رواية فصلية بديلة ( شموخ ) الجزء الثاني الفصل الثلاثون 30 بقلم ام ملكوت

بالي محمد ليش هوه يمته راح من بالي ومنا الدوام صار اسبوعين ماخذه اجازه حتى راح انطرد لازم اروح وهم اشوفه بالي يمه اخاف يكون بطل من الشركه او ماعرف عقلي

وبالي يفكر بي ويمه رغم ان كلشي انتهى وباقي بس روحه السيد حتى يفسخ عقدنه الشرعي بس ماكدرت مافكر بي كل هل وقت وصار بس هوه الشاغل يومي واحلامي وكوابيسي .. كمت بروح خاويه

للحمام سبحت ونشفت طلعت مشطت وانه ارجف لبست ملابس الدوام باوعت لوجهي بالمرايه واشوف عيوني ذبلانه والسواد حالك جواهن انكسر

خاطري على روحي من شفت نغسي هيج مكسوره وهزيله نزلت دمعه حاره على عيني وتوالت بقيه الدمعات تهل مثل المطر على خدي مادري يمته اخلص من الاكتئاب راح يموتني لو يخليني انتحر بنهايه المطاف صرت امسح

الدمعه منا تطيح دمعه ثانيه منا انهارت قواي وكعدت ع الجربايه وايدي على وجهي ابجي ليش هيج انه ضعيفه ليش مجرد مشاعر حب كدرت

تلعب بحياتي ونفسيتي وتدخلني باكتئاب و بهاي الطريقه بس هذا مو الحب لا الحب حلو بس الحيره صعبه وتضعف العزيمه والشخص النحبه هوه اله نصيب من اليصير

بينه من سعاده وحزن ..مسحت دموعي واخذت نفس على صوت الباب هفيت على وجهي ابرد نار عيوني وصحت منو اجالي صوت امي وكمت

فتحته جنت قافلته من طلعت من الحمام باوعتلي باستغراب شافت عيوني حمره خلت ايدهه على خدي بحنيه وكالت بقلق..

_كافي ولج يمه ليش هيج كاعد تدمرين روحج شنو الصاير وياج وشنو البيج

_تعبانه يمه روحي تريد تصعد لباريهه طلعت الدنيا من عينهه يا يمه

_يهون عليج يمه ترحين من هل دنيا وتعوفين ابوج وتعوفينه متمرمرين عليج 

_تنسوني

_شلون ولج يمه اكو واحد ينسه ضناه والله انه وابوج نموت وراج من قهرنه لو صار بيج شي والله ماتحمل يصير بيج ش....

غصت بكلمتهه وخلت حجابهه على عيونهه وصارت تبجي مردت كلبي شهكتهه عرفت وقتهه شكد شالعه كلبهم ومتعبتهم وهمه مايستاهلون وحده

مثلي بست راسهه وهيه تبجي وطلعت من يمهه بروح ضايعه كلت لاحسان ياخذني هوه اليوم مو بابا وافق وماكال شي صعدت بالسياره وفتحت

قفل الباب اجه احسان مبدل صعد للسياره وطلعنه بيهه وانه الطريق كله اباوع من المرايه الجانبيه منتظره سياره تصير ورانه وجان عقلي قافل على

شي واحد وهوه الموت لا محاله .. هناااك وشفت سياره بيضه تمشي ورانه باوعت لاحسان كنظره اخيره وفتحت الباب شمرت نفسي من السياره

واحس روحي صعدت ورجعت لمن انضربت بالكاع ولفت بيه اكثر من ٥ مرات وبكل مره احس بعظم من جسمي يتكسر ومادري شصار بيه بعد بس اخر

ما سمعته هيه صرخه احسان بجزع باسمي .. وره فتره طويله فتحت عيوني بتعب باوعت حوالي لكيت احسان يمي شافني وراح ركض للدكتور

صاحله ودخل هوه والممرض فحص راسي وعيوني هز راسه بايجابيه وكتب بالسجل تالي طلع باوعلي احسان بعتب وعيونه حمره دم ولاول مره

اشوف هل نضره تقدم علي خله ايده حوالين رقبتي وخنكني وصار يحجي وهوه يبجي وانه اباوع بذبول ماهمتني الخنكه ولا وجعتني بكد كلامه..

