رواية جثة ضياء الفصل الأول بقلم محمود الأمين
الموضوع بيبدأ بأغرب بلاغ جه في تاريخ البلاغات اللي اتقدمت قبل كده على مدار سنين.. عيلة اسمها عيلة دياب بيروح منهم مجموعة على قسم الشرطة يعملوا بلاغ، والكلام اللي بيتقال في البلاغ ده مستحيل حد يصدقه.. واللي اتكلم مع الظابط واحد اسمه إسلام، وقال إن مرات عمه اتوفت، وزي ما بيحصل في أي وفاة، الجث. ة اتغسلت واتكفنت، وطلع تصريح الدفن، واتحركوا رجالة العيلة عشان يدفنوا الجث. ة، وأول ما بيفتحوا القبر بيتفاجئوا جوه بمنظر صعب.. جث. ة ضياء ابن عمه على الأرض من غير كفن، ومضروبة بسك. ينة في كذا مكان، والدم مغرق الأرض.. الغريبة إن ضياء ابن عمه ده المفروض إنه متوفي من أسبوع، وإنه كان مصاب بفشل كلوي، والفترة الأخيرة كان بيعاني من المرض وتوفى.. فمين الشخص المجنون اللي دخل قتل شخص ميت؟! ومن هنا بتتحرك رجال الشرطة على القبر عشان يوصلوا ويشوفوا أغرب حاجة ممكن حد يشوفها.
....
#جثة_ضياء
#الجزء_الأول
أنا المقدم كرم السيوفي، رئيس مباحث في واحدة من محافظات الصعيد، والنهارده وصل أغرب بلاغ.. ناس جاية تبلغ عن واحد اتوفى من أسبوع واتدفن، إن جث. ته موجودة في القبر من غير كفن، وكمان في طع. نات في جسمه بسك. ينة، والمفروض إن الشخص اللي مات وادفن ده كان عنده فشل كلوي، وكان بيعاني الفترة الأخيرة.
والشخص ده اسمه ضياء سالم دياب، وعيلة دياب هي عيلة مشهورة عندنا في الصعيد، والحج دياب الله يرحمه اتوفى من ست شهور، واللي عرفناه إنه قسم الورث على ولاده وأحفاده قسمة العدل، والكل كان مرضي ومرتاح، ولكن الله أعلم بالخبايا.. لما اتحركنا ووصلنا للقبر، لقينا فعلًا نفس الوصف اللي وصفه الشخص اللي بلغ، واللي اسمه إسلام.. جث. ة ضياء كانت من غير كفن، وفي طع. نات بسك. ينة في جسمه، ولكن الغريبة إن في دم كتير على الأرض.. وليه بقول غريبة؟ ده اللي هنعرفه من دكتور الطب الشرعي، واللي هيأكد المعلومة اللي عندي.
في الوقت ده لقينا واحد جاي يجري من بعيد، والظاهر عليه إنه التربي اللي ماسك المقابر دي، ولما عرف اللي حصل اتكلم وقال:
_ يعني اللي شوفته مكنش تهيؤات؟!
= أنت اسمك إيه وبتشتغل إيه، وإيه اللي أنت شوفته؟
_ أنا اسمي عطا يا باشا، التربي اللي ماسك المقابر، واللي شوفته إني كنت معدي من يومين قدام القبر ده، وشوفت الباب بيتهز، وفي حد بيخبط وبيقول: افتحوا الباب.. بصراحة يا باشا اترعبت، أنا واحد ياما شاف من العيشة وسط الجث. ث، وكنت هبقى مجنون لو فتحت القبر، وده اللي خلاني جريت على الأوضة، وحلفت إني مش هقرب من القبر ده تاني.
= يعني بدل ما تفتح القبر وتنقذ الراجل، تخاف وتجري وتقول إنك ياما اتعاملت مع الجث. ث.. أنت عارف إنك كان ممكن تنقذ واحد اتشخص إنه مات وهو لسه عايش، والله أعلم مين اللي عمل فيه كده؟!
