رواية جثة داخل الدولاب الفصل الثاني بقلم محمود الأمين
_ مين الشخص ده يا حاج منعم؟!
= الشخص ده يبقى الأستاذ وجيه.. اللي شغال في البنك ده، بس مكنتش عارف ولا فاهم ورق إيه اللي بيخزنه في الشقة دي، بس هما يومين، والراجل جه خد حاجته ومشي.
كانت صدمة كبيرة، معقول الأستاذ وجيه ده يبقى والد ملك.. معقول هو اللي عمل كده في بنته؟!.. لا، لا، أكيد في حاجة غلط، أكيد في حاجة مش مفهومة.
_ أنت متأكد إن اللي جه أجر منك الشقة اسمه الأستاذ وجيه؟!
= هو أنا هتوه عنه يا باشا.. الأستاذ وجيه من منطقتي وأنا أعرفه كويس.
_ طيب، وبعد ما مشي، في حد تاني سكن في الشقة؟!
= لا والله يا باشا خالص.. مفيش حد سكن في الشقة من يومها لحد ما جه الأستاذ حسن ولقي الجثة دي في الدولاب.. وخلاص، الشقة دي عليها العوض ومنها العوض، مفيش حد هيرضى يسكن فيها تاني.
...
طبعًا بلغت النيابة بأقوال الحاج منعم السمسار.. اللي على طول طلعوا إذن بالقبض على الأستاذ وجيه، واتحركت ومعايا قوة من القسم على بيته عشان أقبض عليه، وأول ما وصلت وخبطنا على الباب، فتح، ولما لقينا في وشه اتكلم وقال:
_ خير يا باشا، في مستجدات في القضية؟!
= طبعًا في مستجدات.. أنت مطلوب القبض عليك يا أستاذ وجيه، ممكن تتفضل معايا؟
_ أتفضل معاك ليه؟ أنا مطلوب القبض عليا ليه أصلًا؟!
= بجد مش عارف؟.. أنت مطلوب القبض عليك عشان متهم بقتل بنتك ملك، قتل عمد مع سبق الإصرار والترصد.
_ حضرتك بتقول إيه؟!.. أنا متهم بقتل بنتي؟ ده مستحيل!
= الكلام ده بقى تقوله في القسم.
...
وطلبت من الرجالة يمسكوه وياخدوه على البوكس بره، اتحرك معانا، وكان باين عليه فعلًا إنه مش فاهم حاجة، وكنت بتمنى فعلًا إنه يطلع براءة من التهمة دي، هتكون صعبة على مراته وعلى كل الناس إن الأب يكون هو اللي قتل بنته.
وأول ما وصلنا المكتب، بدأت تحقيق معاه.
_ أنا عاوزك تجيب من الآخر وتقول قتلت بنتك ليه؟!.. عاوزك تحكي تفاصيل الجريمة كلها؟!
= يا فندم، تفاصيل جريمة إيه؟!.. هو حضرتك بتتكلم بجد؟ أنا متهم بقتل بنتي؟
_ ودي حاجة فيها هزار يا أستاذ وجيه؟.. أنت عارف إحنا لقينا جثة بنتك فين؟!
= لا، مش عارف، وأنا هعرف منين؟
_ إحنا لقينا جثة بنتك في نفس الشقة اللي أنت أجرتها يومين، حتى بالمرّة أنت أجرتها من الحاج منعم السمسار على أساس إنك هتحط فيها ورق.. وبعد اليومين سبت الشقة ومشيت، وأكيد طبعًا كنت خلصت عملتك وقتلت البنت وحطيتها في الدولاب، وأكيد كان عندك معلومة إن الشقة دي مش بتتأجر كتير، وكان عندك أمل إن الجثة تتحلل على الآخر عشان ما نعرفش مين صاحب الجثة، وتكون القضية ماتت أو اتسجلت ضد مجهول.
= يا فندم، الكلام ده محصلش.. أنا هفهم حضرتك ليه أنا أجرت الشقة يومين. في مشكلة حصلت في البنك عندي، أنا عملت شغلي مش أكتر، بس الراجل اللي أنا رفضت له القرض عشان ورقه مش مستوفي الشروط، اتهجم عليا بسكينة وكان عاوز يقتلني، ولولا أفراد الأمن كان عاملها.. وقتها مدير البنك قعد معايا وقال إنه مش عاوز مشاكل في البنك، وحسيت من كلامه إنه عاوز يمشيني.. وعشان أنا مش عارف هو بيفكر في إيه بالظبط، بدأت أدور على مشروع مربح آكل منه عيش.. ولما دورت عرفت إن تصوير الورق والطباعة والحاجات دي بتكسب، خصوصًا لما تبقى الجامعة قريبة منك، فقررت إني أجيب ماكينة تصوير وطباعة، وهأجر محل عشان لو مشوني من البنك يبقى معايا مشروع باكل منه عيش أنا ومراتي وبنتي.. المحل كان بعيد شوية عن البيت، وعشان كده أجرت الشقة يومين عشان أركن فيها البضاعة اللي هتكون في المحل، الورق والتجهيزات، لحد بس ما أقدر أظبط المحل وأدهنه.. وبعد ما اليومين خلصوا، أخدت البضاعة ومشيت.
....
