رواية خيط وابرة الفصل الثلاثون 30 بقلم شمس العراقية

لينا ـ الأيام تمر بس الحزن بعده ما يتغير ولا يندفن وريحة الحزن لحدهسة تفوح من زوايا القصر وميتنا عزيز حيل عزيز والسواد مخيم ومقتم ملامحهم و​الديوان ما يفرغ زلم تجي وزلم تروح

وأخوانه يستقبلبون المعزين ليل ونهار وگعداتهم ووكفتهم كلها تحچي بوجع فگد الأخو 

​وعمي مشعان ظهره مكسور والوجه يتگطر بالحزن ويگابل الزلم ويستقبلهم بعين تلملم دموعها بالغصب ويكتم حرگته بس عيونه تفضحه شگد كسرة الولد تذبح الروح وتكسر الظهر . 

وعمتي وهبيه كاعده بزاويه من زوايا القصر وتنعي بصوتها اليفطر الگلب وتعاتب أبنها وتبچي عليه 

وهبيه ـ يمه يا باقــــر يا ضوا عيوني يا أبو العيون الگحيلة يا ذخر گلبي يا وليدي ويا بزر الگعدة يا شهيدي

ولك يمه هضيمتك هضيمة چا هانت عليك أمك 

تمشي وتدير وجهك عنا

والدار وحشه عگب عينك من عمت عيني . 

يا رصاصة سودة حارة ليش طخيتي گلبه مامش

بگلبه غير الطيب ليش صوبتيه ليش ولوعتيني وخليتي جمرة بإفادي 

.. يمه شگالك رويحتك الطاهره من صعدت لربها ما مر عليك طاري طيف أُمك الخلصت عمرها بالهضم ما التفت وراك يمه وتذكرت أبوك أهلك وأخوتك وبيتك الأظلم من دونك يمه باقر

زين ما خطر على بالك مرتك المكتولة عليك وذيچ المهضومه وساكتة اللي شايلة ببطنها بنياتك ومابقى لولادتها غير أسبوع يمه، صابها الرعب والعوزت حنانك وتنطرك ساعة بـ ساعة ترجعلها وتسمي بنياتك هديت حيلها يمه 

يا يمه يا يوليدي حاجييني فهمني شنو جان آخر شي يفتر براسك لحظة التصوبت من غمضت هالعيون الوساع ويا وجه من وجوهنا مر بخاطرك وبيا حظن تمنيت تموت وتتوسد چا أنت تموت وأنه أعيش ليش يوليدي ما مرچيه منك كسرتنا بمشيتك 

يمه هديت حيلي يالولد وخليتني بلا عازة وبلا سند عمت عين أمك على شبابك على ضحكتك الراحت وطمها التراب هنيالك على هاي الشهادة الرافع رأسي بيها بس حرگت گلبي ونار صدري شيطفيها ولك يمه يا باقـــــر . 

​لينا ـ مسحت دموعي والعبره تارسه صدري وضل هذا الحال لـ أربعين وعبالك اليوم جابوا واليوم فاتحته وحزنهم يزود مـا ينقص وأخو الشيخ مـا نشوفه كل وگته بالمضيف نادراً يجي للبيت بس على گد ما يغير ملابسه ويرجع ولاحظت عمتي وهبيه حيل تهابه وحتى تخاف منه حتى هذا نافع اليخوف حيل يحترمه ومن يدخل نافع يگوم بوجهه .. 

وأني طول هالأيام كل وگتي بغرفة خالتي لميعه لان غرفة لبنى قفلنها وما خلني أبقى بيها وما قبلن شيء يطلع من غرفته شگد نسوان كالن للحجيه وعمتي وهبيه انطوا ملابسه ما قبلن كالن أحنه نحتفظ بذكريايته ولبنى هم مخابره ومأكده على عمتي الغرفه تنقفل وكلشي يبقى على حطته وأحترمن رغبتها . 

وضليت بهل القصر محد مفكر بيه وبسالفتي ملتهين بمصبيتهم وحتى لبنى لا مخابرتها ولا محاجيتها موبايلها دومه مغلق .. وحتى بناتها مـا شفتهن عمتي وهبيه والحجيه كل وگت يرحن عليها لبيت أبويه يشوفنها بالجذب محد گالي أمشي نوديج تشوفين خيتج محد بحالي كلمن ملتهي بحاله . 

كاعده بين الزرع والعصا بأيدي وسارحه بالطليان ويگمزن كدامي صافنه عليهن وصار وگتي الحلو من يصير العصر أشيل كتابي والكي عمي جاسم مطلعهن وأخذهم وأطلع أسرح بيهن .. 

شفتهن راحن صوب الخضره شلت العصا وطلعت اركض وراهن وجبتهن وأني أطف بيهن سريع خفت يرحن على الخضره وأحصلي رزاله من عمتي وهبيه أدون سبب تعيط بيه ومقدره حالها وهنا يتعبن بالزرع . 

رجعت طفيتهن وعدلت شالي كل شوي طاير من الهوا وجانوا واكفين بس بعد مسافه عني عمي مشعان جدي حبيب والشيخ حربي ويأشرون على الزرع والكاع وتقربت عليهم سياره نزلوا منها زلم أفنديه يمكن من الدوله علمود الزرع ..خليت ومشيت بعد مسافه وكعدت بمكاني ..جريت دبة الماي ملفلوفه بقماش شربت منها مايها بارد 

بقيت كاعده وأجه نافع من بعيد يتمشى وتقرب صوبي وأنطاني جيس فتحته حلويات كومه أبتسمت بوجهه شكراً 

نافع ـ ولچ شلونج شلونها السراحه شو صايره سوده 

من الشمس صاطمتج صمط 

لينا ـ زينه .. شسوي حسبي الله على خالك هو وصلني لهذا الحال 

ـ أذا تتعبين عوفيها أكو راعي وعمي جاسم موجود

ـ لا عادي تعودت وأحسن ما أضل كاعده وضوجه بالقصر على أقل أطلع والجو يساعد على القرايه 

ـ هم صدك ..شلونها دراستج جاي تقرين 

ـ أي على اليوتيوب والملازم الجبتهن اليه 

ـ الله كريم 

ـ أجه كعد بصفي ضليت ساكته وأكلب بالحلويات وأباوع عليهم من بعيد هو أخذه الواهس يلعب بالعود يشخبط بالكاع يرسم احرف انكليزيه ولاحظت من شخابيطه رسم حرف النون! كتبه بطريقه حلوه خطك حلو بس يا نون منهن نورس لـو نور؟ 

ـ شتگولين أنتِ ياهي منهن 

ـ نور 

ـ چا سگتي 

ـ نافع اسألك سؤال عليك بداعت كلمن عزيز بگلبك بروح باقر جاوبني عليه 

ـ شُـــنو هالسؤال يحتاج هالكثر حلفان. سألي يابه سألي ولو أدري هذا فضول مو سؤال 

ـ نور 

ـ شبيها 

ـ بعدك تحبها؟ لــو نسيتها 

ـ تردين الصدك لو أجذب عليج 

ـ لا طبعاً الصدك چا ليش سألتك 

ـ لا والله وأجذب عليچ أذا گتلج نسيتها ما ناسيها بس زحمه بعد صارت حلال أخوي وتعمى عيني أذا أخليها بعينها لـو أفكر بيها بس گلبي مو راضي ينساها مستعزز بيها وأنه حبي الها جان مو حب حبيب لحبيته وبس .. لا حب أبو لأبنيته والأبو ما ينسي بنيته وشريان گلبه . 

ـ وتضل ما تنساها 

ـ ما ضامنلچ گلبي وما لكيت وحده كفو تستاهله أخليها بمكانها 

ـ ونورس 

ـ وحده بياعه ما بيها ذرة أمان مو مال حب مخربطه ما تعرف نفسها شتريد

ـ ما ناوي تحب وتنسى.. أنت تستاهل كل الخير والله 

ـ لا ما ناوي ولا أريد أحب وأنحب وأريد أبقى عايش عزابي وبعيد عن هالسوالف وجربت حظي مره وطلعت خسران ومنعول گلبي شلي بالحب وشلعان الگلب اليجي من وراه عگبها وعگب حبها الطفولي ما أظن أحب بعد 

ـ يعني بسبب حب نور ما تريد تحب بعد 

ـ لا هي شعليها والله يسعدها بحياتها بس أنه هذا نصيبي أخذته وكافي بعد عليه چا طلابه . 

ـ بس أحسها هي هم تكابر مثلك 

ـ هي تربيتي ما ترضى بالغلط والعوجه ومع الوگت تنسى وأذا هسه نستني بعد أحسن تسوي فضل عليه وعلى نفسها وباجر عكبها يصيرلها جهال وتلتهي بيهم وحب غافر وحنيته يعادلون نافع بعشر قاطات لان يستاهلها أكثر مني والله يسعدهم . 

ـ سگتت الله يسعدك ويعوضك

ـ ما أريد الله يعوضني بس يبقيني على حالي هيج راضي الف الحمدلله نعمه . 

ـ سگتت وصار هدوء ورجع حجه وكسر الصمت 

ـ لينا 

ـ ها عيني 

ـ ديري بالج تخلين عينج عليه أنه مو مال حب بعد وعادج أختي أطلع عيونج أذا حبيتني أكرهج والله أصلاً تلعب نفسي منج من يجيبون طاريج بسالفة الزواج . 

ـ لا يمه شتحجي أنت... والله شايفتك أخوي الجبير 

ـ أي زين 

ـ رجع يشخبط وحفر الكاع وضحك وگال 

ـ أكولج اذا يصيرلي ولده شنو الاسم الي يلوك لاسمي

نافع لازم أسم يوالم أسمي 

ـ هيثم اني أحب هالاسم 

ـ حلو والله انتِ سميتي 

ـ هو وينه شوكت يصيرلك مو شيبت باوع رأسك بي كم شعره شيب . 

ـ كل واحد وقسمته ابوج مو الشيب ترس رأسه يله أجاه ميثم . 

ـ هم صدك 

ـ أي هسه مدرستج شلون 

ـ خليتها عليك انت كدها أريدها منك

ـ الشيخ هسه مشغول بسالفه خل يفرغلي ونكعد ونحجي بسالفتج ونرجعج بيت أبوج 

ـ بس اني بحمايتك 

ـ أثنينا أخوان بس هو يحكمها بعقل مو مشاكل مثلي

أني خالي أذا يكوم يحجي عليچ ما أضمنلج هالمره أسوي شيء ما يعجب أحد . 

ـ بعد ضلت يمك 

ـ الله كريم .. يله أني أروح ديري بالج على نفسج وعالطليان لايروحن عالخضره وتحصلين رزاله 

ـ تمام الله وياك .. راح وگمت جبتهن وبقيت واكفه ومرتجيه عالعصا وأباوع عليهن وتقرب الطلي أخذ ملزمتي يعلس بيها ركضت وراه خفت حلگك رجعها ولك من أنعل والديك جيبها ولك منين أجيب ملزمه يربي خلف الله على نافع جابها اليه ولك جيبها ضربته وجريتها منه وأنشگت وكعدت بالكاع مقهوره وأعدل بإوراقها شبعت قهر هسه شلون وهذن بعدني مـا قاريتهن .

