رواية فصلية بديلة ( شموخ ) الجزء الثاني الفصل الخامس والثلاثون بقلم ام ملكوت
:- تافافت بعصبيه وعفت كوب الكهوه بمكانه وطلعت شفته واكف يم المكتب مالت الموظفه
ويدكون فج درت عيني عنهم وانه دمي يفور .. اخذت ملفات المشروع ورحت يمهم بثقه وقوه متصنعه وكتلهم ببرود....
أضف تعليقًا
المزيد من الخيارات
ويدكون فج درت عيني عنهم وانه دمي يفور .. اخذت ملفات المشروع ورحت يمهم بثقه وقوه متصنعه وكتلهم ببرود....
_لو خلصتوا سوالف تعالوا نكمل شغلنه عل مشروع
_بس قبل شوي جنه نتناقش بي وتعبنه
_ليش منو رئيسه الكروب استاذ محمد انه لو انتو..
عكد حواجبه باستنكار وعصبيه واخذ الملف من مكتبه بنتر ومشه للحديقه قبلنه تخصرت وباوعت للموظفه الجديده الواكفه كبالي وكتله..
_ست بثينه ترديلج عزيمه
_لا رايحه على كيفج
_يله بسرعه لحكيني..
هزت راسهه بعجرفه ورحت من يمهه بقيت واكفه انه ومحمد كل واحد بجهه وعينه على الشوارع اجت بثينه وكفت يم محمد وكتلهه بصيغه امر..
_روحي انتي جيبي الحصيره فرشيهه حتى نكعد شلون نشتغل تردينه وكفه
_انه اروح
_لا العفو منج جنت احجي ويه هذا الحايط المحمر..
باوعت لمحمد بلكي يحجي وياي ومايخليهه تروح كتفت اديه وباوعتلهم بترقب من يمته وعلاقتهم هيج قويه سوالف وضحك وتريده يدافع عنهه
وهوه ماقصر راح جاب الحصيره بنفسه وفرشهه لو انه تخبلت وخاصه لمن باوعتلي وابتسمت باستفزاز .. هزيت راسي بوعيد وكلت انه اعرف
شغلي وياهه ام الواسطات هاي .. كعدنه وفرشنه الملفات بالكاع خليت اللابتوب بحضني اشتغل وعيني كل شوي تروح عليهم وهمه يتناقشون
بيناتهم ومعتبريني هامش يمهم .. اي ميخالف ولا يهمني العين بالعين والسن بالسن شفته مد ايده يريد ياخذ الملف خليت ايدي عليه وكتله ببرود..
_لا تخربون شغلي خلوني لمن احتاج مساعدكم ااكلكم تمام..
عكد حواجبه باستنكار وسحبت الملف من ايده واخذت الثاني من كدام بثينه خليتهن يمي وبقيت اشتغل وهمه مكابليني ويصفنون شويه وكسرت الصمت بثينه لمن كلتله..
_رايحه اسويلنه انه وياك كهوه شكلهه الكعده مطوله..
ابتسمت باستهزاء وهيه كامت و كتلهه وعيني عل لابتوب..
_لا تنسين تبقين بمكانج لحدما نكمل شغل
_شنو
_اليحب يكوم بوسط الشغل اتشرف بطلعته من الكروب
_مفضله علينه شنو
_اي مفضله على راسج..
باوعتلي بعصبيه وهم باوعت لمحمد يلي عينه علي يترقب تصرفاتي واسلوبي من شافته غلس عنهه تافافت ورجعت كعدت كوه بمكانهه كملت شغل
ملف واحد وانطيته الهه تروح تنسخه ابتسمت بتوعد وكامت تنسخه عرفتهه راح تسويلهه سالفه .. شلت الملف لمحمد وكتله بهدوء..
_ساعدني وافرزلي هل ملف وحفظه يمك
_مو توه انطيتي لبثينه تطبعه
_اي اريد كل شغلي اضم عنه نسخه احتياطيه عندك مانع
_ليش تحجين هيج
_شلون يعني
_جناان
_نعم استاذ محمد عندك شي تريد تكوله..
باوعتله ببرود وهوه صفن ماعرف يحجي خله وكام بعصبيه دخل جوه بهتت ملامحي القويه وبلعت ريجي بصعوبه مقهوره على وضعنه هذا شويه
ورجع بيده اللابتوب مالته عبالي راح بعد مايشتغل وياي بس اثاري طلع يجيب اللابتوب .. تحمحمت ورجعت عيني عل لابتوب اجت بثينه انطتني الملف
وكلت لمحمد يجيكه باوعلي باستغراب لان مو من عوايده اجيك وره شغل زملائي وفعلا بثينه الوحيده يلي ماثق بيهه بالشركه كلهه ..
جيكه وطلع مابي شي خلاه يمه وطفيت اللابتوب جبت الملفات كلهن فرشتهن كبالنه وصرت اتناقش بشكل طبيعي بخطوات الشغل وتسليك البيانات
وكيفيه الصنعه وهوه منتبه وياي وبثينه كل شوي تتصنع التثاؤب بملل .. خليت القلم بنتر على الملفات وحجيت بدون ماباوعلهه..
_ست بثينه اذا نعسانه فوتي جوه اخذيلج قيلوله
_لا ماكدر اخاف املاكي تنباك اذا دخلت..
