رواية خيط وابرة الفصل الثاني والثلاثون 32 بقلم شمس العراقية

نور ـ ما توقعت أنخذل بعد والله ما كان ببالي بيوم إنك تخذلني. 

مو أنا اللي شايفة الدنيا حلوة بعيونك ليش هيج سويت بيه غافر 

.. آخر كلماته صوبني بسهم بنص گلبي وهما ما عرفوا على شنهو تدلل! بس أنا عرفت وحسيت بإحساس بشع، إحساس يكول راح يروح وإحساسي عمره ما خيبني. 

الوجه الشفته، والكلام السمعته منه، گلبي وجعني وحس بيها قبل عقلي.

ما حجيت. 

ولا علقت على ولا كلمة أكتفيت بالسگوت ودمعة وكسرة، وغصة تشل.

أمي تسألني، وأسئلتها مو يم السالفة أصلاً وأببالها نافع اله دخل وهي ما تدري وين وصلني كيد أختها

ويا نقطة وصلني بيها من عمري.

يمكن لأن هاي أول زعلة بيني وبينه أول مرة يقسى عليه وما كادرة أتقبلها وأفكر بأفكار تخوف، وعقلي يرفضها بس گلبي... گلبي حاسب حساباته كلها

سميعه ـ شجاها تسودنت مو جانت تحبج وتريدج أخاف صاير شيء وضامته عليه! يمه نور أحجيلي وخليني أتلاحك السالفه وأحلها وأردج لبيتچ أنه أحاجي وأفهمه بس أحجيلي لاتخلين بيتج ينهجم وأنتِ كاعده . 

ـ ماما شتحجين أنتِ وبيتي أذا أنهجم السبب أختج هي بعمرها ما حبتني وگالتلج بنتج ما أريدها لأبني 

ـ أشو كمتي تمسلتين وگته هالحجي عكب ما صرتي مرته وعندج منه بنيه وليش مـا تحبج لا والله تحبج وتريدج وتمدح منج بس صارلها شيء! خالتج موهيج

ـ شصارلها مثلاً سحر شگد قديمه ماما يا سحر يگدرلها وگلشي يصير تذبونه برأس السحر لا والله السحر بريء من سوالف أختج بس گولي كيد نسوان وعجايز أكولج أي أختج عدها كيد ما شفته عند بشر . 

ـ أحترمي خالتج لا أكسر حلگج 

ـ كسري حلگي هو شضل عليه 

ـ ولج ماما فهميني أخاف عرفت بعلاقتج ويه نافع گبل لاتأخذين غافر 

ـ يا علاقه ماما .. داگولج نافع ما عليه وگلشي يخصني وياه مات من زمان وورقه وحرگتها وكل حياتي هو غافر والله نفسي الأتنفسه هو بس أخ من أختج تريد حجج وأخر فتره گامت بس تريد تخلص مني بأي طريقه حتى لو شغلتي كامله على أتم وجه تكول لا ما مشتغله خو سالفة الدراسه والموبايل! لاتحجين بيها محاربتني . 

.. إنهاريت وگمت أبجي والله ماما أموت والله .. لمتني بحضنها وتسـگت بيه وتروح وترجع عليه ضليت يومين حتى الأكل كطعته وأمي تخبلت ومكابلتني وتبجي تالي شفت نفسي مو مال أضل على هالحال وأمي ما عدها غيري ومقرره باجر أدوام .. 

كاعده بالمطبخ لينا جاي تتريك تتنظر أبو الخط يوصلها وأني أنتظر أمي راحت على جيرانه يودي طالبات جامعه بلكي أكو مكان أروح وياهم 

لينا ـ باي .. أكولج عندج خرده 

نور ـ اي بالجنطة أخذيهن كلهن .. أخذت وراحت ولبنى كعدت ووحده من بناتها تبجي شبيها بنتج ما سگتت 

لبنى ـ مصخنه نار أنطيتها تحميله بس بعدها ما فاگتها خالتي وين علمود توديلها . 

نور ـ هسه تجي .. شويه ودخلت أمي ها بشري 

سميعه ـ ماكو رايح شافني نافع راجع من الفرن وگال أني أوصلها كومي وياي أوديج وأنتِ شلون صارت بنتج 

لبنى ـ بعدها خاله 

سميعه ـ خل أودي نور وأرجعلج يله گومي ماطول بنتج نايمه عالسريع 

نور ـ طلعت وياها وجان ينتظرنا وأمي صعدت ليگدام وأني ليورا .. صباح الخير نافع 

نافع ـ هلا عيني صباح النور .. هــا نتوكل 

سميعه ـ أي يمه أتوگل لان أريد ارجع گبل لاتكعد بنونه ورفيف هم سوده عليه مصخنه أريد اوديها 

نافع ـ أسم الله شبيها . 

سميعه ـ مدري يا يمه الليل كله تتنعوص وبطنها ما تطلع اوديها واشوف شيكول النا الطبيب 

ـ ماشي من أوصل نور وأني أوصلج 

ـ كثر الله خيرك يمه تعبناك ويانا

ـ واجبي هذا .. نور ليش تردين خط 

ـ يوديني ويجيبني 

ـ ها وسالفة زعلكم شوكت تفض 

ـ ما جاوبته 

ـ يحتاج أتدخل 

ـ لا تسلم 

ـ الله يسلمج 

ـ سگتنا ومشت بينا السياره وعبرنا من كدام باب بيته وسيارته طابگه يم الباب صفنت عليها والدمعه بعيني

ضليت أباوعلها لحدما طلعنا من الفرع .. 

ووصلنا الكليه ونزلت .. ماما بالرجعه شلون 

سميعه ـ يدبرها ربج 

نافع ـ أني أجي أخذج لما أشوفلج خط ثقه ولو هاي السالفه ما عاجبتني بس شسويلج أنتظركم تفضون زعلكم . 

نور ـ تمام مشكور .. راحوا ودخلت كعدت يم صديقاتي شوي ودخلت المحاضره حرام بدون تركيز هيج كفالة وجه دخلت ..

مشىٰ اليوم بطلعان الروح ومية الف مره دخلت حسابه ماكو شيء منه هيج غافر بهل السهولة .

وحيل ضجت من سالفة الرجعه ما اريد ارجع ويه نافع ويگولن شغلت نافع سايق عدها وبسمعني حجي حرام اذا نورس شافتني نازله من سيارته ما تسگت تنشرني عالحبل حتى لــو أمي وياي 

.. وأدري بيها تحبه وميته عليه بس تعاند بروحها وتكابر عيونها فاضحتها .. 

.. طلعت من الكليه وما لكيت أحد وصفنت على مكان سيارته وأتخيله واكف ومبتسملي كعادته.. وفز گلبي على هورن السياره نافع 

نافع ـ وين غرگت سفنتچ .. صعدي يابه

نور ـ ردت أصعد ليورا وما قبل 

نافع ـ تعاي صعدي ليگدام لا أمشي وأعوفج مو سايق عندج أني

نور ـ مو عن شيء والله لاتفهمني خطأ نافع بس ما أريد أسمع حجايه وتغثك وتغثني 

ـ منو اليحجي أشك حلگه بالقرأن .. شو صعدي 

ـ فتحلي الباب وصعدت وطلعنا البيت وكسر الصمت وگال 

ـ حجيت ويه غافر 

ـ فز گلبي من ذكر أسمه أي وشگالك 

ـ ما أخذت منه لا حك ولا باطل والوجه يبجي عليج بالعباس كسر خاطري عمي رجعي لبيتج وعوفي سالفه الزعل حتى لو هو الغلطان راضي ميخالف غافر يستاهل ماي العين مو صاحبي وأمدحه كدامج بس والله رجال كفو ويحب من كل گلبه .. 

صح ما أعرف سبب المشكله البينكم بس خليها أبالج أني لو مأخذج ممكن بيوم أغلط وأخذلج مني الا غافر ما يسويها رجال كفو وأني مرتاح لان صرتي نصيبه 

لان أعرف داخليته شُنو وأعرف بگلبه ومعاشره من الصغر

والدنيا ما تسوى نور مهما كان حجم المشكله حاولوا تلملمونها وتنهون الزعل مو كل يوم نحصل أنسان يفهمنا ونعيش وياه شعور الحب .. وأدري بيج كلش زين تحبينه لاتكابرين وتخسرينه . 

ـ هو ما حجه 

ـ لا والله گال مشكلة خاصه بينا وأني سحبت نفسي ما أريد أصير ملكوف وأنكرهه هو بدون شيء طاشه عليه سمعه بگلشي متدخل وكل عركه نافع الفارس المغوار . 

ـ ما مكذبين أنتَ صدك فارس ووكفاتك ويانا ما تنسي ترى زيناتك محفورات بعقلي . 

والزين ما ينسي نافع وكل وكفه وكفتها النا اني أو أخواتي جبيره عدنا وما عليك من اليحجون ..

أنت السند الوكفت النا من بعد وفاة بابا حتى من جان عايش أنت واكفلنا ومواقفك الأصيله تشهدلك . 

ـ رحمه الله والديج والله يرحم تراب أبوج الطيب 

ـ أمين .. ووصلنا منطقتنا وعبرنا من باب بيته عيوني نزرعت عالباب وبهل اللحظه ما متوقعتها إنفتح الباب وطلع غافر! رفع رأسه وجگارته بلحگه صارت عينه بعيني متت من الخوف من باوعلي عبالك مسويه جريمه گبل صديت وجهي مرعوبه ونافع دگله هورن وسلم عليه بقيت حانيه رگبتي وأحسها نخسفت لما وصلنا البيت نزلت بسرعه حتى ما تشكرته وباوعتله بعده واكف يم الباب عيونه مصوبات عليه 

گبل دخلت وكل جسمي يرجف من الخوف خرب لو راجعه مشي من الكليه لـ البيت ولا راجعه ويه نافع حتى لو صاحبه هو يغار .. 

دخلت البيت وأمي تلگتني شايله بنين أخذتها أبوس بيها يروح الماما ووصلني أشعار رساله فتحته من غافر 

فز گلبي ودخلت عالرساله 

غافر ـ حضرة جنابج تسنكفين تنزلين نفسج تعال وصلني بس جلبه 

نور ـ غافر شبيك مو أنت الطردتني من البيت بعد على شنو أنزل نفسي وأكولك وصلني شنو ما عندي كرامه

ـ كرامتج بس يم غافر تشتغل . 

ـ هسه شتريد المطلوب شُنو 

ـ حاجيني بإسلوب عدل لا أجي أكسر حلگچ 

ـ كسرت حلگي من طردتني أني وبنتك وأستنگفت أنت توصلني 

ـ نور سدي حلگج وأمي جانت مريضه ويني وينج 

ـ وصارت زينه 

ـ متشمته بيها مو 

ـ لا والله المرض ما بي شماته وترى هي خالتي قبل لاتصير أمك ماله داعي هذا كلامك 

ـ لا واضح 

ـ تعبانه وأريد أغير ملابسي عندك شيء تحجي 

ـ لا

ـ ردت أكتبله مشتاقتلك بس تراجعت ما يستاهل فواكاها جاي يحجي عليه صارلك عشرة أيام عايفني هسه تذكرتنا . 

غيرت ملابسي ولكيت ماما صابه الغده وكعدنا نتغدا اني وأخواتي ونورس وأخواتها بغرفتهن وأني أكل وگفتلي اللكمه من گالت 

سميعه ـ غافر اليوم أجه 

نور ـ أي وشحجىٰ

ـ ما دخل من الباب طلب يشوف بنين أخذها قبل لاترجعين بشويه جابها وداز وياها مصرف! . 

ـ ما حجيت ونفسي نسدت وگمت شنو معناها داز مصرف .. نومتها وأجيت أقرا ماكو واهس والبيت هوسه نورس بس متعاركه هي ولينا وسبأ وصوتهن شايل البيت عبالك بيت كاوليه ومنا بناتنا بس يبجن أني كعدت يم أمي ولبنى ولينا بغرفه ونورس وأخواتها بغرفه وعمي منامه بالأستقبال بس ملابسه أمي تنطيهن اله. 

لليل هنا يتعشن وأني مخليه بنين وكاعده أباوعلها اليوم جنتي يم بابا تقربت حضنتها وشميتها منين باسج .. خرب بيه وبگلبي اليحن بهل الأثناء وصلتني من عنده رساله گلشي بيه رجف رجفه الخلاها بگلبي 

غافر ـ تردين خط يوصلج الكليه مو .. سهله نور 

نور ـ أي أحتاجه چا بيش أروح لدوامي 

ـ ماشي هذا هو 

ـ هذا هو . عفته ورحت على أمي ماما أنتِ حجيتي ويه غافر 

ـ لا والله ماما بس سلمت عليه وأنطيته بنين

ـ منو گايله أريد خط معقوله نافع 

ـ أنه گلت لأم حيدر بلكي أكو مكان يأخذج ويه البنات 

ـ يعني باجر يجيني

ـ أي أكو مكان 

ـ وغافر شمدري 

ـ ليش حجه وياج 

ـ أي هسه راسلني

ـ شگالج .. لاتيبسسن خشمج ليني ماما ليني 

ـ ماما أني ما غلطانه بحقه وبحق أمه ترى هم الغلطانين وهما المفروض يجون عليه مو أني الين 

ـ ميخالف يا ماما وأنه ما گتلج أرضي بسرعه لو رجعي برجليج بس ليني بلكي الله يهداه ويرجعج 

ـ مليتي مني ماما 

ـ لا يروح أمج شأمل منج چا غير بنيتي بس ماكو أم تريد خراب بيت بنيتها وكل بيت تصير بي هالمشاكل وهو أمه ويحبها ولان تخربطت هيج حجه والله يخاف عليها ومتأكده بس تحاجينه بكلمه طيبه يلين غافر گلبه طيب .

