رواية الوجه الاخر للرحمة الفصل الثاني والخمسون بقلم عبير إدريس
انه والبنات وحدة عاينت على الثانية رجعت تحجي
رفل : هاي شبيچن ولا وحدة باركتلي سمعتوني شنو كلت لو لا ؟
بتول : سمعناج خية بس شو ما ندري ؟ منو سعيد الحظ اللي خطبج ؟
سمر : من رخصتكم بنات انه رايحة لبيتي
بتول : بعد وكت وين رايحة ؟ تونا كعدنا
سمر : أريد أغسل ملابسنا مال سفرة
بتول : هاا اذا هيج روحي ، اجي أساعدج ؟
سمر : لا ما يحتاج تسلمين
كمت ردت أطلع لزمتني من إيدي نترتها منها وعيني بعينها
رفل : ما باركتيلي
سمر : وعلى شنو اباركلج ؟
رفل : على خطوبتي
مشيت عنها جان اسمعها تكول
رفل : بدربج باركي ليوسف ، أعرف علاقتج بيه طيبة وقوية ، حتى لا يعاتبج بعدين
التفتت عليها عاكدة حاجبي ومصدومة ، صدمتني ما تقل عن باقي البنات
بتول : شنوه ؟
رفل مشت وكعدت على القنفة حطت رجل على رجل وتعاين على إيدها البيها حلقة
رفل : انخطبنا انه ويوسف
بتول : لا لا تتشاقين
رفل : اسألي عمة ، مو عمة انخطبنا ما تفرحيهم
عمة زهرة سوت حركة بحلكها جنها ما راضية بس بنفس الوقت ما نفت الخبر
رفل : عمة شبيج احجيلهم ، راح اصير جنتج
زهرة : الله اعلم شلون عميتي عينه وخذاج
حجتها وكامت طلعت من الغرفة رحت وراها
سمر : عمة اوكفي احاجيج
زهرة : شرايدة سمر ؟
سمر : هاي تحجي صدك ؟ خطبها يوسف ؟
زهرة : اي صدك اشوفج مستغربة
سمر : اي طبعاً استغرب ، يوسف ما يحبها شلون صار هيج ؟
زهرة : دروب عمة دروب شلون ما انتِ خذيتي شهم من مرته هاي تلكينها لعبت على أبني وخذته ...
ظليت اعاين عليها مصدومة ، بسرعة دموعي نزلن
سمر : عمة تقارنيني بيها ؟
زهرة : وشفرقج عنها ؟ علم فهم ، كدايش وخذيتن عينة ولدي بالعافية عليجن ..
عافتني وراحت انصدمت بيها صدمة عمري ، تركت فطومة يم البنات ورحت لبيت يوسف ، أريد اشوف شنو الموضوع ، دكيت الباب محد فتحلي صعدت جبت النسخة العندي ونزلت فتحت الباب وكفت برا ما دخلت خفت يكون نايم لو بوضع ما يسمح افوت كبل للبيت ، بقيت مترددة تالي سديت الباب ورحت لبيت سهر ، دكيت بابها فتحتها سلمت عليها وسألتها عن ريحانة ، كالت آخذها يوسف ورجعها لبيته ، تريد تحجي بعد تركتها ورجعت لبيته فتحت الباب ودخلت ، الأستقبال جانت فارغة مابيه أحد ، رحت لغرفتها دكيت الباب اجاني صوتها ...
ريحانة : يوسف كلتلك ما أريد سم ما أريد شلون يعني غصب
فتحت الباب مقفول استغربت دكيتها على كيف
سمر : ريحانة افتحي الباب انه سمر
سمعت خطواتها تقترب من الباب ، وكفت وحاجتني
ريحانة : سمر الحكيلي يوسف قافل علية الباب ودايعاملني معاملة سيئة تخيلي مانعني اطلع من الغرفة طول وقتي بيها حبابة حاجيه خليه يفتحلي الباب راح اموت اختنكت هنا ومليت..
سمر : ليش شصاير بينكم ؟ وبعدين انتِ منو جنتي يم سهر شنو اللي رجعج هنا ؟
ريحانة : سالفة طويلة بعدين احجيلج عنها بس خليه يفتحلي الباب الله يخليج حاجيه والله اختنكت
سمر : تمام تمام هسه احجي وياه بس كوليلي انتِ زينة ؟
ريحانة : اي زينة مابية شي
سمر : هسه شوية وارجعلج تمام
ريحانة : انتظرج لا تتأخرين علية
سمر : صار
مشيت من يمها وكعدت بالاستقبال اتصلت بيوسف ما رد علية ، رجعت اتصلت هم ما رد كتبتله ...
*يوسف شلونك انه بالبيت وأريد اشوف ريحانة بس انت قافل عليها ، شنو السبب ؟ ممكن اعرف..
كتبلي
* أدري شفتج ومنا وهيج ما عليج بيها لا تشوفيها ولا تشوفج رجائاً
*زين ليش ممكن افهم ؟
*ماكو شي تفهميه ، أنشغلي بحياتج وبزوجج وبنتج ، ريحانة طلعيها من راسج
*يوسف لازم افهم ما يصير تخليني بموضع الثولة ، انت من البداية دخلتني بالموضوع و من حقي افهم ليش بعدتني وبدون سبب ، سويت شي ضوجك مني ؟
*انتِ ليش هواي تحجين ؟ كلتلج ما أريدج تتواصلين وياها وانتهى الكلام
*لا ما انتهى وما اطلع منا اذا ما اعرف شنو دايصير
كتبلي
*تمام
تركت موبايلي ورحت حاجيتها من ورا الباب
سمر : ريحانة تسمعيني ؟
ريحانة : اي اسمعج
سمر : شنو صاير وراية ؟ وليش يوسف رافض اشوفج ؟
ريحانة : ما اكدر احجي
سمر : ليش ؟
ريحانة : البيت كله كاميرات وهو محذرني احجي شي
سمر : لعد شلون اساعدج ؟ لا انتِ تحجين ولا هو راضي يحجي
ريحانة : ما ادري على شنو ناوي بس متحلفلي
سمر : انتِ مسوية شي ؟
ريحانة : لا
سمر : متأكدة ؟
ريحانة : اي
سمر : لحظة اشوف نقالي يرن بلكت هذا يوسف رجع اتصل
رحت للنقال هذا شهم ، جريت نفس وجاوبته
شهم : ها سمر انتِ وين ؟
سمر : ها ، شلون صرت ؟
شهم : عوفج مني واحجي انتِ وين ؟
سمر : ابيت يوسف ليش ؟
شهم : ارجعي لبيتج بسرعة وبعد لا توصلين هناك
سمر : ليش صاير شي ؟
شهم : يوسف خابرني وكال ما أريد مرتك توصل لبيتي ولا تختلط بهاي اليمج
سمر : شنو السبب ما حجالك ؟
شهم : لا ما حجى بس أكيد خايف عليج منها ، سمر انه من البداية نبهتج ما تدخلين نفسج بهاي الأمور وعاندتيني وشفتي هسه ما يريدج تتدخلين بحياتهم
سمر : بس
شهم : بدون بس عساهم نارهم تاكل حطبهم انتِ شكو مدوخة نفسج بيهم
سمر : البنية شلون اعوفها ؟
شهم : اعتبريها ماكو وارجعي لبيتج وهذا تحذير ممنوع توصليلها مرة ثانية
سمر : شهم عليك الله لا تصعب الأمور ، ريحانة ماعندها أحد
شهم : لا عندها يوسف هو متكفل بيها إحنا شكو
سمر : زين حاجيه بس اشوفها واطلع
شهم : دا اكلج ارجعي للبيت عليش تعانديني ؟
سمر : يلة جاية
رحتلها دكيت الباب وحجيت وياها
سمر : ريحانة احجيلي شنو صاير بسرعة ؟
ريحانة : والله ما أكدر ، دا اكلج يسمعنا
سمر : لعد انه رايحة هالمرة ما بيدي شي اسويه ، يوسف رافض رفض قاطع احجي وياج ، ديري بالج على نفسج الى ان اشوف طريقة نكدر نتشاوف بيها
ريحانة : زين ليش مانعج عني ؟
سمر : انه لازم اسألج هالسؤال
ريحانة : سمر حبابة لا تعوفيني ماعندي غيرج
تنهدت جريت نفس وحاجيتها بتعب
سمر : الله كريم اشوف شلون احاجيه ، ما تدرين بيه وين راح
ريحانة : هو اصلاً ما يتواجد بالبيت قليل ييجي
سمر : معناها صاير شي جبير بينكم ، ارتاحي هسه والله كريم
طلعت من البيت دا اصعد لبيتي سمعت صوته وراية صاح..
يوسف : لحظة
التفتت عليه لكيته عاكد حاجبه ، وجهه متغير لونه مطعون ازرك
سمر : يوسف ! هاي شصاير بيك ؟ خير
تقرب مد إيده وكال
يوسف : المفتاح
سمر : مافهمت
يوسف : مفتاح بيتي أريده
سمر : صاير شي وياكم لا تخلي بالي عليك الله
يوسف : سمر انطيني المفتاح
حجاها بخلك ضيق ، مديتله المفتاح آخذه مني وراح للبيت بدون ما يحجي اي شي ، صعدت لبيتي بس بالي مشغول وحايرة شنو اسوي
ريحانة
سمعت صوت بالبيت عبالي سمر رجعت ، دكيت الباب وصحت عليها ، جاوبني يوسف
يوسف : بدلتي ملابسج ؟
ريحانة : افتح الباب أريد احجي وياك
يوسف : ماعندي وقت للحجي ، كلتلج ألبسي حتى نروح نسوي تحاليل
ريحانة : ما أروح
فتح الباب تراجعت خطوتين ليورا ، وجهه متغير مو نفسه ، ملامحه قاسية نبرة صوته حادة ما التمست بيها رحمة ، رفع أصبعه مهدد
يوسف : تجين وياي بدون كلام وإلا تشوفين مني وجه بعمرج ما شايفة مثله لا تجربين صبري ترى صبري مُر...
ريحانة : لو تذبحني هنا ما اروح اسوي تحاليل...
يوسف : شوفي عنادج وين وصلنا ، جبتها وياج من المصح لليوم شلعان گلب ومشاكل ، ما يوم حاجيتج وريحتي گلبي وحجيتلي شي مفيد ، خلصتيها براسي كال قسور وحجى قسور واجاني واعتدى علية ، ومن امدلج إيدي حتى اساعدج تعضيها ، لهنا وبس ، ماعندي شي اقدمه الج ، راح اشوفلج مكان ادفع إيجاره وانطيج مصرف يكفيج شهر واي تواصل بيني وبينج ماكو ، الفلوس تتحول لبطاقة من بطاقاتي تخليها عندج غيرها ماكو
هزيت راسي ساكتة
يوسف : واي أحد من اهلي ممنوع تتواصلين وياه ، كأنج ماعرفتيهم بيوم من الأيام
ريحانة : تمام وشوكت راح تنفذ ؟
يوسف : مو شغلج
ريحانة : شلون مو شغلي اني أريد اطلع منا بأسرع وقت
يوسف : انه متلهف لطلعج أكثر ، مجرد ارتب الأمور اطلعج من البيت وما أريد اشوف وجهج مرة ثانية ، احتاري بزمانج اللي علية سويته وأكثر من هيج ماعندي اقدمه الج ...
