رواية حين يترك الفراق اثرا الفصل الاول 1
نور:
_جدو
هما محدش عايز يشوفني ولا إيه؟!!
قالتها وهي واقفة في نص البيت
كانت أول مرة تشوف جدها من سنين
وده بسبب إنها كنت مسافرة بره مع باباها ورجعت لأنه عنده شغل في مكان تاني
وشاف إنه احسن إنها تكون هِنا.
لكن محدش كان واقف يستقبلها غيره وغير شخص كمان.
محمد:
_لأ يا قلب جدو
هما بس تلاقيهم مش سامعين إني بنده
وبعدين نوح أهو واقف مخصوص عشانك
ده مابينزلش لحد
اتكلم نوح بابتسامة وهو بيمد إيده ناحيتها:
_لأ طبعًا بتقولي كده ليه؟!
أنا واقف مخصوص عشانك
نورتي القاهرة يا نور
اتكلمت نور بحماس:
_أكيد فكراك
انتَ نوح
شكلك اتغير بس أكيد مش هنساك
نوح بمشاكسة:
_طب بما إنك فاكرة
فاكرة بقى لما كنت بشاورلك على حاجة
وانتِ زي الهبلة تبصي عليها
وأنا اضربك على قفاكِ؟؟
_لأ طبعًا مش فاكرة
قالتها وهي بتحط إيديها على قفاها بضيق
حط نوح إيده على بطنه وهو بيضحك بصوت عالي:
_طب وحاطة إيدك على قفاكِ ليه؟
لسه واجعك ولا إيه؟!
نور بإحراج:
_لأ طبعًا
أنا زي الفل
مش فاكرة أصلًا انتَ بتتكلم عن إيه!!
نوح باستفزاز:
_مادام قولتي كده
يبقى فاكرة
محمد بابتسامة:
_انتوا كده افتكرتوا بعض مش محتاج اعرفكم
كمل وهو بيبص على نوح:
_شوف ولاد عمك محدش نزل ليه؟
اقولهم إني عايزهم كلهم تحت دلوقتي
نوح:
_حاضر يا جدو
بصت نور لمحمد وهي بتتكلم بتساؤل:
_هما هيفتكروني عادي ولا اتعامل معاهم ازاي
دول تمن سنين بعيد عنهم
مش عايزة حد يضايق مني
كلها شهر وماشية ومش عايزة اعمل لحضرتك مشاكل
محمد بحنية:
_انتِ بتقولي إيه يا نور!!
كلهم هيحبوكِ متقلقيش
انتِ بس حاولي تتعاملي مع كل حد بطريقته
فاهماني؟
_إزاى يا جدو؟
_يعني مثلًا حور
هتحتاجي وقت عشان تكسبي قلبها تاني وزي ما قولتي الوقت كان كبير وكفيل يغير كل حاجة
هي طيبة جدًا يا نور وانتِ أكيد عارفة
بس هي بقت قافلة على نفسها ولوحدها
لو قدرتي تفهميها وتفهمي طريقتها
الموضوع هيكون سهل
أما بقى مريم
انتِ أكيد عارفاهم كلهم
بس دي بالذات
كانت أكتر صاحبة ليكِ زمان
أكيد فاكرة
كنتوا ديمًا سوا وبتخرجوا سوا
وكنتِ بتداري عليها لما بتعمل مشكلة وكنتِ بتدافعي عنها
المسافة مش بتغير قلوبنا يا نور ولا بتغير إحنا بنشوف بعض إزاي
يمكن الأيام
آه تبعدنا عنهم
لكن الحب بيفضل في قلوبنا
بس لو كان حب حقيقي
وانتِ كنتِ أقرب واحدة ليها
وبسبب سفرك ماتعرفيش حصل إيه
أنا ابني اتوفى هو ومراته في حادثة واحدة من خمس سنين
ومن سنة بالظبط خطيبها مات
قاطعته نور بصدمة ودموعها بتتجمع في عينها:
_إيه!!؟
بابا مقاليش حاجة خالص عن الكلام ده
محمد بحزن:
_للأسف ده اللي حصل
ويمكن باباكِ خبى عنك عشان متزعليش أو تضايقي
لكن هو جه وحضر على فكرة
وبدون تفاصيل
انتِ لو قربتي منها هتحكيلك أكيد
بس المهم كل واحدة منهم عايزة طريقة مختلفة
حاولي تقربي منهم
وأنا متأكد إنك هتقدري ترجعي صحوبية زمان وتعملي صحوبية جديدة
ابتسمت نور وهي بتمسح دموعها:
_متقلقش يا جدو
أنا عارفة أنا هعمل إيه
بس أنا مش قادرة افهم ليه بابا خبى عني
كان المفروض أكون جمبها
هي أكيد فاكرة إني اتخليت عنها
اتكلم محمد وهو بيقوم يقف بابتسامة وبيشاور عليهم وهما جايين ورا نوح:
_أهم جم
قامت نور بحماس ووقفت قدامهم وهي بتتفحصهم بنظراتها
لحد ما وقعت عينها على مريم
ملامحها اتحفرت في دماغها ومفيش يوم قدرت تنساها
يمكن ملامحها اتغيرت لكن دقة قلبها لما عينها وقعت عليها أكدت ليها إنها هي
أصل دقة القلب دي
دقة حنين
اشتياق
إنك لقيت الأمان والدفى بتاع زمان.
