رواية ابويا جوزني عرفي الفصل الثاني
خرج مازن من أوضة نادين وهو ماسك إيده اللي اتعورت ووشه كله غضب وتهاني كانت واقفة قدامه وأول لما شافته قربت منه بسرعة وهي بتبص على إيده بخوف
تهاني
إيه اللي حصل في إيدك يا مازن وإيه اللي عمل فيك كده تعالي خليني أشوف لك الجرح يمكن يكون محتاج يتعالج يا بني
مازن
ما لكيش دعوة بالجرح اللي في إيدي وابعدي عني أنا مش عايز أسمع صوتك ولا عايز أشوفك قدامي دلوقتي اتفضلي ادخلي اوضتك
تهاني
إنت لسه هتكابر يا ابني حتى وإنت متعور وممكن تكون محتاج علاج إنت كل اللي فارق معاك إنك تثبت إنك قوي قدام الناس كلها حتي امك مش كده
مازن
أنا مش محتاج حاجة خالص وخليكي بعيد عني وما تدخليش في حياتي
تهاني
حاضر بس خليك عارف ان اللي بعمله ده خوف عليك وهتعرف ده في يوم من الأيام وهتفتكر كل كلمة أنا قولتها لك وتعرف إني عمري ما كنت بتمنى لك الشر عشان انت ابني
مازن
انتي بس تبعدي عني وكل حاجة هتبقا كويسة
تهاني
أبعد عنك ليه هااا ده أنا أمك اللي شيلتك في بطني وربيتك من وإنت صغير وكنت فاكرة إنك لما تكبر هتبقى سند ليا مش هتكون أول واحد يوجعني بالكلام بتاعك ده
مازن
أنا مش عايز أسمع الكلام ده وابعدي عن طريقي بقي أنا مش عايزك أصلًا في حياتي
تهاني بتعيط
يا ابني حرام عليك اللي إنت بتعمله في نفسك ده طب خلينا نشوف الجرح اللي في إيدك الأول وبعد كده اعمل اللي إنت عايزه
مازن
انا قولت لا انتي ايه مبتفهميش خالص ولا ايه
تهاني
ماشي يا مازن براحتك يابني
تهاني بصت له بحزن وسكتت وبعدها سابته ونادين كانت سامعة الكلام اللي قاله وشافت إيده وهي بتنزل منها الدم ودخلت الحمام وجابت شنطة الإسعافات الأولية ودخلت له وقالت
نادين
ممكن توريني الجرح ده بعد اذنك
مازن
إنتي عايزة مني إيه إنتي كمان ابعدي عني انا مش عايز مساعدة منك انتي بالزات
نادين
بطل غرور بقا كده ووريني الجرح اللي في إيدك خلينا نلحقه بدل ما تفضل تنزف لحد لما دمك يتصفي ويحصلك لك حاجة ولا تموت ومحدش يلحقك
مازن
انتي بتتكلمي معايا كده ليه وبعدين أنا قولت لك ابعدي عني إنتي كمان أنا مش عايز أي واحدة ست قدامي دلوقتي إنتي سامعة ولا لأ
نادين
لا مش سامعه واذا كنت فاكر انك عايز تثبت لنفسك انك واحد قوي ومغرور فأنا مش هسمح لك ومش هسيبك غير لما الم الجرح اللي في ايدك حتى لو إنت مش طايقني
مازن
بس أنا مش محتاج مساعدة من حد وبالذات منك إنتي
نادين
على العموم إنت حر براحتك بس لو الجرح فضل مفتوح بالشكل ده ممكن حالتك تسوء وعلي العموم إنت مش خسران حاجة لو خليتني أنضفه وأربطه
مازن
إنتي فاكرة نفسك مين علشان تتكلمي معايا بالطريقة دي
نادين
أنا واحدة موجودة في نفس المكان اللي إنت فيه دلوقتي ومش هقف أتفرج عليك وإنت متعور علشان كرامتك بتمنعك تقبل مساعدة بسيطة
مازن سكت وبص لها شوية وبعدها مد إيده قدامها وهو متضايق
مازن
طيب يلا خلصيني
نادين
أهو كده أحسن بدل العند اللي إنت فيه ده وشايف نفسك اوي ونافش ريشك معرفش علي ايه
مازن بص لها بغيظ وهي قعدت جنبه وفتحت شنطة الإسعافات الأولية وبدأت تنظف الجرح براحة