ـ ما حجيت بس هزيت رأسي والكل يردوني أني أبادر وأرضي وأني ما غلطانه هم أمي وهم نافع .. 

وأجيت أنام شفته فاتح أنترنت تالي عفته ونمت وثاني يوم أمي طلعت وياي ووصل أبو الخط 

وصعدت وأمي توصي بي وطلعنا وهم جانت سيارته طابگه يم الباب وكل ظني يطلعلي مثل مره ووصلنا واني اتأمل بالفراغ .. 

وضل هذا الوضع شهر أروح وأجي بالخط وهو من أخر مره ما راسلني بعد ولا أني راسلت حتى ملابسي شغلاتي الأحتاجهن دبرت نفسي وانتظر تاليتها وياه 

بس بنته يجي عليها وميثم يطلعله يأخذها ساعتين ويرجعها ويدز وياها مصرف وأمي ضاجت منه ومن خالتي ومن تصرفهم عايفيني وشهر كامل ما وصلوا البيت بس من الباب على گد بنين وتغير موقفها ووگفت وياي ودوم معصبه . 

سميعه ـ أمشي أطلع جيب البنيه من عنده يستكنف حضرة جنابة يدخل البيت وزعلان على شنو زعلان گاتلتك لما أنت طارها من البيت بس العتب مو عليه العتب ؏ أختي جان گالت بنت أختي وأنهي الزعل وأروح أراضيها بس طلعت ما مصدگه على زعل جنتها وهجمان بيت أبنها وهمزين طلعت منهم مو من عدنا . 

ميثم ـ أهووو طلعيله أنتِ شوفي أحجي وياه 

سميعه ـ لا أشوفه ولا يشوفني خلف الله عليه هيج يجازيني أنطيته نور عيوني وابوها وصاه عليها وهاي أمانه هيج يدير باله على الأمانه بس حوبة يتيمه عساها بحظهم وبختهم .. كلنا عدنا أمهات الله يساعد گلبي سنين ما وصلت وشفت أمي وأبوي شدعوه عليه بس أنت عندك أم 

نور ـ خلص يمه گافي تقهرين بروحج لايصيرلج شيء 

سميعه ـ نار شابه بگلبي عليج يا يمه يا نور من خرب بحظج أذا عندج حظ.. حظج حظ أمج كظيت العمر مشلوعه الگلب زوجتج عبالي أرتاح وگلت هذا كظبة أيدي . 

نور ـ كعدت تبچي وحضنتها والدنيا مغرب عبرتي ترست صدري أبجي على حظي لو على حظ أمي .. سمعت صوتها تبچي باوعت دخل ميثم شايلها وهي تصرخ 

ميثم ـ تعاي أخذيها ملخت نفسها

نور ـ أخذتها منه وأخذت غراضها شگالك 

ميثم ـ ما گال شيء أنطانياه وراح بس صدك هذا الظرف گال أنطي لأختك يمكن فلوس 

نور ـ فتحته فلوس مسوي فضل داز فلوس شسوي بفلوسك .. دخلت البيت وهي تبجي هاي كلما تروح وترجع تتنحس تضل بس تصرخ ما اعرف أحسها ترتاح هناك بالگوه سگتتها ونامت وهي تبچي وگلت بعد ما أدزها شيسوي خل يسوي وبالليل نزل عمي وگبت العيطه هو بالأستقبال ما أعرف يا جلبه گالتله شگد حقيرات هسه شعليجن . 

محمود ـ أني مو مانع أحد يطلعله ليش محد يسمع كلامي وبنته من باجر تأخذينه وتشمرينها عليه ما أربيله خلفته أبن العوجه خوش لاكيله درب يأخذها يشوفها ويرجعها

سميعه ـ بنته ويجي يشوفها مالك حق تمنعه 

ـ مالي حق مو بس هو اله حق عايف بنتج زعلانه صارلها شهر جلب منهم ما وصل وخابرته مثل الأوادم وهذا يوم وهذاك يوم گلشي ما شفت منه فقير هو فقير ما يشتري الها بيت .

ـ مشكله بينهم ويجي يوم وتنحل وقابل بنيه ما تزعل وتجي أهلها خوما تضل طول العمر

ـ لا تزعل بس زعله تسوى أكو سبب مقنع ويجي يحاجيني يگابلني يذبحها على قبله مو منطيني ظهره وعايف بنته علينا ومثگل وجه سلام ما يسلم أبن الگلب وعلى شنو زعلان شو هو طاردها ليكون يريد أني أرجعها اله وأبوس رأسه 

ـ أستغفر الله هسه أبوه الله يرحمه على شنو تسب بي 

ـ والله حرامات أبنه گلب مثل غافر ومن باجر تولين على أختج وتحاجينها أذا ما يلگون حل أني وياهم بالمحاكم 

ـ أبو نورس سالفة المحاكم عوفها أني ما أريد أهجم بيت بنتي ولا أروح ولا أوصل وبنتي عندي وزعلانه بيت أبوها ما مستثكلتها أول تالي ترد بيتها 

ـ بيت أبوها وأني جلب وينبح مو بس الصوج مو صوجج لا والله صوج الگواد اليحاجيج عبالي أدمي وگلبج يوجعج على بنتج بس من يومج كل خير ما منج من ركضتي زوجتيها شون ما جان والله وصية المرحوم من أنعل أبوج لابو المرحوم وياج بنات الگلب أمشي لا من موت الكرفج . 

والله ثم والله بس يوصل بعد أشمر بنته عليه وأريد وحده منجن تفگ حلگها الا أطيح حظها . 

نور ـ نورس جانت واكفه تسمع الحجي طبگت الباب بوجهه وكعدت يم بنتي وشوي وسمعت صوتها عاطت 

نورس ـ ما تلمين بناتج كل شوي دخلات غرفتنا هنا وجيفتهن من كطعيه تكطعهن كون شنو شغلجن بس مسربتاتهن علينا . 

سبأ ـ ترى ما يصير نومي بناتج نريد أنام 

لينا ـ من كطعيه تكطعجن أن شاء الله طفله تحبي وبيت جدها أنتِن شگو ليكون البيت بيت الخلفوجن وأحنه ما ندري 

سميعه ـ شگو ثگبتن هم مشاكل شو كلمن لغرفتها ما ناقصتجن لينا فوتي الغرفة لبنى نومي بناتج نورس تجفي الشر وأخذي أختج أبوجن روحه بخشمه يحرك البيت على رأسي وراسچن 

نور ـ لبنى شالت رانيه أخذتها تغسل الها وهي ساكته ونورس دخلت الغرفه ولينا غمتها وأمي دخلت وأيدها على رأسها ليش حجيتي وياه

سميعه ـ هو أني حاجيته لو هو دز عليه نورس سليمه گايلتله ومتخبل وكاعد حاطه أيدي على گلبي لايطلگج منه وسالفتج أذا تضل هيج تروحين بالرجلين بيت جدج گاوليه لازم واحد جبير يتدخل ويحلها .

ـ منو يحلها عوفي يمعوده كلمن حاير بهمه وهسه يگول ملوا منها بس يردون يرجعونها اليه عوفي خل نشوف تاليته خوما يضل هيج 

ـ وعمج 

ـ هو شعليه بهوبز ومحترك دمه 

ـ شنو شعليه مو عمج 

ـ شبيج يمه شدعوه هلگد خايفه من عمي ترى ما كاعده عند الخلفوه وهذا بيت أبوي محد اله حق يطلعني منه وأذا على بنتي مصرفها أبوها جاي يدزلها على شنو مستثكل عيشتها

بس گولي هو مال من الوضعيه كومه نسوان

وبنته ما شاء الله بس تعيط صوت وحده رقاصه أمها وأبوها المشاكل وأنوب مشكله عالخط الخانسه سبأ خاتون صايرات تحالف على لينا وأني ساكته وما متدخله لان البيه كافي عليه . 

ـ ما خايفه منه خايفه من صوته عمج فضاحه وأهلج يوكفون وياه ومالنا بس خوالج وهم ما ناقصين هسه وأذا أحجي جديتج تكول مو هذا الفضلتي على نافع وكسرتي گلبه علموده وأسگت أحسن . 

ـ ما حجيت تالي گمت فرشت بالكاع أني وبنتي وأسمع صوت بنات لبنى يبجن عفت بنتي وگمت عليها .. شگو شبيهن بناتج شو ما الهن سگته 

لبنى ـ مـا يردن ينامن يردن يطلعن برا متشوفين لازمه الباب وتدك بي 

ـ خل يطلعن شگو حابستهن خطيه 

ـ وين أطلعهن نور مو شوفت عينج نورس أشسوت وعمي نايم بالأستقبال هو يسمع صوت يعيط 

ـ وتالي خطيه شغلي الكلوب 

ـ لينا خطيه نايمه وراها دوام عوفيهن هسه يتعبن وينامن وأني صوجي أعوفهن نايمات الصبح ما مسويتلهن نظام 

ـ يا نظام غير طفل يحب ينام شگو متقيده عوفيهن 

ـ أكوم أجيبها هاي أخف من الريشه هسه الكاها بالأستقبال يم عمي التهيت بالسوالف وغفلت عنها . 

ـ طلعت وراها ولحگتها لگيناها متوليه رأس عمي وتضرب بي وهو يعيط ويغلط لبنى گبل شالتها 

محمود ـ بنات الگلب من أنعل أبوجن لابو الخلفوجن وتالي ما أنام ما يصير يا عمي نومي بناتج متشوفيه الساعه شگد 

نور ـ لبنى ما حجت دخلت الغرفه تحجي وتبچي 

لبنى ـ بدال ما يدزله رحمه دزله نعله هو ما يستاهل الا خير ليش تغلط وتنعل بي هو جوه التراب حتى ميت ما يخلص من لسانكم 

نور ـ أي والله ما يستاهل بس شتسوين لعقلياتهم المريضه .. أنطيناها وتعاي نكعد بالحديقه لما ينعسن 

گامت وياي وطلعنا بالحديقه وأني وياها كعدنا بالمرجوحه وهنا يحبن عالسراميك عدهن مسابقه بالحبي ولبنى وراهن وراهن أنقهرت عليها وعليهن وكعدن ويصفكن لـ لبنى وهي گابلتهن وتضحك عليهن 

لبنى ـ شوف الحظ أني محترك گلبي من كلام عمي على أبوهن وهنا يصفگلي 

نور ـ فدوه عوفيهن يصفگن موزين يسولج جو خوما مثل بنتي الوجه يبجي بس تظلم الدنيا تلزم مخدتها وتنام روحه بالنوم . 

ـ أني هم يحبن النوم طالعات على أبوهن بس يتأخرن وجيبي يشلعهن الصبح من الفراش . 

ـ أجتي كعدت يمي أحس بي أحجي وياها تبجي لبنى هم تشتاقين اله 

ـ كل ثانيه أشتاقله كل خيط نفس يمر بيه أشتاق لريحته لصوته بالحياة أتمنى يرجعلي ويضل على رأسي ورأس بناته نور الموت أبشع شيء بالحياة وگلشي ما أريد بس لو ضال يمي والله موت أمي وأبويه ما كسرني بگد كسرته .. مرات أصفن وأكول لو باقي عايش والله مستعده أتحمل گلشي حتى بروده وعدم أهتمامه ومشاكل البيني وبين عمتي ونورس وگلشي عشته أتحمل كل المر بس هو يضل نفسه بالحياة بس ما يصير .. هو مات وعافني وعافلي حمل ثگيل .

باقر أول أحساس وشعور أحتضن روحي بي وهل الأحساس والشعور يضلن عايشات على أسمه .. 

ـ الله يرحمه ويجعل مسكنه الجنه 

ـ أمين .. أكولج أطلب منج طلب الله عليج أريده منج 

ـ گولي شنو هو وأن شاءلله ما أقصر وياج

ـ تقنعين خالتي تأخذني لگبره والله طاگ گلبي من جانن صغار محد قبل يأخذني هسه گبرن نور والله نار بگلبي محد يحس بيها أحس ضايعه والدنيا كلها ما تلمني بس حضنه مشتاقتله هيج مفرفحه روحي عليه عطره بخشمي ما تحسين بالنار التأكل بظلوعي بس الأريدها منج أشوف گبره أريد أحضن گبره وأضل أبجي وأشگيله لان محد خلاني أبجي براحتي . 

