رواية حين تتغير الاقدار الفصل السادس عشر بقلم سناء الهموندي
بعيني حجايه جيب اليفتهما
دمعتي بلاسب توكع والمها
اكو بذاكرتي ناس تعيش وتموت
ناس اعرفها ما اعرف شسمها
غلام : يمه يمه كومي كعدي .
جوريه : خير يمه غلام شمالك .
غلام : يمه شبيج يوجعج شي شعجب ماكعدتينه للصلاة طر الفجر .
جوريه: بفزعه ياااا جا يمه ساعه بيش خذتني نومه عبن البارحه تأخرت بشغل الحصران لنص اليل شنهي اخوك ماكعد خواتك وينهن .
غلام : هناء تعجن وسلطانه ودت ماي للهايشه و فالح نايم .
جوريه : ها خوش .
غلام : يمه أنا رايح لابوي للسكه اساعده عبن البارحه شفته تعبان .
جوريه : الله وياك يمه تحفضك الزهره راح غلام وانا كمت على البيت خلصت اختمر العجين خبزت هناء توكف يمي تريد تخبز بس اخافن عليهه من التنور الطين وهيج كضت ايام .
ضويه : رحنه لبيت عمي حبيب كبران ويلعب ومرت عمي ملكه رحبت بينه وفرحت بجيتنه ضلينه بلسلف سبوع وردينه واستمرت حياتي مثل ماهي ماتغير شي صادق رفعو بلوضيفه وحالنه صار احسن الحمدلله وفرقد اله اسم بلدوله كلش جبير .
فضه : بنيت كل حياتي لخاطر جهالي مهدي اعتبرته هوه والميت سوه كمت حتى من يجي ماهتمله ولا ادير بال جهالي كبرو وصاروا يرغبون إليه أكثر من ابوهم وانا هم احاول اعوضهم عن كل شي .
ام علي : يمه علاوي ودي هذا الماي والأكل الابوك بلكاع تلكي كتله الجوع .
علي : اي يمه صار أخذ تمار وياي .
ام علي : اخذه وياك بعد امك لا تبطون على ابوك .
تمار : رحت ويه علي نودي اكل لابوي كتله اكلك علاوي خلي نفوت من بستان عمي محمد .
علي : مو وكتك تمار ادري بيك تريد تروح علمود غلام .
تمار : دتعال بسرعه شبيك وصدك انفوت للبستان وأشوفن غلام مسوي مرجوحه بين نخلات ثنين وحده قريبه على الثانيه والجهال ملتمه عليه ويلعبون انا هم عفت علي وركضت كل حيلي وعلاوي يصيح ورايه .
علي : ولك تمارررر تعال والله اله اخلي اني تكتلك تقشمرني اني الك .
تمار : والله فره وحده ونروح وصدك اخذنه الواهس ويه غلام أنا وعلاوي بلمرجوحه ونسينه ابوي إلى أن حجه غلام : اكلك تمار هاي المن البستوكه وهاي شنو جايبين اكل وياكم اي والله عاشت ايدكم شمدريكم جوعان .
تمار : باوعت على علي وهوه هم يباوعلي وفكينه عيونه ثنينه وطفرنه فد طفره أخذنه الاكل وركض الأبوي .
غلام : ها ولكم جا والأكل ماناكل .
علي : يمعود هذا الأبوي واحنه نسينه .
غلام : بضحك جا خوش شبع ابوكم .
تمار : رحنه للكاع لكينه ولا واحد بيهه ضلينه ندور على ابوي ماكو حتى الفلح اليشتغلون ويانه ماكو رجعنه للبيت واخته خايفين مانعرف شون راح نتعاقب عبن ابوي ميتفاهم كتله لعلاوي اكلك هسه شنكل لابوي .
علي : والله مادري انت ورطتنه انت دبرهه .
تمار : انا اكولن لو نرجع للبيت ونكل لامي علصار وهيه تحلهه .
علي : بكيفك المهم نخلص جا شعبالك ابوي يعديهه النه .
