رواية حين تتغير الاقدار الفصل التاسع عشر بقلم سناء الهموندي
دنيانه انتهت والعمر مل وبات
وارم كتر مني ولاخر مات
يطارش تعتني لاولاد ابو ﭽـفات
يغبش للسماوه وخل يطبلهه
يطبلهه ويخلي اجنازتي اعلى الراﮒ
عالشط والصبح واﮔـبال عجد الطاﮒ
جيبولي هذاك العافني اعلى افراﮒ
يوﮔـف عالـجـنازه وخل ينـﮔـطلهه
كولوله
يـَـبٓطـل نــٓضر دَوَخـني لـَوُن عـيوِنه♥️
فالح : أنا جاي اليوم اكلج تحاجين عمي صادق بخصوص موضوع شويه حساس .
ضويه : كول يمه شنو الموضوع .
فالح : دنجت وحجيت صراحه أنا طالب ايد تهاني وانتي تعرفين أنا ربيت بنصكم ميعتاز اعدد انا كذا وانا كذا .
ضويه : والله يايمه موضوعك فاجأني وصراحه أنا كلش فرحت عبن الله شاهد انت ابني حالك حالك انور .
فالح : تسلمين خاله ماتقصرين .
ضويه :بس يا ابني لازم أحاجي عمك صادق واحاجي تهاني .
فالح: أخذي راحتج خاله وحاجيهه التهاني ولعمي أنا مقرر ااجر البيت البصفكم واستقر هنا عبن أنا دوامي هنا وصراحه ماهاوي السلف .
ضويه : جا يمه وامك وخواتك .
فالح : امي بيتي مفتوح الهه وغلام وسلطان معايفيهه .
ضويه : والله يايمه شكلك بعد ومرت يومين وحاجيت صادق اكلك اريدن احجيلك سالفه وكلي شرايك .
صادق : وهوه يتغده كولي ام انور خيرج أنا صار يومين اشوفن بعيونج حجي .
ضويه : دومك تقره عيوني صراحه فالح طلب تهاني وانا كلت اكللك .
صادق : الحمدلله شيلي صينيه وصبي جاي وتعالي .
ضويه : طلعت من الحجره وأشوف تهاني لازكه اذانهه بلباب شافتني انحرجت .
تهاني : دنجت وحجيت والله مو قصدي جيت احاجيج وسمعت اسمي وكفت .
ضويه : مسحت خدهه وكتلهه يصير خير وديت الصينيه وصبيت جاي واجيت كعدت يم صادق تحم حم وحجه .
صادق : اي وشكلج فالح .
ضويه : كال أنا رايد تهاني ومستعد اكعدهه بصفكم .
صادق : انت تعرفين ميهمني الماده ولا البيت اذا استقر بغداد جوري منو الهه وهيه صاحبه كومه يتامه .
ضويه : صادق الولد صار أكثر من ثلاث سنوات عايش بغداد وجوريه جم مره كتلهه تعالي كعدي يمي مارضت وانا احاول اقنعهه تجي تعيش بغداد هسه ماكتلي شرايك بطلب فالح .
صادق : فالح ابنه وين نلكي احسن منه تهاني اله انشالله
ضويه : بفرح جا أنا اروح أخذ رائي تهاني .
صادق : بضحك جنج انت فرحانه أكثر من فالح .
ضويه : جا شون ما افرح وصدك رحت حجيت ويه تهاني يمه تهاني انا ادري سمعتي حجينه أنا وابوج .
تهاني: بخجل شنو يمه .
ضويه : انتي سمعتي بفالح طالب ايدج وابوج وافق .
تهاني : بفهاوه صدك يمه قصدي ششوكت .
ضويه : قبل يومين حاجاني واليوم كلت لابوج وابوج كال وين الكي احسن من فالح وهسه بقه رائيج انتي .
تهاني : بخجل بكيفكم يمه انتوا ادره بمصلحتي .
ضويه : متحملت اشوف فالح يلوب وينتضر مني خبر بحيث ثاني يوم من موفقه صادق بلغته وهوه مصدك أخذ غراضك وروح للسلف حتى يبلغ أمه .
جوريه : دنيه ليل وكلنه ملتمين على الصوبه سلطان مجطول وعمران نايم والبنات شمس تحوك ليفه وسلطانه تلعب هيه وأحلام وهنا تخيط بثوبهه مفتك وغلام حاط راسه بحضني والعب بشعره هوه يحب هلعاده من صغره .
