رواية قاتلة ابي الفصل الرابع والثلاثون بقلم بنت الشيخ ترابية
صباح ثاني يوم
بلا نوم
كاعده بالكاع وابجي بأنهيار بس صوتي ماكو
ومدنكه راسي وابجي وسمعته دخل وسلم عليهم
: السلام عليكم كواهم الله ...
رفعت راسي شفته واكف ولازم سبحه بيده ويفرفر بيها كامو سلمو عليه وانا كاعده بالكاع ولامه رجلي بيدي
اجاني وشالني واخذني للغرفة
بس تأذه من جرح متنه والدم بلش يصب عليه
ايهم: ليش كاعده بالكاع؟
دموعي تصب وصافنه بعيونه اترجاه يبقى يمي
دموعي تصب وصافنه بعيونه اترجاه يبقى يمي
ايهم: انا والموت واحد اذا عفتج ورحت المره الثانيه
قبل عـدّة ايام
بعد مانفخ بوجهي كل الي ببالي الجاثوم مدري شنو اسمه بالضبط الي يجي باللي .. بس طلع الوسواس الخناس .. نفخ بوجهي وفقدت صوتي وفقدت تركيزي وصرت مثل المخبله اخاف من شعري اذا نزل على متني
صبح الصبح وانا مانايمة نزلت جوه اسمع صياحهم
كعدت ولميت رجلي بيدي بصف الدرج بالكاع
ماهر يصيح وشمر التلفون واسراء تهدي بيه
زينب وضعها متوتر
والوضع مو طبيعي
كاعده بالكاع ولامه رجلي بيدي واهز براسي بـ لا
زينب: ولج هنادي احجي فدوه اروحلج مو كلشي سويه
نوفه: ولكم دخل للطوارئ لو يطلع لو مايطلع
كتلكم كلبي لعب ومحد صدك كلامي يايمه نعمت عيني عليك
دخل ماهر من الباب بدفره ويصيح ويغلط ويسب بالتلفون
ماهر: هوووووو شنوووو طلبتكم عون صرتولي فرعووووووون وسد التلفون ورجع اتصل
: البدو تعال الحك للبيت خلي انا اروح يمعود نسووووان شصييييير اناااا
اجه يمي دنك ورفع راسي باسني من كصتي
: كلشي يصير تمام وعيونج بس حاولي تحجين
رجعت باوعت بطرف عيني للدرج وشفته واكف
بسرعه غمضت عيني وسديت اذني حيل
كام ماهر مني وسمعت صوت صياح رج البيت رج
نوفه: ولكم يبووووووووووووووووووو راح سند البيت يابوييييييييييييييه
زينب: شنووو مااااااااااات احجو ماااااااات
وكامت تدك وتلطم وماهر مموجود واسراء وكعت من طولها حنان واكفه ومجتفه ايدها والجهال تتصارخ
وزين وجعفر طابين وطالعين من البيت اخر شي
وصل فهد للبيت وكعد بنص الصاله وركع على رجليه
خنسو هدوء كلنا منتظرين كلامه
همس بصوت مبحوح : تيتمنا
صفنا بوجه لطم على راسه ودنك للكاع وصاح
: راح ايهم انتهيناااااااااااا
صافنه بوجهم
والصدمه بعيني مثل صدمتي بأبوي واخوي
لا ايهم مو انت والزمن عليَ
طفله تيتمت .. مُراهقه تهربت .. زوجة تأرملت
الى أين أُيها الزمن؟
انظر للحياة في بدايتُها
لماذا عجزتني بصغر سُني
ولماذا ارهقتني بشبابي
الى مَتى سأتحمل؟
هل سينتهي؟
طلعو كلهم من البيت بقت حنان وجهالها وبس نوفه تنعي
نوفه: يايمه الولد شمحلاته طوولك
وتنحب وتبجي ومغطيه وجهها بالشيله مالتها
كمت ؏ مـَهل وصعدت لغرفتي اصعد درجه درجه
خايفه حيل خايفه
خايفه ع ايهم وع الي داشوفه
وصلت وردت افتح باب غرفتي وجان اشوفه كدامي
اسود حتى وجهه ممبين مثل الغبار الاسود
اجتني دفعه قويه و وكعت من الدرج
.
