رواية حين تتغير الاقدار الفصل الثامن عشر بقلم سناء الهموندي
فقدان الأب وبكل المقاييس ليس بسيطا..
أن تفقد أباك معناه أنك تخسر الجدار الذي تستند إليه ويجعلك في مهب ريح قد لا ترحم من هم أمثالك..
أن تفقد ( أباك ) معناه أن تفقد السماء التي تجود بنبع الحب والحنان ..
أن تفقد ( أباك ) معناه أن تفقد المظلة التي تحميك من الشرور وتجعلك وحيداً في مواجهة العالم..
أن تفقد ( أباك ) ليس معناه اليتم فقط ، بل يعرف من يتعامل معك أنك وحيداً أمامه وربما أمام طموحه
ومطامعه..
والشعور بالضياع والوحدة والفراغ 🥹
شمس : حياتنه صارت باهته بفقدان ابوي راحت الحنيه والدلال راح السند عمري ميتجاوز ال10 سنين ونكسرت بفقدان ابوي .
غلام : سوينه الفاتحه واجوي عمامي وخالي مهدي وكف وياي هوه وخالي حسين خوبن تمار صار نصي الثاني واجوي بيت خالتي ضويه .
جوريه : ثالث يوم الفاتحه بعد ما دفنت شريك عمري دفنت سلوتي دفنت هلي من جديد ولججججج خيه ضويييه أنا هسه تيتمت صدك خيه .
ضويه : بجي وحزن كافي خيه بطيتي جبدي بدموعج .
جوريه : جا كليلي شسوي ولكم محد حاس بنار جبدي .
ضويه : ام فالح اغديلج سبع فدوات كافي .
غلام : واكف بلفاتحه الوب على امي اريد اشوف شونهه صار تلث ايام مشايفهه عبن نبات بيت عمي محمود والنساوين بيتنه اليوم ماتحملت اجيت للبيت دزيت على هناء اجتي اباوع لخواتي مكسورات بفقدان ابوي بس انشالله اكون الهن كفو وما اخيب امالهن وعد عليه اصونهن واحافض عليهن .
هناء : ها خويه كالوا تريدني .
غلام : اي بعد اخيج شونج .
هناء : بحزن شوني وبجت هناء بقهر وشهكه .
غلام : كسرت خاطري بدموعهه حضنتهه وطبطبت على ضهرهه بسج يماي عيني هذا حكم ربنا ولا اعتراض على حكم الله سبحانه .
هناء : ونعم باله أنا مامعترضه على حكمه بس يخوي بعدنه مو كد حمل اليتم .
غلام : الله كريم حبيبه هسه اذا تكدرين سويلي طريق اشوف امي .
هناء : تعال ماكو غريب بيت عمي محمود وعمتي فتنه وعمتي حسنه وبناتهه وخالتي ضويه وفضه .
غلام : بابتسامه ما كايله شي دخيل ربج فوتي لا تكعدين تعديلي.
هناء : اوكف دقايق .
غلام : راحت هناء سوتلي طريق وفتت لحجره امي لكيت خالتي كاعده يمهه اول مشافتني بجت بجي خلتني حتى مادري شون كعدت كبالهه وحضنتهه وبجيت البجيهه بس ضميت راسي ومخليتهه تشوفني بس جتافي تنهز بسج يمه اروحلج فدوه لا تبجين كليلي شسويلج وابرد كلبج .
جوريه :دكيت على صدري وحجيت شتبرد يمه جهنم شيطفيهه البكلبي .
غلام : اذكري الله يمه صليله وادعيله .
جوريه : انشالله يمه غلام اريدن اروح لكبره واشم ريحت ترابه وعاتبنه شون طلوعه كلبه يعوفني وهوه كال انعيش سوه ونموت سوه .
غلام : اخذنج والله بس خل تكف الفاتحه .
ضويه : اي يبعد خالتك اخذهه خل ترتاح .
غلام : إنشاءالله خاله .
تستمر القصة أدناه
صادق : بويه انور لا تعوف ولد خالتك .
انور : لا بويه شون اعوفهم .
معتز: بويه ابو علي يريدك .
صادق : خوش هسه اروحله ...رحت لابو علي هلا ببو علي كالو طالبني.
ابو علي : اي والله طلبتك بشغله تعرف احنه مو غربه انشالله .
صادق : أهل الله شاهد .
ابو علي : جا مادامنه أهل اريدنك توصل هاي الامانه لام فالح .
صادق : باستغراب شنو هاي الصره .
ابو علي : لا تفهمني غلط بس انا الله شاهد اولاد محمد
همه جهالي وام فالح اختي وانا حاب اساعدهم ولو بشي بسيط عبن تعرف تكاليف الدفن والفاتحه .
صادق : افاااا ابو علي جا احنه وينه عنهم .
