رواية جثة صوفيا الفصل الثالث بقلم محمود الأمين
الأستاذ صلاح قال إن والدته هي كمان ماتت بمرض السرطان، والأشعة والتحاليل أثبتت إنها مريضة سرطان وقتها، وفضلت تاخد في العلاج، ولكن للأسف اتوفت.
وهنا أنا كنت فاهم الأستاذ صلاح يقصد إيه؟!.. هو خايف إن والدته كمان تكون ماتت بسبب العلاج الغلط، وإنها كانت مش مريضة سرطان أصلًا، ولكنه اتفاجئ من رد الدكتور اللي قال:
_ أنا أعرف والد حضرتك ووالدتك كمان؟!.. ووالدتك فعلًا كانت مريضة سرطان، وفي آخر أيامها جات هنا المستشفى، بس حضرتك وقتها كنت مسافر، أظن عشان سمعت إن ليها ابن اسمه صلاح مسافر بره.
= أيوه بالضبط، أنا كنت مسافر بره فعلًا وقت ما اتوفت.
_ عمومًا، والدك بياخد العلاج ده من فترة كبيرة، وده عمله آثار جانبية خطيرة جدًا. من خلال التحاليل والأشعة اللي قدامي، والدك دلوقتي عنده فشل كلوي وانسداد في الأمعاء، ومع سنه الوضع خطير ومش سهل.. بس إحنا هنعمل اللي علينا، وإن شاء الله والدك يبقى كويس.
= أنا مستعد أعمل أي حاجة يا دكتور، مستعد أدفع أي مبلغ، بس أبويا يرجع تاني ويبقى كويس.
_ الموضوع مش موضوع فلوس يا أستاذ صلاح، صدقني إحنا هنعمل اللي في وسعنا، وإن شاء الله والدك يخف ويبقى كويس.
....
وبعد ما الدكتور خلص كلامه، بصيت للأستاذ صلاح اللي كان واقف وبيفكر: مين اللي بيعمل كده؟!.. مين اللي فكر يقتل أبوه بالبطيء؟!.. وهل الشخص اللي بيحاول يقتل أبوه هو هو الشخص اللي قتل مراته واعتدى عليها، ولا العيلة كلها بقت مجرمين؟!
بدأت أتكلم معاه عشان يهدى، وقلت له:
_ أستاذ صلاح، أنا مش عايز حاجة تشتتنا أبدًا. إحنا كده كده هنعرف مين اللي عمل كده في والدك. هنحقق ورا الموضوع ونمشي فيه، بس بصمت. مش عاوزين اللي كان بيعمل كده يحس إننا كشفناه.. وفي نفس الوقت، اللي حصل مع والدك ده يعتبر شروع في قتل وتزوير، وعشان كده أنا عاوز أعرف منك: بتشك في مين؟!.. ولو مش بتشك في حد، مين الشخص اللي مسؤول عن علاج والدك، واللي كان معاه طول الفترة اللي فاتت؟
= المسؤولة عن علاجه هي الخدامة اللي عندنا في البيت، اسمها رحمة، بس البنت معانا من زمان يعني. ولكن لو حضرتك بتسأل مين الشخص اللي واعي وفاهم بموضوع التحاليل والأشعة، فهي مرات أخويا شيرين.. بس أنا عمري ما شوفت منها حاجة وحشة.
معقول هي اللي كانت بتخطط عشان تقتل أبويا؟!.. وكانت بتديله علاج غلط عشان محدش يشك في حاجة؟!.. بس ليه؟!.. إيه السبب؟!
_ إحنا هنحقق ورا الموضوع ده وهنعرف إيه السبب؟!.. بس أنا عاوزك دلوقتي تهدى خالص وترجع على بيتك، وزي ما فهمتك، مش عاوز الموضوع ده يشتتنا عن موضوع قتل مراتك. إحنا عاوزين نعرف مين اللي ارتكب الجريمة واعتدى على مراتك وسرق الفلوس والمجوهرات.
....
مشي يا صلاح ورجع على بيته فعلًا، وبلغهم هناك إن والده هيتحجز في المستشفى فترة عشان تعبان، وهيكون تحت رعاية الدكتور، وبلغني إن الكل سمع الكلام ومفيش حد اعترض.
وفي نفس الوقت، أنا كلمت وكيل النيابة وبلغته بكل اللي دار في المستشفى، والكلام اللي قاله الدكتور عن حالة التهامي كبير العيلة دي.
ورد عليا وكيل النيابة وقال:
_ هي شكل العيلة دي كلها مجرمين.. وأنا من ناحيتي حققت مع المشتبه فيهم، وكان أولهم صلاح قبل ما يقابلك، وحققت مع عمر ابن أخوه، ومع الولد بتاع الدليفري اللي اسمه خالد. وأقدر أقول إن التلاتة أنكروا إن ليهم علاقة باللي حصل لصوفيا وسرقة الفلوس والمجوهرات.
وبصراحة، أنا مستبعد صلاح. اللي هيخليه يعمل كده في مراته، ويمكن أكتر واحد أنا شاكك فيه هو عمر. شاب مراهق، ليه تصرفات قبل كده سخيفة مع صوفيا، ونظرته ليها مش نظرة واحد لمرات عمه أبدًا.
