رواية علي سطح الفلاحة حكاية الفصل الثالث
تاني يوم… في مكتب عامر كان عامر قاعد مركز في ملف قدامه فجأة الباب اتفتح ودخلت ليان بنت جميلة ولبسها عصري والسكرتيرة بتجري وراها. السكرتيرة بصت لعامر بقلق
السكرتيرة
والله يا فندم قلتلها إن حضرتك مش فاضي بس ما سمعتش الكلام ودخلت
بصتلها ليان ببرود وراحت قعدت على الكرسي وحطت رجل على رجل. نفخ عامر بزهق وقال
عامر
طيب روحي إنتي شوفي شغلك
خرجت السكرتيرة وبص عامر لليان بغضب
عامر
هي وصلت إنك تيجي لحد هنا وجاية تعملي إيه أو عاوزة إيه
ليان ببرود
جاية أشوف البيه اللي بيهددني في التليفون هيقتلني إزاي
اتعصب عامر
بنت إنتي ناوية تجننيني ولا إيه من الآخر يا ليان إنتي عاوزة توصلي لإيه بالظبط من ورا جنانك ده
ليان بجمود
عاوزة رؤوف عاوزة أعرف رؤوف فين
في نفس الوقت.. خارج المكتب دخلت سارة الشركة ووقفت قدام السكرتيرة
سارة
عامر بيه موجود في مكتبه
بصتلها السكرتيرة بصدمة وقامت من على كرسيها وهي متوترة
السكرتيرة
مدام سارة
سارة بشك
مالك شوفتي عفريت ولا إيه
سكتت فجأة لما سمعت صوت عامر خارج من المكتب
عامر
اسمعي يا بنت إنتي علشان مش عاوز وجع دماغ كل شوية أنا ماعرفش رؤوف فين ولو أعرف أكيد مش هاجي أقولك ويلا اطلعي بره من غير مطرود.
بصت سارة للسكرتيرة بشك
سارة
مين اللي مع عامر في المكتب
سكتت السكرتيرة وهي متوترة جدًا.. جزت سارة على أسنانها بغيظ واتحركت بسرعة ناحية المكتب علشان تشوف مين اللي مع عامر.
_____________
في بيت فوزية.. قاعدين فوزية وسما وممدوح وحسام بيفطروا وسما سرحانة مع نفسها ومش حاسة باللي بيحصل حواليها بص ممدوح لفوزية وقال
ممدوح
بقولك يا أمي إنتي روحتي لخالي زي ما قلتيلي
فوزية
أيوه يا حبيب أمك روحت وخالك وبنته رحبوا بيا وروحت كمان لعمك وعرفته ويوم الجمعة نروح نتقدم رسمي وربنا يتمم على خير
بصلها ممدوح بصدمة وقال
ممدوح
روحتي لعمي إزاي يعني
فوزية ببرود
هو إيه اللي إزاي يعني أمال هنجوزك من غير ما يعرف الناس هتقول علينا إيه
ممدوح بضيق
يا أمي حرام عليكي أحرجتيني قدام عمي أنا كنت لسه امبارح عنده بطلب إيد ندى وإنتي رايحة تقوليله إني هخطب غيرها
فوزية بحنق
وماله يا خويا خلي فتحية تعرف قيمتها هي وبنتها وإنك مش هتقف عليها وإنك مش أرض بور زي ما فاكرة بسبب دلعها وشروطها خليها بقى قاعدة جنب أمها طول العمر تتشرط على خلق الله
بصت لسما بشك وقالت بزهق
فوزية
أستغفر الله العظيم البت دي شكلها عقلها طار ولا اي؟
بص ممدوح وحسام ناحية سما اللي كانت بتبتسم لوحدها كل ما تفكر تفتكر رؤوف
حسام بغيظ
بنت إنتي اتهبلتي ولا إيه بتضحكي على إيه
انتبهت سما لكلامه وبصتلهم بخجل وخوف
سما