بدون مقدمات
قربت منها وشدتها لحضنها جامد وهي بتتكلم بدموع:
_وحشتيني أوي يا مريم
وحشتيني أوي
دموعها كانت نازلة وهي بتحضنها باشتياق
غريبة الدنيا دي
تبعدنا عن بعض وتوديني آخر العالم
لكن ماتقدرش تغير قلوبنا
ولا تقدر تمحي حبهم اللي اتحفر جوانا.
كانت نور بتحضنها وهي بتحس نفس إحساس زمان
حنين
دفا
أمان
وكأنهم لسه كانوا سوا إمبارح مش بقالهم بُعاد تمن سنين
كانت نور هي هي
نفس الإحساس
نفس الحب
نفس المحبة
لكن مريم كانت لأ
كانت واقفة مكانها جوا حضن نور
مرفعتش عيونها ليها
ولا حضنتها بإيديها
كانت ساكتة وملامحها بهتانة
كأن السنين مش بس غيرت الملامح
لأ غيرت كمان قلبها
وبدل ما كانت بتحس معاها بالونس والأمان
راحت المشاعر
وفقدت أي شعور كان ممكن تحس بيه
وبقيت مجرد جماد مش قادرة تدي أي رد فعل
وكأن اللي شيلاه أكبر منها.
بعدت مريم عنها وهي بتحط عينها في الأرض بهدوء:
_نورتي يا نور
بعد إذنك
لفت وشها من غير كلام وطلعت على أوضتها بخطوات هادية وكأن اللي كانت في حضنها دي مش بنت عنها ولا صاحبة عمرها
أما نور
وقفت مكانها بوجع
بتبص على أثرها بقهر
كانت فاكرة إن زي ما هي فاكرة الصداقة دي
مريم كمان هتكون فاكرة
آه محمد قال إنها اتغيرت
بس متوقعتش إن حبها ليها يتغير
كانت متوقعة إن كل حاجة تموت وكل حاجة تتغير
لكن حبها لأ
كانت مستنية منها
ضمة مش أكتر
ضمة تعرفها إنها لسه فاكرة
لسه باقية
لسه حاسة بحنين
وإنها لسه شيفاها نور صاحبة عمرها
لكن كل حاجة اتبخرت
والموقف ده اثبتلها إن مريم اللي كانت قدامها مش هي صاحبة عمرها ولا هي نفس الشخص اللي سابته من تمن سنين
وقتها بس ادركت إن رجوع صحوبتهم صعب
ويمكن يكون مستحيل لو الحب مات.
اتكلم محمد وهو بيطبطب على كتفها بحنية وبيشاور على حور:
_دي بقى حور
أكيد منستيش صح؟
رفعت نور وشها ليها وهي بتداري دموعها واتكلمت بحزن:
_آه يا جدو فكراها
مقدرش انسى ذكرياتهم ولا أحن وقت عيشته في حياته
هِنا سكني
اللي لما مشيت حسيت بعده بالغربة
مش بس عشان البلد
لأ كمان عشان الناس
خلصت كلامها وهي بتقرب وتاخدها في حضنها
وحور بادلتها الحضن بهدوء
كأنه فرض أو واجب
كأن نور هي بس الطرف اللي بيحن
والطرف اللي فاكر
وكأن السنين كانت كافية تغيرهم لدرجة إنهم يكونوا في حضن بعد
بس هي مش حاسة بأي حاجة.
