رواية خيط وابرة الفصل الثالث والثلاثون 33 بقلم شمس العراقية

لبنى ـ نافع! لا لا مستحيل لا نافع غيره ولا أي واحد منهم وزواج مًا أتزوج عوفني ما أتزوج هي گوه مخططين بكيفكم عبالك نايمه على گلبهم وهسه ترجعوني البيت هسه دقيقه ما أبقى بالقصر . 

سميعه ـ وليش ما تتزوجين وتخلصين وتلمين بناتج وهو عمهم حسبة أبوهن ويوعن عليه بناتج يحتاجن أب وأنتِ تحتاجين رجال تستندين عليه وبظهرج زلمه كفو وأخو خيته هذا نافع كلهن يحسدجن عليه أذا أخذتي 

ـ محد يصيرلهن أبو هنا بنات باقر.. وبس أبوهن باقر

لا نافع ولا غير نافع يصيرلهن أب وما أريد أستند على أحد ووصلي الهم هالكلام وهذا الشيء ما يصير لو على جثتي من بعد باقر مستحيل أتزوج مستحيل خاله مستحيل . 

ـ ولج خاله هي فرصه تجي مره وحده بالعمر ونافع فرصتج وتخلصين من الضيم ومن عمج وبناته ولج أحنه عايشين ويه كاولي تعرفين شُــنو گاولي وبناته ما يخافن الله لا يذبن وراج بليه سوده وگتها بناتج يروحن من أيدج 

وأني ما دايمتلچ وأخواتج باجر عگبه كلمن تمشي لبيت زلمتها وميثم يدرس ويتزوج والمن تبقين خدامه لنسواين لو مكفخه على أيد نورس ولج يمه فكري محد دايم لأحد وأنتِ برگبتج بنات همهن جبير . 

ـ لو تحجين منـا لبعد سنه أبداً والله مستحيل وهسه ترجعيني البيت هسه خاله . 

لينا ـ خاله أنتِ فهمتي وتأكدتي صدك نافع 

سميعه ـ بعد هذا حجي أمي وأبويه بس وهبيه ما راضيه تريدها لحربي تريد البنات يمها بالقصر وحقها ما الومها بنات أبنها هي من جان عايش ما حظت بجنتها بخت حربيه عاد هسه أستكثروا عليها بنات أبنها يضلن عدها بس الحجي والربط بيد حربي لحدهسه هو رافض

لينا ـ يعني نافع ما عنده علم 

سميعه ـ هسه أمي تحجي وياه وتقنعه بس بالأول ننقنع أختج ولج شون وياج تبقين ميبسه رأسج 

لبنى ـ أي أبقى وگولي لأمج لاتقنع نافع ولا غير نافع ما أوافق لـو شيصير .. بعده تراب گبره اخضر يله صارله سنه واليوم سنويته اليوم لازم وجعكم گلبكم بهذا اليوم غمضت عيونه عن الدنيا مات وما لحك يشوف بناته وأنتوا تركضون ورا مرته تردون تزوجونها والله بناتننا لازم يربنن عدنا بناتكم من حقي أني اربيهن زواج ما أتزوج وبناتي يضلن عندي . 

نور ـ نافع هو الخيار الأنسب الج ما عندج حل ثاني ترى مخلينهم كلهم ومخيرنهم! الشيخ ونافع وناجح بعد بقت يمج وصح صعبه عليج وعاذرتج وفاهمتج الحب ما ينسي بهل السهوله بس هاي أقدار رب العالمين ولازم نتقبلها .. والأ من جان متوقع نافع أنتِ تصيرين مرته 

ـ مــا أصير مرته مــا أصير أفهموها هذا الشيء زواج مــا أتزوج لو أعرف أموت عكب باقر محد يصيرلي رجال لما الله يأخذ أمانتي ويخلصني .. مستحيل أتزوج

خاله مستحيل أفهميني فدوه رحتلج خلصيني من هالمصيبه أبوس أيدج ورجلج خاله طلعيني من هالقصر راح أطك راح أموت رجعيني للبيت .. 

أنهاريت بحضنها وبجيت بچي ما صاير خاله أني موتته ما مصدگتها ما عاقلتها برأسي على ساعه أسمع صوته ويدخل عليه وعلى بناته.. والله خاله أني زين مني أكل وأشرب روحي مشتعله بنار نار .. خاله جان يعشك خيالي ومات وما لحك يعيش حياته هو ششاف گولليلي ششاف من الصبر للگبر مستكثرينه عليه أضل عايشه على ذكراه وتردون مني أتزوج يا زواج خاله أني مصيبة گلبي مصيبه ..

لينا ـ حقج والله العظيم حقج بس هاي قسمتج ونافع رجال كفو وفكري . 

نور ـ بحياتي ما ناصحه أحد بس أنتِ .. وأنتِ الخسرانه أذا ما وافقتي على هالزواج مستحيل تلگين أنسان ورجال كفو مثل نافع . 

لبنى ـ لاتنقنعني لاتحجون وياي بهذا الموضوع أبداً سگتن سگتن الله يخليجن سگتن سگتن . 

أبتعدت عنهن ولميت نفسي ومـا أريد أسمع أي شيء وبس أريد أطلع منا أختنگت والغرفه صارت عليه كبر بسبب قرارتهم هذا أعدام بحقي ويخدم مصالحهم ما يخدمني بس يوجعون گلبي ويدمروني محد حاس بيه وبنار گلبي على باقر محد . 

ضلن كاعدات وساكتات ويحجن بينهن وخالتي گامت تدردم عليه صديت وجهي للعصر هنا مكابلتني بس لينا جانت برا تفرفر بنين مستغربه القصر وكل شوي تعيط تسگت بيها .. 

لينا ـ عمي محمود أخذ بناته وراح همزين خلصت منهن حتى لهنا لاحكتنا عوذه . 

لبنى ـ شعليج بيهن كعدي وسگتي 

نور ـ لبنى شگو سالمين أشو نگلبتي علينا 

سميعه ـ عوفنها هي بعدين تعرف مصلحتها وين 

ويجي يوم وأذكرج بهاي عنفصتج علينا 

لبنى ـ ما حجيت واخذت بناتي كعدت أرضع بيهن 

وأندك الباب وطلعت نور سمعت صوته يحاجيها 

نافع ـ بلغي عمتي ولبنى دزوا عليها يردون يحجون وياها . 

لبنى ـ أجتي ونفضت رأسي ما أروح ولا أحجي وياهم 

سميعه ـ گومي شجاج تسودنتي گومي وأسمعي منهم الحجي قابل يجرونج بحبل ويزوجونج گوه .. شو لبسي شالچ وتحركي يله لاتشلعين گلبي . 

نور ـ أسمعي منهم وبعدين قرري وأكيد شيء براحتج ماكو شيء أجباري ومن حقج قابل الزواج غصب يله يا عيني . 

لبنى ـ خاله من هسه أريدج توكفين وياي موو تعوفيني ولو أدري بيج تردين تزوجيني 

سميعه ـ أي أريد أزوجج وأخلص منج شلعتي گلبي خايبه ما تسكتين نايمه على گلبي بيت الخلفوني چا غير كاعده بيت أبوج بس علمودج يا بنتي وشسويلج مطي متمدد برأسج ناطحه رأسج للحايط .. دمشي هسه . 

لينا ـ أجي وياجن 

لبنى ـ صحت بيها وين موليه ويانا كعدي يم البنات ورجلج أكسرها أذا طلعتي من الغرفه لما أخلص مم هالمصيبه ونولي من هالقصر صار گبر عليه گبر 

سميعه ـ لا اله الا الله تسودنت هل البنيه تسودنت أمشي لاتفضحيني عود أنتِ العاقله ما بينا لزمة أيدي

لبنى ـ خاله جوزي مني .. مشيت وياها ونور أجتي ويانا وجانوا كاعدين كلهم الشيخ حبيب وبصفه عمي مشعان وحربي ونافع واحد بصف الثاني والحجيه كاعده وبصفها خالتي لميعه ووهبيه شافتني والدمعه بطارف عينها

خالتي سميعه كعدت وكعدت بصفها ونور ما ضل مكان نافع تقرب عالشيخ كعدت بصفه بس اكو مسافه بينهم .

كعدنا وأني منزله رأسي وعلى گلبي كاعده أريد تكظي هالسالفه وأمشي وبعد ما أرجع على هاي دگتهم بيه 

مشعان ـ بنتي لبنى أنتِ عزيزة عليه قبل لاتصيرين زوجة أبني وأني بنات صباح كلهن أحبهن بس أنتِ أعزهن لان زوجة أبني باقر عزيز عيني وگلبي وأمانته 

لبنى ـ نزلت دمعتي بصوته وغصته والكلام وگف وأختنك ورجع گمل وأني أسمعله والكل يسمعه

مشعان ـ الله يرحمه جان كلما يلتحق يجيني ويوصيني بيج يابه عينك على لبنى هي فقيره وهم وصي خالتي

وأني هضمته وظلمته لو من الأول مشتري اله بيت ولا نشلع گلبه بس قدر رب العالمين وراح يم ربه وتركج أمانه أنتِ وبناته والقرار التوصلنا اله يخدمج ويخدمنا وهذا الصالحج أكثر وأريد أحجي وتسمعيني وبعدين الج كل الوگت تقررين براحتج . 

عمج محمود شويه لسانه وحجاياته ثگال ما ينجرعن ومشاكله ما تخلص واحنه نريد بناتننا يتربن تحت كتفنا وحمايتنا وما نريد نقصر لا وياهن ولا وياج لان أنتِ امانه المرحوم وحتى نخلصج من عمج محمود ومشاكله هو وبناته قررنا ناخذج حليله لنافع أبني خيرة الزلم وأنتِ اعرف بي ابن عمتج وتعرفينه كلش زين ولا تستعجلين برد قرارج 

الشيخ حبيب ـ وأنه يجدي بنيات حفيدي ماريدهن ينهضمن وأحد يتعدى عليهن واليوم وعكبه والوراها أنتِ تكبرين وهنه يكبرن وأنتِ بعدج صغيره والحياه كدامج والفات مات والمرحوم حفيدي كسرة گلبي راح لرحمه ربه والبجي مايرجع ميت يجدي وأنتِ مؤمنه ارضي بالقاسمه الله الج وافقي على حفيدي خيره الزلم ولا تكولين حمايه والحمى نار هذا الحجي كبل هساع أنتِ تحلين لو أخذج حليله اله . 

مشعان ـ وأحنه بالأول قررنا أبني الجبير حربي وهم على طلب عمتج وهبيه لان هذا حقها تريد بنات أبنها يمها بس ما الله هداه رافض وأني أحترمت رغبته وقراره 

ومن بعده قررنا ناجح بس الشيخ رفض لان ناجح بعده مو كد المسوؤليه وأخر شيءقررنا عل نافع افضل لكونه أقرب الج وأبن عمتج بعد والقرار الأول والأخير يرجع الج بابا وما نجبرج ابخد الج حق ترفضين او توافقين بس أنتِ هنا لازم تفكرين بناتج لا تصيرين انانيه لخاطر بناتج

لبنى ـ ما حجيت وطول ما هما بحجون أني ساكته ورفعت رأسي ونزلت دموعي باوعت على نافع ساكت ونزل رأسه ويفر بجداحته والشيخ عدل كعدته گال 

الشيخ حربي ـ شوفي ام رانيه اني مـا أريد أظلمج وأحنه قدمنا نافع لكون أنتِ متعلمه وماخذه عليه عكسي اني عدد مرات شايفج اني موتت اخوي ماهاضمها ادور أخذج حرمه الي واكفه وعلي 

لبنى ـ نافع كرصه من ذراعه والشيخ أبتسم أبتسامه خفيفه وهمس نافع بكلمات خفيفه

نافع ـ شيخ أنتَ هم طلعت ادور مصلحتك! 

لبنى ـ سگت وگح وما فهمت عليهم بس شگيت بلينا! معقوله .. من بعد سگوت حجيت أني أترخص منكم .. گمت للغرفه وأسمع عمي مشعان يحجي 

مشعان ـ أم نور عوفيها على راحتها لحد يحاجيها أمشوا على رغبتها .. خلوها تفكر لاتستعجل بقرارها واحنه ما مستعجلين . 

الحجيه عطايات ـ أي لاتلحن عليها هي تكعد لحالها وتصفن على وگتها وتقرر وما تحصل زلمه مثل نافع يتحمل بهل الأمانه والمسؤوليه العافها اله أخو . 

