رواية جليلة اختفت والسر في الجدار الفصل الثاني بقلم ياسر عوده
وكل اللى عملته وقتها اني طردتهم هما الاتنين، وطبعا طلبت من جابر يطلقني، وفعلا اتطلقت منه وكنت عايشه في صدمه، وقررت اني مافكرش في أي راجل تاني ابدا ولا افكر في الجواز، وعشت حياتي بعيد عن اختي اللى سمعت انها اتجوزت هي وجابر بعد ما اتنقلوا لقريه تانيه بعيده عني، بس من حوالي شهر وانا عماله اشوف كوابيس عن اختي، وحسيت قلبي واكلني عليها، عارفه انها صدمتني ودمرت حياتي، بس مهما كان دي اختي والضفر عمره ما يطلع من اللحم، وعلشان كده انا روحت للقريه اللى عايشه فيها جليله مع جابر وحبيت اقابلها واطمأن عليها، قدرت اوصلهم بعد ما سألت عليهم ولما وصلت للبيت ماعرفتش اقابل جليله وقابلت جابر اللى طردني، قالي انه مش عاوز يشوف وشي ابدا، بس انا اتحايلت عليه اشوف اختي او حتي يديني رقمها اكلمها، بس هو مارداش وحسيت ان اختي فعلا مش كويسه وجابر ده عمل فيها حاجه، وعلشان كده جيت القسم واقدم بلاغ، والباقي حضرتك سمعته من الامين طه.
ــــــــــــــــــــــــــــــــــــــــــــــــــــــــــ
وبعد ما سمع المامور حكايه حسنه وطبعا كان مصدوم من اللى سمعه، بس لغايه دلوقتي كل اللى سمعه من طرف واحد بس، وشغله علمه انه لازم يسمع من كل الاطراف والاهم من كده، انه يسمع للتحريات وكمان للشهود علشان كده هو لا كدب حسنه ولا صدقها، بس من جواه كان عنده احساس ان حسنه كانت صادقه في كل الكلام اللى قالته.
انتظر المامور التحريات اللى بيعملها الامين طه والمخبرين اللى معاه، وعلشان الموضوع هياخد وقت طلب من حسنه انها تروح ووعدها انه هيحقق في بلاغها بنفسه، وعلشان يخليها تطمأن هو طلب واحد من امناء الشرطه ف القسم يسجل ليها بلاغ رسمي، وفعلا اطمأنت حسنه وحست ان اخيرا الشرطه صدقتها وهتحقق في بلاغها.
التحريات اللى طلبها المأمور وصلت تاني يوم، وابتدي الامين طه يحكي للمأمور كل اللى وصله وقال:
-زي ما حضرتك طلبت يا فندم، احنا عملنا تحريات مفصله عن جليله، والحقيقه ان الجيران كلهم اجمعوا ان جليله مابتخرجش من البيت نهائي وانها مختفيه من حوالي سنتين تقريبا، لما سألوا جوزها جابر قالهم ان هي رجليها وجعها بقالها فتره وعلشان كده بطلت تخرج وهو اللى بيجبلها كل طلبتها وطلبات البيت بنفسه.
اتكلم المأمور وقتها وقاله:
-ودا كلام طبيعي ويدخل العقل يا امين؟
-لا طبعا يا فندم، انا لما وصلت للمعلومات دي، دخلت بيت جليله وامين وجبت جليله معايا.
-يعني انت لقيت جليله فعلا؟
-ايوه يا فندم لقتها، وهي معايا بره، تحب ادخلها؟
-ايوه دخلها.
وطلع الامين طه بره المكتب، وبعد لحظات دخل ومعاه وحده، وطلب منها المأمور انها تقعد، ولسه هيتكلم معاها لقى في عسكري دخل وقاله:
-مدام حسنه بره يا فندم وعاوزه تقبلك.
-دخلها بسرعه.
وفعلا دخلت حسنه وطلب منها المأمور تقعد على الكرسي، ولما قعدت انتبه المأمور ان حسنه ماظهرتش أي رد فعل لما شافت جليله، استغرب من التصرف الغريب ده وسألها بتعجب؟
-مش هتسلمي على اختك يا مدام حسنه؟
اتخضت حسنه وسألته:
-انتم لقيتم جليله؟، هي فين؟
طبعا استغرب المأمور من كلمها وقالها:
-يعني دي مش جليله؟
وكان وقتها مشاور على الست اللى كانت قاعده قدمها، وردت حسنه على طول وقالت:
-لا يا فندم، انا معرفش مين الست دي.
