره طلقات! كون بصدري مو بصدرك يروحي . 

مو هيج أتفقنا تعوفني وتدير وجهك ​وأني اليتيمة المكسورة ما عندي أهل أختل بحضنهم أصرخ بإسمه وأبوس بأيديه ونايمه على صدره

أعاتبه ونار مشتعله بصدري وبگلبي ليش باقر ليش تعوفني وحدي بهاي الدنيا إنت تدري بيه يتيمة مالي لا أب يمد إيده يحميني، ولا أم أشكيلها إنت جانت الدنيا كلها بعينك إنت أهلي، وناسي، وعزوتي، وشوفتي شلون يهون عليك تروح وتعوفني بنص الدرب باچر من يجن بناتك ويكولن وين أبونا شگول الهن أكول الهن عافنا وراح ودار وجههه

​عصرت جفوف أيديه وضميت روحي لصدره لأخر مره

" أودعك... أودع عيونك وضحكتك وكل لحظة حلوة عشناها سامحني لأني ما كدرت أقنعك تبقى يمي تروح وتروح روحي وياك. إنت بالجنة إن شاء الله، وأني وبناتك ناكل سهم الصبر. في أمان الله يا يروحي يا أبوي وزوجي وكل دنيتي الله وياك يا أغلى من عيوني

وأني متت من بعدك .. 

_________________

لينا ـ ما تخيلت أعيش شعور الفقد وعشته بوفاة باقر 

وأني أشوف أختي مفرفحه مثل المذبوحه أهلي من ماتوا ما عملت هالعمل أحاول وياها كطعت نفسها بالگوه أخذوا وشالوا وتريد تأكلهم أكل الا عمي مشعان حضنها ويسگتها تضرب على صدره 

لبنى ـ عميي عميي گول الهم خل يرجعونه خل يرجعونه اليه ولبناته عميي عمييي باقـــــر مات وعافني مات 

لينا ـ ضلت تصرخ بحضنه تالي عافها على خالتي لميعه ركضت حضنتها أسكت بيها ودفعتني وطلعت تركض وراه وأحاول أمنعها ما أكدرلها شايلينه والتابوت ملفلف بالعالم العراقي وتشييع مهيب وكومه سيارات عسكريه وزلم وضباط وقاده وشيوخ معلگه عينك وما مدت الله يرحمك باقر .. الله وياك مكانك الجنه أن شاء الله 

بالگوه اني وعمتي وهبيه دخلناها وهناك وجان توكع من طولها وأنخبصنا بيها انه من شفتها وكعت كلت ماتت صرخت لبنى ماتت ماتت .. 

بالمستشفى ومخليتها وكاعده وأباوع عالمغذي وأبجي عليها وخالتي لميعه كاعده بالكاع وتبچي .. حضنت أيدها وأبجي على حظي وحظها لو عندج حظ جان حويتي أحنه فگر فگر . 

للعصر هي ما صحت كالوا وضعها تعبان تحتاج راحه خلوها نايمه .. لليل گالوا يطلعونها بالبيت نهتم بيها 

أجانا ناجح وأخذنا وهي طول الطريق صافنه ودمعتها ما نشفت ووصلنا القصر الجوادر منصبه والسيارات ما تنعد .. دخلنا القصر وسندتها بالگوه تمشي ودخلنا وكومة نساوين وجايبات ملايه يا يمه يا باقـــــر ومحد بحالها كلمن مصيبته مصيبه عمتي وهبيه ميته شبه عايشه مفرعه وجهه والدم يصب والحجيه كذلك لو أخواته كطعن نفسهن وعماته كلهن نفسهن شيء 

كل وحده تگول للثانيه ميتلي ميت . 

دخلتها الغرفه وبس صافنه نومتها بس فاتحه عيونها بقيت مگابلتها وخلص اليوم وأحاول وياها ماي ما تشرب صحت بيها تردين تموتين تردين تموتين وتعوفيني أني منو الي غيرج وبناتج شنو ذنبهن 

نور ـ على كيفج وياها مو بالصياح قابل هي كيفها شو أنطيني أني أحاول وياها. لبنى عيني هذن أمانة باقر يصير ما تديرين بالج على امانته 

لينا ـ حاولت وحاولت ماكو نتيجه وثاني يوم الظهر هي بس الدموع تصب لا أكل ولا شرب ولا نوم ونور راحت گالتلهن وأجتي عمتي وهبيه بنص روح وحضنتها وگامت تبجي وياها ولبنى تصرخ بحضنها

