رواية صرخة مؤجلة الفصل الحادي عشر بقلم ود الزهراء
سَدف
فجأة و بدون مقدمات تبدد شعور الطمأنينة اللي حسيت بيه لأول مرة بحياتي الى شعور الخوف الچان خانگني كل هذيچ الفترة، شجابة ورانه شوصله النة؟!!! اتدهور حالي من شفتة بدأ يمشي يريد يعبر يمنه وجهة احمر من العصبية گبل مشيت من مكاني انا و اخواني و متت من الخوف من سمعتة صاح بعلوا صوتة
غسان:: سَددددفف تعااي لا تروحين تعااايييي
صحت على اخواني بصوت يرجف
سَدف:: امشوا امشواا ببسرعةةة
كضيتهم من ايديهم بسرعة ضليت اركض بيهم و ادخل بين الناس علمود اضيعة بس هو تخبل اكثر و اسمعه يصيح بصوت عالي ما هامه الناس اللي ضلوا يباوعون علينة
غسان:: وراچ وررراااچ وينن تفلتين منيي
اجر بأخواني اللي گوة يمشون من التعب و قلة النوم ضليت ابچي و أتوسل بيهم
سَدف:: بسرررعة عفية بسرعة راح يلزمنة اركضوا گدامي ياللّٰه فدووةة
جريت الجنطة من مينا و خليتهم گدامي يمشون لأن ازدحام ما نگدر نركض ضلينة ندخل منا و منا بين الناس، لـ حد ما طلعنة من السوگ اللي گبال الامام و لگيت فرع بسرعة دخلنة بيه و هوَ ورانه، گلبي ضل يدگ حييل گلت راح يوگف من كثر ما يدگ حيل و سريعة دگاتة. باوعت بنهاية الفرع منصوب چادر گبال بيت بدون أي تردد و ما اعرف حتى الچادر مال شنو
ركضنا لأتجاه الچادر لـ حد ما وصلناله و أول ما دخلنا صارت الدنيا بيضة بعيني و طحت بالگاع فاقدة الوعي...
~~~~~~~~~~~~~
الكـاظمـية📍
قبل تبديل الرآية بـ ساعات 🏴
طلعت من الحمام سابحة و مبدلة ملابسي و لابسة دشداشتي السودة، گعدت بالهول گدام الصوبة نشفت شعري زين و بديت امشطة صاحت عليَّ أمي
- يلا ماما ما كملتي ورانه نحظر غراض موكب أم اسماعيل و أخوتچ حيجوون ويانه بس يشوفونچ ممكملة يحرگونچ حرگ
- ها أها كملت بس خلي ألف شعري
- هوَ وينة شعرچ باقي شعرتين و طحتي بيه و طبرتيه أخخ ولچ الهسه محترگ گلبي عليه مبرد گلبي بكتلتچ
- ماما عادي يطول يطول
لميتة بسرعة مينلم گوة جمعتهن بالشكالة البارحة نص الليل و سويت هاي فعلتي السودة و راح شعري چان يخبل طويل بس الشيطان لعب بعقلي و جبت المقص و گصيتة و مو گص اوادم صار شي طويل و شي قصير لأن ما سيطرت عليه و أمي گطعتني تگطع بچيت شوي و رجعت راضيتها لأن ما اگدر اخليها زعلانة عليَّ
گمت للغرفة لبست حجابي و الصاية لزمت جواريبي اريد البسهن و امي عاطت، طلعت بسرعة من الغرفة لبستهن عالسريع و طلعت وراها ضلت تتصل على اخوي ذَوّاد اكثر من مرة مجاوبها بقت قلقة عليه و اني گعدت أهديها
- ماما يمكن مشغول لو موبايلة طافي شحن لتستعجلين
- باللّٰه بيه شي شسوي بروحي انيي
- ماما بس لو تبطلين هالوسواس تلگينه همين نفس كل مرة ما يدري بموبايلة اتصلي على غَطرَف
رجعت اتصلت على غَطرَف جاوبها