أكلب بالأوراق وفجأه أسمع صوت رجولي من بعيد 

فزيت من مكاني وخرب حظچ يا لينا گلبي طبگ من الخوف

حربي ـ يول هيووو الطليان راحت غاد 

لينا ـ هيوو شنو هاي أنوب! شلت العصا بيدي وطفيت الطليان ركض من الخوف وهو أجه من بعيد يمشي 

متشمغ بالشماغ ملفوف لف والطرف مدلدل على كتفه ولابس دشداشة نيلية نضيفة ومكوية 

وعلى صدره حزام جوزي جلد ملتف من تحت أباطه لظهره برز عرض صدره وهيبة مشيته تسبقه

طويل وضخم بگد عمي مشعان بطوله بس هذا بيه وقار وهيبة شيوخ من صدگ من تشوفه تگول هذا چبير القوم

بقيت أباوعله وأطف بالطليان وايد ترجف لحد ما وگفت بمكاني وخفت يجي يحچي عليه ويگولي شجابچ هنا لان ما ملتقيه بي وجه لوجه هاي أول مره من يوم الطلع بيها من السجن .. 

عدلت شالي زين على راسي لان شفته وصل قريب خطوته ثگيلة وعيونه مليانة غضب وتساؤل وطابگ الحواجب سيفين ومعگودات وشكله يبث الرعب حتى للرجال مو عاد أني . 

من وصل قريب.. نزلت راسي للأرض وعديت للعشرة بداخلي بس بثانية رفعت عيني غصب عني طاحت عيني بعيونه لگيته يباوعلي ومستغرب 

مستغرب شكلي.. ووجودي.. وشجابني لغنمه وحلاله 

عيونه فحصتني من فوك لي جوه كأنه يريد يقرا منو آني؟ 

.. هي نظرة وحدة ودگات گلبي ما استقرت ولا هدأت بصدري صارت طبول حرب يدگن جوة ظلوعي 

وبنبرة صوته القوية والحديه فزتني من مكاني 

حربي ـ إنتِ منو؟ وشجابچ يم حلالي بهالوكت

لينا ـ توترت وشبكت ايديني ولساني نشف وجاوبته 

آني لينا بنت صباح ياسين أخت لبنى زوجة المرحوم باقر الله يرحمه. 

قاطعني بغمزة من عيونه.. 

حربي ـ أهلاً وسهلاً والنعم منج ومن أبوج بس ما شايفچ گبل بعيني من متى أنتِ هين؟ 

ـ من فترة أجيت ويه خالتي سميعة وبقيت يم أختي 

ومن وفاة المرحوم أختي راحت وما أخذتني وياها

ـ يعني نسوچ.. لـو شأسالفة

ـ الكلمة لزگت بلساني ونزلت راسي للأرض وبگلبي أحجي.. يا ربي دخيلك شيخنا روح يمعود دأگها وياي تحقيق عبالك متهم وبايگه الحلال مو دا اسرح بيه 

بس بلساني كذبت وجاوبته أي نسوني

سكت وباوع على الطليان اللي بلشت تبتعد وترعى غاد

ورجع حجه بنبره هادئه 

ـ بس الأعرفه أنه الضيف يضل معزز ومكرم وواجبابه يحضرله مو يگظبونه الحلال ويسرحونه بالفطايم 

ـ حسيت الدم صعد لوجهي من الحچي.. لا شيخ آني مو ضيفة آني من أهل البيت وماكو فرق ومتونسة بيهن وتعلمت عليهن

.. ما حجه بس التفت وباوع على كتبي وملازمي المكومة يمي بعدين رجع عيونه للطليان وعلى الشمس اللي بلشت تميل للصفار

ـ زين دامچ من أهل البيت عينچ عليهن لايرحن غاد ويتوهن واسمعي مني زين بويه

روحي من وكت گبل لاتغيب الشمس لان من يحل الظلام زحمة بنيه حديثة سنچ تضلين للغروب وحدچ بالبر والذيب ما يرحم! 

ـ بلعت ريگي بخوف ذيب! عزه العزاني..

هزيت راسي جاوبته أي شيخ ان شاء الله.. حاضر

مشى خطوتين وبعدين وگف والتفت ظله طويل واصل لرجلي ومن مشى حسيت الدم رجعلي برجليه والنفس اللي حابسته طلعته كله .. بس بقى سؤال واحد يحفر بگلبي هو صدگ ما يعرفني لو يعرفني ودا يختبرني ويشوف آخرتها وياي شنو! 

بقيت سارحه بيهن وعيني على الشمس لاتغيب ويأخذني الظلام ويجيني الذيب! بقيت كاعده وأفكر بكلامه بس شگد صارلي هنا ولا مره واحد حذرني من الذيب! ..

.. ومن بعيد شفت عمي جاسم وصاح عليه ويأشرلي وتذكرت لازم أبعدهن عن أمهاتهن لايرضعنهن قبل لانحلبهن وعالسريع طفيتهن ورجعت بيهن وتلگتني عمتي وهبيه دخلناهن لمكانهن ونحسب بيهن أخاف أني مضيعه طلي بالزرع لان هذاك اليوم نسيت واحد بالزرع وعمي جاسم لاكي من راجع من السراحه..

.. وأجتي عمتي صالحه شايله سطل الفافون تحلب هي راحت على الهوايش على عمي منعم تحلبهن وأني بقيت يم عمتي وهبيه اساعدها علمود تحلب الغنم . 

وأجتي الغنم كلها خير من الله والهوايش عمي منعم يطف بيهن هم ما شاء الله خير ورزق من الله .. وجدي حبيب وجديتي واكفين يباوعون على حلالهم شگد أحب هاي الأجواء وهاي وكفتهم ومن يگملون الفلاليح يجون عليهم ينطونهم أجور يوميه شغل يوم بيومه ويتوگلون لبيوتهم .. 

وهبيه ـ جيبلي سطل والجدر الجبير نسيت أجيبهن بالساحه يم القريوله جيبهن وتعاي عالسريع لاتبطيين أجتي الغنم 

لينا ـ أي عمه .. ركضت ودخلت القصر ووصلت الساحه 

وشفتهن شلتهن ورجعت وشفته رفع عينه وتوترت ونزلت رأسي وعبرته علسريع ونفسي يطارد بيه عبالك عندي عركه ووصلت عمتي هاج عمه

وهبيه ـ شبلاچ نفسج يطارد .. يله فوتي ساعدني 

لينا ـ وگفت يمها ولازمه الطلي وهي تحلب لان هاي النعجه ما تدر حليب الا طلي مالتها يمها وضليت يمها لما كملنا الحلب ومتت من التعب . 

خلصنا الحلب وريحة الخبز مالت التنور الطين من أيد خالتي لميعه معبيه المكان وگفت يمها أخذتلي كرصه وكعدت أكل جوعانه 

لميعه ـ لينا من يمج ناوشيني الطبگ عالحايط خل أشيل الخبز 

لينا ـ أي خاله جبت الطبگ وجمعت الخبز وياها وشلته عالرأسي وهي شالت الطشت مالت العجين ودخلنا القصر وهمزين فارغ ما موجود ما اعرف ليش صرت أتبع أثره! 

خليت الخبز وعمتي صالحه وعمتي وهبيه يشخلن ويصفن الحليب ويفورنه لان كميه هوايه ويخثرنه والصبح يخثنه بالسگيه الفافون ويطلعن زبد ودهن حر 

يخلنا بالظرف .. 

عفتهن ودخلت سبحت وطلعت امشط شعري وأندفر الباب ودخل حمودي ما تبطل سوالفك شتريد ولك وأني مو زعلانه منك شگو تجي عليه يله ولي .. وگف وبرطم خل اخلص وأجيك گملت عليه شلته بحضني وأبوس بي ..

وهنا كملن وصبن العشه واني فرشت السفره وارتب بالخضروات وللبن والخواشيك وعمتي صالحه تجيب صياني الأكل وأوزع وياها .. 

أجوو جديتي وعمي مشعان وباوعلي وأبتسم والكل بلش يتجمع جدي حبيب وجدتيي گعدو صدر السفرة 

وعمي منعم وأبنه حمودي وعمتي صالحه وخالتي لميعه وعمتي وهبيه جابت الخبز واني دا احط المواعين وراسي نازل وفجأة دخل حسيت بخطواته رفعت رأسي هو غسل أيده وينشف بالخاولي وسگت المكان لحظه الكعد بيها عالسفره . 

وأستغربت لان من دون الايام اليوم گعد ويانا على السفرة مو بالعادة هو من طلع من السجن ياكل ويه جده ونافع بالمضيف 

بس اليوم يجوز لان نافع رايح للولاية وأجه كعد ويانا وبعدين من حقه شبيه أني ومنو أني حتى أعترض وين يأكل

نزلت عيني على الأكل حميسه للحم وگلبي يدك متوتره من وجوده ووسط سكوت الكل حمودي كسر السكوت وضحك وركض لزمه من دشداشته وخلاه بحضنه وكعدته .

بلشنا ناكل وحمودي يفتر من حضن لحضن والشيخ حربي گاعد وظهره مستقيم ياكل بهدوء لا يحچي ولا يلتفت عبالك مو مهتم ولا كأنه اكو احد وطفل يضحك ومنوسهم الأ هو طبيعي الأمر عنده يمكن ما يحب الجهال .

بس اني شبيه من العصر لحد هسه اكو شي بداخلي راعبني شعور غريب يخنگني ويشدني بنفس الوقت

وهو ليش هيج الكل يحترمه ويهابه حتى جده حبيب من يحچي وياه ينطي الكلمة وزن وعمي منعم يسگت بحمودي لان لغوي هواي وعمتي وهبيه قدملته ماعون 

وهبيه ـ تفضل يمه ماعونك 

حربي ـ عافية إيدچ

لينا ـ بس كلمتين وسكت بس نبرته لحالها تسكت المكان وحمودي بس يكمز عاد صاح بي 

حربي ـ أكعد بمكانك 

لينا ـ الولد خلس من الخوف گبل لبد بصف أبوه وكعد يأكل مثل الخوش أدمي واني دا اخذ لگمة وارجعها وخايفة الخاشوگة توگع من ايدي وخايفة اكثر من نظرة تجي من عنده صدفة وأحصلي منه عيطه. 

وحمودي ما جاز وعمتي صالحه تكرص بي هو لان المدلل ووكح بسلامته . 

صالحه ـ شجاك اليوم تسودنت . 

لينا ـ عاد مد إيده ونطاه قطعة للحم بدون ما يباوعله بس لمسة إيده على راس حمودي بيها حنية دافيه 

هو گام يغسل ووشلت المواعين واني غسلتهن كلهن وردت أصب الچاي بس عمتي وهبيه ما خلتني هي صبت . 

