رواية سواد الاثمد الفصل الثلاثون بقلم نورس
صرت بنص الشارع أمشي بسرعة ودموعي تنزل رجلي ما تعيني عالركض أمشي وأتلفت مثل المخبلة
اشتغلت گلوبات السيارة الأمامية من وراي وصوت هورن السيارة صكّ بأذني
انداريت فاتحة عيوني على وسعها
شهگت حيل :- هاي سيارته هاي سياررته يا ربي
ما تفصلني عن السيارة غير أمتار بسيطة
صرت أركض بكل سرعتي نسيت حتى ألم رجلي وجسمي اللي صار يصّل عليَّ صل من الوجع
ماريد أندار ماريد أشوفه يمشي وراي ولا أريد أشوف وجهه
صرت أبجي وأحجي وية روحي وأردد
- ما أرجعلك والله لو يصير بيها موتي والله يا عبددد ما أرجعلك
عبرت شارعهم بسرعة ودخلت بشارع ثاني وعدل وگبل طلعته أريد بس أوصل للشارع العام
هناك عاد سيارات تمر أشوفلي بشر يخلصني من مصيبتي ما أدري شسوي بروحي أفوت من شارع لشارع
دخلت بفرع لاخ شفت أسواق ركن مفتحة
أضوية المحل مشتغلة وكراتين مكومة گدام المحل وانتبهت لشاب طلع من المحل يحمل بالكراتين يدخلها
انداريت باوعت وراي لهسه ماكو أحد
مشيت بأتجاه المحل دخلت گبل الولد يسفط بالغراض حس على حركتي رفع راسه شافني متفاجئ
صرت أمشي بالمحل وعيني على العصاير اللي بالثلاجات أفتحها وأرجع أسدها أريد ألهي روحي
ما منتبهة للگدامي ولا أعرف شدا أسوي
أريد بس أضيع وكت وأضل واگفة والولد عيونه تلاحگني
ومنو يلومه ؟ ..
بنية بعمري وطالعة بهيج ساعة من الليل وحافية!
عاف من ايده وگام يمشي وراي واني أفتر
گال :- خوية محتاجة شي ؟
ما رديت عليه ولا باوعتله ما أريده يشوف الخوفة بوجهي
رجع كرر عليَّ السؤال مرديت
صار وراي :- يبنية .. هنا أحاجيج .. هيييي يمعودة
أخذت بطل عصير وانداريتله
بان :- هذا بيش ؟
- شنو صار ساعة أحاجيج متسمعين
- مو دا أگولك هذا بيش
- بخمسمية
مشى وگف ورى الميز بس بعده ممرتاحلي يباوعلي من فوك ليجوة ونظراته محتارة أكثر من حيرتي
ضليت واگفة وعيوني تدور بالمحل
گال :- ها متحاسبين ؟
- بعد أريد أشتري
231 تعليق
ضليت أروح وأجي بين الغراض كل شوي أشيل حاجة من الحلويات وأنزلها عود معجبتني والولد يتأفأف
- خوية ترى الوكت تأخر رايد أعزل تأخرت عالبيت
- هسه هسه
أحجي وأباوع عالشارع من جوة المحل
طلع من ورى الميز
- أگلج انتِ شنو فلمج ؟ شنو حافية شنو طالعة بهالوكت خاف مگداية وجاية تضحكين عليَّ ؟ شايلة فلوس ؟
هزيت راسي لا
رد :- اي دحجي هيج من الأول اخذي شتردين وروحي دوختيني
حجاها واندار رجع للغراض يكمل بتسفيطها
عفت الغراض من ايدي عاصرة ملابسي حيل وأباوعله
شال راسه شافني على وگفتي ومرجعة الغراض
گال :- ها شو رجعتيهن ؟
- ماريد أشتري
گام وگف لحيله
- لعد شتردين خبلتيني ترى
- خلي أبقى هنا
حجيتها بترجي والخوف واضح عليَّ ضل صافن بوجهي الولد أشرلي على راسه بحركة
- شبيج بابا بعقلج انتِ امشي روحي منين ما اجيتي
نزلت دموعي :- عليك الله حباب محد بالشارع والله يلزموني يكتلوني
حسيته انصدم وانگلب وجهه من بچيت
- يا هم يكتولج ؟
- أكو سيارة برة دتلحك وراي شردت منهم
صار يباوع للشارع ويتلفت يسألني
- أهلج وين انتِ شمطلعج بهالليل بس دليني على بيتكم
- ما أدري والله ما أدري تيهته بس خليني ضامة روحي هنا شوي وأطلع بس خل يرحون
صرت أحجي ودموعي تصب أمسحهم بيدي وترجع تنزل
هو جان ممرتاح للوضع بين مصدك وممصدك وحقه
بس ما أدري يمكن الله هداه عليَّ لو انكسر خاطره من بچيت طول خلگه وياي وأشرلي بيده
- صيري ورى الميز ودنگي خلي أطلع أشوف
سويت مثل مگلي ودنگت ثنيت ركبي لازمة بالميز بأيد وايدي الثانية أمسح بوجهي من دموعي والبوخة
وجهي حيل عرگان وجسمي كله تعب من الحركة
طلع هو برة يباوع واني عيني عليه من ورى الميز يصير گزاز يبين بس جسمه ما أشوفه كامل واگف بباب المحل
مرت دقايق اندار يحاجيني
- ماكو أحد
- والله مدا أكذب جانوا بسيارتهم وراي شغلوها واني عبرت للشارع الثاني عليك الله خليني بس شوية وأروح خاف بعدهم واگفين منتظريني
- تعرفيهم انتِ ؟
- لا
ضل ساكت گوة عليه وكمل شغله صار يدخل بالكراتين جوة واني عيني عالباب لازمتني الرجفة لا يجيني عبد
مدنگة راسي وعاصرة عيوني سادتهم حيل
فززني صوته :- تاهو سودة هي ؟
هزيت راسي بسرعة وقبل لا أرد كمل حجايته
- هستوها فاتت مناه
فز گلبي وانخطف لوني هو حس عليَّ
گال :- لا تخافين عبرت لذاك الشارع ما وگفت ضلي على گعدتج لا تگومين جاي تفتر ترى
ضليت على وضعيتي وهو صارت حركته ابطأ يدخل بالغراض على كيفه يضيع وكت وعينه بالشارع
السيارة صدك جانت تروح وتجي أسمع صوتها وهي تمر المحل أكثر من تلث مرات يعني دا يدورون عليَّ
غطيت وجهي وصرت أشهك بصوت ناصي خوف لا أحد منهم يسمعني واني بيني وبينهم شارع شكبره وشگده
هيج وصل بية الخوف بذيج اللحظة أخاف حتى من صوت أنفاسي لا يسمعه ويجيني يسحلني بيده
مرت فترة بالعشر دقايق مدري ربع ساعة گمت ما أركز
اجاني :- ماكو اختفوا
- خاف بعدهم
- يابة والله ماكو هاج گدامج الشارع فارغ شوفيه
- حباب بس شوي
ديحجي دك تليفون عالميز جره مشى شوي عني
جاوب :- ها يابة .. اي بعدني بالمحل .. ها هسه هسه
حجاها وباوعلي عاقد حواجبه ومتضايق يسمع الطرف الثاني مبين ديسمعه حجي والولد ضل يبررله
لحد مطلع من المحل ليبرة يحجي وياه صار كل شوي يلتفت بإتجاهي يباوعلي ويحجي بالتليفون
من سد الخط ضل واگف برة ما دخل بعد ولا حاجاني
ضليت گاعدة وگلبي يدك يدك لا بية أگوم اطلع ولا أگدر أبقى على وضعيتي واني حتى ما أدري شصار وياهم
بالي كله يم مُتيم منظر عبد صار گدامي وهو شايل سلاحه ويحوم على راسه يروح ويجي گباله
صرت أبجي وأردد بلساني دعوة ذي النون
- لا إله إلا أنتَ سبحانك إني كنت من الظالمين لا إله إلا أنتَ سبحانك إني كنت من الظالمين...
الدنيا كلها سودة بعيني ما وگف لساني وهو يلهج بيها
لحد ما فزيت على صوت رجال كبير بالعمر يحجي وية الولد وفات بوجهه من الباب للمحل يباوع بيه
أشرله لولد :- هايه ورى الميز يابة
صاروا اثنينهم گدامي واني نازلة للگاع
الرجال جان أصلًا واضح من وجهه عصبي ومنا شافني عيونه صارت براسه ويخازر بأبنه
گال :- منين انتِ عمو ؟ شرايدة ؟
يحجي بنبرة عالية منفعل وگفت أمتمت گوة أرتب بالحجي عدت عليه الكلام الحجيته للولد
- منين ذول أليلحگوج تعرفيهم ؟
ضليت ساكتة أفرك بأيدي
صاح :- متحجين
- زوجي
الولد فتح عينه مصدوم والرجال صفك ايد بأيد بعصبية
- من الله يعابيك على هالبلوة البليتنا بيها تالي الليل
- ما گلتلي زوجها والله گالت ما أعرفهم
اندارلي :- امشي عمو امشي تردين تورطينا وين ننطي وجوهنا روحي شوفيلج غير مكان تتختلين بيه
- يلزمني والله فدوة بس خليني شوية
صاح :- ولج بووية نبتلي والله واحنا لا بيها ولا عليها
صرت أبجي وهو منفعل يحاجيني من شافني ما أرد عليه وگع لأبنه مسبة وغلط ويروح ويجي متهستر
- كافي عمو كافي لا تبجين بس فهميني ليش شاردة منه ؟ أهلج وين ؟
مسحت دموعي وحجيت بصوت مخنوك من البجي
- جنت بالبيت يم أهلي وفات علينا هو وجماعته مسلحين گوة طلعت من البيت وفلتت منهم والله إذا لزمني ما يرحمني يكتلني خلاص
حجيتها ورجعت أبجي وهو يستغفر ويردد
- لا إله إلا الله بيتكم بعيد هسه لو هنا قريب ؟
- ما أعرف والله منين اجيت ومنين رحت انثولت ردت بس أضيع سيارته وصار بوجهي المحل فدوة عمو حباب خليني هنا بس أخابرهم يجوني
مگال باطل انطاني تليفونه دخلت رقم ماما حافظته ودست إتصال يرن وماكو رد مرتين حاولت محصلتها
رجعتله تليفونه واني منهارة وهو وابنه يتشاورون
أسمعه يگله :- شلون هسه نبلغ الشرطة ؟
ديحجون وفاتت نفسها السيارة من گدام المحل
غير وگع گلبي بين رجلية أريد بس أسيطر اوگف على طولي مگدرت وگعت للگاع أسحل بروحي ورى الميز
سفط سيارته ترس گبال المحل طلعوله بسرعة وأسمع صوت واحد يحجي وياهم بس ما أفهم الحجي
دنگت راسي أباوع من ورى الگزاز مو عبد
بس هاي سيارته متأكدة وهذا اليسأل من جماعته
هي لحظات صارت عليَّ مثل الدهر
صرت حالي حال العليل بآخر لحظاته يشوف الموت گدامه وما بيده يسوي شي يخلص روحه من علته
بين صوتهم وصوت أنفاسي وهمساتي واني أدعي شفته يصعد السيارة وتحرك مشى مبتعد فاتوا للمحل
الولد گله :- شفتهم يابة ؟ مو گتلك مسلحين
- ولك ذول لو نازليلنا ولية إلا يفصخونا تفصيخ لا واحد ولا اثنين
باوعلي :- هو هذا رجلج ؟
- ما شفته
- شيريد منج بهالليل لاملة شلة مخانيث وياه يدور عليج بالشوارع شگالتله روحه
- ميقبل يطلك عمو ميقبل
- گولي يا الله يا عمو امسحي دموعج ضلي هنا انتِ واني راح أسد المحل عليج من برة وننتظر رحمة الله بلكي هالرقم الخليتيه يخابرني لو واحد من أهلج يطلع
ابنه گله :- لعد مو گلت أبلغ الشرطة ؟
- أكو سيطرة عالشارع العام راح أروح أبلغهم بالصار ويجون يشوفون شنو الفلم انتَ ارجع للبيت لا تضل مگابل المحل لا يرجعون هذول
يحجون ويسدسدون بالمحل طلعوا اثنينهم قفلوه عليَّ وعافوا أضوية المحل مشتغلة علمودي
ما أعرف هالرجال شلون رب العالمين سخرلياه هو وابنه
ضليت على گعدتي فترة طويلة ما تحركت بوخت حيل المحل يچوي ويخنك من الحر بس بنكة معلگة بالگسف تفتر فوك راسي بس أحسها تذب سم مو هوا
عيوني گامت تغوش أغمض وأفتح بصعوبة
مو نعاس بس دوخة فضيعة لزمتني وجسمي صار يون عليَّ من وجع الوگعة كليتي من جهة ورجلي من جهة
خليت راسي نمت عالگاع عضيت شفتي ونزلت دمعتي
وينج ماما .. وينج إلحگيني .. بابا حبيبي تعال شوف شصار بحالي .. راح أموت والله راح أموت .. ياريت گلبي يوگف وأجي يمك وأخلص من هالدنيا .. دنيا ظالمة ما رحمتنا .. ما رحمت بناتك بابا حبيبي
بين النايمة والگاعدة أهذي واني متمددة على برودة الگاع فزيت على صوت الباب وهو ينفتح
گمت لحيلي أفرك بعيوني الرؤية مواضحة عندي
انفتح وصاروا بوجهي الرجال وابنه سووا مجال
ركزت بنظري وراهم واگف وليد وضابط ببدلته
شهگت بقوة وهو هم أول مشافني اجاني يسأل بية ويباوع لوجهي والرجال يسولفله الصار
خلاني بظهره واندار إلهم يحجي وياهم
وهذا الضابط يأشرله من باب المحل
يگله :- هي مو ؟
وليد هزله راسه وصار يتشكر من الرجال ويصافحه سلم عليهم وأشرلي حتى أمشي گدامه طلعني للسيارة
صعدت وسد الباب عليَّ ضل هو واگف يحاجي الضابط
خليت راسي عالباب ساندة روحي هم وانزاح من صدري بشوفته والله ذب عليَّ بجي بالسيارة
صعد بكرسي السايق واندارلي
وليد :- شبلاج يا خوية گضت والله گضت ما يوصلج هالچلب ولا يلوح شعرة من راسج ما دامنا نشم الهوا
أريد أحجي اسأله على العفتهم بالبيت وراي بس حتى مجان إلي قدرة عالكلام تعبانة تعبااانة حيل
شغل السيارة ومشى شال تليفونه يخابر
- ها أبو علي ..
