رواية فصلية بديلة ( شموخ ) الجزء الثاني الفصل الرابع والثلاثون 34 بقلم ام ملكوت

تلك العينان وذلك الاهتمام ذلك الدفئ الذي يشع من عينيك ؛لا اعلم ربما سأغرق نفسي من جديد ،

ولكن هل سيكون هذا الغرق نفس ذلك الغرق القديم ذلك الذي اتلف روحي ،

ان تفاصيلك الرائعة هي ما تجعلني اغرق تجعلني مدهوشة بك عيناي لاتقبلان الابتعاد عن اسر عينيك لا اعلم ماالذي يحصل ،

ربما كانت بداية لشيء جديد ، ولكن هل ستكون هذه البداية جيدة ام لا ؟

لا اعلم هذا ولكن ما اعلمه انني سأستمتع بتلك البداية وسأجعلها مميزة تستحق ان تكون لي "...

:-بقيت ٣ اسابيع متسطحه بالفراش والالم ياخذ بيه ويرجعني وبكل مره تشوغ روحي من الوجع اصيح التوبه ربي ماعيدهه بعد .. مادري هذول الناس شلون يموتون نفسهم ويحركوهه ويغرقوهه لو يكطعون اوردتهم يبووي صدك من كال الروح عزيزه واعز منهه الشرف ..

ضليت لا اطلع ولا امشي

مكابله الحيطان ونايمه وامي لو نوره تاخذني وترجعني من الحمام لحدما اخر اسبوع بالشهر ياله بديت امشي وحدي على الجبيره ومن شفت نفسي اكدر كلت لابوي واخذني للمستشفى هوه واحسان سوده علي كل شوي يتاكد من اقفال البيبان صار بي هوس من هل ناحيه وحيل اتكطع عليه من

اشوفه هيج واهلي متعجبين منه منين طلعله هوس اقفال السيارات من تالي وانه اكل بروحي قهر وندم عليه وماكدر احجي السبب لاهلي وكلما

احاجي حتى يروح طبيب نفسي يجذب علي ويكلي مابيه شي بس اخاف ينفتح قفل سياره واحد يطيح منهه .. حسيت ان كلامه صحيح  مثلما

يكول صارت بي خوفه ورهبه من المنظر الشافه مني من طحت وتكسرت فبقى يحاول يتجنب هل صدمه حتى لا يتعرضلهه مره ثانيه .. وصلنه

للعياده مالت الدكتور فحص رجلي وايدي والحوض واخذلهم اشعه شاف الكسور والفطر طايبه هيه وكتفي وحوضي ففتحهن الي واحس توه ياله تحررت جنت لمن مكان يكرصني

بيهن اعاني اضل حتى تروح الحكه وهل شعور بحد ذاته عذاب .. رجعنه للبيت بعدما جابلنه بابا

غده وسرحت بتفكيري بالصار قبل اسبوعين لمن زارتني شموخ وحجتلي عن نيه مرتضى اتجاهي وسمعتني التسجيل ...

.. بقت تسولفلي شصار وشنو حاجي مرتضى علي وانه احس كل كلمه تطلع منهه تنبت سجين بصدري لحدما وصلت للتسجيل وجان هذا خلاصي بحد ذاته ودليل واضح على

مدى قيمتي وقدري عند مرتضى وبينلي حبه المزيف الي ونيته العاطله وياي شغلته وانه دموعي صارت تهل على وجهي وضاقت الدنيا بعيني وهوه

اسمعه يكلهه ماخذ جنان الا احبلهه رغم حجه وكال اريد نستمر بعلاقه حب فتره قبل الزواج بس ابد ابد مافكرت ممكن توصل بي المواصيل ان

يسويهه صدك ويضحك علي لو يقشمرني باسم الحب حتى انطي نفسي وابد ماتخيلت ان ممكن يكون بهل انانيه والشر خفت منه وصفنت بكل مره

يسحبني بعيد عن الانظار ويحاول يتقرب مني ويريد يبوسني لو يحضني ربطت كل تصرفاته وكلامه وايقنت ان مشاعره اتجاهي نزوه ومشاعر

فاسده وكل قيمه ما الي عنده مجرد بنيه سهله يكدر يلعب بيهه ولمن تحبل يتزوجهه ماعرف شنو يحس لمن جان يفكر هيج ولا بشنو يفكر شنو مثلا

عباله انه وحده بت شوارع وانطي نفسي بالحرام لو جان عباله هوه بعده باوربا ويكدر يلعب ويا اليريدهه ولمن تتورط بطفل يتزوجهه ويستر عليهه..

سمعت كلامه هذا وقبلما يكمل التسجيل اخذت النقال من شموخ رت اشمره من حركه كلبي بس سرعان ماتداركت الموقف وايقنت ان النقال مالت

شموخ مو مالتي ومااكدر اكسره براحتي غمضت عيوني بجزع وهيه اخذته من ايدي طفت التسجيل وحضنتني بقيت شاده قبضه ايدي على كلبي

المكسور وابجي قهر مو عليه ولا على كلامه ولا على خسارته وانما ابجي على روحي ونفسي التعبت وحبت واشتاقت اله كل هل سنين ابجي

على محمد يلي كسرت كلبه وتركته بسبب كلام هيج واحد مثل مرتضى ابجي على غبائي يلي خلاني اصدك كلامه ابجي على كلبي التوهم بحبه