نور ـ يحجون وأمي ضلت حايره وجدي گام وعمتي وهبيه باوعت على الشيخ بنظره خذلان هو نزل رأسه خلت ومشت 

وخالي مشعان باوعلي بنظره تكسر الخاطر . 

مشعان ـ شلونج عمي شلونها بنيتج 

نور ـ الحمدلله عمي زينه 

ـ رجلج ما بين ما نعرفت أخباره وين.. نافع يابه شخبار صاحبك 

نافع ـ والله حجي ما أعرف شيء عنه من يوم السافر ولا عندي أي تواصل حساباته كلهن مغلقه وأرقامه متوقفه 

مشعان ـ وين راح هالولد وعمتك شلون هيج تمشي هالمشيه هاي وتخطي هالخطوه وتسافر هي وأبنها وما دگول شبيهم وليش سافروا والله يصبيحه شعندج دگات . 

الحجيه عطايات ـ تسودنت على عمرها بس نگول الغايب عذره وياه لازم يرد ونعرف شنهي طلابتهم . 

نور ـ بقيت ساكته ورفعت رأسي لگيت نافع صافن عليه وصفنته طويله تالي جر حسره وصفگ أيده وحبوبه باوعتلنا وهزت رأسي بقهر وگامت وضلينا وأني سحبت نفسي وگمت لحگت أمي ولبنى وتلكتني لينا ها بشري 

لينا ـ يمعوده هاي لبنى بس تصيح تعاركنا أني وياها عفتها وطلعت متخبله وكاعده وخالتي دزتني گالت كولي لنافع خل يوصلنا البيت هسه . 

نور ـ ديله روحي گولليه تلگينه كاعد يمهم لما أجيب ممات والترمز ضلن بالمطبخ هسه اجي .. 

راحت على نافع واني رحت عليهن لكيت أمي كاعده لازمه رأسها ها ماما شبيج 

سميعه ـ ما بيه شيء عرج ما يطگني .. لملمي غراضج وشغلات بنتج لاتنسين شيء لاتكعد وتخبصج 

نور ـ ماشي .. ها لبنى عيني باوعتلي وصدت وجهه وعيونها مورمات من البچي كعدت يم أمي همست ماما عوفنها خطيه 

سميعه ـ لا هاي هيه أعوفها ولا عليه شلي بخطيتها باجر عگبه يصير ما يصير تگول ردتي تخلصين مني وأنطيتني لنافع .. 

شلي بهل الطلابه وهي كاعده بيت أبوها ما يشيلها البيت تشيلها عيوني هي هم أنهضمت بعدها جاهل ششافت من حياتها يله ما كملت سنه على زواجها ترملت أدور اطاوع أهلي وقرارتهم وأشيل خطيتها وازوجها زواج ثاني حتى لو نافع زين هذا زواج ما يندرى عنه .. احطها وأكعد 

نور ـ أي عفيه ماما . 

ـ لا يمه ما يحتاج توصين .. ديله گومي لمي غراضج وغراض أختج خاف منا منا وشوفيلي لينا وين ولت 

ـ هسه تجي دزيتها على نافع 

ـ خل تجي لاتبطي محجي بإمرها حربي يريدها اله 

ـ صدك تحجين ماما وشلون أقصد يعني معجب بيها لو شنو سالفته 

ـ مدري هذا العرفته من أمي هو حاجي لحبوبته بيها ومحد راضي وضل هو بين حانه ومانه .. دكومي هسه مو وكت سوالف هسه يجي نافع شلعنا گلبه صاير سايق النا . 

ـ ماشي گمت ولبنى مرتچيه على تاج الجربايه وتمسح بدموعها الله يكون بعونها وبعوني مدري شگول أضمها بگلبي أحسن .. طلعت شفت نافع جگارته بحلگه والسويج بإيده طلع لبرا ولينا ماكو هاي وين راحت . 

رحت المطبخ وسمعت صوت حبوبه چاي من حدر غرفة عمتي وهبيه وحبوبه تحجي وصوت عمتي وهبيه تبچي ..

الحجيه عطايات ـ وعليش تبجين البنات مردهن الج ولحضنج وشنهي فرق نافع عن حربي أثنينهن أخوان 

لو الا تحطن بيها ما تكعدن راحه والبنيه ميبسه رأسها من يگول توافق كاعده وتنوحين عبالج هين عليَّ أزوجها 

بس شسوي بنيه جاهل وراها بنياتها تتزوج أخيرلها 

وهبيه ـ لا عمه أكو فرق والحربي اله أولويه أكثر من نافع وأخوانه هي أرملة أخو وأقرب اله على أقل يجيبها عندي أكابلها أربي بنات أبني وياها أنه من دور جانت حرمة باقر شنو شفت منها أنوبه تصير حرمة نافع لا عمه هذا مو عدل أبد مو عدل الله وعباده ما يرضى بهل العمل .. 

ـ شنهو المو عدل ولج وهبيه تردين تشبين النار والفتنه بين الأخوان وشنو فرق نافع عن حربي أها قصدج كلمن وأمه وحد هذا دگج ومدگوج بالسالفه ليش نويفع شبي ما ترضين بي .. 

ـ عمه دخيل بختج أفهميني أني سالفتي مو ويه نافع الولد بسلامة عمره ما بي شيء وهو يحب أخوانه ويتفداهم وأدري ما يقصر بس هم ترد يم حربيه ونفس المشاكل هم تصير حصتها چا أنه ششفت منها وين العدل وبناتي يبرن عند حربيه . 

الحجيه عطايات ـ هسه خل ترضى عگبها نحجي بهل السالفه ولاتخافين أجيبها يمج وأنه أريدن نافع عندي حواليه المن أعوفه لأمه گلبها گلب يهودي ومهديه وسحورتها يومين ويسوله عمل ويلعبن بي فلك وأم الحسن أدهرهن دهيره 

لو تزوجوا أجيبه عندي خل يگابل أخو ويسنده المن عايفين القصر شگد شگبره يطارد بي الخيال . 

وهبيه ـ عمه نافع الف من تتمناه عوفي الولد لاتغصبونها عليه وأنه منى عيني تصير لحربي بس كسرلي ظهري حربي ما يريد حرمة أخو وأدري بي عليمن حاط عينه يعمه حربي عاشگلها وحده جاهل بگد بناته صغيره عليه يعمه أنه مشلوع گلبي وحايره بهل السالفه الطلعلي بيها حفيدج رگصته بعيونها رگصته سودنته . 

الحجيه عطايات ـ لا يوهبيه لبنى من نصيب نافع وحربي أنه أريدن اله مره شيخة تكظب ظهره وقصره

ولينا بعدها زغيره خطيه نظلمها ويه حربي واخافن ما يخليها تكمل دراستها وانه بودي اخذها اله بس اشوفنها اصغيره عليه وبعدها ماشايفه من دنيتها شيء وأنتِ لاتضلين تنگين على رأس ولدج خلينا هسه بهل السالفة عگبها نحجي بسالفته . 

ـ بس عمه حربي عاشگها وواكع على وجه چفي وأنه أشوفها ما ترهمله خفيفه رأس وبس تفتر مو ثگيله مثل أخواتها هي قبل شهرين جنا مسرحينها بالفطايم وتلعب ويه حمودي جاهله يعمه جاهله مو أم بيت هاي كاظبه كتابها وتجي تضل بس تدرس حتى هو ما يفهم منها شيء أنه ازوجه يرتاح لـو ينشلع گلبه بتدريسها وينها وين الزواج ما ترهمله يعمه ما ترهمله . 

وهو جبير عليها وأذا ما أخذ لبنى ولم بنات أخوه أخذله سوسن بنت أخوي تعادل عشره من لينا بس جيب اليقنعه ويطلع هالمكموعه من رأسه 

ـ أنه أحاجي ما الج لزوم عندي بس أنتِ أقنعي لبنى على نافع هي تأخذ بحاجيتج وتسمع منج لان ميبسه رأسها ما تريده المكموعه . 

ـ والله يعمه أشوفنج هاويتها لنافع ومن أول ما حجوا بالسالفه أنتِ گلتي أريدنها لنافع 

ـ أي هاويتها شتردين هساع وليدي هم مشلوع گلبه بلگي يكعد حظه وياها وهي عاقله وأثكل أخواتها تعجبني هالبنيه تحمل الرجال تحمله مثل نسوان گبل

والأريدنه منج تحاجينها وتقنينعها على نافع وأنه سالفة حربي عندي . 

وهبيه ـ أريدها منج يعمه 

الحجيه عطايات ـ توگلي ما الج لزوم . 

نور ـ أنصدمت بكلامهن عجيب .. رحت المطبخ جمعت أغراضي وطلعت لگيت عمتي وهبيه كاعده ويه لبنى وتحجي وياها.. ولينا تباوعلهن صفنت عليها الشيخ يريدج يا لينا بس أگو مكر ومخططات تخرب رادت الشيخ 

وهبيه ـ هاي سنة الحياة يا يمه يا لبنى منو يعرف ساعته شوگت ووليدي راح الدار حقه والله يعوضه الجنه وأنتِ الله يعوضج ويجبر خاطرج وكسرتج على وليدي 

ونافع خوش نافع ربى بالقصر على أيد حبوبته نافع 

مو تربيه حربيه يلبنى نافع تربيه حبوبته وأنه لما أشوفن هالقرار بي صالح ومناسب ما أحاجيج وأقنعج عليه وهم فكري ببنياتچ باجر عگبه يكبرن والبنيه

مردها لأهلها محد يخليهن عندج وأنتِ هم بعد صغيره وتجيج قسمه ويزوجونج جذب ذيج من ذيج تبقى كاعده على خلفتها 

هسه الله دزلج نافع مو غريب عليج تعرفينه وعشتي وياهم وأخذتي عليه مو مثل حربي وأبن عمتج أكربلچ وهو من يومه شايل همجن وواكفلچن بالصغيره گبل الجبيره 

وأنه حجيت العندي والباقي عندج يبنتي فكري بناتج وفكري بنفسج ما تدرين الدنيا شماضتلج مدري يجيج واحد يشلع گلبج وتبهذليين وبناتج ما يضلن عندج فكري يمه فكري .. 

نور ـ يمه گيد النسوان يمه .. سگتت ولبنى ما حجت ولا حرف وعمتي طلعت ونافع دزلنا خبر ولينا طلعت قبلنا شالت الجنط وطلعنا وحبوبه واكفه بالطرمه شافت لبنى وأخذتها على صفحه ونافع جان واكف

گبل صعد السياره شغلها . 

الحجيه عطايات ـ محد يچبرج على شيء ما تردينه وأنه وياج وبظهرج وبناتج يضلن عندج وأذا ما وافقتي هذا هو مو لزوم الزواج وتضلين بنيتنا . 

نور ـ باستها ولبنى بس ساكته وعيونها تحجي بدموع ونظرات كلها حزن .. صعدنا وتوگلنا للبيت طول الطريق ساگتين والبنات نامن .. وصلنا البيت لبنى ﻧزلت أول وحده ونافع شغل وطلع .. 

دخلت غرفة أمي نومت بنين على جرباية أمي تعبانه من الطريق وتمددت يمها تعبانه ونعسانه وأمي تغسل وتعقم المميات .. وصلني أشعار فتحته من نافع 

نافع ـ بس سؤال وبعدها وعد ما أحجي بهذا الموضوع 

نور ـ جواب 

ـ خوما ضجتي مني 

ـ بخصوص شُــنو أضوج منك 

ـ علمود هاي السالفه الزواج 

ـ لان تأخذ أختي هيج قصدك 

ـ أي 

ـ لا عادي ولا يهمك وأذا أنت مهتملي وخايف على گلبي ومشاعري لان أصلك طيب

فتذكر أني بيوم من الأيام دست على گلبي وما أهتميت الك ومشيت بحياتي لان هو هذا الصح وتعرفني وتعرف ترتبيتي ما أرضىٰ بالغلط وما أمشي بي نهائي لو جان على حساب أذية گلبي ولهذا أنتَ من شفتني هيج تقبلت الأمر طبيعي وما زعلت مني بالعكس صرت أحسن وتحول الحب الى صداقه عظيمه هذا الشيء جبير عندي .. 

ـ أبداً ما الوم گلبي ليش حبچ وأنتِ بهذت وعيچ وعقلج 

ـ الحب مو گلشي بالحياة نافع .. الأهم من هذا كله تلگي أنسان نفس روحك يشبهك ويفهمك مثل ما

أني لكيت غافر بس الحمدلله على كل حال .. 