تمار : بخوف دبسك اليسمعك يكول ابوي مجرم وصلنه للبيت واسمع ابوي يصيح بصوت عالي متكليلي وين ولدج راحو صار ساعه أنا من رديت للبيت وهم ماكو .
ام علي : بارتباك هسه على جيه تلكاهم يم بيت ابو فالح .
تمار : مبين السالفه جبيره .
علي : وشكبرهه غيرك .
تمار : دتعال نفوت والله كريم بس خلي نسمي باسم لله طبينه على كيف امي صارت بوجهنه اخذت الاكل من عدنه وضمته وكالت بصوت ناصي .
ام علي : وين جنتو ابوكم كلب البيت علينه من وراكم .
تمار : يمه والله اخذنه الوكت ويه غلام .
ام علي : ابوكم سال على الغده وكتله نسيت ادزلك علمود لا يحجي عليكم .
علي : يمه وانتي شمدريج احنه ماودينه الغده .
ام علي : عبن ابوكم اول مطب للبيت سال عنكم وكال شو اليوم ماجوي عاد أنا عرفت سوالفكم .
تمار : هاي شنو يمه عاجنه سويلي وياج خبز بلدهن وحطيلي شكر عليه هوايه ولا تنطين منهه لنوره .
ام علي : بضحكه خوش مانطي ل نوره بس كلي شبيك وياهه وهيه اخيتك وبعدهه صغيره لازم تحبهه جا شون تحب شمس واختك متحبهه .
تمار : صدك عود انطيني اودي لشمس همين .
ام علي : بضحك مصيرلك جاره .
تستمر القصة أدناه
"
تسريع الأحداث حسب طلب البطله لان احس صار عدكم ملل. "
جوريه : مرت السنين وهسه احنه نهايه ال68 وانا خلفت ثمن جهال اربع بنات واربع ولد فالح وغلام وسلطان وعمران واربع بنات هناء وسلطانه وشمس و احلام اخر واحد عمره ست اشهر جبته محمد صرت اشوفنه كلش قليل عبن شغله من الصبح لليل بلكاع وبلسكه مال قطار بيت عيالي كل هلسنين المرت طبيتلهم مرتين أو ثلاثة أمه توفت من سنتين إخوانه كلمن ملتهي بشغله خواته نوبات يمرن علينه خطيه هم ضيمهن شاغلهن صفيه صار عدهه الولد وكعدت بعد مخلفت استقرت بيت اهله وحدهه هيه وابنهه ومحمد يوم يمي يوم يمهه واكثر شي يبات هناك عبن هيه وحيدهه ولدي وبناتي كبرو فالح طوع بغداد بحراسه من سنه ونص تقريبا وصار كل وكته بغداد أنا ما قبلت بس هاي رغبته ورغبت ابو اليوم ناذره خبز العباس النجاح غلام والحمدلله نجح وانا هسه جاي اوفي بنذري .
هناء : يمه اخلي الخضره بطن الخبز هسه لو بعدين .
جوريه : اي يمه خلي وانطي لسلطان يوزعه .
سلطان : بضحك يمه تره هذا الخبز مو إليه الغلام .
جوريه : واذا لغلام .
سلطان : يمه هوه يوزعه جا انتي مو ناذرته اله .
جوريه : يا يا من كون فلك خايب هوه اخوك مو اجه بشرني وراح لابوك يساعده بلكاع .
سلطان : ياله نطيني امري لله .
جوريه : ودي لبيت ام علي ولعمتك فضه لا تنساهه .
سلطان : لا يمه ما انساهه والله قابل أنا خالي مهدي وانساهه .
جوريه : ولك أنا الك ابو السان اكلتنه اكل علمود تودي الخبيزات .
سلطانه : يمه فار الحليب شسويله بعد .
جوريه : طفي وعوفي يدفه هسه كملت أنا اجي واكملنه .
سلطانه : خوش يمه .
جوريه : جا شو شمس مالهه حس وينهه .
