رواية لا أمان لك الفصل الأول بقلم ورود الخالدي
امنية::::
رجعنا من الصالون اني وخاله هناء وبناتها ونازك بس شنو حيل تأخرنا لان من دخلنا للبيت لكيت ماما منتظره والاستقبال مليان من بنات جيرانه وصديقات نازك ومعارف ماما اول مفتت اخذت نازك كعدتها ع التخم وكلت لبلسم بت خالتي:
بلسم عدلي بدلتها ورتبي كعدتها اني اصعد لغرفتي ابدل
اي ..اي
طلعت من الاستقبال صعدت لغرفتي بعدني مسادة الباب فاتت ماما :
ولج انتي تردين اجلطيني!!
ليش يوم شصاير تره هنه امهات الصالون ع كيفهن يتشتغلن ساعتين بالتسريحة مال نازك ومكياجها بعدين بنات اختج هم اخذن الوقت كوله!!
ولج ياوقت هذا انتي شبيج..رحتي بالنفنوف ورجعتي بيه شتفقت وياج؟؟؟!! مو كتلج اخذي وياج فستان وبدلي هناك وسوي تسريحة ومكياج..ليش راجعه بدون كولشي!!
يوم مو كتلج مضل وقت تأخرنا وملحكن امهات الصالون يبلشن بيه!!
اي جذبي..جذبي . صالون. شكدة شكبرة ملحكن العاملات ..يسولج تسريحة ومكياج بس لحكن على اختج وبنات خالتج...كولي انتي الي مردتي ترتبين نفسج..مو هنه ملحكن..ولج انتي حتى فستان مماخذه وياج
يوم تردين الصراحة ..اي صح اني مردت لامكياج ولا تسريحة!!
ليش...بنيتي ليش ..غير عرس اختج وانتي اخت العروس الجبيرة ولازم اطلعين احلى وحده بالموجودات!!
هههه..اني احلى وحدة بدون لامكياج ولا تسريحة..مو..لو مومو؟؟؟🤗🤗🤗
ادنت يمي تباوع بعيوني!!
صح انتي احلى وحده بس بنيتي نسوان هالوكت من يشوفن وحده معتنيه بمكياجها وتسريحتها يكولن هاي معدلة..ومعتنيه بنفسها..!!
واذا كالن اني شستفيد!!؟
شلون شتستفيدين بلكي وحده منهن تخطبج لابنها لاخوها تره تصير اكثر البنات ..بالاعراس ينخطبن..
هااا..هيجي كولي ..هههه والله انتي وبنات خالتي تضحكن تذكرت حنة حنان العام من بلسم ومنال خابصات نفسهن مكياج وفساتين ..وذبن لحم بالركص ههه ويكولن بلكي وحده تنعجب بينا وتخطبنا..شهالتفكير ؟؟؟
اي ماماتي البنات هالشكل يفكرن وانتي هم لازم تفكرين حالج حال البنات تره انتي مو زغيره عمرج فوك ٢٨سنه ولحد الان محد دك بابج..لان لاتجاملين ولامعتنيه بنفسج بنفسي فد يوم اشوفج تحجين بسالفه عرس وخطبة ولج تلحلحي..يحظي ..البنات يسون اشكال والوان حتى ينخطبن ..ما اكولج روحي سوي علاقات ولزمي الموبايل ..وصيري مستهترة بس اكولج ع الاقل بالمناسبات حاولي تبرزين نفسج بمكياج بفستان بمجاملات بلكي يجيج نصيب..
ليش اني شببه يوم اله اتمكيج واالبس مشخلع بالاعراس حتى انخطب بعدين الناس الي يخطبوني ع مود هالشكليات التافهه همه هم تافهين ..الي تفكر تخطبني لابنها لو لاخوها لازم تكون ..مقنتعه بيه وبأخلاقي وبجمالي على طبيعته...مو ادور فساتين ومكياج ورموش وعدسات وتسريحة..بعدين انتي شكو مستعجلة على عرسي شنو..تردين تخلصين مني!!
ياااا تكول تخلصين مني ولج اني شعندي غيرج ومنو الي غيرج بس والله كلبي ينمرد من اشوفج هاملة نفسج ومحنبه ع المكينه وعيونج رايحات من الخياط ومتحمله مسؤولية زلم مشوربه متتحملها..يوم اريد افرح بيج مثل ما اني هسه فرحانه بعرس اختج واحس بالي راح يطمن عليها من تتستر وتصير بذمة ومسؤوليه رجال..وتعيش سعيدة ويا..
اي وانتي ضامنه هي راح تعيش سعيده ويه هذا العطال البطال الي مصدكتي خطب وركضتي وافقتي..رغم الحجي الي كاله عمه عنه وعن اخو!!
