رواية صرخة مؤجلة الفصل التاسع عشر بقلم ود الزهراء
ما الوگ على غيرك بس عليك افصال
أذوبن بيك چن بيدك مسميني
اصبر الروح باسمك من يضحكها الشوگ
وابرد من جمر طاريك يچويني.. ♥
••••••••••••••••••••••••••••••••••••
ركزوا على كل تفصيلة تنذكر
سَدف
مثل كل يوم گعدت من النوم الفجر قبل الاذان بشوي دائمًا يصادفني غَطرَف همين يريد يصلي و ورا الصلاة نگعد برا نسولف، و بمرور الايام اتغيرت سوالفنه من اشياء عشوائية و عامة الى فضفضة
هوَ هواي يسولفلي عن الضغط اللي يحس بيه بسبب دراسته و الشغل هوَ مرحلة رابعة يعني بس هاي السنة و يتخرج بس من اخذ النتيجة طلع مكمل بمادتين و المواد الباقية تقديراته مو احسن شي بس المهم ناجح و بقى قليل على امتحاناتهم و هوَ كلش ذب روحه على هاي المادتين، على گولته يگول احس عفنت بهالمرحلة اريد بس اطلع منها و اخلص،
و انا همين احچي كل البگلبي عبالك جاي احچي وي روحي ما اخاف من شي لو مثلًا اخاف يحكم عليَّ و على تصرفاتي، هيچ مرات حتى كلامي يكون ما مرتب بس هوَ يفهمه، حتى يرتب افكاري المخربطة و الهوسة اللي براسي من الماضي و من الحاضر و حتى من المستقبل
و منهد آخر مشكلة صارت بسبب هذاك الشفّية احنه ما نتحاچة صار بيناتنا جدال هوَ راسه يابس مصمم على كتل غسان و انا اتعاركت وياه، و هذاك همين ما گاعد انا ما اريد غَطرَف يكتله بالله مالي شغل بغسان يطبه طوب بس اليهمني حياة غَطرَف لأن ادري بعمامي ما راح يسكتون و تظل السالفة تجر..
هذا كل خوفي ، حاول اكثر من مرة يحچي وياي بس اصده لحد ما يرجع عقله الراسه و يفكر عدل
و اليوم من طلعت من الغرفة الفجر لگيته مثل كل مرة منتظرني، عبرته حتى بدون لا اصبح عليه رحت اتوضيت و رجعت دخلت للغرفة صليت و گلت خلي اغفى شوي قبل لا يگعدون بس گعدت على صوت نقرات خفيفة على الباب گمت من مكاني فتحت الباب لگيته غَطرَف هزيت راسي بـ شكوو أشرلي اطلع
عدلت حجابي و طلعت وراه همين بالساحة
گعد على الدچة و انا همين گعدت، ظل ساكت فترة و انا همين ساكته اريده يفتح الموضوع اليريدني بيه
فتح نفس موضوعنا المتزاعلين بسببه خليته يسولف يسولف و انا ساكته منتظرته يكمل
بس كمل حچيه يلا انا سولفت
سَدف:: اولًا اريدك تعرف شغلة انا ما يهمني غسان مثل المتوقعه لو يهمني و احبه مثل اللي فكرته چان ما شردت ولا هاي الخبصة كلها، و دفاعي عنه هوَ علمودك مو علمود احد ثاني انا ادري بعمامي لو كتلت غسان ما راح يسكتون مستعدين يكتلونكم كلكم و ما يرفلهم جفن، فَـ سد الموضوع فدوة و كلمن يلتهي بروحه بدون هاي المشاكل عفية كافي ترا انا البية مكفيني لا تزيدها علي غَطرَف الله يخليك
نتر بية مقهور
غَطرَف:: لعدد ترديني اباوعله و اسكتت؟!!!
سَدف:: ما جاي اگلك اسكت تريد تاخذ حگك؟اخذه بالقانون لو تگاومه عشائريًا و هاي هيَّ هم ماخذ حگك و هم موجود يم اهلك، افهمني فدوة انا ما اتحمل بعد تصير سالفة بسببي الخاطري اتجاهله
غَطرَف:: اللّٰه كريم هسه احنه ترا دنحچي بشي مصاير اصلًا مجرد توقعات منو يگول يجي مرة ثانية
سَدف:: ميخالف اريدن آخذ منك حچاية اتأكد منك يالله يهدالي بال
غَطرَف:: راح اعوفه الخاطرچ مو الخاطر احد ثاني، هسه راح الزعل؟
سَدف:: بعده
غَطرَف:: اا ليش!