هناء : تنيم بعموري عبن كعد يبجي .
جوريه : كملت الخبز وسويت غده وفتت اغسل بين ما يتهدر التمن طلعت لكيت محمد جاي ابتسمت له وكتله الله يساعدك .
محمد : بتعب ساعدج الله حبيبه شونج .
جوريه : بخير مادامك بخير .
محمد : عذريني جوريتي أنا مقصر وياج هليام جياتي قليله عبن شغلي لراسي .
جوريه : معذور ابو فالح انت الخير والبركه أصبن غده يو وره الصلاة .
محمد : لا خلي نصلي مضل شي بعد 10دقايق .
جوريه : رحت حضرت الغده إذن صاح محمد مثل عادته كل مره ويه الصلاة لازم الكل يعوف شنو بيده ويوكف يصلي .
محمد: ياله وينكم إذن يمعودين تعالو عوفوا كلشي .
جوريه : صلينه وكعدنه نتغده حجه محمد .
محمد : فالح داز مرسال بيد ابن خاله انور يريد مصرف .
جوريه : يمه فدوه لعينه نواري اجه جا شو ما اجه سالم عليه .
محمد : جايب مصرف لعمه حبيب .
جوريه : ها خطيه وشبي فالح خلص فليساته مو قبل اسبوعين دزيتله عود كيفت كلت اشتغل راح يشيلنه عشتو .
محمد : ميخالف جوري ابنه قابل مادزيله .
جوريه : أنا اكول خله يتصرف عدل عبن احنه كون ندبرهه وهوه مال حاضر يتلفسهن .
محمد : أنا من يجي أحاجي .
جوريه : الله كريم ...خلصنه غده وشلنه السفره كعدت ارضع بعمران والجهال مجطلين يأخذون قيلوله الضهر طلع محمد من الحجره كال .
محمد : أنا رايح للكاع اشوفنهه اليوم ما مريت عليهه عبن شغل قوي عدنه .
غلام : اجي وياك بويه .
محمد : لا بويه خليك انت أنا اشوفنهه واروح لبيت عمك صلاح عبنه جاي من العمره .
جوريه وغلام : الله وياك .
غلام : يمه ابوي هواي تعبان حاجي يعوف السكه وانا اشتغل مكانه والله لو تشوفي شون راد يوكع ولزمو العمال اليوم .
جوريه : بخوف يااا يمه جميله شبي ابوك غلام احجي .
غلام : يمه ما تشوفين ردينه من وكت عبن ابوي تعب والعمال كلوله روح ارتاح .
جوريه : سوده بوجهي جا شو ماكلتي .
غلام : شكلج يمه هوه ماخلاني كالي لا تخوف امك ما بيه شي .
جوريه : ضليت بخوف وقلق للعصر اجتي ام علي هيه وتمار .
ام علي : ها ولج هناوي كملتي الطبك مالتي .
هناء : اي خاله كملته اجيبه شوفي .
ام علي : لا يمه اعرف شغلج حلو مثل امج .
هناء : لا خاله مو لونته الج مو عبالج لون واحد .
ام علي : ياا وشون لونتي ولج .
جوريه : هاي ضويه جابتلهن الوان وصبغت بيهن الخوص ولونتهن .
هناء : هذا خاله شوفي .
ام علي : عاشت ايدج شون حلو مسويته .
هناء : وايدج خاله بالعافيه ..
تستمر القصة أدناه
تمار : ها يبعد اخوك ما قتنعت .
غلام : بشنو اقتنع .
تمار : انروح انصيد سمج
غلام : اعذرني خويه تموري ماكدر كتلك ابوي تعبان وماهون اعوفنه بحيده .
تمار : جا انا هم ماروح لما يصير عندك مجال .
غلام : بابتسامه جا شلك دخل بيه روح انت .
تمار : خلص أنا كلت لما تفرغ سمعت ابن خالتك جاي هنا .
غلام : اي اجانه للشغل خطيه سلم علينه كال العصر امرلكم للبيت .
