رواية حين تتغير الاقدار الفصل الثالث عشر بقلم سناء الهموندي
هيّ تهون
بس شلون لو هانت ؟ أظن ما نلگه وادم مثل ما چانت .🤍
عاد الصبر يلچم مصب العين 🥺
ولا مثل الخلك بدموعنه #أنمثل
طالت والعمر
كلما تلف بيه #يطول
غم ذاك العمر من ينگضي #أتعلعل😔
محمد : رحت لبيت اهلي اخر مره جيت قبل ست اشهر جبت خالي وجيت وكعت عليهه ومرضت تصالحني اليوم مستغرب انهه دازه عليه وصلت طلعت مرت صلاح ناديه ..
ناديه : هلا بأبو فالح .
محمد : هلا بيج خويه امي وين سمعت صوت فتنه وراي تصيح هذا ياهو التفتت عليهه فكت عينهه وجتني تركض سلمت عليه فتنه اخر مره شفتهه بولادت هناء جتي باركولي هيه وحسنه بوكت امي عبن كايلتلهن التوصل لمحمد اتبره منهه وهنه يحبن امي ويردن رضاهه .
فتنه : توه البيت ضوه بجيتك علينه يبعد روحي .
محمد : ولج شونج يبعد اخوج .
فتنه : الحمدلله بشوفتك زينه .
محمد : طلعت امي على صوتنه باوعتلهه ومتردد اتقربلهه عاد هيه فتحت حضنهه رحت ملهوف اشمنهه وابوسهه عبنهه ريحت الجنه هاي امي لو شسوي تبقى امي .
ام محمد : شونك يحميدان .
محمد : زين يمه زين الحمدلله بشوفتج ردتلي العافيه .
ام محمد : تعال فوت عندي حجي وياك .
محمد : فتت وره امي لمحت صفيه واكفه باب حجرتهه وتفرك بيدهه تفاجاة عفتهه و دنجت وطبيت وره امي كعدنه وراهه جتي حسنه وجهالهه وصلاح بس شكل صلاح معاجبه الوضع اني هم محجيت ويا من اخر موقف بينه اجه محمود وأمي بلشت تحجي .
ام محمد : شوف محمد أنا دزيت عليك عبن عمك اجه ترجاني حتى ارجع صفيه يمي وانت هم ترجع يمي .
محمد : بس يمه شون تردين ارجع لصفيه بعد ما نزلت من قدري كدام أهله جمره رحت اردهه وما قبلت .
ام محمد: البت جانت مقهوره وانا حاجيتهه وكالت تعتذر منك .
محمد : خوش يمه ارجع بس جوري مستحيل اعوفهه .
ام محمد : لا تعوفهه بس لا تجيبهه هنا .
محمد : انا اصلا ماريدن اجيبنهه هنا عبن هناك صارت حياتنه والحمدلله الله اكرمني باولاد ثنين والثالث على الطريق.
ام محمد : ااا أنا معليه بيكم ها ولا تنسه أنا قسمت الورث وانت حصتك الكاع البطرف البستان انت من قبل تحبهه .
محمد : يمه أنا مدامج رضيتي عني عندي هاي تسوه الدنيه .
ام محمد : بتلعثم ااا هوه انت شصار عندك اولاد .
محمد : بابتسامه ولد وبنيه وهسه الثالث بلطريق انشالله .
ام محمد : المن يشبهون قصدي عليمن طالعين .
محمد : أنا اروح يمه وغير وكت اجيبنهم .
ام محمد : ليش مجيبهم هسه .
فتنه : جا مو كلتي ليجيب طاريهم اتبره منه والله ما عرفناج يا ام محمد .
ام محمد : انتي شعندج مكابلتني ما ترحين لبيتج وتفكيني .
فتنه : احبج يمه ماكدر اعوفنج .
ام محمد : حبتج حيه انتي تردين تموتيني بسوالفج .
محمود : بضحكه اسم الله عليج يمه .
