رواية عروسة بيت عمران الفصل الثاني
في بيت عمران…. عمران الجد قاعد على الكنبة. وعاديلة قاعدة جنبه بتقطع في الخضار. وهيام قاعدة على الأرض قدامها طبلية وبتخرط منخلية. اتفاجئوا التلاتة بميرنا داخلة بسرعة وهي بتعيط وجريت على أوضتها. هيام قامت جري وراها.
هيام
ميرنا. مالك يا بت استني. حصل إيه.
هيام جريت ورا ميرنا. عاديلة وعمران الجد بصوا لبعض باستغراب. وفي اللحظة دي دخل عمران.
عاديلة بفرحة
حبيب أمك يا عمران. حمد لله على السلامة يا قلبي.
قامت وخدته في حضنها.
عمران بهدوء
الله يسلمك يا أمي.
قرب من جده وسلم عليه. عمران الجد بص له بشك.
عمران الجد
إنت عملت إيه في بت عمك. داخلة معيطة كده ليه.
عاديلة بغيظ
وهو ابني لسه راجع من سفره يا عمي. هيعمل إيه في بت عمه بس.
عمران الجد بغضب
لما أبقى أوجهلك كلام يا عاديلة ابقي اتنيلي على عينك وردي. غير كده حطي جزمة في حنكك واخرسي. وإنت يا عمران حصل إيه مزعل بنت عمك ليه.
عمران بص ناحية عاديلة وبعدين رد بهدوء.
عمران
ما حصلش حاجة يا جدي. إنت مش تايه علي دلع البنات ده.
في نفس الوقت نزلت هيام وهي بتقول بغضب.
هيام
ما حصلش حاجة برضو يا حضرة الظابط المحترم. يرضيك يا عمي اللي عمران عمله ده.
عاديلة بحنق
وهو عمران عملك إيه إنتي وبنتك. الواد لسه راجع من سفره لا بيه ولا عليه.
عمران الجد بغضب
عاديلة لو سمعت لك حس تاني ما تلوميش غير نفسك. وإنتي يا هيام كملي. حصل إيه.
هيام بصت لعمران بغيظ.
هيام
البيه المحترم ضرب ميرنا في الشارع. يرضيك يا عمي.
عمران بهدوء
هي اللي قليلة الأدب ولسانها طويل.
عمران الجد بغضب
وهي قلة أدبها في إيه يا حضرة الظابط. وبعدين أنا موت ولا عمك مات علشان إنت اللي تحاسبها. حتى لو غلطت.
عمران ببرود
جات معايا كده بقى يا جدي. واللي حصل حصل وخلاص.
هيام بغضب
هو إيه اللي حصل حصل وخلاص يا حضرة الظابط. لو كان زياد اللي رفع إيده على واحدة من أخواتك كنت هتقول اللي حصل حصل وخلاص. وإنتي يا عاديلة ساكتة ليه. ما تقولي حاجة. عجبك اللي ابنك عمله ده.
عاديلة
ما يمكن بنتك هي اللي قليلة الأدب. ولا عمران ما كانش رفع إيده عليها. وبعدين عمران مش غريب. ده أخوها الكبير. فيها إيه لو ضربها قلم. خلاص الدنيا اتهدت يعني.
هيام بغيظ
ولو كان زياد اللي عملها كان ده هيبقى كلامك برضو.
عمران الجد بغضب
بس بقى منك ليها مش عاوز أسمع صوت واحدة فيكم. وإنت يا عمران اطلع غير هدومك دي على ما أبوك وعمك يجوا بالسلامة. ولينا قعدة واللي غلط فيكم هيتحاسب.
عمران بص لهم بزهق وخد بعضه وطلع على أوضته. وقفت هيام بتغلي من الغيظ. وعاديلة كانت بتبتسم بشماتة.
ــــــــــــــــــــــــــــــــــــــــــــــــــــ
في أوضة ميرنا. كانت ميرنا قاعدة على السرير عمالة تعيط. وقاعدين معاها إسراء وهاجر. وبالصدفة كان عمران معدي من قدام الأوضة. وقف لما سمع الحوار اللي داير بينهم.
إسراء
يا بنتي خلاص بقى. أمال لو كان ضربك بالنار كنتي عملتي إيه.
هاجر
خلاص بقى يا ميرنا بطلي عياط. عمران أخوكي الكبير وأكيد ما كانش قصده يزعلك.
