رواية انجدني من الغرق الفصل الثاني بقلم امل بكر
وقفت قدامهم ولقيت المحامي بينطق،
-يعني انتم تجار مخـ.درات !!!
-لاء مين الي قالك كده
يحيي بصلي ،
-ليال انا قولتله كل حاجه علشان يقدر يساعدنا
فتحت بوقي بصدمه وقولت بعصبيه ،
-يحيي اسكت دلوقتي
صالح بصلها بدهشه انها كمان عارفه ومش بعيد تكون معاهم
اتكلمت وانا بحاول اهدي رفعت راسي ليه وقولت ،
-وبعد لما عرفت هتعمل اي هتساعده يخرج !!!
يحيي اتكلم ،
-ايوه هو قالي قول الحقيقه وهو هيساعد ده شغله يعني اكيد حل قاضيا زي كده
صالح اتكلم ،
-انا مش بشتغل في القاضيا دي
بلعت ريقي بتوتر ،
-يعني اي بعد لما عرفت مش هتدخل وتشوف شغلك ؟.!
بصلي وقال بضيق ،
-ده مش شغلي انا مش هشتغل في الجريمه دي
بعصبيه فلتت مني وصوتي علا،
-يعني اي مش هتشتغل انت بتهزر !!!!
يحيي مسك دراعي ،
-ليال صوتك احنا قدام القسم
شديت ايدي بعصبيه ،
-انت مش سامعه بيقول اي ؟!!
صالح قال بزهق ،
-انا ماشي قولت اخر كلامي
مسكت دراعه بسرعه وانا بقف قدامه بص علي دراعه وشده من بين ايدي
-بقولك اي مفيش غيرك دلوقتي وطالما عرفت يبقي اتفضل ادخل وحل
عقد حواجبه وقال ،
-انتي عايزاني اشارك في حاجه حرام !!!..
قلبي دق من الكلمه ولكني تجاهلت وقولت ،
-انا مش عايزه اسمع مواعظ دي شغلتك
-انتي بتقولي اي بقولك حرام !! وانا بكده هشارك معاكم ولتاني مره هقول انا مش بشتغل في القاضيا دي ولو كنت اعرف مكنتش جيت ولا رديت عليكي
-طيب لو سمحت بهدوء كده ادخل واتصرف واي مبلغ هتطلبه هيدفعلك حالاً كاش
-انتي شكلك مبتفهميش يعني بقولك حرام تفتكري لو دفعتي اي مبلغ هيبقي حلال يعني ؟!!
-يعني انت عمرك ماعملت حاجه حرام شريف اوي ؟!
مسح علي شعره وقال ،
-هو انتي ازاي بتتكلمي عن الحرام بشكل بسيط لا بجد ردي عليا
بنرفزه من كلامه لاني مش عارفه انطق ارد ،
-مش رده وماشي امشي احسن برده في غيرك مليون
-شكلك مش عارفه دينك علشان كده مضايقه اوي
بلعت ريقي بصعوبه ومعرفتش اخد نفسي كويس ولكني انفعلت وضربته في صدره جامد ،
-انت واحد غبي
يحيي قرب بسرعه بعد لما سابني علشان اتصرف كالعاده وهو ضغط علي ايده واتكلم وهو بيوجه كلامه ليحيي ،
-انا مش هرد عليها مش هقولك غير ربيها وعلمها الاحترام
قولت بعصبيه وانا بقرب عليه من تاني ولكن يحيي مسكني ،
-انت ازاي تكلمني كده واحد غبي
يحيي بعصبيه ،
-بس بقي اهدي انتي ازاي تمدي ايدك عليه !!!
-ده بيغلط فيا عايزاني اسكتله ؟!!
-مش وقته هنعمل اي دلوقتي
بانفعال شديد وانا ببص عليه وهو بيركب عربيته ،
-معررررفش اتصرف انت لمره واحده
قولت كده وبعد خالص ومشيت بعيد كان فيه . رصيف عالي قعد عليه فضلت اخد نفسي كذا مره براحه ولكن بفشل ودموعي بتنزل ولكني مسحتهم بعنف
-بس بس مينفعش تعيطي مينفعش اهدي انتي مش ضعيفه
" قومت وقفت ورجعت من تاني القسم "
"قربت من يحيي الي واقف جمبه واحد وشكله كده محامي"
-بابا لسه جوة ؟
اتكلم المحامي بابتسامه ،
-اه بس متقلقوش هيطلع الموضوع بسيط جدًا
باستغراب عكس المحامي الي عامل نفسه شريف ومش بيعمل حاجه ضد الحق ما اهو الراجل هيحل الموضوع بسهوله مقعد الدنيا يارتني ماكلمته من الاول
بعد ساعات بابا طلع وفارد ضهره وعلي وشه ابتسامه هاديه مناسبه لملامحه الحاده يحيي حضنه
-حمدالله علي سلامتك ياحج
-الله يسلمك ياابني
قربت وانا بضبطب علي دراعه ،
-خوفتنا عليك يابابا
كنت مفكره انه هياخدني في حضنه ولكنه رد عادي ،
-انا كويس
بابا قال واحنا طالعين من القسم كله ،
-مين الي جاب المحامي ده ؟!!
