رواية الشيخ عرب والمسحورة الفصل الاول
في شقة عز دخلت غادة بنت جميلة جداً لابسة فستان زفاف بسيط بصت للشقة بخجل دخل عريسها عز ضحك على كسوفها وهو بيقول بسخرية
عز
مالك مكسوفة ليه كدا هي أول مرة يعني؟
زاد خجل غادة بصت الأرض وهي بتفرك في إيدها
غادة
عارفة إنها مش أول مرة وعارفة إني مطلقة قبل كدا بس مش كل شوية تحرجني كدا
عز قرب منها حضن وشها بإيده تأمل جمالها بنظرة مش مريحة
عز
ولو ما كسفتكيش كل شوية هشوف الجمال ده كله إزاي أنا مش عارف اللي طلقك ده كان أهبل ولا إيه
غادة اتوترت جامد بعدت عنه وهي بتقول بقلق
غادة
ولو حصل اللي حصل تاني هتطلقني إنت كمان؟
ضحك عز وهو بيفك في أزرار القميص
عز
أطلقك إيه بس ده أنا لحد دلوقتي مش مصدق إن القمر ده بقى من نصيبي أصلاً
وما سابش لها فرصة ترد حتى شالها ودخل بيها غرفة النوم زي أي عريس وبعد حوالي ربع ساعة في غرفة النوم غادة زي أي عروسة مع عريسها فجأة بعد عز عنها وهو بيبصلها بشك غادة بصت له باستغراب
غادة
مالك حصل إيه؟
عز لبس قميصه وهو بيقول بزهق
عز
مافيش نامي وأنا هنام في الأوضة التانية
جه يطلع من الأوضة قامت غادة بسرعة ومسكت دراعه وهي بتقول
غادة
مافيش إزاي فهمني حصل إيه؟
عز بزهق
مش قادر أقرب منك فيكي حاجة غلط
غادة بصت له بصدمة وحزن
غادة
في حاجة غلط إزاي مش فاهمة
عز
ماعرفش بس أنا دلوقتي فهمت إنتي ليه اطلقتي بعد عشر أيام من جوازتك الأولى أنا فكرت عدم توافق بس عمري ما توقعت إنك عندك إعاقة في طريق رحتي الزوجية
غادة مسكت إيده وهي منهارة في العياط
غادة
بالله عليك ما تقوليش كدا يا عز أنا والله كويسة مافيش فيا عيب سمي كدا وتعالى نحاول تاني أنا كويسة والله
عز صعبت عليه لما شاف دموعها حضنها
عز
طيب خلاص حقك عليا ما تزعليش أنا بحبك والله يا غادة وإنتي عارفة كدا بس بجد والله فيكي حاجة غلط كل ما أقرب منك في حاجة غريبة بتمنعني مش قادر أفهم إيه هي
بعد عنها وبص لها شوية وبعدين قال
عز
بصي أنا مش هظلمك زي اللي قبلي نامي دلوقتي وبكرة إن شاء الله نشوف دكتورة كويسة تكشف عليكي وإن شاء الله كل داء وله دواء ما تقلقيش.
سبها عز وخرج وهو بيندب حظها وهي اترمت على السرير وانفجرت في العياط وشريط جوزتها الأول بيتكرر قدامها فجوزها الأول ما كملتش عشر أيام لنفس السبب كانت فكرة إن جوزها الأول بيعاني ضعف جنسي وجاب الغلط عليها ودلوقتي نفس القصة بتتكرر والسبب مش مفهوم
نامت مكانها وما حستش بنفسها غير الصبح الساعة عشرة قامت بسرعة وهي بتبص حواليها بحزن كان نفسها تصحى تلاقي عريسها في حضنها زيها زي أي عروسة مسحت دموعها وخدت بجامة بسيطة ودخلت الحمام وبعد شوية طلعت وخدت بعضها تشوف عز فين
ـــــــــــــــــــــــــــــــــــــــــــــــــــــ
في الصالة كان عز قاعد بيشرب كوباية شاي مع سجارة وهو بيتكلم في التليفون ومش واخد باله من غادة اللي دخلت
عز بزهق
يا عم بقولك طلعت معيوبه تقولي القمر يحل من على المشنقة وأنا هعمل إيه بجمالها طالما مش عارف أستمتع بيه
سكت شوية وبعدين قال بضيق
عز
مش عارف فيها إيه شكلها كدا عندها عيب خلقي وأنا ما عرفش شكلي اتدبست واتحسبت عليا جوازة وخلاص
غادة حطت إيدها على بوقها وهي بتحاول تكتم صوت عياطها علشان ما يسمعش بس عز حس بيها بص لها بتوتر وهو بيقفل التليفون
عز
غادة إنتي صحيتي إمتى؟
غادة بدموع
إنت إزاي تحكي عني حاجة زي دي؟
عز بلع ريقه بتوتر
عز
ده علاء صاحبي مش حد غريب
غادة بزعيق