اسراء
الوضع مو تمام وانا وماهر وزينب وفاقد وفهد بسيارة وحده حشكنا روحنا حشك
فهد ماقبل كال اكعد وره يم البنات
الوضع متوتر حيل وزينب طول الطريق اصابعها تكسرت .. وماهر يقره سور قُرآنية
وفاقد ختم الصلاوات والمعوذات سويه
فاقد: اكللكم حتى نسيت شلون اصلي على النبي
فهد: اللهم صلي على محمد وعلى آل بيت محمد الطيبين الطاهرين
فاقد: عادي اخر كلمتين ماكولها؟
فهد: فاقد دير وجهك
فاقد شغل اغنيه هادئه
فهد: بشرف اختك صدك تحجي؟
فاقد: الجو مكركرب والاوضاع مش مستقراااا
درت وجهي للجام وبقو يتناكرون
صح انا المقربه لهنادي وصح ماهر اخوها وهي الاولى بينا وام البيت وامنا
بس اذا صار شي على ايهم هنادي شيصير بيها
منو الها ومنو وياها؟ ايهم كان ام واب الها
يوميه بالليل صار روتين ايهم يجي ساعتين يمها
يسبحها اذا مريضه ومو بوعيها
واذا نايمه يبدل الها لانو نومها ثگيل متكس
يبدل الها ويعطرها ويلعب بشعرها لو يحضنها ساعتين
يجيب الحلويات والاكل والملابس والاكسسوارات
وينطيهم بيدي لو بيد نوفه ع اساس احنا جايبيهن
يخابر ماهر بحجه شلونك وماهر عرف الروتين
كلما يتصل ايهم ماهر قبل ليكول هلا يكول نايمه تعال
يكول حلالي وماريد اتكرب اكثر
ذاك اليوم سمعته يحجي وياها وهي نايمه
ويكللها
: صرتلج اب وعون وسند وانتي صرتي امي ودنيتي
احنا الاثنين كملنا بعض هنادي البيت بدون آثاث مايرهم ويبقى متروك .. انتي بيتي وانا آثاثج .. وانتي السكينه وانا راحتج .. انا زوجج وانتي امي .. لا تعوفيني هنادي وسانديني كلشي اسوي لمصلحتج
ويطلع وعيونه حمر ومدمعه
بهذي الفترة شفت ايهم مهدود الحيل مو ايهم الي نعرفه والي وكف بنص الارهاب وطلعنا من حلكهم اببببد موووو نفسسسه
ومره لزمني وكال
: من هسه اسراء اذا صارت الاوراق مكشوفه
قبل لتنطون رد فعل حاولو تثقون بيه
وسويت كلشي علمود هنادي وراح انهي الروايه هي وابطالها
وطلع من البيت ومارجع وهذا يومنا ورايحين للمستشفى اله ... ممصدكين بوكعته بكد مفرحانين ؤاح نشوفه وكأنو ايتام وكالو الهم ابوكم عايش
شفنا بأيهم الصديق والاب والاخ والحبيب والام والسند والعووون ..