صدك وثق من گل گلبي جنت أتمنالك أنسانه تعوضك وتجبر كسرك وخاطرك لان أني كنت السبب بهل الكسر وبالعكس فرحت لان لبنى راح تكون من نصيبك أنتَ تستاهلها وهي تستاهلك وأصلاً لايگين لبعض بغض النظر عن هي زوجة أخوك بس هاي سنة الحياة لا بكيفك ولا بكيفها وأقدار رب العالمين نتقبلها ونرضي بيها أشد الرضا والقبول وگلشي يجي من رب العالمين بحلوه وبمره هو خير ألنا .. وأني راضيه الحمدلله والله يرضيك ويسعدك سعادة تغنيك وتملي گلبك الطيب 

ـ الف رحمه ونور تنزل على تراب أبوج الطيب الرباج هيج تربيه صالحه .. وأني موجود ووياج وبظهرج بكل وقت تلكيني ساندج أبداً تتردين وتگولين نافع تزوج وهاي هي لا أني صديقج وأخوج الجبير أذا تردين . 

ـ ما تقصر أن شاء الله من أحتاج شيء أول شخص أجي عليك . 

ـ ماشي عيني ديري بالج على نفسج وعلى بنتج . 

ـ أن شاء الله .. أخذ راحتك 

ـ الله وياج عيني . 

ـ غمضت عيوني ما أريد أتذكر شيء من الماضي خلص نور نفضت رأسي وأفكاري وفتحت موبايلي طلعت صورته وبجيت مشتاقتلك ما أشتاقيت النا ما أشتاقيت لبنتك ليش هيج سويت بينا ورحت وعفتنا ليش غافر كسرتلي گلبي وفشلتني گدام أهلي كلها دگول راح وعافها .. أستاهل منك هيج أستاهل .. وينك غافر

حضنت بنتي ونمت حتى عالعشه ما كعدت ومر أسبوع ولبنى عازله نفسها وأحنه عفناها على راحتها ما نريد نلح عليها وعبالها نريد نخلص منها بالأخير هذا زواج وقرار مصيري .. 

ونورس من عرفت أستغربنا منها أبداً ما حجت ولا تدخلت ولا گالت بس عيونها تحجي الظاهر مقهوره عليه لان راح يتزوج وهسه يله حست بقيمته .

كاعده أني وأمي تلعب بنتي وأني أمشط شعرها وأسويلها نخلات شوفي نخلاتي ماما يخبلن 

سميعه ـ يمه فدوه لنخلاتها يمه قربان ونذر لبنيتي 

نور ـ تضحك لجديتها ودخلت علينا لبنى وجه جان زين 

وحسيت عدها موضوع بس متردده .. لبنى بيج شيء 

لبنى ـ لا بس عندي موضوع يخص غافر أريد أحجي وياجن بي دام ماكو أحد بالبيت ونورس يم بيت جدي . 

سميعه ـ خير أن شاء الله شنهو الموضوع ونورس شعليها بغافر شو أكعدي أكعدي قلقتيني أحجي 

لبنى ـ خاله أني سمعت سالفه بين نورس وبين عمتي حربيه صدفه جنت رايحه وسمعتهن يحجن بخصوص نور ونافع 

سميعه ـ يا سالفه هاي منين طلعن بيها أنوب كملي شسمعتي بعد

لبنى ـ أي ونورس گاللتها حجيت لخالتي صبيحه گلشي يخص نور وعلاقتها بنافع وكل سوالفهم وعمتي حربيه تأكد عليها حجيتي كل سوالفهم .

سميعه ـ خير أن شاء الله 

نور ـ أمي باوعتلي وأني ما مستوعبه الصدمه يعني هنا جانن ورا خراب عقل خالتي وخراب بيتي حسبي الله عليج .. سگتت ولبنى تباوع علينا وأني أتهرب من عيونها مو وگتها أبداً باوعت لأمي وأمي عضتلي شفتها رجعت لبنى حجت

لبنى ـ خاله يا سوالف نورس تحجي بيهن ليش نور جانت تحب نافع! يعني أكو بينهم علاقه لو شنو بالضبط لان گالت على أساس حتى من نور متزوجة غافر ما عافت نافع أكو علاقة ومراسلات بينهم 

سميعه ـ يا صخام الوجه على هالحجي من مصيبه صابتهن 

لبنى ـ هذا السمعته وأني الأعرفه منج من جنت اسألج تگولين لا نور وغافر على علاقه وواحد يحب الثاني بس السمعته ما أدري دخت وأجيت أحجيلج واسألج بنفس الوقت . 

نور ـ تحجي وأني صافنه على أمي شنو تجاوبها لان هالشيء أجه بوقت مو مناسب وهي طلعت ما تدري بگلشي . 

سميعه ـ يا سوالف ماما تحجين بيها هنا هذن يخوطن ويلوصن شغلتهن هاي يحجن ويطعن ماكو كل سوالف 

وماكو كل علاقه ونافع بنت خاله وربى سوا ومشى عليها وابوها ما وافق وهي مالها نفس بي تريد أبن خالتها وصارت القسمه هاي كل السالفه بس هجمن بيتها عساها بصحتهن وعافيتهن أي والله وين يروحن من حوبة هاليتيمه . 

لبنى ـ ونورس 

سميعه ـ شبيها سليمه . 

نورس ـ ليش دائماً دگول بيتي أنهجم من ورا نور 

سميعه ـ شمدريني يا أمي أكعد احللج هي خبله وعقلها طگه ونص منو يتحمل عقلها وشگوگها 

وأنتِ لاتضلين مخليه بالج يم هاالسالفه وفكري 

صدك فكرتي أشوفج ساكته لاحس لا خبر . 

لبنى ـ لا مـا فكرت 

سميعه ـ خير أن شاء الله على راحتج 

نور ـ طلعت وأمي لطمت على وجهه سمعتي الحقيرات المسمومات طلعن هنا ورى خراب بيتي حسبي الله بيج يا نورس ..

أجتي سدت حلگي يمه طين على رأسي غافر هج من ورا سوالفهن أني أنتهيت ماما أنتهيت غافر بعد ما يرجعلي ما يرجعلي . 

سميعه ـ ولج سدي حلگج لاتسمعج هاي الثانيه ويخرب عقلها على نافع وأحنه ما صدگنه الله يهداها 

نور ـ وهسه شنسوي بيتي وهجمنا الما يخافن الله وغافر الله يدري شنو حجتله خالتي وتغير وأخذ خالتي وسافر معقوله يكون عرف وخالتي حجتله سوالف نورس يا صخام الصخمني يعني أني بنظر خالتي وحده خاينه وأني أكول ليش شدت وياي بسالفة الموبايل والطلعه والطبه وكرهتني كره مو طبيعي أثاري الحبايب خوش معبيات رأسها وغاسله عقلها عليه من الله يأخذج ينورس

سميعه ـ صمي حلگج وسگتي وشنسوي نكعد ونسگت 

ـ ليش ما نگول لنافع وخل يتلاحك الموضوع بلكي يعرف شيء عن غافر أو هو محلفه على أقل اذا يتواصل وياه يحجيله يبررله .. يمه أحجيلي شسوي شصخم 

ـ لا نحجي ولا نگول لنافع نسگت ولما يرجع غافر عگبها نحجيله ولو أظن غافر ما عنده علم بالسالفه كلها وخالتج ما تحجيله هيج سالفه لان تعرف أبنها خبل ولو يدري جان ذبحج وذبح صاحبه عبالج بالهين بس لا غافر ما يدري 

ـ شلون ما يدري شلون وليش سافر وبدون ما يگولي 

لا غافر يدري 

ـ لا ما يالرعنه ما يدري لو يدري جان ما گالج رجعي للبيت وحاول وياج جان من طردج بنعال ما يشتريج بعد ومن الصبح يطلكج ويمشي وعذره وياه يكول أمي ما تريدها ومشاكل وكان الله يحب المحسنين وجان ما راسل نافع من سافر وگاله نافع أني سافرت! 

ـ هيج تگولين 

ـ أي هيج أكول والسالفه نطممها وتسدين حلگج لما يرجع رجلج وگتها يحلها الف حلال أكابل أختي وأحاجيها 

ـ ونافع ليش ما تگولليه

ـ ما أكوله وديري بالج تحجيله الرجال نشلع گلبه بالمشاكل ويانا أدور على صاحبه وأنتِ مو رخيصين عنده 

حرام يجي يحط طلقه برأس نورس ويبتلي بيها ويروح شبابه بالسجون خل يلتفت على حياته يتزوج يستقر أشاف من شبابه كظاها هضم ومشاكل ويه أهله وسحوره من الما يخافن الله حسبي الله عليهن . 

ولبنى خاف تسألج لاتججين الها وشيء من الماضي مات وقسمه وما صارت وهي من أجتي حجت يعني اكو أمل توافق .. 

ـ ماشي ماما .. وبعدها سگتنا عن الموضوع بس گلبي مليان قهر وحقد عليهن وكلما أباوعلها أريد أشرب من دمها وهي طافيه طفية موت وأريدها من الله يهدي لبنى وتوافق على نافع وأتشمت بيها يابه تبرد گلبي أذا أخذته .. 

المغرب طلعت لگيتها كاعده تطبخ العشه ها اليوم العشه عليج والله عاد مشتاقين لطبخج . 

لبنى ـ تدللين عيني .. كملت العشه وهي كاعده يمي صفنت عليها وعلى وضعها وغياب غافر حسبي الله عليجن يخلن الواحد يصفن بگيدهن .. 

ومن يوم الفتحوا الموضوع أني دايخه ومن رجعت گبل أتصلت عليه وياريتني ما أتصلت .. طلعت رقمه وأتصلت وأجتي لينا أبقي برا 

لينا ـ ليش شگو 

لبنى ـ گتلج أبقي برا ولاتتدخلين 

لينا ـ أوك 

لبنى ـ طلع فاتح خط الو نافع 

نافع ـ نعم 

ـ أجيت أحجي وياك بالموضوع 

ـ أحجي أسمع 

ـ ياريت أنت تنهي وتبلغ أهلك برفضي ونهائي هذا الشيء ما يصير لو أموت 

يعني كل عقلك مستحيل نافع مستحيل هذا الشيء يصير شلون نافع شلون بس فهمني شلون تتقبلها على نفسك تأخذ زوجة أخوك ..

.. شنو نسيت لو أذكرك بسوالف أختك وأني أتصلت علمود أذكرك خاف ناسي لا ما شفت ولا سمعت كلمه منك ولا رفضت ولا عارضت گبل وافقت وليش هالسگوت! 

فه گلت أتصل وأذكرك وحتى لو ماكو هذا الشيء عائق أني مستحيل أوافق على هالزواج أني على حياة عينه بسبب أختك شك بيه بسبب غبائي ضميت عليه السالفه وضل أيام الليل ما ينام من الغيره والقهر أيام هو أعصابه فايره مني تريد هسه من غمض عينه عن الدنيا أتزوج ومنو أخو الشك بي! لا مستحيل نافع مستحيل وياريت أنت تحجيلهم وتنهي هالموضوع من أساسه . 

ـ وأني شعليه جايه تصلين عليه صلي والموضوع جايه تحجين بي حضرتج أني ناسي وما مخلي بالي يمه بس أنتِ ما نسيتي وهاي مشكلتج مو مشكلتي . 

ـ لا ما نسيته وأني مو غبيه وگتلك لومو هذا الموضوع أني ما أوافق على هالزواج نهائي 

ـ يله هذا هو براحتج ولا اني كاتل ومرغل روحي عليج وهذولاك أهلي والشيخ روحي خابريهم واحجيلهم ليش جايه عليه 

وما تردين لا تردين تسوين عليه فضل من السما للكاع تخلصيني هالزواج لا أساساً أني ما مفكر بالزواج وشايله من رأسي لا أنتِ ولا غيرج ووافقت وسگتت لان أنتِ أمانة باقر وعلمود بنات أخويه لا أكثر ولا أقل 

ـ أنت أحجيلهم 

ـ لا لا أنتِ تحجيلهم اني ما عليه فوك ما مسوي زينه تجين تتهجمين وتصيحين عليه . 

ـ سد الخط بوجهي ومن هذاك اليوم أني مصطوره وساكته وحاطة بناتي وكاعده وحاجيت خاله ونور وبلغتهن بخصوص الموضوع گلت يصير عدهن علم ويعرفن منو السبب بخراب غافر وغيابه وسفرته . 

ونورس من يوم الرجعت هي ساكته ووجهه حزين وهذا السكوت ما مرتاحتله مو بعادتها يجوز لان شافتني رافضه سگتت عني يله بعد أحسن وهذا الشيء ما يصير . 

