رواية قاتلة ابي الفصل الرابع والاربعون بقلم بنت الشيخ ترابية
أفكارٌ تُضربني
تناهيد وأناشيد فيَ مَسمعي
كَلِمات غَريبةُ كُل يوم
مُراقبة شَديدة
كعدت مثل صباح كل يوم وروتين عادي
بس وانا مكسورة الخاطر والقلب ..
لا حب لا عائلة ولا راحة
وماخليت عن المُراقبة المكبوتة
والاحاسيس الي تجيني بأنو هو الي جاي يراقبني
شيريد مني هو يحبها مايحبني؟ وليش افكر هيج
منو كال يراقبني؟ كله هوس و وهم مني!!!
اصابني فضول قوي تجاه الموضوع ورحت
لباب جانت نايمه تصرفي غلط لكن بداخلي شي اريد
اوصل اله .. تلفونها مابي رمز دخلت للماسنجر مامفعلته ودخلت البرامج ماكو الا الواتساب مفعل
دخلت لكيت المحادثه الاولى مكتوب اسمها الاخ؟؟؟
دخلت عليها ولمحت كم رسالة من الاخير
فاقد: وهسه شلونها؟
لباب: الحمدلله يولو وضعها تمام والله
فاقد: گلبي يوجعني عليها من شفتها اليوم بودي اطمطمها بين ضلوعي وماعوفها وحق عيونها
لباب: فاقد ليش ماتصارحها؟ يجوز هي هم تحبك
فاقد: قابل هينه عليه مو تأكدت بنفسي من طلبت احجي وياج حتى مابينت شي وكأنو عادي والحب من طرفي لا تحبني ولا شي لا تخافين مطمن تجاهها لكن الحب بداخلي انه اخ منه گلبي يحب الصعب بعمره ماحب السهل
لباب: بس احجي وياها وصارحها ليش
معيش نفسك بحرب نفسي
تجاهل كلامها وفتح موضوع عن علم النفس
راجعت المحادثه اكثر من مره كايله اله صارحها
وهو متجاهل هذا السؤال بالتحديد
وصلت لكلمة لمحتها من رسالة لباب واصابني فضول تجاه جوابه
لباب: تحبها انت؟
فاقد: احبها لدرجه بقيت اربع ايام بالمنطقه مالتكم انام واكعد بسيارتي بالركن حتى اشوفها من تطلع للمحل وانزل وراها وادفع فلوس ع الخالي بلاش عود اشتري واروح وراها الي تشتري اخذه والي تلزمه اخذه حتى لو نسائي
لباب: واكع ومحد مسمي عليك
فاقد: افقد من اشوفها كدامي ..
صرت اعشق تفاصيلها وهي بعيده عني وماتعرفني
اتحلم بيها واكعد وابقى احجي وي روحي
وين ماروح اتخيلها كدامي
اسبح احسها ويايه اكل احسها ويايه انام واحسها ويايه
انه شروگي وبالعشك مسودن ومعذور
سديت التلفون ورجعته جوه راسها بصدمه طلعت بره
يحبني؟؟؟؟؟
ليش ميصارحني؟ ليش طلب مني رقم لباب؟
ليش سوه هيج اريد جواب؟
بس هو يحبني؟ يعني يريدني مثل ماريده
ويحبني مثل ماحبه واكثر
معقوله؟
ترانيم: يولو عدحجي وياج!
شهل: ءء هاا هاا ايي گولي؟
ترانيم: شفيكي مو طبيعيه شصاير دحجيلي؟
كلامها المكسر ينرفزني بس احبه
شهل: لا بس هيج .. راح تصومين؟
ترانيم: احترام للقديس اصوم لانو اصلي هِذا
شهل: طبعا احترام للاصل واجب
ترانيم: رايحه عيشوف جهالي وارجعلج
اجت بت الحوزه .. سدرة مثل عجايز گبل
القرآن بيدها والسبحه وتفتر والحجاب فوك راسها
سدرة: صباح الخير
شهل: صباح النور حبيبي
سدرة: وين البنات شو ماكو؟
شهل: لباب نايمه وامي نايمه ابوي طالع مدري وين
وترانيم راحت تشوف جهالها
سدرة: احمي الچاي خلي نتريك انه وانتي
شهل: تدللين .. حميته وجهزت الريوك واني الف حسبه وحسبه تاخذني وترجعني .. الموضوع مو سهل ولازم افرح بسرعه لانو يحبني لا.. بس منو كال حب احتمال اعجاب او رغبه؟ منوو كال يعرف كلشي عني؟
شلون حبني؟ وليش طلب اختي مني؟
اسئلة هواي والاجوبه مو دليل مُقنع من غير دليل كافي
..........................
هنادي
تزوجت زينب ومره ع زواجها او زواجنا احنا الطرفين شهر كامل .. مرتاحين وانا مرتاحه ببيتي ماخذه راحتي
صفنت ع الكناري وتذكرت الموقف الي صار قبل فترة
جنت زعلانه منه حيل وضايجه
وهو مغلس عني
اخذني نتسوك وبقيت صافنه ع كناري واحد من المحل صوته جاي انا ماحب العصافير وهاي الانواع لكن جذبني .. رجعنا للبيت العصريه وصفيت الغراض هو
طلع ..
