رواية جريمة العشيق المخدوع الفصل الأول بقلم ياسر عوده
السلام عليكم، عاملين ايه انا مقدم برنامج جرائم حقيقيه اسامه ابراهيم، اتقبلت معاكم قبل كده وياريت تحفظوا اسمي علشان مش كل مره هفكركم، وزي ما انتم عارفين انا بستضيف ضيف عندي في البرنامج بتاعي اللى بيتذاع في الراديو، وكل ضيف بيحكي اغرب الجرائم اللى شافها في حياته، وكالعاده في الحلقه دي انا استضفت ضيف جديد، والمرادي الضيف بتاعي شغال صحفي مشهور بس في جريده عربيه خارج مصر، ولما عرفت انه نازل مصر اجازه انتهزت الفرصه وطلبت منه يجي البرنامج بتاعي علشان يكون ضيف حلقه من الحلقات اللى بقدمها، هو اصله مصري وعلشان كده لهجته مصريه وهتفهموه كويس.
ولما جه وقت الحلقه جه الضيف واللى كان اسمه الاستاذ فادي مدكور.
وبداءنا الحلقه وطبعا انا قولت المقدمه بتعتي:
اعزائي المستمعين، اهلا بيكم في حلقه جديده من برنامجكم الاذاعي جرائم حقيقيه، وكالعاده معانا ضيف جديد علشان يحكلنا حكايه جريمه حقيقيه حصلت وهو شاهد علينا، ضفنا النهارده واحد من المع الاسماء المعروفه في الصحافه العربيه، معاكم ومعانا الاستاذ فادي دكرور.
-اهلا بيك يا استاذ فادي، حضرتك منورنا ومنور مصر كلها.
ابتسم فادي ورد عليا وقال:
-مصر منوره بأهلها يا استاذ اسامه، وطبعا دا شرف ليا اني ابقى مع حضرتك في البرنامج بتاعك.
-الشرف لينا يا فندم، وقبل ما نبداء حلقتنا انا كان عندي سؤال شخصي بعيد عن الحلقه لو حضرتك تسمح.
-طبعا اتفضل.
-من كتر الجرائم اللى بتتنشر في اماكن كتر زي الصحافه المصريه وكمان قنوات اليوتيوب المصريه اللى متخصصه لعرض الجرائم فمعظم المتابعين العرب معتقدين ان نسبه الجرائم في مصر كبيره جدا، بسبب كل قصص الجرائم اللى بتتذاع، رد حضرتك ايه على الموضوع ده بما انك واحد من رواد الصحافه العربيه.
-حضرتك قولت ان القنوات دي مصري وكمان الصحافه مصريه، فاكيد معظم الجرائم اللى هيعرضوها اللى حصلت في مصر، وزي ما انت عارف مصر كبيره وعدد سكنها ضخم، بس مش معني كده ان نسبه الجرائم عاليه، بالعكس ممكن الجرائم اللى بتحصل في الدول الاجنبيه وكمان العربيه اكتر بكتير من مصر، بس علشان التركيز من مقدمين البرامج على الجرائم المحليه هو اللى مخلي الناس تفتكر ان النسبه كبيره في مصر ودا غلط طبعا.
-شكرا يا استاذ فادي، وعلشان مانطولش على الساده المستمعين، ممكن حضرتك تحكلنا عن اغرب الجرائم اللى تابعتها؟
-انا كنت مستني السؤال ده، والحقيقه قبل ما اجي الحلقه كنت محدد الجريمه اللى هتكلم عنها، علشان هي جريمه محيره وكمان صعبه كمان، وقبل ما احكي اتمني من الساده المستمعين يركزوا معايا شويه، الجريمه دي محتاجه تركيز علشان ماتتهوش مني اتفقنا.
-اكيد طبعا يا استاذ فادي، اتفضل احكي انا وكل المستمعين مركزين مع حضرتك.
وهنا بداء فادي يحكي عن الجريمه اللى كان مجهز نفسه ليها وقال:
-الجريمه دي حصلت من فتره طويله شويه، وهي ماحصلتش هنا وعلشان كده ممكن معظم المستمعين ماسمعوش عنها، انا حضرت الجريمه دي بنفسي، كنت وقتها لسه مامسكتش رئاسه قسم الحوادث في الجريده اللى شغال فيها، وبدايه الجريمه لما جالي اتصال من واحد من المصادر السريه اللى مكلفهم بانهم يبلغوني باي حاجه تحصل او جريمه في أي قسم من اقسام الشرطه، والشخص دا اتكلم وقالي:
-ايوه يا استاذ فادي، تعالى لقسم الشرطه بسرعه، في جريمه قتل.
