رواية فصلية بديلة ( شموخ ) الجزء الثاني الفصل الثالث والثلاثون 33 بقلم ام ملكوت

:-رفعت راسي ودموعي هلت على خدي مثل المطر شهكت وحجيت بصوت مخنوك..

_ربي لا أسألك رد القضاء ولكن اسالك اللطف فيه ربي رجعلي بنتي سالمه غير متضرره ربي لا تختبرني بعزيزه كلبي ربي لا تفجعني بيهه ورجعهه الي 

سالمه يا الله يا من لا اله الا انت استغفرك ربي واتوب اليك استغفرك ربي واتوب اليك استغفرك ربي واتوب اليك..

خلصت الاستغفار الثالث وصعد راهب بالسياره وكال..

_فتحي عينج بنتج التقت 

_لا راهب فدوا لا تكولهه الله عليك اذا بنتي بيهه شي لا تكول اخذني يمهه وين ماجانت بس لا تكلي شلون ووين التقت وشصايرلهه

_لا انشاءلله مابيهه الا العافيه بس كولي يالله

_يالله يالله يالله

بقيت اردد بلساني سمعته تنهد وحرك السياره نزلت راسي عل كشن وصرت ابجي بحركه واشهك ظنيت ان سكوته يعني بنتي متضرره بس تالي وكف السياره ولزمني من اكتافي رفعني ودار وجهي عليه وكال ..

_بنتج مابيهه شي اذا لحكنه عليهه انشاءلله تلكيهه سليمه معافايه لا تخافين شموخ قوي كلبج تره المكان الرايحيله خطر وديري بالج تتهورين 

_يعني كلولك بنتي مابيهه شي يعني ريانتي الصغيرونه عايشه ومامتظرره 

_اي مابيهه شي وانشاءالله راح نكدر نطلعهه بامان انتي بس اتبعي خطتي تمام 

_اي راهب تمام انشاءلله راح اسوي مثلما تكلي بس طلعلي بنتي بخير فدوا 

_من عيني تاخذينهه 

_يله نروح راهب لا نتاخر ريانتي منتظرتني 

_يله مسحي دموعج واهدي حتى نتوكل 

_اي مسحتهن مابيه شي هديت يله روح ..

هز راسه بايجابيه ورجع حرك السياره وبقيه سيارات الفريق ويانه مسافه الطريق وصلنه وانه رافعه راسي ادعي مغمضه عيوني وشاده قبضه ايدي على كلبي كون نطلعهه سالمه من مكان خطفهه وكفت السياره بعد دقايق والتفت علي وكال..

_وصلنه لبنتج نزلي شموخ بس تلثمي وحضري سلاحج

_فتحت عيوني كوه اتلفتت حوالين المكان جان جوله ومثل المصنع جبير حيل جنهه محطه غاز او هيج شي باوعت لراهب وهوه يسحب اقسام سلاحه وكتله..

_ وين اجينه

_هنا بنتج جابوهه تردين تبقين بالسياره واحنه ندخل ناخذهه لو تردين انتي امهه تطلعيهه منهم

_انه اريد اروح انه اطلعهه لريانتي

_ تمام بس ماوصيج بعد ديري بالج تره بنتج بخطر حاليا ..

بهتت ملامحي وبلعت ريجي بصعوبه غمضت عيوني محاوله اقوي نفسي والتفتت باوعت للمكان يعني هنا بنتي هنا ريانه مابيناتنه غير جم خطوه وتصير بحضني ريانه ..

رفعت اللثام على خشمي باطراف ترجف وكلب يخفق بجنون نزلنه من السيارات وراهب جمع فريقه سوو الخطه وتوزعوا حوالين المحطه وانه

رحت امشي على خطاه وصلنه يم الباب طل عليهم ومديت راسي وياه اشوفهم وعيوني تدور على ضناي وشفتهه كاعده على جهه وتلعب بلعابه وصخه

ومابيهه شي لزمت كلبي وزفرت براحه انحنيت سانده ايدي على ركباتي وانه ارجف غمضت عيوني وحمدت ربي وشكرته لحدما كال راهب..

_شموخ راح اعد لل١٠ وانطيهم امر بالمداهمه وإنتي خليج وياي من يسلمون نفسهم ندخل نجيب ريانه

_واذا حاولوا يشردون بيهه لو يسوولهه شي

_لا تخافين ساعتهه النه تصرف ثاني وياهم عندي خطه وحاسب لكلشي

_تمام حاضر سيدي ..

باوعتله بقوه وهوه ابتسم براحه التفت وحجه باللاسلكي عد لل١٠ وصار هجوم بقينه نباوع انه وياه والفريق لزموهم كلهم سويه شفت واحد طلع

يمشي على كيف من وره ريانه وبيده سجينه انعمت عيوني وتخبلت رفعت مسدسي صوبت نحوه وصرخت طالقه النار عليه مرتين طاح مدمه

بالكاع وانه دخلت اركض ملهوفه لريانه اخذتهه من الكاع وصار اطلاق نار بين الجهتين وكلمن اخذله صفحه ينضم بيهه

اخذت ريانه ضميتهه بحضني ووكفت وره العمود يلي بنهايه المحطه واطلاق النار علي صار مثل المطر وريانه صارت تبجي وتسد باذاناتهه من

الصوت يلي صار وانه اضمهه لحضني اكثر سحبت المسدس الثاني من الصدريه وصرت اطلق عليهم لحدما خلص العتاد شافني راهب و اجه حاوط

ضهرنه حمانه بسلاحه وطلعنه نركض وهوه يطلق النار عليهم لحدما طلعني من المكان عافنه بره

بامان ورجع دخل هاجم عليهم  ركبنه بالسياره مالت راهب وريانه انكتم صوتهه شفتهه مختنكه لو راحت روحي كلبتهه على بطنهه بحضني وصرت

ادك على ضهرهه ياله صارت تتنفس بشكل متقطع وتشخر انرعبت واديه تربطت ماعرفت شسوي عفتهه عل كشن وكعدت بمكان السايق رغم ماعرف