وفرح بكلماته المزيفه .. سرعان ماقاطعنه صوت الباب لمن اندك ابتعدت عن حضن شموخ وانه امسح بدموعي يلي تنزل مثل الشلال على عيوني

انفتح الباب ورفعت راسي شفته مرتضى دخل للغرفه اشتاطت عيوني غضب وقرف بنفس الوقت هوه كال اسمي لو طفرن شياطيني كبالي كمت كوه ساندتني شموخ وامشي والم حوضي ورجلي يدك دمام بكلبي بس كو مثل وجع روحي بهل لحظه 

رحت يمه وانه شاده قبضه ايدي الصاحيه حيل ضربته بوكس بكل قوتي على خشمه خليته يخر دم مانكر اني توجعت ايدي وحسيت اصابيعي تكسرت

بس ماجان هامني ووجع كلبي طاغي عليه .. باوعلي بهدوء عكس كل مره اضربه بيهه يعصب ويمد ايده علي هل مره بقه وكأن يدري بروحه

غلطان ومذنب بحقي وشما سويت بي اكون مقصره .. لزمته من ياخه قميصه وحجيت بقهر وصوت مبحوح..

_يا حيف تربايه وتعب عمي بيك يا حيف على تضحيه خالتي يا حيف على كل سنين سهرهه وتربيتهه الك روح وماريد انزل مستواي واعاتبك

واسالك ليش بس اريد اكلك شي واحد وهوه عسى حوبتي وكسره خاطري وكلبي ماتتعداك عساك طحت نفس طيحتي بحب وحده تعل كلبك

وتكسره وتخونك باليوم الف مره وماتكدر تعوفهه عساك لا تهنيت ولا تعمر كلبك وبيتك..

تركت ياخته وفتحت الباب بقيت ادفع بي كوه مطلعته من الغرفه وهوه بثكل الجبال كوه مشه خطوتين وطلع من الغرفه سديت الباب بوجهه وكعدت

بالكاع منهاره بالالم وبالبجي حسيت جروحي رجعت تون علي وماكدرت اكوم حسيت اذا تحركت خطوه غلط ينفصل حوضي عن جسمي وانشل هيج تخيلي من الوجع الشفته ..

صرخت طالبه المساعده من شموخ وهيه اجت تركض علي تريد تشيلني ماتكدر منين ماتلزمني اصرخ اخر شي حضنتني وشالتني مثل الطفل وانه صدري اخذ الالم مجراه بي

صرخت وعلى اثر صرختي دخلوا اهلي وبيت عمي خلتني شموخ عل جربايه واجه بابا علي يتطمن وانه مستمره ابجي وادك عل جربايه من الالم جاب احسان المسكن بسرعه وعلكلياه بالمغذي كلهه ١٠ دقايق من البجي صوتي احسه راح وكلبي مات

اخيرا راح الالم وغمضت عيوني روحي خاويه وكلهم طلعوا حتى يخلوني انام وبس شموخ يلي ماسكتت دمعتهه بقت يمي تمسد على راسي وتهدي بيه ومن بين كل افكاري وشهكاتي صحت باسمه احتاجيته احتاجيت حضنه اريده يمي اريد

محمد يجي يلمني لحضنه الدافي وابد احساسي هذا مو جديد ولا نابع من جرحي لو ضيجه خلكي وانما نابع من كلبي من حبه الدفين يلي بكلبي ويلي

جنت احسبه ندم وتانيب ضمير فقط .. رغم مرتضى جان حبي الاول بس محمد هوه حبي الحقيقي يلي استثمرته بروحي بفتره قصيره عكس

طول سنين حبي لمرتضى وبعمره الحب الحقيقي مانقاس بطول المده وكثره التضحيات .. حب الفطره يجي من ثانيه من موقف من رجفه كلب مفاجاه من ابتسامه طفيفه من مشاعر خجل وفضول مجهوله واليزيده واليقوي هيه طول

كل كسر من جسمي من بطني لايدي لعضمه حوضي ولحد كف رجلي كل مكان متاذيه بيه انباس بحنيه فتحت عيوني واشوفه محمد وكاني بحلم بس حسيته حقيقه ابتسمت من بين دموعي ودخلت بحلم ثاني ماتذكره...

.

.

:- مرت ٤ ايام وشموخ ماجايه للدوام افتقدتهه وحسيت يومي بصعوبه يمشي بدونهه رغم بالايام العاديه ما نلتقي هواي ولا نحجي بس عل اقل لمن

نجتمع بمكان واحد احجي وياهه وتحجي وياي براحتنه وعيونه تشبع من بعضهه.. جنت احس بوجودهه يمي بنفس المكان حتى لو ماشفتهه اليوم

كله بس هسه رجعت لهذيج المشاعر المشؤومه يلي جنت احس بيهه وانه فاقد الامل بلقاءهه بكربلا .. رجعت ضيقه كلبي وحسيت راح افقدهه

او فقدتهه ومالنه فرصه وبكل مره احس هيج انفض هل افكار من بالي والتهي بالشغل والقضايا لحدما باليوم الخامس اجت للدوام وكحلت عيوني

بشوفتهه وهيه تدخل بكل ثقه للدائره .. وكفت كبال المصعد واخذني كلبي الهه قبل رجلي وكفت يمهه تحمحمت والتفتت علي باوعتلي ببرود

ودكتلي تحيه بملامح جامده استغربت وكتلهه ترتاح نزلت ايدهه والتفتت عني انفتح باب المصعد ودخلت تعجبت من تصرفهه هذا اجيت صعدت

يمهه وهيه باوعتلي باستغراب تالي رجعت ملامحهه بارده وباوعت بقوه لكدامهه خليت اديه وره ضهري وميلت راسي الهه وحجيت بتساؤل..