سَدف:: افكر بالموضوع
غَطرَف:: اكره اليدللون ترا
حچاها بضحك رديت عليه بأستهزاء هازة ايدي
سَدف:: لا عفية عليك الله حبني
ضحك و انا گمت من مكاني ردت ادخل جوة بس رجعت من سمعته يحاچيني
غَطرَف:: جبتلچ موبايل
طلعه من جيبه و مده الي، ابتسمت
سَدف:: شسوي بيه
غَطرَف:: مَيخالف تحتاجينه، خليتلچ بيه رقمي و رقم امي و هم رقم ذَوّاد خاف تحتاجين شي و اني مموجود
سَدف:: ما اعرفنله
غَطرَف:: تعاي اني اعلمچ
رجعت گعدت بصفه و هوَ فتحه و ظل يعلمني عليه
ظلينه هواي گاعدين علمني على كل تطبيق دخت بيه هواي سوالف كتله
سَدف:: هيَّ السالفة تدوخ لو انا بية شي؟
غَطرَف:: لأن بعدچ جديده عليه و متعرفيله من تتعلمين عليه راح يسهل عليچ
سَدف:: راسي ظل يوجعني علمني بس على التطبيقات المهمه هذن ما اريدنهن
علمني على الواتساب و شلون اتصل
و انطانياه بيدي جربت ادزله رسائل و اتصل عليه شفت السالفة سهلة گال يلا اخذيه و روحي عندي شغل گمت من يمه گتله
سَدف:: شكرًا
غَطرَف:: تدللين چم سَدف عندي
خزرته و دخلت مو مال واحد ينطيه وجه، دخلت للغرفة و اگلب بالموبايل و افتح من تطبيق التطبيق استكشفه دخلت على الواتساب باوعت على الاسماء مكتوب "حماي ذَوّاد" و مكتوب " عمتي ام ذَوّاد" و طاحت عيني على آخر رقم موجود مكتوب "ابو الجهال" و الصورة صورة غَطرَف، ظليت صافنة بالاسم و وراها نطيت من الضحك كاتمة صوتي بأيدي، دخلت عليه هوَ الرقم نفسه المساع دزيتله رسائل بس ما انتبهت على الاسم مساع
هستوني يلا انتبهت، بقيت صافنة على الرقم اضحك لدرجة عيوني دمعن
يمة يعني غَطرَف ابو جهالي!! دخيلك ربي ما اريد، هوَ انا غَطرَف و ما جارعته مو انوب اخلف منه يبووو عليچ سَدف
بس يعني هوَ الاسم يضحك لو انا مدري شبية بس من كل عقله ههههههههههه، انوب ما اعرف منين اغير الاسم
عفت الموبايل على صفحة و مددت على الفراش الابتسامة شاگة وجهي و غفيت و انا احس ببطني فراشات
مرّت الايام هادئة و امتحن غَطرَف و نجح و رسميًا اتخرج سوولهم حفلة تخرج بس ما قبل يروح هوَ و انا وياه ما بطلنا من گعدة الفجرية لو هسه بعز البرد و المطر همين ما نبطل، مرّت فترة و احنه على نفس الوضع و بيوم گاعدة بالليل و كلها نايمة دزلي رسالة
"تعالي يمي تينة خلي نگعد برا" كتبتله "ما اجي ما بية حيل"
غَطرَف "ليش"
سَدف " والله بطران برا الجو يگص گص من البرد"
غَطرَف " لبسي شي ثخين و تعالي، يلا تينة لتخربين واهسي"
سَدف "من هسه اگلكياها ما عندي سالفة لا تگلي سولفي"
غَطرَف " ميخالف اني اسولف ضايج هواي و اريد اسولف وياچ، بس تعاي ليش تحبين تشلعين گلبي"
سَدف "👍"
دزيتله هذا الايموجي و تسللت على كيف للكنتور مالتي اللي خلتلياه رواء طلعت جاكيتي لونه اسود و بيه جيوب و كبوس خليت الكبوس على راسي ببدال الحجاب و خليت ايدي بجيوبي و طلعت للساحة
لگيته لابس همين جاكيت و مغطي راسه بيه سمع صوت الباب من سديته حس و دار عليَّ
رحت گعدت يمه بيناتنا مسافة صغيرة و الجو باارد و بيه نسمات خفيفة
و السماء ملبّدة بالغيوم، والنجوم تختفي وتظهر بين ثناياها و الهوا ينساب بيناتنا بنسمات خفيفة، هادئين اثنيننا للهدوء دور چبير بگعدتنا چانت عيني للسما كسرت الصمت البيناتنا بـ
سَدف:: نبقى ساكتين؟
حسيته دار عينه الي و انا لا ارادي رفعت عيني اله و التقن نظراتنا سوا هوَ ساكت عيونه تدور حول ملامحي و انا عيوني ركزتهن بعيونه ما گدرت اشيلهن عنه همس اسمي بصوت خافت و سكت ما افتهمت شيريد، انا و اخيرًا نزلت عيني الما گدرت اشيلها من عينه الحضني مرتبكة من الهدوء البيناتنا كل مرة نتداهر لو نتعارك بس اهم شي ما نسكت بس اليوم غير..
