رواية فصلية بديلة ( شموخ ) الجزء الثاني الفصل الثاني والثلاثون 32 بقلم ام ملكوت

:-دخلت ريانه للحمام سبحتهه ونشفتهه وطلعت بدلت ملابسهه وكعدت امشط شعرهه .. صارت الساعه ب٤ واندك الباب عرفته سلام كليوميه هيج

وقت يكعد من النوم العصر وياخذ ريانه الكاشخه ويكعدون باب الشارع يم الجهال اليلعبون حوالين البيت .. دخل اخذهه مني لحضنه بوسهه شمشمهه

وهوه يكول افييش وطلع مندمج وياهه بوس وشم ابتسمت على شكلهم ورحت للحمام طفيت الغساله فرغت ماي الغسل ودرت ماي جديد عل ملابس 

وصرت اشطف بيهن واخلي بالنشافه لحدما انترست .. طلعت شغلتهه ورحت يم امي وابوي

بالصاله وكفت وهمه يسولفون عن اسعار الدولار وعن كورونا يلي بدت تشتاح محافظات الشمال باوعلي بابا وكال..

_بويه شموخ منا ورايح ديري بالج على بنتج تره المرض هذا كاعد ينتشر مثل النار فعقمي نفسج

قبلما تدخلين يمهه لانهه ماعدهه مناعه وهل مرض اول مايصيب جهاز التنفس عند الاطفال والكبار فديري بالج يابويه...

_انشاءلله بابا بس منين اجه هل مرض 

_والله مادري يابويه شي تكول مؤامره حتى تتقلص البشريه وشي تكول فشل مختبري وشي

تكول من اكل الاجانب للجريذيه والخنازير ومامعروفه وحتى لقاح ماكو اله حاليا

_هاي شنو 

_اي والله يعني اليصيبه لا سمح الله كبل يموت وخاصه الكبار بالسن والاطفال يلي ماعدهم مناعه ومنهم يتلاحك على روحه بالفيتامينات والادويه 

_اسم الله الرحمن الله يكفينه الشر 

_امين يارب..

تنهد بحيره وسمعت مؤقت الغساله طفه رحت طفيتهه وفرغت الناشف بالسله وخليت غيرهن شغلتهه واخذت السله للحديقه شريت الملابس عل

حبل وانه افكر بكلام بابا ..منين طلعلنه هل مرض هذا الله يكفينه شره معناهه بعد ريانه لا اطلعه ولا امشيهه لمكان حتى بالباب ماخليهه تكعد وتختلط

انفاسهه ويه انفاس بقيه الجهال .. هزيت راسي بحيره واخذت السله للحمام طفيت الغساله وطلعت الباقي شريته ورجعت شفطت الحمام ودخلت

غرفتي سبحت ونشفت وطلعت لبست ترواكه وكعدت اكلب بالملفات مالت القضيه وبيدي ثقل حديد اتمرن عليه كتبت تفاصيلهه للقضيه وكترتهه على صفحه ..

كمت طلعت السجل يلي انطانياه راهب وكعدت اقره بي وانه متعجبه على خطه وطريقه ترتيبه وسرده للتفاصيل المهمه بحل كل قضيه هزيت

راسي باعجاب واخذت ملف الواجب البيتي مالت القضيه وصرت احل حسب طريقته وكلش عجبتني وجانت مختصره وقررت اعتمدهه بحل بقيه

القضايا يلي راح تمر علي مستقبلا .. كملت بعد ساعتين على صوت اذان المغرب طبكت الملف رجعته لجنطتي والسجل خليته عل ميز مالت

الدراسه وكمت طلعت للصاله لكيت سلام كاعد يم اهلي وبحضنه ريانه تباوع للايباد مالتهه .. كمنه توضينه ووكفنه نصلي وبابا منتبهه عليه كل شوي

يصفن ويجر حسرات اعرفه باله مشغول بمرتضى ومايهون عليه يخلي بره البيت وهوه راجع من بعد غربه سنين .. قررت احجي لمحمد واخلي يجيب

مرتضى يطلب السماح من بابا وانه بدوري اروح لجنان باجر او عكبه اسمعهه تسجيل كلام مرتضى حتى نقطع دابر الشر من الناحيتين وبلكي احاجي محمد يكعد وياه ويحاول يفهم شنو سبب رفضه للزواج لان بس هوه يكدر يعرف ويكدر يحجيله سببه 

واذا مرتضى اكو حب بكلبه صدك اتجاه جنان  فراح يتجاوز رفضه للزواج و كلشي ويمشون بدرب الحلال بالاخير.. 

المهم ثاني يوم التهيت بالتدريب على السلاح وكلشي بده يصير تمام من ناحيه التدريبات وصرت اتعود وافهم شغلي واسوي على اكمل وجه بس

رغم انشغالي بتدريبي جان بالي دائما يم ثنين راهب واحسان من جهه احسان صديق طفولتي ومن جهه راهب يلي ماعرف حقيقه ومعنى

المشاعر يلي بكلبه ولا اعرف ليش بدت مشاعري تشن حرب بكلبي مابقيت محتاره هواي قررت اترك مستقبل كلبي بيد الله وهوه يحلهه الي لان حيرتي وقلقي راح يخرب حياتي

وبس التوكل على الله بعدي اسمه هوه يلي راح ينور طريقي وقررت ماراح اخطي اي خطوه اتجاه اي شخص منهم راح اخلي ربي وكلبي هوه اليقرر عني ..