ـ أنهارت وتحجي وتبجي وكل جسمها يرجف والدموع مثل الشلال گبل حضنتها وبچيت وياها وهي عبالك رادت كتف تبجي عليه حضنتني بكل قوتها وكاتمه صوتها واني أنهاريت وياها .. أبجي أرتاحي لاتبقين عبره بصدرج . 

.. گامت على بناتها وهي تمسج دموعها 

ـ يله گومي نعسن . 

ـ روحي حابه أبقى لوحدي 

ـ براحتج عيني أذا تردين أبقى وياج 

ـ لا روحي نومي بناتج ونامي أني شوية نوب الحكج 

ـ تصبحين على خير 

ـ وأنتِ بالف خير .. راحت وبقيت صافنه بالفراغ وصفنت على باب الحوش مالتنا وصاروا كدامي بس صغار مو گبار غافر نور نافع .. 

.. وأخذتني ذاكرتي لهذيج الأيام وياريت لو تعود ونرجع أطفال ونلعب سوا أني وياه ونافع نتراكض ونلعب بالمرجوحه ونضحك ونتعارك ونروح نشتري وأثنينهم حاضنين أيدي وأني بنصهم وأضحك الهم ما أعرف عن الدنيا غير ألعب وياهم وكل همي ما أتمنى يخلص اليوم وأنتظر الصبح يجي علمود أركض شبع لعب وركض بالشارع

يوصلوني المدرسه ويكتبون اليه الواجب وغافر يكتب بخط مكسر نفس خطي علمود ما يتعبني لان جنت كسلانه ومهمله هما علموني على دلالهم اليه ونافع يخليني بحضنه يمشطلي شعري ويشيلني على كتفه ورافع أيديه بالسما ويرفرفني وأني أضحك أسرع نافع أسرع . 

غافر ـ لاتوكعها نافع على كيفك لاتركض نافع 

نور ـ ما وكعت بطفولتي بس هسه أنت وكعتني 

گمت دخلت البيت ولگيت موبايلي يتصل باوعت على الشاشه غافر! أستغربت أتصاله بهل الوقت رفضته لان الكل نايمين لكيته دازلي رسائل 

غافر ـ كاعده .. وينج .. نمتي .. نور 

نور ـ جاوبته ها شتريد 

ـ اسأل على مرتي وأم بنتي 

ـ ما جاوبته 

ـ وين جنتي 

ـ كاعده بالحديقه 

ـ شتسوين 

ـ أتقبل صدمتك بيه 

ـ ها زين وتقبلتيها لـو بعدج 

ـ تستهزء أنت 

ـ لا بس سألت اليتقبل معناها يريد ينسى 

ـ أنت ششتشوف 

ـ تگدرين تنسيني؟ لهل الدرجه أني سهل وأنسي 

ـ مثل مـا سويت أنت 

ـ تعالي 

ـ وين أجي 

ـ للبيت

ـ يا بيت 

ـ للبيتج 

ـ يا بيت منهم ما فهمت أشتريت بيت قصدك

ـ لا منو گالج أشتري بيت وشسوي بالبيت مو عندي 

ـ مو أكول ما تسويها عالعموم هذا مو بيتي بيت أمك 

ـ بيت أمي بيتي ماكو فرق بس القاهرج بيت أمي 

ـ لا والله ما مقهوره منها بالنهاية هي خالتي ومره جبيره عاذرتها بس القهره أجتي منك أكثر شيء 

ـ تعالي ونتفاهم عليها 

ـ على شنو نتفاهم وليش أني أجي 

ـ تعالي لبيتج .. شنو ليش تجين لو عاجبج الوضع 

ـ تريدني أجي محبةً بيه لو علمود بنتك 

ـ الأثنين بس الأكثر بنتي وتعالي وبلا هالأسئله تجين يمي ونكعد ونتفاهم خوش 

ـ مو عبالك بعد وگت صارلك شهر هسه متذكر عندك مره تسأل عنها 

ـ هسه شتردين نور 

ـ أنت شتريد غافر

ـ أريدج ترجعين . 

ـ لـو تريدني صدك تجي ترجعني بنفسك مو تطلب مني أني أرجع برجليه بعدما أنت طردتني وهسه تذكرتني وهم لازم أني الأرجع

ـ يعني ما ترجعين 

ـ شلون أرجع ومنو يرجعني غير المفروض رجلي يجي يأخذني مو هاي الأصول النعرفها

ـ خل أخوج ميثم يجيبج 

ـ وأنت شبيك ليش ما تجي 

ـ عندي شغل وباجر عندي دوام أرجع بالليل ألكاج بالبيت ولاتناقشيني بعد يله تصبحين على خير نعسان وراي كعده من الصبح . 

ـ شوف بسرعه تتهرب أقل كلمه لاتناقشيني شافها وما جاوب .. أذا هسه ما عندك وقت وأستعداد نحجي ونتفاهم شوگت 

ـ من تجين يمي وعالموبايل ما ينحل شيء بالعكس تكبر المشكلة ما تصغر . 

ـ ما أجي 

ـ الصبح نحجي 

ـ ما يحتاج .. شافها وما رد وشوي وفصل الأنترنت أني هم قفلت موبايلي وباجر ما ما أروح الدوام وأذا يريدني يجي يأخذني فوك ماهو غلطان تعالي رجعي والله خوش

ما يتگلف على نفسه .. 

الصبح الكل كاعد بس أني نايمه باوعت الساعه ١١ سحبت موبايلي جو الغطا وفتحته لكيته منه أربع مكالمات ورساله 

غافر ـ ها رحتي لـو بعدج 

نور ـ جاوبته .. مـا أروح جنت نايمه 

ـ روحي البيت نور وبدون عناد تعبان ورأسي يريد ينفجر وروحي طالعه وأريد أرجع بالليل الكاج أنتِ وبنين بالبيت 

وطبخي طبخه زينه تسوگت الج مسواك كامل وأخذتلج كل شغلاتج عفتهن بالغرفه حتى البيت دزيت على وحده نظفته وغسلته كله ما يحتاج تنظفي بس رجعي 

ـ سويت كل هذا وما تكدر تسوي الأهم وتجي بنفسك ترجعني . 

ـ واكفه عندج 

ـ أي وثگيله هم ومستحيل أرجع گتلك تريدنا تعال أخذنا

ـ گتلج عندي شغل وأني بالدوام 

ـ هاي أعذار ويخلص دوامك وتعال شُــنو يعني 

ـ ماشي براحتج 

ـ الله وياك . 

ـ أخر كلام يعني مـا ترجعين 

ـ أي 

ـ ماشي . 

ـ عفت الموبايل بس نار تأكل بگلبي ما أعرف ليش هيج يسوي .. وردت أكول لأمي بس تراجعت لان أعرفها بس أكول الها تگولي أمشي أوديج وياريت لو گايلتلها .. 

لليل عيوني تراقب الساعه كل ظني يجي حتى رتبت نفسي الفطيره بس ما أجه وغافلتهن وطلعت باوعت بالفرع من بعيد باوعت شفت سيارته طابگه يم الباب يعني موجود بالبيت وگفت أباوع والباب أنفتح ركض دخلت البيت ولازمه گلبي .. فتحت الباب باوعت دخل سيارته البيت! كبر لفج ينور.. رجعت ولينا تلگتني 

لينا ـ وين جنتي عبالي أنهزمتي على غافر 

نور ـ وين أنهزم يمعوده وأختج تضل فطيره وما تلحك الأوادم . 

لينا ـ ليش شگو شبيج 

نور ـ كل الخير .. دخلت البيت مقهوره وعيوني على الموبايل ماكو شيء منه وضليت على هالحال ثلاثة أيام! وبيوم الرابع أجيت أنام وصلتني منه رساله 

غافر ـ باجر تعالي اخذي غراضچ وشغلاتچ وگلشي يخصچ. 

نور ـ تمام دزيتها واني ابچي. نمت ودمعتي على خدي والصبح كعدت متأخرة وعيوني مورمه گوه اشوف بيهن

باوعت لفراشي فارغ گمت مفزوعه ماما بنين وين

سميعة ـ ابوها اجه اخذها الصبح شبيچ شنو جاي تبچين

نور ـ ما بيه شي.. گمت للحمام غسلت وجهي وكفت عالمراية الوجه اللي اشوفه مو وجهي ذبلان تعبان وعيوني طافيه .. 

لبست شالي وعبايتي فوك ملابسي وشلت جنطتي.

ميثم گوم تروح وياي

سميعه ـ وين يروح وياج.. ليش انتِ وين رايحة

ـ اجيب غراضي من البيت وارجع.

ـ يا غراض! شتحچين 

ـ هو دز عليه گالي تعالي اخذي غراضچ

ـ هذا شبيه تسودن على عمره 

ـ الله ما هادي عليه شسويله يعني

ـ وانتِ تطاوعينه على خراب بيتچ وهو تسودن انتِ هم تتسودين مثله تردين تجلطوني ولج يمة شصارلكم عين وصابتكم

ـ يمكن الله ما گاتب إلنا نستمر شسوي شطالع بإيديه وما سويته وهو هيج يريد والظاهر ما يريدني من الاساس لو يريدني صدك جان اجه بنفسه ورجعني 

مو يگولي تعالي اخذي غراضچ

ـ واذا جلب بيج

ـ ما اظن بس اروح واشوف.

ـ خلي البس عبايتي واجي وياج واحاچي وافهم منه شبي بكيفكم تتصرفون لعب جهال هي 

ـ ما يحتاج ماما فدوة رحتلچ خليني اروح وحدي.

يله ميثم. 

عفتها وهي تحچي وراي وميثم لحگني يركض

وصلنا البيت وايدي ترجف ردت ادگ الجرس بس اصابعي ما طاوعتني

ميثم ـ جري السيم ودخلي يله آني انتظرچ هنا

نور ـ ما تدخل وياي

ـ لا... انتظرچ

ـ جريت السيم ودخلت غمضت عيوني ورجليه ما تشيلني باوعت الكراج على سيارته وأوراق الشجر اليابس تارس المكان كأنه بيت مهجور من سنين

باب المطبخ مفتوح ونظيف ومرتب بس صوته جاي من الصالة وفز گلبي ودگاته زادت ونفسي ضاگ عليه

ببالـي لو يگول نور گبل اركضله واحضنه ألاشتياق أقوى من گلشي بس اكبر منه كرامتي قاومت ما ردت أبين أني رخصيه كدامه هو الما يريدني وطلعت مو عزيزة عنده

وكفت يم الثلاجة كاتمة عبرتي بإيدي وأسمع صوته 

غافر ـ تعالي لا تروحين بعيد بنيني باباتي

هاج السويج والموبايل مو گتلچ لا تروحين تعاي بابا

نور ـ أسمع صوت ضحكتها وهو يبوسها من رگبتها ويلاعبها ابتسمت من ورا دموعي ومسحت وجهي اخذت نفس عميق ودخلت باوعتله كاعد عالدرج ومخلي بنين بحضنه من رفع راسه وباوعلي ارتبكت وضغطت على سير الجنطة ونزلت عيني 

اجيت اخذ غراضي... گبل نزلت دمعتي ما گدرت اسيطر على نفسي بجيت 

باوعلي نظرة سريعة من رجلي لحد راسي ورجع نزل راسه وحضن بنين اقوى كأنه متخذها درع بيني وبينه وحجه بهدوء 

غافر ـ براحتج... البيت بيتچ اخذي التردينه . 

نور ـ هالكلمة ذبحتني اكثر من ما طردتني هزيت رأسي ودخلت الغرفة نفسها ما متغير بيها شي والتغيير الوحيد أني وياه كلمن بمكان

جمعت ملابسي وشغلاتي وشغلات بنين كلها واني ابچي وطول ما أجمع بيهن عيني عالباب هسه يجي هسه يمنعني بس ما اجه حتى خياله ما بين عليَّ

كملت وطلعتهن يم الباب وهو بعدة حاضنها ويبوس بيها وكأنما أني غريبة لا باوعلي نظره ولا حجه كلمه وبردلي نار گلبي . 

گام... تقرب عليه وريحة عطره ضربتني ودوختني للحظة ضعفت المسافة البينا صارت شبر بس نزلت راسي وافرك بإيدي متوتره أباوع على أيده شال الجنط وانطاني ظهره ومشى.

هنا أنهاريت بچيت بچي ما صاير وشهكت بصوت مكسور حتى حياطين البيت لو عدها أذان تسمعني

وخذلان الدنيا كله تگوم ونزل على رأسج ينور 

بقيت جامده بمكاني ونار تأكل بگلبي باوعت للبيت نظرة اخيرة وباوعت لغرفتي ودخل شال بنته صفنت على طوله حجه بدون يباوع وهو يشيل بنين 

غافر ـ امشي أوصلچ

نور ـ مشى گدامي ولحگته وصعدت ليگدام خلى بنين بحضني وقفل ابواب البيت يمكن خالتي مو بالبيت

وصلني للبيت نزل الجنط بالحوش وأخر شيء أني نزلت

تقرب باس بنين كأنه يودعها وصارت عيونه بعيوني المليانات دموع صفن بيهن اقل من ثانية ومشى سريع شغل السيارة وطلع بس ما رجع للبيت

راح... وعافني أني وبنته بدون ولا كلمة راح وعاف نار بگلبي ما تنطفي .

