رواية صرخة مؤجلة الفصل الخامس عشر بقلم ود الزهراء
تلولحَت عيني لجَيتك انحب وادگ لفرگتك
ماحَصلت من عشرتَك غير النَحب والنايحَة
انحَب على فراگَك وادِگ وشحَصلت من هَل عشگ
الناِس تاكِل بالعثِگ وانِي اركُض على الطايحَة
اركُض على الطاحَت وأجِد تالِي صُفر إيدِي ترد
بأيدي زرعتَك ياورِد ولـ غِيري تنطِي الرايحَة..
جابِر الكاظِمي
•••••••••••••••••••••••••••
سَدف
اتصنمت بمكاني من سمعت حچية كمل كلامه يحچي بأستعجال حتى لا استعجل بالحكم عليه
غَطرَف:: اللّٰه شاهد مردت توصل الهالمواصيل بس مجبور حتى أخلصچ منهم و ما دام احنه مبيناتنا أي صلة ما اگدر اسوي شي و ابقى مربط ما يحقلي اساعدكم بأي شي و الشيوخ البالديوان كلهم اتفقوا على هذا الموضوع بس اني گلتلهم منخطي أي خطوة قبل لا آخذ رأي البنية و نعقد بدون لا صفگة ولا هلهولة ولا أي شي لأن محرم بس عقد
سَدف:: شجاي تخربطون انتم
گعدت بالگاع مهدود حيلي متچية ظهري على الحايط و مخليه إيدي على راسي يعني حطوني بين دربين لو الموت لو الزواج و لازم اختار صحت عليه ابچي
سَدف:: چااا انا المن شردتت ما تغير شي ما تغيرر شيي
وحيدة:: و خفى الهالصوت يطبچ مرض ياهو طگاچ على إيدچ و گلچ شردي اكليها ياللّٰه
سَدف:: من ضيمككم شوصلني انا لهنا غيركم
ضليت ابچي بصوت عالي و على نفس گعدتي داخل الغرفة و غَطرَف بالباب واگف گعد بمستواي يم الباب و حچة بهدوء
غَطرَف:: اثنينه مراضين، بس أحسن يذبحونچ؟ وهذولي الجهال وين يروحون؟ بالنسبة إليّ، آني رجال غريب، وهاي أولًا، ومكاني بعيد. شمعرفني إذا انضربوا، إذا اتمرضوا، حتى توصيني عليهم، ما أگدر أوعدچ وأگولچ آني أنتبه عليهم لأن هذا ظرفي. وإلّا الله شاهد، لو چنت قريب عليهم وأگدر أحميهم بنفسي، ما أطلب منچ هالطلب حتى أضغط عليچ بيه. وأصلًا آني كلش خجلان منچ، بس هذا آخر حل... إذا تريدين إخوانچ يعيشون ، فـ الخاطر إخوانچ.
سَدف:: ما تغير شي انا شردت علمود ما اتزوج و هسه تگلي تقبلين
غَطرَف:: ما اگدر اگلچ براحتچ لأن يكتلونچ كل الاگدر اگوله الخاطر اخوانچ فكري عدل يلا تردين الخبر منا للعصر
باوعلي بأسف و عافني و راح، عمتي وحيدة غمتني و همين طلعت بقيت وحدي ابچي ما بيدي شي على روحي
ضلت الافكار تروح و تجي براسي و كلشي مخربط من ناحية اگول هذا غسان ابن عمي و اعرفه نذل و كلب يعني اعرف معدنه شنو بس هذا الولد غريب لا اعرفنة ولا يعرفني اخاف انوب يطلع أنذل من غسان، لا لا احس تصرفاته ما تثبت هوَ نذل ساعدني و خلف اللّٰه عليه بس همين ما اگدر أثق بيه
اثناء ما گاعدة رفعت عيني للساعة لگيتها وكت صلاة گمت من مكاني و رحت اتوضيت. و رجعت للغرفة صليت و صليت وياها الفجر قضاء ما بالذمة لأن ما صليتها اليوم، ضليت گاعدة على السجادة و ادعي من كل گلبي اللّٰه يختارلي البيه خير اليَ، هذا الحچي اصلي و هُمَ هوستهم گايمة ما سكتوا ادري ما تصلوون ما تذكرون اللّٰه فالحين بس بالطلايب لميت السجادة و اخواني گعدوا من النوم جوعانين سودة علي ما مخلين لگمة بحلگهم منهد لگمة الغدا ببيت ام اسماعيل، گتلهم
سَدف:: شوي و كلنه ناكل
رحت يم علاوي اشوف حرارته زينة لا اتلمست وجهة خافه حرارته زينة ضليت گاعدة يمهم نصفن و ميونة تغفي
سَدف:: مينا ترجعين تنامين؟