وهبيه ـ روحي نامي تعبتي اليوم 

لينا ـ لا عادي عمه قابل ما مشتغله .

ـ عوفيه أني أصب 

ـ براحتج عمه مـا لحيت عليها ورحت كعدت يم جديتي بغرفتها وخالتي لميعه كاعده تفرك رجليها وحمودي يلعب بشيلتها وهي تحجي عالموبايل ما عرفت ويامن بس نهاية الأتصال يله عرفت تحاجي لبنى . 

الحجيه عطايات ـ ديري بالج على بنياتج أنه هالأيام أمرلج لما تصيرلنا روحه للولايه . 

لينا ـ حجت وياها شويه وسدته وحزت بخاطري ما گالت أختي شلونها احاجيها حتى خالتي سميعه ولا تسأل ونور قليل نتراسل اني من شفت محد مهتملي كمت ما اسأل بس شبعانه قهر وعاذرتهن يجوز ملتهيات . 

الحجية عطايات ـ من يمت دزيت عليه ما خلصت هالاتصالات مالته؟ گومي شوفي وين صار

لميعة ـ هسه يجي يا يمه.. دصبري عليه 

غير عنده شغل يكظي ويجي

لينا ـ ما عرفت على منو تحچي وشوية وأندك الباب ودخل حربي وگبل نزلت راسي ولميت ثوبي زين

حربي ـ حبوبة دازة عليّه

الحجية عطايات ـ اي حبوبه دزيت عليك اريدنك بسالفة

لينا ـ باوعتلي وبعدين گالت

الحجية عطايات ـ يمه لينا گومي اخذي حمودي وطلعي وخلينا

لينا ـ اي جده.. أخذته من يمها وطلعت وهو وخر من الباب وكعد مقابيلها وخالتي گامت سدت الباب وراي

حمودي طفر من أيدي وراح يفتر جولات بالقصر هاي شغلته عفته ومشيت بس الفضول مصيبه وگفت بالنص ورجعت ولزگت اذني على الباب اسمعهم

حربي ـ شنهي السالفة التريديني بيها حبوبة؟

الحجية عطايات ـ السالفة تعرفها زين وحاچيتك بيها من طلعت من السجن وما اخذت منك لا حق ولا باطل

ـ السالفة گظت طلابتها حبوبة.. انسيها

ـ لا يحبوبه ما انساها هاي السالفه ما تنسي وانه دزيت على سماح وما طلعت منها بنتيجة وگالتلي اسألي الشيخ هو يحچيلچ 

وگلت اعوفنك على راحتك ومن يصفى بالك تحچيلي 

بس اللي الأشوفنه ما الك نية تحاچي حبوبتك

.. ليش گتلت إبن فرهود! شنهي اللي بينكم من طلابه احچيلي يحبوبه

ـ چلب وفطس وخلصت العالم من شره

ـ مو هيچ اسأل.. ليش گتلته وشفت بعينك لو بس على الحچي الوصلك .. احچيلي عدل لا تسودني وتاخذني على گد عگلي تره انه ما تفوتني سالفة 

الا هاي ما عرفت الها راس من رجل وما كظبت الها رأس خيط . 

ـ حبوبه انه أبن مشعان واعرف اقرا جو المجلس من ادخل واعرف الباردة من الحارة والصاحب من الغريب وأحسب خطواتي گبل لا أمشيها وأعرف تالي كل درب وين يوديني 

وما امشي على الحچي الظاهر من اول دقيقة اعرف اكو شي غلط والفراسة العدنا ما تخيب 

الحجية عطايات ـ الفراسة .. يا يمه الفراسة زينة بس مو كلشي ينحل بيها والدم ما ينغسل بالفراسة حبوبه 

والسجن اللي فتته ما انفتح بفراسة كظى من عمرك

حربي ـ وانا ما طلبت من أحد يفتحه وأنه طلعت بيدي ودخلت بيدي

ـ أدري بيك سبع وادري ما تهاب الطلايب بس هاي سوالف العشاير ما تموت تعيش وتكبر ويه الايام 

اليوم ابن فرهود باجر ابن عمه والسوالف تجر سوالف وأنه أخافن عليك يحبوبه 

ـ خلي تجر وأنه جاي أمشي عدل واللي يعترض طريقي يعرف نهايته.. وحبوبة لا تخافين عليّه انا اعرف اميز

بين منو يستاهل الرحمة ومنو يستاهل الموت 

ابن فرهود مو اول واحد ولا اخر واحد بس هو عبر حده ولمس عرض الناس

ـ وانت القاضي يحبوبه

ـ لا انا ابن مشعان

ـ ونعم منك يحبوبه وترى أنا أمك ومن حق اشيل همك من طلعت من السجن وگلبي ما ارتاح انام واكعد واخاف تجيني فاتحة ما عايزه وجع لگلبي وهضيمه أخوك زارفه گلبي . 

لينا ـ سگتوا ماكو رد بس سمعت صوت الجداجه يمكن ورث جگارته وسمعت صوته 

حربي ـ اذا ماكو غير هاي السالفة اذنيلي حبوبة 

عندي شغل

الحجيه عطايات ـ روح بس تذكر زين الچبير اذا طاح العشيرة كلها تطيح وراه وهاي السالفة ما اجوز منها ولا اسكت عليها وراح ادز على سماح وتتحچلي غصب

حربي ـ حبوبه.. عوفي المره بحالها ليش تخليني ازعل منچ يعني انا مسوي فضل على الخلك هسه لازم اكعد وأحجي بيه 

ـ بس انه حبوبتك مو غريبة عنك شلون ما تحچيلي شلون تضم عليّه

ـ هذا چلب جان سابي بنات العرب سبايا ويومية طافر على وحده يفوت ويطلع ومصخم الوجه ومتعلم على درب الحرام والمتزوجة والبنية محد يعلم كل وحدة متكبعة بضيمها واذا حجت تفضح روحها ويمكن تنگتل وتصخم وجه اهلها وعيالها ومنو يصدگ بالحجي 

وكلمن يگول شرفي عزيز عليّه واول الهوبزة يذبحون البنية ويغسلون العار بالدم هاي النعرفها

ومثلچ من زوجتي عمتي لـ صباح وخيطي سالفتها خياط شلون ما چان وظلمتي صباح وظلمتي عماتي بهالزواج

الحجية عطايات ـ منهو حجالك هالصخام الوجه

ـ سماح بنت الحجي داوود هي وحدة منهن الكاسر عينها ومصخم وجهه

ـ وانتَ گتلته على حچيها 

ـ لا شفته شوف العين شلته من فواكاها على عياطها وهي تعيط وتترجاه وذبحته گدام عيون كل العرب ووگتها ما حجيت لان حجي داوود رجال خوش زلمة ومعروف واله سمعته وهيبته بين العرب واذا جبت طاري بنته السالفة تكبر 

والناس وكلها تريد مني دليل وشهود وانا گتلته بساعتها يعني دليلي فطس وما عندي شاهد بس الحريم وانا ما ارضى اجرجر حريم العرب بسوالف تصخم الوجه وتطير رگاب

ـ كل هذا يصير وياك وتضل ساگت على ضيمك 

ـ غصباً عليّ هذن شرفي 

ـ چا ليش ما حجيت اليه لأبوك لأخوك باقر الله يرحمه من جان يجي عليك ويسألك 

ـ لان اعرفچ حبوبه من تسمعين تكومين الدنيا وتريدين حگ وما تقبلين بالسجن ووگتها ينچاب طاري نسوان العرب وشرفهن وادري زين الأوادم ما ترحم والسالفه كظت بسجن أخير ما تنكظي بفضيحه للعرب 

وباجر تصير السالفة والشيخ حربي گتل أبن فرهود علمود بنية! وليش گتله علمود البنيه شنهي طلابته وياها والأوادم تگوم تشبچ بالحچي . 

وينمسح اسم مشعان من السان العرب وكلها تضل تعلچ بلحمنا وبدال الستر تصير فضيحه اليه ولـ العرب 

و طول ما انا موجود وخشمي يشم الهوا محد يمد ايده على حرمة من حرايرنا 

الحجية عطايات ـ فدوة لطولك الله يحفظك لشبابك 

ويخلي هيبتك تظل مرفوعة بين العرب 

لينا ـ خفت يطلع وخرت بسرعة من الباب ومشيت على الغرفة واني دأرجع وشفته طلع وتوجه لخارج القصر 

وصفنت عليه من بعيد شگد شريف هالرجال ولو كلهم ما يرضون بالغلط والعوجه بس هو غير هو اللي يطبگها بيده مو بس بحچيه . 

رجعت ومديت ايدي على مقبض الباب وقبل لا ادخل عليهن.. سمعت صوت جديتي تحجي وتلوم بنفسها

الحجيه عطايات ـ چا مهديه مالها غرض والسالفة كلها من ابن فرهود هو اللي شب النار بين العربين هو اللي سمم المي وخلى الاخو يذبح اخوه وتالي فطس. بس بعد ما خرب بيوت

.. يا هضيمتچن يا يمه.. هم انتِ هم اخيتچ 

سميعة راحت بعمرها.. وانتِ انذبحتي بالحياة

.. وكل ظني خيطت خياط زين وعبالي ارد حگي وثأري من مهدية وعبالي اذا زوجتها لصباح ارتاح طلعت غلطانة ثأري وحگي حفيدي جابه جابه بالدم مو بالحچي

لميعه ـ شتفيد الملامة يمه امسحي دمعتچ 

والسالفة گظت ومر عليها وگت وسنين طويلة 

والگبور انطبگت على السر . 

وحق سميعة وهضيمتها برگبته حتى لو مات وخلصنا من شره.. وانه هذا نصيبي من الدنيا هلكد وراضية بيه

ولا تقهرين روحچ وأنه عيني على الله وعليچ . 

عفتهن على راحتهن ورجعت كل هذا يصير بسبب نكس مثل ابن فرهود دمر خالتي سميعة وخالتي لميعه 

الله لا يوفقه كون نار تسلكه سلك وكون گبره ما يبرد

وفزيت على صوت عمتي وهبيه! 

وهبيه ـ لينا تعاي جاي

لينا ـ اي عمه.. رحتلها چانت متحزمة.. وتباوعلي بنظرات شك وگلبي وگع بين رجليه وخفت لا تكون شافتني أتسمع الهم

.. ها عمه صحتيني . 

وهبيه ـ شجنتي تسوين حدر الباب

ـ ما اسوي شي عمه..بس چنت گاعدة ومن اجه الشيخ 

جديتي گالتلي طلعي وخلينا عاد طلعت

ـ ترى زين ادري چنتي واكفة تسمعين الحچي 

هو هيچ يا بنتي.. مو عيب ومن گالتلچ طلعي وخلينا يعني عدها سالفة مهمة ويه الشيخ وسالفة ما تنحچى جدام الصغار

ـ عمه..