محمد : ياله في امان الله من طلعت لاكتني صفيه اعترضت طريقي رادت تحجي مخليتهه صح أنا احبنهه واحترمهه بس هيه مابقت لا حب ولا احترام .....رجعت للبيت لاكتني جورية عيونهه حيره على خوف ابتسمتلهه اطمنهه اشويه ارتخه شكلهه طبيت جوه وهيه ورايه متكدر تسال اعرف بيهه متحب دخل نفسهه بشي بس خايفه عليه كعدت هيه هم كعدت كبالي اجتي هناء تركض بحضني حضنتهه هلا يروح ابوج هلا بحبيبه ابوهه وينه اخوج .
هناء : حجتهه بلهجه الاطفال راح ام علي .
محمد : ها راح يم علي .
هناء : اي بابا .
محمد : اباوعلهه بعدهه صافنه وتفرك بأيديهه حجيت شويه بصوت جوري .
جوريه : بفزه ااا هاااا ها ابو فالح تريد شي .
محمد : بابتسامه اريد ماي من ايدج الحلوه .
جوريه : اي هسه تامر امر انت .
محمد : راحت واجتي جابت الماي شربت وكتلهه كعدي عندي حجي وياج كعدت كبالي حجيتلهه على طلب امي والصار .
جوريه : براحه يعني امك رضت عنك وراح ترد مثل كبل .
محمد : انشالله .
جوريه : الحمدلله اهم شي رضا الوالدين زين اااو صفيه .
محمد : حالهه من حالج .
جوريه : اي طبعا هيه هم مرتك والهه حق بيك بس انا اريدن اكلك شي .
محمد : اعرف شتردين حبيبه ماتردين تردين هناك .
جوريه : هزيت راسي بمستحه .
محمد : بابتسامه أنا من غير ما تحجين ماخذنج هناك هذا بعد مسكنج .
جورية : مرت الايام ومحمد رجع يبات يوم هناك يوم هنا مرات من محمد يبات هناك تجي فضه يمي فضه نضلمت ويه مهدي الي كام يجيهه كل شهرين تلاثه هناك باقي كله يم مرته وفضه خطيه من النوع المتحجي كلش هادئه اليوم محمد يبات هناك وهيه جتني من الصبح كاعده انا اشلع رمان من الشجره مالتنه وهيه تكشر وتاكل وتوكل هناء وفالح .
فضه : اكلج جوري شو هذا رمانج حامض .
جوريه : بعد من ازكي اذبله مي وشكر .
فضه : موش هذا كصدي بس هذا حامض مثل اخوج ما ينبلع .
جوريه : بضحكه بهاي صدكتي بس انا من اول كتلج اخوي مو كفو .
فضه : ياله المهم كاعده يمج شحلاتهه الكعده وياج ويه ام علي اله صدك ام علي مابينت اليوم .
جورية : عدهم شغل بلكاع وراحت ويه النساوين ماكلتيلي عمي شون صار .
فضه : شكلج يا جوريه ابوي كاسر ضهري البارحه جنت يمه كلش منتهي نايم بلفراش وباقي جلد وعضم ويصيح من رأسه خطيه ملكه شايلته شيل واحد يحجي حك فوك حملهه طيحت ابوي المانعرف شني علته .
جورية : الله يساعده عمي صار اربع اشهر ماشاف عافيه .
فضه : شسوي جوري اخواني حارو بي اخذو البغداد وماعرفوا علته .
جورية : الله يشافي عمي ميستاهل ..
ضويه : مرت تلث اسنين وحياتي ماشيه صادق اشتهر بشغله وعمتي بقت ويانه عايشه هلسنوات حياتي عاديه كل بيت عراقي صار عندي بعد بنيه سميتهه تهاني انور هلسنه مدرسه وفرحانه بي كلش أنور صارعمره سته وازهر عمره اربعه ونص وتهاني سنتين وهسه حامل بدايه اشهري عمي حازم تمرض دز علينه قبل تلث اشهر رحناله بقينه اسبوع صادق شاف وضعه مو تمام جبنا لبغداد اخذو لدكتور معروف كايللهم جلطه ضاربته ومعديه بس اثرهه بعده ديربالكم عليه اجه يمنه عمتي انقهرت عليه دارته بس من بعيد لبعيد ترجاهه ترجع ويا مقبلت طلب من فرقد يرده للسلف يكول جو بغداد ملوث ودا فرقد اليوم واكفه بلباب متانيه انور اول يوم اله بلمدرسه عمتي راحت تجيبه اخذت ازهر وراحت تهاني تلعب شده يا ورد ويه بنات المنطقه واني صافنه على الدرب فززني صوت .