سَدف:: شكلك تعبان بيك شي؟
غَطرَف:: هوايَّ تعبان
سَدف:: خيرك شبيك
غَطرَف:: عندي حچي وياچ
گلبي ظل يدگ حيل ما اعرف ليش اتوترت بلحظتها
سَدف:: احچي
غَطرَف:: سَدف تكرهيني؟
سَدف:: شلك بهذا الحچي
غَطرَف:: جاوبي
سَدف:: لا
غَطرَف:: زين تحبيني؟
انلصمت على حلگي ساكته ما گدرت احچي ولا شي عيني بعينه
غَطرَف:: جاوبي
سَدف:: ما عندي أي مشاعر تجاهك
اتنهد هاز راسه خوش، ظلينه من بعد هذا الحچي ساكتين اتجرأت و كسرت الصمت
سَدف:: و انتَ؟
اتنهد تنهيده طويلة معدل گعدته
غَطرَف:: اني احبچ
على أثر هالكلمة البسيطة گلبي ظل يترادم بقوة بصدري، ما اتوقعت بيوم اسمعها ابدًا ولا چنت متوقعة راح يجي شخص يگلياها، بدون أي مبالغة ما سامعتها ولا مرة محد گلياها بحياتي كلها ما سمعتها لا من امي ولا حتى من ابوي، اتمنيت روحي ساكته ولا سائله هذا السؤال دومني ادولب بروحي ما اگعد و اسكت، من الخجل احتاريت شسوي كضيت و شردت من يمّه بوجهي للغرفة ما انطيته مجال يكمل كلامه دخلت و سديت الباب وراي ظليت واگفه اعضن بأصابعي احس گلبي راح يوگف من گد ما يدگ. رحت وگفت گبال المرآية اتلمست خدودي وجهي گب نار من المستحى ذبيت جاكيتي و رحت مددت بفراشي ارافس من شعور الفراشات اللي ببطني و وراها نمت احلى نومة ما ادري ليش هالگد فرحانه بس فعلًا ما عندي أي مشاعر تجاهه بس ما ادري ليش هيج احس
مرّت ايام هواي دخلنه سنة جديدة و وضع العراق ابدًا مو بخير الدواعش بكل مكان عشنه ايام بيها قلق مو طبيعي بحيث حتى الولد بقوا ما يروحون الشغلهم يبقون بالبيت يتابعون الاخبار يمنه مرات يسوونها مناوب واحد يروح و واحد يظل يمنه، غَطرَف ظليت اتهرب منه أي مكان يكون هوَ بيه اروح الغير مكان ظليت حتى للصلاة ما اگعد بوكتها مباشرةً اول ما يروح للشغل اطلع اتوضى و اصلي ، شگد حاول يحچي وياي بكل الطرق حتى عالموبايل ما اجاوبه مو زعلانه منه لو شي بس لأن استحي بعد ما اريدن اقابله ولا احچي وياه
اما ام ذَوّاد انسانة حيل خلوقة بالرغم تصرفاتها وياي بالبداية چانت مو حلوة بحقي بس بعدين كلشي اتغير من حبتني و اتقبلتني حاسبتني حسبة رواء و تفگدني بالصغيرة و الچبيرة لو من تروح للسوگ تجي محملة بالغراض ملابس عطور و كلشي احتاجه بدون ما اوصيها لو اطلب منها ابدًا ما مقصرة وياي و ويَّ اخواني تگللهم صيحولي يمة مو خالة و هُمَ فعلًا ظلوا يصيحولها يمة حيل يحبونها،
اما رواء من نجحت گالت بعد ولا اكمل ما بية حيل و خطية شگد حاولوا وياها اخوانها بس هي مصرة تترك لحد ما اتوصلوا لحل و هوَ تكمل معهد من شهادة الثالث و قررت تدخل فنون جميلة و وعد كملت للسادس ما دخلت معهد رغم شگد رواء اتوسلت بيها بس گلتلها انا طموحي اعلى من المعهد
