رواية حرم الاسود الفصل الواحد والاربعون بقلم بتول ابو الليل
طلعت من الغرفه نزلت اتمشه انصدمت من شفت تيمور هوه وشذر واكفين سويه هوه لازم المحجر مال الدرج وهيه كدامه تسوالف عليه.
شديصير مجاي استوعب شي هاي شجابها لهنا وتيمور ليش واكف وياها معقوله اكو شي بينهم واني غبيه مصدكه بكلام تيمور
احس روحي اختنكت كلش مشيت عليهم شافني تيمور تغيرت نظراته بقه بس ساكت ويباوعلي وكفت كدامها وگلت.
_شذر؟
شذر : هلو شلونج
_زينه شجابج لهنا
شذر ; ههههه شبيج ترا خطوبة بنت عمي شلون ما اجي واليان عزمتني واجيت ليش بيها شيء.
_لا مابيها شيء بس شو هنا واكفه الحفله جوه ماتدرين "
شذر : اجيت اسلم علئ ابن عموو
هزيت راسي بأي باوعت لتيمور بهدوء مركز بوجهي عفتهم ونزلت بسرعه نزل وراي تيمور سحبني من ايدي عليه واخذني علئ المطبخ دفعته بثنين اديه من صدره ابعده عني صحت بوجهه.
_وخررر لاتلسمنيييي وخر عنيي
تيمور : لاتتخبلين شبيج ليكون تشكين بيه ماتعرفينها شنوو ؟
_هههه شتريد لعد اسوي شفتك بعيني واكف وياها نسيت هل بنيه شلوون جانت بينكم علاقات وهيه حجت وكالت كلشي صاير بينكم الله اعلم شنوو جانت تحجي وياك او ع شنوو متفقين يمكن حته تكون انتَ العزمتها موو اليان
تيمور : اريانا اعرفي شلون تحجين مستوعبه الكلام التحجينه ولج شوكت تتغيرين وتعرفين تيمور مايحب غيرج اني لوو اريدها اخذها من رحتي ليش عفت الكل عليج ليش هيج تفكرين وهيه هسه متزوجه وعدها طفل واجت بس علمود الخطوبه وسلمت عليه وسالتني عن ابنه لا اكثر ولا اقل والله لاتخلين هل امور التافهه تخرب بينه هستونه گلنه يالله
_اييي خوش خوش وخر اريد اطلع
درت وجهي اريد اطلع لزمني من ايدي عليه دفعني علئ الحايط خله اديه محاصراتني من الجهتين نزل راسه يباوعلي بتركيز درت وجهي عنه سحب نفس قوي وكال.
تيمور : كبري عقلج شويه واعرفي انوو تيمور مايبدلج بـ 10 من شذر مستحيل والله انتِ الوحيده الي ساكنه روحي.
_المشكله شما احن الك ورجعلك تصدمني وترجع تهز ثقتي بيك تخليني اتندم وارجع لنقطه الصفر.
لزم وجهي بين اديه باس جبيني بهدوء وركز بعيوني الي تلمع بيهن الدموع.
تيمور : حضي يخيلي هل سوالف الطايح حضها تصير كدامج شسوي بعد تعبت هواي واني اثبتلج حبي وخوفي عليج مستحيل شخص يحبج مثلي لوو تفرين العالم كله ماتلكين مثلي والله
_اني احبك تيمور ابسط شيء تسوي وتصرفه يأثر بيه ويجرحني حيل تعرفني ماحبها ليش توكف وياها هاا.
تيمور : يابعد تيمور واهله وناسه اخر مره تشوفينها وعد.
ضمني علئ صدره يبوس براسي لفيت ايدي حوالين خصره واني حيل ضايجه ماحب تتقرب أي بنيه منه شكد صار بينه مشاكل وعركات بس من نرجع للحب اريده يكون بس الي اني موو لغيري.
تيمور ; يلا روحي ويه اليان خطيه بقت وحدها
_تمام
رفع راسي عن صدره يباوع لعيوني باس عيوني بهدوء وكال
تيمور : لاتزعلين هل عيون الحلوات اوك
هزيت راسي باي عفته وطلعت للصاله رجعت يم اليان مشغلات اغاني ويركصن مكومات اليان تركص وياهم سحبتني من ايدي بقيت واكفه واصفك احس خرب كل واهسي من شفت شذر بالحفله.
اليان : شبيج اريانا
_مابيه شيء
اليان : اكيد؟
_اي والله
هزت راسها بأي بقينه نفتر حوالين اليان وهيه تركص واحنه نصفك الها هيه تفتر بدلتها ولازمه الورده تجنن طالعه.
طلعو اغنيه لحاتم العراقي .. مارايد من الدنيا كلشي بس اخذك يحبيبي وامشي. "
اليان تفر بالورده بيدها وتركص علئ الغنيه واحنه مسوين عليها ميدان ونصفك ونهلهل.
