رواية فصلية بديلة ( شموخ ) الجزء الثاني الفصل الواحد والثلاثون 31 بقلم ام ملكوت

:- طفه الضوه محمد وطلع من الغرفه تمددت وبقيت صافنه وكل شوي ينعاد الصار كله ببالي وافز عبالك توقف الزمن هناك وماكاعد اطلع من الموقف الصار .. 

أضف تعليقًا

_اي اكلك محمد شلونه بابا شلون صار خو ماتخربط بليل مره ثانيه 

_لا الحمدلله زين صار توه جنت يمه قست ضغطه وسكره طبيعي بس بعده شويه مهموم 

_سوده علي يابويه عساهه بحضك وبختك يامرتضى الا صدك بيش ساعه هسه ليش ماكعدتني بليل ارجع لمكاني اكيد مانمت مرتاح البارحه

_ لا شسالفه خويه شفتج نايمه ماهان علي اكعدج نمت بغرفه سلام مريحه جربايته لا تخافين وبعدهه الساعه ب٥ ونص هسه رجعي ناميلج ساعه على مايصير وقت دوامج

_لا خلي انزل يم ريانه اكيد جوعانه هسه وتريدني

_تمام رح انزل اشوفهه الا صدك صباح الخير

_هههه صباح النور خويه بس جان اجلتيهه للظهر 

_ههه مادري بروحي فزيت مخروعه على ابوي

_اي وياج حق الصار مو هين

_اي والله الا صدك عبير شلونهه

_زينه العبوره دائما تسال عليج

_ههه سالت عليهه العافيه بس بالله عليك كاعد تدلعهه تذمهه شنو عبوره

_هههه هيه برعه وتضامنا ويه اسمهه سميتهه عبوره

_هههه اكلك منين جبت هل كلام معقوله جانوا يعلمونكم بالخارج عليه اشو انه عراقيه وبعمري كله سامعه كلمه عبور بس مره وحده مدري مرتين 

_انه كل فتره اسمعهه

_لا بربك منين

_من ام السمج من اروح اشتري منهه تضل تحجي على بتهه تكول عبور ومره صار عندي فضول وسالتهه شنو معناتهه عبور جان تكلي البنيه الوكحه والبرعه واللوتيه نسميهه عبور 

_يعني هسه عبير صار اسمهه عبور

_اي وتتخبل من اكلهه هيج تصير تعض هههه

_هههه بسيطه جا انه الهه بعد كلما تحاجيني اذب الحجايه عليهه واخبلهه

_بعد انتي وياهه بس لا تكليلهه اخذتيهه مني 

_تخاف تعضك

_اي والله هاج شوفي ايدي شلون مطبعه سنون 

_هوه طار وخلص من اول ماصارت حلالي

_الله يحفضهه الك ويديم فرحتكم وزواجكم يارب

_تسلمين بعد روحي يوم الالج ونفرح بيج

_لااا محمد جا انت ومرتك علي مايصير هيج عل اقل انت اخوي لا تدعيلي بالورطه

_ههههه لا انشاءلله مو ورطه لو لكيتي ابن الحلال

_ابن الحلال خلي لحلاله لا اريده ولا اريد شعفته

_ههههه

_هههه والله خلي اروح اكابل بنيتي واحضنهه قبلما تضل تقترح علي ازواج

_ههه يله روحي وانه خلي ابدل اخذتني سوالفج الحلوه وراح اتاخر

_يبعد حيلي بدل خويه بدل تريكت غير

_الحمدالله 

_عوافي يله باي

_الله يعافيج الله وياج..

طلعت من الغرفه نزلت غسلت وجهي وفرشت سنوني حضرت ملابسي لان كلت ماتفيد النومه بعد رحت لغرفه امي وابوي دكيت الباب ودخلت لكيتهه

نايمه على صدره وهوه فاتح عيونه وصافن بالفراغ باوعلي وابتسم اشرلي اجي يمه ورحت بست ايده صبحت عليه وكتله..

_شلون صرت بابا حبيبي خوفتني كلش عليك البارحه

_لا تخافين بويه هاي انه كبالج مابيه شي والحمدلله 

_ليش سويت هيج بابا ليش قهرت روحك علموده لو صاير بيك شي لا سمح الله انه وين انطي وجهي

تدري يابوي البنيه مالهه سند بهالدنيا بعد الله غير ابوهه تقبلهه اضل بلا سند بسبب مرتضى وافعاله 

_لا بويه ماقبلهه بس مو هينه يبعد ابوج مرتضى خيب ظني وكسرني بكلامه تدرين يا شموخ امس حسيت بنفس الشعور لمن شفت ابني مرتضى ميت

كبالي قبل سنين طويله وهسه حسيت ابني مرتضى مات ودفنته بيدي مره ثانيه يابويه 

_لا تحجي هيج بابا فدوا اروحلك لا تكطع كلبي عليك مرتضى صح غلطان بس لو تكعد وياه وتفهمه هل شي غلط صدكني راح يفهمك ويعوف الطريق الاعوج