بص المأمور لـ الامين طه وقاله:
-يعني ايه الكلام ده يا طه، الست دي مين وجايبها منين.
طه كان متوتر وعرف انه ارتكب غلط كبير اوي، ورد على المأمور وقاله:
-يا فندم انا دخلت بيت جابر زي ما قولتلك، ولقيت الست دي وسألتها انت مين وقالتلي انها مرات جابر، وجبتها وجيت لحضرتك.
وقتها المأمور بص ليها وسألها:
-انتي مين؟
-انا اسمي سميه، وابقى مرات جابر.
الموضوع كله كان متلغبط، ومافيش حد كان فاهم حاجه، بس بعد شويه وصل جابر نفسه للقسم، ودخل مكتب المامور ووضح جابر سوء التفاهم وعرفهم ان الست اللى معاهم تبقى سميه ومتبقاش جليله، وانه اتجوزها بعد ما طلق جليله اللى اختفت ومايعرفش مكانها فين.
طبعا وقتها مافيش حد صدقه، وانفعلت عليه حسنه وقالت انها بتتهمه بانه قتل اختها واتخلص من جثتها، اما بالنسبه لـ جابر فكان بيتعامل بهدوء شديد جدا، واتكلم مع حسنه وقالها:
-لو عندك دليل على الكلام اللى بتقوليه قدميه، انما لو بتتهمي الناس بالباطل، فعاوز اعرفك ان القانون مابيخدش بالكلام اللى انتي بتقوليه ده.
طبعا كان واضح من كلام جابر انه فاهم في القانون، ودي حاجه طبيعيه جدا لان جابر كان في كليه الحقوق، هو فعلا ماشتغلش بشهاده بتعته، بس دا مايمنعش انه عارف القانون.
بس طريقه كلام جابر خلت المأمور يتأكد ان في حاجه هو مخبيها، وفضل يحقق معاه علشان يعرف أي معلومه عن جليله، بس بدون فايده وكان جابر مصمم على اقواله، والنتيجه ان المأمور قرر الافراج عن جابر وعن مراته سميه، وساعتها حسنه اترجت المأمور انه مايسبش جابر لان اختها جليله اكيد حصلها حاجه، بس المأمور رد عليها وقالها:
-انا مش عاوزك تقلقي يا مدام حسنه، انا عامل حسابي على كل حاجه، وهنوصل لـ اختك جليله قريب اوي، عاوزك تمشي وتستني مننا اتصال نعرفك فيه كل اللى وصلناه.
المامور ماقلش لـ حسنه أي تفاصيل، بس هو طلب ان جابر يتحط تحت المراقب المشدده.
المامور كان مقتنع ان جابر اكيد هيحوم حولين جريمته، يعني لو كان مخبي جليله في مكان اكيد هيروح يطمأن ان كل حاجه تمام، اما بقى لو كان قتلها مثلا ومخبي جثتها في مكان فممكن يروح للمكان اللى دفنها فيه علشان يطمأن انه هيفضل في امان، وبعد مراقبه جابر 3 ايام واحد من المخبرين اللى بيرقبوه شافه وهو رايح لبيت مهجور في القريه، المشكله انه رايح البيت ده في وقت متأخر جدا، ولما اتحري المخبر عن البيت ده عرف ان البيت بتاع جابر، وعرف كمان ان جابر ديما بيتردد على البيت دا في اوقات متأخره من الليل.
طبعا بمجرد ان المعلومه دي وصلت المأمور، هو اتأكد انه خلاص عرف مكان جليله، وخد فريق من الشرطه بنفسه وطلع على البيت المهجور، وهناك واول لما دخل البيت شاف حاجه غريبه جدا، شاف اكتر من حفره في البيت، وكان في ادوات حفر وفي البدايه مافيش حد كان فاهم حاجه، بس بعد ما طلب المأمور فريق المعمل الجنائي لفحص البيت، وبعد الفحص اتكلم رئيس فريق المعمل الجنائي مع المأمور وقاله:
-واضح كده من طريقه الحفر ان الغرض منه ماكنش دفن جثه خالص.
-اومال الحفر ده كله ليه؟
-اعتقد كده دي عمليه بحث عن اثار.