رهف شايله سلت ورد جوري تشمر عليها وتهلهل صارت اجواء الخطوبه تجنن كلش مختلفه وحلوو
صدك لوو ما كالو ع نياتكم ترزقون اليان صبرت وانتظرت واخذت الشخص الي يساحقها ويدللهاا.
خلصت الحفله بليل وراحت العالم كلهاا صعدت اليان لغرفتها تنزع البدله وتنطيها الهم يرجعونها.
اني اخذت تيم نام شبع جكليت كاعد علئ الارض ومخلين السله كدامه يفتح وياكل ههه
صعدت بيه للغرفه خليته بالكاروك مالته اخذت ملابس ودخلت سبحت وغيرت ملابسي رحت الاليان بغرفتها.
_هاا بدلتي
اليان : هسه يلا رتاحيت يمه شكد ثكيله البدله القفطان جان كلش خفيف ومريح هاي كسرتني
_اي عود وانتِ اخذتي بدله مابيها هواي شغل نازكه
اليان : اي صح شبيج انتِ طول الحفله تختفين حته بالتصوير صحتلج مالكيتج غير تبقين يمي ليش تروحين .
_يمعوده تيمور متعرفينه انتِ كل شويه مطلعلي سالفه حته الفستان طلب مني انزعه ونزعته ماخلاني ارتاح ابدد
اليان : هههه تيمور ميتغير ابد طول عمره يتحكم بالكل ميغير هل عاده
_اي والله شسوي.
اليان : يلا عادي المهم كملت الحفله بهدوء وبدون مشاكل وتعب.
_الحمدالله بعد كل هل تعب راح نرتاح وكل وحده تشوف طريقها وحياتها ويه الانسان الي يحبها ويقدرها.
اليان : أي والله الحمدالله مرينه بايام كلش صعبه واخذت طاقتنه وحيلنه واهلنه.
_الحمدالله ع كل حال.
اليان : شفتي هاي البنيه الي صورت ويانه وتشمر ورد هاي اخت آرون اسمها رهف كلش كلش حبابه ومؤدبه
_مبينه بشوشه وبس تضحك وتسوالف موو معقده ابد كلش رتاحيت الهاا.
اليان : همه عائله ارون كلهم حبابين والله
_ايي عيني بعد عيالج هذولي طبعاً تمدحيهم
اليان : لأ والله مو قصة عيالي وكذا بس اني تعرفت عليهم من زمان وجربتهم وشفتهم ماطلعت منهم سالفه موزينه كلش حبابين ويحبوني هوواي اكثر مما تصورين تخيلي الفترا الي عشت بيها وحدي جانو كلش مهتمين بيه وساعدوني.
_الحمدالله ع اقل طحتي بناس زينه بعد ماشفتي العذاب هنا
اليان : اي والله الحمدالله
_يلا حبيبتي رتاحي اني رايحه لغرفتي هم كلش تعبانه واريد انام ورتاح تصبحين غ خير
اليان : وانتِ بالف خير
عفتها وطلعت من الغرفه رجعت لغرفتي حيل تعبانه والكعب كسر رجليه كلش لبست كعب علمود الفستان لان طويل اني بطبعي مو هل كد احب الكعب افضل الحذاء الرياضي.
تمددت علئ السرير ابني نايم بقيت صافنه شويه وغفيت من التعب.
فزيت علئ انفاس حاره تضرب بركبتي وبوسات هادئه فتحت عيوني بهدوء جان تيمور حاضني ومخلي راسه بركبتي يشمها حركت راسي ملته علئ اليسار وهمست.
_تيمور كافي
تيمور : ليش نايمه هنا وعايفتني وحدي ؟
_نومت تيم ونمت وياه حيل تعبانه من الحفله ومكسره رجليه
تمدد علئ ظهره سحبني خلاني صرت فوك بطنه رفعت راسي اباوعله رجع شعري علئ جهه.
تيمور : حته لو تعبانه تجين ترتاحين يمي شنوو مخليتني وحدي شنو اتفقنه احنه شبسرعه نسيتي
_امممم وتيم شلون اعوفه وحده خطيه صغير.
تيمور : نجيبه يمنه
_انتَ ابقه ويانه
تيمور : الغرفه صغيره هاي وحته السرير صغير يكسرنه الأ اخليج بنص حضني وانام يلا يكفي
_اي عادي احلا هيج نكون مقربين من بعض دفيني وادفيك
احجي وياه بهمس واحرك ايدي علئ وجهه بهدوء بقه صافن ابتسم وكال.
تيمور : صايره تتحرشين ولج ؟
_ليش ميصير
تيمور : لا يصير منتظرين هل جرأة من زمان
_ايي حلوو اذا هيج.
حضني اكثر عليه دنكت راسي علئ ركبته بسته بخفه خطيه ماصدك تسرسحت روحه هههههه.
اخذتلي عضه صغيره من ركبته كرص خصري بقوه شلت راسي واني اضحك
تيمور : عود تسوين علامات؟
_هيج شٍيِّ
تيمور : هسه اراويج شلون تكون العلامات
كلبني علئ ظهري صار فوك بطني رفع اديه فوك راسي نزل راسه علئ ركبتي يبوسها ويعضها بخفه واني اضحك وارفس بيه ..