_مايفيد يابويه اخوج جبير وفاهم صح شكاعد يسوي هوه وعنده نفسه قبل كلشي وانه ابوه لو

اعرف ان الكلام ممكن يجيب نتيجه وياه جان مامديت ايدي عليه ولو هوه ضربي اله جانت حركه كلب مني ماراح يفيده بشي

_ماعرف يابابا بعد هوه ابنك انت الكبرته وتعرف اطباعه اكثر واحسن مني

_اي بعد ابوج فخلينه عل خطه والتسجيل شوفيلج يوم وروحي للبنيه سمعي الهه عل اقل نكطع دابر

الشر من جهتهه اذا جهه اخوج ماتنكطع وخلي ننقذهه قبلما يضحك عليهه وتطيح بالغلط وتتخارب العائلتين

_انشاءالله بابا اسمعه الهه واحاجيهه بس انت ارتاح بعد ولا تخلي بالك وياه هوه لمن يشوفهه ماتنطي مجال غصب عنه لو يحبهه صدك يجي يكلك اريد اتزوجهه

_على كولتج يابويه بس سالفته هاي وغلطه على ابوه وعمه مانساهه اله طول عمري ولا اكدر اعامله مثل قبل لانه طاح من عيني ومايرجع بعد

_لا بابا الله يخليك لا تسوي هيج مرتضى بحاجتك ولو ماوكفت وياه راح يحس روحه وحده بهاي الدنيا وراح يغرق بالغلط اكثر واكثر حاول تماشي

يابويه وتسمع منه يجوز عنده سبب يخلي مايريد يتزوج عكس بقيه الشباب يلي يتلهفون عل زواج بهيج عمر

_انشاءلله يابويه خليني ارتاح جم يوم وهوه يتادب وساعتهه اكعد وافتهم منه واذا شفته مأيوس منه اكله يلم جوالاته ويرجع منين ما اجه

_اي بابا حبيبي وامي لا تحجيلهه تره ماتتحمل تعرفهه شلون تعبت عليه وربته وشالته بالصلاوات مو هينه تشوف تربيتهه تدمر كبال عينهه 

_لا شلون اكلهه ادريهه امج حساسه وتنقهر لو عرفت بهيج شي خلينه هنا بعد وننسه الصار ومانجيب سيرته لا لامج ولا اي شخص ثاني

_ومحمد طلب مني يعرف شصار وانه وعدته احجيله بعدين

_احجيله محمد اخوكم الجبير ومن حقه يعرف شصار بالبيت بس ماريد السالفه تطلع لبره بيتنه واحد يعرف غيرنه احنه وجنان

_لا انشاءلله بابا ماحجي هيج سالفه انه تدريني 

_تمام بويه روحي يله لدوامج راح تتاخرين وخلي سلام ياخذج بسيارتي وياه 

_تمام باباتي حبيبي ديربالك على نفسك ولا تفكر هواي وتتعب صحتك

_انشاءلله بنيتي وانتي هم ركزي بالتدريب وديري بالج 

_انشاءالله بابا يله بيباي

_الله وياج بنيتي..

بسته براسه وبست امي براسهه وهيه بعدهه نايمه شكلهه الليل كله مانامته خطيه ..طلعت من الغرفه ورحت لغرفتي لكيت ريانه كاعده وتلعب بالايباد مالتهه 

اجيت اخذتهه من جربايتهه بوستهه شمشمتهه علكت الهيتر بالغرفه ودخلنه سبحنه ونشفنه انه وياهه وطلعنه كعدنه كبال الهيتر وصرت البسهه

كملتهه ورجعتهه عل جربايه تباوع افلام كارتون وانه رحت بدلت ملابس الدوام مشطت شعري خليت مكياج خفيف اخذت جنطتي واوراقي

طفيت الهيتر واخذت ريانه خليتهه يم ابوي لحدما تكعد امي وتستلمهه ودعتهم وطلعت لكيت سلام مجهز نفسه للكليه وطالع يجيب التايهه من اهلهه

ابن اللذين ماشاءالله عليه كتله يله وطلعنه ركبنه السياره وطار بيه للدائره نزلني بالباب وراح لجامعته .. دخلت لمكتبنه سلمت على زملائي

وشفت صديقتي رحاب ايدهه جوه خدهه وصافنه اجيت كعدت عل كرسي يمهه وانه اغني

" شعدج صافنه وايدج على الخد ، عبنج عاشكه وبالج احد" 

_ايييه والله عاشكه وبالي احد

_اها ومنو هذا يمصكوعه انتي

_رهبانوو الماخذ بالي وكلبي..

رفعت راسي باوعتلهه باستنكار وهيه تنهدت وكملت كلامهه..