مرت ٥ ايام على قراري هذا وجنت افكر بجانب تدريبي بمشاعر كل شخص بينهم وباليوم السادس واكفين كالعاده بالقاعه السريه وراهب كاعد ينطينه تعليمات وياشرلنه عل لوحه يلي مليانه اوراق ملاحظات وصور اشخاص ومواقع وانه كل شوي بالي

وعيوني تنشد اله ووكفته وكشخته واسلوبه بالكلام والشرح والمحبس يلي بايدهه يلي ماعرف شلون هيج جاي بالتنسيق على اصبعه التفت علي واجت عينه بعيني ابتسم وشكله تخربط من شافني اباوعله كمل المحاضره شلون ماجان وكاللنه نروح لقاعه الكاراتيه عاد كلهه طلعت وانه بقيت الم الملفات جمدت بمكاني لمن صار بجانبي وانحنى يم اذني يهمس ..

_هيج طالع حلو اليوم حتى ماخذ عقلج وعيونج

_هاا لا بالي وياك قصدي ويه شرحك

_طيب ليش لمن صحتلج وسالتج مرتين بقيتي صافنه بوجهي..

عكدت حواجبي ودرت وجهي عليه صار مقابيلي مباشرتا وضوه الشمس عاكسه على عيونه العسليه

بقيت ارمش بفهاوه وانه اتامل عيونه متناسيه كلشي ظهرت على ملامحه ابتسامه جانبيه واردف بصوت شبه مسموع ..

💝💞💝💞💝💞

_ديريهن عني هل عيون من غير شي ضايع بيهن

_عيونك التضيع الواحد

_ههه والله

_ايي

_شموخ

_همم

_ياا جمره كلبي الجاويتني من سنين..

💞💝💞💝💞💝💞

استوعبت اخيرا الكلته وتحمحمت وانه ادير بعيوني عنه رجعت باوعتله وكتله..

_شنو كلت

_هيج انسي..

ابتسم وعدل وكفته بعدما جان ساند ايده عل ميز ونازل لمستواي هزيت راسي بحيره اخذت الملفات وطلعت امشي بسرعه صعدت لقاعه الحديد وشفت ماكو احد استغربت تالي غميت كصتي من ادركت انهم راحوا لقاعه الكاراتيه دوهني الله يدوهنه  طلعت واجه بوجهي باوعلي باستغراب ورحت امشي كدامه للقاعه سمعته ضحك خفيف وانه الخجل موتني دخلت وشفتهه كلهه مبدله ملابسهه وانه لا تافافت وخنكتني العبره اول مره يصير بيه هيج انثول وافشل روحي كدام العالم التفتت وضرب وجهي بصدره خليت ايدي على جبيني وانه منزله عيني وحجيت بغصه...

💝💞💝💞💝💞💝

_شبيك وين ماروح اشوفك ليش تسوي هيج وتخليني اجي بدون مابدل ملابسي 

💝💞💝💞💝💞💝

_ههه شبيج ولج ليش مخنوكه عادي راح ننتظرج روحي بدلي ملابسج وتعالي بعد وكت

💝💞💝💞💝💞💝💞

_تمام بس ابتعد عن طريقي

_تفضلي ست شموخ..

💝💞💝💝💞💝💞💝

باوعتله باستنكار ومشيت سمعته #ضحك وانه يا كاع انشكي وبلعيني احس صرت طفله مو مره شكبرني وشكدني .. دخلت للحمام واشوف وجهي احمر غسلت بماي بارد واحس هديت شويه لبست ملابس التدريب ورجعت للمكتب ضميت الملفات بالكومدي مالتي وقفلته رجعت صعدت للقاعه

اخذت نفس عميق وزفرته براحه دكيت الباب ودخلت التفت علي #راهب وتشردت بعيوني عنه ..

 رحت وكفت يم زميلاتي وانه عيني كل شوي تروح على رحاب وهيه تباوع لراهب وماكلته بعيونهه الوكحه قلقتني وبقه بالي يمهه وخوف بداخلي ماكلني من ان تكدر تسحبه للطريق وتضحك عليه اخذني تفكيري ومنع عني التركيز بالتدريب لزمتني البنيه من رجلي وايدي وكلبتني عل كاع بقيت نايمه مصدومه واجه راهب وكف فوك راسي وهوه خايف علي وكال بصوت عالي معصب ..

_وين تركيزج متدربه شموخ

_اسفه سيدي

_كومي على حيلج

_حاضر..

كمت وكفت بثبات كباله لزم #ياخه قميصي عدلهه بقوه وكال ..

_اريد تركيز ميه على ميه وقوه اذا مانجحتي اليوم ماتطلعين من القاعه الا وانتي مكسره

_حاضر سيدي..

ربت على اكتافي وابتعد عن الساحه اجت البنيه وكفت كبالي وهيه تقفز وتباوع لرجلي عرفتهه تريد تهاجمهه وتطيحني عاد انطيتهه التريده قربت رجلي

يمهه ونزلت تريد تاخذهه بعدتهه عنهه بسرعه ولزمتهه من بطنهه وكلبتهه على ظهرهه ونكلبت وياهه انطلقت الصافره وعفتهه كمنه كل وحده

بجهه ورجعت تقفز علي مدري شتحس روحهه جاكي شان يمكن المهم خليت تركيزي وياهه وبكل مره اكسرهه انه لحدما تعبت وماكامت بعد واعلنت

استسلامهه ظنيت اني فزت بس راهب اشر لبقيه البنات وصارن وحده وره الثانيه تجي تتصارع وياي وحده وره الثانيه وانه شي اضرب برجلي وشي بايدي وشي اكلبهه

على ضهرهه واقيد حركتهه لحدما حسيت اني تعبت كلش واخر وحده ماكدرت احاربهه عاد لفيت جسمي وضربت رجليهه برجلي وطاحت بالكاع

على كتفهه بقيت واكفه اباوعلهه بترقب عبالي انكسرت مدري شبيهه اشو خلت وكامت مابيهه

شي وهيه تحرك بكتفهه تعصبت واجيت هجمت عليهه وانه احجي من بين سنوني بعصبيه..