دنكت راسي خجلانة منه ومن تصرفاتي ، اني ورطته بشي أكبر منه ، وخسر هواي بسببي وهذا الحل الانسب للكل ..والصراحة حسيت براحة من كالي اطلعج منا..
طلع وقفل الباب وراه ...
بعد مرور ثلاث أيام (مشهد شهم وسمر )
سمر : اليوم موعد روحتك للدكتور تروح مو ؟ شهم لا تأجلها لخاطري
شهم : يابة مابية شي عليش خابصين نفسكم
سمر : ميخالف بس نتأكد مو غلط
شهم : صدكيني مابية شي
سمر : ما ارتاح اذا ما تروح وازعل عليك اذا قشمرتني
عاين علية ميل راسه مبتسم وهمس
شهم : تخافين علية ؟
سمر : اي طبعاً
شهم : معناها تحبيني
سمر : أكيد
ضحك ...
سمر : يلة تغدا الأكل راح يبرد
شهم : يلة بسم الله
تغدينا وراها شربنا جاي واجاه فارس بدل وطلع ، وراهم رحت لبيت عمي سألتهم عن طيبة بالي يمها وهم أسمع نفس الجواب ابيت كميل ومحد يحجي شي ثاني..
ظليت كاعدة يمهم واللي عرفته من البنات بخصوص خطوبة رفل ويوسف ، محد يدري بيها غفل جاييهم يوسف وكايل ألهم اريد اخطب رفل وعمي عبد الملك من سمع ما عارض بس عمتي جانت ما راضية ، سألتهم الولد يدرون كالن اي يدرون بس إحنا البنات ماعندنا خبر ، ومن جنا بالشمال رايحين عاقدين سيد ومحكمة بنفس اليوم ، يعني صارت زوجته رسمي ، وكالوا العرس قريب ، تخبلت شنو اللي صار خلال أيام بسيطة كل شي تغير والمشكلة يوسف ما ناطيني وجه احجي وياه واسأله وافتهم أصل السالفة ....
اتصل شهم كمت من يمهم و جاوبته ...
سمر : ها حبيبي بشرني
شهم : مو كلتلج ماكو شي
سمر : صدك الله عليك مابيك شي لو تحجي هيج حتى ما تخوفني ..
شهم : لا ماكو شي
سمر : اذا ماكو شي ليش زوعت دم شنو السبب ؟
شهم : كال تقرحات بالمعدة من ورا التدخين وكالي بطل منه وهذا هو
سمر : اي الحمد لله ، كتبلك علاج ؟
شهم : لا ما احتاج بس كال ضروري تنبه على زوجتك الحلوة ما تغثك ولا تسوي شي يضوجك حتى ما تنقهر وترجعلك التقرحات ..
سمر : ها هو كالك زوجتك الحلوة ؟
شهم : اي واذا ما تصدكين هسه ارجع واسأله
سمر : لالا صدكت اذا بس هيج سهلة عمي ما راح اغثك ..
شهم : وبعد اكو شي ثاني
سمر : شنو ؟
شهم : راح اتعبج شوية
سمر : تعبك راحة احجي شكو
شهم : كال لازم تتبهرز وما تاكل اي شي ، حددني بأكلات معينة لازم تسويهن بيدج الحلوة
سمر : صار من عيوني عبالي فد شي صعب اذا على الأكل هم سهلة
شهم : سالمة عيونج ، اذل تكدرين تسويلي شوربة بس بدون اي اضافات وملح قليل بيها لأن ميت جوع..
سمر : بعيوني ترجع تلكاها جاهزة
شهم : يلة إحنا بالطريق راجعين
سمر : تمام
سديته منه ورجعت للبيت سويتله شوربة خضار وصليت المغرب ، أول ما كملت فتح الباب ودخل ، كمت حضنته بقوة وبجيت ، حضن راسي وباسه
شهم : عليمن البجي ياعيني
سمر : والله خفت عليك
عاينتله وابتسمت والدموع بعيوني ، مسحهن من خدي وكال
شهم : شكد حلوة انتِ
لفيت إيدي على رقبته وهمست
سمر : تحبني ؟
شهم : عندج شك بهذا الشي ؟
سمر : سألتك جاوبني
شهم : لا ما احبج
سمر : ها هيج دروح زعلت
عفته ومشيت سحبني من إيدي
شهم : وين رايحة تعالي
حضني وباس راسي وكال
شهم : لو شرقت وغربت ماراح اكرهج يا سمرمر
سمر : حيل شذكرك بسمرمر
شهم : اسم التنمر هذا شلون انساه
بالمدرسة ما جانوا يصيحولي سمر كله سمرمر واكو مدرسات يصيحولي مرمر هالكد ما جنت حلوة وشعري اشقر كيرلي ..وهو جلبلي بهذا الاسم كلما نتعارك يصيحلي سمرمر ابوي يريدج لو امي تريدج ونتعارك لأن جنت احب اسمي واضوج من يصحولي بهذا الأسم ...
رحت للمطبخ صبيتله شوربة وكعد يآكل ورا شوية رفع راسه سألني
شهم : اكلج رحتي لطيبة شفتي وضعها ؟
سمر : لا والله ما شفتها يكولون ابيت كميل
شهم : الصبح جنت يمها وبس نايمة يكولي مخترعة بس ما اقتنعت بكلامه ، يعني من شنو تخترع
سمر : والله ما أدري آخر مرة حجيت وياها جانت مثل الوردة كل شي ما بيها..
شهم : يكول على اساس طالعة المغرب ودايسة على شي ، صارلنا سنين نطب ونطلع اشو ما دسنا على شي ، و المشكلة انه ما عندي يقين بهاي السوالف بس سكتت بمزاجي كلت افوت يوم يومين واشوف شنو السالفة وهم ما اطلعه جذاب عيب ..
سمر : هي مو بس سالفة طيبة غريبة حتى يوسف
شهم : شبيه
سمر : شنو سالفة خطوبته من رفل اشو بسرعة صارت وبدون علمنا
شهم : علمي علمج ، غفلة خابرني كميل وكال رايحين نعقدلهم يابه شكو يكولي ماكو شي خطبها ونريد نعقدلهم ومن ترجعون نسوي العرس..
سمر : انت مقتنع بهيج شي
ضحك مستهزء
شهم : طبعاً ما مقتنع ، هي وحدة من الأثنين يا اما ورطت يوسف وياها ويريد يستر عليها وما حجى او متسترين على شي جبير بهذا الزواج ما يريدونا نعرفه وإلا ليش الشغلة تتطمطم بين يوسف وكميل وبعدين يلة إحنا نعرف شنو شافونا هنود ..
سمر : ما راح تحجي وية يوسف وتفتهم منه ؟
شهم : لا احجي ولا يحاجيني كلمن عقله براسه يعرف خلاصه قابل انه راح اعيش وياها لو هو ..
سمر : بس هذا أخوك غلط تشيل إيدك منه
شهم : أخوي من يسمع كلامي من يشاركني بمشاكله ونحلها سوى من اكوله هذا غلط ويتجنبه ما يعاند ويكمل بيه ..يوسف هو تغير وعناده راح يجيب العيد..
سمر : عليك الله لا تظلمه
شهم : ما اظلمه ! ليش ريحانة وجودها سهل ابينا ؟
سمر : ترى وداها للمصح بس ما قبلوا يستلموها لأن ما عندها أوراق رسمية
شهم : اكو الف طريقة وطريقة يبعدها بس هو عاجبه يكابلها ويكعد
سمر : يحبها لا تلومه
ترك الخاشوكة من إيده وكال
شهم : الحب اذا تجاوز حدود العقل ما يصير نكمل بيه ، شنو الفايدة احبلي وحدة وتضيع مستقبلي وتنهي حياتي وتخليني عاجز اكملها براحة ، العلاقة اذا ما جانت متكافئة وبيها ثقة بين الطرفين ما تتسمى علاقة ، هو لحد الآن ما يعرف عنها شي يخص ماضيها وهي بالمقابل ساكتة ومستغلته وعايشة براسه
سمر : انت صاير كلش قاسي ليش هيج تحجي عليهم
شهم : مو قساوة وانما المنطق هيج يكول ، تصعد تنزل تبقى مجرمة ومطلوبة للعدالة والله اعلم شنو مسوية واذا لزموها وهي عندنا وإحنا ما مبلغين عنها كلنا تسحبنا وياهم ونروح بالرجلين لاعبالج موضوعها سهل ...
سمر : والله صحيح ، الأمور داتتعقد بالزايد ويوسف كلش تعبان ..بس لازم نوكف وياه ما نتركه وحده ..
شهم : من إيده جان مرتاح وعايش حياته طول بعرض بين العيادة و المستشفى والبيت ، حياة هادئة مريحة ، من يوم دخلها بحياته لهذا اليوم هو ما مرتاح ، شنو بقى ما خسره ، خسرته كل شي وآخرها خسر أهله لا عبالج ابوي وامي راضين عليه ولا إحنا وهو ضاربنا بعرض الحايط..
سمر : والله ما ادري شنو اكولك حيرة ..
شهم : عوفج منهم فطوم وينها ؟
سمر : ظلت يم جدتها ما رضت ترجع وياي
شهم : هي زينة وضعيتها شلونها خوما رجعت تخاف ؟
سمر : لا الحمدلله
شهم : دا تاخذ دروس وي هاي المعلمة ؟
سمر : ها لا ..
شهم : شنو بطلتيها ؟
سمر : لا ما بطلت من باجر ترجع تقريها
شهم : وزينة تفتهم عليها ؟
سمر : اي زينة وحابتها
شهم : الحمد لله الله يسهل
ردت احجيله عن سالفة الدراسة بس خفت يمانع وترجع علاقتنا تتوتر ، كلت ادرس وقبل لا اقدم الأمتحانات احجي وياه واحاول اقنعه بلكت يقبل..
مر كم يوم والوضع طبيعي ، بيوم اجى شهم للبيت بس وجهه مكلوب وضايج كلش سألته .
سمر : خير شبيك ؟ صاير شي ؟
شهم : لا ماكو شي
تركني وفات يسبح ، كعدت بالهول بالي مشغول شبيه ليش هيج ضايج ؟ شنو ممكن صاير وياه ، لهناك رن نقالي عاينت يوسف ، استغربت صارله اسبوع مختفي ، جاوبته
سمر : الو
يوسف : شلونج سمر
سمر : الحمد لله وانت ؟
يوسف : بخير
سمر : ريحانة شلونها ؟
يوسف : ما أدري شنو اكلج بس مو زينة وتريد تشوفج ..
سمر : ياستار شبيها ؟
يوسف : تكدرين تجين شوية للبيت و نحجي
سمر : والله ما أدري شهم هنا اذا طلع امرلكم
يوسف : انتظرج
سمر : تمام
يوسف : مع السلامة
سمر : الله وياك
سديته منه واحتاريت بين اروحلهم واكسر كلمة شهم ، لو احجيله وادري بيه يمنعني اوصل لبيته خصوصاً هو طلب من شهم ما اوصل يمهم..
طلع من الحمام باوعلي وكال
شهم : اكو جاي ؟
سمر : هسه اسوي
شهم : سويلي بين ما اصلي
سمر : تمام
رحت للمطبخ سويت جاي وهو صلى من كمل اجى للمطبخ كعد صبيت الجاي وكعدنا نشرب ساكتين ، طلع باكيت الجكاير راد يورث وحده سحبتها من إيده ...
