رواية حين تتغير الاقدار الفصل الثاني عشر بقلم سناء الهموندي
لا غرني المدح بشفاف المحبين
ولا همني الشماته شما حچو عني
يلتمن عليه مشتتات البال
انفضهن نفض وانهض ولا چني.
::المشڪـݪه اݪمـٰـابي جـٰـࢪح مـٰـايفهم اݪبي حـٰـسـٰـࢪه🖤
.
ضويه : خير عمه وين رايحه .
ام صادق : اروحن بشغله ساعه وارجع .
ضويه : راحت عمتي وانا خفت عليهه ضليت بقلق وره تقريبا ساعه ونص اجتي عمتي وجايبه وياهه غراض كتلهه شني هاي عمه.
ام صادق : شنهي تردين بنتي تعرس وانا مافرحلهه واجهزهه هاي هدايه وصوغه توديهه امانه لفضه وتكليلهه من امج .
ضويه : عمه ليش ماتجين بنفسج تنطيهن الهه .
ام صادق : أنا كلت كلمه وما اثنيهه السلف ماطبله .
ضويه : نزعت ملاويهه ونطتنياهن وكالت .
ام صادق : هااج هاي هم امانه توديهه هديه عرسهه ..
ضويه : تفاجاة بردة فعلهه .
ام صادق : خايبه شمالج فاكه حلكج سدي واخذي الامانه .
ضويه : بتسمت وتقربت على عمتي بستهه كامت تبجي وتوصيني على فضه .
ام صادق : بروح امج عينج عليهه وبوسيلياهه وكلهه امج ما باعتج بس شترت كرامتهه وماتكدر تجي .
ضويه : قهرتني عمتي تحجي وتمسح بدموعهه مرت الايام وقررنه اليوم بليل نطلع للسلف عرس فضه باقيله سبوع طلعنه أحنه وبيت فرقد وعمتي راحت بيت اخوهه طريق بعيد جهال شلعو كلبنه خصوصا هاله بنت فرقد اول مره يطلعوهه طريق بعيد كلبت الامه بلبجي وصخنت وصلنه لبيت عمي ويه صلاة الضهر شافتنه فضه كامت تبجي وركضت علينه تحضن بينه واحد واحد.
فضه : يمه هلا هلا بيكم وينهه امي جتي مو جتي وياكم وين بقت بيت عمتي ادري بيهه .
انتضار : كافي حبي عمتي ضلت يم أبويه بغداد .
ضويه : حضنتهه وكتلهه عمتي وصتني اكلج تكول أنا ما بعتج بس شريت كرامتي .
فضه : أنا اعرفنهه امي ماتتنازل تعالو فوتوا جوه .
ضويه : فتنه جوه بعد السلام والمعاتب عمي مثل الي مقهور من ولده جي عارضوا على مهدي مضى اليوم بين رتاحينه وتحضيرات ثاني يوم من الصبح رحت أنا ومرت فرقد وفضه لجوريه ومنهه نروح نحضر بيت فضه نفرشه ونعدله قريب على بيت جوريه بطرف البستان حتى بيت جدي مرحنه بليل اجتي عمتي نبعه وأخوي حسين هم خطيه يساعد مهدي تعللو يمنه ساعه وراحوا ومهدي مشفته لبسنه عبينه وطلعنه كلمن وجهالهه اوضاعي متخربطه كلش واشكن بروحي شايله مشينه بتجاه البستان وصلنه دكينه الباب طلعتنه جوريه شافتنه فكت عينهه متفاجئه شكلهن جانت تخبز لان وجهه احمر من الحراره .
جوريه : يمه هلا وميه هلا منين طالعه الشمس اليوم .
فضه : من مكانهه خيه .
جوريه : سكتي انتي البارحه الصبح مو جنتي عدي شو ماكلتي يجون .
فضه : علمي علمج والله مادري بيهم .
انتضار : ماشاء الله شكد حلوه الحديقه مالتج .