بعدت حور عنها واتحركت بنفس الهدوء على أوضتها من غير كلام
أما نور وقفت تاني في نفس مكانها
ونفس الموقف بيتاعد تاني
بتبص على أثرها بحزن ممزوج بصدمة
مكنتش متخيلة إن البعد يعمل كده
ينسيهم الحب
العشرة
الذكريات
مفيش واحدة منهم شافت في عينها لهفة أو حتى فرحة
كأنهم نسوا مين نور
وكانت إيه بالنسبالهم
ويفضل السؤال
هو فعلًا المسافات بتنسي الحب؟
طبطب محمد على إيديها وهو بيبصلها بتأكيد:
_هياخدوا عليكِ تاني يا حبيبتي
الموضوع بس محتاح شوية وقت
أكيد هما مصدومين
قرب منها نوح ووقف قدامها:
_نور متزعليش منهم
هما بس مصدومين يمكن أو مش فاهمين
فيه حاجات كتير أوي اتغيرت يا نور
مش من يوم وليلة هتقدري تتعاملي معاهم ولا هما هيقدروا يتعاملوا معاكِ عادي
وبعدين أنا معاكِ لحد ما كل حاجة تعدي
متقلقيش هترجعوا أحسن من الأول
اتكلمت نور بشرود وهي بتبص قدامها بحزن:
_شكل حاجات كتير اتغيرت
حتى مكانتي في قلوبهم
نوح بتأكيد:
_لأ يا نور مش كده أبدًا
هما بس محتاجين منك زقة
ومحاولات عشانهم
اللي قدامك دول
مش هما حور ولا مريم اللي كنتِ تعرفيهم
لو عايزة صحابك
يبقى لازم انتِ اللي تدوري عليهم وترجعيهم
هما مش هيرجعوا لوحدهم ولا هيخدوا عليكِ لوحدهم
الموضوع محتاج مجهود وتعب
وأنا هساعدك في كل حاجة
متقلقيش
كل حاجة هترجع زي الأول
نور بحزن:
_تفتكر بعد السنين دي كلها ممكن حاجة ترجع؟
حتى لو أنا رجعت
اعتقد الفجوة اللي بينا عمرها ما هتروح
كملت ودموعها بتتجمع في عيونها:
البعد قسى قلوبهم أوي
وغيرهم
أنا كنت فاكرة حضني كفيل يفكرهم مين أنا
لكن طلعت منسية ومجرد ذكرى وبس
نوح بتأكيد:
_لأ يا نور لأ
انتِ مش فاهمة حاجة
انتِ فاكرة مريم
هي دي اللي سبتيها من تمن سنين
اللي قدامك دي بقايا منها
وبتحارب عشان تكمل
لو بتدوري عليها في نسختها دي
فأحب أقولك إنها ماتت ومن زمان
بس لو عايزة ترجعيها
انتِ الوحيدة اللي تقدري تعملي ده
وده أكتر وقت مريم محتاجكِ فيه
أما حور فهي طول عمرها وحيدة ومن غير حد
وده كان تأثيره إنها تبعد عن الكل
وتكتفي بعزلتها بعيد عننا كلنا
انتِ محتاجة وقت كبير عشان ترجعيهم من تاني
مش تجبريهم ولا تقسى عليهم
لو فهمتيهم وفهمتي وجع كل واحدة منهم
هتقدري ترجعي صحابك من تاني
واظن إنك قدها يا نور
ومحدش غيرك هيقدر يعمل ده غيرك
رفعت نور عيونها لي بأمل:
_تفتكر؟
هز نوح راسه بتأكيد:
_افتكر أوي كمان
ومتعيطيش يا نور
كل حاجة هترجع زي الأول واحسن كمان
اطمني
اتكلمت نور بشرود وهي بتمسح دموعها:
_اتغيرت أوي يا نوح
زمان كنت بس بتكون عايز تضايقني
دلوقتي انتَ اللي بتطبطب عليَّ
نوح بمشاكسة:
_يا ستي لو على المضايقة فعندي منها كتير
متتعوديش انتِ بس على الطبطبة عشان دي حالة استثنائية عشانك
شاورت نور على الشنط وهي بتمشي قدامه بتكبر:
_شيل الشنط وتعالى ورايا يلا
اتكلم نوح بقرف:
_ليه كنت الشيال بتاع أبوكِ أنا يعني ولا إيه!!؟
لفت نور وشها لي باستفزاز:
_عيب كده يا نوح
وبعدين هتشيل ولا ادخل اقول لجدو في مكتبه
نوح بقرف:
_طب مش شايل واقولي لجدو
اتحركت نور اتجاه باب المكتب وهي بتتكلم بابتسامة:
_من عيوني
جري نوح عليها وشدها من بلوزتها بسرعة:
_هو انتِ ماصدقتي خلاص هشيل
اتهدي
شالت نور إيده من عليها ومشيت قدامه بتكبر:
_شيل إيدك يا بابا
وتعالى ورايا يلا
نوح بمشاكسة:
_حاضر يا حبيبة بابا
يلا قدامي
_________________
وقفت نور في نص الأوضة
وهي بتتفرج عليها بانبهار وعينها بتلمع بحنين
_اتمنى تكون عجبتك الأوضة يا نور هانم
لفت وشها لي وعينها بتدمع:
_كل حاجة يا نوح هِنا زي ما هي
كأني واقفة فيها من تمن سنين
دي أكتر حاجة جدو عملها صح
على الأقل يكون فاضل حاجة من ريحة زمان
على الأقل فيه حاجة لسه زي ما هي
لكن إحنا لأ
لأ هما صحابي ولا أنا نور بتاعت زمان
بس ولله حبهم الحاجة الوحيدة اللي عمرها ما اتغيرت في قلبي
لما شوفتهم رجعت كأني البنت الصغيرة
اللي اتربت وكبرت في البيت ده
رجعت تاني افتكرت الذكريات
الحب
القاعدة الحلوة
يمكن اكون اتلهيت بس مانستش
ولله ما نسيت
الدنيا بس خادتني ونستني هما
أنا عارفة إني غلطانة
بس ولله عمري ما نسيتهم ولا نسيت حبهم
بس واضح إنهم عمرهم ما هيرجعوا ليا تاني
حط نوح الشنط جمبه ووقف قدامها بهدوء:
_مش انتِ عايزة ترجعيهم؟!
نور بلهفة:
_أكيد
نوح بابتسامة:
_يبقى هتقدري
نور اللي اعرفها تقدر وهتحاول ومش هتستسلم
وعلى فكرة هما محتاجينك أكتر ما انتِ محتاجاهم
أنا حاولت معاهم كتير
انتِ عارفة إننا بردو كنا صحاب آه مش زيكم
عشان إنتوا كنتوا بنات
بس اللي عايز افهمه ليكِ
إن حتى العلاقة البسيطة اللي كانت بتجمعني بيهم
راحت واتغيرت زي ما هما اتغيروا
وأنا أملي إننا نحاول سوا
بس لازم تكوني عارفة إنك هتتحملي أي رد فعل منهم أو أي كلمة أو رفض تتعرضي لي
مش من أول مرة هيوافقوا
ولا أول مرة هيرجعوا
ولا هتلاقيهم فاتحين حضنهم ليكِ من أول دقيقة
الموضوع محتاج صبر
وهدوء
وكل حاجة هترجع احسن من الأول
نور بحزن:
_اتمنى يا نوح
نوح بمشاكسة:
_بس انتِ طلعتي عيوطة أوي
زمان ماكنتيش كده
كنتِ بتجيبي اللي يزعلك من شعره
وخصوصًا أنا
وحتى لو زعلتي حد
مكنتيش بتصالحيه
كنتِ بتنكشيه
لا عمرك عيطي ولا شوفتك كده
كنتِ أرجل مني
بس شكلك بقيتِ بنت
نور بتذمر:
_إيه بقيتِ دي
أومال كنت إيه يعني؟؟!!