...
اليان : تمت خطوبتنه اني وارون احلا يوم بحياتي جان كلش كلش فرحت صارت اجواء الخطوبه مالتي كلش حلوه ونازكه
مثل ماجنت اريدها واكثر جنت خايفه متطلع حلوه لأنو المده قصيره بس ارون ماخله شيء ماسوها حته تكون حلووه وتيمور هم ساعدني هواي بتجهيزات البيت هوه الي ختارلي المصممين واختارلي المصورين وهل امور.
خلصت الحفله صعدت لغرفتي بدلت نزعت البدله حيل خنكتني ضكيه وثكيله كلش.
لبست تراك سود وكعدت علئ السرير اباوع بالصور مال الخطوبه انطيت جهازي الآيلا وخليتها تصورلي والمصوره هم دازتلي لقطات
اقرب الصوره علينه اني وارون طالعين كيك ههه. كلش مرتب طالع ارون لابس ستره كريميه وقميص اسود جوه وبنطرون اسود.
اباوع الايدي مزينتها الحلقه ابتسمت بفرح بعدني داكلب بالصور دزلي صور ارون دخلت بسرعه عليهن جانو النه.
وحده مدنكه علئ القرآن وهوه مخلي ايده فوك ايدي ع قرآن وثانيه واكفه شايل عن وجهي البرنص شويه ويباوعلي وضاحك طالعه الصوره تجنن اتصلت عليه فتح كام كبل جان كاعد علئ المكتب مالته ولابس بس تعلاكه
آرون : هًـلا يـ الطولك غصن يتمايل بـ گلبي"
_هههه هاي شنوو صاير شاعر
آرون : اصيرلج اياد وصبيج وحسين وخضير وكل شاعر تحبينه.
_اووي ترا ماتحمل هيج اني
آرون : بعدج ماشفتي شيء هنا تحلا السوالف.
_اممم ايي شعندك بعدك كاعد
آرون : جانو جماعتي هنا محتفلين وهسه يلا طشت العالم دخلت غسلت ورتاحيت وراسلتج.
_احنه هم هسه يلا راح الكل.
آرون : اي.
_امم
عبالك هستوني تعرفت عليه حته كلام ماعرف ماحجي وياه بسرعه يروحن مني السوالف خله الجهاز ع ميز ورجع راسه علئ الكرسي يباوعلي
آرون : احسج خجلانه مني
_لا ابد
آرون : تدرين شنوو افكر اسوي
_شنوو
آرون : اخذج ونروح نشوف صبيحه وجواهر
_عزااا صدك
آرون : والله
_ايييي اييي عفيه يمه شكدد مشتاقه اشوفهم بعدهم بالاهوار الله نتذكر لحظاتنه هناك شكد حلووه جانت
آرون : حلوه؟
_بالاول جنت خايفه وحيل ضايجه بس من كعدت وياهم حيل تعلقت بيهم وحبيتهم
آرون : بس اني ماسألتج عن صبيحه سألتج عن لحظاتنه
_اممم هوه اني كتلك جنت معجبه بيك يعني كل لحظه صارت بينه حلووه وعاجبتني بس اول بدايه الخطف حيل ضجت من عندك وتصرفاتك وياي حيل قهرتني.
آرون : عبالك لبارحه من خطفتج مرت سنين وامور هوواي تغيرت بهل فترا صدك دنيا صغيره
_ايي والله مرت الايام بسرعه.
آرون : نعيد ذكرياتنه مثل ماتكولين
_هههه تمام
آرون : باجر نروح
_اوك.
آرون : يلا حبيبتي نامي.
_تمام عمري تصبح علئ خيرر
آرون : وانتِ بالف خير.
سديت الخط من عنده شمرت الجهاز ع ميز وتمددت بفراشي ميته ن التعب كوه احجي ويه آرون
نمت بسرعه لأن تعبانه من الحفله والفره طول الًيَوُمًِ
كعدت ثاني يوم علئ صوت جهازي يتصل فتحت عيوني بنعاس جانت بـ 11 ونص الصبح شلت الجهاز اباوعله آرون يتصل كاتبته الخاطف
_الوو
آرون : وينج من الصبح ادزلج وماكوو
_ليش شكوو
آرون : بعدج نايمه؟
_ايي والله
آرون : خرب يومج شكد كسلانه لعد كومي بويه حضري روحج وتريكي بين ما اوصلج ورانه طريق طويل
_ليش وين رايحين
آرون : نسيتي موو كتلج نروح للناصريه نشوف صبيحه
_ياااا هسه تذكرت ايي ايي هسه راح اكوم اسبح واحضر نفسي اجيب وياي ملابس لوو نرجع
آرون : جيبي لبسه وحده يوم واحد نبقه ونرجع باجر الصبح
_تمام عمري
آرون : يلا حبيبي كومي راح امر بالشركه اخلص كم شغله واجيج
_اوك.