غَطرَف:: ها حبيبتي
ام ذَوّاد:: وينكم يا ماما وگعتوا گلبي
غَطرَف:: جايين بالطريق حبيبتي ذَوّاد موبايلة وگع بالمي و هسه محتار بيه
اجانة صوت ذَوّاد من الموبايل
ذَوّاد:: مبية شي حبيبتي
ام ذَوّاد:: يلا حبيبي عبالي صايرلكم شي لتتأخرون منتظرينكم انا و اختكم
سدت الأتصال منهم و انا استلمتها
- ماما صدُگ چذب استعجلتيني گلت هاهيَّ راح الگاهم بالباب
ام ذَوّاد:: لأن ادري بيچ ساعتين يلا تكملين
هزيت أيدي و ضليت گاعدة على الدچة منتظرتهم و أمي دخلت جوة ما ادري شتسوي شوي و دخل غَطرَف
- اللّٰه يساعدك
غَطرَف:: و يساعدچ حبيبتي، وين أمي؟
- جوة صيحلها اني رايحة للسيارة
هز راسه و دخل للبيت و اني طلعت للسيارة صعدت ورا و بست ذَوّاد من خده و گتله
- اللّٰه يساعدك
ذَوّاد:: هلا بعزِيزتي و يساعدچ شلونچ؟ درستي اليوم؟
- زينة الحمدللّٰه قريت بس شوي لأن ملحگت
هز راسه و دگ هورن الأمي و غَطرَف اباوعله كُلش تعبان و عيونة حمر لأن ما نايم زين
-ذَوّاد ليش ما تنام هسه و غَطرَف يوصلنه
ذَوّاد:: لا ما اگدر لازم اروح يم الولد ننصب الموكب، صدگ كويتي دشداشتي السودة؟
- ايي بس نسيتها بالبيت خابر امي تجيبها وياها
ذَوّاد:: لا راح ارجع بعدين اسبح و البسها
طلعت امي و صعدت بالسيارة و غَطرَف طلع وراها، حرك السيارة ذَوّاد و ضلوا يسولفون على الزيارة أمي ضلت تسولف الـ ذَوّاد شلون ازدحام بالامام الكاظم ع، اني درت عيني للجامة و ضليت اتأمل الشارع و اقرا اسماء المحلات و اباوع للزوار و وگفنة بأزداحام و بألف يا علي طلعنة منه وصلنة البيت خالتي ام اسماعيل خلصت عمرها وحيدة و ما الها غير اللّٰه و امي
وگفنة گدام بيتها نزلت اني قبلهم جريت الخيط اللي بالباب و دخلت تلگتني خالتي بالسلام حضنتها و بستها
- افييشش شلون ريحة طيبة
ام اسماعيل:: يا بعد گلبي دخلي دخلي، اجتي امچ؟
- اي هسه يدخلون هيَّ و اخوتي
ام اسماعيل:: هلا بيهم هلا
- خالة هوَ الليلة قرايتچ مو؟
ام اسماعيل:: اي يمة اليوم حاچيت الملاية گالت معندي مجال اسويها من وكت راح تقرا على الساعة 11
- يلا خالة عادي ترا العالم تضل گاعدة، شتوزعين اليوم؟
ام اسماعيل:: گلت اسوي كاستر و چرك و بعدني الهسه ممسوية الكاستر
- اني راح اسويه بس انطيني النشا
ام اسماعيل:: بالكاونتر تلگينه گبالچ
هزيت راسي و دخلت ذبيت الحجاب و الصاية و رحت للمطبخ طلعت النشا و شكر و بديت اسوي الكاستر طاحت ايدي لـ حد ما ثخن طفيت النار و شلت الگدر خليتة على صفحة يبرد طلعت للهول لگيت غَطرَف و ذَوّاد برا و وياهم اصدقائهم و بعد ولد جيران خالتي و كلهم بالطرمة رحت گعدت يم امي و خالتي يسولفن شنو يسون ثواب بيوم السابع و العاشر و كلساع الهن رأي لـ حد ما ثبتن على لفات و لبن، ضلت امي تسولفلها على الزيارة لأن اليوم راحت و سولفتلها على الازدحام و سولفت على البنية الضايعين جهالها منها