اسوق ولا بعمري راكبه سياره بس خوفي بهل لحظه خلاني اتذكر بابا وهوه يسوق ويعلمني على التفاصيل مالتهه لمن جنت بالكليه.. وماعرفت

شلون سقتهه ووصلت بيهه لاقرب مستشفى وكفتهه ونزلت اخذت ريانه وهيه صايره زركه بيدي اجيت اركض لداخل المستشفى واخذوهه

الممرضين من ايدي للطوارئ رحت وراهم وخلوهه عل سديه فحصو نبضهه وجان ضعيف حيل ونفسهه مكطوع اصلا بقو يسووله تنفس اصطناعي

ويضغطون على رئتهه وانه كعدت بالكاع مهدود حيلي لامه رجلي لصدري مغمضه وادعي مايصير بيهه شي اجت النسوان التمت علي وانه اهز

بروحي مثل المخبله واصيح يارب يارب يارب واباوعلهه شلون روحهه ميته بين اديهم ويحاولون يرجعونهه للحياة للحظه فقدت الأمل وهزيت راسي

مامستوعبه ان بنتي راحت مني وكلبي راد يوكف حسيته بس سرعان ما حلت رحمه الله وشهكت ريانه وصارت تبجي وتشهك تتنفس كوه علكولهه

الدكاتره الاوكسجين بسرعه وبقوا يهدون بيهه وانه ماحسيت على شي بعد روحي ماتت واحس صعدت لباريهه من الصدمه ...

.

.

:- لاول مره بعد سنين اشوف دموعهه لشموخ ومو اي دموع منظرهه كبالي وهيه تتوسل وتبجي بخوف ورهبه على بتهه مادري شسوه بيه هدت حيلي

دموعهه مرمرت كلبي فكرت لوما لكيت بتهه الهه وهيه انهارت شلون لو ممكن وجان بيدي اخلق غيرهه لو اطلعهه من جوه الكاع سالمه وانطيهه

الهه بس مو بيدي وبس ربي القادر على هل شي وكل الجان بيدي سويته واكثر و الحمد لله يلي خلانه نطيح باهل الولد ومن شافونه داهمنه بيتهم

باسلحتنه واخذنه ابنهم خافوا وكالولنه على مكان البنيه وطلع منطيهه لابو صاحبه اليتاجر بالبنات الصغار حتى يبيعهه لبيوت الدعاره والملاهي

وللعوائل الماعدهم جهال وغيرهه.. اخذنه مكان التسليم منهم وخليتهم يسحلونه هوه واهله للحجز وانه والبقيه من الفريق رجعنه ركبنه بالسيارات

وشفت حاله شموخ تبجي الصخر نزلت دمعتي مكسور على كسرتهه شديت قبضه ايدي وتحلفت الا اكسر الايد يلي انمدت على ضناهه وخطفهه  ..

حركت السياره وانه كل بالي اطلع البنيه سليمه لان اعرف بهيج حالات لمن ينحصرون العصابات يلجأون للقتل والتهديد بالمخطوف وجان عندي خطه

خاصه بيه حتى اطلع البنيه بدون مايصير عليهه شي لو تخاف بس شموخ ماتحملت وقتهه لمن شافت بتهه بخطر وشخص جاي باتجاهه رفعت

مسدسهه يلي صار سنين تعاني منه وماتكدر تلزمه .. صوبته ناحيته وجانت رغم خوفهه ورعبتهه على بتهه التزمت بالقوانين وماموتته

وجهت على بطنه وفخذه باماكن سطحيه وماخطت الضربه طاح بالكاع مدمه وغمضت عيوني باسف لان ماجان المفروض تسوي هيج

وعرفت نتيجه فعلهه هذا شراح تكون ..راحت تركض لبتهه وهمه توحشوا طلعوا الاسلحه مدري منين ما منين وصاروا يضربون نص فريقي تصاوب

وانه دخلت من بيناتهم لمن شفتهم صاروا يطلقون عليهه اخذتهه وبتهه من حلك الموت وطلعت وماهمتني روحي بكثر ماهمني روحهن العزيزه على

روحي .. خليتهن بالسياره ورجعت اساعد فريقي اشرتلهم ينسحبون وهذوليج خفو بالنار  غافلناهم وصحت هجوم وكفنه كلنه سويه حواليهم

وحاصرناهم باطلاق النار صوبنه كل واحد بيده ورجله وكعدناهم عقال بالكاع اخذنه الاسلحه منهم وكلبشو اديهم طلعت اتطمن على شموخ

وبتهه بس مالكيتهه ولا السياره تخبلت وعبالي شخص طلع وخطفهن سويه بالسياره صحت لسالم واجه يركض اخذت اللابتوب منه وكتبت رقم

سيارتي وطلعتلي بالبحث انهم بباب مستشفى قريب منا عرفت صاير الخفت منه وريان متخربطه .. اخذت السويج من الضابط وصعدت

بالسياره الثانيه وانطلقت بيهه للمستشفى يلي بيهه شموخ والبقيه اخذوا المجرمين للحجز.. كلهه دقايق ووصلت لكيت السياه بالباب ومفتوحه

دخلت المستشفى اركض وادور عليهن بعيوني رحت للاستعلامات والممرضين سالت اذا اجت قبل شوي ام شاده صدريه اسلحه ووياهه طفلتهه

متصاوبه او مختنكه وحده منهن ودلوني على مكانهن رحت وراهم وكلبي انهدت روحه لمن شفت شموخ نايمه عل سديه وبحضنهه ريانه وثنينهن

اديهن بيهه كانوله ومعلكيلهن مغذي .. نزلت ساند اديه على ركباتي واخذ نفس فحطان  رفعت راسي باوعتلهن شلون نايمات واجيت امشي باتجاهن

باوعتلهه الدموع ناشفه على خدهه وبلعومهه مورم طالع من الحجاب طاحت دمعه باقيه برموشهه ومسحتهه بيدي بلعت غصتي وكعدت عل

كرسي بثقل طلعت نقالي كصيتلهن صوره ودزيتهه لابوهه ماجان الي حيل لا احجي ولا اخابر احد فقط اكتفيت بان ادزله رساله ويه الصوره واكله..