جوريه : عبن ايدي بيهه وماعوفنهه .
فضه : انا هم سويت مكان ازرع بي ومادام جوريه يمي هيه ساعدني .
جوريه : وجوريه ماعدهه شغل وعمل تكعد داري فضه وحديقتهه .
ضويه : ههههه بعدجن ما انجمعتن تتناكرن .
جوريه :بمزاح لا خيه لازم اراويهه عيني الحمره عبني حماتهه ..
فضه : عاد انتي ماتصدكين طلعين ضيمج بيه .
جوريه : جا شعبالج حتى فلوح اذبه عليج .
ضويه : ابفزه يا خيه أنا ناسيه وينه ابنج بعد اخيتج .
جوريه : نايم بلحجره .
فضه : ميلي ليغاد خلني اساعدج بلخبز .
جوريه : لاله لادمرين نفسج خلصت بس هلجم كرصه .
انتضار : عادي أخذ خبزه .
جوريه : يا يمه أخذي بعد اخيتج صدك جذب شون تحجين هيج .
انتضار : ماتحمل اشتم ريحه الخبز الحار وماكل .
ضويه : طلعت شايله ابن جوريه خدوده مثل أمه متفحات عضعضته تعضعض وهوه يبجي بصوت .
جوريه : يا شمالج خيه صادق مجوعج عوفي الفرخ راح من العض .
انتضار : خطيه ضويه باعي شون يناشغ الله عليج لتعضي .
ضويه : هوه مال عض اني شعليه .
جوريه : كون يشوفج محمد اله يشمرج انتي وجهالج .
ضويه : بضحكه ميخالف المهم انعض عض هلخديدات .
فضه : كملت جوريه خبز وسوينه غده تغدينه عدهه اجه زلمتهه طلعتله .
جوريه : ضلن البنات عندي وانا طايره بيهم ضحك وسوالف سويت غده وطلعت حصه محمد يجي وكت غده اجه طلعتله هلا ابو فالح الله يساعدك .
محمد : يساعدج الله حبيبه اليوم عندج خطار .
جوريه : اي والله البنات عندي.
محمد: كل الهله بيهن أخذي راحتج كلبي أنا اردن للكاع عبن كلت نتغده سوه وارجع .
جوريه : لاله اوكف اجيبلك الغده واتغده انت وأبو علي .
محمد : محسبه حسابي بعد بيتي .
جوريه : جا شون جا غير انت ابونه .
محمد : بستهه براسهه وكتلهه جا جيبيلي فالح شوفنه شويه كبل لا اروحن .
جوريه : رحت جبت الغده خليته يمه ورجعت اخذت فالح من ضويه الاكلته اكل وديته اله .
محمد : بخوف هاي شنو خدوده حمر شنو مريض .
جوريه : لا اسم الله هاي ضويه مردته مرد .
محمد : بضحكه جا كليلهه على هاي الآثار ناخذ منكم فصل مره .
جوريه : بضحكه خوش راح محمد بعد ملعب فالح شويه وراح رجعت للبنات يسولفن كتلهه لضويه حضرو روحكم ام انور .
ضويه : بستغراب خير وين مو كلتو العصر نروح نعدل بيت فضه .
جوريه : لاله مو على البيت قصدي على خدود فالح محمد شافهن وكال كليلهه تحضر عمامهه ناخذ منهم مره فصل .
ضويه : لتعبون روحكم أنا اذا جبت بت انطيهه الكم بدون فصل .
جوريه : ضحكن البنات .
ضويه : وازيدنج من الشعر بيت جنتج جايه بلطريق.
فضه وانتضار : بتفاجاء صدككك.
ضويه : والله شاكه بروحي .
جوريه : شرايج اندز على ام فرهد الجده .
ضويه : لا خليهه مو هسه .
جوريه : لا امشينه نكمل بيت فضه وراهه نروح لام فرهد تكشف عليج ...
فضه : انتن ليش متكولن بيت مهدي كله بيت فضه .