رجع بالليل جايب باقة ورد احمر
وقفص الكناري الي شفته
ايهم: بالله عليج تصير عينج عليه وماجيبه؟
لو بيدي اجيبلج نجوم السمه واخليهن بعلبه واحطهن بصفج
ضحكت ودرت وجهي عود مثگله عليه وهو لف ايده ع خصري وانا اثرم واسوي زلاطه فواكه
ايهم: صوتكِ النَاعم قَد احرق كياني وأربتّ مَشاعُري
اخذت برتقاله قسمتها مربعات وخليت وحده بحلكه
هنادي: اخذ ولا تحجي فصحة
همس : تمتلكين شَفتان قَد يغرقاني من دون قصد
وانا أُمثل بإني لا أُبالي .. لٓكنكِ اهززتي عُرشي
هنادي: اجغام هذا مو غزل
ضحك ...: شوكت تلفظين الراء عدل عاد اجرااام اجرام
باوعتله صفح ودرت وجههي
هنادي: لو تحبني تخليني احجي بغاحتي
ايهم: احجي بغاحتج بويه احجي
هنادي: صحت بيه.. ايييهممم
ايهم: روحه وعيونه
هنادي: حجيه نوفه هناك مو؟
ايهم: اي ومصخنه اليوم فلاونزا
هنادي: باجغ تاخذني
ايهم: صار تدللين كم هدهد عندي؟
طلع من المطبخ يضحك وصافنه ع طوله
اندارلي غمز وصعد
كملت الاكل والكناري يغرد بسرعه تعود ع المكان
سميته روح عجبني جان لونه اصفر
صحت لايهم يجي ياكل ودك تلفوني
كعدنا ع الميز ورديت
الو؟
زينب: شلونج حبيب
: هلا عمغي انتي شلونج؟
باوعلي ايهم ابتسم وهز راسه خزرته وصفن بوجهي
زينب:تعبانه
: شبيج؟
زينب: بس ههيج من الشغل شلونه عمو ايهم
: الحمدلله كاعد كدامي تحجين وياه؟
زينب: ياريت محتاجه احجي وياه واسمع صوته
انطيت التلفون لايهم حمحم ورد عليها
: هلا بويه شلونج اخبارج؟
افا افا ليش هاي الدموع شكو؟.. شصاير احجيلي
سكت شويه .. بناتي؟ باباتي شبيج اجيج؟
ماشي هسه ما اتأخر دقايق
سد التلفون وكام كمت وراه
شكو؟
ايهم: فهد مسافر وهاي كوثر اخته لاعبه لعب بزينب
لبس الحذاء وحجه
ايهم: اروح اجيبها وارجعلج
باس راسي وطلع من البيت
خليت الاكل بالفرن حتى مايبرد ورجعت الجاي
وكعدت مكابله العصفور مثل الي بيها توحد
انتظرت ساعة وسمعت صوت السيارة تقفلت
طلعت للطرمه دخلوا
احت بسرعه لحضني
: شصايغ ماتحجين؟
زينب: ماصاير بس هيج جنت ضايجه واجيت
اخذتها ودخلتها للبيت ودخل ورانا ايهم شايل جنطتها
ايهم: روحي غسلي وتعالي اكلي وياي يلا
كامت تغسل وره شويه رجعت لابسه دشداشه وحجاب
وكعدت تاكل بصف ايهم وهو عاكد الحاجب
تكله بز ينفجر بوجهك بس بيه طبيعه ميحجي ويتقرب مني اذا اعصاب حتى ميأذيني ف سكتت وهو ساكت وكلنا ساكتين ..
زينب: شبعت.. دايمه يارب تصبحون ع خير
هنادي: وانتي بخير حبيبي
هز راسه ايهم واشر الها بمعنى روحي
وهي راحت وهو كام غسل وطلب جاي يصيح راسي
وكعد ع القنفه بالصالة
شلت المواعين غسلتهم وانطيته الجاي
مغمض عينه ولازم راسه ومرجعه ع القنفه
ايهم: تحوصين اعرفج
هنادي: احجيلي شصايغ وياها
ايهم: ماصاير بويه بس سوء فهم بينها وبين حماتها وجبتها هاي كل مافي القصه ..
هنادي: راح اكوم انام انا
هز راسه وكمت منه
ضايج واذا الح عليه يلزكني بالحايط
دخلت بدلت وطفيت الاضويه وتمددت لشويه حسيته اندحس ورايه وحضني ونام ..
......................
فاقد: اااااااااااااخ
وكام يضرب براسه ويشيل ويركع
زين: لك البدوووووو ويييينه
جعفر: مساااااافر مساااافر اكتبها بكصتي
فاقد: لا تصيحووووون رااااسي
زين: هذا اذا كبت عنده الشقيقة اقره ع نفسك السلام
خلي ناخذه دكتور
كام دخل فاقد للغرفة وسد الباب
جعفر: عوفه هسه شويه ويهدئ اعرفه بس لا تطلع صوت
زين: ويبقى هيج روحه محتركه صارله فترة ماندري شبيه
جعفر: اخوك عاشك ومغلس
زين: دروح منا وخابر البدو
جعفر: مايرد الحيوان
زين: اخ لو يسمعك
.....................