وبعدين إيه أرجل منك دي
هو انتَ راجل وأنا ماعرفش؟
رفع نوح حاجبه بتحذير:
_انتِ قد كلامك ده؟
نور بتحدي:
_آه وحاسب حاجبك بس اللي عامل شبه المزلقان ده
قالت آخر كلامها وهي بتضحك بصوت عالي
رفع نوح حاجبه تاني باستغراب وهو بيتجاهل كلامها:
_إيه ده انتِ بقيتِ بنت بجد؟؟
اتحرك عشان يخرج من الأوضة وهو بيتكلم بلامبالاة:
_لأ ما بمدش إيدي على بنات
بس اشك إنك عندك حاجة تخص البنات غير ضحكتك دي
نور بصوت عالي:
_يا حيوان
نوح بتحذير:
_لو جيتلك يا نور
هتزعلي
فظبطي كده احسنلك
______________
نور بابتسامة:
_ممكن ادخل
اتعدلت مريم بهدوء على السرير بعد ما نور دخلت عليها:
_ما انتِ دخلتي خلاص
قعدت نور قدامها على السرير واخدت نفس عميق قبل ما تبدأ تتكلم وكأن الكلام جواها بس صعب أوي يخرج من كتر ما بيوجعها
اتكلمت ودموعها بتنزل وهي بتبص عليها:
_مريم هو انتِ مش فكراني
مش فاكرة نور
نور اللي ماكنتش بتفارقك
اللي كنتوا سوا
بتناموا وتاكلوا وتشربوا سوا
مش فاكرة أنا مين؟
أنا نور يا مريم
صاحبتك وحبيبتك
مش حاسة إني وحشاكِ
ده أنا مفيش حاجة وحشاني قد حضنك يا صاحبتي
رفعت مريم عينها ليها بهدوء:
_اديكي قولتي كنا
اظن تمن سنين قادرين يغيروا كل حاجة
بصتلها نور بعدم تصديق ودموعها بتنزل أكتر:
_وأنا مش مصدقاكي يا مريم
انتِ مستحيل تنسيني ومستحيل أكون موحشتكيش
مريم بهدوء:
_بس دي الحقيقة يا نور
وبعد إذنك أنا تعبانة ومحتاجة انام
نورتي البيت
قامت نور وقفت وهي بتعيط وبتبصلها بصدمة وكأنها مش مستوعبة مين اللي قدامها دي؟:
_مريم لأ
بلاش تعملي كده
ماتكدبيش
انتِ مستحيل تكوني نسيتي مين أنا!!
انتِ ازاي تنسيني؟!!
أنا صاحبتك وأختك يا نور
اللي كانت بتداري مصايبك
اللي كانت بتدافع عنك لو حد بصلك نظرة معجبتهاش
اللي كانت بير لأسرارك
واللي كانت بتسهر جمبك لما تتعبي
اللي كان قلبها بيتقطع لما تزعلي أو تعيطي
وانتِ اللي وعدتيني في يوم إنك عمرك ما هتنسيني
وعدتيني إني عمري ما هكون ماضي عندك يا مريم
وأنا وعدتك إن عُمر البعد ما هيسيني أحن حياة عيشتها معاكِ
وعدتك إني عمري ما هنسى الدفى اللي كنت بحس بيه في حضنك
أنا وفيت بوعدي يا مريم
بس يا خسارة
شكلك انتِ اللي خلفتي وعدك
خلصت كلامها وهي بتحاول تمسح دموعها اللي بتزيد مش بتقل
ماكنتش مصدقة إن دي مريم
دي صاحبتها
إن دي اللي كانت أقرب واحدة ليها !!
ازاي النهاردة واقفين قدام بعض كأنهم أغراب؟
ازاي الدنيا تعمل فيهم كده بعد ما كانوا أقرب اتنين لبعض؟!!
تخليهم بُعاد مع إن دلوقتي المسافة بينهم قريبة
لكن بينهم كل المسافة.
بصيتلها مريم بهدوء:
_لو سمحتي أنا عايزة انام
قبل ما تسمع ردها
لفت وشها وفردت جسمها على السرير وغمضت عيونها
أما نور وقفت تبصلها وكأنها مش مستوعبة ولا فاهمة حاجة دموعها بتنزل
حطت إيديها على وشها بندم
لكن هيفيد بإيه الندم بعد فوات الآوان.
بصت عليها مرة أخيرة وهي بتتمنى إنها دلوقتي تقوم وتترمي في حضنها
وتقولها وحشتيني
بتتمنى كل حاجة ترجع زي ما كانت
بس لا هي قامت
ولا حاجة هترجع زي ما كانت.
________________
دخل نوح على نور البلكونة
كانت سرحانة ومش واخدة بالها منه
ودموعها بدأت تنزل وهي بتبص على الشارع.
اتكلم نوح وهو بيقرب منها بقلق:
_نور انتِ كويسة؟
نور بشرود:
_تفتكر يا نوح
ممكن حاجة ترجع زي ما كانت ولا انتَ بتقول كده وخلاص؟
نوح بتعب:
_تاني يا نور؟؟!