ـ ولا كلمة والسمعتيه تخيطين حلگچ عليه والتسمعينه بهالقصر يندفن بالقصر وما ينحچى بره فاهمة 

ـ ان شاء الله عمه

ـ وبطلي لكافة ولازمة البوب ما يصير بنتي ولا تضلين تحوصين وتفترين بسلامتچ رجلچ خفيفة أثگلي 

الثگل والرزانه حلات البنية والبنية اذا ما اثگلت الناس تأكلها بعيونها . 

ـ سكتت.. بس گلبي انهضم من حچيها كلامها يدگ بصدري مثل البسامير 

ـ يله روحي لغرفتج نامي

ـ رحت للغرفة وگبل نمت وثاني يوم بقيت نايمة وخالتي لميعة للغده يلا تگعدني هي دايماً تخليني نايمة وما اسوي شي بس العصريات اسرح بالطليان واساعدهن بشغلات خفيفة هاي كل حياتي

وضليت ايام وكلامها براسي يدگ أثگلي.. رزانه.. لا تحوصين وتفترين بالقصر .. 

ولاحظت شيء ما تريدني اتواجد گدام ابنها الشيخ 

هو صح مو كل الوكت موجود بس انا عيوني گامت تتبع اثره واريد اشوفه..

هو ملتهي بدوامه عنده شركة ومكتب مقاولات وعقارات يطلع من الصبح يطب ويطلع ولا أحد يدري بي ما يتواجد ومن يرجع يلبس الزي العربي مال الشيوخ واذا عدهم طلابة او شغلة يگظونها هو وجده يطلعون سوا بسيارته .. 

گاعدة وكتابي بحضني وعصتي يمي وصافنة على الطليان يطاردن غاد وأني طايرة بفكري ياطليان يا بختكم تسرحون وترجعون وانا لا سرحة تردني ولا بيت يلمني

لا حياتي حياة

لا دراسة لا مستقبل 

لا أهل. لا أم. لا أب. لا أخت تسأل وهي هم ما ناقصه مصيبتها مصيبة الله يكون بعونها

تالي ما تالي وكعنا بيد عمي محمود صار علينا والي وطردني من بيت ابوي وصار البيت اله ولبناته

هضيمة والله.. هضيمة 

صفا العار تنستر واني انفضحت حتى بيت ما ضل يلمني وضالة گاعدة لفوه عند العالم 

صح ما مقصرين وياي وعاديني وحدة منهم وحيل يحبوني ويقدروني

.. بس انا بديت أحس صرت ثگيلة والضيف ثالث يوم وبعدها يصير ثگيل

بالأخص عمتي وهبيه صايرة تضوج مني وقبل لا يطب ابنها تصيح بيه وتثولني واركض لغرفتي ما تريده يشوفني

مـــا أدري تخاف عليه لــو تخاف على ابنها لا ينعجب بشكولاتي ... 

وعاذرتها حقها يجوز أبنها مـا يگدر يأخذ راحته بسببي وسالفتي محد مفكر بيها من مات باقر بعد ما جاب طاري ولا أحد حاجاه عمي محمود ويرجعوني للبيت أبويه . 

.. فجأه فزيت على صوته حتى الكتاب وكع من أيدي 

حربي ـ حلالج تسربت بويه الطليان راحن غاد گومي عليهن

لينا ـ كمت مفزوعة وعيوني نازلة بالگاع وگلبي يدگ بكل سرعته من يمتى أجه شلون موقف .. ركضت طفيتهن وگفت بيهن وهو بعد مسافه واكف والدخان مال الجكارة يصعد من حلگه 

لابس دشداشه سوده وشماغ على راسه وسبحته بيده وعگاله مايل شوي على جتفه وشورابه ثخينه وتارسات وجهه وهيبته مال شيخ ابن شيخ عيونه سود تبرد وتحرگ بنفس الوكت .. 

مشى وگعد على ساكية النهر طگ الجكارة وذبها بالمي وغرف ماي بجف ايده وشرب من البوري مال البير وبعدين عدل شماغه ورفع راسه وباوعلي وگبل

صديت وتلافيت نظراتي الجانت تراقب تفاصيله من بعيد لبعيد .. حجه بنبرة أمر 

حربي ـ تعاي چاي 

لينا ـ أني شيخ

ـ اي انتِ! چا اكو بنية غيرچ هين

ـ تقربت بس بينا مسافة وگلبي يدگ متوترة من هالقرب وطلع الباكيت والجداحة من جيب دشداشته السودة وقرب جف ايده يحمي الجكارة من الهوا 

دخن ونفض دخان الجكارة ورفع عيونه بعيوني وحچى بهدوء

ـ سمعت عليچ يگولون تضيعين الحلال وتنسيهن بالزرع وتسرحين بفكرچ واللي يسرح بغير وادي يضيع غنمه

ـ بلعت ريگي ونزلت راسي وحجيت لا ياشيخ.. والله ما انساهن بس مرات اتلهى بكتابي ويروحن بعيد عني 

ومره وحده نسيت الطلي وعمي جاسم لگاه وجابه

ما جاوب بس باوعلي وباوع للطليان وصفر صفارة وحدة لمهن كلهن 

سكت.. وطگ سبحته باصابعه طگة وحدة 

وباوعلي مرة ثانية گبل نزلت راسي والدم صعد لوجهي 

من نظراته.. من حچيه.. من هيبته

وقبل لا يمشي وگف وگال 

حربي ـ ساعة النوب وروحي لا تبطين

لينا ـ بگلبي اگول مو اني راعية عندك وعند اللي خلفوك شو هذا صدگ اني راعية بغنمه ويتأمر فوگاها! 

بس هزيت راسي بإي ومشىٰ وانطاني ظهره 

مستقيم واكتافه عريضة وهو يمشي رافع طارف دشداشته بايده لحد ما وصل سيارته برادو بيضة 

صعد بيها وراح وانا رجعت باوعت على الطليان 

لگيتهن كلهن مجتمعات ساكتات حتى هن حسن اكو شي تبدل .. 

وصار الوگت ارجع وبطريقي شفتهم واكفين 

هو و جدي الشيخ حربي وحمودي بصفهم ومن شافني گام يصفگلي واجاني يركض شلته وأبوس بي ها ولك اليوم دايح أمك شلون خلتك تطلع من القصر يله تعال نمشي

وجدي صاحلي 

الشيخ حبيب ـ لينا بويه تعاي جاي

لينا ـ اي جدي وصلته.. مد ايده وانطاني فلوس 

استحيت اخذهن لان حربي واكف ويباوع على الغنم

الشيخ حبيب ـ هاج أخذي خرجيتچ وخلي جاسم

يشتريلچ انتِ وحميده

لينا ـ اخذتهن منه مشكور جدي باوعتله.. لگيته صافن علينا محدد نظره ما أعرف عليه لو على الغنم 

ومشيت للقصر وحمود فرحان ويكمز خل يجي شبيك خبصتني

وبقينا گاعدين بالحديقة يلعب وياي بالطوبة هو ضعيف لان بعده صغير يشمرها عليّه واشمرها عليه وصحت ولك لابعيد منو يجيبها الک هسه . 

واحچي والعب وياه وفات من يمنا ودخل المضيف

گبل عدلت شالي ولميت ثوبي زين وصحت بي يله حمودي كافي لعب امشي نشتري وأريده يتحرك 

زحمة العب وياه شنو انا جاهلة

واجه عمي جاسم الله عليك عمي خل اروح وياك اشتري

جاسم ـ لا ما يصير يشوفونچ

لينا ـ منو يشوفني خل اروح حباب

جاسم ـ لا ما يصير.. ما يصير.. انتِ حلوة

خبصني ما يصير وما يصير وطگ الفلوس مني وراح وخلى حمودي فاحط من البچي وراه واسكت بيه ما يسكت ملخ نفسه الگواد فضحني بصوته

ولك اسكت يمعود هسه يسمعون صوتك شيگولون 

مخليه عقلها وياه بله هاي سالفة سالفتك شو دگوم

لا امشي واعوفك والله

مشيت واجاني يركض شبگني من رگبتي ودفن راسه وسگت وحضنته يله حبيبي ميخالف هسه يجي عمو ويجيب جبس ونستله وناكل هم انا وياك

احاچي وناسية الشيخ وراي يبوووه.. گبل مشيت واجتني عمتي صالحه اخذته مني ورحت لغرفتي

ولليل تعشيـنا وعلى گد ما تعشيت دخلت الغرفة 

بعد ما طلعت وحمودي تبسمر يم الباب شايل جدريته الفافون ويدگ بيها طبل رأسي بصوتها 

صحت بي أمشي روح على امك أني نعسانة اريد انام 

موزين عليك بالليل كافي بس تاكل لا يطك كرشك

عاط وراح عليهم وشوية ورجعلي وگمت وياه امرلي لله

صالحه ـ يولي يدور وراچ ما يفعل يسگت يمي متشوفينه شايل جدريته وأجاج 

لينا ـ اي عمه.. يتدلل حمودي ودخلت المطبخ وسويتلة 

وخليته بالكاسة وجانوا گاعدين يشربون چاي اخذها وگعد بصف الشيخ وگعد ياكل وياه وباوعله وضحك

الشيخ حربي ـ ليا ملعون تعرف طعم حلگك

لينا ـ عفتهم ومشيت لان نظرات عمتي وهبيه عليّه 

دخلت الغرفة اجيت اقرأ ماكو واهس ونافع بعد ما بين عبالي يجيبلي ملازم واقلام محتاجه

.. ومرت الأيام وبهاي الفترة صح الحزن بعده ماخذ مساحته من القصر ومن ملامحهم بس عن نفسي عشت احلى أيامي صرت احب نفسي وأحب اكعد الصبح ارتب شالي وشگلي وادور ثوب حلو ومرتب صرت وحده ثانيه مو أني وأكو شيء أتغير بيه شلون ما أدري .. 

اشوفه من يطلع لدوامه لو من يرجع وأنتظر ساعة جيته دقيقة دقيقة ومن يرجع عمتي تحضرله الغده 

لو گاعدة يم جديتي وهو يجي يسلم وأدوخ وارتبك بحضوره . 

صرت احب الحياة بالقصر وانجذب لأصغر تفصيلة تخصه 

قلمه اوراقه يعوفهن عالميز اتلمسهن واشيلهن اخاف من سوالف حمودي لا يشگگهن

بس هل للحظات والايام الحلوة والمواقف الجمعتني بي قربت تنتهي! 

صح هو ماكو شي من طرفه نهائي ملتهي بشغله وبالفصول ويه جده ومشاكل العرب والعشيرة وفقد أخوه كاسر ظهره وجه دومه حزين ومكتظ بالحزن . 

بس عن نفسي دايخة بگلشي يخصه وما اكدر احدد شبيه ما بيه عقلي وأفكاري كلها مخربطه 

بس الأعرفه عن نفسي خلال هل الشهرين صرت اركز على تفاصيله مثلاً مشيته وهيبته من يدخل المضيف ظهره المستقيم وشماغه المعدل وسبحته بايده لــو لهجته من يحچي بثگل ووزن وريحة العود الجايه من دشداشته واذا فات من يمي اتنفس غصب عني لـو الطريقة اليشرب الچاي بيها يلزم الاستكان باصبعين وينفخ بيه شوية وبعدين يشربه بهدوء 

لـو من يگعد على ساكية النهر ويذب الجكارة بالمي ويغسل وجهه كل التفاصيل الصغيرة اللي محد ينتبهلها أني حافظتها على صدري . 