أول منطق أسمه يلا جريت نفس وهدأت شوية
الحمدلله يعني مبيه شي أكلني التفكير أكل واني بالمحل
دقايق ووگفت السيارة گبال بيته نزل واجى لجهتي فتحلي الباب نزلت رايحة روحي گوة أمشي
فتت للبيت وهو يمشي وراي صارت بوجهنا شيخة
فتحتلي اديها شمرت روحي بحضنها أشهك بچي بصوت عالي واني بحضنها وهي لامتني حيل
وتحاجي بوليد وتسأله
شيخة :- عطيت خبر لأخوك ؟ طلع متسودن عليها يدورها بالشوارع
- گتلو گتلو هسع يجي قريب
حجاها وفات گعد عالتخم أخذتني شيخة غسلت وجهي وتسمي عليَّ منطقت ولا حرف لحد ما سكتت وهديت
طلعت للصالة گعدت جابتلي مَي شربت شوي
وشيخة تسأل بية :- بس گليلي شلون طلعتي من البيت صعد يدورج ونزل يتصايح مثل المسودن گلت راحت البت
وهي دتحجي اندفع الباب حيل وفات مُتيم فاتح عيونه يدور بالوجوه لحد ما وگعت عينه عليَّ
اجاني يباوعلي من فوك ليجوة
تيم الله :- سوالج شي ؟ گضبج ؟؟
هزيت راسي لا طبته علينا خلستني يريد يتعارك
وأخوه يگله :- ما مدحگها أبو علي داخلة يم ازلمة چبير وابنو بالمحل مالهم وحاجيتلهم السالفة خاشينها بالمحل
مسح وجهه بأعصاب ويجر نفس بقوة
- ما خليت دورية تعتب عليَّ ما بلغتها لا خليت باب ما طگيتو بهالليل انسبيت مية سبة بهالساع
- الحمدلله من انلگت جنت لازمة گلبي لا يطلع ماخذها وماشي
وليد :- الولد گلي ماخذلو بالساعة يدور بالمنطقة يروح ويجي يحوم عليها ابن الچلب
هز راسه وعينه تشكلت عليَّ شكلي مبهذل ملابسي متربة رجلي من جوة صارت سودة لأن أركض حافية وشعري مضفور گصيبتين بس مهوّس شعراتي گامزات
- شلون طلعتي من البيت انا مو أتذكر صعدتي فوك ؟
شهربان :- عبرت من البلكونة
من حجيت هيج شيخة شهگت ولطمت على صدرها
- فلشج يالنسرة وما تكسرتي ؟
- لا مو عبرت عالحايط مال بيت مو للگاع گبل
وليد :- إلعب
وأخوه رده :- لا تعجبك بهالسوالف
- نچرة عمي ما خلتو يصلها وما خلتو فرت راسو فر
ما رد على أخوه عينه مشالها عني وملامحه على وضعها عاقد حاجبه ويباوعلي ضايج
- متأذية ؟
- كُلش
- شنو اليوجعج ؟
- صفحتي مناه دتأذيني صارت وگعتي من الحايط للگاع عليها حتى النفس صرت گوة أسحبه ورجلي هم حيل تأذيني
عيوني جانت مدمعة وأسولف من صدك متأذية
مسح على وجهه واندار لعمته
- يمة عينج عليها
- وين رايح ؟
- هين واگفين برة گوم وليد
أخذ اخوه وطلعوا اثنينهم وشيخة اندارت عليَّ طببتني للغرفة گعدت عالسرير راحت شوي ورجعت بيدها طشت صغير بيه مَي دافي أقرب للحار خليت رجلي بيه
تخبلت من شفتها دنگت لرجلي دا أوخر عاطت بية مخلتني وگعدت تفرك بيها على كيفها
جنت مستحية وفشلانة منها مرة كبيرة بعمرها وقدرها تنزل لرجلي جان الفعل غريب عليَّ وهي تردد
شيخة :- يماي ييمة تكسرت رجليناتج عمت عيني اي والله
صخن وجهي گام يطلع حرارة والدمعة متشكلة بعيني
فركتها إلي وغسلتها وجابتلي حبوب شربتهم خلتني أتمدد عالفراش وقللت الأضوية بالغرفة وطلعت
باوعت للشباك جانت بعدها الدنيا ظلمة بس الساعة عابرة الـ ١٢:٠٠ بالليل صرت أغفي واني بمكاني
هستوني غمضت وفزيت على صوت صياح برة
گمت مخروعة طلعت من الغرفة وگفت أباوع
واگف مُتيم بيده سلاح وعمته بوجهه وأخوه بالباب
تيم الله :- روح لبيتك بساع جيب سلاحك وإلحگني
بلا حتى ميسأله دار وجهه وطلع بسرعة
- وين تريد ؟
- عوفيني يمة
- بس حاجيني وين رايد بتفكتك وأخليك
سكت داير وجهه يتنفس سريع
وهي تگله :- أحاجيك لا تديرلي وجهك
صاح بحرگان أعصاب :- داس بيتي يمة داسسس بيتي وتعدى على عرضي واحد مخنث مثل هذا
يأشر على روحه ويصيح بقهر :- أنا هالجربوع الخايس هذا يدوسني وأسكتلو ؟ مشتهي أشرب من دمو هساع والله وما تبرد نار گلبي
- استهدي بالرحمن ولك يمة وين تريد بس انتَ واخيك برگبتو كومة مال لحم لا اخوتك الباقين ولا ولد عمومتك هين خلي يصبّح علينا صبح وسوي التريدو
- ما أبيتها إلو وروح عزام
حجاها وگعد لزم سلاحه سحب الشاجور يعبيه طلق
عمته فوك راسه تحاجيه وهو بعد ما رد مركز بالبيده
عافته وجرت تليفونها فاتت للمطبخ
خلص رجع المخزن لمكانه وگام ديمشي صرت بوجهه
اجت عينه بعيني هواي عيونّا حچت بذيج اللحظة بس اثنينا ساكتين نزلت عيني أسمع تنهيدته خلى وطلع
رجعت عمته باوعتلي :- مشى ؟
هزيت راسي صارت تروح وتجي وتخابر تليفونها مسكت
عيني تراقب حركاتها مجانت خوف مثلي بس قلق وحيرة ملامحها جانت صارمة بعكس شخصيتها
تجاعيدها تارسة وجها بس مو بتعب من هذن اللي تباوعلهن وتجيلك رهبة للحظة من تباوعلك
حتى عمرها مجان مبين كبير حيل، لا مرة بحيلها
ضلت عينها عالباب عاگدة حواجبها مشيت يمها
بان :- خايفة عليهم ؟
- هذول ينخاف منهم مو عليهم دحگي الراح يجرى وينعمل واسمعي الطلايب الجايتج
- لعد ليش هالتوتر
- جنت رايدتو بس يطلع النهار بين ما يجون اخوتو وولد عمومتو ما يروح لحالو بس هو وأخيو هالوحيد
- ليش ممنعتيهم لعد ؟
باوعتلي :- ربيت زلم مو بزران تنطك وتنام على الطگة
ردتها بحدّة وتباوعلي بغضب خلتني أسكت
بقت گاعدة واني ضليت على گعدتها بس گوة مفتحة لأن انطتني مسكن وهسه دا أحس جسمي كله خامل
فتحت عيوني راسي بحضنها نايمة ضيگت عيوني
شفت گدامي وليد بالباب محزم
وليد :- گعديها گعديها بساع
- شرايد منها ما گلك
- ما گال بس يلا ورني ور بتليفوناتو تأخرت عليه
گمت لحيلي اجاني انطاني شماغه ويحجي يستعجلني
- گومي يول گومي بس الطلايب من حدر راسج
خلاها على راسي واني ممفتهمة شي أريد استوعب شديحجي جرني من ايدي گومني وياه وشيخة ورانا
بان :- شبيك شكو
شمرلي حذاء :- إلبسي يولي بلا حجي زايد
دنگت لبستها حتى مخلاني أشد القيطان طلعنا للسيارة شغل وشخطها بسرعة يمشي سريع طاير بينا طير
- شكو وليد بس فهمني
- راح يردج يولي مو رايدة تدحگين بنتج ؟
فز گلبي لآخر كلمة متجاهلة بداية كلامه
- عليك الله حشوفها ؟
هز راسه بلا ميحجي ضليت لازمة صدري گلبي يدك سريع حتى الهبطة نسيتها وصار فكري كله بريحانة
سألته شلون مجاوب
يابة لگيتوها ؟ هم محجى
زين عبد جابها ؟ ما رد
طول الطريق ساكت وتليفونه خبصه خبص
وين يلا وگفت السيارة بنهاية شارع عريض طبگها على جهة الرصيف وطفاها لزم تليفونه وشاله لأذنه
وليد :- ها خوية .. اي جبتها .. أنزلك ؟
سد الخط واندارلي :- حدج هين لا تتحركين هسع أجيج
أخذ الشماغ مني لبسه ورفعه لوجهه نزل من السيارة راح للجنطة طلع سلاحه خلاه بمتنه وسدها قفلها عليَّ ومشى فات للشارع طب لواحد من البيوت
باوعت داير مدايري الشارع فارغ ولا طير
بقيت حايرة بأمري وعيني عالبيت اللي دخل عليه
أخذله يمكن بالربع ساعة وطلع مناك وطلع وراه واحد ملثم لازم رجال وشايل عليه سلاح يدفع بيه من ظهره
تقربوا من السيارة ومن ركزت بالوجوه يطلع شهگت
هذا شاكر ! ..