غلام : يمه تذكرين من كتلج طه ابن عمي صلاح طوع بلجيش .
جوريه : اي اتذكر وكتهه ردت تروح ويا تطوع وماقبلت .
غلام : يمه والله يكول ينطوهم خير من الله واحنه بحاجه الفلس وتعرفين أنا ماحب اروحن وانتي مراضيه عني فشتكولين هسه خل اروح اجرب بلكي اكدر اغير بحالنه .
جوريه : يمه والله انا مايهمني لا المال ولا المضاهر ولك يمه انت السند إليه والخواتك من بعد ابوك عبن اخوك ساكن بغداد وماشايفته .
غلام : بس يايمه أنا كلش راغب لهل شغله .
جوريه : بحيره وهم تسكن بغداد وتعوفني .
غلام : كمت بست راسهه لا وعيونج من الدوام ليج شكلتي .
جوريه : هاي هيه روح يمه تشوف كل الخير يارب .
هناء : غلام عليك الله لا تكطع بينه مثل فالح .
غلام : ولج شون تكولين هيج وانا رايح لخاطركم لخاطر ماتعتازون شي .
جورية : اندك الباب طلع غلام يشوف منو وجان يطبلنه فالح كلبي رجف لشوفته اجاني سلم عليه وعلى خواته .
فالح : شونج حبيبه والله مشتاقلج .
جوريه : جا شمالك ماتجي تشوفني .
فالح : دوام يمه دوام ملتزم بي .
جوريه : كومي يمه وحده منجن تحط عشه لخوهه هيه تلكي كتله الجوع .
فالح : اي والله طالع من ال9 صبح عطلت بينه السياره بلطريق وبنص الجوله تبهذلنه لحد ما اجتي سياره وصعدنه مره لخ وهاي وصلتي .
جوريه : الحمدلله على السلامه يمه خالتك شونهه جهالهه عمك صادق .
فالح : كلهم زينين ويسلمون عليج هوايه .
جوريه : الله يسلمهم ...تعشه فالح وفرشت هناء وسلطانه ونجطلو على الفراش وحجه فالح يم أمه .
فالح : يمه تعرفين أنا اليوم جايبلج خبر يفرحج .
جوريه : خير انشالله .
فالح : أنا حاجيت خالتي وطلبت منهه تهاني وكالتلي كبع وأخذ .
غلام : بلخير خويه مقدما .
شمس : واخيرا راح يصير عدنه عرس .
هناء : من هسه اكلكم أنا أريد العرس بغداد .
جوريه : بفرح بسكم خل افتهم يمه فالح صدك تحجي .
فالح : اي وروح ابوي .
جوريه : من الفرح جان هلهلت بس ماعرف فعبرت عن فرحي بلبجي وجهالي حارو بيه يسكتون وانا أزيد
فالح : شني يمه هسه مافهمنه انتي فرحانه زعلانه.
غلام : بضحك أنا أعرف ام فالح بفرحهه تبجي وبحزنهه تبجي بس هاي الدموع دموع الفرح .
جوريه : وره يومين طلعت الجم فلس الامتهن علمود اصلح بيهن البيت الينكط علينه بكل مطره كلت بكلبي هذا ابني ومالازم اخلي يعوز الشي وطلعت الكردانه مالتي هم كلت ابيعنهه واسويهه فلوس العرسه خصوص بعد ما عرفت راح يسكن بغداد صحيح بالبدايه انقهرت بس بعدين كلت هوه أول وتالي ساكن بغداد رحت على عماته بلغتهم وعلى عمامه عماته فرحوله وعمامه هم باركوله ومحمود كال أنا اجي اطلبهه من صادق وسلام هم كال اجي بس صلاح مكدر لان مريض اتفقنه ثاني يوم رحنه كلنه لبغداد وانا الفرح تارس كلبي اخذت وياي زبد ودبس وتمر مجبوس لبيت ضويه وامنت الهايشه عد ام علي ابو علي من سمع هم اجه ويانه علمود يطلبون تهاني لفالح وصلنه ويه صلاة الضهر بعد سلام حار من الطرفين وعتب حبايب صلينه وصبت جوري خير من الله تغدينه النسوان وحد والزلم وحد خلصنه غده وصبينه جاي .