ام ذَوّاد:: فرفحت عليهم و هي بعدها صغيرة تطلع گصة رواء چان تگُلي هذول جهالي انصدمت بعدها صغيرة كُلش صغيرة و صلوات من شفت الجهال كبار مبين عليهم عمرهم مال مدرسة
رواء:: ماما خاف متزوجة من وكت
ام ذَوّاد:: اي يمكن الا هيچ بس لو انتن ويايَ و شايفاتها مستحيل تگولن هاي امهم
عفتهن گاعدات و رحت جبت گدر الكاستر و السفريات خليتهن يصبن الكاستر بالسفريات و رحت جبت الچركايات و يا ماعون يكملنة اخلي وياه چركاية و اچيسهن لـ حد ما كملنا كل السفريات سفطتهن بالسلة و خليتهن على صفحة و جبت المكناسة و كنست الهول و خالتي تدعيلي بالنجاح و هاي احلى فقرة عندي هوَ دعائها، دخلت على غرفتها و هم نظفتها و آخر شي رحت للمطبخ عزلت المواعين و غسلتهن و نظفتة كلش زين بس كملت كلشي رحت گعدت يمهن تمددت خليت راسي على رجلين امي و ضليت استمع لسوالفهن يحسبن الكلشي و شايلات هم الدنيا كله و مخلياتة على روسهن و اثناء مجاي استمع للحديث بدون ما أحس على نفسي غفيت على حضن امي
فزيت على صوت ذَوّاد يگعدني
ذَوّاد:: گومي يابة ساعديهن
رواء:: اهوو ما اريد هستوني نمت
امي گايمه و مخلية راسي على مخدة و مغطيتني بعبايتها
ذَوّاد:: خطية وحدهن ما بيهن حيل گومي انتِ عينيهن
گمت من مكاني اتأفأف ورحت للمطبخ لگيتهن يسون بالعشا
رواء:: ما گعدتني
ام اسماعيل:: عليمن احنه انسوي ما ينرادله شي
رواء:: لا انتن وين بيچن حيل روحن گعدن انا اسوي
ام ذَوّاد:: بعد وكت لو باقية نايمة احسنلچ كملناه تعاي بس صبي الشوربة
سويت نفسي ضايجة بس بداخلي گلت بعد احسن، صبيت الشوربة بكاسات و حضرت باقي الاكل بمواعين و فرشت السفرة و صحتلهم كلهم گعدوا
رواء:: لعد وين غَطرَف؟
ام ذَوّاد:: ما ادري طلع گال ما اريد
كلينه و خلصنا و رحت غسلت المواعين و شلت الطايح و بخرت لأن ورانه قراية و اجه غَطرَف طلعوا هوَ و ذَوّاد للموكب وي جماعتهم و انا ما ادري شبية اليوم خاوية و مالي خلگ حتى نعسانة خابر غَطرَف على امي گللها خدريلنة بعد چاي، خليت القوري على النار لـ حد ما يحمى الماي ضليت واگفة يمه صافنة اهوجس فزيت من صفنتي على صوت غَطرَف يصيح و امي تلگتة
ام ذَوّاد:: هاااا يمةة شكو
غَطرَف:: وين رواءء
رواء:: شبيك؟؟
غَطرَف:: لبسي عبايتچ و تعاي هاي بنية وگعت بالگاع فاقدة الوعي بالموكب بسرࢪعةة
لفيت حجابي شلون ما چان و لبست عباية امي الگصيرة علي و طلعت ورا غَطرَف ركاض گبل درعمت على الچادر ناسية اصدقاء الولد كلهم هنا باوعت على اطفال اثنين يصرخون و يبچون رحت على البنية ضليت اطگها راشديات
رواء:: يبنية... يبنية تسمعيني
انطاني غَطرَف مي رشيت عليها و منا غَطرَف فوگ راسي يگلي شوفيها تتنفس خاف ميتة
