رواية حضرة الظابط والمراكمه الفصل الاول
_إنزلي وهاتي بطاقتك.
_حضرتك مين، وليه أنزل؟
"كانت دي الجملة اللي قولتها علشان أوضح إعتراضي على الموقف العبثي اللي حصل في الباص اشمعنا أنا يعني وليه البطاقة".
_إنزلي بقا وإنتي هتشوفي أنا مين.
_نزلت أهو هخاف يعني، مين بقا أنت.
_معاكِ النقيب حسام عبد الحق ظاهر.
_الحق وظاهر، يسوادك يا هاجر.
_بتقولي حاجة؟
_أبدًا يا فندم أنا مش بكلمك إنت أصلًا، أنا بقول للي هناك دا.
" شاورت بإيدي على شخص كان واقف جمبه علشان أهرب من الورطة دي ويارتني ما شاورت".
_أنا؟؟
_هو دا يوم الإستغراب العالمي، أيوه إنت هتطلع مين إنت كمان ؟؟
_بت... بت اسكتي، هتروحي في داهيه.
_هروح في داهية ليه يعني؟ لتكون خايف منه.
_منك لله.
_بس يا حسام، معاك العقيد آدم البيلي.
_ليك هيبة والله، تسلمي يا مصر.
_بتقولي حاجة يا آنسه؟
_بقول يا دي الخيبة اللي أنا وقعت فيها.
_طيب ممكن البطاقة علشان تخلصي من الخيبة دي.
_ما هو أصل يعني.
_خير يا فندم؟
_مينفعش الكارنيه بتاع الجامعة وأهو فيه كل حاجة موجودة في البطاقة يعني.
_لأ مينفعش لازم البطاقة.
_إنت مين يعني علشان تشوف البطاقة.
_إنتي اللي مين علشان تكلميني كدا، هات البوكس يا بني.
_بوكس إيه يـٰ آدم استهدي بالله، معاك المراكمة هاجر.
_ال إيه؟
"علامات استفهام كتير ظهرت على وشة، وبصراحة حقه منا مش مصدقة الرتبه اللي وصلت ليها من تالت أسبوع دي"
_المراكمة، اه والله مش مصدق مراكمة كل المحاضرات اللي اخدتها لحد دلوقت.
"ظهرت ابتسامة جانبية منه كدا أول ما قولت مراكمة، ما كلهم رُتب وأنا بصراحة ملقتش رتبه أكتر من مراكمة دي تليق مع وضعي الحالي، لكن اختفت ابتسامته واتكلم وهو وبيشاور على مكان الكمين اللي عاملينه واتحول فجأة".
_دا بجد والله، إيه رأيك أجيب إتنين لمون ونقعد هناك هنا نحكي ونشوف المحاضرات دي؟
_لأ خليهم قهوة وأنا اقولك كل حاجة وأسامي الدكاتره كمان.
_ بجد والله، و إيه آدم دي كمان هنتصاحب؟
_لأ حرام.
_البطاقة بقا، إيه اللي شغلني الشغلانه اللي ما يعلم بيها إلا ربنا دي.
_إنت بتستقوي عليا علشان رتبتك أعلى من رتبتي يعني.
_رتبه إيه ونيلة إيه؟؟ بت إنت ناسية البطاقة؟؟
_بت في عينك... أقصد يعني لأ مش ناسيها بس أنا مليش دعوة لو شوفتها.
_يست ملكيش دعوة بس جيبيها وخلصينا الطريق واقف.
_إتفضل.
"خلاص كل المحاولات اللي عملتها راحت علي الفاضي وهو مصمم يشوفها، أول ما طلعتها فضل يبصلي ويبص في البطاقة وظهر عليه معالم الإستغراب"
_إزاي كدا؟
_منا قولتلك بلاش إنت اللي مصمم.
_اتفضلي يـٰ أنسه، شكرًا عطلناكي.
_بتضحك على إيه؟ مش أنا عملاها في مصلحة حكوميه.
_أسفين يـٰ أنسة وإن شاء الله تغيريها قريب.
_ما خلاص بقا إنت شوفتها وهو شافها.
_ما أنا مش هبقي غريب، وهو هيبقا شاهد إن شاء الله.
" ضحكوا هما الإتنين وأنا طبعًا مش فاهمة كمية العبث اللي بتحصل دي وقولتلهم".
_حاجة تانية ولا أمشي.
_على فين يا سيادة المراكمة؟
_أجيب اتنين لمون وأقعد أقولك المواد؟
_لأ هيبقوا إتنين قهوة بس في بيتكوا بقا.
_وإنت هتيجي ليه أصلًا مش كفاية كدا.
_لأ منا لما أجي هتعرفي.
" معرفش ماله دا بس وات إيفر يعني أخدت نفسي ومشيت من قدامه، بس إيه دا؟ دا تسلم مصر وحلاوة مصر و أروح أشوف الدكتور اللي منزلنا الساعة واحدة الضهر دا هو كمان ".
_ إيه دااا؟؟