اخواني الحمدلله مرتاحين و حابين اهل غَطرَف و كلهم يحبونهم و بوكت التسجيل اخذهم غَطرَف سجلهم اول ابتدائي و اجوني طايرين من الفرح و بدت تحضيراتهم رحنه انا و عمتي للسوگ اشترينالهم كلشي من ملابس و قرطاسية و هُمَ حيل فرحانين و بدأ الدوام و التهيت وياهم بعد من ناحية الدراسة و التحاضير و مستواهم كلش ممتاز لأن اصلًا هُمَ سابقًا مدرستهم انا فَـ ما استغربوا من المواد، و اما ام اسماعيل دائمًا يمنه بس نوبات ترجع البيتها بس ما تطول بيه و ترجع يمنه، و همين شلون مرة الله يستر عليها درة والله تحبني و تگعد وياي و تسولف و اجتماعية حلوة سوالفها، دائمًا تگعد وياي انا و رواء تنصحنه و تعلمنه من الدروس الاخذتهن من الحياة و اتعلمني دائمًا عن العيال شسوي و ما اسوي وياهم و من هذا الحچي، قصتها كلش حزينة و مؤلمة هم معلعله من اهلها و من جهة رجلها و ابنها اسماعيل انكتلوا بزمن صدام و خطية للآن ما لاگيه جثثهم تحاول ما تبين حزنها دائمًا ماخذتنه بالسوالف و الضحك بس بالحقيقة هيَّ منتهية و خصوصًا ابنها حملت بيه بطلاع الروح هم تمرمرت علموده،مرات من نسمع مشاكل غيرنه تهون علينا مشاكلنه و نحمد الله و نشكره على بساطتها مقارنةً وي مشاكل الآخرين، بالنهاية هذا واقع اغلب النساء العراقيات عايشاته ..
~~~~~~~~~~~~~~~~
رواء
باشرت بدوامي بالمعهد و كلش حابه الدوام و هالايام محتارة بالتنسيقات و اللبسات اللي اريد اسويها يومية لبسة شكل اتكشخ بألوان تشبه قسمي دائمًا اركز على الالوان الفاقعه البسهن بطريقة مرتبة، اختاريت الفنون من بين كل الاقسام الموجودة بالمعهد لأن كلش احب الفن و اني من زمان احب الرسم و التصميم حيل احبهن و عندي واهس بيهن، و بأحد ايام الدوام كملت من المحاضرات امشي وحدي ضايجة كل مرة امشي بممرات المدرسة و وياي وعد نگضي الدوام سوالف ما نسكت ابد، بقيت گاعدة على كرسي بالحديقة لحد ما يجيني ابو الخط و بهاي الاثناء اجاني ولد شاب شايفته بقسمنا لابس قميص و بنطرون جوزيات و ضايف حركة على القميص مخليه اللبسة تموت و جنطته الجلد على كتفه، وگف گدامي و من بعد السلام گلي
-اختي رايد قلم رصاص إذا متصير زحمة
طلعت قلم من الجنطة و انطيته اله، بقى واگف هوَ يكتب بدفتره ما ادري شنو بس كمل رجعه الي
-شكرًا
رفضت آخذه گتله
رواء:: خليه الك
- لا تسلمين ناسي مقلمتي مجايبها ويايَّ اليوم فَـ اتوازيت اطلب منچ، شكرًا مرة ثانية
اخذته من عنده و هزيت راسي و هو راح، اجه ابو الخط و رجعت للبيت و هيچ الايام تمر بين الدوام و البيت و يوم نداوم و عشرة لا بسبب اوضاع البلد بهذاك الوكت چانت مو تمام، و بيوم من ايام الدوام سووا فعالية العمل جماعي كل كم طالب يتفقون على مشروع، رتبونه مجموعات كل مجموعة تسوي مشروع و اني اختاريت نشرة جدارية فَـ ما خلوا ويايَّ مجموعة چبيرة لأن المشاريع الثانية تحتاج اكبر عدد طلاب مثل النحت الرسم على ضلع من اضلع الحايط و غيرها هواي من المشاريع،
بالكثير يخلون ويايَّ شخصين فَـ بقوا كم طالب بدون مشروع فَـ الاستاذ خله كل نفر منهم ويَّ مجموعة و اني خله ويايَّ نفس الولد اللي طلب من عندي قلم هذيچ المرة