_خير شموخي ليش هيج نظراتج بارده

_يتراوالك سيدي 

_ليش تحجين برسميه واحنه وحدنه

_احنه بالشغل سيدي ولازم اتصرف برسميه ويه رئيسي

_هاا هيج 

_نعم سيدي

_شلونهه ريانه صارت..

جبت سيره بتهه ورخت ملامحهه شوي باوعتلي وعيونهه تلمع ووجع دفين بداخلهن مجهول تشردت بعيونهه عني وكالت بهدوء بعدما تحمحمت..

_بخير سيدي الحمدلله 

_وانتي شلون صرتي خو مارجعتي انهاريتي

_لا سيدي شكرا على سؤالك وعن اذنك لازم اروح للمكتب..

رادت تطلع ودست الزر موقف المصعد رجع انسد الباب وهيه باوعتلي بتساؤل كتفت اديه ووكفت كبالهه بثبات ادور بعيونهه الصاير وياهه

وافكر ليش كاعد تصرف بشكل غريب وياي وهيج تتشرد بنظراتهه عني تقربت عليهه خطوه وهيه رجعت بسرعه لزكت روحهه بالحايط عكدت

حواجبي باستنكار وقربت اكثر وكفت مقابيلهه وصار مايفصلنه غير كم سنتيم سندت اديه على الحايط وسالتهه ..

_ليش كاعد تتصرفين باسلوب غريب وتبتعدين عني بهل طريقه وكاني منحرف

_لا حشاك بس لان بالدوام احنه ومايصير اعاملك بغير رتبتك

_شمووخ

_نعم سيدي

_مرتضى حجه وياج بشي

_لا ليش وبشنو يحجي وياي

_هيج انسي..

ابتعدت عنهه واجت وكفت كبالي وهيه تسالني..

_شصاير راهب ليش يحجي وياي مرتضى وبشنو

_هسه راهب صرت مو

_العفو سيدي 

_احجيلي ليش كاعد تصرفين بغرابه وياي وحاسبتني غريب عنج

_لانك فعلا هيج

_مو على اساس جنت مثل فرد من عائلتج مو جانت قبل كم يوم عيونج تصرخ بحبي وتغارين علي من اليتقربلي شنو الاختلف هسه شموخ

_ماكلت ولا سويت هيج شي من حب او غيره انه

_والميانه الزايده ومناداتج الي باسمي بدال سيدي لمن نكون وحدنه شيسموهه وكفتي كبالي وجنتي

مستعده تحجين للعالم اني احبج وتحبيني بس حتى لا اتوسل بوحده مثل رحاب تتستر علينه

_راهب خليني براحتي هيج احسن الي والك خلينه عند حدود الشغل انت رئيسي وانه متدربه عندك افضل 

_بس انتي مو مجرد متدربه عندي ولا انه مجرد رئيسج

_راهبب

_انتي زهره افادي الكضيت ١٠ سنين من عمري اسكي بيهه واكبرهه انتي جمره وجاويتني من شبابي انتي حبي الاول والوحيد انتي غنيمتي من هاي الدنيا

_راهب كافي فدوا لا تحجي هيج وخلينه بموضوع مرتضى

_تدرين شسالني واحنه بالمستشفى 

_شسال

_سالني شنو البيني وبينج وكتله مابينه غير الخير كتله اختك جانت مو بوعيهه وخايفه على بتهه وتوسلتني تدرين شكال

_اي

_كالي هيه مو بوعيهه بس انت شنو عذرك ليش حضنتهه

_شكتله او لا اسكت ماريد اسمع شنو جوابك ولا يهمني اعرفه..

تقربت عليهه وهيه تتراجع بخطواتهه حصرتهه بالزاويه خليت اديه وره ضهري وانحنيت لمستواهه صار وجهه مقابيل وجهي وهيه تبلل شفايفهه بتوتر كلساع ابتسمت خفيف على توترهه وهمست يم اذنهه..

_كتله اختك عاله كلبي من سنين ودمعتهه عزيزه علي ماتحملت اشوف دمعتهه وابقى ساكن تدرين شحسيت وقتهه لمن شفت دمعتج جان ودي اخذج

مو لحضني وانما لداخل كلبي ردت اضمج وانسيج خطف بنتج ردت اضمج وماخلي حزن يوصل مسامعج تمنيت اطلع كلبي واسوي قماشه وامسح بيهه دمعج.. شموخ ااعشكج انه..

رفعت راسهه باوعتلي بحزن وحيره وصدرهه يصعد وينزل تتنفس سريع ومستمره تشعل كلبي وتبلل شفايفهه بلسانهه وتباوعلي ببراءه عكس

نضراتهه البارده قبل شوي .. حضنت وجهه بكفوف اديه بحنيه وتقربت من لا وعي بستهه براسهه من فوك الحجاب وهيه حجت بصوت يرجف ومبحوح...

.

.

