رواية جريمة في عيادة دكتور نفسي الفصل الثاني بقلم ياسر عوده
جريمه في عياده دكتور نفسي
وبعد ما خلصت مع الدكتور اتكلمت مع الضابط كمال وقولتله:
-انا خلاص عنيا قفلت ومابقتش شايف، لازم اروح انام كام ساعه علشان افوق، عاوزك انت ورجالتك تحققوا لو في شهود عيان او أي شخص عنده أي معلومه تفدنا في التحقيق، وعاوزك كمان تباشر تفريغ الكاميرات بنفسك، وانا هروح انام وبكره باذن الله نتكلم في المعلومات اللى وصلتلها.
-تمام يا فندم، كل اللى انت عاوزه هيحصل.
وسبتهم فعلا وروحت على البيت، كنت محتاج انام وحتى نمت بهدومي وماغيرتهاش، وماعرفش انا نمت قد ايه، بس صحيت على صوت تليفوني اللى كان بيرن، ورديت على التليفون ولقيت اللى بيتكلم كمال وقالي:
-ايوه يا عمرو باشا، احنا محتجينك في حاجه مهمه حصلت ولازم تسمعها.
-تمام، انا هقوم البس واجي على طول.
وقومت وروحت المكتب بتاعي، وهناك لقيت كمال مستنيني، ولما قعدت معاه اتكلم وقال:
-حصلت مشكله يا فندم.
-مشكله ايه؟
-لما فرغنا كاميرات المراقبه بتاعت العماره لقناها فصلت الساعه 12 تقريبا، ولما حققنا في الموضوع عرفنا ان في عطل كهربائي حصل في العماره والكهربا قطعت، وماتصلحتش الا تاني يوم الصبح.
-ازاي اللى انت بتقوله ده، اكيد اللى حصل بفعل فاعل.
-طبعا انا شكيت في ده يا فندم، واستدعيت حارس العماره علشان احقق معاه، بس عرفت ان حارس العماره محجوز في المستشفى من حوالي 15 يوم، كان تعبان واتعملتله عمليه في القلب، وانا اتأكدت من المعلومه دي بنفسي.
-كدا احنا مش قدام مجرم عادي، دا عامل حسابه على كل حاجه، وقطع الكهرباء علشان مافيش أي كاميرات تصوره وهو داخل.
-بالظبط يا فندم.
وفي الوقت اللى اتصدمت من موضوع كاميرات المراقبه في العماره جالي تقرير المعمل الجنائي، واللى لقيت فيه معلومات مهمه جدا، والمعلومات دي انهم لقوا تسجيلات صوت وصوره للـ 3 اشخاص اللى قابلهم الدكتور اشرف في ليله الجريمه بعد الساعه 12، وعاوز اقولكم انهم كانوا مفاجأه بالنسبالي، وكنت عارف ان الجاني مش هيخرج بره ال 3 اشخاص دوول، واضح ان واحد فيهم قرر يقتل الدكتور لما عرف ان الدكتور بيسجله الجلسه.
اول تسجيل سمعته كان بين الدكتور ومريض اسمه اسامه فاروق، واللى مايعرفش مين اسامه انا اقوله، دا واحد من اشهر لاعيبه كره القدم دلوقتي، وابتدي اسامه كلامه مع الدكتور اللى سأله:
-قولي يا كابتن اسامه، ايه مشكلتك؟
-مشكلتي اني كابتن مصر.
استغرب الدكتور وقاله:
-يعني ايه، ممكن توضحلي؟
-علشان تفهم المشكله لازم تفهم انا ازاي بقيت كابتن مصر، ايه الصعوبات اللى واجهتها، تعرف يا دكتور انا في أي لقاء صحفي او تلفزيوني بيستضفني وبيسئلوني انا ازاي دخلت مجال الكوره كنت بقولهم اني دخلت بالصدفه، بس مش دي الحقيقه، انا اللى صنعت الصدف بتعتي، انا ماكنتش بسيب حاجه للصدفه ابدا، انا عملت أي حاجه صح او غلط علشان يلقبوني بـ كابتن مصر، بس قبل ما احكيلك كل حاجه بصراحه محتاج اسألك سؤال الاول.