رفعت راسي باستغراب واشوفهه تباوع لمحمد مبتسمه وهوه يباوعلهه بملامح جديه للحظه صارت وخزه بضلوعي قويه لزمت مكان الالم عاصرته ومغمضه
بالم بقوا هادين ويباوعولي وانه الوخزات انهالت علي حسيت عليه كام دخل جوه بسرعه ورجع قدم كلاص الماي يم ايدي وكال بدون مايباوعلي..
_شربي ماي وهيه تروح الوخزه
_شمدريك بيهه وخزه
_لانهه مافاركتني من هذاك اليوم..
فتحت عيوني وباوعتله بقهر وانه عاكده حواجبي بالم وهوه ولا باوع بعيوني اخذت الكلاص منه وشربته مره وحده حسيت وره لحظه راحت
النغزات بس وكأن غصيت بالماي وبقه واكف بصدري ماعرف غصه قهري هاي الحجبت عني الهوى .. رجعنه نشتغل وبثينه جنهه تنين صارت
تباوعلنه بعصبيه وتنفخ بهوى حار وصل لوجهي.. كملنه نص الشغل تقريبا وسدينه الملفات وهوه كام قبلنه دخل جوه وراحت وراه بثينه تركض فركت
وجهي بعصبيه كلش استفزتني اموت واعرف شنو البيناتهم هيه وياه .. لميت الملفات واخذت لابتوبي ودخلت خليتهن عل ميز مالت المكتب ورجعت
لميت الحصيره كوه خليتهه على جهه ودخلت وانه انكت بملابسي من التراب رفعت عيني وشفته يباوعلي وشتت عيونه عني بتوتر بقيت اباوعله
وانه امشي ناحيه مكتبي وشفته بعد ماخله عينه علي تنهدت وكعدت بمكاني شويه واجت المشرفه وكفت فوك راسي وهيه تكول..
_جنان المدير طالبج روحي شوفي
_بس شنو اليريده مني
_عذريني والله ماسالته شتريد من جنان ..
حجت باستهزاء وراحت هزيت بايدي وشفت محمد يباوعلي باستغراب خطر ببالي فكره وكلت احرك كلبه مثلما حرك كلبي عاد اخذت دفتر ملاحظاتي
ورحت لمكتب المدير دكيت الباب ودخلت اشرلي اكعد عل كرسي واجيت كعدت وهوه يكول..
_شلون صرتي جنان انشاءلله كلشي تمام
_اي استاذ كلشي تمام شكرا على سؤالك
_اي الحمدلله الا اكول وين وصلتي بالمشروع انطيني اخر التطورات بله
_وصلنه حاليا لتركيب البيانات ودمجهن
_يعني ماضل شي انشاءلله
_اي انشاءلله اذا ماصارتلنه عراقيل منا لبعد اسبوعين انه مكمله شغلي
_كلش زين بس على راحتج عدنه شهر بحيله حتى نسلم كلشي
_حاضر استاذ ..
ابتسمت وصفن بعيوني ولمعه غريبه بعيونه صارت تحمحمت ونزلت راسي شفته بقه ساكت ردت احجي وكال بتردد..
_جنان انتي مرتبطه ..
باوعتله باستغراب واحس كلبي طاح بمعدتي من التوتر الصار بسؤاله هذا لدرجه لا اراديا وكفت وكتله بسرعه..
_اي استاذ انه مخطوبه
_مخطوبببه
_اي ليش استغربت
_من يمته هل حجي
_صار شهر ونص تقريبا
_وليش احنه ماندري بشي
_فقط عقد شرعي وبسرعه ماسويت حفله حتى اعزمكم اسفه
_لا عادي بس انصدمت ماتوقعت تنخطبين بهل سرعه ولو هيج جمال ينلكف بسرعه محد يتردد بطلبه..
حجه هيج وباوعلي مبتسم باسف بادلته بنظره توتر وكتله عن اذنك وطلعت من المكتب بسرعه وكفت بالباب ولزمني مغص ببطني بقيت لازمتهه وسانده نفسي عل حايط اجه محمد من بعيد من شافني هيج وكال بقلق..
_شنو شبيج جنان
_لا مابيه شي بس مغص خفيف لا يضل بالك
_تعالي كعدي ..
اخذني من ايدي وانه امشي كوه احس ضهري والحوض تشنج كله والتقلصات موتتني كعدت عل كرسي وراح جابلي ماي والبنات التموا علي يسالني شبيه
كتلهن مابيه شي ومديت ايدي شغلت الحاسبه وشفت التاريخ.. غمضت عيوني بالم ولوم شلون انسى تاريخهه هسه شلون اذا بينت علي خرب
شرفهه من سالفه .. اجه محمد بيده كلاص ماي دافي مايل للحروره اخذته اشرب منه والبنات كلمن رجعت لمكانهه تقرب محمد يم اذني وهمس يسالني..
_هذا موعدهه
_شنو قصدك
_مغص العاده الشهريه هذا
_لا ماعرف لا تحجي هيج كلشي مابيه روح لمكانك
_وليش توترتي تره عادي
_محمدد
_لحظه..
راح من يمي وانه ودي الكاع تنشك وتبلعني على هل فشله اكره ماكره شخص يفتح موضوعهه وياي مو نوب ولد رفعت راسي وشفته يدور ماعرف شنو
بميز المكتب مالته طلع طبقتين ادويه وراح للمطبخ جاب كلاص حليب دافي وخلاه عل ميز هوه والادويه رفعت راسي باستغراب وكتله..