هزت راسها بـ اي عدلتلها المخدة و نومتها عليها و غطيتها بقينة بس انا و علاوي شوي و دخلت نيروز بأيدها صينية بيها اكل حطتها گبالنه و خزرتني بعيونها المورمة و الحمر مبينة باچية نترت بهمس
نيروز:: المنن اجيتي؟؟
سَدف:: هُمَ لگوني
نيروز:: ما افتكك منچ اناا ولچ هستوني شفت باب اللّٰه و انتِ طگيتيني صفح
سَدف:: شليي غرض انا قابل ميتة عليكم و جايةة
گعدت بالگاع گبالي ناطة من البچي و مخلية ايدها على حلگها حتى لا يطلع صوت بچيها
نيروز:: ولچ هستوه بدا يميلي ليش تجيننن ليشش ولچ عوفيني ارتااح سالبة راحتي سَدف سالبة راحتي
سَدف:: لا تضلين تمضرطين انا معلية و الزهرة مالي غرض هُمَ اجو و خذوني و افرحي راح يذبحوني هسه على شنو تبچين
ضلت تهز براسها لا اكثر من مرة و ميتة من البچي شكلها گطع گلبي بس انا شعلية
نيروز:: ما يذبحونچ ما يذبحونچ غسان ما قبل يگللهم زوجوها اليي ما تذبحونها بس عمامچ ما قبلوا بحچية گالوا لازم نكتلها و نغسل عارنة
سَدف:: لو ينط ما آخذه لو ينطط
نيروز:: فكيني من شرچ سَدف ولي عني ما نريدچ ما نريدچ ما تفتهمين
سَدف:: دررووحي على اساس انا كاتله روحي عليكم هوَ انا اريد بس اخلص منكم انتم ما جاي تعوفونيي، كافي نيروز عليمن مگطعة روحچ على غسان و رايحة عيونچ ياهو هوَ مهندد
نيروز:: معليچ بية انا كاتله روحي عليه لا تدخلين بس عوفيني فكينيي
عافتني شايطة و طلعت تمسح بوجهة، گعدت مينا حتى تاكل هي و علاوي اكلوا و انا همين كليت لأن بايدة روحي من الجوع، كملنة اكل الحمدلله و ضليت شوب گاعدة مترددة اطلع اودي الصينية بس آخر شي گمت شلت الصينية و طلعت للمطبخ خو ما اضل گاعدة هنا لازم اوديها و همين بدربي اتسمع على حچيهم بالديوان، طبيت للمطبخ لگيته نظيف و غاسلات المواعين انا همين غسلت مواعينة و ضميتهن و طلعت. من المطبخ رحت يم باب الديوان مسدود وگفت اتسمع عليهم
صباح:: احنه ما راضين بالزواج بس الخاطرك شيخ رضينة من عبنك رجال خير و ما نريد نتخارب وياك
بقى الشيخ يمدح بيه و يتشكرة و من هذا الحچي و ضلوا يسولفون بأمور عادية يعني انا اجيت بالنهاية بس ميخالف ضليت واگفة اسمع گال الشيخ اللي اجه وي غَطرَف عرفته من صوتة و طريقة حچية
-من رخصتكم يا جماعة بس صيحولنه البنية حتى يعقدلهم السيد لأن ورانا طريق ما نگدر نطول اكثر
صباح:: هاي گدام الكل ما عدنا بت اخو منا و هيچ متبرين منها و من اخوانها الصغار همين
صارت اصوات الزلم تتعالى معترضين على كلامة و انا احس سچاچين صارن بصدري امداچ سَدف انعمت عينچ يالغبية احسنلچ هيچ؟ فعلتچ الغبية وصلتچ لهنانة اكليها يالله اكليها
هسه تنكتلين تنهانين محد يطلع وراچ راح تضلين طول عمرچ مذلولة ما دامچ بدون اهل و هسه اليعتبرون اهلچ اتبروا منچ اكليها يالله، نزلن دموعي و وي ما جاي امسحهن سمعت احد يتقرب على الباب كضيت و شردت للغرفة و سديت الباب و اقنع نفسي عساس هسه هُمَ يدافعولي لو انهانيت،
انفتح الباب و دخل عمي صباح ما يحط عينه بعيني
گال
صباح:: حطي عباتچ على راسچ و تعاي وياي
وگفت گباله ابچي
سَدف:: عمي آسفة واللّٰه آسفة اتصرفت بغباء فدوة سامحوني
ردت آخذ إيدة ابوسنها بس ما خلاني سحبها مني و ابتعد مأشر على الباب بدون ما يحط عينة بعيني