:- ماعرف شصار بيه كل قواي اتهدمت لمن تقرب يمي و همس باذني بكل كلامه هذا وقبلما استوعب قربنه صدمني لمن كال شموخ احبج رفعت راسي

باوعتله متربطه وكلبي يدك دمام وحلكي ينشف كل شوي من التوتر حسيت السكر صعد عندي وكل اطرافي صارت ترجف ..مو وقته هل اعتراف ابد

ماجنت رايده اسمعه وخاصه بعدما اتخذت قرار الابتعاد عنه وعن كلشي يربطني بالحب والزواج .. اعترافه خله ثقل جبال على كلبي رغم جمال بحه

صوته وجمال هل كلمات الاسرت كلبي بس ماجنت اريده يعترف ماريد اجرحه وارفضه اول ماخطى خطوه اتجاهي.. بقيت اباوعله واعاتبه بكلبي ليش

راهب ليش اعترفت هسه ليش ما بقيت هل حب بداخلك مثل قبل ليش نطقت هل كلمات وطيرت كلبي ونزلته لاسفل الارض بنفس اللحظه وكسرته

ليش اعترفت وخربطت كلبي وضعفت عزيمتي على تركك .. تركزت انظاره على عيوني ونزلت راسي محاوله اجمع قواي الهدمهه وانطق ولو بكلمه

وحده بحركه بطيئه مفاجئه منه تقرب حاضن وجهي بكفوف اديه وباسني بعذوبيه براسي من فوك الحجاب فتحت عيوني بصدمه و رجف كلبي وكل جسمي انتفض دفعته خفيف وحجيت بصوت شبه مسموع..

_بس انه ماحبك وماريدك راهب ابتعد عني ..

حسيته جمد بمكانه لمن سمع شحجيت ابتعد عني وباوعلي بنظرات ماعرفت افسرهه قهر على خيبه امل على كسره خاطر  بلع ريجه بصعوبه وكال وهوه يتصبب عرك من جبينه..

_شنو حجيتي شموخ

_كتلك ماحبك راهب عوفني وياريت تنسه هل حب البكلبك وتبتعد عن طريقي لاني كرهتك وكرهت حبك اتجاهي هذا ..

خليته بصدمته وكسره خاطره وفتحت باب المصعد طلعت وتوجهت كبل للحمامات ذبيت جنطتي عل ميز وفتحت الماي البارد بقيت اغسل

بوجهي مره ومرتين وكلاثه لحدما ارتاحيت نزلت دموعي مختلطه بالماي ونظراته الكسرتني مافاركتني ابد رغم متاكده جان امله بموافقتي

يقترب بس مواجهتي اله وكلامي بهل طريقه ماجان متوقعهه وانه نفس الشي ابد ماجنت منتظره اعترافه ولا ظنيت راح يعترفلي

ويحصرني بالزاويه ويجبرني اجذب عليه حتى ابعده عني وعن حياتي.. ظنيت بس ابتعد عنه واعامله برسميه رح يفهم علي وتستمر علاقتنه

كرئيس ومتدربته ماجنت متوقعه اعترافه وبهل سرعه ابد .. مسحت وجهي الصار اصفر والعيون مورمه طلعتلي كحل ومسكارا خطيتهن واخذت

الحمره المارونيه خليت لشفايفي البيض باوعت بقوه وحاولت اخفي حزني وندمي واحول ملامحي لجديه رجعت الحمره جريت نفس مليت ريتي

وزفرته بقهر وانه امسح بدموعي التنزل سكته اخذت جنطتي وطلعت امشي بشكل طبيعي دخلت لمكتبي خليت الجنطه عل ميز وكعدت عل كرسي اجو زملائي تحمدولي بسلامه بنتي

ويسألوني عنهه كتلهم بخير وطلعناهه سالمه الحمدلله تحمدولي بالسلامه مره ثانيه وكلمن رجع لمكتبه ورحاب تباوعلي بحقد مدري منو دايس على

ذيلهه شكد كرهتهه .. درت وجهي عنهه والتهيت اقره بالجدول وانسخ والصق الملفات المتكدسه علي بهل ٤ ايام شويه واجه الضابط كمنه دكينه تحيه وكال..

_وين شموخ شهم

_نعم سيدي

_صارلج ٤ ايام غايبه بدون اجازه وسبب واضح والمحقق راهب طالبج تنطين اسبابج

_حاضر سيدي..

عفت الملف عل ميز وردت اطلع وسمعته صاح..

_رحاب المحفوظ موجوده 

_نعم سيدي 

_العميد طالبج حالا لبسي الزي العسكري ونزلي لمكتبه 

_بس ليش سيدي

_هناك تعرفين ليش

_حاضر سيدي..

عفتهم وطلعت نزلت وتمشيت لمكتب راهب وانه كلبي يمشي كبالي احسه لزمت يده الباب بايد ترجف اخذت نفس عميق وزفرته ويه فتحه الباب دخلت دكيتله تحيه بملامح جامده رفع عيونه دون راسه وكال..

_تفضلي متدربه شموخ

_حاضر سيدي..

كعدت عل كرسي يم الميز وبقيت عيوني كبالي واحسه يباوعلي كل شوي وهوه يكتب ماعرف ايش بالملف الكباله فتره مو طويله وتحمحم وهوه يكول..

_اي ست شموخ شنو جان سبب غيابج ٤ ايام عن الدوام وانتي مجرد متدربه بعدج

_سيدي صارت حادثه ويه طفلتي وماكدر....