💬 حجينه حفيدتك التقت وهيه وبنتك بالحفظ والصون بس تعبن وجبناهن للطوارئ بمستشفى >>>> اذا تردون تعالوا تطمنوا عليهن..

طلعت من المحادثه ورفعت راسي سانده عل حايط ومغمض بتعب احس اصعب مهمه هاي اخذتهه بحياتي رغم بساطتهه وسهوله حلهه بس الشعور

يلي حسيت بي جان بثقل الجبال ان تحل مشاكل العالم اسهل من ان تحل مشاكلك والثقل والصعوبات محد يحس بيهن غير صاحبهن وهسه

كدرت احس بشعور الناس يلي جهالهم ينخطفون ويغتصبون وينقتلون ويتشرحون وتنباع اعضاهم هذولي كلهم مصايبهم اكبر وفجعتهم اكبر

و"الحمدلله الذي عافانا مما ابتلاهم به ولو شاء فعل " .. هل محنه جانت درس الي وعلمتني احس بمشاكل الناس ومعاناتهم واتعامل وياهه

كانهه مشاكلي الخاصه خلت كلبي يقوى بالزايد ويصر ان ياخذ حق المظلوم من حلك السبع ونعاقب المجرم حتى على ابسط جرائمه

لان شمهما كان الجرم بسيط فهبطه المضلوم وخوفه وجزعه وقله حيلته بهيج موقف كفيله بان تسجن الضالم مدى الحياة لان ارواح الناس مو لعبه وياهو الجان يلعب بيهه والحمدلله ربي علمني سبيل الحق ومشاني بطريقه..

كلهه دقايق وصاروا اهل شموخ بالمستشفى كمت اشرت عليهم من بعيد واجو كلبهم متلهف على شموخ وبتهه دخلوا يمهن وانه طلعت بره بقيت واكف بالباب واطحن بروحي جكاير ومنظرهه كل شوي يمر علي لمن لزمت

ايدي تتوسل بيه اخذهه تدور على بتهه وينعصر كلبي وياذيني عليهه يصير اكثر لمن اتذكر بجيهه وهيه تشهك وتحجي بغصه.. مامتعود عليهه

هيج مامتعود اشوف شموخ ضعيفه وبلا حيله لاول مره اشوف الضعف وقله الحيله بعيونهه لاول مره تتوسل طالبه نجاة بتهه وماهمهه العالم

التفرجت عليهه هيج حب الام يسوي وبلحظه تتحول من ام قليله حيله لام شرسه وقويه وتدافع عن بتهه بوسيله جانت معذبتهه وماتقوه عليهه ..

تلاشت افكاري لمن طلع محمد ولزمني من كتفي عدلت وكفتي وهوه يطبطب على ضهري ويكول..

_مشكور وماقصرت ابو معاذ كفو انت وعدت ووفيت وعدك ورجعتلهه بتهه سالمه كفو منك

_لايخوي ماكدرت ارجعهه سالمه شوفه عينك قصرت لمن طلعتهن وانه مامنتبه على الطفله وهيه تبجي قصرت ياخوي وحيل هم

_لا تحجي هيج يكفي طلعتهه من الموت والخطر وضحيت بحياتك لاجلهه وفضلك جبير من بعد فضل رب العالمين وشما حجينه وتشكرناك ماراح نوفي فضلك هذا

_واجبي اتجاهكم هذا وشغلي كمحقق لا تشكرني على شي الفضل لله

_والنعم منك ومن اصلك..

ابتسمت بتعب وطبطبت على كتفه طلع اخوهه الثاني مرتضى وهوه يباوعلي بشك تذكرته مساع من حضنت شموخ لصدري مهديهه وهوه جان يمنه

واكف هسه يفهمنه غلط ويروح يحجي ويه اخته وهيه توه ماره بهيج وضع عاد توكلت على ربي وتمشيت باتجاهه كتله خلينه نحجي شوي بره

وهوه هز راسه وطلع وياي للحديقه طلعتله جكاره ورثتهه اله واخذهه من ايدي سحبنه نفس وكتله  وانه صافن بالسما..

_احجيلي خويه مرتضى شنو بخاطرك احنه عائله وحده وماريد تشك بيه وتفهمني غلط 

_شنو البينك وبين شموخ

_كل الخير بينه انشاءلله 

_شلون يعني

_يعني ماكو شي غلط بالموضوع وكلشي واضح كبالك شموخ عاشت فتره شهرين من حياتهه عدنه ومتعودين على الحجي بدون رسميات رغم هيه

متدربه عندي بس جانت علاقتنه العائليه الوديه تخليهه تطلب مساعدتي وتلجئ الي بهل طريقه الشفته انت مساع وجانت خايفه على بتهه وماتدري بروحهه شتسوي 

_بس هذا مايعني انك تحضنهه هيه مو بوعيهه جانت انت شنو عذرك

_عذري ياخويه والحجي بيناتنه اختك ماخذه روحي من ١٠ سنين ودمعتهه غاليه على كلبي وصعبه تشوف دمعه شخص عزيز و تحبه وماتكدر حتى تخفف عنه 

_انتبه لكلامك راهب انه اخوهه لو ناسي اكدر هسه امرعدك هنا وادفنك على كلامك هذا

_افاا وانه غلام ابوي لو اندفن بسبب حبي لاختك بس تمون وانت فاهم غلط مثلما اختك جانت مو بوعيهه ومتمرمره على بتهه انه جنت بنفس الموقف كلبي تمرمر على بتهه وعليهه لمن شفتهه

تتوسل بيه بقله حيله ولا تضن بيه سوء وان تقصدت اتقربلهه لا والله شاهد علي وياخوي ان احبهه هذا الشي مايعني اني استغليت ضعفهه وتقربت الهه لا والله

حبي الهه فطره ونيتي صافيه وياهه واليحب مايفكر بيوم يلعب باليحبه اليحب ياخويه يخاف على اليحبهه حتى من انفاس صدره لو هبت بوجهه ..

