رواية الخاله سكينه الفصل الاول
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
من جوة اوضة بوشي كان بوشي واقف قصاد مرايا التسريحة ومسك ورق فيلمة الجديد هو ما قولتش ان بوشي ممثل علي ما تفرج كنت ناسي وقولت اهو المهم بوشي ماسك الورق وباصص للمرايا ومسك ازازة قطرة وقال
دي القطرة اللي بتخلي اي حد يعيط في المشاهد الدرامية ودي اللي بيستخدمها محمد رمضان وبتخلي يعيط من عين واحدة وبقي نمبر وان علشان كدة لازم احط منها وابقي انا بوشي نمبر وان تو
ورفع بوشي القطرة ناحية عينيه اليمين وقال
الصيدلي قال نقطة واحدة كفاية
وداس علي القطرة ما كنتش بتنزل اي حاجة اضايق وداس بكل قوته وهوب نزلو نقطين بالظبط وفرح بوشي وقال
هو دة الكلام خليني اعيط وابهر اي فنان
لكنه حس بحرقان في عينه شديد وما بقاش عارف يعمل اية والحرقان عمال يزيد ويزيد وعينه اتقفلت مش عايزا تفتح وبقي شبه الاعور بتاع فيلم المشبوه ومسك ازازة القطرة لقاها ازازه امير بتاع اللزق صرخ باعلي صوت عنده وقال
اعمل اية دلوقتي عيني راحت في الشلاحات ما فيش غيره شات جي بي تي هو اللي يلحقني
ومسك موبيله وبالعين اللي فاضله كتب علي شات جي بي تي
اعمل اية لما الامير يخش في عيني
رد عليه شات جي بي تي
وازاي امير كراره دخل في عينك دي حادثة ولا دة تشيبة مجازي منك اشرح لي اكتر خليني اساعدك
كان بيصرخ بوشي وهو بيقول للتطبيق شات جي بي تي
انا جبت سيرة امير كرارة انا بتكلم عن الامير اللي بنلزق بي اي حاجة
شات جي بي تي رد وقال
الامير هو عبارة عن مادة لزجة وثقيلة، قوامها شبه هلامي، بتتمدد عند لمسها وبتلتصق بالأسطح، ولونها ممكن يكون شفاف أو مائل للون معين حسب نوعها
صرخ بوشي باعلي صوت عنده وقال
هو انا في سنتر وباخد درس في الامير انا عايز اعرف اعمل اية لما الامير يخش في عيني
شات جي بي تي رد
واية اللي جاب الامير في عينك انت صغير وبتلعب بي ممكن اعرف سنك علشان اقدر اساعدك
بوشي وهو متعصب
انت اية بقيت مملل وانا هوصل للمعلومة عن طريق حد تاني
وخرج بوشي من التطبيق واتصل ب صاحبه الوحيد زوبع ورد زوبع وقال
صباح الفل يا فنان ياللي جايب لمتابعينك الجنان
بوشي بعصبية
مش وقت نفاق انا زهقان
زوبع
واية اللي مزهق اللي مني قولي وبلاش تحرمني
بوشي
يا هشام يا جح لو ما بطلتش شعر من جذمتي اللي هتنزل علي قفاك انا مش هحرمك
زوبع
في اية يا بوشي مالك
بوشي
دخل في عيني امير
زوبع
وازاي امير كراره دخل في عينك
بوشي
اية دة هو انا بتكلم مع شات جي بي تي ولا في اية
زوبع
مالك بس فهمني دة انا قلقان وقلقي عليك بدا يقتلني
بوشي
هتفضل تتكلم باسلوب الف ليلة دة منك هتقفلني بقول لك اية غور
وقفل بوشي في وش زوبع وفتح اليوتيوب و كتب فيديو اعمل اية لما الامير يخش في عيني اليوتيوب جاب له كل فيديوهات امير كراره رمي الموبيل علي السرير وقال وهو متعصب
الدنيا كلها ضدي بس انا مش هسكت ولازم اتصرف ومافيش غير المية
وجري علي الحمام اللي في الاوضة بتاعته وبدا يغطس وشه في حوض الوش بعد ما اتملي مية دافية ويرفرس برجله من تحت ويبقلل بوشه من فوق وفضل علي كدة ربع ساعة كاملة لغاية ما عينه رجعت تفتح تاني،،،،،،،،،
ومن جنينة الفيلا كانت سكينة اللي عندها خمسين سنه وشعرها احمر ناري بتلعب تنس وحوالين منها رجالتها اللي بسلاح وبتلعب مع سكينة بطله العالم في التنس سيرينا ويليامز اللي كانت مرعوبه واي كورة تنس تلعبها مظبوط تسمع شد الاجزاء فتبص وراها وغصب عنها تخسر وخلص الماتش بفوز سكينة علي بطلة العالم وراحت سكينة تسلم علي سيرينا وقالت بانجليزي مدارس الحكومة
اي وز هيبي بلاي وز يو
سيرينا بصت لها وما كنتش فاهمة هي بتقول اية فقالت سكينة
انتي مش وز زيي ولا اية باين عليكي حمارة في الانجليزي خدوها علي الزريبة