فَـ انفردوا كل مجموعة بمجموعتها احنه رحنه للمرسم متوسط كبره و مليان لوحات و اعمال يدوية و فخار و كلشي يخطر ببالكم
گعدنا اني وياه نتناقش عن الفكرة و حجم النشرة اتفقنا على كلشي و على الالوان و التصميم وضحتله فكرتي و عجبته و هيَّ رسم بوابة عشتار و الثور المجنح (آثار عراقية) مع علم العراق كلهن بلوحة وحده
و النشرة الثانية چانت شعر للشاعر كريم العراقي (آه يا عرب) چان بس التصميم عليه و الخط و الفكرة و التلوين كله عليَّ مبارك المن مخلينه ويايَّ بس شكل، ثاني يوم بدأ هوَ بالتصميم و اني گاعدة يمه اوضحله الفكرة عدل و هوَ يصمم مثل اللي اگله عليه و استغرقت هذهِ اللوحة اسبوع تقريبًا كملنا كلشي بيها من ناحية التصميم و التلوين كملناها و چانت النتيجة كلش مُرضية و حيل حبيناهه
و مباشرةً باليوم اللي بعده بدأنا بالنشرة الثانية، خليت هالمرة التلوين عليه و الخط عليَّ، بديت اخط كلمات الشعر
يرتدي شعبيَ شوكًا والجنائنُ بابليَّهْ
أ تُعيدونَ بلادي للعُصورِ الحَجَرِيَّهْ؟
أ تُبيدونَ عراقًا كانَ مَهْدَ البَشرِيَّهْ؟
أ تُبيحونَ دِماءً -يشهدُ اللهُ- زكيَّهْ؟
أيُّ كذْبٍ وادِّعاءٍ يا دُعاة َ الطّائِفِيَّهْ
واحدٌ شعبي ويبقىٰ اِرْحَلي يا هَمَجِيَّه..
كريم العراقيّ(رحمهُ اللّٰه)🍃.
بعد ما كملتها ابتعدت واگفه گبالها للوحة اتمعن بتفاصيل الخط مبتسمة، مثل اللي ببالي و الخط حيل حلو رغم إيدي ترجف لأن كلش اتوترت لا تخرب اللوحة، بس الحمدلله كلشي چان حلو بقت آخر خطوة و هيَّ الحركات طلعت الورقة الكاتبة بيها الشعر حتى اشوف الحركات الصحيحة، فتحت الورقة و خليتها گبالي و بديت اخلي الحركات بأماكنهن گلت شوي اللطف الجو و احچي مو كله اخوزر گتله
رواء:: شنو رأيك؟؟
- جدًا راقية و خصوصًا مختارة شعر يوصف وضعنا الحالي بالعراق
رواء:: صحيح و اريد انعلگ النشرة بمدخل القسم حتى الكل يشوفه
- هههههه هاي هيَّ نعلگها
رواء:: تدري صار مدري شگد احنه نخلص الدوام سوا بس لحد الان ما اعرف شنو اسمك
-اسمي ابا ذر انتِ اروى مو صحيح؟
رواء:: لا اسمي روااء
ابا ذر:: اهاا اتشرفت
صفنت اريد اتذكر شنو لازم اجاوب اني اعرفها بس راحت من بالي درت عليه مبتسمة رديت عليه
رواء:: اني الاشرف
هوَ ظل صافن عليَّ و اني اباوعله اگول هذا شماله صفن، هزيت راسي شكو گال
ابا ذر:: ماكو شي سلامتچ
رواء:: اللّٰه يسلمك
درت وجهي للنشرة اكمل كتابة
استغرقن الحركات وقت مني 10 دقائق مو هوايَّ و كملت النشرة اباوعلها صارت تخببل رحت اخذت قلم رصاص خليت على طرفها حقوقي و النشرة الثانية هم خليت عليها حقوقي و كذلك انطيت القلم الابا ذر همين كتب حقوقه على النشرتين و كملنا عملنا سلمناه للاستاذ و كلش عجبه فضلنه نعلگهن على أن نخليهن بالمرسم
وراها رجعت للبيت منتهية من التعب بوجهي للغرفة نمت ما دريت بعد شصار من وراي، و هيچ الايام تمر و بعد المشروع مالتنه گمت هوايَّ اصادف ابا ذر و يصير بيناتنا سلام لحد ما بدأ الموضوع يتطور شوي شوي..