مازن
اااه ااه بالراحة إنتي بتعملي إيه يا شيخه انتي ايدك تقيله اوي
نادين
بنضف الجرح عشان ما يحصلش فيه التهاب وبعدين هربطه بالشاش اهو خلاص يااه علي البني ادم لما بيكون في حاجة صغيرة اوي اد كده وهيموت خلاص وعمرة ما يقول الحمد لله أبدا
مازن
علي فكرة انت باين عليكي لسانك طويل ولمضه وبعدين هو إنتي بتعرفي تعملي الكلام ده من إمتى
نادين
مش مهم بعرف من إمتى المهم إنك سايبني أساعدك دلوقتي
مازن
أنا مش فاهم إنتي ليه بتساعديني بعد اللي حصل واحده غيرك كانت سابتني لما دمي اتصفي واموت
نادين
علشان أنا مش زيك ومش هسيب حد قدامي بيتألم واشوفو واسكت لمجرد إن بيني وبينه مشكلة
مازن
إنتي تقصدي ايه بالكلام ده تقصدي ان انا قلبي جامد وقاسي مش كده
نادين
انا ولا قصدي اقول حاجة ولا مقولش أنا بس عايزة أخلص الجرح وأرجع أوضتي ممكن بقا سكت
مازن
ده إنتي غريبة اوي بجد
نادين
وإنت عنيد أكتر مما كنت متخيلة
مازن
أنا مش متعود حد يقف قدامي ويتكلم معايا كده والحاجة اللي انا عايزها انا باخدها سواء بالغصب او بالرضي
نادين
بس مش كل حاجة هتعرف تاخدها بالغصب ولو انت الناس كلها بتخاف منك وانت شايف ده فأنا مش فارق معايا لا فلوسك ولا اسمك حتي
مازن بص لها وسكت ومبقاش عارف يرد عليها وهي كملت تنضيف الجرح وربطت إيده بالشاش
نادين
خلاص كده الجرح اتنضف واتربط وإن شاء الله تبقى كويس بس حاول ما تستخدمش إيدك كتير النهارده
مازن
إنتي كمان بتديني أوامر
نادين
لا أنا بقول لك نصيحة ولو مش عايز تسمعها براحتك اعمل اللي انت عايزة اهي ايدك انت مش أيدي
مازن
انا اول مرة اشوف واحده غريبه بالشكل ده والله ومش خايفه مني وكمان واقفه قصادي
نادين
أنا مش واقفه قصادك ولا حاجة
مازن
أومال من ساعة ما دخلتي البيت ده وإنتي بتحاولي تثبتي إنك أقوى مني واني مش هقدر عليكي
نادين
أنا مش بحاول أثبت إني أقوى منك ولا حاجة أنا بس بحاول أحافظ على نفسي لأن اللي حصل من أبويا ومنك مش أنا اللي اخترته
مازن
إنتي هنا واحدة أنا جايبها بفلوسي إنتي سامعة ولا لا
نادين بصت له بوجع لكنها حاولت تتمالك نفسها
نادين
لسه برضو بتتكلم بنفس الطريقة وبتتفاخر بنفسك على الناس عشان معاك فلوس بس الفلوس مش بتديك الحق تتحكم في حياة حد
مازن
أنا مش محتاج منك درس في الحياة
نادين
وأنا مش هديك درس بس واضح إنك محتاج حد يقول لك الحقيقة من غير ما يخاف منك
مازن ضحك
هاهاها وإنتي بقا فاكرة إنك لما تعالجيني كده يبقى أنا هغير رأيي فيكي
نادين
أنا ما عملتش كده علشان تغير رأيك فيا أنا عملت لك الجرح وخلاص ونضفته لك وإن شاء الله تبقى كويس
وقامت نادين وقفلت شنطة الإسعافات وحاولت تمشي من قدامه وهو قالها
مازن
استني عندك
نادين وقفت
عايز إيه تاني
مازن بص لها وسكت شويه وبعدين قال
مازن
ولا حاجة اتفضلي روحي من قدامي انا مش محتاج حاجه
وبعدها نادين مشت ودخلت أوضتها وقعدت لوحدها وهي مستغربة من نفسها ومن تصرف مازن وهو فضل قاعد مكانه وبص لإيده اللي نادين ربطتها وفضل ساكت ومش عارف ليه كلامها فضل يرن في دماغه وقال لنفسه