ردت ميرنا بغضب.
ميرنا
لا. عمران أخوكم إنتوا مش أخويا. وأنا مش أخته. لو كان بيعتبرني أخته زيكم ما كانش اتصرف معايا بالشكل ده.
إسراء
طيب اهدي واحكيلي. هو إيه اللي حصل يخليه يرفع إيده عليكي.
ميرنا بصت لهم وسكتت شوية وبعدين قالت بتردد.
ميرنا
كنت واقفة مع عز قدام السوبر ماركت بطبع ورق الكلية اللي هقدمه. ومن سوء حظي البيه أخوكم شافني وشدينا قصاد بعض.
إسراء
طيب ما هو معاه حق يتعصب يا ميرنا. إنتي مش غريبة عن عمران. هو مش بيحب واحدة فينا تقف مع راجل غريب.
ميرنا بغيظ
وأنا يعني كنت واقفة أتصاحب عليه انتي كمان.
هاجر باستغراب
أنا في حاجة مش فاهماها. إشمعنى ميرنا اللي عمران بيتعصب جامد كده عليها. ما أنا بقف مع عز وشافني كذا مرة. ما اتعصبش ولا قالي حاجة.
ميرنا وإسراء بصوا لهاجر وبعدين بصوا لبعض باستغراب… برة الأوضة عمران نفخ بزهق وتمتم وهو داخل أوضته.
عمران
ربنا ابتلاني بتلات مجانين. وطبعًا الاستنتاج في الآخر هيطلعوني بحب ميرنا وغيران عليها.
ـــــــــــــــــــــــــــــــــــــــــــــــ
بالليل بعد العشا كان الكل قاعد في الصالة بيشربوا الشاي مع بعض. حسين بص لعمران بغيظ.
حسين
وإنت تضربها ولا تحاسبها إنت ليه. أنا موت ولا إيه يا حضرة الظابط. وحتى لو غلطت في حاجة تيجي تقولي وأنا لو ما كسرتش دماغها وإنت واقف ابقى حاسبها إنت براحتك.
عمران بهدوء
خلاص يا عمي حقك عليا. كنت راجع تعبان وما أخدتش بالي من تصرفاتي. بعتذر منك.
هيام بغيظ
واعتذارك ده هيرد كرامة البت اللي مسحت بيها الأرض قدام اللي يسوى واللي ما يسواش.
عاديلة بحنق
ما الواد اعتذر وخلاص يا هيام. ولا إنتي عاوزة حريقة تشبعي فيها لطم إنتي وبنتك.
حسن
بس منك ليها. وإنتي يا أم زياد عمران مش غريب. ده أخوها الكبير. غلط واعتذر أهو. يبقى بلاش نكبر الموضوع ونزعل العيال من بعضهم.
عاديلة
ما هو ده اللي مرات أخوك عاوزاه. عاوزة تولع الدنيا وخلاص.
حسن بغضب
بسسس. اقفلي إنتي دلوقتي.
عاديلة لوت شفايفها بغيظ وسكتت. عمران الجد بص ناحية ميرنا وعمران وزياد وهاجر.
عمران الجد
خلاص اقفلوا الموضوع ده. مش عاوز أسمع له سيرة تاني. وإنت يا عمران إجازتك المرة دي كام يوم.
عمران
إن شاء الله 15 يوم يا جدي. بس في حاجة ولا إيه.
حسين بهدوء
ما فيش يا بني. بس عز ابن عمك حامد قابلني بعد العصر وطلب إيد ميرنا.
عمران بص ناحية ميرنا وهو بيكور إيده بغيظ. وميرنا خافت منه وبصت في الأرض.
عمران الجد
إنت إيه رأيك في الموضوع ده يا عمران.
عمران
اللي تشوفه إنت وعمي يا جدي. ولو هي موافقة أنا مين علشان أقول لا.
عمران الجد بخبث
متأكد من الكلام ده يا عمران. ومش عاوز تقول حاجة قبل ما نقول كلمة للناس.
عمران بص ناحية ميرنا وفضل ساكت شوية وبعدين قام وهو بيقول.
عمران
لا يا جدي عن إذنكم. هطلع أنام علشان راجع تعبان من السفر.
عمران سابهم وطلع. وعمران الجد بص ناحيته وهز راسه بيأس. وبعدين بص ناحية هاجر وهو بيقول.