جنت بالحمام أسبح وعفت البنات يم لينا وسمعت صوت عمي يصيح وعالسريع ما أعرف شلون لبست ثوبي وطلعت وشفت رانيه بحضن خالتي فاحطه من البجي وتنفخ بوجهه جريتها ونفضتها قوي وعاطتت وردت روحها لميتها لحضني ميته خوف وعمي يصيح 

محمود ـ مو بنات صراكيع الواحد ما يأخذ راحته بهل المهجوم ولج سميعه سميعه من غضب عليج وعلى بناتج وعلى ساعة السودة التزوجت بيها 

سميعه ـ أجيت أجيت من ساعة المباركه الصرت بيها رجلي رجاجه اي والله . 

لبنى ـ كعدت أخذ نفس وهي تشهك لميتها بحضني يمه بنيتي شبيها شصار 

لينا ـ سگتي وخليها جان موتها الخبل.. عنده أوراق بالأستقبال رايحه عليهن ومسويتهن سريده واجه وشاف لو تخبل بحيث ضربها ضربة موت ونورس ما نرضى عليها عاطت بي وجرتها منه فد خبل فلا صاحي هالرجال من الله كرفك وكرف أوراقك شكو حاجز للأستقبال اني أدرس وخابصه نفسي مو بگد هوستك

محمود ـ مو يردون يزوجونها ما توافق شگو ميبسه رأسها شتريد هاي شتريد حاجيها وخل تفض هالسالفه لا والله أذبها بحلك جلب 

سميعه ـ وليش يمه تذبها بحلك جلب البنيه ما تريد تتزوج چا هي غصب عوفها بحالها تروح تروح وترجع عليهن وأوارقك شگو عايفهن بالكاع وجهال يفترن شسوي الهن أربطهن وصي بناتك يلممن وراك ترى زهگت روحي أني

محمود ـ وزهگتهم كل خير ما منج لا تحلين ولا تربطين بس شاطره تلعلعين وتصلين بصوتج عليه 

لبنى ـ نور راحتلهم لان گبت بينهم للستار ولينا گامت سدت الباب ورانيه تشهك بصدري رفعت وجهه خده أحمر دم تنكسر أيدك أن شاء الله طفله شلون تضربها 

لينا ـ هذا يعرف طفله خبل المخابيل .

لبنى ـ ما حجيت بس نار تأكل بصدري عليها بجيت وياها لما نامت نوب شبعت قهر عليها من كثرما بجت تعبت ونامت .. حضنتها وأبوس بيها ودخلت خالتي ووياها نور .. كعدت فاحطه ونور جابتلها جهاز الضغط كعدت تقيسلها . 

سميعه ـ من دهرك فرك كون مال للطم شالع گلبي أنه شوگت أخلص شوگت 

نور ـ خلص ماما كافي لاتنجلطين أوكفي خل أشوف ضغطج . 

لبنى ـ قاسته طلع معلك ركضت جابتلها علاج وجرت المخده وتمددت بالكاع يمنا ورفيف راحت عليها وجرتها نامت بحضنها يحبنها وهي هم تحبهن . 

سميعه ـ سوده بوجهي عليجن يبيبي وعلى حظجن والله أبوجن لو عايش ويشوف هالعمل يأكل محمود بدون ملح بس حظ أمجن ما حوا زلمة الزين بس حظي حاوي وملفي اليه وين ماكو واحد زايعته الكاع وكاولي. 

لبنى ـ سگتت ولا هنا حجن وياي بس يباعن اليه كأنما يگولن وافقي لخاطر بناتج.. خليت رانيه ونمت بصفها وأني أبوس بيها وأمسح دموعها خنگتني خنك . 

نايمه وأسمعهن يحجن يينهم 

سميعه ـ ما حجت وياجن 

لينا ـ لا أبداً ولا جابت طاري ذابته عالصامت 

سميعه ـ مشعان خابرني يسأل حرت شگوله كتله

بعدها ساكته وكال أقنعينها حاجيها وأنه ما أريد تحس اني مستكثلتها لو ماله منها ومن بناتها مخليتها على راحتها بس والله خايفه على البنيات من هذا الخبل لا يوم يصكط وحده منهن اني ما خلصت من نورس وكفت من أمهن طلعلي أبوها .. كاوليه ما ينعاش وياهم . 

نور ـ والله ماما تردين الصدك خوالي لو يدرون ما يسگتون على ضربته اليوم لـ الرانيه وهو أيده ثگيله 

سميعه ـ منو يرضى بهل العمل يمه منو يرضى الظنا عزيز وهنا بنات باقر عمت عيني عليك يعمه بعدك ششفت من شبابك چا أنت تموت وهذا الكاولي عايش 

لينا ـ هي لو توافق أويلي شيصير بحال بنته كبل تنضرب أربع جلطات هيج يطلع دود من گلبي 

نور ـ أي والله أريد أتشمت بيها شماته ولو بحياتي ما شامته بإحد الا هاي والله تبردلي نار گلبي غير لو تحجي غير لو دگول نعم موافقه وبكل سرور شبيج يحظي دوافقي وفضينا خل نفرح شوي مو طگ گلبنا من الحزن والهم والغم هو العمر ينعاش مره وحده مو بالله يمه .

سميعه ـ چا هي بگيفها يمه غير هذا رجلها عزيز عليها ما تهون عليها عشرته وهي من تزوجته شافتها مثل أبوها بعدجن جهال وتزوجتن ما تشوفن ميتات على زلمجن . 

نور ـ ها سميعه خاتون هاا أشو هيج قصدج گاتلين روحنه عالرجال ما أقبلها ترى . 

سميعه ـ ديله أخذي أختج وگومي خل أحط رأسي وجيبلي غطا هاي نامت بحضني سوده عليه . 

نور ـ ماشي ولـو ما تستاهلين بس أمي أكسب بيج حسنه

لبنى ـ طلعن وأني نمت وگعدت رأسي مصدع يوم كامل لا أكلت ولا شربت من القهر البگلبي تالي صفنت عليهن وعلى الوضع لكيت نفسي متصله عليه وساكته ودموعي تچري على خدي ونار بگلبي 

نافع ـ ها خير 

لبنى ـ نافع أني فكرت بس مو على سواد عينك اوافق من لا جاره ضاگت بيه الدنيا

ـ ديلا عاد ست محاسن! كاتل روحي عليج دفضينا وخلصيني من هالهم اني لما الشيخ يفرضج عليه ويكول ما أريد ناجح جان ولا فكرت بس ناجح مو كدها ويرجعج نفس الطاسه ونفس الحمام نفس حياتج وأبشرج هم نفس غرفتج وأمي متحزمتلج بحزامين مو واحد خاف ما تدرين 

عاد اقلها اني رجال واخو خيته كفوو اكدر أعيشج اميره أنتِ وبناتچ بس أنتِ ثوله وغبيه وأني واللي الأعرفه الصين اذكياء ليش أنت غبيه . 

ـ سد الخط بوجهي خلاني أفور شمرت الموبايل مقهوره ودخلت عليه لينا باوعتلها وهي بلعت ريگ 

من يجون رجلج أكسرها أذا طلعتي . 

ـ منو يچي ما فهمت 

ـ لا زين فهمتي بس مسويه روحج غبيه وثوله بس لاتحلمين زايد البرأسج ما يصير واوعي وأصحي 

ـ هو شگو لبنى ترى أني ما عندي شيء لا محاجيته لا كاعدع وياه

ـ كفختها لا هاي العايزه تكعدين وياه ما تنجبين لا أكوم أطيح حظج . 

ـ هو معجب بيه ويريدني أني شگو 

ـ شگد شفت صلفات مثلج صلفه ماكو ولج الثكل زينة البنيه ليش تبقين ثوله 

ـ ديله عاد فضيني بهل المقوله مالتج اليسمعج يگول اني مصخمه وجهج متگولليي أشسويت طالعه طابه عاشگه والرجال هو الحجه بالسالفه لزگتي لديني دبگتي

وماكو ثوله غيرج أنتِ صارلج أسبوع من حجوا وياج ما توافقين وتخلصين نفسج وتخلصين بناتج من هالوحل على شنو رافعه خشمج وين يصح الج واحد مثل نافع

ـ ها هيج صار الحجي تقللين أحترام وياي ولج لا عبالج الشيخ يريدج كبرتي ترة بعدج زعطوط وبعدين هذا الموضوع يخصني لاتحشرين نفسج بإشياء أكبر منج 

ـ أهوو ديله عاد أنتِ كبرتي زعطوط وزعطوط أكلتوا رأسي بهل الكلمه . 

ـ أنزعجت وضاجت مني وأدري زودتها عليها بس تستاهل خل تصفن على نفسها وتعرف عقلها وين وهي متوالمه بإي شكل من الأشكال كافي عمتي وهبيه كارهتها وما تريدها هاي بوحدها تكرها الزواج 

للعصر أجتي عليه خالتي وعرفت صار عدها علم باوعتلي مبتسمه وراها لينا ونور يتحرمصن يردن يعرفن . 

سميعه ـ بالمبارك يمه شايفه الف خير الله يسعدكم ويهينكم زواج الخير يارب . 

لينا ـ ليش وافقت 

نور ـ شو محد گال شوگت وافقتي 

سميعه ـ تجي تبشر .. وافقت وخلص هسه مشعان خابرني وگالوا باجر الصبح يجون يعقدون الهم ماطول أمي أهنا جايه بس أبويه ما يجي تعبان رجليه يوجعنه سوده عليه وحربي مودي للطبيب 

لينا ـ يااااي وأخيراً يصير عدنا عرس 

سميعه ـ يا فلك يمصخمه يا عرس وينا وين العرس بس يعقد عليها ويأخذها وياه .. ديله يمه باجر الصبح كعدي من وگت وتحضري أمي تجينا ويه طگة البريج بس تصلي تلگينها مزوعة يمنا اليوم الليل ما تنامه . 

نور ـ أي من الأول وافقي وفرحينا ياعيني يا خيتي وخل نتشمت بالأعداء ويلي هسه برد گلبي ولج شبيج يحظي راح يصير نسيبنا 

لينا ـ أي والله ويصير حصانا أقصد حصتنا 

نور ـ أمداج سوته حصان طاح حظج 

لينا ـ ماكو فرق نفس الجمله المهم الحمله أقصد المعنى 

ـ أشوفج صايره تعلسين يا حمله أنتِ اليوم شاخطه ديله خل نتحضر صدك ما عندج فستان حلو خل أدورلج بملابسي . 

ـ أي عفيه خل تذب الأسود 

لبنى ـ ما البس فستان والأسود ما أذبه 

نور ـ ليش خطيه تظلمينه بالأسود بعدكم بسم بالله تبدون زواجكم بثوب أسود 

لبنى ـ نور فدوه لعينج مو وگت لبس وفرح عوفني بحالي البيه مكفيني . 

لينا ـ ولابسه أسود يالعروسه وتطلب المرحوم بوسه 

لبنى ـ من طاح حظج وحظ سوالفج الخايسه يا خزي

لينا ـ والله مو قصدي گلت ألطف الجو . 

نور ـ هو هيج تلطفين الجو دخنتي لو باقيه ساكته أشرفلج دومج شاطحه بسلامتج دمشي المطبخ. 

لبنى ـ طلعن وبقيت بغرفتي وسمعت صوت منو أجانا 

حربيه ـ وينها البربوك وينها

لبنى ـ عمتي حربيه! أندفع الباب ودخلت تحجي وخالتي سميعه وراها ونورس واكفه 

حربيه ـ فلفتي عالزواج فلفتي گتلي نفسج علما تأخذينه لو أدري تالي يصير الج الا بساعة الحبلت بي أذبه بالمجاري ولا يصيرلج چا أنتِ تالي تصيرين من نسوانه شسويتله عشگتي يمسودنه بعد تراب رجلج أخضر ما صبرتي بدون رجال بس نسوان صلفات تعلمني بيجن حسبي الله عليجن وعساج لاتهنيتي بي وعسى زواج سم وزقنبوت عليج گون تعيشين شلعان الگلب وتذوگينه يا بربوك 

لبنى ـ تفلت بوجهي بكل حيلها وخالتي سميعه صاحت بيها 

سميعه ـ أمشي أطلعي من بيتي أمشي ورجليج أحشها اذا وصلتي عتبة بابي . 