مازن
انا إيه اللي حصل لي ده وليه البنت دي رغم كل اللي حصل قدرت تقف قدامي وتساعدني من غير ما تستنى مني حاجة
وفي الوقت ده وصلت عمته أميرة للفيلا ولما شافته رابط ايده قالت
أميرة
إيه ده هو اللي حصل لك يا مازن وإيدك مالها
مازن
مفيش حاجة يا عمتي انا اتعورت وخلاص حاجه بسيطه يعني
أميرة
اااه وانت بقا اتعورت إزاي ولا مين اللي عمل فيك كده
مازن
قولت لك مفيش حاجة يا عمتي وبعدين إنتي جايه وعايزة إيه دلوقتي
أميرة
جرا إيه يا مازن هو إنت هتطلع عصبيتك عليا أنا كمان أنا جايالك عشان أكلمك في موضوع الصفقة الجديدة بتاعة الشركة
مازن
مالها الصفقة
أميرة
مش إحنا كنا متفقين إني هدخل معاك شريكة بنسبة معينة حصل ولا لأ
مازن
أيوه
أميرة
أيوه إيه اومال أنا ليه لما سألت المحامي بتاعك قال لي إن ماليش أي حاجة في الموضوع ده يعني إيه الكلام ده
مازن
خلاص يا عمتي طالما المحامي قال لك انك مالكيش حاجة يبقى مالكيش
أميرة
بقا دي آخرتها يا مازن مش عايز تخلي عمتك شريكة معاك في شغلك ولا عايزني يبقا ليا اي صفه في اي حاجة تنساش ان دي في يوم من الايام كانت املاك اخويا الله يرحمه
مازن
عمتي من فضلك احنا مش بنتحاسب وبعدين أنا حر في شغلي يا عمتي ومش عايز أتكلم في الموضوع ده دلوقتي
أميرة
بقا كده طيب على العموم براحتك يا مازن اعمل اللي إنت عايزه بس اعرف إن أنا اللي ربيتك وإنت ابن أخويا وأنا عمري ما قصرت معاك يعني المفروض تقدرني
مازن
يا عمتي أرجوكي أنا مش فايق للكلام ده دلوقتي ولو سمحتي سيبيني في حالي
أميرة
ماشي يا حبيبي بس متنساش إن اللي حواليك مش كلهم أعداء زي ما إنت فاكر
مازن
حاضر يا عمتي مش هنسي
وبعدها أميرة بصت له بغيظ وسابته ومشيت وهي متضايقة ومازن فضل قاعد لوحده زهقان ومتضايق من كل اللي حصل
ولما اميرة طلعت من عنده اتصلت بواحدة وقالت لها بصوت واطي
أميرة
شوفتي مازن مش عايزني أدخل معاه في الصفقة أنا بقى عايزاكي تجيبي لي كل الأوراق اللي أنا طلبتها منك إنتي سامعة ولا لا وبكرة هقابلك في الشركة ونتفق على كل حاجة بالتفصيل ويلا سلام دلوقتي
وقفلت أميرة المكالمة ومشيت وتاني يوم صحيت نادين بدري ونزلت من أوضتها عشان تطمن على مازن وتشوف الجرح اللي في ايده ولقت باب المكتب مفتوح ودخلت لقته نايم على الكرسي ورأسه مائلة على جنب وإيده المربوطة بالشاش قدامه بصت له باستغراب
نادين
هو انت إيه اللي منيمك هنا كده إنت كويس
مازن فتح عينه وبصلها بنعاس ونادين قربت منه
نادين
ممكن أبص على الجرح اللي في إيدك وأشوفه وصل لحد فين
مازن بص لها ما ردش عليها ومد إيده قدامها وهو ساكت ونادين مسكت إيده وبدأت تفك الشاش القديم براحه وفي الوقت ده كانت تهاني واقفة بره المكتب وبتراقبهم من بعيد وابتسمت وقالت لنفسها
تهاني
ربنا يهديك يا مازن يا ابني والله أنا حاسة ان البنت دي اللي هتغيرك وهتخليك واحد تاني وبصراحة أنا مرتاحة لها ربنا يا رب يجعل الهداية على إيديها
نادين
لازم نغير عليه عشان لسه بيجيب دم وعلى فكرة إنت لازم تروح لدكتور عشان يشوف الجرح ده