شهل
دخلت زينب للغرفة تالي الليل وهمستلي وطلعت وراها
شهل: شكو بنص الليل خبله انتي؟
لباب: جوعانه بروح اخوج
هزيت راسي كارهه الوضع ودخلت المطبخ
سويت اكل الها وهي كاعده بالكاع منتظره
انطيتها الاكل وبدت تاكل وكفت احمي الجاي وسألتها
شهل: من شوكت يحبني!
غصت وكامت شربت ماي وتدك ع صدرها وباوعتلي بصدمه
شهل: شفت المحادثه
لباب: خصوصياتي؟!!!
شهل: احجي لا اهفچ بالقوري
لباب: يكول من تبادلنا العلاليك اول مره
شهل: حب من اول علاكه ههه والله يا الله
لباب: يعشگج شهل
شهل: اعرف حسيت بس ليش رافض يجي؟
لباب: عاد مادري اذا شفتي المحادثه اكيد شفتي الحاحي عليه ويرفض يحجي
شهل: انتبهي لو ابوي يدري تحجين وي ولد لو عمي يصلخ من جلدج جلد
لباب: ماقريتي اسمه شسالفه
شهل: قريته وباوعتلها صفح ودرت وجهي
ربتت ع متني وهمست : لا تخسرين شخص يحبج بهذا القَدر لانو ماكو بنات وفيات بهذا الزمن ولا زلم حوگ
تصبحين ع خير شبعت
وطلعت من المطبخ طفيت القوري وصفنت بكلامها
نرجع للواقع هو يحبني بس شنو الي يثبت؟
عفتها ع الله ورجعت نمت
.........................
اسراء: كووووووم حجيه نوفه وكعت
طفر من فراشه وخفت الجهال يكعدون بس ماكعدو
طلع شافها لا تحرك ايد ولا رجل بسرعه شالها وطلع وخابر لمدري منو .. بقيت وحدي اقره قرآن وادعي
ساعتين وخابرته
: هااااا شبيها
ماهر: جلطه ولو تكعد لو تموت ...
سد التلفون وبقيت صافنه اعاتب ربي وادعي بنفس الوقت مثل التخبلت ونوب امي ماموجوده سافرت قبل شهر لاقاربنا وبقيت وحدي
لميت رجلي وحضنت نفسي وبقيت ابجي وادعي ع السجاده
................
نايمين ودك تلفونه
رد بنعاس: الووو؟
وكمز من مكانه ودفعني حيل بحيث صحيت
وفتح الضوه بسرعه ولبس ملابسه صحت وراه
: شكووووو
ايهم: امي نوفه وكعت جلطه
وطلع بسرعه وخلاني وحده صافنه
خوف ع قلق وتوتر
مستحيل بس لا يصير بيها شي هم نتيتم؟
هل المره حجيه نوفه احتوت الكل حتى ولد المنطقه
وصل الخبر لابنها ومرت ابنها وراحولها يبجون
واحنا وضعنا متوتر اتصلت ع اسراء بس تبجي
بقيت ع اتصال وياها وفاتحه سبيكر حتى احسسها بوجودي وهي تحسسني بوجودها
وكعدنا نصلي وندعي ثنينا لشخص واحد
واجت زينب وسمعت وتخبلت صارت تعيط
كلشي ولا نوفه
تموت عليها وجانت المقربه الها تنام بحضنها
وهم وكفت وياي تصلي وكل شوي تشهك وتعيد الصلاة
خابر ايهم والتزمنا الصمت والخوف
سديت الاتصال من اسراء وزينب اتصلت عليها وفتحت سبيكر حتى تسمع وانا ارجف اريد ارد ماكدر احس نشليت
مدت ايدها زينب فتحت اتصال والسبيكر
ايهم: وضعها تمام بس انصابت بشلل نصفي
عاطت زينب وبعدين كالت الحمدلله اهم شي ماتموت
ايهم: لا ماتموت يومين ونطلعها من المستشفى لانو خطره
وهاي تخبلت ليش حالتها خطره لحد مافهمها وسد الخط ونامت ع السجاده وانا كعدت اقره قرآن واسراء سدينا الخط منها لانو كامت تبجي وتصيح
انهارت اعصابنا فد مره
الولد سمعو واجو لبيتي
فاقد وزين يمي وجعفر راح يم اسراء
فاقد عيونه حمر دم وعروگه مبينه وشاد راسه
وعيونه بالكوه فاتحهم ويمشي
همسلي زين لا تطلعون صوت هذا گابه الشقيقه عليه
سكتنا وزينب صعدت نامت بغرفتها وانا دخلت لغرفتي
وفاقد وزين بقو بالصالة ياخبرون ويحجون بس بصوت اشبه الهمس علمود فاقد ...
وصل النا اتصال وفاقد كام يصيح