-اتفضل اسأل أي سؤال انت حابب تسأله.
-انت ممكن تتكلم مع أي حد بخصوص اللى هتكلم عنه واحكيه دلوقتي؟
-اتكلم مع أي حد زي مين؟ وضح سؤالك انا مش فاهمه.
-اقصد انت ممكن تروح تتكلم مع صديق او مع مراتك مثلا او مع صحفي او أي حد عن الاسرار اللى هحكهالك؟
-لا طبعا، ايه الكلام اللى انت بتقوله ده، اسرار المرضي دا شيء مقدس عندي، مستحيل اقوله لـ أي شخص، وكمان زي ما انت شايف انا لا معايا مسجل للجلسات ولا أي شيء، انا بعتمد على ذاكرتي، انا عاوزك تطمأن يا كابتن، اسرارك هتفضل جوايا لغايه لما ادخل بيها قبري.
-طمنتني، اصل انت ماتعرفش انا عملت ايه علشان اوصل للي وصلتله، وماتعرفش انا ممكن اعمل ايه علشان احافظ عليه، الموضوع بالنسبالي حياه او موت.
علشان تفهم كلامي لازم تعرفني كويس يا دكتور، انا طفل اتولد بين 9 اخوات غيره، انا عشت الفقر والحرمان، انا كنت بنام تحت الرجول علشان كنت اصغر اخواتي وماكنش ليا مكان انام فيه، لما كان بيتحطلنا الفتار ماكنتش بلحق غير لقمه عيش حاف دا لو لحقتها اصلا، انت تسمع عن الناس اللى بتاكل من الزباله، احنا كنا بناكل من الزبله حرفيا، امنا لما كانت بتشوفنا جعانين بتطلع تروح أي مكان الناس بترمي فيه زبالتهم وتقعد تدورلنا على أي اكل ناكل منه، احنا ماحصلناش كلاب الشوارع.
في اللحظه دي الدكتور سأل اسامه:
-اومال والدك كان فين؟
-هرب، لما شاف الوضع اللى احنا فيه هرب، هو كان شايف ان احنا متعلقين في رقبته وخنقينه، فكان احسن تصرف بالنسباله انه يمشي ويسبنا ومش مهم احنا هنعمل ايه من بعده، وعاوز اقولك حاجه يا دكتور فهمتها لما كبرت وماكنتش فاهمها وانا صغير، انا لو مكانه ماكنتش هقعد مع 10 اطفال وامهم، اكيد كنت هتصرف زي ما هو اتصرف بالظبط.
-تمام، وايه اللى حصل بعد كده؟
-لما كنت عايش مع اخواتي كنت لازم ابقى قوي علشان اعرف اعيش وسطهم، والاهم من القوه الانانيه، كنت لازم افكر في نفسي ومش مهم أي حد تاني غيري، حتى لو الحد ده اخ من اخواتي، ودا اللى عملته بالظط لما اخويا حاول ياخد مني كاوتش انا لقيته، الحقيقه انا مالقتهوش انا سرقته من قدام جامع، ولما خدته ولبسته وروحت بيه اخويا اللى اكبر مني خده مني بالعافيه، وساعتها كنت لازم انتقم منه، كنت لازم اعرفهم كلهم اني مش لقمه ساهله، وفضلت متربص لـ اخويا لغايه لما كنا ماشين وزقيته قدام متوسكل كانت النتيجه ان اخويا رجليه اتكسرت وعلشان ماكنش معانا فلوس العلاج الموضوع ساب اثر في رجله، ومن وقتها وكل الناس بتناديله بالاعرج.