جوريه : انتي اختنه وعشنه وياج مهدي ماشفنه منه شي وانا جم مره كتلج مهدي مو كفوا لا تشدين احزامج بي مايفيدج.
ضويه : لاعاب حلكج جوريه حجيتي لبداخلي بس انا ماردت اكسر بفحت فضه .
فضه : بلكي ويه الايام يتغير وهوه وكف الأبوي هوايه ومعافه وانا اكولن ابن عمي اولى من الغريب .
جوريه : جا مني الجانت تبجي اول ما طلبهه وتكلي ماحبنه وماريدنه .
فضه : حجيت وبجيت ودكيت ولطمت شغير غير قرار ابوي لو قرار عمامي ما شفتيهم ما حطولي خيار ثاني يو مهدي يو ابن حجي تعبان وانتي تعرفين ابن حجي تعبان متزوج اثنين وعنده كومه جهال عاد أرضه بمهدي ابن عمي وانا شرطت عليه كتله من نتزوج ترد مرتك وجهالك تريد تكعدنه نفس البيت تريد غيره .
ضويه : والله انتي فطيره باله هوه شكال .
فضه : كال لا اخذلهه غير بيت .
جوريه : الله كريم بدينه بلبيت فرشنه بساطات ورتبنا وخلينه ملبس على التخت وهيه مستحيه طلعنه ردينه لبيتي لكيت ام علي بلباب شافتنه بتسمت .
ام علي : يا هلا بخطارنه .
جوريه : فتحت الباب وطببتهم هلا باام علي اليوم مابينتي الصبح .
ام علي : صار عندي شغل وماجيت ماعرفتينه على الحلوه الوياكم مبينه مو منا .
جوريه : بابتسامه هاي انتضار مرت فرقد من بغداد .
ام علي : كل الهلا بنت العم وأهل بغداد .
انتضار : بابتسامه وبيج أكثر حبي .
جوريه : سلمت ضويه هم على ام علي وانا حجيت اكولن خيه ام علي .
ام علي : امري بعد كلبي .
جوريه: باوعت على ضويه وحجيت تكدرين تأخذين ام انور لجده ام فرهد تفحصهه يمكن شايله .
ضويه : يا شمالج جوري المره توهه طبت مو عيب .
ام علي : ماكو لا عيب ولا شي لبسي عباتج ومشينه .
جوريه : ضويه استحت من ام علي بس ام علي أصرت واخذتهه أنا لزمت جهالهه نيمتهم وكعدنه نسولف ويه البنات .
انتضار يعني بنتي اكبر من بنتج .
جوريه : اي انتي جبتي بكتهه اجه فرقد وكال صار عندي بنيه جنت بيت عمي .
فضه: اي صدك بكتهه وراهه باسبوعين انتي جبتي .
جوريه: اي الحمدلله ...اجتي ضويه وجهه يضحك.
ام علي : كرت عينج ام انور
ضويه : تسلمين ام علي .
جوريه : شمالهن ذني دحجن مو ضجت .
ضويه : أنا حامل .
جوريه : بفرح بالعافيه عليكم خيه .
ضويه : رحت كشفت وطلعت حامل باركلي البنات وضلينه للعصر كلش عد جوريه وراهه ردينه للبيت مضت الأيام اجه العرس مال فضه جانت ماخذه بدله بسيطه مال بت عمي مال عرسهه لبستهه طلعت كلش حلوه اجت جوريه ويانه من الصبح نحضر .
جوريه : اليوم من الصبح كعدت وضعي مخربط كاعد اساعد بلبنات واكفه بصف ضويه وملكه مرت عمي شايله فالح وأحس الكاع تفتر بيه ردت اوكع لزمتني ملكه .
ملكه : خيرج حبيبه بيج شي .
ضويه : بخوف شمالج جوري يوجعج شي .
جوريه : لا مابيه بس يمكن دخت جي ماماكله وارضع بفلوح .
ضويه : غير تأكلين يا اختي .
جوريه : مابيه شي والله هسه شويه وتروح .
