رواية حين تتغير الاقدار الفصل العاشر بقلم سناء الهموندي
الله كريم نكول بس هذا روتين☹️
صح نمشي فوك الكاع بس احنه ميتين
ونحن الذين تقوم القيامة بداخلنا وملامحنا لا يظهر عليها سوى الإتزان .. سلامٌ لنا حتى يفنى السلام.
ملكه: خايبه فضه فضه لحكي هذا مزهر ابن عمج يكول وين عمي حازم كتله ماهو راح لبغداد .
فضه : اي وماكالج شنهو الصاير .
ملكه : بتلعثم اااا شو يكول جديتي ماتت .
فضه : يبوووووو صحت بصوت وبجي وملكه تحاول تهديني وانا كعدت انوحن عبن جديتي جانت تحبنه لبست عباتي ورحنه أنا وملكه لكينه عماتي حاركات البيت بلصياح أنا طبيت كابلتهن و ملخت روحي وياهن طبيت لحجرت جده لكيتهم مغطينهه ويقرون عليهه القرآن كعدت يم راسهه بجيت اجت ملكه كعدت يمي وتبجي متعرف احد هنا مجايه غير مره وحده من جوي صادق وفرقد رحت يم نسوان عمامي متحزمات ويطبخن سالت خيريه مرت عمي.. خيريه جده شمالهه احنه مو قبل يومين عدهه كلشي مابيهه.
خيريه : طاحت ورقتهه بعد طلابه مره جبيره ومريضه كعدنه الصبح لكيناهه لا ايد ولا رجل .
فضه : بكلبي كلت هوه انتن مصدكن تخلصن منهه كتلهه يعني من اليل ميته وانتم ماتعرفين.
خيريه : الله اعلم من اليل الصبح العلم عد الله وشنهي احنه حراس وتردينه نسهر نحرسهه.
فضه : هزيت راسي بأسف ودرت وجهي راده للهول وشافني عمي عدنان.
عدنان : ولج ابوج وين فضه .
فضه : ابوي راح لبغداد عده شغل طلع الفجريه.
عدنان : هسه وكته جا ماكدر ياجل شغله .
فضه : عافني عمي عدنان وراح ماكتلهم على سالفت امي عبن محد يدري ..للغروب عمامي خذوا جده يدفنوهه مانتضروا ابوي عبن طريق بعيد ويكولون إكرام الميت دفنه ...
جوريه :. محمد شغله صار من الفجر لليل وانا اكضي وكتي بلبيت نوبات اروحن اجيبن ماي من النهر أنا وام علي وبناتهه ثنين صغار اليوم محمد جابلي زوري عبن مشتهيته كاعده انضف بي وندك الباب كمت صحت ياهو .
ام علي : أنا خيه جوري.
جوريه : فتحت الباب هلا بلغاليه تفضلي ام علي .
ام علي : بيج أكثر يبعد كلبي فتت للحوش شنهي اليوم مسويه زوري .
جوريه : اي شو شتهيته .
ام علي : اي خيه عبنج تتنسين كلشي يعجبج.
جوريه : اليوم تبقين وتتغدين وياي عبن محمد مايرد للغده .
ام علي: عذريني ماكدر والله عبن ما كايله لابو علي .
جوريه : أنا اريدن اسالنج سوال .
ام علي : كولي يجوري انتي خيتي .
جوريه : أنا اريدن اكلج سمعت علي مو ابنج هلحجي صدك .
ام علي : بابتسامه اي صح علي ابن ضرتي المرحومه عبن أنا تزوجت ابو علي وعلي عمره سنه وام علي ميته بلولاده .
جوريه : بحزن يااااا خيه يعني علي يتيم الأم وانتي مربيته .
ام علي : أنا أمه يجوري عبن الام التربي مو التخلف وعلي معزته بمعزت بنتي زمن .