_دنكسري بت الاوادم بشر انتي لو آله تعبتيني الله يتعبجججج..

لزمتهه من بين رجليهه وكلبتهه عل كاع وبقت مطروحه سندت اديه على ركباتي وانه الهث بتعب واباوعلهه بترقب شفتهه ماكامت بعد وبقت تتنفس

بتعب وهيه متمدده اطلق راهب الصافره وغمضت عيوني براحه تمشيت للميز اخذت بطل الماي وشربته مره وحده وانه فحطانه .. 

التفتت عليه وهوه جان يحجي ويه سالم ويسجل اجت عينه علي باوعلي بملامح بارده ودار عينه عني استغربت شبي انكلب هيج بساعه وحده .. 

رفعت اكتافي بعدم معرفه وكال التدريب خلص لهل يوم رحت اخذت جنطتي وطلعنه للحمامات بدلنه ملابسنه ونزلنه لمكتبنه كعدت سانده ضهري

عل كرسي واجر نفس بتعب كلهه دقايق ودز علينه المحقق ساهر كمنه بتثاقل اخذنه ملفاتنه ورحنه للقاعه مالت العلوم الجنائيه اخذنه محاضره مدتهه

ساعتين كدنه بيهه ننشغل بافكارنه عن كل العالم وحتى عن وجع اجسادنه من التدريب .. 

رجعنه بعدها للمكتب بعدني ماكاعده واجه الضابط سالم خله علبه بكد جف الايد كبالي وكال..

_هذا بريد باسمج وصل من شخص مجهول

_مجهول وبريد الي

_اي نعم

_تمام شكرا الك..

هز راسه بايجابيه وراح اجن البنات التمن علي ورحاب وكفت بعيد تباوع بفضول وكلهه سالتني شكو بي كلبت بالعلبه وشفت مكتوب على جهه

"لا تفتحيهه هسه خليهه بالبيت " استغربت والخط مالوف شفته بالنسبه الي تحمحمت وشلتهه ضميتهه بالجنطه وكلهه رجعت المكانهه مو راضيه

على تصرفي هوه انه كتلني الفضول بس خفت من العباره خاف بيهه شي منا منا واتفشل كدامهم ولو شاكه انهه من راهب بس شمعنى كتب مافتحهه

هسه معقوله بيهه شي مو حلو او عيب لا شسالفه راهب ماعنده هيج سوالف وخاصه ان مابيناتنه هيج اشياء .. المهم صبرت روحي كوه منا لخلصنه

اخر محاضره اخذت جنطتي ورحت بوجهي للحمام ماكدرت انتظر منا لارجع للبيت عاد اخذت العلبه فتحتهه وشفت بيهه شي اسود فتحته

واشوف بي بلوزه اسود شتوي ومقفل من الردانات والرقبه استغربت وشفت ورقه بالعلبه اخذتهه وجان كاتب بيهه " لبسي هذا جوه ملابس الكاراتيه مره ثانيه لا تبقين هيج" 

بقيت صافنه باالرساله شنو يعني قصده مافهمت شبيهن ملابس الكاراتيه غير كاعد البس سترابلس جواهن رجعته للعلبه واخذته بيدي هوه والرساله 

رحت بوجهي لمكتبه دكيت الباب كال تفضل ودخلت باوع للعلبه رفع حواجبه وكال باحراج..

_شفتيه

_اي بس ماعرفت شنو قصدك بالرساله 

_ماقصدي شي فقط شفتج لمن تنحنين بالتمرين تطلع ملابسج يلي جوه القميص

_شنوو تحجي صدك #راهب

_قابل مجذب عليج لهل سبب دزيتلج هذا مقفل ولا يبين صدر ولا رقبه منه ..

بقيت اباوعله باحراج وفشله نزلت عيني عل علبه وكتله بصوت شبه مسموع وانه اريد اطلع..

_شكرا الك سيدي

_شموخ

_هاا

_لا تحسين باحراج تره عادي وانه كتلج فتحيهه بالبيت حتى ماتجين تواجهيني واضطر احجيلج السبب

_لا بس كاعد افكر شكم شخص شاف الشفته

_ولا واحد تطمني لمن انتبهت على هل شي اخذت الكل بعيد وشغلتهم عنج 

_شكرا #راهب 

_لا تشكريني انتي #بت كلبي 

و عرضي ..

رفعت راسي #بتفاجئ وهوه يباوعلي بعيون بيهه #شراره حب واشتياق وغيره اتجاهي ابتسمت وفتحت الباب طلعت امشي وانه الاحراج والخجل كاتلني منه شلون هيج مانتبه على ملابسي واخلي شي من جسمي يطلع حتى لو بطريق الخطا ولو هوه الكاراتيه مايخلي على حالنه حال وجان

المفروض من بدايه البس هيج بدي مستور ومقفل جوه الملابس حتى لمن تنزاح ماينشاف شي .. 