_اويلي عل طول عل شخصيه عل عطر اليجيب التايهه ولو عطره اخذني من اهلي وتوهني

_يولي على كيفج شدعوه هيج متسرسحه

ماخله عينه علي ولا حاول يستغل حبي اله بالعكس ردني وخله حدود بيناتنه بس تدريني اخيتج مايلزمني حد

_ايي وشتردين تسوين بله اذا ما يلزمج حد منو يلزمج

_شسوي ليش بيدي شي انه غير ان اعترفله واحلي بروحي بعيونه حتى ينطيني مجال

_واذا انطاج مجال وتالي شراح تستفادين

_استفاد هواي لجج انتي شايفه رومانسيه المكتب شلون حلوه اويلي وخاصه اذا عدنه مكان خاص بينه نلعب للصبح ومحد يحاجينه 

_مجربه الشعور الظاهر 

_وهوايي همم بس حابه اجربه ويه راهب اريد احس بدمي يجري بجسمي وين مايخلي ايده 

_صدك ماتستحين وبلا تربيه انتي طلعت مصادقتلي وحده ساقطه ومادري بنفسي ..

باوعتلي بغضب ونترت بيهه كمت من يمهه وانه دمي فاير لو باقيه يمهه شوي بعد جان افترستهه لا ونوب مخليه عينهه على راهب بت الطركه عوزهه

بعد وراهب ينطيهه عين ويتمتع بيهه خرب لعبت نفسي حتى من راهب اذا صدك يتقرب من هيج وحده ساقطه .. بقيت افتر بالحديقه وانه احاول

اجر نفس غمضت عيوني ورفعت راسي افكر بكلامهه عن راهب واحس بركان يتنقل من راسي لكلبي بقيت اهز رجلي بقلق معقوله تخلي راهب

براسهه وتحصل عليهه معقوله هوه ينطيهه عين ويتقرب من هيج وحده مو لشي بس اخاف تضحك عليه وتوهمه انهه تحبه تالي ينكسر كلبه من يعرف

حقيقتهه وهوه كلبه طيب افف شلون مشكله هاي لازم احذر راهب منهه ولا شلي غرض هسه انه شنو صغير هوه مايعرف الساقطه من الشريفه لو غبي مثلي

_منو هاي التريد تضحك علي 

_منو

_الجنتي تحجين وتغلطين عليهه بحركه كلب توه

_جنت افكر ماحجي

_تفكرين بصوت عالي

_يعني سمعتني

_قابل شلون اعرف جنتي تحجين على وحده 

_ايي.. لا ..غلطان ماجنت احجي على وحده

_شموخ

_هاا

_لا بس هاي الاسمهه رحاب طلعت مو خوش بنيه وتدور رومانسيه بالمكاتب وتدريني اضوج من هيج شغلات انه وماتوقعتهه تكون بنيه مو زينه فعصبت عليهه 

_وانه شنو علاقتي بالسالفه

_شنو

_ليش كلتي خاف تضحك علي 

_اي مخليه عينهه عليك تريد تجرب هل شغلات وياك وانه فكرت ان ممكن تضحك عليك وتوهمك بحبهه خفت ينكسر كلبك منهه لا اكثر ولا اقل

_هاا هيج 

_اي هيج 

_لااا تخافين علي شفت هواي هيج نماذج بحياتي والعنده غالي مايهزه الرخيص فلا تخافين

_لاا مو يم هل شغلات انه الحمدلله عندي وحده ماليه كلبي وتفكيري ولو اريد جان شفت غيرهه من سنين

_منو هيه

_وحده جانت اول حب الي وللاسف ماقدرت حبي وتزوجت ثاني

_احم تمام عن اذنك سيدي صار وقت محاضره العملي

_اخذي راحتج..

ابتسم بوجهي وكلبي صار يخفق بجنون نزلت عيني عنه وعبرت من يمه حسيت كل كلامه عن اليحبهه موجه الي وكأن عيونه بدت تصرخ بحبي يعني

كلام اسراء وعبير صحيح وراهب بعده يحبني بس شلون وليش معقوله اكو هيج انسان يحب شخص ما عرفه وعاشره غير شهرين بس ويكتم حبه كل

هل سنين بكلبه ومايبدله بغيره هذا مو حب هذا جنون اليحس بي راهب اتجاهي اذا فعلا اكون انه يلي بكلبه ..هه شوف انه الوم الرجال وانه مو اقل

من وضعه اذا حبه جنون انه حبي شنو ابتسمت وتذكرت لمن اعترفلي بالسياره بطريقنه للمستشفى هذيج الذكرى صارت تجيلي كل فتره وبكل مره

احس عبالك البارحه معترفلي ماجن مر على السالفه ١٠ سنين بحالهه وماصدك ولا ممكن يكون اكو هيج حب بالدنيا الله رزقني بي .. نفضته من

افكاري وخفيت ابتسامتي بجوف كلبي يلي متواجد بي كل المشاعر الدفينه ورجعت لمكتبنه اجت عيني بعين رحاب وكلبت عيونهه هزيت ايدي

واجيت اخذت جنطتي والاوراق ودخل الضابط طلبنه لقاعه المحاضرات للعلوم الجنائيه .. طلعنه وراه ودخلنه للقاعه اخذنه محاضرتنه لحدما مر

ساعتين كملنه وطلعنه للحديقه نرتاح شوي ونفتر بقيت كاعده عل مسطبه وحدي وصافنه بكلام راهب ماكاعد يروح من بالي 