وشعلينا بأخو احنا مزوجيها اله لو لاخو!!
ليش هو وين عايش ومنو معيشه هو واهله غير اخو الهتلي المهتلف السايب
ياااا..وانتي لكفتي الحجايه من حلك عمج وسويتيها راس مال ..تره عمج يبالغ!!
عمي سعدون فقير ولا يبالغ ولا شي ومعنده مصلحة يجذب ..حتى معنده ولد ونكول طمعان ياخذ نازك الهم بس كلمة الحق مترضي احد بهالزمن!!
اكولج شو انتي مطابكة عمج ..سدي حلكج مو وكت هالحجي ولتخربين على اختج فرحتها وتضلين تقرين براسها ..شبيها قسمتها شو احسن قسمه صح الولد بعده ممشتغل بس اهله حالتهم كولش زينه واخو الجبير عنده معرض سيارات ..ومعيشهم مثل الملوك شنو هالعفه التحجين بيه!!
اي معيشهم ملوك ومنو كال لكمتهم حلال لو عيشتهم حلال؟؟
ليش مو حلال تره اخو يبيع ويشتري بالسيارات مو بالمخدرات ولا بايك احد..منين جبتي هاي مال الحلال والحرام!!
وتتوقعين واحد مخلصها بارات وملاهي وشقق مشبوهة عايش بالحلال مو!!
شعلينا بي..بالبارات بالملاهي هو حر شنو احنا مطي اله مره لو لاخو!!
نفس الشي يوم مادام عايشين ابيت واحد وهذا الصكط يصرف عليهم مو بعيده تصير اخلاقة مثل اخلاق اخو الجبير..والله ماما كلبي ممطمن خطية نازك راح توكع..بورطة الها اول ما الها تالي بس ما اكدر احجي وياها اكثر لان من حاجيتها حيل تحسست وكامت تبجي وحتى تكولي انتي تغارين مني وتردين توكفين بطريق قسمتي لان اني ازغر منج وانخطبت ولان انتي عرجة ومحد معبرج وداك بابج.
هي هيج كالتلج!!
اي والله يوم واني بلعت الحجاية وسكتت..كلت شسويلها هي مجلبة بصفوان عبالك ماكو غيره بهالدنيا اني مضايجة منها لان عيرتني وتكولي عرجة لاوالله ماما اني خايفة عليها وهي عبالها غيرانه منها!!
وهسه انتي من رحتي وياها ورجعتي بدون مترتبين نفسج بالصالون هسه تفكر انتي مفرحانه الها!!
شسويلها شتفكر خلي تفكر اني ممضطرة اصلح افكار غيري ..واغير تصرفاتي وقناعاتي حتى ارضي الناس!!
ديله بدلي ورتبي شعرج وخلي شويه مكياج
ههه...هسه ابدل واخلي شويه حمره من حمرتج وشويه كحله وداعتج اطلع احلى وحده بالعرس كوله!!
رادت تطلع بس التفتت ورجعتلي:
ماما لتزعلين من اختج لان كالتلج عرجة!!!
هههههه..اني ازعل من نازك ؟؟!!بعدين واذا كالت عرجة شنو قابل هي غلطانه الله خلقتي هالشكل قابل اكوله رجعني ع العطار الحمد لله منطيني نعمه تغطي على هذا العيب السخيف الي اصلا ميجي على بالي
اي عفيه بنيتي المعدلة
من طلعت ماما وبقيت وحدي بدلت لبست الفستان الي مقررة البسه بالحنه والي خلصت خياطة البارحة بالليل ..لان حيل تعبني بسبب الشغل الي بالصدر مالته وفتحت شعري وخليت ماشات ومنا ونزلت برجم خفيف..على كصتي وخليت شويه باودر وحمرة فاتحة بس من ردت اخلي كحلة مدري شبيه باوعت ع المراية ودمعت وتذكرت حجاية نازك من كالت تغارين لان انتي عرجة ومحد خطبج..ليش ..تكول عني عرجة..اني مو عرجة ولا رجلي مشوهة كل مابالموضوع انولد وعندي قصر ٣,سنتمر برجلي اليسرى يعني رجلي اليسرة اقصر من اليمنى بسنتمرات قليلة واصلا ممبينه بس من امشي شويه اكزل برجلي يعني ..مو عرجة مثل ميكولون عني..وحتى اذا عرجة الله انطاني عقل وشطارة وندارة وشايلة عائلتي كولها بشغلي وبتعبي ..ومقصر ربي وياي انطاني جمال وجسم وملامح وشعر مثل الحرير ليش دمعت ليش اتأثر بحجي الناس اني املك كولشي يخليني احس بثقه اعلى من غيري..مسحت دموعي ورجعت خليت كحلة ورتبت مكياجي وفكرت خلي التقط صورة بجهازي..احب التقط صور دائما...بس هو وين موبايلي من البارحة ادور عليه مدري وين صار جماله مخلص شحن وطافي اي البارحة من رجعنا من المول..واني بالتكسي طفه جهازي وخليته بجنطتي بس وين صار ملكيته بالجنطة يصير وكع مني ..بس لا..لا ميوكع جنطتي مسدوده شلون يوكع..يجوز من رجعت بسرعة والتهيت اخيط صار ابين الاقمشه مالت الناس اي بس تخلص الحنه ادورة والكاه اكيد بين الاقمشه صار وماما لمتهن بسرعة ومنتبهت عليه..لان جانن مطشرات بالصالة..