جوريه : ونعم منج والله يبارك بيج عبنج مراعيه هليتيم وحاطه الله بين عيونج بي تصدكين أنا من سمعت ماصدكت عبن اشوفن شون تخافين عليه ومداريته.
ام علي : جا شون أنا اخاف من الله وعلي ابني أنا تعبت بي وربيته من تزوجت ابو علي جبت زمن وهاي زمن عمرهه ثلاث سنوات وعلي اكبر منهه بثلاث سنوات وانا عندي يسون الدنيه ومابيهه.
جورية : والله ام علي انتي يوم عن يوم تكبرين بعيني أكثر .
ام علي : بس مو بطيبت كلبج يجوريه ياله أنا اترخص اردن للبيت.
جوريه : دضلي عدي تغدي شمالج مستعجله .
ام علي : لاله هم ياله .
جوريه : راحت ام علي وانا نضفت السمج بس مالي واهس اكل وحدي يوميه محمد يرد بس على كد الغده اليوم كال ماجي عدنه شغل كمت غسلت وكعدت اصلي وخذيتلي غفه شويه وكعدت كضه الوقت إذن المغرب كمت اصلي وكفت على فراش الصلاة بعدني باول ايه وطب محمد باوعلي وراح كعد انا هم كملت صلاة وكتله الله يساعدك .
محمد : الله يساعدج يبوج شنهي اليوم ماضايج خلكج اوديج بيت عمج بيت جدج.
جوريه : بستغراب لاله شعدي رايحه شنهي صاير شي.
محمد : جوريه انتي مو تكولين أنا اامن بقضاء الله وقدره.
جوريه : بخوف اااي اي أأمن بس شصاير بروح ابوك.
محمد : جديتج انطتج عمرهه .
جوريه : لطمت على صدري يمه حبيبه عمت عيني عليج جده وانا اكولن شمالهه اخر مره من رحت اشوفنهه كلساع تكلي حالليني انتي واخيتج .
محمد : الله يرحمهه لبسي عباتج ومشينه اخذنج عبنهه من الصبح متوفيه وانا هساع بالصدفه عرفت .
جوريه : رحت لبيت جدي لكيته مكلوب كلب فتت جوه لاكيت مهدي اخوي عبالك وكف بيه الزمن شكله متغير وكبران من شافني هوه هم صفن بوجهي حتى ستحيت اسلم عليه حسيته شخص غريب عليه صار أكثر من سنتين ما شايفته ... باوعلي وبتسم .
مهدي : جوري هاي انتي يبعد اخوج شونج شون احوالج .
جوريه : تقدم باسني براسي وضل يسلم ويسأل عن أحوالي وانا ساكته كتفيت بكلمه واحده الحمدلله زينه ودنجت وفتت جوه عزيت عماتي وبجيت وياهن واذكر حجي محمد بلطريق يوصيني بروحي ويحلفني اديرن بال على نفسي شافتني فضه اشرتلي من بعيد كاعده شنك ومكابلتهه وحده تعاونهه بس غريبه شكلهه رحت يمهه سلمت عليهه البنيه اليمهه هم سلمت عليهه بس معرفتهه كعدت يم فضه وهمست ماعرفتهه مني هاي المره .
فضه : مرت ابوي مادريتي .
جوريه : فكيت عيني وكتلهه جا عمي شوكت أخذ أنا مو قبل جم يوم عدكم .
فضه : امي مو حجتلج السالفه ابوي مايكدر يرد الهديه تعرفين انتي فجابهه واجه والبت تنام عدي من يوم الجت لينه .
جوريه : جا وعمتي شكالت .
فضه : لتفتت يمنه ويسره وهمستلهه امي راحت لبغداد وماضنهه ترد عبن هيه قبل ما تروح كالت أنا ماتحمل ابوج يجيب وحده عليه وانتي كله يومين وترحين بيت رجلج كالت رايحه يم اخوج .
جوريه : خطيه عمتي يعني هسه هيه عد ضويه .