سمر : اشو رجعنا ؟ مو منعك الدكتور منها
شهم : خليني اشربها مزاجي متعكر
سمر : التهي بأي شي وعوفها
ما جاوبني شرب الجاي ساكت
سمر : ما راح تحجيلي شبيك ؟
شهم : عرس يوسف الخميس الجاي
شهكت بالجاي وكمت اكح ، هو باوعلي مستغرب ، كمل الجاي وكام جدد واحد ثاني ، وكف ناطيني ظهره وكال
شهم : ليش شهكتي من سمعتي عرسه الخميس؟
حجاها والتفت علية عاكد حاجبه
سمر : وانت هذا السبب اللي مخليك تضوج ؟ من عرفت بموعد عرسه ؟
شهم : لا
سمر : لعد شنو اللي مضوجك ؟
شهم : ضايج من سالفة الاستعجال حاسس اكو شي صاير وضاميه علية وانه كل شي ولا واحد يحط عينه بعيني ويستغفلني احس روحي غبي ...
سمر : الصراحة الموضوع مو مريح اكو بيه أنه ، حتى انه ضايجة من سالفة الاستعجال بالزواج وما حابة ياخذ رفل ، يوسف يستحق وحدة احسن منها ..
شهم : سمر لخاطري اي شي يخص يوسف وحياته ممنوع تتدخلين بيه ، اكو غيرج الف واحد هنا ويروح يلجأ له ، ما أريد يصيرلج شي لو تجيج حجاية من اهلي لأي سبب كان ، ياخذ رفل ياخذ غيرها مالنا شغل بيهم..
سمر : بس طلبك صعب
شهم : شنو الصعب بيه ؟ لأن أريد احافظ عليج وعلى استقرار حياتنا
سمر : لا مو هيج انت حقك بس انه هم ما أكدر اعوفهم ...
شهم : هو طلب بلسانه تتركيهم بعد شكو
سمر : اعرف طلب مني اتركهم ، وهسه رجع خابرني من جنت بالحمام وكالي ريحانة تريد تشوفج وانه حابة اروح اشوفها
شهم : يلة روحي لبسي عباتج واركضيلهم وفلشي بيتج بإيدج ..
كمت وكفت كباله متوسلته بعيوني
سمر : شهم هذا اخوك واللي يصيبه يصيبنا واللي يأذيه يأذينا كلنا عوفك من ريحانة غريبة بس اخوك من دمك ولحمك لا تتخلى عنه ، هذا توأمك مو اي أخ
دمعت عيونه ودنك راسه همس
شهم : مرات اقسى وياه من خوفي عليه لأن اعرف نهاية طريقه مو زينة وتتذكرين كلامي اذا عايش كولي كلت ياشهم وصار واذا ميت اترحميلي واتذكري حجايتي هاي
حضنته وهمست
سمر : اسم الله عليك عمرك طويل إن شاءالله لا تحجي بالموت ما اتحمل ..
بعدني عنه بهدوء وكال..
شهم : يلة روحي شوفيه شيريد منج وتعالي لا تطولين راح ابقى هنا انتظرج ، فطومة نايمة بعدها ؟
سمر : اي رجعت من المدرسة تغدت ونامت
شهم : بس صارلها هواي راح اكعدها
سمر : كعدها اذا تريد
شهم : راح اكعدها وانتِ لا تطولين هناك
سمر : تمام
جنت مسوية فاصولية للغدة صبيت لريحانةوسويتلها صينية مرتبة حتى تاكل ادري بيها تحبها طلعت من المطبخ شايلتها بإيدي شافني جان كاعد بصف فطومة على جربايتها ، باعولي وكال ...
شهم : المن هاي الصينية ؟
سمر : لريحانة تحب الفاصولية خطية..
شهم : عوفيها انه انزلها روحي ألبسي ..
رجعتها على الميز ورحت لبست عباتي ونزلنا انه وياه وصلني للبيت حطها بإيدي ودك الجرس وراح صعد فوك ، يوسف فتحلي الباب ابتسم بتعب وكال ..
يوسف : انطيني الصينية عنج
آخذها مني عاين على الأكل وكال
يوسف : تدرين صارلها كم يوم كاطعة الأكل تماماً
سمر : ليش ؟
يوسف : ما أدري تعاقبني لو تعاقب نفسها تكولي أريد أموت ، بس اليوم أكثر يوم جانت منهارة بيه وتصيح أريد سمر جيبلي سمر ، عاد اتصلت عليج ..كلت تجين تشوفيها شبيها
سمر : هسه اشوفها شغلت بالي عليها ...
دخلت للبيت نطاني مفتاح غرفتها ومفتاح البيت وكال ...
يوسف : مفتاح البيت خليه يمج وانه آسف على تصرفي الأخير وياج مريت بظروف صعبة شوية ..
سمر : ما صار شي
حط الصينية على الطبلة والتفت علية وكال
يوسف : اذا احتاجيتي شي اتصلي علية
سمر : هسه احجي وياها وبعدين اخليها تاكل اسويلها واهس لا يظل بالك عليها ..
ضحك بقهر ، باوعلي وكال
يوسف : انه راح اطلع حتى تاخذون راحتكم
سمر : اذا تكدر تفصل الكاميرات حتى ناخذ راحتنا و انه هنا مالهن داعي
يوسف : اكيد ، يلة انه رايح
وصل للباب صحته ..
سمر : يوسف
التفتلي وكال
يوسف : نعم
سمر : ضروري نحجي
يوسف : إن شاءالله
دنك راسه وطلع سد الباب وراه أول مرة اشوفه هيج مكسور والدنيا طالعة من عينه..
آخذت نفس ، نزعت عباتي ورحت لغرفتها فتحت الباب لكيتها كاعدة على الفراش وحاضنة نفسها وتون
سمر : ريحانة
رفعت راسها عاينتلي ، كامت من مكانها ركضت حضنتني وتبجي
سمر : شبيج ياعيني شبيج شنو صاير وياج ؟
ما تحجي شي بس تبجي ، سحبتها من إيديها وآخذتها للحمام غسلتلها ، آخذت الخاولي مسحت وجهها وطلعنا ، التفت علية وكالت
ريحانة : طلعيني من هاي الغرفة كرهتها
سمر : يلة حبيتي تعالي..
طلعنا للهول شافت الأكل وكالت
ريحانة : ما أريد آكل أريد أحجي وياج
سمر : ناكل شوية ونسولف وراها
رحنا كعدنا قربت منها الصينية حطيتلها مركة على التمن وشلت الخاشوكة حتى اوكلها مجرد اشتمت الريحة لعبت نفسها وكامت ركضت للحمام رحت وراها تقيأت وكعدت بالكاع لزمت بطنها وتبجي ، ربتت على ظهرها اهدأها ، مديت إيدي ساعدتها تكوم ، كامت ورجعنا للأستقبال ...صفنت على الأكل وكالت
ريحانة : حبابة شيليه من كدامي
كمت آخذت الصينية وديتها للمطبخ ورجعت كعدت كبالها صافنة عليها شنو صايرلها
سمر : مو تحبين الفاصولية ؟
ريحانة : ما ادري اكثر الأكل مدا اطيقه
سمر : شنو السبب ؟
حطت إيدها على وجهها وبجت
سمر : شبيج يمعودة لا تخوفيني
مسحت خشمها وحجت بصوت مبحوح..
ريحانة : أريد اطلب منج طلب
سمر : كولي
ريحانة : تكدرين تجيبلي تيست منزلي مال حمل
سمر : شنو ؟ شتسوين بيه ؟
ريحانة : جيبلي واحد وبعدين احجيلج
سمر : غير افهم أول ليش رايدته
ريحانة : افهمج كل شي بس جيبلي واحد وبعدين نحجي
سمر : شلون اجيبه ؟ ما اكدر أطلع شهم بالبيت
ريحانة : حبابة دبريني شوفيلج سالفة واطلعي علمودها وجيبلي وياج واحد أريد اتأكد ..
تحجي وترجف وانه صافنة عليها باهتة
سمر : هسه اشوف شلون اجيبه انتظريني هنا ولا تسوين شي بغيابي مفهوم ؟
ريحانة : اي اي انتظرج باقية بمكاني
لبست عباتي وطلعت ، بالباب تلاكيت وية سعيد اخوية جان واكف اباب بيتي ، عبالي جاي يسلم علية كلت شعجب ، باوعلي عاكد حاجبه وكال
سعيد : رجلج الشفية ما قبل يستقبلني بالبيت..
سمر : وعليكم السلام والرحمة ، صار زمان ما متشاوفين وهيج سلامك ؟
سعيد : انه ما جاي اسلم عليج ولا رايد شوفتج الزفرة
سمر : على شنو جاي ومتعني اذا مارايد تشوفني ؟
سعيد : اجيت احذرج
سمر : من شنو ؟
سعيد : لا تكو******* لمناسك
سمر : عيب عليك هيج تحجي استحي شوية على شيباتك شكبرك تصير وماتعرف تحجي وتمسلت..
سعيد : سمعي لج ، كولي لحماج النذل يبتعد عن مناسك ولا يروحلها للكلية ترى ابطلها واكعدها من وراه ، ومرة ثانية من يجيبلها غراض وملابس لا تصيرين وسيط بينهم ترى راسج اكسره افتهمتي ...
سمر : وانت منو وتهددني لازم نسيت شهم شلون داس على راسك وخلاك ما ترفعه كدام الناس ، شعجب صوتك طلع وتهدد لازم نسيت الكتلة ؟ فوكاها بكاعنا جاي وتهوبز شنو انت ما تخاف ؟
كملت آخر كلمة وما اشوفه إلا وهاجم علية وكعني بالكاع ونام فوكاية ودك بوكسيات على وجهي وعلى راسي وانه بس اصيح موتني حسيت روحي تريد تطلع بإيده خنكني من ركبتي حسيت النفس راح غمضت عيوني تشاهدت ، وما احسه إلا انجر من فوكاية كمت اكح بقوة فتحت عيوني لكيته صاير جوا شهم ويدك بيه بوكسات وراها طلع سجينة حطها على ركبته وصاح بصوت عالي
شهم : لازم عاجبك اشرحك انت وعايش ، كو******** كام يغلط عليه ويتوعدله ..
زحفت اريد اوصله امنعه يأذيه مو خوفاً عليه يطبه مرض بس خفت على شهم يتورط بيه
سمر : شهم عوفه لخاطري الله عليك لا توسخ إيدك بدمه النكس
شهم : وخري عني خليني اموته هذا ما يجوز منج اذا ما يموت ...
كمت لزمته من بلوزه أجر بيه ، لأن انتهى جوا إيده وهو يضرب بيه بوكسيات شوه وجهه ملامحه كامت ما تبين ، والدم يجري من كل مكان تخبلت احجي وياه وهو مستمر يصيح كام ما يسمعني ..
شهم : كدرتك على النسوان ها جاوبني جلب ، مد إيدك واضربني اذا بيك خير مو كادر على سمر ..