تافافت ودخلت للمكتب بعدما رجعت العلبه للجنطه  كعدت وانه بالي كل شوي يسرح يمه وبكلامه تذكرت اني مادكيتله تحيه من طلعت غميت كصتي مبتسمه على ثولي اليجيلي من احجي ويا لزمت كلبي يلي صار يرفرف هليام ويطير مثل الفراشه وماكدر الزمه ابتسمت بس اختفت ابتسامتي ورفعت راسي متعصبه من كلام رحاب وهيه تكول..

_ ايي الظاهر الحب بده ينتشر بالمكاتب والعميد اويلي عليه يجهل الرومانسيات الكاعد تصير بدائرته ..

تباعلي وتحجي وخلت الكل يوجه انظاره علي ابتسمت ونزلت عيني ارتب الملفات واحجي بنفس طريقتهه مبعده العيون عني موجهتهه الهه..

_اي والله فعلا بس لا تخافين اذا العميد يجهل اليصير بدائرته فالمحقق راهب يعرف كلش زين باليصير بمكتبه لهل سبب نزل رتبتج ورسبج بكل الاختبارات الاخلاقيه...

ضربت الميز وكامت على حيلهه تريد تجيلي باوعتلهه باستهزاء وكمت اخذت جنطتي وملفاتي

وطلعت من المكتب متجاهله كلامهه وسباتهه وبطلعتي شفت الضابط سالم اجيت يمه وكتله وانه اعبر من يمه..

_سيدي الضابط عدنه فايروس بالمكتب الست رحاب كاعد تتهم المحقق راهب بالزنه بالمكاتب شوف شغلك سيدي..

باوعلي باستغراب وراح يمشي بسرعه عل مكتب مالنه كملت طريقي ونزلت للطابق الأرضي اتصلت على سلام يجي ياخذني لان اصلا خلص الدوام

كال تمام وسديت الاتصال التفتت وانه اتافاف بضجر وشفت راهب واكف يم فريقه بيده الملف وعينه علي اشرلي بمعنى شكو وهزيت راسي ب لا

عاف الملف واجه باتجاهي بس استوقفه لمن سالم نزل وهوه يجر وراه رحاب من ايدهه وكف دك تحيه لراهب وساله باستغراب..

_شصاير سالم ليش ساحب المتدربه وراك

_سيدي المتدربه رحاب كاعد تنشر اشاعات مالهه اساس من الصحه بالمكتب وتشوه بسمعتك انت والمتدربه شموخ ..

رفع راسه باستنكار باوعلي ودرت وجهي عنه سمعته كال اخذهه للحجز وتعال للمكتب وراح سالم سوه مثلما كاله شفته يريد يجي باتجاهي

وسياره بابا صفت بالكراج رحت للسياره متجاهلته او بالاحرى متشرده من الاشاعات وحجي زملائي .. ركبت بالسياره واشر سلام على راهب ونزل سلم

عليه وكل شوي تجي عينه علي ضل باله يمي .. نزلت عيوني عل نقال اسوي نفسي اطلع اغنيه لحدما راح دخل جوه وسلام صعد للسياره باوعلي باستغراب وكال..

_شصاير #شموخ

_شنو شصاير 

_احس بيناتكم مشكله هوه باله يمج وانه اسولف وانتي تباوعيله ببرود مو مثل العاده

_لا بس عاقبني بالتدريب وانه مامسويه شي عاد ضجت منه

_ههه حتى بالتدريب خبال وتزعلين

_اي جا هينه عليك اختك يعاقبونهه ويخلون زملائهه يتشمتون بيهه

_لا طبعا بس بالنهايه هوه رئيسج والناس مايهم رأيهم ان حجو او لا فرديهه 

_على كولتك اشو تندمت لان ضجت منه 

_يا صبر الارض 

_ههه شبيك

_عندج انفصام بعقلج انتي

_شعده ابو العقله كامل وبعدين انه اختك الجبيره مو عيب تحجي هيج وياي

_هاا اسف العفو

_الله يعينهه التاخذك

_هنيالهه ولو هيه خبله مثلج

_هاا ولك لزمتك منو هاي الخبله اليوم الا احجي لابوي واخلي يزوجكياهه 

_لا يمعوده زواجيش بعدني كليه

_عادي شكو بيهه لو تريد تاخذ طريق اخيك مرتضى وتضحك عليهه ولك

_لا تشبهيني بي لهل عار 

_عيب سلام اخوك واكبر منك

_اي ليش تشبهيني بي وتخليني اجفص 

_جا شنو يعني هسه اذا كلتلك البنيه تعال اخطبني ماراح تروح

_ هيه غير تدري بحبي بالاول ولو انه ماريدهه تعرف هسه اريد اتخرج واتوظف  ياله خو ماعيشهه بالفكر

_حب من طرف واحددد

_ههه اي هيج شكله الوضع

_ومن يمته ومنو هيه

_ماكدر اكلج منو هيه بس صارلي تقريب السنه 

_وياك بالجامعه لو من عدنه

_لا من عدنه يا جامعه هاي

_لااا تكلييي رسيللله بتتتت عمووو شعلااان

_خرب شكلي صوتج زرفتي طبله اذني لا مو صخيمه شجابني عليهه وهيه بكد ابوي 

_يا عيارتك اكبر منك بسنتين

_بشرفج وانه اخذ وحده اكبر مني وبت عمو شعلان وانه شايف خفتهن شني

_اي هم صح انت عاقل تعرف مصلحتك بس الله عليك كول منو هيه

_ولا اكلج واذا انتي ذكيه اكتشفيهه بنفسج 

_اوو يعني خلوا عقلي يرتاح شويه خطيه بالدوام مشتغل وبالبيت هم يشتغل شطلعت هاي

_ههههه يله جا عوفي نايم وضلي

_لا راح اشغله لخاطرك مو هل كاعد اغذي واشربه حليب ولوز وجوز جا هاذ الصرف كله عليمن يروح اذا ماستخدمه علمود اخوي اخر عنكوده 

_هههه فديته لهل عقل انه

_تشكرات تشكرات🥰

_خبالات خبالات

_ههههه...