ضويه : زفينه فضه ومهدي اليوم اليوم ياله شفنا حضنه وضل يبوس براسنه ويسلم بس كل احساس ماكو تجاهه وصلنهم البيتهم وردينه جوريه كالت عشاهم عليه راحت البيتهه بعد وكت عصريه صارت الزفه
جوريه : رديت للبيت سويت عشه وخذينا اني و محمد انطيناهم العشه للعرسان وباركنالهم وردينه .
فضه : زفوني على مهدي تعامل وياي بحنان وحب أنا أحاول انسجم ويا فضت سالفتنه على خير جتي جوريه جابوا العشه تعشينه ميته من الجوع .
مهدي : شنو هلجمال عمي وين جان ضامج .
فضه : ما كتلي ليش أنا بلذات مو عندك كومه بنات عمام .
مهدي : الكلب ومايهوه .
فضه : وتريدني اقتنع انت واكع بحبي .
مهدي : تكدرين تكولين هيج .
فضه : بس انت لازم طول بالك عليه عبن كتلك أنا ماجنت قابله .
مهدي : مادام صرتي إليه يجي يوم وكلبج هم أملكه .
فضه : الله كريم انشالله اول مترتب امورك دبرلك مكان ورد مرتك وجهالك .
مهدي : الله كريم اردهه بس مو هسه .
محمد : شمالج اليوم وضعج مو طبيعي .
جوريه : مابيه شي مو هاي أنا كدامك .
محمد : وجهج اصفر ماعاجبني .
جوريه : لا والله مابيه شي الضهر دخت شويه بس هسه مابيه .
محمد : باوعتلهه بشك .
جوريه : ليش هيج تباوعلي.
محمد: اكلج خافنج حبله.
جوريه: يا اسم الله الرحمن توه فلوح طب التلث اشهر .
محمد : بضوجه وليش اسم الله شنهي عدنه عشره .
جوريه : مو هيج قصدي شبساع .
محمد : ايجوز على الاربعين شلتي .
جوريه : بخجل مادري شكلك باجر اروحن ويه ام علي وانشوف .
محمد : بفرح انشالله حامل .
جوريه : الله كريم ..صبحت الصبح راح محمد وهوه يوصيني على نفسي وعلى فالح سويت غده وخبزت وخلصت شغلي وأخذت فالح وتمشيت لام علي متعلمه يوم هيه تجي يوم أنا اروحلهه واكثر شي هيه تجيني رحت طلعت صباح الخير .
ام علي : هلا بهل صباح .
جوريه : سلمت على نسوان حماهه وكعدت يمهن سولفت لام علي على حالتي .
ام علي : يعني انتي ماجايتج الشهريه من عهد ما جبتي .
جوريه : لا جتني قبل الأربعين ليطلع مال فالح .
ام علي : وراهه تقربلج .
جوريه : شني هل حجي خيه .
ام علي : جوريه غير حتى اعرف .
جوريه : اي .
ام علي : فتهمت كومي وياي .
جوريه : رحنه لام فرهد .
ام فرهد : عفيه نسوان يوميه زاركاتلجن وحيد دكعدن بسجن .
ام علي : بضحكه ام فرهد هاي عدهه بس واحد بعد أكثر من تسعة سنين ياله صار .
ام فرهد نامي جده اتقشمر وياج .
جوريه : فحصتني وكالت مبروك راح يجي اخو لهل حليو .
ام علي : بفرح انشالله حجيه ضلت عندج العافيه .
جوريه : انطيتهه تعبهه وطلعت فرحانه عبن هسه محمد يفرح .
رديت كبل لبيتي شكد ام علي رادتني ابقى مارضيت وره نص ساعه ندك الباب طلعت شفت ضويه وانتضار وعمتي نبعه رحبت بيهم وطبوا .
ضويه : جبنه ريوك للعرسان وكلنه نمر نشوفج عبن وضعج ما عجبني البارحه ..
جوريه : هاي عادي خيه ..