سمر : عيوني عوفه لخاطر بنتك وابنك الراح ييجي للدنيا يلكى ابوه بالسجن ، فدوة والله ما يستاهل تفوت سجن بيه
شهم : بعلي اذا لمحتك مرة ثانية بأي مكان اخلص عليك وهاي ذكرى طيبة مني كل ما تباوع بالمرايا تتذكرني بيها
حجاها ومشى السجين على خده من الطول للطول ، كمت الطم على وجهي ، التفتت علية وصاح
شهم : عليش تضربين وجهج خايفة عليه ؟
سمر : لا والله يروحلك فدوة بس خايفة عليك عوفه الله يخليك عوفه ..
حطيت إيدي على وجهي وكمت ابجي ، كام منه بصق عليه ودفره برجله على بطنه أكثر من مرة وكال
شهم : يلة ولي منا بختك بسمر والله لو ما جانت موجودة واخاف عليها ، لا تخاف من الراح اسويه بيك جان فصلت راسك عن جسمك واشوف منو يطلع لك..
وخرت إيدي من وجهي وما أدري منين التموا الكرايب فوك راسنا ، ضحى وامها بالباب ويوسف اجى وصارت هوسة جبيرة ، رادوا يفتهمون منه شنو صاير ما حجى وياهم تقرب مني كومني ودنك آخذ عباتي من الكاع نفضها من التراب وحطها على راسي وحضني من ظهري التفت عليه وكال
شهم : وين ما اشوفك اكتلك خلاص ضم روحك مني...
صعدنا للبيت ، اول ما دخلنا باوع علية وكال
شهم : آذاج ؟
هزيت راسي بلا وبس دموعي تنزل
شهم : اكعدي ارتاحي اكعدي
حجاها وراح جابلي مي غسل وجهي وشربني وراها راح كعد يعاين على إيده ترجف من العصبية معقولة المرض رجعله بس اللي اعرفه تعالج منه يمكن من العصبية اي ، هو اعصابه فايرة ما يتحمل...مابيه شي إن شاءالله
ظلينا كاعدين كل واحد صافن بجهة ، بعدها سألني
شهم : شنو راد منج حزين ؟
دنكت راسي خجلانة ما أعرف شنو اجاوبه
شهم : سمر
رفعت راسي عاينت عليه وهمست
سمر : نعم
شهم : كلتلج شنو راد منج ؟ وليش ضربج ؟
سمر : من جنا بالسفرة فارس اشترى ملابس ونقال جديد واحذية وجنط لمناسك وكالي وديهن الها وانه ...
قاطعني وكال
شهم : ورحتي لأهلج بدون علمي مو ؟
سمر : لا والله ما رحت خابرتها واجت لبيت عمي آخذتهن من الباب وراحت
شهم : وانتِ شيخصج شعليج بيهم على شنو تصيرين وسيط بين القنادر
سمر : آسفة
شهم : وانه اظل احذر واحجي وتوكعين بمصايب وبعدين تجيني وتكولين آسفة ، سمر سمر سمر
سمر : ها
شهم : هاي آخر مرة احذرج اخواني ومصايبهم ما عليج بيها ابتعدي عنهم ، ماعليج غير بنفسج وبنتج وحتى انه ما عليج بية يطبني طوب ...
عافني وطلع من البيت ، حطيت إيدي على راسي وكمت ابجي ، ياربي شلون بية والله احبهم وما أكدر ارفضلهم طلب ، هواي ساعدوني هواي وكفوا وياية بوقت لازم يكون زوجي حاضر ابدالهم ، بس هم ما قصروا ، فطومة تتمرض فارس يركض بيها ، انه اتعب احتاج مستشفى يوسف وفارس حايرين بية شلون شلون ياربي ومنا سالفة ريحانة ، ومنا شهم يضغط علية راح اتخبل شنو اسوي ما أدري ..
سمعت صوته جوا يصيح فتحت الشباك واسمعهم هو وضحى يتعاركون سديته ورحت كعدت اجتي فطومة من غرفتها تضحك
فطومة : ماما بابا درسني وكملت وكال شوفي كارتون لحد ما تنامين وسد علية الباب وطلع ، عادي ابقى اتفرج ؟
ياربي الطفلة نسيتها همزين التهت بالتلفزيون جان انتكست حالتها لا سامح الله..
سمر : عادي حبيبتي
ظلت واكفة بمكانها تعاين علية
سمر : شبيج أمي روحي شوفي كارتون ليش واكفة كبالي ؟
طلعت إيديها من ورا ظهرها وبيها نقال ابوها ..
سمر : شنو هذا ؟
فاطمة : عادي ابقى العب بيه بابا كال ألعبي حتى نزل لعبات هواي
سمر : هالمرة نقال فوك التلفزيون وأذيته ، لا ممنوع جيبيه ..
فاطمة : حبابة ماما حبابة
سمر : جيبيه كلت ممنوع..
طنكرت جابته حطته بإيدي وراحت ، لكيته مفتوح ، أول مرة نقاله يكون بإيدي صار عندي فضول اشوف شنو بيه رغم أعرف حرام وعيب اتجسس بس بعد سويتها من باب الفضول ، دخلت على الاستوديو لكيته مليان صور الي ولفطومة ، صعدت ليفوك وانصدم ماخذلي صور انه ونايمة ، انه واشتغل ابيت عمي ، لو كاعدة وية البنات واضحك ومصورني ، اتذكر هاي التفاصيل جنا بوقتها زعلانين وهو ناطيني وجه العصبي المارايدني وكلهن صور قديمة...
وراها طلعت لكيت مسوي ألبوم كاتب عليه سمرة فتحته ، عبارة عن صور من جنت حامل ونايمة بالأستقبال ، صور وانه طالعة من العملية وصور لفطومة هي وبالخدج وأكو صورة كاتب جواها ، ياربي معقولة هاي الگمر مو بنتي ؟
صخنت يعني حجي رفل صحيح إيدي كامت ترجف ..
يعني شاكك بية ومسوي التحليل ..
حطيت إيدي على حلكي وطلعت من الصور رحت للواتساب دخلت على المحادثات كلت بلكت الكى شي فتحت المحادثة بينه وبين ضحى ، اغلبها مشاكل وعركات بينهم وانه السبب كالت سمر وحجت سمر وهو يرزل بيها ومايفيد ، خصوصاً بالسفرة مطلعة روحه كاتبتله جرايد وهو ما مجاوبها ..
طلعت منها ورحت على محادثة مثبتها ليفوك و كاتب عليها قسور إيدي كامت ترجف من قريت الأسم ، قسور قسور لو غيره فتحتها يطلب رمز مني وانه ما اعرفه ، صحت على فطومة ..
سمر : فطومة
طلعت من الغرفة تعاين علية عاقجة وجهها ومكتفة إيديها...
سمر : تعرفين شكد الرمز ؟
فاطمة : عمري وعمرج
سمر : عمري وعمرج ؟
يمكن قصدها مواليدنا حطيتهن بس ما فتحت المحادثة يعني قافلها زين ليش وشنو عنده وياه شنو جابه عليه نزلت أدور أكثر ، ما اعرف شلون انقفل بإيدي ، جربت فتحته على مواليدنا انفتح ..
بس ما لحكت اشوف شي لأن سمعت صوت خطواته تقترب من الباب سديته وحطيته على القنفة ، دخل للبيت مشى لغرفة فطومة حجى وياها وطلع وكف كبالي وكال
شهم : موبايلي وين ؟
آخذته ومديته إله آخذه مني راد يطلع كلتله
سمر : مرة ثانية لا تنطيها النقال تتعود
ما جاوبني وطلع من البيت ، هذاك اليوم ما مر علية مثل الناس الف فكرة وفكرة ابالي ، أريد احجيله عن سالفة التحليل بس الوضع ما يسمح هو منا مريض و اذا اكدلي الموضوع مستحيل اكمل وياه وبنفس الوقت خايفة اواجهه خايفة اخرب حياة بنتي خايفة ياخذها مني ويعاند ، ياربي شنو اسوي شنو ، انسطرت ونمت من التفكير ، من كعدت كمت اجر بروحي جر ريكت بنتي ولبستها ملابسها واجى ابوها آخذها للمدرسة ، اتصل يوسف يسألني عن المشكلة الصارت البارحة حجيتله بشكل مختصر جان قلق وما نايم وصايرة هوسة جبيرة علمود سعيد لان شهم مأذيه حيل بحيث حتى جدي متدخل يلة فاضيها وماخذين تعهد من فارس ما يوصل لمناسك بعد ...
وراها سألته عن ريحانة كال
يوسف : بالغرفة لا راضية تاكل ولا تشرب وبس تبجي
سمر : خطية هاي البنية ولا ارتاحت ، خلي اشوف وضعي واجيها
يوسف : انتِ بيا حال عوفيها لا تصيرلج مشكلة وية شهم بسببنا
سمر : لا اشوفلي طريقة احاجيه بيها لا يظل بالك
يوسف : يمعودة إحنا ما صدكنا رجعت علاقتكم مو مال تخرب لأي سبب كان
سمر : يوسف اللي يضيمكم يضيمنا
يوسف : اعرف والله بس ما أريدج تتأذين ، هي فترة بسيطة واطلعها منا
سمر : تطلع منو ؟
يوسف : ريحانة
سمر : وين توديها ؟
يوسف : دا ارتبلها مكان بس يكمل اطلعها
سكتت ما جاوبته ، الصراحة هذا انسب حل خصوصاً اذا هو فعلاً تزوج رفل...بعدين حجيت ما اتحملت اضمها أكثر ...
سمر : ﻷن راح تتزوج مو ؟ تريد تكعد رفل بالبيت ؟
جر حسرة وكال
يوسف : اي
سمر : شلون صارت الخطوبة شنو نمت كعدت فكرت تخطبها ؟
يوسف : لا موهيج
سمر : ادري جبروك عليها مبينة ؟
يوسف : لا محد جبرني
سمر : شنو تحبها وتريد تتزوجها ؟
يوسف : مو شرط احبها هسه ، بالعشرة يصير تعود بعدين المحبة تجي
سمر : ها بالعشرة كلتلي ، يوسف احجيلي الصراحة شنو سبب زواجك منها ؟
يوسف : شفتها مناسبة الية ماكو شي ثاني وبعد لا تسألين أكثر عن هذا الموضوع ، يلة مع السلامة
سمر : الله وياك
سديته منه ورا شوية فات شهم ما حاجاني كبل راح للغرفة مدد ، كمت سويتله ريوك ورحت وديته للغرفة ما قبل ياكل ، ورا ساعة كعد من النوم على صوت نقاله جان يرن ، نزل لبيته الثاني وانه طبخت الغدة وسويتله تشريب خاص اله مابيه لا بهارات ولا ملح كلش قليل خليت بيه ، اتصلت عليه ما رد ، حطيتله الأكل بصينية وآخذت فطومة وياي نزلنا لبيته ، حطيت الصينية كبال الباب الداخلي وكلتلها
سمر : دكي الباب وكولي لبابا ياخذ الأكل وتعالي اصعدي تمام
فاطمة : تمام ماما
صعدت فوك ورا ربع ساعة فاتت فطومة وكعدت تتفرج على التلفزيون مددت وغطيتها ، اجتني رسالة على النقال فتحتها شهم كاتبلي
* عاشت إيدج بيبي الأكل كلش طيب
رديتله بدون نفس جنت ضايجة منه كلش بسبب الصورة اللي شفتها مال فطومة او بالأصح بسبب الكتابة الجواها...