ها وهضحك على إيه يعني
ممدوح
طيب غوري اعملي كوباية شاي وبطلي هبل على الصبح أحسنلك
بصتله سما بحزن وقالت
سما
طيب أنا محتاجة ميتين جنيه أجيب العلاج بتاعي اللي خلص وقبضي نزل وأمي أخدت الفلوس
فوزية بحنق
ادي النكد اشتغل من أول اليوم قومي يا سما شوفي أخوكي قالك إيه اعمليه واصطبحي على الصبح أحسنلك
بصتلهم سما بحزن وخيبة أمل وقالت
سما
مش هقول غير حسبي الله ونعم الوكيل في كل ظالم
قامت فوزية بغضب وهي بتقول
فوزية
بت إنتي بتتحسبني على مين علي الصبح كدا.. طيب والله لأنا مربيكي من أول وجديد يا سما الكلب انتي
قربت فوزية من سما ومسكتها من شعرها وفضلت تضرب فيها وسما لا حول لها ولا قوة.. قام ممدوح وخرج بره البيت وهو بينفخ بزهق
أما حسام فدخل المطبخ بكل برود يعمل الشاي وكأن مفيش أي حاجة بتحصل
ـــــــــــــــــــــــــــــــــــــــــــــــــــــــــــــــ
في شقة رؤوف.. طلع رؤوف من الحمام وهو بينشف شعره بالفوطة ودخل أوضة النوم لقى تليفونه على السرير بيرن.. نفخ بزهق ورد من غير ما يبص على اسم المتصل
رؤوف
عاوز إيه تاني يا عامر أنا مش قلتلك ما تتصلش بيا تاني
سكت فجأة لما سمع صوت مجهول
المجهول
إيه هو مفيش في حياتك غير عامر
بص رؤوف لشاشة التليفون باستغراب وقال
رؤوف
إنت تاني عاوز إيه وهتستفيد إيه من ورا اللي بتعمله ده
المجهول
والله أنا مش هستفيد حاجة غير إني عاوز أنصحك لوجه الله زي ما نصحتك قبل كده وأحب أقولك إن هروبك من البيت مش هيفيدك بحاجة بالعكس إنت قدمتلهم اللي هم عاوزينه على طبق من دهب أخوك مش عاوزك وعاوز يستولى على كل حاجة ويورث لوحده وبخروجك من البيت مفيش غيرك اللي هيطلع خسران في الآخر
فضل رؤوف ساكت لحظة وبعدين قال بشك
رؤوف
عاوز أعرف إنت مين وعرفت كل اللي حصل ده إزاي
ضحك المجهول بسخرية وقال
المجهول
أنا مش بس عارف اللي حصل أنا كمان عارف اللي بيحصل وكل خطوة بتاخدها بيكون عندي علم بيها وأحب أقولك إن الضيفة الجديدة فريدة من نوعها وحاجة جديدة بصراحة وعجبتني أوي بجد أنا مبهور بيك طلع عندك سرعة تخطي مش معقولة
مسح رؤوف وشه بقلق وقال
رؤوف
لو قصدك على سما أحب أقولك دي واحدة مجرد تضييع وقت فراغ مش أكتر وما تخصنيش في حاجة بلاش تدخلها في أي حاجة ويكون أحسنلك
ضحك المجهول
واضح إنها ما تخصكش يا رؤوف بيه بس أحب أطمنك إنها دخلت وانتهى الأمر
أنتهت المكالمة.. رمى رؤوف التليفون على السرير بغضب وقال بزهق
رؤوف
هو مين ده وعاوز مني إيه بالظبط
سكت لحظة ثم قال بقلق
رؤوف
أنا لازم أمشي من هنا البنت غلبانة وما عرفهاش غير من يومين ودخلتها في دوامة ملهاش نهاية
قعد على السرير وحط إيده على راسه وقال بقلق
رؤوف