ضويه : بل تفاجأ شون عادي خافج مريضه وماتحجين .
جوريه : لا وروح ابوي بس بببس .
نبعه عمت جوريه وضويه : احجي شمالج .
جوريه : أنا طلعت حبله .
ضويه : صدك بالعافيه خيه يتربه بعزج
جوريه : صرنه سوه حبلات ههههه .
انتضار : انتضروني احبل وياكم .
جوريه ضحكنه وشقه ودعتني ضويه وراحت كالت بليل يطلعون البغداد اجه محمد وكتله طار من الفرح .
محمد : يعني متاكده .
جوريه : قابل ام فرهد متعرف .
محمد : الحمدلله والشكر يارب الحمدلله اروح اصلي صلاة الشكر .
جوريه : بفرح خوش وانا احضر الغده ......مرت الايام
ضويه : رديت البغداد حياتنه ماشيه كما هيه انور بشغله وانا وعمتي بلبيت نوبات تروح لبيت فرقد نوبات همه يجونه عمي ابو صادق علاقته بمرته تحسنت واخذهه من جنه يمهم فضه حجت كالت كتلهه امي واعرفهه ماترد وانتي شنو ذنبج قربي روحج من ابوي تكول عاد عمي متقبل وجودهه وهيه شايلته شيل اكله شربه هدومه فرقد ومرته حياتهم عاديه واحنه الحمدلله ماشيه .
تسريع الأحداث
فضه : حياتي مشت ويه مهدي حباب وقاسي نفس الوقت واشوفنه شخص غامض مينحزر كتله على مرته كال اروحلهه وأشوف شسوي وهاي مر اشهر على زواجنه وراح المرته وراد يرجعهه شرطت متعوف اهلهه بلبدايه عارض بعدين شويه شويه كثرت روحاته هناك صار سبوع يمي وشهر هناك واني الوكت الهوه ماكو اكضيهه يم جوريه اشكيلهه تكلي عوفي حتى لو اخوي بس انا اتقبلت وضعي وكعدت وسكتت وهيج مشت السنين .
جوريه : حياتنه مشت عاديه محمد كل فتره يروح لامه ومتقبل تحاجي وصفيه راحلهه مرتين ومرضت ترجع استمرت الايام والأشهر والسنين مرت سنتين صار عندي ابنيه سميتهه هناء وضويه هم جابت بنيه وهم رجعت حبلت بعد فالح وهناء مره ثالثه محمد كل مره احبل يفرح أكثر من القبلههه صار عمر فالح تلث اسنين وهنا سنه وجم شهر وهسه حامل بشهر السابع وام علي حامل وحتى ضويه ومرت عمي ملكه كلنه حوامل بس هذا الطفل ماتعبني بحبالته خفيفه ام علي عليهه تلث اشهر ويه ضويه كاعده أفلس رمان وناكل فالح يلعب واخته تريد تلعب ويا ميخليهه يدفعهه محمد روحه بهناء.
محمد : ولك بابه ليش مو اختك لتضوجهه .
جوريه :ندك الباب طلع محمد رجع طب كال هذا محمود استغربت حطيت شيله على راسي محمود صارله سنه مجايينه شال لغير محافظه وقلت جياته .
محمود : شونج خويه ام فالح .
جوريه : هلا بيك خويه وميه هلا شونهم الاهل .
محمود : الحمدلله على الله .
جوريه : سويتلهم جاي وعفتهم سويت في غده تغده محمود عدنه وطلع
محمد: جوريه محمود يكول امي تعبانه ودازه عليه .
جوريه : صدك جا خوش روحلهه ..
محمد : كلبي ملجوم منهه .
جورية : ميخالف امك هاي .
محمد : انشالله العصر اروحلهه .
جورية : راح محمد العصر لامه حتى يعرف شتريد وصار المجنه متوقعي ..........
صلو على محمد وال محمد
الله اكبر
شكرا لزيارتكم عالم روايات سكيرهوم