*بالعافية
رجع كتبلي
*بس هيج ؟
كتبتله
*دا اقري فطومة وكتبتلك على السريع
قراها وما رد ، قررت افتح الموضوع وياه، بعد ما تفض سالفة ريحانة واشوف شبيها ، اكعده كبالي واحجيله مستحيل أكدر اسكت أكثر من هيج وابقى ضامتها بگلبي ...
للعصر اتصلت عليه جاوبني ...
سمر : شهم أريد أروح للسوك
شهم : شعندج ؟
سمر : هيج ، شغلات أريد اشتريها
شهم : خليها باجر حتى آخذج وارجعج
سمر : لا هسه أريد أروح
شهم : سمر خليها بيومج اكون يمج ونطلع
سمر : لو الشغلة مو ضرورية ما أروح
شهم : شغلة لو شغلات ؟
سمر : اريد أمر للصيدلية هم
شهم : خومابيكم شي ؟
سمر : لا ما بينا
شهم : اصبري هسه جاييج ونروح
ماكو دقايق وخابرني كال اتحضري ، كمت بدلت على السريع وبدلت لفطومة وطلعنا لكيته صاف السيارة بالباب ، عاينتله من الجامة فتحها وكال ....
شهم : صعدوا يلة
سمر : السوك قريب عليش ماخذنا بالسيارة خلينا نتمشى
شهم : وين تتمشين بهالبرد ؟ واليوم بيها مطر على الأقل سيارة موجودة اذا زخت علينا وإحنا بالطريق اصعدكم ونرجع..
صعدت فطومة ليورا وانه صعدت ليكدام وآخذنا للسوك ، افترينا وكل شوية يسألني شنو محتاجة وين نتوجه وانه ما ابالي شي غير اجيب أختبار الحمل لريحانة ...
دخلت محلات اثنين لا على التعين واشتريت ملابس للبيت شلون ماجان وراها دخلت محلات الأطفال واشتريت لفطومة تراكسود ، بعدين مرينا من يم صيدلية واكف بيها ولد ، استحيت أدخل مشينا على الشارع العام لكيت صيدلية بيها بنية كيفت ، التفتت عليه وكلتله
سمر : شهم بس افوت للصيدلية اشتري شغلة واجي
شهم : شنو تريدين ؟
سمر : شغلة نسائية
شهم : يلة
دخلت راد يفوت كلتله
سمر : وين جاي استحي
غمزلي وكال
شهم : بس اشوفها للشغلة
سمر : اي ميخالف اشوفها الك من اطلع بس مو كدام البنية تحرجني
شهم : ماشي
انتظرني بالباب ودخلت ، سلمت على البنية والتفتت عليه لكيته ملتهي وية بنته ، رجعت حاجيتها
سمر : اريد اختبار حمل واريد غسول نسائي
_ تمام
راحت جابتهم وحطتهم بعلاكة حاسبتها وحطيت الاختبار بالجنطة وشلت العلاكة بإيدي وطلعت ، وصلنا للسيارة صعدنا ، التفت علية وكال
شهم : شنو اشتريتي مانع حمل ؟
سمر : لا هاي وين عقلك راح ، هاك شوف
فتحت العلاكة شاف الغسول وهز راسه مبتسم ...
رجعنا هو راح لبيت اهله وانه رحت لبيتي ، فطومة نامت ، كمت آخذت مفتاح بيت يوسف ورحتلهم ، فتحت الباب ودخلت البيت فارغ رحت لغرفتها دكيت الباب ماكو رد ، المفتاح جان بالباب والباب مقفول فتحته ودخلت لكيتها نايمة مشيت يمها وكعدتها على كيفي فزت مرعوبة
سمر : اسم الله اسم الله
ريحانة : هاي وينج ؟ من البارحة انتظرتج ليش ما اجيتي
سمر : بعدين احجيلج ليش تأخرت عليج ، المهم جبتلج الاختبار كومي سويه وتعالي..
هزت راسها وآخذته مني
سمر : تعرفين تستعمليه ؟
ريحانة : التعليمات عليه هسه اشوفها
كامت للحمام ورا خمس دقايق سمعتها تبجي فتحت الباب لكيتها قافلته
سمر : ريحانة افتحي الباب ريحانة وينج يمعودة لاتخلين بالي ريحانة
صاحت بصوت عالي
ريحانة : عوفيني بقهري عوفيني سمر عوفيني..
سمر : افتحي الباب وخلينا نفتهم شصار
ظليت ادك بالباب واحجي وياها فوك الربع ساعة يلة فتحتلي الباب مدت إيدها بيها الاختبار ، ترجف خايفة ومصدومة باوعتلي وكالت
ريحانة : هاج شوفي حتى مرة ثانية من احجيلكم شي تصدكوني
آخذته منها ، باوعت للأختبار بيه خطين واضحات معناها حامل ، لطمت على وجهي باوعتلها وحجيت بخوف...
سمر : ولج شلون ؟ منين حامل منين ؟ عزة بعينج..
ريحانة : منين يعني من قسور
سمر : عزة عزة شلون بينا شنو نسوي هسه ، يعني صدك جان هنا ؟ صدك اعتدى عليج
لزمت إيدي تتوسل بية
ريحانة : الله عليج ساعديني أموت نفسي ، ما أريد منج غير تنطيني شي ينهي حياتي بسرعة بدون ما أحد يدري
سمر : انتِ من عقلج تحجين ؟ شلون اساعدج بهيج شي ؟ مستحيل اسويها
ريحانة : الله عليج ماعندي حل ثاني ما عندي ساعديني حبابة
سمر : خلينا انفكر بهدوء لازم اكو حل ، ما انتهت الدنيا
ريحانة : ماكو حل ماكو كل شي انتهى كل شي
كامت تصيح وتملخ بروحها تهسترت ضربتها كف على وجهها وراها لزمتها بإيدي وثبتتها ، بس ترجف وتصيح ، تالي صحت بيها ...
سمر : فهميني شنو صار وياج وكم مرة اجاج كم مرة اعتدى عليج واوعدج اساعدج...
هدأت شوية
سمر : تعالي نحجي برا
سحبتها من إيديها كعدتها على القنفة ورحت لمنظومة الكاميرات طفيتهن وكعدت كبالي
سمر : هسه ابدي احجيلي ، من سالفة قسور وجيته للبيت لحد حبستج بهاي الغرفة كل شي تحجين ممنوع تضمين علية اي تفصيلة
هزت راسها وتمسح بدموعها
ريحانة : سالفة الأعتداء اللي صارت جانت صحيحة ما كذبت عليكم بحرف واحد ، ومن ما صدكتوني انهزمت ، عبالي انتحر واخلص بس رجعتوني ، انكتبلي عمر جديد مليان بالشقاء والتعب وراها وديتوني لبيت سهر ، تعبت بالأكثر واني اعيش الصراع بين اصدك كلامكم واكول ممكن صدك جنت اتخيل وبين اصدك نفسي والحقيقة اللي عشتها برعب ...
آخذت نفس وكملت ...
مرت الأيام واجى موعد الشهرية طلبت من سهر تنطيني فوط من عندها ، آخذت الجيس وضميته انتظرت تجيني ما اجت ، عبر موعدها ..
ورا ١٥ يوم جنت واكفة بالمطبخ احمي الأكل وشفت قسور كبالي خارج البيت واكف ويأشرلي على وريده بالسجين ما أعرف شنو صارلي كمت سويت مثله بدون وعي .... وكملت باقي الحديث الى ان وصلت لبيت يوسف والصار بينهم ..
سمر : كملي
ريحانة : اجى موعد شهريتي الثاني وهم ما اجتني ، هنا شكيت بنفسي حامل مو سالفة هرمونات وتأكدت أكثر من كمت ما اتقبل الأكل واذبه من راسي مجرد اشتم ريحته ، سمر اني حامل والمصيبة من قسور فهميني شنو اسوي وين انطي وجهي بيا عين اباوع ليوسف بيا عين احجيله الصار وياية ..
سمر : بس لازم تحجيله محد يكدر يساعدج غيره
كامت من مكانها وكعدت يم رجلي تتوسلني
ريحانة : كل شي ولا يوسف يدري الله عليج لا تحجيله شي
سمر : لعد منو يساعدج غيره ؟
ريحانة : انتِ
سمر : شنو أكدر اسوي انه ؟ لازم يوسف يعرف ، هيج سالفة ما تنضم
ريحانة : ما أريده يكرهني اكثر ما أريده يشك بية ، كافي صفحتي سودة كدامه ما أريد اصخمها أكثر
سمر : بس اللي صار مو بإيدج ولا الج ذنب بيه على شنو يكرهج ؟
ريحانة : سمر توعديني محد يعرف بحملي خصوصاً يوسف ، ما أريد انفضح واذا عرف اموت نفسي والله لا عبالج ما اسويها
صفنت عليها حايرة ، هاي شلون مصيبة وشلون نحلها ما أدري وفوكاها ما تريد يوسف يعرف ..
ريحانة : ها سمر ؟ شنو كلتي ؟ راح تسترين علية مو ؟ اني حطيت ثقتي بيج وحجيتلج الله عليج لا تخذليني
مديت إيدي على راسها مسدت شعرها وهمست بقهر
سمر : اوعدج بس شلون نحلها ياالله ، صعبة والله صعبة ، مصيبة ونزلت على راسنا مو شي هين وبسيط وينحل بيني وبينج انتِ مفتهمتني صح ؟
ريحانة : ما ادري جيبلي علاج من الصيدلية مال اسقاط او اي شي المهم محد يدري بالموضوع
سمر : بس هاي مسؤولية ومجازفة ما اكدر اخاطر بيها وحدي بلة آخذج النزيف لا سامح الله شلون ؟ و شنو اسوي ؟ لالا ضروري يوسف يكون عنده خبر بالتالي هو مسؤول عنج ما راح يلومني ؟
بعدني دا احجي وياها دنكت على إيدي باستها بعدين حضنت رجلي و تبجي رادت تدنك عليها سحبتها منها..
سمر : لا استغفر الله ليش هيج سويتي ؟
ريحانة : ما أريده يعرف ما أتحمل اشوف نظرات كره بعيونه ، اريد اطلع منا وابقى ذكرى حتى لو متعبة بس مو سيئة ...
سكتت وهي ضلت تلح علية اجاوبها ، آخذت نفس وكلتلها...
سمر : انطيني مجال أفكر هسه ما أكدر اردلج خبر ، بس قبلها توعديني ما تسوين بروحج شي
هزت راسها بلا وكالت
ريحانة : لا ما اسوي شي بس ساعديني
سمر : زين هسه انتِ شنو تكدرين تاكلين ؟
ريحانة : ما بنفسي شي
سمر : معناها ما اساعدج
ريحانة : سمر والله ما مشتهية خصوصاً بعد ما تأكدت من الغضب اللي ابطني
سمر : لازم تاكلين وتسندين روحج وإلا ما أكدر اسويلج شي ، تروحين توكعين علية وتالي انجبر احجيله ليوسف وناخذج للمستشفى
ريحانة : لالا كل شي ولا مستشفى دخيلج
سمر : لعد أكلي
ريحانة : جيبلي لبن اشربه بس هذا الاتقبله
سمر : لبن ؟
ريحانة : اي صارلي كم يوم عايشة عليه
سمر : عندج بالثلاجة لو اجيبلج ؟
ريحانة : لا يوسف جايبلي اتوقع
كمت للثلاجة فتحتها طلعت فواكه ولبن وشوية خبز حميته ، وآخذتلها الصينية ، كابلتها وكلتها بإيدي غصب عنها..