_ليش سويتي هيج جنااان ليش سويتي هيج شمسويه وتردين تموتين روحج احجي ولج تردين تموتينه تردين تجلطين ابوج ولج هسه شكله شلون

اكابله واكله اخذت اختي وياي وماكدرت احميهه شلون اكله اختي يمي وحاول تموت ولو ما الله ستر جان انمردت وماتت كولي وانطيني طريقه اروح بيهه لابوج واكله بنتك

حاولت تنتحر وهيه بالمستشفى مكسره احجي جناان شسوي بيج شسوي بروحي شسوي بالدنيا ولج خويه شسويييي...

بقه يبجي بحركه كلب وانه ابجي بقهر وسكته نزل راسه مكسور على صدري وحضني حيل وكأن مامصدك اني رجعت للدنيا وكأن جان بينه وبيني لحضه موت

وجزع حسيت شكد انه عزيزه وشكد اهلي يحبوني وخاصه احسان لو جان اخ غيره جان اهتم بحجي الناس وموتني بيده ماعاتبني وحضني

2 تعليق

مكسور كلبه .. رفعت راسه وحضنت وجهه باديه خله جبينه على جبيني ودموعه تهل على وجهي مثل المطر بقيت امسد على راسه واهدي بي..

_اشش احسان حبيبي انت لا تبجي وتكطع كلبي فوك ماهوه متكطع وتعبان لا تسوي بيه هيج والله كسره خاطركم هاي علي تخليني افكر اخلصكم مني ومن كآبتي وحزني

_شصاير وياج جنان مو انه اخوج ليش ماتحجيلي جربي وكوليلي وانه اساعدج انه سندج بهاي الدنيا بعد الله واهلنه ياخويه كليلي شنو البيج وشنو اليوجعج

_خويه كلبي يوجعني مادري شيريد خوف بداخلي مجهول وكوابيس محاوطتني كلبي وضميري مامرتاح من جهه اكول اريد محمد ومن جهه اكول اريد مرتضى..

اعترفت اي اعترفتله وحجيتله كلشي عشته بهاي السنين وهوه فاتح عيونه مصدوم من كلامي وقتهه ماهمني يكتلني لو يسوي بيه شي ماهمني اذا دره

بسوالف مرتضى ويروح يكتله لو يهد عليه ماهمني شي غير ان افضفضله واطلب مساعدته .. بعدما وصلت لكلام مرتضى بيوم خطوبتي لمن كال

افسخي العقد وخلينه نعيش الحب براحتنه تالي بعدين نتزوج .. كام على حيله وكال بشك..

_شنو يعني جنان شنو قصده مرتضى من هل كلام

_قصده نبقى نتراسل ونسولف ونلتقي يعني تعارف من جديد او هيج شي ماعرف

_وانشاءالله وافقتي لو سوالج شي

_لا رغم سمعت كلامه وفسخت عقدي من محمد بس ماسمحتله ولا وافقت على اي شي من كلامه وحتى رسايله يمر عليهن كم يوم ياله ارد عليه وانه

كتلك احس كلبي مو اله احس ماصرت مثل قبل احبه واتمناه احسان كلبي ياذيني وماعرف على منو على محمد الكسرت فرحته لو على مرتضى الصارت مشاعري بارده اتجاهه..

_افهمج خلاص لا تحجين شي بعد وانه راح اكعد وياه واحاجي اشوف شنو نيته وياج واذا يريدج كزوجه لو بس لعب

_سوي التريده بس خلصني من حيرتي فدوا

_لا يضل بالج واعتبري الشغله محلوله انسي كلشي وابدي من جديد صفحه ويه نفسج وشغلج واوعديني ياخويه ماتسوين هيج ماتدرين شصار

بيه من شفتج شلون تتكلبين بالكاع ولولا ستر الله ووكفت السياره جان انمردتي جواهه ماشفتيني شلون طلعت امشي واطيح اخاف تجي سياره تمردج قبلما اوصلج ..