ضحكنه وبقيت افكر واسترجع تصرفاته منو ممكن يكون يحبهه هل فصعون اشو بعمري ماشفته مختلط ويه بنيه لو باوع بوجهه رجعت ضهري عل

كشن وانه صافنه بالشوارع ومشغول بالي وفضولي باليحبهه لحدما وصلنه للبيت نزلنه وبوجهي رحت لريانتي اخذتهه من امي بعدما

مسيت عليهم وكعدت ابوس واحضن بيهه وهيه تسولفلي شصاير بافلام الكارتون من احداث وانه استمعلهه بكل جوارحي بنيتي هاي العزيزه شسوه

انه من دونهه بهل دنيا .. كمت رحت لغرفتي خليتهه تباوع بالايباد ودخلت سبحت نشفت وطلعت لبست ترواكه وكعدت عل جربايه وهيه

بحضني العب بشعرهه وافكر براهب وعيني عل علبه ابتسمت وحسيت بذنب لمن تجاهلته وطلعت وقررت اصحح غلطي باجر انشاءلله رغم مو

محاضرته بس احاول اروح لمكتبه اعتذر منه وافهمه الصار .. بقيت مصفنه لحدما تركت ريانه الايباد بضجر وكامت على حيلهه حضنتني وبقيت

اهز بيهه على كتفي لحدما ثقلت انفاسهه نايمه كمت خليتهه عل جربايه مالتهه وطلعت ملفاتي فرشتهن عل جربايه وصرت اشتغل عليهن

لحدما صار المغرب طبكتهن وضميتهن وكمت اخذت ريانه يلي كعدت قبل فتره وبقت تباوع ويه امهه للملفات وتكتب بالورقه طالعه شاطره على امهه بعد عيوني .. 

طلعنه بره اجه سلام اخذهه مني ورحت للمطبخ انه وكفت اسوي العشه عن امي وهيه راحت تصلي كملت بسرعه ورحت انه اصلي وراهه على ماتصب

الاكل كملت صلاتي قريت قران واجت صاحتني عل عشه كمت لفيت مصلايتي رجعت القران عل ميز وطلعت للصاله لكيتهه صابه كلشي كعدت يم

بابا وريانه بحضن سلام يوكل بيهه وياكل ابتسمت على شكلهم وكلت هنيال جهاله عليه يحب الاطفال بشكل مو طبيعي  يعتني بيهم اكثر من روحه يعني

التاخذه ترتاح من ناحيه الفره والجره وره الجهال والتعب وياهم بس لو اعرف منو هاي المحظوظه جان ارتاحيت .. تنهدت ورجعت اكل وبابا ومحمد

يسولفون عل معازيم منو يعزمون ومنو لا لحدما كملنه عشه كمت شلت الماعين غسلتهن ورتبت المطبخ ورحت للصاله اخذ ريانه لكيت سلام غاسل

حلكهه ومنومهه يمه وهمه يباوعون للتلفزيون وهيه المفلوكه حاطه رجل على رجل والحجل الذهب يرن برجلهه السمره ومندمجه بالمسلسل

ياعياره البنيات يابويه كون الفهه بخبزه واكلهه.. اشرت لسلام عليهه واشرلي اطمن لان يبقى يمهه عاد هزيت راسي برضى ورحت لغرفتي مددت ضهري متكسر عل جربايه

وغفيت بسرعه بس صارت الساعه ب٩ هذا وقتي كل يوم اكعد بال٦ الصبح مانام منا لل٩ بليل اطفي وانام جفت على روحي للصبح .. كعدت لكيت ريانه

بجربايتهه نايمه مخليهه سلام كمت بوستهه ورحت للحمام سبحت وطلعت لبست ملابس الدوام وطلعت يم اهلي صبحت عليهم خليت ريانه

بالصاله عل مخده وغطيتهه بالبطانيه يم امي رحت تريكت ريوكي المعتاد شربتلي كلاص ليمون وماي دافي وطلعت صعدت بالسياره وسلام اخذني

للدوام نزلت وبوجهي رحت لمكتب راهب لزمت يده الباب اخذت نفس ودكيته كال تفضل وفتحت الباب شفت رحاب كاعده عل كرسي واستغربت باوعتله وكتله بضوجه..

_اسفه سيدي ماعبالي عندك ضيفه 

_لا تفضلي شموخ همزين اجيتي اريد احجي وياج بموضوع امس وانتي متدربه رحاب تكدرين ترحين..

باوعتلنه بعصبيه وكامت بنتر رادت تطلع وعاط بيهه راهب وكفت بثبات انه وهيه جمدت بمكانهه التفتت وهيه تتصنع المسكنه

كام على حيله بغضب وتوجه الهه رفع اصبعه بوجهه وكال من بين سنونه واول مره اشوفه هيج يتعامل ويه وحده من المتدربين..

_هاي حركتج اياني واياج تعيديهه مره ثانيه انه مو ابوج لو اخوج وتنترين بوجهي هيج وتذكري

موقعج دائما وشنو انتي وشنو انه بهاي الدائره تره بصفكه اصبع اخليج تلمين زباله هنا ومحد يحترمج

_اسفه سيدي

_امشي روحي يله واي شكوى او اي كلمه تطلع عنج منا ورايح ايدي والفصل مفهوم

_حاضر سيدي..