~~~~~~~~~~~~~~
سَدف
كملت من دراسة اخواني و خليتهم يرتاحون و ينامون حتى بالليل ما عندهم شي گبل ينامون
بعد ما ناموا گمت التفتت للبيت نظفته كله منا لحد ما صارت الدنيا مغرب، باوعت الملابسي مبهذلات حيل عليَّ ما عندي وكت حتى اهتم بنفسي
منا البيت يريد الطبخ يريد اخواني يريدون و كلها تريد مني ما جاي ينطوني فنتك، گلت اليوم ما بيها مجال اعتني بنفسي و الباقي كله سهل
آخر شي عنايتي هيَّ سبحت و سويت شعري ضفيرة و اتعطرت
طلعت من الغرفة للمطبخ
لگيت رواء گاعدة من النوم و هيَّ تسوي بالعشا سلمت عليها و بقينة نسولف سولفتلي على نشراتها و سولفتلي على الموقف الصار وياها وي الولد الوياها من گللها اتشرفت و ردت عليه بـ اني الاشرف،
صفنت بوجهة اريد اتذكر الكلمة
رواء:: هااا شو حتى انتِ صفنتي شسالفة
سَدف:: خرب يومچ رواء نسيتيني الرد الحقيقي شنوه، شنو انا الاشرف ههههههه بس لحظة خلى اتذكر
ظليت افكر عاصرة عقلي عصر لحد ما لگفتها
سَدف:: ولچ إلي الشرف تردين لازم هههههههههه
رواء:: صدگك!! ههههههههههه و اني مستغربة اگول ليش الولد صفن بوجهي عزا بعينچ رواء شنو من دگة ناقصة هاي ههههههههه
متنه من الضحك على موقفها البايخ
ظلينه نسوي بالعشا و نضحك دخلت علينه عمتي
ام ذَوّاد:: ضحكني وياچن
سولفتلها رواء الموقف و هيَّ غمت رواء تضحك عليها، اتعشينه و كملنه و اخواني فزوا عشيتهم و سبحتهم صاروا انظاف يلا اجوا گعدوا يمنا بالهول، گاعدين انسولف من ضمننا خالة ام اسماعيل يسولفون بس بالاخبار و الوضع و من العدم انفتح موضوع عرسنا و خالة ام اسماعيل و عمتي يأيدن بعض و يگولن خلّ نسويه هاي الايام، انا رافضه الفكرة بس استحيت اطرح رأيي گال غَطرَف
غَطرَف:: احس مو وكتها خلي انأجل الموضوع بعد لأن الوضع مو تمام لو شتگولين سَدف؟
انحرجت من وجه الحديث اليَّ ما عرفت شنو اگول و اباوع للكل منتظريني أعلق گلت
سَدف:: رأيي مثل رأي غَطرَف فعلًا الوضع مو زين هسه
ضلوا هُمَ يتناقشون و انا درت عيني الغَطرَف خازرته هوَ شافني و ابتسم مغطي وجهة عنهم، گال ذَوّاد
ذَوّاد:: بعد هاي هيَّ مَدام هُمَ مَقابلين هسه خليها يمتى مَيردون
سدوا هذا الموضوع و بعد ما فتحوه ابدًا و هيچ خلصت هاي السنة
اخواني نجحوا الصف الثاني و رواء مرحلة ثانية بالمعهد و وعد عادت السنة بالسادس من صار عندي موبايل انطتني رقم امها و دائمًا نتواصل تعرف اخبارنا و احنه نعرف اخبارهم لأن خطية بعد ولا صارتلها جية النه ملتهية تدرس و رواء تغورها تسولفلها على المعهد و اجوائه و هاي ولا يمها تضحك
رواء:: بعد ولا صادقت من بعدچ باعي الوفاء
وعد:: سودة عليَّ و شلون تكملين الدوام؟
رواء:: اگضيه وحدي لو ادرس لو اصفّن