مازن
وانا اروح لدكتور ليه ما كفاية إنتي اللي دويتي جرحي ولا إنتي عايزاني أروح لدكتور وإنتي موجودة برضو
نادين
إنت بتتريق عليا مش كده بس لعلمك الجرح ده محتاج دكتور برضو لاني يعني مش هكون زي الدكتور
مازن ضحك
طيب ولما أروح للدكتور ويقول لي مين اللي عورك كده وأقول له انك إنتي اللي عورتيني ساعتها ممكن يعمل لك محضر وتدخلي السجن
نادين
ولا بيهمني على فكرة اعمل اللي إنت عايزه بس برضو لازم تروح للدكتور وياريت بقا تسمع الكلام
مازن
وأنا مش رايح في حتة وبعدين أنا كده كويس ما تقلقيش عليا أنا ما بيحصليش حاجة مازن ابو الخير مبيتوجعش أبدا
نادين هزت رأسها وقالت
نادين
برضو هتفضل مكابر وعنيد براحتك على العموم أنا قولت لك نصيحة وخلاص ولو مش عايز تروح للدكتور ممكن أقول لك على برشام مضاد حيوي وتبعت أي حد يجيبه وتاخده عشان الجرح ما يلتهبش
مازن
يعني انتي هتعملي عليا دكتورة ولا ايه وبعدين إنتي مالك خايفة عليا وعلى الجرح اللي في إيدي ده قوي كده ليه
نادين
لا أنا مش خايفة عليك ولا حاجة أنا كل اللي عامله عليه إني مش عايزة حد يقول إن أنا السبب في اللي حصل لك
مازن ابتسم
ما تقلقيش لو حد سألني هقول له إني أنا اللي عورت نفسي أو إني وقعت على إيدي خلاص ارتاحي بقا
نادين
ماشي براحتك وسكتت وهي بتكمل تغيير الشاش
وعند أميرة كانت وصلت الشركة ودخلت على مكتب مدير الحسابات اللي اسمه أحمد ولما شافها وقف وقال
احمد
اهلا وسهلا يا أميرة هانم ده ايه النور ده كله ده انا مكتبي نورك بحضرتك
أميرة اهلا بيك يا استاذ احمد في الحقيقة مقابلتك دي هتخليني اتكلم معاك بصراحة اوي واطلب اللي انا عايزاه
احمد
انتي تطلبي عنيا يا اميرة هانم وانا تحت امرك
أميرة بصت له بإعجاب وقالت له
أميرة
باين عليك ناصح جدا يا أستاذ أحمد وهتفهمني من أول مقابله
أحمد ابتسم
وأنا عندي نظرة قوية في الناس وشايف إن حضرتك بجد تستاهلي كل خير ولو عايزة ايه انا اعمله علطول ده كفايه ان حضرتك جميلة اوي وشيك هو في كده برضو
أميرة
إيه ده إنت بتعاكس بقى ولا ايه
أحمد
ما هو مش معقول الواحد هيشوف حاجة حلوه من غير ما يقول انها حلوه لازم الغزل ده طبعا
أميرة
يبقا احنا كده شكلنا اتفقنا وهيبقى في شغل بينا كتير قوي يا أستاذ أحمد في الفترة اللي جايه دي
أحمد
وأنا من إيد حضرتك دي لايدك دي
أميرة
طيب ممكن اشوف الملفات اللي عندك الخاصة بحسابات الشركة بقا ولا إيه
احمد
اوي اوي تحت امرك بس ياريت بلاش استاذ دي خليها احمد وبس
وبعدها أحمد جاب لها الملفات والحسابات وحطها قدام أميرة وقال
أحمد
اتفضلي دي كل الحسابات اهي قدامك راجعي فيها زي ما إنتي عايزة وأي حاجة تطلبيها أنا هعملها فورا
أميرة
تمام خلينا بقا نشوف الحسابات دي فيها إيه الاول وبعد كده نتفق مع بعض علي كل حاجه
وفي الوقت ده دخل سلامه الساعي بتاع الشركه ومعاه القهوة وحطها قدام احمد وقاله
أحمد
روح هات عصير لأميرة هانم يا عم سلامة لو سمحت اصل شكلها مش بتشرب القهوة
سلامه
حاضر يا فندم