صاحبك إنت مش صاحبي أنا وحتى لو كان أخوك إزاي تحكي له حاجة خاصة زي دي ده أنا حتى بقيت مراتك فين الخصوصية اللي هتبني عليها حياتنا الزوجية؟
عز ضحك
خصوصية وحياة زوجية هي فين الحياة الزوجية دي؟ إحنا دخلتنا كانت إمبارح يا غادة وبسبب القرف اللي عندك ده كل واحد نام في أوضة
غادة بصدمة ودموع
قرف؟ أنا دلوقتي بقيت قرف يا عز؟
عز لاحظ اللي قاله قرب منها وحضنها وهو بيقول
عز
خلاص خلاص اهدي مش قصدي والله زلة لسان حقك عليا يا حبيبتي والله ما قصدي عارف إنها حاجة مش بإيدك بس أنا راجل في الآخر سامحيني
رفع إيده يمسحلها دموعها وهو بيقول
عز
بس ولا تزعلي نفسك أنا والله متكلف بعلاجك حتى لو هسفرك بره مصر هعالجك والله ما تقلقيش
غادة اتعصبت من كلامه زقته جامد وهي بتقول بعصبية ودموع
غادة
إنت طلعت حقير زيه يا عز كل اللي يهمك نفسك وراحتك وأنا أتحرق أولع بجاز فين الحب اللي كنت بتقولي عليه هو ده حبك وكل اللي يهمك جسمي مش مهم حاجة غير كدا فين مشاعري فين خاطري وكرامتي من حبك ده؟ الحب عندك إنك تفضح خصوصيتي بالطريقة دي؟
عز بزهق
قولتلك علاء صاحبي مش غريب يا غادة غلط واعتذرت أعملك إيه تاني أتحزم وأرقصلك علشان ترتاحي؟
غادة
لا كتر خيرك والله عملت إنجاز عظيم فضحتني وتقولي أصلي صاحبي إنت أهبل يا عز ولا إيه؟
عز بغضب
غادة اتفضلي على جوا علشان أقسم بالله كلمة كمان وهنسى إنك غادة
غادة بحزن
وإنت مفكر إني ممكن أأمن على نفسي معاك بعد اللي عملته ده؟
عز بعصبية
يبقى خير وبركة إنها جات منك يا غادة كدا كدا إنتي مش نافعة في جواز ولا يحزنون جمال وجسم فاضي
عز سابها وخرج وهو مضايق وغادة انهارت على الأرض للمرة التانية اختيار غلط ونفس القصة برضه بتتعاد.
ـــــــــــــــــــــــــــــــــــــــــــــــــــــــــــــــــــــ
وفات أسبوعين على جواز غادة وعز وكل يوم خناقة لنفس السبب وما بقاش في تفاهم بينهم ودلوقتي الساعة داخلة على 12 بالليل وغادة قاعدة على جمرة من نار مستنية عز يرجع من بره عز دخل رمى المفاتيح على الترابيزة وهي قامت بغضب
غادة
حمد لله على السلامة يا بيه ولا كأنك متجوز وفي بني آدمة مستنية جنابك
عز بزهق
عاوزة إيه يا غادة أنا راجع مش فايقلك
غادة
عاوزة أعرف إيه آخر اللي بيحصل ده
عز بصلها شوية وسكت قبل ما يقول ببرود
عز
اطلقي يا غادة ده أفضل حل أنا متجوزك علشان محتاج أعف نفسي بس إنتي فيكي عيب خلقي ودي حاجة مش بإيدك وأنا مش مجبور أتحملك أكتر من كتر كفاية لحد هنا أنا آسف إنتي طالق يا غادة
غادة وقفت مصدومة ولنفس السبب اطلقت للمرة التانية وما قدرتش ترد بحرف وفجأة وقعت من طولها أغمي عليها عز جري عليها حاول يوفقها
عز
غادة غادة ردي عليا غادة
ـــــــــــــــــــــــــــــــــــــــــــــــ
تاني يوم فاقت غادة لاقت نفسها في المستشفى متعلق في إيدها إبرة المحلول بصت حواليها تدور عن عز بس مش موجود واللي موجود أمها وأختها الصغيرة هاجر بصت لأمها وهي بتعيط بحسرة
غادة
طلقت أطلقت تاني يا ماما أطلقت عروسة للمرة التانية أنا منحوسة أنا فيا عيب أنا فيا عيب
أمها بصتلها بحزن
أمها
لا يا غادة إنتي لا منحوسة ولا فيكي عيب هم اللي اندال مش بيحبوكي هتلاقي اللي يحبك يحبك إنتي يحبك علشان غادة مش جسم غادة ومش هيقدر يقرب منك غير واحد يحبك بجد
غادة
أنا مش عاوزة حب أنا عاوزة أعيش وأستقر في حياتي يا ماما مش كل ما أتجوز أطلق وأنا عروسة بجد حرام اللي بيحصل ده
فضلت تعيط بقهرة وأمها بصت لها بحزن وندم وكأنها السبب في اللي بيحصل لها