ابو علي : ادري بيكم كفوا الله شاهد بس خلوني وياكم اشيل الحمل .
صادق : ابو علي انت تعرف ام فالح نفسيتهه شكد عزيزه وماترضه بمساعده أحد عبن تعتبرهه صدقه أنا موش ابن عمهه وهم ماترضه اساعدهم بشي .
ابو علي : لا تصعبهه عليه ابو انور .
صادق : عمي اذا تريد خاطر ام فالح رد حلالك .
ابو علي : عود ردتك عون .
صادق : بضحك يأبه عتبرهه وصلت .
ابو علي : الله كريم .
فالح : طول ايام الفاتحه كضيتهه بيت عمي اليوم رابع يوم رديت لبيتنه وكعدنه سوه تغدينه وانا اباوع تهاني بلايه حجاب واكل بكلبي شون هيج تفتر بلديره شني عبالهه هاي بغداد أنا لازم احاجيهه وصدك ثاني يوم خالتي رادت تروح لبيت ام حبيب هيه وبناتهه أنا كتلهم أنا اخذكم .
ضويه : براحتك يمه وإذا متكدر انتاني ازهر .
فالح : لا خاله أنا اخذكم حضروا روحكم وصدك طلعوا البنات وأشوف تهاني تتمايل بكذلتهه لو تخبلت .
ضويه : ها يمه نروح .
فالح : اي خاله بس خلي البنات يحطون على راسهم تعرفين عدنه بلسلف موش مثل بغداد .
ضويه : حقك خاله امشي تهاني حطي على راسج انتي واخيتج .
تهاني : حجيت بجديه يمه تعرفين بينه مانلبس حجاب .
ضويه : روحي يمه لا تعاندين .
فالح : باوعت نضرت انتصار عليهه هيه كلبت وجهه وراحت لبست واجتي .
جوريه : مرت الايام والأشهر وخلصت العده مالتي كمت على بيتي وجهالي عبن لازم اتعايش ويه فقدان محمد الكسر ضهري رجعت شغل الخوص والبن والجبن ابيعن وعايشين الحمدلله خطيه ابو علي معاف الولد بشغل الكاع يساعدهم ويعلمهم والحمدلله صح اشجارنه معدوده بس عايشين منهه ونبيع بوكت الموسم شي قليل عبن العالم ماتشتري كلهه عدهه كيعان وزرع زرعت الخضره والفجل والسلك احوشنهه واحضرهه وثاني يوم غلام وسلطان يرحون يبيعوهه نجحوا لغير مراحل وهسه كاعدين عطله البنات مامسجلتهن بلمدرسه عبن بعيده كلش واخافن عليهن ام علي وفضه معافني كل يوم يمي ضويه ضلت يمي سبوعين وراحت وراهه اجتي الاربعين ومحمله بلغراض حاجيتهه كتلهه أنا ما أرضه تكلفين روحج زعلت مني وكالت جا كليلي لا طبين بيتي سكتت وخليتهه براحتهه مرت على وفات محمد 10 أشهر وانا وغلام كل شهرين نروح للنجف نوبات نروح كلنه نوبات أنا فضه وغلام مثل كل كاعدين أنا والجهال تعشينه وكعدنه والبنات بدن باسلتهن .
شمس : يمه اليوم شراح تحجيلنه قصه .
جوريه : خايبين يا قصه خل نام مابيه تعبانه .
احلام : يمه قصه وحده .
سلطانه : اي يمه احجيلنه شون زوجتي ابوي وشلبستي بعرسج .
جوريه : ولج تسكتين يو اكومن بلقوري .
غلام : بضحك كلشي ولا القوري يمه بعد بيمن نشرب جاي .
سلطان : على طاري الجاي أنا جوعان .
جوريه : جا ياهو الكلاله كرصتين خبز ويه العشه وماصارلنه ساعه .
سلطان : شسوي يمه جوعان .
شمس : اسويلك لفه مال طماطه وخيار .
سلطان : اي من اروح فدوه لاحلى خواتي .
هناء : ها علمود لفه صارت أحله خواتك جا منو البارحه يكللهه انتي ضلين على كلبنه ومحد ياخذج .
سلطان : اتشاقه وياهه .
شمس : يمه عليج الله لا تحجين اروح اسوي لفه واجي .
جوريه : خوش متانيتج وصدك اجت شمس وبديت احجيلهم من طفولتي لحد ماخذيت ابوهم الله يرحمه كملت وكتلهم ياله كلمن بفراشه انتن عدجن شغل من الصبح لا تنسن وانتوا غلام وسلطان يمه نامو حتى ترحون على باب الله .
غلام : يمه اذا عندج فد قماش ادكه للباب ثخين عبن الهوه يطبلي من جوه الباب بارد يكص كص .