ضل يمسح على خدي ويحجي وعيونه تتخيل الموقف ويحجي برعب واديه ترجف وكأني حسيت بشعوره بهذيج اللحضه وانه اتكلب بيد الموت ..

سحبت راسه لصدري وحضنته وهو مستمر يحجي ويبجي مثل الطفل وانه كلبي ينوجع عليه اكثر من وجع ضلوعي المتكسره

فعلا صعبه تشوف اختك لو اخوك الربيت وياه كبال عينك ياساعه ياخذ روحه ملك الموت وبعد ماتسمع حسه بالبيت ..بلعت غصتي وهزيت راسي

بايجابيه نزلت دموعي مسحهه و باسني بجبيني ومسحت دموعه وانه اهدي بي شويه وطلع يحجي ويه الدكتور رفعت راسي عن المخده باوعت لجسمي يلي ماكاعد احس بي واشوف رجلي اليسرى ملفوفه

وايدي ومخلين شي مربع كابسينه على حوضي ولفاف على بطني نازل من صدري ماعرفت شنو هذا المخلينه على حوضي ولا ليش مخلينه جسمي كله خدران وماحس بي ولا باي الم فقط ايدي اليمنى

صاحيه وصفحه اليسرى من كتفي ملفوفه من غير راسي الشادين عليه باندج ورقبتي يعني باختصار مكسر جسمي تكسير من الصدمات بالكاع كله وما

طلعت روحي قدر الله ان ماياخذ روحي وانه مذنبه وظالمه نفسي وغيري .. تندمت حيل تندمت لان سويت بروحي هيج رجعت راسي عل مخده

وصرت احجي ويه ربي واعتذر واستغفر وهل ذنب العظيم بس هوه العظيم القادر على ان يسامحني عليه و يغفره .. دخل الدكتور فحص

عظامي واخذوني للاشعه يشوفون وضع راسي بعدما كعدت وكالوا مابي شي مجرد شك بسيط اثر ضربته بالرصيف ورضوض بالجمجمه وباقي الاطراف الملفوفه متفطره ومتكسره

لان صارت الطيحات عليهم انفطر كتفي وحوضي اثر اول طيحه وكسر بكف رجلي من التوائهه والحمدلله يعني عدت سلامات نكول وماتشللت.. هزيت راسي باسف وضميري صار العذاب بي كود

وزاد الوضع لمن بده البنج يروح مني وصارت كل اطرافي تصل علي رجعوني للغرفه والليله رح

يبقوني تحت المراقبه فد يومين ياله اكدر اطلع دخل احسان كعد عل كرسي يمي بتعب وكتله بتردد..

_احسان اهلي يعرفون

_لا كتلهم راح اخذهه لمدينه الالعاب تتونس 

_وتالي شراح تكللهم وانه راح ابقى هنا يومين

_راح اكلهم طحتي من اللعبه وتكسرتي جا شكلهم ذبيتي روحج من السياره حتى ينجلطون لو تلازمهم فوبيه من السيارات وعلي مايخلونج تصعدين سياره بعد معناهه 

_شكرا احسان

_ماريد شكرج هذا اريد توفين بوعدج وبس 

_انشاءالله بعد مافكر باحد ولا اريد احد فقط الزم وظيفتي واستقر يمكم

_هاذهو خليج يمنه اشرفلج من الغير..

هزيت راسي بايجابيه وابتسمت رن نقاله ووجهه علي شفته بابا تنهد وطلع من الغرفه يرد عليه وانه صفنت بالفراغ واتذكر حالته مساع وشلون ضل

يبجي واكل بروحي قهر عليه وشعور الذنب والندم فوك شعور وجع الكسور حاوطني حسيت روحي رادت تطلع وضاق النفس بيه هاجت كل كسوري

علي وبقيت شاده قبضه ايدي واضرب عل جربايه بكل حيلي لحدما اجه احسان مخروع لزم ايدي وكال بقلق..

_شنو شبيج جنان شيوجعج

_كلشي يوجعني كلشي احسان فدوا خليهم ينطوني مسكن روحي راح تطلع من الالم احسان فدواا  ااخ يمااا..