يعمر:::
كاعد ع القنفة بس شنو لازم نفسي كوه من الضحك جماعتي كاعدين على نار بس يردون حنه صفوان تخلص ويستلموني اشوفهم ..يتحروصون واحد يندس باللاخ.ههه وين ..تصرفلهم هيج كعده ..مال حنه يردون ركص وبنات وشرب ..ومتأكد واحد يكول للاخ شورطنا واجينا للحنه شسويلهم من الاول حذرتهم وكتلهم الحنه سكته ابويه ميقبل لا شرب ولا طربكة لان عازم شياب المنطقة كولهم اي صفوان اول واحد من ولده يزوجه ويريد يتنومس بعرسه رغم جان عنده امل يزوجني لان اني الجبير بس من شاف الحجي والملحة بموضوع الزواج وياي مجابت نتيجة ....كال خلي افرح بصفوان اذا يعمر معاند عموما..صارت الساعة بالتسعة وربع اول واحد من جماعتي شفته كام طلع من باب الاستقبال لحكته:
ها..مصطفى بعد وكت.
والله مستحي منك بس عمي خابرني نسيت هو موصيني ع شغله وهسه حرك الموبايل بالاتصال!!
هههه كول اريد افلت الحنه معجبتك؟؟
هي مال افلت فعلا اريد افلت بس عمي صدك اتصل وداعتك!!
اي براحتك..عود سلملي ع خالك..؟؟؟..هو خالك مو؟؟
لك ساقط كتلك عمي كوة تريد تبوك لساني..ههه عود من تخلص..الحنه وصل الولد وياك للتقاطع مابيه حيل لدوخة ..حسين هسه يكول عافنه وفلت!!
هههه اي اوصلهم..دروح ليضل بال عمك مدري خالك عليك؟؟
ساقط متصيرلك جارة
وراح مصطفى وره ساعة اجه حسين شاورني
لك ..داد يعمر..خدرن رجلية من الكعدة شوكت تخلص الفاتحة مالتكم..اقصد الحنه!!
هههه بعد وكت الساعة بالعشره تره!!
يعمر..تره علاوي كام يكفر يكول راح اروح حتى لو يزعل يعمر..
هههه روح صيحة هو ومالك خلي اوصلكم للتقاطع ..
اي الف رحمه لوالديك تره ابهاتنا احتركت وابوك زرف دماغي بسوالف الشياب والحصار مال الامريكان؟؟
هههه
وفعلا اخذتهم تلاثتهم بسيارتي حتى انزلهم بالتقاطع بالطريق حسين كال:
شباب بعد وكت خلي نروح للوكر مالتنا.. وحجية سميرة خابرتني الظهر تكول شلون بنات جدد اليوم جايات يملخن..
فكتله:
اي مثل الاسبوع الفات هم الحجية خابرتك وطلعن ميسون فلس!!
اي تونست وشبعت وبالاخير ميسون فلس شتريدهن تركيات قابل!!
لك شنو تركيات هنه ذني الجابتهن حجيتك هم حاسبهن بنات ..وحدة..تركص جنها منتوله ...والثانيه من نزعت هدومها..جسمها كله طكع لعبت نفسي حتى المزة والمشروب كلبتهن كولهن بالحمام طلعن من خشمي...
علاوي كال:
لعد نروح يم سوسو طرب ناخذ بت اختها وهاي ام النمري
من كال ام النمري خربت ضحك:
ههههه..ذكرتني بام النمري ..تتذكر من رادت تروح شكالت ::
هههههه ..يجوز صدك شريفه؛؛
اي شريفة لعبت لعب وتالي اخذت من كل واحد ورقة والصبح كعدت يم رجليه بعده الشرب براسها تكولي:
..تدري شكد حبيتك..لا عبالك اني موخوش بنيه تره اني بت عائلة بس مضطرة اشتغل حتى اعيش ابويه لان مشلول..
وانت مقصرت وياها فشلتها هي تحجي وانت تكولها والنعم منج..ومن ابوج الكواد
ههههه...بس صدك ونستنا بليلتها
علاوي كال:
لعد ..خلي نروح يم سوسو ..الليلة..