دكتله تحيه وطلعت من المكتب باوعلي وهوه بعده عاكد حواجبه خله اديه وره ضهره واجه تقدم علي وانه ارجع بخطواتي واباوع باستغراب وتوتر بعيونه

التبث شرار وصلت قريب الحايط ووكفت تقرب وصار مايفصلنه شي واردف بصوت شبه مسموع..

_اكدر اعرف شنو سر تجاهلج الي فجاتا البارحه

_اعرف غلطت بس جان بالي ويه الموظفين وخفت واحد يفهم علاقتنه غلط

_ليش شبيهه علاقتنه ويفهموهه غلط

_مابيهه اصلا طبيعيه بس

_شموخ خلي بالج ان علاقتنه بعمرهه ماجانت طبيعيه ومجرد محقق ومتدربه والكلام التحجين عنه وسوء الفهم ماكو هنا انسان ممكن يفكر بي او يكدر يحجي واضح

_بس رحاب

_اعرف وسالم وصلي كلامهه وتدبرت امرهه

_شلون تدبرت امرهه بله حجيت وياهه بلطف لو توسلتهه ان ماتحجي هيج بعد عنه لو شنو بالضبط جيتهه لمكتبك وكعدته على هل كرسي بهل شكل

_اي 

_شنو اي

_حاجيتهه بلطف حتى لا تنشر اشاعات جذب

_ليش سويت هيج والمن حجيت وياهه بلطف تريدهه تفهم انك منطيهه مجال لو تفهم كلامك اللطيف توسل الهه 

_مو انتي تجاهلتيني بسبب كلامهه البارحه اضطريت اتوسلهه حتى تسكت وماتتجاهليني بعد 

_واذا حجت شنو يعني تولي شتريد تحجي خل تحجي ماكو شي من كلامهه جذب ومستعده انه

اوكف كبالهم هسه واكلهم بيني وبين راهب علاقه اكثر من مجرد محقق ومتدربه واليريد يحجي خل يتجرأ ويوريني نفسه واذا عل تجاهل لو اريد فعلا اتجاهلك لا رحاب ولا الف وحده مثله تكدر تغير رايي بعد على شنو تنزل مستواك وتتوسلهه..

باوعلي بابتسامه نصر ضهرت على وجهه عكدت حواجبي باستغراب ورخت ملامحي من العصبيه لصدمه واستوعب الكلام الحجيته بلعت ريجي بصعوبه لزمت كتفه مبعدته

عن طريقي حتى اشرد منه بس سرعان مالزم ايدي لاويهه وره ضهري تقرب علي وهمس بفحيح حار يم اذني..

_ لو ادري راح اسمع هل كلام من لسانج العذب جان فعلا توسلت برحاب وخليتهه تسكت ..

شديت قبضه ايدي بغضب من فكره ان جذب علي وطلع مامتوسل بيهه بس حتى يشوف رده فعلي شنو عاد لزمت ايده وحررت ايدي منهه التفتت وانه

لازمه ايده وايدي الثانيه خليتهه على صدره دفعته لازكته بالحايط وهوه مبتسم ومكيف لزمته من ياخه قميصه وكتله بعصبيه..

_هاي وحده وياك ورحاب يكون احسن الك لو مالتقيت بيهه بعد والا صدكني مايصبح عليهه ولا عليك صبح 

_اموت واخرب على الغيره

_راهببب احجي جد تره

_قابل احجي معلك انه ..

تركت ياخته ووكف معدل قميصه تافافت وباوعتله بحيره وهوه رجع عكد حواجبه صفنت بي بترقب ورفع عينه علي وكال ويه رفعه حاجبه..

_ماناسيهه الج تجاهلج البارحه 

_ومانساهه الك جذبتك هاي

_لعد خلينه نتعادل

_بشنو

_انتي اعترفتي وانه لازم اعترف

_لا راهب

_شكو

_مامستعده اسمع او استقبل منك اي شي حاليا لان ضايجه من سالفه رحاب وكعدتهه يمك بالمكتب 

_تدرين وكايلج مايملي عيني وكلبي غير جمرتي الاحبهه

_راهب

_وروح ابوي الماحلف بي جذب جبتهه حتى احاسبهه واعاقبهه على كلامهه وياج البارحه وحتى شوفي الملف مالتهه عل مكتب كله اكسات حمره 

_ خو ماحاولت تجاوز حدودهه

_شتتوقعين تكدر مثلا تسوي وياي هيج

_على تصرفك وياهه مساع لا اكيد ماتكدر

_لعد هاذهو فرديهه وخلينه نتصافه

_تمام بس حذرتك انه منهه

_من عيني ..

ابتسمت لمن خله اصبعه باتجاه عينه وحجه هيج تنهدت وكتله وانه اتوجه للباب..

_راح تبدي محاضرتي بعدين نسولف

_شموخ

_هاا

_ديري بالج وركزي زين محققتنه المستقبليه

_تمام انشاءلله محققنه العصبي..