ساعه وانه الاوجاع تاكل بروحي حسيت بروحي تصعد وتنزل وكل شوي يغمى علي وارجع اكعد على اثر الالم مايصير ينطوني مسكن لحدما يمر ٦ ساعات وره العمليه بقيت مخليه حجابي بحلكي واصرخ حتى مايطلع صوتي والم المستشفى علي بس عبث ..

احسان يروح ويرجع عل دكتور يتوسل بي ينطيني مسكن وانه اصرخ من الوجع وابجي وعلى صوتي دخلت امي وابوي للغرفه خايفين والقلق بعيونهم شفتهم وسكتت مصبره روحي على الالم يلي كاعد اعيشه باوعلي احسان وتوسلته

بعيوني هز راسه وراح بسرعه صاح للدكتور كعد بابا يم راسي وكال وهوه يمسح على شعري..

_ شلونج يبعد ابوج شلون طحتي ليش ماتنتبهين على نفسج بويه ماتدرين شصار بيه من كلي اخوج طحتي وتكسرتي

_ما.. مابيه شي .. بابا صرت احسن 

_شبيج بويه اكو شي يوجعج

_لاا بس رجلي شوي توجعني 

_هسه راح اروح اصيح للدكتور حلى خليج يمهه ..

راح بابا وره احسان وامي بقت تبجي بسكته وتمسح على راسي وتباوع على طولي لزمت ايدهه بستهه وانه روحي احسهه تتكطع من الالم وكوه احجي ..

_اا امي لا تبجين.. مابيه شي

_شلون مابيج شي ولج يمه وهاي حالتج الله ستر ومارحتي بيهه والله جني حاسه لمن طلعتي من البيت جنت حاسه راح يصير بيج شي بس مالحكتج وجذبت احساسي 

_لا تخافين علي.. امي مابيه شي .. مع الوقت اصير زينه..

غمضت عيوني بالم واجت الممرضه بيده ابره فرغتهه بالسرنجه واحسان وبابا داروا وجهم وطلعوا بالباب دارتني على جهه اليسرى هيه وممرضى ثانيه لو شاغت

روحي من الم الحوض ماتحملت اسكت بعد وصرت ابجي واصرخ عليهه عافتني وراحت عل جهه الثانيه دارتني على جهه اليمنى السليمه شوي وضربتني الابره بالعضله

رجعت نمت على ظهري حيلي منتهي من الصريخ وامي تبجي بسكته وملتهيه تمسح بدموعي دخلوا بابا واحسان اجه بابا باسني بجبيني ومسحت دموعه النازله على خده وكتله وانه احس الدنيا اختفت من عيني..

_دموعك غاليه على كلبي يبعد كلبي انت 

_تمرمرت روحي عليج ولج بويه شبلاج ليش صارلج شكم سنه داخله باكتئاب احجيلي وكليلي

شنو التردينه حتى اسوي كليلي وين مشتهيه ترحين حتى اخذج مستعد اوديج لاخر الدنيا بس لا اشوف حالتج هيج بعد 

_ماريد شي غير وجودكم يمي وسلامتكم 

_يمج احنه موجودين يمته ماتردينه ..بويه احسان سولفلي شصار باختك وشلون صار هيج بيهه وانت يمهه 

_بويه ركبت بالمراجيح ونست تشد الحزام او ما شدته زين ولمن ارتفعت وزادت سرعه المرجوحه فقدت السيطره وطاحت 

_سوده علي يابويه عساهه طيحتج بيه ولا بيج 

_اسم الله عليك بابا اموت اذا صار بيك شي شعدي غيرك ووين انطي وجهي بعدك الله يحفضك ويطولي بعمرك ويخليك الي بابا

_بعد حيل ابوج وبيته ..

باسني براسي وشوي احس الالم خف وبده يروح ونعست بقيت اباوعلهم وهمه ايدهم على خدهم وكاعدين يباوعولي لحدما غمضت عيوني نايمه...

مر يومين عل حادثه مالتي وطبعا المسكن يضل بس ٣ ساعات ومايصير اعيده الا بين ٦ ساعات وثانيه وانه كل يوم متجرح بلعومي من الصياح وروحي متولعه بالوجع .. 