يحيي قال بنبره انبساط ،
-انا يابابا
ضبطب علي ضهره ،
-جدع يابني كنت عارف انك انت الي هتعرف تتصرف
كنت ضاغطه علي ايدي جامد ومكنتش حتي حاسه بالوجع
-ومين بقي الي جاب المحامي الاول ده ؟!!
يحيي ،
-ده ليال اخو صاحبتها
بعدنا عن القسم بمسافه بابا بصلي وقال بحده ،
-وهو طلع ملهوش في حل القاضيا دي مش كده ؟!
هزيت راسي باأه
علا صوته وانا اتنفض بخوف ،
-ازاي تجيبي واحد مش واثقه فيه ولا عارفا !!!! !ردي
قولت بخوف شديد ،
-بابا انا مكنتش اعرف وكمان يح….
"يحيي بصلي ونفي براسه بمعني متقوليلهوش "
"وكالعاده جبت اللوم كله عليا "
-انطقي وكمان اي !!!!
-وكمان كنت خايفه وعايزه حضرتك تطلع بسرعه
بصيلي وقال باستفسار ،
-حد قاله حاجه انا مقولتلهوش اوعكو تكونو فتحتو بوقكم
قلبي دق بعنف ونفيت براسي بسرعه وقولت وانا باصه ليحيي ،
-لا يابابا ميعرفش بحاجه
بشك ضيق عينه عليا ،
-ولي مشا والا يكون عرف منك الحقيقه
رفعت راسي ليه "عرف مني " واشمعنا انا اصلاً يحيي الي اتكلم وقاله كل حاجه !!!
-لاء يابابا هو جاله اتصال ومشي علشان كده يحيي جاب واحد غيره
-ماشي يلا روحي واحنا رايحين الشغل
يحيي بص حواليه وقال لابوه ،
-بابا بلاش نروح علي مكان الشغل خلينا نروح الشركه عادي ونشتغل من علي الالب
-اشمعنا !!!
-علشان محدش يكون مراقبنا
-صح عندك حق
"الحارس فتح لبابا ويحيي باب العربيه ومشو وانا فضلت متابعهم بعيني لغيت لما اختفو "
"هما مش خايفين عليا في الوقت ده اروح لوحدي !!! ضحكت بسخريه علي نفسي اني لغيت دلوقتي وانا بتأثر فتحت موبايلي وطلبت أوبر وصل بعد وقت ركبت وصلني البيت غيرت هدومي وعملت شعري ضفيرة علي جمب وطلعت البلاكونه
افتكرت كلام المحامي الي مفيش في اخلاقه اتعصبت ان ازاي معرفتش ارد عليه كويس ازاي كلمني كده وانا لي مضايقه انا مش بعمل حاجه حرام وده شغل واكل عيش ايوه بابا قالي كده ومفيش غير كده اصلاً
مسكت دماغي بوجع فتحت باب اوضي وندهت علي سناء الي بتهتم بالبيت
طلعت علي السلم جري ،
-اتفضلي ياحبيبتي اطلبي
قولت بتعب ،
-معلش ياسناء اعمليلي كوبايه قهوة مظبوطه
-من عيوني
-ياريت بسرعه
دخلت البلاكونه من تاني وانا عماله افكر في كلامه الي خلاني عاجزه عن الرد ودي اكتر حاجه بتخليني مضايقه شويه وسناء حطت قدامي القهوة وطلعت
شربت وانا حاطه الكوبايه بين ايديا بصيت علي موبايلي وجالي فكره اني اتصل بيه واهزقه ولكني اتراجعت طب افضحه واعمل فديو دلوقتي لا طبعاً مينفعش
سيبت الكوبايه علي التربيزه ومسكت الموبايل وانا حاسمه امري
عملت سيرش "هو المـ.خدرات حرام "
ولكني مسحتها بسرعه وقفلت الموبايل وقولت بصوت مسموع ،
-انت هبله ياليال خلاص كلام واحد زي ده هيأثر فيكي مش واثقه في ابوكي ولا اي !!