و هيچ گضيت سنتين يم غَطرَف و اهله و الحمدلله راضية على حياتي وياهم الف الحمدلله و اخواني بدوا يكبرون گدام عيني شعور حزين من اشوفهم يكبرون بهالسرعة اريدهم يظلون عنونيين بس بعد هيَّ هاي الحياة، و بأوقات العطلة غَطرَف ياخذ وياه علي الرضا وياهم للورشة يگلي حتى يتعلم
اما ميونة كل ما تكبر تحلى اكثر حيل نعومة و هادئة شحلاتها و الدلع ينگط منها و مرتبه ما متعبتني مثل علاوي متعبتني بسالفة وحده و هيَّ التسريحات تريد كون يومية تسريحة شكل و ما تقتنع بأي شي تشلع گلبي يلا تقتنع
رواء عايشة بعالم وحدها بين دراستها و ابا ذر دوم تسولفلي عنه تگول دائمًا يحاول يحتك بية و يسولف ويايَّ بس اني ما انطيه وجه و دائمًا اصده عني بس بالغلط والله بالغلط بديت انعجب بيه بس ما بينت ابدًا و بقيت على نفس اسلوبي الجاف و ميصير بيناتنا أي حديث الا اذا هوَ اجه و حاچاني يتحجج بالدراسة و أكثر من مرة حذرته يمعود كافي عوفني ترا اگول الاخواني عليك بس ماكو فائدة، آخر مرة حچة ويايَّ گال اريد اتقدملچ بس انطيني رقم والدتچ والدتي تريد تحاچيها و اني ارفض، گلتلها
سَدف:: اتوقع ما بيها شي رواء معناها يريد يتقدملچ بالحلال احسن مما يگضي وياچ وكت و تالي يعوفچ، انا اشوف لو تگولين الامچ احسن
رواء:: والله ما اعرف محتارة خاف يطلع مو خوش ولد و اني مو كل هاي اعرف عنه اشياء
سَدف:: گولي الامچ و خلي يجون هنا خلي الاهل يتعرفون على بعض و شوفي رب العالمين شكاتبلچ وياه
سمعت حچايتي و فاتحت امها بالموضوع سوت روحها ما تعرف شكلها يموت من الضحك شنو يعني گلتلها
رواء:: يمة اكو ولد ويايَّ اجاني گلالي امي تريد رقم امچ
ام ذَوّاد:: ياا و شگلتيله
رواء:: ااء گتله شنو تحچي وياها عرف ولف
كفختها على راسها ترزلها گلتلها
ام ذَوّاد:: ولچ يريد يتقدملچ معناها يالخوثة
رواء:: هسه شنو يمة انطيه رقمچ؟
ام ذَوّاد:: والله ما ادري دخلي اشوف ذَوّاد
رواء:: لاا دخيلچ عوفيه
ام ذَوّاد:: ياا لعد يمة غير يريد يتقدملچ
رواء:: يمة هسه انتِ شمدريچ يمكن عندها سالفة وياچ
ام ذَوّاد:: يعني ماما واضحة هيَّ لأن هيَّ المرة منين تعرفني شبيچ انطيه رقمي و خلي اشوفها شتريد وراها اگول الذَوّاد
رواء:: اي اي
اخذت موبايل امها سجلت الرقم بورقة و رحنه انا وياها للغرفة طايرة من الفرح ظلت تگمز فرحانه و انا وياها
رواء:: يمةةة احس شي ببطني ديزاگط
ظليت اضحك و اجه الليل و هيَّ محتارة بالتنسيقات طلعتلها فستان و نسقت الجنطة و الحذاء ما سايعتها الدنيا حضرتهن و نامت و انا همين نمت، ثاني يوم راحت داومت و من رجعت حيل متوترة و گضتها تصفّن حتى اخوانها انتبهولها
غَطرَف:: شبيچ
رواء:: شبية!