قلمه من ويلزمه ويكتب واوراقه المتناثرة عالميز وخطه الثگيل والمميز حتى طگة سبحته صارت موسيقى باذني

.. اراقب كتفه من يمشي وايده من تعدل الشماغ

واذا طلع القصر يصير موحش واذا رجع الحياطين تتنفس

صرت اكعد الصبح بس علموده وأرتب نفسي بس علموده حتى أسرح وأطلع بالكاع علموده ما أعرف شصارلي ولا أكدرر أحدد نفسي شبيه ... 

طلعت من غرفتي أجيت أكعد يم جديتي لان متوقعه منه هيج وگت يجي يسلم عليها وأعدل بشالي بس وگفت من سمعت صوت عمتي تجاجي جديتي . 

وهبيه ـ عمه يصير احچي وياج بكلمتين بخصوص لينا

الحجية عطايات ـ احچي شعندج على هاليتيمه بس لابزعتن منها 

ـ لا عمه مو سالفة بزعنا منها لا والله بس لينا يعمه ما يصير تبقى بالقصر وصار شهرين أرد أحاجيج .. وانتوا سالفتها جنكم نسيتوها بنية يتيمة ووراها سالفة عمها محمود هادر دمها

وكبل القصر فارغ وعمت عيني جان باقر الله يرحمه وزوج اختها بس هسه باقر الله يرحمه وأختها مشت واجه ابني وأعزب وما يصير تبقى البنية حديثه تفتر بالقصر كدامه مثل النار يم الكصب . 

ـ الله أكبر البنية بنيتنا وبعدين وين تروح وعمها يريد متحلف الها هاي أمانه عندي يوهبيه . 

ـ ادري عمه ادري بس الناس والأوادم ما ترحم وباجر يصير حچي الشيخ والبنية بنفس القصر والحچي اذا طلع ما يرجع وحچي الناس يذبح بلياه سيف 

وانه ما ارضى على سمعة ابني ولا ارضى على البنية هم خطية يتيمة لازم تشوفين حل قبل لا يوگع الفاس بالراس

ـ اي والله يوهبيه كلامچ عين العقل وأنه عبالي بعدنا بزمن باقر لان ما مصدگه موتته عمت عيني عليك حبوبه ونسيت عگبك الدنيا تبدلت . 

بس وين اوديها هاي يتيمه 

ـ والله عمه فكري زين لـو نزوجها لـو نرجعها لأهلها 

بس بقائها هيچ غلط 

ـ زواج منو يتزوجها ونويفع أحاجي دگ رجليه للحايط ما يريدها گلمه والثانيه أختي وأختي شسوي واذا رجعناها لبيت ابوها عمها يذبحها من عمى العماه من بين العمام تالي ما تالي محمود صار والي على هاليتيمات . 

ـ من مو بكيف عمها .. عمه خلها يم اختها وخلي تكمل دراستها وبيت أبوها مو بكيفهم البنية خطية بعدها ما مكملة دراستها حرام تضيع عمرها بين اربع حيطان شايلها كتابها وتركض وراه الطليان خليها تعيش وتصير الها قيمة وتكمل دراستها ومستقبلها مو بس گاعدة وتنتظر الموت من عمها شنهي بس هي غلطت أكعدوا وأحجوا وحلو سالفتها وردوها بيت أبوها . 

ـ بس اخاف عليها اخاف اذا طلعت من حمايتي محمود يشلع گلبها .. بس هاي هي باجر أدز على نافع وأحاجي وخل يحاجي خاله ويوديها بيت أبوها .. 

لينا ـ رجعت الغرفه وصفنت بكلامها هي ما خايفه عليه لايضيع مستقبلي خايفه على أبنها مني.. خلص دام هيج أروح بيت أبويه وشيصير خل يصير أحسن ما بعدين أسمع حجي وأنغث وهم أحس بروحي مو طبيعيه فكري وعقلي كله متشتت أني ويني وين هالسوالف أرجع لبيتنا وأنسى گلشي والتهي بكتابي أفضلي .

_______________________

لبنى ـ گلشي مخليه على بالي الا أنه تموت وتعوفني

كسرتلي ظهري بهاي روحتك صارلك شگد ما ناول ما نويت تعود ما فكرت بيه المن عايفني ومنو اليه أني وبناتك .. 

مخليتهن گبالي وخالتي سميعه تسبحهن بالطشت ونور تساعدها وأني صافنه عليهن ولا مره ركزت بيهن تخنگني روحي وضاله بگلبي مات وما شاف بناته وشگثر جان متحمس الهن ويشتري ويسولف وياهن 

وسماهن قبل لايستشهد .. رفيف و رانيه .. 

أصفن ويه روحي وأذكر كلامهم من گالوا طالع بمهمه عسكريه على ناس مطلوبين وصاير عليهم هجوم وهو أول واحد متصوب ومستشهد بساعتها ووياه أثنين من جماعته هم أستشهدوا .. 

شگلتوا لربكم من صوبتوا وليش ترستوا صدره رصاص ليش ما خليتوا اليه يعيش بعدنا ما عشنا حياتنا ولا هو عاش شُــنو شاف من حياته بعدنا بسم بالله .. ليش فوك جرمكم جرمتوا بحبيب روحي وأخذتوا من حضني .

نور ـ هاج رانيه رضيعها لما نكمل سبح رفوفه . 

لبنى ـ أخذتها منها وبديت أرضعها ودمعتي على خدي باوعتلي خالتي وگامت تحجي عليه 

سميعه ـ ليش تبچين موزين على بناتج ياعيني وخريها من صدرج لاتشرك بالحليب وخريها 

ـ صدك أختنگت وأخذنها مني وخالتي تطبطب على ظهرها وتنفخ بوجهه بالگوه ردت روحها متت الف موته أخذتها مني يمه بنيتي . 

ـ كم مره موصيتج من ترضعين بنتج لاتبچين هو هيج جان صارلها شيء ما يصير يا أمي هنا هم خطيه شنو ذنبهن حاطتهن وتبجين وأبوهن أستشهد أدعيله أقريله قرأن . 

ـ تحجي عليه وما تقبل أبجي وهي دومها تنعي وتبچي عليه .. هضيمتك ما تتسولف يحبيبي والله فرگتك وموتك محد مصدك بيها .. 

ـ يله يمه نور گومي روحي البيتج هسه خالتج بالها عندج وديري بالج على نفسج أنتِ بشهرج 

ـ گملتها وخلتها بصفي وگامت لبست عبايتها وبطنها زينه مو جبيره حيل .. تقربت باستني الله وياج 

نور ـ لاتقهرين بروحج فكري بناتج خطيه 

لبنى ـ هزيت رأسي وطلعت وخالتي كعدت تغسل ملابسهن من يوم الصارن هي تسبح وتغسل وتسهر وتلقح وتودي وتجيب دارتني مثل الأم تداري بنتها ما قصرت وأبد ما أجازي وگفتها وياي زينه أكثر من الازم .

شويه ورجعت نور معصبه شگو شبيچ 

نور ـ هاي نورس ما تبطل سوالفها واكفتلي مثل الطنطل يم الباب وتذم بسمها وأني ساكته ما محاجيتها ماما طگت روحي منها شوفيلي صرفة حل شلون يعني بيت أبويه ما أطبه من ورا حضرة جنابها الخاتون . 

سميعه ـ شسويلها يا ماما بگد البغل ليش الي حجايه وياها ونوب عماتج وجديتج من مات باقر بحجه نأخذ من خاطر لبنى ونشوف البنيات عود گاتلتهن المحنه عليها وعلى بنياتها ويوميه جايات ورجلهن أخذت عالدرب مسويه كعده وتحالف مو بيت هذا صار مزار للرايح والچاي وأنه أحجي يلطموني ميه نعال على حلکي ويسگتوني . 

نور ـ بالقرأن ما يصير ترة بيتنا مو بيتهن شطلعت هاي كله صوج أهلج زوجج لسليمه وصار علينا أبو البيت طبعاً ما تكدرين تحجين صاكرج أبو العرگ من سليمه أخذته چا باقر يموت والعارات تعيش وين ما أكو واحد زايعته الكاع صار رجال برأسنا . 

سميعه ـ نور يمه توكلي لبيتج مالي خلك المشاكل ترى روحي واصله خشمي على ساعه أحط رأسي وأموت وأخلص سگتي وأستري علينا وجفينا الشر متخبلات وكاعدات يردن أحد يتحارش بيهن . 

لبنى ـ نفضت نفسها بقهر وراحت وخالتي شالت الملابس ولحكتها .. نومتهن بالسرير وحضرت ملابسي أريد أسبح وأني طالعه نورس باوعتلي وعوجت حلگها 

نورس ـ خير لهنا ولحگتيني ما أخلص منج ومن سالفة الحمام لو دوده بيج من تشوفيني أسبح لازم تسبحين تغارين مو بيدج . 

ـ مـا حاجيتها مالي خلگها وهي تريد تعارك ويني وين هالسوالف هي لو أدميه وتعرف مالات الأوادم جان قدرت حالي ومصبيتي . 

سبحت وطلعت وأجيت أمشط شعري بدون واهس عالنص وعفته ولفيته ما ينمشط صاير عگدات مالي خلكه لبست شالي بقيت أباوعلهن لا يذبن الحليب هنا يرضعن صدري ويشبعن الحمدلله بس بالبدايه خالتي جانت تنطيهن ممه بس بعدين كطعتها وعلمتهن عالصدري وخالتي تجييلي بهل الفواكهه والكرزات والتمر والدبس وتسويلي شوربات وتعتني بالأكل مالتي علمود الحليب يصير دسم ويشبعهن . 

گمت يم خالتي كعدت يمها وهي تطبخ الغده 

سميعه ـ همزين طلعتي من هالغرفه وشفناج أي طلعي أحجي سولفي ما يصير يا ينتي ولـو ندري البچي يرجع الميتين جان بچيت دهر ورجعت أبوچ شنسوي قسمتنا هيج الله يرحمهم برحمته وأدري بيج صعبه عليج ومقدره وضعج بس علمودج وعلمود بنياتج خطيه 

ومن تختنگين طلعي واتوضي وصلي ركعتين وادعيله الله يرحمه ويصبرچ . 

لبنى ـ عمه تردون أنساه تردون أنساه گمت أبجي أجتي حضتني وتسمح بدموعي. 