صادق : بضحكه الله يساعدهم ام انور .
ضويه : اويي صادق خوفتني .
صادق : خيرج شنهي متانيه الدكتور أنور .
ضويه : شو اتاخر .
صادق : بضحكه صدك تحجين تره بعد وكت شنهي راح ياكلوا انتي وبطنج واكفه بلباب .
ضويه : بضوجه عفيه بس يجي واطب .
صادق : تهاني تعالي بابا طبي جوه ياله عيني ام انور فوتي انتي لأخ .
ضويه : طببني جوه واني كعدت عتبت باب الهول وأيدي على خدي وصادق كاعد يصنف عليه اندك الباب طفرت صاح عليه .
صادق : وين وين على كيفج بطنج لتنسين روحج .
ضويه : راح صادق فتح الباب وطب انور يركض وطب ورا ازهر اجه حضني مكيف يسولفلي على المدرسه صاح ابوهم .
صادق : ولكم وين بيبي .
ازهر : بابه تجي ورانه .
انور : بابه بيبي تمشي على كيفهه وكلساع توكف تسلم على مريه .
صادق : وانتو عفتوهه واجيتو .
انور : تندل بابه هيه كالت .
ضويه : واكفه اباوعلهم واضحك على اسوالفهم .
صادق : هيه هاي سوالفكم فوكاهه امهم خايفه عليهم اروح ادور امي احسلي .
ضويه : ويه مجاي يطلع صادق طبت عمتي صاحت عليهم .
ام صادق : ولكم اني أعلمكم هيج تخلوني اركض وراكم اله اموتكم اليوم .
ضويه : مشه يومي هيج وعدت الايام .
جوريه : مرت الايام محمد كال امي نطتني حصتي الكاع اليمنه بس شغل الكاع مو قوي فعافهه بيد الفلح اليوم من الصبح جتني فضه فززتني .
فضه : الحكي جوري الحكي .
جوريه : بخوف شكو شبيج .
فضه : أنا حبله والله حبله .
جوريه : يا جا ما تكيفين .
فضه : شون ما كيف أنا فرحانه .
جوريه : بالعافيه عليج خيه انشالله يصيرلج سند احسن من ابو اله صدك البارحه سمعت حس ابو يسولف ويه محمد .
فضه : اي البارحه اجه الصبح .
جوريه : هله اكول مابينتي .
فضه : جا تردين اعوفن زلمتي .
جوري : همممم زلمتهه هيه ولج هم كلبج يرف عليه .
فضه : جا شون غير راعي بيتي .
جوريه : فضه اسكتي لا تخليني اجيب بلثامن من القهر .
فضه : بضحكه اروح أنا اسوي غده دسم لزلمتي .
جوري: راحت فضه واجه محمد أنا كاعده اضفر بشعر هناء صاحني .
محمد : جوريه تعاي شوفي شجبتلج فد شي تتمني من زمان .
جوريه : كمت بتفاجاء شنو هذا الشي طلعت للحوش وأشوفن بلحوش حوليا ( هايشه صغيره ) حجيت بلهفه هاي مالتمن .
محمد : هاي الج جبتلجياهه .
جوريه : كلش فرحت بيهه الجهال مكيفين فالح شويه خاف بالبدايه بعدين تعلم ثاني يوم الصبح كالي شرايج أخذ الجهال لامي تشوفهم .
جورية : اي شكو بيهه هسه ابدلهم وأخذهم بدلتهم وصدك اخذهم وراح واني ضليت الوب ها هسه بعد مقبلون يرجعوهم ها هسه يبجون اجت ام علي وفضه يمي .
فضه : خايبه جوري مشتهيه ماميه من ايدج .
ام علي : اليوم جوري جنهه مو ويانه يمعوده ذكري الله همه اهلهم قابل وين رايحين .
جوريه : يحجون وياي واني مادري جاوبتهن والله ايدي على كلبي .