ريحانة : بعد ما أكدر كافي
سمر : عود ذبيه من راسج المهم تاخذين الفائدة مالته
وكلتها وخليتها ترتاح وطمنتها ، ظليت كاعدة يمها ، شوية تبجي وشوية تصفن الى أن غفت ، تركتها وكمت لبست عباتي وطلعت من البيت ، وكفت بالباب حايرة وين أروح تذكرت الكاميرات رجعت شغلتهن وطلعت رحت لبيت أهلي دكيت الباب ، أمي رحيمة فتحتلي سلمت عليها ودخلت لكيت أبوي كاعد سلمت عليه وكعدت يمهم ، الحمد لله صحته تحسنت وهواي فرق عن قبل والعلاج بدأ يتركه شوية شوية ...
يسولفون وياي وانه بغير عالم حايرة بزماني شلون اساعدها وشنو اسوي ، كامت أمي للمطبخ رحت وراها اساعدها بالعشا ، التفتت علية وكالت
رحيمة : اليوم عشاكم يمنا انتِ وشهم وفطومة خوش
سمر : اي يمة عادي نتعشى يمكم
تركت السجينة من إيديها وكالت
رحيمة : شبيج فد تتصفنين من اجيتي لحد اﻵن ؟
سمر : يمة اذا الوحدة حامل بالشهر الثاني او بداية الثالث تكدر تطرح نفسها بعلاج بالبيت
عكدت حاجبها وكالت
رحيمة : لا يكون حامل وتريدين تسقطين الجاهل ؟
سمر : لا والله بس هيج دا اسألج
رحيمة : لا تسألين ، هذا قتل نفس وتخشين بخطية الجاهل واذا سمعتج ياسمر مسويتها ما ابريج الذمة ولا اريدج بعد
سمر : يوم وداعة بنتي وتدرين ما عندي اغلى منها غيركم ، الشغلة ما تخصني
رحيمة : تخص منو ؟
سمر : عندي بنية صديقتي تعرفت عليها عن طريق النقال وحجتلي قصتها وقهرتني هواي وردت اسأل اذا اكو شي نكدر نساعدها بيه
رحيمة : وهي عليش حبلت وعليش تريد تذبه مو حرام هاي جريمة تعتبر
سمر : يمة البنية ما متزوجة
لطمت صدرها حيل وكالت
رحيمة : يااا عزة ومنين حبلت اذا ما متزوجة ؟
سمر : فد مرة جانوا اهلها طالعين وطبلهم حرامي للبيت واعتدى عليها وصارت حامل وخايفة تحجي لأن عايشة بمجتمع مثل مجتمعنا ما يرحم البنية يعني بقرية وانتِ تعرفين اذا اهلها عرفوا بيها أكيد يذبحوها
رحيمة : سترك ربي ، وعليش اهلها عايفيها وحدها بالبيت وين جانوا عنها والحرامي هيج ماخذ راحته بحيث نهب شرفهم
سمر : ما أدري بس هي قريبة منا من الأطراف يعني
رحيمة : وانتِ بشنو تكدرين تساعديها ؟
سمر : كلت اذا تعرفين قابلة ادليها عليها تروحلها
رحيمة : هي اكو وحدة فد ما ادليج عليها ما اخش بذنبها وذنب جاهلها
سمر : يمة ليش ذنب إحنا نيتنا نساعدها وننقذ روح من القتل
رحيمة : اول تالي راح اهلها يكتشفون موضوعها هيج شي ما ينضم قابل ما راح تتزوج وتنكشف ؟
سمر : لا هي كالت ما تريد تتزوج بعد تسوي العملية وتسافر
رحيمة : واذا ماتت بيد الجدة شلون ساعتها؟ شنو تسوين ؟ مو راح تبليج
سمر : يمة انتِ تعرفين وحدة لو لا ؟
رحيمة : لا
رحت يمها وبستها من راسها
سمر : يمة احسبيها بنيتج ما تساعديها ؟ والله تنتحر اذا ظل الطفل ابطنها
صفنت علية وكالت
رحيمة : خليها تروح لأم أحمد وتحجيلها سالفتها وتشوف تكدر تساعدها لو لا بعد هي وحظها
سمر : وين صايرة أم أحمد ؟
نطتني العنوان اندليته قريب من السوك تبعد كم فرع عن بيتنا ، كملنا العشا وبالي مشغول وفكري يغلي بسالفتها
سمر : يمة هذا الأكل كله شهم ما ياكله راح اسويله شوربة بصدر الدجاج ...
رحيمة : سويلة يمه ، المسكين منين اجته التقرحات ، هذا هم حظه...
سمر : الحمدلله على كل حال..
سويتله الشوربة من كملت اتصلت عليه جاوبني ...
سمر : هلو شهم شلونك
شهم : هلو سمر شلونج
حجاها وضحك
سمر : شبيك تضحك ؟
شهم : لا هيج
سمر : انت وين ؟
شهم : ابيت كميل يم طيبة
سمر : شلونها زينة ؟
شهم : نفس الحال ماكو فرق نايمة وشاديلها مغذي
سمر : ليش ياستار ؟ شنو مريضة ؟
شهم : لا بس كاطعة الأكل
سمر : تكدر تاخذني بالليل اشوفها ؟
شهم : كميل ما يقبل ، أمي بالكوة اجت شافتها شوية ورجعناها للبيت خليها غير وقت
سمر : زين تجي تتعشى ابيت ابوي قادر
شهم : ليش انتِ هناك ؟
سمر : اي
شهم : وشوكت رحتي اشو انه ماعندي خبر
سمر : ما أدري نسيت اكولك ، هسه تجي لو لا ؟ منتظريك والأكل جاهز وكاعدين ما يرضون يمدون إيدهم إلا تجي...
شهم : يلة شوية واكون يمكم ..
سمر : تمام ننتظرك بس جيب فطومة وياك عفتها بالبيت
شهم : ليش ما آخذتيها وياج ؟
سمر : من طلعت جانت نايمة
شهم : وشلون تأمنين تعوفيها وحدها حتى لو نايمة
سمر : شكو عليها
شهم : بلة فزت خايفة ، هاي مو سالفة تطلعين وتعوفين بنتج وحدها ، مرة ثانية وين ما تروحين تاخذيها وياج
سمر : تمام بعد ما أعوفها
سديته منه وكعدنا ننتظره شوية واجى جايب فطومة بس مطنكر حسيته ، حطينا الأكل أكلنا وراها تعللنا شوية ، صارت صلاة العشاء صلينا وابوي نام وامي عيونها قفلت ، سلمنا عليها وطلعنا ، التفت علية وكال
شهم : ماعاجبني ارجع للبيت شنو رأيج نتمشى بالبستان ؟
سمر : يلة نتمشى
حطينا فطومة بالنص ومشينا ساكتين الهوا بارد وصوت الريح يهز بالأشجار ، والهدوء يخبل ، لهناك وحجى شهم...كال
شهم : تعرفين شنو أكثر شي يعجبني بهذا البستان ؟
التفتت عليه وهمست
سمر : شنو ؟
شهم : كل شي بيه يحتاجله وقت حتى يكبر
باوعتله بطرف عيني وجاوبته
سمر : وانت شنو تريد تكبر ؟
ابتسم وكال
شهم : لا بس أريد أتعلم الصبر منه
سمر : الصبر على شنو ؟
شهم : يعني ما اسبق الأشياء قبل حدوثها
سمر : شنو قصدك ؟
شهم : يعني طبعي أريد ابدله
سمر : من اي ناحية تبدله ؟
جر نفس طويل وزفره بعدها كال
شهم : عندج مثلاً سالفة طيبة شاكك بيها شي مو طبيعي وعندي احساس ضامين علية شي جبير ما يريدوني أعرفه ومشكلتي من ابقى اضرب اخماس بأسداس وتالي اكتشف المصيبة بس يكون الوقت متأخر ، لو سالفة زواج يوسف من رفل اللي طلعتلنا فجأة وية انتكاسة طيبة ، برأيج مو اكو شي غريب بالموضوع ؟
صفنت عليه الكاعد يحجيه نفس اللي فكرت بيه بس ما أكدر احجيه بصوت عالي واخاف اصلاً احجي ، لهذا ظليت استمعله ساكتة
شهم : الخبر اليوم بفلوس باجر ابلاش
حجاها بنبرة توعد مو نبرة عادية ، مرينا من يم شجرة رمان واشتيهت اقطف وحدة بس جانت عالية مديت إيدي آخذها ، هو سبقني وقطفها ..
وراها فتحها نصين وكال
شهم : بالعافية
سمر : اني جان عاجبني آخذها بنفسي من الشجرة ليش سبقتني ؟
شهم : آخذي غيرها وهاي انه وفطومة ناكلها مو مشكلة يعني
سمر : لا خلص هاي كبيرة كلنا ناكلها
شهم : وشبيج ضجتي ؟
سمر : لا ما ضجت بس أحب أسوي الأشياء وحدي ما متعلمة تساعدني
شهم : تمام ما راح اساعدج منا وجاي بس اتذكري إيدي ممدودة الج اذا احتاجيتيها آخذيها بدون ما تطلبين ، وتبقى ممدودة الج طول العمر
سمر : مشكور
تقاسمنا الرمانة وأكلناها وراها رحنا كعدنا يم جذع نخلة قديم ومكصوص ، صفنت عليه شلون يلعب فطومة ويشاقيها انتبه علية ابتسم ورجع يلعب وياها بعدها سألته
سمر : شهم
التفت وكال
شهم : هممم
سمر : اذا نترك كل شي ونسافر وين ممكن نروح ؟
عقج وجهه وكال
شهم : شنو هالسؤال الغريب ؟
سمر : اعتبره شي افتراضي وجاوبني عليه
شهم : انتِ وين عاجبج تروحين ؟
سمر : لأي مكان المهم بعيد عن هنا بعيد عن المشاكل والنزاعات والعادات الغريبة اللي مجبورين نعيشها
شهم : يعني مكان ما يعرفنا بيه أحد ؟
سمر : بالضبط
شهم : فالنفرض رحنا راح تتقبلين الحياة وياي بدون ما تحاسبيني على نسختي القديمة ؟
سمر : هو انه كادرة انسى نسختك القديمة ؟
شهم : لعد عليمن متهجولين ومتغربين اذا ما تنسين
سمر : شهم معقولة انت تغيرت ؟
شهم : ليش عندج شك ؟
سمر : ما اعرف
شهم : اذا رجعت اتعامل وياج بنفس الأسلوب القديم ، الباب اللي فتحتيها الي ارجعي سديها فضت راحت
سمر : وانت راح تتقبل اتركك للأبد ؟
شهم : راح اتقبل اذا حسيت نفسي تماديت وياج من جديد ، واوصلج مرحلة تتعبين بيها معناها ما استحق أطلب منج تبقين وياي وتكون هاي الأخيرة وانه وعدت وراح تشوفين اكون كد هذا الوعد إن شاءالله
سمر : بس انه عندي موضوع وياك اريد نحجي بيه وافضل ما يكون هنا بالقرية ، تاخذني لمكان نكون بيه وحدنا انه وياك ونحجي براحتنا
شهم : شنو هذا الموضوع ؟
سمر : بوقته راح تعرفه
شهم : شوكت ييجي وقته ؟
سمر : بس تفض سالفة طيبة وترجع تتحسن ونعرف شبيها وراها نشوف سالفة عرس يوسف ونكعد كعدة طويلة ونصفي الأمور بينا
شهم : هذا هو متفقين
سمر : يعني راح تحجيلي كل شي بدون ما تضم علية وتلف وتدور
شهم : اذا هذا الشي يريحج اسويه ، يلة كومي نرجع الدنيا بردت واخاف تتمرضون
هزيت راسي وكمت ، مشينا شوية بعدين التفت علينا وكال
شهم : منو يكدر يغلبني اذا ركضنا للبيت ؟
فطومة صاحت بحماس
فاطمة : انه
شهم : راح ابوج فدوة للأنه
شالها وركض بيها بعدين وكف التفتلي وكال
شهم : يلة حركي نفسج شوية خلي تصير عندج مرونة
ضحكت وركضت كدامهم ، صاح
شهم : اوكفي اوكفي هذا غش
جاوبته بصوت عالي وغمزتله...