حجيت هيج وصفن يفكر مدري يتذكر المهم طبطبت على كتفه ورحت من يمه وهوه باقي صافن وماخذته افكاره لاكاني محمد بيده ورقه ادويه وكتله..

_شنو هاي محمد

_مقويات ومهدات كتبهه الدكتور لشموخ لان صار بيهه انهيار وراح يلازمهه هل كم يوم فلازم المهدات متوفره يمهه حتى اذا انهارت مره ثانيه ننطيهه 

_هاا انطيني لعد انه اجيبهن الهه

_لاا ولو انت بس وكفتك النه هاي كافيه وعل ادويه خيرك واصل وماتقصر بعد اخوك

_ميخالف يامحمد هنه ادويه انطيني انه اجيبهن انت روح يم اختك محتاجتك يمهه هسه وانه اجيب اللازم والا والله ازعل عليك

_بس مايصير ياخويه

_لا يصير يصير عود ردلياهن من اتمرض

_الله ينطيك الصحه والعافيه اذا مصر هاي الورقه بس اعتبرهه دين برقبتي

_نشوف عود

_ههه ..

ابتسمت واخذت الورقه رحت للصيدليه اشتريت الادويه واخذت لاصق جروح ورجعت يمهم لكيتهم كاعدين بره عل كراسي عفتهم ودخلت يم شموخ لكيت

امهه تقره قران يمهه باوعتلي وابتسمت بامتنان بادلتهه وخليت الادويه عل ميز اخذت لصقه الجروح فتحتهه ومديت ايدي اخذت كفهه لشموخ تحت انظار امهه المستغربه لزكتهه على طول الجرح يلي صابهه لمن اطلقت النار وتحركت ايدهه باوعتلهه شويه وفتحت عيونهه شافتني وهيه

فزت من مكانهه وفزت ريانه وياهه لزمت صدر ريان وبقيت اطبطب عليهه حتى ترجع تنام باوعتلهه وباوعتلي دموعهه مغوركه  غمضت

عيونهه وابتسمتلي بامتنان التفتت على كلام امهه وتسائلاتهه وانه خليت وطلعت وكفت يمهم بره وكتلهم انهه كعدت كاموا دخلولهه كلهم بس مرتضى بقه واكف بره

ماعرفت ليش ماحاول يدخل يطمن على اخته وما همني اعرف.. المهم رحت للحمامات غسلت وجهي نزعت الصدريه وسندت اديه عل مغسله محاول

اهدي نبضات كلبي واتناسه دموعهه الطبعت بكلبي وكسرتهه يلي كسرت ضهري .. جريت حسره بتعب اخذت شغلاتي وطلعت رحت يمهم استاذنت ودخلت باوعتلي وعدلت كعدتهه وهيه تكول..

_تفضل راهب 

_الحمدلله على سلامتكم

_الله يسلمك ومشكور ماقصرت وياي رجعتلي روحي وماسمحتلهه تتدمر فضلك علي جبير

_واجبي هذا وانتي النقذتي بنتج مو انه 

_اعرف زين السويته علمودنه ماحاجه تنكر وتتواضع

_ههه تمام 

_ههه

_بس الصدريه انطينياهه حتى ارجعهه للدائره مايصير تبقى بره هواي

_اي هاي بالعلاكه يمكن كالت الممرضه خلتهن بله امي شوفي هاي العلاكه وراج انطينياهه..

اخذت العلاكه امهه خلتهه بحضنهه طلعت الدرع والصدريه انطتني العلاكه وجيكتهن اذا كاملات لو ناقصهن شي هزيت راسي بايجابيه خليت الدرع

يلي بايدي وياهن واخذت العلاكه تحمدتلهه بالسلامه مره ثانيه وطلعت وصلني ابوهه واخوانهه محمد وسلام للباب تشكروا مني سلمت عليهم

وركبت سيارتي اشرتلهم مع السلامه وطرت للدائره وسالم رجع عل سياره الثانيه جابهه وصلت قبلما

يخلص الدوام بربع ساعه دخلت بوجهي لمكتبي رجعت الغراض واندك الباب دخل سالم وكال..

_سيدي انشاءلله مابيهم شي المتدربه شموخ وبنتهه

_لا الحمدلله مابيهن شي هسه ومنا لبعد ساعه يرجعونهه اهلهه للبيت

_اي الحمدلله بس سيدي ممكن سؤال

_تفضل 

_شنو علاقتك بالمتدربه شموخ وشلون هيج تكدر تحجي وياك عبالك تعرفك وتحجي اسمك بدون مقدمات 

_وهيه كذلك

_شلون سيدي 

_سالم تعبان هسه بعدين احجيلك واذا فضولك قاتل اسال مرت اخوك اسراء عليهه وهيه تجاوبك

_ليش اسراء هم تعرفهه

_اي من زمان

_لااا تكليي هييه الجنتت تحببهه من ١٠ سنيين لهسسه

_وغسل صوتك 

_العفو سيدي بس انصدمت الله عليك كلي هيه لو لا

_اي هيه

_ااالله اكبررر

_على راسك امشي ولي اطلع مني لا انعل العرفني بيك هسه

_حاضر سيدي خلي اروح لمرت اخوي نحش بيكم شويه 

_بس لا تكول لاحد عن السالفه الصارت اليوم ولا تحجي ان بيناتنه شي انه وشموخ

_ليش سيدي 

_خلي الوضع يهده واذا تريد شموخ هيه تحجيلهن لا تدخل 

_هاا تمام سيدي عن اذنك محتاج شي

_لا تكدر تروح..