_ومن يمته ملازم التحقيق والمتدرب يعوف تدريبه وشغله ويلتهي باموره العائليه 

_اسفه سيدي

_يمته صار حادث بنتج

_قبل ٤ ايام انخطفت سيدي

_ويمته رجعت الج

_بنفس اليوم سيدي

_لعد شكو غايبه صارلج ٤ ايام 

_اسفه سيدي ماعندي عذر مقنع

_تمام اذا هيج تفضلي هذا فايلج راح تبقين تداومين ويه الشفت الثاني بايام العطل بدل ال ٤ ايام راح يصيرن اسبوع 

_حاضر سيدي

_وهسه خلصنه الشغل خلينه نسولف عنج بله

_عن شنو سيدي

_عن يلي ببالج ونيتج بخصوصنه

_ماعندي اي نيه وياك سيدي اذا ماعندك امر اكدر اروح

_شموخ

_نعم سيدي

_تدرين بيه صارلي سنين متعلك بيج ورغم كلشي صار وياج بعدني احبج ورايدج ولو شخص ثاني جان فقد الامل بيج وشاف غيرج من اول ما عرف بيج عندج طفله 

_لا رد

_باوعيلي شموخ 

_نعم سيدي

_عوفي السيدي لا اكوم اسكتج على طريقتي..

باوعتله بتفاجئ ونيتي طارت لبعيد عكدت حواجبي باستنكار وكتله بملل..

_سيدي شنو المطلوب مني والتريده

_اريد اسالج سؤال وبعدهه كلشي يختلف بيناتنه

_تفضل سيدي

_ما مر عليج وقت حبيتيني بي او نويتي وياي الحلال لا من قبل ١٠ سنين ولا بالفتره يلي فاتت بعد لقاءنه..

صفنت بعيونه التباوعلي بترقب منتظره جواب يشفي كلبه شتت انتباهي وشردت بعيوني على المحبس اللابسه وكتله ..

_محبسك حلو

_جاوبيني واعتبري الج 

_راهب مشاعري قبل ومشاعري هسه ومنا ورايح ماراح تهمك ولا راح تقدم او تاخر شي بيناتنه لاني

نويت بعد الحادثه يلي صارت ويه ريان ان اكعد بيت اهلي اربيهه والتهي بتربيتهه وتعليمهه وبشغلي واشيل من بالي كل زواج وحب نهائيا 

_يعني شنو

_يعني الحب بيناتنه ماراح يفيدك بشي غير ان تحرم نفسك واهلك من شوفه جهالك 

_بس انه رايدج وماهمني شي بدنيا غير تكونين حلالي وريانه هيه بنتي معتبرهه

_لا راهب وانه ماكدر اترك بنتي وهيه بامس الحاجه الي واشوف حياتي واتونس

_بنتج هيه بنتي باذن الله وتكدر تشاركنه حياتنه وتصير عزيزه بيتنه 

_مستحيل هل شي يصير ماكدر ابعد ريانه عن البيت الربت بي ولا عن اهلي المتعلقين بيهه ومتعلقه بيهم ولا اكدر اسيطر على روتين حياتنه وانتبه عليهه وحدي بزحمه شغلنه 

_بس لكلشي اكو حل مايصير تدمرين نفسج ومستقبلج هل شكل

_انه انحطيت كبال خيارين يا اما حياتي او حياة بنتي وانه اختاريت ريانه فرجاءا لا تضغط علي ولا تلومني لو تسالني ولا تحاول تقنعني باختيار غير

بنتي لان راح تكسرنه احنه الاثنين ومارح نعيش مرتاحين واتمنى لو تترك هل لعنه يلي اسمهه حب وتشوف حياتك ويه غيري وتفرح كلبك واهلك بطفل صغيرون

_ماكدر كلبي انخلق حتى يحبج انتي وبس ولو انتي لو ماريد من دنيا شي بعد

_اسفه راهب 

_هاي ثاني مره ترفضيني والثالثه ثابته

_ماكو ثالثه بعد خلاص راح امشي بطريقي وانت امشي بطريقك وحتى لمن تشوفني بالصدفه بمكان غير الدائره اعتبرني غريبه وياريت تعاملني كمتدربه عندك مو شي ثاني 

_هذا اخر كلام عندج 

_اي نعم سيدي

_خلاص تكدرين ترحين

_حاضر ..

صفن بيه وعيونه تحولت حمره وكوه يبلع غصته كمت ردت امشي ولزم ايدي التفتت بسرعه مستغربه تصرفه وشفته لبسني المحبس يلي كال

جاوبيني واعتبري الج .. رفعت عيني بعينه واحس روحي تحترك بنار ايده الدافيه سحبت ايدي بتوتر وبطئ من ايده تشكرته وانه اشتت نظري عنه

وطلعت سديت باب المكتب وراي ووكفت التقط انفاسي يلي انحبسن جوه يااالله على كميه الخنكه يلي حسيت بيهه يمه وبالف يا ويلاه كدرت اخفي

لمعه عيوني لمن يكول اسمي .. مادري شوكت وشلون زاد حبه بكلبي وتخلخل لاعماق روحي مثل الفراشات باوعت لباب المصعد وتذكرته لمن

اعترفلي واحنه بداخله وهمس بكلمه احبج رغم سمعتهه هل كلمه قبل ١٠ سنين بس هسه صارلهه طعم غير وقتهه ماجنت متاكده من حبي اله بس هسه لا حسيت

كلبي صار يرفرف وكل علومي تخربطت لمن سمعتهه ..ابتسمت بقهر ومسحت دمعتي الطاحت على خدي تمشيت للمصعد بروح ذبلانه وحزينه