ولكن في نفس الوقت، اللي مخليني مستبعد عمر من الشك، وبقول صعب عليه يعملها بالطريقة اللي قتل بيها الشخص ده: استخدامه لسلك زي ده عشان يقتل بيه، وبعدين تيجيله فكرة بشعة إنه يعتدي على الجثة، وبعدين يسحبها للحمام عشان يشيل آثار السائل الذكوري، وبعدين يلبسها الروب ويرجعها تاني مكانها في الأرض، ويسرق المجوهرات والفلوس ويهرب.. كل الحاجات دي صعب على واحد في سن عمر، ولكن واحد زي خالد، خصوصًا إن ليه سابقة، ممكن يعمل كده.
= بس أنا يا باشا بستبعد خالد، عشان بعد التحقيق معاه أنا رجعت تاني على بيت عيلة التهامي، وراجعت الكاميرات مرة تانية، وخالد طلع وصل أوردر البيتزا اللي معاه ونزل على طول.. يعني مقعدش فوق.
_ ما هو كده الموضوع مش منطقي، ولو هنفكر بعدم منطقية، يبقى صلاح هو اللي عمل كده في مراته، وممكن يكون متعقد من فكرة إنها مش عايزة تخلف منه، وأكيد مش مخلياه يقرب منها، فممكن يكون قتلها، وفي لحظة جنون قرر إنه يعمل العلاقة معاها بعد ما ماتت.
= رغم إني مستبعد صلاح، بس والله كلام حضرتك منطقي. يعني إحنا كده بنفكر بمنطقية، مش بعدم منطقية... إلا بقى لو كان في اتنين هما اللي قاموا بالجريمة. يعني واحد قتل صوفيا وعمل كده فيها، وكان داخل عشان كده أصلًا، والتاني شخص عارف إن في مجوهرات وفلوس في الدولاب، فدخل وسرق الحاجة اللي في الدولاب وهرب.
بس اللي سرق ده أكيد من جوه البيت، وممكن يكون اللي عمل الفعل الباشا ده صلاح أو خالد، واللي سرق هو عمر.
_ كل دي استنتاجات، ولكن في النهاية إحنا لسه ما وصلناش لليقين. ولكن لازم نوصل، لازم نعرف مين اللي عمل كده؟!
.....
وبعد ما خلصنا كلام في الموضوع ده، فهمت وكيل النيابة إني هتكلم مع رحمة، ولكن بشكل ودي. هنحاول نضغط عليها عشان نعرف مين اللي بيحاول يقتل والد صلاح، وهل هي عارفة إنه مش مريض سرطان ولا مش عارفة؟!.. والموضوع ده هيتم من خلال الأستاذ صلاح، اللي هيخرجها من البيت عشان نتكلم معاها.
وفي نفس الوقت، كنت بدأت تحريات عن الحاج التهامي نفسه. عاوز أعرف إيه اللي يخلي حد عاوز يخلص منه، وبعد تحريات دامت 24 ساعة، عرفت إيه السبب؟!..
بوليصة تأمين بـ50 مليون جنيه، وطبعا لو مات الفلوس دي هتتقسم على أولاده.
ولو هنفترض إن شيرين عملت كده عشان جوزها يكون ليه نصيب، هل فكرت بعد ما تخلص من التهامي الكبير إنها تخلص من صلاح وعبير؟!.. وهل ليها علاقة بموت صوفيا؟!
وده اللي خلاني طلبت من الأستاذ صلاح إنه يستدرج رحمة بره البيت، وياخدها معاه ويجيبها على مكتبي. لازم أتكلم معاها وأعرف مين اللي عمل كده.
وفعلًا، صلاح جابها وجه على مكتبي.. ولاحظت إن البنت خايفة ومتوترة، واتكلمت وقالت:
_ هو حضراتكم جايبيني هنا ليه؟!.. هو أنا عملت حاجة؟
= متخفيش يا رحمة.. إحنا بس عاوزين نعرف منك: الحاج التهامي مريض سرطان ولا لأ؟!
_ أيوه طبعًا مريض سرطان وربنا يشفيه.. وأنا ماشية على العلاج معاه زي ما موصياني الست شيرين بالظبط، ومش بتأخر والله عن أي جرعة.
= طيب، تعملي إيه لو اكتشفتي إن الحاج مش مريض سرطان أصلًا، وإن العلاج اللي كان بياخده ده غلط، وهيكون سبب في موته.. ومش كده وبس، ده بالنسبالنا إنتي بتحاولي تقتلي الحاج، يعني إنتي المتهمة.
_ يا لهوي يا باشا.. أنا أقتل الحاج؟!.. طب إزاي؟!.. ده أنا لحم كتافي من خيره.
= طيب قولي أي حاجة تدافعي بيها عن نفسك.. أو على الأقل أكيد شوفتي حاجة غريبة في يوم، بس خوفتي تتكلمي.
_ أنا والله يا باشا ما أعرف حاجة عن موضوع الحاج.. بس أنا شوفت حاجة كده يوم ما اتقتلت الست صوفيا.. ومش عارفة إذا كانت الحاجة دي هتفيدكم ولا لأ؟!.. أنا لمحت الباب مفتوح بتاع شقتها، وشوفت اللي كان واقف وبيبص من بره.. وبعدها دخل الشقة.
= مين يا رحمة؟!.. مين الشخص ده؟
_ الشخص ده يبقى...
