رواية في عشقها هلاكي الفصل الواحد والثلاثون
جمال..اوعى.... اوعى ابوس ايدك...ارجوك لا
الكل التفتو لنسيم واتصدمو بمنظرها وروعه شهقت بخضه وجريت عليها
اما حمزه اول ما وقعت عيونه عليها وعلى اثار الضرب والبهدله والتشوهات اللي ملت وشها اتسعت عنيه بقوه ولمعت بالدموع والتفت لجمال بسرعه وغل ميتوصفش وقال....ايه ده....ايه ده يا حيوان يا زباله يا قذر
وهجم عليه من غير ما يخاف من السلاح ووقعه على الارض وبقى يضربه بقوه وغضب مكانش شايف قدامه غير منظر نسيم اللي كانت بتنزف بشده ومتبهدله على الاخر
مختار كان مصدوم من اللي بيحصل وكان عايز يبعدهم عن بعض بس خايف يتدخل لان السلاح لسه في ايد جمال وخاف تخرج رصاصه تاذي حمزه قال بذهول وقلق....حمزه حمزه كفايه خد بالك ...بس...بس ابعدوا عن بعض كفايه تهور
نسيم كمان كانت واقفه بتصرخ وبتقول...... كفايه يا جمال ....كفايه ارجوك
بس مكانوش سامعين لحد كان جمال بيحاول يضرب نار على حمزه .....وحمزه كان بيشد السلاح منه وبيضربه وفيه نزاع شديد بينهم
ودقايق عدت على الكل كانها سنه من كتر الرعب انتهت برصاصه خرجت من السلاح وهما لسه ماسكين بعض
مختار وقع على ركبه وصرخ باسم حمزه وروعه جريت عليه
ونسيم اغمى عليها في الحال بين ادين نجوى اللي كانت مصدومه جدا وهتموت مكانها
بس اتغيرت ملامح الكل في دقيقه لما حمزه دفع جمال اللي كان اتصاب وسايح في دمه
وحمزه كان بيبصله بصدمه ومش مصدق انه قتل
مختار اخد نفسه بصعوبه ودموعه نزلت وهو منهار حرفيا
روعه بقت تهديه وجابتله ميه كان حرفيا قلبه هيقف في اللحظه دي
اما حمزه حاول يتمالك نفسه و جري على نسيم وبقى يفوقها وهو بيقول برعب ودموع ...نسيم نسيم حببتي قومي...حقك عليا انا اسف...انا اللي بعتك بايدي انا اسف
وبقى يحضنها وهو بيبكي وحاسس انه هو اللي بينزف
نسيم رفعت دماغها وهيه بتبصله بتوهان وقالت بدموع...حمزه ...انت...انت
حمزه مشى ايده على وشها اللي كان واضح عليه اثار الضرب ونزلت دموعه اكتر وقال..انا بخير انا بخير يا حببتي ..حقك عليا يا نسيم سامحيني
وبص لنجوى بغضب وقال...كنت فاكر ان عندي حد اثق فيه طلعت كل حياتي كدبه
ومرر نظره على غانم اللي نزل عيونه بحرج ونجوى كمان
نسيم مسكت ايده وقالت...المهم انك بخير...... وقعت قلبي حرام عليك
مختار قال بغيظ...وقع قلبك انتي بس ده انا قطعت الخلف منك لله كنت عايز اجيب بنت واسميها رائد
وقام من على الارض قعد على الكنبه وهو بيحاول ياخد نفسه
فايز قرب من جمال برعب وشاف النبض وقال بصدمه ...انتو ليكو نفس تهزرو مش داريانين بالمصيبه اللي احنا فيها...الراجل مات..... دي جريمة قتل توديكم ورا الشمس
مختار قال بلاة مبالاه ...متكبرش الموضوع كده دلوقت الاقيله صرفه ارميه في اي مقلب زباله ...كلب وراح
فايز بصله بدهشه وحمزه وقف وقال بحزم..لا طبعا انا هسلم نفسي ...انا اللي عملت كده ومتحمل المسؤليه