صار وقت طلعتنه وفحصولي عضامي وكتبولي المسكنات وهاي المخلينهه حوالين الحوض ثبتوا علي ماشيلهه ولا اغيرهه لحدما يطيب الفطر

سوالنه بابا خروجيه وطلعت من المستشفى على حماله ماكدر اكعد على حيلي وطبعا اصريت على اهلي ان مايجيبون سيره لاحد بس ضعفت قواي باول اسبوع وانه اتلوى بين الوجع وتفكيري بمحمد كلش احتاجيته روحي تمرمرت عليه 

حتى صرت من اتالم وياخذني الوجع لا اراديا انده باسمه واكثر من مره ردت اتصل عليه يجيلي بس منعت نفسي وكلت خلي الولد عايش حياته خلي جروحه تطيب ويشوف الاحسن مني والتستاهله رغم صعوبه هل تفكير بس عل اقل اهون من ان ياخذني ويتعذب وياي وبانانيتي ..

بعد ايام اخذني الضعف واضطريت اكول لاهلي يخابرون لعمو شهم ويخلون شموخ تجي يمي واحجيلهه عن الصار وياي لان اختنكت من مكابل الحيطان والنوم ولا طلعه ولا مشيه ورغم

اخذت اجازه من دوامي الا ان محمد لا اتصل ولا اجه ولا حاول يعرف حتى اخباري ولو اعرفه انه هسه عباله انخطبت من مرتضى لو تزوجنه وهل

ماخذه اجازه اويلي على حظي اذا صدك هيج ظن بيه بس لا شلون اخطب وانه بعدني على ذمته امده عقلي ادري شنو عقل شايله تنكه انه لو

الرضوض اثرت على دماغي .. المهم وره اسبوع من اصابتي اجو بيت عمو شهم كلهم تطمنوا علي حتى مرتضى بس ماسمحت ان انفرد وياه خفت

يسويلي شي عاد بقيت ملازمه بشموخ وهوه من شافني هيج طلع من الغرفه مالتي ويه عمو وبابا بس شموخ بقت يمي ونوره ..سالتني شلون صار

وياي الحادث ونزلت راسي بندم ماعرف شكولهه مستحيه من نفسي وفعلتي هاي كلت لنوره تطلع تجيبلي ماي وهيه جنهه حست علي خلت نوره تطلع وكالت ...

.

.

:- بيوم خطوبه محمد وعبير وبعدما طلعنه واحنه بالسياره لمن كالي بابا ان رايد يحجي وياي عن مرتضى ويريد يادبه لزمت كلبي وقتهه ماعرفت

شنو يريد يسوي بابا ويه مرتضى ولا عرفت شمسوي هوه حتى يريد يسويله بابا فركه اذن ثاني يوم كعد وياي بابا وحجالي اليريد يسوي وكال ...

_بويه شموخ انه سمعت كلامج ويه سلام بالمطبخ بيوم التعاركتي بي ويه مرتضى وراد يضربج

_لحظه بابا خلي افهمك انه ما..

_اعرف يابويه انتي الحجيتي جان كمثال ضربتي لاخوج حتى يرجع عقله لراسه بس شكله اخوج راكبه شيطان ومصر على نيته ويه البنيه وانتي

تعرفين جنانه يابويه بنيه عاطفيه ومشاعرهه تتملكهه واخاف يضحك عليهه اخوج وياخذهه لدرب اعوج بحجه الحب والزواج

_لا بابا جنان رغم عاطفيه وتقودهه مشاعرهه بس لا تتوقع انهه بيوم ترضى بالغلط ويه مرتضى وتطاوعه على شي حرام وعيب

_اعرفهه بت اخوي وتربيته ماتخطي بس الخايف منه هوه اخوج وانه بالي موال اريد اغني اله

_شلون يعني بابا

_اريدج تكعدين وياي بعدين عل عشه وتلمحيلي عن نيته ويه جنان خلي يفهم ان اذا ماتركهه بحالهه ممكن ان تحجيلي عنه 

_بس انه كتله وهددته احجيلك بيوم التعاركنه وماسمع مني يعني حتى لو تدري انت وتروح تحجي وياه راح يكلك احبهه واريد اتزوجهه والوصلك هل حجي جذاب