فضه : دكومي كطعيلنه بانيه من حديقتج وسويلي أنا اخيتج وعاجبني .
جوريه : بعدهه صغيره خل تكبر .
فضه : أنا احبنهه صغيره .
ام علي : فضه بعد قفلت على بانيتج صدك هاي الحولي مالمن .
جوريه : فزيت من جابت اسم الحوليا خطيه ضلت بلا اكل ولا ماي .
فضه : يا هاي شبيج على كيفج سوي الباميه لا تستعجلين .
ام علي : بضحكه هسه تجيج سويج باميه .
جوريه : حطيت علف للحولي ومي ورحت كطعت باميه خطيه ليش يضل بنفسهه طبخت الغده ام علي وجهالهه راحوا بقت فضه تغدت وكعدت شويه حجت على ابوهه تكول حالته من اسوء الاسوء عبر الضهر انجطلت بطني كامت تلويني من القلق توني اغفى واسمع صوت هناء تصيح يمه وابوهم يكللهم على كيفكم لا تركضون كمت بلهفه عليهم شافني محمد بتسم .
محمد : ها بعد حيلي اشوفنج ملهوفه تره ردينه سالمين .
جوريه : ضحكت وبوست الجهال وكعدو يسولفون شون بيبيتهم مخليتهم بحضنهه وعماتهم يهوسن الهم ولاعبين ويه جهالهن .
محمد : امي من شافتهم بجت بجي يا جوري شكت كلبي حضنتهم وتبوس بيهم مجنت متوقعهه منهه .
جوري : جا غير جدتهم صدك اريدن اروح اشوفن عمي كلش تعبان .
محمد: إنشاءالله انا هم اريدن اروحن اشوفنه باجر اجي من الشغل ونروح .
جوريه : ثاني يوم رحنه شفنه عمي كلش تعبان نايم بلفراش مرته تكسر الخاطر تبجي كعدت يمهه واسيتهه فضه اجتي من شافت ابوهه كامت تبجي كالت.
فضه: ابوي ميطول اليوم شفت بلحلم اجه جدي أخذ ابوي وراح لازم ادز على اخوتي وأمي تجي تحالله تحجي وتبجي .
جوريه : شبعت قهر على عمي ورجعت للبيت فضه بلغت حسين اخوي راح لبغداد ينشد صادق و فرقد .
ضويه : مرت الايام وبيوم عصريه كاعده اخيط دكم بيدي
يجيبهن صادق للبيت اخيطهن اله من عنده شغل قوي ميلحك نكعد عليهن أنا وعمتي اندك الباب طلع انور فتحه
اجه كال هذا عمو حسين يريد بابه راحت عمتي طببه وانا لبست شيلتي طب حسين سلم علينه بس وجهه مايبشر بخير عمتي تلوب تريد تسأله بس كرامتهه مانعتهه رحت جبتله جاي شرب جايه وكال صادق بعده مجاي .
ام صادق : خير ابني شصاير .
حسين : والله يا عمه عمي حازم كلش تعبان وردت اجيبنه لبغداد ماقبل كلت اجي أحاجي الولد .
ضويه : عمتي متحملت دموعهه ترسن عيونهه بس تكابر ضل حسين يمنه المغرب اجه صادق وانطا خبر صادق تخبل على عمي ددز ابن خاله على فرقد واجه فرقد حجو وحدهم بلهول لليل اجاني للمطبخ كال.
صادق : بقهر ضويه ابوي كلش منتهي حتى اكل وشرب ميكدر حسين يكول جايبيله حكيم وكايللهم هاي أيامه توقعوا بيا ساعه يموت .
فضه : بفزه يمه اسم الله شجا عمي .
صادق : ضويه حضري روحج نروح للسلف لان ابوي مقابل يطلع من السلف أنا بلغت امي كتلهه تعالي حاللي وكالت اجي وياكم .
ضويه : حضرت كلشي فرقد راح جاب مرته كال ماخذهم طريق وبهذله الجهال انور جلب بيهم يحبهم خطيه هيه هم كالت .
انتضار : عوفي يمي اني اقري وابدله .
ضويه : يتعبج وانتي منا جهالج .
انتضار : بداعت امج بقي شوفي شون يبجي .