باوعت للمصعد ورجف كلبي عفته ورحت صعدت للطابق الثاني بالدرج ..دخلت مكتبنه واخذت مكاني باوعت للفايل وتلمست خط ايده لمع بعيني

المحبس وايقنت ان حلاته وكشخته بس على اصابيعه تلوك وايده يلي محليه المحبس مو المحبس محليهه .. جريت حسره وغصيت بيهه

استمريت اكح وادك على صدري لحدما راحت والكل بقوا يباوعولي اخذت بطل الماي وطلعت للحمامات دخلت وقفلت الباب باوعت لروحي

بالمرايه وغمضت عيوني وتخيلت رسمه كبالي وعيونه التجدح وتلمع بالحب لمن يشوفني.. سندت ضهري عل مغسله ونزلت دموعي بحركه على خدي

والشهكه مافاركتني امسح دمعه تطيح عشره وراهه شجابني عل حب انه شوازاني وحبيت ولو هوه الحب من الله هوه اليزرعه بكلب عبده لو راد

وانه حبي مو جديد عليه بس شسوي بروحي هسه انه شلون راح اكدر اكمل وهوه كبالي وبنفس المكان الاداوم بي.. صح طلبت منه يعاملني

كمتدربه عنده ويتجاهلني بس انه شلون بيه شلون راح اكدر اعامله طبيعي كرئيسي واعتبر ماصاير شي شلون بكلبي لمن يشوفه اخاف يتهور

ويخطيله اخاف عيوني تلمع بحبه وتفضحني كباله واخاف واخاف واخاف ويا كثر الخوف يلي صار بداخلي واضعف عزيمتي ...

من بعد حادث جنان قررنه ناجل عرس محمد بعد شهر لحدما تشفى جروحهه وتشاركنه الفرحه .. مرت اسبوعين من اخر مره حجيت ويا راهب ونهيت كلشي ومن ساعتهه وانه كوه ادخل لتدريبه وابقى على طول منزله راسي لو مشتته نضري عنه ابد ماخليت عيني بعينه ولا حجيت وياه كلمه وحتى

لمن يحجي وياي مرات بخصوص التدريب اضل ساكته وغير نعم وحاضر سيدي مايحجيله لساني ..وانه اعرفه زين اعرف سكوته وهدوءه

الموطبيعي هذا وراه انتظار طويل اعرفه مارح ييأس ويشوف غيري ويمكن هذا الشي يلي مصبرني عنه ومطمني ومايخلي كلبي يخطيله لان

لو شفته ويه غيري بيوم لو حسيت راح افقده ماكدر احزر شراح اسوي وياه او شنو راح تكون رده فعلي وهذا حال دوامي كضيته نفس الروتين

كل يوميه تدريب وتعب وصرت من التفكير والكآبه البداخلي ما اكل ولا اشرب مثل الاوادم ضعفت بدل ال٥ كيلو ١٠ كيلوات بحيث عظامي احسهن بعدلهن

شوي ويبرزن تحول وزني من ٦٥  الى ٥٥ بظرف اسبوعين بس .. اما بالبيت فكالعاده مخبوصين بالترتيب والتعديل ومحمد خطيه يفتر هوه وسلام

واحسان ويجيب ويخلي بغرفته ..و لاحظت على مرتضى هليام هادئ ومسالم حتى بده يحجي وياي طبيعي وكلنه يالله بلكي تغير عقل بس ابو طبيع

مايغير طبعه وانه ملتهيه بفرش ارضيه الغرفه مالت محمد بعدما جاب الاخشاب والفراش وكلشي تقريبا بس نفرشهه ونسفط ملابسه هوه وجهاز عبير

بيهه .. احتاجينه مقص حتى نكص شويه من الحافه يم الباب ونزلت للمطبخ اجيبه واشوف

مرتضى اول ما دخلت للمطبخ يخابر ويحجي بهمس وعذوبيه استغربت وتقربت يمه اريد اخذ المقص من الكاونتر واسمعه يكول..

_ اشتاقيتلج ولج اريد افتح كاميرا وياج اليوم بليل.. تمام بس لا تتأخرين علي لان مفول كلش ...

جمدت بمكاني مصدومه وللحظه ظنيتهه جنان بعدما سمعت كلامه الجريء وياهه بس تالي كلت لا جنان عافته ومن زمان اصلا وحاليا بالهه مشغول

ويه غيره شرجعهه عليه بس ميخالف هم احاول اسحب منهه كلام بعدين اشوفهه اكيد عافته لو سرسح كلبهه ..تسحبت من المطبخ ورجعت صعدت

الدرج وانه قرفانه تالي تحمحمت ورجعت نزلت بس سويت صوت شكلك توه اجيت هوه انتبه علي وكام طلع بره بعدما كلهه لحظه اختي يمي .. 

هزيت راسي باسف وكلت ردت حليمه لحالتهه القديمه وانقرف كلما اتذكره شيكلهه مدري شيحسون من خر* بهيج زلم تقودهم شهواتهم..

اووف ياربي اووف شهل بشريه هاي صرت اكره الزلم كلهه من وره مرتضى وشلون عاد انه احبهم يعع .. اخذت المقص وصعدت للغرفه انطيته لامي

وهيه كصت الفرشه وصارت الغرفه مرتبه وتشرح صدر اليدخل بيهه ..كنسناهه وعطرناهه وطلعنه قفلت امي بابهه ونزلنه بقه شكم لبسه من مالات قصص ماي هوبس 

محمد بالغرفه القديمه الكعد بيهه اول ما رجع من الخارج عاد دخلت لميتهن بجنطه ونظفتهه للغرفه وقفلتهه طلعت انطيت المفتاح لامي وكالت..