التفتت وباوعت لجهه مكتبه ولا اراديا اخذتني رجلي اله دكيت باب مكتبه وانه مادري شراح اكول وشنو حجتي وجيتي لمكتبه ولا ليش اجيت اصلا

اجالي صوته وفزز كلبي اخذت نفس ودخلت باوعتله وعبالك اول مره اشوفه وكأنه شخص غريب ولهل درجه مستحيه منه ومتردده من ان

ادخل لمكتبه لفت انتباهي اديه يلي طابكهن سويه ومخليهن عل ميز والمحبس يلي مزينهن على شكل قناع حربي .. رجعت عيني عليه وهوه يباوعلي

بتساؤل ومنتظر احجي اشرلي ادخل وسد الملف الجان يقره بي دخلت بتردد وكلبي يرجف خوف على توتر دخلت بورطه باختصار كعدت عل كرسي وسال بقلق..

_خير شموخ صاير شي وياج ليش هيج متردده 

_راهب

_امري جمره كلبي..

رفعت راسي بتفاجئ وكتله بفهاوه..

_شنو

_شنو

_منو جمره كلبك

_وحده صار سنين معيشتني بعذاب فراكهه 

_هاا اجيت بس حتى اسالك اذا جان عندك كتب او شي يفيدني بالموضوع الحجيت بي ويانه بالقاعه السريه

_شمدريج بيهه سريه

_لان محد اخذنه الهه او حجه بيهه وثانيا القاعه مضلمه ومقفله باحكام وبيهه اسلاك كمبيوتر مواقع عكس بقيه القاعات 

_هاا حلوو و شنو طلبج بالضبط

_اي شي يفيدني كتاب او ملف او ملزمه تساعدني افهم وادرس شغلي زين بالمستقبل

_شنو عدكم هسه

_شاغر ماعدنه شي منا لبعد ساعه

_تمام لعد تعالي خلينه نحل هل قضيه سوه وبعدهه انطيج الكتب الترديهه

_قضيه شنو

_قتل زوج لزوجته 

_شنوو

_ليش متفاجئه هاي طبيعه الشغل يلي راح تستلميه كله قتل واغتصاب من طفل عمره اسبوع للشايب عمره٦٠ سنه

_يله لعد كعدي هنا عل قنفه لبينما اجيب الملف واللابتوب

_تمام..

ابتسمت بتوتر واجيت كعدت عل قنفه وانه اكل بروحي لوم وندم وفشله المن اجيت هسه انه المن دخلت لمكتبه وحجيت هيج وياه هسه عباله غرت

من رحاب وردت اتقرب منه لو يفهم جيتي غلط ويحاول يحجي وياي بغير مواضيع ساعتهه شلون افلت بله ..

تافافت وراحت عيني عليه شفته جاب اللابتوب والملف ودفتر ملاحظاته وهوه عينه علي يراقبني اجه كعد يمي وابتعدت شوي عنه باوع للمسافه

البيناتنه وهز راسه مبتسم درت عيني عل ملف يلي عل ميز ومديت ايدي اخذته خليته على رجلي وبقيت اقره بي وجان عباره عن...

براءه امراة ذات ال٣٠ عاما ام لثلاثه أطفال وزوجه لضابط شرطه برتبه ملازم تم العثور على جثتها في تاريخ _/ _/ _ على ضفه النهر ملقاة جثه هامده قام الناس الماره الذين عثروا عليها بابلاغ الشرطه منذ رؤيتهم

لزوجها الذي قام بقتلها واخذها في سيارته ولقي فريق الادله الجنائيه عند فحص الجثه بصمات اصابع و DNA لزوجها حول رقبتها فاستنتج المحققين والمحللين انه تم محاوله خنقها وعندما لم ينجح

ذلك قام زوجها باطلاق ٣ رصاصات على قلبها وكبدها مما ادى الى وفاتها مباشرتا وذلك موضح في كاميرات المراقبه لدى الجيران فقد تم قتلها ثم

نقلها بسيارته واختفاءه بعدها باتجاه بركه مياه كبيره في منطقه ____ ولم يتم العثور على الزوج الى الان .. 

:-قريت باقي التفاصيل جريت حسره ورفعت راسي اريد احجي ويه راهب وشفته مخلي اديه على رجله وصافن بيه يتامل تحمحمت وحتى نسيت شنو ردت اكله عاد كتله..

_وهسه شنو رحتو لهل مواقع ومالكيتوه

_اي 

_زين وجهاله وين

_عند اهلهه

_لعد الشغله بيهه ان

_شلون احجيلي بله

_شوف مو دائما يكون المقتول ضحيه وهل مثال ينطبق على اهل المره بهل قضيه

_وضحي اكثر

_يعني انت حاولت تحجي ويه اهلهه وتسالهم شجاب الجهال عدهم

_جوابهم ان نسيبهم جاب جهاله الهم يلي هوه القاتل

_وشنو ياكد هل كلام

_تسجيل الكاميرات

_اكدر اشوف التسجيل

_اي اكيد..