دك تحيه بحماس وهوه خافي ضحكته طلع وهوه فرحان بهل صدفه اكثر مني ابن الطراك ضحكت عليه بكلبي ونزلت عيوني على جنطتي طلعت منهه

جاكيتي وقفلتهه لبسته وخليت مسدسي بخصري وجنطتي على كتفي وطلعت قفلت المكتب ودرت

وجهي اريد اطلع واجت بوجهي رحابب لاا هيج احنه ماراح نخلص معناهه باوعتلهه باستغراب وكالت تتصنع القلق..

_سيدي انت تدري بشموخ عدهه بنيه 

_ليش بشنو يخصج هذا الشي

_يعني تعرفهه متزوجه

_والمطلوب

_اي يعني عدهه زوج واكيد ماراح تتركه وتجيلك لو تنطيك عين

_شنو بله عيدي ست رحاب ماسمعت شنو كلتي 

_العفو منك سيدي بس يعني اكول اخاف جنت رايدهه لو منعجب بيهه حبيت اذكرك انهه ملك غيرك مو الك فلا تخلي امالك بيهه واكو هواي خيارات

_اي بله مثل منو ومنو هل اختيارات التكولين عليهه 

_هنه البنات ويانه كلهن متزوجات بس انه الوحيده الما مرتبطه او متزوجه واحسن اقتراح لو حبيت تعشك من صدك هوه كبالك

_لهل درجه ماعندج كرامه واحترام لذاتج وعندج جراة توكفين بوجه رئيسج وتحجين هيج 

_شكو بيهه سيدي انت تحب العلاقات وانه كذلك وتدري بيه احبك من زمان ليش ماتنطيني فرصه

_هوه انه ليش واكف احجي واتعب نفسي وياج انتي اكيد تعرفين تدريبكم هنا مو بس عل شغل وانما الاخلاق الحميده والمسار التربوي والثقافي عند الموظف ياخذ ٦٠ بالميه من الشهاده موو

_شلون يعني سيدي

_يعني بعدين تعرفين روحي هسه لمكتبج ولا توريني خلقتج ولا تحضرين لتدريبي من اليوم ورايح

_بس سيدي انه مو قصد...

عفتهه تحجي وعبرت من يمهه طلعت ركبت سيارتي اتصلت بسالم رد علي متحمس وكتله..

_سالم خلي علامه اكس على كل الدرجات الاخلاقيه والتربويه بفايل المتدربه رحاب المحفوظ 

_بس سيدي هيج راح ترسب وتنطرد

_وهذا الاريده انه لان هل اختصاص يهتم بانقاذ الناس ورد حقهم مو مناسب لبنات الشوارع اليدورن ونسه ولعب وراحه بروس الزوواج 

_بس شمسويه حتى اذا طلب العميد سبب انطي

_سوي الكتلك عليه وسلمني الفايل باجر انه ادخل للعميد وانطي سببه اليريده

_تمام حاضر سيدي 

_يله كملوا لم غراضكم ورجعوا لبيوتكم

_حاضر سيدي محتاج شي بعد

_لا تكدر تروح 

_مع السلامه سيدي 

_الله وياك..

سديت الاتصال وحركت السياره رجعت للبيت نزلت بتثاقل وحيلي احسه بعده مهدود علي دخلت ولاكتني امي انتبهت علي تعبان واجت يمي لزمت ايدي وهيه تكول..

_خير يمه راهب شبيك وليدي كوه تمشي

_تعبان يوم 

_الله يساعدك يبعد روحي تعال ادخل اسبح وبدل ملابسك حتى انومك على رجلي مثل قبل شرايك

_علواه يبعد حيلي 

_يله جا بسرعه هروله روح اسبح وتعال بالصاله..

ابتسمت بتعب على سوالفهه وشلون تحاجيني مثل طفل كدامهه بست راسهه ودخلت لغرفتي ذبيت ملابسي ودخلت للحمام سبحت بماي حار نشفت وطلعت

لبست تراكسود وعفت شعري رطب مالي حيل انشفه رحت للصاله لكيتهه محضرتلي بطانيه

وصوبه يمهه اشرت على رجلهه ورحت تمددت خليت راسي بحضنهه وصارت تمسد على شعري شهكت وكالت بقلق..

_يا يمه ليش شعرك رطب ليش ماشسورته ولك يمه بارده لا تستبرد وماصارلك هواي من طبت من الفلاونزه

_مالي حيل يمه عوفي هوه ينشف وحده 

_ياا شلون عبير ولج عبيرر يمه وينج..

صاحت لعبير واجتلهه والنقال باذنهه عرفتهه تخابر بمحمد كلتلهه تجيبلهه الشسوار والمحوله راحت شويه ورجعت علكته بالكهرباء وانطتهن لامي

كعدت وصارت وراي تفير بشعري لحدما نشف ياله طفته وخلته على صفحه يمهه رجعت راسي على رجلهه وبقيت صافن افكر بشموخ ومنظر الكانوله

بيدهه المجروحه وشلون حاضنه بتهه ونايمه وشلون كعدت مخروعه تتلفت بعيونهه على بتهه

ومن شافتهه يمهه زفرت براحه وشلون باوعتلي بامتنان وعيونهه مغوركه دموع كل يلي صار اليوم مر مثل الشريط كبالي جريت حسره وفززني صوت امي وهيه تكول..