غلام : بعد ما شربنه الجاي عمي سلام حجه .
سلام : اليوم جاييك بطلب يبو انور واتمنه ما تردنه .
صادق : كل الهلا بيكم .
محمود : ابو انور صراحه جايين نطلب ايد محروستكم الجبيره لابن اخويه فالح وهوه ربه عندك وانت تعرف عليه كلشي .
صادق : كفو منكم ومنه وانا انطي اعيوني لفالح عبن أنا مالكي مثل نسبكم .
غلام :كلهه تشكرت من عمي صادق لحد ما حجه فرقد وصدمهم .
فرقد :حجه بشقه بس انا ناهي عليهه لابني مسلم.
محمود : هاي شتحجي ابو هاله لا تخلينه نطلع زعلانين .
فرقد : بشقه أشبه للجديه لا أنا مايهمني غير مسلم لازم ياخذ بنت عمه .
غلام : راح انور واجه شايل بيده طفل عمره ميتجاوز ال ست اشهر وكال .
ازهر : وهذا ابن عمي العود شوفوا اجه بنفسه ينهي على رضيعتي .
صادق : ميت من الضحك على سوالف اخو يمعود فرقد كافي صدك جذب .
فرقد : بضحك تعال سلومي يبعد ابوك شوفهم ماياخذون بنهوتنه .
غلام : تمت الخطبه فالح ثاني يوم ويه صلاة الصبح عمامي ردو للسلف وأبو علي راح لبيت أخته بعد نص ساعه على بيت خالتي ضلينه احنه امي كالت مايطولهوهه للخطبه بساع ياخذوهه الصبح راحت امي وخالتي وعمي صادق وفالح وتهاني يكطعون مهر للامام الكاظم بما انو قريب عليهم انا هم رحت علمود تسجيل دورات بلجيش وطوني كتاب وكالوا تعال باجر سوي مقابله رجعت للبيت واسمع صوت هلاهل وصفك استحيت اطب للبيت مبين هوسه رجعت تمشيت لمحل عمي صادق لكيته مفتح ويمه ابو علي وتمار عبالك عندي عيد سلمت عليهم وكتله ها ولك شجابك هنا .
تمار : بضحك جا غير شتاقيتلك .
غلام : لا صدك شجابك مو البارحه كتلك تعال ويانه كتلي عندي شغل .
تمار : كضيت شغلي وجيت علمود شغله بغداد ابوي من ست اشهر محاجيني بيهه .
غلام : بس لا نفس الشعله يمعود اذا هيه عوفهه ختولي .
تمار : علساس انت راح تشتغل بأمان اشو حالي من حالك وانا لازم اكون روحي وأشوف مستقبلي .
غلام : براحتك يا بعد اخوك ما تجي نتمشى للامام نزور .
تمار : اي بس انطي قياسات الستره مال نوره لاستاذ صادق حتى بلكي منا ليومين يكملهه واخذهه .
غلام : احجي بداخلي شبيه يربي كايم بس اسمع باسمهه لو اشوفهه كلبي ينغزني معقوله لالا لا مستحيل طردت الأفكار من راسي وباوعت على القماش الختاره تمار قماش ثخين كاعيته بيضه مشجر بورود ناعمه كلش حلو كتله لعد انت متفصلك .
تمار : اي اختاريت ذيج الكحليه عجبني قماشهه .
غلام : اي حلو والله خلص تمار ورحنه أنا ويا زرنه وهوه أخذ حلاوه لأهله وردينه لبيت خالتي غلام ابقى نتعشه سوه لتروح .
تمار : لا راح ابقى فد ساعه اسلم على الولد واشوفنهم هم
طبينه جوه أنا متعلم كلما أمر البغداد أمر لبيت ابو انور اسلم على الولد لان احنه اصدقاء من طفوله من يجون نلعب سوا فمن طبيت جانوا البنات كاعدات بلحديقه والولد يسولفون سوالف عاديه ويضحكون استقبلوني الولد وكعدت بنصهم وأشوف شمس اجت بلا حجاب وشعرهه مثل الشلال يتمايل بضهرهه وكل ما تفر راسهه يفتر وياهه وانا كلبي يشتعل شعل اباوع بلكي غلام سلطان يكلولهه روحي خلي شي على راسج بس شو شفتهم عادي اعرف بيهم متربين سوه ويعتبروهم إخوانهم بس ميصير هيج عاد الله جابهه كبالي كعدت وكلما ترفع راسهه اخزرهه وهيه دنج وجهه صار احمر يمكن خافت مني .