_ يا باشا غصب عني، ده واحد مات واتدفن، وتشخيص الدكتور بيقول إنه مات، هو أنا يعني هفهم أكتر من الدكتور؟ وبعدين ده البلد كلها عارفة إن ضياء ده عنده فشل كلوي، والعياذ بالله، وآخر فترة كان تعبان وراقد في السرير.
= طيب بس اسكت كفاية كلام، ووسع كده عشان رجالة الطب الشرعي والمعمل الجنائي وصلوا.
...
دخل فريق من الطب الشرعي والمعمل الجنائي للقبر، وبدأ فحص جث. ة ضياء ومحاولة رفع بصمات إن وجدت، ولكن بعد شوية خرج الدكتور عشان يأكد على وجهة نظري.
_ كرم باشا، استحالة الراجل ده يكون ميت من أسبوع.. الراجل ده اتدفن وهو صاحي، وممكن يكون الدكتور اللي كشف عليه شخصه غلط، وبتحصل على فكرة كتير.. وطبعا إحنا هناخد الجث. ة عشان يتم توقيع الكشف عليها وتشريحها بشكل كامل، ولكن أنا ليه بقول إن الشخص ده مستحيل يكون ميت من أسبوع؟ عشان الشخص لما بيموت، الدورة الدموية بتتوقف، ولو اتجرح بسك. ينة أو بآلة حادة، الدم مش بيخرج بره الجسم بالشكل ده، وده معناه حاجة واحدة.. إن الراجل ده كان عايش وقت ما اتقت. ل، وجايز المرة الأولى مكنتش وفاة طبيعية.. جايز تكون محاولة قت. ل وفشلت.
= أنا لاحظت ده فعلًا أول ما دخلت القبر، وعموما هننتظر من حضرتك تقرير الطب الشرعي في أقرب وقت.
_ إن شاء الله يا باشا هيكون عندكم في أقرب وقت.
....
اتنقلت الجث. ة للمشرحة، وكان في كذا بصمة موجودين جوه القبر، ولحد ما نعرف مين أصحابهم، هنبدأ نعمل تحرياتنا عن المجني عليه، ونعرف مين الأشخاص اللي كان ما بينهم وبينه عداوات ممكن توصلهم لارتكاب الجري. مة بالشكل ده..
ورجعت على المكتب، وكان معايا الرائد علاء، وبدأنا نعمل تحرياتنا عن المجني عليه ضياء سالم دياب، ومن ناحية تانية عرفنا من عيلة ضياء إن اللي شخص حالته دكتور في مستوصف، واسمه حمدي عبد السلام.. وطلبت إنه يتم استدعاؤه عشان يتحقق معاه ونعرف منه هو إزاي شخص حالة ضياء على إنه توفى.. ولكن المفاجأة إن الدكتور حمدي ده اختفى من المستوصف بعد تشخيصه للحالة دي، ومفيش حد عارف مكانه فين؟! ومن الواضح كده إنه ساب البلد خالص، ولكن كده كده هنوصله.
بعد 24 ساعة وصلت التحريات، وفتحتها عشان أعرف إيه اللي جواها.
: ضياء سالم دياب عنده 35 سنة، اتجوز من 3 سنين، ومراته اسمها نرمين، والده ووالدته متوفيين من زمان، ومعندهوش عيال، ومن سنة اتصاب بفشل كلوي أثر على صحته وصرف عليها كتير.
التحريات بتثبت إن ضياء يبقى ابن الزوجة التانية لسالم، ودي النقطة اللي كانت مخلياه مش محبوب وسط العيلة، عشان والدته كانت إنسانة طبعها صعب، وضياء برضو كان مش بيحب العيلة ودايمًا بيفضل يبعد عنهم، ولكن لما اتوزع الورث، اتفاجئوا إن ضياء ليه نصيب، ونصيب كبير كمان، وده اللي زود الحقد والغيرة ما بينهم، رغم إنهم واخدين زيه، ولكن هما كانوا شايفين إن ضياء مش من حقه يورث.