_هاي هيه بويه كدامنه الحل اريدج تبوكين لسانه وتتعاركين وياه نفس هذاك اليوم اريد كلامه ونيته ويه جنان كلهه مسجل حتى تسمعينه لجنان وانه

راح اوكف وره الباب بحجه الجنت اتسمع عليكم وادخل عليه حتى الزمه واكون سامع سمع اذني محد حاجيلي ولا يكدر يسوي وياج مشكله بعد ولا يضرج بشي

_ تمام بابا بس يمته 

_اليوم بليل اذا تكدرين بس لا تبينيله انج مدسوسه عليه او عندج شي وياه وانتي ادري بيج شاطره وكدهه

_حاضر وعند عيناك يبعد عيناي اجيبلك تسجيله وتسجيل العشيره همين 

_اروح فدوا لبنيتي المتحمسه

_هههه ..

بيومهه بليل سويت نفس الكاله ابوي راقبت مرتضى وجان معصب فكلت خلي استغل هل شي لان لمن يكون معصب وشخص يعيل بي يحجي كلشي عنده فبقيت ابسمر بي واكول لسلام..

_اكلك سلام سؤال

_جواب

_اذا بيوم شخص اجالك وكلك اريد اتعرف على اختك واراسلهه ويكون بينه حب وغرام وبعد سنتين خمسه عشره حسب الظروف اذا سمحت اجي اتقدملهه شراح تكله

_تشوفين ميز البلازما هذا

_اي

_اخلي عليه واطر مكفاه نصين واكله روح عالج ضهرك وتالي تعال اسالني نفس السؤال حتى اوديك

للنجف هل مره جا شني خويه انه اختي بت ليل لو بت شوارع ماعدهه اهل حتى تكعد تطرح الحب والغرام وياك ابن الزمال

_ليش شكو بيهه مجرد رسايل وبس

_لو هسه نضره اذا باوع لاختي لو لبت عمي لو لاي بنيه من قرايبي وعرضي الزمه واشلعهن اله

_كفوو والله هاي الزلم المعدله..

حجيتهه وباوعت لمرتضى بنص عين وهوه خازرني وشاد قبضه ايده شكله مامولعهه بعده عاد التفتت على بابا وكتله..

_وانت بابا شنو رايك اذا واحد من خواني دريت بي عنده بنيه يحبهه ويريد يكضي وياهه وقت

يعشك ويتمعشك وياهه وياخذ راحته عل اخر والزواج اخر همه شراح يكون رايك وشلون تقابل هل موقف هذا

_انه

_اي

_وواحد من ولدي يسويهه ببنات الناس 

_اي

_افاا غير اذبحه عل صبه وانه ابن ابوي 

_اححا

_والله جا شني بويه عايشين باوربا احنه شني غير مسلمين والنه شرع ودين وعاداتنا وتقاليدنه هاي كلهه وين راحت ومن غير هذا كله عمرنه ماطلعت

عيبه من بيتنه واحنه بيت الشيخ محمود لا من بنيه ولا من رجال هسه تاليهه يجي واحد من ولدي

يلعب بعرض الناس لا ويجي ابوهه يكابلني ويكلي ابنك لعب بعرض بنتي غير اكتله واكتل روحي وراه 

_اسم الله عليك بابا بس هدي اشو حركت دمك من مجرد سؤال هاي لو تصير صدك شلون

_اذبحه وعلي واذبح روحي لو واحد من ولدي لعب بعرض بنيه وضحك عليهه ان جانت قريبه او غريبه 

_لاا خواني خوش زلم ويخافون الله بعرض الناس مايسوونهه..

جريت الكلمه وباوعت لمرتضى وهوه هز راسه بوعيد شكله فعلا جان كاعد على نار بقه يصفن ومن شافنه سكتنه اشرلي اجي وراه وراح لغرفته

اشرت لبابا وطلعت نقالي فتحته على مسجل الصوت وكمت وراه واول مادخلت للغرفه لزمني من خوانيكي وحجه من بين سنونه..