ذَوّاد:: ما ادري شو مو على طبيعتچ
رواء:: لا الحمدلله مبية شي بس اليوم ممجاوبة بالامتحان و طافرة روحي
باوعلها ذَوّاد ما مقتنع بس سكت كملنه الغدا و هيَّ ولا نامت ابد لحد ورا العشا اجه اتصال على موبايل عمتي گامت هيَّ بالمطبخ و احنه وراها انا و رواء طلعت ام ابا ذر، طلبت منها يزورونه بالبيت هلّت بيهم عمتي و انطتها العنوان و اتفقن على يوم يجون بيه، باوعت الرواء وجهة صار اصفرر كركم كاضه گلبها بيدها رحت طبطبت على چتفها مبتسمة حتى بس شوي تهدأ، اول ما سدّت الاتصال عمتي من ام ابا ذر گلتلها
رواء:: يمة لتگولين للولد هسه
ام ذَوّاد:: ليش
رواء:: يمة استحي خلي انام وراها حاچيهم
ام ذَوّاد:: خطية بوكت راحتهم احاچيهمم روحي هسه انتِ للغرفة و اني احاچيهم معليچ ميگولون شي قابل انتِ شعليچ هُمَ اجوا
سَدف:: هم صحيح
ام ذَوّاد:: تعاي ويايَّ سَدف
سَدف:: ياا عمة شعندي رايحة انا هم استحي
ام ذَوّاد:: خاطبينج لو خاطبينها
سَدف:: ههههه بعد استحي
عافتنه و طلعت و احنه دخلنا للغرفة انا و رواء حاولنه نتسمع بس ما وصل صوتهم انا عفت رواء و نمت لأن حيل خاوية گلتلها عود گليلي شنو يصير حضنت مينا و نمت
فزيت على فرحة رواء طلعوا الولد ما گايلين شي بس شوي ذَوّاد معارض گايل بعدها صغيرة بس بعدين اقتنع يجون هوَ و غَطرَف من امهم گلتلهم خلي انشوف عائلة الولد و نسأل عليهم يمكن يطلعون خوش ناس و من هذا الحچي
و ظلينه للصبح گاعدين انخطط انا وياها هي حضرت لبستها مال باچر و ظلينه نخطط شنو تلبس من يجوون و شنسوي ضيافة لحد ما راحت للدوام يلا رجعت نمت و گعدت متأخرة مخليني نايمة محد مگعدني طلعت من الغرفة لگيتهم كلهم گاعدين يشربون چاي حتى رواء جاية من الدوام و گاعدة يمهم و وجهة صاير طماطة الظاهر محاچينها على موضوع الخطوبة، رحت غسلت و رجعت گعدت يم عمتي گلتلها
سَدف:: چا عمة ليش ما گعدتيني
ام ذَوّاد:: عليمن يمة ما عدنه شي گلت خطية خلي تنام تعبانة من ورا الجهال
سَدف:: لا شسالفة شعندي اتريگوا قبل لا يرحون؟
ام ذَوّاد:: إيي ريگتهم و خليت الهم فطائر من السويتهن بحافظة بعد امهم يسمعون الحچاية و ما شلعوا گلبي ابد
ابتسمت مفتخرة بتربيتي فدوة الگلبهم
گمت للمطبخ اتغديت و مرت الايام الى يوم اللي يجوون بيه اهل ابا ذر، التهينه بالتجهيزات و بالچاي و بالماي و رواء الدنيا ما سايعتها من فرحتها
گعدوا سوية الامهات و طلع الولد يشتغل و يدرس بعد ما راحوا بكم يوم بدوا اخوان رواء يسألون عن الولد
و طلعت سمعتهم طيبة بالمنطقة و ابوه خوش رجال و مثقف، حاچه ذَوّاد اخته اذا موافقة لو لا گلتله اصبرولي افكر بالموضوع و ظلت تقريبًا اسبوع يلا ردت الخبر
رواء:: موافقة
شكرا لزيارتكم عالم روايات سكيرهوم