_شنو هاي
_ادويه مسكنه
_وشيسون عندك
_جنت جايبهم للاحتياط المهم اخذي من عدهن وتصيرين زينه
_محمد
_رايح انه لشغلي..
شتت نظره عني وراح لمكانه وعيني تتبعته شفته كعد وهوه عاكد حواجبه ببرود باوعت للأدويه واخذت بيدي من كل طبقه حبايه خليتهن بلساني
وشربت وراهن ماي .. حظنت بطني باديه وراسي خليته عل ميز منتظره يشتغل مفعول المسكن شويه وراح الالم حسيته اشرت لزميلتي اليمي على
فستاني وهيه فهمت علي.. وكفت والتفتت عليهه اشرتلي بمعنى لا ماكو شي بفستاني زفرت براحه
ودخلت للحمامات غسلت وجهي واديه وجابتلي اللازم البنيه لبست وطلعت لمكتبي وهيه اجت يمي تسالني..
_اكول سؤال
_تفضلي حبي
_شنو البينج وبين محمد اشو جنتو اصدقاء وهسه محد يحجي ويه الثاني ومن شافج تاذيتي اهتم بيج حتى ودالي شغلات بيدي
_شنو شغلات لا تكليلي هاي منه
_اي هوه راح للاسواق القريب جابهن و انطانياهه وكلي اجيبهه الج خاف تستحين تاخذيهه منه
_لا بربج
_اي والله نوب انه فشلت ومالي شغل
_خرب شكلي خرب شكلي وين انطي وجهي هسه
_هسه كليلي شنو البيناتكم وتالي احتاري بوجهج وين تنطيه
_شجاوبج تنصدمين لو اكلج شنو بيناتنه
_صدميني الله عليج
_يصير خطيبي
_ااالله علييج
_اشش صوتج فضحتينه
_تحجين صدك لو تقشمرين علي
_اي والله قبل شهر ونص خطبنه وهل فتره صايره مشكله بسيطه بيناتنه وهل مانتحاجه
_بس شو ما كتولنه ولا واحد حس عليكم من قبل
_اي لاني طلبت مايحجي ولا يبين لاحد منكم حتى نكمل شغلنه بالمشروع على اكمل وجه ومحد يسوي حزازيات
_بس اشو صارله من غبتي لهسه وهوه وبثينه مترافقين
_شلون يعني
_هوه صح ماينطيهه مجال بس هيه تحجي وتسولف وياه
_وين مامنطيهه مجال مو هل يضحكون ويسولفون سويه
_لاا وللج والله بس من اجيتي صار يبادلهه سالفه والضحكه حتى احنه استغربنه كلت معقوله حباهه لو شنو اثاري طلع حتى يغيضج
_حلفي
_اي والنبي ..
استبشرت ملامحي وراحت عيني عليه وهوه انتبه علي عكد حواجبه بتسائل على ابتسامتي ورجعت عيني على البنيه وهيه تكول..
_وهسه شنو صار احجيلي الله عليج زميلتج انه من سنين
_هههه ماصار شي بعدنه على حافه الهاويه
_الاعرفه هوه يحبج وهل شي واضح على تصرفاته واسلوبه وياج طول هل سنتين ونص الفاتت بس وانتي شنو
_شنو
_تحبينه ..
بهتت ابتسامتي ورجعت باوعتله وهوه يشتغل ومركز بالحاسبه جريت حسره وحجيت وانه عيني تتامله..
_احس اني عشكته مو بس احبه
_ااااالله
_هههه صوتج وعلي راح ننفضح من وراج
_تصدكين جنه من نشوفكم انه والبنات بالحديقه والخضار حواليكم شنكول
_شتكولن
_نكول اجتمعوا امير وفريحه شلون ثنين حلوين رغم ماجان بالنه ان ممكن تحبون وترتبطون بس منظركم يوحي انكم عصافير حب
_هههه خوش عدجن نظره حلوه
_اي والله انشاءالله يزول الزعل بيناتكم وترجعون تجتمعون
_امين ربي يسمع منج
_يله كملي شغلج وانه خلي اخبر البنات واكلهن عصافير الحب تزاوجوا
_ياا فلشج شهل كلمه هاي
_هههه عاتي عاتي بعدين تتزاوجون
_خرب شكلج روحي منا..
ضحكت وانه انضميت بملابسي من الخجل مدري شصار بيه من حجت هيج بقه وجهي مبتسم وكلمتهه تتردد لمسامعي وللحظه تخيلت نفسي
بحضنه حسيت الجو صار حار وخنكه صرت اهفي على وجهي وانفخ اهدي كلبي يلي انخبص .. رجعت لهيت نفسي بالشغل لحدما خلص وقت
الدوام .. لميت جنطتي وشغلاتي اخذت الملفات وياي ورمش علي احسان معناهه بباب الشركه هوه
لبست جنطتي اخذت العكاز ومشيت صعدت بالمصعد يم محمد وبثينه الرادوا ينزلون .. بقيت واكفه على جهه وهمه بجهه واسمعهه تكله ..
_محمد شنو عندك هسه شغل
_ماعندي شي ليش
_تكدر توصلني للجيم اخويه ماراح يجي علي اليوما
_تمام اوصلج
_شكرا الك كلش ريحتني جنت بقلق شلون اروح للجيم وللبيت بدون سياره
_لا ولو ما بيناتنه اشكال..