وكمان التحريات بتقول إن نرمين كانت رافضة الجواز من ضياء، وقالت إنها مش عاوزاه كتير، ولكن أهلها أجبروها إنها تتجوزه، وطول فترة جوازهم كانت بتحصل مشاكل كتير.
أما عن أقرب واحد لضياء، فهما اتنين: منصور وسليم.. دول كانوا أقرب أصحاب لضياء، وأكتر ناس كانت منهارة عليه لما مات، أو كانوا فاكرينه مات في المرة الأولى.
ولكن كان في حاجة مذكورة في نهاية التحريات، والحاجة دي كانت غريبة شوية، ولفت نظري الاسم اللي مكتوب.. الحاجة دي إنه طلع كلام الفترة الأخيرة في البلد إن ضياء على علاقة ببنت، وإنه بيخون مراته، ومش بس كده.. ده البنت حامل من ضياء، ولكن الحدوته دي اتكذبت وقتها.. المصيبة مش هنا، المصيبة إن البنت دي اسمها رانيا عطا نصر.. بنت التربي بتاع المقابر.. معقول الصدفة دي؟!
...
قفلت ملف التحريات واتبعث للنيابة، وبعد ساعات بيظهر تقرير الطب الشرعي، واللي كان فيه مفاجأة مستنيانا.. وهي إن كلام دكتور الطب الشرعي كان صح.. ضياء لما اتشخص إنه مات في المرة الأولى، كانت كل الإشارات اللي في جسمه بتدل على كده، ولكن ده بسبب إنه كان واخد جرعة زيادة من علاج الفشل الكلوي، وده اللي دخل الجسم في غيبوبة، فسرها دكتور المستوصف على إنها حالة وفاة.
وده معناه إننا مش قدام قات. ل واحد.. في واحد الأول حب يخلص عليه بموضوع العلاج، جرعة زيادة من علاج الفشل الكلوي، وبعدها تشخيص حالة غلط، وادفن ضياء وهو صاحي، ولكن لما فاق وهو في القبر وحاول إنه يخرج، في حد خلص عليه بالسك. ينة، والوحيد اللي شافه وهو بيحاول يفتح القبر كان التربي.. التحريات أثبتت إن بنته كانت على علاقة بضياء، يعني بنسبة كبيرة التربي هو اللي خلص على ضياء بالسك. ينة.
وزي ما كنت متوقع، النيابة بعد ما اطلعت على التحريات طلعت قرار بضبط وإحضار عطا التربي للتحقيق معاه، واتحركت أنا ومعايا قوة من القسم على المقابر عشان نقبض على عطا نصر التربي..
وأول ما دخلنا الأوضة عنده اتفزع وكان بيسأل: هو في إيه؟!
فرديت عليه وقلتله:
_ أنت متهم بق. تل ضياء سالم دياب، التحريات أثبتت إنه كان على علاقة ببنتك.
= حاسب على كلامك يا باشا، أنا بنتي أشرف من الشرف، ولا يمكن تعمل الكلام ده.
_ طيب والناس اللي شافتها كذا مرة مع ضياء دول إيه؟ كدابين ولا بيتبلوا عليها؟!
= أيوه كدابين.. أنا بنتي في البلد ومش معايا هنا أصلًا، وبعد إذنك يا باشا لو حضرتك عاوز تاخدني وتحقق معايا، اتفضل، وأنا واثق من نفسي إني معملتش أي حاجة.
_ هنشوف دلوقتي بعد التفتيش.
....
كنت فاكر إني هلاقيه مخبي سلاح الجري. مة هنا أو هنا، لكن في الوقت ده حد من العساكر قال إن البلاط ده متغير قريب، وده اللي خلاني أبص لعطا وأبتسم.. واضح إنه دافن سلاح الجري. مة تحت البلاط، وعشان كده طلبت من العساكر تحفر عشان نوصل لسلاح الجري. مة، ولكن اتصدمت أكبر صدمة، عشان اللي تحت البلاط مكنش سلاح الجري. مة.. دي جث. ة!