سمر : الحرب خدعة
ظلينا نركض بين الأشجار وكل واحد منا يذكره هذا الطريق بطفولتنا ، وصلت قبله ووكفت عند الباب ألهث
سمر : فزت عليكم
شهم : اي فزتي
سمر : اعترف
شهم : معترف
سمر : بدون كذب
شهم : ياعمي فزتي علية وانه هم جنت اركض هيج زين ؟
سمر : اي زين
نزل فطومة ونزل لمستواها حضنها بقوة وباسها ، وبعدين كام وبقى يباوع علينا ، وكال
شهم : ما اريد افارگكم والله
سمر : هذا هو شنسوي ؟ تصبح على خير
شهم : من الصبح اجيج ونتريك سوية
سمر : تمام
هو راح للبيت واحنا صعدنا لبيتنا نمت وثاني يوم غبش علينا من الصبح لكيته فوك راسي واكف
شهم : يلة اكعدي سمر سمر كومي
سمر : شبيك بعد وقت شنو حلمان بينا
شمر نفسه على السرير بصفي وانتجى على عكسه ، وصار وجهه كبال وجهي ، حچى مبتسم
شهم : أنام وأكعد أحلم بيج ليش انتِ مبقية عقل براسي ؟
سمر : بدينا بالجذب
حجيتها وكفيت الغطا عني وكمت ، جان يصوفر بحلگه التفتت عليه وخزرته بالشقى
سمر : عينك
شهم : صلفة
سمر : كلش
تركته ورحت للحمام غسلت وطلعت لكيته طالع من الغرفة بدلت ملابسي بتراك شتائي ورحت للمطبخ لكيته حاط القوري على النار ، ويريد يسوي بيض ، ضحكت
سمر : اول تالي دكتور شهم يشارك بأمور منزلية
التفت علية وكال
شهم : لا اعجبج اليوم حتى ريوك ما تسوين كله انه اسويه
سمر : حتى لفات فطوم ؟
شهم : حتى لفاتها
كعدت على الكرسي رجل على رجل وهو حضرلنا الريوك وراح كعد فطومة وتريكنا وراها آخذها للحمام غسلت وفرشت أسنانها ورجعها للغرفة غيرلها ملابسها وانه وفطومة اثنينا صافنين عليه خايفين لا يكون مبدليه بواحد ثاني مانعرفه....
آخذها للمدرسة وراها رجع وبقى يمي للظهر نظفنا البيت سوية وسوينا الغدة اثنينا وجان فرحان وهو يساعدني كأنما مسوي فد إنجاز كبير ....
خصلنا الشغل والغدا ، صار وقت حلة فطومة من المدرسة ، راح جابها ورجع صبيت الغدا تغدينا والأمور كلها طبيعية ، نام الظهر وكعد آخذ فطومة وراح لبيت اهله وانه نزلت لريحانة كعدت وياها وحجيتلها عن القابلة وكلتلها اوديج عليها ، خافت بالبداية بعدين كلتلها هذا الحل الوحيد ماكو غيره ..
ورا يومين رحت لبيت عمي لكيت الكل مخبوصين بتحضيرات الزواج وفرحانين ورفل تفتر ابنصهم وتكول...
رفل : منا وجاي لحد يصيحلي بأسمي صيحولي ام يعكوب رجائاً
تقربت منها وحجيت بيني وبينها حتى محد يسمعنا
سمر : شنو سويتي وخطبج يوسف
ضحكت وكالت
رفل : مثل سواياتج
سمر : مممممم اذا يوسف عرف بحقيقتج والسويتيه وي ريحانة ، برأيج راح يكمل وياج
رفل : يكمل
سمر : يعني هيج واثقة من نفسج ومتأكدة راح تصيرين ام يعقوب ؟
رفل : ما ظل شي للعرس وتشوفين بعينج شلون راح اصير مرته وام ابنه وبعنادج
سمر : وعلى شنو بعنادي ، انتِ لو آدمية واعرف نيتج صافية ونظيفة وياه ليش ما افرحلج بس اعرفج شنو
رفل : عليج برجلج وبنتج هاي حدودج لا تتجاوزيها حتى حياتج ما تخرب
سمر : ومنو يخربها انتِ ؟
رفل : جربي تأذيني وشوفي شنو يطلع مني
سمر : أعرف ما تطفح منج غير الخيسة
رفل : الخيسة خيستج ام الرجولة
كمت لزمتها من شعرها وعطت بيها
سمر : شنو قصدج لج احجي بوضوح لا تظلين كل مرة تشمرين بالحجي
على صوتي فاتت عمة وكالت
زهرة : هاي شكو ليش صوتكم طالع ؟
رفل : عمة سمر ما فرحتلي بزواجي وتريد تخربه
زهرة : وعليش تخربه ، آخذتيه بعد وتربعتي
رفل : والله عاد الرجال يحبني وهو اختارني عليش مصدومين بزواجنا ، هذا الزواج المفروض من زمان يتم بس النصيب تأخر شنسوي ..حتى يوسف متندم لأن ضيع هذا الوقت كله وهو بعيد عني..
زهرة : هو هذا هم حظهم ياخذون هيج شكولات لا علم ولا فهم ، عمت عين الوكت اللي خله يوسف وله شهم ياخذوجن...
سمر : عمة ليش تجمعين بالحجي
زهرة : يمة انتِ هم مو خيرة نسيتي سوالفج وشلون آخذتيه لشهم اذا انتِ نسيتي إحنا ما ناسين
سمر : خلف الله عليج عمة
تركتها ورحت ، ضجت شوية من كلامهم بعدين كلت على شنو مضوجة نفسي الحجي ما يخلص ليش اخليه يأثر علية وعلى حياتي ، مريت لريحانة كعدنا وفتحت موضوع القابلة..
سمر : تكدرين تروحين وياي للجدة ؟
ريحانة : شوكت ؟
سمر : هسه
خافت وكامت ترجف ما جاوبتني..
سمر : عندي حجة اطلع بيها وكلت لشهم أريد أروح وي البنات نشتري ملابس وهو هسه طالع بالولاية يعني عندنا وقت
ريحانة : ويوسف شنو نكوله ؟
سمر : كوليله اريد اروح وي سمر للسوك محتاجة كم شغلة وشوفيه شنو يكول
ريحانة : خابريه
اتصلت عليه سلمت وراها نطيت النقال لريحانة حجت وياه وكاللها روحي بس لا تتأخرون ، سدته منه وكالت
ريحانة : يكول روحي بس لا تتأخرون..
سمر : يلة لعد كومي بدلي بسرعة
كامت لبست ملابسها وطلعنا ، نمشي وشايلين گلبنا بإيدينا ، اول مرة بحياتي اسوي شي واخاف منه ، اول مرة اجازف هيج مجازفة وما أكدر اتراجع عنها....
وكعت بين نارين ، نار الخوف ﻷن شغلة جبيرة ومجازفة وانه راح اتحمل المسؤولية كاملة ونار ريحانة وتوسلاتها وما بية اعوفها وما اساعدها ، رفعت عيوني للسماء ودعيت ربي يحلها...
وصلنا لبيت القابلة وكفنا بالباب مديت إيدي حتى أدك الجرس ، لزمتني وكالت
ريحانة : سمر خايفة
التفتت عليها ورفعت البوشي من وجهي عاينتلها وحجيت ...
سمر : انه شنو أكول ؟ والله احس گلبي صار ابطني من الخوف ، بس ماعندنا حل ثاني
هزت راسها وسكتت ، دكيت الجرس فتحتلنا الباب بنية صغيرة ، سألتها عن أم أحمد فاتت للبيت صاحتها واجت ، المرية رحبت بينا ودخلتنا لبيتها كعدتنا بالصالة وراحت جابت مي وقدمتلنا
سمر : مشكورة خالة
آخذته منها شربت شوية ونطيت الكلاص لريحانة شربت والباقي وكعته على ملابسها إيدها جانت ترجف ...
المرية عاينت علينا وكالت
_شعندكم ؟
سمر : والله ما أعرف شلون ابديها وياج بس جنتنا حامل وهي موزين عليها الحمل بهاي الفترة وتريد تنزله ...
التفتت على ريحانة وكالت
_انتِ الحامل ؟
هزت راسها بأي
_بيا شهر هسه ؟
ريحانة : دورتين مرت بس ما أعرف بيا شهر
_ ما آخذتي سونار حتى اشوفه ؟
سمر : لا ما آخذت
_وشلون اعرف وضعج اذا ما ماخذة سونار
اتدنيت من ريحانة وسألتها
سمر : شوكت اجاج متذكرة ؟
ريحانة : هزت راسها بلا
عصرت دماغي وتذكرت الشهر اللي صارت بيه الحادثة بس اليوم ما متذكرته بالضبط ، اتذكر بداية شهر هيج شي ، نطيتها تاريخ بس مو حقيقي ...شي تقريبي
المرأة حسبت بإيديها وكالت ..
_هسه انتِ بالشهر الثالث يعني الطفل كبير وتعتبر مجازفة ولازم تسوين تحاليل كاملة وسونار وتجيبين زوجج وياج واعرف حالتج تستحق انزل الطفل لو لا يلة اسويها ، لأن انه استحرم وأخاف الله بهيج سوالف..
سمر : هسه التحاليل والسونار بسيطة نسويها بس زوجها شلون ييجي ، مسافر ..
_من يرجع تعالوا
سمر : يتأخر
_ابوه ، امه واحد منهم ييجي وياكم واشوف مستمسكاتكم وأوراق البنية وعقد الزواج وراها تاخذون عيوني ...
سمر : خالة انتِ داتصعبيها علينا
عاينت علينا ضيقت عيونها وكالت ...
_البنية غلطانة وي واحد وجايتني مو ؟
سمر : لالا استغفر الله خالة شنو هالحجي
_اذا لا أريد اشوف اهل زوجها يلة اسويلها العملية
سمر : خالة شكد ما تطلبين مستعدين ندفع بس سويها
_ مو عيب عليج ما تستحين شنو شايفتني مادة إيدي وأكدي منكم
سمر : لا العفو بس
قاطعتني وكامت وكفت وكالت
_ تفضلوا برا بلا مطرود
سمر : بس خالة
_ لا تبسبسين مو تغلطن وتجن تصححن غلطجن عندي ، هذا باب رزقي مو مكان لهيج سوالف وديها لأهلها يحيرون بيها ، ماعندي مكان لهلأشكال هاي ..