دار وجهه عل لابتوب طلعلي الفيديو واخذته خليته على رجلي وركزت بالفيديو وعدته هواي مرات وانه

مقربه الشاشه عليهم رفعت راسي لراهب وشفته لاطش وجهه يم وجهي يباوع وياي ابتعدت شوي وكتله..

_اكدر اتنفس سيدي

_اي ليش لا واذا تردين انطيج من انفاسي 

_راهببب

_ههه شكو لا تفهميني غلط كلت هيج يعني بحال اذا اختنكتي مو اكثر

_همم..

تافافت وهزيت راسي باسف وهوه مستمر يباوعلي احس قطعه من وجهي انشلعت بعيونه نزلت عيوني للفيديو وحجيت وياه بدون ماباوعله..

_مو كأنهم هنا جانوا يحجون

_اي لعد شنو ياكلون

_القصد ان سالتهم عن مغزى كلامهم شنو

_اي وجوابهم ان كلهم بتكم شردت ويه عشيكهه وعافتلكم جهالهه 

_همم بس ماحس ان حجو هيج لان من خلال ملامحهم جنهم يدرون بالسالفه وما متفاجئين او مصدومين وخاصه ابوهه شوف شلون هز راسه

بايجابيه وابتسم وين اكو واحد يكلوله بتك شردت ويه واحد ويكتفي بس يهز راسه ويبتسم شهل كلاوات هاي

_ههه وياج حق اكو تسجيل كاميرا قبل اسبوع من الحادثه لمن زار اهلهه وبقو يحجون بهمس بالحديقه هوه وعمه وانطاه مسدس بيده 

_صدك يعني استنتاجي صحيح مو

_اي صحيح 

_بله خلي اشوف التسجيل

_لحظه..

قرب يمي وفتحت عيوني بصدمه ابتسم ودار عيونه عل لابتوب وهوه بحضني طلعلي تسجيل الكاميرا وابتعد ياله جريت نفس و زفرته براحه

شغلت تسجيل الكاميرا وجان فعلا مثلما كال راهب طلعوا يهمسون وانطاه شي رغم ماواضح تماما بس مبين شكله من بعيد ان مسدس 

يعني الاب مشترك بالجريمه وهوه المحرض عليهه هزيت راسي بايجابيه وحسيت اني بديت اتعود على شغلي وافهمه صح باوعت لراهب وكتله..

_وهسه شراح تسوون

_الخطوه الجايه بالسرداب 

_سرداب شنو

_ليش ماتدرين ان عدنه سرداب جوه الكاع نحقق بي ويه المجرمين والاستاذ زوجهه لزمناه حاليا بالسرداب

_هاي شنو يعني لازمينه وانه كاعده احل واخطط 

_اي جنت اختبر مستوى تعليمج وين وصل وهم تتقوين شكو بيهه 

_زين هوه اعترف لو لا

_بعده حاليا تحت التحقيق لمن يعترف اكلج

_تمام زين راهب اكدر اشوفه للسرداب

_ههه احسج تتحولين طفله لمن يتعلق الموضوع بشغلج عكس بقيه الناس

_ههه لا بس احب هيج شغلات واحب اخوض بيهن 

_تمام اخذج اشوفج المكان بس مو هسه لان عدنه شغل ومحاضرتج راح تبدي 

_ليش بيش ساعه ..

رفعت ايدي باوعت للساعه وشفت باقي على محاضرتي بس ١٠ دقايق شلون مرت الساعه بهل سرعه مادري 

رفعت حواجبي بتعجب واخذت اللابتوب خليته عل طبله مسحت على رجلي بتوتر ووكفت على حيلي كام وكف كبالي وكتله..

_يله عن اذنك سيدي رايحه لمحاضرتي

_تمام بس مو كأن نسيتي شي

_اي صحيح الكتب العفو انشغل بالي بالقضيه ونسيتهن

_عادي تصير انتظري لحظه..

راح يدور برف الكتب مالته وعاكد حواجبه بجديه طلعلي كتابين وسجل جبير بي ملفات قضايا انطانياهن وهوه يكول..

_اخذي هذولي الكتب خليهن وياج وين ماترحين كلما تصادفج قضيه لو اختبار حاولي تستخرجين التحتاجينه منهن ويكون افضل لو تحفضيهن

ع الغيب لان مفيدات كلش وهذا سجل القضايا بوقت فراغج اطلعي عليهن وحاولي تقوين نفسج عل تحقيق من هسه 

_تمام سيدي

_وشغله ثانيه باجر يكون وقت تدريبكم يمي وراح اخذكم للميدان اعلمكم شغل السلاح فكوني مستعده وتدربي اليوم تمام

_حاضر ..