خلصت كوبايه القهوة وطلعت قفلت البلاكونه وشديت الستاره وروحت انام ضربت المخده بعصبيه مازلت منفعله جوايا
"""""""""""""""""""""""""""""""""""""""
صحيت تاني يوم علي زن سناء
-خلاص بقي قومت قومت
-انا اسفه ياحبيبتي بس منصور بيه تحت وقالي اصحيكي علشان الفطار و
قاطعتها وانا بحط رجلي علي الارض ،
-خلاص ياسناء اي هتحكيلي قصه حياتك !!
-انا اسفه ياهانم
-خفي كلام الله يسترك مش علي الصبح
-حاضر
"دخلت الحمام وغيرت هدومي لبست جيبه قبل الركبه خضرا وتوب ابيض بنص عملت شعري كحكه وفرقت قصتي الصغيره من الجنبين ولبست كوتشي ابيض ونزلت "
"شديت الكرسي بتاعي وقعد معاهم علي السفره "
بابا اتكلم ،
-احنا انهارده هنروح الشركه اهملنها اليومين الي فاتو
"بابا بيشتغل في شركه تصدير العربيات علشان يخبي الشغل التاني وراها والحكومه متقدرش تثبت حاجه ولا حد يلاحظ"
يحيي رد عليه ،
-ماشي هاجي معاك
رد عليه بسخريه ،
-مااكيد هتيجي معايا هو انت بتعمل حاجه غير الشغل معايا
رفعت عيني علي يحيي الي زعل ولكنه ابتسم بهدوء وهو بيحاول يخبي
-بابا مين الي عمل فيكو كده امبارح وبلغ ؟!..
ساب المعلقه وقال بوعيد ،
-واحد بيشتغل معانا كان محتاج سلفه وانا مردتش فاراح اتعاون مع ناس عايزلنا الشر
شربت بوق عصير وقولت بدهشه ،
-طب لي يابابا معطيهوش سلفه !؟؟
بصلي وقال ،
-عايزاني اديله ميه الف جنيه علشان يعمل عمليه لأمه؟!
-لو فيها روح انسان مفيهاش مشكله لو ساعده واهو يبقي مبلغ لله
ضحك بصوت عالي ممزوج بسخريه بص ليحيي وقال ،
-الحق اختك بتقول اي !
يحيي بطريقه بقت نسخه من بابا ،
-بس ياليال ياحبيبتي بتقولي اي !!
"سرحت وفضلت افكر وبقيت حاسه اني مبقتش عارفه اهلي الي صح ولا مين الي صح ! مش عارفه اندمج مع الناس كل مااحب حد بابا يبعدني عنه وكأنه مش عايزاني يبقي ليا صحاب ولا ناس احبهم مش عارفه اطلع الكلام الي جوايا من سنين لحد لانه مينفعش اقول حاجه مينفعش "
-بقولك اي ياليال انتي هتيجي تشتغلي معانا في الشركه بتاعتنا
بصتله وبتردد ،
-بس يابابا انا مش عايزة اشتغل في المكان ده
حط الشوكه علي الطبق ،
-انتي هتكسري كلمتي ولا اي !!!!
-لا لا مقصدش بس انا مش بفهم في الشغل ده
-بسيطه هتتعلمي
مسحت بايدي علي الجيبه من تحت السفره بتوتر
-طب ممكن بلاش انهارده
-ماشي ريحي انهارده
يحيي خلص اكل وقال ،
-طيب يابابا انا هروح مشوار وهشوفك في الشغل
-متتأخرش
-حاضر
يحيي طلع وبابا باس ماما من خدها وطلع مشا فضلت متابعا وهو بيطلع بسرحان
ماما مسكتني من ايدي وهي بتقول ،
-تعالي معايا عايزاكي
قومت معها وقعدنا في الجنينه الي بره ،
-في اي ياماما ؟!
اتكلمت وهي بتحط رجل علي رجل وبابتسامه هاديه،
-اي رائيك في طارق ابن نڤين صحبتي
-مين طارق !!
-الله انتي نسيتي الي كنا مع بعض الاسبوع الي فات في النادي
اتنفست ،
-اه انتي قصدك ده ماله رائي ازاي يعني ؟!
-كخطيبك ياحبيبتي اكلم ابوكي عليه ؟