حربيه ـ تطرديني من بيت أخويه يسميعه 

سميعه ـ أطردج وأطرد كل وحده تحجي وتطعن بشرف بناتي وبيتي ما يلفي هيج شگولات وناس متخاف الله وبابي يعثرج يحربيه وطول ما أني عايشه هذا البيت ما أخليج تفوتينه يله برى بيتي يله 

حربيه ـ والله وگت بيت أخويه يضل للخايسات 

لبنى ـ نور ولينا دفعنها وهي تصيح وتحجي 

سميعه ـ والله لما أم نافع جان طردتج بالنعل 

حربيه ـ هو نافع من يومه حصتج وبختج وما أخذتي لنور أخذتي للهايشه لبنى دگج ومدگوج نافع گتلتن نفسجن عليه أمهات سحوره سحرتنا فريتن رأسه اخذتنا الجن عساجن لاتهنيتن بي . 

لبنى ـ طلعت بوسط عياط وصياح ونورس واكفه تباوع ورجعت صفنت عليه گمت سديت الباب وكعدت .. 

ثاني يوم من الصبح خالتي كعدت نظفت وغسلت ونور سبحت بنتها وسبحت بناتي هي ولينا وكعدت ابدلهن ودخلت عليه خالتي 

سميعه ـ گومي تحضري يمه هسه يجون

لبنى ـ ما عندي شيء خاله هسه أكوم .. گمت لبست ثوبي أسود ونور ولينا يباعن عليه بس سگتن حتى خالتي ما حجت .. بقيت كاعده بالغرفه لما دخلت عليه لينا 

لينا ـ أجوو أجوو 

لبنى ـ أختنگت خنك ورجليه تربطت بحبل وأخذت رفيف وراحت وشوي وخالتي أجتي

سميعه ـ گومي يمه السيد وصل ومستعجل يريد يعقد الكم ويروح اكو ناس ينتظرونه . 

لبنى ـ مشيت وياها شايله رفيف ووصلت وصار كلام السيد لما تمت العقد وصرت على ذمة نافع وهاي تكرظ بگلبي أسفه باقر أسفه ينور عيوني الصار أكبر مني والله سامحني ولاتزعل مني . 

بقيت بالمطبخ ونور مخبوصه هي ولينا وفرحانات 

لينا ـ صار نسيبنا وعلى عينك يا تاجر 

نور ـ خرب سگتي لاتسمعج وتطگ وتموت ونحير بيها وفاتحه وروح وتعال ما ناقصين.. عليج الله ستري علينا 

لينا ـ أهلل والله أهلل . 

لبنى ـ يحجن بينهن وأني أباوع على رفيف عافتني ولزمت الحايط تريد تروحلهم تتحرمص شلون اختها كاعده يمهم وأني لا وتباوعلي ومتردده توكف وترجع تكعد وتباوعلي تريدني أكوم وياها تخاف وجبانه عكس أختها رانيه اللي من هسه مسويه الها جو وجمهور وأدور ورا عمامها وبيت جدها وكحه عكس رفيف ..

"أباوعلها وأتبع خطواتها وهي وصلت باب المطبخ وبنظراتها تتوسل بيه وترجع تبجي كأنما تگولي گومي وياي 

.. وأسمع صوته يصيح الها 

نافع ـ تعالي... لا أوكفي أني أجيج لاتوكعين . 

لبنى ـ أجه شالها وحضنها ودخلت خالتي

سميعه ـ گومي ليش كاعده بالمطبخ وأمي دزت عليج گالت خل تجي لا عيب ولا حرام هاي هيه صرتي على ذمته بعد . 

لبنى ـ كومتني ومشيت وياها دخلت عليهم بس الحجيه وعمي مشعان ونافع سلام عليكم سلمت وردوا وتقربت باوست الحجيه . 

الحجيه عطايات ـ هلا بيج يمه هلا بيج .. مبارك يمه الله يسعدكم ويجعله زواج خير عليج وعلى وليدي . 

لبنى ـ ما حجيت وكعدت بصفها ورانيه بحضنها وذبت نفسها على نافع شايل رفيف وتگومن بحضنه والحجيه صافنه عليهم وگام عمي مشعان أخذ رانيه وگامت تبجي عاد أخذ منه رفيف 

نافع ـ هاي صديقتي هذيج تستغرب . 

لبنى ـ أنطاها موبايله وكعدت ورفيف رجعتلي وضلينا كاعدين وعمي مشعان يحجي بطاري سالفة البيت وشوگت يكمل ما فهمت على شنو يحجون 

نافع ـ والله يابه گوه حصلناه منه أنطيناه فوك سعره مليونين يله قنع وهم بمعرفة حربي الله هداه تكعدله يلكاله بيت بمنطقة زينه بس المشكلة بعده ما گامل الحوش ما مطبك سراميك والداخل ما مصبوغ گال المقاول بس يكمله هالأيام وينطيني خبر . 

مشعان ـ خير أن شاء الله عاد خوش بيت ياهو هو هذا البصف العميد منذر الكتلك عليه 

نافع ـ لا يابه هذاك الگتلي أنباع وهذا صاير بنفس الشارع مقابل بيت عمتي بكم بيت بصف بيت أستاذ فارس بالضبط بناء جديد 

مشعان ـ أي عرفته بس هذا يتأخر أبني ما لگيت غيره 

نافع ـ والله يابه ما لگيت وأكو بغير فرع وبفرع بيتنا هم أكو هذا ناجح گاللنا عليه الورثه بس أني أريد بنفس الفرع قريب على بيت عمتي . 

الحجيه عطايات ـ هذا هو حبوبه وهساع أكعدوا بيت أهلك لما يكمل البيت 

نافع ـ لا حبوبه يكمل البيت يله . 

مشعان ـ بيها الخير .. عمي صار بيتج لوحدج ويتسجل بإسمج وهذا أقتراح نافع لان أحنه وعمتج وهبيه ردناج بالقصر بس ما الله هداه يريد بيت لوحده ومشينا على رغبته وهم أحسن الكم . 

لبنى ـ ماشي عمي .. نزلت رأسي وجبل على گلبي جانت أمنيتي يكون بيتي لوحدي ووياك باقر بس القدر اله رأي ثاني عكست ويانا دنيتنا أنت أستشهدت وأني صرت على ذمة أخوك .. الدنيا أبداً مو عادلة . 

گعدوا شوي وگاموا وبالطلعه عمي مشعان ونافع وگفو يحجون ويه خالتي ولاحظت عمي محمود من عقدنا جان كاعد شعجب وين راح . 

رجعت وأجتي خالتي وگالت 

سميعه ـ الأحد تعقدون محكمه وهاليومين نروح نجهزج ونجهزلج بيت لما يكمل نروح نرتب الأغراض . 

نور ـ يعني بيتها لوحدها 

سميعه ـ أي وقريب علينا تمشين شويه گبالج يصير بصف بيت أستاذ فارس هذا جاي يبنون بي . 

لينا ـ يا سلام يعني قريبه علينا الله

نور ـ والله أحسن شيء بيتها لوحدها تخلص 

سميعه ـ أي والله والأحسن قريبه عليه اني تعودت عليها وعلى بنياتها وأحنه نروحلها وهي تجينا ومن رجلها بالخفاره نبات يمها تبات يمنا وتخلص من عمتج حربيه ومشاگلها لان متحزمتلها بحزامين 

نور ـ لبنى أشو ساكته ما تحجين شبيج 

لبنى ـ شحجي هاي هيه اللي يشوفونه مناسب المهم مكان يرتاحن بي بناتي راحتهن أهم عندي من گلشي 

عفتهن ورحت الغرفه ونورس طلعت راحت الحمام وتقربت عليه الباب جان مفتوح 

نورس ـ مبروك عليج نافع أنتِ تستاهلينه بس هو ما يستاهلج والله يعينج على ما بلاچ شراح تشوفين مصايب وسوالف الا تكرعين شعر ما يضل برأسچ هذا نافع الحبايب يطممن وراه وياما تحت السواهي دواهي ديري بالج منه ترى غدار من العيار الثگيل وضربته توجع! 

لبنى ـ قبل لا أجاوبها اجتها نور 

نور ـ خير نورس شعندج لازمتلها الباب حجايه زايده ناقصه وياها أخابر رجلها 

نورس ـ يمه خوفتيني وگمتن تهددن برجلها عشتوا ما يخوفون جلبي وخابري عيني خابري لان أنتن شغلجن كله على المخابره

نور ـ تردين گتله جلدج بي ملح ما توبين من الكتل ما يحط عندج 

نورس ـ لا أكتلج ولا تكتليني واني ما حاجيه وياج استقري داده حيري بروحج لاتحشرين خشمج اوك 

لبنى ـ عافتنا ومشت عوفيها ختولي 

نور ـ هو عايفتها بس شگالتلج هالمسمومه . 

لبنى ـ تحجي على نافع عوفيها والله ما احاجيها لان أحسها مسكينه بشر بهيج عمر وما عنده وعي وعقل شوگت يكبر . 

نور ـ والله صدگتي .. صدك باجر شنو تلبسين من تعقدون محكمه 

لبنى ـ عندي فستان أسود البسه 

نور ـ هم أسود صدك جذب لبنى 

ـ أي نور خلوني على راحتي هو عقد ساعتين ونرجع 

ـ براحتج ما أضغط عليج 

ـ سگتت ولليل جابلي فستان وگعدن يقنعن بيه ما حاجيتهن ومن الصبح كمت رضعت بناتي وشبعتهن ودخلت سبحت ريحة الحليب فايحه مني ونورس تفوت وتطلع وتباوعلي غلست عليها مالي خلگها عبالها گاتله عالزواج . 

لبست فستان فضاض أسود وسمعت صوت الحجيه! نور ولج نور تعاي شنو اجو 

نو ـ أي نافع وحبوبه كاعدين بالمطبخ أمي سوتلهم ريوك كعدوا يتريگون . 

لبنى ـ تمام .. بقيت بالغرفه وصاحلي خرب دعوفني كاعده 

سميعه ـ لبنى تعالي تريگي يمه الليل كله ترضعين بناتج ما تردين حيل تمشين . 

لبنى ـ أي خاله أجيت .. رحتلهم نافع واكف مرتجي عالكاونتر يشرب بإستكان الچاي .. صباح الخير 

الحجيه عطايات ـ هلا يمه صبحج الله بالخير وحطوج بسوره ونوره .. أكعدي تريگي يمه . 

لبنى ـ كعدت يمهن وهو أخذ الأستكان وطلع بالطرمه بعد أحسن كملنا وخالتي گامت تحضرت وطلعنا والحجيه تحجي على نافع ما بيها جايبها گوه وياه 

الحجيه عطايات ـ گتله أنت وعمتك ما فعل الا تمشين وياي فالج خير بوجهي چا شنهي مبخته يعين حبوبتك 

لبنى ـ فتحلها الباب وصعدت وطلعنا المستشفى ومن وصلنا هنا ما نزلن بس أني وياه وهو يمشي سريع عبالك راكضين وراه وگف وباوعلي شگو 

نافع ـ دأمشي عاد تتگلبين مثل البطه ينرادلج نهار گامل يله توصلين 

لبنى ـ مو جاي أمشي أنت مطيور مستعجل شگو 

ـ مستعجل على السعاده راح أشوفها من وجهج 

دفضينا وراي كومة شغل . 

ـ لاتصيح 

ـ ما مصيح ترى هذا صوتي شسويلج يعني 

ـ لا اله الا الله 

ـ أشو ما عاجبج 

ـ أي ما عاجبني هسه تمشي لـو شلون 

ـ أي نمشي چا أضل أتسامر وياج والله يالله 

ـ مشيت وراه وهو صار بين الناس خرب عافني وأباوعله يتلفت والله مال اعوفه وارجع على هالسالفه هاي تقدمت وصلته 

ـ وين ضعتي

ـ ليش يمه أضيع جاهل أني بس أنت عبالك راكضين وراك ما تشوف الأزدحام

ـ هذا لسانج هو هيج دائماً 

ـ شلون يعني 

ـ يعني ما تسگتين ما الج طفيه 

ـ لا 

ـ مو أكول حظي وأعرفه مصخم من أولها . 

ـ سگتت ما جاوبته ووگفت يمه وأجتي مره جبيره من عبرت دفعتني قوي وبالخطا طخيت جتفه وگلب عيونه عليه ترى ما أدري 

ـ وأني شحجيت ما تعرفين تسدين حلگج . 

ـ غير تعدي هالساعه على خير واكفه على أعصابي وهو كذلك گوه متحمل وأزدحامات شون حظ ما خلصنا هالتحليل الا تفلنا المر .. 