ابتسم وحك راسه باحراج ضحكت على شكله وطلعت من المكتب واجه بوجهي سالم وهوه ضام ابتسامته شكيت بي يعرف بيلي بيناتنه انه ورئيسه

لان هوه مرافكه نهاركله واكيد حاجيله عني .. ابتسمت وصعدت لمكتبي واجت بوجهي رحاب باوعتلي كلبت عيونهه ومشت غاصت بمكتبهه حتى راسهه مابين

بعد كلت بعد ايدي رهبان صحاهه على زمانهه .. اجيت كعدت عل كرسي ..وخلصت اليومين بين المحاضرات وشغل البيت واجه وقت تدريب راهب الثاني

ومثل كل مره واكفين بالغرفه السريه مندمجه بالشرح مالته ومره اندمج بعيونه لمن تتركز علي فتره وقاطع محاضرتنه صوت نقالي معلن عن اتصال كلهم التفتو علي

نسيت اخلي صامت قبلما ادخل عاد مديت ايدي بجيب بنطروني سديت الاتصال ورجعت انتباهي ويه شرح راهب شويه ورجع اتصل وراهب تنهد وباوعلي بجديه وكال..

_شموخ ردي  

_بس شوي سيدي ..

طلعته لكيته بابا المتصل رديت عليه وكتله بدون ماسلم..

_بابا عندي محاضره بعدين اتصل عليك..

ردت ابعد النقال عن اذني وسمعت صوته يحجي ويلهث وهوسه يمه رجعته لاذني واسمعه يكلي..

_بويه شموخ بنتج ماكو ولج بويه ريان انخطفت دورنه الدنيا كلهه عليهه وماكو بنيتج مادري وين صارت اراضيهه بويه ..

انصعقت بيلي سمعته وهزيت راسي برفض وكتله وانه صوتي كوه يطلع ..

_شنوو .. بابا شنو تكول لاا مامعقوله بابا شتكول انته شلون ريانه تنخطب شوفهه بالحمام لو بالحديقه وره البيت لو تلكاهه نايمه وره البرده بابا دورهه زين اكيد كبالكم وماشفتوهه

_ولج بويه انخطفت هاي بالكاميرا مبينه طلعت بالباب وخطفوهه شباب بدراجه بويه..

رجف جسمي وكلبي وحيلي انهد كرفصت بالكاع لازمه كلبي ماعرفت شسوي ضعت وضاع الكلام من لساني بنتي ريانه الصغيرونه تنخطف بنتي تضيع من ايدي مستحيل..

باوعت على راهب يلي اجه على كلامي ومنتظرني احجي شسالفه رفعتله راسي بتوسل وعيوني غوركت دموع صرت ااشرله لبره ولصدري انكتم

صوتي وهوه يحاول يفهم شصاير اخيرا نطقت وحجيت وانه اصرخ واتوسل بي لازمه ايده..

_بنتي راهب بنتي راحت بنتي خطفوهه راهب بنتي لحكلي عليهه لا يسوون بيهه شي لك بنتي عدهه

ربوو عدهه ربووو وبس تختنك ومانساعدهه تموت والله تموت راهببب ابوس ايدكك بتيي رجعلياهه راهبب ..

ردت انزل على ايده ابوسهه من قله حيلتي وسحبهه رافعني حاضني لصدره وهوه يصبر بيه بقيت لازمه بقميصه وابجي ولساني ماسكت يتوسل بي ويدعي ماصاير شي لبنتي اخذ

نقالي من ايدي واتصل على ابوي ساله على التصوير شنو بي واذا جانت بسياره اخذوهه او هيج وماعرف شكال بعد ماتحملت  نزل كرفص كبالي لازمني من ضهري لا اطيح والبنات جابن ماي غسلن وجهي وكام هوه على حيله راد يروح ولزمت ايده وكتله بجزع..

_وين رايح راهب اريد بنتي جيبولياهه فدوا

_رايح اجيبهه والله رايح اطلعهه الج من جوه الكاع بس اصبريلي ادعيلهه مايصير بيهه شي وانتظريني اجيب بنتج الج

_لا مانتظر اموت هنا والله اموت من الخوف اخذني وياك انه اروح وياك انه اريد اطلع بنتي انه

_مايصير بهاي حالتج لا تاخريني شموخ عوفيني خل اروح

_لا ماتروح والله اروح وياك وان مارحت اطلع وراك وادور عليهه بالشوارع ..

بقيت لازمه ايده ورافعه راسي احجي ويااه وهوه مكرفص علي ولازم ايدي باوعلي بحيره و رفعني وكفت على حيلي وسحبني  وراه

وهوه يحجي ويه سالم وفريقه يحضرون نفسهم دخلني وياه لمكتبه طلع درعه والصدريه مالت الاسلحه والقبعه وكل زيه العسكري اليطلع بي

للمهمات اخذ صدريه مالت اسلحه واجه علي شداهه على بطني وصدري وخله العتاد ومسدسين عل جهتين وسجين ومكص لزمني ثبت وكفتي حيل وكال وهوه يباوع بعيوني..

_شموخ باوعيلي شموخ انتي رايحه وياي مو بس لبنتج اعتبري هاي اول مهمه تطلعين بيهه بشغلج

لازم تلتزمين بقوانين المداهمة وماتخلين مشاعرج تتغلب عليج وتتهورين تره تخسرين كلشي واولهم بنتج ..

هزيت راسي بايجابيه ومسح دموعي بيده غمض عيونه يطمني اخذ البيكيسي مالته وطلع وانه وراه ركبنه انه وياه وسالم وثنين ويانه بالسياره وبقيه

فريقه بالسيارتين البقيه رحنه كبل لبيت اهلي وصلنه وشفت الناس باب بيتنه نزلت من السياره بسرعه ورحت اركض لداخل بيتنه وراهب دخل

لبيت الجيران ياخذ تسجيل الكاميرا لكيت بابا كاعد على دجه الباب مالتنه وايده على راسه

ومرتضى وامي يمه .. صحتله رفع راسه علي وكرفصت كباله بسرعه وسالته..