دكيتله تحيه واخذت الكتب منه ابتسم وبادلته الابتسامه خليت وطلعت وبوجهي صعدت لمكتبنه وانه كلبي يخفق حماس وخجل بنفس الوقت

خليت الكتب بجنطتي لان جبيره جايبتهه بس السجل جان اكبر من الجنطه عاد خليته جواهه .. اجه الضابط ياخذنه وحضرت دفتري وقلمي خليت

الجنطه والسجل بالكومدي قفلت عليهن وطلعنه وره الضابط اخذنه لقاعه الحاسوب والبيانات اخذنه محاضره ساعتين وانتهى الدوام حضرت نفسي

واجه علي سلام اخذني لان بابا تعبان مابي حيل طريق روحه رده .. ركبت السياره سلمت عليه ورجعنه للبيت مر اليوم عادي وبابا شوي صار

احسن طلعته وصرنه نتمشى بالحديقه ويسولفلي عن حياته قبل لا ياخذ امي وعن قصتهم الحقيقيه يلي تكتمت امي عنهه وعن معاناتهه اول اشهر زواجهه 

وتفاجات او انصدمت لان ماجانت تجيب سيره النه ابد عنهه ولا تذكرهه ولمن يسالهه شخص عن

اول فتره من زواجهه جانت تزيف الابتسامه وتكلهم احلى ايام.. رغم جان مبين جرح

هذيج الايام بعده اثره بكلبهه وكل هل سنين بغض النظر عن حبهم هيه وبابا ومحاولاته شكد ينسيهه ويعوضهه بس كلما تعاركت وياه وتذكرت ذيج

الليالي السوده على كولتهه جانت تبجي بحركه كلب وتحس عبالك انعادت عليهه وكأن هل شي السواه بابا وياهه خلف فراغ بكلبهه مايكدر بعد

يملي ويعوضه وهسه فهمت وعرفت ليش مرتضى هيج صار دون اخواني كلهم فهمت ان الفطره يلي بالطفل تنخلق وياه حسب الظروف يلي جانت الام تمر بيهه ..

وامي جانت تمر بعذاب وقسوه لمن حبلت بي يعني مرتضى اجه نتيجه تعذيب وكره لهذا السبب صارت عنده فطره العنف وصارت ايده

والخنك ويمكن هذا السبب يلي يخلي مايريد يتزوج لان يعرف بنفسه لو تزوج راح يشلع كلب مرته ويعذبهه بهاي الفطره المؤذيه يلي انخلقت وياه .. 

باوعت لابوي وهوه يحجي بندم وتخنكه العبره لمن يحجيلي شلون كلما شاف امي تبجي يتذكر هذيج الايام وياكل بروحه قهر ويحاول يعوضهه .. 

يمكن هذا السبب يلي خله حبهم يدوم تضحيه امي وندم ابوي واحساسه بالتقصير المستمر اتجاهه 

هوه يلي خله حياتهم تستمر بحب وسلام رغم كل المصاعب الواجهوهه .. وهيج اكون فهمت شي مهم بالحياة ان الحب مو كلام لو مجرد مشاعر

وانما الحب مواقف الحب افعال الحب تضحيه واستقرار وهذا الحب مايجي ببلاش لازم ندفع ثمنه يا اما جسديا او نفسيا ...

مر يومي اعتيادي وثاني يوم رحت لدوامي واول ماخذنه راهب تدريب جابلنه سياره كوستر جبيره

واخذنه انه وزملائي للميدان يلي ماجنت اعرف شنو هوه ولا سامعه بي فقط رايحه على عمى عيوني ..

وصلنه وجانت عباره عن منطقه صحراء جبيره وجان بيهه من جهه قاعه للاحصنه والخيول ومن جهه قاعه للتدريب ع السيوف والسجاجين وجهه

قاعه بيهه معدات اسلحه ومجموعه لوائح قريبه وبعيده نسميهه الهدف .. اخذنه الهه ووزعنه كالعاده على الاسامي كل واحد اله مكانه وسلاح كباله

مفكك والهدف كباله بالبدايه راد يشوف مستوى تعليمنه للسلاح فمن اطلق الصافره انطلقنه نشد السلاح ونصوب عل هدف رفعت ايدي وكلبي يخفق بكل

حيله بخوف وتوتر من ان افشل وفعلا فشلت رغم ايدي رجفتهه قلت بس بعدهه ماكدر اصوب بالهدف عكس يلي صوبوه وبقوا صافنين علي

مستغربين شلون دخلت هل مجال وانه ماعرف للسلاح انتبه عليهم راهب وصفك بيده حيل وكلهم يرجعون يتدربون والهدف يبتعد عنهم اكثر كالي

اجي وراه تركت المسدس عل ميز وطلعت مشينه مسافه مو بعيده عن المكان وهوه بيده بندقيه راح

خله لوحه وبيهه دوائر عل طابوك مثبتهه واجه وكف كبالي وكال وهوه مركز ويعدل بالسلاح..

_تعرفين تستخدميهه

_لا

_تدرين هاي التجهلينهه هيه دوه لرجفه ايدج

_شلون 

_لزميهه..

مديت ايدي ردت اخذهه وعافهه بيدي فجاتا نزلت انه وايدي بثقل وشلتهه بثنين اديه وكتله بتفاجئ..