وصلوا يمي وگفوا گدام السيارة صورتهم صارت واضحة عندي واگف شاكر والوجه يلطم يباوعلهم ويباوع لوليد اللي مگابله بسلاحه من گدام
ومُتيم شايل عليه سلاحه من ورى عرفته من الكلاش الأسود وعيونه التتجادح من اللثام حاصروه اثنينهم
صاح بيه :- يلا خابرو جدامي
شاكر :- يابة انطوني مجال بس وخر سلاحك من وجهي
أشر لوليد براسه ينزل سلاحه بس هو ضل رافعه عليه
صار وليد گدام شاكر مد ايده لجيبه يفتش بيه طلع تليفونه خلاه بيده ويصيحون عليه خابر يلا
شال تليفونه يدوس بيه ورفعه لأذنه صار يحجي بالتليفون حاولت أسمع مگدرت كلمة تنفهم وعشرة لا
لحد ما سد التليفون جرّه منه وليد بسرعة
اجى لجهتي فتح الباب أشرلي براسه :- انزلي بساع
نزلت مثل مگلي ومُتيم معاف شاكر لحظة يحجي وياه
تيم الله :- راح يجي لو لا ؟
- جاي والله جاي مو سمعتني جاي أحاجيه
- إلك مناه لربع ساعة لو ما صار عبد جدامي أفرغ هالشاجور براسك وروح أبوي
- هسه يجي گال قريب عليكم
- نشوف بالله
وليد اخذني للسيارة اللي واگفة مقابيل سيارته فتحلي الباب صعدني ورى حتى منتبهت لسيارة مُتيم گدامنا
رجع يحاجي بأخوه صوتهم صار ميوصلني
انتبهت لشاكر انسحب منهم وفات من يمي ديمشي لبيته
انتبهوله صاح وراه مُتيم وأشرله بيده
- تعال ولك تعال وين تريدد
شاكر :- غير خابرته راح يجي شتريد بعد
- لك شنو قشامر جدامك تاتروح تبلغو ما يصل لهين
لگفه من ياخته جره لسيارة وليد گعده بالصدر وصعدوا وياه اثنينهم واحد بكرسي السايق والثاني ورى
وبقينا كلنا منتظرين بالسيارات جية عبد
صرت أطگطك من الخوف مو من جيته وبس هذول اثنينهم لازمين سلاحهم وعبد مناك يجيهم مسلح
تعلك بينهم بهالظلمة يصيرون للضالين
أخذله أقل الربع ساعة وسيارته طبت للشارع من الجهة الثانية وگفت گدام بيت شاكر ونزل هو وواحد للبيت
باوعت وراي نزل مُتيم وأخوه ساحلين شاكر وياهم ومشوا بأتجاه البيت مسلحين طبوا ورى عبد
صرت أگمز وگلبي يريد يطلع من صدري گد ميدك حيل ضليت آكل بأصابيعي وأهز برجلي عالسريع
لو يطلعون محملينه لو محملهم متقبل غلط
وبالحالتين اني أروح بيها وأصير بوجه المدفع
فزيت من طلعوا من البيت مُتيم يجر بعبد جر من ملابسه ووليد وراه لازم هذا اللي اجى وية عبد وعمه شاكر يمشي وراهم يحجي وياهم ما يردون
لحد موصلوا يمي فتح الباب دفعه للگاع يم رجلي
رفع راسه صارت عيني بعين عبد عيونه دم وضاغط على روحه بالگوة ولو النظرات تكتل جان اني ميتة
مُتيم رفع سلاحه من وراه دفعه بطرف السلاح
تيم الله :- يلاا انطق
ضل ساكت يباوعلي عينه مشالها عني صدره يصعد وينزل بقوة يتنفس سريع وبغضب واضح بوجهه
خلى رجله على متن عبد من ورى ودفره
صاح :- انطق ابن الخرا ابن النعال انطقققق
شاكر :- لك عمي لا هيج امشي نفوت لبيتي ويطلگها يسوي التريده والله
اندارله صاح بيه :- انكتم انتَ لا أرميييييك
شاكر انخرس من شافه موجه السلاح عليه وتراجع
مجان مُتيم الأعرفه صدك جان إنسان ثاني من گد حالته العصبية والأنفعال الجان بيه ساعتها
طبت سيارات عالية سودة للشارع من الجهتين سدت الشارع الولد صاروا يتلفتون واني گلبي صار بين رجلي
232 تعليق
اندار لوليد :- هذول شجابهم ياهووو الدلاهم ؟
وگفت السيارات ونزلوا منها كومة مال زلم كل سيارة بيها تلاثة وأربعة مسلحين گدرت أميز منهم بس السيد
اجاهم يمشي وراه رجال كبير ملتحي وصل يمهم گام يصيح عليهم وصاير أعصاب
ريحان :- تحجون صدك تچذبون متفگين بليل أظلم وهادين عالعالم وين ترردون ؟ ولك أبو علي هذا انتَ النگول عليك العاقل وچبير أخوتك
- عمي خليني رحمة للخلقك ترى واصلة حدها وياي رايد أكتلي بشررر
- دخذ السلاح منه اخذ السلاح لا يسويلنا قدر
اجاه صدر الدين يحجي وياه يريد ياخذ منه السلاح وهو ما يقبل صاروا يتصايحون وصوتهم صار عالي
- ما أخلييييه والله هسسسساع آخذ حگي منو على دوسوتو لبيتي
صدر الدين :- اخذه اخذذذه بس مو هيج انطيني سلاحك
- وخرررر گتلك
ريحان :- ولك انطيه التفگة شلعت گلبي انا بيدي آخذلك حگك مربع من الداسوا بيتك بس خل يطلع الضوة
- الليلة هاي ما يصبّح صبح وعيني تاخذ نوم لا ما زينت راسو وجبت حگي وحك هالبت وخوفتها بهالليل منو
- چا تريد تگاومهم هسه شبيك مسودن انتَ وين أكو گوامة بتلاثة الفجرر ؟
صدر الدين جر السلاح من ايده گوة ضرب السيارة حيل برجله يسب ويغلط وهذا عبد جوة رجليهم على وضعه
والسيد الچبير يغلط على مُتيم ويصيح
- كل إحترام ما عندك ولا خليتلك حشمة لكبرتي جارر أخوك ورايح متحزم اثنينكم وراكم عوايل ما فكرت بيهم ؟
حاولوا وياه يگولوله الصبح وهو قافل الليلة يعني الليلة
من شافهم معترضين وهو مشتعلة روحه يصيح ومحد مأيده گام دفع الباب مالتي سده وصعد بكرسي السايق شغل السيارة وشخطها مشى عنهم وهم يصيحون وراه
أحس جسمي انخض خض أول ما إستدار
انخرست خرس وهو ما خلى كلمة تعتب عليه ما عاف لا السيد لا عبد لا شاكر حتى أخوه لاحته كم حجاية
متخبل متخبل شلون ما خلوه يسوي اللي يريده هسه أخذله شوية يصيح ويحجي وية روحه محترك وسكت
يمشي بالشوارع بسرعة مدري منين طلع بينا طريق سريع وسيارات تتخاطف وهو يعبرهم
نزلت دموعي اندار على صوتي واني أجر النفس
312 تعليق
ورجع يباوع للشارع صارت عينه عليَّ بالمراية
تيم الله :- انتِ شبلاج تعوين ؟
ضليت ساكتة منزلة راسي بس صوت أنفاسي مسموع
گام يستغفر ويتأفأف طلع من السريع وگف على جهة من الشارع طفى السيارة واندار بنص جسمه عليَّ
- يول شبلاج لا تسودنيني عش هالبجي هساع ؟
- كُلشي صار من وراي
حجيت منفعلة :- لو مخليني راجعتله وسديت السالفة من الأول ولا هالهوسة هاي
- بكل عقلج شبيج ؟
- اي ايي بكل عقلي دا أحجي هو يحوم عليَّ رايدني ومن سمع بينا جايين لبغداد رافعين دعوى اجى بسرعة يريد ياخذني يمه لو باقية بالبيت مطاوعته ولا هاي الهوسة ولا انتَ وأخوك ابتليتوا بية
أحجي وأمسح بدموع ميتة قهر
- دحگي يول
باوعتله شهگتي بصدري
تيم الله :- ثقي بالله لطلع حك كل دمعة نزلت من عيونج منو بعدو لهساع حسابو ما خلص عندي
- مرايدة أحد يتورط من وراي
- ورطتيش بان ورطتيش ؟ محد صفگني على ايدي انا الحزمت روحي وتكفلت بيج وببنتج وعطيت چلمة لأمج تاردج وأردها
تليفونه ما سكت كل شوي يتصل
نتر :- سودنتني شتريد متگلي شتريد
فتح خط ورفعه :- هاا يمعود ؟
ضل ساكت شوي يسمع الطرف الثاني تبدلت ملامحه شغل السيارة وأسمعه يگله :- وين انتوا هساع ببيت عمك ؟ .. زين زين جايين هساع
سد الخط واستدار يمشي
گال وهو يهز براسه :- هانت يولي گتلج أردلج حگج بنفس اليوم
مفتهمت كلمة وشنو مقصد كلامه ضل يمشي بالطريق لحد ما وگفت سيارته بمنطقة ثانية السيارات السودة نفسها كلها طابگة وزلم تارسة الشارع طبك على جهة
اجاه السيد صديقه نزل الجامة
صدر الدين :- وين صرت يمعود عمي صارت عيونه براسه من وراك وخالك خابر جاي بالطريق
- جبتوه هالچلب وياكم ؟
- اي جوة گاعدين هو وعمه
نزل مُتيم اجى لجهتي فتح الباب انطاني شماغه أشرلي ألبسها على راسي واندار يحاجي صديقه
- سوي درب للبنية تاتفوت
- شتلتنا خوش شتلة بهالليل اشتعلت روحك
- طاگك على ايدك ؟ گتلك تعالي ؟
- غصبًا ما عليك رجلي على رجلك
حجاها ومشى وهو يضحك سوولي مجال من بين الزلم التارسة الباب ودخلوني للبيت أشرلي السيد جوة
دخلت من الباب صارت مرة گدامي أخذتني دخلتني جوة وهم أسمع صوتهم يحجون بالأستقبال
گعدت جابتلي مَي أشرتلها بيدي ماريد
ضلت گاعدة يمي ويمها واگفات اثنين بنات شابات يحجن وياي ويسألني مرديت ولا كلمة الخوفة بية
المرة حاجتهن ديسكتن وصار بس صوت الزلم مسموع
بالبداية جانوا يحجون بصوت عالي بس طبيعي النوب گبوا صياح ناس ترفع وناس تكبس وعبد أسمعه يگلهم
عبد الإله :- ضامين مررررتي ببيتوهم هو وخاله شتردوني أسكتتت ؟
تيم :- اجتتت شاردة من ظلمك وجورك عليها ماخذ بنيتها منها وذابلو تهديد لبيت خالي يتهدد عليها تايكتلها
- حطوا روحكم بدالي منو اليقبلها مرته تگعد ببيت رجال غريب ؟ لحد يلومني بالسويته
- خالي مو غريب عليها رجل أمها وبمقام أبوها وهو المتكفلهن انتَ مالك شي عندها گنالك طلك ما رضيت إلا صارت محاكم يلا طلعت راسك
- ما أريد أطلك بكيفك انتَ ترفع دعاوي ومجرجرها وراك ؟
- البتتتت ما رايدتك شلون گووة عمي ما رايدددتك
رجعت گبت هوستهم وصار مصايح مال زلم تعاركوا مدري شبيهم بس الصياح يوصلنا وهاي المرة تلطم على رجلها والبنات يباوعن محتارات أكثر من حيرتي
هدئ صوتهم شوية وصار هذا السيد چبيرهم يحجي أسمع صوته يحاجي بعبد وعمه
سيد ريحان :- خوب طلعت أبو علي من البيت لخاطرك أجيب البت ورى الباب واسألها گدامك وهاي الزلم واگفة تشهد إذا رايدتك هسه تاخذها وتطلع الله ومحمد وعلي وياك وإذا تگول لا تطلك وتدير ظهرك ما تحجي بيها بعد
- إلها بنية عندي ما راح توافق
- هي التقرر وشتگول انا حاظر
اجى فتح الباب الداخلي شافنا واگفات
أشرلهن :- سون طريق
وخرن وگفن على صفحة واني وگفت ورى الباب وهو واگف بالباب صاير بيني وبينهم
سألني :- عمو انتِ رايدة ترجعين لرجلج ؟
دنگت راسي دموعي تنزل
- احجي بوية لا تخافين انا أبوج وكلنا أهلج راضية ترديله وترحين وياه لو لا ؟
هزيت راسي :- لا أريده يطلگني