ـ لا يا أمي العزيز ما ينسي وما أكولج أنسي بس اذكري بالدعاء وادعيله بالرحمه وعيشي علمود بناتج هو سماهن رفيف ورانيه علمود يبقن ذكرى منه لا تخليـن أسمه يموت وياه هذن من ريحته عيشي لخاطر بناتج لايروح من كثر البجي حليبج ينشف مثل هذيج المره أنشلع گلبج وتلوعن على صدرج فكري بيهن يا بنتي 

ـ هزيت رأسي أن شاء الله خاله بس بداخلي أبجي دم 

بقيت كاعده يمها وجابتلي صينيه مسويتلي شوربه دجاج وشوفان كعدت أكل وأندك الباب وطلعت وشويه وأجتي جايبه وياها باله حفاظات وباله كلنكس حتى دهن مال حفاظات علبتين ومسواك گامل وللحم وسمج ودجاج وفواكهه . 

ـ علواه كل العيال مثل عيالچ الله يبختج بيهم 

ـ خلتهن ورجعت وشويه وأجتي وكعدت تعزل وأجتي نورس تباوع 

نورس ـ منو جابهن 

سميعه ـ خالج مشعان ونافع 

نورس ـ والله گلت نافع قبل لاتگولين لان أعرفه حنين بسلامته من دور أخوه جان عايش مو عاد من مات يخرخر محنه مو بيده .. وشدعوه علگد جايب ومسواك هم شسامع أحد گايله ميتين من الجوع لو مجدين يم بابه جايب السوك وچاي . 

سميعه ـ لا يمه هما ما جايبيهن الج جايبهن لجنتهم وبنات أبنهم . 

ـ أي گولي هيج يا خــاله! وجنتهم ما تأكل بس سمج ولحم ودجاج شسالفه 

ـ مرضع ترضع بناتها والحليب يريد تغذيه زينه 

ـ أها والله عمي زين أرمله وبعدهم يدللون بيچ شتردين هينالج على هيج عيال وعلى هيج حمووين! 

ـ حاسدتها على عيالها ينورس هي شيضل عليها 

ـ لا خــاله علــىٰ شُـــنو أحسدها على محنة نافع! 

ـ شقصدج أشو مــا تعرفين تحجين تشبچين شبچ بسوالفچ وترىٰ أخويه اليجيب المسواك حجايتچ بيها النا 

ـ لا خــاله شبيها قابل بس هيج نلطف الجو مو لبنى يله عليج بالعافيه بس عادي أخذ من الكلنكس مخلصين 

ـ أخذي منو مانع عليچ الخير جثير . 

لبنى ـ أخذت وهي تباوعلي بنظراتها شالعة گلبي بس تذبلي كلام وأني مو ناقصتها أبداً وإذا عالمسواك هما دائماً هيج وعمي مشعان اليتسوك ويجيب وعمتي وهبيه كل أسبوع تجيني وهالأسبوع گالن يرحن المگبره بلكي يخلني أروح وياهن أبد ما رايحه يگولن موزين عليج نفسه والده جديد وهسه صارلي شهرين كون أكدر أقنع عمتي وتأخذني وياها . 

للعصر كاعده أرضع رانيه وسمعت صوت منو أجانا شويه ودخلت لينا! شجابج گبل ذبت نفسها بحضني وگامت تبجي ولج وكعتي گلبي شبيچ شصايرلج أحجي شگو 

لينا ـ ماكو شيء والله بس مشتاقتلج طگ گلبي عليج وأنتِ بعد مـا سألتي عليه عفتوني ونسيتوني هم 

ـ منو ينساج شو رفعي رأسج سوده عليه ياخيتي حضنتها وأسگت بيها وكعدت تبوس بناتي وتحجي وياهن 

ـ عيوني يشبهن باقر والله نسخه من عنده 

ـ دمعت عيوني أي حيل يشبهن أبوهن الله يرحمه 

ـ عمتي وهبيه أجتي هي وجديتي يردن يرحن المگبره على باقر ويزون أذا تردن روحي وياهن 

ـ الله عليچ عمه.. بس اخذيني بس اشوفه.. والله طاگ گلبي عمه نـــار بگلبي نـــار ولو اموت احسن.. والله شنو عيشتي اني 

علمود بناتي والله باقي بيه اخر خيط نفس 

والا اني متت من ساعة سمعت خبر استشهاده

وگلبي صار گبر من يوم راح باقر وخلاني وهضمني بمشيته عمه وكل نفس اطلعه أحس الموت محاصرني بس ما يقبض روحي ويأخذني عنده أتنفس ونار تأكل بگلبي 

واتخيله فات من الباب وضحكته وسوالفه الحلوه 

بالليل انام وأكعد مفزوعة عمه وادور ايده يمي الكا المخدة فارغه وباردة اباوع لبناته وأصيح بگلبي ما شافجن بس سماجن ما لحك عمه ما لحك 

ترسوا صدري رصاص مو بس بصدره من تعمى عيوني 

ولا عيونه جوه التراب 

وهبيه ـ كافي يمه موزين عليج هذن ريحته ديري بالج عليهن أنه أشوف باقر بيهن والنار البگلبي تهدأ بس من أشوف بنياته . 

لبنى ـ الحجيه ساكته وتباوعلي وترجع تباوع على البنات بحضن عمتي وتسبح بسبحتها وصفنتها طويله! وشويه وگامن وتمنيت لو أروح وياهن بس ما قبلن . 

لينا كعدت ترتب ملابسها وكتبها شلونج 

لينا ـ زينه 

لبنى ـ شعجب أجيتي 

ـ شگد أضل بعد وزحمه أبقىٰ وعلى شنو ضاله لفوه عند العالم وبيت أبويه موجود وأذا على الصار أني مالي ذنب كل تخطيط وتدابير من المايخافن الله 

ـ وعمي محمود أذا أجه وشافج شلون شتـسوين 

ـ لا نافع حاجي وياه ومفهمه بعد ما عليَّ بيه 

ـ ها زين 

ـ أي لايضل بالج أي شلونهن الحيايا الهنا 

ـ زينات مالي شغله بيهن كاعده بغرفتي ومگابله بناتي 

ـ شتسوين .. ونور ما ولدت 

ـ بعد دخلت شهرها وخلال هالأسبوع إذا ما صار عدها توسيع يدخلونها عمليه لان هي تعبانه 

ـ الله يسهل الها وتگوم بالسلامه هي وبنيتها 

ـ أن شاء الله ... كعدت بس ضايجه وجهه ما عجبني بس صافنه لينا بيج شيء 

ـ ها لا مـا بيه 

ـ صدك منو جابج 

ـ أجيت ويه جديتي وعمتي وهبيه الشيخ جابنا 

ـ أي زين أجيتي قبل المدارس علمود تروحين ويه خالتي تجهزين وتداومين .. شبيج أشو بالج مو يمي 

ـ ها لا يمج وين قابل .. أي أن شاء الله نروح ليش لا 

ـ ما عجبتني أبداً حتى متغيره مو هذيج لينا الأعرفها بس لازمه كتابها وداگتها صفنتها دوختني خفت لا يكون بيها شيء أو أحد غاثها ومسمعها حجايه بس هي ما تحجي ذابته على الصامت عفتها كلت خل ترتاح كم يوم وأفهم منها شبيها .. 

نامت صفنت بيها وعفتها على راحتها بعدين هي تجي تحجيلي ما الح عليها واليوم رجعت بعدها تعبانه ..

وبعدين رجعت على ذكرياتي الأحبها أحب كل لليل كلما أنام أحجي وياه أحسه ينتظرني ينتظر الليل يجي وأجي أني وأكلب بذكرياته وأحس بروحه تگابلني وقريبه مني 

أكلب بالمحادثات وأقرأ وابجي ومن ضمن كلامه أنتِ صرتي امانة گلبي وتالي حبيبي عفت أمانتك وحيده ويتيمه من دونك أقرا كلامه وابجي

رفيف على اسم ضحكتچ ورانيه على اسم حنيتچ

وانا اضحك وابچي سوا وانت شنو 

باقر ـ وانا ابوجن والسند مالتجن

لبنى ـ رحت حبيبي رحت وهضمتني تذكر من گتلي اذا متت لا تبچين هواي علمودي وشلون ما ابچي وانت نصي وروحي . 

بناتك نايمات وحضني فارغ بس گلبي عامر بيك 

بكل كلمة حلوة سمعتها منك بكل لمسة بكل ديري بالچ على نفسچ

باقر راح أبقى أحبك للما أموت وبعدني انتظرك بدگة الباب وبعدني اتخيلك بمكانك بصفي وراح أضل عايشه على ذكراك الطيب.. 

نور ـ ما أدري ليش أحس الدنيا عاكسه ويانا بگلشي وأساساً أحنه قليلين حظ هم أني هم أخواتي عن نفسي الحمدلله حياتي زينه الا خالتي مشوفتني نجوم الليل بالنهار وأحجي ميفيد شگيت لأمي هي هم ما ناقصه وغافر شحجي يگول أمي شيگدر يسوي صح أمه وكم مره أجاها بالطيب تجر كم يوم وبعدها تگلب عليه ماكو هيج قابليه من النگ والحچي العدها على أقل غلطه تسوي مشكله وتضل تدردم وأني روحي واصله خشمي وحملي مضايقني كمت ما اسكت الها .. 

بالعياده أنتظر السره يجيني وغافر طلع برا وگف لان أزدحام . 

صبيحه ـ ما تگومين تشوفين سراج وين صار لو هذا عنادج يشتغل على دكتورات هم ومن گتلج على هذيج دكتوره مـا رضيتي الا هاي شلون اهنا لازم نتفخخ هاي معروفه والها اسم . 

نور ـ خاله يا أسم يا معروفه لخاطر الله بس أخلص عفتها وگمت على السكرتيره فدوه لعينج ما دخليني والله خالتي أكلت رأسي .. ضحگت أي أضحكي على حالي 

السكرتيره ـ هسه دقايق وأصيح أسمج . 

نور ـ ما رحت يمها طلعت أدور على غافر هذا هم راح يهج ويشيل رأسه من وراي ومن ورا أمه النگاگه لگيته واكف يدخن جگاره ويخابر والشمس ضاربه بوجهه منطيته جماليه عاف الموبايل وباوعلي 

غافر ـ ها شسويتي دخلتي بعدج 

نور ـ بعد شويه نوب 

ـ صدك جذب ترى مو وضعيه هاي قحط دكتورات ياعيني الأزدحام واصل لرأس الشارع شسالفه لخه صايره أدري عدنا مقابله ويه وزير خوما وزير . 

ـ هسه شبيك 

ـ دروحي شوفي لايجي أسمج 

ـ ما تجي 

ـ لا چاي وياج أمشي . 

ـ دخل كدامي معصب أكثر من أمه والله جان ما بي شيء متأكده هي خابرته لان جان يحجي عالموبايل

شافتنا وهزت رأسها وأخذت الورقه ودخلت . 