_اي لازم تتعلمين استخدامهه حتى الباقي يسهل عليج

_تمام وانه مستعده اتعلمهه..

هز راسهه بايجابيه واخذهه مني سحب اقسام ورفعهه وجهه عل هدف واطلق النار تفاجات من صوتهه اقوه من المسدس طلع وصار عندي

فضول استخدمهه اجه خلاهه بيدي وثبت وكفتي كبال الهدف رفع اديه خلاهن بوضع مناسب ولزم عكسي بقوه وهمس بفحيح حار يم اذني..

_اطلقي..

ضغطت عل زناد واطلقت النار لو احس ايدي انشلت رجعت ليوره ولزم كتفي راهب مرجعه فتحت عيوني بتفاجئ و بفرح لمن شفت نفسي صوبت قريب الهدف وانه اول مره استخدمهه..

خلاني اجرب مرتين وحدي وبكل مره ارتد ليوره ويلزم كتفي باصابع ايده ويدفعني خفيف لمكاني بس ماكدرت اصوب بحدي الا هوه يثبتهه الي

عافني اتدرب عل تصويب وراح يجيك وضع الفريق وتدريبهم بقيت انه مستمره اعبي بالعتاد مثلما علمني واصوب بالهدف وتخطي رجع وبقه

يباوعلي من بعد مسافه عني لحدما تعبت وايدي ماصرت احس بيهه عفت السلاح عل بلوكه وكعدت

بالكاع سانده ضهري عليهه باوعتله بتعب وهوه وكف كبالي متخصر وكتله بريج ناشف..

_تعبت سيدي ايدي ماتت وريجي نشف 

_كومي هرولي جيبي ماي من داخل

_لا سيدي راح العطش وين بيه حيل اروح مدري شكم متر

_شمووخ

_حاضر سيدي..

كمت بسرعه وكفت بجديه واشرلي اروح للقاعه دكيتله تحيه ورحت اهرول مثلما كلي اخذت ماي واخذتلي صفنه على تدريب زملائي اليعرفون

للسلاح واشوفهم لازمينه عبالك مسدس ماي .. تنهدت ورجعت لمكانه شربت من بطل الماي وانه اباوعله يعدل باللوح انتبهلي واجه علي وهوه عاكد

حواجبه من الشمس وحلكه ناشف مد ايده اخذ البطل مني وشربه مره وحده .. هاي ثاني مره تصير ونشرب من نفس البطل بقه بي شوي ماي 

وحسيت بعطش انطانياه وبقه يعبي عتاد غافلته وشربت الباقي من الماي حسيت بطعم جكاير صار بشفايفي تلمستهن وباوعتله ونزلت عيني وكحه على شفايفه

وهوه شاد عليهن مركز بالسلاح استوعبت الكاعد اسوي وافكر بي وضربت حلكي بصدمه شمرت البطل من ايدي ونفضته من افكاري بقيت مركزه بالهدف

واسوي باصابعي حلقات واقربهن على عيني حتى اشوف الهدف كمل تعبئه السلاح وانطانياه وكفت بثبات رفعت اديه وازنت بينهم شديت قوتي عل

سلاح واطلقت اجه كذلك قريب الهدف وعدلت راسي اباوع بفرح وهوه صفك خفيف واجه اخذ السلاح مني وهوه يكول..

_يله هسه لهنا انتي تدريبج ممتاز اخذي استراحه كم يوم بس ابقي على تدريب الاثقال حتى

بالمحاضره الجايه وبعد اسبوع نرجع هنا نتدرب عل سلاح اريد تجيبيهه بالهدف تماما

_تمام سيدي شكرا الك

_العفو واجبي..

صفن بعيوني وانه صرت اتلفت متجنبه نظراته كتله رايحه يم زملائي خليت السلاح ومشيت دخلت لقاعه التدريب لزمت سلاحي واحسه مو بنفس الثقل الجنت احس بي من قبل لان وزن البندقيه اخذ على ايدي شديته

وصوبت كبال الهدف واطلقت مره ومرتين وعشره لحدما خلصت الساعتين وتعبنه كلش تركنه كلشي وجهزنه شغلاتنه وطلعنه رجعنه للدائره ارتاحينه فد ١٠ دقايق

ورحنه لتدريب العملي.. اخذنه المحقق ساعتين ثانيه وخلص اليوم بعد الشغل الإضافي مده ساعه .. رجعت للبيت ويه سلام دخلت للمطبخ

شربت ماي وحسيت البيت بي هدوءه غريب .. عفت الكلاص عل كاونتر ودخلت للصاله مالكيت

احد دخلت للغرف كذلك ماكو احد رحت لغرفه سلام بعدما عافني وراح يسبح دكيت الباب ودخلت لكيته بالحمام دكيت بابه عليه واجالي صوته..

_هاا 

_ويه امي لا يضل بالج

_هاا تمام ..

