رواية جثة سالي الفصل الثاني بقلم محمود الأمين
بمجرد ما سمعت: "الجث.ة؟!.. جث.ة مين؟!" اتحركت على طول على العنوان.. والعنوان كان عيادة الدكتور سالم عبد العزيز، دكتور النسا والتوليد.. الدكتور سالم اللي متجوز مدام شهيرة، اللي بنتها سالي ماتت في عربيته وكنا لسه بنشوف جث.تها في المشرحة.. الدكتور اللي المفروض موقوف عن العمل، والجث.ة كانت لبنت في العشرينات.. ووالدتها بتقول إن البنت كانت كويسة قبل ما تدخله، ولكنه اعتدى عليها جوه وماتت بسببه.
طبعًا العيادة كانت مقلوبة، وفي ناس من الشارع اتلمت، والدنيا كانت بايظة، وده اللي خلاني دخلت للدكتور سالم وقولتله:
_ هو حضرتك مش المفروض موقوف عن العمل يا دكتور سالم؟!
= لا، حضرتك فاهم غلط.. أنا موقوف عن العمل في المستشفى بسبب خطأ طبي، لكن دي عيادتي الخاصة، وأنا بمارس فيها شغلي عادي.
_ طيب.. دلوقتي حضرتك متقدم ضدك بلاغ إنك اعتديت على بنت عندها حوالي 20 سنة في عيادتك الخاصة.. ووالدتها هي اللي قدمت البلاغ وقالت الكلام ده.. ردك إيه على الاتهام ده؟!
= في الحقيقة الكلام ده محصلش.. البنت كانت على علاقة بحد، وقبل ما تدخل عندي كانت واخدة برشام كتير في محاولة انتحار، وهي اعترفت بده جوه على فكرة.. وأول ما خرجت كنت خارج وراها عشان أبلغ والدتها بالموضوع، لكن البنت وقعت من طولها وماتت.. وساعتها والدتها طلعت الكلام الفارغ اللي بتقوله.
_ لا، حضرتك هتيجي معانا.. الكلام هنا مش هينفع يا دكتور سالم.
= أجي مع حضرتك ليه؟!.. ما أنا حكيت اللي حصل أهو.
_ دكتور سالم، ده بلاغ متقدم ضدك.. يعني لازم نحقق معاك، ولو كان في شبهة فعلًا في صحة البلاغ ده، حضرتك هتتحول للنيابة، وساعتها هي تشوف إذا كنت ظالم ولا مظلوم.
= تمام، أنا تحت أمركم.
....
اتحركت ومعايا الدكتور سالم عبد العزيز، دكتور النسا والتوليد.. وجث.ة البنت اتفحصت من رجال الطب الشرعي واتنقلت على المشرحة، ولكن المرة دي مكنش ينفع أسيب الجث.ة تتشرح تحت إيد نفس الدكتور.. وعشان كده قدمت طلب إن اللي يشرح الجث.ة دي هو الدكتور هشام محفوظ، والغريبة إن الطلب اتوافق عليه عادي، وفعلاً الدكتور هشام هو اللي تولى تشريح الجث.ة.
وفي الوقت ده كنا بدأنا التحقيق مع الدكتور سالم عبد العزيز.
_ دكتور سالم، ممكن أعرف إيه سبب وقفك عن العمل في المستشفى؟.. أنا عارف إن حضرتك قلت إنه كان خطأ طبي، بس أنا عايز أعرف إيه الخطأ الطبي ده؟!
= واحدة ماتت أثناء ولادة طبيعية.. رغم إن كل المؤشرات كانت بتقول إنها لازم تولد قيصري، لكن أنا اللي أصريت على الولادة الطبيعية وتحملت المسؤولية الكاملة، وعشان كده لما المريضة ماتت لقيت نفسي موقوف عن العمل ومتحول للتحقيق.. ولكن الكلام كان من مدير المستشفى، مش من نقابة الأطباء.