عمران الجد
دلوقتي يا هاجر يا بنتي. إنتي متقدملك مروان ابن خالك جمال. وزياد ابن عمك عايزك. وأنا علشان ما أظلمش واحد فيهم ولا أظلمك هسيب الاختيار ليكي.
هاجر بصت ناحية زياد وبعدين بصت بخوف ناحية عاديلة. عمران الجد فهم خوفها من أمها وقال بحدة.
عمران الجد
أنا قاعد يا هاجر. وأبوكي وعمك كمان. عاوز أسمع رأيك. ومش عاوزك تخافي من حاجة. ده جواز. والواحدة بتكمل مع اللي تحبه ويرتاح له قلبها.
هاجر بصت ناحية زياد اللي كان قاعد على جمرة نار مستني يشوف هتقول إيه.
هاجر بكسوف
أنا حابة زياد ولد عمي يا جدي. بس عاوزاه يتعالج ويشتغل زي باقي الرجالة.
عاديلة بصت لها بغضب وهي بتغلي. زياد ابتسم بفرحة وهو بيقول.
زياد
وأنا موافق يا جدي. هتعالج وهشتغل من الصبح كمان. وبوعدك الشبكة والشقة هجيبهم من عرق جبيني. وما هاخدش ساخ واحد من حد. أهم حاجة تكون مرتاح ومبسوط يا جدي.
عمران الجد بغيظ
وإنت حاشر جدك ليه يا زفت. ما ترد عليها من غير ما تحشرني في النص.
الكل ضحك. وهاجر وزياد بصوا للأرض بكسوف. وعاديلة كانت بتغلي من كتر الغضب والغيظ وهي باصه ناحية هاجر اللي كانت مرعوبة منها.
ــــــــــــــــــــــــــــــــــــــــ
في أوضة عمران.
عمران نايم على السرير وعمال يتقلب بزهق ومش عارف ينام. قام وهو بينفخ.
عمران
وبعدين بقى في أم الليلة اللي مش هتخلص دي. ما تتجوز اللي تتجوزه. أنا مضايق ليه كده.
قام وطلع البلكونة يشم شوية هوا. عقد حواجبه بغيظ لما شاف ميرنا قاعدة في الجنينة بشعرها.
عمران بغضب
البت دي مش ناوية تجيبها لبر. ماشي يا ميرنا. أنا وإنتي والزمن طويل.
خد بعضه وطلع من الأوضة علشان ينزل لها.
في الجنينة. كانت ميرنا قاعدة سرحانة وهي قاعدة بشعرها وباصة للقمر. عمران جه من وراها وهو بيقول بغضب.
عمران
إنتي إيه اللي مقعدك بشعرك كده. خلاص ما بقاش حد مالي عينك ولا إيه.
ميرنا اتخضت منه ولبست طرحتها بسرعة وهي بتقول بحنق.
ميرنا
ما أنا قاعدة لوحدي أهو. وبعدين ما كنتش أعرف إنك لسه صاحي. وإلا ما كنتش طلعت أصلًا.
عمران
طيب في أسلوب رد أحسن من كده. ولا إنتي عاوزة تعصبيني عليكي.
ميرنا ببرود
لما إنت تتكلم بأسلوب كويس هبقى أرد عليك بأسلوب كويس برضو.
عمران بص لها بغيظ وسكت شوية وبعدين قعد جنبها.
عمران
طيب قوليلي. في حاجة بينك وبين عز.
ميرنا باستغراب
حاجة زي إيه يعني. مش فاهمة.
عمران بغيظ
أمال الأستاذ متقدملك على عميني يعني.
ميرنا بشك
عاوز تقول إيه يا عمران. إني ماشية مع عز في السر علشان كده اتقدملي يعني.
عمران
والله أنا ما قولتش كده. بس الجواب بيبان من عنوانه.
ميرنا بصت له بغضب وقامت وهي بتقول بدموع.
ميرنا
إنت متخلف وتفكيرك زبالة. علشان كده مفكر الكل زيك. حقيقي أنا بكرهك. إنسان زبالة.
ميرنا سابته ومشيت. عمران قام وهو في عز غضبه وكور إيده جامد وهو بيقول بغيظ.
عمران
طيب يا ميرنا اصبري عليا. وأنا هعرفك مين اللي متخلف والزبالة ده. وابقي قابليني بقا لو خليتك تتجوزي انتي وحبيب القلب.