ضويه : صادق كال بقي علمود مدرسته هم فرقد صار عنده بعد ولد يعني هسه عنده بنيه ولد راحت مرت فرقد وأخذت انور بيت اهلهه واحنه الفجر طلعنه وصلنه الضهر لكينه فضه اول مشافتنه بجت بجي خلتنه كلنه نبجي وياهه عمامي كلساع واحد جاي وعالم طالعه طابه ملكه مرت عمي خطيه حايره بعمي وبلخطار من شافت مرت عمي دنجت راسهه وسلمت عليهه مرت عمي ردتلهه عادي مرت يومين عني وضعه متغير عمتي كعدت حجت ويا ولده حتى حجي كوه يحجي اجت جوريه فرحت بيهه وبجهالهه .
جورية : عمي كاسر خاطري .
ضويه : اي والله عمت عيني عليه .
جوريه : نوب هاي مرته شنو ذنبهه .
ضويه : ذنبهه نولدت بين ناس متعرف غير العادات والتقاليد .
جوريه: اي والله اكومن اساعد فضه .
ضويه : روحي أنا راح اشوفن الجهال والحكج .
ضويه : مرت خمس ايام على جيتنه نايمين وكعدنه على صياح ملكه الهز البيت هز ركضت اشوفن شكو صادق وفرقد ينامون يم عمي وملكه يمنه بس هيه بليل كلساع تروح شوفه فتت الحجره وأشوفن صادق غطى رأس عمي وفرقد يبجي بصوت أنا جمدت مكاني جتي عمتي دك وتلطم وفضه خطيه تصيح وتبجي اجوي عمامي اخذو عمي وصادق وفرقد وياهم بيت عمي انترس عالم طابه وطالعه عمتي كاعده وتنعي وفضه يمهه وملكه كاعده تبجي واجوي اهلهه يمهه وانا ساعه اكعد يمهن الطم ساعه اكوم للبيت كضت ايام الفاتحه بحزن جوريه يوميه تجي وتروح مر اسبوع سوينه سبعه مال عمي الله يرحمه ملكه اهلهه اخذوهه كالو تخلص عدتهه يمنه واحنه وره السبعه ردينه البغداد فرغ بيت عمي بعد ما جان مملي حب وحزن وفرح هلبيت بي هواي ذكريات عمتي تأثرت بوفات عمي اعتكفت بحجرتهه بعد مردينه البغداد اسمعهه مرات تنوح مرات تقره قران اني التهيت بجهالي وبيتي صادق هواي تأثر بوفات عمي مرات يكعد يقراله قران ويبجي يكلي راح بساع من عدنه وانا ضاله اواسي بيهم .
فضه : حالتي نفسيه دمرت بعد وفات ابوي مهدي معافني طول هلفتره هوه وياي ويحاول يواسيني نوبات تمرلي جوري طيب خاطري وتروح بس هذا ابوي ياهو اليكدر ينسيني حنيته حبه النه تعبه كلما اتذكر اشبع قهر مرت الايام ومباقي لاربعينيه اله يومين واجوي بيت صادق وبيت فرقد .
جوريه : بعد وفات عمي تأثرت هوايه بي لان جان حسبت ابوي والوحيد الروح البيته هسه المن اروح فضه خطيه حالتهه كلش تعبانه قبل يوم الاربعين مال عمي بومين اجتي ضويه رحت اساعدهه أنا وفضه وحتى ام علي جتي ويانه طبخنه وزعنه هاي عاداتنه ثاني يوم راحوا للنجف تمنيت اروحن بس بطني لزمتني خطيه محمد كل فتره يأخذني نروح انا ويا مشي كربلاء ونجف نضل يومين تلاثه ونرجع خلص راحوا كلهم حتى فضه مرت على الاربعين وره يومين رجعوا مكدرت اروحن احس من الصبح عندي وجع صارلي سبوعين بشهري محمد ملتهي بشغله وصار يوم هنا ويوم هناك اجه محمد الضهر مبتسم .
محمد : جوريه تدرين صار شي مثل المعجزه .
جوريه : خير إنشاءالله .
محمد : جوريه أنا اجيت اخبرج بنفسي لان اعرفنج تحبين الخير الغيرج وطيبه كلب .