صباح:: ياللّٰه سَدف اطلعي
سَدف:: لا عمو فدوة
عاط بية بعلوا صوتة
صباح:: گلللت اطللعيي
فزوا اخواني و ضلوا يبچون و انا عيني تتوسلة و ميتة من البچي اتخبل ضل يصيح
صباح:: يلااا وين عباتچ اطلعي ما اريدن اشوفنن وجهچ
ضل يدور على عبايتي عقله طاير اللي هي عباية عمتي وحيدة دنگت خذيتها من الگاع و خليتها على راسي و ما عندي كلام يوصف ندمي بس دموعي تسولف طلع هوَ و انا طلعت وراه و عفت اخواني يبچون وراي انا سبب خوفهم و دمارهم اناا
ما اگدر اسكتهم لأن انا السبب بكلشي جاي يصير وياهم
طب عمي للديوان و سد الباب بقيت انا واگفة بالباب و كلهن. يعاينلي و صبيحة تعاينلي بشماته و نيروز طايرة من الفرح لأن راح تتخلص مني التقت عيني و عين براء سوية نزلن دموعها و مسحتهن بسرعة درت وجهي على باب الديوان مسحت عيوني بطرف الشيلة و انتظرت شوي و طلع من الديوان عمي صباح وگف يمي و الباب مفتوح على النص گاعدين بالگاع بصف الباب السيد و گاعد بصفه غَطرَف ثاني رجليه و مدنگ يباوع الساعته انا همين گعدت بصف الباب ضليت مدنگة السيد گال
- تسمعيني بابا
سَدف:: اي اسمع
ضل يحچي آيات قرأنية و بأمور الزواج و استمع بكل تركيز لكل كلمة يحچيها كمل كلامة و أخذ موافقة غَطرَف و سألني يريد ياخذ الموافقة مني و انا احس گلبي طاح ببطني انطيت الموافقة و صوتي يرجف
سَدف:: نعم و أنتَ وكيلي
صلوا على محمد كل الگاعدين و انا ما ادري شبية احس بگلبي راح يوگف من گد ما يدگ حيل وگفوا هُمَ و انا همين وگفت و رحت رجعت للغرفة اركض و احس بشعور غريب ما اعرف شنو هوَ بس يعني هسه انا متزوجة صرت؟ واللّٰه الموضوع يبچي رحت گعدت يم اخواني شبگتهم و ضليت انحب ما اريدنه ما اريدنن
انفتح الباب و دخلت براء اجت عليَّ شبگتني حيل انا ابچي و هيَّ تبچي وياي
سَدف:: ما ارريدن اتزوج برااء
براء:: ميخالف يَروحي چا شتسوين يمكن يطلع خوش رجال و يخاف اللّٰه بيچ اصبري حبيبتي و همين اتعلمي درس و اتحملي نتيجة غلطچ
سَدف:: ندمانة واللّٰه ندمانة
شبگتني و ضلت توصيني على اخواني و على نفسي و حتى على غَطرَف و على امه و تعلمني شنو اتصرف وياهم و يمكن اسمع حچي لازم اسكت و بعد حچتلي هواي توصيات و انا نصهن افهمهن و نصهن لا بقت تقريبًا ما اعرف شگد تسولف وياي و انا ساكته احس بعدني ما مستوعبة بس استاهل كلشي يصير بية
دخلت علينه نيروز گالت
نيروز:: سَدف يلا رَجلچ يصيحلچ يگول راح تروحون
هي گالت هيچ و انا رب العالمين ذب عليَ نحيب و بچي فرفحت براء احتارت بية ما تعرف شتسوي و وي هذا النحيب و البچي اسمع صوت غسان ضل يصيح صياح و يحلف و يتكفر سَدف ما تطلع من البيت وي غَطرَف شماله هذا هستوه اتذكر! براء ضل تصيح عليَ
براء:: گووومي ولچچ بسرعة روحي وي رَجلچ راح تصيرلنا سالفة ياللّٰه گوموا بعد گلبي ياللّٰه
راحت على اخواني گومتهم و انا حطت العباية على راسي و ضمت شعري بشيلتي و جرتني مگومتني مسحت عيوني بالشيلة و عدلتها و لزمت اخواني و طلعت حتى ما ودعتها هي لزمتني باستني و تگلي
براء:: مثل ما وصيتچ سدوفة گلبي انتِ
هزيت راسي لگيت غَطرَف واگف بباب الهول مچتف إيده ورا ظهره يباوع الغسان اليرعد و لازمينه عمامي بس شافني خايفة و اباوع الغسان أشرلنا بمعنى تعالوا عفت اخواني و مشيتهم گدامي و رحنه يم غَطرَف لبسنا احذية ما ادري مال منو لأن اجينة حفاي ما خلونه نلحگ حتى نلبس احذيتنة گلت خاف حرام علينة ردت ارجع حتى اگول البراء گال غَطرَف