وصلنا للمستشفى ونزلنا بلهفه
فهد يصيح: ابووي وينه وين غرفته
ومخبوصين ناس تروح لغرفة المدير وناس مدري وين بس حتى نندل غرفته لحد ما كالو بالطوارئ وراح يطلعو للعنايه المُركزة
بقينا واحد صافن بوجهه الثاني
مانعرف شصاير وياه الى ان اجه رجال
: عفوًا انتو اهل المُصاب ايهم *****
فهد: اي تفضل كول
: هذي بس اغراضه بقت يمي
فهد: ممكن تكول النا شنو الي صار وياه؟
: والله ماعرف اجيت ولكيته متمدد بالكاع ودمه بطوله
وراسه مفشوخ وطلقه بصدره حسب الآثار الي موجوده وكلام الدكتور
فهد: زين جان وحده لو احد وياه
: وحده جان مشمور بالكاع وشفته واخذته
فهد: مشكور ماقصرت
وانطاه فلوس
فاقد: سووها الكـ**** وهجمو عليه كتلك اتصرف فهد
فهد: كله مني انا السبب والله انا السبب
زينب: زين شوكت صار كل هذا احنا مو اتفقنا ع اتفاق ع اساس وتمثيل حتى نوهم العائلة وطلعتو علمود تجهزون؟ شبسرعه صارت هاي الاحداث
فاقد: يالكائنات ياااابه هاي ارهاااب لزمت فهد وكتله فهد هذول ارهاب ويردون ايهم بالاسم يمعود الحكككك خلي نروووووح نشوفه ونگضه وفهد ماطل بالموضوع ويومين بقى يوم يجر يوم لحد ما هجمو عليه
من يموت احنا وين نروح
اسراء: شغله وحده مافهمتها ليش فهد صار ايهم مات بالبيت؟
فهد: لانو كالولي مات زين الاثول
فاقد: جعفر وزين وين؟
فهد: مادري
بقينا ننتظر واتصلو ع رقم ماهر وبسرعه ماهر كمز وطلع مافهمنا شصاير .. هي عايزلها دكتين وتكوم
بعد ماطلع بدقايق اتصل ع فاقد وسده
فاقد صفن صفنه وعوج حلكه وهز ايده
وفهد يباوعله ومتخوصر
فهد: شبيك؟
فاقد: كملت سبحه السبعه
فهد: شكو احجي
فاقد: هنادي واكعه من الدرج
لطمت ع صدري وهمست بخوف
: يممممه هنادي شوووكت
فاقد: كعدي لخاطر ابوج لا تخرط روحج ... هسه هستوها وكعت
فهد: هسه انا المن اصير
فاقد: زينب شني انصدمتي واخرسيتي؟
زينب: لا صافنه ع وضعنا .. قبل يومين نضحك ونسولف وملتمين سبحان مُغير الاحوال هسه اختي واكعه من الدرج وابو بيتنا بالعنايه المركزه؟
هذا حسد لو سحر لو اختبار من ربنا؟
فهد: وَعَسئ أَن تَكّرِهوا شيئاً وَهوَ خيرًا لكّمْ
زينب: صدق الله العظيم .. بس انتبهو ع التفاصيل
اول شي هنادي كلبت علينا وطردت عمو ايهم
وراها طلبت الطلاك وبعدها اختفاء عمو ايهم وهسه الهجوم عليه وهنادي هسه
زين شمعنى هنادي وايهم يتأذون بنفس الوقت؟
يحزنون ويفرحون بنفس الوقت؟
حياتهم تتشابه معاناتهم تتشابه؟ ليش؟
وهذا كله وهنادي تكول ما افهم ايهم
فهد: ترابط المشاعر اله دور مُعين وهذول الله خلقهم لبعض لحسن حظهم حتى واحد يكمل نقص الثاني
ثنينهم ايتام وكعدو كملو بعض ايهم صارلها اب وهي صارتله ام
فاقد: وين صارتله ام طيحته لحظه والله
اسراء: اكيييد حبهم ببيناتهم ومايظهرون النا الا الاهتمام العام فَ مانعرف الي بيناتهم بس لازم نتأكد هذول الاثنين ميعيشون بدون بعض
زينب: اريد اصلي لايهم
اخذها فهد لمسجد موجود خارج المستشفى
نص ساعه ودخلو علينا ماهر ونوفه وهنادي على السديه .. ركضو بيها الاطباء وماهر يرجف عليها
اسراء: ولك احجي شبيها؟
اباوعله شفايفه بيض و وجهه اصفر
ماهر: واكعه من الدرج ومفشوخ راسها بأخر درجه ومفتوح ولازم خياط ودمها خلص هاي الطريق كله تنزف والصاله انملت دم منها ..