ضحكت بدلع ولزمت ايده وهوه ابتعد عنهه بسرعه نفخت بضجر وكلت الى متى رح يبقى يمثل وهاي مستغله الوضع .. انفتح باب المصعد وطلعت
صعدت بسياره احسان وهوه لمن شاف محمد خله ونزل صاحله "هاا نسيب " فتحت عيوني بتفاجئ لمن شفت محمد ابتسم واجه على احسان تسالموا
كتف بكتف وبقوا يسولفون طبيعي استغربت من يمته احسان علاقته قويه هيج ويه محمد وهوه بس مرتين شافه وسلم عليه .. بقيت منتظرته وانه
اتاملهم سويه رجعوا تسالموا واجه احسان صعد بالسياره وهوه مبتسم اشرله وحرك السياره التفتت عليه وكتله بعد تردد طويل..
_من يمته علاقتك بمحمد هيج قويه
_من بدايه
_هم تلتقون بره
_اي كل فتره نطلع للمولات نفتر ويه جماعتنه
_هاا
_ ليش عندج مانع
_لا بالعكس حلوه علاقتكم بس تفاجأت لان ماجنت ادري بيك هيج مقرب منه
_جا غير نسيبنه الكفو هذا لو عندج حجي ثاني
_بس احنه راح ننفصل
_وبعدكم مامنفصلين
_يعني منتظر ننفصل ياله بعد ماتلتقي بي
_لا مافارك الناس الزينه انه..
حسيته كاعد يبسمرني لان طلبت افسخ عقدي وياه وانفصل عنه وهوه احسن الي من غيره بعيونهم تنهدت ودرت وجهي عل شارع دقايق ووصلنه
للبيت نزلت ورحت بوجهي لغرفتي بعدما مسيت على ابوي وامي .. ذبيت ملابسي ودخلت للحمام غسلت وغيرت وطلعت لبست ترواكه شتوي علكت
الهيتر وخليته يم رجلي وكعدت عل جربايه وافكر بمحمد حسيت نسبيا ارتاحيت لمن شفته ولمن سمعت كلام زميلتي عنه هوه وبثينه
بس هاي بثينه عكربه خايفه تستغل انفصالنه وتقربه منهه وهوه يتورط وياهه بحجه ان يخليني اغار لازم افكر بطريقه تبعدهه عنه بس شلون وهوه
ماكاعد يباوع بعيوني حتى .. تنهدت و طلعت للمطبخ خليتلي تمن ومركه وزلاطه وطرشي
بصحون وكعدت عل ميز اكلتلي لكمتين غسلت الماعين وطلعت كعدت يم اهلي بصف بابا خله ايده على كتفي وهوه مبتسم ويكول..
_شلونج باباتي شلون صارت نفسيتج
_زينه بابا الحمدلله انت شلونك صحتك
_نحمد الله يابويه انه من اشوفكم بخير اصير بخير
_الله يخليك النه يارب
_ويخليلج احباب كلبج بعد كلبي..
ابتسمت وبقينه كاعدين نباوع تلفزيون هنااك وحجت امي عن عرس محمد وكالت موجهه لكلام لبابا..
_مساع خابرت سماء وكالت ما ضل شي انشاءالله الجمعه يعرس محمد
_اي بيهه الخير انشاءالله الله يتمملهم على خير بعد انتن شوفن شنو عدجن شغلات ومن هسه اخذن احسان كملن امورجن لان راح ينشغل ويه الولد بالحنه والمعازيم
_اي بعد باجر نشوف لو عكبه على فرغته ياخذنه للسوك شتكولين يمه جنان
_اي يمه بكيفكم على راحته بعد باجر عكبه يمته ماجان انه ماعدي شي بس ااجرلي فستان
_ليش بابا خوب اشتري عليمن تاجرين
_لا باباتي حبيبي بالخطبه اشتريت وبقى بالكنتور مالبسه بعد فعليمن ضاله اشتري ب٧٠ وب١٠٠ وينظم بالكنتور خوب ااجرلي فستان يوم واحد وارجعه تالي هم توفير وهم مايضل وتخرب كشخته
_بكيفج بعد بويه بس اذا عجبج فستان ثاني اشتري مالج شغل بالفلوس انه راح انطي لامج تشتري الج
_صدك بابا مدام عندك فلوس اريد اطلب شي جان بنفسي من زمان
_اي طلبي عيوني الج
_لحظه خلي اكوم اجيبلك نقالي اوريك
_تمام..
كمت بسرعه جبت نقالي واجيت دخلت عل انستا وطلعت تراجي ذهب ناعمات ثقب ثاني وعلى شكل حلقه وياهن تراجي طوال يجن سيت كامل وريتهن اله وكتله..