رواء:: غَطرَف ترا دوهنتني انطيني مجال اشوف دربي سكت الاطفال خطية
ذَوّاد راد ياخذهم على صفحة يسكتهم بس هُمَ تخبلوا اكثر ما يقبلون يتحركون من يمها، شوي البنية بدت تصحى ضليت احاچيها
رواء:: ها حبيبتي تسمعيني؟؟ غَطرَف تعال ساعدني خلي ندخلها للبيت
هستوه لف عبايتها على ايدها يريد يلزمها بس هيَّ فزت و طگت ايده دافعتها
سَدف:: شني تكض بية اعرفك تعرفني ميل عني
رواء:: زين بيچ حيل تگومين ويايَ
صفنت ثواني كأنما جاي تستذكر شي فزت بسرعة واكفة و حضنت الاطفال و ضلت تبچي بهستيرية
سَدف:: يريد يذبحني احموني منه
غَطرَف:: منووه؟
سَدف:: عفية احموني مننه راح يذبحني داخله على اللّٰه ثم عليكم
و وي حچايتها سمعنة صوت صياح زلم ذَوّاد التفت علينة و صاح
ذَوّاد:: اخذيهم و طبوا للبيت
جريت البنية من ايدها و انا لزمت البنية و هي لزمت الولد و دخلنة ركاض للبيت تلگتنة امي و خالتي
ام اسماعيل:: منو هاي البنية؟
دخلت البنية و دخلت وراها الجهال و صوت صياح ولدنا وي هذول الزلم رج الشارع رَج و امي و خالتي طار گلبهن امي رادت تطلع للشارع بس گوة كضيتها
رواء:: ماما ماكو شي هسه يحلونها و يجوون گولي يا اللّٰه
ام ذَوّاد:: يمةة اخوتچ لا ينكتلوون و وين انطي وجهي بعد
~~~~~~~~~~~~~~~~
سَدف
ا
سمع بالصياح البرا متخبلة و ما اتصور غير مشهد ذبحي على ايدهم
شبگت اخواني حييل و هُمَ خايفين اكثر مني ضليت گاعدة بالهول و شابگة اخواني و ما ينسمع غير صوت بچينة
دخلن النسوان الاثنين و وياهن البت الچانت يمي رايحة ارواحهن و زاد قهري و خوفي لا ينكتل واحد من هذول الولد و دمه يصير برگبتي ضليت الوم بروحي و اهمس بيني و بين روحي
سَدف:: كله مني كله مني
شغلت عقلي النايم و فكرت گلت ما الي غير اطلع و اروح وياهم لأن غسان و اهيلتة مسودنين لا ينكتل واحد منانة و شسوي بروحي، بس وگفوا اخواني بعيني لو يذبحونهم وياي لو يضلون تايهين، و كل ما اجاله الصياح يزيد لـ حد ما دخل ولد باوعتله و باوعلي نفس الولد اللي جابلي مينا و علي الرضا من ضاعوا مني بالزيارة تلگنه البنية و النسوان الثنين گلالي بأستعجال
غَطرَف:: جيبي الجهال و تعالي بسرعة
ام ذَوّاد:: وين يمة غَطرَف لا تخبلني
راح يمها يحچي وياها و انا تدهورت احوالي راح يسلمنة الهم هاي هيَّ وگفت على حيلي و گتله
سَدف:: عوفونة نروح
غَطرَف:: ويين؟؟
سَدف:: لا تسلموني الهم اگله يذبحووني عوفونة نروح و بعد مالكم غرض بينة
غَطرَف:: لا حول ولا قووة الا باللّٰه شبيچ بابا؟؟؟!
سَدف:: انتَ شبيكك!! ما اروحن وياك لو هسه مدري شيصير شمعرفني بيك انااا
غَطرَف:: لعد ضلي هسه اطلعلهم اگللهم البنية عدنا تعالوا اخذوها و ذبحوها
ضليت ابچي بصوت عالي
سَدف:: وين تريد تااخذنة؟؟!