الموضوع اختلف وقتها، ودي كمان جريمه جديده هتنضم لملف جابر، بس المأمور طلب من رئيس فريق المعمل الجنائي انه يفحصوا البيت كله كويس جدا، وبمجرد ان المامور رجع مكتبه جاله اتصال من واحد من الامناء اللى في البيت المهجور وقاله:
-عاوزينك ترجع تاني يا فندم بسرعه.
-خير يا امين، حصل ايه؟
-لازم تيجي يا فندم وانت هتفهم كل حاجه.
وبعد ما قفل المامور الاتصال راح بسرعه للبيت المهجور، وهناك لقى رئيس فريق المعمل الجنائي مستنيه وقاله:
-بعد ما حضرتك مشيت وطلبت مننا فحص البيت كله، انا شوفت الجدار ده واللى كان شكله غريب ومش طبيعي.
-تقصد ايه بكلامك؟
-الجدار سميك كدا، تقريبا كده السمك ما بين 60 الى 80 سنتي، ودي حاجه غريبه ومش مفهومه ابدا، وعلشان كده طلبت من الرجاله انهم يكسروا الجدار ده علشان نشوف هو ليه معمول بالشكل ده.
وفعلا لما الرجاله بداءوا يكسروا فيه لقينا جواه جثه.
راح المأمور وشاف الجثه اللى لقوها في الجدار، وطبعا المامور كان متأكد زي ما حضراتكم توقعتم ان دي جثه جليله، ودا كان دليل قوي ضد جابر، وطبعا المأمور ماستناش عليه، بعت فريق للقبض عليه، وكمان بعت اللى يجبله اخت جليله اللى اسمها حسنه، وانتظر المأمور في مكتبه لغايه لما يتم القبض على جابر، اصل جابر بمجرد انه عرف اللى حصل في البيت المهجور بتاعه اول حاجه عملها انه هرب فورا وخرج من القريه، بس افراد الشرطه عملوا اكتر من كمين للقبض على جابر، والمامور كان بيتابع كل حاجه بنفسه.
بعد ساعتين زمن بس من نصب الكمائن تم القبض على جابر فعلا، كان هبان في عربيه من العربيات الاجره، حاول يخرج من المحافظه بس واحد من الضباط المسئولين في كمين من الكمائن وقف العربيه اللى كان جابر فيها، وفتش العربيه ولما شاف جابر شك فيه، وجابر كان السبب اصله كان بيحاول يخبي وشه مع ان مافيش حد من اللى في الكمين كان معاه صوره لـ جابر اصلا، ولما الضابط انتبه ان جابر بيحاول يخبي وشه، طبعا شك فيه وابتدي يسأله عن اسمه وبلده وكمان طلب منه البطاقه الشخصيه، وكان باين على جابر التوتر والخوف ودا خلى الضابط يركز معاه اكتر، وبسبب خوف جابر قدر يكشفه فعلا ويمسكه وبالكشف عن بطاقته الشخصيه عرف انه مطلوب القبض عليه.
بعد ما اتقبض على جابر وقعد قدام المأمور اللى قاله:
-انا مش عارف ابداء معاك بأنهي جريمه، ابداء بالجريمه الاساسيه وهي جريمه قتل جليله واخفاء جثتها، ولا جريمه البحث عن الاثار؟
انفعل جابر وقتها وقاله:
-قتل ايه يا باشا، انا ماقتلتش جليله، جليله اصلا ماتقتلتش، جليله لسه عايشه.
-والمفروض اني اصدق الكلام الفارغ بتاعك ده انها لسه عايشه وانت ماتعرفش مكانها صح، وبالمره مش انت اللى كنت بتدور على الاثار في البيت المهجور، وكمان هنقول ان البيت المهجور مش بتاعك من الاساس، صح كده يا جابر واقولك قوم امشي روح.
-انا ماقولتش كده يا باشا، حضرتك انا هقول كل الحقيقه، البيت بتاعي انا مش هنكر، وكمان كنت بدور على الاثار فعلا بس مالقتش حاجه، بس جليله انا ماقتلتهاش، والجثه اللى لقتوها دي مش جثتها اصلا، جليله عايشه.
-خليني معاك للاخر، الجثه مش جثه جليله، تمام اومال بقى جثه مين؟، ولو جليله ماقتلتهاش هي فين دلوقتي؟
-معرفش، صدقني يا فندم معرفش.
سكت جابر وكمان سكت المأمور، وبعد لحظات جابر قال:
-انا هحكي لحضرتك كل حاجه حصلت بيني وبين جليله.
رجع المامورب بضهره على الكرسي وقاله:
-احكي وانا سامعك.