من حجيت هيج عبد تخبل گام يصيح
- بس گلها مالها شي يمي لا اوگفلي بمحكمة وأشهد ولا إلها بنية عندي ولا غايب بقطعة الهدوم الطلعت بيها من بيتي بذيج الليلة
باوعلي السيد :- هاه سمعتي ؟
هزيت راسي موافقة بس أريد أخلص السيد گله قابلة
اول محجى هيج اجتي حجاية عبد ترس أذني
عبد الإله :- انتِ طالك
السيد فات للأستقبال وسد الباب وگعت للگاع ميتة بچي المرة والبنات انخبصن بية يسكتني
خلصت منه ؟
يعني هاهية بعد ماكو عبد ؟
والله خلصت ؟
هواي لحظات تمر علينا بحياتنا نكون بيها معتقدين أخذنا القرار الصحيح بس وراها نكتشف جان هالقرار أكبر غلطة بحق نفسنا ونصير نبجي بدال الدموع دم
دقايق وفات السيد يردوني برة أخذني أمشي وراه طلعت من البيت كومة مال زلم صار بوجهي مُتيم
ووليد أخوه لازم غدارة روسية رفعها ليفوك يرمي
وهذا صديقهم السيد مكيف عالصوت
صدر الدين :- فدوة لحلگج تهلهل مو ترمي
أشرلي عالسيارة أخذني بيده صعدني وسد الباب وضل واگف قريب يباوع للباب ويحجي وياهم
121 تعليق
الشمس جانت توها طالعة جريت نفس براحة وأباوعلهم
انتبهت لمُتيم يدخن وعينه بالباب طلعوا عبد وشاكر
عمهم الچبير إلتهى يسولف وية الزلم المعگلة الواگفة بباب بيته وصدر الدين واگف لازم الغدارة من وليد يگلب بيها يسولفون بينهم وعبد وعمه ديركبون السيارة
ذب الجگارة من حلگه وغافلهم كلهم راح من بينهم بسرعة جر عبد من شعره سحل كلها فزت عليهم
ضليت لازمة گلبي متوقعت يتصرف هالشكل صرت أحرك براسي أريد بس أشوف هوسة صارت عليهم
ركزت وأشوفهم بالگاع متلازمين واحد خانك الثاني والزلم فوك راسهم يفاككون بينهم
جروه جر لازمينه الولد دفعوه عن عبد وهو يتصايح وياهم وعبد گام صايرين بوجهه السيد وشاكر
يمسح بالدم النازل من خشمه ويباوع لمُتيم ويهز براسه
حاجاهم السيد وشاكر يدفع بعبد حتى يصعد بالسيارة صعدوا سيارتهم وحركوا مبتعدين طلعوا الشارع
يلا مُتيم هدئ شوية والسيد واگف گدامه يحجي بعصبية وياه وهو مدنك راسه مبين ديترزل
اجاني وليد صعد السيارة شغلها ومشى عنهم طلع بينا لبيت مُتيم نزلت فاتت للبيت تلگتنا شيخة
وليد :- هلهلي عمة
- شصار ولك ضل گلبي معلك يمكم
صرت أضحك وعيوني مدمعة
شهربان :- شيخة طلگني خلصت منه والله خلصت
حضنتها حيل أبجي وأضحك فات مُتيم من ورانا للبيت الوجه يضحك وشايل سلاحه على متنه
تيم الله :- لو هلهلتي يا عمتنا واحنا الشجعان بلمتنا
صارت تهلهل وهو يباوعلي وجهه مرتاح
الولد ضلوا گاعدين منتظرين خالهم لحد ما اجى واني طبيت جوة بالغرفة ميتة تعب من البارحة بلا نوم
أثاري فدار مو لوحده جاي جايين وراه عمام مُتيم من سامعين بالصار وولدهم سياراتهم ترست الشارع
فزيت من نومتي على صوتهم وهم يتصايحون
ضليت واگفة ورى الباب مال غرفة صوتهم بنص البيت
وهذا الحيوان عمهم الجبير الجان يتهدد على نورجان أميز صوته من بينهم كلهم شگد گلبي محمل عليه
يصيح عالولد مُتيم ووليد شلون رايحين هادين على بيت شاكر بلا ميحجون ويشاوروهم وگعد يلوم بخالهم
سلطان :- كلو منك يفدارر خليتهم يطيرون ويفرون ما ينزلولهم على گاع بكل هوسة انتَ تمشي وتصفگلهم
- جابوا حگهم واجوا ما يحتاجون أحد يهوس وراهم
- ولكك طلعوا متفگين يدورون الطلابة
- ولد عزام ما دوروا الطلابة هي الطلابة دورتهم
ما انطى بيهم ولا بكلمة والعمام متخبلين منه هم مشتعلين ويصيحون وهو يحجايهم ببرود أعصاب
لحد ما اختفى صوتهم من البيت فتحت الباب على كيف مديت راسي أباوع بس الولد وخالهم وعمة شيخة
وگعدوا الولد يحجون لخالهم بالصار السيد لام السالفة بينهم وما موصليها للشرطة لأن كلها مسلحة
وضلوا لا مُتيم اشتكى على عبد على طبته لبيته ولا شاكر اشتكى عليهم فضت بينهم بطلاگي من عبد
خالهم گام راح لبيته ووليد أخذ سلاحه وطلع وية خاله
فات مُتيم ديصعد الدرج مر من الغرفة لمحني
- هاه انتِ گاعدة وخالي راد يشوفج گبل لا يروح گنالو نايمة
- فزيت عالصوت
- نامي زين وارتاحي تاتگعدين نرد لأهلنا
- اليوم ؟
هز راسه :- ان شاء الله بالليل نطلع
ضليت ساكتة مترددة أحجي حس عليَّ أشرلي گولي
- بنتي مُتيم
نزل من البايتين الجان صاعدهن واجى وگف گدامي
- انا شلت ايدي منج ؟ گلت راح أخليها ؟ لا تخافين وراه وراه لحد ما أجيبها لحضنج وأثبت بالقانون انتِ أمها
- گال مراح أجي ولا أشهد بالمحكمة
- إذا على دعوى تصديق الزواج فتمشي غيابي حتى لو ما حضر عدنا العقد وعدنا شهود كلش كافي وراها نباشر بدعوى التفريق
- شنو حاجتهم لهذول إذا هو طلگني بعد ؟
- نحتاجهم شلون منحتاجهم عجل شلون تردين تثبتين جان أكو زواج بينكم ؟ يفيدونا بعدين من نرد ريحانة
خلى ورى رگبته مال راسه يطگطك بيها
گال :- هسع انتِ لا تشيلين هم هالسالفة نامي زين وارتاحي تانطلع بالليل
ذبينا روحنا عالنوم من التعب الليل كله سهرانين
ما گعدنا للمغرب جابلنا عشا من برة تعشينا وگعدوا بالصالة هو وعمته أخذتلهم الچاي ومشيت لهناك
هو گاعد بالگاع يمه سلاحه ينظف بيه وبقطعه
انطيت استكان لعمته وتقربتله مباوعلي ملتهي
شهربان :- چاي
باوعلي بنظرة بسرعة ورجع نزل عينه أشرلي
- هنا خليه
انطيته استكانه خليته وين ما أشرلي ويسولفون بينهم
شيخة :- يمااااه بانة هذا چايج جير ولا ينجرع
- هسه فوك مسويتلكم
- دحك الچذب عيني عينك ولج لوما انا الحضرتو وحطيت الچاي عليه گتلج بس عينج عليه تايفور
تيم :- وراحت حرگتو سلگت جد جدو
مرجع ظهره يشرب ويحجي عينه عليَّ
- والله مو صوجكم صوجي اني صرت خوش بنية وتبرعت بالمطبخ وغسلت المواعين هاااه صدك شيخة ترى كسرتلج ماعون بالغلط
لطمت على صدرها
- تكسرت ضروسج كون بس لا من الجديدات
- البيض ؟
- ايه
عضيت شفتي وأشرتلها بيدي :- اثنين بس بالغلط
- يبووو راحن مواعيني
ومُتيم يضحك گلها :- يلا فدوة
گامت خلت إستكانها بالصينية
- عطيني إستكانك تاسوي واحد جديد مرر هذا ما ينشرب
- خليه خليه انا أحبو ثگيل
عافتنا ومشت للمطبخ وهو رجع ينظف بسلاحه جان مفكك قطعه ومصفطها على بطانية گدامه ياخذ القطعة يمسحها ويرجعها بمكانها لحد ما خلص تنظيفهن كلهن بدا يركب السلاح من جديد جان أسود يلمع لمع
رفعه ينيشن بيه اندار عليَّ خلاه بوجهي ضل يباوع بيه كم ثانية بعدها نزل السلاح بدون ليحجي شي
بان :- كلاش روسي أسود
- ومنين تعرفين اسمو ؟
حجاها وهو ياخذ استكانه صار يشرب بيه
هزيت أكتافي مبتسمة :- هيج أعرف
ضل يباوعلي بشك مضيك عيونه
- ينخاف منج النسرة حجاية عمتي
زادت ابتسامتي :- ظلمتوني
- ايه كلش
- هم الزلم يكرهوني شعلية اني مال ألزم الروسي عليهم وأفرغ شاجوره بيهم واحد واحدد
- لا يا ناكرة المعروف عجل والهوسة هاي كلها من أمس ولليوم تالي أصفى مكتول
- لا انتَ استثناء
- اييه مصلحة مو غير شي بعد إلج يمي سالفة بنتج
ضحكت :- لا والله انتَ حباب ولو خلستنا بالليل انتَ والكلاش مالتك بس الباقين لتلومني عليهم
- يا هم بالله الرايدة تكتليهم ؟
- سالم وستار وعبد الچلب وأخوه وعمه وخالك وياهم عالواهس
- إذا على عمج وستار هذول بالسجن وإذا على عبد هذا هم خلصتي منو بس خالي هالمگرود شمسويلج شو يگاون مگاون عليجن حتى وية نسابتو تخارب لخاطرجن
- هاي لخاطر نورجان وماما بس اني يكرهني حاقد عليَّ
- وعش بالله يكرهج ؟
- لأن گاصة من الصوندة مال حديقته حاقد عليَّ
ابتسم :- هاااه هيج الحجي وشتسوين بالله گاصتها ؟
- كتلت بيها مرته وبنته
ضحك بصوت عالي عضيت شفتي أباوع مبتسمة لضحكته اجتي عمته على صوتنا گعدت
شيخة :- مو انا گتلك هالبت نسرة وما تنگضب
- اللسان والجسارة نوبات هم تنراد يمة
- ايه بس مو بكل وكت ولا لكل واحد الچبير هم إلو إحترامو هي ما تخلي شابچتهم صغار وكبار خص حريم بيت خالك وهن شلون يردنها من الله
- يعني يتجاوزن ويضربن وأسكتلهن ؟ لا والله ما أسكت
- أي احد چبير يغلط عليج وما تگدرين تردين عليه بس گوليلو الله يحسن خواتيمنا ويشغلنا بطاعتو
- وليش ما أگدر أرد عليه ؟
- لو حرمة اكبر منج مثل حرمة الخال فدار أم مؤتمن ما تگدرين تراددينها لأن هذا من الأدب والخلقبس حگج تدافعين عن نفسج بأدب
- الأدب والخلق إنّي أردلها الكلمة عشرة لأن نفسي عليها حق علي ومن واجبي الخلقي أتجاه نفسي أخليها سوية نفسيًا وما يبقى شي بداخلها والمو محترم ما يُحترم لو جان من الأهل
- يمة يممممة برعة هالبت برعة ما تنگضب
مُنيم بيده كوب الچاي يسمع ويتبسم
گلها :- دوة والله
وصانا نتجهز حتى نطلع بعد صعدت أبدل ملابسي ونزلت شايلة حذائي بيدي وجنطتي صغيرة بيها لبستين أبدل بيهم وأسمع صوتهم يسولفون بالصالة
- خالي من العصر خابرني گال رايحلهم
شيخة :- وشلون صارت ؟
- أخذها مؤتمن وحرمتو للمستشفى وخالي لحگهم لهناك بس لا تحجين هساع جدامها خلي بس نصل وأگلها
بان :- شصاير
اندارولي اثنينهم بسرعة ضلوا واحد يباوع بوجه الثاني
تأكدت ديقصدوني من سكوتهم فجأة يضمون عني الموضوع صرت يم شيخة توسلتها تحجيلي
گالت :- أمج متخربطة وماخذيها للمستشفى بس لا تخافين تيم خابر خالو گبل شوي گلو گعدت زينة
صارت عيني عليه هزلي راسه يطمني
تملكني الخوف ووضعي كله تخربط واني طلعت مناك متزاعلة وياها وما أحاجيها ضليت آكل بروحي عليها
لحد مگاموا قفل البيت وطلعنا بسيارته راجعين للغربية
... 《 نورجان 》...