طيب افرض عملوا فيها حاجة هفضل شايل ذنبها طول عمري أعمل إيه يا رب في المصايب اللي مش بتخلص دي ما عرفش مين ده وعاوز مني إيه بالظبط
ـــــــــــــــــــــــــــــــــــــــــ
في مكتب عامر.. كان عامر قاعد وقدامه ليان.. فجأة دخلت سارة عليهم.. اتفاجئ عامر واتوتر أما ليان فابتسمت ببرود
سارة باستغراب
ليان إنتي بتعملي إيه هنا
قامت ليان بهدوء وأخدت شنطتها من على المكتب وبصت لعامر ثم لسارة
ليان
ولا حاجة كنت جاية أسأل عن رؤوف وبس عن إذنكم
سابتهم وخرجت.. بصت سارة لعامر بشك وقالت
سارة
ليان كانت جاية تعمل إيه وعاوزة منك إيه بالظبط
اتظاهر عامر بالضيق علشان يخبي توتره
عامر
ما هي قالتلك جاية تسأل عن رؤوف مش أكتر ولا إنتي لازم تعملي من الحبة قبة
سارة بحنق
ماشي يا عامر هفضل عاملة نفسي هبلة لحد ما أعرف إيه اللي إنت مخبيه
عامر بزهق
بلا أعرف بلا بطيخ أنا هسيبلك المكتب كله وهغور من وشك أحسن
قام عامر وسابها وخرج من المكتب.. بصت سارة لطيفه بشك وقالت لنفسها
سارة
أنا دلوقتي اتأكدت إن في حاجة عامر مخبيها ولازم أعرف إيه هي ولو عرفت رؤوف فين متأكدة إني هعرف الحقيقة كلها يا ترى إنت فين يا رؤوف
ـــــــــــــــــــــــــــــــــــــــــــــــ
في مكان تاني.. بيت ضخم شبه مظلم والبودي جارد في كل مكان.. دخلت ليان واتحركت بهدوء لحد ما دخلت مكتب ووقفت بتوتر وهي بتكلم شخص قاعد على كرسي مكتبه ومديها ضهره
ليان
عملت اللي حضرتك طلبته مني بس للأسف رفض يقولي هو فين
الشخص
إنتي عارفة إن دي كانت آخر فرصة ليكي وللأسف بالنسبة لرؤوف إنتي بقيتي كارت محروق
اتوترت ليان أكتر وقالت
ليان
مش فاهمة حضرتك عاوز توصل لإيه بالظبط
لف الشخص بالكرسي.. كان راجل في الأربعين من عمره وسيم.. ابتسم بخبث وهو بيقوم ويفتح دراعيه
الشخص
تعالي يا ليان يا حبيبتي قربي وهفهمك كل حاجة
بلعت ليان ريقها بخوف وقربت منه.. حضنها وهو مبتسم بخبث وسحب سكينة من طبق الفاكهة اللي على مكتبه
الشخص
كان نفسي الرحلة معاكي تطول أكتر من كده بس للأسف سما دلوقتي بقت أهم منك وموتك هيفيدني أكتر
بصتله ليان بصدمة ورعب.. ما اداهاش فرصة تتكلم وطعنها بالسكينة.. وفضل حضنها لحد ما أسلمت روحها للي خلقها
بعدها قعدها على الكرسي ونادى بصوت عالي وهو بينضف السكينة بمنديل ورجعها مكانها
الشخص
حمدي يا زفت
دخل حمدي بسرعة وهو متوتر.. اتصدم أول ما شاف ليان مقتولة لكنه حاول يتمالك نفسه وقال بهدوء
حمدي
أمرك يا جلال بيه
رجع جلال قعد على كرسيه وقال بهدوء
جلال
إنت طبعًا عارف هتعمل إيه كويس مش كده
بص حمدي لليان وسكت لحظة ثم قال
حمدي
أمرك يا فندم أكيد عارف
جلال ببرود
حلو أوي يلا شوف شغلك ومش عاوز يطلع منها المرة دي أي غلطة بحساب إنت فاهم
