رواية جثة سالي الفصل الثالث بقلم محمود الأمين
الجثة كانت للدكتور سعد، دكتور الطب الشرعي، اللي كتب التقرير الخاص بجثة سالي، وقال إن الوفاة طبيعية، وإنها كانت نتيجة لتناول سالي كمية كبيرة من السكريات، وإنها مخدتش حقنة الإنسولين، وإن ده كان سبب الوفاة.
والدكتور ده المفروض إن إحنا كنا هنحقق معاه بسبب استئصال الأعضاء التناسلية في جثة سالي بدون سبب واضح، ولكن قبل ما ناخد أي إجراء في استدعائه والتحقيق معاه، جالنا البلاغ اللي بيخص وفاة مريضة في عيادة الدكتور سالم، ومع انشغالنا باللي حصل سيبنا الاستدعاء على جنب لحد ما نخلص التحقيق مع الدكتور سالم.
ولكن كل اللي أنا قولته ده مش هو اللي مثل ليا الصدمة... اللي مثل الصدمة بجد هو إن اللي قتله كان واقف قدامي، وماسك السكينة اللي غرقانة د.م، يبقى الأستاذ شوقي، والد سالي.
والجيران كانوا ماسكينه ومكتفينه. قربت منه وأنا مش مصدق، هو عمل كده إزاي وليه؟
فاتكلم وقال:
- هو ده اللي كان عاوز يضيع حق بنتي... كان عاوز اللي اسمه سالم يفلت بعملته. دكاترة زمايل مع بعض طرمخوا الموضوع عشان حق بنتي يضيع. لما جيت لحضرتك المكتب وعرفت إن الحيوان اللي اسمه سالم هيطلع منها، سألت وعرفت إن دكتور الطب الشرعي قال إن وفاة بنتي طبيعية، رغم إني لما جيت مسرح الجريمة اللي كان في عربية بنتي، كنت سامع كلام إن في حد اعتدى عليها، وعرفت إن الموضوع فيه إن، وكان لازم أتأكد. سألت على عنوانه، وكنت رايح ومش في نيتي إني أقتله، بس لما عرف إني والد سالي طلب مني أخرج بره، وإلا هيبلغ الشرطة وهيقول إني جاي أتهجم عليه. وهو اللي رفع عليا السكينة الأول... أنا مكنتش عاوز أقتله، بس لما حاولت أمسك منه السكينة جت فيه غصب عني.
- إنت ضيعت حق بنتك باللي إنت عملته ده... الشخص ده كان هيتحقق معاه، وكنت هخليه يعترف ويقول الحقيقة، وساعتها كنا هنقبض على اللي عمل كده في بنتك. ولكن باللي إنت عملته ده، للأسف إنت ضيعت حقها، ودلوقتي مش هنعرف مين اللي طلب منه يعمل كده.
- مفيش غيره، اللي اسمه سالم... هو اللي ورا كل المصايب اللي حصلت.
...
اتقبض على الأستاذ شوقي بعد ما قتل الدكتور سعد، بس بعد ما قبضنا عليه فتشنا بيت الدكتور سعد، وكان في أوضة عنده أشبه بمعمل، ومن حسن حظنا إننا لقينا فيها الأعضاء التناسلية الخاصة بجثة سالي، وكانت محفوظة في بوكس عشان الأعضاء ما تتلفش. وطبعًا اتاخدت عشان تتسلم للدكتور هشام محفوظ، وأظن دلوقتي يقدر يوضح السبب الحقيقي في وفاة سالي، ويكشف مين الشخص اللي اعتدى عليها.
ولكن أول ما رجعنا المكتب لقيت العميد حازم عاوزني في مكتبه، وفعلاً روحتله.
- نعم يا فندم؟
= أنا عاوز أعرف إيه حكايتك مع الدكتور اللي اسمه سالم عبد العزيز؟ في البداية تتهموه إنه ورا موت بنت مراته، وبعد كده يظهر تقرير الطب الشرعي اللي يقول إن البنت ماتت موتة طبيعية، وبعد كده يتقبض عليه بسبب بلاغ واحدة مقدماه، وبدل ما نحقق في البلاغ اللي عندنا نحقق معاه في حاجة الطب الشرعي قال مفيهاش شبهة جنائية. والنهارده الراجل مقدم شكوى فيك، بيقول إنك بتحاول تلبسه حاجة هو معملهاش. ممكن أفهم إنت بتفكر في إيه؟
- يا فندم، تقرير الطب الشرعي اللي طلع واللي بيخص جثة سالي تقرير مضروب. أنا ووكيل النيابة اطلعنا على جثة سالي بعد التشريح، والجثة كان فيها أعضاء ناقصة، والأعضاء التناسلية في جثة سالي مكنتش موجودة. والنهارده والد سالي قتل الدكتور اللي طلع التقرير ده، ولقينا عنده في البيت الأعضاء التناسلية اللي بتخص سالي. كل ده بيقول إن الموضوع فيه شبهة جنائية، وفي حد عاوز يقفل القضية دي عشان ما نوصلش للي عمل كده في سالي.