تمار : اباوع الشمس بعدهه 10 اسنين ممكمله بس هيه ماشاءالله مبينه اكبر وشعرهه قصه طويله وشو أنا ما عرف شمالني اغار أحد يباوع عليهه بلا حجاب يمكن جي متعلق بيهه من الصغر واعتبرهه بمثابت نوره وزمن طردت الأفكار من راسي وكتله اكلك هاي من يجي ابن خالتك اقصد انور هم شمس متلبس حجاب كدامه انتو مو حجبتوهه المفروض تلبسه كدامه .
غلام : شبيك تمار انت شتحجي شمس كله عمرهه ممكمله ال 10سنوات يعني تسعه وكم شهر بعدين هيه تلبسه كدامك .
تمار : بضوجه طبعا لا .
غلام : وهيه كدام ولد خالتي هم متلبس عبن بعدهه صغيره .
تمار : ضجت من حجي غلام وقررت احاجيهه بنفسي احسن شي حتى لو متفتهم أنا افهمهه وصدك قبل مارجع لبيتنه شفتهه تنطي للدجاج اكل بلحديقه هيه ونوره اختي انا هم كعدت بطرف الحديقه وحجيت بجديه شمسسس.
شمس : بفزه هاا تمار اكو شي .
تمار : اي اكو روحي لبسي حجاب راح يجي انور .
شمس : اي ادري راح يجي .
تمار : بستهزاء صدك تدرين .
شمس : اي والله ادري .
تمار : بصوت أشبه بعالي جا كومي لبسي حجاب بسرعه وبعد ممنوع طلعين شعرج كدام احد .
شمس : بخوف وركضه للداخل بعد مطلعت .
تمار : تقدمت عليه نوره وحجت .
نوره : ليش خوفتهه مو خطيه اله اكل لابوي عليك .
تمار : حتى اموتج .
نوره : اروح يم امي احسن .
جوريه : راحت ام علي لليل اجه انور ورا محمد تعشينه وكعد محمد يسولفنه على سوالف قبل وانا روحي بلقصص انور بات عدنه بقى يومين ثاني يوم بليل كلي .
انور : خاله أنا باجر راد لبغداد تردين شي مني
جوريه : والله ماشبعت منك دضلك بعد يومين .
انور : لا خاله اروح امي يضل بالهه وأبوي هم كتلهم يومين وارجع تعرفين أبويه مو مثل قبل يكدر يجي ويروح .
جوريه : اي خطيه الله يساعده يمه انت هم ديربالك طريق بعيد ويخوف .
انور : لا بلعكس امان ماكو شي وانا هم لا تنسين كبرت عمري 19سنه .
جوريه : بضحكه والله يمه بعيونه شكد متكبرون ضلون جهال وعود امك ليش ما اجت صارلهه خمس اشهر ماجايه .
انور: خاله مو تعرفين التهت بيبيتي خطيه حالتهه كلش تعبت طريحه بلفراش وانتي تعرفين شكد يرادلهه اهتمام .
جوريه : اي صدك الله يشافيهه متستاهل عمتي ثاني يوم من الصبح راح انور بعد ما ودعته ودزيت بيده تمر وراشي و دهن حر لضويه وره اسبوع دنيه ليل كاعده احمي خبز على صوبه وناكل ويه الدبس والراشي أنا ومحمد والجهال من عده فالح بغداد محمد كال.
محمد : اكلج جوريه شرايج انصلي صلاة اليل ونطلع لكربلاء .
جوريه : والله ياريت تعرف أنا من حبلت بعمران مارايحه
محمد : جا هيري نفسج بلوحده بس نصلي صلاة اليل نطلع شدكول بويه غلام .
غلام : روحو بويه الله وياكم أنا هنا يم اخوتي .
هناء : ترحون وتجون بلسلامه .