نسيم لطمت على خدودها وقالت ببكا وهستريا......انا ياما قولتلك ابعد ابعد مسمعتش الكلام...... اهو اللي خايفه منه حصل حصل مستقبلك انتهى وهتحصل ابويا ليه كده ليييه حرام عليك
وبقت تبكي بقوه
روعه قومتها وبقت تحاول تهديها وحمزه قال بدموع .....انا اسف ...بس بعد اللي عمله فيكي عندي استعداد اعيش عمري كله مسجون المهم خلصتك منه
نسيم حطت اديها على وشها وبقت تبكي بس مختار قال بهدوء....مفيش حاجه من دي هتحصل....انا هقول اني انا اللي قتلته....انا دخلت السجن قبل كده وعادي ادخله تاني ...مش هسيب مستقبلك يضيع
بقلم...زهرة الربيع
حمزه قال بسرعه..لا طبعا مستحيل ......انا اللي قتلته دي مشكلتي انا
روعه قالت بضيق...في الواقع هيه ولا مشكلتك ولا مشكلته ....ومفيش حد هيتحبس اصلا
كلهم بصولها باستفهام وروعه قالت...انتو ناسيين ان جمال كان عايز ياخد حقه بايده ومحررش محضر بخطف نسيم في القسم
مختار ابتسم بذهول لما فهم قصدها فورا وحمزه قال..... مش فاهم ده دخله ايه
روعه قالت.....دخله انه طالما ملوش حق عندك جاي بيتك بسلاحه ليه ...هو اللي اتهجم على بيتك وطبيعي تحمي نفسك وده يعتبر دفاع عن النفس ويتحكم لصالحك من اول جلسه
حمزه ابتسم وهو مش مصدق نفسه وقال...انتي متاكده
روعه ابتسمت وقالت..... متاكده
فايز قال بتوتر....بس...بس ياروعه احنا عارفين انه خطف مراته
روعه ابتسمت وقالت...اول حاجه حتى لو له حق فيه حاجه اسمها قانون يجبهوله مش يجي بسلاحه ويحاول يقتل عمد...تاني حاجه انا كان ممكن اتعاطف معاه واحسبها كده واقف في صف القانون...لو مكنتش شفت نسيم بالمنظر ده...ده واحد حيوان واقل حاجه فيه القتل ولو عليا كنت قتلته انا
حمزه ابتسم وقال...انا متشكر جدا يا حضرة الرائد انا مش هنسى وقفتك معانا من البدايه
روعه ابتسمت وبصت لمختار عن قصد وقالت...العفو ...كله يهون لعيون نسيم
قالت كده ومشيت راحت تكلم عمها وتبلغ عن موضوع جمال
وحمزه بص لمختار لانه متاكد انها تقصده بالكلام وغمزله وقال ...لعيون نسيم
مختار ضحك بخفه وفرك دماغه وراح وراها وقلبه بيدق بقوه من السعاده بيها
فايز اتنهد وقعد على الكنبه وبقى ياكل من الفاكهه اللي على الطاوله قدامه بغيظ من اللي بيعملوه وقال...مفيش فايده
حمزه قرب من نسيم ومسك ايدها باسها وقال.....كل حاجه هتتتحل وهحل مشكلة عمي نصار كمان...امسحي دموعك لاني من النهارده مش هسمحلها تنزل تاني
نسيم ابتسمت وقالت ...انا خايفه....مش قادره اصدق ان ممكن ده يحصل
حمزه مسح دموعها من على خدودها وقال..... هيحصل اوعدك..وحياة عيونك الحلوين
نسيم قالت ...دلوقت بابا كمان موقفه ايه..... هيفضل مسجون بما ان صاحب الدين مات
حمزه اتنهد وقال .....مش متاكد والله بس كنت قريت قبل كده ان الدين بيتحول للورثه ولو وافقوا على التصالح ياخدوا الفلوس وعمي يطلع
نسيم قالت بحزن ....ممكن اخواته يوافقه دول معندهمش قلب واهم حاجه عندهم الفلوس....بس اصلا المبلغ كبير