وخرج من المكتب واتصل بمازن وقال له
سلامه
سلام عليكم يا مازن بيه أنا كنت بتصل بيك عشان عايز اقول لك على حاجة حصلت هنا في الشركة دلوقتي
مازن
في إيه يا عم سلامة اتكلم
سلامة
الست أميرة هانم جت وسألت ودخلت عند الاستاذ احمد بتاع الحسابات وطلبت تشوف الملفات وأنا بصراحة حسيت إن الموضوع في حاجة مش تمام فقولت ابلغ حضرتك
مازن سكت شويه وقال
مازن
ماشي يا عم سلامة أنا متشكر قوي على اللي إنت قولته ليا ده
سلامه
العفو يا ابني أنا عملت كده لاني بقالي سنين في الشركة دي ومع أبوك الله ومش عايز أي حاجة تحصل تتسبب في مشكلة وأنا شايف إن في لعب كتير ممكن يحصل من وراك
مازن
ما تقلقش عليا يا عم سلامه أنا بعرف أتصرف كويس في الأمور اللي زي دي
سلامه
ماشي يا ابني وربنا يسترها معاك
وبعدها قفل مازن المكالمة وفضل ساكت وحس إن موضوع أميرة مش هيعدي بالساهل وبعدها راح علي أوضة بيلبس هدومه عشان يروح الشركة ونادين شافته وهو بيلبس الجاكيت وقالت له باستغراب
نادين
ايه ده إنت رايح فين كده وانت تعبان
مازن
مش شغلك وبعدي انا مش تعبان وكويس قدامك اهو
نادين
مش شغلي يعني إيه على فكرة بقا إنت لسه في إيدك جرح والمفروض ما تخرجش وإنت كده خالص
مازن
برضو انتي ما لكيش فيه وبعدين أنا رايح أشوف شركتي ولا إنتي عايزاني أفضل قاعد هنا كده في البيت
نادين
طيب انت ممكن من غير تروح شركتك وتتعب نفسك وايدك اللي لسه فيها جرح تتصل باللي فيها من هنا وتتابع كل حاجة بالتليفون وخلاص ايه بقا اللي يخليك تروح
مازن
ما لكيش دعوة يا ستي أنا حر وبعدين اعملي حسابك إن إحنا هنسافر وعايزك تجهزي نفسك على بال ما أرجع عشان نسافر سوا
نادين
واحنا هنسافر على فين بقا ان شاء الله
مازن
هنسافر وخلاص إنتي بس جهزي نفسك وبلاش أسئلة كتير كده انا عايز اروح ارجع الاقيكي جاهزة
نادين
إنت برضو مش عايز تسمع الكلام وتريح نفسك مفيش فايده فيك
مازن
لا أنا ما بسمعش كلام حد ويا ريت تعملي اللي أنا بقول لك عليه من غير جدال
نادين
إن شاء الله بس ما تزعلش لما أقول لك إن العند بتاعك ده هيجيب لك مشاكل كتير اوي
مازن بص لها بضيق ومردش عليها وخرج من الفيلا وركب عربيته وراح لشركة ولما وصل راح مكتب أحمد ولما أحمد شافه وقف من مكانه وقال
أحمد
أهلا أهلا يا فندم خير يا مازن بيه حضرتك بنفسك جاي لي مكتبي هنا ده والله المكتب نور
مازن
بقول لك إيه يا أحمد عايزك تجيب لي استقالتك وتيجي لي بيها على مكتبي دلوقتي حالا ياريت تقعد وتكتبها
أحمد
ليه بس يا فندم وأنا عملت إيه عشان اقدم استقالتي
مازن بعصبية
اسمع اللي أنا بقول لك عليه وتعمله وتنفذه أنا عايز استقالتك تجيلي بدل ما أعمل لك رفد وتتفضح قدام الشركة كلها إنت سامع ولا لأ
أحمد
حاضر حاضر يا فندم تحت أمرك هكتبها وهجيبها لحضرتك حالا
مازن
تمام وما تتأخرش عليا يلا بسرعه
وبعدها مازن خرج من المكتب وراح لمكتبه وأحمد اتصل بأميرة وقال لها
أحمد
أميرة هانم مازن بيه قال لي اني أقدم استقالتي ومش فاهم هو انا عملت إيه بالظبط
أميرة