ومن يومها وانا اتعلمت اني ماسبش حقي ابدا، على فكره من وقتها واخواتي كلهم بيخافوا مني، وابتديت اكبر ولقيت نفسي بحب لعب كره القدم، الموضوع بالنسبالي كان مجرد تسالي مش اكتر، لغايه لما في يوم عرفت ان لاعيبه الكوره بيكسبوا كتير اوي وكمان ليهم معجبن ومعجبات، وقتها حطيت حلم لنفسي اني ابقى لاعب كره قدم مشهور وغني، وبقيت اسعي للموضوع ده مهما حصل.
لما كبرت ماكنتش بسيب أي فرصه ممكن تخليني لعيب كوره ابدا، أي اختبار تبع أي نادي مهما كان كبير او صغير، وفعلا قدرت بعد صبر وماعاناه اني انضم لمركز شباب، وهناك كنت مستني الفرصه، ولما جت الفرصه ماكنتش اقدر اضيعها، كان في مستكشف لاعيبه جاي مركز الشباب، وكانت المنافسه بيني وبين لاعب تاني وبردوا ماكنتش اقدر اعتمد على المهاره بس، وكنت محتاج اتخلص من اللاعب التاني وده اللى عملته بالظبط، ودفعت لواحد من اخواتي مبلغ مقابل انه يسببله في عاهه مستديمه، ودا اللى حصل واتغيب اللاعب التاني عن الاختبارات ونجحت انا، ومن وقتها وانا كل ما يظهر قدامي أي منافس في أي مكان كنت لازم اتخلص منه، لغايه لما وصلت للمكانه اللى انا فيها، بس الدنيا مابطلتش تختبرني، من فتره قريبه ظهر لاعب كان لسه صغير، ولقيت الكل مهتم بيه، وقررت اني لازم اتخلص منه، حسيت اني محتاج اتخلص منه قبل ما يبقى خطر عليا، طلبت من شخص انه يعمله حادثه تخليه يبطل لعب، بس اللى حصل ان اللاعب ده مات في الحادثه، ومن وقتها وانا بشوفه في كل مكان، بيظهرلي وبيقولي انت ليه عملت معايا كده، ومش هو بس مع الوقت بقيت اشوف كل اللى صادفوني في حياتي واتخلصت منهم، وبقيت اهرب منهم بالمهدءات، ولما المهدءات مابقتش تنفع بقيت اشرب مخدرات، انا بدمر مستقبلي وعلشان كده انا جتلك يا دكتور، انا محتاج مساعدتك تخليني ابعد عن المخدرات وفي نفس الوقت ابطل اشوف الاشخاص اللى بشوفهم، هتقدر تعمل كده يا دكتور؟
-مش عاوزك تقلق ابدا يا كابتن اسامه، انا هقدر اساعدك.
ولغايه كده الجلسه انتهت وانتهي التسجيل، وكان واضح من التسجيل اللى سمعناه ان اسامه من ضمن الناس المتهمين بقتل الدكتور اشرف.
اول حاجه عملتها اني اصدرت تعليماتي باحضاره، وفعلا تم احضاره وقعد اسامه قدامي وواجهته بكل المعلومات اللى وصلنالها، وكمان واجهته بالاعتراف اللى الدكتور اشرف سجلهوله، وطبعا بمجرد ان اسامه سمع التسجيل انفعل وقال:
-لا يا فندم كل الكلام اللى في التسجيل مش كلامي ولا دا صوتي، دا اكيد شغل ذكاء اصطناعي، انا واحد مشهور ومستحيل اعمل كل الكلام ده.
-انت وانا عارفين انه صوتك وانه اعترافك، والانكار مش هيفيدك، انت اللى حكيت كل حاجه في الجلسه مع الدكتور اشرف، ولما خلصت ومشيت فكرت في اللى حصل، وقتها حسيت انك غلط وانك في خطر، علشان كده فكرت وقررت ترجع تاني وتقتل الدكتور اشرف علشان مايبقاش في شاهد على اعترافاتك.
