رواية الشيخ عرب والمسحورة الفصل الثاني
وفات أربع شهور على طلاق غادة للمرة التانية نفسيتها اتأثرت جداً خصوصاً لما عرفت إن عز اتجوز ومراته حامل في الشهر الأول بس قررت تحارب وتعيش هي كمان واقنعت نفسها إن الجواز مش كل حاجة في الدنيا اشتغلت على نفسها وقدمت في شركة محترمة كسكرتيرة للمدير والنهاردة أول يوم شغل ليها كانت داخلة مستعجلة ومتوتّرة الكل بصلها بانبهار من جمالها اتوترت أكتر وقربت من موظف الاستقبال
غادة
صباح الخير أنا المدام قصدي الآنسة غادة السكرتيرة الجديدة للأستاذ خالد
الموظف كان بيتأمل جمالها من غير ما يحس ومش داري باللي بيحصل غادة خبطت على المكتب وقالت بزهق
غادة
حضرتك سامعني فين مكتب الأستاذ خالد ده
فجأة الراجل وقف مرة واحدة وهو متوتر غادة بصت له باستغراب وبصت وراها لما سمعت صوت واحد بيقول لاقت شاب أنيق ووسيم جداً كان خالد مدير الشركة
خالد
وإنتي عاوزة مكتب اللي اسمه خالد ده تعملي بيه إيه
غادة بزهق
وإنت مال أهلك يا عم إنت ما تغور تشوف رايح فين مش ناقصك إنت كمان على الصبح
الموظف بصلها بصدمة وبلع ريقه بخوف خالد تأملها بنظرة إعجاب وابتسم
خالد
طيب براحتك على العموم كنت ناوي أساعدك بس يلا خير ما فعلتي
خالد سابها ومشي وهو مبتسم ومش قادر يشيل صورتها من دماغه غادة بصت للموظف بعصبية
غادة
ما تخلص إنت كمان قولي فين مكتب المدير وتبطل بحلقة على الصبح
الراجل شاور لها بخوف ناحية المكان اللي دخل فيه خالد غادة بلعت ريقها بخوف وهي بتمثل العياط
غادة
يعني اللي كان واقف من شوية هو ده المدير خالد؟
الموظف
أيوه يا فالحة هو الأستاذ خالد شكلك كدا هتتطردي قبل ما تشتغلي علشان تلمي لسانك بعد كدا.
ــــــــــــــــــــــــــــــــــــــــــــــــــــــ
في نفس الوقت كانت واقفة أم غادة مترددة قدام باب مسجد كل شوية تروح وتيجي وهي بتفرك في إيدها بقلق واضح
أم غادة
يارب أعمل إيه أدخل له ولا بلاش طيب غادة هتسامحني لو السر ده اتكشف يارب أنا عارفة إني غلط بس إنت عالم كان من خوفي عليها ومنها لله اللي وزتني بقى
في نفس الوقت كان طالع شاب ثلاثيني جميل جداً أبيض عيونه خضر وشعره بني فاتح وليه دقن كان لابس عباية بيضاء على طاقية بيضاء وماسك سبحة لاحظ وقفة أم غادة وقرب منها
الشاب
السلام عليكم ورحمة الله وبركاته خير يا أمي محتاجة أساعدك في حاجة
أم غادة بتردد
وعليكم السلام ورحمة الله وبركاته أيوه يا ابني الله يبارك لك ممكن توصلني لواحد هو شيخ والناس بتقول شيخ عرب هو أنا مش من هنا ومحتاجة في حاجة كدا
الشاب ابتسم
معاكي يا أمي أنا الشيخ عرب خير في إيه
أم غادة تفاجأت
إنت هو الشيخ عرب
الشيخ عرب
أيوه والله العظيم أنا خير في إيه
أم غادة بخجل
اعذرني يا ابني بس ما شاء الله اللي سمعته عنك ما كانش يدل إنك صغير كدا كنت فاكرة راجل كبير شوية
الشيخ عرب بابتسامة
التوفيق من ربنا سبحانه وتعالى مالهوش دعوة بالسن يا أمي
أم غادة بتردد
