رواية صرخة مؤجلة الفصل العاشر بقلم ود الزهراء
الشمس طلعت علينة و مو وكت نوم
هم عدكم صبح يهل المگابر؟
••••••••••••••••••••••••
سَدف
خفق گلبي ضليت اتلفت حوالية اريد أثر الهم ما لگيت هستوهم چانووا يميي وين راحووا، ضليت امشي و اصيح عليهم مثل المخبلة و اكض بالجهال اللي وي امهاتهم و اشوف وجوههم و امشي و اتسئل بالناس عليهم اوصفلهم ملابسهم و اشكالهم بس محد چان يعرفهم ضليت فترة طويلة ادور عليهم گعدت بالگاع و ضليت ابچي و اصرخ متهسترة وين الگاهم بين هاي الناس كلها
التمن عليَّ النسوان و اليشتغلون بالعتبة يحاولون يهدأوني بس انا عقل ما ضل براسي ضليت الطم
سَدف:: يمةةة يمةة وين الگاهمم يمة
- ماما گولي يا اللّٰه هسه تلگينهم وين يروحون
بس حچت حچايتها دگ تليفونها جاوبت
- هاا ماما
سكتت شوي تسمع للمتصل
- وين انتَ يمكنن جهال هاي البنية
فزيت و وگفت على حيلي حاچتني المرة
- ولد و بنية مو؟
سَدف:: اي ايي
-باللّٰه تعاي وياي شوفيهم
مشيت وياها و هيَّ الموبايل على أذانها و ادعي بگلبي يطلعون صدگ هُمَ و نخيت الامام الكاظم و انا بديرتة و لساني يلهج بالدعاء لـ حد ما المرة وگفت بمكان و تحچي وي ابنها گلتله انا بفلان مكان منتظرينك و سدت الاتصال
سَدف:: خالة خلي يحاچوني بالاتصال حتى اعرف هُمَ لو غيرهم
- هسه راح يجوون قريبين علينة إن شاء اللّٰه هُمَ لا تخافين
سكتت و ضلينة منتظرين ابنها يجي هوَ و الجهال و بينما احنه منتظرين سألتني
-اخوانچ هُمَ لو جهالچ؟
سَدف:: جهالي
سكتت ما مقتنعة بحچيي لأن لو اگل الطفل هذول جهالي ما يصدگني، شوي و اتصل الولد على امه و شافتة من بعيد و ضلت تأشرلة باوعت وياها عليهم و ردتلي روحي من شفت شايل مينا و كاض علاوي من أيدة، ركضت عليهم من لا وعي و شبگت علاوي و گعدنا بالگاع اثنينة ابچي بصريخ نزل الولد مينا و اجتني هم تبچي شبگتهم حيل و ابوس بيهم
سَدف:: لييش تمشوون وحدكم تردوون تسودنوني
گالت المرة
- ياللّٰه ماما الحمدللّٰه من لگيتيهم گومي العالم ضلت تباوع عليچ
بعدتهم من يمي مستمرة ابچي من الهبطة گال الولد
- غيرر تلزمينهم عدل شنو هالفهاوة هاي
رفعت عيني عليه لابس دشداشة سودة و لاف الچفية على رگبتة صحت بيه
سَدف:: مالكك غررض
انصدم من ردة فعلي صاحت عليه امه
- كاافي ماما عيب مناا شارع راح تسوونة فرجة الأمة لا اله الا اللّٰه، شنو اسمچ حبيبتي؟
سَدف:: سَدف
- خابري على زوجچ خلي يرجعكم لو تندلين؟؟
صفنت عليها محتارة
سَدف:: ما عندي تيليفون و ما اندل
- انتِ مو من بغداد
سَدف:: شلون عرفتي؟؟!