دخلت البيت مقهوره وعيوني ما أشوف بيهن دربي وشهگتي بصدري بالگوه أخذ نفس أشهك أشهك وطلعت أمي صحت بيها يمــا يمــا .. ركضت وحضنتها وبجيت يمه يمه راح غافر عافني وراح راح . 

سميعه ـ ولج حاجيني شصار وين راح سليمه 

نور ـ يمه لاتحجين عليه لاتحجين يما روحي راح تطلع أشهك أشهك وأني حاضنتها وأبجي يمه شيء واكف بعلومي ما أكدر ما أكدر يمه أني ما أتحمل الفراك جاري على كلبي يمه أنشلع گلبي يماااااا .. 

أخذتني لغرفتها ما تريد أحد يشوفني ويتشمت بيه هو عافني للشماته هو سواها بيه وعافني وعاف بنته .. 

بقيت يومين بس صافنه بالفراغ وأمي تحاجيني بس أهز رأسي وأباوع لبنتي وأرجع أباوع المحادثة ماكو شيء منه حتى على بنته ما دز! وأمي بيومها راحت وگالت بابهم مقفول وبعد ما وصلت ومنعت أحجي وياه ما تدري هو الما يحجي وياي . 

سميعه ـ ما الأسف عليه هذا الجنت أكول عليه كفو بعد لو يبوس قنادر ما أرجعج اله شهكتج ودماعتج وين يروح من حوبتج هو وأختي وين يرحون وعلى شنو هو شگو شنو هالذنب العافج علموده وما يسأل عنج هيج أمك عزيزه عليك چا مرتك ما بيناتكم عشرة وهالطفله شنو ذنبها يا حسافة عالزلم المثلك يا غافر خيبت ظني يخاله

نور ـ تحجي وأني عيني على الباب أنتظر ميثم يجيني سالفتهم تحير بابهم ليش مقفول معقوله خالتي صحتها تعبت وأخذها لغير محافظه يعالجها بس محد گال حتى أمي خابرت خوالي گالوا ما عدنا علم بيها من أخر مره بعد ما واصيلن هما هم ملتهين محد فارع 

.. ضل بس نافع أنتظر ميثم وأخابره واسأله أكيد يعرف بصاحبه وين أختفى .. حتى أنترنت ما فاتح من زمان 

والواتساب كذلك من يوم الجابني بعد ما فاتحه!

أجه ميثم ها ميثم 

ميثم ـ ما أدري شگولج بس بابهم هم مقفول ماكو أحد بالبيت نور! 

نور ـ يما ويــن راحــوا ويــن أختفوا هو وخالتي 

سميعه ـ شمدريني يا يمه حتى خالج مشعان سألته ما يدري العصر أروج على عمته واسألها بلكي تعرف أبن اخوها وين ..وين يروح قابل يجوز خالتج مريضه ذكروله دكتور وأخذها هو گلشي ولا أمه . 

نور ـ مـا مرتاحه غيابه وراه سالفه! جريت الموبايل وراسلت نافع... نافع وينك أريد أحجي وياك .. 

ما متصل أتصلت عليه أنطاني رفض أكيد عنده شغل .. كتبت اله نافع من يصيرلك مجال راسلني ضروري أنتظرك . 

بقيت كاعده وعمي يسأل عمي وهي تجاوبه وسگت ما حجه لان محد يعرف عنه شيء .. عمي لبس والتحق الدوام وگال لأمي 

محمود ـ من أنزل أطلگها منه وأنعل الساعه السوده الشفتهم بيها . 

گمت جبت بنتي وسديت الباب وكعدت بالغرفه ووصلتني منه رساله 

نافع ـ نور مراسلتني . 

نور ـ أي راسلتك وينك 

نافع ـ جنت نايم والله هسه كعدت جاي أتغدى خير صاير شيء

ـ راسلتك علمود غافر .. نافع أنت الشخص الوحيد القريب منه ويحجيلك گلشي أحلفلك بالله تگولي غافر وين ليش باب بيتهم مقفول كلما أدز ميثم يگولي القفل بعده الباب مضروب سنجيل وينه وخالتي وينها وين راحوا راح أتخبل نافع غيابه وراه سالفه 

ـ ليش ما گالچ 

ـ شُنو يگولي! نافع تعرف شيء عنه أمانه أحجيلي غافر وين وين راحوا هو وخالتي 

ـ راح أجي البيت وأحجيلج بس صدگي ما أعرف شيء عنه وأريد منج تحجيلي المشكله البينكم علمود أوكع على علتج وعلة صاحبي 

نور ـ تمام أنتظرك .. ضليت أنتظره وبعد الظهر كلهن نايمات بس أني وأمي كاعدات ونار بگلبي واروح واجي وعيني عالباب لما سمعت طبة الباب وطلعتله أمي وشافني جنت واكفه بالمطبخ 

نافع ـ خالي خوما موجود 

سميعه ـ لا التحق 

نافع ـ تعاي بالأستقبال .

نور ـ لحكته وگف يكلب بموبايله ها نافع ووجه الشاشه بوجه

نافع ـ هذا الأعرفه عنه 

نور ـ قريت محادثته ويه غافر گاتبله رساله 

غافر ـ نافع أني سافرت! 

نور ـ سافر! وليش سافر وويامن وشعنده مسافر وأني شُــنو وبنين بنته وبنين شون ما فكر ببنته وليش ما گالي يسافر ليش عافنا ..

ماما غافر سافر وعافني جنت حاسه بي راح يروح وما يرجع والله حاسه من وصلني الباب ودع بنته راح ماما غافر راح 

گمت أكمز وأنفض برأسي وأبجي وأحير شسوي وأقرا الرساله وأرفض فكرة سفره لاااا غافر ما يعوفني ما يعوفني ما يعوف بنته مـــامــا صرخت بوجع وعبره وصرختي أنكتمت لحظه سحبني من أمي لحظنه وضمني حيـــل لصدره يحاول يهديني وأني أضرب على صدره عافني غافر ..

نافع صاحبك كسر گلبي ليش هيج سوا بيه مو أني حبيته ولله حبيته كسرتلي گلبي ومشيت ليش وشعندك تسافر شنو شغلك بالسفر . 

وگعت من حضنه وأمي لمتني وأبجي بحضنها ونافع كعد بالگوه لازم أعصابه وحجه بقهر 

نافع ـ والله أدفعك الثمن غالي يا غافر والله .. أذا ما شربت من دمك . 

نور ـ مسحت دموعي وأمي أنطته موبايله ما عرفت منه ويامن مسافر وخالتي وين عافها ويا دوله سافر 

نافع ـ ما گال بس عمتي صبيحه وياه ما سافر لوحده! 

بس يرجع وين يروح لازم يجي يوم ونتلكاه ونتواجه ويصير خير وأي عذر ما مقبول من عنده . 

نور ـ دام خالتي سافرت وياه يعني راحوا وبعد ما يرجعون يجوز طلبت منه يطلگني وهو گال الها أذا أعوف نور ما أبقى هنا وأگيد هي وافقت وكالتله أمشي وياك

هاي هيه ما تحب غلط الطلب جان من خالتي وهو وافق ومشى وياها .

نافع ـ وعلى شنو تعاركتوا وليش عمتي هيج تگرهج 

نور ـ ما عندي حظ .. خل أمي تحجيلك أني أروح على بنين من رخصتك 

نافع ـ أخذي راحتج 

نور ـ دخلت الغرفة أمي ونورس طلعت وگالت 

نورس ـ نافع يمنا من شوگت أجه 

نور ـ مـا جاوبتها طبگت الباب ولزمت الموبايل أتصلت عليه عذرا الرقم المطلوب غير متوفر يعني صدك راسلت واتساب أني غبيه ما راسلته من راح .. كتبت عالسريع غافر وينك .. ما موجود قافل الواتساب ما يحصل أتصال راسلته على كل البرامج ما يحصل وكعت بالكاع يعني شُــنو هاي هيه رحت وبعد مــا ترجع هيج غافر سويتها بيه وكسرتني وعلمود شنو أشسويتلك شنو ذنبي السويته الك وهيج تعذبني وتمشي حتى بدون ما دگول راح أســــافر .. 

ثاني يوم صادف عندي دوام ورحت رغم كسرتي دست على جروحي بنتي محتاجتني أذا أبوها عوفها أني لازم ما أستسلم .. أداوم وأرجع على الهوسه والمشاكل البيت صاير ما ينسكن وعمي صاير فركاس ما ينداس من سمع غافر مسافر هو وخالتي أعصابه فايره وبس يحجي ومنـا مشاكله هو ونورس حيل وكحه وما تحترمه

ومخليه عقلها ويه لبنى معاديتها ولبنى ساكته ومتحمله مكسوره عينها ما ورا بناتها وأني ساكته بس يجي يوم وأنفجر بيهن هم الراح كسر عيني ومشىٰ ..

صار أشهر ماكو أي خبر عنه ولا متواصل ويه أي أحد حتى نافع القريب من عنده ماكو تواصل وياه هنت عليك بهل السهوله غافر ..

واليوم أخر يوم أمتحاناتي وكملت الحمدلله رغم الصعوبات الواجهتها بس كظت بس يبقى شعور بداخلي ناقص مفتقدته وعيوني تدور عليه بالفراغ بالأخص هو سافر بدون ما يگول وأحس جان يريد يرجعني بس علمود يثبت لنفسه هو حاول لان يدري أني ما ارجع بعد ما نطردت بس محاولاتك جانت بارده غافر ولازم يجي يوم ونتواجه ... 

ولينا هم جانت أمتحانات خطيه ونفسيتها زفت وياهو يحجي وياها تعاركه ماكو هدوء تقرأ وبالأستقبال محجوز بس من عمي يلتحق تكعد تقرأ ومرات نورس تخبث عليها لو تأخذ ملازمها وتخليها شايطه لستار ويتعاركن وأمي تفازع بينهم ما يفيد عقلها صغير وتكرهن أكثر مني .. 

نورس ـ عاد راح تشرمنها بدارستجن مو شفناجن قبل. شفناجن هسه همزين التاريخ يضل محفور ما ينسي! 

نور ـ أنتِ ليش تردين تنهانين وتنسحلين يعني ما يفوتلج يوم أذا ما تسويلج مشكله وهسه عاجبج تنگتلين 

نورس ـ أنتِ محد واصل كرباج أكعدي وأستقري على بنتج حيري بروحج داده 

لينا ـ أذا نور ما تقصدينها چا تقصدين منو 

نورس ـ تحجين بالچا والله تطورتي لو هاي بيها النا والله شگيت من لكفاتج الزايده من يحون خوالي على البنيات شگيت . 

لينا ـ عفواً شگيتي بشنو 

سبأ ـ شبيج أنتِ منو يمج بگلشي تأخذين على نفسج عفيه شنو هاي ما عدجن ثقه بنفسجن شكد بلا شخصيه 

لينا ـ منو اليحجي أنهجم بيت الشخصيه وطلعلج لسان بالخانسه 

نورس ـ لينا عوفي سبأ لا أكسر حلگج 

لينا ـ من أشوفج عايفه أخواتي أعوف أختج بس راح أربيج أنتِ وسبأ لزمتها من شعرها ونور عافتني خرب بيومج نور لحگيلي 

وما أحس الا جابت الصونده عفيه بحزامي الناصل . 

نور ـ تحجين بالتأريخ مو أني أعلمج يا بربوك وأنتِ تأريخچ نظيف أمهات السحوره ليش ما تخلينا ساكتين مو سحورتجن عبرت القارات . وين اليوجعهن خليتها تنكز ولزمت لينا عضتها بكل حيلها وأجيت اضرب سبأ نامت عليه هنا ضخمات عكسي أني ولينا فروخ دجاج ونورس أخذت الصونده مني وضربتني بكل حيلها بحيث لحم جلدي حسيته أنتفخ الا لينا دفعتها على ظهرها ونورس عاطت . 

نورس ـ ظهري يابه ظهرييييي.. 

لينا ـ نكسر ظهرها أمشي عساها بالموت أن شاء الله

سبأ ـ كسرتن ظهرها حقيرات ولج نبأ لحكينا 

نبأ ـ شسويلجن تستاهلن بس مشاكل فوك ما كاعدات بيتهن كل وحده لسانها شطوله الله يأخذجن وأنتِ الجبيره عود مو أكبر منهن بخمس سنوات أمداج أي والله . 

نور ـ دخلنا الغرفه ورفعت تيشرت خرب صاير أحمر هاي أيدها شگد ثكيله ورمت جلدي بس خل تجي أمي ولو أمي هم فاهيه أمر من عدنا هسه شتحجي بالله هاي سالفه واحد بيته وينكتل أمده حظي . 

لينا ـ أبوها منو الله يأخذهم والله لما خالتي مانعتني أطردهن جان طردتهن بالنعل الأدبسززيات أمشي خل أشوفهن وين صارن مو عبالك تأخرن لبنى وخالتي. 