_هاا يمه اليوم احسك مو طبيعي جاي مهدود حيلك وتتحسر احجيلي يضناي ورمش عيني شبيك وشصايرلك

_لا يضل بالج يوم بس صار ضغط علي هواي بالشغل وجيت تعبان

_ليش تضغط على نفسك يمه على كيفك ويه روحك اشتغل ساعتين وارتاحلك ساعه لا تجرهه ٧ ساعات بس شغل ويلتم عليك التعب من تالي

_شسوي يمه مو بيدي الناس تحتاجني بكل وقت تصدكين بكل ساعه التمر يجيلي بلاغ لو بلاغين سويه وباليوم نطلع مداهمتين او اكثر 

_اي يايمه صحيح شغلك متعب بس الواحد اهم شي راحته ياوليدي اذا مارتاحيت انت شلون تكدر تشتغل شغلك على اكمل وجه يعني تتعب وتتمرض

وتكعد بالبيت وهواي ناس ماتلحك عليهم فلیش ماتوازن وقتك وتخلي لكل شي وقته وقت الشغل شغل ووقت الاستراحه راحه 

_انشاءلله يوم منا وهيج اسوي مثلما كلتيلي

_اي وليدي حبيبي

_شلونج انتي صحتج عافيتج 

_والله شوفه عينك يمه هل كاعد احش بروحي دوه وعلى الله المستعان

_ونعم بالله ديري بالج على نفسج يمه دواج اخذي بوقته 

_انشاءلله حبيبي 

_هففف بنهايه الشهر تزوج عبير شلون راح نرتب وضعنه بدونهه مادري انتي شلون وين اوديج لمن اروح لدوامي رح يضل بالي يمج 

_لا تخاف وتقلق يايمه بس الكاتبه ربك يصير اضل هنا وحيدتي ماعلي شي 

_ماكدر اعوفج وحدج 

_لعد اذا انت هيج يايمه مهتم وخايف علي دحن علي وتزوج وجيبلك عروس تصيرلنه ونيس وتعبيلنه البيت ضنا 

_هههه انشاءلله يايمه بس شكلهه مطوله شوي هاي العروس

_يعني عندك وحده

_لا حاليا ماعندي

_رهبانو على امك هل جذب تره وصلولي حجي وكلولي عروستك اليحبهه كلبك موجوده 

_ههههه حكومه انتو ماينضم عليكم شي شني

_ههه جا شعبالك عندك خوات يطلعن السر من جعبتك يخلنه باذاني

_هههه موش نسوان حالهن بلي على كوله اهل البصره 

_هههه يله يايمه فرح كليبي وتلحلح تره العروس ماتجيك برجليهه الا لمن تروح وتسحل روحك الهه ياله 

_والله مادري يا يوم بعدهه هسه هيه حاليا ملتهيه بشغلهه وبتهه خايف اتهور واستعجل وانرفض وارجع خايب مستحي

_لااا انشاءلله ماتخيب انت بس توكل على ربك وهوه يمشيهه ويسخرلك كلبهه

_ونعم بالله انشاءلله يمه لمن يجي الوقت المناسب احجيلهه واشوف ردهه 

_اي يمه بعد امك اريد اشوف ابنك قبلما الله ياخذ امانته وتضل بحسرتي

_عمرج طويل انشاءلله غاليتي..

بست باطن ايدهه وصارت تفتش بشعري مدري شتدور اجت عبير كعدت كبالنه وكالت لامي عن خطف ريانه اليوم وامي اخذتلهه صفحه تعاتبني

ليش ماكتلهه عاد كتلهه ادري بعبير راح تكلج ياله سكتت عني كملن سوالف وانه بقيت اصفن وضايع بافكاري التفتت على عبير وترددت اسالهه بس بعد عين اخوهه فهمتني عل طاير وكالت بعدما تحمحمت..

_كال محمد ان رجعوا للبيت وشموخ اخذ مهدئ ونامت وانشاءالله يوم يومين تستعدل نفسيتهه وتسترجع قوتهه 

_هاا انشاءلله 

بقيت نايم بحضن امي وهي تمسد على راسي وتسولف ويه عبير لحدما غفيت بمكاني فتره طويله وفزيت

لكيت روحي بالصاله بعدني وراسي عل مخده والبطانيه ام جلد النمر مخلينهه علي شفتهه الساعه

ب١ بليل ردت اروح لغرفتي بس تعاجزت ومنا مكاني دافي عاد بقيت بمكاني ونمت بعدما وقتت نقالي ب٥ ونص ...

.

.

:- بعد يلي صار لريانه والموقف يلي انحطيت بي رجع عقلي لراسي وقررت ماسمع لكلبي بعد ولا اخطي خطوه بطريق يبعدني عن بنتي وياخذهه

مني ..الصار وياهه خلاني اكل بروحي ندم وضميري يعذبني خليت اللوم على نفسي لان مانتبهت عليهه لان ماعلمتهه على الاشياء الممنوعه

والغير ممنوعه ومنهه طلعتهه للشارع جان المفروض التهي بتربيتهه وتعليمهه وماغفل عن هيج شغلات وخطفهه جنت مشتركه بي وانه سببه

لان هملتهه وهملت تعليمهه بعدما صارت تمشي وخليتهه عند اهلي من واحد لواحد يديرون بالهم عليهه .. وفوك تقصيري جايه هسه افكر بالحب

واعشك واتمعشك وعايفتهه وهاملتهه عند اهلي واصلا شفايده الحب وانه الزواج شايلته من راسي واعرف كل زين اهلي شلون متعلقين بريانه وهيه

متعلقه بيهم ولا ممكن اكدر افرقهه عنهم واذا فكرت اتزوج فلازم ابقيهه عند اهلي ومستحيل اسوي هيج خطوه واترك ريانه واعيش حياتي بعيد

عنهه بنتي هاي روحي من دنيا ماتركهه علمود سعادتي وبس يمهه راحتي الكاهه .. هسه خليت عقلي براسي وكعدت وسكتت قررت ابقى كاعده

على بنتي وماضحي بيهه ريانه بحاجتي وبحاجه شخص يبقى على طول يمهه حتى لمن تكبر ..وبحال فكرت و وافقت على راهب وتزوجت

منه فراح تبقى ريانه وحدهه ومحد يداريهه لمن نطلع لاشغالنه وخالتي وفاء ماتكدر تعين نفسهه شحال اذا ريانه وياهه .. هذا كله بكفه ومشاعر

احسان وتفكيري بي بكفه ثانيه شلون فكرت احب راهب واكسر كلبه لاحسان وهوه حبني كل هاي السنين ومنتظر الكلمه الحلوه مني هيج راح اكون

ظالمه بحق نفسي وحقه ولا انه يرتاح ضميري واعيش بسلام ويه راهب ولا احسان يشفى كلبه ويعيش بسلام ويه غيري وحيره حياتي صارت بهل

فتره حيره واخر قرار ثبتت عليه وشفته هوه الصح ان اكعد على بنتي واسكت لا زواج يرهملي انه بعد ولا ارتباط خليني بشغلي وبنتي واعيش

ويه اهلي احسن الي وللكل على الرغم هذا قراري رح يجرح راهب بس هذا الافضل واتمنى يلكون التسر خاطرهم هوه واحسان ويبطلون يحبوني ..