همس :- اششش لا تنوصين
بين شهگاتي وصوته الخشن
ترافة بشرتي وخشونة ايده
جانت أكو عيون صغيرة تراقب من الباب
عيون تشوه عندها مفهموم الطفولة وأخذتها للكبر عقلها متشوه ويرسم خيالات مالها وجود بالدنيا
فزيت مخروعة عيني على ايدي ترجف تررجف
جسمي بارد من برة بس داخلي مشتعل نارر
المكيف مشتغل مع هذا جان وجهي يصب عرك
گمت من الجرباية شلعت الكانيولا من ايدي وشمرتها
مشيت صرت گبال المراية أباوع لشكلي شعري الفوضوي وجهي شاحب وجوة عيني هالات شفايفي صايرة بيضة ويابسة من گد الجفاف
عضيت شفتي الجوة بين سنوني حيل لحد ما وجعتني حررتها انفتحت صارت تطلع دم
من شوكت جنت اني هيج ؟
ليش ايدي باردة وعيوني حمر ؟
شنو دتبچين ؟
كلهم داير مدايري يداروني ويهتمون بية بس محد حاس بنار صدري ولا أحد يفهم شنو البگلبي
محد يحس بوجع أحد وهاي ايدي باردة مهلگد لزمت ناس تعبانة وطفتهم بحرارتها وخوفها
فزيت على صوت الباب وهو يندك فز گلبي وية دگته
رجعت شعري ليورة ومسحت وجهي صرت ورى الباب
- منو ؟
- انا افتحي
فتحته بسرعة صارت بوجهي هاجر دخلت تباوعلي
هاجر :- شنو جنتي نايمة ؟
- توني گعدت
- من الصبح ما حاطة لگمة بحلگج وعمة شدن موصيتني عليج ما يصير هيج
- ما أشتهي والله خليني
- لا والله شو ما أخليج امشي وياي نتعشى انا وياج
- ردت اسألج ماما شلون صارت هم خابرتوا عليهم ؟
- لا والله ما سألت أحد أخاف منهن هذن لا أگلهن على عمة شدن ويگبن بوجهي
جريت نفس وهزيت راسي مشيت گعدت عالجرباية
اجت يمي :- بس دحگي لو رايدة نخلي مآب يخابر مؤتمن
فزيت من مكاني
53 تعليق
- اي حبابة گوليله أريد أحاجيها بالي يمها
- امشي وياي ننزل تاتحجين وياها ليمت تضلين حابسة روحج بالغرفة
- لا لاا خليني ماريد أنزل
- ما يگربلج والله انا حدرج ما أخليج
اعترضت بس هي لحت عليَّ خلتني أغسل ومشطتلي شعري وطلعتلي ملابس أغيرهم اللابستهم من البارحة
نزلنا اثنينا گايدة ايدي وگفت عالدرج مكملت
وعيني اجت على غادة واگفة يم كوثر بنت عمو فدار
هاجر حست عليَّ ندستني وأشرتلي يلا كملنا مشي لغرفة مآب ومرينا منهن تباوعلي من فوك ليجوة
وصلنا لغرفته ووگفنا بالباب
- انتِ حاجيه نورجان انا ما يسمع مني
هزيت راسي ودگيت الباب وهي وراي اجاني صوته
فتحته شوية ومديت راسي
- عادي أدخل ؟
جان متمدد وبيده الريموت فز عدل گعدته ورجع ظهره
مآب :- تعاي نورجان تعاي
دخلت وهاجر وراي وهو عينه بيني وبينها
- گولي شعندج
- عادي بس تخابر مؤتمن تسأله على ماما ؟
- صار تأمرين أمر
حجاها ومد جسمه ياخذ تليفونه عالشحن بعيد عنه
مشت هاجر فصلته وانطته إله بدون كلام بينهم
صار يگلب بيه ورفعه يخابر شوي واجاه رد من أخوه صار يسأله على وضع ماما وصارت عينه عليَّ
مآب :- هاي نورجان تريد تحاجيها .. هاه خوش .. ديلا خليها بعد لباجر .. سلملنا عاليمك
سد الخط واني أباوعله بنفاذ صبر وأفرك بيدي
- أمج زينة لا يضل بالج معلگيلها مغذي والدكتور هم قايس سكرها طبيعي منا لباجر گال مؤتمن يطلعوها
- ليش مخليتني أحاجيها
- نايمة والله مو سمعتيني سألتو
تشكرته ودا أطلع رجع صاح وراي
- ها
- يول انتِ شحالج ؟
دنگت راسي محجيت شي
هاجر :- من الصبح ما ماكلة من هيج عمة شدن تخربطت من حدر راسها شلعت گلبها
باوعتلها فاتحة عيوني تنفسي سريع هم مرديت
مآب گلي :- اكلي لا تضلين هيج باجر تطلع تجي تريد ترتاح لو هم تدحگج بهذا حالج
هزيت راسي ووصى مرته تسويلي أكل اخذتني من ايدي وطلعنا الغرفة دنمشي للمطبخ
صارن بوجهنا فرحة وأم غادة والبنات يمهن گاعدات
ام غادة گالت :- هي هاي الكتل روحو عليها تالي طلعت عايبة مو بت
فرحة :- ايييه هاي دحگيها هي ولا غيرها ولا چن مسويتلها طرگاعة بگد راسها ومخلية الزلم تتكاتل
هديل :- حظوظ هن وامهن لو وحدة الأخرى يذبحوها من ساعة الدروا بيها مو بنية بس ما وراها ازلمة
- عبنهن گحاب معروف حظ الگحبة شلون يصير
أسمع لحجيهن ومدنگة راسي دمعتي بعيني صايرة بظهر هاجر ولازمة بملابسها حيل ايدي ترعش
جرتني من ايدي وتأشرلي عود معليج بيهن
دنمشي وغادة واگفة ذبتلي رجل عثرت بوجهي للگاع
وهديل صاحت :- وثول
راسي بالگاع انهضمت حيل ونزلت دموعي وهن يغلطن
رفعت راسي أباوعلها بغضب أتنفس سريع وهي تضحك
هاجر اجت دتگومني وخرتها مني وچلبت برجل غادة حيل جريتها وگعتها فوگاي صارت تعيط وتغلط
دا أگوم لزمتني هديل من شعري جرتني حيل ليورى
وخرتني عنها وغادة گامتلي لزمت بالبدي مالتي وخرت منها انجر بيدها من الياخة انشك وگعلي اثنينهن ضرب ويهلسن بشعري صرت اهمش بيدي مگدرتلهن
وفرحة وام غادة يغلطن وتصيح :- اييييه ولج حيل كسريها تخاربت زلم من حدر راسها هالصفرة البزر
صرت أبجي حيل وضامة وجهي بأيدي ما تأذيت من الضرب گد حجيهن المسموم والمعاير والذم
تمنيت من الله بان موجودة بهاللحظة ودتسمعهن وتشوفهن شلون ملتمات عليَّ يضربني
جان تنجر غادة ليورى تصرخ وحدة لازمة بشعرها عتتها عت ودفعتها لورى ومن أركز أشوفها هاجر صارت فوگاهن تضرب وتنضرب الصريخ ترس البيت
على صوتنا طلع مآب من غرفته يمشي بعكازاته
شافنا لو تخبل صار يصيح وأمه تخبلت على هاجر شلون تدافعلي وتضرب بيهن وگعتلها دك وفشار
بس مآب بالبيت من الولد وما يگدرلهن بس صوته يصيح يريدهن يعوفنا واحنا هم مخليناهن متكافشات
مآب :- ولججج هديل احاجيج .. يممممة .. يممة خليها لا تطگيها .. كوثررررر وينج .. كوثر خابري الولد
اخته الصغيرة ركضت جوة وهو ديحجي مدري منين أجته دفعه رجعته ليورى انردم بالحايط
صار يصيح من رجله امه تخبلت من شافته گامت تدك وتلطم وهو گوة ساند روحه زين ومصارت الوگعة برجله
إلتهن بيه وعافونا وهو لسانه گام يذب غلط وسب عامي شامي ما تعرف يقصد منو كلها شبچها
صاح بهاجر جرتني وصعدنا نركض فوك للغرفة وقفلنا الباب
أباوع لحالنا لا ضل شعر لا ضلت ملابس والوجوه مشخطة من خراميش الأظافر ونتنفس سريع
شو هاي طگتها ضحكة ومشت تباوع بالمراية وشهگت
هاجر :- اشتعلت روحهن دحگي شلون شگلي ثوبي الجديد
اندارت تباوعلي اختفت ضحكتها واجتني بسرعة
- يا نورجان لا تبجين والله طيحت حظهن يا ولج شبلاج والله موتتهن تموت الخايسات
اختنگت حيل واتذكر حجيهن وغلطهن على أهلي
هديت شوي وهي يمي معافتني تحجي وياي
باوعتلها :- شلون هيج تگدرين تضحكين ورى الصار ؟
- يااا يمعودة حلاوة هاي شكثر اكلت طك من أبوي واخوتي هاي هيج بالرجلين
- وحجيهن وغلطهن ؟
- تعودنا سمعنا الأغث منو وداعتج
- نيالج اني ما أتحمل كلامهن الجارح خاصة هديل وأمها من هيج مدا أنزل جوة وقافلة الباب
ابتسمت :- بس لو تدحگين شلون عضيت هاي هديل الحية من متنها والله خليتها تصرخ الغوث
ضحكت ومسحت دموعي خطية هي حالها مو أحسن من حالي گصيبتها شطولها جوة ظهرها مهلساتها تهليس
گعدن خلتني ارجع أمشطها وأضفرها إلها من جديد
ضلينا على حالنا بالساعتين محد اجانا
لحد ما اندك الباب واجاني صوتها فزيتلها بسرعة
فتحته صارت بوجهي عقدت حاجبها تباوعلي مستغربة
حضنتها حيل أشهك بجي فاتت جوة سلمت على هاجر
بان :- شبيها ليش تبجي
حجتلها الصار تحلفت بيهن اجت دتريد تنزل مخليتها
- احنا هم ضربناهن ومآب صاح بيهن مرضى عليهن
- دتشوفن حالجن لو لا
هاجر :- عجل غير تلاثة مدري أربعة ملتمات علينا واحنا هالأثنين بس هم ما عطيناهن مجال
- البربوقات شافنجن على گد ايدجن ومحد بالبيت استفردن بيجن كون يمجن إلا ألعب الصوندة عليهن
نورجان :- جايبة الصوندة وياج لهنا ؟
ضحكت وهزت راسها
- ضامتها لوكت العازة بس حرامات مجنت موجودة
جانت مرتاحة ومنطلقة تسولف لحد معرفت بالصار وياهم طلاگها من عبد فرحت لفرحتها
سألتني على ماما حجيتلها وضعها ضلت بقلق
312 تعليق
هاجر :- لا تخافين مآب گال باجر يطلعوها من وكت
- گلبي معلك يمها شوكت أخذوها ؟
- والله هي من الصبح دحگتها جانت دايخة وگاضبة راسها حتى ما كلت للعصر كلش داخت ووگعت أخذوها مؤتمن وحرمتو