حمزه ابتسم وقال ....متقلقيش هنقوم محامي ونشوف الازم ويارب تيجي على الفلوس انا هتصرف فيها ....هاخدهم من مختار وابقى اسددله واهي فلوس حرام اخلصه منها و تروح لناس واطيه تستاهل الحرام
نسيم ضحكت وقالت ....هتعمله غسيل اموال يعني
حمزه ضحك وقال ..حاجه زي كده
نسيم ابتسمت وبصت لجثة جمال وهيه مش حاسه تجاهه باي حزن....بس حاسه بشفقه على خياله المريض اللي عيشه في عذاب وكان السبب في موته في عز شبابه قالت في نفسها.....الله يرحمك يا جمال ...انا مسمحاك
نجوى لما عرفت ان كل حاجه اتحلت انسحبت بهدوء ولسه هتطلع حمزه وقفها وقال...استني ..على فين يا زميلتي يا صديقة ٨ سنين بحالهم ...مش عايزه حتى تقولي اسفه
نجوى اتنهدت وقالت بوجع.....لا ....هقولك مبروك..... حببتك بقت معاك .....رغم كل الي انا عملته واللي عمله جوزها بس في الاخر انتو لبعض.... مبروك
حمزه قال بغضب....انتي مش شايفه نفسك غلطانه...مش شايفه حالتها...ده انا سبتها امانه عندك
نجوى قالت ببساطه ودموع...علشان غبي
حمزه اتفاجأ بردها وهيه ضحكت وسط دموعها وقالت.... اه والله غبي.....ما انا دكتوره ومهنتي كانت امانه عندي...وخونتها علشانك وقولتلك انها حامل بالكدب....ليه رجعت سبتها عندي
حمزه متوقعش ردها ده وقبل ما يرد قالت بسرعه ووجع.....انا اقولك سبتها عندي ليه....سبتها لانك مش عايز تعترف قدام نفسك اني بحبك وعشقاك ...مش قادر تضحي بالبنت اللي عمرك ما هتعتبرها غير صديقه وزميله وبتحتاج لها في حياتك...خايف....خايف تواجهه نخسر بعض ...وده الغباء بعينه لاننا خسرنا بعض من زمان ..من وقت ما قلبي دق لك يا حمزه
حمزه نزل عيونه حس انها قرته فعلا رجع بصلها وقال بحزن...تقومي تسلميها لواحد همجي زي ده ..افرض كان حصلها حاجه كان هيبقى عادي معاكي يا نجوى
نجوى قالت بدموع...لا ...مش عادي ومش سهل
وبكت بقوه وقالت ....وندمانه ...لاني خسرت نفسي وبرده مقدرتش اكسبك ...عموما انا اسفه ...اسفه ليك وليها ولنفسي ....اشوف وشك بخير يا حمزه
ولسه هتمشي مسك ايدها ولمعت الدموع في عيونه وقال....انا مسامحك
نجوى حست بقلبها بيتشق وقالت بحسره ودموع...بس انا مش هسامحك يا دكتور ....مش مسمحاك
قالت كده ومشيت وحمزه بص لطيفها بدموع ووجع وقال بهمس....حقك عليا يا نجوى
نسيم سمعته وقربت منه وقالت بحزن....تحب تروح وراها
حمزه قال بحزن....لا ...كفايه كده مش لازم اديها امل تاني.... لازم تنسى ...الغلط غلطي من البدايه.... كان لازم احط حدود بنا علشان متعش على امل واهم....وبرضه مكانش ينفع ارجع واديكي عندها كل اللي حصلك بسببي انا اسف
نسيم ابتسمت وقالت ...انا بخير....عموما موضوع ان مكانش فيه حدود بينكم ده مش هيعدي كده بالساهل ها...له قعده بس خلينا نخلص من اللي احنا فيه
حمزه ضحك من قلبه ونسيم مشيت وراحت قعدت لانها مش قادره تقف كان هيروح وراها بس غانم قرب منه وقال بتوتر....حمزه يا حبيبي...انا كنت مرعوب عليك