غَطرَف:: هاا وين
سَدف:: اگولن البراء راح ناخذ احذيتهم خاف حرام علينة
صاح بصوت مسموع يابة ترا خذينة احذيتكم ابرونة الذمة گالها و خذه الجهال و طلع حتى ما انتظر ردهم يمكن ما قابلين هوَ و اخوه الچان واگف بباب الشارع و انا نظرت آخر نظرة للبيت و العمامي و طلعت وراهم و عفت وراي غسان الشايط و عمامي يصيحون عليه و يغلطون عليَ ما گدرت ما ابچي ماادري شنو صار و شغير تفكيري يعني انا طلعت منهم اول مرة ما مهتمة و اريد بس الفكة منهم و هسه أحس بتأنيب الضمير خصوصًا من حاچيت عمي صباح
صعد رجال معگل گدام و انا و الجهال و غَطرَف ورا و ذَوّاد يسوق و انا صعدت يم الباب و غَطرَف من الجهة الثانية و اخواني بيني و بين غَطرَف درت وجهي للجامة عيني على البيت هاي آخر مرة اشوفه و عيوني ما بطلن من البچي، حركت السيارة و كلهم قروا الفاتحة لأم البنين
ضميت وجهي بعباتي و ابچي بسكات حتى لا يسمعوني، يبين يمهم انا اعاين من الجامة و بنص انهياري دغتني مينا بچتفي و همست
مينا:: اريدن اگعد يم الجامة
مسحت عيوني بالشيلة و درت عليها شلتها و خليتها بحضني حتى تباوع و انا درت وجهي همين على الجامة هسه اكيد وجهي موروم و مبين باچية
غَطرَف گال الاخوه
غَطرَف:: حاچيت امي؟
ذَوّاد:: اي اتصلت عليها جاوبتني رواء
غَطرَف:: امي شلونها
ذَوّاد:: زعلانة شوي من نوصل و تفهمها تصالحك زعل حبايب
غَطرَف:: اتصلت عليها هواي مردت عليَ هالمرة زعلها قوي
ضحك بخفة مبين مقهور بس ما يريد يبين ما عرفت شنو السبب و التزمت بالصمت ما حچيت أي شي، مشينة مسافة طويلة شغل المسجل ذَوّاد مال السيارة و طلع قراية آنه يـالميـمون بصوت حمزة الصغير
-آنــه يالميـمون... بيـدي جدمتك و نخمش گلبي
من رحـت بحسين.. باللّٰه ودعتك و الباري حسبي..
بقت روحي تلوب... و انتظر جيتك و عيوني تربي، حسين چا وينه؟
الكلمات حزينة توصف حال السيدة زينب ع و هيَّ تخاطب حصان الأمام الحُسَين ع بعد معركة الطف من كلهم انكتلوا و اجه المهر بدون الامام الحُسَين ع... صوت الملا حزين جدًا و حنين، لگيت شي ابچي عليه و اطلع ضيم گلبي كله غطيت وجهي و بچيت بدون صوت
شبگ ايدي علاوي يحاچيني
علي الرضا:: ليش تبچين
سَدف:: انقهرت على روحي و بچيت
همستها بيني و بينه ما اريد احد يسمعنه گال
علي الرضا:: من اشوفنچ تبچين اضوجن
مسحت دموعي و بست شعره لأن قريب على وجهي و الوحه و مينا نايمة على صدري ما اگدر اتحرك عدل،
ب
الغلط صارت عيني على جهة غَطرَف لگيته يباوع علينه اهووو وين انطي وجهي هسهه من شافني انتبهتله نزل عينه للموبايل يكتب بالكيبورد درت وجهي بعد من عنده شو هذا دغني بچتفي درتله هزيت راسي هاا دار الموبايل عليَّ كاتب
" لتبچين تينة ترا ما راح ناكلچ"
فتحت عيني على وسعها شنني يگلي تينة، باوعتله خازرته و همستله
سَدف:: مالك غررض بية
ابتسم و دار وجهة للجامة و انا همين درت و گلبي يدگ حيل
صارت الدنيا مغرب و طبينا البغداد متوجهين البيت غَطرَف و ما چنت ادري باللي منتظرني من اروحن هناك ولا ادري راح ينفتح عليَّ باب الجهنم ثانية..