_ولج تردين تبيعيهن علي شموخ تره مو غبي انه حتى اتراجع عن قراري بس لانج سمعتيني رد ابوي

خلي يكون بعلمج لا انتي ولا ابوي ولا اكبر واحد يكدر يمنعني من شي لو ردت اسوي فاهمه

_يعني بعدك مصر تضحك على جنان وتلعب بيهه وتشمرهه

_لزمي لسانج ولا تتبلين علي لا نيتي اضحك عليهه ولا العب بيهه واشمرهه 

_جا شنو مثلا جوابك لمن كتلك اذا حبلت شتسوي وكتلي اذا حبلت اتزوجهه

_اي وهذا الكلام يثبت اني رايدهه زواج مو لعب

_هااا يعني تريد توصلي فكره انك تريد تجرب وياهه الحرام قبل الحلال لان الحرام طيب والضاهر تعودت عليه وانت بالخارج تريد تجربه هنا وتورط البنيه 

_اكلي خر* ادبسزز وبعدين انتي شني عود صايره جبيره وفهيمه وكاعده تتفلسفين علي وتبسمرين بيه كدام ابوي خب خلي اكلج ياهه حتى تفوخ

الدوده جنان ماراح اتزوجهه الا لمن اشبع منهه وتطلع مونتهه من عيني والا احبلهه ياله اتزوجهه

واكعدهه بالبيت مثل الخدامه واريد تفتحين حلكج بكلمه لو توزينهه علي وشوفي الا اعدمج عافيتج واشوفج نجوم الضهر 

_جا شكد خسيس وماعندك تربيه الظاهر تعب امي وتضحيتهه راحت عل خالي بلاش ولو تدري بابنهه يطلع ناقص جان ثاني يوم تزوجت وعافتك تربه يتيم 

_ولج انجبي وسدي حلكج لا والخلقج هسه اموتج وادفنج هنا وانعل ابوج لابو جنان لابو الخلفجن يا ساقطا.....

قبلما يكملهه دفر الباب بابا ودخل لزمه من قميصه من وره ولزكه بالحايط ودك بوكسات على وجهه وراسه واكتافه بحيث تخبلت وانه ادفع ببابا عنه

واحضن بي محاوله ابعده واصرخ بعلو صوتي لسلام يجي يفكه مني واخيرا اجه حضنه من وره هوه و محمد ودفعه عنه وامي طلعت مرتضى سحل

من الغرفه باوعت لبابا وشفته وجهه صار اصفر على ازرك خرت قواه وطاح بحضن سلام صرخنه عليه انه ومحمد وكعدنه كباله كمت بسرعه اركض

جبت صلاحيه الماي من الصاله واجيت من الخوف والرعبه ردت اطيح مرتين على وجهي وصلت وخليت بيدي كومه ماي وغسلت وجهه ومحمد

يمسح على صدره ويحاجي وانه جسمي كله يرجف ويكت خوف ..ومرتضى يبعد بيه حتى يشوفه مانطاني مجال وامي تبجي

وتحجي وياه صارت هوسه وكلهه بكوم وايد مرتضى التبعد بيه بكوم ثاني ماتحملته وكرهته كلش اخر شي لزمته من ياخته بغضب شديت

قبضه اديه وصرت ادك على صدره واغلط عليه وادفع بي بره الغرفه كام محمد طلعه من البيت كله وداه للساحه وانه رجعت على ابوي وشفته صار

احسن رجع يتنفس طبيعي بس صافن وهمه ثكل اكتافه نزلت دموعي لمن باوعلي بتعب وكال وهوه مهدود حيله..

_خلي يطلع من البيت ماريده ماريد اشوف كصته بهل بيت بعد خلو ياخذ هدومه ويرجع منين ما اجه الزين لو مات مايجي بحضاه الاكشاش..