ضحكت و گالت
-مبينة من لهجتچ
باوعتلهة متوترة گلتلها
سَدف:: اي جاية وي اهلي
- وينهم اهلچ عنچ خلوچ تدورين و تفرفحين وحدچ عليهم
سكتت مدنگة احاول ادور چذبة حتى اگللها بيها طبطبت على چتفي مبتسمة ابتسامتها حنونة
-تعالي ويانة نوصلچ للأمام و انا هم اريد ازور بعدني مزايرة نزور سوية
سَدف:: لا ما اريد انا اعرف ارجع
- مو توچ تگولين ما اندل؟
سَدف:: لا أنددل كلشي اندل بس عوفوني
حچيت بأنفعال و صوتي يرجف خفت منهم لأن لحت عليَّ، لزمت بأيد اخواني و مشيت بيهم المادري وين نسيت الطريق اللي يودي للأمام لأن ما چنت بكامل وعيي من خذتني المرة ابتعدنة عنهم كلش و حسيت نفسي چفصت لأن كلشي ما اندل و ترددت اسأل احد و الدنيا مغيمة تريد تمطر و الناس مزدحمة لأن الليلة تبديل الراية گالت مينا
مينا:: جوعاانة
علي الرضا:: انا هم
سَدف:: راح الجوع هسه نشوف مطعم لو شي ناكل منه
و احنه نمشي لگيت رجال چبير بالعمر گتلة
سَدف:: السلام عليكم، عمي اكو مطعم قريب منا؟
-اي يابة تلگين مطعم بهاي الدربونة
اشرلي على مكان الدربونة تشكرت منه و مشينة للدربونة دخلنة بيها وشفت المطعم من الطاولات اللي بالباب مخلينهن دخلناله و اباوع كلها زلم بيه طلعت ضليت واگفة بالباب محتارة شسوي گلت العلي الرضا
سَدف:: ادخل گول الهذا الزلمة گله عمو نريد تمن و مرگة و بيش يصيرن راح اوگفلك هنا
هز راسه و راح دخل ضليت اباوعله من بعيد حچة وي الرجال و اجاني هوَ و الرجال الظاهر ما فهمة
- تفضلي عمي
سَدف:: اللّٰه يساعدك عمي بيش التمن و المرگ
گلي السعر بس غالي مقارنة بفلوسي اذا اشتريهن يروح نصهن و بعد منين اجيب گتله
سَدف:: ما يصير تطيحلنه من السعر؟
- لا ما اگدر
سكتت شوي و گتله خوش جيبلنه ياهن بسفري هز راسة و دخل، احنه رحنة گعدنا على الرصيف ننتظر و باثناء ما احنه ننتظر طلعت فلوسي و حسبتهن و طلعت منهن فلوس الاكل و رجعت الباقي بالجنطة، شوي وطلع الرجال مخلي السفريات بعلاگة انطيتة الفلوس و مشينة لـ حد ما لگينة شارع عام ضلينة واگفين منتظرين احد يوگفلنة شوي و وگفت النة سيارة گتلة وصلنة للأمام و صعدنا وياه
نزلنة يم السوگ القريب على الامام و گعدنة على الرصيف فتحت السفريات و بدينة ناكل و نسولف شبعنة كلش ياللّٰه گمنة لفيت السفريات بالعلاگة و ذبيتهن بالحاوية و رحنة للحمامات غسلنة و اتوضيت و دخلنة للتفتيش صايرة كتلة و خنگة و بألف يا على طبينة للامام و هم لگيناه بعد اكثر ازدحام صايرة كتلة اخواني اختنگوا و احتاريت بيهم شلت مينا و كضيت علاوي من أيدة حسيت بروحي انتهيت منا ازدحام و منا شايلة مينا و هيَّ چبيرة بالگوة شايلتها و بأيد وحدة و العباية طاحت من راسي و كلش تبهذلت و ضلينة مستمرين نمشي بالضريح ندور بس على مكان شوي فارغ بس نريد نتنفس لگيت زاوية فارغة جبتلي تربة و صليت صلاة الظهر لأن ما لحگت اصليها بس كملت گومت اخواني و مشينة ضليت ادور على باب اطلع من عندة نريد بس نطلع شوي و لگيت باب نطلع منه نزلت مينا من أيدي و مشيت بيهم لـ برا بس طلعنة ياللّٰه جرينة نفس
رحنة للأمانات خذيت الجنطة مالتنة لأن بيها غراضنة و بعد ساعة تصير اكثر ازدحام و ما اگدر اطب بين العالم و اخذها رحنة الولد صغير يبيع ماي اشتريت من عنده النة و رحنة گعدنة على الرصيف نباوع للعالم باوعت العلاوي كلش وجهة شاحب و تعبان و عيونة ذبلانة گتلة
سَدف:: شبيك؟
علي الرضا:: ما ادري احس روحي تعباان
تلمست گصتة و رگبتة لگيتة گاب نار
سَدف:: مصخن علاويي
حط راسه على حضني و يفتح و يسد بعيونة يقاوم حتى لا ينام حطيت ايدي على عينة حتى ينام بأيدي الثانية دنيت الجنطة بيني و بين ميونة خليتها تخلي راسها على الجنطة و هي گبل نامت لأن تعبانة و ما نمنة هواي بالامام و جايين من مكان بعيد و انا هم منتهية من التعب بس ما اگدر انام