لبنى ـ عمه باقـــــر مات وعافني أخذيني يمج لاتعوفيني 

وهبيه ـ وين أخذج وتضليين تبجين وأنتِ حامل لايصيرلج شيء شنو ذنبهن بنيناتج چا نسيتي هذن من ريحته من ريحة الغالي .. لخاطره أبقي بغرفتج وديري بالج على البطنج يمه والله مصيبتي مصيبه بس گاللي جنتج راح تموت وأنتِ أمانته يا رويحتي يا يمه يا عزيزة گلب باقر يمه عمت عيني طم التراب عيونك الحلوات عمت عيون أمك . 

ضلت يمها وقنعتها بالگوه شربت ماي وكم لكمه وگامت عالنسوان وضلينا أني ونور مكابلتها وخالتي سميعه كل شوي تجينا تشوفها وضلينا على هالحال أسبوع وخلصت الفاتحه ولبنى تعبت حيل . 

لبنى ـ خاله بناتي ما أحس بحركتهن من البارحه ما الهن حركه والوجع ذبحني

سميعه ـ أبقي لاتتحرگين لما أشوف عمتج وأجيج 

لينا ـ بقينا خايفين عليها وهي تلوب أحس عدها وجع ها لبنى عيني يوجعج شيء 

لبنى ـ ركضي عليهن راح أموت راح يطلعن من خشمي 

لينا ـ دفعت الباب وطلعت عليهن لحگن على لبنى يمكن گامت تتولد .. ركضن كدامي والحجيه فحصتها 

الحجيه عطايات ـ وهبيه بالعجل أخذي جنتج المستشفى البنيه ولاده ذابه ماي الرأس لحكن البنيات لايموتن كتلج جنتج جنتج دكيتي ولطمتي حقج يا يمه بس جنتج شنو ذنبها عفتنها وحيدها بهل الغرفه والوياها هم جهال 

.. والله اذا بنيات ماتن ما تلومن الت نفسجن هي طفيله جاهله وشايطه على رجلها چا أنتن شبلاجن . 

لينا ـ أباوعلها تلوب وأبجي عليها ولبسنها عالسريع ونور شالت جنطتها خل أروح وياها فدوه عمتي حربيه عاطت بيه ودفعتني 

حربيه ـ وين موليه شو أمشي رجعي 

لينا ـ صعدوها بالسياره وناجح اليسوق وعمتي وهبيه وخالتي سميعه وحربيه ونور راحن وياها وأنعصر گلبي من مشت فدوانتك ربي رجعها اليه سلامات كومها بالسلامه هي وبناتها . 

بقيت كاعده بغرفتها وبالي عدها والحجيه رجعت كعدت يم النسوان رغم صار أسبوع بس بعد الفاتحه ما خلصانه ولا الجوادر شالوها بعد الناس تجي عليهم . 

لفت أنتباهي باب الكنتور مفتوح وشفت جنطته

گمت عليها وأيدي ترجف وفتحتها نعصر گلبي وبجيت ملابسه وموبايله ومحفظته وجداحته وباكيت الجكاير وساعته وفتحت المحفظه مالته مخلي بيها صورة لبنى غمضت عيوني يالله كتمت صرختي ورجعتهن لمكانهن 

الله يرحمك برحمته الواسعه مكانك الجنه أن شاء الله .

أختنكت وطلعت سألت عليها زهور هم خابرتي عليهم 

زهور ـ أي هسه جنت أحجي ويه نور داخله صالة العمليات صارلها نص ساعه .. الله يكومها بالسلامه

لينا ـ يارب عينك على أختي وبناتها يارب الطف بحالها ضليت أدعي وأكرر الدعاء الا أن نور خابرتنا وزهور تحجي وياها ها بشري . 

زهور ـ الف الحمدلله الله يبشرج بالخير وضعها شلونه هسه اوووف يمه سوده عليه الله يكون بعونها چا أخوي هين عمت عيني عليه ما شاف بناته ما لحك عليهن . 

لينا ـ ها طمني گلبي 

زهور ـ الحمدلله طلعت من العمليه والبنات مدخليهن الخدج بس لبنى تعبانه بس تبجي وتعيط على باقر سوده عليه يا خويه .. أنه أروح أكول لحبوبه . 