-لا طبعا الكلام ده مش صح، انا ماقتلتش الدكتور، وبعدين انا ايه اللى يخليني اعمل كده اصلا.
-انت بنفسك قولت للدكتور انك على استعداد تعمل أي حاجه علشان تحمي مستقبلك.
-ايوه انا قولت كده، بس انا ايه عرفني ان الدكتور كان بيسجلي اصلا.
-تمام هنشوف كلامك صح ولا لا.
امرت وقتها بحبس اسامه اربع ايام على زمه التحقيق، وطلبت تحريات عنه علشان نعرف هو راح فين بعد ما مشي من عند الدكتور، ومن حسن حظه اننا قدرنا نتأكد انه لما خرج من عند الدكتور راح لملهي ليلي، طبعا هو ماقلش ده في التحقيق بس المخبرين السريين قدروا يوصلوا للمعلومه دي.
اسامه تم تبرئته من جريمه قتل الدكتور اشرف، بس مش معنى كده انه بريء لا طبعا، انا ماكنتش اقدر اتغضى على الاعترافات اللى قالها للدكتور اشرف، وطلبت بفتح تحقيقات في اعترافاته علشان يتحاكم على اللى عمله.
وبعد ما انتهيت من اسامه جه الدور على المتهم التاني، والمتهم دا يبقى واحد من الشخصيات المعروفه بس في المجال الطبي، يبقى الدكتور صفوت منصور، واحد من الاسماء المعروفه جدا، وصاحب مستشفى من اكبر المستشفيات الخاصه.
التسجيل كان موضح الدكتور صفوت وهو قاعد مع الدكتور اشرف واتكلم وقال:
-الورث، كل واحد ليه ورثه الخاص، انا من الناس اللى كانت سعيده الحظ في الموضوع ده، في ناس بتورث مبلغ صغير، وناس بتورث شقه او حتي بيت او عربيه، انا بقى ورثي كان اكبر من كده بكتير، فيلا وعربيات وارصده في البنك، والاهم من كل ده مستشفى كبيره ليها اسمها وسمعتها ولازم احافظ عليها، كنت فاكر ان الموضوع سهل ما انا دكتور وكنت دارس بره مصر، بس لما استلمت ورثي ابتديت اكتشف ان انا ورثت كمان سر لو اتكشف مش بس كل اللى ورثته هيضيع، لا سمعه ابويا وسمعه العيله كلها هتدمر، وبدل ما كانوا بيحلفوا بسمعه ابويا النضيفه واللى تشرف أي حد، وقتها كل الناس هتلعنه ودا اللى مستحيل كنت اقبل بيه.
انا لما دخلت المستشفى وكان عندي طموح اني اكبرها واخليها اكبر مستشفى في الشرق الاوسط كله، وفي وسط الطموح ده اتصدم بالحقيقه المره ان في قسم في المستشفى وكان اهم قسم فيها وهو اللى بيصرف على المستشفى كلها وسبب كل الثروه الضخمه اللى ورثتها، القسم ده باختصار كان عباره عن كل العمليات المشبوهه اللى ممكن أي حد يسمع عنها، زي عمليات اعاده غشاء البكاره وكمان عمليات اجهاض غير قانونيه، والاسوء من كل ده عمليات سرقه ونقل الاعضاء.
كانت صدمه بالنسبالي، وماكنتش عارف اعمل ايه، وحتى لما فكرت اني ماكملش في نفس الطريق اللى ابويا كان ماشي فيه، وقتها اتعرضت لتهديدات كتير اوي منها بالفضيحه وتانيه بالقتل وغيرهم كتير، مافيش حد سمحلي اني انسحب وكان مكتوب عليا اني اورث الورث الملعون ده.
شكرا لزيارتكم عالم روايات سكيرهوم