طيب يا أحمد سيبك منه واعمل اللي هو عايزه وما تقلقش أنا معاك ومش هسيبك بس المهم تنفذ اللي هو قالك عليه
أحمد
يعني إيه أنا كده اتخرب بيتي ولا ايه يا مدام أميرة
أميرة
ولا اتخرب ولا حاجة أنا بقول لك أنا مش هسيبك وهفضل معاك بس اعمله اللي هو عايزه وخلاص وماتخليهوش يشك في حاجة
أحمد
ماشي يا أميرة هانم حاضر انا هعمل كده وربنا يسترها
وبعدها أميرة قفلت المكالمة واتصلت بالسكرتيرة بتاعة أحمد اللي اسمها دينا وقالت لها
أميرة
أسمعي يا دينا أنا عايزاكي تشوفي لي مازن هيعمل إيه في الشركة دلوقتي وتعرفي كل تحركاته وتبلغيني أول بأول
دينا
حاضر يا مدام أميرة بس أنا خايفة لو مازن بيه عرف حاجة زي دي هتبقى مشكلة كبيرة
أميرة
مفيش حاجه هتحصل وهو مش هيعرف حاجة والموضوع هيبقى بيني وبينك إنتي سامعة
دينا
حاضر يا مدام أميرة هعمل اللي حضرتك عايزاه سلام
وبعد شوية دخل مازن عند دينا وحط قدامها شوية أوراق وقال لها
مازن
اسمعي يا دينا أنا مسافر يومين كده وراجع وعايزك تتابعي الشغل كويس
دينا
طيب هو حضرتك هتسافر فين يا مازن بيه
مازن
أنا رايح الساحل على الفندق بتاعي هناك وياريت تخلي المحامي بتاع الشركة يمشي في إجراءات الصفقة زي ما اتفقنا أنا مش عايز حاجة تقف وأنا مش هنا
دينا
حاضر حاضر يا مازن بيه تحت أمر حضرتك
مازن
تمام وخلي عينك على كل حاجة وبلغيني بأي حاجة تحصل وانا مش موجود انتي سامعه
دينا
إن شاء الله يا فندم
وخرج مازن من الشركة ورجع للفيلا ولقي نادين مستنياه وكانت مجهزة شنطتها ولما شافته قالت
نادين
هااا خلصت شغلك خلاص انا جهزت نفسي
مازن
تمام يلا بينا عشان نلحق نسافر
نادين
هو إحنا مسافرين بجد دلوقتي
مازن
أيوه يلا عشان ما نتأخرش
وركبت نادين معاه العربية وهي لسه مش عارفة هو ناوي ياخدها فين وبعد فترة وهي بتبص من الشباك قالت
نادين
هو إنت موديني على فين كده
مازن
موديكي الساحل إيه اللي إنتي عمرك ما شوفتيه لا إنتي ولا أهلك
نادين
الله يسامحك يا مازن بيه والله مش عارفة أقول لك إيه كلك زوق
مازن
لا ما تقوليش حاجة أنا مش عايزك تتكلمي خالص لحد لما نوصل
نادين
حاضر مش هتكلم
نادين فضلت ساكتة طول الطريق وهي مضايقه من كلامه ومازن مركز في السواقة لحد ما وصلوا الساحل ودخلو الفندق ومازن طلب من العاملين يجهزوا لهم اوضه وراح ناحية الأوضة ونادين كانت ماشية وراه وهي بتبص للمكان باستغراب لأنها أول مرة تشوف المكان ده ولما دخلوا الغرفة حط مازن شنطته وقال
مازن
اتفضلي حطي حاجتك وارتاحي وأنا عندي شغل لازم أخلصه
نادين
هو إنت جايبني هنا عشان ترتاح ولا عشان تفضل تشتغل زي ما إنت في الشركة
مازن
أنا جاي هنا أغير جو وأتابع شغلي وفي نفس الوقت عندي شوية حاجات لازم أخلصها ايه عندك مانع
نادين
ماشي بس إيدك برضه محتاجة راحة
مازن بص لها وسكت شويه وبعدين قال
مازن
إنتي مش هتبطلي كلام عن إيدي دي بقا ولا إيه
نادين
لما تبطل إنت العند بتاعك أبقى أبطل
مازن
واضح إننا لسه هنختلف كتير
نادين
واضح جدا
وسكتوا الاتنين وكل واحد فيهم بص للتاني شويه ونادين فضلت ترتب حاجتها ومازن وقف عند الشباك بيبص للبحر