فضه : مادري خيه وداعتج كل الاعرفه بغداد اجه صادق وفرقد على ابوي يحاجوا بس لا همه ولا ابوي يكدرون يسوون شي اخذوا ابوي وياهم وراحو بلكي يردون امي ولو انا متاكده امي ماترد عبن كلمتهه ماتثني امي واعرفنهه.
جوريه : انشالله ترد .
ضويه : عمي حازم ضل يقنع بعمتي وهيه راكبه راسهه اخر شي كالت .
ام صادق : بصياح أنا كلت مارد وانتهت السالفه وحتى وإن رديت البت الهدوهه لك هم ماردن وروح ابوي .
ابو صادق : الضاهر انا ماضلي معزه يمج ولا ضلي خاطر ونسيتي كلشي جمعنه .
ام صادق : أنا مو قليلت اصل حتى انكر كلشي جمعنه واضلن احترمك لآخر نفس عبنك ابو اولادي بس انا ماردن وهاي حجايتي الاخيره .
ابو صادق : بنفاذ صبر هاي هيه براحتج بس بيتج موجود شوكت ماتحبين تردين ياله بويه أنا اردن هم ياله ضلمت عليه .
صادق : يأبه فدوه اروحلك اكعد وتفاهمو بعدين على كيفك .
فرقد : بويه يرحم جدي اكعد وين رايح بهليل .
ابو صادق : لاله اروحن عبن أنا مامبلغ عمامك بجيتي ماردت احد يعرف واخيتك ضاله وحيدهه .
صادق : يأبه عاد ضل للفجر وطلع .
فرقد : باوعت لمي وكتله امشي بأت عدي والفجر أنا اجي وياك .
ابو صادق : خوش جا امشينه .
فرقد : طلع ابوي وانا رحت بست راس امي وكتلهه يمه عندج بيتين وين متحبين تكعدين البيبان مفتوحتلج .
ام صادق : بحسره ودموع الله يخليكم ليه .
ضويه : راح عمي وفرقد وصادق راح يوصلهم رجع متاخر مرت عمي فاتت للحجره ما طلعت طبيت اطمن عليها لكيتهه تقره قران طلعت نومت الجهال واجه صادق .
صادق : والله يا ضويه كلبي لاجمني على امي .
ضويه : اي خطيه شبيدنه عليهه .
صادق : بس لا تنسين ابوي هم انجبر وانتي تعرفين عاداتنا
ضويه : الله كريم الله يجمعهم .
صادق امين اكلج ام انور .
ضويه : كول ابو انور محتاج شي .
صادق: لاله بس كلت اذا صارت بيه نفس ابوي ونجبرت أخذ عليج ذاك الوكت شسوين.
ضويه : مادري بس ماتحمل .
صادق : هم تعوفيني مثل مسوت امي .
ضويه : يمكن اكثر ههههه .
صادق : اخخخ اخ وانا اكولن فقيره .
ضويه : مر يوم وصادق بشغله رد العصر عمتي سألته على فرقد شو ما اجه اليوم جاوبهه .
صادق : راح يوصل ابوي للسلف وكال عدي شغل هناك .
ام صادق : ها خوش مو اكولن مو من عوايده مايمر .
ضويه : وره يومين من روحت عمي اجه فرقد علينه وكال .
فرقد : صادق انت لازم تجي للسلف انت وامي وحتى ضويه .
صادق :خير شصاير ابوي بي شي
فرقد : جديتي انطتكم عمرهه من رحت ويه ابوي عرفت بلخبر.
صادق : لا بربك شوكت هلحجي .
فرقد : اليوم الثالث عمامي ماخذيهه ودافنيهه .
صادق : لا حول ولا قوه الا بالله .. ضويه حضري روحج وانا رايح أبلغ امي .
فرقد : جا هيه وينهه امي .
صادق : كالت اروحن شويه بيت جدك .