وقتها انا ماكدبتش خبر زي ما بيقولوا، وروحت على طول على قسم الشرطه علشان اتابع الجريمه دي، وهناك ابتديت اعرف التفاصيل من واحد من الضباط الموجودين في القسم اللى اتكلم وقال:
-جالنا بلاغ من منطقه من المناطق السكنيه الراقيه، وكان البلاغ ده ان في مجموعه طلاب مدارس وهما في طريقهم للمدرسه بتاعتهم شافوا عربيه مركونه بجانب الطريق، وانتبه واحد من الطلاب دوول ان في مايه بتنزل من تحت الباب الموجود جنب السواق، وعلشان العربيه ازازها فاميه مافيش حد شايف ايه اللى جواها، الطلاب جالهم فضول يعرفوا ايه المايه دي وقربوا من العربيه، واحد منهم مد ايده يفتح باب العربيه بس لما حاول يفتح الباب لقاه مقفول ماتفتحش، وقتها واحد تاني من الكلاب مد ايده ومسح المايه اللى كانت بتنقط من الباب ووقتها شاف ان اللى على ايده مش مايه زي ما كلهم كانوا مقتنعين، لقوا ان اللى نازل عباره عن دم ووقتها الفزع اتملك منهم، وفضلوا الطلاب دوول يصرخوا انتبه الناس اللى كانوا ماشين في نفس الطريق، ومنهم اشخاص لما شافوا اللى حصل اتصلوا على الشرطه ووقتها احنا روحنا لمكان البلاغ علشان نعرف ايه اللى حصل.
اول لما وصلنا لـ هناك فريق الشرطه انتشر في المنطقه كلها، وابتدينا في التحريات وسماع اقوال الشهود واولهم الطلبه طبعا، وكمان طلبنا فريق المعمل الجنائي وكمان الطب الشرعي لفحص العربيه ومحاوله فتحها، ووصل وقتها وكيل النيابه، واول لما وصل وسمع اللى عرف وكنا لسه مافتحناش العربيه قال:
-انتم ازاي تعملوا كل الاجراءات دي وانتم لسه ماتعرفوش ايه اللى جوه العربيه، ليه مافيش حد فيكم حط احتمال ان مافيش جريمه حصلت جوه العربيه، مش يمكن يكون الدم ده دم حيوان مش دم بني ادم، او ممكن كيس دم كان جوه العربيه واتخرم مثلا او أي حاجه تانيه غير ان في جثه في العربيه، كان لازم تتأكدوا قبل ما تقلبوا الدنيا وتبلغوا المعمل الجنائي والطب الشرعي وكمان النيابه.
لما وكيل النيابه قال الكلام ده كل الحاضرين دخلوا في حاله صدمه، اصل كلامه كان مظبوط، رغم ان احتمال وجود جثه وجريمه كانت كبيره جدا، بس في احتمال ان يبقى في أي سبب تاني، ووقتها موقف القسم هيبقى صعب اوي ومحرج كمان، وعلشان كده كنا لازم نتصرف بسرعه ونفتح العربيه، وبعتنا جبنا متخصصين من المهنين علشان يفتحوا العربيه من غير يدمروا البصمات او أي ادله جنائيه موجوده.
وبعد وصول المتخصصين اللى قرروا انهم يقطعوا جزء من الازاز بقاطع ازاز وقدروا بعدها يفتحوا العربيه، ووقتها لقينا جثه شخص موجود في العربيه فعلا، وقتها احنا حسينا بفرحه رغم وجود أي جريمه دي حاجه ماتفرحش حد خالص، بس احنا فرحنا لان موقفنا قدام النيابه كان هيبقى محرج اوي.
وبسرعه ابتدي المعمل الجنائي والطب الشرعي يشوفوا شغلهم، واحنا كملنا استجواب شهود العيان، وفحصنا كل كاميرات المراقبه القريبه من الطريق اللى كانت عليه العربيه علشان نحاول نوصل لـ أي معلومه ممكن تساعدنا في حل لغز الجريمه اللى حصلت.