جوريه : نامو الجهال راح محمد انطه خبر لبيت ابو علي حتى يتفقدون الجهال واحنه طلعنه بحدود الوحده وشويه طريق بعيد نص مشي ونص سياره وصلنه ب 8الصبح صلينه الفجر بلطريق وصلنه توضينه وطبينه سوه أنا ومحمد الإمام بي ناس قليله بس دخيل اسمه الاحساس ال بالحضره مينوصف وريحه ياربي تعطر النفوس وتزكي الروح تحس عبالك زحت كل همك بهل مكان المقدس صلينه ودعينه وصليت لامي وأبوي ودعيتلهم بلرحمه وضلينه لصلاة الضهر ومحمد كال .
محمد : ها ام فالح انرد أو تردين بعد ضلين .
جوريه : لا هم ياله نرجع الجهال وحدهم خطيه .
محمد : توكلنا على الله ياله أبويه كومي نرد .
جوريه : ردينه وما وصلنه اله وتالي اليل لكيت البنات محضرات عشه ومنتضرينا تعشينه ومن التعب ذبينه روحنه بلفراش وره اسبوع رحت لبيت فضه اشوفنهه مو من عوايدهه ما تمرلي كل يوم رحتلهه دكيت الباب طلع مهدي شكله متعصب كال .
مهدي : هلا باام فالح زارتنه البركه شونج اخبارج شو منشوفج .
جوريه : هلا بيك خويه انت شونك .
مهدي : الحمدلله .
جوريه : جا وين فضه .
مهدي : فوتيلهه جوه تسوي غده .
جوريه : فتت لكيتهه كاعده تكلي سمج ومكشخه من شافتني ابتسامتهه شكت وجهه .
فضه : هلا بلعيد همزين ذكرتيني .
جوريه : علساس أنا ناسيتج والله على بالي بس كلت شعجب ما بينتي .
فضه : بستهزاء وبضحكه جا غير رجلي يمي شون اعوفنه خيه .
جوريه : باستغراب لا حقج بس شنو هلتغيير تره دوختيني .
فضه : بهمس وداعتج ماكو اي تغيير بس انا قررت اتجاهله هل تشوفينه شاش علينه .
جورية : بضحكه عاشت ايدج أنا اكومن اروح .
فضه : دضلي تغدي وياي عليج الله .
جوريه : دخيل الله لا تحلفيني تردين اكابل مهدي واكل غير يصير عندي تسمم .
فضه : بضحكه حقج خيه لعد أنا شدكولين عليه .
جوريه : الله يساعدج ياله مع السلامه .
فضه : الله وياج حبيبه.
جوريه : مرت الايام والأسابيع حياتي ماشيه البارحه محمد جان يمي اليوم ماجه للبيت أنا استغليتهه فرصه اشتغلت السلالي والحصران عندي كميه جبيره اشتغلت أنا والبنات وياي للعصر ياله كملناهن غلام وسلطان اجوي من السوك وبايعين الخضره .
غلام : الحمدلله اليوم الشغل زين .
جوريه : الحمد لله الله يرزقكم يمه .
سلطان : جا ابوي ماجاي بعده مرينه عليه للكاع مالكينا .
جوريه : لا والله يمه بعده خاف راح لبيت عمتك صفيه.
غلام : لا يمكن بعده بلسكه عبن هلسبوع لازم يكملون تزفيتهه .
جوريه : شني هاي يمه .
غلام : هذا جبير اسود يمه يزفتون بي .
جوريه : هاااا روحو صلوا حتى تتغدون الغده جاهز .
غلام : خوش يمه اكو مي حار اسبح .
جوريه : اي يمه شعلت الصوبه بلحمام .
غلام : اخذت اهدومي جاي اطب اسبح والباب اندك قوي رجعت شفت امي وسلطان يردون يفتحوا كتلهم رجعي يمه أنا افتحه فتحت الباب وأشوفن واحد من العمال اليشتغلون ويه ابوي بلباب وجهه مخطوف كالي الحك غلام ابوك احترك .
غلام : شنو .
شكرا لزيارتكم عالم روايات سكيرهوم