فرقد : خوالي عرفوا بسالفه امي وابوي .
صادق : اي عرفوا وحاجوهه وكلولهه لا اول ولا اخر واحد يتزوج بس امي راكبه راسهه ...ياله ضويه حضري الجهال أنا رايح.
فرقد : اوكف جاي وياك .
صادق : رحنه خبرت امي وجان جوابهه صادم.
ام صادق : الله يرحمهه روحوا عزو عمامكم واكفو ويه ابوكم لا تعوفونه .
فرقد : بستغراب يمه جا وانتي ماترحين .
ام صادق : لاله شعدي رايحه أنا هنا اصليلهه الوحشه واهديلهه.
صادق : حاولنه نقنع امي بس تحضر الفاتحه بس هيه معنده تالي رحنه أنا وفرقد وأخذت ضويه والجهال .
ضويه : بعد عناء درب طويل وصلنه لسلفنه اول مرحنه بيت عمي فتت جوه وأشوفن مره غريبه سلمت عليهه مبين شكلهه اكبر من صادق سالتهه على عمي فضه
وينهم .
ملكه : راحو لبيت جدهم فضه كالت ما تأخر نص ساعه وتجي .
ضويه : هزيت راسي وفتت لحجرت فضه خليت الجهال ردت انيمهم ماقبلوا صادق وفرقد راحو لبيت جدي جتي البنيه كعدت كبالي وبتسمتلي شكلهه حلوه سمره عيون كبار سود طوخ لابسه شيله متربعه على دورت وجهه داكه بحنجهه نجمه صراحه شكلهه حلو يجذب كعدت تسولف على الفاتحه وانا بس اهزن براسي وابجي ويه حجينه جتي فضه شافتنه فرحت كمت سلمت عليهه .
فضه : توهه نورت الديره بطبتكم شفت صادق وماصدكت جيت ركض .
ضويه : يا بعد كلبي .. كامت البنيه وانا نهديت بفضه خايبه لا تكولين هاي مرت عمي .
فضه : اي هيه خيه عوفج منهه وكليلي امي وينهه ماجت وياج .
ضويه : لا والله عمتي مارضت تجي .
فضه : اي أنا كلت امي هسه بعد لو ابوي بنفسه يموت ماتجي .
ضويه : خليهه ترتاح بلكي تغير رايهه .
فضه : لاله مستحيل امي فقلت بعد كومي نروح لبيت جدي عماتي كلهن ملتمات امشي عزيهن .
ضويه : اي كايمه اله ماكلتيلي شونهه مرت ابوج مبينه فقيره .
فضه : اي هاديه الله يستر عليهه يوميه تجي وياي للفاتحه بس البارحه نسوان عمامي ضلن يذبن سمهن علبت كتلهه ضلي اليوم أنا اروحي ساعه نص ساعه واجي .
ضويه : رحت بيت جدي عزيت عمامي وعماتي وضليت لليل فضه العصر ردت اليوم خامس يوم والهوسه ماتفك ناس رايحه ناس راده لليل صادق صاحني ورديت للبيت لكيت فضه محضره عشه وعمي جاي رحت عزيته شكله متاثر بوافت جديتي تعشينه وغسلت الجهال ونيمتهم رحت بحجره فضه جتي مرت عمي فرشت وكعدت على فراشهه باوعت لفضه بمعنى شنو السالفة عاد جاوبتني فضه .
فضه : ملكه من يوم الجت تنام وياي بلحجره بطلب من ابوي .
ضويه : هزيت راسي وكلت اغير الموضوع عيب من البت صدك فضه جوريه ماشفتهه جتي الفاتحه جده لا .
فضه : جا شون جتي ثلاث ايام هيه تجي وتروح هيه وزوجهه .
ضويه : بعد كلبي شونهه بطنهه مبينه .
فضه : بابتسامه حليانه وبطنهه كبرانه صايره جنهه بطه سالتهه شكد عليهه كالت راح اكمل الخامس .