_بابا شوف هذولي ينخلن بالاذن اريد اثقب اذني واخليهن حلوات
_من عيني ذهب هنه مو
_اي بابا هنه شوي غاليات لو رخاص جان اشتريتهن من راتبي اريد بس تجملني ١٥٠ ومني ٢٥٠ حتى اجيبهم هنه موجودات بسوق الذهب بالعشار
_عساج على تراجي راح انطي امج فلوس واخذيهه وروحي جيبي التردينه
_شكرا بابا حبيبي بس ماكتلي حلوه نقشتهن لو اجيب غيرهن
_كلشي حلو عليج بنيتي ماعرف انه بهل شغلات بس تعاي اكلج تعاي
_هاا
_ راح انطيج فلوس وجيبي زوج ثاني غير نقشه لامج وكليلهه انهه منج فرحي كلبهه
_ههه وليش ماكلهه منك
_انه بله يوميه جايبلهه شغله مامقصر وياهه بس اريد الهديه منج تطلع احلى وهم تخفف عليهه تعب هل سنين الكضتهه عليكم خطيه تعبت وياكم باخر
فتره وخاصه انتي من تشوفج تعبانه تضل ليلهه كله سهرانه تفكر بيج وتدعيلج عاد جبري خاطرهه بهديه صغيره
_حاضر بابا من عيوني بس انه بفلوسي اشتريلهه لمن استلم راتبي لان راتبي هل شهر كله انصرف
_ميخالف بويه بعد انتي رايحه رايحه اشتريلهه وياج بفلوسي واعتبريهن دين
_تمام اذا هيج لعد من استلم ارجعلك فليساتك
_هههه اتفقنا..
ابتسمت واخذت ايده بستهه وهوه باس راسي وحضني وامي حجت بعدما جانت تباوعلنه بترقب..
_هاا ولكم شنو جنتوا توشوشون ومخلينه صافنين عليكم
_هيج امي طلبت من بابا يشتريلي تراجي صغار وتشكرته
_بله وينهن خلي اشوف هسه يطلعن مال جهال..
ضحكت وكمت يمهه راويتهه التصميم مالتهم وعجبهه وبقيت اكلب بقيه التصاميم اشوف ذوقهه بالتراجي شلونه حتى اشتريلهه التعجبهه هنااك
ووكفت على زوج كلش حلو وعجبهه وحتى نصحتني اشتري شفت عيونهه لمعت باعجاب وهيه تتامله عاد سويتله سكرين واشرت لبابا بعلامه
اوكي وهوه هز راسه مبتسم .. ومر كم يوم نفس الروتين بالشغل ومحمد ماختلط بعد وياي ولا انطاني مجال احجي وياه لمن اكون بنفس المكان
يطلع منه ولمن اجي بنفس اتجاهه يغير مسار مشيته كلهه بسبيل ان ماتلتقي عيونه سوه وانه نار وتسعر بيه لمن اشوفه يتجاهلني بهل طريقه
ويحجي ويسولف ويه بثينه نسيت او ماصدكت كلام زميلتي لمن كالت يسوي هيج حتى يخليني اغار لان وبشكل واضح كاعد يشوفني لمن اباوعلهم
ويعرف كل زين شلون كاعد اضوج وانقهر ويعرف زين اني رايده احجي وياه ويتجاهلني ويتشرد مني عينك عينك لحدما طكت روحي وقررت بعد
عطله الاسبوع وزواج محمد ابن عمو شهم احجي وياه واساله اذا يريد يكمل وياي او يريد يطلك لان تعبت واحس روحي صارت رخيصه ياهو الاحبه
يتجاهلني ويمشي اعوج وياي لمن ابينله ولو القليل من مشاعري اتجاههم .. ضربت المشط بالميز وفركت وجهي بعصبيه دخلت امي بعدما اندك
الباب وكالتلي ان شموخ راح تجيلي العصر كلت بعد احسن بلكي تريح كلبي وتنطيني حل ونهايه لتعبي .. كمت لفيت شعري بالقراصه وطلعت وانه
طاكه روحي اريدلي بس شي التهي بي طلعت بالساحه بهل ضهريه والجو شتا
وبارد فتحت ماي الماطور قوي وباارد يكص كص بقيت ارش بيهه وملابسي نكعت طلعت امي صفكت ايد بايد وكالت بصدمه..
_يااا ولج يمه هاي ليش هيج بللتي نفسج
_اريد اغسل الساحه
_تردين تغسليهه بهل برد ولج والماي يثلج
_اي عادي امي شسالفه دنيا ضهر ماياثر
_لا تتمرضين يا يمه ماصارلج هواي من طابت عظامج ومنا رجلج بعدهه يايمه
_امي خليني براحتي اريد الهي روحي بشي لان ضايجه خليني اذب حركه كلبي بيهه عل اقل انظفه لو ماكدرت انظف كلبي
_ليش يمه شصاير وياج حبيبتي
_ ماصاير بس طاكه روحي وضايجه مشتهيه اسافر اطلع ارفه عن نفسي ومشتهيه ابقى بالبيت ومافارك غرفتي
_ياا وشلون تصير هاي بله
_ماعرف امي ماعرف هسه خليني اسافر بالماي ونفكر تالي بيمن نروح
_هههه فلشج كون
_هوه انه متفلشه شضال بيه
_لا اسم الله عليج مابيج غير العافيه انشاءلله
_يبعد العافيه انتي
_حبيبتي بنيتي يله غسليهه بسرعه ودخلي ولا تبللين رجلج وتضل تصل عليج ماشي
_انشاءالله حبيبتي..
دخلت اخيرا بعد هل نقاش الطويل وشلت المكناسه ام العود وبقيت اكنسهه وارش ماي وانه واكفه.. هنااك ودخل احسان من بره وحجه وهوه يتقدم باتجاهي..