لينا ـ سوده بوجهي عليج يخيتي الله يكون بعونج شيصير لو مأخذيني وياج يله مهم تكومين بالسلامه 

ضليت صافنه بالوجوه أول مره أحس بالغربه أختي ورجلها جانوا سادين عليه وحشتي وأباوع البيت كله يبجي عليك باقر زلم ونسوان ويجي الليل تهدأ الأصوات وأني أمشي لغرفة أختي والنوم ما يجيني أختنك واضل بس أبجي .. 

مر ١٢ يوم على وفاته ولبنى العرفته منهن ثالث يوم مطلعينها هي والبنات للبيت أبويه وخالتي نور بعد ما رجعن ضلن يمها وردت أروح بس المن أكول ملتهين حتى زحمه الله يكون بعونهم وبمصابهم ..

عمتي وهبيه مالها سگته المسكينه ما مصدگه والحجيه دومها تنعي وصوتها يفطر الگلب وعمي مشعان صاير جلد على عظم شفته ما عرفته مكسور كسرة موت منتهي عبالك واحد مريض من كثرما متأذي والشيخ حبيب هذا سالفته سالفه واكع بالفراش بالگوه يعينه حيله ونافع متكفل بي ما يعوفه أبداً والباقيين وجوهم تحجي أخواته وأخوانه وعماته والكل متأثر عليه حتى حياطيين القصر تبجي عليك يباقر .

طلعت من غرفتي وباوعتلهم كاعدين والحجيه أيدها على رأس عمي مشعان نايم على رجليها ونافع كاعد أيده على خده وصافن بالفراغ ودخلت زهور من برا وگالت 

زهور ـ حربي أجه حبوبه حربي طلع من السجن وأجه يحبوبه . 

لينا ـ نهض عمي مشعان من حضن جديتي ونافع گام على حيله وسند حيل جديتي على عگازتها وطلعت عمتي وهبيه على صوت زهور

ودخل رجال طويل ولابس أسود ولحيته عاليه وعيونه مليانات دموع وشفايفه تترجف وباوع عالكل بنظره وحده 

وهبيه ـ اجيت يمــا أجيت يبعد أمك چا أخوك يمشي ويطمه التراب وأنتِ تجيني والبيت فارغ أعذرني يمه أخوك راح وهو الجان متحضر ومنتظر جيتك بس الموت أخذه گبل لايصيرن بناته وگبل لا تطلع أنت ما لحك يفرح بيك وبناته ما لحك أجاه الموت وأخذه من حضني أخوك أستشهد يمه أستشهد . 

حربي ـ يا بـــــويه يا خــــويه يا باقـــــر . 

لينا ـ عيوني گمت ما أشوف بيهن من الدموع حضنته أمه وأبوه ويبجون وياه وكع بالكاع ويشهك بحضنهم صوته عالي شهگته صدى صوتها يتردد بمسامعي والحجيه تبجي وتضرب على رجليها ونافع لازمها ويمسح بدموعه . 

تقرب نافع عليه رفعه من الكاع وحضنه ويبجي وياه 

حربي ـ كسرلي ظهري نافع هذا أخوي أخوي نصي الثاني ياريتني ضال العمر كله بالسجن بس هو يعيش 

لينا ـ بچوا واحد بحضن الثاني وأخذه وراحوا للمضيف عالشيخ وأسمع صوته يهوس لأخوه 

حربي ـ زغيرون يا خويه وصاحولك المرحوك كشخ بيك الكبر وگلبي ملجوم وشلون أرتاح وگلبي مصوب ومضيع ناس أعزاز ولك خويه باقر . 

لينا ـ كسرته تموت الروح وضل بالمضيف يم جده وكلهم عنده وكلها من سمعت بي طالع من السجن أجو عليه والمضيف أنترس زلم وناجح يودي الهم الچاي واني كاعده بصف عمتي وهبيه منتظره أبنها يجي ولكيت نفسي باقيه كاعده . 

وهبيه ـ عمت عيني عليكم يمه تفرگتوا جنتوا مثل التؤم عمت عيني عليك يمه باقر يطمك التراب وأنه عايشه يا يمه من كون لا الي عمر من بعد عمرك . 