ماعرف شنو اسوي ولا بيدي شي غير دموعي تصب واتكي ع ربي .. ايهم بالعناية المركزة وهنادي بالطوارئ
ياربي رحمتك بس ...
طلعو دكاترة ايهم
الدكتور: وضعه سيء جدًا وما انطيكم امل بيه نهائي
خلوها ع الله سبحانه طلع الوضع من ايدنا
وبقت بيد ربنا هو يحلها
وبهل الاثناء طلعت الممرضة مال هنادي
: بس نريد بطل دم فصيلة *** بسرعه وضروري
ماهر طلع يركض للمختبر
وفهد كعد بالكاع يصيح رجلي ماتحملني بعد
دقايق والدكاترة تتراكض على غرفة ايهم
وناس جايبه جهاز وناس جايبه ابر
روحنا خرطت واحنا صافنين
زينب اغمى عليها من حست الوضع مو تمام
ونوفه بالمسجد تصلي الهم
طلع الدكتور يركض
: يمعوووودين وينكم قنينه اوكسجيييين بسسسسرعه
خرطت العافيه فد نوووب من صاحو
: جهاز النبض بسرعه لحكولنا
زينب: مات موو خلص انتهى مووووو
بسرعه فهد كعد وراها وسد حلكها بيده
فاقد: فضحتنا سريعه الاشتعال
ونهز برجلنا منتظرين خبر من الدكاترة روحنا طلعت
طلعت الممرضه
: الحمدلله ع سلامتها الجرح الي براسها 5 خياطات واحد منكم يتفضل ويايه بس انطيكم العلاج لو سمحتو
راح فاقد وياها
وربع ساعه وطلع الدكتور
: الحمدلله وضعه حاليًا تمام لحدود الساعتين ونعرف مصيره بوقتها
فهد: يعني شني
الدكتور: حاليًا ماكدر اكول غير الحمدلله ع سلامته مؤقتًا بسبب الجهاز والاوكسجين فقط
وراح الدكتور ورجع فهد كعد بالكاع
فهد: انا لو صار شي على ايهم لا تصدكون اعيش
اسراء: اسم الله ماكو شي ان شاءالله
اجانه فاقد وجهه متعوب
فاقد: تكول الممرضه احتمال كبير تفقد الذاكره مؤقت
فهد: شني هذول خلقهم الله على المؤقت .. مسح وجهه وكال .. استغفر الله ياربي ماجاي اسيطر ع لساني
فاقد: تكدرن تدخلن يم هنادي روحن
كمنا اني وزينب ركض للغرفة الها
جانت نايمه ومعلكين الها المغذي
زينب: وجهها اصفر
اسراء: صارلها يومين مو طبيعيه اصلا
كعدنا كل وحده بجهه ونبجي ع الي صار ويانا
ليش مانرتاح؟ شوكت نرتاح؟
فقداني لحملي وفاجعة ايهم والاضرب هنادي هسه
شمسوين بحياتنا؟ مو كافي صرنا رهن بيد الارهاب
وصرنا نمشي ونجدي بالشوارع مو كافي؟
دخلت علينه نوفه
نوفه: يمه سوده بوچهي بنيتي وجهاا اصفر
ولطمت على صدرها وتبجي
نوفه: يُمه ويلادي ثنينهم لا ياربي لا تفجعني بيهم
نوفه جانت ام الحقيقية لايهم وهنادي
جانت تحس بيهم وتحاول بكل الطرق تجمعهم
جان ايهم يكللها ويوصيها ع هنادي
وتجي نوفه تطبق كلامه ع هنادي
حجيتلها ع وضع هنادي
وكلت الها بيوم وليله اخرست البت وتصفن ع درج غرفتها وتخاف وقبلها تصيح الاسود اجه
شهكت ولطمت حيل
: يايمه بس لا الوسواس الخناس !!!!
"" "" "" "" "" "" "" "" "" "" "" "" ""