وطلعنا بس أريد أوصل البيت بالي يم بناتي وصلنا لكيتهن كاعدات يبجن عليه سوده بوجه أمجن 

لينا ـ ها گملتوا 

لبنى ـ بس تحليل الدم بعد 

لينا ـ أي زين شبيج شو معصبه 

لبنى ـ شلعان گلب يمعوده وأزدحامات روحي بخشمي جيبلي ماي متت عطش جابتلي وبقيت كاعده يم بنياتي والله لما أنتن فلا أوافق نمت تعبانه العصر كعدت مطفيه والحجيه يمنا بايته وبالليل ضلينا كاعدين يمها كعدنا خوش كعده ونورس من رجعت ما لكيتها رايحه هي وسبأ على بيت جدها . 

وخلال هالأيام عقدنا محكمه وخالتي ونور يشترن ويجهزن غراض البيت والمطبخ ويجيبن للبيت وفرحانات صعدناهن فوك طابق الثاني . 

وملابس اليه مجهزاتلي كامل ولينا تفتح بالأكياس وخالتي تشوفني اخاف ما عاجبني بس أهز برأسي 

سميعه ـ على ذوق نور أخذتلج ردت أخذج بس من ورا بناتج وأنتِ ما فعلتي 

لبنى ـ لا خاله ما يحتاج أروح أنتن كافي واني والله ما محتاجه شيء 

سميعه ـ لا يمه شلون أنتِ تزوجتي ولازم نجهزج ما يصير . 

لبنى ـ يگلبن ومن بين الملابس شفت ستيتات نوم! غمضت عيوني گلبي وجعني 

وثاني يوم هم راحن كملن تجهيز ومن أجن من عزلن خالتي مأخذتلنا مناشف ونافع منشفته لون أحمر وشالتها لينا تهوس بيها شخبله هالبنيه وخالتي تكمخ بيها . 

لينا ـ هاي أنطوها لـ لبنى تروض بيها لنافع الثور الهايچ

سميعه ـ من فلك فلگج گون شعندج سوالف والله لو يسمعج الا يشنقج بيها . 

نور ـ ترة صدك يمه تضحك ما لگيتي الا لون الأحمر 

سميعه ـ شبي الاحمر يخبل لون الحب 

لينا ـ ها خاله ها طلعتي تعرفين الوان الحب

سميعه ـ أنتِ ينراد الج ضبه زينه . 

لينا ـ ريلاكس خاله شبيج نكرصتي جاي نلطف الجو . 

لبنى ـ ضحكنا عليها وخالتي غمتها شعدها سوالف 

ومرت فتره لما كملن تجهيزات والبيت كمل راحن نظفنا واخذن لينا وياهن عافن البنات يمي لليل يله رجعن واني طبخت العشه 

نور ـ ها طابخه العشه زين زين لان رجلج أجه ويانا 

لينا ـ خرب فحطت يمه شگد تعبت شنو هاي عليمن هالتعب فلوسكم قليله صرت أم بيت من ورا تنظيف بيتج يا لبنى حتى شبابيك جلفانهن ولمعانهن . 

نور ـ غصباً عليج شو هاج ودي ماي لنافع يم الباب 

لينا ـ خل لبنى توديله أني شگوو أروح اسبح . 

لبنى ـ شويه وأجه هو وخالتي يحجون عالبيت ونور صبتله ماي وأنطته واني حضرت العشه وصبيتلهم ورحت على بناتي يبجن . 

نور ـ تعالي تعشي ويانا أمي دزت عليج 

لبنى ـ بعدين أتعشى لما أعشي بناتي ورفوفه مالها خلگ من العصر . 

نور ـ أكلي يمعوده ترة حيل ضعفانه الضعف هواي مو حلو 

لبنى ـ لا يمعوده أحسن خليني هيج راحت وگملوا العشه وأجتني خالتي ونور جابت النا الچاي . 

سميعه ـ گملنا گلشي وأثث البيت من كل مجاميعه الكاونتر من هذا الزين وعلموديل ورتبنا كل المواعين والأغراض حتى الثلاجه ترسها مسواك وغرفتج هاي اشترالج غرفه والبنات رتبن ملابسج وشغلاتج 

لينا ـ أشوفج اخذتلها صوره تخبل كلش حلوه 

نور ـ لاتشوفينها خليها هي تشوفها بالحقيقه أحلى مو لبنى 

سميعه ـ باقيله بس البلازما يشدلها أنترنت كال علمود البنيات وشنو بعد گال 

نور ـ الغساله بعد ما جايبها 

سميعه ـ أي گال عنده شغلات يكظيهن بالنهار بلكي يكملهن بيوم واحد وباجر بالليل يجي يأخذج تروحين وياه البيتج 

لبنى ـ گلبي أنقبض وحتى نفسي ضاك عليه . 

سميعه ـ شايفه خيره يمه الله يهينج بي شلون بيت الله يجعله عتبه خير عليج وعليه ويبعد عنج الما يخافن الله .. وأبوهن كلهن قريبه عليه 

لينا ـ أي والله أذا تتعاركين أنتِ وياه نسمعكم ونجي نفزغلكم اني من هسه ويه نافع لحد يناقشني 

لبنى ـ ما حجيت وخالتي سميعه أشرت لنور ما اعرف يتهامسن بينهن وخالتي گامت وضلت نور

نور ـ ما أعرف شگولج لا هيج يله تصبحين على خير 

لبنى ـ ما حجت نور عرفت شتقصدين!

نور ـ أني علمودج والله كلت تتحهزين ليش بعدين تصيرين بموقف 

لبنى ـ مو عبالك مستعجلات ومعرسات اكثر مني خلن كلشي بوگته واني بكل حالتي نظيفه ومرتبه ما عندي شيء عوفني بحالي الله يخليجن وزين تعرفن هذا الزواج علمود بناتي .. تقربت نور حضنتني 

نور ـ لبنى حبيبتي أبدي وياه بدايه حلوه لا من اولها مشاكل وتتعبين خليج الطيبه التحتوي الكل كبل نفسها

خلي الله يوفقج وتبدين وياه من جديد وهاي سنة الحياة مو بگيفنا وبعد ضلت يمج وبالأخير هاي حياتج وأنتِ أعرف بيها 

لبنى ـ ما حجيت وطلعت وضليت صافنه لما نمت

الثاني يوم ضلن نايمات خطيه هل الفترة حيل تعبن جهزن ونظفن ما أجازيهن وخالتي لو شسويلها ما أجازيها وكفتلي وكفات أم لبنتها الله يحفظها النا 

عفتهن نايمات وبنات عمي محمود بس نبأ خطيه باقيه هذنيج عمي ملتحق وهنا يم بيت جدي ما لافيات وهالفتره عمي عايفهن .. 

طلعت لحم والفاصوليه أطبخها عالغده بس رفوفه يمي سويت الچاي وطگيت بيض وسويتلي ريوك وكعدت أني ورفوف وسمعت الباب يندك منو أجانا شلتها وطلعت أعدل بشالي وصحت منو . 

نافع ـ أني نافع .. 

لبنى ـ بگلبي حلمان بينا چاي من الصبح .. فتحتله ودخل . 

نافع ـ شُــنو نايمين لحدالأن 

لبنى ـ أي 

ـ بس أنتِ كاعده 

ـ أي 

ـ أجيت أخذ البلازما 

ـ موجوده فوك هسه أنزلها الك .. دخل كدامي وشاف الريوك ضل يباوع وخله قطعة جبن بلحگه . 

ـ صبيلي چاي لما أصعد أنزلها وين موجوده هي 

ـ فوك بالغرفه من يم الدرج هاي بيها أغراض .. صعد وصبيتله الچاي ونزل خلاها يم الباب وأجه أخذ الگوب الچاي وگف باب المطبخ يشرب وأني واكفه وگمل خلاه عالسنك وگال . 

ـ حسبي حسابي عالغده ودزيلي بيد ميثم لان أبقى بالبيت أكمل الشغل 

ـ أن شاء الله 

ـ وباليل تحضري أجي أخذكم ورى العشه 

ـ هزيت رأسي وشال البلازما وراح ورجعت حتى نفسي أنسدت وكعدت خالتي 

سميعه ـ عبالك سمعت صوت نافع 

لبنى ـ أي أجه أخذ البلازما فوك 

سميعه ـ ها زين وتريك 

لبنى ـ لا بس شرب چاي .. راحت صلت وكعدت تتريك وكعدن البنات واني طبخت الغده ولگيته دازلي رساله 

نافع ـ لبنى اذا غداج كمل دزيلي وزيدي ماعون أبو الانترنت يمي . 

ـ تمام هسه أدزه .. رحت حضرتله ميثم تعال ودي الغده لنافع أخذه وراح وللعصر راحت تسوگت للبيت والنا عزلت المسواك من گلشي ما مخليه ما متسوگه . 

سميعه ـ من يجي نافع يأخذج خليهن بسيارته .. نور أكو مربى وقوطية دبس وعلبة تمر هم ذكريني بيهن لا أنساهن لأختج ترضع . 

نور ـ أن شاء الله ماما . 

لبنى ـ گمت سبحت بناتي ولبستهن ودخلت سبحت ولبست عبايتي ودز رساله 

نافع ـ ها أجي كملتوا لو بعد 

لبنى ـ ما عدنا شيء .. عفت الموبايل وسمعت صوتهن يودن المسواك ودخلت نور 

نور ـ يله گومي أجه نافع 

لبنى ـ شالت رانيه ومشت كدامي وشلت رفيف ولحگتها جان واكف ويه خالتي واخذ رانيه من نور ومشى .. تقربت باوستهن خاله تعبتج وياي أنتِ ونوب ما قصرتن 

لينا ـ واني بالجذب ما شملتيني وياهن رأس بصل اني

لبنى ـ ضحكت عليها أنتِ هم ما قصرتي يله مع السلامة 

سميعه ـ الله وياج يمه ديري بالج على رجلج وبيتج وبناتج وافتحي صفحه جديده والله يوفقكم ويسعدكم

لبنى ـ ودعتهن وطلعت. 

صعدت ليگدام والبيت طلع قريب كلش دقيقتين وگفنا يمه ردت انزل أشرلي بايده لا .. 

نزل فتح هو الباب ورجع دخل السيارة للجوة بالحوش

بعدها نزل ومشى گدامي فتح الباب ودخلت وراه

اول ما دخلت عتبة الباب هبت عليه ريحة نظافة والبيت حيل مرتب وأول ما أدخل أستقبال وصالة ملمومة بيها تخم وبلازما والمطبخ مفتوح عالصالة وگدامي ممر

بيه غرفتين مقابل بعض ونهايته للحمامات.. 

بس باب واحد من الغرف مفتوح وبقيت واكفة بمكاني تايهة ومربطه إيديه ما أعرف شسوي 

هو نزل المسواك والاغراض وخلاهن كلهن عالميز بالمطبخ وبردود أندار باوعلي

نافع ـ يله بعد شوفي شغلچ عزلي المسواك رتبي غراضچ

لبنى ـ ما حجيت ودخل الغرفة اخذ ملابسه ودخل الحمام واني وراه دخلت الغرفة جايب الهن سراير مرتبات 

غيرت ملابسي ولبست ثوب وهنا گامن يبچن الأثنيهن سوى وكعدت ارضعهن واليوم بالنهار ما نامن هسه بلشن يطفن ويريدن ينام 

حاطة رفيف ارضعها ورانيه تفتر بالغرفة عدها جولة استكشاف بالبيت الجديد

باوعت للغرفة حلوة ومرتبة وعالميز اكو صينية بيها عطور ومسكة ورد عرفت هاي ترتيبات نور . 

الباب انفتح فجأة دخل وفزيت وگبل غطيت صدري بسرعة بشالي ونزلت راسي هو ولا كأنه شاف شيء 

رش عطر مشط شعره وشواربه عالمرايا بعدين شال رانية وباسها من رگبتها وبضحكة خفيفه يحاجيها 

نافع ـ ها ولج ما أشتاگيتلي . 

لبنى ـ طلع لصاله وبقيت كاعده بالغرفه وأسمعه يحجي عالموبايل 

نافع ـ حضريلي ملابسي ما عندي ولا لبسه كلهن خليهن بجنطه الجبيره فوك الكنتور موجودة أي هسه أجي أخذهن وأغراضي هم بعد أنتِ تعرفين شغلج . 

لبنى ـ ما عرفت منو يحجي بس شگيت ويه زهور شويه جابها خلاها يمي 

نافع ـ هسه أجي عينج عليها لاتصعد الدرج 

لبنى ـ ماشي .. راح وگمت نومت رفيف وجبت رانيه ارضعها گافي فراره ما تعبتي هاي مو أختج وياج 

.. رضعت ونامت وفصل التبريد وما أعرف بالكهرباء نومتها عالجربايه وطلعت أشوف وأثاري بس الغرفه صاله ما بيها شيء! هذا هم حظي من أولها نهجم تبريد . 