ضلت تلوب تريد تروحلها ومحد هنا موجود
لحد ما اجت بنت عمو فدار فوك تصيحلنا
كوثر :- هذا مؤتمن يندهلجن جوة
نزلت بسرعة طايرة واحنا وراها جان گاعد لوحده عالتخم ومرجع راسه ليورى مغمض عيونه
بان :- مؤتمن شلونها ماما
فتح عينه عدل گعدته وهز راسه
مؤتمن :- زينة زينة هساع خليتهم هي وأبوي ورشا هناك تبات عدها
- ليش بيتوها صاير شي ؟
- لا لاا ماكو شي بس يتأكدون من سكرها تاتصعد نسبتو ويرد طبيعي منا لباجر يطلعون ان شاء الله
وگفت عند حجايته رجليها بادن لزمت بايدي صوتها يجف
- بيها سكر ؟
ضل يباوع للوجوه ميدري بيها ما عدها علم انهارت وگعت للگاع تبجي وتشهك واني وهاجر لازماتها أبجي على بجيتها ومؤتمن من جهة يحجي عليها
حجت مخنوگة :- ما أدري بيها والله ما أدرري لو صايرلها شي واني متزاعلة وياها شگول لروحي
گوة سكتت شربناها مَي حسدتها توني گلت دتضحك
هدأت وصارت تصفن ومؤتمن يسألها عالمشكلة الصارتلهم البارحة عمو فدار حاجيله
صارت تحجي من البداية لدخلة عبد عليهم بنص الليل لشردتها من البيت وطلعتها من البلكونة
وهذا مؤتمن صافن عليها وهي تحجي
مؤتمن :- وصدك عود طافرة من البلكونة ؟
ابتسمت وهزت راسها
- والله عمي نچرة وحدة الغيرج تگضيها بجي
مآب :- وتالي شصار طلگج ؟
اندارينا عليه واگف بالباب يسمع الحجي
- اي طلگني گدام هواي ناس وگال بعد ما يتعرضلي
- هم خوش خلصتي منو
حجاها واجى يم أخوه ساعده يگعد
- خلصت من وحدة بعد بس شغلة وحدة
- ريحانة مو ؟
هز راسها وهو يحاجيها :- ترد ترد ما دام أبو علي وراها
صارت دنيا الليل صعدنا فوك وهاجر اجت ورانا بيدها اثنين لفات جبن وكوبين چاي انطتنياهم
بان مرادت گعدنا بس اني وياها ناكل ونسولف وبان تحجيلنا بالمشكلة وعمو تيم ووليد من لزموا عبد
ثاني يوم اجانا عمو تيم الظهر للبيت گالوا حيطلعون ماما فد شوي وچلبنا حتى نروح وياهم
لبسنا وصعدنا وياه بسيارته اني وبان طلع بينا للمستشفى
صار يحاجيني عالصار وسالفتي اني وشبير واني مدنگة راسي وغير الموضوع وية بان على سالفة بنتها
- وصيت جماعة تايجيبون عنوانو لعبد
بان :- عليك الله ؟ يعني إذا لگيناه وريحانة وياه نگدر ناخذها ؟
- مو هيج الحجي خليني أخابر المحامي بالأول إذا گال يباشر بدعوى إثبات النسب ويصير نجيب البت منو نروح ناخذها وإذا گال لا بعد ننتظر خوما نروح ناخذها بالگوة
- وليش عود ميصير غير بنتي ؟
- اي بس بالقانون متسجلة بأسمو هو وحرمتو ذيج انتِ مالج حق بيها هساع لحد ما تطلع نتيجة الفحص إذا رحنا وأخذناها منو مو بعيد يروح يجيبلو دورية يوگفها بباب بيتي يشيلنا انا وياج شگلك ناهبين بنتي
اتصل تليفونه باوع بالأسم ورفع يجاوب
انگلبت ملامحه وطلع صوته سد الخط افتر وغير الطريق اني وبان وحدة تباوع بوجه الثانية متجرأنا وسألناه شي صاير عصبي وعاگد حواجبه
يمكن بالساعة هو بس يخابر ويصيح يريد يعارك
لحد ما وگف السيارة گدام مزرعتهم
نزل بسرعة ووصانا نبقى بالسيارة
نورجان :- بان هذا بيت المزرعة مالتهم
- وشكو جابنا لهنا غير جنا طالعين للمستشفى
مسحت وجها وصارت تأفأف طول حيل وما رجع
فتحت الباب ونزلت نزلت أمشي وراها دخلنا ورى عمو
وگفت بنص الگراج مصطكة من منظرهم
واگف عمو تيم وأخوه سلام وبالگاع شبير يمه بطل لازمه وعنو تيم واگعله فشار وصياح وسلام لازمه
بان تتلفت تباوعلهم وترجع تباوعلي عصرت ايدي حيل
مد ايده ياخذ البطل دفره عمو تيم حيل برجله كسره
جان دايخ ووضعه مو طبيعي العيون حمر ويحرك براسه عبالك بغير عالم وأخوته متخبلين منه
فتح عيونه شافني فز يريد يگوم ما سيطر وگع
رفعه عمو تيم من ياخته وهو يحجي بلسان ثگيل
شبير :- بس أحاجيها هاي .. هاي واگفة .. تاحاجيها
ضربه بوكس بنص وجهه دنك لزم راسه متأذي
وعمو تيم يصيح عليه محترك گلبه عليه
- ولكك سودنتني شسويلك وتعقل ؟ ليمتتت تبطل هالسمّ ؟ ليمت تجوز شبيرررر تعبتني ولكك تعبتني
يضرب بيه ويصيح وأخوه سلام بينهم يهدي بيه
وشبير يصيح بأسمي ويأشرله عليَّ نزلت دموعي وصرت ورى بان لازمة بيها
اندار علينا عمو تيم فتح عيونه وصاح بأخوه
تيم :- سسسلام ردهن للبيت
- وأخليك هين انتَ وياه غير تاتطلع بروحو
نتر بيه خرسه نزع حزام البنطرون ولزم شبير من رگبته اخذه يسحل بيه جوة البيت گدامنا
اجانا سلام أشرلنا نمشي أخذنا لسيارته صعدنا ورجع بينا لبيت عمو تيم نزلنا وشخط سيارته وراح
دخلنا جوة شتفتنا عمة شيخة تفاجأت بشوفتي حجينالها الصار گامت تدك على وجهه تلوب عليهم
شيخة ؛- ما يجوز هالولد ما يجوز من طلعاتو العوجة چم نوبة بنوبة حذرو ووصاه چم مرة گضبلو عودة كسرها على ظهرو ما يجوزز
ضلينا عدهم للعصر لا احنا الرحنا لماما ولا عمو اجى
طلعنا للحديقة ويانا در نسولف وبيدي بزونتي البيضة
طول هالفترة الفاتت جانت يم در دايرة بالها عليها
وبان يمي تلعب بيها
گالت :- تذكرت جداحة بس وين هذاك مچلوب شوي ويصعدله سيارة يروح يجيبلنا ريوك هاي هادئة تخبل
در الزهراء :- نازكة على صاحبتها
ابتسمتلي رديتلها الأبتسامة
انتبهنا لصوت سيارة وگفت برة صرنا نباوعها من جوة الباب الكبير مال گراجهم بقت واگفة برة فترة
بان :- هذا مُتيم
دتمشي لزمت بيها در منعتها
در الزهراء :- لا اگفي أبوي ما يخلي سيارتو برة هالكثر ينزل هو يفتح الباب
طبينا جوة نباوع للشاشة مال كامرات طلعن تلث سيارات مو سيارة وحدة والباب متروس زلم
شهگت من شفت عمتي سجودة نزلت من وحدة منهن ولزمت الباب تحاجي بواحد من الواگفين
در صاحت لعمة شيخة بخوف واني وبان اصفرينا
شفنا بيدهم سلاح انخبصنا خبص صرنا نتعايط علي نزل يركض من فوك عالدرج ويصيح
علي خيبر :- شكو شكوو
شافهم بالكاميرات لو تخبل اجى يريد يطلع لزمته عمة شيخة ما خلته وهو ضل ينگز شالت تليفونها خابرت عمو تيم گوة حصلته حجتله عليهم وصاها تخابر الولد
گامت التليفونات تتراگع من جهة عمة ومن جهة در تخابر بعمها سلام بيته قريب وهذا علي يريد يطلع
وگف گدامهم رجال لابس دشداشة وملثم بظهره سلاح
بان گالت :- هذا نفسيته الجابنا اني وهاجر ذاك اليوم من البستان
شوي ودك عمو تيم على عمته
گلها :- ذول جايين يردون بان سمعوا بيها تطلگت شگلك بتنا متگعد عند غربة خليها عندج بالبيت واحبسيها لا تخليها تطلع أبدد هتي مهترة ترى انا مسافة الطريق أوصلكم خابري الولد مؤتمن سلام وينهم ؟؟
عمتي وجماعتها يم البوابة يردون بان والبيت ما بيه أحد بي احنا وعلي عمة شيخة متخليه يطلع
حبست بان بوحدة من الغرف الفوك وهاي بان متخبلة تدگدك بالباب ووصتنا اني ودر
شيخة :- لا تغفل عينكم منها ولا تفتحولها الباب اشوف هالظلام شيردون وارد لحد يطلع
علي خيبر :- شنو لحد يطلع وانا شنو هين واخليج انتِ تطلعين لهالمخانيث
- اهجب عمة اهجب مو مال هوبزة جايين مسلحين وحادين سنونهم ما اريدهم يدحگونك
- عش انا مو زلمة لو ما مالي عينكم ؟
- زلمة وشحدو اليگول غير هالحجي بس لخاطري گلب والدة ملچوم وهذول ما عندهم مخافة الله ميعولون ينفردون بواحد بيكم تا يصفونو
ضل يتجادل وياها حتى يطلع ما خلته وطلعت ضلت در مچلبة بيه وخايفة وهو يحاول يهدينا يگلنا ماكو شي
نباوع عليهم من الكاميرات عمة واگفة بالبوابة تحجي وية سجودة ويمها هذا الرجال اليحرس بستانهم
ومبينة عالگة بينهم واحد منهم تقدم لعمة صار الرجال بوجهه تلازم وياه وصاروا يتصايحون
علي ما تحمل خلى وطلع يركض صحت وراه ما رد گامت دموعي تصب ميتة خوف ودر تبطي وبيدها تليفونها تخابر على أبوها ما يرد
بان تدك بالباب واني عيني بالشاشة علي صار گدام واحد منهم ويصيح عليه وعمتي تجر بيه حتى يفوت
لحد ما علي شال ايده ضرب واحد بيهم وهذاك رجعله الضربة در صارت تدك على رجلها وعمتي تجر بعلي وتصيح بذاك الضربه بعصبية
ما اسمع صوتها بس اشوف انفعالها وعصبيتها عليهم وهم واگفين كم خطوة من البوابة كل واحد سلاحه بيده