فكتله:
لا سوسو ولا حجية سميره شهاللعبان النفس والخيسه اريد غير شكل..
علاوي كال:
غير شكل شلون:
هيج اريد فد بنيه غير شكل
فهمت لعد نروح على ام هاجر يمها ايجات يذبحن ذبح!!
واني شنو ما اندلها ام هاجر لك يا ايجات هنه ذني العجاير المشتهن بروسنا وتسميهن ايجات؟؟
لعد شتريد!!
اريد بنيه راقيه ..وادفع شكد متكلف ما اريد لابت ملاهي ولا بت شقق!!
حسين كال:
الراقيات يردن صداقة وعلاقة شهر شهرين وتجيبهن للدرب هاااا وزخ فلوس..وهدايا؟؟
لك اني منيلي وكت اصادق وادز هدايا
..التفتت ع مالك شفته ساكت..كتله:
شو مسمعنا صوتك مالك؟؟
اني ساكت..لان هذا الخريط مابي فايده..
ومنك نستفيد..
يعمر لاتريد ايجه ولاتريد بت ملهى ولا تريد بت شقق اعرف شتريد!!
اي يالفهيمة شريد بله؟؟
طبعا مالك لوتي وامه اصلا صاقطه وخالاته كلهن ساقطات وحتى بنات خالاته اني نايم وياهن يعني ..كواد بس ..دبلوماسي وطبعا احنا منحجي كدامه بس نعرفه..ولان صاحبنه منعيره بالموضوع..شفته طلع موبايلة وانطانيا وكلي:
شرايك بهاي الغزالة!!
اخذت من ايده الجهاز وشفت الصورة بس مو بنيه تشك الحلك شهالجمال شهالعيون انتبهت البنيه ماامكيجة ولابسة تراك عادي وماخذه صورة كدام المراية ..بس بقيت صافن بشكلها يعني فعلا جذابه وحلوة فكتله:
لك منين هاي؟؟
شعليك منين!!
شنو تشوفنياها حتى تحرك كلبي!!
مو غاليه عليك!!!!
يعني شلون غاليه شكد تريد
٦اوراق؟؟
هههه ست اوراق شنو يعني كولنا بست اوراق؟؟
لا النفر الواحد٦ومتطلع ويه مجموعة تطلع ويه واحد لك هاي ..بنيه ممعروفه ..يعني متصادق هوايه ..
ومنين حصلتها!
صديقة ملازم علاء تعرف هو يلتقي مرات يم براق وحجالي عنها واخذت صورها من جهازة..
اي وشنسوي بالصور احنا
اذا تريدها من باجر ارتبلك كعده وياها بس الدفع مقدم ٣ او...وره الكعده ٣
شنو هاي..تاخذ مقدمة؟؟
اي ..موكتلك متطلع هوايه واهلها معروفين وتصادق بس ضباط ثكال!
لا هوايه ٦
بكيفك منو جابرك!!
بقيت لازم الجهاز بيدي..واباوع بملامحها شهالبراءه شهالعيون..شهالابتسامه ..قطرة مكياج ممخليه اي هاي الاريدها اريد بنيه طبيعيه تنسيني كل النسوان المصخمات الي نمت وياهن..التفتت ع مالك كتله:
عندك بعد صور الها؟؟
اي عندي..
شمرتله جهازي وكتلة ارسلهن بلوتوث!!
رسلهن الي وصلنا للتقاطع رادو ينزلون كتله :
مالك ضل انته خلي نسولف
راحو الولد بقيت بس اني ومالك اتفرج ع الصور ..انتبهت الصور بغرفة عادية يعني داخل بيت يمكن غرفتها..والمشكله ممبين عليها موخوش..وبنفس الوقت عجبتني بس كلبي لعب كتلة:
لك مالك ممقتنع بالصور صح البنيه قنبلة بس ممبينه موخوش..يعني لابسه تراكات وهاي الصورة بدشداشه ..وهاي بنفنوف انت متاكد لو هذا ملازم علاء مجذب عليك.
شنو مجذب عليه ..دنطيتي ٣,اوراق..وبأي يوم تريدها اجيبها الك..
وطلعت ٣, اوراق وكتله :
باجر عرس صفوان يعني مراح افرغ ٣,ايام معناها ليلة السبت ع الاحد اريدها بشقه مصطفى وهاك هاي ورقه بعد رتبلي الكعدة..وجيبلي مشويات وما اريد فله اريد ابو القطارة مو تعلس الورقة..نصها
ماشي ادلل..
اخذ الفلوس ونزل وبقت الصور بجهازي حتى من رجعت للبيت قبل ما انام تفرجت عليهن حيل عجبتني وتخيلت نفسي راح اخلص وياها احلى ليلة...