جوريه : انشالله يمه حجيتهه بانكسار عبن ادري ماعندي شي زايد كل العدنه بطانيتين مزرفه وانا يوميه راكعتلهه ركعه واخيطهه ولحاف للبنات وبطانيه للولد وبطانيه أنا وعمران و احلام تخاف تنام ويه خواتهه بعدهه صغيره تقريبا ساعه بسبعه بليل كلهم ناموا وانا هم رضعت عمران ونمت عن عمران عمره سنه ونص نمت وكعدت شبعانه نوم طلعت باوعت على الجو شكله مآذن ليل الشته طويل همزين ما فتتني صلاة جان احس نهاري كله مكامل اذا ماصليهه بوكته كمت توضيت وصليت وخليت الجاي على النار كعدت البنات صلن ورجعن نامن كعدت غلام وسلطان كوموا يمه هم ياله تاكلولكم لكمه وطلعون على باب الله .
سلطان : يمه شو بعدني نعسان .
جوريه : كوم بعد امك لا تتكاسل تره الأرزاق تتوزع ويه طرة الفجر .
غلام : كمت صليت و اكلت لكمه سلطان كعدته بلدفرات ههه وكمنه انا ويا شلنه شلايف الخضره وطلعنه وأمي لازمه الشعله واكفتلنه ضويلنه الطريق ضلمه وتخاف علينه .
جوريه : مثل كل يوم الزم شعله النار واضويلهم من بعيد لحد ميطلعون طرف البستان مشو لنهايه البستان لحد ما بعد كمت ماشوفهم طبيت جوه كلت خل اصلي للموتى .
غلام : مشينه أنا وسلطان فتنه من نفس الدرب اضلم هندس وبس صوت الواويه هلدرب كلهه تخاف منه كبار وصغار يسمونه كفشت حلب .
سلطان : بضحك غلام شرايك هسه يطلعنه طنطل .
غلام : دبسك بسك هيه مال طناطل غلام أثناء ماجاي احجي ما احس اله ثنين كدامنه واثنين ورانه وشايلين حربات .
احد الملثمين : ذبو كلشي عدكم .
سلطان : بخوف ورجف ااااا عددنه الخضره اخذوهه اخذوهه بالعافيه عليكم .
غلام : رغم خوفه بكلبي بس ماهزولي شعره وبقيت صامت .
الملثم : هي انت طلعوا العدكم .
غلام : عمي انت شرايد احنه ماشايلين غير الخضرات .
الملثم الثالث: لك ابو حربه هذول يمكن صدك ماعدهم شي وهاي انتو ولد هاي المره الماعده بطرف البستان الجانت شايلتلكم الشعله .
سلطان : بخوف اااا اي اي .
غلام : سمعت واحد منهم يهمس يكللهم
الملثم : يأبه تره ذول ماعدهم وحالتهم كوه مدبريهه يمعودين عوفوهم .
غلام : واحد منهم وجهلي الحجي كالي .
الملثم : عمي انتو تعرفون ساعه بيش .
غلام : اي ساعه بلخمسه ونص .
الملثم : بضحك عمي سترو على روحكم ورجعوا للبيت ساعه بلوحده ونص بليل حتى بلثنتين ماصايره .
غلام : ردينه أنا وسلطان لازمني من أيدي كل قوتي بس ابتعدنه قريب منوصل لبيتنه جان اطكهه بضحكه اريد اسكت ماكدر .
سلطان : شكو شبيك شفتني شون وكفت بعينهم وخافوا مني وخلونه نرد .
غلام : بضحك اي اي كلش خافو منك ورجعونه ولك حتى الحراميه عرفونه ونقهروا علينه .
سلطان : تره ارجع اكتلهم كلهم .
غلام : لا خلي عضلاتك لغير وكت هههه ...رجعنه للبيت وتلكتنه امي .
جوريه : ها يمه خيركم شو رديتو .
غلام : بضحك يمه شنهي انتي ما تردينه .
جوريه : يا ليش يمه شكو.
سلطان : من اكلج يمه بعدني نعسان تكليلي كوم الأرزاق تتوزع ويه صلاة وطلعت حتة صلاة بعدهه ماصايره .
جورية : يا جا يمه بيش ساعه .
غلام : سولفت لامي واحنه نضحك واصنف على سلطان .
ضويه : مرت الايام والأشهر والسنين واحنه حياتنه ماشيه كل فتره اروح اجوريه ونوبات اجيبهم يمي البنات يكيفون هلفتره اشوف فالح يلمحلي بشغله ويريد يحاجيني وانا تقريبا شاكه بشغله بالي لحد ما فديوم كاعده اسوي غده واجه فالح وكال .
فالح : خاله أنا اريدن افاتحج بموضوع واتمنى ماترديني
ضويه : انشالله اسويلك الاكدر عليه وماقصر .
فالح : أنا جاي اليوم اكلج تحاجين عمي صادق بخصوص .......
شكرا لزيارتكم عالم روايات سكيرهوم