وين صار أشو تأخر .. تالي گمت فرشت بالصاله ونومتهن بالكاع وتمددت يمهن وسمعت صوت طبة الباب أجه فتح الباب و‏مد راسه 

‏نافع ـ هـا نايمين 

لبنى ـ ‏أي والله نامن من وكت لان افترن الضهر وتعبن

‏نافع ـ أحسن سون فضل عليه ما انساه لما يتزوجن

ـ و‏ليش تريدهن ينامن حجيت بحديه عكس نبرتي الخفيفه

ـ ‏وشبيج وكرص اني هم تعبان اريد انخمد ‏يمج كرباج طككتي العيون بوجهي جنج رئيس كوريا المنغولي 

ـ ‏لا تعيب ولا تحجي من يمك

ـ ‏ديلا يلا كاتل روحي عليج ‏أصلاً ولا اتناقش وياج

‏نضراتج وحركاتج جني واحد كاتل كل أهلج بطليها

‏متريدني مو لازم اني ما كطعت روحي عليج خاطر 

بس هالمساكين 

‏سويلي زقنبوت تعبان وأريد أنام رجلي صار خيوط

‏ومن هسه لا اريد منج شيء ولا أوصلج ولا تضلين تحوسين عليه وتشمرين بحجايتج تره ما اباوعلج. 

ـ باوعلي زين إسلوبك هذا المستفز تبطله وياي و‏ما مسوي فضل غصباً عليك . 

ـ ‏دنجبي بله شو إنجبي وما ضل عليه بس شكولج تحاجيني هيج . 

ـ ‏سكتت والسكته أولى هذا من اولها ناوي يجلطني

دخل الغرفه خلاه جنطة ملابسه وگمت رحت أسويله عشه وصاح عليه 

ـ هاي ليش منومتهن هنا المن جايب السراير أني

ـ التبريد مالت الغرفه ما اعرف شبي وجبتهن هنا 

ـ بس لا عطل من خرب بشغلك مثنى . 

ـ راح الغرفه يشوفه واني كملت العشه وطول بس لا ما يشتغل وين أنام أني وبناتي 

كملت العشه وصحتله تعال أتعشى أجه ضايج ويتأففف وكعد يتعشى 

ـ ها أشتغل

ـ لا عاطل باجر أصلحه 

ـ شلون يعني ما يشتغل 

ـ مو كتلج عاطل يعني ما يشتغل 

ـ وأني وبناتي وين أنام 

ـ نامن هنا دبرن نفسجن اليوم فرشيلي هنا 

ـ وين أفرشلك 

ـ يم الگواويد وين يعني .. يمجن أريد أنخمد 

ـ صحت بي أي أنخمد منو لازمك 

ـ تردين واحد يفرك حلگج ويعلمج شلون تحجين .. وشخصيتج القويه لاتمارسينها برأسي أني رجال وأنتِ مره صوتج ما يعلى بهل البيت فاهمه

ـ ضجت منه حيل وأصلاّ أني ضايجه منه ما طايقته وأحسها صعبه ما جاي أتقبله ولا أريد أكعد أكابله بإي شكل من الأشكال .. 

لگيت نفسي منهزمه من گدامه گبل شلت بناتي بإيديه اثنين بالكوه دخلت الغرفه وهو يباوع على تصرفي شمر الخاشوگه الا طفرت بالكاع والزيت مال بتيته طفر على الكاع . 

ـ وين موليه ومأخذتهن وياج . 

ـ ما حاجيته 

ـ مو وياج أطرشيتي ويامن أحجي أني 

ـ دخلت الغرفه وقفلت الباب وهو ضل يصيح عليه 

ـ الغرفه جنهم والتبريد مالتها بي عطل والكهرباء ساعتين تردين تصمطيهن من ورا خبالچ .. 

ومنو يمج أنتِ شحجيت وثگبتي وتجرجرين بيهن وراج تردين نامي نامي وحدج وخرب بروح أهله اليوصلج . 

ـ حجه حجه وسگتت وأني أريدها حجه ما أبقى يمه وأنوب يريدني افرشله ينام يمنا .. غمضت عيوني وبچيت أجتي الوطنيه وأشتغل السبلت وگمت طفيت الأضويه وحضنت بناتي وأني أبجي خفت منه والله خفت والرجال ما يتأمن .. 

نمت وما أعرف تاليتها شلون تفض على رأسي .. 

لميعه ـ من يوم ما مات باقر عمت عيني عليه وعلى شبابه اللي راح والقصر أنگلبت أحواله واحنا الساگنينه كل واحد صار ينطي قرار من راسه لا الجبير ولا الصغير صرنا هوسة وتمشي مدري يمتى تفض وكلمن يستقر ويرتاح 

وبوسط هالظروف القاسيه المرت علينا خضر حب مثل نبته صغيرة طلعت من بين التراب بس ما احد منتبهلها بس هي عايشة وتكبر بالسكتة وهالحب ما انزرع بيوم وليلة لا أنزرع بحجايه دافيه بنظرة يغطيها من عيون الناس حب غريب حب لوحده مو من عمره حب يتيمه ضايعه 

.. وگل أهل القصر رافضينه ويگولون صغيره عليه وما توالمه بس أني واكفه وياه مدري لان أنهضمت وأنظلمت من الحب ما أريد أحد يعيش العشته أحب أشوف كل اليحبون مجموعين على حب الله وسعيدين 

كاعده وأحاجي أمي وأريد أقنعها توافق على لينا يمه ليش طاوعتي وهبيه وگفتي وياها چا وحربي شلون يمه لازمني من أيدي التوجعني ويگولي أريدها منج 

الحجيه عطايات ـ يمه أنه أكسر گلبه وأهضمه من ورا أمه بس ماشيتها علمود تقنع جنتها على نويفع ومنا لوگتها الله كريم يحلها الف حلال . 

بس يمه لينا صغيره عليه بس هو شسوي لگليبه العشاگ .. واكع چفي على وجهه حاجيتي أنتِ 

لميعه ـ أي حاجيته قافل عليها يگول حتى لو صغيره

أني أكبرها عندي مالكم لزوم بهاي السالفه 

الحجيه عطايات ـ چا هيج الحجي گومي خل يجيني وأفهم طلابته

ـ يعني يمه توافقين عليها 

ـ ليش ما أوافق بس خل أحاجي وأنه ما أريدن أهضم واحد منهم وأكسر گلبه حتى لو أمهاتهم ما راضيه من كثر خلفتهن عاد ما ترسن عيني قصر شگد شگبره بطرك حربي ونافع بس هالزلمتين وهذولاك نثايا ما منهم فايده ولد أمهم مامش ولدي ولا تربيتي بس هذولي كظبة أيدي 

.. دگومي شوفي وينه خل يجيني . 

ـ على أمرج يمه .. طلعت أدوره لگيته گاعد ودخانته تعچل .. عمه حربي أندار والوجه ما يگصه سيف تعال حبوبتك تريدك بسالفه

أجه وياي ودخل وتقرب باسها من رأسها وگابلها . 

الشيخ ـ خير حبوبه طالبتني بسالفه أمريني 

الحجيه عطايات ـ ما يأمر عليك عدو يحبوبه أي رايدتك بسالفه وهالسالفه أريدن أسمعها منك ولازم تعرف نتايجها گبل لاتدحم لان أنت شيخ يحبوبه والشيخ لازم يگون گد كلمته وحجايته أنتِ تريدها حرمه صدك لو ماشي على هوا گلبك 

الشيخ ـ العين بالعين والگلب واكع بولايتها حبوبه 

.. أنه ماخذها للقصة من أطرافها رايدها يحبوبه رايدها 

الحجيه ـ چا اذا هيج ردتك على بركة الله بس أذا لينا موافقه لازم تعرف التاخذ الشيخ مثل المي بالصينيه على يا ساعه ياخذه عليها شريجه ويتصخم وجهه .

الشيخ حربي ـ ماعليج حبوبه اني رايدها قافل عليها 

الحجيه عطايات ـ يا حبوبه من كون فلك يفلكك شكد صلف ولا يستحي 

الشيخ حربي ـ چا شلون حبوبه هو الغالي ينعاف لو يندل طريجه غير بگلبي وهالبنيه أندلت مكانها وتربعت 

الحجيه عطايات ـ يصير خير يحبوبه يجرالك التريده بس من هسه أكولها الك مو وگت فرح عرسك سگتاوي يحبوبه لـو تأجله منا لسنة زمان . 

الشيخ حربي ـ والله حبوبه أنه جنت ناوي عالسنه التجي يله أحاجيكم بيها يعني سنويتين على وفاة أخوي بس هالسالفه الطلعتوا بيها النا گربت سالفتي وخربت كل مخططاتي وأذا صارت گلشي ما أسوي

.. بس هسه أريد منج تحاجين الباقين لان جدي واكف ويه أبوي وما راضي وخبصوني بكلمة صغيره والعرفته باقر هم اخذ لبنى صغيره بس هي هيج طفوليه بعدها وتكبر تكبر اجيبها يمي وتسمن . 

الحجيه عطايات ـ أنه أحاجيهم بس أمك من هسه أكولها الك راح تزعل منكم وخل أنشوف تالي مرت أخوك أذا وافقت على نافع نجيبها هنا ونسكتها بالبنيات وتمر الوگت وترضى وتسگت . 

الشيخ حربي ـ أن شاء الله حبوبه يله أنه أترخص 

لميعه ـ طلع وصاحلي ولحكته ها عمه أبالك سالفه 

الشيخ حربي ـ ماعليج حبوبه اني رايدها قافل عليها 

الحجيه عطايات ـ يا حبوبه من كون فلك يفلكك شكد صلف ولا يستحي 

الشيخ حربي ـ چا شلون حبوبه هو الغالي ينعاف لو يندل طريجه غير بگلبي وهالبنيه أندلت مكانها وتربعت 

الحجيه عطايات ـ يصير خير يحبوبه يجرالك التريده بس من هسه أكولها الك مو وگت فرح عرسك سگتاوي يحبوبه لـو تأجله منا لسنة زمان . 

الشيخ حربي ـ والله حبوبه أنه جنت ناوي عالسنه التجي يله أحاجيكم بيها يعني سنويتين على وفاة أخوي بس هالسالفه الطلعتوا بيها النا گربت سالفتي وخربت كل مخططاتي وأذا صارت گلشي ما أسوي

.. بس هسه أريد منج تحاجين الباقين لان جدي واكف ويه أبوي وما راضي وخبصوني بكلمة صغيره والعرفته باقر هم اخذ لبنى صغيره بس هي هيج طفوليه بعدها وتكبر تكبر اجيبها يمي وتسمن . 

الحجيه عطايات ـ أنه أحاجيهم بس أمك من هسه أكولها الك راح تزعل منكم وخل أنشوف تالي مرت أخوك أذا وافقت على نافع نجيبها هنا ونسكتها بالبنيات وتمر الوگت وترضى وتسگت . 

الشيخ حربي ـ أن شاء الله حبوبه يله أنه أترخص 

لميعه ـ طلع وصاحلي ولحكته ها عمه أبالك سالفه 

الشيخ حربي ـ عميمه رايدج بسالفه رايدها منج أريد أشوفها وأحجي وياها وجه لوجه 

لميعه ـ شلون ولك عمه وعمها محمود بالبيت وبناته كل وحده لسانها شبر چا هي هيج گبل تفوت وتشوف 

ـ ما عليه أريد أشوفها دبريلها مروتچ عميمه 

ـ چا عمه عشگك عشك سوادين . 

ـ ​مو عيب على زلمة مثلي يضيع بعيونها السود ويظل تايه ما يدري وين الله حاطه 

.. أريدج تمشين وياي ومناك تحاجين عمتي سميعه وهذا عمها أريد أعزل عليه وأشلفه من دربي ما عاجبني صاير والي عليهن ما مرتاحله شنو واحد سگير مخلين بأمانته گومه نسوان بيا كعده رهمتوها وشلون . 

ـ هسه عوفنها من عمها أشو هسع تذكرته حاجيني على طلابتك الما خلتك تشوف دربك وين 

ـ والله عمه أريد اتأكد منها أشو هاي ما مبينه ما تنحرز بس فاكهه حلكهه عليه اخاف اتقدم وتطلع تلعب على گلبي . 

ـ يصير خير يعمه خل تكظي سالفة نافع عگبها نروح وتدلل 

ـ بس مو تبطين عليه 

ـ لا أن شاء الله طلبك مكظي بحيل الله 

ـ الله يسلمج بس لاتگولين لحبوبه أنه ما مستحي ولا مفتشل من عشگها بس ما ما أريد يطلع حچي وهي بعدها مو على ذمتي . 