نور ـ لا تلقيحات وأزدحامات اليوم أني اروح على بنتي لا يموتنها هذن ما بيهن أمان . 

طلعت همزين لگيت نبأ مخليتها يمها ومنطيتها بسگت هاي الوحيده أمن بيها عفيه نبأ حاجي أخواتج ترة مو وضعيه ترى صارلها شگد تحجي أني ساكته لان والله ما ناقصه والله حجت وگلبي طگ منها ومن سوالفها تريد تسويلها سالفه وتروح بيت جدي خل تروح وتخلصنا 

نبأ ـ والله طلع على لساني شعر ما يفيد خيتي ومنو يلفيها بيت جدي كومه ولد شباب عبالج مثل قبل صغار كلها زلم بس نورس ما تحمد ربها . 

نور ـ سگتت مقهوره منهن وباوعت عالباب دخل نافع شايل رانيه تعيط شالت البيت بصوتها وراه لبنى شايله رفيف وأمي تسحل بالجنط . 

نافع ـ فد عرمه شالت المستشفى شيل هاج أستلمي 

نور ـ أخذتها منه وگامت تبجي وراه صار فتره يأخذونهن يمهم خالي مشعان يدز عليهن ويرحن عليهم وين تردين عنده شغل 

نافع ـ والله لو تمرعدين نفسج ما أخذج . 

سميعه ـ لا وين تأخذها لقاح بعده هسه تصخن خل تبجي توكل يمه ما قصرت . 

لبنى ـ ها ماما ها أوكفي خرب أني شوكت أخلص من سالفة التلقليحات شلعان گلب شيسگتهن اليوم . 

نور ـ دخلتهن الغرفه وگبت العيطه وبنتي هم عالواهس 

وياهن أنتِ شجاج وأمي لازمه وحده ونومتها ولبنى تعبانه حتى الوجه أصفر . 

سميعه ـ أخذنها منها جان ماتت علينا همزين أخذت نافع وياي وتلاحك عليها بمغذي ضغطها صفر شلعان الگلب من يجي جفته وحده . عوفي الرضاعه خل نجيب الهن حليب متشوفين شصاير بحالج أثنين يرضعن بيج 

لبنى ـ لا عمه شلون تردين أعوف الرضاعه الطبيعيه بالممه وجاي يشبعن الحمدلله وما بيه شيء بس طلعت بدون ريوك وتخربطت عليج تحمليني 

ـ والليل كله يصفطن بيج طبعاً تتخربطين گومي جيبي الها مصفي فواكهه ماعون تمر وأكو حلاوه هم جيبها وجان اكو علاكه بيها بسكت وعصير ولفات كباب نافع جابهن الها ما أكلتهن الزفره مدري وين راحت 

نور ـ عالكاونتر لينا خليهن بصينيه وجيبهن .. جابتهن وكعدت تأكل وأمي فارشه علأكتها بيها أدويه

ـ 

سميعه ـ خليهن بالثلاجه نافع حصلهن النا من المستشفى من تخربطت لبنى سواها ميته فدمره وكومه هبد بالعلاجات على صيت بلاش وهذن حبابي ضغط حصلتهن ضميهن اليه . 

أخذتهن لينا والبنات نامن ولبنى هم نامت بصفهن ولينا كعدت تحجي الموجز لأمي وشوفتها جسمي تخبلت 

سميعه ـ من كسر لأيديهن أن شاء الله هاي ياهي منهن الضربتج شنهي أمج ميته وتنضربين والله أنعل أبهاتهن 

نور ـ أمي گامت معصبه ودگت الباب وطلعت الها نورس متخصره 

سميعه ـ شلون تضربين بنتي فوك ما مكعدتج بيتي تضربين بناتي أنتِ جلدج يحكج عالمشاكل وترديلج سالفه علمود أبوج يرجعج لنافع بس لاتحلمين بعد ما يگلبج شيسوي بوحده سلعوه مثلج 

نورس ـ يمه من يمتى أني صرت سلعوه وبعدين منو گالج أني أريده يرجعني ومنو جايب طاري نافع أصلاً! بس گولي أنتِ تردينه لبنتج العافها رجلها وسافر وگلتي أجتي والله جابها ارجعها لنافع لان بس هو واكفلجن ومعقوله وكفاتها هيج بلاش تلقيحات والمتخربطه وام جامعه وأم الإمتحانات كلهن هو ليش مو غيره بس وضحت السالفة ضامته لبنتج . 

نور ـ أمي ضربتها راچدي فرت رأسها فر ولزمتها من شعرها 

سميعه ـ أذا نسيتي أني خالتج فه أذكرج زين الخاله بمقام الأم وأنتِ وحده ما متربايه وما عندي بنيه ترادد وما تحترمي أني حتى بنات رجلي يخافن مني ولج لينا شگد وكحه ما يوم قللت أدب وياي بس أنتِ عرحج عرج عماتج شترچى منج ..

وهالمره أسكتلج بس بالعباس أبو فاضل أذا سمعتلج صوت وجبتي طاري نور لو وحده من بناتي وشبجتي الحجي أطلعج من بيتي بليله ما بيها ضوء كمر لو مو بنات أختي . 

نور ـ دفعتها ومشت باوعتلي بحقد تجاهلتها هاي ما ناويه على خير أبداً وتستاهل مو أدمي وما تحترم 

ونزل عمي وجان مزاجه زين ويحاجي أمي هو مرات زين مرات خبل مـا ينجرع بس أمي بكل حالاته ما متقبلته فقط زواجها شكلي كدام الناس وهو هم تقبل الوضع ورضى وسگت وهو الممنون وأحس سگوته بس علمود بناته لان وكحات ما ينحملن وين يوديهن لگه أمي أنسب مكان وهو عايش حياته بكيفه يطب ويطلع محد يحاسبه . 

مر أسبوع وهدوء نورس من أخر مره أمي رزلتها سگتت مبين خانسه وخلصانين منها وأني بس أريد بروده الكاع مالي خلگها ونفسيتي زفت ومصيري مجهول غافر ما بين وبنتي كبرت ومصاريف ما جاي تلحك راتب أبويه كله يطير وراتب خالتي قلق تفك بي اقساط محاضرات لينا وهم مصرف منه وراتب عمي كله ديانه جان يتسوك هسه گلشي ماكو حتى بناته ما ينطيهن عايفهن على أمي والوضع صاير صعب حيل كومة نسوان المسواك بيوم واحد ينفض گامت أمي باليوم مرتين تتسوك يا دوب يلحك وهنا يأكلن ويبذرن بدون وجع گلب .. 

أني بنتي حليب وحفاظات وهم نريد مصرف ونافع يدزلي كل شهر ١٥٠ بس بدون محد يدري بس أمي ما يقبل أحد يدري هم كثر الله خيره بس هو هم خطيه وما رضيت وأمي گامت تحجي گال أدز لبنت صاحبي مو لنور نكول قنعنا بس جذاب هو شايل همي وأني همي ويه المسافر وما أعرف أرضيه وين . 

وأجه رأس الشهر وأجتي أمي جابتهن ليش أخذتيهن مو گلت بعد ما أخذ يمعوده ماما أحجي وياه وراتب أبويه كافي علينا . 

سميعه ـ مو حجيت يكول شيلحك الراتب

نور ـ أخذتهن وضميتهن وللحظه خطر على بالي وشگيت معقوله غافر موصي وتذكرته وظيفته! 

راسلته نافع موجود 

نافع ـ هلا عيني أي گولي 

ـ عندك تواصل ويه غافر مو 

ـ لا والله 

ـ أحلف نافع 

ـ ليش مـا تصدكيني شبيج نور 

ـ الفلوس منك لو من غافر 

ـ لا والله مني 

ـ وغافر ووظيفته شلون 

ـ يا وظيفه تحجين عنها 

ـ شلون يعني 

ـ غافر صارله قرب أربع أشهر مسافر يا وظيفه نور أنطوا فصل عام وسألوني عنه گتلهم سافر هو وأمه وما اعرف شيء ثاني عنه وأني أدوام غير قسم هو شفت صباحي أني شفت مسائي كل وواحد وقسمه هو مكتب أني مناوبة وخفارات ليليه . 

ـ هو ليش هيج سوا 

ـ ما أدري والله 

ـ أبد ما مراسلك أتصال شيء 

ـ أبداً والله ولو راسلني أو أتصل أول وحده أكولج أنتِ والمصرف الأدزه من حسن نيتي لاتفكرين غير تفكيرات وياريت محد يدري ما أريد يطلع حجي عليج أنتِ بإمانتي لما الله يأخذ أمانتي . 

ـ أسم الله عليك وما أعرف شلون أجازيك وأعتذر ظنيت بيك بس گلت يجوز صاحبه ومحلفه أو راتب غافر ما أدري 

ـ لا عيني عادي ولا يهمج 

ـ تسلم نافع 

ـ تدللي بنت خالي . 

ـ صفنت عليه بعدك نفس ما أنتَ طيب وأيدك مو الك وتفكر بالكل وناسي نفسك مواقفك تشهدلك ياريت كل الأصدقاء يوفون مثلك .. 

صداقتي ما أنتهت بيك لكوني ما صرت الك لا بقيت محافظ على صداقتنا أحنه الثلاثه وما تغييرت رغم الأذيه والكسره العشتها لوحدك ما أكول غير الله يعوضك وبجبر خاطرك بأنسانه تستاهل طيبه گلبك وتقدر وجودك النادر بهاي الدنيا الظالمه 

ـ رحمه الله والديج يابه كثريلي من هالدعوات لان أني مواطن مظلوم حتى ويه أهله ما عنده حظ 

ـ ضحكت .. تستاهل كل الخير . 

ـ تسلمين عيني أخذي راحتج عندي شغل أترخص منج

ـ الله وياك .. دخلت عليه لينا وگعتي گلبي شبيج 

ـ وينج أنتِ علگت بين عمج محمود وخالتي ولبنى

ـ شگو هسه عفتكم گلشي ما بيكم 

ـ يمعوده ناجح وحليم اجو أخذوا البنات عمي مشعان داز عليهن ورادوا يأخذون لبنى عمي مشعان گايل الهم جيبوها وياكم بس هي ما راحت ولبنى گالتله لاتتأخر وتأخروا خطيه وگفت يم الباب عينها عالدرب وأجه عمي شافها وگام يسمعها حجي وگامت تبچي .

ـ أمشي أمشي طلعنا وجان عمي يحجي ولبنى وأكفه بصف أمي منزله رأسها وتبجي 

محمود ـ فاتحه روضه رايحين جايين شعندي أني شعندي وحطي بناتج وكعدي عليهن شعندج كلما أجه واحد منهم كمزتي شوگت تكبرين بابا عيب عيب 

لبنى ـ عمي والله ما طلعت عليهم خالتي طلعت

محمود ـ وشعندج لازمه الباب وماده رأسج مو عيب شتگولين العالم تردين تصخمين وجهي يگولن تواعد! وسالفه يجون يأخذون بناتج ماكو بعد يردون يشوفون بناتهم يجون لهنا مو مسوين الدرب خري مري رايحين جايين وهما ولد شباب واني بيتي مليان نسوان والعالم تحجي عمي تحجي وأنتن يمسوؤليتي تردن تفضحني . 

والله أذا طلعت بنيه منا بعد ما الها رجعه فاهمه يله كدامي يله . 

نور ـ دخلت لبنى تبچي دم وأمي گامت تحجي عليه

سميعه ـ شنو تواعد عيب عليك عفت الكل رجعت على هالمسكينه وهما حموينها وأذا أجو أخذوا البنات وبيت جدهن ويدزون عليهن وبيت خالهم ما داخلين بيت غريب وهذا بيت أبوها محد اله حق يحاسبها ولبنى مربايه وأعرفها شنو ما أسمحلك تطعن بيها لا أنت ولا غيرك 

محمود ـ والله طلعلج الج للسان وتحجين.. أمشي الحگيها لا أكسرلج حلگج أمشي وهذا البيت أني المسؤول عنه وحجايه فوك حجايتي ما تصير والتعيش تمشي تحت أمري وكلمتي أني وأحاسب وأكسر حلوك 

سميعه ـ عشتوا يمه جم حلگ گسرت قبلي 

محمود ـ سميعه تجفي الشر ولحكي بناتج لا الحگج بصباح 

ـ هو من مات طاح حظي يوم المنى الحكه وأخلص من هالشگولات الله بلاني بيها . 

نور ـ رادت يضربها بس مشت وخلته شايط دفعتنا من الباب ودخلت على لبنى جانت حاضنه نفسها وتبجي جرتها وحضنتها وگامت تبجي وياها . 

لبنى ـ يمه حجايته ثگيله على گلبي شقصده تواعد أواعد منو ما كافي بنته ليل نهار تطعن بيه ما كافي كسرتي وقهري على باقر لو الموت حلال جان لحكته وخلصت . 