_بعد يمه مرت اخوج انشاءلله راح تجي الخميس الجاي ترتب ملابسهه وشغلاتهه البقيه وبعدهه نلتهي بطلعه السواكه احسن شتكولين

_اي خليهه فره السوك من نكمل كلشي حتى مايصير ضغط علينه 

_اي يمه 

_بس امي اريد اروح لجنانه اليوم حاجيلي سلام ياخذني من يرجع من جماعته صار منهد اخر مره مارحتلهه بس اخابرهه 

_انشاءالله من يرجع احاجي بيش ساعه تردين ترحين

_العصر من يكعد ب٤ هيج نروح نضل لل٧ ونرجع 

_بس دنيا ليل يصير يا يمه وطريق طويل خو باتي يمهم باجر سبت ماعندج دوام 

_همم ماعرف بله اشوف خلي اروح هسه واذا شفت الوضع تمام ابقى يمهه لباجر 

_تمام يمه براحتج

_يله راح ادخل اسبح ريانه واجي اساعدج بالطبخ تمام

_هاذهو بنيتي روحي..

ابتسمت واخذت ريانه المجلبه بذيول تشيرتي ورحنه للغرفه شفت ريانتي نظيفه ماموصخه نفسهه بعد حيل امهه عاد خليتهه تباوع بالايبادقصص ماي هوبس 

على افلام كارتون ودخلت انه للحمام ذبيت ملابسي ودخلت جوه الدوش والماي الدافي يصب على كلبي البارد رفعت راسي للسكف وغمضت اجه

بالي يلي ماغاب عنه لحضه ونطقت شفافي باسمه انعصر كلبي وخنكه صدري خلت دموعي تجري على خدي .. كل يومي اكضي وانه احارب واشغل

بنفسي عن التفكير بي ولمن انفرد بنفسي تشتعل كل ذكرى ببالي وكل مشاعر كلبي ..احس مشتاقتله رغم وياي وكل يوم اشوفه بس ماعرف ليش

اشتاقله ازيد من قبل كل لحظه تمر واصفن بشكله وجديته بالتدريب احس روحي تذوب وتسرسح على كل تفاصيله وضلوعي بارده تطلب دفو ضلوعه .. رفعت ايدي وتلمست المحبس

مالته وتصورته لمن جان يلبسه ويشبك اصابعه سويه .. رفعت ايدي متلمسه خدي وراح بالي قبل كم يوم لمن جنت اتدرب عل سلاح واجه من دون

سابق انذار عدل رجلي ورفع ايدي بايده ثبتهن وانفاسه الحاره تلفح خدي وحتى لمن ابتعد بقه خدي دافي ابتسمت بتعب.. ورجعت لواقعي كملت

سبح نشفت نفسي وطلعت اخذتلي ملابس من الكنتور بدلت وكعدت عل ميز اشسور بشعري مشطته ولفيته بقراصه .. كمت تمددت يم ريانه

شويه تالي اخذتهه وطلعت يم امي بالمطبخ لكيتهه تطبخ بالمركه رحت طلعت التمن من الكونيه غسلته  خليتله ماي وملح وخليته عل نار رجعت

كعدت عل ميز بعدما جبت خيار وطماطه ولهانه بطاسه وكمت اثرم بيهن ..رشيتلهن ملح ولمندوزي وسماگ خليتهه بالثلاجة واجيت نصيت النار عل

تمن كملنه وره فتره طبخ واجه بابا من المزرعه بعد حيلي هليام كاضيهه كل يوم بالمزرعه ويه عمو ساجد يروح ب٦ الصبح مايجي منا لل١٢ نصلي ونتغده كلنه

سويه وينام وهيج كاضين روتينهم مرات بالعطل تقترح امي عليه ياخذنه وبيت عمو ساجد ونروح للمزرعه وطبعا مرتضى ابوي مانعه تماما من هاي

الطلعه مايريده يختلط بجنان ولو باي مكان بعد حتى لو احنه وياهم ومرتضى مايحجي شي يضل ساكت ويتقبل هل شي و ولا مره حاول يعترض

لو يجيب سيره جنان كبالي لو يسالني عنهه وكأن خلاص طلعهه من كلبه وحياته هاي اذا جانت موجوده اصلا المهم مرت الضهريه وكمت بدلت لريانه

واخذتهه يم سلام تالي رجعت انه بدلت ملابس الطلعه خليت مكياج خفيف حضرت جنطي لبست برجلي وطلعت وراهم للحديقه صعدت بالسياره

وانطاني ريان بحضني توكلنه على الله وحرك السياره..كلهه ساعه تقريبا وصلنه لبيتهم دكينه

هورن وفتحلنه احسان الباب دخل سلام السياره بالكراج ونزلنه اجه باتجاهي احسان اخذ ريانه من ايدي وكال بعيون تلمع ضيقت كلبي...

_شلونهه ام ريانه

_نحمد الله عايشين

_الحمدلله 

_انت شلونك

_على الله هم عايش..