ضويه : خاف اكل لصادق يأخذني ليهه هسه ومايقبل .
فضه : خيه ستري على روحج الزلمه تعبان لا يكضج ويخبزج بتنور الطين يصبح الصبح وروحيلهه.
ضويه : انشالله نمنه وكعدنه الصبح صادق أخذ انور ويا ازهر بقه عدي كتله على جوريه كال ساعه وارد اخذنج ...فضه ليش ماتجين وياي .
فضه : لا خيه ابوي مايرضه روحي انتي أنا اروحن لبيت جدي فد ساعه تجين وياي .
ضويه : اي خلني اجي وياج شنهي ملكه ماتجي .
ملكه : عذريني ام انور ماكدر اجي روحو انتم .
فضه : أخذي راحتج احنه ساعه هيج ونجي رحنه بيت جدي كلش قريب علينه نفس الشارع نمشي أنا وضويه وفات مهدي ومزهر ابن عمي راسن دنجت عبن مهدي نضراته ماحبنهه عبرناهم مسافه ومهدي صاح ام انور ضويه ملتهيه بازهر يريد يركض بلبستان وهيه تجرجر بي فمركزت من صاحهه باوعتله متفاجاءه .
ضويه : لتفتت على الصوت وأشوفن مهدي سبحان الله شكد يشبه ابوي بس ربع حنيه ابوي ماعنده تقدم عليه وسلم بلهفه جوبته برود حسيته شخص عادي وماعرفنه صار سنين وهوه ماسال علينه حتى حسيون ابن صبيريه مرت ابوي احن منه من اجي من بغداد يجي يتلكاني بلهفه وكل فتره يروح يسأل عن جورية سلمت عادي ومشيت هوه تفاجأ بحركتي فضه تحجي .
فضه : ولج عيب ولج اخوج مايصير .
ضويه : سكتي فضه هذا مو اخوي مشينه بيت جدي سلمت وساعدتهم يحضرون لباجر السبعه مال جده اجه مزهر كال صادق يكول خل تجي هيه وفضه رجعنه للبيت تلكاني صادق .
صادق : ماعرفتج هيج قاسيه انتي ام كلب الطيب .
ضويه : بتفاجاء ليش شصاير .
صادق :مو عيب من اخوج يجي يعاتبني يكلي اسلم عليهه تخلي وتمشي ولا جني مو جود .
ضويه : أنا ماعندي اخو الاخ مايعوف خواته وما يسال الاخ مو بلحجي الاخ أفعال وانا اخوي بس بلاسم كلشي ماشايفه منه بعدين هوه شعجب جاي عاد هوه مايبين لا بخير ولا بشر.
صادق : صاير خلاف ويه نسابته وزوجته وعايفهم وراد صارله سبوعين .
ضويه : اي مو هل اكولن هوه بس بلمصالح .
صادق: هههه ياله امشي اخذنج تشوفين اخيتج ياام كلب الحجر .
ضويه : اخذت الجهال ورحنه لبيت جوريه ...تدري صادق همزين جوريه ردت لبيتههه خل ترتاح من المشاكل .
صادق : بس بعيد بطرف البستان وهيه وحيدهه .
ضويه : لا تخاف جوري سبعه ومينخاف عليهه .
صادق : جا مادري اذا انتي اخيتهه شون متصير سبعه .
ضويه : ولصلنه دكينه الباب ماكو بلبرع ساعه واكفين صادق مل كال خل نرد وباجر نجي .
ضويه : اوكف شويه بلكي رايحه مكان صدك بعدني احجي واشوفنهه من بعيد شايله حطب وياهه مره بلعشرينات تمشي وياهه ويسوالفن هيه لمحتنه جتي بلهفه طايره حتى نست المره شمرت الحطب وحضنتني وتسالمنه صادق سلم عليهه وراح جتي المره
ام علي : يا هلا بام انور .