غَطرَف:: للمگبرة
سَدف:: شنسوي بالمگبرة؟
غَطرَف:: ادفنچ هناك
سَدف:: مو وكت شقة هسه انا بيا حااال شبيك
غَطرَف:: منو گلچ جاي اتشاقة؟
سَدف:: يمةة عفية طلعووني منانةةة
انهاريت بالبچي و اخواني وياي همين ضلوا يبچون
ام ذَوّاد:: ياااا غَطرَف لا تخوف البنية وين مولي بيهم بهالليل
غَطرَف:: يعني يمة راح آكلهم غير اريد آخذهم منانة لأن راح يجوون الشرطة
ام اسماعيل:: يااااعع يمة اسم الله ليش ولك
غَطرَف:: هذا ابو عباس اتصل عليهم و هسه بس تضل هاي هنا راح يرجعونها وي هذاك الناقص غير اريد تغير مكانها حتى من يجون الشرطة ننكر وجودهم
ام ذَوّاد:: منو حيطلع للشرطة؟
غَطرَف:: ذَوّاد راح يبقى هنا و سلام و باقي الولد كلهم هنا ما عليكم شي انتم بس يمكن يفتشون البيت فَـ اخذي خالتي و رواء و ذَوّاد راح ياخذچن البيتنة
ام ذَوّاد:: خاف تكبر يمة و احنه اليوم عدنا مجلس شلوون
غَطرَف:: لا يمة بسيطة تنحل إن شاء اللّٰه اما المجلس اتعذري منهن و گليلهن صارتلي ظروف و ما اگدر اليوم اسوي المجلس
ام ذَوّاد:: ياا زين و باچر هم اتعذر ميصير ماما مو احنه ناذرين نقرا اول عشرة
غَطرَف:: لا باچر تنحل بأذن الله ذَوّاد راح يحاچي ابو عباس يسحبها للشكوى
ام ذَوّاد:: إن شاء الله خير، باوع من اتصل عليك جاوب تمام؟
غَطرَف:: صار، ياللّٰه يبنية
طلعنة وراه و كاضة بأخواني حيل احس على لحظة يبعدوني عنهم ما اعرف ليش، احنه وراه و هوَ يمشي گدامنه يمشي سريع و موبايلة ما سكت من الاتصالات و يجاوبهم الظاهر اخوه لو صديقة سد الاتصال منه و دار علينة
غَطرَف:: امشوا بسرعة ليش بطيئين
عجلت مشيتي بس اخواني تعبانين ما بيهم حيل يمشون و علاوي كل ما جايها صحته بالنازل انتبهلة الولد الويانه
غَطرَف:: شبيك عمو؟
سَدف:: مريض
وگف گبال علاوي اتلمس گصته و رگبتة
غَطرَف:: تؤ تؤ تؤ گاب نار هذا
سَدف:: علاجة بقى بالجنطة و ما ادري بيها وين
غَطرَف:: مو مشكلة هسه بس نمر بصيدلية اجيبله علاج الوضع ما يسمح اوديه مستشفى
هزيت راسي ما عرفت شجاوب و هوَ شال علاوي و خله راسه على چتفة باوعتلي مينا بتعب بمعنى هم شيليني شلتها و هم خليت راسها على چتفي بقينة نمشي لـ حد ما الولد رفع موبايلة خابر على واحد و حچة وياه
غَطرَف:: خوية وينك احنه و اگفين يم ****
سكت يسمع للمتصل انوب گال
غَطرَف:: هذا انتَ؟
اشر على سيارة تكسي گال تمام سد الاتصال و دار عليَّ
غَطرَف:: راح نصعد بهذيچ السيارة
سَدف:: و انا ليش ثاقة بيك؟؟
غَطرَف:: واللّٰه ما ادري اسألي روحچ
سَدف:: اطلعلي بالنظيف شنو غايتك من ساعدتني؟
غَطرَف:: ما عندي غاية بس دخلتي دخِيلة يمنة شلون اعوفچ
دنگت مترددة ما اريد اروحن وياه
سَدف:: يصير يعني انسحب؟
عگد حاجبة
غَطرَف:: شلون يعني؟