سديت الخط كمت اتمغط نعسانه اخذت ملابس ودخلت سبحت وبدلت لبست هاينك اسود وياه كوت لونه بصلي وبنطرون ربطت شعري وخليت أيس كاب علئ راسي.
طلع الاوت فت كلش نارك ومرتب اخذت ويايه تراك حته ابدل هناك وانام بيه وفلوسي واغراضي الي احتاجهن بجنطه صغيره ونزلت جوه
جانو الولد طالعين للشركه بس جنان واريانا وآيلا بالبيت كاعدات.
_صباحو
آيلا : صباح الورد عروستنه شنوو هل جمال من الصبح
اريانا : وين طالعه
_رايحه سفره ويه آرون
جنان : لبارحه انخطبتو شبسرعه سفرات انطو صبر من تزوجون اطلعو
_ترا صاار زوجي عادي مبيها شيء واني اعرفه من زمان كلش عادي واحنه مرايحين بعيد سفره قريبه مانطول.
آيلا : اطلعي حب تونسو هيه هاي ايام الخطوبه الحلوات.
_ايي صح.
اريانا : تريكي قبل لاطلعين.
_هوه رايحه اتريك حيل جوعانه
خليت الجنطه بالصاله ورحت للمطبخ تريكت وكملت وطلعت اتصل عليه ارون كلي وصل طلعتله للباب نزل من سيارته شايل ورده حمره بيده قدمها الي اخذتها منه لزم ايدي وباسها.
آرون : تفضلي آنستي
_ميرسي.
فتحلي الباب دخلت بالسياره شمر الجنطه ورا ودخل وساق مد ايده الي لزمت ايده واني اباوعله بفرح.
آرون : هم گلتي الاخوانج رايحه
_محد جان موجود بالبيت الكل طالع بس گلت لجنان
آرون : جنان منوو ؟
_مرت ابوي ام تيمور
آرون : هاا ايي زين المهم يعرفونج طالعه وياي حته ميضل بالهم
_ايي حجيت الهم
آرون : نمر ناكل شيء لوو نطلع كبل.
_لا اني هسه تريكت كلشي ماريد اذا انتَ جوعان جيب شيء واكله وراك طريق طويل
آرون : من اتعب اخليج تسوقين
_ايي بعد احسن كلش احب السياقه اني واول منتزوج اشتري سياره ماعرف اخذ تكسي وين ماطلع.
آرون : الي يعجبج سوي.
_حبيبي والله.
آرون : تعاي بوسه صغيرونه.
ضحكت قربتله خدي باسه بخفه وهوه يسوق ابتسمت واني اباوعله.
آرون : رهف من لبارحه تكلب بالبيجات تختار النه ديكورات للغرفه والاثاث تريد تكلب البيت.
_حبيبتي كلش فرحانه
آرون : اكثر مني ومنج
_ههههه
بقينه نسوالف ونضحك طول الطريق مشينه هوواي ساعات والسياره تمشي وكف آرون ع طريق جاب النه اكل بقينه ناكل ونسوالف
بعد سياقه طوييله وصلنه العصر كلش غروب الشمس.
خله آرون سيارته يم صديق اله واخذنه تكسي ورحنه علئ الاهوار.
المغرب الاذان يأذن يلا وصلنه للهور حته يخوف المي اني كلش اخاف من اصعد بالبلم.
صعد آرون كدامي ومدلي ايده تذكرت اول ماجينه لهنا وتمرضت واخذني عبالك لبارحه وهيه صارلها تقريباً سنتين.
لزمت ايده وصعدت وياه لف ايده علئ ظهري يحضني حضنته حيل واني خايفه كلش.
_يمه آرون المكان يخوف. لوو باقين للصبح موو احسن.
آرون : اني وياج لاتخافين هسه نوصل.
هزيت راسي بأي بقيت متمسكه بيه واباوع بقينه شيء نص ساعه بالبلم نمشي وصلنه لمكان صبيحه نفسه ممتغير شيء منه ابد نفس البيت والمكان والهور.
نزلنه سويه مشينه علئ بيت صبيحه لازمين ادين بعض.
_اتوقع نايمين هسه
آرون : هههه ايي همه ينامون من وكت بس ماتوقع بعدها بـ 7 ونص
_حته لوو نايمين نكعدهم.
وصلنه لبيتهم جانت صبيحه كاعده وياها مره جبيره ثانيه هم كاعدات باب البيت شافتنه صبيحه شهكت وكامت بسرعه
صبيحه : يااا فلك منين طلعتووو.
_ههههه خاله مشتاقتلج
رحت عليها حضنتها وبوستها وسلمت علئ المره الكاعده وياها ارون هم سلم عليهم.
صبيحه : خايبين وين غطيتو ماشفناكم بعد
آرون : مشاغل الحياة شنسوي لبارحه خطرتي علئ بالي وگلت الاليان نجي ونشوفكم.