ـ حسبي الله عليه وعلى بنته وساعة السوده الشفتهم بيها يمتى أخلص منهم يمتى عبدوا يمي عبدوا حتى أهلي ما يقبلون أتطلك منه أسمه زلمة بيت من طاح حظي على هيج زلمه گدرته بس عاليتامى وبنته لسانها بطول النعال ما يگدر يحاجيها مخليه علينا مثل الجلب البوليسي لاتحترم خاله لا تقدر مصيبة لاتگول لاتصخم وجهه من الله يصخم وجهي على الورطه الورطت نفسي بيها وتكبعت بهل الزواج الأكشر أنه شعندي لما هما وبيتي قصر أحطجن وأكعد شگو علينا قابل بس أني ترملت . 

بس الله كريم تفرج يمه تفرج .. وحده منجن تخابر عليهم خل يجيبون البنيات هاي لا حليبها ينشف من القهر 

لينا ـ هسه أراسل نافع 

نور ـ نافع بالدوام حجيت وأمي گبل خزرتني نشفت دمي 

سميعه ـ وأنتِ شمدريج بي بالدوام 

ـ راسلته وگال عندي شغل 

ـ شعندج تراسلينه نور ستري عليه ما ناقصه تجيني حجايه عليج أني بدون شيء سالفه رجلج وخالتج ما مخليه عقل برأسي من التفكير نشگت الكاع وبلعتهم 

ـ ماما صدك تحجين ترة راسلته سألته عن غافر وبس مستحيل يكون هذا تفكيرج بيه ما توقعتها منج أبد 

ـ ولج أوكفي وين رايحه أني غير علمودج يا بنتي وهاي الشيطانيه بس تريد علينا الزله وتنشرنا على الحبل 

ـ ردت أمشي منعتني وضلت تحجي شويه وعفتهن مقهوره أني هم بعد لا أراسل ولا اسأل وغافر أول تالي يبين وين يروح قابل شگد يضل .. 

فرشت بالكاع ونمت مقهوره وبنتي بحضني وأباوع عليها وأتلمس بشرتها شنو ذنبج تنحرمين من أبوج مشى وسافر وعافنا حتى ما فكر بيج بس أذا هو بيه ما فكر بيمن يفكر .. وينك يا غافر 

____

لبنى ـ يوم عن يوم كسرتي تكبر من أشوف بناتي يكبرن من دون أبوهن .. حاطتهن وكاعده وما أريد غير يكبرن بصحه وسلامه .. 

همي مو أقل من هم نور تحجي وتسولف بس الكسره واضحه بعيونها كلما يرن موبايل تفز وكلما يدك الباب تفرح عيونها تتبع أثره بس مع الأسف غافر غاب وهل الغياب كان مفاجئ وصادم للكل حتى عماته ما يعرفن شيء عنه ولأ عن أمه .. 

لينا كل همها تكمل السادس وتجيب معدل زين بس ما جاي أشوف هيج أبد أختي وأعرفها شنو أبالها يمكن أكول قبل لاتروح القريه وقبل لاتصير فضيحتها جان الها واهس قوي بس من يوم رجعت من القصر هي وحده ثانيه صفنتها ونظراتها مو إلها وتأكدت وتيقنت من الشك من لگيت جداحه الشيخ بجنطتها واخذتها عندي وانتظرها تحس وكتها الي كلام ثاني وياها .. 

ضلت يومين هي تلوب ونبشنت البيت نبش حتى كنتوري وملابس بناتي دورت وأني أباوعلها عاگدة حواجبي بشك . عن شنو تدورين 

لينا ـ ها على قلم أي قلم جاف خوش قلم 

لبنى ـ صايره تكذبين ومتمرسه الكذب بطرق والجداحه تتحول من جداحه الى قلم! 

ـ يا جداحه 

ـ طلعتها هاي .. شتسوي عندج حاجيني من الأخير جداجه الشيخ شتسوي بجنطتج 

ـ لكيتها وضميتها گلت أنطيها لنافع

ـ لكيتيها لكفتيها!

ـ لا لگيتها شنو لكفتها 

ـ جذابه لينا ولكفاتج وأيدج الخفيفه يمتى تبطلينها ليش أخذتيها تردين تصخمين وجهي أنتِ وويامن ويه جبير أخوانه .. ناسيه نورس مركبه كاميرات ورانا تريد نقطه ببحر علمود تفضحنا ولج هو أنتِ مفضوحه وسوالفج صارت تأريخ نورس وربع نورس كل مشكله تكعد تعيرج بيها .

ـ تعيرني لبنى 

ـ لا مـا أعيرج بس أريدج تثگيلين وتبطلين تصرفات رعونيه ليش ما توبين من سوالفج ما صارتلج عبره

ـ خلص إشسويت هسه 

ـ أشسويتي مو وهاي شنو مو أسمه مكتوب عليها

بله لو نورس شايفتها عندج مو تسويلج فضيحه وهي شأكه بيج عبالج من يجي الشيخ ويه عمتي يشوفون البنات تذب سمها هيج بدون سبب أكيد شافتج ملگوفه ومصروعه وشگت بيج . 

ـ خلص الله عليج گافي سدي هذا الموضوع والجداحه أنطيها لنافع گولليه البنات مأخذتها غطي عليها فدوه أني أختج 

ـ ماشي بس توعديني تثگلين وتبطلين لكافه . 

ـ وعد والقصر بعد ما أوصله والله 

ـ هو أكو شيء بينكم لـو لا 

ـ لا ماكو شيء 

ـ أكيد 

ـ أكيد 

ـ أذا عرفت أكو شيء وتجذبين عليه أزعل منج ها سگتت 

ـ لينا أنسي أذا عندج أعجاب بشخصيته أطردي هل الأفكار من رأسج لاتخلين هالصفات على حلو وشخصيه يلعبن بعقلج ويفرن دماغج أنتِ مو كد هالسوالف ولاتنسين هو جبير عليج وأصلاً ما توالمينه وشيخ وخبصته وهواساته وفصوله وينج ووينه واليريد يأخذ يأخذ من عمره أو مقارب اله مو هالشطحه . 

ـ تمام 

ـ أي بنتي أريد عاقله وما تخيبين ظني بيج التفتي على دراستج 

ـ تمام . 

ـ گومي نامي .. راحت لفراشها وصفنت عليها وعالجداحه ضليت حايره بيها أذا أذبها بالقصر يلاحظون لان بوگتها نبش القصر نبش عليها وعمتي وهبيه گومه دورته ما لگتها .. مثل ما كالت أكول لنافع هو يلكاها صرفة ويخلصنا منها باوعت الساعه عيب أراسله 

فتحت موبايلي شفته فاتح أنترنت ضليت متردده وهل البلاوه عافتها عليه خرب بعقلج يا لينا .. السلام عليكم 

رسلتها وطول يله رد . 

نافع ـ وعليكم السلام . 

لبنى ـ أريد أحجي وياك بموضوع 

ـ وهو 

ـ بس توعدني بيني وبينك 

ـ روحي منين ما أجيتي ولا تحجين شيء 

ـ ليش 

ـ على شنو أوعدج أذا أنتِ ما عندج ثقه بيه 

ـ لا والله موو هيج القصد بس البنات مأخذات جداحه أخوك وأريد منك ترجعها بطريقتك 

ـ الجداحه وشون البنات اخذنها شمعرفهن بيها 

لبنى الكدامج مو خبل 

ـ همصدك .. شوف لگيتها عند لينا وحجيت وياها ورزلتها 

ـ أدري بيها عند الست محاسن! هذاك اليوم ردت أحجي وياج وتنصحينها وتوعينها خل تتبعد لان تتندم بعدين ترى أني ملاحظ قبلج وردت أحجي وياها بس تراجعت الأفضل أنتِ أختها أقرب الها وتسمع منج نصحيها 

ـ تمام والله حاجيتها 

ـ ماشي باجر من يصيرلي مجال أمرلكم وأنطيناها حاولي لاتخلين أحد يشوفها عندج لان منقوش عليها أسمه . 

ـ أن شاء الله .. مشكور .. أخذ راحتك 

ـ الله وياج . 

ـ گمت ضميتها وأحس متحمله بذنب من ورا هالجداحه 

خرب بعقلج وسوالفج يا لينا .. 

وثاني يوم جنت أطبخ الغده وموبايلي رن نافع جاوبته ها . 

نافع ـ أني يم الباب مستعجل أنطيناها 

لبنى ـ تمام ركضت طلعتها وضميتها جوه ردن ثوبي ومشيت وصادفتني نورس طالعه من المغاسل وتباوع بشك 

نورس ـ خير وين رايحه 

لبنى ـ أريد أشوف خالتي وين صارت .. عفتها وهي مشت بس وگفت باب المطبخ .. فتحت الباب جان واكف يم السياره نافع باوعلي وأجه انطيتها اله

خلصني منها . 

نافع ـ ديله فوتي . 

لبنى ـ رجعت وهي متخصره عبرتها ورجعت أكمل الطبخه

نورس ـ أدري بيج تحبينه ما يحتاج تضمين عليه وأدري بيج معجبه بي من جان متزوجني بس عيب عليج بعد تراب رجلج أخضر وأنتِ تتمعشگين ويه أخو 

ـ نورس شتحجين أنتِ أكيد تخبلتي مستحيل تكونين واعيه على نفسج ما كافي ما بزعتي شجلبتي بيه عوفيني بحالي أعتقيني لخاطر الله أني وين وأنتِ وين . 

ـ چا شعندج متواعده وياه يم الباب 

ـ تخبلتي أنتِ وتجي خالتي وأحجيلها عنج 

ـ متأكده تحجيلها أضمن عليج ما تحجين لان كلامي صدك 

وعلى أساس تشوفين خالتج! خوش دروب معلمج عليهن نافع بس نصيحه مني الج نقذي نفسج مازال الدرب بعده ضيج .

ـ ما تحملت حقارتها ضربتها وضربتني وجرتني من شالي قوي 

ـ أني عفته بسببج ومستحيل أخليج تأخذينه الله يأخذج أذا أخذتي . 

ـ دفعتني عالسنك وأختنگت حيل نزلت دموعي حاره ونبأ أجتي تسألني ما جاوبتها من الصدمه السمعتها منها هذه غضب نزل عليه ما تعوفني بحالي الا تصخم وجهي وويامن ويه نافع يارب دخيلك أسترني يارب دخيلك أسترني يارب يتيمه ومكسوره خاطر ومودعه يمك شهيدي وگلبي ينزف عليه دم بس عبادك ما يعوفني بحالي . 

كله منج يا لينا أني شمطلعني على نافع لما سوالفج حتى مراسله ما مراسلته من يوم فضيحة أخته .

ردت أگول لخالتي وجانت ضايجه على نور وما ناقصتني 

وعدت هالأيام بس نورس ما تعوفني محاربتني بگلشي حتى بناتي تضربهن كاعده وجابتها وشمرتها بالكاع الا رانيه فحطت گمت عليها وجريتها من شعرها ونمت عليها والكل يعيط ويجر بيه واني خانگتها رادت تموت لما عمي محمود ضربني على خاصرتي أحس كلياتي وگفن وعيوني من الوجع يردن يطلعن . 

محمود ـ تردين تذبحين بنتي غضب على يومج 

سميعه ـ بنتك ما تنجرع شلون تضرب طفله بله صكطتها وكفت گلبها شون تشمرها هالشمره طفله وتحبي بيت جدها محد اله حق يمنعها 

ومحمود الزم بناتك ترى كلبي طگ منهن أني ما جايزه من بناتي وهذن أمانة باقر والله احرك البيت عليك وعلى بناتك أذا وحده منهن يصيرلها شيء . 

لبنى ـ تعارگوا وأني مختنگه ونور تنفخ بوجهي 

نور ـ ماما لحگي لبنى زرگت وجهه أختنك راح تموت 

لبنى ـ خالتي نفضتني نفضه قويه وتدك على ظهري وردتلي روحي وشهگت شهگه قويه وبجيت وبناتي يصرخن يردني ضميتهن لصدري وعمي أخذ نورس وكبت العيطه بينهم . 

وضلن كاعدات يمي وخالتي تحجي وگلبها مورم وأني گمت أخاف عليهم أحطهن وأقفل الباب ما أخليهن يطلعن أموت أذا وحده من بناتي تتأذى وهاي حقده وسمانيه لايوم تشمر وحده وتموتها وگتها أذبحها

والله .. 

محمود ـ غضب الله على يومجن خبلتني فضحتني وين أوديجن متگوللي ساعه أرتاح بيها بس عياط وصريخ جهال ومشاكلجن ما تخلص مو بيت ملهى ملهى . 

لبنى ـ سگتت وضل فتره محاربنا كلنا حتى بناته وبناتي ساگمهن سگم بس يحجي ويصيح .. 

وهنا كل كم يوم عمامهن ناجح وحليم يجون يأخذونهن عمي مشعان خطيه يدز عليهن ومران الحجيه تجي لهنا مرات لا تدز عليهم وخالتي تطلعلهم اني ما طالعه مره طلعت ووصيت ناجح عليهن وما يطولن لان يرضعن من صدري من يبجن گبل يجيبوهن اليه . 

وصارت مشكله وعمي حلف البنات بعد ما يطلعن من البيت أني هم خليتهن وكعدت ما ناقصه مشاكل وعمي محمود واحد ما يستحي أنكس من بنته بسرعه يكوم يتهم ويطعن وسالفته تكرظ بگلبي تواعد عزه العزاك كون وأكول نورس عليمن طالعه ثاريها نكسه

مثل ابوها مريض وشگاك .. 