_يول هاي ليش تغسلين بره وبهل برد تردين تجمدين
_اي مو اميره الثلج انه واجمد
_ههه شبي البوز منورنه اليوم
_طالعه روحي احسان روح منا لا اتعارك وياك
_يول يول اعصابج عجل لو كل يوم هيج محد يفتح بوجهج
_ادري جنت مرافك اهل الانبار وكضيتهه علي يول وعجل
_اي والله جنت يم صاحبنه الانباري وعجبتني لهجتهم عاد لكفت منه جم حجايه
_عاد حلو لا
_وشتردين بي ولج وبعدين ماعيب عليج تسالين اخوج هيج سؤال
_عاد كلنه نشوف خلقه الله شلونهه شكلنه هسه احنه
_اسكتي اسكتي لا اخبث عليج وافتن عند النسيب
_الا صدك هذا نسيبك من تلتقي بي كله خل يجي يطلك تره ماكاعد يخليني افتح حلكي واحجي وياه كلمه
_ليش تردين تطلكين منه
_يعني صار شهرين مقررين نفسخ الخطوبه ومن ذاك اليوم لهل يوم باقين هيج لا احنه مرتبطين ولا احنه مفترقين ولا كاعد يخليني اكعد واحجي وياه مثل الاوادم
_تردين احجيلج وياه
_لا أريدك بس تكله جنان طالبه الطلاق وهوه مجبور مو من كيفه يجي يحاجيني
_يعني هسه شنو تردين تطلكين صدك لو بس حتى يجي يحجي وياج..
صفنت من حجه هيج وبلعت غصتي عفت المكناسه و باوعت بعيونه وكتله بقوه وثبات..
_اريد الكالي حل ودامنه واحد يتشرد من الثاني فراح تستمر هل مهزله سنين وانه البيه مكفيني وانت تدري بالحال يا احسان فيا اما يطلكني يا اما يكعد ويحجي وياي ..
عرف قصدي على تعب نفسيتي وانتحاري اخر مره وفهم اني ممكن يصير علي ضغط واعيد نفس السالفه ومن خوفه علي باوعلي وبهتت ملامحه
وهز راسه بايجابيه بعد دقايق من الصفنه والتفكير خله ودخل جوه بدون مايحجي كلمه وياي ورجعت انه اخذت المكناسه وذبيت العكاز وصرت اغسل ودموعي لا اراديا
تنزل قهر على تعب على ملل احس روحي بمستنقع مظلم وماكاعد اقوى على الخروج منه والمضعفني هوه كلبي والحب يلي بي اعرفه كلبي
نذل واذا حب شخص يريده دوم يمه ويحس بنفسه عزيز عنده وانه تعبت كلش تعبت ماعرف الخلل بيه او بيهم لو بكلبي ومشاعره الملخبطه الغامضه ...
خلصت غسل بعد ساعه كامله واحس روحي جمرت وجسمي عرك خليت الماي اغسل رجلي وحسيت ببرودته وفكرت لو هاذ الماي البارد
ينزل على نار كلبي يكدر يطفيهه .. للحظه فكرت اجرب ورفعت الصونده بيدي وصار الماي البارد ينزل على راسي وصولا لاصابع رجلي..
نزلت الصونده على جهه كلبي وغمضت عيوني حاسه بالماي البارد ينزل على ضلوعي ويحتر مايطفي شي بعدت الصونده ورحت بملابسي
المبلله وجسمي اليرجف طفيت الماطور وساعتهه ماخفت من كهرباء ولا خفت تلزمني وانه مبلله
ومحد يلحك علي فقط طفيته بلا مبالاة ورجعت دخلت من المطبخ شافتني امي ولطمت على خدهه وكالت بخوف..
_ياا ولج يمه هاي شمسويه سبحتي بره بهل برد والماي يكص كص
_اي امي عادي الجو زين
_والماطور منو طفاه
_هاا
_ااالله ااااكبر على راسي ولج جناان تردين تموتيني تردين تجلطيني ولج يمه طفيتي الماطور وانتي هيج ناكعه بالماي البارد ولج ماخفتي تلزمج
الكهرباء وماتفكج ماخفتي على روحج هيج عندج رخيصه وسهله الموت وانتي ماصارلج اسبوع من شفيتي من اصاباتج الجنتي تبجين وتونين ليل نهار من وراهن
_مادري يمه طفيته ياله استوعبت ان ملابسي مبلله مو قصدي
_امشي من كدامي جنان امشي لا توريني وجهج بعد
_يمه شسالفه اهدي لا يصعد سكرج
_روحي من يمي كتلج لا اجرم بيج هسه
_هيج طاكه روحج مني يمه ..
باوعتلي بتعب ونزلت راسهه خافيه دموعهه يلي نزلت بدون سابق انذار فتحت عيوني بصدمه واجيت عليهه حضنتهه ودموعي ماصدكت لكتلهه
سبب حتى تطيح بقيت حاضنتهه واحاول اهديهه كعدتهه عل كرسي وجبتلهه ماي شربتهه وهيه عينهه دايرتهه عني هدت بعد دقايق وخلت ايدهه
على راسهه وغمضت بقيت اباوعلهه وجسمي وسنوني تطكطك من البرد صار العصر كلش والجو برد زايد ..فتحت عيونهه وحجت وهيه عينهه بالفراغ..