اجوا ولدهم يركضون سلام ومؤتمن كل واحد بسيارة وولد عمومتهم مناك اجوا يتراكضون من سمعوا
صارت هوسة شگدها شكبرها ومصايح بينهم
آخر كلام دار بينهم جانت عمتي سجودة رافعة اصبعها بتهديد وتحجي بعصبية وعمة شيخة تراددها خلوا وانداروا لسياراتهم ركبوها ومشوا
تنفست براحة من شفتهم يبتعدون فاتوا عمة شيخة وعلي للبيت وهي ترزل وتغلط عليه
علي خيبر :- ميخالف تمونين
- وانتَ الممنون عجل تضرب چلمتي عرض الحايط ما تستحي؟ مالي احترام عندك؟ طايح الحظ
- واشوفو يگربج واضل واگف ادحك مثل الحريم ؟
- ايخسى واحد منهم يگربني لو يطولني انا شيخة يعلي شيخة اخت عزام ما يدنسني الردي ولا تطولني زلام
ابتسم :- وشيخة الشيخات هم
باس راسها واعتذر منها
باسته بخده ولزمته تباوع بيه
- شوف شوف الچلب شلون ضاربو جعل ايدو بالكسر متأذي يعمة ؟
- ما بيها شي هسع تورم وتفش لوحدها
حجاها وهو لازم فكه ويضغط عليه مبين متأذي ضلت عمة يمه رحت جبتله ثلج وانطيته
اندارتلي عمة :- ما سألتج شو هالبت مالها حس ؟
صعدت فوك بسرعة شلون نسيناها فتحته وفتت اباوع
ضليت صافنة بالغرفة نزلت أحجيلهم
نورجان :- بان ماكو
طفرت من مكانها هي وعلي طفرة وحدة وصعدوا للغرفة فارغة محد موجود بيها
فز علي للشباك مفتوح كل حيله طلع راسه يباوع
فتح عيونه :- شتعملين هييييين
مشينا للشباك وما نشوفها إلا واگفة على حافة صغيرة وساندة روحها عالحايط عمتي شهگت بفزغ صاحت بيها
شيخة :- فلشج يالنسرة عجل تردين تموتين
ضلت ساكتة وتباوعلنا عيونها مغورگة
بان :- شيخة نزلوني
نزلنا جوة ونباوعلها شلون معلگة الأرتفاع عالي بس توگع تتكسر لا بيها تنزل بعد ولا ترجع منين ما اجت
عمتي صاحت بالولد حتى يجيبون الدرج
وعلي يگلهم :- مشكول الذمة اللي ينزلها
- وتضل البنت معلگة ؟
- خليها شلون ما ورطت روحها تنزل لوحدها تا توب من فواينها العوجة
جنت لازمة گلبي بيدي لان الحافة الواگفة عليها صغيرة أخاف لا تزلك رجليها وتوگع وما نتلاحگلها
در الزهراء :- فدواتج بان لا تتحركين هسع يجيبولج الدرج
انفتحت البوابة وفات عمو تيم وياه مؤتمن وسلام يمشون وراه من بعيد شافونا ملتمين عقد حاجبه
وعلي يأشرله ليفوك
باوع وين ميأشر وشافها معلگة وجها مطعون طعن صاير قطعة حمرة عض ايده بتوعد وهو يباوعلها
واني دموعي تنزل ميتة خوف عليها
لزمتني در تهدي بية جابوا الدرج خلوه ما وصل إلها صعد عمو تيم وتناوشها بيده نزلت ونزل وراها
واستلموها عمو وعمة شيخة رزايل وعلي يكفخ بيها
بان :- هيييي لا تضرب
- وأكسر راسج هم شعندج مفينة فوك تا تبلينا بيج هم ياريت لو تسوين هاگدج جنج سلبوح سيان حجاية عمي شبير تا يجون الغمان يحسبونج علينا مرة
حضنتها أبجي وأشهك وهي تسكت بية وعمو تيم خازرها حيل
يصيح عليها :- ام الشبابيچ تعلمت بكل سالفة تگضب الشباچ تاتعبر منو
نورجان :- تريد تنت حر أدري بيها
علي صفك ايد بأيد :- دستلم باع اللخ
رجعنا وية مؤتمن للبيت مال عمو فدار تفاجأنا بماما بعدهم ممطلعيها وهم من الظهر گالوا حيطلعون
... 《 شدن 》 ...
فتحت عيوني ساندة راسي على كتفه وهو يمي
فاتت رشا شافتنا ابتسمت ودارت وجها
اجيت دا أوخر مخلاني رجع راسي
فدار :- خليج لا تگومين
- دايخة كُلش
- هسع نرجع للبيت تاكليلج لگمة نظيفة أحسن من أكل البرة تاترد عافيتج
لمت غراضي بالجنطة وضلت يمي وهو راح يكمل إجراءات الخروج شوي ورجعلنا أشرلنا نگوم
صعدنا السيارة راجعين للبيت جاب الطريق كله يحجي عليَّ على كم رزالة عالطاير على خوف
- بس أجي اسبوع الجاي اشوفلج دكتور هين تاتبدين تراجعين وياه ويتابع حالتج كلش هملتي روحج بآخر فترة حتى علاجج ما كملتيه
- واحنا شفتنا شحالنا من مصيبة لمصيبة ملحگنا نجر نفس
- بعد ماكو شي ان شاء الله انداري لروحج وانتبهي لصحتج لا تخلين بالي يمج وانا ببغداد
وصلنا للبيت الدنيا بدت تغورب نزلنا رشا ساندتني
تلگوني بناتي گاعدات بالحديقة احني يتراكضن
فتحتلهن ايدي جريتهن لحضني أبوس بيهن وأطمنهن وهن يبجن وبان لازمة بأيدي تبوس بيها
- آسفة والله آسفة مجنت أدري بيج مريضة من وراي كله صوجي اني زعتلج وتخربطتي
شدن :- لا يماما لاا والله مو هيج اني دا أدوخ صارلي فترة لا تحجي هالشكل فدوة لوجهج امسحي دموعج
فتنا جوة هاجر وكوثر سلمن عليَّ وولده هم اثنينهم گاعدين تحمدولي عالسلامة
دا أصعد الدرج اجى وراي تقرب يشاورني
- هاه أشيلج لو تگدرين تصعدين ؟
ضحكت بصوت ناصي ودرتله وجهي
- شگالولك عليَّ مگرمة
- شو دخل أشيلج
- عزة لا لا والنبي عيب الولد گاعدين والبنات مناه
صعدنا فوك طلعتلي ملابس ميتة ميتة بس أريد أفوت للحمام أسبح وأغير ملابسي وفدار بعده على سالفته
- هاه هساع ما تخليني أفوت وياج للحمام تاعاونج
- النوب ؟
- دمشي والله خاف ما تگدرين
يحجي ويندس بخصري ويغمزلي ضحكت أخذت ملابسي ودخلت وهم هم راح يسبح بالحمام البرة
طلعت انشف بشعري لگيته طالع قبلي
اجاني أخذ من ايدي المنشفة وصار ينشفلي شعري
- هاي مداراة خاصة گبل لا أروح
شدن :- حتروح اليوم ؟
- أطلع الصبح ان شاء الله كومة شغل خليتو بظهري
صاحونا للعشا ضفرت شعري ونزلنا اني وياه جوة كلنا إلتمينا عالأكل بناته وزوجته وولده ونسوانهم
وبان گاعدة بصفي انتبهت بس نورجان مموجودة
سألتها :- اختج وين متجي تاكل ؟
- مقبلت تنزل
فدار سمعنا گلها :- امشي اندهيها
هاجر واگفة مخلتها تگوم گلتلها اني رايحة أصيحها
راحت شوي ونزلت
هاجر :- ما ترضى عمي شكثر حاجيتها
دا اگوم مخلاني أشرلي أگعد گام هو صعدلها
يمكن أقل الخمس دقايق ونزل لازم ايدها يحجايها وهي تضحك اجوا گعدوا تنفست براحة
تجاهلت نظرات زوجته وبناته وإستغرابهم منه
أهم شي بناتي يمي كل وحدة گاعدة من جهة
تعشينا وهذا الچاي رسم ورى الأكل لازم يشربون
اني صعدت أخذت علاجي وتمددت أريد انام البنات ضلن يم هاجر بغرفتها محد وياها
لهناك ظلمة وبرودة المكيف مالية الغرفة حسيت عليه وهو يصعد الجرباية تمدد خلى ايده جوة راسي وجرني على كيفه لصدره خليت ايدي على گلبه
فدار :- گاعدة ؟
رديت والنوم بعيني
- أخذتي علاجچ ؟
- اي
- شدن انا طالع لباجر بحيل الله مثل ما وصيتج لا تخليني بقلق هناك عليج عينج على روحج ابوية انتِ
ابتسمت :- ما أعرف شلون اجازيك
- عليمن ؟
- على كُلشي على إهتمامك بية على خوفك وتركك لشغلك واجيتني لو على موقفك وية نورجان قبل شوي
باس راسي :- ما منتظر منج تجازيني يكفي تصيرين زينة وتضلين جدام عيني وإذا على نورجان هاي معزتها غير عندي
- اشوفك كُلش هواي تهتم بيها أكثر حتى من بان
- مو سالفة ياهي أكثر بس نورجان دوم أدحگها مكسورة خاطر حتى من تفرح لحاجة فرحتها ناگصة لهساع تجي بعيني صورتها من خليتيها عندي ومشيتي وهي تدحك بالوجوه مكسورة وعينها تلالي
- مشبعت من أبوها ومعاشت وية رجال انطاها إهتمام كلهم جانوا يدگون عليها من فؤاد للباقين
- لا لبالج انا راضي على سواية شبير وياها لهساع مغتاض منو وما رايد حتى ألاگيه بدرب واحد
- تأذت حيل من الصار رجعتلي هذيج الطفلة اللي لازمة بية متخليني أفارگها
تنهد :- ميخالف اصبري شوي عليَّ وحگج وحگها تاخذنو وعلى عالشارب
رجع باس راسي سكتنا اثنينا غمضت عيوني براحة ونمت نومة طويلة هم وانزاح من على صدري من سالفة بان وطلاگها من عبد ..
ثاني يوم فدار تريك شرب چايه وتوكل لبغداد ومؤتمن طالع لشغله والبنات بدن ينظفن بالبيت
جانت الساعة بعدها عشرة الصبح بناتي وهاجر گاعدات يتريگن عفتهن وصعدت لغرفتي دا آخذ علاجي
اخذته وانتبهت لواحد من الأدوية يصير بعلبة ماهو مموجود فتحت العلاگة أشوفه اتأكد ملگيته
دورته بالغرفة باوعت ما أتذكر أصلًا فتحت العلاگة هذا جديد البارحة جبناه ويانا خليته يم راسي ونمت
گلت معقولة ناسيته بالمطبخ نزلت دورته هم ماكو
ضليت مسطورة عليه لزمت راسي أذاني
سمعت صوت عالي جاي من برة طلعت بسرعة
هذا صوت بان ..