_شلون راحت بابا ريان شلون طلعت من البيت وشلون انخطفت احجيلي ليش غافلتوهه وطلعت للشارع 

_والله يابويه يمنه جنه كاعدين بالصاله وعبالي اخذتهه امج نومتهه شويه واجت امج بيدهه صحن اكل الهه وكالت جا وين ريانه كمنه دورناهه

مالكيناهه طلعت ولكيت الباب مفتوح قليل يعني الا تحصر روحهه ياله تطلع رحت ادور بالشارع مالكيتهه سالت الجيران وطلبت اشوف كامراتهم

وجنت مستبعد انهه تكون طالعه بس ردت اتاكد .. طلعولياهن وشفتهه طلعت بالباب وكفت تباوع للجهال البعاد عنهه وواحد شاب اجه شالهه وراح بيهه بدراجه لصفحه الهيمه..

يمه هوه كال صفحه الهيمه لو مات حيلي كعدت بالكاع لا حس ولا نفس تذكرت اخر قضيه محلوله درسوهه النه عن اغتصاب طفله بعمر ال٥ سنوات وعرفت هل

جرايم كاعد تتكاثر بهل وكت تخيلت ومر فيلم كبالي شكد ما اكول مرعب ماكدر اوصفه وهوه بس مجرد تخيل انهم رح يسوون شي ببنتي ويقتلوهه انهد

حيلي وراد يخبلني.. هزيت راسي برفض مثل المخبله وكمت اسح بروحي كوه رجلي ماتعيني لوما مرتضى سندني ووداني للجيران يم راهب جان رحت زحف

على رجلي شافني راهب واجه علي لزم ايدي ووكف كبالي حجب عني رؤيه الكاميرات وطلعني بقيت اتوسل بي يخليني اشوفهه شلون انخطفت

بس ماقبل طلعني وبقه مرتضى لازمني كوه وانه روحي تنعصر وابجي وكاعده على بايه الدرج شويه

وطلع راهب شفته وتخربطت روحي كمت بسرعه وعثرت بالبايه ولزمني وانه احجي وياه..

_هاا راهب عرفتهه وينهه عرفت منو اخذهه وبيا جهه راحوا بابا كال راحو بالهيمه راهب هاي الهيمات اليغتصبون بيهه الاطفال بتي اخذوهه الهه

مو راهب احجي بتي كون بيهه شي اكيد ماراح يغتصبون طفله بعمر ال٣ سنوات مستحيل مو هيه صغيره بعدهه ماتتحمل راهب هيه بيهه ربوو اذا

بجت تموت والله تموت راهب حباب احجيلي طمن كلبي وكلي بنتج بخير كلي مابيهه شي حباببب كول اي شيييي..

بقيت ابجي واحجي وهوه دمارات عيونه نطت سحبني من راسي لحضنه وهوه يهدي بيه ويكول..

_وعيونج اطلعهه من حلك السباع بس لا تبجين لا تدمريني بدموعج شموخ انتي قويه عرفتج قويه وبعدج قويه لا تضعفين خلي

ايمانج بالله قوي وكوني على ثقه ان وياهه هوه وحاميهه باوعيلي شموخ احنه شتفقنا مو كلنه تصيرين قويه وماتضعفين وترحين وياي تطلعين

بنتج من حلك السبع مو هيج احنه اتفقنا يله امسحي دموعج لا تبجين وخلي نروح كله هذا من وقتنه وكل دقيق مهمه بالنسبه النه 

_اي راهب اي خلي نروح اخذني عرفت مكانهه مو يله اخذني الهه عفيه....

هز راسه بحيره وباوع لمرتضى يلي واكف مايعرف شسالفه بيناتنه لزم ايدي راهب وطلعنه من المكان ركبنه بالسيارات وطرنه بيهن من الجهه الراحو منهه

وصلنه لنهايتهه وشفنه ملعب متروك وبي حاويات وزبل لزمت كلبي ضربت عليه اكثر من مره محاوله اقوي ويحملني يخليني انزل ادور بهل مكان

المشبوه بس ماكدرت نزل راهب هوه وفريقه راحوا يدورون بالمكان وانه بقيت بالسياره منزله راسي ومغمضه عيوني ماريد يجي وجايبهه وياه

ميته لو بيهه شي ماريد يجي ويكلي لكيناهه مغتصبه  ومدفونه بين الحاويات .. لاا يالله اخذ روحي يارب اخذ عقلي اخذ كلشي مني بس لا تكسرني بيهه لا تاخذ باب الجنه مني ..رفعت راسي ودموعي هلت على خدي مثل المطر شهكت وحجيت بصوت مخنوك..

_ربي لا أسألك رد القضاء ولكن اسالك اللطف فيه ربي رجعلي بنتي سالمه غير متضرره ربي لا تختبرني بعزيزه كلبي ربي لا تفجعني بيهه ورجعهه

سالمه يا الله يا من لا اله الا انت استغفرك ربي واتوب اليك استغفرك ربي واتوب اليك استغفرك ربي واتوب اليك..

خلصت الاستغفار الثالث وصعد راهب بالسياره وكال..

_فتحي عينج بنتج التقت 

_لا راهب فدوا لا تكولهه الله عليك اذا بنتي بيهه شي لا تكول اخذني يمهه وين ماجانت بس لا تكلي شلون ووين التقت وشصاير بيهه....