حاطتهن وكاعده ويدگن بالباب يردن يطلعن ما أخليهن تالي فتحت الهن الباب نقهرت عليهن لينا جانت بالحمام تغسل الملابس ونور واكفه يمها عينجن عليهن . 

لينا ـ ماشي عيني 

لبنى ـ دخلت أتمدد تعبانه وگبت العيطه توني غمضت عيوني هم رجعنا گمت بتعب عليهن 

سبأ ـ صارلج ساعه حاجزات الحمام نمتن بي خوما نمتن 

لينا ـ والله بكيفي حمامي وبيتي

نورس ـ وأحنه كواويد كاعدين عندج وعند الخلفوح شو طلعي نريد نغسل ملابسنا وملابس أبويه تريد غسل . 

نور ـ متشوفين جاي نغسل جاي نلعب 

نورس ـ اي والله جاي تلعبن بالمايات صارلجن ساعه

لينا ـ گالتلج بعدني ما مخلصه مو تشوفين الغساله مشتغله مالجن كوه شنو هاي ما تشترن غساله فلوس أبوجن المن وين تودن الراتب لو بس عالحلويات 

نورس ـ أشو دوخريي من الحمام وغساله ما نشتري وراتب أبويه بس للحلويات شعندج يمي وهذا الموجود ويله ولي سبأ جيبي ملابسج وتعاي غسليهن 

لبنى ـ دفعت نور ولينا من الباب وطلعت كل الملابس هنا ومايهن من الغساله وشمرتهن بالصاله طربست الدنيا بالماي . 

نور ـ ليش هيج سويتي وشمرتي الملابس . 

نورس ـ علمود تعرفن تشتغلن مو بس أنتن عايشات بالبيت كل وحده تدخل الحمام ساعه ما تطلع . 

لينا ـ لا والله نعرف نشتغل بس الما نعرفه ونعلمه الج هسه هذا بيتنا وبيت أبونا وتوهبينا النا وأنعل أبوجن لابو لفاجن علينا . 

لبنى ـ لينا تقربت جرت سبأ ونورس هجمت عليها وتعارگن وخالتي گامت لازمه رأسها وتصيح محد يسمع الها ولينا شالت ملابسهن وشمرتها بالحوش 

لينا ـ يله طلعي من بيت أبويه أخذي أخواتج وطلعي من بيتنا وعسى ما تلفيجن الشوارع ما يهمني لان مو أدمي الزمه الباب وخل يندل دربه وبعد ما الفي هيج شكولات تعبانه بيت أبويه . 

نورس ـ بسيطه يا لينا بسيطه أذا ما ندمتج أني مو نورس بنت محمود .. أمشن بس والله ما يصير خير بس خل يجي أبويه الا أخلي يذبج بحلك جلب أنتِ وهذيج المستشرفه أم الحمامات صوحبية نافع ابو النسوان 

لينا ـ دولي درب اليسد ما يرد وراج سبع حجرات أدبسزز 

لبنى ـ أخذت أخواتها وطلعن ونبأ گوه مشت ما ردات تروح ونور ضلت ساكته ما حجت شالت الملابس وغسلتهن ولينا دخلت الغرفه وخالتي لازمه رأسها خاله أقيس الج ضغطج . 

سميعه ـ لا يمه خلي بلكي يعلك وأنجلط وأموت واخلص 

لبنى ـ لا خاله أسم الله قست ضغطها معلك انطيتها علاجها وتمددت تعبانه والصراحه حاطه أيدي على گلبي خايفه من عمي أذا عرف طادرين بناته من البيت .. 

لليل نور طبخت العشه وسمعنا طبة الباب ومن الباب دخل يصييح 

محمود ـ ولج لينا تطردين بناتي اليوم أصكطج أدبسزز 

أستكاويتهن وأنجلبتن ماكو رجال على رأسجن وأستحليتن البيت وتطردن بكيفجن . 

لبنى ـ دخل دفعني وعبرني يدور على لينا وخالتي وگفت يم الباب تمنعه وهو حالف الف يمين الا يكتلها وتدخلت نور دفعته

نور ـ كافي عاد بزعنا وملينا ومنك ومن بناتك تعثر بالكاع ترجع علينا وعلى شنو تريد تضربها بناتك مو أوادم وما يحترمن . 

محمود ـ أنتِ وخري ما أريد أذيج لان عزيزه عليه ما أريد أغلط وأمد أيدي عليج بس هاي الأدبسزز تريد تربيه من جديد والمفروض من زمان ذابحها وطام عارها العار 

لبنى ـ حاولنا بس هو رجال أقوى من عدنا ودفع الباب ودخل عليها وضربها ضرب مال موت نعيط ونتوسل نريد بس نخلصها منا لما فزينا على عياط نور بعلو صوتها 

نور ـ مــــامــــا مــــامــــا . 

لبنى ـ عمي ركض عليها وركضنا كلنا واكعه بالكاع وگبل شالوها ورفعوها هو ونور وطلعوا بيها المستشفى ولينا حلگها وخشمها يذبن دم گامت غسلت ورجعت الغرفه تبچي وبناتي يبجن وبنين طگت من الصريخ ورا أمها وضع يقهر بناتي لهيتهن بالجداري بس هي ما تسكت متعقله بإمها هواي ما تريد أحد 

شايلتها وأفتر بيها لما دخلوا ونور ساندتها وشايله بطل المغذي دخلتها الغرفه نومتها واجتي على بنتها 

نور ـ ها ماما هاي فدوه لريحتج أسفه حبيبي أسفه ماماتي أجيت والله أجيت 

لبنى ـ شلون صارت 

نور ـ تعبانه والله ضغطها معلك موزين ما مجلوطه گال أنتبهوا لوضعها الله سترها 

لبنى ـ وعمي شگال 

نور ـ ساكت ما حجه شيء بس أمي كالتله شوفلي حل ويه بناتك گال الها نورس ردت من نافع يرجعها على ذمته ما قابل يرجعها وهذنيج فقره بس هي بيهن وكحه وسبأ هي خبلتها ما جانت هيج . 

أروح أنوم بنتي بعدين نحجي . 

لبنى ـ راحت ورجعت لغرفتي ولينا نايمه وعمي عاط خرب بناتي بس لا راحن عليه 

محمود ـ تعالي لمي بناتج شگو كاعدات لهل الوگت ما تنوميهن شنو شغلج . 

لبنى ـ أخذتهن ونومتهن ولينا بس صوت شهگاتها ينسمع لينا عيني حاجيني شو وخري الغطا لينا 

لينا ـ عوفيني لبنى عوفيني الله يأخذني وتخلصون مني 

لبنى ـ حاولت وياها ما يفيد عفتها وگمت أشوف خالتي ونور متعاركه هي وميثم 

نور ـ شعندك هسه يله لفيت البيت متگول أمي أخواتي وأمي جان ماتت من ورا بنات عمك وشجابهن علينا لما أنت . 

سميعه ـ ولج عوفي أخيج عوفي شگو رديتي عليه تعال يمه تعال ما عليك منها 

ميثم ـ والله يمه جنت يم بيت خالي مشعان وكاعدين والكعده حلوه وهسه نافع وصلني البيت وما تصدكوني خابروا وتأكدوا منه 

نور ـ لا ما يحتاج صدگناك يله نام ومنا هيج طلعات بالليل ماكو 

سميعه ـ نور وتالي وياج شو نامي ونومي بنتج 

لبنى ـ فرشت فراش ونومت بنتها وعفتهن ورجعت على لينا رفعت الغطا وبستها أباوع على وجهه وشفتها كله كدمات شكد ما يرحم كم مره بمره ضربها .. 

رجعت يم بناتي ونمت بس نوميش تحضن المخده الافكار كلها تتكوم عليك .. مر كم يوم وعمي رجع بناته ولينا ابد ما تحجي وحابسه نفسها بالغرفه وطلعت لحكت بناتي وراهن وراهن ولكيت نور متعاركه هي وعمي 

نور ـ البيت ما ينباع لو على جثتي بيت أبويه يبقى مثل ما هو كاشيه ما تنشال منه 

محمود ـ بس ياعمي يانور البيت صغير وما جاي يكفينا بس مشاكل كلت ابيعه ونجمل فلوسه ونأخذلنا بيت طابقين اني وبناتي بطابق وانتِ وأمج وأخواتح بطابق واحسن من هالمشاكل . 

ـ أبد عمي لاتفكر ولاتحجي بهل السالفه البيت ما ينباع يعني ما ينباع . 

ـ نبقى هيج واذا أمج وافقت البيت أبيعه 

ـ لا أنت ولا حتى أمي أخليكم تبيعونه أحركه وما أبيعه 

لبنى ـ طلعت وراحت على خالتي وگبت بيها تخبلت خبال عالبيت 

نور ـ اذا طاوعتي وقنعج وبعتي البيت أخذ بنتي وأهج مثل مل هج رجلي وخلاني بهل القهر.. بيت أبويه ما ينباع فاهمه ماما ما ينباع اذا بعتي معناها تبيعين اخر ذكرى من أبويه . 

سميعه ـ شجاني تخبلت أبيعه شعندج بايعته وشايل هم بناته خل يشتري الهن بيت يأجر مشكلته اني شگو بايعه بيتي . 

نور ـ أي عبالي ديري بالج ماما ديري بالج گلشي الا البيت . 

لبنى ـ وهذا الأحسن وضل عمي يحاول ويقنع قافلات وبلأخص نور قافله نهائي وتصير نار من يجيب طاري البيع عاد نسد الموضوع والعرفته من حجيهن نبأ ناجح يريد يتقدم الها عمتي حربيه محاجيه عمي محمود وعمي موافق بس گايلتله لما تطلع سنوية باقر ونحجي بالموضوع 

وهو يريد يرجع نورس لنافع ونافع قافل ما يريدها 

كاعده بالمطبخ أوكلهن وعمي جان موجود بالبيت وأندك الجرس ودز سبأ فتحته واجتي 

سبأ ـ بابا هذول ناجح وحليم

محمود ـ خير شيردون شعدهم يوميه طابگين سيارتهم يم بابي مفتح بيت ملهى 

سميعه ـ أستغفر ربك يا رجال أكيد أجو على البنات

محمود ـ وأني شحجيت شصخمت مو گلت البنات ما يطلعن أشو حجايتي مالها أهميه سميعه 

ـ ما الك حق تمنعهم يشوفون بناتهم ما الك كوه على الناس 

سبأ ـ أي گالوا الشيخ وجديتي وعمتي وهبيه دازه تريد تشوفهن . 

محمود ـ من أنعل أبو الشيخ وياهم ماكو بنيه تطلع منا وروحي گولليهم ابويه يگول ما اقبل واليريد يجي يشوفهن يجي هنا مو كاعدين هناك ويردون بناتهم وگاتلتهم المحنه عليهن مو اشتغل عند الخلفوهم اربي وادز خوش لكوه حضانه وبلاش يستنگون يدخلون البيت

سميعه ـ شنو هالحجي وشنو بلاش ترة اهلهن ما مقصرين ومصرفهن يوصل لعدهن وبيت جدهن أنت شعليك بيهن ترى زايده منك تنعل وتحجي 

محمود ـ أنتِ سكتي لا أكوم أكسر حلگج والحكج على أهلج.. واوكفي أني أطلع عليهم 

لبنى ـ طلع وأعصابه فايره وخالتي واكفه وتحجي واني منطيه الأذن الطرشه وأباوع على الوضعيه واجتي لينا ودخل عمي يدردم هي دقايق وما حسينا غير صوت الهورن شال البيت ودگات على الباب هم مو عالجرس 

سميعه ـ شفت هاي سوالفك اطلع تفاهم وياهم سويتلنا مشكله لابيها لا عليها كفروا اذا دزوا على بناتهم . 

لبنى ـ ركض ميثم فتح الباب ودخل الشيخ دفع ميثم وعمي نهض مثل الخايف ووتقرب يحجي بعصبيه 

الشيخ حربي ـ بإي حق تمنع البنات يوصلن بيت جدهن منو عينك والي عليهن حاجيني بإي حق تطرد أخواني من باب بيت خالهم . 

محمود ـ على كيفك بويه وأني ما مانع أحد ولا طردتهم لايجذبون بس السالفه وما بيها البنات بعدهن صغار وما يصير يوميه طابگه سياره يم بابي واني بيتي مليان نسوان وكل وقتي بالدوام وهما شباب وأنت شيخ تعرف حق الله وتعرف الناس أذا تكوم تشبج حجي على بنت بيت . 

الشيخ حربي ـ أشك حلگ اليجيب طاري حرمه من عدنا وأنه الدزيتهم لان حبوبه ما بيها تجي وگالت تريد تشوفهن شو أجوني فارغين ومحد مستقبلهم 

محمود ـ هدي حيلك وأتفضل وخل نحجي 

لبنى ـ دخل الأستقبال وخالتي هم دخلت وياهم وصار الحجي وعمي كام يحجي ولينا سوتله الچاي وأنطته لميثم . 