_جواهر وين اشو ماكوو؟
صبيحه : تزوجت وعافتني وحيدتي.
_ياا صدك الف مبروك حبيبتي الله يهنينها.
صبيحه : عافتني المفلوكه وراحت خلتني وحدي حته اخافن وحدي انام اجيب ام حسين تضل وياي.
_شتصيرون من بعض
ام حسين : ابهاتنه ولد عم
_ها
ام حسين : انتم منين
_احنه من بغداد وأيسر تعرفو هم يقرب الكم.
ام حسين : اي اعرفه هذا وليدنه شتصيرين منه انتِ
_خطيبته
صبيحه : هاا ولج شگتلج مو كتلج يريدج وتگلي لاا خاله اصدقاء خوش صداقه
_ههههه ترا لبارحه خطوبتنه اصلاً مجنه سويه.
آرون : اخذتها بعد تعب
صبيحه : بالعافيه عليكم منك المال ومنهاا العيال.
_بعد كلبي خاله.
بقينه كاعدين وياهم نسوالف هواي شغلونه نار جمريه نسوالف جان جايب وياه آرون فروه لبسها وسحبني لحضنه يغطيني وياه.
صبيحه : انه بعد نعست ضلو انتم طيور الحب.
_نامي خاله ليوم خليناج تسهرين
صبيحه : اول مره اضل گاعده للـ 11 بليل.
آرون : تعودي ع سهر اني مقرر ازوجج الابوي ضال بدون مره
صبيحه : لغسل الك والابوك اني بيا حال وانتَ تسولفلي بالرجل.
_صدك خاله ليش ماتزوجين
صبيحه : بلا هذوله شتحجي وياهم خايبين اني كاتلني المرض والفقرات ماكدر حته اكوم منهن وتردوني اتزوج.
_تعالي ويانه لبغداد هناك ابقي نداريج ونعالجج
صبيحه : فدوه رحتلج صعبه روحتي هنا حلالي منهو يضل بيه وبنياتي كلهن هنانه يجن عليه.
_بس تتعالجين وترجعين.
صبيحه : مو هسه غير مره
_براحتج
صبيحه : يلا ولكم لهيتوني وراي كعده من الصبح انتم بلا فايخين شعدكم لاشغله ولا عمله.
ضحكنه علئ سوالفها عافتنه ودخلت للغرفه طلعت النه فراشات احنه طلبنه منهاا نام برا حلووه برا بالطبيعه وعلئ ضوء القمر
فرشت النه ثنين دواشگ وبطاطين تمددنه سويه فتح بطانيته آرون واشرلي اجي يمه تقربت تغطيت وياه بنفس البطانيه والفراش خلاني بوسط حضنه لفيت ايدي علئ خصره واني حيل مرتاحه باس راسي وهمسلي.
آرون : شكد ارتاح من تكونين وياي.
_اني احس بالامان تدري
آرون : تدرين شوكت صرت اريدج وحابج
_شوكت
آرون : من تخيلتني ابوج وعترفتي بحبج الي احس شيء تغير بداخلي اتجاهج جنت مماخذ عليج اي نظره وشايل فكرت نكون سويه احسج حيل بعيده عني وعن حياتي حياتكم مختلفه وحياتي بعد اكثرر القدر لعب بينه وعيشنه ايام حيل حيل صعبه واخر شيء جمعنه سويه.
_اني من زمان جنت اريدك من اول ماتعرفت عليك حسيتك حيل هادئ وفاهم ومثقف مثل ما اتمنئ اني بس من عرفتك مرتبط تغيرت نظرتي وصرت شكدد ما اكدر ابعد نفسي عنك وماخرب حياتك جنت ازعل روحي وانقهر وابجي وماتجرأ واحجيلك حته ماخرب حياتك وارتباطك زعلت بابا عليه ومات وهوه زعلان مني علمودك ضحيت بنفسي عليك جان المفروض تعرفني احبك من هذيج الساعه موو هسه.
آرون : جنت اعمئ او بالأحرى جنت مغمض عيوني وجابر نفسي اتحمل هل وضع وابقه مصر عليه افكر باهلي بيج بعائلتي افكر بالكل ألا نفسي جنت ومازلت مافكر بيها احب اسعد غيري واخلي مرتاح بس مامهتم لروحي هسه وياج قررت اسوي شيء يسعدني يرجعلي الحياة والحب اريد اعيش اريد اغير من حياتي وابدي من جديد.
حضنته اقوه واني مبتسمه بسته بصدره وهمست.
_اني وياك راح نبدا من جديد نكون ايد وحده نكون سند لبعض منخلي اي بشر يفرق بينه ابد.
حضني اقوه عليه باس راسي ودنك يباوع لعيوني.
آرون : خليج دائماً وياي ثنينه محتاجين بعض داويني وادوايج نسي بعض جروحنه والي مرينه بيه.
_انشالله.
لزم فكي بيده يرفع راسي يريد يبوسني توترت وخجلت كلش نزلت عيوني عنه غطه روسنه جوه البطانيه قرب وجهه حيل مني يحرك خشمه علئ خدي.