اما كلبي يلي رجعت نبتت بي ثمار الحب بعد سنين راح ابقي هل ثمره وحدهه وماتقرب منهه لحدما تموت من وحدهه لو تكبر بالفطره...

مر يومين على حادثه خطف ريانه وانه ملازمه الفراش وبس حاضنتهه ونايمه كل حيلي راح بخطفهه وانهدمت كل قوتي حتى دوامي عفته هل

يومين ومارحت حتى لا اشوف راهب وكلبي يضعف كباله .. والشي الوحيد يلي خلاني اصحى من خمولي هذا وكآبتي هوه الخبر يلي صعقنه كلنه

اليوم الصبح لمن اتصل عمو ساجد يطمن علي وعلى ريانه وكال لابوي عن حادثه جنان يلي مر عليهه اسبوع واحنه ماندري بقيت صافنه ومصدومه وانه اسمعه يكول طاحت

من اللعبه ونكسرت رجلهه وحوضهه وصار عدهه رضوض انهد حيلي ودموعي اخذت مجراهه كلبي توجر عليهه وانه اتخيل جسمهه متكسر شحال لو شفتهه كبالي لا والمشكله صارلهه اسبوع

تخيلت الموقف كبالي وحضنت روحي متولعه وحيل خفت وانكسر كلبي عليهه والتهيت بيهه عن التفكير والكآبه كمت بسرعه لسلام كتله ياخذني الهه وطبعا اهلي كلهم كالوا يرحون وياي

يطمنون عليهه اخذت نقالي خابرتهه واسمعهه تحجي مخنوكه ومحتاجتني كتلهه راح اجي وطمنتهه شويه وكمت بدلت لريانه واهلي بدلوا خليتهه عل جربايه وكمت غسلت

واجالي بابا للغرفه وانه ابدل دك الباب وكتله يتفضل ..اجه كعد عل جربايه اخذ ريانه لحضنه يطمن عليهه ورفع راسه باوعلي وكال بتردد..

_بويه شموخ راح ترحين بعد لجنان تمام

_اي بابا شنو صار

_ولو هسه هيه مو بحاله زينه بس خلينه نستغل هل زياره وكعدي احجي وياهه شوفي شنو رايهه بمرتضى وحاولي تسالينهه اذا حابه تبقى تتواصل

وياه لو تكطع منه اذا مايريد يتزوجهه هسه لان يجوز البنيه ماعدهه اشكال ان يتراسلون ويتعرفون

اكثر على بعضهم فانتي نبهيهه ان تدير بالهه اذا بقت ويه مرتضى لا تسمحله يسوي شي ويضحك عليهه باسم الحب

_اي بابا هوه انه هم هيج كلت احاجيهه واشوف رايهه شنو بس تطمن جنان ربت عمرهه كله وياي واعرفهه ماتحب ولا تتقبل هيج شغلات حتى لو جانت باسم الحب 

_اي بويه واذا على كولتج شفتيهه جاهله بهل شي وماخذه بالهه مرتضى يحبهه ويريد يتزوجهه اذا اخذ اليريده فبعد انتي سمعيهه التسجيل مالته

وكليلهه النيه الحقيقيه اله وخليهم يتفاهمون لان ماريد يفترقون لو يصير سوء تفاهم بينهه وبينه بسبب التسجيل فهمتي علي بويه

_اي بابا لا يضل بالك اعرف شلون احجي وياهه واوعيهه عل حقيقه وبعد هيه الهه حريه التصرف وهيه تره تفتهم بنوايا الناس ماينضحك عليهه بسهوله 

_شلون ماخلي بالي يابويه هيه رب الكدر يضحك عليهه بكلمتين وخلاهه تعوف الرجال الشاريهه بماي عيونه ماستبعد يضحك عليهه بامور ثانيه

_وياك حق بس لا تقلق خليهه علي جنان انه اعرفه وراح احاجيهه وبعد هيه بكيفهه

_اي يابويه يله كملتي خل نطلع

_اي يله بابا ..

ابتسم وباس ريانه وطلع من الغرفه وطلعنه وراه انه وريانه لزمت ايدهه الناعمه باصابعي وطلعنه لاكاني سلام و اجه عليهه رفعهه

لحضنه وصار يبوس بيهه وراح طلع للسياره جريت حسره وباوعت عليهم وصفنت افكر شلون الي عين احرمهم منهه شلون ابعدهه عنهم وخاصه سلام

وهيه معتبرته ابوهه وهوه معتبرهه بنته وروحه ومايكتمل يومه بدونهه .. بلعت غصتي ودخلت للصاله وصادفني مرتضى يلي بالتواسيل محمد كدر يقنع ابوي ويرجعه يعتذر منه بعد حادث ريانه ..

باوعلي ودار عينه عني من صارت اخر مشكله لهسه محد يحجي ويه الثاني انه وياه كعد يم اهلي وسال امي باستغراب..

_شنو يمه وين رايحين كلكم

_جنانه بت عمك طايحه قبل جم يوم من اللعبه بمدينه الالعاب ومتكسره

_شنووو وشلونهه هسه وين هيه

_طلعوهه ثاني يوم وهسه بالبيت خطيه وهل رايحين نشوفهه

_تمام انتظروني اروح وياكم بس اغير قميصي

_تمام يمه منتظرينك..