ـ أجي وياج لو مـا يحتاج 

ـ لا ما يحتاج .. دخلت وفحصتني وماكو أمل طبيعي أحسن علمود أخلص روحي طلعت دكتوره بس خل تطلع أني أحبل بعد التوبه 

الدكتوره ـ ليش ماما بعدج صغيره والأطفال حلوين 

نور ـ شلعان گلب .. سگتت وكعدت تكتب بالورقه 

الدكتورة ـ سمعي ماما نور من الليل من الساعه ١٠ تصومين هاي الورقه باجر الصبح تجيبنها وتجيني للمستشفىٰ ... وأنطيها الهم علمود يكملون الأجراءات ومن أجي الكاج جاهزه گبل أدخلج عمليه تمام حبيبتي 

ـ بس شو عبالك بسرعه بسرعه 

ـ والله ماما ماكو أمل طبيعي ولا شوي على شنو مبقيتج تتنظرين وأنتِ شكلج تعبان وبنيتج ضعيفه أخاف عليج وراج عمليه تريد منج حيل . 

ـ تمام مشكوره دكتوره أخذت الورقه وطلعت حجيتلهم وسگتت ما حجت بس غافر حسيته توتر ويباوعلي شبيك

ـ مو عبالك مستعجله خل أدخل أحاجيها 

ـ لا حبيبي أحسن خل أخلص أني هم تعبت يله خل نمشي تعبت من الوگفه وخالتي هم تعبت خطيه 

ـ يله أمشوا 

ـ طلعنا للبيت ونص الطريق نزل جاب علاكه خلاها بحضني وهي ما رضت 

ـ الدكتوره مو گالتلها تصومين وراها عمليه المن جايبهن

ـ بعد وگت يمه خوما من هسه أصومها وهسه أخذكم مطعم نتعشى شتگولون 

ـ لا ما يحتاج مطعم تحرم فليساتك تذبب بيهن على المطاعم وراك عمليه على الخاص تريد منك ومرتك ما صبرت على الطبيعي تفتل على الدكتوره مالتها ويموتن على العمليات علمود يخلصن وهنا شمعرفهن بالتعب بس عالحاضر سلت فلوس ويجيهن الجاهل قابل مثل حبالة گبل . 

ـ يمه شلزومه هالحچي غير وضعها مو مال طبيعي بكيفها هي 

ـ ما حجيت بس أنهضمت منها باوعلي مسحت دموعي وهز رأسه بقهر وسگت كالعاده ليش يگدر يحاجيها .. 

وصلنا وهو وصى على أكل من مطعم ما أكلت دخلت الغرفه تمددت وهو أجاني جايبلي لفه ما جوعانه والله 

غافر ـ لخاطري أگليها وراج عمليه يله حبيبي . 

نور ـ لخاطرك 

ـ نأكلها أني وياج لان أني هم ما أكلت 

ـ تمام ويأكل نص ويوگلني نص وختمها بوسه على الشفايف ما تفوت فرصتك 

ـ عافيات .. بيج حيل تسويلي چاي مشتهي من أيدج 

ـ أي تدلل على أحلى چاي 

ـ فدوه لطولج 

ـ گمت سويتله الچاي ولملمت المطبخ ونظفته وهو شايل قميصه يمكن يريد خالتي تگوي ما يريد يتعبني عاد أمي دخلت علينا وخايفه وتبجي شبيج ماما اني أم العمليه ما خايفه 

سميعه ـ بعدج صغيره وينج وين العمليه ما گالتلج على الطبيعي ما بيج مجال 

ـ لا عمليه أحسن أخلص 

ـ خالتج وين 

ـ كاعده أتفضلي هسه أجيب الجاي وأجي وأجه غافر سلم عليها وخله قميصه عالباب ومشى وياها وصبيتلهم الجاي واخذت قميصه گويته وهو يباوعلي برضا يربي شگد أحب نظراته اليه . 

وتأخر الوگت وأمي غافر وصلها ورجع وأني حضرت الجنط وبقينا كاعدين ولا يجينا النوم وهو بس يتگلب متوتر أكثر مني عبالك هو الحامل مو أني تالي شغل الموبايل وطلع فيلم وحضني وكعدنا نباوع لما غفيت بحضنه وما حسيت غير الصبح يكعدني وتوجهنا المستشفى وهو راح يكمل الأجراءات وأمي وخالتي كاعدات وصار الوگت أفارگهم ودعتهم وغافر أطكه على خشمه يبجي مدخن گوه يحاجيهم .. تقربت عليه حبيبي دنيا خاف ما أطلع دير بالك على ماما 

غافر ـ ما تنجبين شهل التمسلت هذا 

نور ـ أحبك أكثر من ما تتخيل حب ماله وصف والله 

غافر ـ مو بگد حبج بگلبي الله يردج اليه بالف سلامه 

ـ ودعته ودخلت الصاله العمليات وأدعي الأدعيه الوصتني عليها ماما وجان البنج موضعي وكاعده وهما يشتغلون بيه بس رأسي ثگيل والدنيا تفتر بيه الى أن سمعت صوتها ما خلوني أشوفها وبعدها مر الوكت وطلعوني الهم وشفت غافر گبل تقرب لزم أيدي شديت عليها 

ـ الف الحمدلله والشكر ربي .. الف الحمدلله 

ـ رفعوني من سديه السديه وركزت نظري هذا نافع بس عيوني مغوشه وركزت زين وشفته أي والله هو وتقرب وحجه

نافع ـ هـا نور شلونچ الحمدلله على سلامتچ عيني ومبارك عليكم البنيه شلونها تنكرط من هسه محجوزه لأبني خاف تگولين وتخلفين وياي وتكسرين گلبه ديري بالج نور . 

نور ـ أن شاء الله .. دفعوا السديه ووصلني الغرفه ورفعوني من السديه لسرير بس غافر ونافع ثبتوني واجتي الممرضه والدكتوره يحجن بالي مو يمهن نعسانه بس أحس بلمسات حاوطات أيدي بحنيه

وغفيت .. 

كعدت على صوتها تبجي والوجع نار وتأكل بيه غافر راح أموت الحكي فدوه .. 

غافر ـ شسويلج ياعيني هسه أشوف الدكتوره لاتتحركين ويزود الوجع عليج . 

نور ـ راح على الممرضه تنطيني مسكن وباوعت شفتهن أمي وخالتي ومخليتها بحضنها وتشربها حليب وهي تصرخ ونافع يباوع عليها ومزعوج من صوتها وعاقج وجهه 

نافع ـ هاي جوعانه من هسه أم بطن خرب حظ الكواد شگد عرمه وعرصه عليمن طالعه متگولليلي شو أمج صوت ما الها وأبوج ماكو أفقر منه .. سكتي شو سگتي أدبسزز ما عدنا بنات عرمات وصوتهن عالي . 

نور ـ أبتسمت على سوالفه وياها لاتصيح على بنتي ما أقبل نافع

نافع ـ ما مصيح عيني والله ما مصيح وبنتج هي التصيح وعوزها تغلط علينا.. يابه شعليها عرامه هاي تشيل عرب گامله وبطلت ما أريدها لابني جايز منه أخذله بنتج . 

ـ ها شو تراجعت 

ـ شمدريني عبالي تطلع على أمها كلت أخذها وأني الممنون بس طلعت غلطان أنتِ ماكو شبيهتج . 

ـ حجاها بضحك وأجه غافر والدكتوره وياه حنچه وأبتعد طلع برا وأنطتني مسكنات بالمغذي وغافر ولا مهتم لبنته حاير بيه سوده عليه ملامح الخوف تارسه وجهه 

وين يله شالها بحضنه وأذن بإذنها وسماها . 

غافر ـ الله يبارك بيج ويجعلج من الصالحات يا بابا يا بنين 

نور ـ سماها بنين . 

نافع ـ وهسه نگدر نگولك أبو بنين تعيش وتتربى بعزك ودلالك حبيبي وهاي أول هديه من عمها . 

نور ـ خله علبه صغيره فتحته اأمي تراجي ناعمات يخبلن 

غافر ـ حبيبي ما قصرت والله بس وگفتك وياي كافي وأردها الك بالأفراح وبعد هاي صارت جنتك 

نافع ـ تدلل عليه أنتِ وجنتي العرمه أم بطن 

غافر ـ ها شو هيج ما أقبل هالحجي على بنيني يابه فدوه لهل الوجه . 

نور ـ باسها وشمها وخلاها بحضن أمي وطلعوا برا وضليت كاعده أباوع على أمي وخالتي والوجع يروح ويجي لليل نافع ضل ويانا وجاب العشه وكعدوا يتعشون بس هو واكف يباوع على بنتي ها عجبتك 

نافع ـ شلون ما تعجبني مو بنتج بعد غصباً عليه مبين عقلت وسگتت گالت هذا عمي خاف يبطل ما يأخذني لأبنه مو بله 

ـ خرب نافع أسكت ما بيه أضحك لازمه بطني متوجعه وغافر گام جابلي عصير وبسگت أكلت شوي وكومني ولازم أمشي أستندت عليه وحضنته بالگوه الوجع أخذ روحي وضليت أتمشى بممرات المستشفى وهو ساندني من خصري ونافع يحجي ويه أمي وخالتي 

لما رجعني السرير تعبانه ونافع ضل بات ويانا ما عافنا وثاني يوم طلعنا للبيت وبدأت المهمات الصعبه وأمي وخالتي ساعدني بهاي الفتره والأمومه شعور حلو بس مع ذلك صعبه سهر ووجع العمليه .. 

وصار عمرها شهرين وهالشهرين أحلى أيام عمري صح تعبت بيهن بس تستاهل بنيني يمه فدوه لبناتي .. 

ليش خالتي معارضه أقدم عالكليه 

غافر ـ هي ما معارضه على دراستج بس علمود بنين 

ـ لا معارضه دراستي هي من زمان ما تريدني أكمل 

ـ هم رجعنا مو گتلج خليها عليه وما عليج بالباقي ولو عليه ما أخليج تكملين لان بنين بعدها صغيره تحتاجج يمها بس أذا هسه عارضت تزعلين شسويلج بعد .

ـ نوب أنت غافر 

ـ لا يابه هذا هو كملي عمي كملي 

ـ شبيك شو أحسك مستثكل دراستي 

ـ أي لان مو وگتها وأنتِ صرتي أم وبنتج صغيره وين تعوفينها ياعيني 

ـ وين أعوفها قابل مو أمك يمها وهي ترضع ممه وأصلاً أني ما بيه حليب شگد حاولت ما نزل قليل وما يشبعها شتريد قابل 

ـ يله هذا هو فضينا عاد 

ـ عصب وطلع وعافني أكيد هي معارضه وضلت تحجي وقنعته بس والله أكمل بس اعوف هالسنه بعد ما يضل واهس وتروح عليه وأني صوجي أجلت سنه جان هسه مرحله ثانيه وخلصانه . 

مر كم يوم وقدملي على تربيه اللغة العربيه وأجه وگت الدوام وبلشت أدوام أول ايام أستصعبت لان بنين بعدها صغيره وما مفارگتها أضل طول طريق بس أبجي وبالي عدها ومنا غافر مزعوج بس ساكت ومتحملني ومتحمل الوضع ..

الى ان تعودنا عالوضع وصار يهتملي ويساعدني الحمدلله وياي خطوه بخطوه ما خله أحد يحجي وياي والمره أذا رجلها واكف وياها وداعمها لو كل العالم ضدها ما تهتم لأحد .. 