كلبي احسه صاار يدك بسررعه لزم راسي يرفعه يباوع لعيوني.
آرون : ابد لاتخافين مني.
_ماخاف.
آرون : ولا حته تخجلين اني وياج هسه زوج وزوجه يعني حلال ومامسوين أي شيء حرام ابوسج احضنج كلش عادي اريدج تتعودين ع هل امور وهم تحسين بالامان والاهتمام.
هزيت راسي بأي وسكتت باس شفتي بهدوء غمضت عيوني بتوتر شال ايدي وخلاها ورا راسه لفيت ايدي حوالين ركبته نزلني اكثر علئ الفراش وصاار فوكي يبوس شفتي بلهفه بادلته وجانت اول مره احس بشعور حلوو من اقبله.
تفاعلنه سويه ابتعد عني وهوه يبتسم مسح شفتي بطرف اصبعه لان خربت الحمره دنك باس ركبتي لزمت كتفه بقوه وهمست بصوت يرجف.
_ءأء آرون كافي عفيه تأذيني.
ابتعد شويه عني رجع تمدد وسحبني علئ حضنه لزم ايدي باسها وكال.
آرون : اسف حبيبي بس من تفاعلتي خليتي عندي لهفه قويه عليج.
_اييي
آرون : هههه ماعرفتج جنت اشوفج حييل قويه ولسان اشو تبين كلش خجوله وماتتحملين هذا شيء بسيط فكري بهذيج اليله.
_اهوو آروون شبيك.
آرون : يلا يلا سكتنه نامي نامي موو مال هيج سوالف لازمج دراسه قويه وتعليمات يلا تصيرين خبره
ضحكت مجاوبته خليت راسي علئ صدره ونمت.
كعدنه ثاني يوم من الصبح لأن طلعت الشمس علينه احنه نايمين برا وصوت الحيوانات والدجاج والبقر ميخليك تنام ابدد
كمت واني اباوع حواليه النسوان تنطي حشيش للبقر وقسم يترس مي من الهور بجدوره.
ارون لاف راسه بالبطانيه حيل منزعج يريد بس ينام هزيته من كتفه اكعده
_آروون اكعد حبيبي الشمس طلعت عليك كووم.
آرون : شويه شويه
_كوم ماكوو شويه ورانه طريق طويل لازم ارجع عفيه كوم.
رفع البطانيه من راسه شعره صاير كيرلي ونازل علئ وجهه يخبل طالع كرصت خده.
_شنوو هل جمال من الصبح
آرون : هسه صرتي شاطره وتتحرشين وين جنتي لبارحه ضميتي راسج
_ههههه نتعود شويه شويه
آرون : نشوف
صبيحه : صباح الخير
_صباح النور
آرون : صباح النور جوعان مسويه ريوك موو
صبيحه : سويتلكم ريوك مال عراريس
_حبيبتي خاله تعبناج وانتِ مريضه جان كعدتيني ساعدتج
صبيحه : لأ يمه هذني السوالف مايتعبني انه متعوده عليهن.
_الله ينطيج الصحه والعافيه
صبيحه : خايبه يروحلج فدوه أيسر شحلاتج وحلات حجيج هذا يفكر بس بطنه
آرون : هههه هاا هيج صارت
صبيحه : ايي هيج دشوف دره مال الله
_فدوه لكلبج
صبيحه : يلا كومو تريكو برد الريوك.
كمنه سويه غسلنه وجوهنه ودخلنه للغرفه مال الطين لكيناها خطيه مسويتلنه ريوك كلش حلوو ومرتب مسويه كيمر عرب وبيض سلك ودبس وراشي وزلاطه وخبز تنور طين حار صينيه تشهي.
كعدنه علئ الارض تربعت تربع حته مابدلت ملابسي بقيت بيهن ونمت بيهن
تريكنه سويه هيه ماكلت ويانه كالت متريكه وراحت للحلال مالها تنطي علف.
آرون : هاي الاكلات الصحيه
_احب الاجواء الشعبيه وهيج اكلات وكعدات.
آرون : هواي امور تشبهيني بيها.
_غير مرتك بعد.
آرون : شلوون مره جنها حوريه.
_حبيبي الحلوو.
بقينه ناكل ونسوالف خلصنه شلت الصينيه غسلت الصحون رحنه علئ صبيحه نسلم عليها ونرجع
رحنه للحيوانات ارون يلزمهن واني اضحك خايفه من بعيد اباوعله.
انطاها ارون فلوس وكللهاا شوكت ماتردين اخذج يمي بس خابريني وهيه وافقت.
عفناها ورجعنه صعدنه بالبلم لزم ايدي ارون وخلاني نزلت ايدي ع ميي بااارد والبلم يمشي احساس يجنن.
_هههه لانوكع ارون
آرون : لاتخافين واني وياج.
_بطلي
آرون : وانتِ بطلة قصتي.
_اووي.