للاسف مالقناش أي شخص عنده أي معلومه تفيد التحقيق، غير شخص واحد بس واللى اتكلم وقال:
-انا كنت راجع من شغلي الساعه 2 بعد نص الليل، اصل انا شغال كاشير في واحد من المطاعم الشهيره، ولما كنت راجع شوفت العربيه دي وكانت لسه يادوب بتقف في المكان ده.
سأله وكيل النيابه وقتها وقاله:
-شوف اللى كان في العربيه ان كان شخص او اكتر من شخص؟
-بصراحه لا يا فندم، العربيه كان ازازها مقفول، وزي ما حضرتك شايف الازاز بتاعها مش بيبين الاشخاص اللى جوه العربيه.
وكان ده الشخص الوحيد اللى كان عنده معلومه عن العربيه والجريمه اللى حصلت فيها، وطبعا زي ما سمعت يا استاذ فادي كانت معلومه بسيطه وماتسعدش للوصول للجاني، بس على الاقل قدرنا نحدد الوقت اللى العربيه وقفت فيه في المكان اللى حصلت فيه الجريمه.
بعد فحص المعمل الجنائي للعربيه كلها، اتكلم رئيس الفريق مع وكيل النيابه وقاله:
-احنا مالقناش أي اوراق في العربيه، وحتى المجني عليه نفسه لما فتشناه مالقنا شمعاه حاجه خالص، لا اوراق اثبات شخصيه ولا أي فلوس او حتى أي متعلقات، واضح كده ان الجاني خد كل حاجه معاه ودا ممكن يكون بسبب ان الغرض من الجريمه هو السرقه، ويمكن السبب التاني ان الجاني عاوز يخلينا نفكر ان الغرض من الجريمه هو السرقه، لان الجاني لو عاوز يسرق المجني عليه ليه ماخدش العربيه نفسها، او يمكن الجاني سرق من المجني عليه حاجات اهم من العربيه نفسها، وكل الاحتمالات موجوده.
-وممكن الجاني كل اللى كان عاوزه ميخاناش نعرف مين هو شخصيه المجني عليه مثلا، بس حتى لو بيفكر بالشكل ده اكيد هو عارف اننا هنوصل لشخصيه المجني عليه عن طريق العربيه نفسها، ولا ايه رأيك؟
-دا ممكن بردوا يا فندم لو العربيه مش ملك للمجني عليه، يمكن العربيه متأجره او حتى مسروقه، بس لو هي كده فعلا ليه المجني عليه هو اللى كان في كرسي السواق؟
-على المعموم كل الاسأله دي هيتجاوب عليها لما نكشف عن العربيه ونعرف ان كان المجني عليها صاحبها او لا، قولي ايه المعلومات التانيه اللى وصلتلها؟
-احنا رفعنا جميع البصمات اللى كانت موجوده جوه العربيه، ولقينا بصمه للمجني عليه طبعا، ولقينا كمان بصمه تانيه غريبه واحتمال كبير تكون بصمه الجاني.
-ممتاز دا خبر حلو اوي، يعني بمجرد اننا نمسك الجاني هنقدر نتأكد من انه الجاني فعلا من بصماته.
-مش بس كده يا فندم، واضح من الحاله اللى فيها العربيه ان المجني عليه حاول يقاوم الجاني، ولقينا خلايا وبواقي جلد في ضوافر المجني عليه، وطبعا اكيد دي نتيجه مقومته للجاني، وطبعا دا دليل اقوي للتأكد من الجاني لو الشرطه قدرت تشك في أي شخص، ممكن عن طريق الحمض النووي نوصله على طول.
-طيب بالنسبه لـ سلاح الجريمه، لقيتوه ولا لا؟
-لا يا فندم مالهوش اثر في العربيه، واحنا كمان مشطنا المنطقه اللى فيها العربيه علشان ندور على سلاح الجريمه، بس احنا مالقناش ليه أي اثر، واضح ان الجاني خده وهو بيهرب علشان يتخلص منه.
-تمام، في أي معلومات تانيه وصلتلها؟
-لا يا فندم، احنا دلوقتي بنفرغ الكاميرات اللي موجوده في المنطقه وعلى الطريق يمكن نقدر نوصل لـ أي معلومه.
-شكرا لمجهوداتكم، وهنتظر منك أي معلومه جديده هتوصللها.