طلعت من الدوام وكالعاده الكاه طابك سيارته وينتظرني مثل كل يوم وصلته نايم دگيت الجامه وفتحلي الباب ومحضرلي عصير ولفه تقربت بسته من خده خوما تأخرت عليك 

غافر ـ لا عيني ماكو كل تأخير قابل بيدج وهسه نتوكل على الست بنين شالت البيت شيل وأمي باقيلها شوي وتشيل رأسها وتهج كابات عدها هسه اذا شافتج وكبت بيج تسكتين ولا كلمه . 

نور ـ أن شاء الله وطلعنا البيت ولكيت هدوء فتحنا باب الأستقبال مخليتها بصفها وأثنيهن نايمات وغافر طلع موبايله وصورهن وردت أشيلها ما قبل گبل سحبني من أيدي 

غافر ـ عوفيها تعالي عندي أنتِ هسه صرتي حصتي . 

نور ـ أخذني لعنده ... ودخل يسبح فتحت موبايلي لكيت رسائل من لينا . 

لينا ـ نور موجوده أريد أحجي وياج 

نورـ ها عيني لينا گولي بسرعه ردت 

لينا ـ فدوه نور أحجي ويه نافع خاف أهله ينقنعونه وأني ما أريد أتزوج طامسه بالسادس وراي أمتحانات ويني وين الزواج 

ـ ليش هذا الموضوع مو أنسد بوكتها ليش هسه فتحوا 

ـ شمدريني بسوالف عمج الخبل بس يريد بزوجنا ويخلص من عدنا عبالك كاعدين بيت الخلفوه 

ـ خاف أنتِ للسان وما تسكتين ورجع عليج مو گتلج عوفي خل الله ساتر عليج وقنع ورجعتي تدوامين وراج أمتحانات الله يسهل الج وتمتحنين . 

ـ لا والله بس عمي محمود يريد يزوجني بأي طريقه كانت وداز خبر لنافع وعمي مشعان گال هما مو طلبوج مني شنهي يلعبون عليه . 

ـ العصر أجي وأفهم من أمي السالفه كلها 

ـ تمام أنتظرج بس أهم شيء ما أخذ نافع 

ـ ليش شبي ما تردينه وين يصح الج رجال مثل نافع أخو خيته وسبع 

ـ من كل عقلج والله لـو أموت ما أخذه هذا أخويه خبله أنتِ ترديني أتزوج نافع يمه . 

ـ عفتها ما ناقشتها والعصر خابرت أمي وصدمتني من گالت . 

سميعه ـ أي نافع راح يأخذ لينا بس هسه لما تكمل أمتحاناتها ويحجون بالسالفه . 

نور ـ عفتها أمي ما عدها صحه للخبر خل اتأكد من نافع راسلته نافع شلونك 

نافع ـ هلا عيني بخير الله يسلمج وأنتِ وبنيني حبيبة عمها شلونها

نور ـ بخير الله يسلمك .. أكول نافع جايتك بموضوع وأريد اتأكد منه 

ـ كولي عيني 

ـ أنت ولينا صح تتزوجون ما أدري سمعت حجي وأريد اتأكد لان لينا تريدني أقنعك توقف هالزواج ما تريدك 

ـ ولا أني أريدها ولا أريد غيرها وأطلب من الله يبقيني على حالي هيج وزواج ما أتزوج بعد وبكيفهم يخططون أهلج وأهلي بكيفهم يزوجون عمي گولليها هاي جذبه من حذبات نافع يمشي بيها أمورج وأموره لما تكملين السادس دفع بله على رأسج ورأسه مو أهل طركاعة الله 

ـ تمام عيني 

ـ أني أتزوج بعد من خرب بروح أهله اليفكر بتزوج بعد خبل عاقل .. أني گبل جنت معبي بطل وعقل ما جان برأسي من تزوجت أدور هسه . 

ـ تمام 

ـ دوختج وياي أخذي راحتج 

ـ لا عادي ولا يهمك .. عفته ورحت طمنت لينا وفرحت حيل وصفنت عليها وعلى حالها وعمي محاربها اذا يضل هيج وياها وشاده عليها بسالفة الزواج حتى معدل ما تجيب وهي ميته بس تقرأ تريد تطلع من السادس وتخلص خطيه .. 

نشوف تاليها وين تصفى ويه عمي محمود ... 

صبيحه ـ نور وينج تعالي على بنتج ولا تدرين عنها خوش لكيتي مربيه وعايفتها عليه وكاظيتها على الموبايلات! لو أمج لو أختج شطلعت هاي . 

نور ـ هاي شبيها نگرصت نوب.. أجييت خاله رحتلها وأخذتها منها وسويتله ممه وهي تبجي شو هاي خالتي عاطتا بيه وخلت البنيه فاحطه من البجي ثولتني 

ـ جيبيها أنتِ مال جاهل لاتخنگينها وتموتينها طفله ما تعرفين ترضعينها حقج هو أنت هم تنحسبين وتنعدين على ألأمهات لا والله بس فالحه لغافر هذا التعرفينه دلال وغنج . 

ـ أخذتها مني وتدردم فوك ما مدلله أبنج ياربي الصبر

سگتت وأخذتها بحضني وتباوعلي فدوه لوجهج ماما 

ـ أي هسه تندرت أمج وگابلتج من الدوام للغرفه من الغرفه للموبايل زين تذكرتي عندج بنيه دكومي نوميها بسريرها ونظفي البيت خايس ريحته طلعت وهدوم رجلج بالغساله عفنن والمطبخ يريد مره تگابله وتطبخ طبخه لهل الرجال خاست بطنه من أكل المطاعم . 

ـ أن شاء الله خاله 

ـ دگومي غوربت الدنيا شوگت تگومين ورجلج هسه يجي 

ـ شلتها ورحت الغرفه خليتها بسريرها ولملمت ونظفت البيت وشغلت الغساله وغسلت البيت والحوش وطلعت لحم مثروم اسوي مخلمه ودخلت سبحت وبنين طگت من البجي وهي كاعده تالي عفت ملابس وكعدت ارضعها واجه غافر الغرفه مگلوبه ما لحكت أنظفها .

غافر ـ الغرفه ليش مهجومه شهل الهوسه والوسخ نور 

وين كاعدين بمزبله 

نور ـ هسه بس ترضع أكوم انظفها وبعدين هي نظيفه بس الملابس أعزلهن 

ـ من شوگت عفتج كاعده ليش ما مكمله شغلج لحد هسه شجنتي تسوين 

صبيحه ـ جانت لازمه الموبايل وين تلحك تكمل شغلها يمه والموبايل هم يريد وحده تگابله وأمها وأخواتها هم يردن وحده تگابلهن ﺟا مثل حظي من الدوام گبل لغرفتها كعده ما تكعد وياي حتى بنتك عايفتها لكت الها خوش مربيه عالحاضر هسه اخذتها من عندي وصارتلها أم وتحجج بيها على شغل البيت . 

غافر ـ من قبلت تداومين گلتي أنظم وقتي بين البيت وبين الدوام شو هم رجعنا للخربطه والهوسه ست نور 

نور ـ والله ما لحگت وگلت هسه بس تنام أكوم 

ـ وديها على أمي وگومي على شغلج والغرفه شيلي الموكيت غسليها غسل زين وهاي الهوسه كلها تنشال يله بسرعه . 

ـ عصب وگبل شلتها خليتها بحضن خالتي وشلت الموكيت وصاح بيه 

ـ صعدي فوك لاتفرشينه بعد صاير وسخ 

ـ نظيف قبل أسبوع فرشته 

ـ گتلج صعدي ولاتناقشيني . 

ـ بس هو جديد 

ـ بس وسخ .. أنتِ ليش تعاندين من أحجي حجايه تسوينها وأنتِ ساكته لغوه لاتلغين 

ـ ما معانده بس ما بي شيء منو يوسخ قابل بس انت وخاله بيكم هوس نظافه تعبتوني والله صاح بعلو صوته 

ـ نـــور 

ـ سگتت وصعدته وشمرته فوك ونزلت غسلت الغرفه وأني ساكته وهو يباوع ومعصب دخل الحمام الغساله مشتغله كام يحجي صار نار حتى خالتي خافت عافت بنين وراحتله كله منج لما تحجين فلا يعصب شالعه گلبي أنوب عليه أبنج . 

حجه حجه ما جاوبت بس أنهضمت منه لان حجه كدام أمه وهي تتشمت بيه وتريد الزله مدري شعجب سگت وتهدي بي .. نشفتها ومسحت الأخشاب وعطرتها أيد ما ضلت عندي ورحت المطبخ عالسريع سويت العشه 

ـ وين صار العشه باجه خوما باجه أريد أولي 

ـ أي هسه صبيته عالسريع وخليته كدامه أكل لكمه وغص وذبه من حلگه 

ـ خرب بروح أهله اليأكل بالبيت أدري مگومه قوطية الملح كله دتعالي أكلي وشوفي روحج شمبدعه 

ـ أكلت لكمه ومالح حيل ما ينأكل والله خليت قليل 

ـ شوگت تتعلمين متگولليلي شوگت 

ـ عافني وطلع وحيل ضجت منه اليوم زودها عليه حيل كمت كلبت الأكل كله وطلعت لحم مثروم وطبخت تمن وسويت كبه ذبيت قهري كله بيها ونظفت البيت كله وطلعت ملابسه كويتهن ما خليت كملت كلشي حتى خالتي سويتلها عشه وأخذته اله لغرفتها ما حجت كعدت تأكل

لما اجه دخلت گليت ورتبت صينيه وخليتها بالاستقبال هو جان كاعد يم أمه طلع شافني عبرته ورحت الغرفتي ..

بقيت كاعده وصلتني من عنده رساله

غافر ـ تعاي تعشي وياي .

نور ـ تعشيت .. أتعشى أنت بالعافيه

ـ نور رأسي يوجعني تعاي يمي

ـ عفت موبايلي وأدري بروحي فطيره بسرعه أرضى أمداني اي والله ، رحتله ولا كأنما هو العيط وصيح عليه كابلته وكعدت أكل وياه وهو أيده جوه حنجه ويباوعلي طيبه الگبه سويتها الك أنت تحبها .

ـ أي طيبه أكلتها يم أمي عاشت أيدج

ـ عليكم بالعافيه أكل حبيبي

ـ أي أكل ..

ـ خله لگمه بلحگي ومسح على شفتي

ـ هاي خاف زعلانه مني

ـ لا ما زعلانه.. أكلت بس بداخلي مهضومه ما بينت اله وكمت سويتلهم الجاي والله مو نفسي وامدحها بس ما مقصره بشغلتي من يوم التزوجت أركض كدامهم بس أقل غلطه أطلع صفر .

ما أعرف هما متغيرين حتى هو أطباعه صايره صعبه ما جان هيج يدور أغلاط عليه مرات تجي أيام شلونه مرات يعكس ويضل يتذمر يله مو يگولون المره تتحمل رجلها شسوي أتحمل والله كريم ..