جوريه : احجي محمد شصاير .
محمد : صفيه حبله .
جوريه : فدشي صدك معجزه وصراحه فرحتلهه كلش بلكي الله يعوضهه ويهديهه باركتله وهوه يكلي .
محمد : جوريه والله ثنينجن نفس المعزه جوري انتي بنتي مو مرتي تدرين بيه شكد احبج .
جوريه : بفرح اعرف والله مرت يومين كعدت الصبح عجنت حسيت ضهري وجع قوي نضفت وسويت اكل وخبزت كوه تقريبا بلتسعه بعد ماتحملت كمت ابجي من الوجع والجهال مكابليني ويبجون وياي واليوم مبينت لا ام علي ولا فضه اندكت الباب كمت على كيف امشي وابجي فتحتهه طلعت ضويه من شافتني فزت .
ضويه : خير جوري شجاريلج .
جورية : بصوت الحكليييي ضويه وجع وجععععع قوي .
ضويه : يمه اسم الله الرحمن ذبي حملج عليه وامشي جوه عود أنا جيت أودعج عبن باجر راده البغداد .
جوريه : بجي دزي على أم فرهد ولججججج يمممه ضويه راح اموتن .
ضويه : بسج خايبه فززتي الجهال بصياحج شمالج اول مره جا مو ذول ثنين .
جوريه : ضويه واااالله وجع قوي .
ضويه : خليج مجطوله صفح اروحن أصيح اي وحده .
جوريه : راحت وضويه وره نص ساعه جتي هيه وام علي ومره ماعرفهه .
جوريه : بجي ام علي وين ام فرهد بعد ماتحمل .
ام علي : هاي أم عبد امهه لمرت حماي هم جيب .
جوريه : المره بس فحصتني كالت هذا رأسه طالع كامت صيح عليهن جيبن مي جيبن هدوم وصدك ربع ساعه مطولت من اول طلكه عطت عيطه قويه وطلع الجاهل ساكت سالتهه خاله شو ماكو صوته .
ام عبد : بخوف ممما بي شي خاله .
جوريه : اسمعهه ضربه قوي كتلهه على كيفج فدوه خاله يتاذه ويه مجاي احجي ضربته ضربه قويه عاط وكام يناشغ بجيه فرفحت عليه .
ام عبد : يمه صلوات هلهلي يمه ام علي يوم الالج شوفي جنه العافيه .
ام علي : فدوه الله يخبل .
ضويه : بدموع يا عيني جنه كمر ولج جوري هذا يطلع كل جهالج كسر .
جوريه : بابتسامه كلهم نفس المعزه صدك وين الجهال .
ضويه : فضه يمهم لتخافين .
جوريه : نضفتني الجده وكعدتني كالت.
ام عبد : رضعي خبصنه بلصياح .
جوريه : أخذته اول مشفته صليت على محمد خليت صدري بحلكه راسن رضع وسكت اباوعله وجهه صافي وناعم شعر ناعم اسود بكثافه عيون سود بسواد اليل مخنزره وحواجب سود يلمعن ويه عيونه خشمه رفيع وطويل ميشبه فالح ابد بي ملامح من ابو حضنته وبسته قوي بقت يمي ضويه أجلت سفرتهه لعكب باجر للضهر اجه محمد من طب تفاجأ بيه نايمه وبحضني طفل تقدم عليه والجهال ورا .
محمد : بلهفه وخوف ليش مدزيتي عليه يروحي انتي أنا شون محسيت بيج وعفتح وحدج صار بيج كليلي .
جوريه : لا تخاف الحمدلله بساع جبت تقدم عليه باسني براسي وكال .
محمد : الف مبروك .
جوريه : مراح تسال شجبت .
محمد : كله رزق وخير من الله .
جوريه : جبت ولد .
محمد : الف الحمدلله .
جوريه : خليته بحضنه وهوه شاله وأذن بإذنه .
محمد : شو هذا ميضحك ومخنزر عليه .
جوريه : بضحكه ثكيل مايحب الخفه محمد اذا أنا حابه اسمي .
محمد : يجرالج أبويه انتي شراح تسمي .