شمس : ياربي هذا شبي تمار يخزر بيه والله خوفني بهاي عيونه الجنهه عيون بزون كلساع تنكلب لون هلمره اذا خزرني اروح اكل لامي عليه .
تمار : بعد مرفعت راسهه لحد ما صاحوهه وراحت تركض وانا من اشوف طولهه وحسنهه مو مال وحده ممكمل ال 13اليشوفهه يكول هاي عمرهه 18 سنه سبحان الخلقهه وخله معزتهه بكلبي من صغيره من دون الكل تعشينه وانا خلصت اول واحد طلعت اغسل واشوفهه كاعده تكنس بلحوش ابتسمت ابتسامه نصر وتقدمت وكفت كبالهه .
شمس : كاعد اكنس بلحوش وأشوف خيال فوك راسي صار رفعت راسي هذا تمار راسا دنجت راسي .
تمار : تعرفين بنفسج مذنبه هل دنجتي ومالج عين تحاجيني .
شمس : لا والله كلشي ممسويه بس ببب بس .
تمار: بعصبيه بس شنو .
شمس : بخوف خاف اكلك وتكوم تحجي عليه .
تمار : احجي عاد فضينه .
شمس : ها باوع بعدني محاجيه كمت صيح .
تمار : ولج عمي منو مصيح أنا صوتي هيج وروح جدي بس احجي شبيج ليش من اخزرج دنجين معقوله معرفتي على شنو .
شمس : مو مم مو عيونك تخوف .
تمار: عقدت حواجبي هاي شتحجي ولج شبيهه اعيوني .
شمس : عيونك مثل البزون كلساع تنكلب لون خصوصا من تخزر تخوف بلزايد .
تمار : ديلا أنا وين وانت وين سمعي اكلج شمس قسم بالله اذا شفتج بلا حجاب كدام ولد خالتج اله ازينج كرعه
شمس : بخوف لزمت شعري وحجيت ببب بس كلهم ملابسين حجاب .
تمار : وانا معليه بأحد عليه بيج خل اشوفنج بلا حجاب وساعتهه تعرفين بيه من احجي اوافي .
شمس : عفت المكناسه وطياره لحجره خالتي كعدت بالزاويه ولازمه شعري قوي
تمار : سلمت عليهم وطلعت رجعت لبيت عمتي .
جوريه : مرت الايام وردينه للسف وانا هم جهزت لفالح واضطريت ابيع تراجيي زوجين فوك الكردانه وكملنه تجهيزات العرس مر شهر وباقي سبوع لعرس فالح غلام طوع بلجيش وصار يداوم سبوع هناك سبوع يمنه رحنه كلنه لبغداد وسوينه عرس فالح أجر بيت بصف بيت ضويه وفتحو باب عليهم اقترح علينه نكعد يمه بغداد بس انا ماهويتهه البيت صغير وأحس بنفسي اختنك مو مثل ديرتنه مفتوحه خلص العرس وردينه الحياتنه الطبيعيه غلام بلدوام وانا والبنات نشتغل بشغل الخوص سلطان يطلع يبيع الخضره وانا صرت اتنكب واطلع ويا اكعد مسافه عنه ابيع الحصران والسلالي والطبك وحتى مهفات وليف .
تهاني : صارلي شهر من تزوجت حياتي حلوه ويه فالح يحبني ومدلللني تركت المدرسه واهتميت بي وبلبيت .
جوريه : ياله ولجن خبزن عجينجن اختمر وغلام على جيه اليوم ينزل وكال هلمره يجي ويا فالح وتهاني .
هناء : اندكت الباب فتحته وأشوف غلام وفالح وتهاني سلمت عليهم طبو جوه جاي اسد الباب جان يندفع ويطب انور ويباوعلي بنضرات استفزازيه وكال .
انور : اجيت أخذ الجواب من ناس بذاته دارو وجهم ومدارولي بال .
هناء : فريت حلكي وكتله تفضل ابن خالتي لتبرد .
انور : يجي يوم واخليج تكولين تفضل يا بعد بيتي .
هناء : عفته يحجي ومشيت وكتله باحلامك .
الى هنا ونختم بارت اليوم انتضروني بلاحداث المقبله حبايبي