حمزه حس بغصه في قلبه لما سمع صوته...كان دايما يترمي في حضنه في الاوقات الصعبه زي كده...بس حاول يقوى وبصله بغضب وقال...امم وبعدين
غانم قال بدموع ...انا عارف اني غلطت ...بس عارف ان قلبك كبير ...حتى ان رامي جيه وقالي ....قالي حمزه عرف اهرب .... بس انا قولت لا...انا هستناك واعتذرلك ومتاكد انك هتسامحني علشان انت ابني ...انا متأكد كمان انك هتحميني من مختار...... انا ربيتك وعارف اني مش ههون عليك و انك مش هتسيب ابوك لمختار مش كده يا ابني
حمزه بصله وابتسم بطريقه هزت غانم من جواه وقال ....حبيبي يا بابا انا اقدر اسيبك لمختار ...ده انت حبيبي
بره عند مختار طلع ورا روعه لقاها كلمت عمها يجي قال ...جايين
روعه قالت ...اه جايين كلها شويه ويوصلو...هما في القسم سلمو رامي ورجالة عزيز...... وعزيز في المشرحه دلوقت
مختار اتنهد براحه و قال ...يلا الحمد لله داهيه تاخد مترجعش..انا احم..انا كنت جاي اشكرك علشان وقفتك معايا ومع حمزه ...مش عارف اقولك ايه
روعه ابنسمت وبصت لعيونه وقالت...ما انا قولت جوه ...انا اعمل اي حاجه علشان نسيم
مختار ابتسم وقرب منها قوي وقال ....اي حاجه...متاكده
روعه دفعته بضحكه حلوه وقالت....مفيش فايده في دماغك...انت في ايه ولا في ايه
مختار لسه هيرد وقفت عربيه ونزل منها شاكر وقرب منهم وقال...حمد الله على سلامتكم يا مختار باشا
قبل ما مختار يرد روعه قالت بسرعه...جيت في وقتك اقدر افهم انا بقى ايه حكاية شاكر....وايه علاقته بالقضيه و ازاي كان في مزرعة عزيز
مختار ابتسم وقال...ابدا ملوش اي علاقه بالقضيه ....انا استعنت بيه ...كنت محتاج مساعده وملقتش انسب منه
روعه استغربت وقالت..شاكر
مختار حط اديه في جيوبه وقال بعتب..اه شاكر....اللي خلاه باع ١٥ سنه صداقه ومعرفه واخوه وكان هيسلمني لعزيز علشانك ...يخليه يرجع يساعدنا من غير ما يخون علشان نطلعك من هناك..كلمته يجيب رجالتنا ويشغلوهم لحد ما اطلعك وهو نفذ فورا برافو عليه
وقال لروعه.....معلش عايزه في كلمتين ...عن اذنك ...واخد شاكر على جنب وقال ...ها جاي ليه
شاكر نزل عيونه في الارضه وقال..جيت علشان اشكرك انك كلمتني.....انا عارف انك مش هتسامحني وحقك
مختار قال بسخريه...مش مهم اسامحك ...المهم انك عملت الصح ...لولا خيانتك ليا من البدايه مكناش خلصنا من الحمل ده...وعموما انا عاذرك اذا كنت انا ضحيت بنفسي وكنت ههربها يوم العمليه....فطبيعي انت تخون
شاكر قال بحزن حقيقي...انا اسف جدا يا مختار ...انا مكنتش قد ثقتك..حتى اني قولت لعزيز على مكان اخوك ...بس والله خوفت كان مهددني بالسلاح...انا عارف اني مش الصديق اللي كنت بتتمناه... الراجل اللي تعتمد عليه ويفوت في النار علشانك انا اضعف من كده بكتير
مختار ابتسم وطبطب على كتفه وقال .. كلنا ضعاف متضغطش على نفسك انا مش زعلان منك
شاكر مسح دموعه وقال بسعاده...بجد....يعني هنرجع نشتغل سوا تاني