ونعم بالله صدقت يا ابني والله طيب أنا كنت جاية لك في موضوع كدا بس مش هينفع نتكلم فيه هنا وأتمنى يفضل سر بيني وبينك
شيخ عرب
إن شاء الله يا أمي اتفضلي معايا بيتي قريب من هنا وبإذن الله خير ما تقلقيش
خدها ومشي على بيته وطول الطريق أم غادة خايفة وقلقانة من اللي هتقوله وبتفكر في رد فعل غادة بعد ما تعرف اللي عملته فيها بس يا ترى إيه اللي حصل وأم غادة عملت إيه مخوفها ومخلي مافيش حد عارف يقرب من غادة كدا؟
ـــــــــــــــــــــــــــــــــــــــــــــــــــــــــــــــــ
في مكتب خالد في الشركة اللي شغالة فيها غادة كان خالد مركز في ملف قدامه قطع تركيزه صوت خبط على الباب
خالد
ادخل
دخلت غادة وهي مترددة ومكسوفة منه
غادة
حضرتك طلبتني يا فندم
خالد أول ما شافها ابتسم
خالد
أنا طلبت السكرتيرة مش القمر أبو لسان ظريف
غادة بحنق
ما أنا السكرتيرة الجديدة يا فندم
خالد بدهشة
بتهزري معقولة القمر ده سكرتيرة عندي أنا
غادة بزهق
هو حضرتك طالبني علشان الكلام الفاضي ده؟
خالد انتبه على نفسه اتعدل في قعدته وهو بيمثل إنه مشغول
خالد
أيوه صح إنتي رغاية أوي نسيت كنت محتاج إيه؟
غادة بغيظ
أنا برضه اللي رغاية ولا حضرتك اللي إذاعة 48 ساعة؟
خالد ضحك
طيب خدي بالك إني مديرك هااا علشان البريستيج بتاعي قدام الموظفين بس
غادة نفخت بزهق
طيب حضرتك تأمر بحاجة؟
خالد
آه كنت محتاج فنجان قهوة تعرفي تعمليها؟
غادة
تمام خمس دقايق هتكون عند حضرتك
لفت علشان تطلع سمعت صوته من وراها بيقول بغزل
خالد
طيب بلاش تلمسيها علشان ما بحبهاش سكر زيادة ماشي
غادة بزهق
يا دم أمك يا أخي يا ربي أنا مين داعي عليا في حياتي السودة دي
سابته وخرجت خالد فضل متابعها لحد ما طلعت وقفلت الباب
خالد
يا خريبت حتة موزة موزة إيه دي صاروخ جوي
ـــــــــــــــــــــــــــــــــــــــــــــــــــــــــ
في بيت عرب كانت قاعدة أم غادة بتبكي وهي بتحكي لعرب اللي عملته في بنتها
أم غادة
بنتي دلوقتي 25 سنة اتجوزت مرتين واتطلقت عروسة لنفس السبب وبعد جوزتها التانية حرفياً كانت بتموت وأنا مش عارفة أعمل لها حاجة ودلوقتي ربنا خد بإيدها ورجعت تشد حيلها وتقف على رجليها وأنا خايفة ربنا يبعد لها ابن حلال وتطلق تاني ممكن تموت فيها وحياتها تقف وكون أنا السبب
عرب هز راسه بحزن وتأثر
عرب
طيب ليه كدا بس يا أمي ما جاش على بالك إن الحامي ربنا يعني إنتي مش بس دمرتي بنتك إنتي أشركتي بالله لا قدر الله لما وكلتي الشياطين يحموها
أم غادة بحسرة
والله يا ابني أضحك عليا من واحدة منها الله يصلح حالها وعملت الربطة للبنت من وهي خمستاشر سنة وما كنتش فاهمة ولا عارفة إن كل ده هيحصل ولما واحدة بت حلال دلتني عليك جبت بعضي وأنا عشمانة في الله وفيك خير
عرب
مش عارف والله أقولك إيه بس علاجها دلوقتي مع واحد يحبها حب حقيقي مش طمع في جسمها ولا جمالها وقتها الربطة دي هتتفك لوحدها كل اللي هقدر أعمله إني أرقيها ونهدي اللي عليها شوية وربنا يصلح حالها ويسيبها في حالها
أم غادة
طيب أنا من إيدك دي لإيدك دي قولي أعمل إيه وأنا هعمله