رجعت لغرفتي بس كلبي معصور حاسه اكو شي بس ماعرفت شنو هوه سبحت وطلعت نشفت شعري لبست تراك وكعدت عل ميز امشط وصافنه

احس بقلق مجهول لهنااك واندك الباب كمت بسرعه عبالك مدري شنو طلعت للصاله اركض لكيت امي ومحمد راجعين باوعت حواليهم وكتلهه بقلق..

_يمه وين ريان

_هاي عند ابوج

_وين بابا

_بالحديقه كاعد يغسل اديه 

_هاا اوكي ..

زفرت براحه لمن كلتلي ريان عند بابا ماعرف سبب خوفي المجهول عليهه بهل لحظه كعدت يمهم اسألهم عن خالتي وفاء والبنات وفهمت انهم قرروا بنهايه الشهر يعرسون ولازم يبدون يجهزون سوالف العرس من ملابس وغرفه وتعديل وتبديل خليتهم يخططون هوه وامي وكمت للحديقه اخذت ريانه من ابوي حضنتهه لصدري وكتله..

_الله يساعدك بابا

_ويساعدج بنيتي 

_شنو اليوم رايح للمزرعه شعجب

_طاكه روحي والبيت فرغ عاد كتلهم يذبوني عل مزرعه ويجون ياخذوني من يرجعون

_هاا

_شلونج انتي بويه وين وصلتي بالتدريب

_حاليا بديت اتدرب عل سلاح انطاني راهب بندقيه اتدرب عليهه مو مسدس حتى تتعود ايدي عل ثقل

_اي صحيح احنه الزلم هيج تعلمنه السلاح من التواثي للبندقيه وبالاخر صار المسدس لعبه بيدنه

_اي هوه هم هيج كال

_اي وبعد

_وكاعد ندرس فنون قتاليه من كافه الانواع وكل يوم النه ساعه فراغ نتدرب بيهه عليهن

_اي اهم شي هاي لانكم معرضين لكلشي فلازم الشخص يعرف يدافع عن نفسه حتى يكدر يدافع عن المظلومين

_اي بابا

_اي يابويه بالتوفيق انشاءلله 

_حبيبي ويوفق الجميع 

_هذا النذل مارجع للبيت

_لا كال محمد ان عند صاحبه رح يبقى

_احسن خلي بعيد هل فتره لان بس اشوفه اتخبل عليه

_ميخالف بابا يبقى بس انت لا تحرك اعصابك ولا تفكر بي

_انشاءلله بويه يله ندخل جوه لا تستبرد ريانه

_اي يله..

سوه حركته المعتاده خله ايده على كتفي و تمشينه لداخل البيت كعدنه شوي بالصاله تالي كمنه صبينه غده لان كلهه مامتغديه جانت كعدنه ناكل وفتح محمد موضوع العرس ويه ابوي وكال..

_بويه احنه بعد منا لراس الشهر مكملين كلشي بحيل الله فكبل نتزوج ماريد اتاخر هواي

_هذا الشي راجعلكم بويه محمد بس اريدك تكضيلي كم شغله من معازيم وذبايح وغيرهه لان تدري ماعندي غيرك يساعدني انت وسلام وتفتهمون بهل سوالف

_انشاءلله بويه انت لا تفكر ولا تتعب نفسك انه وسلام واحسان ومناك محسن راح نتكفل بكل الترتيبات 

_هاذهو بويه واي شي ينقصكم او تردونه تعالوا كولولي 

_مانريد شي غير تكون سالم وحاضر بيناتنه بويه

_انشاءلله ربي يرضى عليكم ويوفقكم ويطعمني شوفه جهالكم

الكل : آمين يارب العالمين..

كملنه غدانه وشلنه الماعين غسلتهن وامي عطرت الصاله رحت انه طلعت ملابسي وملابس ريانه الوصخه خليتهن بالغساله درت عليهن ماي وتايت

وخليتهه تغسل وحدهه رحت دخلت ريانه للحمام سبحتهه ونشفتهه وطلعت بدلت ملابسهه وكعدت امشط شعرهه .. صارت الساعه ب٤ واندك الباب

عرفته سلام كليوميه هيج وقت يكعد من النوم العصر وياخذ ريانه الكاشخه ويكعدون باب الشارع يم الجهال اليلعبون حوالين البيت .. دخل اخذهه

مني لحضنه بوسهه شمشمهه وهوه يكول افييش وطلع مندمج وياهه بوس وشم ابتسمت على شكلهم ورحت للحمام طفيت الغساله فرغت ماي

الغسل ودرت ماي جديد عل ملابس وصرت اشطف بيهن واخلي بالنشافه لحدما انترست .. طلعت شغلتهه ورحت يم امي وابوي بالصاله وكفت

وهمه يسولفون عن اسعار الدولار وعن كورونا يلي بدت تشتاح محافظات الشمال باوعلي بابا وكال..

_بويه شموخ منا ورايح ديري بالج على بنتج تره المرض هذا كاعد ينتشر مثل النار فعقمي نفسج

قبلما تدخلين يمهه لانهه ماعدهه مناعه وهل مرض اول مايصيب جهاز التنفس عند الاطفال والكبار فديري بالج يابويه

_حاضر بابا بس....