_ طيب، وحضرتك كنت فين يوم الجريمة؟.. اليوم اللي ماتت فيه بنت مراتك سالي؟!
= جريمة إيه؟!.. على حد علمي يعني، تقرير الطب الشرعي بيقول إن الوفاة كانت طبيعية ومفيهاش شبهة جنائية.. فإزاي حضرتك عاوز تحقق معايا في حاجة مفيهاش شبهة جنائية أصلًا؟!
_ آه؟!.. وحضرتك عرفت إن تقرير الطب الشرعي بيقول كده إزاي؟!.. مين اللي بلغك؟
= دكاترة صحابي هم اللي بلغوني.. عشان أنا كنت مهتم بالقضية، وكنت بعتبر سالي زي بنتي، ولو طلع الموضوع فيه شبهة جنائية كنت أنا أول واحد هبقى عاوز أعرف مين اللي عمل فيها كده.
_ طيب، لو عاوز تساعدنا فعلًا.. اتكلم كده واعرفنا حضرتك كنت فين في الوقت اللي كانت سالي مع أصحابها في العربية، ورجعت البيت الساعة كام؟.. عشان على حسب كلام مدام شهيرة إنك كنت بره ورجعت متأخر حوالي الساعة 5 الصبح.
= رغم إني مش مجبر أجاوبك على حاجة زي دي، ولكن أنا زورت المستشفى يومها.. كنت عند الدكتور مصطفى عبد العال، صديقي، وسهرنا أنا وهو مع بعض في كافيه، وكان معانا مجموعة من الزملاء، وأنا مستعد أكتب أسماءهم لحضرتك وتتأكد إني سهرت معاهم.
_ يا ريت والله.. أكون شاكر لفضلك يا دكتور.
....
وفعلًا كتب أسماء الناس اللي كان سهران معاهم.. وفي الوقت ده كانت ظهرت التحريات اللي كنا عملناها عن سالي شوقي عبد الحميد.
التحريات كانت بتقول إن سالي كانت متعودة على الخروجات والتأخير بره، عشان هي عاشت في أوروبا سنتين مع والدتها واتعودت على الثقافة بتاعتهم هناك.. أقرب حد ليها هو خالد كريم رسلان، وكريم رسلان ده يبقى رجل أعمال معروف.. وعلى حسب التحريات، سالي وخالد بتجمع بينهم علاقة حب، ووالدتها مدام شهيرة على علم بالعلاقة دي.. وكمان ليها واحدة صاحبتها اسمها ولاء حسين أبو زيد، ودي بنت غلبانة معاها في الجامعة، ولكن أصدقاء دراسة من زمان، وبتخرج معاهم في الخروجات اللي بيطلعوها.
علاقة سالي بزوج والدتها الدكتور سالم علاقة عادية جدًا، ومفيهاش أي مشاكل تمامًا.. ده غير إنها من ساعة ما رجعت من أوروبا وهي قللت زياراتها خالص لوالدها الأستاذ شوقي، وبقت تعرف صاحبتها إن والدها هو الدكتور سالم.
....
قفلت ملف التحريات اللي مفيهوش أي حاجة بتدين الدكتور سالم، والنيابة مش هتقدر تستدعي حد للتحقيق في قضية طلعت فيها الوفاة طبيعية ومفيهاش شبهة جنائية.
وعلى حسب التقرير اللي أنا واثق إنه تقرير مضروب، بيقول إن سالي أكلت حاجات فيها سكر كتير، وده اللي خلاها تعبت واتكسرت منها حقنة الإنسولين لما جت تاخدها، وده اللي تسبب في الوفاة.. لكن موضوع انتزاع الأعضاء التناسلية ده بيقول إن البنت فعلًا تعرضت للاعتداء، وفي حد بيحاول يخفي ده.