في الوقت دة وقف جنب منها المساعد بتاعها وذراعها اليمين طرقعها وقال
ما ينفعش كدة دي معاها الجنسية الامريكي وممكن نعمل مشكلة مع الامريكان
سكينة
في اية يا طرقعها من امتي سكينه عارف معروف تخاف من شوية امريكان ما تطلعهاش في دماغي اروح امريكا دلوقتي وبدل ما هي ولايات متحدة اخليها ولية واحدة ومطلقة وبعدين ما انا قدامك اهو مديت لها ايدي بالسلام وقولت لها وز وهي عاملت فيها مش من هنا انا مش ناقصة حزن
طرقعها
خلاص اهدي يا ست الكوكب واللي انتي عايزا هيحصل
وبص لرجالته وقال
خدوها علي الزريبة وحطوها جنب جاكي جان
وفعلا خدوها ومشيو وهي طلعت فوطة من شنطتها زي لعيبة التنس بالظبط ومسحت عرقها وقالت
اومال فين ابراهيم فايق ،،،،،،
ويتغير المشهد ونشوف ابراهيم فايق المذيع الرياضي المشهور علي قناة ام بي سي مصر مربوط جوة اوضة وسكينة قعدت قصاد منه وقالت
عارف انا اتصلت ب ابوك كام مرة علشان يجي ياخدك وهو رافض
ابراهيم
انا ابويا ميت والله العظيم ابويا ميت
سكينة
ازاي بس مش انت ابن تركي ال شيخ بتاع السعودية
ابراهيم
يا سكينة هانم ميت مرة اقول لك الاستاذ تركي ال شيخ مش ابويا انا مجرد شغال مع في القناة بتاعته
سكينة بصيت ل طرقعها وقالت
اية يا طرقعها من امتي الكلام بيجي غلط خليته شكلي وحش
طرقعها
لا عاش ولا كان اللي يخلي شكلك وحش يا ست الكوكب كله وما دام جه لغاية عندنا يصور معاكي حلقة جديدة من برنامج فايق ورايق ويعرف الناس انك كسبتي سردينا بتاعت التنس
سكينة
اة والله مش هي بتتنط علينا ب الكام بطوله جراند يا سلام اللي هو واخداهم انا بقي علمت عليها حضرو الاستدويون خلي ابراهيم فايق يصورني وانا رايق ،،،،،،،،،،
ونروح ل برديس بنت سكينة اللي كانت في السجن رايحة زيارة ل حد وظهر وياريته ما ظهر كان في كل العبر رفيع والمخدرات وقعت سنانه وشعره طار وفي شبه من الفار ودة يبقي ابو عزة كان شريك سكينة في اعمالها الاجرامية قبل ما يختلفو مع بعض وتشيله قضية خد فيها سنة لكنها عرفت ان بنتها بتحبه ومش بتحبه وبس دي دايبة في دوب وقعد ابو عزه قصاد برديس وقالت برديس
شده وتزول يا سيد الناس
ابو عزه
ازيك يا برطيس
برديس
ما بلاش تكرهني في اسمي وقوله صح مرة اسمي برديس
ابو عزه
ما انتي عارفه اني الدغ في الدال ما تغيري انتي اسمك
برديس
خلاص قولي يا حب
ابو عزه
ما تخشني يا بت انتي عايزا ابو عزة اشقي شقي في اشقياء اسكنطرية يقول يا حب انتي فاكراني خريج حاسب الي
برديس
هو انا حبيتك الا علشان انت مخربش
ابو عزه ضحك وقال
كلها سنة تعطي بالطول او العرض واطلع لك واتجوزك غصب عن أمك سكينة
برديس
وانا هفضل ادعي لك يا حبيب قلبي
ابو عزه
انتي الاصيله الغاليه اومال انا متعلق بيكي لية يا برطيس
بصت له برديس وهي قرفانه منه ،،،،
وترجع برديس الفيلا اللي عايشة فيها مع امها وتلاقي سكينة قاعدة علي سريرها ومربعه ومستنياها توصل واول ما شافتها برديس قالت
ماما بتعملي اية هنا
سكينة
برضو روحت لي
برديس بعصبية
انتي بترقبيني يا ماما
سكينة
زعلانه اني خايفة عليكي
برديس
من اية مش ابو عزه دة كان راجل من رجالتك
سكينة
وبص لفوق ومد ايدة علشان ياخد حاجة مش من حقة وانا اللي يمد ايدة علي حاجة غصب عنها
اقطعها له
برديس
فكري كدة تأذي ابو عزة وانا هولع في نفسي
سكينة
انا مش هأذي لكنك لو ما اتجوزتيش بوشي هو اللي هيأذي نفسه
برديس
بوشي عمره ما حبني أية هتجوزيني لي بالعافية
سكينة
ومن امتي ماماتك سكينة بتغصب حد علي حاجة فرحك بكرة علي بوشي وبمزاجة مش غصب عنه
برديس
وان قولت لا
سكينة
يبقي بكرة كلنا نقراء الفاتحة علي روح ابو عزه
وقامت سكينة وقفت وقالت
فستان الفرح في الدولاب ابقي قيسي
وخرجت سكينة من الاوضة وهي ناوية ترجع للنصب تاني وبحيلة ما تخطرش علي بال الشيطان جوازه بوشي هتم من برديس وبكرة باذن الله الفرح وكلكم معزومين سلام