محمود ـ السالفه وما بيها أني مال من المشاكل وهما كل يومين طابگه سيارتهم يم بابي ما يصير والعالم تحجي ويردون يشوفون البنيات يجون لهنا من باب يجن النسوان وأني لبنى ما اقبلها تطلع من البيت هذاك اليوم جديتك دازه عليها وتعرف هي أرمله يعني واكفه تضل رايحه جايه . 

الشيخ حربي ـ هاي هي عمي السالفه مكظيه وتطلع سنويه أخويه ونسوي حل ويصير خير يرضيك ويرضينا

لبنى ـ ما فهمت شيء وگبل گام وعمي طلع وراه وتأخر يله رجع ضل واكف وياه هواي يم الباب .. 

ومر يومين وخالتي بس لازمه موبايلها وتخابر بإهلها

بس تحجي بسگوت ما ينفهم منها شيء واني هالأيام روحي مقبوضه بهل الأيام أستشهد وراح وكسرلي ظهري وگلبي وبناتي بعدلهن كم يوم يكملن سنه 

اليوم سنوية باقر الله يرحمه واني من الليل ناصبه عزه بروحي دموعي ما نشفت أبجي لحالي وأتذكر كل ثانيه عشتها بهذاك اليوم الأخذ مني روحي ..

العرفته مسوين السنويه بالقصر وكلها تروح حتى عمي محمود وبناته ودزوا خبر لخالتي أحنه وياها وتحضرنا وحضرت غراضي الأحتاجهن ونور أجتي وكفت يمي حسيت عدها حجي تحجي 

نور ـ لبنى مـا أدري شگولج 

لبنى ـ گولي شعندج 

نور ـ دزوا على أمي .. علمودج أنتِ وبناتچ! 

لبنى ـ شلون يعني توها رادت تحجي دخلت خالتي 

سميعه ـ يله كملتن نافع وصل لينا وينج تعالي شيلي غراض أختج ميثم وين وليت هسه أمشي شوفي أخوج وين علمود يروح ويه عمج محمود السياره ما تكفي 

لبنى ـ نور طلعت مستعجله ما فهمت منها گلشي شلت رفيف وخالتي شالت رانيه وطلعنا وهنا وراي وتوكلنا للقريه . طول الطريق أباوع على نور اريدها تحجي صمت حلگها . 

وصلنا وكلها موجوده هناك بيت عمي مشعان كلهم جايين ومن نزلنا نافع أخذ رانيه من خالتي ومشينا وبالدخوليه مخلين صورة باقر حجم جبير ودنگ نافع وكف رانيه ويحجي وياها . 

نافع ـ هذا بابا ... بابا بابا 

لبنى ـ بچيت طگ گلبي أريد أتقربله عبالك هو وواكف كدامي مو صورته وشالها ودخل كدامنا تقربت تلمست الصوره وابجي حبيبي عيوني أنت والله ما مصدگه اليوم صارلك سنه والله وأصلاً ما مصدگه أنت ميت 

رفيف بحضني هاي بنيتك رفوفه سميتها مثل ما طلبت مني تلمست شواربه وعيونه وخليت رأسي على كصته بجيت ظهري مكسور باقر محتاجتك والله محتاجتك ليش رحت عفتني ..

بالگوه نور ولينا سحبني واجتي عمتي وهبيه حضنتني وبچيت بحضنها عمه والله ما مصدگه بي هو ميت والله وكل ظني هسه يطلع من الغرفه .. 

وهيبه ـ هو بمكان أحسن من عدنا الله يرحمه برحمته الواسعه ويصبرج تعالي يمه تعالي . 

لبنى ـ دخلت وياها وكلهم كاعدين وتقربت سلمت عالحجيه والحجي وعمي مشعان هذاك الرجال الضخم الصوته عالي يگوم عرب وما يكعدها صاير جلد على عظم من الضعف تقربت سلمت عليه باسني ولمني بحضنه بجيت وهو يشهك وأني أشهك عمي باقر كمل سنه من مات عمي . 

مشعان ـ كسرلي ظهري ومشىٰ باقر كسرلي ظهري يبعد عمج . 

لبنى ـ مسحت دموعي وكعدت وأخذ مني رفيف يبوس بيها ونافع جابله رانيه خلاهن بحضنه يباوعلهن ويبجي گامت الحجيه حضنته وتبچي وياه وأباوعلهم كلهم يبحون نافع گام يمسح بدموعه ورانيه لحكته 

الشيخ حربي ـ تعالي عمي تعالي .. يولن لحگنا لاتوكع من الدرجات على وجهه . 

لبنى ـ لينا جابتها وخلتها يم الشيخ هزيت الها رأسي ومشت مثل الخوش أدمي كعدت بصف نور وخالتي 

وعمي مشعان گام يغسل وأني أباوعله شفت عمتي حربيه هنا! خير أن شاء الله ..

كعدنا يمهم وساكتين والبنات يلعبن بالنص والحجيه تباوعلهن وتباوع عليه وعلى نافع! ونافع باوعلي ما تحملت نظراتهن شلت رفوفه وگمت للمطبخ لحكتهن وقبل لا أوصل الساحه وقفني صوتهن. 

نورس ـ أي والله عمه گلشي حجيت الها وهي ما تدري عبالها من مشى عليها على نياته حاله من حاله غافر ما تدري بسوالفهم أثاري على عمى عيونها هي وغافر ما عدهم علم . 

ـ وأنتِ حجيتلها كل سوالفهم

ـ أي والله عمه وكتلها ولحد الأن تحجي وياه وعلى علاقه وهي متزوجه ما عايفته وطلكني من وراها بالبدايه ما صدكتني بس اني قنعتها وحجيت الها كل مواقف نافع وياهن يله أقتنعت وصدگت 

ـ أي وشكالتلج 

ـ شتگول عمه ضلت ساكته وشوفة عينج نور صارلها أشهر يمنا شمرها وسافر هو وخالتي محد يعرف بيهم وين ما وين حتى عمات غافر خالتي سميعه راحتلهن وسألت ما يعرفن شيء عن غافر ولا حتى عن خالتي 

ـ بعد أحسن وعسى بالهجم أن شاء الله عسى ربي حوبة صفا تهدم وتخرب بيوت العامره على رأسج يسميعه أنتِ وبناتج . 

لبنى ـ أسمع الأصوات وأركز بيهن زين أني عرفتها والله عرفتها مدبره ويجيچن يوم لا تخافن.

هو الذي لا تأخذه سنة ولا نوم، علام الغيب والشهادة

رجعت أسمع وأركز بالكلام وعرفت السر اللي دمر حياه أختي الله لأ يوفقچن بجاه كلمن عنده جاه يم رب العالمين 

لازم الكه حل وأتاكد وابلغ الراس الجبير حتى يتصرف!

رجعت قبل لايحسن عليه وتوجهت لغرفتي المن أكول خل ارجع البيت ويصير خير .. فتحتها وهبت عليه

ريحته كعدت عالجربايه تلمست المخده گلشي باقي مثل ماهو غراضه عطوراته ملابسه كلشي على حطته 

ما قبلت ولا اهله قبلوا .. محتفظين بذكرياتك حبيبي 

كعدت أرضع رفيف الى أن نامت وأجتني لينا ها وين جنتي 

لينا ـ بالمطبخ راح يصبون الغده ما تجين 

لبنى ـ لا كاعده خليني بس تعالي تعرفين شيء لان أحس نور ضامه عني شيئ 

لينا ـ لا والله ما أعرف مثل شنو ضامه

ـ هيج أنتِ أمر مني ما تعرفين شيء گومي شوفيلي رانيه وين سويلها اكل مو هلكد بالرضاعه هي ام بطن 

ـ وكلتها جديتها جاي تلعب يمهم 

ـ عوفيها هي تنعس .. تبقين لو تطلعين 

ـ لا ابقى مو مـا ترضين اطلع 

ـ علمودج أني .. ديله نمشي نطلع نساعدهن . 

طلعنا ولكيناهن صابات ومخلصات وزهور والبنات كلهن جايات سلمت عليهن وجههن ثكيل بس زهور زينه هذن شبيهن!

تغدينا والزلم بالمضيف واحنه أجتمعنا بالصاله والأكل كملنا وصبن الچاي والحجيه وخالتي سميعه ولميعه ونور راحن الغرفه من كعدنا لحدهسه يتهامسن بينهن! 

لينا فضولها كتلها حجيت عليها ورزلتها وراحت الغرفه واني كمت ساعدت عمتي صالحه وشلت المواعين لان نورس وأخواتها على كد ما أكلن نفضن أيديهن وگامن ولزمن الجاي .. وكفت اغسل المواعين وياها والجدوره وكعدنا نعزل بيهن 

صالحه ـ هذن وديهن للمخزن وروحي بعد تعبتي اني اكف الباقي 

لبنى ـ ماشي عمه شلت الجدوره ومشيت للمخزن صاير بصف المطبخ بالساحه وقبل لا أوصل سمعت صوت الشيخ يحجي .. 

الشيخ ـ يمــا أبوس رأسج ليش معارضه رغبتي گولليلي شنهي طلابتج وياها ليش ما تردينها 

وهبيه ـ مو ما أريدها بس مو نسوانك يحربي وأنت شيخ چا نسيت الشيخ لازم يأخذله مره أم بيت وشيخه وتكظب ظهره وقصره مو يركضلي ورا زعطوطه مثل هاي ولك يمه من كل عقلك تريدها هاي لو متزوج جان بگد بناتك منو يعقلها عليك چا تسودنت على عمرك يا يمه تعشك وحده جاهل وأحنه بيا حال ولك يمه بعد تراب أخيك أخضر چا نسيت أخوك 

ـ عمت عيون التنساه بس أنه ما كتلج هسه أريدنها بس مخليها أبالي وحاجيتج بيها علمود تشيلين سالفة أرملة أخوي لان ما أخذها 

ـ ليش ما تأخذها چا منو يأخذها عكبك يالشيخ هاي أرملة أخوك ومنو يلم بنات أخوك ويدير باله وعينه عليهن بس لا تريد تمشي على شور عقلك وگلبك المسودن وشور حبوبتك يحربي وتكسر گلبي فوك كسرته على أخوك وتخلي حرمته تروح مني وتبعد بنياته عني

ـ يمــا أنه موتته لحدهسه ما مقتنع بيها أدور أخذ حرمته شتحجين أنتِ هذا الشيء ما يصير يا يما 

لاتحلمين أخذ حرمة باقر . 

لبنى ـ أجه وشافني وصار وجه بوجهي وحيلي بهت وعمتي وراه تباوعلي نفض عبايته ومشى مستعجل اجتني عمتي تحجي گبل عفت الجدوره بالكاع وركضت الغرفه وأني أشهك وأبجي مستحيل مستحيل شجاي يفكرون ويخططون ... 

وهبيه ـ لبنى أوكفي ولج يمه أوكفي مو أحاجيج 

لبنى ـ دخلت الغرفه ولميت غراضي ولبست عبايتي ولينا جانت تگلب بالموبايل مستغربه شكلي گومي گولي لخالتي لبنى تريد تمشي البيت وهسه بسرعه

لينا ـ شگو شبيج شصاير 

لبنى ـ لينا تحرگي مالي خلگج أكعد أحاجيلج صيحيلي خالتي سميعه بسرعه بسرعه . 

طلعت وأني أفرك بوجهي ودموعي تصب ياربي شجاي يصير وعمتي شلون تفكر هيج تفكير مستحيل يصير هالشيء لو أموت . 

بقيت بالغرفه الوب ودخلت عليه خالتي ونور ولينا وقفلن الباب .. جنتي تدرين أنتِ وبنتج جنتن تدرن وضامات عليه وجبتني للقصر مو علمود السنوية علمود تخلصن مني ومن بناتي مو هيج أني ثكيله عليج خاله 

سميعه ـ مو ثگيله مع الوگت تتقبلينه وترضين بقسمتج

لبنى ـ أتقبل! وأرضى! صدك تحجين خاله وباقر .. أشو أنتِ ما تقبلتي ورضيتي بعمي محمود من بعد أبويه 

ـ مو كل رجال رجال وولد أخويه خوش ولد وهذت أنسب حل الج الى متى تبقين حاطه بناتج وحابستهن وكاعده وعمج محمود محاربج ونورس مشوفتج نجوم الظهر .. وتأخذين أخو مو غريب ولا عيب ولا حرام . 

لبنى ـ لا حرام حرام حرام خاله شلون تردون أتزوج أخو شلون وباقر ما فكرتوا بي محد فكر بينا وحبنا وصخام وجهي وطين برأسي ولكم هذا عزيز گلبي ما صارله سنه گبل گمتوا تتخذون القرارات وتخططون بكيفكم وأني جايبيني على عمى عيوني وهسه بالصدفه أسمع الشيخ يحجي ويه عمتي وهبيه وحاجين ومكملين گلشي من كل عقلكم والله لـو أموت هذا الشيء ما يصير .

سميعه ـ بس مو الشيخ اليأخذج! 

لبنى ـ لعد منو . 

نور ـ نافع ..