انتِ ليه بتصعبيها على نفسك؟
ليه بتتعبي نفسك بالشكل ده؟
أنا قولتلك هنحاول
انتِ بقالك كام ساعة هِنا
مش عُمر
بصيتله نور بدموع:
_ما أنا حاولت
ولله حاولت
بس أصلًا مكانتي في قلبها ما بقتش موجودة عشان أحاول
_مش حقيقي يا نور
ولله ما حقيقي
وبعدين انتِ حاولتي ازاي؟
اتكلمت نور وهي بتاخد نفس عميق وبتمسح دموعها
نبرتها كان فيها خذلان ماقدرتش تخبيه:
_كلمتها يا نوح
حاولت افكرها أنا مين
بس كان ردها بارد
بارد لدرجة قهرت قلبي
أنا اتكسرت يا نوح
وهي اللي كسرتني
الإيد اللي ياما طبطبت عليَّ
هي دلوقتي السبب في وجع قلبي
نوح بهدوء:
_اهدي يا نور
واحدة واحدة
كل حاجة هتكون كويسة بس مش بالطريقة دي
غلط يا نور
اللي انتِ عملتيه غلط
مش بعد تمن سنين
تكوني فاكرة إنك لما ترجعي هتكون كل حاجة زي ما هي
انتِ اختارتِ تمشي زمان
وهي حقها دلوقتي تزعل
دول تمن سنين يا نور مش يوم ولا اتنين
عارفة يعني إيه تمن سنين؟
يعني عُمر بحاله
أنا مقدر إنك نفسك علاقتكم ترجع زي الأول
بس ده محتاج وقت
محتاج انتِ تديها وقتها
وتحاولي معاها
ومتزعليش من أي رد فعل تعمله
وده اللي قولته ليكِ
إنك لو عايزة تصلحي
لازم تحاولي
رجعت نور بصت قدامها تاني بوجع:
_أنا مشيت يا نوح بس ولله سيبت قلبي هِنا
الدنيا أوقات بتجبرنا
لكن المهم إنك تكون شايفني صح
ما تكونش شايفني وحشة وقاسية
هو أنا وحشة يا نوح؟
نوح بابتسامة:
_لأ طبعًا يا نور مش وحشة
كمل بهدوء:
_بس اللي عايز اعرفه
مشيتي ليه يا نور؟
ومعنى كلامك ده إيه
قصدك يعني عشان شغل باباكِ وإنه مش بمزاجك؟؟!!
مسحت نور دموعها وهي بتتحرك عشان تدخل جوا:
_أنا هدخل ارتاح
________________
_لأ واضح إني مرغوب فيا أوي هِنا
سفرة بالحجم ده
مفيش عليها غيرك يا جدو
ونوح وأنا
قالتها نور بهزار عشان متعملش مشاكل بسببها
لكن الحقيقة إنه مش هزار
عيونها بتدمع وهي بتبص على كل كرسي فيهم
كل كرسي من دول شايل حكاية
شاهد على ذكرى
على كلمة
على وجع
فرحة
عياط
سعادة
لكن كل حاجة دلوقتي بقت باهتة
هادية وساكتة
زي صحابها بالظبط.
اتكلم محمد وهو بيبصلها بحنية:
_كلهم هينزلوا دلوقتي
هما بس مش عارفين إن الأكل اتحط
شاور على الست اللي جت تحط آخر طبق في إيديها على السفرة:
_دي بقى يا ستي زينب
أكلها مش هتدوقي زيه في حياتك كلها
جت من بعد ما مشيتِ
رفعت نور عيونها وبصت عليها
كان واضح إنها ست غالبًا في أوائل الخمسينات
لابسة عباية وطرحة
باين على وشها الهدوء والطيبة.
قامت نور من مكانها ومدت إيديها ليها بابتسامة:
_أنا نور
زينب بحب:
_حمدلله على السلامة يا بنتي
عارفاكِ من قبل ما تيجي
الحاج محمد ملهوش سيرة غيرك
ربنا يخليكِ لي يا حبيبتي
كملت وهي بتبص لمحمد:
_مريم زي كل يوم يا حاج مش هتنزل تاكل
أما حور قالت هتنزل
ويوسف رنيت عليه بس مردش عليَّ
_السلام عليكم
قالها يوسف وهو داخل من باب البيت
وأول حاجة عينه اتقابلت معاها كانت عين نور
اللي بمجرد ما سمعت صوته
رفعت عيونها لي
عشان تتقابل مع عيونه بعد تمن سنين غياب
في لحظة محدش منهم حَسب حسابها ولا تخيل إنها ممكن تحصل تاني.