= طيب، ومال الدكتور سالم عبد العزيز باللي إنت بتقوله ده؟ ماشي، أنا هتفق معاك إن الدكتور سعد ده طرمخ على القضية، وعمل الفعل البشع ده عشان يقول إن الوفاة طبيعية. إيه دخل الدكتور سالم برضه؟
- بصراحة يا فندم، أنا روحت واتكلمت مع واحدة من صحاب سالي اللي كانت معاها يوم الجريمة، اسمها ولاء، وقالت إن سالي كانت حكيتلها عن الدكتور سالم، وقالت إنه بيعمل تصرفات بتضايقها، وإنها كانت بتصحى من النوم تلاقيه في أوضتها... يعني هو مشتبه فيه.
= وإنت اتكلمت مع البنت دي بصفة رسمية؟ يعني كان معاك إذن نيابة؟ أو النيابة نفسها استدعتها؟
- بصراحة لا يا فندم... أنا روحت هناك بصفة ودية.
= بصفة ودية؟! ومن إمتى شغلنا فيه صفة ودية؟ إنت بتشتغل من دماغك، وأنا المفروض دلوقتي آخد قرار يكون في مصلحة التحقيق، وهو إني أبعدك عن القضية تمامًا. كل حاجة إنت عملتها في القضية دي غلط. حققت مع واحد واتهمته بارتكاب جريمة كان فيها تقرير طب شرعي طالع بينفي الجريمة نفسها. يعني قانونًا مينفعش تحقق معاه. وروحت اتكلمت مع بنت في نفس القضية بصفة ودية، مش رسمية، والكلام اللي قالته وارد جدًا إنها تيجي في محضر رسمي تغيره وتقول كلام تاني خالص. قولي... إنت لو مكاني تعمل إيه؟
- اديني فرصة يا فندم، ولو الدكتور هشام محفوظ قال إن البنت متعرضتش لاعتداء، أنا مستعد لأي عقاب، لأني متأكد مليون في المية إن البنت اتعرضت لاعتداء.
= تمام... أنا هديك فرصة لحد صدور تقرير الطب الشرعي، وبعدها يبقى لينا كلام تاني.
...
خرجت من مكتب العميد حازم وأنا على آخري. كان لازم أستعجل الدكتور هشام محفوظ في التشريح، وده اللي خلاني أروح المشرحة. وكان الدكتور هشام شغال على الجثة، واتفاجئ لما لقاني داخل عليه المشرحة.
وقولت له:
- ها، في أخبار جديدة يا هشام؟
= والله الموضوع صعب، خصوصًا بعد استئصال الأعضاء التناسلية، بس المؤشرات الأولية بتقول إن في اعتداء حصل، لأن في جروح واضحة أثناء التشريح. ولكن أنا بحاول أوصل للسائل الذكوري اللي في الأعضاء دي، والموضوع مش سهل، ولكن بإذن الله هنوصل.
- شد حيلك يا هشام، أملي في ربنا ثم فيك إنت. لو التقرير طلع إن في اعتداء، كده هنقدر نجيب اللي عمل كده في البنت دي، ده غير إني هثبت حسن نيتي قدام العميد حازم.
= مش فاهم... تثبت حسن نيتك إزاي؟
- الدكتور سالم عبد العزيز مقدم فيا شكوى، إني عاوز ألبسه جريمة معملهاش، وللأسف أنا وقت ما حققت معاه كانت القضية متقفلة إنها وفاة طبيعية، وكان موجود التقرير المضروب بتاع الدكتور اللي اسمه سعد.
= فهمت... عمومًا، في خلال 24 ساعة أكون خلصت، وبإذن الله هنعرف نثبت إن البنت دي تعرضت لاعتداء.
...
خرجت من المشرحة، وكلمت وكيل النيابة في التليفون، وقلت له:
- المؤشرات الأولية بتقول إن في اعتداء حصل. استدعي صحابها اللي كانوا معاها في العربية يوم الجريمة، وخصوصًا الولد اللي اسمه خالد. ده كان بينه وبينها علاقة حب، وجايز يكون هو اللي عمل فيها كده ونكون ظالمين جوز أمها.
= تفتكر كريم رسلان هيسكت؟ ده راجل واصل، وإنت عارف.
- والله إحنا بننفذ القانون، ولازم ابنه يحضر عشان يتحقق معاه، ولو ما حضرش هروح أجيبه من بيته. لازم نحل القضية دي، عشان لو اتقيدت ضد مجهول، أو التقرير قال إن الوفاة طبيعية تاني، صورتي هتبقى زي الزفت قدام العميد حازم.
= ما تقلقش... هنستدعي الاتنين وهيجوا.
...
وفعلًا، وكيل النيابة استدعى ولاء حسين أبو زيد، وخالد كريم رسلان، للإدلاء بأقوالهم في جريمة قتل سالي شوقي عبد الحميد.
وبعد 24 ساعة ظهر تقرير الطب الشرعي، ولقيت الدكتور هشام محفوظ هو اللي جايب التقرير بنفسه. فتحت التقرير، وكانت المفاجأة...