ابتسم باس راسي وصلنه للارض نزلنه اخذنه تكسي ورحنه لصديق آرون جبنخ سيارتنه صعدت الجنطه مالتي بس اخذتها كلشي ماستعملت منهاا العطر والركسونه والمناديل خليتهم كلهم لصبيحه وجنت اريد انطيها فلوس ماقبلت حلفت ماتاخذ لان ارون انطاها.
رجعنه لبغداد خليت راسي علئ الجام ونمت لأن مشبعانه نوم كعدت من وكت كلش.
فزيت من ارون دك هورن فتحت عيوني اباوع احس روحي دايخه باوعلي ابتسم وكال
آرون : صح النوم يحلوو
_وين وصلنه شكدد نمت انيي
آرون : راح نوصل اخذتي الطريق كله نايمه.
_نعسانه كلش حته مكدرت افتح عيوني.
آرون : اني اباوعلج وتحسر اريد انام
_هههه اول متوصل لف راسك ونام
آرون : هوه هيج راح اخذج لبيتنه رهف تريد تراويج تصاميم مدري شنوو.
_هاا تمام.
هز راسه بأي لف السياره وساق بقينه تقريباً ساعه كامله وصلنه لبغداد اخذنه لبيتهم وصلنه الهم انصدمنه من شفنه رهف هيه وجون واكفين باب البيت ..
.....
اريانا : راحت اليان هيه وارون سفره ماندري وين بس اني رضيت بروحتها خليها تتونس وياه تغير جو صار زوجهاا.
كاعده واوكل بابني دخل تيمور للبيت رجع من الشغل.
تيمور : هاا ابو كرش
_الله يساعدك
تيمور : هلا بالعافيه واهلها
_ابنك شلع كلبي مايرضه ياكل صارلي ساعه احاول وياه ميقبل يريد يعيش بس ع حليب ميستحي ميكول كبرت ولازم اكل حالي حال العالم.
تيمور : ولك فصعون ليش تزعل ماما هاا اجعصك هسه اكلك.
_عود جاي ترزله هسه؟
تيمور : رزاله معدله هم
_شكدد تخوف لعد.
تيمور : فد تعباااان وحته ماكدر ابدل تجين تساعدين زوجج ابو اطفالج حبيبج.
_ههههه يمه يمه بدينه
تيمور : تحصلين حرام اذا ماتساعدين زوجج
_اكمل والحكك
تيمور : بسرعه موو طولين وفنجان كهوه من ايدج.
_صاار بعد امر خدمه
تيمور : من تجين عود اكلج بطلباتي الباقيات
غلصت عيوني مراضيه سوالي بوسه بالهوئ وعافني وصعد ضحكت ودنكت راسي اوكل بابني خلصت منه شلته اخذته غسلتله طلعت من المطبخ شفت ام تيمور كاعده خليته يمها وصعدت فوك .
لكيت تيمور كاعد علئ القنفه مخلي لابتوب بحضنه يطكط بيه اخذتله الكهوه وخليتها ع ميز.
سد الابتوب خلاه ع صفحه سحبني من ايدي كعدني بحضنه يمشي ايده علئ شعري يرجعه ورا اذني يباوعلي بتركيز.
_شبيك حبيبي
تيمور : اكوو موضوع صاار ليوم ولازم تعرفينه
_ خير شصار؟
تيمور : اخوج
خفت كلش وتوترت من جاب سيرت مسلم دخيلك ياربي شكوو نوب.
_شبي
تيمور : مسجلين اسمه صاير عليه القاء قبض ليوم حاجاني المحامي وعندي عرف بالدوله.
_شنوو ليشش شمسووي
تيمور : عارفين بيه جان يتاجر بالمخدرات وهذول الانذال الي يدخل وياهم موو بسهوله يطلع يخلونه يعض اصابع ندم يلا يحلون عنه.
_ياربي دخيلك هسه شلوون تيمور راح يسجنونه موو
تيمور : اني جاي احاول اشيل هل قضيه عنه قبل لايلزمونه ويروح بيها صدكيني اذا لزمته مكافحه الارهاب اشربي وراه ماي مايطلع لوو يركع راسه بالحايط بعد بلقليل ينسجن 10 سنوات هاي اذا ماسجنوه مؤبد.
_شدحجي يالله دخيلك فدووة تيمور ساعده لاتخلي ينسجن امي تموت والله اذا عرفت تموت وراه ماكدر اخسرر كل عائلتي فدووه تيمور سوي شيء.
تيمور : اهدي حبيبتي اساعده والله حاجيت محامي شاطر وراح اتواصل ويه اخوج وافهمه شنوو يسوي لاتخافين من شيء انشالله تنحل
_شكدد نبهته يعووف هل شغله شووف وين وصل روحه شستفادينه هسه احنه شربحنه من هل شغل الطايح حضه يااالله دخيلك شسوي هسه
تيمور : بديينه عليمن تبجين هيي اريانا باوعيلي باباتي والله ماخليهم يسجنونه اساعده موو لان احبه ولا لان كاسر خاطري ابد السواه بيه مانساه طول عمري وصلني لهل حاله هوه بس علمودج انتِ ادري بيج تحبين عائلتج وتخافين عليهم راح اساعده واخلصه من هل سالفه وحته ابين اله اني احسن منه وماشيل حقد وكارهيه.