عدت الساعات و انا ماكلني التفكير احس من كثر التفكير راسي يريد ينفجر افكر اذا رجعنة البيت جدي مستحيل عمامي يخلووني عايشة و اذا نبقى هنا منو النة چندوب نضل نايمين بالامام؟ وين نروح شلون اعيشهم ضليت اغلط على روحي لأن الغبية ما فكرت بهاي الاشياء كلها چان كل همي اطلع من هذاك البيت المشؤوم و خطيت هاي الخطوة بدون تفكير بس تبقى ارحم مما اگضي عمري وي غسان المسودن و اهلة خاف چنت گبل شوي مقتنعة بس من سوة فعلتة الاخيرة كرهته كره ما صاير نزلن دموعي من الحيرة الجاي احس بيها دعيت رب العالمين
سَدف:: اللهي يا من أخرجت يونس من بطن الحوت، ويا من نجّيت موسى ومن معه، ويا من بردت النار على إبراهيم، ويا من كشفت الضر عن أيوب، ويا من رددت يوسف إلى أبيه و يا من قلت للشيء كن فيكون... سهل أمري و اخرجني من ضيقي يا ررب
مسحت وجهي بأيدي و صليت على محمد، نزلت عيني العلاوي من ضل يتهوع يريد يتقيئ گومتة بسرعة غسلت وجهة و هوَ مستمر يتهوع وگف گلبي و احتاريت شسوي سودة عليَّ طلعت روحة و وجهة صار احمر اختنگ كلش ضليت ابچي ما ادري شسوي و مينا هم ضلت تبچي وياي طلعت روحة لـ حد ما اتقيئ ذب الغدا كله و تلف هدومة و الگاع فتحت الجنطة طلعت كلينكس و مسحت حلگة و هذا الحچي كله و الوادم تباوع علينة محد تدنة النه، علاوي ضل هادئ رايحة روحة و صافن ضليت احچي وياه
سَدف:: هاا علاوي شنو تحس؟
ما جاوبني ولا حتى باوعلي خوفني اكثر
سَدف:: علاوي مو احاچيك؟
بس حچيت حچايتي طاح مغمي عليه بين أيدي ضليت اصرخ و ابچي و احاول اصحيه و اطگه راشديات بس ما يفيد ضليت اصرخ
سَدف:: لحگوووني اخوي راح يمووت
التمن علي النسوان و وحدة من النسوان شالت علاوي و مشت بيه للصيدلية اللي صايرة قريبة علينة رحت من الخوف على علاوي ردت اعوف مينا و امشي بس سمعت صوت بچيها بسرعة رجعتلها جريتها وياي اريد الحگ بالمرة دخلنة للصيدلية و ما ادري شسوولة و رجع صحى ما منتبهة خلصتها بچي ضليت گاعدة يمه احچي وياه گالت البنية الصيدلانية
-حرارتة كلش مرتفعة راح ننطيه خافض حرارة و خليلة كمادات و إن شاء اللّٰه ما بيه غير العافية
سَدف:: زين ما آخذة للمستشفى؟
-لا هسه وضعة تمام من تشوفين حالتة تسوء اخذيه
هزيت راسي و تشكرتها گلتلي تعاي وياي انطيچ خافض الحرارة رحت وياها و انطتني الخافض و انطيتها فلوسة، و رجعت يم علاوي شربتة العلاج و شوي و طلعنة من الصيدلية مجرد ما طلعنة بدأ يمجد
گلت ما عندي غير حل لازم ارجع الجنطة للأمانات و ادخل للامام هم اصلي و هم اخليهم ينامون شوي و يرتاحون لأن اتبهذلوا كلش، رجعت الجنطة و رحت للحمامات اتوضيت و بسرعة طلعت لأن خليت اخواني ينتظروني بالباب لبست عبايتي و مشينة للامام دخلنة للتفتيش و همين اكثر ازدحام و طبينة للامام و صايرة كتلة بالگوة لگينة مكان نگعد بيه، جبتلي تربة و خليت اخواني ينامون يمي و انا ضليت منتظرة الأذان، ضليت شوي منتظرة و أذن أذان المغرب و الصوت عاالي و مريح و حسيت بطمأنينة فضيعة من صوت الأذان و اصوات الناس
وگفت و بديت اصلي كملت الفرض الاول و كملت فرض العشاء و گعدت اسبح و ما لحگت اغفى لأن انگلبت الدنيا مجرد ما گضت الصلاة گعدت اخواني بسرعة قبل لا ننحبس هنا و بالگوة طلعنة من الضريح للشارع رحت بوجهي جبت الجنطة مالتنة ما ادري ليش ضليت قلقة على أن اخذها كالساعة رغم ما بيها شي مهم غير هدومنة
مشينة بعيد عن الامام بشوية يعني من بعيد نگدر نشوفة لأن ما گدرنة نبقى بهالازدحام اكثر اختنگنة كلش و اخوي مريض ما يتحمل، بدت مراسيم تبديل الراية و شعور يقشعر البدن من الكل يهتف بصوت عالي
"لبيكَ يا حُسَين... لبيكَ يا حُسَين"
ضلينة نتأمل هاي اللحظات العظيمة و حتى علاوي و مينا يباوعون مندمجين وي الاجواء بچيت و گلت
اللهي بجاه هذا شهر الحُسَين دليني بالدرب الصحيح ولا تخليني تايهة
مسحت عيوني و مستمرة بالدعاء و باللحظة خاطفة جمد الدم بعروگي من شفتة اي اي هوَ واگف على الرصيف يخابر و موجه عيونة المتروسة حقد و شرار علينة شوصل غسان النه و شلون طاح بينة؟!!!!
شكرا لزيارتكم عالم روايات سكيرهوم