في الوقت ده زارني في المكتب الأستاذ شوقي، والد سالي، وكان عاوز يشوف آخر تطورات القضية.. ولما عرف إن الموضوع هيتسجل وفاة طبيعية انهار، وفضل يقول إنه متأكد إن بنته اتقتلت، ولكن أنا فهمته إن تقرير الطب الشرعي هو اللي بيأكد ده.
وبعد ما الراجل هدي، طلبت منه يروح لحد ما نستكمل التحقيقات ونشوف هنعمل إيه.. وللأسف، في الوقت ده ظهر تقرير الطب الشرعي للبنت اللي ماتت في عيادة الدكتور سالم عبد العزيز.
التقرير كان بيقول إن البنت ماتت بسبب إنها أخدت أنواع مختلفة من عقار مهدئ في نفس الوقت، وده اللي عمل عندها هبوط حاد في الدورة الدموية وتسبب في الوفاة.. وده معناه إن الدكتور سالم عبد العزيز بريء من التهمة دي.
كنت هتجنن.. الراجل ده عليه علامات استفهام كتير، وكل ما نقرب عشان نتهمه بحاجة عملها يطلع منها زي الشعرة من العجين.. وطبعًا أفرجنا عنه بعد صدور التقرير.
مش عارف ليه جالي هاجس إني عاوز أتكلم مع البنت اللي اسمها ولاء.. اختفاؤها هي والولد اللي اسمه خالد وعدم ظهورهم بعد موت سالي فيه حاجة مريبة، وأنا لازم أعرفها.. ورغم إن الإجراء اللي هاخده مش قانوني، إلا إنه لازم.. لازم أعرف الدكتور سالم ليه علاقة بموت سالي ولا لأ؟!
وده اللي خلاني جبت عنوان ولاء حسين وروحتلها.. واللي فتح الباب ساعتها والدها، وطلبت منه إني عايز أتكلم مع بنته، وفهمته الوضع كله.. وفي الحقيقة الراجل كان متعاون جدًا وسمحلي بالدخول.. بس لما البنت جت قعدت قدامي كان باين عليها الخوف والتوتر، فطمنتها وحاولت أتكلم معاها.
_ ولاء، أنا مش جاي أقبض عليكي ولا فيه أي حاجة.. مش عاوزك تخافي، أنا جاي أسألك سؤالين وماشي على طول.
= تمام يا حضرتك.
_ أنا عرفت إنك صديقة مقربة للمرحومة سالي، وعاوز أعرف منك علاقتها بالدكتور سالم، زوج والدتها، كانت عاملة إزاي؟!.. هل العلاقة ما بينهم كانت كويسة ولا لأ؟
= أنا كل اللي أعرفه إن الشخص ده مش كويس، وإنه كان بيتصرف تصرفات بتضايق سالي، وهي حكت إنه أكتر من مرة كانت بتصحى من النوم تلاقيه في أوضتها.. بس أنا معرفش الموضوع تطور لحد فين.
_ طيب، ويوم الجريمة.. إنتي كنتي معاها، مش كده؟
= لحد الساعة 2 تقريبًا.. وبعدين أنا روحت، وهي قالت إنها هتروح لخالد وبعدين هترجع على بيتها.. ولما صحيت عرفت الخبر.
_ طيب، وبالنسبة لخالد.. العلاقة ما بينه وما بين سالي كانت واصلة لحد فين؟.. أنا عارف إنهم كانوا بيحبوا بعض، بس هل الموضوع وصل بينهم لحاجة غلط؟
= لا خالص.. سالي كانت حاطة حدود للعلاقة، ومعتقدش إن فيه أي حاجة حصلت ما بينهم.
_ أنا بشكرك جدًا يا ولاء.
....
مشيت من عند ولاء، وفي الوقت ده وصلني تليفون عن شخص اتقتل في شقته، والطريقة اللي اتقتل بيها كانت بشعة.. اتحركت على العنوان، ولما وصلت هناك كانت الصدمة..