مختار هز راسه باسف وقال ...لا ....مش هنشتغل..من انهارده كل واحد في طريق ..مش لاني زعلان منك ....بس لاني هرتبط بروعه ...ووجود شخص بيفكر فيها حوالينا مش هيريحني ...انت استغنيت عني علشانها...وانا دلوقت باستغنى عنك علشانها برده..... واعتقد هتعذرني زي ما عزرتك
شاكر ضحك وسط دموعه وهز راسه بالموافقه وقال....كده صح....مبروك ...عموما لو احتاجتني في اي وقت رقمي معاك ...هبقى مبسوط لو كلمتني
مختار ابتسم بالم بيحاول يخبيه وقال ....ان شاء الله...اشوف وشك بخير
ومد ايده يسلم عليه بس شاكر حضنه بقوه وبقى يكتم بكاه حس انه خسر شخص كان جزء كبير من حياته علشان يكسب البنت اللي حبها وفي الاخر برده موصلهاش
مختار ضمه وهو محروق من جواه على ذكرياتهم سوا بس ميقدرش يسيبه معاه وهو عارف انه بيحب روعه
بعد عنه وحاول يقوى وقال...كفايه عواطف يلا... انت عارف اني مليش فيها
شاكر ابتسم وبص لروعه من بعيد وقال.....اشوفكم على خير يا انسه روعه
روعه ابتسمت وقالت بحزن.....مع السلامه ياشاكر.... وشكرا على كل حاجه
شاكر ابتسم بوجع ومشي وهو حاسس انه فقد كل حاجه ومختار رفع عيونه لفوق علشان دموعه متنزلش
روعه قربت منه وحطت ايدها على كتفه وقالت...انا اسفه...انا السبب في زعلكم من بعض
مختار اتنهد وقال...عادي...لو كانت صداقتنا قويه فعلا مكانش حد اثر عليها...عموما انسي المهم اننا خلصنا من الدريكه دي كلها
روعه ابتسمت وقالت ...طيب طالما زعلان عليه كده مسامحتوش ليه...ده ربنا بيسامح
مختار ابتسم وقال..ومين قال اني مش مسامحه...انا مسامحه...بس هو بيحبك ومش هينفع يفضل معايا...هبقى مخنوق
روعه حمحت وقالت...مش فاهمه
مختار قرب منها قوي وقال....متاكده انك مش فاهمه
روعه نزلت عيونها بتوتر شديد وقالت..انا..انا هروح اشوف الدنيا جوه لحد ما عمي يوصل و
بس قطعت كلامها لما شدها ليه بقوه وقال...بحبك...ولاول مره قلبي يدق..واول دقه كانت باسمك يا روعتي
روعه اتفاجات وعيونها لمعوا بسعاده متتوصفش وقالت.....انت
مختار قال بتاكيد..... بعشقك....ولو توافقي نكمل عمرنا سوا يبقى اتكتبلي عمر جديد
روعه ابتسمت بسعاده ولسه هترد شافت عمها ومعاه عناصر الشرطه بيقربوا منهم بعدت عنه بسرعه وقالت بارتباك.... احم...تمام كتر خيرك ..نتكلم بعدين
مختار اتسعت عنيه بدهشه مش ده الرد اللي كان مستنيه ابدا رفع شفته لفوق وقال...نعم يا اختي ...ايه كتر خيرك دي هو انا شحتك عشره جنيه في الاشاره ...ده انا بقولك بحبك بحبك
روعه داست على اسنانها بغيظ لان عمها واللي معاه سمعوه قالت بغضب..عمي
مختار قال بسرعه...اه متقلقيش منه الراجل لاقرع ده... انا كلمته وهو موافق وفضل يتحايل عليا نقرى الفاتحه وانا قولتله مش وقتها ....ايه رايد نقراها دلوقت واهو تبقى على روح جمال بالمره
روعه اتغاظت من غبائه ولفته مقابل عمها وهيه بتقول....هنقراها على روحك الاول
مختار اتفزع لما شاف عمها في وشه بلع ريقه وبص لروعه وقال...عمك
عدلي بصله بتوعد وقال....الاقرع وووو