_كومي بدلي ملابسج
_امي شبيج ليش بجيتي هيج انه متعبتكم ومادري
_ماتدرين جنان
_والله الكاعد اسوي بروحي من ضيمي وماجان قصدي ااذي احد منكم او اخليكم تقلقون علي
_ليش مو اهلج احنه مو امج وابوج الربوج وكبروج تعبوا عليج ماتدرين يعني اذا صار بيج شي ولو فلاونزه خفيفه ننخبص عليج وليلنه ما ننامه
_ اسفه امي ادري بس مو بيدي والله مالي واهس بالدنيا ولا الي نفس بيهه بعد احس لو اموت...
قبلما اكمل لطمتني على حلكي وهيه ناطه عيونهه علي بعصبيه وخوف حسيت بطعم دم صار بلساني دمعت عيوني مهضومه وكمت من يمهه رحت
لغرفتي كعدت عل كرسي باوعت بالمرايه واشوف شفتي مشكوكه شوي وطالع دمهه كمت للحمام بقيت اغسل بالدم وابجي اول مره هاي امي تمد
ايدهه علي من صغري لهسه وابد ماجانت الضربه من كرهه لو من ضوجتهه مني بالعكس جانت ضربتهه حنينه وتنبع خوف وقلق علي جانت ضربه
لا اراديه لمن سمعت بالموت لمن استوعبت اني جبت سيره شي ماتتحمله ولا تكدر تفكر ان ممكن يصير بيوم من الايام وطبعا كل ام بالدنيا تتمنى
يخلص عمرهه وتموت قبلما تشهد موت واحد من جهالهه ..الله يطول بعمرهن يارب ويرحم امهاات المسلمين اجمعين.. غسلت وجهي وشفتي من فوك
ورمت عبالك ضاربه فلر خليت ايدي اتلمسهه وغمضت عيوني بالم وضحكت بقيت اضحك وابجي واحتاريت اضحك على خوف امي الجسدته
بضربه فلر لو على القلق والخوف السببته الهم كل السنين الفاتت .. برطمت بكسره خاطر ومسحت دموعي طلعت بدلت ملابسي ورجلي كامت تاذيتي موتتني رحت كوه امشي عل عكازه اخذت حبايتيت مسكن ولفيتهه بالباندج وتمددت ادفيهه فتره وسكن الالم لزمت نقالي
دخلت على صوره محمد المخليهه بالتلي وبقيت صافنه بعيونه الحلوه ودموعي تنزل وحدهه فتره مو طويله وسمعت صار صوت بالصاله عرفتهه
شموخ وصلت عفت النقال وردت اكوم وهيه دخلت اجت حضنتني ودمعتهه بعينهه اعرفهه هاي الدمعه اعرف كسره الخاطر والضعف هذا حسيت عليهه اختي وبت عمي صاير وياهه الصار وياي حسيت بيهه كاعد تعيش العشته انه ولازلت اعيشه.. جريت حسره وكتلهه وانه ايدي بايدهه ..
_شلونج خيه شهل زياره المفاجئه الحلوه
_الحمدلله حبيبتي انتي شلونج عاد اشتاقيتلج وكلت خل اجي اطمن عليج فتحتي جبيرتج وشلون اصاباتج صارت
_شوفه عينج رحت قبل ٥ ايام شفتهن صارن زينات وطايبات عاد فتحهن الي المضمد وكال روحي بس مرات رجلي تصل علي عاد جبتلي عكازه استند عليهه من امشي
_اي الحمدلله على فك اسرج
_شيفكه اسري انه يمعوده
_هههه بس هاي ليمته راح تبقين عل عكازه
_لحدما اشوف رجلي قوت عضامهه ياله
_هاا تمام ..اي سولفيلي بله ليش اسرج ماينفك شصاير
_طالعه الدنيا من عيني وتعاركت امي وياي مساع وضوجتهه ومنا محمد يتكسكس علي
_ياا هههه خرب شكلج شهل حجي
_والله طلعت روحي لا هوه حاجي وياي ولا ينطيني مجال احجي وياه
_هيه حيره ياخيه شوفي خاف سامع عنج شي او سمع عندج علاقه بمرتضى وتتواصلين وياه
_بس انه ماتواصل وياه فشلون راح يسمع بشي ماصاير اصلا
_يعني كطعتي من مرتضى كلش
_اساسا من اولما قررت افسخ عقدي ويه محمد اخوج صرت انفر منه لمن اشوف شي حلو بتصرفاته ولمن سمعتيني تسجيله فتحتي عيوني على يلي بكلبي وعرفته شيريد
_وشلون عرفتي شيريد
_مشاعري لمرتضى عكس قبل تماما تصوري لمن سمعت التسجيل جان المفروض ابجي واصيح واعاتبه واسمع منه الحقيقه عل اقل بس كل هذا ماصار
_شلون ماصار وانتي كعدتي تبجين وتنوحين بحضني بهذاك اليوم ولعبتي بي لعب
_رزلته حتى يحس بذنبه وبيومهه ابجي على نفسي ومن الم ضلوعي الهاج علي تدرين شموخ الشفته والحسيته كل هل سنين مو هين انه بجيت مهضومه على تعبي وصحتي وروحي الجانت تحترك انه بجيت لان
لحظتهه ادركت اني احب محمد ومرتضى وتفكيره بيه ونيته اتجاهي ماهمتني انه بجيت على الضيعته روحي
_تحبينه