دنكت راسي ابجي حيل ضجت واختنكت من سمعت بالموضوع ماريد يصير شيء الاخوي هوه غلط بس تاب وعاف هل شيء كل انسان يغلط ويتصرف بعدم فهم.
رفع راسي بيده يمسح بدموعي ضمني علئ صدره يهدي بيه باس راسي وبقه يمسح علئ ظهري.
تيمور : اني وياج ارتاحي ولاتفكرين تيمور هناا يحل كلشي والله
_تيمور ساعده فدوه لخاطري اني اذا تحبني ساعده ادري هوواي أذاك وخلاك تتعذب بس هوه تاب وتغير والله لخاطري اني.
تيمور : اساعده والله يلا كافي حبيبتي امسحي دموعج شبيج ع كل سالفه وصرفتي طن دموع راح يجفن عيونج ع هل حاله هايي.
_شسوي فهمني شسوي كلشي مابيدي غير ابجي اخوي من جهه وابوي الراح امي المريضه كلهم يتأذون واني بس اباوع عليهم ماكدر اسويلهم شيء احس روحي مربطه كلش.
تيمور : احنه من الاول غلطنه ولازم نتعلم من هل غلط انوو الشغل الي بيه حرام عمره ماجان زين للانسان ولا راح يدوم ابدد راح يدمر الانسان ويخلي يعض اصابع ندم تحصل فلوسك بالحلال والتعب احسن ماتحصلهن بالحرام وتخسر الامان والخوف بحياتك.
_كل انسان يغلط ويتعلم هواي امور بحياته يمكن كنتو جاهلين عن هل موضوع وعبالكم سهل ومراح تتأذون منه وتحصلون فلوس هواي بس متدرون بهل تصرف السويتو دمرتو حياة هوواي شباب والله عاقبكم بهل طريقه.
تيمور : تدرين شنوو بالي اسوي اريد اتوب واتعلم اصلي واصوم هل سنه اطهر نفسي من كل الذنوب فلوس العندي انطي منهاا للفقراء ادفع كفاره حته ربي يكون راضي عليه ويخلينه نعيش مرتاحين شايفه شكدد تعذبنه اني وياج سويه وبكل مره نفترق لأن ماخفنه ربنه ولافكرنه بالحرام والحلال.
_شكد كبرت بعيني هسه من زمان اريدك تكون بهل فهم وهل تفكير الحلوو متاخذ كلشي بالقوه والانانيه كون دائماً حنون هيج ولاتعوفني ابدد.
ضمني علئ صدره يبوس بوجهي حضنته بكل قوتي واني احس روحي بالامان
_احبك هووواي والله.
تيمور : ماتوصلين لحبي وخوفي عليج ابدد مهووس بيج اني ريونه روح لروحي انتِ عايش لخاطر عيونج.
_حبيبي الله لايحرمني منك
تيمور : ولايحرمني منج.
بقينه علئ هل وضعيه شويه اندك باب الغرفه ابتعدت عن تيمور بس بقيت كاعده يمه دخلت اسينا وكالت.
اسينا : الاكل جاهز.
_جايين
هزت راسها بأي وطلعت من الغرفه رجع شعري ورا اذني تيمور باس ركبتي بخفه وكال
تيمور : كومي ميت من الجوع
_الكهوه بردت
تيمور : يلا اشرب غيرها
هزيت راسي بأي طلعنه ثنينه من الغرفه نزلنه جوه الكل متجمع علئ سفرة الاكل تيم نايم وشايلته ام تيمور مخليته علئ السرير مالتها تمووت عليه تحبه اكثرر حته من تيمور ناكل سويه فجأه كال قصي.
قصي : احمم اكوول اريانا اكدر اسالج سؤال؟
تيمور : خير
_ايي جواب.
قصي : اكوو بنيه اجت ويه عائلة العريس تعرفينها
_شلابسه
قصي : هوه جانت لابسه فستان احمر وشويه قصير شعرها طويل نازل بيضه عيونهاا صفرر.
تيمور : ماخذلها سونار خرب شرفك مفصل البُـنًتٍ تفصل
_هههههه قصدك رهف
قصي : اسمها رهف
_أي
قصي : شكد حلووه شكلها كلش مريح وحلوو حيل عجبتني
ساهر : هاا واخيراً وصلت مرحله الاعجاب عاد انتَ موو كل بنيه تعجبك
قصي : لأ هاي مختلفه وحيييل مرتبه ونازكه احب هيج بنات ممسويات تجميل ونفخ تفخ طبيعيه ملامحها حلووه
ساهر : هههه الولد سكران.
تيمور : هسه شتريد ماعرفنه