لينا ـ تنعي وتبجي وفجأه سمعت صوت رجولي قوي والشباك مفتوح گبالنا ونباوعلهم يضربون على صدرهم وهو يهوس الهم 

حربي ـ بحر وتفوج بي الحيتان يا أصل الحمادة

يالحاجز العدوان وسفه تنام عينك وأنت مركز الإخوان!

​عقب شخصك حزينة الدار حگّي من أعزيها والله حگّي من أعزيها وحگّي من عيني تبچيله كلف كلش صواب البين وغميچ وحيل ما بيها

​وفي وضحين الجان وشال 

يطوفان البحر يالما يكضّك سد يا عرج الأصيلة من أبو والسابع جد فزعة تصير للينخاك فزعه تصيير للينخاك 

وطومر بيه الحد من الغيم وطومر بيه الحد وطومر بيه الحد 

لينا ـ يضرب على صدره بقوه بجف أيده العريض وأخوانه مگابيلنا هما وعمي مشعان ومنعم وجاسم والشيخ 

حربي ـ يا روح أبجي وحيل ما بيها

هذا أخوي وحزام ظهري وفرگته كسرلي ضهري بيها

.. يا روح أبجي وحيل ما بيها

هذا أخوي ودرع روحي وعيوني ما تمل بجيها 

.. يا روح أبجي وحيل ما بيها 

هذا باقر أخوي تيجاتي وفارع الروح وبموتك طاحت روحي بيها . 

لينا ـ بجيت وياهم وأنهضمت حيل ودخلت لان أكو زلم جاي تجي واحنه مبينين من الصاله وناجح سد الباب وضلوا بالمضيف .. لليل ما بينوا ضلوا كاعدين والحجيه عينها عالباب . 

صبوا العشه ومحد أكل رد الزاد مثل ماهو ونسوان من عربهم كامت تجيهم تتحمد الهم بالسلامه وكومه نسوان! والأستغربته حتى شابات ومتزوجات دخلن وفرحانات بطلعة الشيخ من السجن !!والقصر أنترس رغم الدنيا لليل بس ما ذلك كلها أجتي عليه شمسوي الهم وهيج يحبونك! 

ـ الف مبارك طلعة الشيخ من السجن والله لما مصابكم بإستشهاد باقر الا نهلهل بس الله يرحمه برحمته الواسعه ويصبركم على فراگه ويحفظلكم الشيخ حربي

لينا ـ كلهن كعدن بالصاله والبنات قدمن الهن الچاي وشوي ودخل وكلهن گامن يهلن ويرحبن بي وهو مخلي أيده على صدره وعلى رأسه وگامت وحده منهن تبين حيل حلوه بس مستره وگالت . 

ـ الف الحمدلله على سلامتك شيخ حربي نورت ديارنا ونورت عربنا يا شيخنا وأن شاءلله خاتمة الأحزان الله يصبرك على مصاب أخوك . 

حربي ـ ممنون رحمه الله والديجن على رأسي جيتجن الف هلا بيجن بويه الف هلا بيجن أستريحن بويه أستريحن . 

لينا ـ مشىٰ ولحكته أمه ودخلوا الغرفه وشوي وطلع راح المضيف وبعد ما رجع والنسوان ما طولن بس على گد ما أجه سلم عليهن وتحمدله بالسلامه گامن!. 

لميعه ـ شفتي يمه 

الححيه عطايات ـ أي يمه شفت يستاهل ماهو صاحب فضل على كل نسوان العرب! وخل تبرد نار گلبه وأحاجي! . 

لينا ـ ما فهمت عن شُــنو يحجن لان كلامهن الغاز لليل كلش خفت الهوسه وهو ما بين وكلمن مشت الغرفتها بس أني بقيت كاعده يم الحجيه كاعده تتنظره 

الحجيه عطايات ـ گومي لفراشج شعدج كاعده لحدهسه گومي حبوبه 

لينا ـ لا حبوبه ما يجيني النوم 

ـ گومي لفراشج يله 

ـ خشنت صوتها عليّ ودخل نافع وأني گمت ونام على رجلينها . 

نافع ـ لينا غطا من يمج 

لينا ـ جبتله غطا من غرفة لبنى وغطيته 

نافع ـ يله روحي نامي . 

لينا ـ هذولي شبيهم بس يطردون بيه تالي عفتهم ورحت الغرفه لبنى نمت وأبالي هواي أفكار وتذكرت لبنى سوده عليه هسه شلون حالج الله يصبرج . 

الفصل الثلاثون من هنا