عرفته قصده الزين هنا ابنه مرتضى المات لان جان يسولفلنه عليه ويكللنه شكد جان شاب خلوق ومؤدب ونفس اخلاق محمد وبار باهله وماتغيره

غربه ولا ناس والكشاش قصد بيهه مرتضى اخوي يلي علموده اخذ امي حتى تجيبله بديل عن مرتضى وفعلا كلامه "الزين مايجي بحضاه الاكشاش" 

وفرق شاسع وواضح بين مرتضى الاصلي وبين البديل هذا .. هزيت راسي باسف ووكفناه انه وسلام اجه محمد اخذه عني وودوه لغرفته قاس

ضغطه وطلع مرتفع حيل هوه وسكره انطاه ابره نزل السكر وانطاه حبايه ضغط وبعدهه بنص ساعه رجع قاس ضغطه وطلع شوي نازل عاد انطاه ابره ثانيه وخلاه

ينام وهوه سوده علي نام بسرعه من الهبطه مالته .. بقيت نايمه يمه وكلهه تسالني شصار وليش ضرب مرتضى من شافوني ماحجيت طلعوا بره

واخذني محمد من ايدي لغرفته كعدني عل جربايه جابلي ماي وكعد كبالي وهوه يحجي بهدوء..

_شلون صرتي

_مو مهم وضعي المهم ابوي مايصيرله شي اخاف عليه محمد اخاف عليه ينام وبعد مايكعد والله اموت لو صار بابوي شي والله

_لا تخافين ابونه الشهم مو حي الله كلبه قوي وراح يتجاوزهه انشاءلله بس اذا تكدرين احجيلي شنو الصار بالضبط

_خليني ارتاح وبعدين احجيلك عفيه

_اي اكيد تمددي ونامي هنا حتى محد يزعجج وانه رايح للديوان اذا تردين تحجيلي تعالي

_تمام بس فدوا محمد لا تخلي مرتضى يروح يم ابوي لا يشوفه ويعصب اكثر ويروح بيهه

_لا خلي علي مرتضى انه راح احاجي واخلي هل فتره يبات عند صديقه لحدما يهده الوضع ويرجع اذا سمحله ابوي

_تمام شكرا الك

_لا تشكريني مو غريب انه انتو اهلي وقطعه من روحي وواجبي اوكف وياكم بالشده واسندكم بالرخاء

_ياريت لو مرتضى اخذ من اخلاقك بالفتره العاش بيهه عندك

_الاخلاق فطره مو بس تربيه تجي من الصعوبات ومرتضى ماشاف صعوبات بحياته وجانوا امه وابوه محاوطينه ومدللينه وكلشي يسوي يعتبره صح

بينما احنه عشنه من صغرنه لا ام ولا احد يسال علينه غير ابونه وهم جان يكضيهه بالدوام اغلب وقته ويادوب يحضرولنه لكمه ناكلهه وهيج صارت

بينه فطره اخلاقيه ومحنه عل جبير والصغير والفقير وخليهه بالج الدلال الزايد يخرب الانسان شما جانت تربيته واخلاقه زينه

_صحيح يا خويه الاخلاق فطره وهل فطره شائت تكون عندك انت وسلام وتنعدم من مرتضى ااخ يا امي لو درت بتربيتهه وتضحيتهه كل هل سنين شلون ضاعت بابنهه والله الا تنام وتكعد وهيه مقهوره على ابنهه

_الله كريم خويه اذا مسوي شي جبير لا تحجولهه لان مو سهله الام تشوف تربيتهه تضيع كدام عيونهه وماتكدر تسويله شي

_هوه هيج ياخويه بعدين احجي ويه ابوي واكله مايجيبلهه سيره ولو هوه اصلا من بعد السمعه متاكده منه ومن ذاته ماراح يحجيلهه شي بس للاحتياط اوصي

_تمام يله خويه ناميلج شويه اكيد تعبتي من الصار وانهد حيلج وخلي السوالف لبعدين وريانه لا تخافين عليهه راح ابقيهه يمي اوكلهه ومن تنام اوديهه لامي

_تمام خويه..

ابتسم ومسد على شعري طفه الضوه وطلع من الغرفه تمددت وبقيت صافنه وكل شوي ينعاد الصار كله ببالي وافز عبالك توقف الزمن هناك وماكاعد

اطلع من الموقف الصار .. غمضت عيوني وغفيت بدون ماحس للصبح كعدت على صوت طكطكه يمي فتحت عيوني وشفت نفسي بعدني بغرفه

محمد التفتت وشفته واكف يم الكنتور يطلع ملابس الدوام كعدت على حيلي انتبه علي وكال باسف....