شفته شبير لازم بأيد نورجان وهي تبجي وبان واگفة گدامه تتصايح وياه رحلته شلت ايده منها
- شعندك جاي بيا عين واگف گدامها دتكمل السويته بيها ذاك اليوم
ما رد عليَّ ومسح وجهه وباوعلها
شبير :- نورجان امشي وياي گتلج
وهي تبجي وتصيح
- ما أروح وياك عوفني ما أرووح
- بس ردي وياي وانا أردلج حگج من اكبر واحد حجى بيج وجاب أسمج على لسانو
گتله :- الفضيحة صارت منك انتَ الخزيتها وخليتها علچ بحلك اليسوى والميسوى كل يوم جايها واحد شامرله حجاية عليها تخلص الليل تصرخ من القهر أهلك ما نصفوها زلم ونسوان أكلوها بحجيهم وما سلمنا منهم لا اني ولا بناتي
- حگها برگبتي انا السويت الفضيحة وانا ألمها بس خليها تمشي ترد وياي
- ما تنلم بعد هي مو بس حجي لسان وبوس عمك بوس خالك وفضت راحت هاي سالفة أعراض ما تنلم بكم حجاية
- محد يتدخل بيني وبين حرمتي لا انتِ ولا هم
- شنو المحد يتدخل ؟ لك بابا اني أمها مسويلك سالفة شكبرها ودرت وجهك ومشيت وجاييلها تعالي والله ارجعي شبيك بعقلك ؟
- گتلج لا تدخلين امشي نورررجان
رفعت ايدي صفگته راشدي البنات شهگن وهو دار وجهه ضاغط على ايده حيل رفعت اصبعي بوجهه
- ديربالك مرة الله ترفع صوتك بوجهي لو تحاجيني بهذا الأسلوب ونورجان تنساها بعد مالك مرة يمي
صاح :- يووول لا تسودنيني شنو المالك مرة ترى لهساع هس على ذمتي ما طلگتها
- تطلگها
- ما أطلك گتلج مررررتي أريدها يا بشرررر
- مو بكيفك غصبًا ما عليك تطلك لا تخليني أوصلها لخالك وتكبر
- شتردين تسوين سوي نورجان امشي وياي
- متروح
- لو درت وجهي وطلعت ثقي بالله ما أرد بعد هاي انا جايج برجلية تاردج
- مسوي فضل گتلك متروح دير وجهك وتوكل
- نورررررجان
درتلها وجهي خازرتها دموعها على خدها
- تمشين لو لا ؟
هزت راسها لا تخبل
صاح :- طلاك ما أطلك لو تطلع نخلة براسج انتِ وأمج
دار وجهه ومشى يعارك روحه يسب ويغلط
شدن :- أيا طايح الحظ اثاريك صدك مخبل وما تعرف بروحك شتريد
اخذتها جوة اغسل وجها واخاجيها أهدي بيها فور دمي الحقير صعدت للغرفة باوعت للعلاج العلبة موجودة!
ضليت صافنة معقولة مشفتها ..
إلتهيت اليوم وياها نفسيتها حيل انكسرت من جيته وكلامه ورجعت گطعت الأكل وهاي بان متخبلة منه
بالليل راسها بحضني اتصل موبايلي جريته دا أشوف
- أهوووو هذا شنو فلمه
رفعت راسها بان :- شكو ؟
- رقم خبلني من الصبح ديتصل ارد عليه ميجاوب أسده يرجع شوي ويدك
اخذته مني ردت هم مجاوبها غلطت عليه وسدت الخط
- احظريه خيولي
- شلون احنا بهذا اللسان والتجاوز
- يفورون الدم شيلزم لساني
- هاي الألفاظ من أسمعها من ولد بالشارع تلعب نفسي شلون عاد من بنية بعمرج محلوة بحقج جوزي منها
- أحاول
- بان صدك دا أحجي لتخلين لسانج يتعود على هالكلام
- جيد
هزيت راسي منها بيأس
مر كم يوم البيت هادئ لا شبير بعد بيّن ولا اني حجيت عود گلت بس أشوف تيم أحاجيه
يوم خميس صادف فدار جاي للغربية بالليل والتموا الولد يمه وتيم هم موجود والبنات گاعدات ماكو غريب
حجيتلهم بموضوع نورجان وشبير
فدار :- رايدتهم يتطلگون ؟
- اي لعد شنو مبقيها معلگة على ذمته يطلك وكلمن يروح لطريقه
- يردها شنو يطلك
- شنو مصدك هو أرجعها إله ورى السواه ؟
- ميخالف عاتبيه گاونيه بس لا تحجين بالطلاك خابرني گلي رايدها
- هي متريده مو كافي الشافته منه
تيم گاعد ساكت مدنك راسه بيده سبحه يفر بيها ويسمع للحجي الولد گاعدين ما تلاغيت زايد وياه
بس ضجت كُلش شنو محسبين ببالهم ترجعله ورى الصار ولا عبالك صاير شي ليگول فد سالفة عادية
دايرة وجهي لهناك وأشوف بان تنزل من الدرج بسرعة خطوتين خطوتين الوجه أحمر دموعها على خدها
صارت گدام تيم تصيح
بان :- جنت تدري مو جنتتت تدري ومگايلي
واگفة يمها بس أريد أفهم منها وهو فزلها
تيم :- شبيج تصارخين
- لتسوي روحك غشيم مخليني اتأمل كل يوم اسألك خابرت المحامي وانت تگولي باجر تضحك عليَّ مضحك گدامك
تمسح بدموعها وتحجي تشهك حيل درتها عليَّ
شدن :- بس فهميني شبيج
- مسافررر ماما عبد سافر بيها لتركيا أخذها وراح بعدد ما أشوفها راحتتتت بنتي راحت ريحانة مني
انتهت بجي أثاري الحيوان دازلها صور على صفحتي مال فيس صور إلهم بالمطار وصور للجوازات هو ومرته والبنية ( مسميها ياقوت ) يحرك بگلبها
وكل صورة يدزها ميطلع بيها وجه ريحانة لو ايدها لو رجها لو صورة لمرته وهي شايلتها من ورى طير عقلها تهسترت علينا بنص الليل وهي تباوع للصور
ضليت الليل كله مگابلتها تون وعينها بالتليفون
- لج ماما كافي ارحمي بحالج
دموعها على خدها فاصلة بغير عالم وتگلب بالصور
ثاني يوم گعدت بالگوة ضليت سهرانة وياها ويا دوب نمت ساعتين باوعت شفتها مموجودة بس نورجان
فزيت من مكاني غسلت وجهي وطلعت أدورها
نزلت جوة اسأل البنات عليها وفدار واگف بالباب مال مطبخ خازرني انتبهتله أشرلته براسي شكو
مشى رحت وراه لزمني من ايدي وجرني على صفحة
عيونه صايرة بگصته يحاجيني بصوت ناصي
- يول الباكيت وينو طلعيه
- يا باكيت شبيك
- لا تثوليها شدن ترى روحي صايرة بخشمي خلصيني باكيتي مال جگايرر وين ؟
- وكلام الله ما أدري بيه
دار وجهه :- لا إله إلا الله
- فدار حلفتلك بالله شسويلك بعد وتصدگني أصلًا ممدخنة من يوم ملزمتني ولهسه
- عجل وينو طارر خليتو عالميز هو والسويچ مال سيارة وانطمرت گعدت بس السويچ والباكيت ماكو
- هسه أصعد أدوره بس أعصابك متستوجب هالعصبية
يباوعلي خازرني عافني ومشى
أدري بيه مو علمود الباكيت بس عباله اني الماخذته صعدت دورته إله فوك جوة الجرباية يم الميز ماكو
نزلت گتله ماكو ضل گالب وجهه مني
من صدك ضجت أحلفله وبعده ممصدگني
دا امشي مريت من غرفة مآب سمعت صوت بان تقربت من الباب وقبل لا افوت أسمعه يگلها
مآب :- طلعي الباكيت تاشوفو
- ما عندي يا بشرررر افهم مماخذته
- لا تچذبين لجج مو قشمر جدامج أمج وابوي تجادلوا من الصباحيات راسو ثايل عليه لبالو عندها
- واني شعلية يعني
- احلف عليج انتِ الماخذتو جيبيه يلاا
عبالي حترد وتعترض ضلت ساكتة
وهو يردها :- هيج وصيري خوش بنية من الأول
فار دمي منها اجيت دا أفوت عليهم سمعت صوتها تبجي
بان :- متفهموني انتوا محد يفهمني تعبت اني تعبتتتت
وگفت بالباب ايدي على وجهي وهو يهدي بيها
انفتح الباب صرت بوجهه اندار عليها ورجع باوعلي
- خليها لا تحاجيها ترى متضايگة حيل من الصار أمس
انطاني باكيت الجگاير وعيني ضلت عليها مدنگة راسها ولامة رجليها لصدرها مشيت انطيته باكيته
فدار :- وين لگيتيه
- واگع ورى الميز
حجيتها ضايجة ومختنگة انطيتهيا ومشيت
... 《 نورجان 》 ...
مر يومين بان نفسيتها بالنازل تفز بالليل بس تبجي
وهذا طليقها ما كف منها كل شوي داخللها بحساب ودازلها شي لبنتها مخليها تتهستر
ماما حاجت عمو تيم علمود يعرضوها على دكتور نفسي
وحجتله عالجگاير الدتاخذهم لأن هي متدخنهم ونسة لا تگول مادة النيكوتين تريحني خفنا لا تاخذ شي ثاني
وعلى حجي عمو تيم
گال :- المتعاطي ما يتشافى وبأي وقت يرجع يتعاطى
شدن :- مو راجعت بيها كم روحة للطبيب صارت احنا وياها بأربيل وگلنا تعافت
- ممكن كمرحلة أولى بس أقصد انه حتى لو طلعت السموم من جسمها اذا السبب النفسي الجذر اللي خلاها تتعاطى ما تشافى خروج السموم ماراح يغير شي راح ترد وتطلب الحبوب وتفكر بيها وأي عثرة أو تعب نفسي تمر بيه يخليها ترجع للتعاطي
طبيت للغرفة ادورها لگيتها لازمة تليفوني
مسحت دموعها باوعتلي گالت :- تعالي شوفي تعالي دازلي صوتها
- بان حبيبتي مو گنالج احظريه ؟
- اسمعيها شلون دتناغي حتبدي تحجي واني مو يمها اول كلمة ماما من حلگها صارت ليسر مو إلي
جريت التليفون من ايدها وماما فاتت على صوتها
حجيتلها الصار گعدت يمها تحاجيها ومترد بس تبجي
لزمت ايد ماما تتوسلها
بان :- عليج الله امشي خلي نروح وراهم .. حبابة خلي نلحگهم لتركيا اني وياج .. ما أگدر اسافر لوحدي
عافتها وگامتلي تتوسلني :- نورجان حاجيها اقنعيها هي تسمع منج انتِ گوليلها دنروح نجيبها ونجي
جرتها لحضنها دموعها تنزل
شدن :- شبيدي عليج يا أمي الله يحرك گلبه مثل محرك گلبج
طلعت من الغرفة دموعي بعيني طلعت للحديقة
جو البيت على گد ما كبير صار كله يخنگني بان من جهة وماما من جهة وسالفتي من جهة
رفعت راسي للسما :- دخيلك يا ربي خلصنا
اليوم جان كئيب ومدري شلون مر وبنات عمو فدار ملتهيات يحضرن عدهم خطوبة اليوم
خلصت اليوم بس نوم اخلص من التفكير
گعدت للعصر البيت فارغ محد بيه بس احنا وهاجر
نورجان :- شعجب مرحتي وياهم
ضلت ساكتة تباوعلي ودنگت راسها مركزة بالبيدها
خابرت على علي يجي ياخذني يم در أدرس مقبل تحجج عنده شغل خليت ماما تخابره انحرج
سمعت صوت هورن السيارة طلعت بسرعة صعدت
سلمت عليه هز راسه ومشى لبيتهم
وصلنا هناك نزلت دخلت جوة خواتهم كلهن ملتمات والبيت يصير خبصة من يجن لا وحدة ولا اثنين
مشفت عمة شيخة فتت بوجهي لغرفة در
تفاجأت من شافتني
در الزهراء :- ياهو جابج ؟
- وصيت علي يجيبني يمج
هزت راسها وضلت ساكتة
گتلها :- شبيج در ضايجة مني ؟ ترديني اروح ؟ شو انتِ وعلي مدري شلونكم وياي اليوم وجهكم ثگيل
- لا يا انا أدير وجهي عنج ؟
- لعد شبيج عود اجيتج ادرس على واهسج اختنگت هناك
ابتسمت :- كل الهلا بيج بكل وكت احنا بس شوي مخبوصين علمود الخطوبة
- خطوبة منو هي
حجيتها واني أگلب بكتابي
ضلت ساكتة تباوعلي :- عش انتِ ما تدرين ؟
وية حجايتها سمعت صوت هلاهل من برة عفت كتبي وطلعت من الغرفة وهي تصيح وراي
صارت گدامي سهاد واگفة يم الدرج تطش چكليت ويمها واگفة هيام وخواتها يهلهلن
دارت عيني وين مديباوعن شفت شبير نازل لابس بنطرون أسود وقميص وسترته بأيده مدنك يعدل بساعته....