هزيت راسي بايجابيه واجه سلام يمنه تسالموا بيناتهم ودخلنه جوه سلمنه على بيت عمي ورحت لغرفه جنان لكيتهه فاتحه الجبيرات مالتهه بس بعده وضعهه مو تمام هاي من غير السواد

الماخذ عيونهه الحلوه سلمت عليهه وكعدت كبالهه اباوعلهه سوده علي شصاير بيهه حتى الضحكه كوه تطلع من عدهه كعدت شوي وكالت بذبول وهيه لازمه ايدي..

.

.

:- بعدما فتحت جبيره إصاباتي شفت نفسي ما اكدر امشي بدون محد يساعدني بعده الالم يون علي من امشي عاد جابلي بابا عكازه اسند بيهه نفسي لمن امشي بقيت يومين واحس اختنكت من كعدت البيت فقررت ارجع اداوم قبلما يكمل الشهر لان بالي يم محمد احس

بكل لحظه تمر علي خاليه من الحياة وهوه بعيد عني وخايفه اخسره وماشوفه بعد خايفه يكون استقال من الشركه بسببي او شاف غيري بس لا

مستحيل محمد مايسويهه ويشوف غيري وانه بعدني على ذمته اي مايسويهه لان يدري بيه ماتحمل فكره ان احد ياخذه مني اي اكيد يعرف

مو .. استغفرالله ربي يمته اخلص من هاي الوساوس الماتفاركني ابد طول يومي يمته يارب فدوا اروحلك .. توكلت على ربي وكلت لاهلي عن رغبتي بالدوام وافقوا بعد معاناه وليلتهه نمت متوتره وانه افكر بي وكلبي يرفرف

بمجرد مافكر اني رح التقي بي باجر غمضت عيون وبقيت اسمع لااغنيه "شيجيب باجر /هيثم يوسف" فتره طفيتهه ونمت للصبح كعدت نشيطه سبحت وكشخت وطلعت يم

اهلي والابتسامه مافاركتني حتى اهلي تعجبوا وبدوا يومهم بابتسامه وراحه على راحتي .. اخذني احسان وبابا وهمه بطريقهم للشغل والمزرعه نزلوني

بباب الشركه وودعتهم وراحوا بقيت واكفه بالباب واحس كلبي انخبص وللحظه فكرت اخابر لاحسان يجي يرجعني للبيت بس سيطرت على نفسي

سميت باسم الله ودخلت امشي كوه عل عكازه بعد دقايق من الوكفه بالباب .. دخلت المصعد وكل ذكرياته هاجمتني من كل ناحيه .. انفتح الباب وجمدت بمكاني متفاجئه

من شوفته اول واحد وهوه كذلك جمد بمكانه يتاملني بعيونه الخضرت كلبي حب واشتياق.. لحظات وتداركنه وكفتنه هل شكل تحمحمنه وانه

طلعت وهوه دخل للمصعد بدون مايحجي وياي او يصبح علي ويسالني شبيه امشي عل عكاز ولا همه حتى بقيت اباوعله وملامحه جديه ولا مباليه بوجودي كباله ..لفتت انتباهي هالاته الحمره

جوه عيونه الصايره دم من الحمار البيهه انسد باب المصعد وباللحظه الاخيره ياله دار عينه علي وباوع بعيوني.. نزلت راسي بقهر والتفتت ادخل اجت

بوجهي الموظفه الجديده باوعتلي وكلبت عيونهه وكعدت بمكتبهه اجن بقيه البنات علي لمن انتبهن علي تحمدلي بسلامه وسالني شصار وياي وقصدا

كتلهن طحت من السياره وتكسرت جنت بامل لمن يحجن كبال محمد يهتم ويجيبه حبه يطمأن علي بس طلعت غلطانه ومتوهمه .. بعدما كملنه سوالف

كعدنه كلمن بمكتبهه والعرفته ان اجلوا تسليم المشروع بسبب غيابي ونقص بالكادر مالتنه .. اجه محمد بيده ملفات اخذ دفتر ملاحظاته وحجه ويه

الموظفه الجديده وهيه ابتسمت وكامت وراه طلعوا بالحديقه مالتنه كعدوا بنفس مكانه انه وياه وانه عيني بقت تراقبهم ماركزت بشي بسبب شعور

النار السعرت بكلبي وانه اشوفه يحجي وياهه وشوي يضحكون وشوي يشتغلون لو يسولفون ماعرف على شنو .. لزمت كلبي اهدي ناره وحاولت

اركز بشغلي والتهي عنهم بس عبث كل حماسي وشوقي لشوفته وسوالفه اختفى من كلبي وضاكت بيه الدنيا طفيت الحاسبه وكمت للمطبخ

بقيت واكفه واخذ نفس كوه حسيت بشخص دخل وراي ومسحت دمعتي الطاحت بدون ماحس عليهه سويت نفسي اسوي كهوه واشوفه وكف يمي اخذ

كوبه وسواله كهوه وانه كل هل وقت منزله راسي عل كوب واشتغل .. سمعته بعد لحظات تنهد وطلع من المطبخ راحت عيني وراه وغميت كصتي

وبقيت الوم نفسي ليش ماستغليت هل فرصه وحجيت وياه ليش ماحاولت اساله عن حاله او افتح وياه اي موضوع .. شمالني بس صار قريب

مني انربط لساني وجمدت بمكاني مثل المزهريه .. تافافت بعصبيه وعفت كوب الكهوه بمكانه وطلعت شفته واكف يم المكتب مالت الموظفه ويدكون فج

درت عيني عنهم وانه دمي يفور .. اخذت ملفات المشروع ورحت يمهم بثقه وقوه متصنعه وكتلهم ببرود...