ضويه : تفاجات المره منين تعرفني .
ام علي : لتتفاجاين كد ما حاجيتلي بيج جوريه حفضت كلشي بيج .
جوريه : يمه هلا بنوير وزهير شونكم ولكم كبرانين ماشالله فوتو جوه ليش واكفين تعالي ام علي اعرفج على ضويه طبينه جوه انور وازهر شافوا دجاجاتي كيفو عليهن ركضو وراهن رحت جبت ماي .
ضويه : شونج يروح اخيتج .
جوريه : من شفتج صرت بخير .
ضويه : دومج يارب ..ولك نوير عوف الفرخات وتعال .
جوريه : خلهم خيه فرحانين بيهن هاي محمد البارحه جابهن بعدهن فروجات.
إم علي : شونج ام انور .
ضويه : الله يسلمج بخير جوريه دوم تحجيلي عنج والله انج مره طيبه وخيره .
ام علي : جوريه اخيتي الماجبتهه امي .
جوريه : عفتهن يحجن ورحت احضر غده اجتي ام علي كالت .
ام علي : أنا رايحه لا تحسبين احسابي .
جوريه : دضلي ام علي ويانه على الوهس .
ام علي : غير مره انشالله ياله مع السلامه .
ضويه : الله وياج حبيبه .. جوريه شسوين .
جوريه : راح اسويلج طابك .
ضويه : لا خيه بروح امي عوفي الطابك خل نشوي طماطه وبيتنجان تدرين بيه احبهن .
جوريه : صفنت رجعت اليوم وفات امي وانا كاعده اكل بلطماطه والبيتنجان الشوي بتسمت لضويه وكتلهه من عيوني اسويلج ونقره الفاتحه لامي وأبوي ..
ضويه : ضليت للعصر يم جوريه وراهه اجه صادق ورديت خلصت السبعه مال جده وعمي يترجه بعيونه عسا ولعل نقنع عمتي ترجع وكال للولد.
ابو صادق: امكم ماغيرت رايهه .
فرقد : بويه امي قافله حتى للفاتحه مارضت تجي .
ضويه : عمي دنج بنكسار وراح لحجرته أنا لميت غراضنه عبن الفجر نطلع لبغداد .
جوريه : مرت الايام والأشهر محمد مستمر بشغله ويه ابو علي وانا وام علي صرنه كلش قريبات وحده على الثانيه طبيت بشهري واحسن بنفسي ثكيله ..كاعده احوشن بلخضره الطلعت بلحديقه ودجاجاتي وراي كبرن جانن كتاكيت اجه محمد وكت غده .
محمد : الله يساعدج بطه .
جوريه : ساعدك الله شنهي هاي بيدك ..
هاي شليف تمر طانيا ابو علي حك من التعب كلت يفيدج تسوينه دبس مدكوكه اعرفنج تحبين المدكوكه .
جوريه : عاشت ايديناتك .
محمد : اصلي ونتغده .
جوريه : جاهز الغده بين متخلص أصبن شلت الخضره غسلتهه وحضرت الغده واحسن سجاجين بضهري كلت يجوز مال تعب كوه صبيت وخلصنه غده غسلت الماعين محمد : شبيج بعد هلي شكلج معاجبني اليوم.
جوريه : بابتسامه لا مابيه وجع مثل كل يوم .
محمد : يعني اخذلي غفه ساعه واروحن لشغلي .
جوريه : نام نوم الهنه أنا مابيه جني العافيه ...نام محمد وانا الوجع يزيد ويقوه واستحي اكعدنه واكله طلعت بلحوش كعدت أعصر بطني وابجي .
محمد : كعدت ادور على جوري طلعت واشوفنهه تتلوه لو تخبلت ولج شصايرلج جوري.
جوريه : بصوت عالي الحكلي يمحمدددددددد.
صلو على محمد وال محمد
شكرا لزيارتكم عالم روايات سكيرهوم