ردت احجي ريحانة كامت جرتني من إيدي وكالت
ريحانة : خلص سمر امشي مو مال ننهان أكثر من هيج ...
طلعنا من بيتها وطبكت الباب حيل
سمر : شبيها هاي
مشينا شوية وراها ريحانة كعدت بالكاع تبجي كومتها ما ترضى تكوم
سمر : كومي ريحانة كومي مو وكت بچي
ريحانة : عوفيني سمر وارجعي لبيتج
سمر : شلون اعوفج ما أكدر كومي وياي
ريحانة : عوفيني ما أريد ارجع كلت
سمر : اذا اعوفج وين تروحين ؟
ريحانة : بأي مكان عسى ما بجهنم
سمر : اذكري الله حبيبتي وإن شاءالله تنحل ماكو شي ماله حل
ريحانة : وشلون تنحل ؟ هذا آخر أمل جان عندي وراح تبخر
سمر : كلش كلش اذا انسدت وما لگينا حل نحجي ليوسف وهو يتصرف ..
ريحانة : كل شي ولا يوسف يعرف بداعة بنتج لا تحجيله ...
سمر : بس الصار مو بإيدج وما راح يلومج بالعكس راح يصدك بكلامج اللي حجيتيه قبل ويعرف انتِ تعالجتي وما تتخيلين ويمكن راح يلوم نفسه لأن ما صدكج
ريحانة : ما اريده يلوم نفسه ولا اريده يتأذى كد شعره وحدة ، مو المهم عندي يعرف تعالجت المهم ما يعرف بحملي ، ولج صعبة علية ما أتحمل اشوف نظراته الي والله اموت..
سمر : انتِ ليش خايفة نظرته تتغير عليج ؟ متأملة شي منه ؟
دنكت راسها وتبجي
سمر : تحبيه ؟
جاوبتني بقهر..
ريحانة : اموت عليه مو بس أحبه ، يوسف بالنسبة الية النفس اليصعد وينزل بصدري
ظليت صافنة شنو احاجيها بلة
سمر : ريحانة المهم هسه تنزلين الطفل ونخلص منه ومن ابوه وبالنسبة ليوسف .....وسكتت
رفعت عينها عاينتلي وكالت
ريحانة: راح تحجيله مو؟
سمر : شوفي اذا عرف بيج حامل او ما عرف النتيجة وحدة ما تتغير ، يوسف مو الج وما راح يتزوجج ، أعرف كلامي قاسي عليج بس أول وتالي راح تعرفين اذا مو مني من غيري
ريحانة : يستعِر مني مو ؟ حاسسني عار وما يريدني أشيل اسمه ؟ هو حجالج
سمر : لا مو هيج بس يوسف خطب وعرسه بعد يومين
ريحانة : شنو ؟ تحجين صدك ؟
سمر : للأسف اي صدك
ريحانة : ألمن خطب ؟
سمر : بنت عمي
ظلت ساكتة مصدومة وبس دموعها تنزل ، مديت إيدي كومتها ومشينا للبيت أول ما دخلنا من الباب الرئيسي تلاگينا وية يوسف عيونه اجت على ريحانة شافني شلون ساندتها وبالكوة تمشي ...
تلاقت نظراتهم ، هي تباوعله بعتب ولوم وهو يباوعلها بنظرة الفقدان الخسارة ، اثنينهن يقهرون ، وضعهم صعب ومن المستحيل بعد ينجمعون ..
وكف كبالها راد يحاجيها اشرتله يسكت ، باوعلي بنظرة معناها ليش ، ما حجيت وياه ، تركناه ومشينا رجعتها للبيت دخلت للغرفة وسدت الباب عليها ، فتحته وردت أدخل يمها كالت
ريحانة: عوفيني وحدي اريد ارتاح
سمر : شلون اعوفج ما أكدر
ريحانة : لا تخافين ماراح اسوي شي بنفسي ، حتى الموت فشلت بيه ..
سمر : تجين يمي بالبيت ؟
ريحانة : لا ما أريد كلتلج روحي
سمر : تريديني اروح لو ابقى بالبيت برا ؟
ريحانة : روحي لبيتج اريد اكعد وية نفسي شوية محتاجة مساحة افكر بيها وحدي
سديت الباب وطلعت ، صعدت فوك اتصل شهم ...
شهم : ها سمور شلونج يابه
سمر : الحمدلله رجعت بعدك ؟
شهم : لا بعدني شنو يعجبج اجيبلج وياي ، انه جبت حلويات والعاب لفطومة ..
سمر : لا هذا هو عاشت إيدك
شهم : محتاجة شي للبيت قبل لا ارجع
سمر : لا
شهم : رحتي للسوك ؟
سمر : رحت ورجعت ما لكيت شي مناسب
شهم : اذا تريدين باجر آخذج
سمر : لا هسه راح آخذ فطومة واروح باجر ما الحك
شهم : وحدكم ؟
سمر : البنات كلهم مشترين محد تقبل تجي وياي
شهم : فارس وينه خليه ياخذكم
سمر : استحي منه مو مال يفتر وياي بالسوك
شهم : زين شوفي أمي رحيمة تجي وياج
سمر : هسه اروحلها واشوف اذا تقبل تجي
شهم : واذا ما كدرت باجر اوديج
سمر : اوك
شهم : مامحتاجة شي ؟
سمر : سلامتك
سديته منه ولبست عباتي ورحت لأمي كلتلها أريد أروح للسوك ضحكت
رحيمة : يا ، بنيتج بطولج وتريديني آخذج للسوك
سمر : غير هذا شهم شسويله ما يقبل اروح وحدي
رحيمة : هو ياهو الراح يشوفج اشو جنج غراب اسود من فوك ليجوا حتى جفوف لبسج
سمر : يوم مالي خلك مشاكل ييجي يوم واقنعه يغير رأيه بلبسي هسه خالته براحته يتصرف ، يلة يمة كومي قبل لايرجع
رحيمة : يلة فد البس عباتي واجيج
كمت جبتلها عبايتها وجواريبها لبستهن وطلعنا نمشي ، عيوني تدور على قطعة مكتوب بيها قابلة ومعلكيها على بيوتهم . من فرغ لفرع نفتر ، التفتت أمي علية و كالت
رحيمة : ولج سمر عليش هيج طولتي الطريق علينا
سمر : يمة عجبني امشي مختنكة
رحيمة : ولج السوك صار ورانا والدنيا راح تغورب..
سمر : هسه يمة الله عليج اصبري شوية
من شارع لشارع نتفر الى إن لكيت قابلة غير اللي رحنالها وكفت كبال الباب والتفتت لأمي
سمر : يوم فدوة عطشت
رحيمة : اي من الفرارة حتى رجليناتي وكعت
سمر : يمة فدوة احس نفسي انكطع بس جيبيلي مي وآخذي فاطمة وياج
رحيمة : هاي آخر مرة أطلع بيها وياج موتيني
سمر : اي والله حقج تعبتج وياي
هزت إيديها وراحت ، ركضت للباب دكيته طلعت المرية سلمت عليها وسألتها عن القابلة كالت اني تفضلي
سمر : فدوة عندي أختي زوجها فد واحد كلش موخوش آدمي ونريد نطلكها منه ، وهسه هي زعلانة عندنا بس شنو خالة طلعت حامل بالشهر الثالث والثولة ما تدري بنفسها ، وخطية من طردها زوجها حتى مستمسكاتها آخذهن لا ملابس لا ذهب هيج اجتنا بطرك دشداشتها ، وما نكدر نوديها مستشفى كلت بلكت انتِ تساعدينا وتسويلها عملية هنا و تسقط الطفل وتخلص منه ، وشكد ما تأمرين إحنا حاضرين ..
_يا خطية اي ميخالف بس اسعاري غالية
سمر : من الربع للمليون مستعدين ندفع
_ يعني تدفعين مليون ؟
سمر : اي ادفع
_ لا مليون ونص
سمر : تمام ماعندي مشكلة
_ يلة خوش
سمر : شوكت اجيبها ؟
_ جيبيها عكب باجر
سمر : عكب باجر عندنا عرس ما يصير باجر ؟
_لا عندي ولادات ما أكدر ، وبعدين البنية شعليها بالعرس جيبيها وعوفيها يمي اسويلها العملية وارجعي عليها
سمر : لا ما أكدر اعوفها وحدها ، جبانة تخاف
_اي تعالي وياها وعوفي العرس
رحيمة : ها سمر شعندج هنا ؟
سمر : عفية خالة هاي أمي وماتدري كوليلها استعملت الحمام الخارجي مالتكم اذا سألت
سمر : ها يمة
رحيمة : شتسوين ؟
جاوبتها القابلة
_خطية احتاجت حمام وفتحتلها الباب وهسه واكفة تتشكرني
رحيمة : اي رحم الله والديج
سحبتني من إيدي ومشينا
رحيمة : هاج هذا بطل المي
سمر : ها ما أريد شربت ، هاي المرية جابتلي
رحيمة : عليش خليتيني اتعنى الطريق اذا شربتي منها
سمر : يمة لا تضوجين فدوة اروحلج
رحيمة : أذن المغرب مو مال نروح للسوك تفوتنا الصلاة امشي نرجع وباجر ياخذج رجالج ..
سمر : اي عادي نرجع
عاينت علية بشك ، امي ذكية ومتأكدة ما عبرت عليها سالفة الحمام ومنا انه سائلتها عن القابلة ، نمشي وتحجيلي عن الحلال والحرام وشلون الوحدة لازم تطيع زوجها وما تخالفه ولا تغدر بيه وتسوي شي بدون علمه ، اعرف قصدها علية عبالها انه حامل و رايده اسقط الطفل ...
ما صدكت رجعنا وانهزمت منها لبيتي دخلت بوجهي للحمام سبحت وصليت ومددت بغرفتي الى أن رجع شهم من الزيارة كمت سويت عشا تعشينا وباوعنا تلفزيون ونمنا ، الغريب من بعد ما رجعنا من السفرة ما تقرب مني ولا حاول مثل كل مرة استغربت وبنفس الوقت جنت مرتاحة لهذا الشي ..
ثاني يوم رحت لريحانة وحجيتلها عن هاي القابلة والصار بينا بالتفصيل ، شهكت ولطمت صدرها
ريحانة : تاخذ مليون ونص شدعوة شنو شداتسوي ؟
سمر : هاي بعد شتسوين
ريحانة : ومنين اجيب ؟
سمر : انه عندي جم فلس ضامتهن جوا إيدي
ريحانة : وتصرفيهن علية لا ما أقبل
سمر : ولج انه مجمعتهن لأن لا اطب ولا اطلع شهم ينطيني المصرف بإيد واضمه بالكنتور بالإيد الثانية شسوي بيهن ، هسه عوفج من الفلوس المهم حضري نفسج عكب باجر العملية ..
ريحانة : عكب باجر عرس يوسف
حجتها وغصت ...
سمر : هذا انسب يوم ، يكون الكل ملتهي ، حتى اذا تأخرنا محد يلاحظ