مش عارف ليه كنت مصدقه، ولكن كان لازم نتأكد.. هل البنت راحت ناحية البيت ده ولا لا في الفترة اللي كان مأجر فيها البيت؟ واثناء تفكيري، لقيت الأستاذ وجيه بيقول:
= على فكرة يا فندم، في كاميرا في السوبر ماركت اللي في أول الشارع، والكاميرا دي كاشفة الشارع كله.. ممكن حضرتك تتأكد إني بريء من موضوع بنتي ده، بس أنا بقسم لحضرتك إني والله العظيم ما عملتها. هقتل بنتي ليه؟!.. ده أنا من يوم ما عرفت إنها ماتت وأنا مش عارف أنام.
موضوع الكاميرا ده هيحل كتير، وفعلاً هيعرفنا إذا كانت البنت قربت من البيت في الوقت ده ولا لا، ومين اللي دخل البيت ومين اللي طلع منه.
ومن حظ الأستاذ وجيه الكويس، ظهور تقرير الطب الشرعي، واللي كان في مصلحته تمامًا.. وكيل النيابة كلمني عشان يقول الكلام اللي في التقرير.
_ تقرير الطب الشرعي في إيدي أهو... التقرير بيقول إن الوفاة حدثت نتيجة كسر مضاعف في الجمجمة ونزيف داخلي بالمخ، بجانب وجود علامات خنق على رقبة المجني عليها.. وبعد فحص الجثة تبين إن الجريمة حدثت يوم 27 من الشهر الماضي الساعة الواحدة ظهرًا.
= يوم 27 ده هو نفس يوم اختفاء البنت.
_ بالظبط كده.
= تمام يا باشا.. أنا كنت لسه هتصل بسيادتك عشان أبلغك إن في كاميرا في السوبر ماركت اللي في أول الشارع.. الكاميرا دي كاشفة الشارع كله اللي في الشقة اللي حصلت فيها الجريمة، وأكيد من خلالها هنقدر نتأكد هل الأستاذ وجيه هو اللي قتل بنته ولا حد تاني؟.. وعشان كده هحتاج من حضرتك إذن بفحص الكاميرا الخاصة بالسوبر ماركت عشان الإجراءات القانونية تمشي صح.
_ تمام، هطلع إذن بفحص الكاميرا عشان نعرف مين اللي عمل كده؟!
....
بعد ما قفلت مع وكيل النيابة المكالمة، بصيت للأستاذ وجيه اللي كان لسه قاعد قدامي، وقلت له:
_ ممكن أعرف اليومين اللي أنت كنت مأجر فيهم الشقة.. كانوا بيوافقوا كام في الشهر؟
= كان في آخر الشهر تقريبًا... 25 و26 من الشهر اللي فات.
...
ومعنى كده إن وجيه كان ساب الشقة قبل حدوث الجريمة بيوم.. وأكيد القاتل كان فاكر إن الشقة دي تبع الأستاذ وجيه، وعشان كده خطف البنت وقتلها في الشقة دي وساب جثتها في الدولاب عشان الأستاذ وجيه هو اللي يلبس القضية.. ميعرفش إن الشقة دي كانت إيجار يومين بس، ولكن رغم كده فضلت متحفظ على الأستاذ وجيه لحين فحص كاميرا السوبر ماركت عشان نتأكد من صحة أقواله.
وفعلًا اتحركت، واتقابلت أنا ووكيل النيابة عند السوبر ماركت اللي في أول الشارع اللي في الشقة اللي حصلت فيها الجريمة.. وبإذن من النيابة قدرنا نطلع على الكاميرات الخاصة بالسوبر ماركت، وبالتحديد يوم الجريمة، يوم 27 من الشهر اللي فات.. ومن حسن حظنا إن التسجيلات كانت موجودة.
بدأنا نفحصها عشان نشوف مين الشخص اللي دخل العمارة دي ومعاه البنت.
وعلى الساعة 12 الضهر، وصل واحد كان لابس قميص وبنطلون لونهم أسود، وعلى دماغه كاب أسود مغطي ملامحه، وكان ماسك في إيده البنت، ودخل بيها العمارة فعلًا، وخرج بعدها بحوالي ساعة، ومشي عكس اتجاه الكاميرا.
واضح إنه عارف إن في كاميرا في الشارع، وعشان كده محبش يظهر ملامحه، وعشان مفيش حد يتعرف عليه.. وللأسف معرفناش مين الشخص ده؟!.. ولما عرضت الفيديو على وجيه، معرفش هو كمان يتعرف على الشخص ده.
....
فات أسبوع كامل وإحنا في تحقيقات وتحريات عشان نعرف مين الشخص ده، ولكن في الوقت ده بيوصلنا بلاغ عن ريحة وحشة طالعة من شقة.. الجيران خبطوا كتير عشان يعرفوا مصدر الريحة دي إيه، ولكن مفيش حد كان بيجاوب، وعشان كده قرروا يبلغوا الشرطة.
اتحركت على هناك وأنا بقول: يا رب ما تكون جريمة جديدة، ولما اقتحمنا الشقة اتصدمت.. عشان لقيت كاب معلق في مسمار في دخلة الشقة.. الكاب ده أنا عارفه كويس، ده نفس الكاب اللي كان لابسه الراجل في الفيديو.. الراجل اللي قتل ملك.
ولكن لما دخلنا جوه الشقة كانت الصدمة...