_الحب كلمه قليله تصوري محمد بمده قصيره ولنفترض مده سنتين فقط كدر يستولي على كلبي ومشاعري بشكل اكبر واعمق من حبي لمرتضى كل هل سنين الفاتت
_اييه ياخيه الحب ماينقاس بالعشره ولا بعدد السنين ومحمد هوه حبج الحقيقي يلي مستحيل تكدرين تنسينه
_لاول مره احسج مطاوعه الحب وتمشين بي واحسج مختلفه صارلج فتره احجيلي عنج بله وعوفج من ضيمي
_ههه شحجيلج عني يكولون الانسان وهوه ببطن امه يشوف سلسله حياته لحدما يموت ويحس
بكلشي رح يصير وياه ومدامني الله خلقني اكره الحب معناهه جني حاسه راح يصير هيج بيه
_شلون ولج تره وكفتي كلبي معقوله شموخ تحب
_ايي يا خيه طايحه انه ومن زمان مثل طيحه هذاك الكام مهضوم ويبتسم
_راهب مو
_ليش اكو غيره حب وشتاق وسلملي كلبه وكل شبابه
_وانتي شنو
_ردت ارجع اطيح باشباكه لولا حادث ريانه الرجعلي عقلي لراسي
_شدخل
_حسيت بندم وتانيب الضمير لان التهيت عن بنتي وماعرفت اربيهه واعلمهه عل صح والغلط وخاصه بهيج عمر البنيه تبدي تفتح عينهه عل دنيا وماريد بنتي تضعف ويصير بيهه يلي صار بغيرهه من الاغت صبوهن والخط فوهن والقت لوهن والضحكوا عليهن بسبب اهمال اهلهن
_بس هذا مو عذر اعتبري نفسج باقيه ويه زوجج شراح تسوين وقتهه هم راح تهملينهه لو راح
تربينهه صح وهسه نفس الشي اذا تزوجتي راهب تكدرين تامنين بنتج عند امه لو تبقينهه عند امج وهيه تربايتهه والنعم منهه
_شلون ترديني اعوف بنتي وهيه بهل حاله واتزوج جنان ولو نفترض تزوجت واخذتهه وياي واخوج
_شبي اخوي
_شلون اكدر اكسر كلبه وهوه منتظر موافقتي كل هل سنين شلون اكدر اجرح مشاعر اعز صديق ورفيق عندي واتزوج غيره حتى لو جنت #احب_راهب خليني وحدي ولا اضطر اختار واحد منهم واكسر الثاني
_هناا الحجي يعني المانعج عن راهب مو ريانه وانما مشاعر اخوي اتجاهج وخوفج عليه مو
_الاثنين مهمات بالنسبه الي وخلن حد بيني وبين راهب فلو جان السبب بس ريانه جان انرسم هل حد لكم سنه فقط بس اهميه احسان عندي رسمت حد بيناتنه للابد
_هيج اخوي عزيز على كلبج لدرجه ان تضحين بسعادتج ويه الشخص التحبينه علموده
_ايي والله واكثر مما تصورين
_زين سؤال ولو مو بمكانه بس انتي كضيتي كل عمرج ويه اخوي معقوله ماحسيتي بمشاعر غير الاخوه والصداقه اتجاهه يعني كل شخص لابد
يلين كلبه لمن يعاشر شخص يحبه ويحاول بكل الطرق يسعده انتي معقوله هيج كلبج ما رف ولا لان اله
_اي والله الله شاهد علي احسان بعمري مافكرت بي غير اخ من خواني وابن عمي وصديق طفولتي وجنت بكل مره اشوف عيونه تلمع حب اتجاهي
انقهر وتصيبني خوفه ورجفه غريبه من المستقبل وخوف من ان اكسر كلبه بيوم وهواي اسباب دفينه بكلبي جبرتني مالتفت لحبه الي كل هل سنين
_هففف والله مادري ياخيه عجيب امرنه احنه
_الحمدلله على كل حال
_الحمدلله الا صدك راح تبقين يمي الليله
_اي والله بعد دنيا ليل صارت مايكدر سلام يرجع
_هلا بيكم ابقوا شكد ماتردون افرشلكم عيوني
_يبعد روحي الله ينولج التتمنينه وتعيشين مرتاحه
_ااميين..
ابتسمت بتعب وطبطبت على كتفهه اخذت نقالي وصرنه نكلب بالفساتين يلي بالمولات متناسين المنه ومواجعنه لحدما لكينه مول بالجنينه ياجر خوش بدلات عاد هيه من كتلهه راح ااجر وافقتني عل فكره وراح تسوي مثلي صورنه عنوان المول وطلعنه بره بعدما سمعنه الاذان توضينه ورجعنه للغرفه وكفنه نصلي وريانه كل شوي ساجده كبال وحده وتنضم جوه المحرم لحدما كملنه لفينه مصلاياتنه وطلعنه نساعد امي بصب العشه جانت مسويه كبه وتبسي وبيتنجان شوي وطماطه وخبز حار كلهن هذن جهزتهن من العصر الهم خطيه صبينه الجاي والتمينه عل سفره بس افتقدت وجود احسان باوعت باستغراب وسالت امي وكالت بضوجه..
_اخوج شفته طلع قبل فتره يمكن عازمينه جماعته..
.
شكرا لزيارتكم عالم روايات سكيرهوم