سَدف:: يعني بعد ما اريدن اصير عدكم دخِيلة اريد انسحب
انا گلت هيچ و هوَ مات من الضحك
سَدف:: ما گلت نكتة ترا و هسه احنه مو بحال ضحك
حاول يكتم ضحكتة بس ما گدر و رجع انفجر بالضحك وجهة صار احمر و اذانة همين
غَطرَف:: لا ما يصير بعد فات الأوان لو قبل شوي گايله چان يصير تنسحبين بس هسه ما يصير
سَدف:: زين شلون اثقن بيك بالله طلعت مو خوش و سويتلي شي شسوي بروحي
انمحت ابتسامتة و حچة بجدية مدنگ راسه يباوع للگاع
غَطرَف:: يعني ما ادري شلون اذا اگلچ ثقي بية تثقين؟
باوعتلة بحيرة دمعن عيوني گتلة
سَدف:: كلمة رجال؟
غَطرَف:: كلمة رجال
مسحت عيوني قبل لا تطيح دموعي و هزيت راسي و هوَ اشر على السيارة بمعنى خل نمشي مشى هوَ و انا مشيت وراه باوعت على ابو السيارة واگف گدام السيارة ملثم بچفية مينا بس رفعت راسها و شافتة لعبت لعب بالصريخ و البچي
مينا:: يمةة حرررااامي حرامي
سَدف:: مو حرامي ولچ مينا
-عمي مو حرامي هاي باوعيلي مو حرامي
شال اللثام عن وجهة و هي مستمرة تبچي و تصرخ مفرفحة
سَدف:: باوعي مو حرامي رفعي راسچ شجاچ
باوعتلة ياللّٰه شوي هدأت بس بقت شابگتني و تناشغ
- عمت عيني بچيتچ شو تعالي خل نتصالح
ما قبلت توخر عني صعدنة كلنة بالسيارة گاله الولد الجابنة لهنا
غَطرَف:: اذا انتَ تخلس حقها البنية تخاف انوب ملثم
-شمدريني بيها تخاف اتلثمت من البرد
سكتوا شوي و گال الولد متذكر
غَطرَف:: اوگفلنه على صيدلية خلي اجيب علاج للولد شسمك عمو؟
علي الرضا:: علي الرضا
-تمام بس بعيدة الصيدلية منا
غَطرَف:: ميخالف وين ما تصادفك اطبگ عليها
مشينة مسافة شوي طويلة ياللّٰه لگينة صيدلية دار الولد على علاوي
غَطرَف:: رضاوي تعال انزل ويانة حتى انجيبلك علاج
سَدف:: لا ما ينزل
غَطرَف:: شلون لعد غير حتى الصيدلاني يعرف شينطيه لازم ينزل لا ينطيه علاج غلط و يتخربط اني انطيتچ كلمة بعد شنو
سكتت و نزل هوَ و علاوي و الولد بقينة بس انا و مينا بالسيارة شوي انتظرناهم و اجوا كلهم صعدوا و حرك الولد السيارة لـ حد ما طبگ السيارة گبال بيت صغير و مبين عليه قديم نزلنة كلنة و لزمت علاوي و مينا و الولد الوصلنة بسيارتة طلع المفتاح و فتح الباب فتحلنة الباب و دخلنة گدامهم انا و اخواني ضليت واگفة لـ حد ما دخلوا گلالنه الولد
غَطرَف:: ادخلوا بهاي الغرفة ناموا تلگين فراشات و كلشي موجود و أي شي تحتاجونه تلگوني هنا بالهول
سَدف:: مشكور
دخلنة للغرفة و شغلت الضوة، الغرفة صحيح تعبانة بس نظيفة و على صفحة مسفطين فراشات ذبيت عبايتي و فرشت فراشات الاخواني و الي و شربت علاوي علاجة هُمَ مددوا و انا همين مددت يمهم اول ما خليت راسي على المخدة من التعب نمت
شكرا لزيارتكم عالم روايات سكيرهوم