ـ بعيني 

ـ سالمات عيونج عميمه . 

ـ راح وگلبي وبالي عنده الله يريح بالك يعمه ورديت يم أمي وتباوعلي وتقرأ بعيوني 

ـ شنهي طلابته شيريد منج 

ـ رادني بسالفه بعدين أحاجيج عليها لو كظت أكولج ولاتلحين عليه وولد أبنج يأمون بيه ويحجولي ما أكدر أفضح سرهم . 

ـ لا يمه ما الح عليج الله يخليج على روسهم ويخليهم الج . 

ـ أمين الله يفرحني بيهم .. أكول يمه چن عبالك مستعجلين بسالفة الزواج 

ـ چا شنسوي أنه بيدي .. لو بيدي ما أزوجها لواحد منهم تكعد على بنياتها وتكبرهن بس بعد صغيره خطيه أظلم حظها وبختها وهي ما شافت من حياتها شيء خل تتزوج يمه هاي يتيمه مالها أحد 

ـ بس يمه 

ـ أحس بحلگج حجايه أحجيها ولج 

ـ نافع 

ـ شبي نافع كلجن گلوبجن مليانه حجي على وليدي . 

ـ ما مليانه حجي هو هم عزيز عليَّ بس يمه أخافن نشيل خطيتها بهل الزواج وهو گبل طلك نورس وأخافن ما بطل من سوالفه 

ـ يا سوالف أنتِ شتمسلتين وتخربطين بحجيج أنه مو كلت ما تحجن بهل السالفه بعد وانتن شفتن بعينجن وتشبجن بالحجي هم أنتِ وهم السليمه الگبور أمه من عسى لا اله الأم هي الفضحته ولگت الها خوش طبل وتطبل بي أنه هيج أم من شگت عيني لدنيا ما شفت . 

ـ خلص يمه سگتنا 

ـ أي سگتي لا أشك حلگج والله الأسمع وحده تجيب طاري نافع أفرع گلبها فرع .. أريدن أزوجه يرتاح حاله حال ربعه تجن تنبشن وراه بسوالف مالها صحه . 

ـ خيطت حلگي وسگتت لان عصبت وضاجت خفت عليها وبعد ما فتحت الموضوع والتوبه ..ومر أسبوع وأجو نافع ومشعان وحسيت وراهم سالفه بس من شفت وجه مشعان أستبشرت بالخير وجه يضوي 

دزوا على حربي وگعدوا بغرفة أمي وهبيه هم لحكتهم ﺟا ضلت عليه خل أروحن وأشوفن شگو ماكو أجو من الولايه محملين شگبان سوالف . 

كعدت بسد وهبيه وحاطه أيدها على گلبها وهما يحجون 

مشعان ـ لبنى دزلتنا خبر ووافقت الف الحمدلله 

الحجيه عطايات ـ الله يبشرك يا يمه 

مشعان ـ أي والله يمه هسه أرتاحيت وهاليومين نروح نعقدلهم ونجيبها للقصر تعيش هنا يمنا وأذا هو يريد بالبيت وبغرفته كيفه 

نافع ـ لا يابه بهاي أعارضك وگبل گلشي وكبل العقد أني ما أقبل لا يم أمي ولا حتى بالقصر 

الشيخ حربي ـ ﺟا شتريد . 

نافع ـ بيت لوحدي 

الشيخ حربي ـ وتگدر تفتح بيت لوحدك 

نافع ـ أي ليش مو بعينك 

ـ لا بعيني بس هاي مسؤوليه جبيره تتحمل بيها تگدرلها وهذن أمانة أخوي يعني گدها 

ـ أي لاتشغل بالك 

وهبيه ـ بس أني أريد بنات أبني يمي منين طلعتوا اليه بسالفة البيت لا هذا الشيء ما أرضاها وينج يعمه أشوفج سكتي مو گلتي البنيات أجيبهن يمج أشو حفيدج يريدهن بيت لوحده وشبي القصر ما يسكن بي 

مشعان ـ وهبيه

وهبيه ـ هذا حق وأني ساكته بس من توصل لبناتي من ربحة أبني أحجي 

الشيخ ـ سالفة البيت شيلها نافع لبنى والبنات يسكنن بالقصر هنا يم أجدادهن وأنت رتب وضعك 

نافع ـ أذا هيج أني أسحب نفسي وأنتوا تولوا السالفه كلها مالي دخل بعد 

لميعه ـ راد يگوم ومشعان منعه وگعد بس على أعصابه 

مشعان ـ أنت ليش تريد بيت لوحدك 

نافع ـ يابه أني رجال أريد خصوصيه بحياتي كل خراب حياتي ومشاكلي وأنفصالي من نورس ماكو خصوصيه وكل مشاكل لبنى ويه أمي ونورس بسبب محد محترم الخصوصية 

وگبل صارت مشكله وباقر جابها وأجه للقصر وكدامكم صار هالحجي .. وهسه هي بيت خالي محمود وكل مشاكلهم لان ماكو مساحه الها ولبناتها ما مأخذه راحتها ياهو اليجي يضربهن وحاطتهن وحابستهن 

بهل الغرفه 

على أقل أذا بيتها لوحدها محد يحاسبها وبناتها يلعبن يكسرن يهجمن بيتهن محد اله دخل بيهن وأني من الأخير طلبي ومطلبي الأول قبل العقد أريدلها بيت لوحدها وقريب على أهلها ويتسجل بإسمها هم مو بإسمي ومن فلوسكم علمود أخاف يوم من الأيام أصير موخوش أدمي وأغلط أعوفلها البيت وأطلع وهي تضل بيتها 

الحجيه عطايات ـ خوش حجي يمه ما طلبت الا حقك يجرالك يحبوبه . 

وهبيه ـ وأنه عمه چا جنتي تضحكين على عقلي گلكم أكلتوا حلاوه برأسي وعگب ما لبنى وافقت سحبتوا نفسكم وطبتگوا وياه والله حفيدج يريد خصوصيه چا أنه منطيته لبنى لو علمود البنيات زواجيش هذا 

لميعه ـ هزت أيدها بقهر ومشت ولحگها حربي ونافع هم طلع وأمي ضلت تحجي ويه مشعان وواكفه ويه نافع بسالفة البيت ومأيدته .. گمت وراهم ولكاني حربي . 

الشيخ حربي ـ عميمه أريدج بسالفه 

ـ علمود لينا

ـ لا هالمره تخص نافع 

ـ شبي نافع .. أخذني على صفحه 

ـ عميمه أنه أدريج أنتِ قريبه منه وصندوك أسراره كله عندج وتعرفين الصغيره والجبيره عن نافع أحجيلي شتعرفين عنه 

ـ شإعرف عمه 

ـ عميمه أنه وأنتِ ندري نافع أبو مكسرات ونسوان ومو نظيف ومن جان مراهق هو عنده سوابق فه أحجيلي التعرفينه عنه لان سالفة يفتح بيت لوحده ما غشت مخي علمود بكيفه يغش ويطب ويطلع وما يجيبه غير الفجر ومحد يحاسبه ويگوله وين جنت! بس المكروده اليأخذها ومبين عليها البزون يأكل عشاها ما تگدرله لان نافع مكار . 

ـ والله يعمه هذاك أخوك وروح اسأله اني مالي بهل السالفه وهو من تزوح نورس عقل وتاب بعد مدري تريد اتاكد واسأل 

ـ أي اسأل ليش ما اسأل ومن سالفة الصكط صفا هو وين جان ساكن 

ـ مدري يعمه بس الاعرفه هو جان عنده شقه يبات بيها 

ومن أستشهد باقر هو رجع القصر والبيت بالولايه بعد ما عافه ضلت منك لأخوك . 

ـ عنده شقه گلتي والشقه ملكه الشخصي لو أيجار 

ـ ما أدري 

ـ هم تعرفينها وين صايره هاي الشقه بيا مكان 

ـ لا ما أعرف 

ـ عميمه أحجيلي التعرفينه وتكسبين أجر وثواب باليتيمه أذا حجيتي لان هذا زواج ومسؤوليه ونافع

مو گدها ما غاش مخي من وراه الحجي اليطلع عليه وأبداً ما هاضمه ولبنى حلگ الفطيمه علمود اتلاحك وأعرفه سوالفه وأخرب هالزواج . 

ـ گتلك ما أعرف شي والأعرفه حجيته الك واسأله 

ـ اسأله! شبيج عمه أكو واحد يگول على نفسه أنه طايح حظي ... بس السالفه صارت عندي والعقد ما يتم الا أعرف نظافته شگد بالميه وأذا عرفت شيء عنه وأنتوا ضامينه حتى لو يتزوجها اطلگها منه . 

ـ راح وعافني بحيرتي يربي شسوي شصخم أنه شحجيت والله مدري شحجيت سوده بوجهي وانوب منا مسؤوليه لبنى .. يله هي تصفى وأخو خوما يكسر بأخو علمود مرت أخو .. يارب صفيها ولاتخبطها .. 

.. كاعدة ومگابله أمي تحاجي زهور على الموبايل 

الحجيه عطايات ـ من الله يكصف عمرها شال رأسه من البيت من لسانه دگول مسنيه بس تدعي عليه من كون دعوه شالتها وخلصتنا منها أمج مالها گبر شجاها تسودنت على وليدي 

زهور ـ أي والله حبوبه تعارگت وياه وطردته من البيت 

سوده عليه مشلوع گلبه صارله يومين يبات بالبيت والبيت فارغ بعده جاي يشتغل بي . 

ـ من الله يأخذج على حرگة گلبه وعلى شنو تعاركت وياه 

ـ من ورا عمتي سميعه من سمعت لبنى صارت لنافع تخبلت وشالت رأسها عليهن واجتي عليه تحجي وتدعي على لبنى والبنات وهواي شبجت سوالف مالها داعي وهو ما رضى على روحتها وأنوب عمتي سميعه طاردتها من البيت خالي صباح حلفت على نافع ما يضل بالبيت شال رأسه وطلع . 

ـ چا بيت الخلفوها بنت أم السحوره بس ميته وطاگه أبوج عايفها ومكابل تاج رأسها وأستجلبت تتحارش بعزيز گلبه بنافع تعرف شلون تضرب وتصيبه بگلبه علمود يرد عليها ويصگرها بس أمج تاليتها هم تتطلگ وعلى أيدي وهالمره ما أخلي نافع يقنع أبوه لخاطرجن وعيب من الناس لا العيب اذا بقيتها تلعلع بلسانها على وليدي 

بس أجي ودواها عندي اني الها أمجن .. 

لمبعه ـ سدت الخط وأحترك دمها على نافع گومت الدنيا وما كعدتها ودزت على مشعان وأخذها ومشى بساعتها ما ضلت بالقصر .

ومر كم يوم وحربي ساكت ما حجه ومبين ماكو شيء لان مشى ويه أخو وأشتروا البيت وعقدوا وخلال فتره كمل شغله وأخذها البيت وأمي فرحانه لنافع وگالت يمر أسبوع ونروحلهم بس وهبيه كاعدة بغرفة باقر وتنعي وتبجي وبيوم السمعت نافع مأخذها البيت إشسوت شعملت جن باقر هسه جابوا .. وحقها ما الومها أنهضمت على أبنها ورادت بنياته يمها محد سمعلها ..

أخيط بثوبي ودخل عليه ومبين عنده سالفه

الشيخ حربي ـ عميمه گومي تحضري تمشين وياي 

لميعه ـ وين أمشي وياك يعمه 

الشيخ حربي ـ للگبور ﺟا غير حاجيتج گبل أيام علمود عليلة گلبي . 

ـ أها صارت عليلة گلبك بس خل أشوفن سميعه بالأول

ـ مـا يحتاج بس كظي عبايتي وأمشي وياي بس خل نوصل بيتهم عگبها تدبر اشلفهم وأستفرد بيها 

ـ يا فلك فلگك گون أشو هيج تسودنت يعمه 

ـ شبيج عمه واكفتلي غير أحاجيها 

ـ أها چا أذا هيج خوش أمشي وياك وحبوبتك اذا سألتني شگول الها 

ـ هسه بس أمشي تحركي شلج بحبوبه جاهل أنه . 

ـ أي خلص لاتعصب وتورث سوادينك عليه .. گمت لبست عبايتي وهو راح شغل سيارته تسودن هالولد ومن الشيخ صار عاشك ولايتها .. الله يفض طلابة گلبك يعمه يحربي ..