كام بسرعه عبر من يمي هاف هزيت ايدي عليه وباوعت لبابا يهز راسه باسف وحيره عليه ماينعرف شيريد من جهه يريدهه كنزوه ومعتبرهه هامش

بحياته ومن جهه يخاف عليهه ومايشوف دربه لو صارلهه شي ماعرفت جده من هزله لهل مرتضى .. المهم انتضرناه يكمل لبس وطلعنه اخذت ريانه

لحضني وصعدنه بالسياره انه وامي وسلام وره وبابا كدام ومرتضى يسوق .. وصلنه بعد طريق ساعه تقريبا لبيتهم ونزلنه دكينه الجرس وفتحلنه

احسان الباب باوعتله وبهتت ملامحي بضيق درت عيني عنه سلم على اهلي وانه دخلت بدون ماسلم عليه او بالاحرى رديت على سلامه بس بكلمه هلا

ودخلت سلمنه على عمو وخالتي ونوره اخذتني لغرفه جنان دخلت ودكيت على صدري بصدمه وانه اشوفهه نايمه عل جربايه وايدهه ورجلهه مجصصه وحوضهه شادينه وراسهه وماضال بيهه عضم صاحي انمرد كلبي عليهه وفوك

قهري اجت قهره جنانه على حالهه نزلت دمعتي واجيت سلمت عليهه وحضنتهه ابجي على حالهه والوصلهه لهاي المرحله سالتهه عن حالهه وشلون صار هيج بيهه وهيه باوعت لنوره وكلتله

تروح تجيبلهه ماي عرفت السالفه بيهه ان طلعت نوره ساده وراهه الباب والتفتت على جنان وكتلهه بشك..

_جنان لا تكليلي انتي سويتي بروحج هيج..

دمعت عيونهه ونزلت راسهه بندم عرفت وياي حق ضربت الجربايه بعصبيه وكمت وانه افتر محاوله اهدي اعصابي ومحتاره شحجي وشكول عليهه سمعتهه تشهك والتفتت عليهه وكتلهه بعتب..

_ليش سويتي هيج جنان ليش هيج روحج ونفسج رخيصه عندج 

_لا تكولين رخيصه لا تسوين مثل اخوج وتعتبريني رخيصه

_وهذا تصرفج شنو اذا انتي بشر انجرحتي من مرتضى لمن حسبج رخيصه شلون باجر تكابلين ربج وتكليله الروح يلي انطيتنياهه رخيصه بالنسبه الي شراح

تكولين لربج لمن يسالج ليش سويتي هيج راح تكليله علمود مرتضى راح تكليله من تعب نفسيتي من الضغط السواه الي جنان شنو عذرج شنو العذر

اليغفرلج سوايتج هاي لج حراام السويتي حرااام اتقي ربج وعوفي هل حب والعذاب دخيل الله شيجي من وره الحب غير العذاب والتعب ووجع الكلب

_ندمت والله ندمت وتبت لربي ودعيت يسامحني ويغفرلي خطيئتي واترك كلشي مايرضى عليه  واالله

_بشنو راح يفيد ندمج لو ميته بيش تفيد توبتج جناان يعني ماراح تعيديهه ماراح تسوين بروحج شي لمن تمر عليج ايام صعبه 

_لا ماسويهه والله التوبه بعد ماسويهه خلاص ايقنت ان هاي مو ساعتي وشمهما سويت ماراح اموت ولا ارتاح وبالعكس راح اغضب ربي واتاذه وانوجع انه 

_استغفرك ربي واتوب اليك ربي ليش خلقت كلوبه بهل ضعف ليش ماخليت كلوبنه قاسيه بقساوه كلب الرجال 

_شموخ..

باوعتلهه بتعب وهيه تباوع بتوسل كعدت بتثاقل كبالهه وكالت وهيه دموعهه تجري على خدهه وغصتهه ببلعومهه..

_اريد ارتاح شموخ كلبي ياذيني وماعرفه شيريد ومنو يصدك 

_جان المفروض احجي وياج وافتهم رايج بس هيج انتي ماخليتي بيهه راي راح اضطر اوريج الحقيقه المره حتى يرجع عقلج لراسج وابعدج عن كل هل وجع والاذيه

_شنو قصدج

_شوفي راح احجي وخلي بالج وياي وفهمي واستوعبي الاريد اوصله الج زين و اريد اسمعج شي بس اوعديني بالاول انج ماتنقهرين على

شخص غير نفسج واوعديني راح تنسين كلشي وتبدين صفحه جديده بعد يلي راح تسمعينه لان هذا الشي راح يفتح عينج على هواي شغلات

_اي بس شصاير هبط كلبي

_شوفي بيوم الفسختي عقدج من محمد واجه مرتضى حجالي عن السويتي وقتهه ضجت وردت

اعرف مرتضى وين يريد يوصل بالضبط وياج فسألته شنو راح تسوون تالي بعدما انفسخ عقدج فهو كال......

صرت احجيلهه عن تفاصيل عركتي ويه مرتضى وهي بس صافنه وتفكر بكلامي لحدما وصلت

لعركتنه الجنه متفقين عليهه انه وبابا وهيه تبجي شغلتلهه التسجيل سمعته كله و لمن وصل لكلامه...

$ مرتضى : اكلي خر* ادبسزز وبعدين انتي شني عود صايره جبيره وفهيمه وكاعده تتفلسفين علي وتبسمرين بيه كدام ابوي خب خلي اكلج ياهه حتى تفوخ الدوده جنان ماراح اتزوجهه الا لمن اشبع

منهه وتطلع مونتهه من خشمي والا احبلهه ياله اخذهه واحطهه كبالج مثل الخدامه واريد تفتحين حلكج بكلمه كدام اهلي لو توزينهه علي الا اعدمج عافيتج واشوفج نجوم الضهر